اعتبريني معاكى في بيتك ومعمقة غرفة النوم شغل فنادق

[انجي حمدي 17]

السلام عليكم ورحمة الله وبركاته

موضوعنا النهردة طويل لكن بجد ممتع وجميل

وهيفرق معاكى بجد فى بيتك حتى لو عمرك ما نظفتى ولا رتبتي

وحتى لو فرشك قديم معايا هتجددي وهتغيري ودا طبعا هينعكس على حياتك وعلى نفسيتك بصفة عامة

اول حاجة هنتكلم عنها هتكون غرفة النوم الرئيسية بتاعة الزوجين

هنعرف ازاى هننضفها وازاى هنرتب كل جزء وكل فتفوتة فيها وكمان ازاى هنرتبها وننظمها ونخلليها احلى

نبتدي بسم الله

واول حاجة نشوف الغرفة وهيا متكركبة

ال

 

 

 

 

اظن مفيش اكتر من كدا واظن كمان ان اللى غرفة نومه كدا نفسيته فى الدمار

المشكلة كمان ان اللى بتسيب الحالة توصل لكدا مش بيبقى ليها اى نفس تبتدي

علشان كدا باقللك النهردة تخيلي بجد ان جرس البيت رن ولقتيني جيت ودخلت معاكى وقلتلك يلا بينا ننظف غرفة النوم اول حاجة

وادخلى وابتدى واعتبرينى معاكى ايد بايد واتكلمى معايا ونفكر سوا

 

طبعا الاوضة وهيا بشعة بيكون فيها ايه؟

اول حاجة

# قمامة

مناديل

ورق وفواتير

كروت

قشر برتقان او لب

 

تانى حاجة

# ملابس

نظيفة وما اتطبقيتشي

مش نظيفة ومقلوعة ومرمية فى اى حتة(فيه موظفات مطحونات بتبقى جاية من برة بجد نفسها تقلع باسرع ما يمكن علشان بس ترمى جسمها على السرير ودى بقى مش هتقعد تعلق العباية وتروح تحط الشراب في الغسيل وترجع تطبق الطرحة وووووو: فيه حل ممكن يساعدك : فيه اسبات شبك صغيرة ممكن تحطيها في الغرفة ولما تقلعى تحطي فيها لغسيل اللى عاوزة تغسليه وتبقى تفضيها بعد كدا فى الغسيل اسهل واشيك من ان الهدوم تبقى مرمية فى كل حتة وعلى الارض والسرير )

شرابات

ارواب

فوطة

تالت حاجة # اغطية السرير طبعا اللى بتكون مفركشة والمخدات واقعة على الارض

شباشب

طيب يا ترى هابتدي من فين؟

ما انتى لازم تحددي نقطة وتبتدى من عندها لانك لو دخلتى كدا بجد هتدوخي وهتتعبى قبل ما تعملى ربع الغرفة وهتقولى المرة الجاية او مش قادرة بقى يوم تانى

افتحي الشباك يهوي الاوضة

وتبصي على الملابس

شيلي كل الملابس والمفارش اللى تلاقيها قدامك والفوط وكل شيء بيتلبس

اللى عايز يتغسل ع الغسالة

والنظيف افتحى الدولاب وحطيه زى ما هو دلقتي

او علقيه زى الروب مثلا او الغيار اللى زوجك هيلبسه لما يرجع

او الاسدال جوة الدولاب

فضيت الاوضة سنة

هيبتدى الهوا يلاقى مكان يتحرك فيه

طيب بعد كدا هتعملى ايه؟ هتشوفي الغطا اللى على السرير لو هيتغسل انقعيه في البانيو او اغسليه في الغسالة

ولو نظيف طبقيه وبرده حطيه في الدولاب دلوقتى

شيلي مخداتك كمان فى الدولاب او فى غرفة تانية وقلعيها الغطا علشان يتغسل

فاضل الملاية ....... لا سبيها مكانها دلوقتى ليه؟

علشان لما تشيلي العنكبوت من السقف وتنفضي التراب ما ينزلشي على المرتبة

الملاية هتتغسل لكن المرتبة صعب

هييييييه الاوضة خست عن الاول

ناخد الباسكيت اللى فى الغرفة فى ايدنا ونمشي نلم فيه كل القمامة اللى شفناها من شوية انا وانتى لما بصينا على الاوضة ونقفل الكيس ونشيله فى الباسكيت الكبيرة ونغسل الباسكيت

ونقلبها على وشها تنشف

يبقى انا وانتى كدا شيلنا الملابس والمفارش والغطا

وكمان شيلنا كل القمامة

نيجي بقى لكل اللى فوق التسريحة والكمودينوهات بتاعتنا والشفونيرة

لو برفان او فازات او اى انتيكات لميها على حوض المطبخ علشان تتغسل او تتلمع

وتعالى على المكياج افتحى الدرج وزقيه بايدك كلله ينزل الدرج

وشيلي الادراج على برة

واى تابلوهات متعلقة كمان شيليها من على الحيطة بالراحة ونشيل الستاير على الغسيل

كدا خللينا الاوضة قرعة تماما مفيهاش غير الموبيليا والملاية بتاعة السرير وبس

هنجيب المقشة الطويلة ونلم بيها كل العنكبوت

ناخد المقشة ونكنس كل الحيطان علشان التراب اللى عليها ينزل

وننفض بقى المرتبة ولو نقدر نطلعها فى الشمس يبقى جميلل جداونمسح النجفة

وبعدين نكنس الارض كلها وما ننساش الحز العالى اللى بيبقى جنب الحيطان دا نكنسه بالمرة ونكنس ورا الكمودينوهات والتسريحة والشفونيرة والشماعة الخشب كل زاوية فى الاوضة

ونجيب 2شفشق او طبق عميق ونحط في واحد اى منظف عندك ومعاه سلكة ناعمة او ليفة على حسب الدهان بتاعك وتغسلي جزء وتشيلي الصابون بفوطة مبلولة من الطبق التانى اللى هتمليه مية لوحدها او مية بمعطر او خل فقط

وعلى فكرة اجمل شغل للبيت بجد لما تمثلي انك وراكى خروجة مثلا وعاوزة تخللصي بسرعة هتلاقي نفسك بتشتغلى اسرع من انى ابقى نايمة على نفسي وعمالة اتاوب واقعد كل شوية اريح

 

هوب يلا يلا عايزين همة خللينا نلحق نخللصها فى زمن قياسي يا بنات يلا

خللصنا الحيطة لو مش نظيفة نظفناها ولو مغسولة قريب لمعناها بفوطة مبلولة

# وطبعا ما ننساش اننا ما نجيبش مية عند الكهربا واحنا بننظف

كفاية نلمعهم بالفوطة المعصورة وبس

بعد كدا نيجي

للارض احنا كنسناها يبقى هنمسحها بقى وبرده نمسح تحت كل حاجة موجودة في الغرفة وممكن تتحرك من مكانها

نشيل الملاية بقى خلاص ونلمها على الغسالة علطول

خللصنا مسح

هنلمع البرفانات والبراويز ونسيبهم ينشفوا

هنجيب الادراج اللى خرجناها برة وندلق كل اللى فيها على السفرة بالراحة وننظفها من جوة ونفرشها ونرص علب فاضية او بولات بلاستيك او مجات ونرص فيها حاجتنا بشكل ظريف

ولو عندك حاجات بتقع يعني قاعدتها مدوة مثلا مش بتقف كويس اربطي استيك ملابس في طريفين الدرج من جوة على جنب يعني الاستيك مش هيبان من برة خالص ووقفي الحاجة دى والاستيك هيمسكهالك وهتبقى منظمة

رجعى الادراج في الاوضة مكانها وطبعا فى الوقت دا هيكون المية اللى على الارض نشفت تماما احنا صحيح نشفناها بس برده بيبقى سهل اوى علامات رجلينا تبان عليها

 

بملمع الخشب بقى ونلف على الموبيليا كللها تلميعة سريعة هوب يلا هاسبقك يلا بسرعة

ونلمع المراية وازاز الكمودينو والتسريحة بمية وخل والنجف ماتنسيهوش

وما تنسيش كرسي التسريحة والشماعة الخشب الكبيرة

كدا تقريبا الوضة خلصت

( تحت السرير والدولاب ممكن يتعملوا فى يوم لوحدهم علشان بيكون فيهم حاجات كتير محتاجة شغل وتطبيق وترتيب وطبعا تحت السراير المصرية مش زي اى سراير في العالم )

 

رجعى بقى التابلوهات مكانها وكمان المفارش على التسريحة والكمودينو لو بتحطي وياريت يبقوا تحت الزجاج مش فوقه لانهم هيفضلوا متساويين ومش هيبقعوا من العصير وغيره وكمان مش هيتزحلقوا كل شوية او يطيروا من الهوا بتاع المراوح

 

 

ماتنسيش كمان انك ممكن تغيري مكان السرير في اي حتة انتى عاوزاها ولو المكان مش مقضي على فكرة انتى ممكن تحاولى تغيري لمدة شهر واحد حتى

تشيلي كمودينو من الاتنين تحطيه فى المكان الفاضي جنب الدولاب او حتى جوة الدولاب نفسه زى التربو كدا

المهم بجد انك لازم تشعرى بالحياة ولازم تحسي بالتغيير

ولازم لما جوزك يدخل الاوضة اول حاجة تسمعيها ايه دااااااااااا

الاوضة اتغيرت

الله ينور

يبقى اللى ممكن تغيريه , مكان السرير

ومكان التسريحة

كمان ممكن تبدلى فى الستاير لو لونها يليق يعني تجيبي بتاع اوضة فى اوضة

او تشيلي الستارة التقيلة وتسيبي الخفيفة لوحدها

اهما حاجة في الاوضة كام يا بنات طريقة فرش السرير

مش كل يوم تطبقى اللحاف ولا المفرش ولا البطانية وتحطيها على حرف السرير كدا

مش منظر بصراحة لا عاوزاكى تغيري

بصى

 

 

حتة شريط عريض زي الطرحة ومحطوط على طرف السرير ولايق على لون الغرفة او على لون الستارة وممكن تليقيه على السجادة كمان

 

او تفرشي مفرش العروسة عادى

 

 

 

كمان فيه الطريقة دى

بتفرشي اللحاف او المفرش على السرير كلله وبعدين تطبقيه تلات اتلات وتحطيه على طرف السرير

 

 

 

 

 

او تفرشيه على السرير كلله لحد ما تغطي المخدات كمان وبعدين تاخدى الجزء اللى مغطي المخدات وتطبفيه لورا على باقى المفرش

 

 

# الدولاب

في اليوم اللى هترتبي فيه الدولاب محتاجة الاتى

مفارش , معطر, صناديق او تربو صغير استانليس او حواجز خشبية

ليه؟

علشان بعد ما تنظفى الدولاب وتمسحيه كلله تفرشيه اشيك بكتير من ارض الدولاب الخشب ما تبى باينة

وتعطريه خصوصا دلفة زوجك علشان تفتحى نفسه

والصناديق دي ممكن تكونى عاملاها من كرتونة او فيه منها بيتباع جاهز زى الهدايا كدا فى المكتبات

المهم شكلها يبقى شيك ما تحطيش الكرتونة زى ماهيا في الدولاب بيبقى منظرها وحش بجد

الصندوق دا

بيوسع ادراج برة ويديكي فرصة تعيني فيها حاجات محيراكى مش لقية ليها مكان

ممكن تحطي فيهم

الشرابات

الطرح

الملابس الداخلية

الجرافاتات

الاحزمة لو مش متعلقة لفيها

الكابات والطواقى

المحافظ

 

وممكن كمان تحطي الحاجات فى تربو صغير او التربو الكبير اللى بادرج زى كدا

 

 

 

 

 

 

كمان الواح الخشب يا بنات ممكن تلصقيها بغراء الخشب او اى لصق قوى واقفة كدا علشان تعملى بيها فاصل فى نفس الدلفة يعني تقسمي الدلفة الطويلة نصفين اليمين عبايات واليسار مثلا ترنجات والميزة ان الفاصل دا هيخللى الصفوف ما تقعشي

 

وممكن تحطي التربو الصغير ابو دوربن جوة الدولاب

 

زي بتاع الحمام على الرف نفسه جوة الدولاب وترصي فيه الحاجات الصغيرة

 

 

 

 

 

 

 

 

 

 

وطبعا ما تنسوش المنظمات الجاهزة زى كدا

 

 

 

 

 

 

 

 

 

 

طبعا الصور دى من على النت للتوضيح وممكن يكون فيه منها من المنتدى لكن استخدمتها لغرض الشرح

 

******

 

#عاوزة اقول حاجة كمان

فيه بنات مش بتكون اختارت الحاجات على زوقها او مكانتشي واخدة بالها ان الاوضة مش لايقة على بعضيها

انتى تقدرى تصلحي كل شيء

هاقللك ازاى

لو مثلا السجادة مش لايقة انتى ممكن تخللى شكلها مقبول ازالى

ممكن تعلقي تابلوه مرسوم او تجيبي بوستر وتبروزيه

المهم انه يكون فيه لون السجادة مع لو السرير او مع لون الستارة

العين وقتها لما تيجي تبص للمنظر بصفة عامة هتحس انه لايق اوى مع انه فى الاول مكانشي ماشي مع بعض

التغيير في حد ذاته بيقضي على الملل ليكي وكمان لزوجك بيحسسه ان فيه حاجة جديدة بتحصل سواء في بيته او مراته او حياته

لان الرجالة متطلبة بطبعها وملولة جدا

دا ممكن ياكل اكلة عند حد هو اصلا مكانشي بياكلها وكمان يشعر فيها

لانه انسان ملول بيزهق بسرعة وبيحب التغيير خصوصا التغيير اللى بييجي بعد فترة من الصمت مش اللى كل يوم لانه بيحسسه بهرجلة ولخبطة وبيتعود عليه خلاص فمش بياخد باله حتى ان فيه تغيير ماهى كل يوم قالبالى الشقة

مثلا تحطي خدادية مربعة على السرير فيها لون الستارة مع لون المفرش او مع لون السجادة , وممكن تعمليلهها الغطا دا بطرحة او ايشارب قديم

عيونك علطول هتخطفها الالوان وهتحسي ان كل حاجة ماشية مع بعضها

ممكن كمان تجيبي فازة او مج للفرش او اى زينة صغيرة او مراية تسريحة وتدهنيها لو الحيطة او المفرش

بجد انتى ممكن بلمسات بسيطة تبصي تلاقي اوضة نومك بقت زى بتاع الفنادق بالظبط

اصلا الفنادق حاجاتهم سيمبل جدا ورقيقة ودا اكتر شيء بيشدنا لاننا بنحس براحة نفسية وبترتبط الراحة دى فى دماغنا انها احلى

مع انك ممكن تبصي في الفندق تلاقي فى الاوضة كللها

سرير واحيانا كمودينو واحد

وستارة وتسريحة صغيرة وممكن تكوم كمان مش لون الدولاب ومع ذلك

بنعمل كدا ونقول تحفة

 

دا بالنسبة لغرفة النوم وان شاء الله لينا تكملة مع باقى الشقة ونحولها لشغل فنادق

واكيد اكيد لو افتكرت حاجة هارجع اضيفها للموضوع وارجوا انى ما اكونشي ضيفة تقيلة عليكوا في الموضوع

ولا فى البيت

 

انا عارفة انكوا تعبتوا في الشغل النهردة لكن بجد

تستاهلى احلى سقفة

وكمان كل واحدة هتنظف انا مستنياكي تيجي تحكيلي عملتى ايه وغيرتي ايه في اوضتك

وفيه موضوع ليا هنا هيساعدكوا فى الترتيب اسمه الشطارة مش في الشوبينج كل يوم

 

فيه ملحوظة مهمة يا بنات نسيت اكلمكوا عنها

وهيا الترويق العادى بتاع كل يوم

غرفة النوم بتبقى نصين الاول السرير

والتانى باقى الغرفة

عودى نفسك كل يوم اول ما تفتحي عيونك وانتى قايمة لو الملاية هتتغير شديها في ايدك وانتى ماشية هتوقعى المخدات ع السجادة وتدخلى الحمام تحطي الملاية في الغسيل كل دا مااخدشي خطوة زيادة لا دا اونتى في طريقك اصلا

ولو مش هتغيريها يبقى نزلى الغطا ونفضيها وافرشي الغطا زى ما اتعلمنا او طبقيه وحطيه في الدولاب لوقت النوم او سبيه ع السرير ودى اقل حاجة افضلها

صدقيني مش هتاخد اكتر من الوقت اللى هتتمطعى فيه وانتى نازة من السرير بس فى لحظة هتكونى خللصتى نص المهمة

ادعولى حبيباتى بالولد الصالح

وماتنسوش التقييم انا مش فاكرة بقالى اد ايه باكتب وارتب فى الموضوع بس كل اللى متاكدة منه انكوا هتقدروا تعبى وهتفرحونى بردودكوا واد ايه اتحمستوا وعلمتوا لحد فين

استودعكم الله والسلام عليكم

تم تعديل 16 فبراير, 2016 بواسطة سُندس واستبرق
حذف الروابط من الكلمات وصور النساء

[ام جومانا وجنى 515]

السلام عليكم ورحمة الله وبركاته

 

جزاك الله خيرا وربنا يرزقك بالولد الصالح

[راماس 860]

وعليكم السلام ورحمة الله وبركاته

البارحة قرات الموضوع جيت ارد ولكن اتحمست وقمت رتبت الغرفة عندي قبل عشان ارد بنفس مفتوحة

الموضوع رائع والتسلسل حلو وقيم

ولكن بعد الترتيب والتعب تركت هبة في الغرفة يا دوب خمس دقايق على اساس انها بتولكل لعبتها وبتغيرلها بالنبرز

طلعت البنت فرجانه بجواريرها بقت متربتبة وقامت تشيل منها وتلبس لعبتها وانا بعد النظر ليها وعيوني تطلع من مكانها حطيت ايدي على شعري نتفت منه شوية وخرجت وسيبت كل حاجة : )

دلوقتي داخلة اعيد الترتيب الموضوع فتح نفسي من تاني

[انجي حمدي 17]

@راماس

ربنا يخليهالك ويقويكي علي كل شغل البيت