اذهبي الى المحتوى
~ أم العبادلة ~

حواديت ايناس و الأطفال

المشاركات التي تم ترشيحها

post-452676-0-68548000-1418170059.gif

 

صفحة متخصصة في التنمية البشرية للطفل تعالج مشاكله بإسلوب قصصي شيق و غير مباشر و تقدم نصائح للمربين و أولياء الأمور ( للأمهات فقط )

بقلم الأستاذة إيناس

شارك هذه المشاركه


رابط المشاركه
شارك

احترمي أشيائك تحترمك

حدوتة هتكلمك ازاي نزرع فيهم فكرة النظام والترتيب

ماما تعبت جدا من نيهال لأن نيهال مش منظمة خالص ودايما ترمي هدوم المدرسة في اي مكان وتيجي تسأل ماما عليها وترمي كتبها ولعبها...مش مهتمة بالنظام خالص "،،

في يوم ماما قالت لها'"عارفة ليه يا نيهال انتي مش بتلاقي حاجاتك؟؟""عشان انتي مش بتحترميها فهي مش بتحترمك.."

نيهال استغربت "هي الحاجات اصلا بتحس ؟"

ماما قالت "الحاجات مش بتحس بس مش بتمشي من مكان اللي احنا حطيناها فيه واحنا بنحس ف ليه منحطهاش في مكان محدد؟"

نيهال مهتمتش بكلام ماما بس جات تدور علي المقلمة ما لقيتهاش!"ماما فين المقلمة"

ماما قالت "هي المقلمة مكانها فين؟"

نيهال قالت"الشنطه طبعا "

ماما"خلاص شوفيها في الشنطة!""المقلمه ما بتمشيش ولو حطتيها في مكانها هتلاقيها!"....

نيهال فكرت... (المقلمة ما بتمشيش؟ فعلا هي ما لهاش رجلين. ...طيب ليه كل يوم اتعب في التدوير عليها مدام ممكن احطها في مكان والاقيها!)..

ماما ما ساعدتش نيهال في التدوير و المقلمه طلعت في الحمام ع الغسالة!....

نيهال قررت تجرب اللي ماما قالته حطت المقلمة في الشنطة ....لقيتها في الشنطة ...

الحياة بقت اسهل ووقت التدوير ع الحاجات اتوفر ....

نيهال ماما سمعتها بتقول لصاحبتها في التليفون (احترمي حاجاتك عشان تحترمك)

تم تعديل بواسطة ~ أم العبادلة ~
  • معجبة 2

شارك هذه المشاركه


رابط المشاركه
شارك

حدوتة هتفهمك حاجتين ازاي اتعامل مع الطفل اللي بيصمم علي رأيه...

وهتفهمك يعني ايه ذكاء شخصي عند الطفل

زياد ...من هو صغير له رأي وبيعرف يختار...

لو ماما اخدته وهي بتشتري اللبس..تعجبه حاجات ويرفض حاجات...وماما تتغاظ...

وفي المدرسة عارف يصاحب مين ومين لأ!...

ولما يجي يذاكر يبدأ بالعربي وما يرضاش يبدأ بالانجلش زي ما ماما بتقوله..

ماما دايما بتقول "عنيد"...

زياد بيحس ان ماما متغاظة منه علي طول!

وفي الاجازة قال لها انه مش عايز يشترك في السلة عاوز الهاند بول ...

ماما قالت له"طبعا ما انت لازم تعاندني"؟؟؟؟؟

حتي في الاكل ...زياد بيحب الموز اوي لكن ماما بتقوله ياكل تفاح،،،،

مفيش تفاهم بين زياد وماما...

زياد بيحب ماما لكن هي دايما بتقول انه عنيد....

بابا كان مسافر ورجع ...زياد فرح اوي ...بابا طلب من زياد..انه يتفرج معاه علي كرة القدم...

زياد قال"معلش يا بابا انا مش بحبها"

ماما اتغاظت من زياد....

لكن بابا كان مش متضايق خالص وقاله وهو بيبتسم"امال بتحب ايه"

زياد اندهش ورد "بحب ماتشات التنس الارضي"...

بابا قال "ايه رأيك نتفرج انا وانت عليها وعلي الكورة انا هاشاركك في التنس وانت في القدم". .

زياد عجبه اوي اقتراح بابا ..

تاني يوم كان فيه موز وتفاح

زباد استعد لخناق ماما معاه لازم تاكل تفاح لكنه اتفاجئ ان بابا قال "تاكل موز ولا تفاح يا زيزو"!!!!

زياد اكل الموزة وهو مندهششششش!!!!!!

زباد ما بقاش عنيد خالص لان بابا فهمه واصبح بيعامله بطريقه تديله حق الاختيار ...

ماما لما شافت اد ايه زياد بقي مريح قررت ان هي كمان تخيره....

لما بجيبو اللبس "ده ولا ده يا زياد" الاتنين عاجبين ماما... وزياد هو اللي بيختار....

البيت بقي اهدي كتير....

زياد في يوم رسم بابا لابس لبس سبايدر مان!

بابا استغرب بس زياد قال باعجاب "انت بطل يا بابا"

تم تعديل بواسطة ~ أم العبادلة ~
  • معجبة 1

شارك هذه المشاركه


رابط المشاركه
شارك

حدوتة ميادة هتكلمك عن تأثير عصبية الاب ولو كان بيشتم علي نفسية الطفل...

ميادة جميلة ورقيقة بس اتعودت تحط ايديها علي ودانها كتير

هي مش عيانة ولا ودانها بتوجعها ، هي بس بتتضايق من صوت بابا العالي والشتيمة اللي بيقولها لماما ولاي حد يزعله....،،

ميادة مش بتحب تسمع الشتيمة ولا الزعيق، ، وهي عارفة ان بابا طيب وبيرجع يتأسف لماما ...وبيجيب لميادة لعب

بس ميادة مش بتحب تخرج معاه عشان بيتعصب كتير ونفسها يوم الجمعة ما يخرجش بابا معاها!!

ومن كتر ما ميادة بتسد ودانها ساعات ما بتسمعش كلام عادي حواليها زي (اغسلي سنانك،،، هاتي مايه)

لو كان بابا بيزعق ... ميادة مش بتسمع الكلام العادي...

**وفي يوم حزين بابا وماما اخدوا ميادة النادي .... وماما طلبت الغدا وبابا راح يمرجح ميادة علي ما الاكل يجي ...

بس فيه راجل تاني مع ابنه عصب بابا بسبب حاجة تخص مين يقعد ابنه علي المرجيحة !

الراجل التاني كان بيتكلم بهدوء بس بابا بدأ يزعق....

وميادة كانت لسه منزلتش من علي المرجيحة بس هي بتكره زعيق بابا مدت ايديها تسد ودانها المرجيحة بتتحرك...ياااااا......

طبعا ميادة وقعت وقعة جامدة وبابا والناس جريوا عليها بس المؤثر انها كانت لسه حاطة ايديها علي ودانها !!

الدكتور عالج جروح ميادة بس للاسف طلع فيه كسر في دراعها واحتاجت جبس!!

الدكتور كان بيقولها (ليه بس يا ميادة تسيبي المرجيحة )....

ردت (عشان ما سمعش زعيق بابا)......

اد ايه كان بابا حزين كان بيفكر وبيفتكر شكل ميادة وهي واقعة علي الارض ولسه ايديها علي ودانها!

اد كده انت بتأذي مشاعرها بالزعيق والشتيمة ...

الجبس اللي اتحط علي دراع ميادة كأنه كسر في قلب بابا

ماما وميادة اتفاجئوا بمعني الكلمة من تغيير بابا بيجاهد نفسه مر يومين مزعقش وبعدين بقو تلاتة .....

كل ما يفتكر شكل ميادة يصمم انه مش هيزعق ولا يشتم.....

يوم فك الجبس كان بابا اتغير خالص ميادة لحد النهاردة محتفظة بالجبس وكاتبة عليه اسعد ايام حياتي!!

شارك هذه المشاركه


رابط المشاركه
شارك

حدوتة هتفهمك نفسيتهم تجاه المولود الجديد

جني...كانت فرحانة ان ماما ف بطنها بيبي...اخيرا هيبقي عندها اخ...

ماما كان شكلها تعبان بس بتبوس جني وبتقولها لما البيبي يجي هتلعبي معاه وهيحيب لك هدايا...

جني استحملت...يوم طويل من غير ماما ولا بابا ولا تيته...

كانت قاعدة مع جدو منتظرين ماما ترجع ومعاها البيبي...

ماما رجعت هيييه...بس شكلها تعبان ...

ماما ابتسمت في وش جني....جني عاوزة تحضنها...تيته قالت""بالراحة ماما تعبانه "

جني اتكسفت....ماما مقالتش حاجة

جني كانت فرحانه اوي بالاخ النونة....وباسته...بس بابا قال لها "ما نبوسش الصغيرين جامد كده"

جني اتكسفت...وماما كانت مشغولة

البيبي كان معاه عروسة ماما قالت "عمرو اخوكي جاب لك دي"

جني فرحت اوي...وقالت "شكرا بس هو جابها ازاي ده صغير"

تيته قالت "ما تاخديها وخلاص..."جني اتكسفت

جني مش مبسوطة حست انها في سجن بعد ما كانت بتطلع ع السرير براحتها

ماما دايما دلوقتي تقولها"حاسبي عمرو""انتي مش شايفة"

ماما ساعات تبتسم لجني ...وساعات لأ بس دايما تعبانة وزهقانه....

وبابا كل ما يشوف جني بتنط يقول "بس ...عمرو نايم"....

جني بتقول لنفسها لما عمرو يبكي باليل "ليه محدش بيقول له جني نايمة"

"عشان هو مهم ...وانا لأ"

جني خبطت عمرو يوم العقيقة وهي مش قاصدة

تيته زعقت"خلي بالك"

جني قعدت بعيد تفكر "انا مش عايزة عمرو ده...ايه فايدته...الناس بتحبه مع انه علي طول عياط...اه.....العياط...العياط"

جني بدأت تعيط.....تيتة شافتها مالك يا جوجو؟

(اول مرة تيتة ترجع تحبني.... ) جني بقت علي طول بتعيط....

بابا اهتم بيها....وبيخرجها ...

حتي ماما رجعت تضحك لها...وجني سمعت ماما وتيتة بيقولو (غيرانة)

جني مش عارفة يعني ايه...لكن مش مهم

المهم انهم رجعو يتكلمو عنها...لأ...

خلو بالكم...كل طفل له طريقته اللي هيفكركم بيها بنفسه....

ممكن يهمل دراسته او يتبول لا اراديا...

او العنف مع الصغير......

كان الصح الكلام مع جني "انت وعمرو اهم اتنين في الدنيا"

"انتي اللي هتعلمي عمرو يبقي شاطر"

"انا وانت وبابا وعمرو اسعد اسرة"

"انا عارفة انه مكانش قصدك تخبطيه ..انت اكتر حد بيخاف علي البيبي"

تم تعديل بواسطة ~ أم العبادلة ~

شارك هذه المشاركه


رابط المشاركه
شارك

حدوتة هتكلمك عن اهمية الصداقة بينك وبين ابنك وازاي تكوني صديقة له

"زياد"...مش بيعرف يتكلم كتير ولا يعبر عن نفسه بالكلام مع انه شاطر جدا في المدرسة. .

بس مش بيتكلم كتير وبيحب الحنان والطبطبة ...ودايما عطوف علي الاطفال اللي اصغر منه ...لكن فيه حاجة دايما بتزعله!

ماما طيبة وبتجيب له لعب وبتذاكر له بس هي دايما مش بتحضنه ولو حاول يحضنها تزقه بزهق ....

زياد بيبص لماما بنظرة حزينه بعدها وماما مش بتاخد بالها... وبابا مسافر في شغله ...،،،

شوية شوية زياد مبقاش يحاول يحضن ماما ...وهو اصلا مش بيكلم كتير ،،

خلاص بقت العلاقة بينه وبين ماما المذاكرة .... ماما بتزعق و زياد بيتضايق ...،،،

زياد بدأ يكبر وماما حاسة انه بيبعد عنها ...

وساعات كتير تتفاجئ ان عنده رحلة وما بلغهاش او عنده معسكر ومقالش ...

او عملوا له حفلة تكريم في المدرسة. ..وما ذكرش حاجة عنها ...

والاصعب كان يوم ما ماما دخلت تعمل عملية المرارة.... بابا لاحظ ان زياد كان متباعد ومش قلقان اوي عليها!...

ماما بكت بعد العملية مش من الالم لكن من تباعد زياد عنها ....

زياد مش بيضايقها لكن متباعد مش بيحن عليها ولا بيكلمها ... ودايما كتوم.....

ماما بعد ما اتحسنت قررت تلجأ لحد متخصص تفهم شخصية زياد وليه هما مش اصحاب!!

بابا راح معاها الدكتور بعد ما سمعهم قال "النوع ده من الابناء بيكون قليل التعبير بالكلام وبيعبر بالحنان والحضن ...

انتم كسرتوه لما كنتم بتزقوه وتبعدوه، اخد منكم موقف من جواه .. "

ماما حكت للدكتور عن النظرة اللي كان زياد بيبصها لما ترفض تحن عليه....

الدكتور قال،"هو كان كل مرة بتزقيه بيتراكم جواه شئ ...."

ماما سألت ....ايه الحل انا مش عاوزة اخسر ابني ...حاسة انه لما يكبر ويتجوز مش هيعرفني الا في الرسميات

الدكتور نصح ماما وبابا يبنوا علاقة جديد مع زياد....، ،

زياد مبقاش بيحاول يحضنهم...لكن الدكتور قال هما يعطفوا عليه ،،

و.الدكتور فهمهم ان زياد مش هيستجيب من الاول لكن بعد شوية،،

وفعلا زياد كان بيتباعد لما ماما تطبطب عليه ...ويبص لها نفس نظرة العتاب الصامت لكن هي كانت بتبتسم في حزن ...!

زياد لاحظ انها بتعطف عليه في الاول كانت مشاعره جامدة لكن بدأت تلين....

الدكتور نصح بلاش زعيق...وفعلا ماما بطلت زعيق الجو بقي هادي....لكن زياد مش بيتكلم كتير بس ملاحظ مجهود ماما....

وفي يوم كان جميل اوي في حياة ماما ...زياد لاحظ ان ماما عندها كحة وبرد ،، ماما اتفاجئت ان زياد عمل لها ليمون وجا يطبطب عليها وباس ايدها....

دموع ماما غرقت كوباية اللمون ....،، ماما سجدت لله تعالى شكر....

وفكرت اد كده يا ابني كنت مش فاهماك اد كده مكنتش عارفة ان معاملتي ليك مش صحيحة ....

الصداقة زادت بين ماما وزياد وبقوا احن اتنين علي بعض....

زياد مش طبيعته كتر الكلام لكن حنون جدا ...وبيجيب لماما طلباتها وممكن يقولها باختصار احداث حياته....

وماما بقت حنونة جدا معاه وفي يوم جميل ماما وزياد وبابا راحوا للدكتور ببوكيه ورد.....

مكتوب عليه"الفضل لله ثم ليك في انقاذ اسرتنا من الفشل

شارك هذه المشاركه


رابط المشاركه
شارك

حدوتة هتفهمك ازاي الطفل يتعامل مع زمايله اللي بيضايقوه واد ايه ده مؤثر علي مستواه الدراسي

براء...طول عمره شاطر في المدرسة ..وبيحب يروح اصل بصراحة مدرسته حلوة. ...

معاملة المدرسات حلوة والملعب رائع ...براء مش الاول ولا التاني ساعات الثالث وساعات الخامس....لكن شاطر ...

وكمان اصحابه بيحبوه...وهو بيحب اوي محمود ويحيي....لكن...براء اتفاجئ ان محمود هيتنقل مدرسة تانية...عشان هيسافر مع اسرته...!

براء زعل جدا....وبعد نقل محمود براء حس ان يحيي بعد عنه....اصل محمود كان همزة الوصل بين الاتنين، ،،!

براء بقه شايل الهم في الفسحة ....بيمشي لوحده...وبعدين بقى. .

بيقول للميس سيبيني في الفصل....بعد كده براء زعل لان فيه ولد اسمه طارق بقي بيسخر منه بيقول عليه ضعيف ووحيد !!

براء...لاول مرة في حياته يكره المدرسة

براء مش بيحكي لماما كتير ،، مع انه بيحبها،، لانه مش بيعرف يحكي بس درجات براء بقت وحشة جدا !!!

ماما وبابا اندهشوا بس مزعقوش لبراء لانهم حسوا ان عنده مشكلة.... (مالك يا براء)....براء مش بيرد

ماما لقيته كاتب جواب لمحمود صاحبه وكاتب فيه وحشتني انت كنت صاحبي الوحيد....ويحيي بيكرهني ...،،

ماما اتصلت بمامة يحيي ...كانت متعاطفة جدا مع براء ... (ايه اللي حصل يا يحيي)...،،

يحيي كان زعلان وهو بيرد "براء مش بيصاحب غير محمود وبعد عن الناس كلهم حتي عني)...دي كانت وجهة نظر يحيي...

ماما بلغتها لبراء ....براء عيط وقال (هو اللي بعد... محدش بيصاحبني)....!!

ماما كان نفسها توضح لبراء حاجة مهمة اسمها اختلاف وجهات النظر وحاجة اهم اسمها المرونة في التعامل...،،،

ماما جابت ماء واذابت فيه شئ ابيض امام براء وسألته (انا عملت ايه؟؟)....

براء رد (دوبتي سكر في ماء....)

ماما قالت له دوق كده. ...

"يااا ده ملح!!!"

براء اتفاجئ بالطعم...

ماما قالت له دي كانت وجهة نظرك ان ده سكر وبعدين اتغيرت بالدليل...

ليه متديش يحيي فرصة انه يغير وجهة نظرك ،، يحيي بيقول ان انت اللي مش بتحبه...

ولو مكانش يحيي. .. ايه المانع يكون حد تاني؟؟

ماما جابت لبن ومرة عملت بيه شاي بلبن ومرة كاكاو...

(بص يا براء اللبن ممكن يتوافق مع اكتر من حاجة....دي في الانسان اسمها المرونة نقدر نتكيف ونتعلم )...

براء من نوع الاطفال اللي مش بيجيد الكلام لكن بيحس جدا براء فكر كتير وبعدين حضن ماما...،،

براء راح المدرسة بروح جديدة ...وفي دماغه كلام ماما ....اتفاجئ ان يحيي مفتقده جدا... وان فيه ولد لطيف مكانش يعرفه من فصل تاني اسمه معاذ....

الحياة فيها مشاكل المهم اعرف اتعامل معاها....

ماما وبابا فرحو اوي لما مرة شافوا براء بيعلم زينه اخته ان اللبن ممكن يتوافق مع شاي او كاكاو .....

وان الشئ الابيض في الماء ممكن يكون ملح اوسكر .....

اصل زينه كانت بتشتكي من صاحبتها !!!!

شارك هذه المشاركه


رابط المشاركه
شارك

حدوتة هتفهمك خطورة اللوم المستمر والرغبة الدائمة في الا يخطئ ابنك مع ان كل ابن ادم خطاء...

شريف عارف ان بابا سماه شريف علي اسم جدو والد باباه.....

لانه بيلاحظ دايما ان باباه بيسمع كلام جدو في كل حاجة ...

جدو مش بيضحك كتير وبرضه بابا مش بيضحك .... ماما هي اللي بتضحك في وش شريف

شريف حاسس ان بابا ينفع جدا مدرس في المدرسة مع ان بابا مهندس!

بس هو دايما. .يقول لشريف "غلط"علي حاجات كتير...

لو شريف خبط حاجة وهو مش قاصد ....بابا علي طول يقول"ركز يا غبي"

لو نقص درجتين بابا يحذره "هتخيب"..

لو مطلعش الاول في السباحة في المسابقة بابا يخاصمه......

شريف كاره البيت ودايما حاسس انه في سجن ...دايما بيحلم ان حواليه قضبان زي قضبان السجن .....،،

شريف بيروح عند خالو صلاح...وهو اصلا مش مسموح له يروح غير عنده...

المهم خالو عنده ولد صغير اسمه معتز اصغر من شريف بكتير

شريف بيحب يلاعبه بس معتز كان بيجري ووقع....

شريف توقع علي طول ان خالو يجي يزعق. .. لكن خالو طبطب علي معتز...وشريف فضل باصص لخالو مستني الزعيق! ....

خالو قال له (مالك يا شريف )...

شريف قال لخالو.."مفيش"......

شريف اكتر من مرة يلاحظ ان خالو مش بيعلق علي الغلطات كلها لكن علي بعضها بس !

شريف سأل خالو (هو حضرتك ليه مش بتزعق علي الحاجة الغلط).....

خالو ابتسم...

شريف بيحب جدا ابتسامة خالو.....

وخالو قال (مش كل حاجة زعيق الانسان ممكن يوجه اللي قدامه بهدوء... وبعدين يا شريف النبي محمد صلى الله عليه وسلم فهمنا ان كل البشر بيغلطوا.... يبقي طبيعي نتوقع ان اللي قدامنا مش مثالي...)

شريف ...عجبه اوي كلام خالو....وقرر يكتبه لبابا....لكن!!! بابا زعق له..... (انت مش هتفهمني انا اللي افهمك)....

شريف بدأ يكبر وبابا وجدو مفيش فايدة برضه مش بيضحكم... ودايما لوم وزعيق....،

شريف بقي من جواه مش بيقتنع اصلا بكلام بابا ... وبيقول لنفسه (مدام عملت اللي عليا خلاص يزعق...هه).....

شريف بقي اطول واكبر وبابا لسه بنفس الاسلوب....

وماما ملاحظة بعد شريف الكبير عن بابا نفسيا...

وفي يوم حزين جدا...وبابا بيزعق ...شريف قال له بهدوء وادب (لو سمحت كلمني بالراحة انا مبقتش صغير...)

بابا اتصدم ...كان هيضرب شريف....،،

شريف قال له وهو مش خايف (اضربني يا بابا...كلها فترة بسيطة واخد شهادتي وامشي من البيت ده اللي ياما انضربت فيه!)....

بابا مقدرش يضربه ..وفضل يبص له بذهول...

وشريف قال (عن اذنك)...وراح خرج!!!!!

ماما دموعها نزلت وهمست لبابا ( شريف كبر ارجوك شوف طريقة تانية قبل ما تخسره)....،،

ارجوكم انتبهوا فالذي تهينونه الان...سيكون رجلا في الغد وقادر علي منع اذاكم ...ابنو حب بينكم وبينهم

  • معجبة 1

شارك هذه المشاركه


رابط المشاركه
شارك

عن الاب اللي فاهم ان الضرب هيخلي الولد يسترجل ......

حدوتة هتكلمك عن الاثر النفسي المترتب علي معاملة طفل صغير بعنف وقسوة ....

عمرو اكتر كلمة في حياته بيكرهها كلمة راجل! !!

عشان بابا لما بيزعق لماما بيقول انا الراجل هنا...،،

ولما بابا بيضرب عمرو ..وماما تيجي تراضي عمرو وهو بيعيط ...بابا يمنعها ويقول لها سيبيه ..يسترجل ...وبعديها بابا يبص له جامد اوي ويقول له انت راجل متعيطش لو عيطت هتنضرب اكتر. .....!!!

عمرو بقي بيكره الرجالة!! ويحمد ربنا ان مدرساته ستات ....ومش بيحب يسلم علي عمه

ومش بيستريح للقعدة مع بابا ...بابا دايما يضرب ومش بيتفاهم ابدا....

وماما بتزعل من بابا كتير بسبب معاملته لعمرو ومرة كانت هتاخد عمرو ..وتمشي عند تيته...بس بابا منعها تاخده وقال لها امشي لوحدك ...

عمرو صوت بصوت عالي ومهموش الضرب ...اوعي تسيبيني يا ماما ....ماما صعب عليها وما مشيتش....، ،

عمرو بيدعي ربنا ان بابا يسافر عشان لما مرة سافر ....البيت كان هادي وماما مبسوطة..وهو كمان....

بس المفاجأة ان بابا وماما الاتنين هيسافرو الحج!!

عمرو عيط بس ماما وعدته بألعاب ....وانها هتدعي له كتير...

عمرو هيروح عند عمو حسين اخو بابا اللي ابنه اسمه تامر وعايش في اسكندرية ،،

عمرو عارف ان مامته بتحب طنط اميرة مرات عمو حسين....فهو مطمئن،،

وفعلا طنط اميرة وتامر فرحو جدا بعمرو....ورحبوا بيه بفرحة

عمرو اتبسط....طنط عملت لهم تورتة ..وتامر بيلعب معاه. ..لكن!!

عمو حسين رجع من الشغل ! عمرو اكتأب اكيد هيزعق!! ويكون زي بابا والبيت يبقي وحش! لكن عمرو اتذهل بمعني الكلمة لما لقي عمو حسين بيضحك في وش طنط اميرة وبيبوس تامر وباس عمرو!

وساعة الغدا كان الجو كله ضحك وحكايات ظريفة!

عمرو كان بيعامل عمه باحتراس لكنه اتفاجئ ان عمو قعد يلعب معاه هو وتامر بالعربيات والمكعبات!!!!!

وقال لهم:انا احسن وقت قضيته النهاردة اللي قضيته معاكم....!!

عمرو مجالوش نو م من التفكير.......ما هو عمو راجل وبيضحك ..يبقي مش كل الرجالة كده ولا ايه؟؟؟

عمرو بدأ يرتاح اكتر...طنط اكلها حلو ومعاملتها حلوه.. وتامر اطيب ولد وعمو حسين بيلعب معاهم؛ ؛؛ ب

س مرة عمرو سمع مناقشه بين عمو وطنط "بس اكيد دلوقتي هيبين انه راجل بالزعيق"عمرو فكر كده....لكن اتفاجئ ان طنط لما عيطت ..عمو خرج ...وما زعقش ..وبعد شوية لقيوه راجع يراضيها وجايب ورد...

عمرو باس عمو.... (والله انت محترم يا عمو)....دموع طنط اتحولت لابتسامة....وعمو طبطب علي عمرو ..

عمرو قضي ايام حلوة زي الحلم واتعلق بعمو حسين فوق الوصف..

وماما بتطمن عليه في التليفون...عمرو نفسه ماما ترجع بس....! بابا......لأ!!!!!

وبدأ يبقي قلقان وشكله خايف لما عرف انهم خلاص راجعين...،

عمو حسين سأله مالك...مالك....عمرو انهار في العياط...

(ارجوك يا عمو ما تخليش بابا ياخدني....انت اخوه وتقدر تقنعه )

...عمرو حكي كتير....وكان بيترعش... طنط جابت له عصير وتامر طبطب عليه.. وعمو كان شكله بيفكر...

(انا هاقوم اصلي قضاء الحاجة يا عمرو دي صلاة بندعي فيها ربنا ونطلب اللي احنا عاوزينه... هاصلي وادعي اني اعرف اتكلم مع بابا )،،

لما ماما وبابا وصلوا عمرو مرضيش يطلع من الاوضة ماما اللي دخلت له

حضنوا بعض جامد بس لما بابا قال يلا ع القاهرة عمرو مرضيش بابا استغرب جدا ...

عمو.. طلب من بابا انه يسمعه (احنا أخوات وانا بانصحك في الله تغير معاملتك مع عمرو.. اولادنا امانة وهنتحاسب عليها. .. انت حجيت بيت ربنا )..

بابا كان مرتبك ومتفاجئ... لكن عمرو كان مصر يفضل في الاوضة .. وماما بتعيط علي حاله. ...،،،

عمو حسين قال لبابا بصوت واطي (عمرو دلوقتي طفل ، بكرة يبقي راجل ومتعرفش تفرض عليه حاجة )...

محدش عارف ايه اللي حصل بالظبط...وايه اللي غير بابا ...

عمرو بيقول انها صلاة قضاء الحاحة اللي صلاها عمو،،

ماما بتقول انها كانت ملاحظة تغيير في بابا في الحج، عمو بيقول ان بابا طيب وقلبه وجعه....

المهم ان بابا غير فكره ومعاملته...وشوية شوية. .. عمرو بقي فعلا بيحبه ... ب

س بابا طلب من عمرو انه يفكره بالآية دي لما يتعصب، (والكاظمين الغيظ)......♡♡

شارك هذه المشاركه


رابط المشاركه
شارك

الام اكبر ..وانجح طبيبه لاولادها...

حدوته هتكلمك عن ده ماما كانت فرحانة اوي بأسماء...بنتها الاولي....

بس الفرحة بدأت تنطفي اول ما اسماء راحت الحضانه! لان الميس بعتت لماما وقالت لها"اسماء عندها سمات توحد"..؟؟؟

ماما اتخضت اوي "يعني ايه"...

كان رد الميس"اسماء مش بتبص في عين حد.. التواصل البصري عندها مفيش" ....

ماما معرفتش تعمل ايه هي كانت ملاحظة كده بس مش فاكرة ان ده امر خطير!

ماما عيطت كتير ولكن لما اسماء رجعت من الحضانه كانت ماما قررت انها مش هتسيب اسماء ..

هتحاول بكل طريقة...

ماما بتنادي اسماء واسماء مش مركزة ولا بتبص لها

ماما شالتها علي رجلها وعملت اصوات وتعبيرات جامدة اسماء بصت لها اخيرا...

ماما بقت كل يوم تلفت نظر اسماء ليها وناقص تعمل اراجوز عشانها وبابا كمان

اسماء فعلا بقت بتبص لهم وتبتسم علي شكلهم ، بابا بيشيل اسماء اول ما يجي من الشغل الساعة اربعة وينزل يشتري لها حاجة ،

اسماء بدأت تتجاوب مع بابا..ودايما تشاور له ع الباب "،

بس لما جاء معاد التقديم في المدرسة لاسماء كانت هتترفض لان تركيزها مع المدرسة اللي بتمتحنها مفيش!!

بس اسماء اتقبلت...كان جهد نفسي عظيم علي بابا وماما، لكن الجهد الاعظم كان المذاكرة لأسماء. .

اسماء مش بتتجاوب ، بابا قعد يعلمها أ...أرنب ..وهي مش بترد...بابا زعق وكان هينهار

ماما جات وحاولت مفيش فايدة. ..اسماء عيطت ،،،

فجأة ماما جابت ارنب لعبة من بتوع اسماء وقعدت تحدفه.. وهي بتغني أ ارنب

اسماء ضحكت وحاولت تقلد ماما "أ أرنب"...دموع بابا سالت من بعيد...،،،

ماما كانت بتعمل المستحيل عشان تعلم اسماء ...وبابا كمان ،،

بس زعلوا اوي لما برضه الميس بعتت لهم ان اسماء مش بتتجاوب معاها رغم انها في البيت معاهم بقت احسن ،

ماما وبابا فكروا... وعرضوا اسماء علي دكتورة حكوا لها كل حاجة،،

الدكتورة قالت لهم "ان سمات التوحد عند اسماء اصبحت قليلة بفضل الله ثم بمجهودهم.."

"انتم عظماء" الدكتورة قالت كده

"كملوا اسماء دي ربنا هيبارك لكم فيها وهتكون فرحتكم"...ده كان تشجيع لبابا وماما ...

عملوا حفلة لاسماء في المدرسة بالاتفاق مع الادارة...ماما وبابا اتكلمو كتير مع مدرسة اسماء واسماء شافتهم...

اسماء ارتاحت للمدرسة بعد الحفلة لأنها شافتها بتكلم بابا وماما...

من بعد الحفلة اسماء بقت بتتجاوب مع المدرسة وبقي عندها ثقة فيها، طفل التوحد لا يمنح ثقته بسهولة،،،،

في يوم سعيد اسماء جات لماما وقالت لها أ أرنب....واقولك أ.....ايه؟....

دموع ماما سالت وبرضه دموع بابا لما اسماء قالت أ أمي ، أ أبي ......

بابا وماما سجدوا لله شكر انه سبحانه يكافئ المجتهد....

لا تيأسو ابذلوا جهدكم انتم اعظم اطباء لاطفالكم...

"هذه القصة حقيقية"

تم تعديل بواسطة ~ أم العبادلة ~
  • معجبة 1

شارك هذه المشاركه


رابط المشاركه
شارك

حدوتة هتكلمك ان ممكن اوي سوء تصرفات ابنك في المدرسة تكون خطأ من الاخرين وليس منه

معاذ في المدرسة دايما متضايق ...كل ما يلون ميس الرسم تقول له تلوينك وحش جدا ايه ده،،

معاذ اتبرمج علي ان تلوينه وحش وحتي لو حب يلون كويس يلاقي نفسه بيغلط تاني ويلون وحش ،،،

وصاحبة انس اخد منه قلمه فمعاذ اتغاظ راح يشتكي للميس مسمعتوش ...ولا ردت عليه،،

رجع لانس وقال له "هات القلم'" انس مرضيش ،

معاذ اخد القلم بالعافية، انس زقه فمعاذ قام ضربه!!

انس عيط بصوت عالي والميس جات وشخطت في معاذ "ايه ده انت ولد وحش اعتذر" معاذ مرضيش ...

وحاول يحكي اللي حصل بس هي مسمعتوش وقالت"كمان رافض الاعتذار والله لانزلك للمديرة"!!

مرة بعد مرة بقت الكلمه اللي بتتقال علي معاذ شقي ومش مطيع وهو بقه بيكره المدرسة ومش عايز يروح..ودايما سرحان،،

الاخصائية النفسية في المدرسه كانت اسمها ميس يسرية وكانت جديدة..،،

معاذ حس انها بتعامله بطريقة مختلفة وباحترام ، وقعدت تكلمه ان احنا نحب اصحابنا وهو سامعها

وفجأة قال "يا ميس انا والله مش باعمل حاجة" وراح معيط ،، بس يسريه طبطبت عليه "كمل يا معاذ"

معاذ قال لها "هم بيضايقوني ولما اشتكي محدش يعمل لهم حاجة باضطر اضربهم"

"والله يا ميس انا مش بحب اضرب الناس"

ميس يسرية ابتسمت لمعاذ وجابت له عصير ...وعشان تهديه طلبت منه يرسم....

قال لها"رسمي وتلويني وحشين ميس الرسم قالت كده"،،،

رسم عربية ولونها واتفاجئ ان ميس يسرية قالت له تسلم ايدك با ميزو،،،

معاذ كان مذهول""انا""

ميس يسرية قالت له "بس ايه رأيك المرة الجاية نظبط التلوين اكتر،،،

معاذ فرح...وميس يسريه بقت بتتكلم معاه

وطلبت من مدرسة الفصل بتاعته انها تحترمه لما يجي يشتكي،،

معاذ مكانش عاوز يضرب حد

اهمال الكبار هو اللي وصله لكده،،

معاذ اتغير جدا ....

دايما مجتهد ومسالم وبقي بيلون احسن حتي ميس الرسم اخيرا قالت "تحفة"،،،،،

معاذ لما طلع من الاوائل جاب هديته لميس يسرية وقال لها "انتي تستاهلي احلي هديه

شارك هذه المشاركه


رابط المشاركه
شارك

حدوتة هتفهمك خطورة المقارنة بين الاطفال وتأثيرها علي نفسيتهم

نجوي بنت جميلة ومؤدبه ... وبتموت في جدو فكري بتحب تزوره وتبات عنده هو وتيته...

جدو بيحكي لها حواديت وبياخدها معاه النادي...وبتحكي له عن اصحابها ...

حاجة واحدة بتضايقها من جدو

لما بيجي "يحي" ابن عمها ..جدو بيقول يحيي اشطر من نجوي في الانجلش...،، يحيي خلص اكله برافو يحيي

نجوي بتحب جدو...لكن بتزعل جدا من كده

هي ابطأ شوية من يحيي بس برضه شطورة...

واول ما يحيي يجي نجوي بتضايق ،،،

اخر مرة في النادي جدو عمل سباق بينها وبين يحيي،،،

وطبعا يحيي اللي كسب....نجوي عيطت ...

جدو قال "لازم روحك تبقي رياضية ...منزعلش ان احنا خسرنا"...

نجوي بصت للارض وهي بتعيط وقالت "انا مش زعلانه اني خسرت انا زعلانه من حضرتك يا جدو"؟؟؟؟

جدو استغرب بس مزعقش لنجوي .... لكن لاحظ انها معدتش بتطلب تيجي عنده اخر الاسبوع

اتصل يسأل عليها ماما قالت له ان نجوي بطنها تعبانه ،،

جدو قلق وراح لنجوي بسرعة ...ولقي شكلها ضعفان بس حس انها متضايقة مش عيانه....

ومضحكتش لما شافته زي عادتها ...جدو عنيه دمعت....

نجوي قالت "يحيي اشطر مني ومش بيكون عيان...صح يا جدو؟؟"

جدو حضن نجوي الطفلة الرقيقة الحساسة اللي بتحبه وهو ازعجها بالمقارنة من غير ما يقصد،،

جدو ما اتكلمش ...لكن فهم ...

نجوي قالت له وهي تعبانه "احكي حدوتة"...

جدو من بعدها ما بقاش بيقارن نجوي بيحيي

بيشجع نجوي وبيشجع يحيي

نجوي شاطرة في الرسم والتلوين ويحيي في الجري

نجوي..فرحت اوي ..

جدو مكانش قصده يضايقها بس مقارنة الاطفال ببعض شئ يضغط علي اعصابهم ولا سيما ان كانوا حساسين ،،،،

لكل طفل مواهبه لا داعي للمقارنة..

تم تعديل بواسطة ~ أم العبادلة ~

شارك هذه المشاركه


رابط المشاركه
شارك

حدوتة " شهاب" هتفهمك تأثير الكلام الوحش اللي بيقوله الاب عن الام علي نفسية الاولاد....

شهاب ولد مؤدب وبيحب ماما وبابا لكن بيكره الخناق بينهم لان بابا بيتعصب اوي وبيرمي اي حاجة علي الارض...

وماما بتعيط وتكون ساكتة... شهاب سأل ماما "هو انتي ليه اتجوزتي بابا؟....

ماما بتسكت بس شكلها حزين وبتحاول تشغل شهاب في اي شئ ....

شهاب نفسه يفهم بابا ليه بيزعل من ماما ....مع ان بابا بيبتسم لجدو وتيته ولشهاب....وبيكلم اصحابه حلو جدا !!!

في يوم شهاب اتشجع وراح بعد خناقة سأل بابا "انت ليه بتزعق؟"ب

ابا قال "ماما بتتصرف غلط وفاشلة يا شهاب!"

شهاب قال "يعني ايه فاشلة"

بابا قال "مش عندها شغل ناجحة فيه زيي ولا حد بيحبها...وبتغير من نجاحي"...

شهاب اتضايق لكن بدأ يتغير مع ماما شوية شوية مرات مش بيرد عليها ومرات مش بيسمع كلامها...

وماما زعلت منه....،،، لكن خلاص هو مش مهتم

بابا في الشغل...وشهاب مش بيسمع كلام ماما...

لما بابا جا وماما قالت له .. ،،، زعق لشهاب انه مش بيسمع كلام ماما!!!

شهاب استغرب اوي ...وراح لبابا وهو قاعد علي اللاب توب وقاله انت ليه عايزني اسمع كلامها مش هي فاشلة"...

بابا اتخض...ومردش...

ماما سمعت من المطبخ ،،، كان يوم حزين ماما ما نامتش من العياط وبابا كان ساكت ... وشهاب مستغرب

تاني يوم بابا جا واخد شهاب من المدرسة بدل ماما،،

شهاب اتخض "فين ماما"..

بابا كان شكله متأثر وهو بيقول لشهاب "انا عزمك علي الغدا"

شهاب قال "وماما"

في المطعم بابا قال لشهاب"شهاب انت عارف ان الانسان ممكن يغلط؟"،،،

شهاب قال "طبعا انا مرة غلطت في واجب العربي"

بابا ابتسم بحزن وقال "انا غلطت لما قلت لك علي ماما فاشلة، ماما كويسة اوي واتخرجت من كليتها بامتياز وسابت شغلها عشان تتفرغ لي انا وانت ...هي مش فاشلة انا قلت كده عشان كنت متضايق منها لكن ده مش صح"

شهاب فرح "يعني ماما مش فاشلة"

بابا قال "وعاوز اصالحها ايه رأيك نجيب ايه؟"

"ورد طبعا هي بتموت فيه" شهاب قال كده

ماما ...كانت حزينه لكن بابا وشهاب ادوها الورد وقالو متأسفين

ماما ابتسمت...

من فضلكم لا تنتظروا من الاولاد احترام الام اذا سمعوا عنها كلاما سيئا من الاب

او احترام الاب اذا انتقدته الام دوما راعو

احترامكم لبعض في سياق الكلام

  • معجبة 1

شارك هذه المشاركه


رابط المشاركه
شارك

حدوتة هتفهمك ازاي بتبرمجي ابنك انه يبقي متردد ومعندوش ثقة وانتي مش واخد بالك،،،

إياد...اكبر اخواته...بابا بيسافر كتير في شغل واياد دايما مع ماما ...تكلمه وتذاكر له ،،،

وهو بيحبها جدا...وبيسمع كلامها وهو عموما طفل بيسمع كويس ويركز في اللي بيسمعه ،

ماما اتكلمت معاه عن الصلاه فصلي ، ونصحته يغسل سنانه فغسلها...لكن ....إياد مرة كان زهقان شوية وكتب الواجب بخط وحش ،، ماما اتضايقت جدا..."كده ده خط ده ايه اللي جري لك؟،،، ،،،،،

اياد فكر "هو انا جري لي حاجة؟"....،،

مرة تانيه..اياد كان متضايق من مدرب السباحة عشان بيشتم وقبل ما يحكي لماما كانت بتقول له"كان لعبك وحش مالك ايه اللي حصل لك؟"...اياد كان مركز اوي في كلام ماما"هو انا حصل لي ايه يا ماما؟"

ماما قالت"بقيت مستهتر ومش بتعمل حاجة عدلة،"

عقل اياد ردد كلمة ماما...وكان سامعها كويس "مش بتعمل حاجة عدل"...

اياد وهو قاعد يكتب الواجب حاول يكتبه كويس بس عقله ردد "انت مش بتعمل حاجة عدل ...انت اتغيرت"...

وفعلا كتب وحش وماما انهارت "مالك بقيت كده...انت اتحسدت...."

وحالة اياد ازدادت سوءا... نفسه يرضي ماما لكن بيتصرف عكس ما يرضيها،،،

ماما قررت تاخد كورس في التعامل مع الاطفال ...

وفهمت فيه ان الطفل السمعي طفل نشاط عقله متركز في ودانه وانه بيسمع كويس اوي ،

وفهمت ان فيه حاجة اسمها برمجة سلبية يعني كلام يزيد حالة الطفل سوءا زي الكلام اللي كانت بتقوله لاياد "انت مبتعملش حاجة عدل" فهي برمجته علي انه ما يعملش حاجة عدل!!!

المهم ان ماما لما درست قررت تعامل اياد معاملة تانيه...

لما بيكتب وحش بتقوله بثقة"انا متأكد انك شاطر وقادر تكتب باحسن خط،"

"وقت بسيط وهترجع احسن من الاول"

اياد عقله بيردد كلام ماما " انا قادر ،، انا خلال وقت هارجع احسن من الاول"

ماما معدتش بتلومه..وانما دايما تديله ثقة ...

المفاجأه ان اياد فعلا رجع يعمل كل حاجة باتقان وماما بتشجعه وتكافئه.....

النهاردة ماما عامله حفلة لاياد عشان طلع التاني علي المدرسة

لا تقولي لابنك كلاما سلبيا عند اخطاؤه لان الكلام السلبي يقوي الخطأ بل شجعي والتمسي العذر....

  • معجبة 1

شارك هذه المشاركه


رابط المشاركه
شارك

حدوتة طويله.. ولكن هتفهمك من اين ينشأ الكذب والإخبار بغير الحقيقة عند الطفل؟....

مصطفي بيحب جدا اصحابه ، وبيجي يحكي لماما وبابا واخوه عنهم،،

ماما دايما تعترض علي بلال صاحب مصطفي وتقول انه مش ظريف "متصاحبوش يا مصطفي"...

وساعات تقول "وليه سكت لما صاحبك زعق"،،،

مصطفي يرد"خفت يزعل"...

ماما تقول له"ما يزعل،،، خلي عندك شخصية يا ابني...اللي يزعق لك زعق له"...

"انت ليه طالع كده "..

عقل مصطفي بيردد كلام ماما "هي قالت خلي عندك شخصية =انت معندكش اصلا...ماما معاها حق ...انت ضعيف "...

مصطفي اقتنع اكتر انه ضعيف...وبقه مستسلم اكتر للاذي ...لكن بيروح نفسه يحكي لماما وبابا طيب يعمل ايه؟؟؟

عقل مصطفي قال له"انت تقدر في خيالك تكون زي ما تحب قوي زي ما ماما بتقول....عيش في خيالك يا مصطفي"....

مصطفي حكي لماما "انا النهاردة لما بلال زعق لي زعقت له"...

ماما فرحت جدا "صحيح برافو يا مصطفي"

وجابت له شوكلاته ...مصطفي بدأ يحكي لماما حجات من خياله تخليه محترم...

مرات انه زعق لبلال .

ومرات ان الفصل صقف له.....،،،

وماما مصدقة ومبسوطة...

وفي يوم كانت الصدمة جالها اتصال من ميس رانيا من المدرسة...."خير" ....ماما سألت ،،

ميس رانيا اشتكت لها من ان مصطفي دايما يتخيل حاجات مش موجوده وبيكذب كتير،،،

ومحدش في الفصل بقه بيصدقه!!!!!

"ازاي"... ماما سألت وميس رانيا قالت"بيألف حاجات بيقول للمدرس مثلا...

انا حليت الواحب كله ولكن الكراسة ضاعت ...المدرس صدقه...لكن اتفاجئ ان مصطفي مخبي الكراسة، ، وعيط لما المدرس شافها وقال ان انتي اللي منعتيه من حل الواجب وقولتي له روح نام"؟؟؟؟؟

ماما استغربت...وميس رانيا كملت"بيقول انه ابنك الوحيد وان باباه بياخده في كل مكان "واحنا عارفين ان له اخ اصغر منه ....

ماما مكانتش عارفة ترد تقول ايه....ولا تعمل ايه وسألت ميس رانيا "مصطفي قال ان الفصل بيصقف له...وان بلال....،،،

قبل ما ماما تكمل ميس رانيا قالت "انا لسه كنت هاكلمك علي بلال ،، مصطفي بيترعب منه وبيسمع كلامه بشكل عجيب وبلال اكتر من مرة يتعاقب لان المدرسة شافته بيضرب مصطفي ومصطفى مستسلم ومش بيشتكي"!!!!!

ماما دموعها كانت ماليه عنيها....ولكن لابد من حل ،، اتصلت ببابا في الشغل بابا برضه اتضايق جدا....

ماما قالت له "لازم نعاقب الولد "

بابا قال "لأ اوعي تبيني حاجة .....انا هاخده للدكتور "

وفعلا مصطفي جيه ...وباس ماما وقعد يحكي لها ازاي كان بطل النهاردة وماما بتهز راسها...

بابا اخد مصطفي لدكتور لطيف ....مصطفي قال "انا مش عيان"....

الدكتور قال "ما انا عارف"

"انا بس طلبت من باباك يجيبك عشان باعمل بحث عن تفكير الاطفال وسمعت انك ذكي جدا قلت استعين بيك"...

مصطفي ابتسم "طبعا....انا بضرب كل العيال"...

الدكتور قال"بس دي حاحة وحشة"

مصطفي رد علي طول"لأ حلوة لازم يكون عندك شخصية"...

الدكتور قال له "يعني انا لو ضربتك دلوقتي هيبقي عندي شخصية "

مصطفي خاف فجأة "اوعي تضربني.."

الدكتور قال بهدوء "اضربك ليه...انا مش بضرب حد، مال الشخصية ومال الضرب...اصلا يعني ايه شخصية؟" .

مصطفي قال " الشخصية دي زي العضلات بتطلع لما نضرب ونزعق "،،،،

الدكتور ابتسم وقال "انت بتاخد دين صح..هو النبي محمد كان بيضرب ويزعق؟"

مصطفي ....فكر ورد "لأ...ودايما اقرأ انه كان شخصية عظيمة"...

الدكتور قال "يبقي الشخصية مش بالضرب ولا الزعيق"...

مصطفي كان سامع الدكتور بتركيز... وفجأة سأله "يعني اللي مش بيحب يضرب الناس ولا يزعق ممكن يبقي عنده شخصية؟"...

الدكتور ابتسم "تمام"...

مصطفي قال "بس ده مش بيعجب الامهات"...

الدكتور قال "نتكلم ونقول لهم يمكن مش عارفين"

مصطفي بص حواليه ووطي صوته وقال "لما يكون حد مش عاجبه اللي انت بتعمله... بتعمل معاه ايه؟"

الدكتور قال "بأحاول اتفاهم معاه..هو انت فيه حد مش عاجبه اللي انت بتعمله"

مصطفي رد "لأ انا دايما بتصرف صح"

مصطفي فكر كتير في كلام الدكتور وفي الزيارة التانيه قال له "هو صحيح ربنا بيودي الكذاب النار"...." حتي لو هو عايز يفرح الناس"....

الدكتور:الكذب مش بيفرح حد...الكذب بيزعل ،،، لان لو الشخص عرف انك بتكذب هتكون زعل بالنسبه له....صح؟

عارف يا مصطفي انت ولد محترم اوي وبتفكر كويس...

مصطفي فرح جدا بس قال "بس انا مش بحب اضرب حد ولا ازعق"

الدكتور صقف لمصطفي "برافو".....

مصطفي سكت وكان فرحان ،،،

المرة اللي بعدها مصطفي قال للدكتور "فيه ولد اسمه بلال بيضربني علي طول ويزعق لي.."

الدكتور سمع مصطفي باحترام....ومصطفي سكت شوية وبعدين قال "بس انا مش مش مش .....مش بحب ارد عليه"

الدكتور قال "عشان انت محترم...،، انا لو مكانك برضه اعمل زيك بس احاول اشتكي للمدرس..."

مصطفي قال "مش بيعملوا حاجة..."

الدكتور قال "ممكن بابا يروح الادارة....لكن انت برضه عشان محترم متقبلش انك تنضرب امنع بلال وهدده انك مش هتصاحبه".

..مصطفي كان بيفكر. ...وفجأه باس الدكتور!!!

في المدرسه بلال جا زي عادته يغلس علي مصطفى"،،، مصطفي زق بلال "انت مش هتضربني"...

بلال استغرب لكن مصطفي كان مصر ومكشر "انا مش هاسكت لك وهاشتكيك في الادارة"...

بلال استغرب...مصطفي كان معاه حاجة حلوة ،، بلال قال له اديني

مصطفي رد "لما تبقي محترم معايا"،،،

الايام عدت وبلال بقي نفسه مصطفي يسامحه وفي يوم جميل بلال قال لمصطفي "انا اسف"..

مصطفي رفع ايديه وقال لنفسه "انت بطل يا مصطفي من غير ما تضرب ولا تشتم ..."

مصطفي تغييره كان ملحوظ بقي ثابت في كلامه وصريح وماما بتحترمه...،

مصطفي كان نفسه اوي يكون محترم ولما فشل في الحصول زمان علي الاحترام عاش...في خياله،،

احترموا اولادكم وجهوا بهدوء ...

كل انسان ممكن نعلمه رد الاذي حسب شخصيته.....

تم تعديل بواسطة ~ أم العبادلة ~
  • معجبة 1

شارك هذه المشاركه


رابط المشاركه
شارك

السلام عليكم ورحمة الله وبركاته

 

بفضل الله رااااااااااائع

قصص جميلة جداً اللهم بارك : )))

جزاك الله خيراًُ أم العبادلة الغالية نتابع معكِ إن شاء الله : )))

  • معجبة 1

شارك هذه المشاركه


رابط المشاركه
شارك

اللهم بارك ، اكثر من رائعة

جزاك الله خيرا اختي ام العبادلة، وجعله في ميزان حسناتك

اللهم اعني على تربية ابنائي كما تحب وترضى .. ياالله

شارك هذه المشاركه


رابط المشاركه
شارك

حدوتة هتعلمك ازاي تعلميهم حب الناس ومساعدتهم بدون افراط ولا تفريط

جني بنوتة حلوة جدا واحلي حاجة في حياتها ماما لانهم اصحاب جدا ،،

ماما جابت لجني فستان ابيض وورد للحفلة بتاعة المدرسة ... بس جني قالت لماما ان نور مش هتسيبهم يتبسطوا بالحفلة!

نور مع جني في الفصل وزنانه دايما بتعيط ....! ومش بتصاحب حد ابدا !

ماما فكرت وقالت لجني "هي بتعيط ليه؟؟؟"

جني قالت"هي جديدة معانا في المدرسة ومن ساعة ما جات بتعيط!"

ماما قالت لجني "هي اكيد حاسة انها غريبة في وسطكم ايه رأيك تصاحبيها"

جني قالت "وليه اهتم بيها انا عندي اصلا اصحاب كتير...وهي كل حاجة تعيط اصلا"

ماما قالت "تهتمي بيها عشان ربنا يديكي حسنات وكمان ممكن تلاقي منها خير انتي مش عارفاه ...

لما الشمس بتغيب بنحتاج ضوء القمر "

جني ابتسمت واقتنعت وفي يوم الحفلة نور كانت بتعيط وجني قدمت لها وردة وباستها ....

نور استغربت وبطلت عياط شوية!..

الحفلة كانت جميلة بس نور قاعدة بعيد ...

جني نادت نور (تعالي نقطع الكيك مع الميس) ....

نور جات بعد تردد!!!

يوم ورا يوم ...نور بدأت تحب جني وتبطل عياط ....

بس للاسف جني تعبت والدكتور قال انها محتاجة راحة. وهتغيب من المدرسة...

جني كانت نايمه في سريرها لما الجرس رن يوم الجمعه ...

ماما بتفتح الباب لقيت بوكيه ورد كبير نور شايلاه... ومامتها جنبها... جايين يطمنوا علي جني....

اول واحدو جات زارت جني كانت نور ... اول واحدة قالت لها اخدوا ايه وهي غايبه....

جني قالت لماما وهي فرحانة (صحيح كلامك يا ماما لما غابت الشمس جيه القمر... انا غبت من المدرسة بس نور جات لي ...طول عمري هاعمل خير لربنا )

شارك هذه المشاركه


رابط المشاركه
شارك

ما شاء الله لا قوة إلا بالله

حواديت في منتهى الرووووعة...

جزاكي الله خيراً على هذا المجهود الرائع..

وننتظر المزيد.......

اللهم ربي لنا أبناءنا...وربنا معهم

شارك هذه المشاركه


رابط المشاركه
شارك

حدوتة هتفهمك ليه بيقولك انا زهقان..مهما عملتي له؟

احمد بيحب الحركة كتير والتنطيط...

دايما يتقال عليه"شقي"بس ذكي...

درجاته مش حلوة اوي لكن معقولة....

احمد حنين وطيب وبيحب الاطفال اللي اصغر منه وعطوف عليهم كلهم الا اخوه الصغير طارق!

لانه بيغيظه واحمد بيضربه..وماما تزعق ...

احمد بحب اوي كورة القدم وما بيطيقش السباحة لكن هيعمل ايه في ماما ؟ مصرة علي انه يبقي بطل سباحة...وبتقول علي الكورة ما لهاش لازمة.

واحمد مش مبسوط في السباحة بس يالا!!! اهو بيمارسها وخلاص...

احمد بيحب الحركة و الجري بس ماما دايما تزعق"بطل غلبة"....

بيبطل لما تزعق وخلاص، احمد مش بيحب يقعد يذاكر علي مكتبه بيحب يتحرك وهو بيذاكر وماما تزعق بيقعد وخلاص!!

احمد زهقان ودايما مش مبسوط ...

ماما اخدته هو وطارق وفسحتهم بس احمد كان برضه زهقان لما رجع وقال لماما "احنا ما بنخرجش خالص"..

ماما انهارت "بعد كل ده...انت مفيش حاجة بترضيك؟"...

احمد سكت وخلاص...،

ماما وبابا سافروا الحج وتيته جات تقعد مع احمد وطارق...

تيته لاحظت ان احمد بيزهق كتير... تيته ابتسمت ..احمد استغرب ..،،،

في النادي احمد لعب كورة بس اما شاف تيتة خاف تزعق له لكن اتفاجئ انها بتصقف له... "برافو ايه الشطارة دي" ...

احمد اندهش "بس الكورة مالهاش لازمه"

تيته ضحكت "كل رياضه وليها لازمتها يا احمد"...

احمد قال "اشتركي لي في الكورة"...

تيته وافقت .... يااااه احمد طار من الفرحة ومبقاش زهقان في النادي واستحمل السباحة،

احمد في البيت كان طهقان من المذاكرة ع المكتب قام يتمشي وهو بيذاكر تيتة مقالتش حاجة،،

"هي مش شايفاني ولا ايه؟"احمد قال كده لنفسه،لكن طبعا تيته كانت شايفاه ...احمد قال لها "ينفع اذاكر وانا باتحرك"

تيته ردت "ينفع...المهم تذاكر"..

احمد قال "والله انتي حلوة" درجات احمد اتحسنت ،

تيته تعبانة ومش بتقدر تخرجهم كتير لكن احمد مش زهقان وبيساعد تيته في تزويق التورته والبيتزا وفي ملي ازايز الماية...

وتيته بتقول "انت بتساعدني في رعاية طارق" وفعلا احمد مبقاش يغلس علي طارق......

ماما وبابا كانوا واحشين احمد لكن نفسه تيته ما تمشيش...

وعيط كتير يوم ما عرف انهم راجعين... تيته حضنته..وقال لها "ما تمشيش يا تيته..ارجوكي..."

تيتة احترمت نمط احمد وعشان كده احمد احترم تيته ومكانش متعب ليها ،

تيته عاملته باحترام وراعت ذكاءه الشخصي وميوله مكنش معاها زهقان ،

خلو بالكم الطفل لو مش حاسس باحترامك ليه العاب الدنيا والخروجات مش هتعوضه....

شارك هذه المشاركه


رابط المشاركه
شارك

لماذا يبتكر الاطفال اصدقاء خياليين؟

ومتي يصبح الامر خطيرا حدوته هتفهمك ده

نجوي...بنت وحيدة لماما وبابا معندهاش اخوات

وماما كان نفسها تخلف تاني لكن الدكتورة قالت مش هينفع """

نجوي ساعات بتشوف ماما بتعيط

نجوي بتحب ماما لكن مش بتحب العياط....نجوي تحكي لمين؟

نجوي اخترعت شخصيه وسمتها رورو....بتحكي له ان مامتها بتعيط....وبعدين بتلعب معاه...خلاص رورو بيجي معاها في كل حتة...

بابا زعق لها لكن تيته قالت له سيبها بتلعب....،،،

نجوي كبرت شوية و..رورو كمان كبر ...

نجوي كان نفسها تحكي لماما حاجات لكن ماما بتعيط كتير عشان مش بتخلف تاني....

ونجوي مش بتلاقي غبر رورو تكلمه......

وبابا بيزعق وتيته....مبقتش بتقول له حاجة....ونجوي ...برضه بتكلم رورو....،،،،

تيته اخدت نجوي على رجلها وحضنتها....

نجوي بصت لتيته..... وقالت لها :ينفع اتكلم معاكي كتير؟.....

*****وجود اصدقاء خياليين للطفل امر طبيعي في سن صغير لكن استمراره فوق سن 5سنوات يعكس مشكلة.....

لابد ان ننتبه للطفل ونتحدث معه

شارك هذه المشاركه


رابط المشاركه
شارك

حدوتة هتفهمك ليه معندهمش ثقة في نفسهم...

هنا جميلة واقرب حد ليها في الدنيا ماما....

بتكلمها وتحكي لها...

ماما بتقول "انا تخنت اوي يا هنا وبقي شكلي وحش"...

هنا تقول: ابدا يا ماما حضرتك قمر

ماما بتوزن نفسها كل يوم... ودايما تتضايق

هنا تقول لها معلش يا ماما...

ماما قالت "انا اصلي بتخن من اي حاجة لو شربت ماية حتي باتخن"

في العيد ماما جابت لبس جميل وبالونة لهنا ..وهنا كانت فرحانة

بس......هنا فجأه. ..حست انها مش حلوة خالص ....ورمت البالونة وراحت توزن نفسها...ياااااه انا تخنت.....

ماما الحقي

ماما قالت"انتي لسه صغيرة..."

هنا كانت... بتفكر تعمل ايه ما هي اكيد هتتعب زي ماما.... بقت علي طول بتفكر"""""

هذه القصة حقيقية.....برجاء انتبهوا لان الاطفال يخزنون ويتأثرون ويقلدون.....

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×