المربحية بالفندقوش

[بنوته مسلمه مصريه 458]

كتبه/ أم البنين (حنان لاشين)

المربحية بالفندقوش O_o

أنا: أنا اشتريت المربحية بالفندقوش

انتم: إيه المرحرحية بالبردقوش دي يا أم البنين O_o

أنا:حاجه كده جميييييلة

قوي جدا خالص خالص

شكلها ملفلح

وطعمها زي السراريش

وريحتها تحفه زي المهابيخ

وعليها من فوق دحاليج

وحلوة مع الشاي بلبن ^-^

انتم:الله !

أكيد حلوة...شكلك فرحان

يا ترى بالشوكولاته دي واللا الكريمة انت أكلتي كام حته

يا أم البنين...طب عاوزين نآكل

وندوق وكده

أنا:في ناس كتشيييير أكلتها ^-^

ربنا يرزقكم بقى ويحنن عليكم

يا عيني يا مساكين يا محرومين.

انتم: يا ترى شكلها إيه

وإيه السراريش دي

ومين الدحاليج دول.

وروحوا وناموا واحلموا وافتحوا التليفزيون

واتفرجوا على الإعلانات والأغاني والأفلام واسمعوا كام بيت شعر في وصفها وقصة قصيرة ورواية عن شعورك وانت بتاكلها وبتقرقش الدحاليج .

في جزء منكم حا يتخيلها حلويات

والتاني حوادق

والتالت حا يشوفها فطيرة

والرابع برايم برايم وارمي يا شلبية في الفرن .

وارفع سقف التوقعات لفوووق لحد ما رجليك تطير في الهوا

واحلم أحلام وردية وخيالية

وإحلم معاية ببكرة جاي ولو ما جاش إحنا نجيبه بنفسنا

قوم إيه بقى لما تيجي تآكلها -ورغم إنها حلوة جدا وبما لا يخالف شرع الله- تقول إيه ده

انا كنت فاكرها أحلى من كده

ويجيلك إحباط

وممكن تدعي على أم البنين

أهو ده اللي بيحصل مع

(الحب والجواز)

إتهرينا في الأفلام والمسلسلات وأغاني أم كلثوم وعبد الحليم كلام في الحب وسيرة الحب وسنين الحب وعذاب الحب

وكل بنت قاعدة مستنية العريس الوسيم الشاطر (حسنين)

ييجي بسلامته راكب حصان أبيض

ويخطفها من أبوها وتعيش في قصر كبير وتلبس فستان واسع وتغيظ الملكة.

أو يكتب فيها شعرويتشعبط على المواسير

ويطلع لها من البلكونة ويقع فتنكسر رقبته ويتجوزوا في المستشفى.

والشاب من دول فاكر إنه حا يتجوز سندريلا

وحا يرجع الضهر يلاقي الأقزام السبعة خلصوا شغل البيت(وغسلوا المواعين) وهي الأميرة النائمة وحا يصحيها بقبلة رقيقة

وحا تقوم من النوم متسشورة وحاطة روج ولابسة جزمة .

وسقف التوقعات بيرتفع لفوق أكتر لما بتتكتب قصص الحب وكلام الحب مع صورة اتنين شكلهم حلو

وهي لابسه ومتأنتكه وهو حاطط جل في شعره و شايلها

أو ماسك مناخيرها مسكة سينيمائية وهي حاضناه وماسكة ودانه .

وبيبص لها بحنان وبتبص له بدلال(مع الاعتذار ل دلال.)

وروحوا وناموا واحلموا وافتحوا التليفزيون واتفرجوا على الإعلانات والأغاني والأفلام واسمعوا كام بيت شعر في وصف الحب وقصة قصيرة ورواية عن شعورك وانت بتحب.

وتعالى اتجوز

وتعالي إتجوزي

الإنسان اللي إخترتيه وفرحانه بيه وطبعا اللي لسه عايش في الأحلام ومتوقع شيء خيالي وساب نفسه للمؤثرات المرئية وكلام الناس

والرغي والفتي الكتير ونسي الواقع حا يكون شعورة كده زي اللي أكل المربحية بالفندقوش ولقاها مش حلوة وزي ما كان فاكر...

رغم إنها حلوة وزي العسل.

افهموها صح

الحب بين الزوجين ليس لها قالب واحد ولا نموذج متفرد كل زوجين لهما حالة خاصة من الإندماج والتفاهم والحب تختلف عن الآخرين

والسعادة مذاقها مختلف من شخصية لأخرى فلا تطبق تجارب الآخرين على نفسك.

الحب مش محتاج أميرة وأمير و ملكة جمال وفارس الفرسان.

الحب يعني تحبها بعد الجواز حتى وهي حامل ووشها مورم وخدودها منفخة.

يعني لو بقى أصلع وبكرش يفضل فارس أحلامك.

يعني مش محتاج يكتب شعر كفاية كفه اللي بتطبطب على ظهرك ما هي دي ترجمة كلمة بحبك.

يعني هي جميلة لأنك بتحبها حتى لو هي مش جميلة.

يعني كل لحظة تمر عليكم مع بعض بتعيشوا جوا بعض .

يعني انت مسجون في روحها حبس إنفرادي.

يعني أي بنت حلوة مش حا تلفت نظرك لأن قلبك شبعان بحبك لزوجتك.

 

بأقول لكم إيه

هي إيه المربحية بالفندقوش دي يا بنات حدش يجيب لي مقاديرها

[«..ارْتِـــقَّـےـاءْ..» 639]

السلام عليكم ’’’’

أو ماسك مناخيرها مسكة سينيمائية وهي حاضناه وماسكة ودانه .

هههههههههههه

أضحك الله سنكِ بنوتة حبيبتي ()

موضوع توحفة مقدرتش أمسك نفسي من الضحك

أسأل الله ان يصلح بيوت المسلمين

جزاكِ الله خيراً ونفع بكِ ()

[برحمتكـ استغيث 297]

هههههههههههههههههههه

انا قلت دي اكيد وصفة مغربية هههههههههههه

يا الهي

موضوع رائع فعلا

ومنتشر جدااااااااااا

تسلم ايدك

[همسات في صمت 101]

هههههههههههههههههههههه

اضحك الله سنك اختي الحبيبه

أسعدك الله في الدارين

[بنوته مسلمه مصريه 458]

@

@@برحمتكـ استغيث

@@همسات في صمت

^ـــــــ^

جزاكن الله خيرا يا بنات

عطرتم موضوعى بردودكن

انا ايضا عجبنى الموضوع ماشاء الله أم البنين كاتبة الموضوع تتناول هذه المواضيع بخفة ظل وبطريقة لطيفة

جزاها الله خيرا ونفع بها