اذهبي الى المحتوى
~ أم العبادلة ~

مناقشة التعليم المنزلي للأخت سميه محمد

المشاركات التي تم ترشيحها

لكل ام بتفكر فى التعليم المنزلى لاولادها لكن خايفه من المسؤليه :،

 

مسؤليه التعليم فى المنزل مش حاجه تخوف بالعكس انتى عندك مميزات وامكانيات تأهلك اكتر من اى حد انك تشيلى المسؤليه دى وتنجحى فيها

 

انتى الوحيده اللى عارفه قدرات ابنك ونوع شخصيته وطريقه استجابته للتعليم واى اسلوب بيكون افضل لتوصيل المعلومه

 

 

انتى الوحيده اللى هيكون عندك حرص مراعاه الجانب التربوى وانك تحفظى كرامه ابنك بجانب التعليم وده مش متوفر عند اغلب المدرسات وممكن الطفل يتعقد من التعليم كله عشان موقف غير تربوى من مدرسته

ومتعرفيش الموقف الغير تربوى هيكون امتى ومن مين وهل هتكونى محظوظه وتعرفيه اصلا ولا هيشوه نفسيه ابنك من غير ما تحسي

 

وانتى الوحيده برضه اللى تقدرى تكتشفى مواطن القوه عند ابنك وتنميها اكتر ومواطن الضعف وتقويها انما بره مفيش حد عنده الخبره بإبنك وﻻ الصبر عليه عشان يكون انسان مميز

 

لو انتى ام متفرغه مش بتشتغلى فالتعليم المنزلى هيكون خيار مناسب جدا وممتع ليكى وﻻوﻻدك

اهم شئ انك تتعلمى وتنمى نفسك اكتر عشان تعرفى توصلى معلومه باسلوب شيق وممتع ﻻوﻻدك يحببهم فى التعليم اكتر

وطبعا ﻻزم تتعودى انك تكونى منظمه وتعرفى تنظمى وقتك ووقتهم لتحقيق اقصى استفاده ممكنه من اليوم

 

كل سلبيات التعليم المنزلى هنتكلم عنها بالتفصيل فى بوستات قادمه ونشوف الخيارات المتاحه لتجنبها

 

وعلى فكره انتى مش محتاجه دعم كبير من اﻻسره فى البدايه ﻻن انتى تقريبا اللى هتعملى المجهود كله ونجاحك فى التعليم المنزلى هو اللى هيقنع اللى حواليكى بوجهه نظرك ويخليهم فى المستقبل يقدمو ليكى الدعم اللازم

 

الموضوع محتاج اراده وقرار جرئ وصبر ليس اكثر

 

والنتيجه اما تكون شخصيه طفل متميز جدا تعليميا وخلقيا

او على الاقل طفل عادى تعليميا ومتميز خلقيا

 

وفى كل الاحوال هيكون افضل من طفل تربي فى مجتمع بقيم مشوهه وتعلم فى منظومه تعليميه هى الاسوء فى العالم

 

يعنى المقارنه باختصار بين انك تحاولى طول الوقت تصلحى اخطاء المجتمع وتاثيره السئ جدا على ابنك ( تعليم مدرسي عادى )

او انك من البدايه تربي صح وتزرعى قيم تربويه وتعليميه مميزه وتدمجيه بطريقتك فى المجتمع الصغير اللى انتى بنفسك تختارى سلوكياته ( تعليم منزلى حر )

 

الفرصه ما زالت متاحه اننا نربي اولادنا ونعلمهم صح ونقدم لهم شئ ينفعهم طول حياتهم فقط لمن يملك اراده التغيير

  • معجبة 1

شارك هذه المشاركه


رابط المشاركه
شارك

التعليم المنزلى 2

 

بما ان البوست السابق تحدث عن الدافع وظهرت انتقادات وتساؤلات كتير لاسلوب التعليم المنزلى فلازم نوضح اصلا يعنى ايه تعليم منزلى .

التعليم المنزلى ان الام او من ينوب عنها بيدرس منهج اختيارى للطفل .

.

هل التعليم المنزلى معناه عدم حصول الطفل على شهاده ؟؟

اكيد لازم فى النهايه شهاده دراسيه عشان يقدر يكمل فى الجامعه وفى فرصه عمل مستقبلا والطريق لشهاده دراسيه يمكن ان يكون كالاتى :

*اما ان الطفل يلتحق بمدرسه عاديه ويتم الاتفاق بشكل ودى على عدم الحضور الا وقت الامتحانات ( الطفل يروح يمتحن فقط كل سنه للحصول على شهاده ناجح ومنقول للصف الاعلى )

*او ان الطفل ينقطع عن الدراسه تماما ويمتحن فى الشهاده الاعداديه ويعتبر من المتسربين من التعليم ( وياخد شهاده ناجح ومنقول للصف الثانوى ولا تؤثر على مستقبله الجامعى )

*او ان الطفل فى سن معين يدرس وياخد شهاده sat اون لاين ويكمل دراسته بره مصر

*او لو طفل مغترب بره مصر يلتحق بنظام امتحانات السفاره ( ابناؤنا فى الخارج )

دول اربع حالات ممكن الطفل يتلقى تعليم منزلى ويكون معاه شهاده تؤهله للجامعه بعد كده

.

.

سؤال ما الاشكال المتاحه للتعليم المنزلى ؟؟

1- ان الام تقرر تعليم ابنها فى البيت لوحدها فتبدأ تدور وتبحث عن مناهج تشتغلها مع ابنها ( النوع ده قليل الحدوث ومش دايما ناجح والبوست الجاى هنعرف ليه )

2- ان الام تقرر التعليم المنزلى وتكون محظوظه بوجود اسره قريبه منها ويكونوا مدرسه منزليه مشتركه تدرسها الام او الشخص المؤهل للتدريس ( النوع ده محتاج بحث دقيق للوصول لاسره فى نفس الظروف )

3- ان الام تقرر التعليم المنزلى وفشلت فى ايجاد اسره قريبه فقررت انها تعلم ابنها بمساعده خارجيه( فى الغالب بمساعده معلمه شابه حديثه التخرج )

.

الحل الاخير ده مناسب لعلاج عقبات كتير منها عصبيه الام الزايده فى تعليم ابنها , عدم مقدره الام على توصيل معلومه , تعب الام وقت الحمل او استقبال مولود جديد , الام العاطفيه اللى ممكن تتخلى عن مسؤليه التعليم كلها لمجرد ان مودها وحش , الام الغير مسيطره اللى ابنها مش متقبل يقعد يسمع منها معلومه

.

فى الحل الاخير لو حولنا الموضوع من تلقى مناهج فى المدرسه لتلقى نفس المنااهج فى البيت فى شكل دروس خصوصيه يبقى مفيش فرق كبير بين التعليم النظامى والتعليم المنزلى

نقطه الابداع الحقيقه هنا ان الام فعلا تقدر تحقق حلمها فى اى مناهج اضافيه باى شكل هى عاوزاه واى طريقه عرض تبتكرها لكن المنفذه هتكون مدرسه حديثه التخرج تقدر تنسق معاها فى كل خطوه يعنى الام فى هذه الحاله هى العقل المدبر لعمليه التعليم وتعوض افتقادها لمهارات التدريس بالاستعانه بمن يجيدها

 

طبعا الاعتماد على المدرسه الشابه اعتماد محدود للتلقى الاولى للمعلومه ودور الام انها تكمل الخطه الدراسيه بعرض افلام وثائقيه او تنفيذ انشطه ورحلات ميدانيه او مناقشات وعروض تقديميه الى جانب المسؤليه الكبيره فى اختيار المنهج والانشطه بما يناسب شخصيه ابنها وطبعا مسؤليه البحث عن المدرسه متفتحه العقل اللى تقدر تتابع معاها كل خطوه وتفهم بالظبط المعلومه المطلوب منها تدريسها للطفل وباى شكل بناء على توجيهات الام

.

فى الوقت الحالى التعليم المنزلى ضروره تربويه وعلميه لكن الواقع ان مش كل الامهات عندها مهارات التدريس او عندها الوقت والجهد الكافى.

.

بحيله بسيطه التعليم المنزلى الان متاح لكل الامهات ايا كانت صفاتك الشخصيه ايا كانت مسؤلياتك الاسريه ايا كانت درجه عصبيتك ، حضرتك تقدرى تكونى عنصر فعال جدا فى تعليم ابنك ، حضرتك ما زلت تقدرى تستخدمى الميزات العظيمه ليكى كام اللى قولناها فى البوست السابق وتبنى اعظم بناء فى الوجود ( انسان مبدع مميز علميا وخلقيا )

.

ملحوظه ،

ما زال باب الانتقاد مفتوح فى هذا البوست لاظهار سلبيات التعليم المنزلى

البوست القادم هنتكلم عن صفات الام اللى تصلح تكون معلمه لاولادها بدون مساعده خارجيه وهنتكلم عن المشاكل الخاصه بالام من حيث ( تنظيم الوقت ، وجود الحافز ، التحكم بوقت الطفل ، مشكله اوقات التعب اللى تمر بيها الام وازاى متاثرش على تعليم ابنها .)

.

والبوست اللى بعده هنتكلم عن المشاكل الخاصه بالطفل وخيارات ذكيه للتحايل عليها ( الجانب الاجتماعى ، نقص المنافسه ، التشجيع ، الجو المدرسي وذكريات المدرسه ، مواجهه المجتمع بعد انتهاء سنين التعليم المنزلى )

شارك هذه المشاركه


رابط المشاركه
شارك

(التعليم المنزلى 3)

 

فكره ضروريه لابد من توضيحها ولا بد ان تكون محل مناقشات مطوله للاسره قبل اتخاذ قرار التعليم المنزلى

اى قرار بناخده فى حياتنا بصفه عامه لازم يتحسب على اساس السلبيات والايجابيات وعليه بنحدد مين الافضل وبنختاره .

الموضوع مش سهل ومش دايما بيكون واضح ومحتاج مننا مجهود وتفكير كتير وبالاخص لو مرتبط بمستقبل اولادنا زى موضوع التعليم المنزلى .

 

 

قبل ما نقرر نوع التعليم لاولادنا المفروض اننا نكون عملنا الاتى :

بورقه وقلم ونكتب بوضوح جدا مقارنه بسيطه بين التعليم المنزلى والتعليم المدرسي وايهم سيكون افضل للطفل وبنسبه كام فى الميه من حيث :

( الجانب الدينى - الجانب العقائدى - الجانب الاخلاقى - الجانب العلمى - الجانب النفسي - الجانب الابداعى - الجانب الثقافى - الجانب الجسمانى والرياضى - الجانب الاجتماعى - الجانب الترفيهى - المهارات الشخصيه المكتسبه للطفل - علاقه الطفل بوالديه - علاقه الطفل باخواته )

دى اهم نقط المقارنه ويمكن الاضافه ليها على حسب اولويات كل اسره

.

المطلوب نحدد لكل جانب من دول نسبه مئويه لاحتماليه تحقيقه فى كل نظام تعليمى سواء تعليم مدرسي او تعليم منزلى

واحدد اي النظامين ايجابياته اكثر من سلبياته بالنسبه لاولوياتى

وهل النظام الاحسن فيهم هقدر بمجهودى اتغلب على سلبياته ولا هتكون عقبه كبيره تضطرنى الجأ للنظام التانى .

.

النقطه دى مرنه شويه لانها بتتحدد على حسب ظروف كل اسره فممكن اللى يناسب اسره معينه لا يناسب غيرها .

بس هيكون واضح جدا من البدايه السلبيات فى النظام اللى هنختاره وتكون نقطه بحث وتفكير ازاى نتغلب على السلبيات دى .

وطبعا قرار مهم زى ده مينفعش الام تاخده لوحدها لازم اتفاق تام بين الاب والام على النقطه دى لان هيترتب عليها التزامات مختلفه لكل طرف على حدى ولازم الاب والام يكون واضح جدا بالنسبه لهم كل واحد دوره ايه والتزاماته ايه فى القصه دى

 

طيب توكلنا على الله وفكرنا واستخرنا واختارنا نظام من الاتنين ، ازاى اعرف ان اختيارى صح ؟؟

بالتقييم

مهم جدا نسيب لنفسنا وقت من بدايه التجربه ( على الاقل سنه ) وبعدها نقيم نفسنا ، نمسك تانى نفس الورقه القديمه بتاعت السلبيات والايجابيات ونشوف هل تقديرنا للامور فى البدايه كان صح ولا مبالغ فيه ،، هل حققنا الايجابيات المطلوبه فعلا ونسبه نجاحنا فيها كام ،، هل تفادينا السلبيات ولا لسه موجوده وتاثيرها علينا شكله ايه ،،

. وهل حققنا الاهداف الواقعيه اللى حطينها من سنه فاتت ( وهنعمل بوست منفصل فى النقطه دى بالتفصيل جدا )

والاهم هل اختيارنا ككل كان يستحق فعلا التعب والمجهود والوقت المبذول فيه ولا النتيجه مش فارقه كتير .

اظن بعد سنه من التجربه هيكون عندنا خبره كافيه اننا نعرف الافضل نستمر ولا نغير خطتنا الدراسيه

.

لو عملتو المقارنه السابقه دى بتأنى واخدتو قرار التعليم المنزلى فعلا , يبقى تابعو معايا البوستات القادمه هنتكلم عن افكار مهمه وعن السلبيات وعلاجها

شارك هذه المشاركه


رابط المشاركه
شارك

(التعليم المنزلى 4 )

 

بعض الانتقادات الهامه للمقالات السابقه والرد عليها

 

سؤال فى نقاط هامة اعتقد أنها تجعل التعليم المنزلي صعب أن مكنش مستحيل وده من جانب الأم

١- الصبر على الطفل وعدم العصبية ؟؟

٢- توصيل المعلومة بشكل ممتاز يستوعبه الطفل ؟؟

 

الاجابه : لو الام عصبيه فعلا لدرجه انها مش قادره تصبر خالص فى تعليم ابنها ودايما تتحول الحصه الدراسيه من اول عشر دقائق لصوت عالى وممكن ضرب انصحها انها فعلا لو مش قادره تهدى عصبيتها يبقى متخاطرش بتدريس ابنها بنفسها لانها بتدمره من جانب تانى ، انما الافضل فى الحاله دى تستعين بمدرسه شابه الام تعطيها المنهج والتوجيهات اللازمه والمدرسه تتعامل مع الطفل وتفضل العلاقه طيبه بين الام وابنها وميكرهاش ويكره التعليم كله .

ونفس الحل ينطبق على الام لو منشغله بقدوم طفل جديد او تمر باى ظروف لا تمكنها من تدريس ابنها

 

^^^^^^^^^^^^^^^^^^^^^^

 

3- طب مهما كان مستوى الأم التعليمي تقدر توصل مع الطفل لفين ؟؟

 

الام دورها فى التعليم المنزلى مش مدرسه حتى المدرسه المتخصصه دورها فى التعليم المنزلى مش مجرد تدريس عادى والا فالتعليم المدرسي هيكون افضل من الناحيه العلميه

الهدف من التعليم المنزلى اننا نخلى اولادنا يكتسبو مهاره التعليم الذاتى انه يعلم نفسه بنفسه مش نديله العلم بالمعلقه زى ما معظم البيوت بتعمل .

الام وظيفتها اداريه توجه الطفل وتوفر له بيئه مناسبه ووسائل تعليميه مناسبه ومصادر للمعلومه والطفل ينطلق يحاول يفهم ويبحث ويسال لو شئ صعب عليه

 

طبعا مهاره التعليم الذاتى محتاجه سنين عشان نعلمها للطفل

بس مبدأيا اى ام تعليمها جامعى تقدر توصل لابنها معلومات المرحله الابتدائيه كلها لو كانت تملك الصفات الشخصيه للتدريس ، وبعد الابتدائي هيكون الطفل بيعرف يعلم نفسه بنفسه وهى بعد كده دورها اشرافى ، بس طبعا لازم تطور نفسها للمناهج بعد كده او تستعين بمتخصص للمواد الصعبه يشرح للطفل الاجزاء الصعبه للمنهج

 

^^^^^^^^^^^^^^^^^^^^^^^

 

4- الاحتياج لمدرس خارجي للمساعدة يبقى انتقلنا للمدرسة؟؟

 

لو الامر هيختزل فى مجرد دروس خصوصيه فى البيت يبقى التعليم المدرسي احسن علميا

لكن لو هندخل معانا مهاره التعليم الذاتى ومهاره عرض المناهج باسلوب مختلف يبقى اقتربنا من معنى التعليم المنزلى مع المحافظه على المكاسب الاخلاقيه الموجوده فيه

 

^^^^^^^^^^^^^^^^^^^^^^^^^

 

5-ازاى اوفر معامل وأدوات بمعنى أوضح كل ما تحتاجه العملية التعليمية من أدوات؟

 

معظم الادوات التعليميه المتوفره فى المدارس رخيصه جدا ان وجدت اصلا يمكن اغلى شئ صادف معظمنا داخل المدرسه كان الميكروسكوب فى المرحله الثانويه وده تمنه لا يتعدى 200 جنيه.

 

^^^^^^^^^^^^^^^^^^^^^^^^^^^^^^^

 

6- حصص زي التربية الزراعية والاقتصاد المنزلى والصناعة هندرسها ازاي بالبيت؟؟

 

الاصل فى التعليم هى البيئه المفتوحه والاستثناء هو حصر هذه البيئه فى حجره دراسيه .

التربيه الزراعيه ممكن بسهوله نزرع نباتات فى البيت نزور حدائق او حقول

حصص الاقتصاد المنزلى اى ام فى مطبخها وانشطتها الفنيه تقدر تقدم حصه رائعه افضل كثيرا من حصص المدرسه

 

^^^^^^^^^^^^^^^^^^^^

 

7- زيارات المصانع ازاي هتقدر نوفرها كأفراد ؟؟

 

المصانع لو الدنيا واقفه على زياره مصنع يعنى مع انى اعتقد ان اغلبنا تخرج من الجامعه ولم يزر مصنع فى حياته فاعتقد البديل الافضل مشاهده فيديوهات لمصانع متقدمه عالميه وكتابه تقارير عنها

 

^^^^^^^^^^^^^^^^^^^^^^

 

8- انتي كأم ازاي هتقدري توفقي بين اهتمامك بشخصك وبيتك وواجباتك الاجتماعية وتعملي مدرسة داخلية وانتي المديرة والمدرسة والإشراف يعني نقدر نقول هتكوني عشرة*١ ؟؟

 

بشويه تنظيم وقت وبعض الحيل البسيطه تقدرى توفرى وقت لنفسك طبعا وده بوجه عام وتحت اى ظروف ( هنتكلم بالتفصيل عن تنظيم الوقت بعد كده )

ومن لم تجد عندها القدره والوقت على لعب كل الادوار مجتمعه هيكون خيار مناسب ليها الاستعانه بمدرسه وتكتفى الام بدور الاشراف والاداره والتوجيه

 

^^^^^^^^^^^^^^^^^^^^^

 

9-ازاي هنستطيع كاسرة أب وأم وأطفال تواجه التحديات والتعليقات من اقرب الناس والمحيطين لما حد يسئل ابنك ابسط سؤال انت في سنة كام حبيبي؟؟

 

لو هنمشي فى كل خطوه فى حياتنا بمبدأ الناس هتقول ايه هنبقى مجرد نسخ مكرره مشوهه من الافراد المحيطين بينا لو اخدنا قرار التعليم المنزلى لازم نكون مقتنعين بيه مليون فى الميه وواثقين من صحه اختيارنا ساعتها مش هيفرق معانا كتير تعليقات الناس

بالنسبه لاولادنا هما هيدرسو عادى ويدخلو امتحانات عادى زيهم زى اى طالب فى اى سنه الفرق اننا بنحميهم من ضياع وقتهم وعقولهم واخلاقهم جوه المدرسه

 

^^^^^^^^^^^^^^^^^^^^^^^

 

10- المنهج واختياره في حالة عدم الالتزام بمنهج بعينه؟؟

 

المناهج وكيفيه اختيارها وازاى نعرف الكويس من الوحش والاسس اللى هيتم بيها الاختيار هنتكلم عنها بالتفصيل جدا فى المستقبل

 

^^^^^^^^^^^^^^^^^^^^^^^

 

11- هل نفضل التعليم المنزلى فى كل دول العالم ام فى مصر والدول الضعيفه تعليميا فقط ؟؟

 

طبعا لو متاح الالتحاق بمدرسه فى دوله متقدمه بتعلم ولادها تعليم متميز يبقى التعليم المنزلى مش اختيار مطروح اصلا ....

التعليم المنزلى مجرد فكره نتجت كبديل للحاله السيئه جدا للتعليم فى مصر وبعض الدول العربيه

وطبعا لكل قاعده استثناء ظهر ناس فى الغرب فضلو يعلمو اولادهم منزليا اسبابهم تختلف بتاكيد عن اسبابنا وان كانت اسبابنا احنا اقوى كثيرا منهم

شارك هذه المشاركه


رابط المشاركه
شارك

و عليكم السلام ورحمة الله وبركاته

 

ما شاء الله ,

الأخت كفت ووفت بفضل الله

موضوع جميل جداً ومهم كذلك بفضل الله

 

العالِم الفرنسي " بيير كوري " كان من صغره والده بيلاحظ إنه ذكي أوي زيادة عن سنّه فرفض يدخله مدرسة وقتها عشان ذكاؤه ميقلش

وعلمه هو بنفسه , لإن والده هو كمان كان عالم فيزياء

وبفضل الله , الابن ده بقى أستاذ في جامعة السوربون ,و تزوج " ماري كوري " وخادوا هم الاثنين جايزة نوبل في الفيزياء بسبب اكتشاف الراديوم : ))

 

مع إنه مدخلش مدرسة : )

بس لإنه كان عبقري أصلاً بفطرته ما شاء الله , وكمان عشان تعليم والده كان نبيه ونابغ جداً , مش أب عادي : )

 

ده أكتر مثال تعليم منزلي ناجح بفضل الله : )))

  • معجبة 1

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×