اذهبي الى المحتوى
~ أم العبادلة ~

عزومة بناتي

المشاركات التي تم ترشيحها

بسم الله الرحمن الرحيم

 

السلام عليكم ورحمة الله وبركاته،،،

 

عندي عزومة بعد كام يوم ان شاء الرحمن ومحتاجة مساعدتكم اطبخ ايه وما حدش يقولي اعملي محشي لاني هقعد فيه سنة ومش هعرف اخلص من ابني (6 شهور) ولا فراخ علشان انفلونزا الطيور.

 

الضيوف هما اتنين اصحابي نازلين زيارة مصر. واحدة فيهم ما شفتهاش من 3 سنين او اكتر والتانية من حوالي سنتين

 

هيكونوا معايا من الصبح بدري يعني هطبخ وهما هنا بس هحاول اعمل كيكة من قبلها بيوم ان شاءالله

 

فعايزة حاجة سهلة وسريعة تتعمل وهما عندي وتكون مغذية مع العلم انهم من جنسية ليست عربية

 

عايزة كمان اكلة خفيفة تنفع لابن واحدة فيهم عمره سنة ونصف

 

ويا ترى في حاجة حلوة ممكن اعملها او مشروبات؟

 

يا ريت تردوا عليا ضروري وبسرعة علشان الحق اشتري الحاجة ولو هتقولولي وصفة جديدة يبقى اجرب اعملها قبل ما يزوروني علشان اول مرة هيكلوا من طبيخي ومش عايزة اعك الدنيا

 

والسلام عليكم ورحمة الله وبركاته

شارك هذه المشاركه


رابط المشاركه
شارك

السلام عليكم يا حبيبتي،

متزعليش أكيد لسة ماحدش صحي من النوم

بصي يا ستي عندي كام صنف حلوين وسهلين،

 

ممكن تعملي لحمة بالمشروم،

هي بتبقى لحمة البفتيك الرقيقة خالص وتنقعيها من قبلها بيوم في عصير بصل وملح وفلفل وتشحوي المشروم في زبدة بسيطة مع ثوم وزعتر لحد لما يستوي وبعدين تاخدي اللحمة وتحشياها بالمشروم وتلفيها وتثبتيها بخلة وبعدين تحطيها في طاسة تيفال على نار هادئة خالص لحد لما تستوي من غير سمنة ولا حاجة وبعد ما تستوي تحدي سمنة قليلة وتشوحيها فيها لحد لما لونها يحمر، وعلى فكرة أنا ساعات باستبدل المشروم بالخضار السوتيه وبتبقى حلوة برضة بس بمتخليهوش يتسلق أوي وبعدين تشوحيه برضه في الزبدة مع الزعتر

كمان ممكن تعملي جنبه أرز بالخلطة أو بالكاري

وممكن تعملي جنبهم بسلة باللحمة المفرومة يعني تجيبي بصل ولحمة مفرومة زي ماتكوني هتعملي عصاج وبعد ما تحطيهم على النار تحطي معاهم كسبرة خضراء وكاري وقرفة وتحطي البسلة عليهم وتسيبيهم يستووا مع بعض (أظن دي سهلة جدا)

وممكن تعملي جمبهم كمان كفتة حاتي عادية لأنها كمان بتبقى طرية للأطفال، وبرضه تبقي عاملاها من قبل كدة وتحطيها في الفريزر وتسويها يوميها بس

وممكن تعملي بطاطس وكوسة محشية باللحمة المفرومة وطبعا إنت ممكن تشتريهم أصلا متوضبين وتكوني مجهزة العصاج من قبلها وتحشيهم يوميها فقط وممكن تعمليلهم بشاميل فوق الوش أو ممكن صلصة حمراء بدل الباشاميل

وممكن جنبهم تعملي سمبوسة محشوة بالجبنة البيضا أو الجبنة الرومي ودي ممكن كوني مجهزاها ولفاها من قبل كدة في الفريزر وتحمريها على طول

بالنسبة للحلو ممكن تعملي بسبوسة علشان سهلة (كيس البسبوسة الجاهز عليه معلقة كبيرة سمنة وكوب زبادي) أو فيه حلويات كتيرة هنا في المنتدي سهلة (شوفي حلويات القهوة بتاعة صانعة الأجيال وبالذات عماير الضباط سهلة جدًا)

وبالنسبة للمشروبات ممكن تعملي خروب أو تمر هندي أو كركديه، والأجانب بالذات بيحبوها أوي

 

ربنا معاكي ويارب العزومة تبقى جميلة

شارك هذه المشاركه


رابط المشاركه
شارك

بسم الله تبارك الله

 

يا ربي انا هعمل دول كلهم؟ هو انا المفروض اعمل كام صنف؟

 

اصل بصراحة دي اول مرة يكون عندي عزومة رسمي يعني قبل كده لما كان بيجيلنا حد كان بيبقى مننا وعلينا وكان بياكل من اكلنا بس طبعا لازم يكون في لحمة او فراخ

 

انا عمالة افكر فيها وامبارح جتلي فكرة اني اعمل كبسة سعودي واعمل معاها بطاطس محمرة وسلطة وكيكة وجيلي

 

بس من كلامك شكله مش كفاية ولازم اشوف حاجة تانية : (

 

حلويات صانعة طالعة من عيني وباذن الله لو عرفت اروح جوه البلد هحاول اشتري حاجتها واعملها

شارك هذه المشاركه


رابط المشاركه
شارك

بصي ياستي انا هجبلك من الآخر

 

طبعا انتي عيزة حاجة تتعمل بسرعة، وفنفس الوقت تكون حاجة مصري عشان هم مش مصريين، ووفنفس الوقت عيزة تشرفي نفسك ادامهم .. يعني حاجة كشخة وطعمها حلو..

طيب مادام قلتي لأ للمحاشي خلاص.. مش مهم.. ولا طيور كمان.

 

نبدأ بسم الله

 

الحلويات اعمليها من أبلها بيوم. هقولك على حلا حلو اوي وسهل جدا

 

كريم كراميل تشيز كيك

 

المقادير:

عبوة كريم كراميل

بسكوت شاي (ماري أو أي نوع)

زبد

2 علبة كريمة سائلة

2 كوب جبنة كيري او اي نوع جبن بالقشطة.

ملعقة نشا

حليب (المقدار المكتوب على علبة كريم الكراميل)

 

هاتي صينية حطي فيها ورق الومنيوم وافرديه في الصينية كلها حتى الجوانب وسيبيه نازل لحد آخر الصينية من برة.. يعني افرشي بيه الصينية كلها

 

اطحني بسكوت الشاي وصبي عليه زبدة سايحة واضغطي بإيدك اوي لحد ما يبأة كله سوا واحد.

هاتي الكريمة والجبنة اخلطيهم مع بعض مع حبة سكر وصبيهم على الخليط وبعدين حطي الصينية في الفرن تقريبا 10 دقايق.

طلعيها من الفرن وحطيها تبرد شوية وبعدين حطيها في التلاجة لحد ما تبرد خالص

لحد ما تبرد حطي الكريم كراميل على النار مع الحليب وملعقة النشا واعمليه بالطريقة المكتوبة عندك على العبوة

بعدين سيبيه لحد ما يبرد خالص وصبيه على الخليط الي في التلاجة

هاتي كيس الكراميل الي بيكون مع علبة الكريم كراميل وصبيه بشكل عشوائي على وجه الكيكة..

وحطيها في التلاجة.

لما تقدميها شيليها من الصينية الي فيها عن طريق رفع حواف ورق الألمنيوم من الصينية بحذر وبعدين حطيها في طبق تقديم كبير وقطعي منها وقدميها وبالهنا والشفا

 

الحلا دة شيك اوي وفنفس الوقت معروف ولذيذ جدا.

 

 

بالنسبة للعصائر، اعملي عصير الليمون بالنعناع المثلج

راااائع وبردو مشهور اوي وشيك جدا

 

بصي من ابلها بيوم هاتي ورق نعناع طازج وحطيه في مكعبات التلج وامليها مية وسيبيها في الفريزر تتلج

تعالي تاني يوم اعملي ليمون خلاط عادي وحطي فيه مكعبات التلج المثلجة بالنعناع وقدميها في كاسات.. هتعجبهم اوي ان شاء الله

 

بصي ياحبيبتي

دايما لما تيجي تعملي عزومة حاولي تقسمي الأكل (شوربات - سلطات - مقبلات - اكل رئيسي - حلويات - مشروبات) وهكذا عشان تبأة حاجة كدة شيك ويعرفو انك منظمة.

 

اولا: المقبلات: كفاية اوي تعملي نوع واحد، اعملي مثلا فطاير بيتزا صغيرة واكيد الطفل الصغير هيفرح بيها اوي خاصة لما تعمليها علا شكل وجه ضاحك مثلا.

 

طريقة العجينة هجبهالك مع الطريقة اوك. تقدري تعملي العجينة من ابل ما ييجو وتسيبيها تخمر وكمان تجهزي الحاجات الي بتتحط عالوش وعلا فكرة هي سهلة اوي ومش محتاجة

 

السلطات: اعملي سلطة زبادي بالخيار، المقادير: كوب زبادي، نصف كوب مايونيز، فص توم مهروس مع كمون، ملعقة عصير ليمون ، خيارة مبشورة، رشة نعناع، قلبي كله مع بعض ودوقيه شوفي الحياء بتاعه ، ولما تقدميه زينيه بأوراق النعناع الطازج وتقدري تقدمي معاها الخبز الأبيض المحمص .. روووعة

 

اعملي سلطة خضرا عادية

الشوربة:

اعملي شوربة عدس.. اه شوربة عدس هي اكلة شعبية مصري والأجانب والعرب بيشربوها كشوربة ابل الأكل

اعملي الشوربة عادي وقدمي جنبها سرفيس كبير فيه مكعبات زبد صغيرة مع مكعبات تلج عشان مش تسيح، وكمان شرايح لمون

وحطي جنبها كمان سرفيس حطي فيه عيش ابيض محمص بالزيت ومقطع قطع صغيرة.. سدئيني هيبأة طعمها روعة وهيفرحو بيها اوي، ولو معندكيش وقت تقدري تعمليها عادي من ابلها بيوم.

 

او عشان الطفل الي معاهم تقدري تعملي شوربة الحروف، شوربة لسان عصفور عادي بس بدال لسان العصفور بتبأة شكل الحروف.. هتلائيها في السوبر ماركت في اي مكان.

 

الأكل الرئيسي اعملي رز بالتفاح.. ايه رأيك بأة في الفكرة دي.. علافكرة جايز انتي لما تسمعي مجرد السمع عن الصنف دة هتأرفي بس والله والله انا جوزي مش بيحب التأليف مجرد ما داقه عجبه جدا وقالي اعمليه تاني علاطول،

طريقته:

قطعي بصل جوانح، وفلفل رومي جوانح وابشري جزر .. واهرسي توم مع حبة زنجبيل وكسبرة ناشفة..

 

شوحي البصلة على نار هادية مع حبة سمن، وبعدين حطي الفلفل الرومي والجزر وقلبي شوية بعدين حطي التوم وقلبي

 

حطي بهارات وفلفل اسود ورشة قرفة والتوابل الي انتي عيزاها

بعدين حطي معيار المية بتاع الرز عادي وغطي الحلة وسيبيه لحد ما يغلي

اول ما يغلي تحطي الرز ويكون بسمتي.. وسوي الرز عادي بالطريقة العادية.. بس ابل ما يستوي اوي

هاتي تفاحة قطعيها مكعبات وحطي شوية سكر في تيفال على نار هادية لحد ما يتحرقو ويصيرو كراميل حطي عليهم التفاح وقلبي وبسرعة شيليه واحفري حفرة صغيرة في نص الرز وحطي فيها التفاح.. وغطيه تاني بالرز وسيبي بأة الرز يستوي.

لما يستوي قدميه في سرفيس كبير وزينيه بشرائح التفاح المقطعة جوانح.

 

قدمي معاها لحمة روستو (عرق) في سرفيس تاني.

 

وممكن تعملي كمان صنف مسقعة بالبشاميل مثلا وكفاية كدة اوي.

 

يبأة كدة انتي هتعملي:

 

قائمة الطعام:

 

1- عصير ليمون بمكعبات النعناع. (اعمليه من ابلها بيوم وحطيه في الفريزر ولما تيجي تقدميه حطي المكعبات على العصير)

2- سلاطة الزبادي بالخيار مع الخبز المحمص + سلاطة خضرا (اعملي سلاطة الزبادي من ابلها بيوم هي والخبز المحمص)

3- شوربة الحروف أو شوربة عدس مع العيش المحمص والليمون والزبد. (اعملي من ابلها بيوم وتبأة جاهزة عالتسخين)

4- رز بالتفاح مع لحم رستو. (اعمليها في نفس اليوم)

5- مسقعة بالبشاميل (اعمليها في نفس اليوم)

6- تشيز كيك كريم كراميل (اعملي من ابلها بيوم)

 

 

اقري كدة القايمة وقوليلي رأيك، وعلافكرة انا مجربة كل الحاجات دي وبجد تحففففففففة

شارك هذه المشاركه


رابط المشاركه
شارك

على فكرة هما حاليا بالقاهرة عند ناس قرايبهم وهروهم محشي واللذي منه من الاكل مصر وخصوصا المحشي ... تقريبا كل بيت دخلوه هناك اكلوا في محشي اصل معرفهم كتير.

 

وبعدين هما هيكونوا عندي من الساعة 9 صباحا او ممكن بدري علشان يلحقوا يقعدوا معايا وما يروحوش متأخر (انا ساكنة في طنطا وهما ساكنين في اخر القاهرة يعني من بيتهم لمحطة القاهرة تقريبا ساعة او اكتر ده غير المسافة من القاهرة لطنطا) وانا اللي هروح اجيبهم من محطة القطار.

 

سبب من الاسباب التانية اني عايزة حاجة سهلة هي اني ما عنديش حد من اهلي او اصحابي هنا وما ليش اختلاط بالجيران يعني هعمل ده كله لواحدي غير ان ابني صغير وبيعيط كتير لو سبته ودخلت المطبخ او عملت حاجة لمدة طويلة الا اذا كان مزاجه رايق.

 

وانا عايزة اعرف اقعد معاهم علشان الله اعلم اذا كانوا هينزلوا مصر تاني واشوفهم ولا لأ

 

انا عجبني التقسيمه قوي (شوربات - سلطات - مقبلات - اكل رئيسي - حلويات - مشروبات) وان شاءالله هحاول احطها في اعتباري

 

انا كنت بفكر في التشيز كيك برده وطلعت في دماغي طريقة ورق الالومنيوم وانتي اكدتيها بس لسه مش عارفه هقدر اروح جوة البلد ولا لأ .... معلش انا معقدة الدنيا

 

روشة حركة العصير بس انا مستنية اشوف الجو يومها سقعة زي النهاردة ولا حر (لو حر يبقى هعمل العصير واجهزه قبلها بيوم اما لو سقعه فممكن اعمل كركديه صح؟)

 

سلطة الزبادي بالخيار فكرتني بسلطة الزبادي بالجزر وهما بيحبوها كتير فان شاءالله اعملها (بتجيبي كمية كبيرة من الجزر وتقشريه وبعدين تبشريه وتحطي الجزر المبشور في حلة وعليهم شوية زيت وتفضلي تقلبي فيها لغاية ما تذبل وتشرب المياه بتاعتها وبعدين تيجيبي طبق وتحطي فيه الجزر ولما تبرد تحطي عليها الزبادي وتقلبيها وسيبيها في التلاجة كام ساعة او يوم علشان كل ما تسيبيها اكتر كل ما طعمها بيكون احلي وبتصفر من الجزر) جميلة جدا ومسكرة

... لا استني مش هقدر اعملها :( افتكرت دلوقتي ان ابني عنده ارتجاع ولو عملت حاجة فيها زبادة وانا اكلتها او هو اكلها بيفضل يرجع طول الوقت وبيتعب :(

 

شوربة الحروف حلوة وممكن اعملها في يومها

 

لو في وقت لفطاير البيتزا ولبني كان هادي هعملها ولو مافيش يبقى هكنسلها علشان العجن والتقطيع والفرد هياخد وقت

 

أرز بالخلطة سهلة كمان بس مش عارفة تنفع مع التقسيمة ولا لأ ؟؟ وفي الكبسة (ارز بسمتي بتسبيكة الطماطم واللحمة الضاني والزبيب)

 

البسلة باللحمة المفرومة انا وهما بنحبها بس احنا بنعملها بطريقة تانية (تعصجي لحمة مفرومة مع بصل متخرط ومتحمر ولما يستوي البصل تضيفي عليه البسلة ولما تستوي البسلة بتكوني مجهزة كمية كبيرة من البصل الاخضر والفلفل الاحمر والاخضر ومخرطاهم حلقات رفيعة وتضيفيهم بعد ما البسلة تستوي وتقلبي فيها كل شوية وتسيسبيها لغاية ما تشرب المياه اللي نزلت منها ) طبعا الفلفل والتوابل بتحطيع مع اللحمة اما الملح بتحطيه بعد ما البصل والفلفل ينزل الميه بتاعته ودي طعمها تحفة بشهادة الجميع. بس مش عارفه هلاقي بصل اخضر وفلفل مش حراق في السوق ولا لأ.

 

انا عارفة اني مصعباها بس السوق اللي جنب بيتي صعب وحاجته قليلة ومش حلوة ولو روحت السوق اللي بعيد مش هقدر اشتري حاجات كتير علشان هبقى شايله ابني على دراعي.

 

على العموم زودوني بالافكار على قد ما تقدروا وباذن الله هحاول اتصرف واشوف ايه اللي موجود في السوق واقدر اجيبه

شارك هذه المشاركه


رابط المشاركه
شارك

السلام عليكم ورحمة الله وبركاته،،

 

كيف حالك أم عبد الرحمن عندك عزومة كنتي قلتي من زمان كان كل وحدة من الحلوات تعمل طبقين

 

وانت عليك الطبق الرئيسي والقهوة والشاي والعصيرات

 

حبيبتي حشرح لك بالتفصيل الممل (أنا لا أعرف طريقتكم لكن أقولك على اللي عندنا ماشي )

 

أول ما يجو الضيوف حتستقبليهم بأيه بابتسامة وترحيب (خلصنا )

 

بعدين بعد ما يرتاحو (والله انت اللي حتكوني تعبانة ) حتقدمي أيه

 

عصيرات ( عصير ليمون بنعنع / فراولة / كوكتيل ( تفاحه + برتقالتين + موزتين + مانجة (مثلجة أو طازه ) + فراولة (مثلجة) + ظرف جيلي ) وقبل ماتصبيه في الكاسات حطي أسفله فيمتو بسيط حيديه شكل )

 

لو كان معها قطع تشيز كيك ميني أو ممكن نوع من البسكوتات (كوكيز أو بيتي فور) أو بلاش

 

شاي وحطي معاه (تشكيلة من البيف باستري أو الفطائر (إذا كنت من هواة العجن) بس البيف باستري أسرع وأسهل

 

قهوة ومعاها حلى قهوة أحط (شوفي اللي حطيتهم يمكن يعجبك منهم أو خذي حاجة بسيطة

cook390.jpg

(المقادير:

2كوب حليب بودره+نصف كوب سكر ناعم+قشطه+بسكوت شاي+ظرف كريم كارمل

الطريقة:

يوضع الحليب البودره على النار حتى يشقر ثميوضع السكر والقشطه ويخلط حتى تصبح متماسكه تفرد في صينيه ويصف عليها بسكوت الشاي ثم تعمل الكريم كارمل بوضع الكارمل مع كوب حليب على النار الى ان يغلي ثم يصب على البسكوت وتدخل الثلاجه لحين التقديم تقطع مكعبات وتقدم مع القهوه )(صلحيه قبل بيوم أو يومين وغلفيه وفي الثلاجة )

 

خلصنا الاستقبال ونأتي على العشاء (بوفية )

 

مقبلات

1-شوربة دجاج بالموتزريلا (المقادير:بصلةمتوسطةمفرومة - صدوردجاج مقطعةمكعبات صغيرة- 150جرام ملح- وبهارحسب الرغبة - حليب سائل1ونصف لتر - جبنةموتزيرلا500جرام - ملعقةزيت.

الطريقة:يحمى الزيت في قدرثم يكشن البصل ثم توضع صدورالدجاج ثم يوضع الملح والبهار ويقلب الى ان تستوي صدورالدجاج ثم يوضع الحليب ويترك على نارهادئةالى ان يغلي ثم يؤخذ3 او4 ملاعق من الموتزيرلا وتوضع على جانب ويوضع الباقي على الحليب المغلي ثم تقلب الشوربةالى ان تذوب الموتزيرلا توزع الشوربةفي زبادي صغيرةاوزبدية كبيرة ثم توزع الموتزيرلا الجانبيةفوق الشوربةوتدخل الفرن ويولع عليهامن فوق لمدةدقيقةواحدةحتى يحمروجههاثم تقدم

 

2-مسقعة وأنتم خبراء تبارك الرحمن (اعمليها بدري وغلفيها وسخنيها قبل العشاء بحوالي ساعة على نار هادية )

 

3- ورق عنب ومحشي ملفوف (صلحيه قبل بيوم )

 

4- كبة فرزنيها وطلعيها في يوم العزومة واقليها قبل العشاء (ياريت الجيران هم اللي يقلوها عشان ريحة الزيت أو إذا كان عندك قلاية كهربائية )

 

5- سمبوسك (إذا حبيتي نجيب لك طريقتها إذا كان عجينة السمبوسك الجاهزة مش متوفره )

 

6- فطاير (معجنات أو بيف باستري (يقوم بالواجب )

 

7- سبرنغ رول

 

لو بتحبو الملوخية (وهذا ما أعتقده )

 

(المهم اختاري اللي تقدري عليه ويعجبك )

 

السلطات (وهي اللي عليها العين الكل بيحبها اعملي شكلين ثلاثة إن شاء الله أربعة (تعطي للبوفية شكل ) بس على قدر حاجتكم

 

أحطلك كذا شكل وأنت تختاري

1- السلطة المصرية(المقادير:3حبات طماطم-1بصلة كبيرة- 2قرن فلفل اخضر- 1قرن فلفل اصفر- 1خسة صغيرة- حزمة جرجير- حزمة شبت - 2 خيار-2جزرة- (قطعيها بدري وخلي كل نوع لوحده عدا البصل والطماطم وغلفي كل نوع لوحده وقبل ما يجو الضيوف على طول اخلطيهم وتكوني قطعتي الطماطم والبصل (بس ما تخلطيهم معاهم إلا قبل التقديم)

الصوص (زيت زيتون- زيت عادى- ملح - شطة- ليمون- خل ابيض) حضريه ولا تضيفيه إلا قبل التقديم برضه

cook300.jpg

 

2- سلطة الحبوب (سهلة وسريعة ) (علبة فاصوليا حمراء/علبة فاصوليا بيضاء / علبة ذرة / علبة عرانيس ذرة (الصغيرة ) / علبة بليله (يمكن تستغني عنها ) بصل أخضر / شوية جرجير / جبنة شيدر مبشورة ) (صوص السلطة )

 

تقطعي البصل الأخضر بعد غسله وتغسلي الجرجير وما تقطعيهوش إلا إذا كانت ورقته كبيرة المهم التقطيع حيكون كبير مش صغير بعد أن أن تضعي البقول في مصفاية (مشخال ) تغسلية من المواد الحافظة وقبل التقديم تخلطيهم وتحطي عليهم الصوص وتجمليه بالجبنه المبشورة

 

3- (سلطة الملفوف (الروسية )( نصف ملفوفة مقطعة شرائح رفيعة. - 3-4 حبات جزر مبشورة

الصوص ( مايونيز تقريبا 4ملاعق وشوية سكر وملعقتين قشطة (ممكن تستغني عنهم )

 

نخلط كل المكونات السابقة مع بعضها ويفضل تجهيزها قبل التقديم بساعة.وقبل التقديم أخلطيها بالصوص

 

4-سلطة الجرجير السريعة (المقادير:2حزمة جرجير-1حبة طماط-جبن شيدرمبشور

الصلصة/زيت زيتون- خل .

الطريقة:ينظف الجرجير من الاعواد وتقطع الاوراق بدون السكين لان يجب ان تكون الاوراق كبيرة.

2-يقطع الطماط ويضاف الى الجرجير ويبشر فوقها جبن الشيدر ومن ثم تضاف الصلصة

 

5-السلطه اليونانيه(المقادير:خس مقطع /فلفل أخضر /طماطم /زيتون بدون لب /بصل أخضر /خيار /جبنه مالحه بيضاء الصوص(زيت زيتون حسب الرغبه /عصير ليمون /فلفل اسود+القليل من الثوم أو بودرة الثوم

الطريقة:

تقطع الخضار (في وقت مبكر ) وتخلط مع الجبن قبل التقديم ثم يضاف عليها الليمون والثوم والفلفل و الزيت

 

6- سلطات المكرونة (يا كثرها )وخذي وحده

1 باكيت معكرونة ملونة-

1 فلفل أخضر رومي مقطع إلى مكعبات صغيرة-

1 فلفل أحمر رومي مقطع إلى مكعبات صغيرة-

1 علبة ذرة (حبات)-

1 علبة فاصولياء حمراء-

ربع إلى نصف كوب بصل أخضر مقطع إلى قطع صغيرة -

قليل من الفلفل الأحمر-

مقادير الصلصة:

1 ملعقة أكل مايونيز-

3 ملاعق أكل روب-

ربع إلى نصف كوب مايونيز (ثاوزاند أيلاند)-

3 ملاعق أكل خل -

لا نضع الملح أبدا في هذه السلطة.

 

 

الطريقة:

 

1.نغلي المعكرونة في الماء مع قليل من الزيت حتى تصبح طرية بعض الشيء( لا نضيف ملح)

2.نضع جميع المقادير المذكورة أعلاة في صحن عميق ونضيف عليها المعكرونة(السابق غليهاويجب أن تكون دافئة قليلا)

3.ثم نخلط مقادير الصلصة مع بعض ونضيفها على الخلطة السابقة ونخلطهم مع بعض مع مراعاة الخلط بالشوكة حتى لا تتفتت المعكرونة.

4.نضع السلطة في الثلاجة حتى تبرد قليلا ومن ثم نقدمها.

 

(اختاري ولا تحتاري صنفين ثلاثة )

 

خلصنا السلطات والمقبلات يبقى الطبق الرئيسي

 

زي ما قلتي (كبسة )

مكرونة بالبيشاميل

سمكة مشوية

روبيان (مسلوق أو مقلي (لو تحبي أعطيك الطريقة )

 

نجي للحلى (اعمليه قبل بيوم وغلفية وفي الثلاجة ما يخرب )

 

أم علي

كريم كراميل

تراميسيو

الحلى اللي حطيتوه (يسرق الأضواء )

 

وبالهناء والعافية

 

وإن شاء الله أكون أفدتك

شارك هذه المشاركه


رابط المشاركه
شارك

بصي يا ستي فيه أفكار كمان ممكن تعملي كبيبة من قبلها تشليها في الفريزر وتحمريها على طول وقت ما هو موجودين،

وممكن برضه تعملي صينية جلاش وتحطيها في الفريزر جاهزة على التسوية برضه،

وممكن تعملي كوسة بالبشاميل لو بتحبيها

على فكرة بالنسبة لتقسيمة العزومة إحنا عندما بنقسهما كىلآتي:

نوع شوربة- نوع معجنات (سمبوسة أو كانيلوني أو جلاش)- ونوع لحمة -ونوع طيور -ونوع لحمة مفرومة (يعني كفتة أو كبيبة أو داوود باشا) -ونوع أو نوعين خضار- أرز أو مكرونة مع السلطات،

و بالنسبة للحوم والمعجنات ممكن تعملي حاجت جاهزة على التحمير أو التسوية

يعني مثلا بقتيك جاهز على التحمير أو كفتة تتحط في الفرن على طول أو كبيبة تتحمر على طول

بالنسبة للكانيلوني والجلاش ممكن برضه تعمليلهم من قبلها بكام يوم وتشيلي في لافريزر

بس خدي بالك لو هتعملي كبسة ما تعمليش أرز ولا مكرونة

 

وربنا معاكي

شارك هذه المشاركه


رابط المشاركه
شارك

يا ربي دا انا اللي هكون خلصت فعلا

 

والله انا مش عارفة ليه العزومات كده بس من كل العزمات اللي انا اتعزمتها كانت عند ناس بسيطة وبيحبوا البساطة (مكرونة وحمام وسلطة) وخلص الموضوع على كده

 

لا حول ولا قوة الا بالله

 

اديني عماله اسجل من دلوقتي في الورقة وشكلي والله اعلم هبدأ من دلوقتي وكل يوم اعمل حاجة واحطها بالفريزر

شارك هذه المشاركه


رابط المشاركه
شارك

ممكن حد يقولي طريقة بابا غنوج وسلطة طحينة بالتفصيل الممل؟؟؟ انا عملتها قبل كده بس عمرها ما ظبطت معايا ودايما تطلع وحشة

شارك هذه المشاركه


رابط المشاركه
شارك

بصي ياحبيبتي.. جاتلي فكرة حاجة تعمليها وهتلائيها كتير ان شاء الله في السوق

مادام هم شبعانين من الأكل المصري

 

تقدري تعمليلهم سمك وتتفنني فيه..

 

يعني مثلا اعملي صيادية

اعملي فتة جمبري بتبأة روووعة

اعملي بردو مسقعة.. وجه بحري بيعملو المسقعة مع الأسماك بتبأة روعة

اعملي رز سمك عادي بالبصل

اعملي سمك مشوي وفيليه مقلي مثلا

 

اعملي سلطة خضرا وسلطة بابا غنوج وسلطة طحينة عادية

 

اعملي شوربة جمبري

 

بالنسبة للحلويات قدمي فروت سالات بالآيس كريم وهتبأة مناسبة اوي فكرة الفواكه مع السمك.

 

ها إيه رأيك، ومتهيألي مش هتلائي احسن من السمك عندكو

ابلها بيوم هاتيه نظفيه هو والجمبري وتبليهم وحطيهم في التلاجة، واعملي كمان السلاطات وعالتلاجة

وتعالي تاني يوم اقلي بس السمك ووضبي السفرة وهم أعدين

 

وبالنسبة لريحة القلي

1- حطي فحمة جنب الطاسة الي بتقلي فيها

2- افتحي كل شبابيك الشقة والشفاطات

3- حطي غطا على الطاسة وانتي بتقلي

4- بعد ما تخلصي رشي مية بديتول في الم مطبخ كله وامسحي من فوق الوش وشغلي اي فواحة في الشقة وخلصت

 

 

بالنسبة لطريقة بابا غنوج

 

2 بازنجان متوسط الحجم

1 بصلة متوسطة

8 فصوص توم مهروس

طحينة

خل + زيت

كمون - ملح - شطة

بقدونس مفروم

 

حطي البازنجان والبصلة في الفرن وشغلي عليهم الفرن لحد ما يتشوو عالآخر

طلعيهم وقشريهم وحطيهم في الكبة او بشوكة وافضلي اهرسي اهرسي لحد ما يبأة الخليط مهروس كله

حطي عليهم تقريبا ملعقة كمون صغيرة وملعقة شطة صغيرة والملح حسب المذاق

حطي عليهم البقدونس المفروم وتقريبا 3 ملاعق خل ورشة زيت وحبة طحينة، يعني انتي كل ما تزودي ملعقة مثلا من الحاجات دي دوقي وشوفي المذاق لأنها بتبأة حسب المذاق

 

وبس قلبيها كويس وشوفي لو عيزة طحينة زيادة او خل زيادة او زيت، وانتي وذوقك

شارك هذه المشاركه


رابط المشاركه
شارك

بصي ياحبيبتي.. جاتلي فكرة حاجة تعمليها وهتلائيها كتير ان شاء الله في السوق

مادام هم شبعانين من الأكل المصري

 

تقدري تعمليلهم سمك وتتفنني فيه..

 

يعني مثلا اعملي صيادية

اعملي فتة جمبري بتبأة روووعة

اعملي بردو مسقعة.. وجه بحري بيعملو المسقعة مع الأسماك بتبأة روعة

اعملي رز سمك عادي بالبصل

اعملي سمك مشوي وفيليه مقلي مثلا

 

اعملي سلطة خضرا وسلطة بابا غنوج وسلطة طحينة عادية

 

اعملي شوربة جمبري

 

بالنسبة للحلويات قدمي فروت سالات بالآيس كريم وهتبأة مناسبة اوي فكرة الفواكه مع السمك.

 

ها إيه رأيك، ومتهيألي مش هتلائي احسن من السمك عندكو

ابلها بيوم هاتيه نظفيه هو والجمبري وتبليهم وحطيهم في التلاجة، واعملي كمان السلاطات وعالتلاجة

وتعالي تاني يوم اقلي بس السمك ووضبي السفرة وهم أعدين

 

وبالنسبة لريحة القلي

1- حطي فحمة جنب الطاسة الي بتقلي فيها

2- افتحي كل شبابيك الشقة والشفاطات

3- حطي غطا على الطاسة وانتي بتقلي

4- بعد ما تخلصي رشي مية بديتول في الم مطبخ كله وامسحي من فوق الوش وشغلي اي فواحة في الشقة وخلصت

 

 

بالنسبة لطريقة بابا غنوج

 

2 بازنجان متوسط الحجم

1 بصلة متوسطة

8 فصوص توم مهروس

طحينة

خل + زيت

كمون - ملح - شطة

بقدونس مفروم

 

حطي البازنجان والبصلة في الفرن وشغلي عليهم الفرن لحد ما يتشوو عالآخر

طلعيهم وقشريهم وحطيهم في الكبة او بشوكة وافضلي اهرسي اهرسي لحد ما يبأة الخليط مهروس كله

حطي عليهم تقريبا ملعقة كمون صغيرة وملعقة شطة صغيرة والملح حسب المذاق

حطي عليهم البقدونس المفروم وتقريبا 3 ملاعق خل ورشة زيت وحبة طحينة، يعني انتي كل ما تزودي ملعقة مثلا من الحاجات دي دوقي وشوفي المذاق لأنها بتبأة حسب المذاق

 

وبس قلبيها كويس وشوفي لو عيزة طحينة زيادة او خل زيادة او زيت، وانتي وذوقك

والله فكرة مع ان جوزي ممكن يدبحني عليها لانه مدمن سمك وعمري ما عملته عزومة سمك ... ههههه ... لما يرجع من السفر ان شاء الله اعملهاله وهبقى اقوله جربتها في البنات الاول .... شريرة صح؟

 

طيب ممكن يا حبيبة قلبي تقوليلي بالتفصيل الممل الممل وكل الخطوات بتاعة كل وصفة ... اشرحيلي كأني واحدة عمرها ما دخلت المطبخ وما تعتمديش على تذوقي زي ما عملتي في البابا غنوج وانما قوليلي احط طحينة قد ايه واللذي منه

 

انا عارفة اني مش هعمل ده كله وانس هختار بس مش هقدر اختار الا اذا عرفت طريقة كل واحدة وأشوف اي واحدة حاسة اني فهمتها كويش واعرف اعملها ... يبقى عايزين:

طريقة الصيادية

طريقة فتة الجمبري

طريقة مسقعة

طريقة شوربة الجمبري

طريقة شوربة السمك

 

انا بعرف اعمل رز السمك والسمك المقلي اما المشوي فزوجي ربنا يحميه ويرجعهولي بالسلامة كان دايما يشتريه مشوي جاهز

 

والله يكرمك يا ريت تقوليلي نوع السمك اللي هشتريه والكمية اللي اشتريها اصلي عمري ما اشتريته قبل كده وزوجي هو اللي خبير فيه وكان بيجيبه دايما

 

ولو عندك وصفات تانية للسمك قوليلي عليها لاني لو لقيت الجمبري غالي قوي يبقى مش هقدر اعمله بس انا برده عايزة الطريقة

شارك هذه المشاركه


رابط المشاركه
شارك

لقيت بعض الطرق: يا ريت لو حد جربها ولقاها حلوة يقولي:

 

جامبالايا الجمبري

 

jambalaya.gif

 

المكونات الأساسية جمبرى،أرز،بسلة،فلفل حار

وقت التحضير 20 دقيقة

وقت الطهى 45 دقيقة

الكمية تكفى 5 اشخاص

 

المقادير

1 حبة بصلة ,متوسطة مقطعة أرباع

1 حبة فلفل أحمر حار ,مقطعة قطع صغيرة

6 ملعقة كبيرة زيت ذرة كريستال

3-4 فصوص ثوم

ملح و فلفل

2 ملعقة كبيرة معجون طماطم فاين فودز كنور

2 ملعقة كبيرة عصير ليمون

1 ملعقة صغيرة كمون

1 كجم جمبري ,(غير مقشر)

2 ملعقة صغيرة ثوم , مدقوق

1 كوب بسلة

2 كوب أرز

1 حبة ليمون ,مقطعة شرائح

5 حبات طماطم , ناضجة

 

طريقة الطهى

1. يغسل الجمبري جيدا و يصفى. يوضع الجمبري (غير المقشر) وعصير الليمون وشرائح الليمون والبصل و فصوص الثوم و ملعقتين زيت والكمون والملح والفلفل في اناء متوسط.

2. يوضع الاناء على نار متوسطة لمدة حوالي 5-7 دقائق حتى يتحول الجمبري الى اللون البرتقالى مع رج الإناء من حين لآخر. يقشر الجمبري ما عدا الذيل وينزع العرق الأسود من على الظهر.

3. يغسل الارز جيدا تحت الماء الجاري و يصفى. يسخن ملعقتين زيت في إناء متوسط لا يلصق على نار متوسطة .يضاف الارزو البسلة ويقلب لمدة دقيقة أو دقيقتين.

4. يضاف 3 أكواب ماء مغلي وملح و يقلب جيدا. عندما يتشرب الأرزالماء يغطى الإناء و تخفض النار و يترك لمدة 20-25 دقيقة.

5. تضرب الطماطم في الخلاط مع 2/1 كوب ماء. يسخن الزيت المتبقي في إناء متوسط على نار متوسطة. يقلب فيه الثوم و الفلفل الحار لمدة 20-30 ثانية . تضاف البسلة والطماطم المعصورة ومعجون الطماطم و كوب ماء و الملح والفلفل ويترك ليغلى.

6. يغطى الاناء و تخفض النار و يترك لمدة 25-30 دقيقة. يمكن إضافة القليل من الماء إذا كانت الصلصة شديدة الكثافة.

7. يوضع الارز على طبق تقديم مسطح ثم يرص الجمبري بجانبه. تصب صلصة الطماطم على الجمبري وتقدم باقي الصلصة في وعاء آخر. يقدم فورا.

 

ملحوظة:

يمكن عمل الأرز بطريقة الأرز الأبيض العادية و سلق البسلة على حدة ثم إضافتها فوق الأرز في طبق التقديم ثم إضافة الجمبري. يمكن أيضا استخدام المتبقي لديك من الأرز الأبيض و البسلة المسلوقة.

 

 

طاجن السمك

 

المكونات الأساسية سمك،بصل،طماطم

وقت التحضير 20 دقيقة

وقت الطهى 45 دقيقة

الكمية تكفى 4 اشخاص

 

المقادير

2-3 حبة بصلة ,كبيرة مقطعة مكعبات

1 رأس ثوم , مفرومة

4 ملعقة كبيرة عصير ليمون

1 كوب زيت ذرة كريستال

2/1 كجم طماطم ,ناضجة أو 2 ملعقة كبيرة معجون طماطم

4/1 كوب بقدونس , مفروم

4/1 1 كجم سمك بلطي ,أو أي سمك متوسط الحجم

2/1 كوب خل ,(حسب الرغبة)

ملح و فلفل

 

طريقة الطهى

1. يغسل السمك جيدا . يمكن قطع كل سمكة الى نصفين. يضاف عصير الليمون الى السمك ويترك جانبا لمدة ساعة.

2. تضرب الطماطم في الخلاط أو يذوب معجون الطماطم في كوب ماء. يسخن الزيت في اناء متوسط على نارمتوسطة. يضاف البصل و يقلب حتى يصبح لونه بني ذهبي.

3. يضاف الخل والطماطم المعصورة والثوم و 2/1 كوب بقدونس والملح والفلفل . يضاف نصف إلى كوب ماء و تخفض النار و يترك لمدة 20 دقيقة.

4. يضاف السمك الى الاناء و يغطى و يطهى لمدة 15-20 دقيقة حتى لا يتبقى سوى القليل جدا من الصلصة في الاناء. ينقل الى طبق تقديم و يوزع فوقه البقدونس المتبقي. يقدم فورا

 

ملحوظة:

يمكن عمل هذا الطبق في الفرن. يوضع السمك في صينية أو إناء للفرن و يتم عمل الصلصة باتباع نفس الخطوات ثم تضاف فوق السمك و تطهى في الفرن (200 مئوية) لمدة 20-25 دقيقة حتى ينضج السمك.

 

 

السمك بالباشاميل

 

المكونات الأساسية سمك،بشاميل

وقت التحضير 10 دقيقة

وقت الطهى 50 دقيقة

الكمية تكفى 4 اشخاص

 

المقادير

4/3 كجم سمك فيليه

2/1 1 كوب لبن

1 كوب لوز

1 ملعقة كبيرة كريستال زيت عباد الشمس

4-6 ملعقة كبيرة عصير ليمون

1 ملعقة كبيرة زبد

4/1 كوب عين جمل - جوز , مفروم

ملح و فلفل

2 ملعقة صغيرة كمون

1 ملعقة كبيرة دقيق

 

طريقة الطهى

1. يتبل السمك بالملح والفلفل و الكمون وعصير الليمون. يوضع في الثلاجة لمدة ساعة إلى ساعتين.

2. يسلق اللوز لمدة 10 دقائق ثم يقشر و تقطع كل لوزة إلى 4 قطع بالطول. يحمص في الفرن أو التوستر أو يحمر في الزيت.

3. يذاب الزبد على في إناء صغير على نار متوسطة. يضاف الدقيق مع التقليب المستمر. يضاف اللبن و يخفق باستمرار حتى يصير الخليط أملس. تترك لتغلي (حوالي 5 دقائق) ثم ترفع عن النار.

4. يخلط اللوز و عين الجمل و الباشاميل معا ويقلب جيدا. يحمى الفرن الى درجة حرارة متوسطة (180 مئوية).

5. تدهن صينية للفرن بالزيت و ترص فيها شرائح السمك ثم يصب عليها البشاميل. يدخل السمك الفرن لمدة 45 دقيقة حتى ينضج. يقدم فورا.

 

ملحوظة:

إذا كان البشاميل غير أملس و توجد به كتل، يمكن أن يرفع عن النار و يصفى بمصفاة دقيقة ثم يعاد إلى إناء نظيف و تستكمل باقي الخطوات كما هي.

شارك هذه المشاركه


رابط المشاركه
شارك

طاجن المأكولات البحرية

 

المكونات الأساسية مأكولات بحرية،توابل،طماطم

وقت التحضير 25 دقيقة

وقت الطهى 30 دقيقة

الكمية تكفى 4 اشخاص

 

المقادير

4/1 كجم كالاماري- سبيط ,مقطع حلقات

4/1 كوب خل

4/1 كوب معجون طماطم فاين فودز كنور

3 حبات طماطم ,كبيرة مقطعة مكعبات

2 ملعقة كبيرة زيت ذرة كريستال

2/1 كجم سمك فيليه ,مقطع مكعبات متوسطة

4/1 كجم جمبري ,متوسط مقشر و منظف

2 ملعقة صغيرة أوريجانو , (حسب الرغبة)

1 حبة بصلة ,كبيرة مفرومة

1 ملعقة كبيرة بهارات السمك

1 حبة بصلة ,كبيرة مفرومة

2 فص ثوم , مدقوق

ملح و فلفل

 

طريقة الطهى

1. يسخن الزيت في إناء كبيرو يضاف البصل و الثوم و يقلب حتى يلين. تضاف الطماطم و الخل و معجون الطماطم و توابل السمك و2/1 كوب ماء والملح والفلفل . يقلب جيدا و يترك ليغلي.

2. تخفض النار و يترك وهو غير مغطى لمدة 10 دقائق.

3. يضاف السمك و الكالاماري و الجمبري و يقلب ليمتزج جيدا . يترك غير مغطى لمدة 15-20 دقيقة او حتى ينضج الكاليماري تماما. يضاف الاوريجانو ويقدم فورا.

 

الكالاماري على الطريقة الايطالي

 

المكونات الأساسية كالامارى،بهارات

وقت التحضير 20 دقيقة

وقت الطهى 30 دقيقة

الكمية تكفى 4 اشخاص

 

المقادير

2 ملعقة كبيرة زيت ذرة كريستال

1 ورقة ورق لاورا

1 ملعقة صغيرة زعتر

2 حبة طماطم ,متوسطة مقطعة مكعبات صغيرة

2/1 كجم كالاماري- سبيط ,(سبيط)

ملح و فلفل

1 حبة بصلة ,مفرومة

1 ملعقة كبيرة بقدونس , مفروم

2/1 كوب معجون طماطم فاين فودز كنور ,مذاب في 2 كوب من الماء

1 ملعقة صغيرة أوريجانو

1 ملعقة صغيرة ريحان ,مطحون

1 ملعقة كبيرة ثوم ,مفروم ناعم

 

طريقة الطهى

1. يغسل الكالاماري جيدا و يقطع الى مربعات متوسطة.

2. في إناء متوسط يقلب البصل والثوم في الزيت على نار متوسطة حتى يصفرا. يضاف معجون الطماطم و مكعبات الطماطم والريحان والزعتر والاوريجانو والملح والفلفل . يترك غير مغطي لمدة 10 دقائق مع التقليب من حين الى آخر.

3. يضاف الكالاماري والبقدونس و ورقة اللاورا و يترك لمدة 20 دقيقة أخرى أوحتى ينضج الكالاماري . تنزع ورقة اللاورا و يقدم مع ارز ابيض.

 

 

طاجن الكالاماري

 

المكونات الأساسية كالامارى،طماطم،فلفل أخضر

وقت التحضير 20 دقيقة

وقت الطهى 40 دقيقة

الكمية تكفى 4 اشخاص

 

المقادير

1 حزمة بقدونس , مفروم

4 حبات طماطم ,متوسطة مقطعة مكعبات صغيرة

1 حبة قرون فلفل أخضر ,حار مقطع قطع صغيرة

ملح و فلفل

2 ملعقة كبيرة زيت زيتون

2 حبة فلفل أخضر , متوسطة مقطعة مربعات

2/1 كجم كالاماري- سبيط , (سبيط) مقطع مربعات

2 حبة بصلة ,متوسطة شرائح

2/1 ملعقة صغيرة شطة مطحونة ,(حسب الرغبة)

1 ملعقة صغيرة بهارات السمك

2/1 1 ملعقة كبيرة معجون طماطم فاين فودز كنور

 

طريقة الطهى

1. يقطع البصل الى شرائح ثم تقطع الشرائح الى أنصاف.

2. يخلط الكالاماري مع الطماطم والبصل والفلفل الاخضر والفلف الحار في طاجن كبير. يضاف البقدونس ومعجون الطماطم والزيت و توابل السمك والشطة والملح والفلفل . تخلط جميع المكونات جيدا.

3. يضاف 2 كوب ماء و يغطى الطاجن بورق الالمونيوم و يدخل الفرن على حرارة متوسطة (180- 200 مئوية) لمدة 30 دقيقة او حتى ينضج الكالاماري تماما.

4. يرفع ورق الالمونيوم و يترك في الفرن لمدة 5- 10 دقائق . يقدم فورا.

 

جمـبـري حلــو وحـار

 

المكونات الأساسية

وقت التحضير 20 دقيقة

وقت الطهى 15 دقيقة

الكمية تكفى 4 اشخاص

 

المقادير

2/1 كجم جمبري ,متوسط ، مقشر

2/1 كوب صوص الصويا

3 ملعقة كبيرة زيت ذرة كريستال

2 ملعقة صغيرة سكر

1 حبة فلفل أحمر حار ,مفرومة ناعم، أو شطه

1 ملعقة كبيرة نشا

1 بصلة ,متوسطة، حلقات

1 حبة فلفل أخضر , حلقات

1 حبة جزر ,متوسطة ، شرائح رفيعة

ملح

 

طريقة الطهى

1. يغسل الجمبري جيدا ويصفى ويترك جانبـا .

2. تسخن ملعقتين زيت فى طاسة صينى على نار عالية . يضاف الجمبرى و يقلب باستمرار لمدة حوالى 5 دقائق حتى يصبح لونة برتقالى .يرفع من الطاسة .

3. يضاف الزيت المتبقى ثم يضاف البصل و الفلفل الاخضر و الجزر و الفلفل الحار. تقلب الخضروات لمدة 2_3 دقائق

4. يعاد الجمبرى للطاسة.يضاف صوص الصويا و السكر و الملح و يقلب.

5. بذاب النشا فى ملعقتين من الماء و يضاف للطاسة و يقلب فورا حتى يتكاثف الصوص قليلا.يقدم فورا.

 

السمك بصلصة الطماطم

 

المكونات الأساسية سمك فيليه،طماطم،زيتون أسود،فلفل أخضر

وقت التحضير 15 دقيقة

وقت الطهى 20 دقيقة

الكمية تكفى 5 اشخاص

 

المقادير

4/1 كوب زيتون أسود ,منزوع النوى و مقطع انصاف

ملح و فلفل

2 ملعقة كبيرة ثوم ,مفروم ناعم

2/1 كوب عصير ليمون

2 ملعقة كبيرة زيت ذرة كريستال

1 حبة فلفل أخضر ,كبيرة مقطعة عيدان رفيعة

1 كجم سمك فيليه

2 حبة بصلة ,متوسطة

 

طريقة الطهى

1. يغسل السمك جيدا. يوضع السمك في صينية للفرن و يتبل بعصير الليمون والملح والفلفل و يترك لمدة ساعة.

2. يقطع البصل الى شرائح ثم تقطع كل شريحة الى نصفين. يسخن الزيت في طاسة لا تلصق على نار متوسطة. يضاف البصل و الفلفل و الثوم ويقلب لمدة دقيقتين. يضاف 4/1 كوب ماء و عصير الطماطم و الزيتون وتترك لتغلى.

3. تصب الصلصة لتغطي السمك في الصينية . توضع في الفرن في حرارة متوسطة لمدة 30-35 دقيقة حتى ينضج السمك. يقدم فورا.

 

الكسبرية

 

المكونات الأساسية سمك فيليه،بصل

وقت التحضير 40 دقيقة

وقت الطهى 35 دقيقة

الكمية تكفى 5 اشخاص

 

المقادير

1 ملعقة كبيرة ثوم ,مفروم

2 كوب دقيق

1 ملعقة كبيرة كسبرة ,جافة مطحونة

1 كجم سمك فيليه

كريستال زيت عباد الشمس

2/1 ملعقة كبيرة كمون

5 حبة بصلة ,كبيرة مفرومة

1 ملعقة صغيرة بهارات

2/1 كوب زيت ذرة كريستال

ملح و فلفل

2 كوب عصير طماطم

 

طريقة الطهى

1. يغسل السمك جيدا. يتبل بنصف ملعقة كبيرة ثوم ونصف ملعقة كبيرة كسبرة والكمون والملح والفلفل. يترك لمدة 30 دقيقة.

2. يوضع الدقيق في طبق وتغمس فيه شرائح السمك حتى تغطى جيدا. يقلى في الزيت حتى يصبح لونه بني ذهبي. يرفع و يترك جانبا.

3. يسخن 2/1 كوب زيت في إناء على نار متوسطة و يقلب فيه البصل حتى يصفر. تضاف الكمية المتبقية من الكسبرة والثوم و تحمر حتى يصبح لون البصل بني ذهبي.

4. يضاف عصير الطماطم وكوب ماء و البهارات والملح والفلفل . تخفض النار و يترك لمدة 5-7 دقائق حتى يتكاثف الخليط.

5. في صينية معدنية لا تلصق تضاف نصف كمية خلطة البصل و توزع في الصينية. يرص السمك الفيليه و يغطى بنصف كمية خلطة البصل الآخرى.

6. يحمى الفرن الى درجة حرارة متوسطة (190 مئوية). تدخل الصينية الفرن لمدة 15-20 دقيقة . تقدم فورا.

شارك هذه المشاركه


رابط المشاركه
شارك

طيب الحمدلله إن الفكرة عجبتك.. بصي بالنسبة للسمك انا مبعرفش بالكيلو انا لما بجيبو بجيبه بالوحدة اوك

 

يعني هاتي مثلا ممممم لو انتو 3 بس يبأة 8 سمكات كفاية اوي، تنئي 8 سمكات بلطي متوسطين الحجم حلوين كدة.. وخلي بالك تكون خياشيمه حمرا ويكون لون قشرته تحسي انه بيدي الوان كتير كدة زي قوس قزح عشان يبأة طازة..

 

الجمبري هاتي جمبري وسط، وجمبري صغير

هاتي من الوسط 2 كيلو، ومن الصغير 2 كيلو

 

هاتي كيلو سمك فيليه

 

وخلي بالك عشان تعملي اكلة السمك دي اعملي حسابك تشتري وانتي جية الأغراض دي الكلام دة لو مش عندك في المطبخ

 

1- حزمتين بقدونس - خس - جرجير

2- 2 كيلو رز مصري

3- دقيق

4- بقسماط ناعم

5- بيض

6- 2 بازنجان متوسطين الحجم

7- طماطم - فلفل رومي - بطاطس - بصل- خيار - ليمون - توم.

8- طحينة - خل - كمون

9- خبز أبيض أو أسمر

10- شوفي نوع الحلويات الي عيزة تعمليه وهاتي حاجته وكذلك بالنسبة للمشروبات.

11- خلطة بشاميل ماجي (انا بجيبها جاهزة عشان مجربتش اعملها قبل كدة، لو بتعرفي تعملي البشاميل خلاص)

12- مايونيز وكاتشب وعلبة زبادي

 

اول حاجة تجيبي السمك من السوق تنظفيه كويس و تفتحي فيه فتحات بالسكينة من كلا الجانبين وتتبليه وتحطيله خل وليمون وملح وعالتلاجة، وكذلك الجمبري

تجيبي الجمبري الصغير تقشريه وتنظفيه وتتبليه

أما الجمبري الكبير تشيلي راسه بس وتسيبي ديله مع جزء صغير منه، وتفتحي سلسلة ظهره من ورا تشيلي الخيط الأسود الي بيبأة فيه، بس خلي بالك عشان ديله ميقعش.. جربي فواحدة وانتي حتفهمي اصدي.. سمي بالله كدة وبالراحة

 

وتقومي متبلاه وعالتلاجة.

ياريت الكلام دة يبأة من أبلها بيوم بالليل مثلا عشان يكون لحق يتتبل تاني يوم.

 

طبعا التتبيلة بتبأة عبارة عن: 3 رأس توم كبيرة + 2 م ك كمون + 1 م ك شطة + 3 م ك ملح + قرن فلفل أخضر بارد + نصف كوب خل + نصف كوب عصير ليمون.

 

طيب، نتكلم عن المسقعة بالبشاميل:

 

شيلي رأس البازنجان وقطعيه حلقات متوسطة السمك .. يعني متكونش تخينة او رفيعة وقشريه

رشي عليها شوية ملح وسيبيه يصفي ميته لحد ما تقشري البطاطس وتقطعي الفلفل الرومي حلقات

قطعي البطاطس بردو صوابع

سخني الزيت ويكون زيت غزير في الطاسة، سخنيه وبعدين ابئي بالفلفل الرومي وبعدين البازنجان والبطاطس

البازنجان مش تسيبيه لما يتحرق ، لا مجرد ما يحمر شوية تشيليه وياريت تكون النار متوسطة يعني ولا عالية اوي ولا واطية اوي

 

صفي المقالي على ورق المطبخ وبعدين هاتي حلة وافرمي بصلتين كبار وحطي في الحلة نفس الزيت الي قليتي بيه.. تقريبا نصف كوب، يعني مش تحطي زيت كتير اوي

لما يسخن حطي البصلة وقلبيها لحد ما تصفر

هاتي نصف رأس توم افرميها مع حتة زنجبيل اخضر لو عندك معندكيش خلاص، وافرمي معاها قرن فلفل أخضر حراء او بارد على حسب منتي عيزة، وكمان م ص كمون وحطيهم عالبصلة وقلبي، اول ما تشمي ريحة التوم تكوني عصرة تقريبا بما يعادل زجاجة طماطم، او مثلا 8 حبات طماطم مستوية وتكوني طبعا مزوداها حبة مية عشان متكونش تقيلة اوي، ولو عندك صلصلة ياريت تحطيلها ملعقتين كدة

حطيهم على البصل والتوم الي عندك وسيبيها تتسبك، اول ماتتسبك (يعني المية الي فيها تنشف نوعا ما ) تقومي مزودة 2 كوب ماء وأول ما يغلي تحطي تقريبا 1 م ص ملح ورشتين فلفل أسود وحبة شطة وتقومي حطة المقالي الي قليناها من شوية، مع ملعقتين كبار خل.

وتقلبي وتسيبيها لحد ما المية الي فيها تنشف نوعا ما.. يعني تفضل الصلصة بس وتحسي المية الي انتي زودتيها نشفت شوية، خلي بالك اوعي تحرقيها،

بس

اطفي عليها وهاتي صينية بيركس او تيفال او طاجن او زي منتي عيزة، حطي المسقعة وبعدين اعملي البشاميل بالطريقة المكتوبة على بشاميل ماجي.. وصبيه على المسقعة.. طبعا في ناس بتحط لحمة مفرومة، بس انا بصراحة لغيت الفكرة دي لأن مش هتبأة لذيذة اللحمة المفرومة مع السمك

المهم صبي عليه البشاميل ورشي عالوش حبة جبنة مثلا جبن رومي مبشور او حبة موزاريلا وحطيها في الفرن وشغلي عليها الشواية لحد ما تحمر.

وبس. كدة المسقعة بالبشاميل اتعملت

 

بالنسبة لفتة الجمبري وشوربة الجمبري

 

هاتي الجمبري الصغير الي انتي تبلتيه حطيه في حلة وحطيله مية تغطيه مرتين.. يعني تكون المية كتير عشان هنحتاج الشوربة

حطي معاه فلفل وبصل وتوم وبهارات وكمون وفلفل اسود وحبة ملح .. يعني تقريبا كل الي عندك

 

وغطيه وسيبيه يستوي على النار

لما تلائي المية نقصت شوية خديك واحدة دوقيها وشوفي لو استوى خلاص اطفي..

ودوقي الشوربة شوفي كدة لو محتاجة ملح.

 

اسلقي تقريبا كيلو رز أبيض مصري بشوربة الجمبري.. يعني تسلقيه بشوربة الجمبري ولو مش هتقضي ممكن تزودي مية عادية.

وتكوني قطعتي عيش اسمر او ابيض قطع صغيرة وحمرتيه في الزيت وصفتيه.. يعني يكون عندك عيش ابيض محمص، اسقيه شوربة من بتاعة الجمبري وخليه يبوش شوية.

 

هاتي صينية كبيرة حطي طبقة خبز محمص وطبقة جمبري وطبقة رز، وبعدين اعملي برة دقة

يعني حمري حتة سمن وحطي عليها راس توم مدقوقة واول ما التوم يصفر تقومي حطة تقريبا ربع كوب خل وتطفي علاطول

زوديها تقريبا نصف كوب شوربة وصبي بأة على صينية الفتة الدقة دي.

 

لو عندك مستردة رشي عليها كدة من فوق بطريقة عشوائية حبة صغيرة اوي.. يعني منظر بس خلي بالك متحطيش كتير.

 

ياريت تعملي المسقعة من ابلها بيوم بالليل وتركنيها في التلاجة، وكذلك تعملي البشاميل ابلها بيوم بردو وتركنيه في التلاجة، وتعالي يوميها ابل الأكل بشوية حطيهم علابعض وعالفرن علاطول

والفتة تكوني مقطعة العيش ومحمصاه جاهز، وتكون سالقة الجمبري من ابلها بيوم وحطاه في التلاجة

وتعالي يوميها اسلقي بس الرز عشان تاكلوه سخن واعملي بقية خطوات الفتة والدقة وكدة وحطيهم علابعض وخلصي نفسك.

 

نيجي للجمبري البانية: هاتي طبقين مسلطحين

اول واحد حطي فيه تقريبا كوب دقيق وتقريبا كوب ماء وحطيهم علا بعض بس مش مرة واحدة.. يعني هاتي الطبق الي فيه الدقيق وزودي المية حبة حبة وانتي بتقلبي لحد ما تتكون عندك عجينة سايلة، يعني تكون عاملة كدة تقريبا زي المهلبية وهي سخنة.. مش عرفة قدرت اوصلك الفكرة ولا لأ، يعني المهم تبأة سايلة ولو احتاجت مية تاني حطلها عادي، المهم حطي عليها بيضتين تقريبا وحبة شطة ورشة ملح وحبة كمون،.

تاني طبق حطي فيه بقسماط

شيلي الجمبري واحدة واحدة من الطبق حطيه في الخلطة الأولى بعدين البقسماط وحطيه في طبق تالت واحدة ورا واحدة لحد ما الطبق يتملي عندك

بعدين تكوني مسخنة زيت غزير جدا.. حطي الجمبري فيه لحد ما يحمر وبعدين طلعيه صفيه على ورق مطبخ

 

تكوني بأة محضرة سرفيس كبير مفروش فيه بقدونس وحطة في طبق صغير غويط فيه الخلطة التالية:

3 ملاعق ك كاتشب، 3 ملاعق كبيرة مايونيز ، 3 ملاعق ك زبادي، وقلبي وحطيهم في الطبق دة.. وهتبأة دي الدريسنج او التغميسة بتاعة الجمبري، وبس حطي الجمبري حوالين الطبق الصغير دة وقدمي السرفيس.

 

نيجي للسمك البلطي والفيليه، طلعيه واقليه عادي في زيت غزير

طلعي البلطي صفيه وبعدين رصيه في سرفيس كبير مفروش بالبقدونس وزينيه بشرائح الليمون.

اما الفيليه بعد ما تصفيه من الزيت اغرفي رز السمك الي بالبصل في سرفيس كبير ورصي السمك الفيليه فوقه وقدميه

 

اعملي بأة سلطة خضرا (3 م ك بقدونس مفروم - 3 طماطم كبير - 3 خيار - ورقتين خس - حبة فلفل رومي مقطع صغير - بصلة صغيرة مبشورة) وحطي عليها فلفل اسود وملح وليمون وخل وشطة وكمون. وقلبي وحطيها في طبق كبير غويط والي عايز يغرف او لو مش عيزة تعملي بوفيه حطيها في اطباق صغيرة

 

سلطة الطحينة:

سخني تقريبا كوب ماء

هاتي طبق غويط حطي فيه نصف علبة طحينة، وزودي المية وانتي بتقلبي حبة حبة لحد ما الطحينة تبأة سايلة بس مش اوي، لو احتاج مية زيادة حطي

حطي تقريبا 3 م ك خل

نص م ص ملح

نص م ص كمون

نص م ص شطة

 

وقلبي وشوفي لو عيزة مية سخنة تاني زودي، يعني لو لسة تقيلة زودي مية، ودوقيها لئتيها دلعة حطي حبة ملح

 

اغرفيها في الأطباق ورشي حبة بقدونس عالوش

 

اعملي سلطة الجمبري

هاتي حبة جمبري مسلوقين، وحبة خس مقطع حلقات، حطي أكواب صغيرة تقريبا كل كوب عدد 4 جمبري صغير او وسط زي منتي عيزة

وحطي عليهم حبة خس مقطعين حلقات

وحطي تقريبا م ك مايونيز وقلبي وحطيها في التلاجة

ساعة التقديم طلعيها وحطي الأكواب بجانب السلطات وسدئيني بيبأة طعمها حلو اوي..

 

بالنسبة بأة للصيادية حاولي تسألي حد عليها لأني عمري ما عملتها

 

والسمك المشوي يبأة بوري وياريت تجيبيه جاهز معاكي لأني مش بشويه في البيت.. ولو مش هتعرفي تنزلي تجيبيه ساعتها هاتيه معاكي بأة وانتي بتجيبيهم الصبح وحطيه في لفته لحد معاد الأكل حطيه في الفرن شوية يسخن بس وطلعيه قدميه

 

 

انا كتبتلك الي اعرفه كله يا حبيبتي لو عندك اي تعليق انا مستنياكي

شارك هذه المشاركه


رابط المشاركه
شارك

يا امي الحقيني ........ ان عايزة أعيط وأصرخ

 

انا مبارح خرجت علشان اجيب الحاجة من السوبر ماركت لقيت الاسعار (الفيليه والجمبري اللي حجمه حلو) ما يعلم بيها الا ربنا قلت ارجع وابقى اتصرف ولسه قدامي وقت طالما هما ما اتصلوش لاني متفقة معاهم يعرفوني قبلها بيومين او تلاتة

 

وكمان حاجة الحلويات ما لقيتهاش كلها

 

اجي في النص الليل الاقي مكالمة من واحدة فيهم تقولي جايين بكرة ... انا اتخديت ... قالتي انا عارفة والله بس البنات لسه معرفنها ... قلتلها خلاص تعالوا

 

ومن الصبح وانا عمالة اجري هنا وهناك

 

قلت اللي في السوق هجيبه وخلاص

 

كل ما اروح اجيب حاجة يطلعي مشكلة حتى اللبن ... رحت للست اللي بجيب منها وروحتلها بدري ... لقيت اللبن خلص ... يا ربي

 

ولا الجزار رحتله مرة الصبح ومرة دلوقتي علشان خاطر اجيب لحمة مفرومة ... النور قاطع ومش عايز يجي

واللحمة العادية اقولي اديني كيلو ... يقولي مافيش غير نص كيلو من النوع اللي انتي عايزاه ... اكملها حاجة تانية؟؟؟

 

حته امبارح اشتريت ارز من بتاع الكبسة قلت خليه احتياطي موجود ... جيت البيت لقيته مش بتاع الكبسة وصعب ارجع جوه البلد تاني

 

طب اعمل ايه يا رب؟؟؟

 

انا عايزة اعيط واصرخ و .......... حد يجيبلي أمي

 

الله يكرمك ادعولي ان بكرة يعدي على خير

شارك هذه المشاركه


رابط المشاركه
شارك

لا حول ولا قوة إلا بالله

 

معلش يا حبيبتي والله انا دلوقت بس قريت رسالتك لأني ببأة اجازة جمعة وسبت

 

لا إله إلا الله

 

طب طمنيني عملتي ايه قوليلي بسرعة

 

كنت هقولك علا كم حاجة كدة تعمليها بالحاجة الي عندك وخلاص..

 

طيب قوليلي عملتي ايه دلوقت

شارك هذه المشاركه


رابط المشاركه
شارك

الحمدلله عدت على خير وكان يوم بسيط وممتع ... ههههه كنت انا الضيوف وهما المضيفين

 

سبحان الله حصلي مواقف تانية كنت هتجنن وبكيت اقول الله يسامحكم بس قدر الله وما شاء فعل وانا فرحانة جدا ان العزومة كانت بسيطة من غير بهرجه

 

اللحمة المفرومة قطعتها حتت وحطيتها في خلاط براون اللي عندي والحمدلله كانت زي اللحمة المفرومة

جبت من السوق بسلة وبصل اخضر وفلفل اخضر وعملت بسلة باللحمة المفرومة بس البسلة والخضراء كانوا كتير على اللحمة المفرومة واللحمة شبه مختفية فطلعت اللحمة المشكلة اللي الجزار اديهالي وسلقتها

الرز اللي فكرته بتاع كبسة طلعته وطبخته بالشعرية لان ما كنشي في وقت انقي رز

بالنسبة للحلو امي قالتلي على حاجة كنا بنعملها زمان وهي كيكة بالجيلي والكريمة. بتعملي الكيكة عادي وتقشطي الوجه وبعدين حطي طبقة كريم شانتيه علوها 1 سم وحطيها بالتلاجة ... الجيلي تكوني عاملاه وشايلاه بالتلاجه ولما تلاقيه مسك نفسه شوية تقومي جاية وتصبيه على الكيكة فوق الكريم شانتيه

 

عملت بابا غنوج وسلطة عادية وجبت سفن

 

هما لما جم قاموا بالواجب ... هما اتأخروا حوالي 4 ساعات فقلت هيجوا جعانين وقعدت اجهز الاكل ولما وصلوا راحوا عملوا السلطة وكملوا اللحمة اللي بتتسلق على ما انا رحت اصلي وارضع ابني لانه يا عيني كان جاب اخره من الجوع

 

ويا دوبك لسه هنخلص اكل ... راحت واحدة قامت عملت شاي واحنا بنلم مترح ما كنا بناكل راحت التانية جابت كيكة من التلاجة وقدمتها وهكذا

 

كان يوم جميل الحمدلله ... استرجعنا بعض الذكريات الحلوة واللي كنا بنعمله في الكلية

 

عارفة بعضكم هيعمل زي زوجي لما اتصل بيا وعرف بحوستي ... قاللي بسلة باللحمة المفرومة بس ... ههههههه

 

والله ما في احلا من البساطة والحمدلله ربنا بارك في الاكل وكفي واتفضل منه كتير وهما بسم الله تبارك الله ملوا اطباقهم اكتر من مرة وعجبهم الاكل وده اهم شئ

 

بنت الصادق انا لسه عايزة اعمل برنامج غذاء من الاسماك والحاجات دي لان جوزي بيموت فيه وفي كل حاجة من البحر وعايزة ان شاءالله يوم ما يرجع من السفر اكون محضرة له بوفيه كامل كأني عازماه على الاكل بره وعلشان كده عايزة استعد من دلوقتي.

شارك هذه المشاركه


رابط المشاركه
شارك

الحمدلله

سبحان الله.. الأكلة الهنية تكفي مية

 

ماشاء الله تبارك الرحمن انتي ابدعتي وفي ضمن إمكانياتك واهم حاجة انهم اتبسطو يا حبيبتي

واضح كمان انهم عساسيل اوي :)

 

بالنسبة لجوزك شوفي هو جي امتة وانا في الخدمة.. بس ياريت فعلا تستعدي من دلوقت بدل الحوسة الي انتي كنتي فيها دي :)

 

هم دول صحاب المدرسة او الكلية ؟

شارك هذه المشاركه


رابط المشاركه
شارك

احنا يا ستي صحوبية مشكلة ... يعني كنا في الخارج مع بعض وبندرس في جامعة واحدة بس كل واحدة بتدرس حاجة

 

انا كنت في الكلية و واحدة كانت في المعهد والتالتة كانت رايحة بعثة تعمل دكتوراه واتعرفنا عن طريق المصلى بالجامعة (الجامعة هناك مقسمة لمعاهد وكليات وحاجات تانية)

 

وطبعا لازم يكونوا عساسيل مش هما اصحابي بردوا <<< شايفه نفسي قوي

 

بالنسبة لزوجي هو راجع كمان 3 شهور ان شاء الرحمن بس انا عايزة اجرب الوصفات قبل ما يجي علشان ما تبقاش عزومة فاشلة ويتعقد

 

صحيح انا عملت البابا غنوج ... هما قالوا عجبتهم بس انا حاسة انها حامية شوية ... يا ترى ايه السبب؟ يا ترى كان المفروض ازود طحينة؟ بس اخاف طعم الباذنجان يروح منها وبعدين انا نسيت احط ليمون عليها

 

هو لسه فاضل منها فقوليلي واجرب في الحتة اللي فاضله علشان اعرف اظبطها

شارك هذه المشاركه


رابط المشاركه
شارك

السلام عليكم ورحمة الله وبركاته،،

 

حبيبتي أمة الرحمن تبارك الرحمن

 

ما بعد الضيق إلا الفرج (خطط وخطط وما فيش إلا اللي يكتب ربي له الحمد والشكر والمن والفضل )

 

ولنا في رسول الله قدوة حسنة فأحسنت حبيبتي بالبساطة وعدم التكلفة

 

لكن عندنا البوفيه شيء شبه لازم ولكن بحمد الله (لا يرمى ما بقي ولكن له مخارجه )

 

وأحسنت حبيبتي بانك جعلت نصب عينيك {وكلوا واشربوا ولا تسرفوا إنه لا يحب المسرفين}.

 

الحمد لله الآن أخت كور في العزايم ولازم تتحفينا

شارك هذه المشاركه


رابط المشاركه
شارك

بصي ياحبيبتي الباباغنوج مش بيتحطلها ليمون، بيتحطلها خل وزيت ذرة

 

وممكن تكون طلعت حامية عشان التوم كتير، عموما ابئي قلليه المرة الجية، بس عشان تحسنى مذاقها دلوقت حطيلها شوية طحينة ممكن هي الي تبأة قليلة

 

واي حاجة تانية انا في الخدمة

شارك هذه المشاركه


رابط المشاركه
شارك

الحمدلله يا صانعة الاجيال انها طلعت بسيطة وأتمنى من الله عز وجل أنه يكتب لكل عزوماتي ان تكون بسيطة وغير مكلفة

 

بنت الصادق: انا زودتها طحينة بس طعم الباذنجان راح خالص وانا كنت جعانة فأكلتها كده

 

انا فعلا حطيت توم كتير بس كنت فاكره التوم الكتير بيخليها حلوة ... طيب الزيت الكتير بيخليها حامية؟ ممكن اكون زودت الزيت كمان؟؟

 

انا اكلتها مرة وكانت جميلة جدا ... كان طعم الباذنجان باين خالص بس مع ذلك كانت حلوة ومش حامية بس للاسف مش هعرف اوصل للاخت اللي عملتها علشان اسألها

 

بالنسبة لليمون أظن امي قالتلي عليه وفي حد تاني كان كاتبها فيظهر ان ليها كذا طريقة

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×