يوميات الست ذكية بدون ردود بقلم المبدعة "هبة نور"

[حواء أم هالة 1895]

*~* يوميــ الست ذكية ـــــــات *~*

 

(1)

 

بقــ هبةنور ــلم

 

 

ياسلام على الست ذكية

 

 

زوجة مثالية وعاقلة وكاملة وجوزها مش عارف يعمل ايه ولا ايه من فرحته بيها

 

 

تعالوا شوفوا عملت ايه النهاردة

 

 

اهى دخلت تصحى جوزها يوم اجازته من الصبح بدرى

 

 

اصحى يا عبد الصمد اصحى

 

 

يا عبد الصمد اصحى يا عبده

 

 

يوه ايه يا ذكية بتصحينى ليه دلوقتى

 

 

الساعة عدت سبعة ياراجل

 

 

يا شيخة حرام عليكى انهاردة اجازة سيبينى انام وارتاح من شقى الأسبوع

 

 

شقى ايه وكلام فاضى ايه يعنى هو انت بتروح الشغل تشيل حديد

 

 

انت بتروح تقعد على مكتبك زى الباشا

 

 

يعنى هو انا بقعد على المكتب العب

 

 

طيب يلا اصحى عشان تودينى لأمى

 

 

هى امك لحقت توحشك ما كانت عندنا اول امبارح

 

 

قصدك ايه هو انت عايز تحرمنى من امى ولا ايه

 

 

لا يا ستى ربنا يخليكى لامك

 

 

طيب قوم البس

 

 

يا ستى هنزور امك فى وقت زى ده معقول

 

 

لا اصل انت مش عارف اصل امى عازمة خالتى محاسن وولادها واجواز ولادها وولادهم على الغدا

 

 

واحنا مالنا يا ستى

 

 

يا سلام امال مين اللى هيساعدها فى الطبيخ

 

 

يعنى هى امك مالقتش حد غيرك يساعدها فى الطبيخ

 

 

باين امك بتكره خالتك اوى

 

 

قصدك ايه يا عبد الصمد هو انا ما بعرفش اطبخ ولا ايه

 

 

لا ياستى بتعرفى انا اللى مابعرفش اكل

 

 

طيب انا هاخد الفرختين وكيلو اللحمة اللى فى الفريزر

 

 

نعم يختى ليه ان شاء الله

 

 

اصل انا وعدت امى انى هشارك معاها فى العزومة

 

 

وانتى قبل ما تتسحبى من لسانك وتوعديها مش تاخدى رئى

 

 

يا خويا مالك بتزعق ليه ع الصبح هو انا هاخد مزرعة فراخ وعجل من الفريزر

 

 

ما كانوش كيلو لحمة وفرختين عمى

 

 

انتى ناسية يا ست ان ماعندناش غيرهم لأخر الشهر

 

 

وماله الناس لبعضيها ياخويا

 

 

طيب هنكمل باقى الشهر بإيه

 

 

يوه يا عبد الصمد هو العدس والفول خلصو من السوق

 

 

طيب كملى انتى العشر ايام بالعدس والفول وانا كل يوم هخرج من الشغل اروح اتغدا عند امى حبيبتى اللى عرفت قيمتها بعد ما اتجوزتك

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(2)

بقــ هبةنور ــلم

 

 

النهاردة بقى إيه حكاية ذكية

جوزها جه من شغله وهى بتكلم صاحبتها

تعالوا نشوف ايه اللى حصل

 

ـ ها وبعدين يا نوال كملى يا حبيبتى

ـ ويعدين يا ذكية قولتلها أنت جايباه منين

ـ ذكيه

يا ذكية

ـ طيب استنى يا نوال عبد الصمد جه

ـ ايه يا عبد الصمد انت جيت؟

ـ انت شايفه ايه

ـ طيب معلش نوال بتحكيلى موضوع مهم قوى

ـ ياهانم قوليلها جوزى جه واقفلى معاها

ـ حاضر حاضر ... وبعدين يا نوال كملى ايه اللى حصل

ـ تصدقى الخبيثة مارضيتش تقولى

ـ لأ دى خبيثة قوى قوى وانت سكتى يا نوال

ـ لأ أنا قولتلها هعرف بطريقتى

ـ يا ذكية ... يا هانم

ـ استنى يا نوال أنا مش عارفه الراجل ده عصبى قوى ليه كده مع إنى غلبانة زى ما انت شايفه

ـ طيب روحى يا ذكيه شوفيه عايز ايه

ـ هيكون عايز ايه يعنى يا نوال يختى اكيد عايز ياكل

ـ طيب روحى اكليه

ـ لأ أصل أنا ما لحقتش اطبخ

ـ ليه يا ذكية يا اختى

ـ ما هو اصل انت كلامك يا نوال ما ينشبعش منه الكلام خدنى معاكى ونسيت أطبخ

ـ الله يخليكى يا حبيبتى ربنا يعلم انتى غالية عندى قد ايه يا ذكية

ـ يا ذكية ....... يا ست حرام عليكى جعااااااااااااااااااااااااااااااااان

ـ طيب... يا نوال هقوم اشوفله حتة جبنة على خيارتين فى الثلاجة والله زعلانه علشان ما كملناش الموضوع المهم

ـ خلاص يا ذكية أكليه وكلمينى

ـ ماشى يا نوال

ـ مع السلامة يا ذكية

ـ الله يسلمك يا نوال

ـ ايه يا عبد الصمد ايه مالكش حق عمال تنادى يا ذكية يا ذكية الست اتحرجت منك

ـ هى دى لو عندها دم وعرفت ان جوزك جه هتفضل ترغى برضه

ـ لأ لأ لأ يا عبد الصمد ما تغلطشى فى صحبتى

ـ فين الغدا يا هانم

ـ اصل يا أخويا .... أصل أنا ...

ـ أصلك ايه يا ستى ما طبختيش طبعاً

ـ معلش يا عبد الصمد سامحنى المره دى

ـ لأ بجد زودتيها .... إدينى التليفون

ـ ليه هتكلم نوال

ـ انت عايزه تجننينى هكلم ابوكى يا هانم

ـ وعايز ايه من ابويا

ـ هشهده على ظلم بنته لى

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

 

(3)

بقــ هبةنور ــلم

 

 

ذكية الزوجة المثالية قاعدة على النت من الصبحية

 

 

وجوزها بيدور عليها

 

 

تعالوا شوفوا عملت ايه النهاردة

 

 

ذكية

 

 

نعمين يا عبد الصمد

 

 

بتعملى ايه

 

 

بشيت عقبال امالتك

 

 

وقمصانى فين

 

 

ماشوفتهومش النهاردة

 

 

هو انا بسألك عن ولاد اختك

 

 

مين بتقول ايه يا عبد الصمد

 

 

يا ستى ادينى وشك وركزى معايا

 

 

خيريا عبد الصمد

 

 

قمصانى فين

 

 

فى الغسيل يا اخويا

 

 

ومتغسلوش ليه

 

 

حاضر هبقى اغسلهم

 

 

ولحد ما يتغسلوا هلبس ايه

 

 

ما انت لابس اهه والحمد لله

 

 

القميس اللى انا لابسه زى الطين

 

 

وانت مش تحافظ على هدومك نظيفة يا عبد الصمد

 

 

المهم هعمل ايه دلوقتى

 

 

اتصرف يا عبد الصمد البس اى حاجة

 

 

يعنى هلبس عباية من بتوعك يا ست

 

 

لا حول ولا قوة إلا بالله يعنى ايه لزوم التريقة دى

 

 

بجد أنا فوضت أمرى فيكى فى الله

 

 

يا شيخة اتقى الله خافى من ربنا حرام عليكى

 

 

جرى ايه يا عبد الصمد ايه اتقى الله وخافى من ربنا دى هو انا واكله مال يتاما يا راجل

 

 

بجد كان يوم اسود يوم ما دخلتلك النت فى البيت

 

 

يا سلام على رأى المثل النت لو مش فى البيت القطن يهرب من الغيط

 

 

لاء ولا انت الصادقة الست اللى على النت طول النهار لا تنظف بيت ولا تعمر دار

 

 

انت عايز ايه با عبد الصمد دلوقتى

 

 

يا هانم انا ما منعتكيش من النت لكن المفروض تحددى ساعتين بس مش طول النهار

 

 

انت بجد راجل غاوى مشاكل يعنى انا عملت ايه دلوقتى هو انا كنت روحت ولا جيبت فى حتة علشان تزعل

 

 

انا قاعده كافية خيرى شرى فى بيتى وفاتحه نتى وبكلم حبايبى تزعل ليه بقى

 

 

بصى انت الكلام مش هيجيب نتيجة معاكى شغل البيت مقصرة فيه وانا بقيت اخر اهتماماتك انا من بكرة هروح الغى اشتراك النت

 

 

كده برضه يا عبد الصمد طيب روح الغى النت وانا قلبى وربى غضبانين عليك ليوم الدين

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(4)

بقــ هبةنور ــلم

 

 

الست ذكية قاعدة بتتفرج على مهند ونور

 

 

وجالها جوزها الغلبان الشقيان عبد الصمد

 

 

وقعدت تبحلق فى وشه تعالوا نشوف أيه اللى حصل

 

 

مالك يا ذكية بتبوصيلى كده ليه

 

 

بتفرج على عجائب خلق الله

 

 

لا إلا إلا الله مالك يا ست

 

 

قولى يا عبد الصمد انت بتحبنى

 

 

طبعا امال عايش معاكى ومستحملك ليه

 

 

امال ليه مش بتعيط وبتشحتف علشانى

 

 

واشحتف علشانك ليه هو انا محروم منك ما انت فى وشى ليل ونهار

 

 

وعبد الحاجه الوحيده اللى بتخلينى اعيط لما بتفكر اليوم اللى خطبتك فيه

 

 

طيب وليه مش بتبصلى بحنيه

 

 

تعالى يا ست لما أبصلك بحنية

 

 

ايه ده يا عبد الصمد مال عنيك

 

 

مالها عنيه

 

 

مش عارف فيها حاجه غريبة

 

 

غريبة أزاى

 

 

انت عندك عين أوسع من عين يا عبد الصمد

 

 

لا حول ولا قوة إلا بالله

 

 

وحواجب مالهم مقفولين وكتير كده ليه يا اخويا

 

 

معلش استحملينى

 

 

وليه بقك كبير كده

 

 

وايه تانى مش عاجبك

 

 

بصراحة مش عارفه يا عبد الصمد فى حاجه فى وشك مش مريحانى بس مش عارفه ايه هيه يمكن مناخيرك بقى

 

 

طيب أنا هدخل انام يا ذكية علشان اريحك منى شوية

 

 

لاء خليك ادينا بندردش

 

 

هى دى دردشه يا ذكية

 

 

ده كلام تقوليه لجوزك

 

 

اصلك انت ما شفتش مهند يا عبد الصمد

 

 

مين مهند ده يا ست هانم

 

 

طيب وطى صوتك .. ده الجدع الممثل التركى اللى بيجى فى التليفزيون

 

 

اصله انا نفسى تبقى شبهه

 

 

يا سلام وابقى شبهه ازاى يا فالحة

 

 

أولا تروح الجم

 

 

أروح الجم ليه

 

 

بصراحة يا عبد الصمد مش عايزه اقلك ان كرشك فاضحنى فى كل حته

 

 

دى حتى امى شافت واحد شبهك وكانت هتسلم عليه لكن قالتلى لما قربت عرفت انه مش جوزك لانى معلماه بكرشه

 

 

يا سلام عليك وعلى امك يا ذكية ونعمة الناس

 

 

بقلك ايه با عبد الصمد انت تروح مركز تجميل يشفطولك كرشك ويركبولك لينزز خضره

 

 

وماله يا ذكيه اروح اركب لينزز خضره واصبغ شعرى واسمى نفسى عفاف

 

 

بطل تتريق عليا يا عبد الصمد الموضوع كبير قوى قوى قا اخويا وما ينفعش السكات عليه

 

 

يا هانم الست لازم تقدر جوزها وتحترمه اما سى مهند ده شغلته التمثيل

 

 

ودى مهنته اللى بياكل منها عيش يعنى يسبل ويقبض

 

 

لكن الراجل اللى زى حالاتى مطحون فى شغله ومستنى مراته الكاملة العاقلة اللى تقدره وتشيله على راسها

 

 

ومهند ده لو بتحترمى جوزك ما تشفهوش تانى

 

 

وعلى فكره ليكى عندى مفاجأة

 

 

ايه يا اخويا

 

 

لمى هدومك ومع السلامة على ابوكى

 

 

ايه

 

 

ليه كده يا اخويا

 

 

خلى مهند ينفعك

 

 

مهند مين وبتاع مين يا نور عينى انت

 

 

بقيت نور عينك دلوقتى

 

 

سامحنى يا عبد الصمد

 

 

لاء أنا مصمم تسيبى البيت

 

 

اه يانا يا مظلمة يانا اهئ اهئ

 

 

يقطع التمسليات والتركى واللى بلانا بيها

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(5)

بقــ هبةنور ــلم

 

 

عبد الصمد رجع من شغله

 

 

لقى ست غريبة خارجة شايلة شنطة وذكية بتقولها ابقى تعالى أول كل شهر تلاقينى مجهزهوملك

 

 

تعالوا تعالوا نشوف ايه الحكاية

 

 

السلام عليكم

 

 

وعليكم السلام

 

 

مين دى يا ذكية

 

 

ادخل انت يا عبد الصمد دلوقتى انا جاية

 

 

مع السلامة يا أم رتيبة

 

 

الله يسلمك يا ست ذكية يا أغلى زبونة فى العمارة

 

 

يا ذكية

 

 

انا جيت اهوه يا عبد الصمد

 

 

مين الست دى

 

 

دى أم رتيبة الدلالة يا خويا

 

 

هو الدلالات دول مش انقرضوا من زمان

 

 

يا سلام واشمعنى الدلالات بتوعنا ينقرضوا والدلالات بتوع الصين بيجوا بشنطهم على الشقق ما بينقرضوش

 

 

طيب ودى عايزه ايه

 

 

لاء يا اخويا احنا اللى عايزين منها

 

 

فى ايه يا ذكية ايه الحكاية

 

 

ولا حكاية ولا رواية أنا كنت امبارح عند انصاف جارتنا

 

 

لاقيتها لابسه جلابية حلوة قوى وقلتلها اشترتيها منين

 

 

قالتلى من أم رتبية بالتقسيط

 

 

قولتلها ابعتهالى

 

 

خدت منها فضلت خيرك جلابيتين ليا وكل عيل بيجامتين و4 ملايات سرير ومفرشين

 

 

ودول بكام ان شاء الله

 

 

ايه يا اخويا هى كانت عايزه الفين جنيه ضحكت عليها وخدتهم بالف تسعمية خمسة وتسعين بس

 

 

بس ماتخفش دول بالتقسيط

 

 

كل شهر متين جنيه بس

 

 

ده ايه الهنا والسعد اللى انا فيه ده

 

 

شوفت عشان تعرف مراتك ناصحة

 

 

يا ذكية حرام عليكى ده المثل بيقول اللى ما يشوفش من الغربال يبقى اعمى

 

 

اعمى ايه ومفتح ايه هو انا عملت ايه يا خواتى

 

 

انا لسه ما خلصتش من أقساط التكييف

 

 

ربنا يعينك ويقويك

 

 

انا مش عارف كان لزومه ايه التكييف

 

 

لزومه ايه ازاى يعنى انت عايز سكان العمارة ياكلوا وشى

 

 

كلهم عندهم تكييف وبيغظونى بيه

 

 

دى حتى سعاد كل يوم قبل ما نجيب التكييف تقولى انا مش عارفه الناس الغلابة عايشين من غير تكييف ازاى

 

 

كان قصدها علينا يا عبد الصمد

 

 

انت يرضيك مراتك يتقل قيمتها

 

 

لأ ما يرضنيش بعد الشر عليكى وعلى قيمتك

 

 

طيب والعربية اللى صممتى نجيبها بالقسط

 

 

لأ يا عبد الصمد إلا العربية يا خيوا دى عامله لينا قيمة وسط الخلق

 

 

وبصراحة كده انا جيبتها علشان البواب بيعاملنى وحش

 

 

بيعاملك وحش ازاى

 

 

كل ما يشوفنى بيبصلى من فوق لتحت وما بيرضاش يشتريلى حاجه من السوق

 

 

لكن بصراحة لما جبنا العربية بقى يقولى يا ست هانم ويضحك فى وشى

 

 

يا ذكية اتقى الله فى شقايا وتعبى

 

 

المفروض تحسى بيا وبالمسئوليات اللى على دماغى

 

 

هجيب منين الاقساط دى كلها

 

 

اخص عليك يا عبد الصمد يا كاسر بخاطرى

 

 

انت عايز برستيجى يضيع بين الناس

 

 

لأ ما تخفيش كده كده هيضيع لما اتسجن

 

 

بعد الشر عليك يا عبده ما تقولشى كده يا خويا

 

 

ان شاء الله اللى يكرهوك

 

 

قلبك عليا قوى يختى

 

 

امال ايه مش جوزى حبيبى اللى مهنينى

 

 

طيب ايه رأيك ترجعى الحاجات اللى اشتريتهيا من ام رتيبة

 

 

حاضر يا حبى من عينى ولا اشوفك زعلان ابدا

 

 

ربنا يخليكى يا ذكية يا نور عنيه

 

 

ويخليك يا عبد الصمد

 

 

طيب انا خارج شويه اقعد مع اصحابى

 

 

وماله بس ما تنساش وانت راجع تعدى على المحل اللى جنبينا

 

 

تسألهم جابوا الكيتشن مشين اليابانى اللى طلبته منهم ولا لسه

 

 

يا مثبت العقل والدين يااااااااااااااااااااااااااااااااااااارب

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(6)

 

 

بقــ هبةنور ــلم

 

 

النهاردة ذكية حكايتها حكاية

 

 

وراها مشوار مهم ودخلت تستأذن عبد الصمد

 

 

تعالو نشوف ايه الحكاية

 

 

بقولك ايه ياعبد الصمد انا رايحة لاختى منكسرة عشان اتصلت بيا وعايزانى

 

 

ليه عايزاكى فى ايه خير

 

 

ابدا ياخويا اصلها اتخانقت مع جوزها وطردته من الشقة

 

 

ايه ازاى الكلام ده يعنى ايه تطرد جوزها من بيته

 

 

ماهو زهقها بقى ياعبد الصمد بعاميله السودا

 

 

عملها ايه ياذكية

 

 

تصدق ياعبد الصمد الراجل يصحيها من احلاها نومة عشان تحضرله فطار

 

 

معقول عمل كدة لأ دا باين عليه اتجنن

 

 

مش كدة برضو ياعبد الصمد

 

 

وعمل ايه تانى

 

 

بعيد عنك ياخويا مش عايز يجيبلها طقم الاسوار الدهب اللى نفسها فيه ال ايه مزنوق ومامعهوش فلوس

 

 

لأ دا كدة يستاهل الحرق مش الطرد

 

 

رجالة اخر زمن ياعبد المقصود

 

 

وان شاء الله اختك عايزاكى فى ايه

 

 

عايزانى اروح معاها القسم نعمله محضر

 

 

لا حول ولا قوة الا بالله ليه الأذى ده هو مد ايده عليها

 

 

لأ ياعبد الصمد هو يستجرى بس اختى قامت بالواجب خبطت راسها فى الحيطة وهتقول انه ضربها

 

 

ياعالم اتقوا ربنا تطرده الراجل من بيته وتعملوله محضر كمان وانتى مش المفروض تعقلى اختك منكسرة وتنصحيها

 

 

ماانا نصحتها بس هى دماغها ناشفة

 

 

نصحتيها بايه ياذكية

 

 

نصحتها تلمله رجالة العيلة

 

 

ماشاء الله ونعم الرأى تلمله رجالة العيلة عشان يصلحوهم

 

 

لأ ياعبد الصمد عشان يكتفوه ويرنوه علقة ويعرفوه غلطه

 

 

لا اله الا الله انتى اتجننتى انتى واختك يا ذكيه بجد بالحق قوليلى ياذكية هى امك سمت اختك منكسرة ليه

 

 

عشان غلبانة ياخويا ولا بتهش ولا بتنش زى القطة

 

 

زى القطة ولا زى امنا الغولة

 

 

طب ياعبد الصمد هروح البس

 

 

لأ ياذكية مش هتروحى المشوار المقندل ده

 

 

انت بتمنعنى من صلة الرحم يا عبد الصمد

 

 

انا بحميكى من شر نفسك ياذكية

 

 

طيب ياعبد الصمد انا بقى هلملك رجالة العيلة عشان يجو يعرفوك غلطك

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

 

(7)

 

 

بقــ هبةنور ــلم

 

 

عبد الصمد وهو راجع من شغله لقى عربيات مطافى واقفة عند العمارة وناس كتير واقفة بس ماقدرش يفهم فى ايه

 

 

طبعا جرى على ذكية وهو مخضوض عليها وعلى الولاد وفضل يضرب الجرس بعصبية وتوتر ولما فتحت

 

 

تعالوا نشوف ايه حصل

 

 

ايه ياعبد الصمد كفا الله الشر مالك

 

 

انتى بخير ياذكية انتى والولاد

 

 

الحمدلله ياعبد الصمد ليه فى ايه

 

 

انا لقيت عربيات مطافى كتير قدام العمارة واتخضيت عليكو

 

 

اه ياخويا دول جاين عشان المسابقة

 

 

انتى عملتى مسابقة لبتوع المطافى ياذكية

 

 

لأ ياخويا اصل انت مش عارف الموضوع . انا كنت قاعدة مع جيرانى حبايبى امبارح وجت سيرة الملوخية راحت سعاد قالت

 

 

انا ماحدش يعرف يعمل ملوخية زى بتاعتى ردت عليها عواطف قالت انتى ايش عرفك بالملوخية وعمايلها الملوخية ليها ناسها

 

 

بس انا ماسكتش قولتلهم انا علية ملوخية ماحصلتش ولا هتحصل وبعدين قولنا المية تكدب الغطاس وعملنا مسابقة احلى شهقة

 

 

واشتركوا فيها ستات العمارة كلهم وكل واحدة تجيب ملوخيتها وتقف فى مطبخها وتستعد ولما تضرب صفارة الحكم كلنا نحط الطشة ونشهق الشهقة الجماعية

 

 

لكن السكان اللى فى العمارة اللى جنبينا افتكروا العمارة بتتحرق واحنا بنصوت فطلبولنا المطافى ياخويا

 

 

ربنا يعوض علية عوض الصابرين . مش كانت روحكو طلعت وانتو بتشهقو وريحتو سكان الشارع من بلاويكو

 

 

بتقول حاجة ياعبده

 

 

لأ ما استغناش . وعلى كدة كل ستات العمارة اشتركو معاكو

 

 

لأ ياعبد الصمد ماعدا الحاجة عزيزة والحاجة ام احمد

 

 

اه طبعا دول ستات كبار افاضل مش دماغهم طقة زيكو

 

 

لأ ياخويا ماهم اصلهم فى لجنة التحكيم والحاجة ام احمد هى اللى ضربت الصفارة بتاعة الشهقة الجماعية

 

 

يامنجى يامغيث

 

 

ادخل غير هدومك ياعبده على اما احضرلك الغدا

 

 

هيه هيه هيه هيييييييييييييييه

 

 

مين دول . يا ذكية انتى ياهانم

 

 

نعم ياعبد الصمد هو احنا مش مخلفين عيلين

 

 

ايوة يا خويا

 

 

امال العيال دى كلها جت منين

 

 

دول عيال الجيران جم يلعبوا مع العيال

 

 

يلعبوا مع العيال فى اوضة نومنا ياذكية

 

 

احباب الله ياعبد الصمد سيبهوم يلعبوا

 

 

طب الحقى احباب الله فاتحين الدولاب ومبهدلين الهدوم

 

 

بس ياحبايبى اخرجو العبوا برا عشان عمكو عبد الصمد هيغير هدومه

 

 

هيه هيه هيه هيه

 

 

انت غيرت هدومك ياعبد الصمد

 

 

الحمدلله

 

 

طيب ادخل الغدا فى السفرا

 

 

الحقى ياذكية العيال دخلوا السفرا وخطفوا الأكل كله وماخلوليش ولا بق مية

 

 

معلش ياخويا اطفال برضو

 

 

ياذكية كدة ماينفعش دى مش طريقة

 

 

ياست ذكية

 

 

ذكية يا اختى

 

 

طيب ياعبد الصمد هروح ارد على مديحة بتنده علية من شباك المطبخ

 

 

روحى ردى على حبايبك

 

 

عايزة حاجة يا مديحة يا اختى

 

 

انتى بتعملى ايه ياذكية

 

 

مش بعمل حاجة

 

 

طيب ماتيجى تشربى معايا شاى

 

 

طيب ماتيجى انتى

 

 

مش بتقولى جوزك عندك

 

 

ماهو هيقعد فى الصالون ويتفرج على التليفزيون وانا وانتى نقعد فى البلكونة نشرب الشاى

 

 

طيب ماشى انا نازلة

 

 

تأنسى وتنورى ياحبيبتى

 

 

ايه اللى قولتيه لجارتك ده ياذكية

 

 

ايه ياعبد الصمد انا عملت ايه

 

 

حرام عليكى بجد يعنى الاقى راحتى فين لو مالقتهاش فى بيتى

 

 

جيرانى ياعبد الصمد وواخدين بحسى فى غيابك

 

 

دول واخدين بحسك فى غيابى وحضورى وده مايصحش الموضوع ده تحطيله حد

 

 

ياخويا ولا حد ولا سبت دى مابقتش عيشة حرام عليك ياراجل . انا عملت ايه بس يا اخواتى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

 

(8)

 

 

بقــ هبةنور ــلم

 

 

ذكية لقت عبد الصمد قافل على نفسه الباب وبيتكلم فى الموبايل

 

 

ولازم تعرف بيكلم مين طبعا

 

 

تعالوا نشوف ايه اللى حصل

 

 

بس يامصطفى ياخويا هدى نفسك

 

 

لأ ياعبد الصمد انا حقيقى تعبت من الست دى

 

 

طب اهدا وانا هاجيلك حالا

 

 

عبد الصمد

 

 

نعم ياسبب سعدى

 

 

هو اخوك متخانق مع مراته ليه

 

 

وانتى عرفتى منين

 

 

اصل انا سمعتكو بالصدفة وانا معدية جنب الباب

 

 

وانتى معدية جنب الباب ولا وانتى لازقة فى الباب

 

 

انت كدة على طول ظالمنى ياعبده

 

 

معلش ربنا يعينك علية

 

 

طيب انت بتلبس ورايح تصالحهم

 

 

ان شاء الله

 

 

طب استنى هلبس انا والعيال ونيجى معاك

 

 

لا اله الا الله هو انا رايح رحلة ياست

 

 

ايه ياعبد الصمد مش لازم اشارك فى مصايب عيلتكو

 

 

الله الغنى عن مشاركاتك . انتى بالذات لو اتدخلتى الموضوع هينتهى بطلاقهم . هو انا انسى لما اختى كانت زعلانة مع جوزها وقولتيلها انا لو منك اخلعه

 

 

يوه ياعبد الصمد ماهى زى اختى وعايزة مصلحتها

 

طب ايه رأيك هى اللى كانت غلطانة واعتذرت لجوزها

 

 

هى طلعت غلطانة ! هى اختك طول عمرها غلاطة ويتفاتلها بلاد

 

 

طب ممكن انزل بعد اذن جنابك

 

 

طيب بس لما تيجى تحكيلى ايه اللى حصل

 

 

خليكى فى حالك ياذكية

 

 

هحاول ياعبد الصمد

 

 

انت جيت ياعبد الصمد حمد لله على السلامة

 

 

الله يسلمك

 

 

الجماعة اتصالحو

 

 

الحمد لله وبقو سمن على عسل

 

 

هما كانوا متخانقين ليه

 

 

تصبحى على خير ياذكية

 

 

كدة ياعبد الصمد طيب ماشى بتشد اللحاف على وشك عشان ماتشوفنيش

 

 

اه صحيح نسيت اقولك واحد صاحبك اتصل بيك

 

 

اسمه ايه

 

 

مش عارفة ياخويا فكرى ذكرى ولا بكرى

 

 

اه شكرى

 

 

بيقولك كلمه ضرورى وهو اتصل بيك على الارضى عشان موبايلك مقفول

 

 

طيب هاتى الموبايل واخرجى برا

 

 

ليه ياخويا هو انت هتكلم شكرى ولا شكرية . هو مش راجل زيه زيك .ايه يعنى الاسرار اللى هتكون بينكو

 

 

هاتى الموبايل ياذكية واطلعى برا

 

 

طيب قبل مااخرج عايزة اقولك اخوك اللى فى بلاد برا بعتلك ازايز برفانات

 

 

وهى فين

 

 

اهيه ياعبد الصمد

 

 

ايه ده ياذكية . هى مش كانت فى صندوق مقفول ومتبرشم

 

 

اه ياخويا امال يعنى كانوا فى كيس نايلون

 

 

ومين اذنك تفتحى الصندوق

 

 

اصل ياخويا خفت ليكون فيه قنبلة تفرقع فى وشك قولت افتحه انا وافديك بروحى ياعبده

 

 

مش هقول غير ربنا يصبرنى عليكى ياذكية

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

(9)

 

بقــ هبةنور ــلم

 

 

النهاردة ذكية جاية من برا وجايبة معاها امها وامها كانت زعلانة وبتعيط ياعينى

 

رنوا الجرس وفتح عبد الصمد

 

تعالو نشوف ايه الحكاية

 

ادخلى ياما

 

اهئ اهئ اهئ اهىىىىىىىىىىئ

 

مالك ياحماتى بس بتعيطى ليه

 

ااهئ اهئ اهىىىىىىىىىىىىىىىىىىىىئ

 

امك مالها ياذكية

 

سيب امى فى حالها ياعبد الصمد

 

ايه بس ايه اللى حصل

 

اصلها متخانقة مع ابويا

 

معقول ! ليه بس

 

بسبب الفالنتيم ياخويا

 

اسمه الفالنتين ياذكية

 

قوطع ياخويا وقوطعت سيرته

 

وامك مالها اصلا بالفالنتين ياذكية

 

اتصلت بيا الصبح ياخويا وقالتلى هاتى العيال وتعالى

 

روحت ياخويا لقيتها لبسة جلابية حمرا وابويا لابس بيجاما حمرا افتكرتهم عندهم الحصبة ياخويا

 

قولتيلها مالك ياما بعد الشر انتى عيانة انتى وابويا

 

قالتلى ليه يا بت ياذكية

 

قولتيلها امال لابسين احمر ليه . قالتلى عشان الفلانتيم ياجاهلة وقالتلى روحى السوق هاتيلى سبعة كيلو طماطم

 

قولتيلها ليه ياما قالتلى هنعمل محشى طماطم

 

طب واشمعنى امك عايزة تعمل محشى طماطم يعنى

 

عشان الطماطم حمر صحصح معايا ياعبد الصمد حتى قولتيله اجيبلك بتنجان كمان قالتلى ابدا ده لونه اسود ومايدخلش بيتى النهاردة

 

اه عندها حق وبعدين

 

روحت السوق ياخويا لاقيت الباياعين اتهبلو بعيد عنك . بياع كاتب على الطماطم .طماطم لامور والتانى كاتب طماطم جيتادور

 

المهم ياخويا جيبت الطماطم وروحت حشيتها انا وهى وبعدين حكمت علية انا والعيال نلبس احمر كلنا

 

بقينا قاعدين ياخويا كلنا لابسين احمر فى احمر زى المستنين حكم الاعدام

 

القصد ياخويا اتغدينا وابويا نفخ كام بلونة وامى قعدت تفرقع بومب

 

وشوية جه وقت الهدايا . راحت امى ادت لابويا الهدية بتاعتوا فتحها لاقاها جايباله شبشب حمام

 

وابوكى زعل طبعا عشان امك جايباله شبشب

 

لأ ياخويا ابويا زعل عشان الشبشب مجاش مقاسه وقال لامى يعنى عايشة معاية العمر ده كله ومش عارفة مقاس رجلى

 

وهى تقوله ياخويا حقك علية قالها لا انتى مش هتباتى فى البت ده النهاردة روحت جايباها وجاية

 

طب والهدية اللى ابوكى جابها لامك كانت ايه

 

ماهى مالحقتش تعرف ياعينى

 

لا حول ولا قوة الا بالله . حتى ابوكى وامك بيحتفلو بالفالنتين

 

بس انا زعلانة منك يا عبد الصمد

 

ليه بس

 

فين هدية الفلانتيم بتاعتى

 

ياذكية الفالنتين ده عيد كفار والمفروض مانحتفلش بيه

 

اه طبعا مادام هتجيب هدية وتدفع فلوس يبقى عيد كفار ولو مش هتدفع فلوس يبقى عيد مؤمنين صالحين ياعبد الصمد مش كدة

 

انتى مااتعظتيش من اللى حصل لامك ياذكية

 

قصدك ايه ياعبد الصمد

 

قصدى مافيش حاجة اسمها فلانتين ياذكية وخلى ايامك معايا تعدى على خير

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(10)

بقــ هبةنور ــلم

ذكية هانم ست الهوانم قاعدة بتتفرج على التليفزيون وحاطة رجل على رجل

 

وجه عبد الصمد يسأل عن الغدا لكن لقى مفاجأة

 

تعالوا نشوف ايه اللى حصل

 

 

 

ذكية

 

ذكية

 

ياذكية

 

انتى مش بتردى ليه

 

عايز ايه

 

ايه الاسلوب اللى بتردى بيه ده

 

ماله اسلوبى

 

مالوش ياستى . قومى حضرى الغدا

 

انسى ياعبد الصمد

 

انسى ايه ياذكية

 

الكلام الفاضى يا عبد الصمد بتاع حضريلى الغدا وحضريلى العشا تنساه عشان ده كان موضة وبطلت

 

نعم يا ست هانم! وده من امتى ان شاء الله

 

من ساعة مابقيت عضوة فى جمعية سوكسوك ومال

 

جمعية ايه يختى

 

معلش عاذراك ياعينى عليك ماتعرفش لغات. سوكسوك ومال يعنى الست الناجحة

 

 

هههههههههههههههههههههه خخخخخخخخخخخخخخخخخ قصدك ساكسيسفول ويمان

 

ايوة هى دى ياعبد الصمد

 

وانتى ان شاء الله اشتركتى فيها امتا

 

كل ستات الحى جالهم دعوات عشان نروح حفلة الاستفتاح . بس نصهم طلعوا ستات بلدى ومش متسئفين خالص ياعبد الصمد

 

ليه بعد الشر عملو ايه

 

فضحونا ياعبد الصمد . هما عرفوا ان الجمعية بيجيلها تموين اجنبى من هنا وكل واحدة راحت جابت شنطة خضار وجت الاجتماع كانوا فاكرينهم بيوزعوا سكر وزيت

 

ياذكية تمويل اجنبى مش تموين اجنبى

 

اه ياخويا ماهو من جهلهم مش فاهمين حاجة

 

وايه اللى حصل بعد كدة ياست المثقفات

 

الامن مارضيش يدخلهم الا لما يسيبوا شنط الخضار برا لكن هما ضربو الامن ودخلوا بالعافية

 

وبعدين دخلت ابلة الدكتورة مستقوية عبد الجبار

 

مين دى ياذكية

 

دى اللى عاملة الاجتماع واول مادخلت قعدنا نزغرط

 

ودى قالتلكو ايه

 

كتر الف خيرها عرفتنا حقوقنا وقالتلنا الست لازم تشتغل وتصرف على البيت عشان الراجل مايكسرش عينها

 

الله ينتقم منها ان شاء الله .وبعدين

 

قالتلنا كمان مافيش واحدة بعد كدة تدخل المطبخ وتبهدل روحها والأكل يكون دولوفرى

 

الله اكبر هناكل دليفرى يافرحتك بابنك ياما . كملى ياست العاقلين اشجينى

 

اه وكمان مافيش غسيل ومكوى فى البيت الحاجات دى تخلف ورجعية وهدومك يا عبودة توديها التراى كليم

 

تراى كليم ! اه دراى كلين . ماشاء الله نطق متميز يا ذكذوكة ياصانعة الحضارة .كملى

 

 

وتجيبلى شغالة من الفلبين ودادة للعيال من سيريلانجا

 

وايه تانى كملى عشان معايا فلوس كتيرة اوى عايز احقق كل احلامك

 

عايز كوباية مية تقوم تجيبها لروحك وماتطلبش منى حاجة ابدا

 

وايه كمان

 

اه نسيت اقولك انا هشيل اسم ابويا من البطاقة

 

انتى كمان ابوكى اتبريتى منه ياذكية

 

لأ مش للدرجة دى . اصل ابلة مستقوية قالت ان البنى ادم مننا لازم يتسمى بأسم امه . يعنى انا اسمى ذكية منيرة وانت اسمك عبد الصمد نسرين

 

لا حول ولا قوة الابالله . الست عقلها ضرب . بس انا امى مااسمهاش نسرين . امى اسمها جمالات

 

لا ياعبد الصمد اعذرنى ياخويا امك اسمها بلدى اوى ومايشرفش

 

اه عندك حق برضو . وان شاء الله الاجتماع الجاى امتى

 

لما ابلة مستقوية تفك الجبس وتخرج من المستشفى

 

هى اتجبست ! احسن تستاهل

 

كله من الستات الاوباش اللى كانوا جاين ياخدو التموين . قالولها عايزين التموين يا حاجة

 

قعدت تفهمهوم ان مافيش حاجة اسمها تموين اجنبى ومافيش زيت وسكر . وان الجمعية بيجيلها شيكات كل شهر من بلاد برا لإدارة الجمعية مش للعضوات

 

لكن ماصدقوهاش واتلموا عليها وقالوها فين الزيت والسكر يانصابة ونزلوا فيها ضرب وكسرولها دراعين ورجل وياعينى ركبت باروكة

 

ليه .شعرها راح فين

 

شعرها طلع فى ايديهم بعيد عنك المفترين قتالين القتلا

 

الحمدلله . ربنا يقل من امثالها . يا ذكية دول خرابين بيوت وناس ضد الاسلام

 

ماتقولش كدة ياعبد الصمد حرام عليك

 

طيب قومى اخزى الشيطان وحضرى لقمة ناكلها

 

خد الورقة دى ياعبد الصمد

 

ايه الورقة دى

 

دى ورقة فيها ارقام كل المطاعم اللى فى البلد اتصل واطلب دلوفرى

 

طيب هاتى التليفون

 

هتطلب دروفرى

 

لأ هطلب الحاج عبد المغيث المأذون

 

ايه ايه . ليه ياعبد الصمد هو انا زعلتك فى حاجة ياخويا . انا قايمة احضر الغدا ياعبده . ال سوكسوك ومال ال

 

 

ستات ماتجيش الا بالعين الحمرا.

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(11)

بقــ هبةنور ــلم

عبد الصمد متضايق اوى ياعينى من ذكية مش عارفة ليه مع انها زوجة مثالية ومش منقصاه حاجة خاااااااااااااااااالص

 

وبيبص لذكية بطريقة مش عجباها ياترى ليه

 

 

 

مالك ياعبد الصمد

 

 

اوف

 

 

بتنفخ ليه كدة حد مزعلك

 

 

اوووووووووف

 

لا حول ولا قوة الابالله . فى ايه ياعبده

 

 

انتى عاجبك تسريحة شعرك دى

 

لأ ياعبد الصمد الا تسريحة شعرى . انا عمرى ماهغيرها ابدا ابدا. التسريحة دى ليها تاريخ فى عيلتنا

 

تاريخ ايه المقندل ده

 

انا هفهمك ياعبد الصمد . جدى الله يرحمه كان بيحب التسريحة دى على ستى اوى ولما جه يموت وصا ستى ماتغيرهاش ابدا لحد ماتقابله

 

وستى وصت امى بالتسريحة دى وقالتلها التسريحة دى امانة فى شعرك اوعى تغيريها ياضنايا لا انتى ولا بناتك ولا نسلكو كله

 

اه عشان كدة ابوكى جاله الضغط وجوز اختك جاله السكر وانا هيجيلى شلل على ايديكى . ربنا يصبرنى ياشيخة على المرار اللى شوفته على ايديكى

 

 

شوف ياخويا نكران الجميل . انت سيبت كل حاجة وهتمسك فى تسريحتى

 

هى تسريحتك بس . وطريقتك فى اللبس . دى هدوم تلبسيها لجوزك . امال لو نازلة تتسولى هتلبسى ايه

 

كدة برضو ياعبد الصمد. انا منظرى منظر متسولين

 

ذكية امشى من وشى عشان ماارتكبش جريمة

 

 

طيب قولى ياعبد الصمد انت عايز ايه وانا هعمله

 

اولا تسريحة شعرك الاثرية دى تتغير

 

وازعل ستى فى تربتها ياعبد الصمد !

 

لا بعد الشر . موتينى انا بسبب عمايلك اللى تقصر العمر

 

بعد الشر عليك ياعبده ياحبيبى . طيب خلاص هغيرها

 

ربنا يهديكى . وكمان لازم تغيرى من طريقة لبسك وتلبسى هدوم جذابة

 

ودى بيجيبوها منين دى

 

اسألى اى حد برا عيلتكو

 

وماله ياعبد الصمد

 

طيب انا هنزل وعايز اجى من برا الاقيكى واحدة تانية

 

ازاى يعنى ياعبد الصمد

 

 

اوووووووووووف

 

خلاص ياخويا ماتنفخش انا فاهمة كل حاجة . هاتيجى تلاقى ايرمالادوس فى الشقة . انسى ذكية ياعبد الصمد

 

 

اتمنى ياذكية

 

مع السلامة يا عبد الصمد

 

الله يسلمك يا ذكية

 

 

 

 

 

الو ايوة يا باتعة يختى

 

 

الو ازيك ياذكية

 

الحمد لله يختى كنت عايزاكى فى حاجة كدة

 

خير يختى

 

 

الراجل عبد الصمد جوزى مش عاجبه شكلى ولا شعرى

 

 

يختى بصراحة عنده حق . انتى شكلك يطفش العفريت ياذكية . الله يكون فى عون جوزك

 

يختى الله يسامحك . ماعلينا. طيب اعمل ايه عشان اعجبه يختى

 

غيرى تسريحة شعرك

 

دى سهلة . وبعدين

 

انزلى اشترى لبس على الموضة كدة يختى

 

وماله ياباتعة اشترى يختى

 

وحطى برفان كدة

 

بس انا ماعنديش برفان

 

فى واحدة ست ماعندهاش برفانات

 

كان عندى كام ازازة وشحتها

 

ليه كدة بس ياذكية

 

ماانا قولت مالهومش لازمة يختى

 

طيب انا هقولك على كام نوع حلوين اوى ابقى هاتيهم

 

وماله يختى

 

واعملى سهرة رومانسية كدة

 

سهرة مالها يختى

 

 

يعنى هاتى شمع وحطيه فى الشمعدان واطفى النور

 

ايه الجو الكئيب ده ياباتعة انا بخاف من الضلمة يختى

 

بقولك ايه ياذكية اطلعى من دماغى انا مش فاضية

 

طيب يختى مع السلامة

 

 

ال سهرة روزمية ال . ستات فايقة ورايقة . انا بقى هعمل حاجات ماحدش سبقنى وعملها . يحيا الثورة

 

 

 

 

 

 

 

ذكية

 

 

ياذكية . ياحفيظ يارب . ايه الريحة اللى فى الشقة .ايه الدخان ده . فى ايه

 

 

انتى فين ياذكية

 

 

انت جيت ياعبد الصمد

 

سلام قولا من رب رحيم . انتى مين ياست

 

 

سلامة نظرك ياعبد الصمد . انا ذكية مراتك حبيبتك

 

لا يا ست . مراتى مش مشلفطة للدرجة دى

 

هو انت مافيش حاجة عاجباك ياراجل

 

ايه اللى فى عنيكى دى

 

اه . اصل ماعنديش كحل وكسلت انزل اشترى . روحت حرقت الحلة وهببتها وخت الهباب حطيته فى عنية بدل الكحل

 

تعاليلى يااما انا خايف

 

وبعدين كنت عايزة احط احمر فى بقى مالقتش بس لقيت المروكير بتاع الضوافر روحت حاطة فى بقى

 

منك لله يابعيدة وايه اللى نكش شعرك زى الغولة كدة

 

الله يسامحك ياعبد الصمد . انا غلطانة انى كويت شعرى بمكوى الهدوم وحطيتله جل من بتاعك . انا استاهل

 

لا بجد تسريحة ستك ارحم

 

 

شوفت عشان اتبطرت على النعمة اللى فى ايدك

 

انا نازل ياذكية وماتدروريش علية

 

 

رايح فين ياعبد الصمد

 

 

عبد الصمد استنى ياخويا رايح فين

 

 

الراجل المفترى سابنى ومشى

 

منتديات أخوات طريق الإسلام

تم تعديل 23 يوليو, 2012 بواسطة حواء 2010

[حواء أم هالة 1895]

*~* يوميــ الست ذكية ـــــــات *~*

 

(12)

 

بقــ هبةنور ــلم

 

 

على فكرة النهاردة حماة ذكية عندها

 

الله يرحمك يا ذكية

 

تعالوا نشوف ايه اللى حصل

 

بقولك ايه ياذكية

 

نعم يا عبد الصمد

 

امى جاية تقعد معانا يومين كدة

 

يا مصيبتى !

 

بتقولى حاجة ياذكية

 

بقول يا فرحتى يا سعدى حماتى حبيبتى جاية

 

ربنا يخليكى يا ذكية هو ده العشم برضو

 

هى جاية امتى ياخويا

 

زمانها جاية . وانا هنزل اجيب شوية فاكهة وحلويات عشان نرحب بيها

 

وماله ياخويا وهاتلى بلونتين اعلقهم على باب الشقة

 

حاضر ياذكية

 

ترن ترن ترررررررررررررررررررررررررررررررررررررررررررررررررررررررررررررررن

 

ميييين

 

افتحى يامزغودة

 

اهلا اهلا اهلا ام الغالى هاتى بوسة

 

اوعى يابت من وشى باسك حنش

 

اتفضلى يانينة

 

خدى شنطتى دخليها اوضتى

 

هو انتى عندك اوضة عندنا يانينة

 

اوضة ابنى تبقى اوضتى يابت

 

طيب وانا هنام فين

 

ماتنامى مطرح ماتنامى انتى هتشيلينى همك ليه . ابنى حبيبى فين

 

راح يجيب فاكهة وحلويات

 

يخليه ليا ابنى ضنايا

 

ذكية

 

اهلا ياعبد الصمد

 

امى جت

 

ايوة

 

امال هى فين

 

فاتحة التلاجة وبتلقط رزقها من ساعة ماجت

 

ابنى حبيبى ازيك ياعبد الصمد

 

ازيك يا امى وحشانى

 

ماتشوفش وحش ياحبيبى . ولا صحيح انت بتشوفه كل يوم ياضنايا . ياعينى عليك وعلى بختك ياابنى

 

ليه يا نينة ماله بخته

 

هو حد كلمك يابت انتى ولا عايزة تجرى شكلى والسلام

 

ايه يا امى بس دى ذكية بتحبك

 

بأمارة ايه ياابنى يلا نصيبك كدة هنعمل ايه

 

اوف لا حول ولا قوة الا بالله

 

البت دى بتنفخ ليه كلامى مش عاجبها

 

لا ياامى ده انتى كلامك شهد مكرر

 

يخليك يا حبيبى

 

مش نجاة بنت خالتك عنايات جت من السفر هى وجوزها

 

حمد لله على سلامتها

 

البت نجاة دى طالعة من عينى لحد دلوقتى يا ماكان نفسى تكون من نصيبك

 

اوف اووووف

 

هى مراتك بتنفخ ليه هو انت مزعلها فى حاجة

 

لا ابدا . دى عندها كرشة نفس

 

يعينى ياابنى هى زيادة على بلاويها دى كلها عيانة . ياعينى يابنى على بختك

 

بس ياامى بقى كفاية

 

انا داخلة احضر الغدا ياعبد الصمد

 

طيب ياذكية اتفضلى

 

انتى يللى اسمك ذكية

 

نعم

 

اعمليلى محشى كرنب

 

ماعندناش

 

انزلى اشترى يختى هى شغلانة

 

طيب انا هنزل ياامى اجيب الكرنب

 

ماتسيبها تنزل هى ياحبيبى خليها تخفى من وشنا شوية

 

لا معلش انا هنزل

 

طيب ياابنى الله يسامحها تعباك ومشيلاك الهم

 

عن اذنك ياامى

 

انتى ياذكية ولا اسمك ايه انتى

 

نعم نعم نعم

 

انتى ماسكة ايه فى ايدك

 

تفاحة

 

ليه . هو مش ابنى جايب التفاح ده ليه لوحدى

 

ياسلام واحنا هنتفرج عليكى

 

سيبى يابت التفاحة دى لاقطع ايدك

 

اهيه التفاحة مش عايزاها

 

احسن برضو

 

تررررررن تررررررن

 

اهلا ياعبد الصمد

 

امى فين

 

اهى قاعدة فى الانتريه ياعبد الصمد

 

وانتى ليه متعصبة كدة

 

مافيش حاجة

 

منورة يا امى

 

اهئ اهئ اهئ

 

مالك يا امى

 

تعالى شوف مراتك يا عبد الصمد مبهدلانى

 

معقول ياامى . مبهدلاكى ازاى

 

بقولها يا ذكية يابنتى ادينى تفاحة اكلها قالتلى اياك تيجى جنب التفاح . التفاح ده بتاعى لوحدى اهئ اهئ اهئئئئئئ

 

انتى ياذكية

 

نعم ياعبد الصمد

 

انتى مزعلة امى ليه

 

انا برضو مزعلاها . دى من ساعة ماجت مابطلتش كلامها اللى يسم البدن

 

طيب وطى صوتك لتسمعك

 

يعنى انت اهم حاجة عندك زعلها وانا مش مهم

 

بقولك ايه ياذكية . دول يومين بالطول بالعرض استحمليهم

 

حاضر ياعبد الصمد حاضر

 

عبد الصمد ياضنايا

 

ايوة يا امى جى حاضر

 

هى مراتك فين

 

بتحضر الغدا

 

ايه رأيك يا امى فى المحشى

 

مالوش طعم ياحبيبى

 

اوف

 

والملوخية

 

هى دى ملوخية ياحبيبى . داانا فكراها شوربة فول نابت . لاطعم ولا ريحة

 

اوف

 

معلش ياذكية ماتزعليش

 

ماازعلش من ايه ولا من ايه ولا من ايه . الحمد لله

 

كل دى اصناف ياعبد الصمد ياابنى

 

دى اقل حاجة ياامى

 

لا ياابنى ده كتير اوى ولا انتى يا محروسة عاجبك تبعزقى شقا الواد على كرشك وخلاص

 

لا اله الا الله . انا مالى انا

 

وايه ده اللى بيلعلط فى ايديكى ده . انتى اشتريتى غوايش جديدة

 

ايوة

 

يا شيخة حرام عليكى اتقى الله فى ضنايا وشقاه

 

بقولك ايه نينة

 

عايزة ايه

 

انا سيبالك البيت ورايحة عند امى

 

بالسلامة يختى تريحينا من وشك

 

استهدى بالله ياذكية بس وكملى اكلك

 

اكل ايه بس يا شيخ انا نفسى اتسدت عن الدنيا

 

خليها تمشى ياواد انا عارفة عاجبك فيها ايه اللى ناقصلها شنب وتبقى دكر دى

 

اووووووووووووووووووووووووووووووووووووووووووووف

 

ذكية

 

ياذكية

 

ذكية مشيت ياامى

 

اكسر وراها اولة ياواد بكرة اجوزك ست ستها تعالى كمل اكلك

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(13)

بقــ هبةنور ــلم

عبد الصمد قاعد حاطط وشه فى الجورنال ومندمج فى القراءة

 

وجت الست ذكية وهاتك يا رغى

 

ولما انتبه لكلامها لاقاها بتقول

 

 

ماتيجو نشوف ايه اللى بتقوله

 

 

وبعدين يا عبد الصمد رفضوا العريس

 

 

هما مين دول

 

الجيران اللى جانبينا هو انت مش سامع الحكاية من الاول يا خويا

 

واحنا مالنا ياذكية ومال الناس

 

مالنا ازاى مش جيرانا ياعبد الصمد

 

طيب روحى شوفى شغلانة غيرى وسيبينى اكمل الاخبار

 

اخبار مين

 

اخبار العالم

 

لا اله الا الله هو انت مش لسة قايلى احنا مالنا ومال الناس

 

عارفة ياذكية ان كل يوم بحمد ربنا عشان اتجوزتك

 

بجد يا عبده . ربنا يخليك ليا ياخويا . بس ليه يعنى

 

عشان عشرتى معاكى دى اكبر تكفير لذنوبى

 

ماشى ياعبد الصمد الله يسامحك

 

كان نفسى كدة يكون لينا نفس الاهتمامات ويكون بينا تقارب

 

جرى ايه ياعبد الصمد هو فيه اكتر من كدة تقارب .ما انا قاعدة جانبك على الكنبة اهو

 

صحيح قاعدة جنبى بس بينا مسافات كتير

 

طيب اتاخر خدنى جنبك يا عبده

 

خدك ربنا يا شيخة . قومى شوفى حاجة تعمليها وسيبينى فى حالى

 

مالك بس يا عبد الصمد مهموم ليه كدة

 

عايز حد بيفهم اتكلم معاه

 

هو انت هتلاقى حد فى نضافة مخى ياعبد الصمد . انت مش عارف مخى ده فيه ايه

 

ماهو انا اللى محزنى انى عارف مخك فيه ايه

 

طيب ياعبد الصمد انا هتكلم معاك كلام كبير اوى

 

اتفضلى صدعينى

 

يرضيك ياعبد الصمد الجارة الجديدة اللى فوق اطلع اتعرف عليها وواخدالها معايا طبق مسقعة بالتوم وريحتها مفحفحة

 

تقوم تفتحلى الباب نص فتحة وتقولى انت مين ياست انتى ولما قولتلها انا جارتك ذكية وجايبالك مسقعة تقوم رازعة الباب فى وشى وتقولى سوفاج

 

انا تهزئت يا عبد الصمد

 

انتى تستاهلى . واحدة ماتعرفيهاش ايه يوديكى عندها

 

مش جارة جديدة ولازم ارحب بيها

 

هو انتى ماعندكيش كلام الا عن الجيران

 

لا عندى كتير اوى بس ادينى ودنك وانت تكسب

 

خير

 

مش انا روحت السوق لقيت كيلو البتنجان بخمسة جنيه

 

اللهم ارحم عبدك الفانى يارب

 

وحاولت مع البياع ينزلى حتى ربع جنيه فى الكيلو مارضيش

 

ذكية سيبينى اقرا الجورنال وفارقينى

 

طيب انت بتقرا ايه

 

بقرا عن الاحداث اللى بتحصل

 

هو ايه اللى حصل

 

امريكا يا ستى بتتحكم فى العاالم كله ومسيطرة عليه

 

طيب والعالم يسكتلها ليه ياعبد الصمد

 

للأسف يا ذكية ماحدش بياخد قرارات حاسمة مع امريكا

 

وهى امريكا دى ياعبد الصمد مالهاش راجل يلمها

 

امريكا مين اللى مالهاش راجل يلمها ! هو انتى فاكرة امريكا دى واحدة ست زيك

 

لا ياعبد الصمد ايش وصلها ليه امريكا دى .ايش جاب لجاب. طيب انا عندى فكرة ياعبد الصمد

 

خير يا ام الافكار

 

ادينى عنوانها وانا اخد اتنين تلاتة من حبايبى ونروح نتصاحب عليها ونشوفها يعنى عايزة ايه مننا

 

عارفة ياذكية يمكن اللى بيحصلنا ده بسبب الناس اللى زيك اللى مش فاهمين اى حاجة فى اى حاجة ومودينا فى داهية

 

هو انت ليه يا عبد الصمد دايما مستقل بيا . اللى انت ماتعرفوش عنى يا عبده انى انا سياسية من الدرجة الاولى بس مابحبش اتكلم عن نفسى كتير

 

وايه الدليل ان شاء الله يا ست السياسية

 

انا ياعبد الصمد مابفوتش حلقة من حلقات رأفت الهجام والست ايستر بلوبيسكى

 

يا شيخة اتقى الله خليتيه هجام كمان . اسمه رأفت الهجان .

 

ياخويا وانا مالى هو انا هناسبه

 

طيب فارقينى ابوس ايدك كفاية . انا زهقت

 

زهقت من ياعبد الصمد

 

لا زهقت من نفسى

 

طيب اقولك فزورة

 

ياذكية الست لازم تعرف اهتمامات جوزها وتشاركو اهتماماته وتبعد عن اللى بيضايقه لازم الزوجين يبقو اصحاب

 

استغفر الله العظيم اصحاب ايه ياعبد الصمد سلامة عقلك احنا متجوزين على كتاب الله وسنة رسوله

 

طيب قومى من وشى لحسن يكون اخر يوم فى جوازنا انهاردة

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(14)

بقــ هبةنور ــلم

الست ذكية قاعدة ماسكة ورقة وقلم وقاعدة قدام التليفزيون

 

وبتنقل حاجات من على الشاشة ودخل عبد الصمد عليها وبيكلمها وواضح ان عنده مشكلة كبيرة

 

لكن هى مش معاه خالص

 

 

تعالو نشوف اللى حصل

 

 

 

ذكية

 

ذكية

 

 

وبعدين نقطع عليه بصل حلقات

 

 

 

ياذكية

 

ايه ياعبد الصمد فى ايه

 

بتكتبى ايه

 

بكتب وصفة الاكلة الجديدة بتاعة الشيف كرشو

 

 

اكلة ايه دى

 

بباريونى بالبمبريونى

 

 

ياذكية ده اسمها لوحده يوجع البطن احنا ناقصين هو انتى مش هتريحينا من الوصفات الفتاكة بتاعتك دى

 

 

 

دى اكلة طليانى يا عبد الصمد بيقول عليها حلوة اوى

 

 

طيب سيبك دلوقتى من الوصفة وخليكى معايا عايزك فى موضوع مهم يتعلق بمستقبلنا

 

 

يا مصيبتى انت اتجوزت علية يا عبد الصمد

 

لا يا ستى مااتجوزتش

 

طيب خلاص خلينى اكمل البرنامج

 

يعنى اهم حاجة عندك انى مااتجوزش عليكى وبس

 

 

 

ونروح مشوحين اللحمة وحاطين عليها جمبرى وسبيط وصدور فراخ وعيش غراب عشان الغراب مايزعلش ويقول اشمعنى انا لأ

 

 

يا سيتى سيبك من الغراب وخليكى معايا يا حداية

 

 

لا اله الا الله . خير ياعبد الصمد خير فى ايه

 

 

انا فى ازمة

 

سلامتك يا عبد الصمد

 

هو انا بقولك انا عندى مغص

 

طيب يعنى فى ايه يعنى مالك

 

انا محتاج دهبك يا ذكية عشان اخرج من الازمة

 

نعم نعم نعم يا خويا . انت جرا لعقلك حاجة يا عبد الصمد

 

انا هروح فى داهية ياذكية . انا مضيت شيكات وميعادها جه ومش معايا سيولة تغطى المبلغ

 

 

يا سلام يا خويا يعنى تغطى المبلغ وتعرينى من دهبى

 

يا حبيبتى هعوضهولك ان شاء الله

 

اللى يروح مابيرجعش يا عبد الصمد وبعدين امى طول عمرها تقولى اوعى تفرطى فى دهبك يا ذكية

 

دهبك هو راجلك الحقيقى يابت . وكانت تقولى عمرك شوفتى عقد دهب نط من رقبة صاحبته واتعلق فى رقبة واحدة تانية

 

قولتلها لأ ياما . قالتلى لكن الراجل ممكن يسيبك ويتعلق فى رقبة واحدة تانية قولتيلها عندك حق ياما

 

 

لا حول ولا قوة الا بالله . كدة برضو ياذكية . انا مستقبلى هيضيع

 

طيب انا عندى حل يا عبد الصمد

 

خير قولى ابوس ايدك

 

فى برنامج بيجى بالليل اسمه القلوب الرحيمة اتصل بيهم ويحددولك معاد وتقوم لابس جلابية مقطعة وتنكش شعرك وانا هضحى بالعيال وابعتهم معاك

 

بجلاليب مقطعة برضو ومنكوشين وتقعدو تعيطو وتقول ياعالم مش لاقى أأ كل عيالى وهما هيلمولك قرشين وتخرج من الازمة ياعبد الصمد

 

الله ينتقم منك ياشيخة عايزانى اشحت واتسول وانتى معاكى دهب

 

 

انسى دهبى يا عبد الصمد وشيله من دماغك خالص

 

وهتسيبينى اتسجن ياذكية

 

ياخويا ده يوم السعد والهنا داأنت هتروح السجن تلاقى كبارات البلد كلهم مشرفين هناك

 

وهتتصاحب على ولاد الريس يا بختك ياعبده . بس بقولك ايه ابقى اتصور معاهم عشان نحط الصورة فى الصالون وعيالك يتباهو بيك طول العمر

 

منك لله . حسبى الله ونعم الوكيل

 

انت بتدعى عليا ليه يا عبد الصمد انا قصرت معاك فى ايه . انا عمالة اشوفلك حل مش لاقية

 

هاتى الدهب ياذكية وخليكى واقفة جنبى

 

مش هقدر اقف جنبك يا عبد الصمد عشان ورايا شغل فى المطبخ بالإذن

 

 

يعنى ده أخر كلام عندك

 

عارف ياعبد الصمد مرة زمان ابويا احتاج من امى غوايشها الدهب وامى ماكانتش عايزة تديهومله ولكن كانت خايفة تقوله لأ فراحت

 

خبيتهم عند ستى ولما جه من برا قالتله الدهب اتسرق وقعدت تعيط والدهب فضل عند ستى وقبل ماستى تموت بعتت لأمى عشان تقولها على مكان الغوايش

 

وامى قعدت جنب سيتى وهى بتطلع فى الروح وتقولها الدهب فين ياما وسيتى تقول الدهب ف الدهب ف وبعدين روحها طلعت وامى ماعرفتش مكان الدهب

 

واغم عليها وجالها انهيار عصبى بعيد عنك والناس كانت فاكرة انها زعلانة الزعل ده كله عشان امها اتاريها زعلانة على الدهب

 

 

احسن تستاهل وتستاهل اكتر من كدة كمان

 

الله يسامحك ياعبد الصمد

 

انا خارج

 

رايح فين

 

رايح اتصرف فى الكارثة اللى انا فيها

 

 

بالسلامة والقلب داعيلك ياعبد الصمد

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(15)

بقــ هبةنور ــلم

عبد الصمد جاى فرحان من برا وجاى يبشر ذكية بخبر حلو

 

يا ترى خير

 

تعالو نشوف ايه اللى حصل

 

 

ذكية انت فين يا حبيبتى

 

انا هنا يا عبد الصمد

 

عندى خبر حلو

 

خير فرحنى ياخويا

 

عبد الوهاب اخويا اشترى فيلا

 

ايه ايه ايه بتقول ايه ياعبد الصمد

 

زى ماسمعتى

 

يعنى انت عايز تقول ان تفيدة مرات اخوك اللى كانت بتبل العيش فى المية وتاكله عشان تشبع تسكن فى فيلا

 

ربنا يوسع علينا وعليهم ياستى

 

هيوسع عليهم اكتر من كدة ايه . انا عارفة اشمعنى انا اللى بختى مايل وعايشة فى عشة فراخ

 

لا حول ولا قوة الا بالله . احمدى ربنا وماتبصيش لعيشة غيرك

 

لأ هبص يا عبد الصمد

 

يبقا هتتعبى ياذكية

 

اه يانى يا مفروسة يانى

 

طيب قومى نامى عشان بكرة هتاخدى العيال وتروحى تباركى وانا هحصلكو بعد الشغل

 

انام ايه هو انا هيجيلى نوم بعد ماعرفت الخبر المهبب ده

 

 

 

 

 

 

يلا يا ذكية انا نازل وانتى بعد الضهر خدى العيال وروحى للجماعة

 

عشان خاطرك ياعبد الصمد هعصر على نفسى لمونة واروح

 

 

 

 

 

 

 

 

يلا ياولاد وصلنا فيلا عمكو والمخفية مراته

 

ايه البوابة اللى زى بوابة سجن ابو زعبل دى

 

انت البواب ياخويا

 

انتى عايزة مين ياست

 

عايزة صاحبة الفيلا

 

طيب اتكلى على الله دلوقتى وتعالى يوم الجمعة بيوزعو لحمة

 

لحمة ايه اللى بيوزعوها ياعجل انت . شايفنى داخلة اقول لله يامحسنين

 

امال عايزة ايه مش عايزة صدقة برضو

 

صدقة فى عينك انا مرات اخو جوز المدعوئة صاحبة الفيلا

 

طيب استنى اتصل بالهانم واتأكد

 

ايوة ياهانم . فى واحدة ست غلبانة ساحبة معاها عيلين بتسأل عليكى

 

حاضر ياهانم هسألها عن اسمها

 

اسمك ايه ياست

 

اسمى ذكية هانم عويس باشا يا جاهل

 

اسمها ذكية . حاضر هدخلها

 

اتفضلى ياست

 

اوعا من وشى

 

 

 

 

 

يالهوى يالهوى ايه الهنا والعز ده كله يا عينى عليا وعلى بختى ياما

 

 

اهلا اهلا اهلا ازيك يا ذكية يا غوح قلبى

 

اهلا يا تفيدة يختى الف بركة على الفيلا . دا انا فرحتلك فرحة مايكتبها على عدو ولا حبيب لو اقولك كنت هولع من الفرحة مش هتصدقينى

 

ميغسى يا غوحى انا عارفة انك بتحبينى

 

تشغبى ايه ساقع ولا سخن

 

لا سخن ايه هاتى حاجة ساقعة تبرد النار اللى جوايا

 

 

 

 

اشغبى ياغوحى ولا اجيبلك شاليموه

 

لا يختى استغفر الله العظيم حد الله بينى وبين المنكر

 

منكغ ايه بس . شاليموه يعنى شفاط تشغبى بيه العصيغ

 

لا شكرا يختى

 

على فكغة الغدا النهاغدة مفاجأة . هناكل سى قود

 

هو انتو يختى بتحترموا الفول اوى كدة وتقولوله سى فول . اصل احنا بنقول عليه فول من غير القاب

 

سى فود ياغوحى يعنى مأكولات بحغية

 

لا معلش يختى اصلى ماليش فى عالم البحار انا عايزة مأكولات جوية

 

يعنى ايه مأكولات جوية

 

يعنى طيور ياحبيبتى بط وز فراخ اى حاجة نرم بيها عضمنا احنا دابينلك مشوار يهد الحيل

 

موجود كله موجود

 

ايه رأيك فى الفيلا صحيح

 

حلوة اوى يختى كنتو فى جرة وطلعتوا لبرا

 

شوفى الخاتم السوليتيغ ده . بودى جابهولى امباغح

 

حلو اوى اوى يختى بس جابهولك بمناسبة ايه

 

بمناسبة حبنا

 

وماله يختى ماهو عبد الصمد جابلى اول امبارح حلتين صاج بمناسبة حبنا برضو

 

 

تعالى نقعد فى الجنينة

 

تعالى يختى وماله

 

 

 

 

ياهانم المحل بعت الاكل

 

طيب هات غيكس ياكل فى الهوا

 

 

هو انتى شارية الاكل جاهز يختى

 

لا ده الاكل بتاع غيكس

 

مين ريكس ده يختى اخوكى الكبير

 

لا ياحبيبتى ده الكلب البوليسى بتاعنا

 

جايبين اكل للكلب من محل يعوض علية عوض الصابرين

 

 

 

ايه يختى العربيات دى كلها

 

دول سبع عغبيات . تلاتة بتوعى وتلاتة بتوع بودى وواحدة بتاعتنا احنا الاتنين يعنى لما بنخغج سوا

 

اه يانى يا مفروسة عندك تلات عربيات لوحدك وابوكى كان حلم حياته يركب مترو الانفاق

 

بتقولى حاجة

 

بقول يختى مش كتير تلات عربيات

 

يادوب ياذكية واحدة الصبح وواحدة العصر وواحدة بالليل

 

 

اه يانى يانفوخى ضغطى على

 

مالك ياغوحى

 

طلعت روحك ياشيخة فرستينى وحرقتى دمى وعليتى ضغطى الله يهدك هدة قوية ناولينى دراعك

 

 

اه دغاعى يا عضاضة يا مسعوغة الحقونىىىىىىىىىىىىىىىىى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

(16)

 

بقــ هبةنور ــلم

 

الست ذكية قاعدة مع صاحبتها احلام بيتكلموا فى امور الرجالة الغريبة

 

ياترى عندهم حل ؟

 

تعالوا نشوف حكايتهم ايه

 

اسكتى ياذكية يختى مش جوز انصاف اختى مطلع عنيها

 

ياقلب امها يختى . ليه كدة

 

باين عليه شايفله شوفة تانية

 

يختى وعرفتى منين

 

اصلها بتقول انه على طول سرحان ومش طايق دبان وشه وتكلمه تلاقيه فى دنيا تانية

 

هو الراجل لما يسرح يبقا شايفله شوفة تانية يا احلام

 

امال ايه ياذكية .بيفكر فى العروسة الجديدة

 

يالهوى يا احلام . دا عبد الصمد سرحان ليل نهار

 

يبقا هيتجوز ان شاء الله

 

يختى ماتفوليش علينا

 

وكمان ياذكية يختى تلاقى الراجل لما مراته تيجى جنبه كأن عقربة لاشته ويبقا مش طايقها

 

عندك حق يا احلام دا عبد الصمد كنت واكلة فحل بصل جنب الفول وجيت جنبه قالى ياشيخة ابعدى عنى بريحة نفسك اللى هتموتنى دى

 

اخص عليه راجل .ماعندوش حق فى عمايله دى

 

بس ده لو اتجوز علية داانا كنت كلته بسنانى

 

طيب بدل ماياكلك وتاكليه ماتعمليله حجاب

 

حجاب !

 

ايوه يا عين اختك حجاب يجيبهولك على ملا وشه ويخليه تحت رجليكى طول العمر

 

طيب دلينى اروح لمين يختى

 

ولا تروحى ولا تيجى انا هجيبلك الشيخة كرامات لحد هنا

 

مين دى يختى

 

دى شيخة واصلة ومتصلة

 

متصلة بمين يا احلام

 

بالاسياد ياذكية

 

بسم الله الرحمن الرحيم . يختى بخاف من سيرتهم

 

طيب خليكى خايفة لحد ماواحدة تيجى تلطشه منك

 

لا يختى خلاص هاتيها

 

طيب بالإذن هروح اجيبها واجى

 

ترن ترررررن ترررررررن افتحى ياذكية انا احلام ومعايا الشيخة كرامات

 

يا لهوى مين دى يا احلام

 

دى الشيخة كرامات

 

يختى قولى الشيخة نفرتيتى .دى كبيرة اوى اوى

 

طب سنديها معايا عشان نقعدها

 

اقعدى يا شيخة كرامات

 

انتى مين يابت انتى وهى

 

انا احلام اللى جيبتك من البيت

 

غيط ايه يابت

 

ياستى جيبتك من البيت البيت جيبتك من البييييييييييييييييييييييييييييييييييييت

 

لا انتى الحرامية اللى سرقتى منى الربع جنيه الفضة بتاعى

 

ياستى لا والله انا احلام مش حرامية

 

يااحلام دى مش دريانة بالدنيا

 

لا دلوقتى هتفوق وتبقا زى الفل . اصبرى بس ياذكية

 

يا شيخة كرامات يا شيخة كرامااااااااااااااااااااااااااات

 

عايزة ايه يابت

 

عايزين نعمل حجاب

 

حجاب لمين

 

لجوزى انا يا شيخة كرامات

 

هو جوزك فى سنة كام

 

ياست جوزى مين اللى فى سنة كام هو انا بكلمك على عيل فى الاعدادية

 

بالراحة عليها ياذكية

 

دى حاجة تجنن يا احلام

 

يا شيخة كرامات يا خالة كرامات

 

انتو مين

 

لا اله الا الله . انا هخنقها يا احلام

 

اصبرى يا ذكية هاتيلها كوباية مية وروحى اعملى القهوة عشان تقرالك الفنجان

 

تقرا ايه يا احلام تقرا ايه . هى شايفة بعنيها اصلا

 

طيب روحى بس وهى هتفوق دلوقتى

 

قومى اشربى المية يا شيخة كرامات

 

فين شبشبى يا حرامية انتى وهى

 

ياست شبشبك فى رجلك اهو ماحدش جه جنبه خلصينا بقا الراجل زمانه جاى

 

فين القهوة

 

اهيه القهوة

 

اطفحى الفنجان وناوليهولى يابت

 

حاضر

 

ادى الفنجان

 

انتى اسمك ايه يا بت

 

اسمى ذكية اللى هتطق من جنابها

 

انا شايفة جوزك فى الفنجان راكب عجلة وماشى ورا واحدة بيعاكسها

 

عجلة ايه ! انا جوزى مابيركبش عجل

 

انتى بتكدبينى يابت انتى ولا ايه

 

لا ياست وبعدين كملى . البت دى اسمها ايه

 

مش مكتوب فى الفنجان بس هى طويلة اوى اوى اوى وراسها خارجة من الفنجان

 

ولابسة ايه

 

لا بسة شراب

 

يافضيحتى ماشية فى الشارع ولابسة شراب بس

 

يابت حرام عليكى ماتفتريش على الولاية .اصلها طويلة اوى ع الفنجان وانا مش شايفة الا لحد ركبها

 

عرفتها يا احلام

 

مين يا ذكية

 

هى كريمة بنت خالته مافيش غيرها . انا ماشوفتش حد اطول منها فى حياتى

 

طيب يا شيخة كرامات . يا شيخة كرامات . دى نامت تانى يا احلام

 

معلش يا ذكية شوية كدة وتصحى

 

الراجل زمانه جاى يا احلام دا يوم ايه اللى مايعلم بيه الاربنا ده

 

ياشيخة كرامااااااااااااااااااااااااااااااااااااااااات

 

انتو مين

 

قومى يختى اعملى الحجاب وخلصينا

 

ادى الحجاب اهو تبليه فى مية ويشرب منها والباقى ترشيه على العتبة دى ويبقالى الحلاوة

 

عينى يختى بس يتم المراد

 

الا قوليلى ياشيخة كرامات

 

عايزة ايه يا بت يا تخينة انتى

 

هو الحجاب صحيح بيجيب نتيجة

 

امال ايه ياهبلة . انا ياما عملت حجابات لناس وجاب معاهم مفعول وبيدعولى لحد دلوقتى وكلهم ناس مشهورين وروحى اسأليهم

 

مين دول ياترى

 

انتى عارفة الملكة فريدة تحبنى زى عنيها ولسة باعتالى دلوقتى عشان متخانقة مع الملك فاروق وانا رايحة اعملها حجاب عن اذنك

 

ياست انتى مش فى الدنيا . الملك فاروق مين بس . دا مات الله يرحمه وفريدة ماتت

 

هى فريدة ماتت ! ياعين امك يافريدة يختى دانا لسة كنت عندها الاسبوع اللى فات

 

الاسبوع اللى فات ايه بس دى ماتت من زمان والملك فاروق خرج من مصر وقامت ثورة 52 وجه رؤساء بعد منهم كتير

 

يلا ياكدابة ياحرامية انا هروح ابلغ عليكى الانجليز عشان يحبسوكى ويحطوكى فى التخشيبة

 

طيب اتكلى على الله بالسلامة عشان لو شافوكى انتى هيحطوكى فى المتحف

 

تررررررررن تررررررررن

 

يالهوى عبد الصمد جه . قومى خوديها وامشى بسرعة بقا يا احلام

 

حاضر يختى حاضر بس سنديها معايا

 

فين كيس الفلوس يا حرامية انتى وهى

 

يلا بالسلامة فلقتينا يا شيخة

 

اتفضل ياعبد الصمد . مع السلامة ياجماعة

 

مين دول ياذكية

 

دى احلام والحاجة ام خفرع

 

مش بعادة تصاحبى ستات كبار

 

لا اصل دى كانت صاحبة ستى فى الحضانة

 

هى كان فى حضانات ايام ستك

 

يوه ياعبد الصمد

 

على فكرة احنا معزومين بكرة على فرح

 

فرح مين

 

كريمة بنت خالتى

 

معقول . ياحلاوة ياولاد بركاتك ياشيخة كرامات الحجاب جاب نتيجة وكريمة مش هتتجوز جوزى

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

 

(17)

 

بقــ هبةنور ــلم

 

يا جماعة ياجماعة موبايل عبد الصمد بيرن

 

ياترى مين بيتصل بيه

 

تعالو تعالو نشوف فى ايه

 

الو

 

حضرتك السيد عبد الصمد عبد الصبور

 

ايوة يا فندم مين معايا

 

هنا قسم شرطة .

 

خير يافندم ان شاء الله

 

زوجتك السيدة ذكية عويس مشرفانا ومنورانا

 

لا اله الا الله . خير يافندم عملت ايه

 

لما تيجى هتعرف

 

اهئ اهئ اهىىىىىىىىىىىىىىىىىىىىىىىىى

 

اه يانا ياما يللى اتبهدلتى ياذكية

 

كفارة يا معلمة

 

اهئ اهئ وبعدين معاك ياعبد الصمد ايه معلمة دى هو انا بتاجر فى البانجو ياخويا

 

انا عايز اعرف ايه اللى حصل بالظبط

 

منها لله باتعة الله ينتقم من حبابى عنيها الهى تتشلى فى حواجبك يا باتعة ولا توعى تشوفى بمناخيرك تانى اهئ اهئ اهئ

 

بتدعى على صاحبتك ليه . دى حتى ماكانتش معاكى

 

اسكت ياعبد الصمد انت مش عارف حاجة دى هى السبب فى كل اللى جرالى

 

عملت ايه ياهانم

 

ياخويا انا اتفقت انا وباتعة وام محمد وام جمعة ومجموعة من اصحابى الانتوم نقضى يوم فى جنينة الحلوانات عشان بصراحة سيد قشطة كان واحشنى اوى وقولت اروح اشقر عليه

 

واهو نقعد وسط الحلوانات ونفرح بلمتهم حوالينا ونحسسهم بالجو الاسرى

 

لأ فيكى الخير

 

روحت ياخويا عملت حلة محشى وخدت ملاية سرير معايا وبعدين باتعة قالت احنا نروح ميدان التحرير احسن اهو نتفرج على المجنح العلمى ونغرف المحشى فى صنية الميدان

 

وكلنا وافقنا وروحنا واول ماوصلنا فرشنا الملاية وحطينا حلة المحشى جنبنا وبعدين لقيت ناس جاين علينا بيقوللنا احنا تبع حركة ستة ابرول

 

وناس تانية جم قالوا احنا تبع حركة اتنين مارس روحت انا قلتلهم واحنا تبع حركة تلاتة فبراير

 

ايه تلاتة فبراير دى

 

ياخويا ما انا بحسب كل واحد بيقول تاريخ ميلاده

 

راحو قالولنا انتو معانا ولا علينا

 

قولتلهم احنا مش تبع حد

 

قالولى يبقا انتو جاين تتجسوسوا علينا انت خونة وجساويس

 

وبعدين قالولى انتى بتجيبى التموين بتاعك منين قولتلهم من عند عم عبده البقال اللى على ناصية شارعنا راحو قايلنلى هاتى عنوانه روحت اديتهولهم

 

ومافيش خمس دقايق ياخويا لقيتهم جايبين عم عبده فى شوال ومكتفينه ونازلين فيه ضرب وهو يقولهم حرام عليكو ماعملتش حاجة . روحت انا ندهت بأعلى صوتى قولتله استحمل يا عم عبده عشان

 

مصر ياخويا . قالى الله ينتقم منك يا شيخة ثبتى علية التهمة وبعدين ياخويا لقيت بنات وصبيان ملمومين على بعض فى خيم قولت انصحهم لوجه الله وقولتلهم انتى يابت انتى وهى روحى لامك بلا قلة

 

ادب ومسخرة . راحو حدفونى بالطوب وخرجو من الخيم يقولو يسكت يسكت حكم الزعتر روحت انا قلت انا مش اقل من العيال دول ولازم اشارك فى الاحتلال

 

وقعدت ازعق بعلو صوتى الاحتلال التام او الموت الزكام . راحت ام جمعة خطفت غطة الحلة وطلعت تجرى بيه وتقول ياعزيز ياعزيز كبة تاخد الانجليز

 

والميدان ولع بعيد عنك . كل واحد يقول اللى فى نفسه وشوية ياخويا والبوليس جه لمنا كلنا وخدو منى حلة المحشى والملاية وباتعة اتسرسبت من بين الناس وهربت الله يسامحها

 

وبعدين ياخويا البيه الضابط الله يكرمه قالى انتى مش وش بهدلة وهخرجك بكفالة بس هنبعتلك تانى عشان التحقوقات شغالة

 

بسم الله ماشاء الله. عملالى وطنية يافاشلة. وكمان اتسببتى فى الاذى لعم عبده بسبب جهلك عشان هما يقصدو التمويل يا جاهلة مش التموين وكانو عايزين يعرفو الدولة اللى بتمولك

 

الله يسامحك ياعبد الصمد انا ماحدش عمره ملولنى

 

انا اللى غلطان انى سمحتلك بالخروج لو كنت اعرف انك هتعملى البلاوى دى كنت منعتك . ياست هانم الست لما تخرج من بيتها تخرج لضرورة

 

انما خروج الست فى مظاهرات واختلاطها برجالة الله اعلم بيهم وستات مااعرفش جاين من انى مصيبة دى تبقا كارثة فى حد ذاتها

 

ترررررررن ترررررررن

 

الباب بيخبط ياعبد الصمد شوف مين ياخويا

 

افندم

 

لو سمحت هو ده منزل زعيمة حركة تلاتة فبراير الناشطة السياسية الست ذكية

 

مين حضرتك

 

انا صحفية من جريدة هنولعها يعنى هنولعها وعايزة اجرى معاها حوار جرئ

 

تعالى يا زعيمة اتفضلى الست الصحفية عايزة تجرى معاكى حوار

 

لأ يختى اجرى انتى لوحدك انا نفسى اتقطع من الجرى وامشى من هنا بدل ما انزل عليكى بإيد المقشة . ناولنى ايد المقشة ياعبد الصمد

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(18)

بقــ هبةنور ــلم

 

 

النهاردة ذكية وعبد الصمد ماشاء الله اخر انسجام

 

وكل ماتطلب حاجة يقولها ؟

 

 

تعالوا نشوف بيقولها ايه

 

 

صباخ الخير ياعبد الصمد

 

صباح النور ياعيون عبد الصمد

 

عايزة فلوس ياخويا عشان اجيب عباية جديدة كانت عجبانى

 

وماله ياحبيبتى . عايزة كام

 

يعنى هى كانت بحوالى ستوميت جنيه

 

حاضر ياحبيبتى وهكملهوملك الف كمان عشان تجيبى معاها شنطة وجزمة

 

ياحبيبى ياعبد الصمد . تسلملى من كل وحش ياخويا

 

انتى طلباتك اوامر ياروح قلبى

 

ربنا يخليك ياعبده

 

بقولك ايه ياذكية

 

نعم ياخويا

 

ماتيجى ناخد العيال ونتغدا برا النهاردة فى اى مكان تختاريه

 

بجد ياعبد الصمد

 

ايوة ياحبيبتى . شوفى انتى عايزة تروحى فين

 

طيب انا نفسى اكل فوشى

 

اسمه سوشى ياحبيبتى

 

ايوة ياخويا ماانا عارفة ابويا كان بيجيبهولنا على طول

 

من عيونى يا ست الستات

 

تسلم عيونك ياخويا .

 

 

 

 

 

 

 

 

عبد الصمد

 

نعم ياحبيبتى

 

انا ياخويا كنت عايزة ازور اختى منكسرة عشان ابنها كان بعافية شوية

 

سلامته بعد الشر ماله

 

لا ابدا عمل عملية اللوز

 

سلامته وسلامة لوزه . طيب خدى المية وخمسين جنيه دول هاتيلو فاكهة ولا عصاير

 

دول كتير ياعبد الصمد اوى

 

لا ياست مش كتير على ابن اخت مراتى حبيبتى

 

تسلملى ياعبد الصمد

 

 

 

 

 

 

 

 

ذكية

 

نعم يا عبده

 

غمضى عنيكى

 

ليه ياخويا هنلعب استغوماية

 

لأ ياروح قلبى عاملك مفاجأة

 

مفأجة ايه ياعبده

 

طيب غمضى عنيكى بس

 

ادينى غمضت ياخويا

 

فتحى بقا

 

ياحلاوة ياحلاوة ايه الخاتم الحلو ده

 

عجبك ياحبيبتى

 

هو انت تجيب حاجة ماتعجبنيش برضو ياعبد الصمد . دا حتى الغوايش اللى جيبتهوملى الشهر اللى فات يهبلو

 

 

كل ده شوية عليكى حبيبتى

 

تسلم ياعبده

 

 

 

 

 

 

 

عبد الصمد

 

نعم حبيبتى

 

انا كنت عايزة خمسوميت جنيه عشان اجيب حلة بريستون بدل اللى باظت

 

معلش حبيبتى استنى كام يوم

 

نعم ياخويا استنى كام يوم دا ايه

 

انا محتاج الفلوس اللى معايا ومش هقدر اتصرف فيها عشان لزمانى

 

 

يعنى هى جت على الحلة البريسون

 

ياستى الحلة البريستو تستنا شوية

 

لا ماتستناش ياعبده

 

لا حولا ولا قوة الا بالله

 

ياستى الصبر حلو مش كدة

 

لا ياعبد الصمد ياتجيبلى الحلة البريستون ياإما مش قاعدالك فى البيت

 

كدة برضو ياذكية

 

ايوة كدة

 

طيب اعملى اللى انتى عايزاه بلاش وجع دماغ

 

اهئ اهئ اهئ كدة برضو ياعبد الصمد بتطردنى من البيت بعد المر اللى انا شارباه معاك اه يامجوعنى ياحارمنى يللى ماشوفتش معاك يوم عدل افتكرهولك اهئ اهئ اهئ

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(19)

بقــ هبةنور ــلم

 

ياذكية وطى صوتك شوية عايزة اكتب مقدمة الحلقة الله يهدك

 

بس اسكتى شوية هقدم الحلقة وكملى الخناقة

 

 

ياجماعة ذكية النهاردة بتتخانق مع جارتها اللى تحتيها تعالوا نشوف مين الغلطان

 

 

 

 

 

 

 

انتى يا ست يللى فوق

 

 

عايزة ايه ياست يللى تحت

 

انتى ازاى كدة عمالة تنفضى السجاجيد بتاعتك من البلكونة وتبهدلى الغسيل بتاعى

 

 

يختى من نضافة غسيلك اوى . بلا خيبة . دا غسيلك زى الطين اصلا

 

انت ست مش مؤدبة

 

سيبنالك يختى الادب والاخلاق الحميدة

 

 

يعنى عاجبك الغسيل اللى تعبت فيه وحاطاه فى الشمس ينشف يتبهدل بالشكل ده

 

يا شيخة فلقتينا بغسيلك .دا انتى يوم مابتنشريه الدبان بيتلم فى الشارع ويطلع علينا ياكلنا

 

 

انتى حقيقى ست فالجر وسوسى كمان

 

انا ست فجلة ومسوسة كمان . طيب استنى علية انا نازلة اعرفك شغلك يا انشف من عود القصب انتى

 

 

 

 

 

 

 

 

 

يا استاذ عبد الصمد

 

اهلا يا استاذ حسين

 

حضرتك جاى منين دلوقتى

 

انا راجع من شغلى يا استاذ حسين

 

يعنى ماشوفتش اللى الست بتاعتك عملته فى الست بتاعتى

 

خير يا استاذ حسين

 

يرضيك الست بتاعتك تضرب الست بتاعتى وتفتحلها دماغها

 

معقول الكلام ده

 

انا لولا اننا جيران كنت عملت محضر فى القسم

 

لا معلش يا استاذ حسين انا هطلع اعلمها الادب واجيبها تعتذر للست بتاعتك . حقك عليا

 

خلاص يا سيدى عشان خاطرك

 

 

 

 

 

انتى يا هانم يا بلطجية

 

جرا ايه يا عبد الصمد .داخل بشرك ليه من برا

 

انا برضو اللى شرانى . ايه اللى عملتيه فى جارتك ده

 

هى اللى شتمتنى الاول

 

ياسلام

 

يا سلامين يا خويا

 

ايه هتضربينى انا كمان ولا ايه

 

 

استغفر الله العظيم وبعدين يا عبد الصمد معاك

 

اتفضلى البسى وانزلى اعتذريلها

 

انا ماغلطتش فى حقها يا عبد الصمد ومش هنزل

 

 

هتنزلى ورجلك فوق رقبتك والا

 

 

خلاص يا خويا ولا إلا ولا حيثما انا نازلة

 

 

 

 

 

 

 

ماتزعليش يا اسمك ايه ماكانش قصدى

 

 

يوه انتى مابترديش ليه يا عود القصب

 

انا لية اسم تنادينى بيه

 

اسمك ايه يختى

 

اسمى وفاء

 

خلاص يا وباء ماتزعليش هاتى بوسة

 

يا ستى ولا تبوسينى ولا ابوسك ربنا يكفينا شرك . صباح الخير ياجارى انت فى حالك وانا فى حالى

 

 

خلاص ياجماعة ماتزعليش منها ياست وفاء

 

 

انتى مين يختى

 

انا جارتك سعاد

 

طيب وانتى مين حشرك فى الكلام اصلا .ماتقفلى باب شقتك وتتهدى

 

انا غلطانة انتى ست اخلاقك صعب خالص

 

 

 

 

 

 

 

 

 

بقولك ايه ياعبد الصمد

 

ايه عايزة ايه نعم فى ايه

 

مالك ياخويا مش طايقلى كلمة كدة

 

بسبب عمايلك والنكد اللى مسببهولى بطولة لسانك مع الناس

 

ماهما ياخويا اللى بيخرجونى عن شعورى

 

عندك شعور اوى ماشاء الله

 

ايوة ياخويا عندى شعور امال قرعة

 

على فكرة اختى جاية تزورنا انهاردة

 

ياقاعدين يكفيكو شر الجايين

 

الله يسامحك ياست . بالله عليكى تحسنى الفاظك وماتفضحنيش قدام اختى

 

 

هحاول ان شاء الله ربنا يوفقنى

 

 

 

 

 

 

اهلا اهلا اختى ام احمد

 

ازيك ياخويا واحشنى اوى والله

 

ربنا مايحرمنيش منك يا غالية

 

 

امال فين ذكية

 

انا جيت اهو يختى ازيك يا ام احمد

 

ازيك انتى ياذكية وحشانى اوى

 

ماتشوفيش وحش يختى

 

اتفضلى ياذكية دى فاكهة عشان الولاد

 

ايه ده يختى انتى جايبالنا برتقان . هو انتى طالعة الارافة . ومالك مكلفة خاطرك كدة . مالقتيش حاجة ارخص من كدة تجيبيها

 

ها

 

تعيشى وتجيبى يا ام احمد نورتى البيت

 

تسلم ياخويا . بس باين مراتك مش عاجبها الفاكهة

 

سيبك منها كفاية دخلتك علينا هى دى شوية يا حبيبتى

 

ربنا مايحرمنيش منك يا خويا

 

 

 

قومى اعملى حاجة لأختى تشربها

 

هقوم اعملها شاى

 

لا ياحبيبتى انا مش بشرب الشاى

 

اه يختى ماانتى داخلة علينا بجمال محملة فاكهة اشكال والوان ومن حقك تتأمرى علينا

 

لا حول ولا قوة الا بالله . انا ماشية

 

تمشى فين بس يا حبيبى اقعدى يا ام احمد

 

معلش ياخويا ولما تحب تشوفنى بيتى مفتوحلك فى اى وقت يا عبد الصمد ياخويا عن اذنك

 

 

 

عاجبك كدة يا مصيبة انتى هتخسرينى اهلى بسبب عمايلك ولسانك اللى بينقط سم

 

 

ايوة ياخويا اغلط اوى .انا لسانى بينقط سم .ليه متجوز عقربة

 

 

 

اكتر من عقربة والعياذ بالله

 

 

 

ماما

 

عايز ايه ياواد

 

عايز كوباية زبادى

 

لا ما فيش

 

الزبادى فى التلاجة ياماما

 

فى التلاجة ومش هديك انا حرة وامشى من وشى لحسن اقوم اقطعك طرنشات

 

 

 

حتى ابنك بتعامليه بالسوء ده

 

بقولك ايه يا عبد الصمد .ابنى وانا حرة فيه

 

 

معلش ياابنى دى غلطتى انا وانتو بتدفعوا تمنها سامحنى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(20)

بقــ هبةنور ــلم

 

النهاردة ياجماعة ذكية لسة راجعة من فرح ابن خالتها هى والولاد

 

بس عبد الصمد ماراحش معاها

 

تعالوا نشوف ايه اللى حصل فى الفرح يمكن تكون جيبالنا معاها حتة جاتوه ولا حاجة

 

 

 

 

 

خشوا يا ولاد عقبال ماافرح بيكو يارب يا قلب امكو

 

 

ازيك يا عبد الصمد والله ليك وحشة

 

 

اه طبعا مش لازقة عند خالتك من اسبوع بتحضروا للفرح

 

يوه ياخويا .خالتى وزى امى انت ايه يزعلك

 

ربنا يخليكو لبعض يختى

 

اسكت ياعبد الصمد على الفرح وجمال الفرح وحلاوة الفرح . كانت ليلة ياخويا من الف ليلة وليلة

 

ايه اللى حصل ياست شهر زاد

 

الاول ياخويا روحنا جيبنا العروسة من عند الحلاق وكانت ايه بقا قمر منور شعر ايه وعنين ايه وحلاوة ايه

 

لا حول ولا قوة الا بالله . هى مش محجبة

 

ايوة ياخويا هى فى الاساس متحجبة بس النهاردة شالت الحجاب عشان ليلة العمر ياخويا عقبال ماتفرح بالبت دودو

 

 

يعنى عشان ليلة العمر تغضب ربنا

 

ياخويا ربنا بيسامح ماتتحشرش انت . وبعدين كانت لازم تقلع الحجاب عشان الفستان بتاعها مفتح ومفندق من الاربع اتجاهات ياخويا

 

يا حفيظ يارب .وازاى ابن خالتك يسمح لها تلبس فستان عريان بالشكل ده

 

ياخويا دا هو اللى اشتراهولها

 

لأ راجل ماشاء الله

 

وبعدين ياخويا روحنا الاكاندة اللى فيها الفرح . اكاندة اوبها ياخويا والانوار جوا بتلعلط لعاليط كدة

 

والناس اول ما العروسة دخلت قعدو يسقفو ويزغرطو وانا معاهم طبعا انت عارفنى صاحبة واجب

 

وبعدين المزيكا اشتغلت هادية اوى كدة وطفو النور انا كنت بحسب هيسيبو العريس والعروسة ينامولهوم شوية وبعدين نصحيهم

 

لكن لقيت العريس سحب العروسة من ايدها وراح ياخويا خدها بالاحضان وقعدو يرقصوا بشويش

 

والمعازيم كمان كل واحد خد مراته ولا صاحبته وقعدو يرقصو بشويش كدة زى العريس والعروسة . وانا اقول فينك ياعبد الصمد

 

كنت خدتك ورقصت زيهم كدة . وإذ فأجة كدة على غفلة المزيكا الهادية بقت على واحدة ونص والناس هاصت ياخويا كله عمال يرقص

 

بعزم مافيه وترش الملح بينهم ماينزل من كترهم ياخويا بس ياخويا بعيد عنك الفرح كان هيقلب بغم

 

ليه بعد الشر عليكو ايه اللى حصل

 

ياخويا الاستاذ عبد العال ومدامته مودام اشعال جم الفرح

 

مين عبد العال واشعال دول

 

ياخويا دول جيران خالتى فى الشقة اللى قصادها على طول .حتى مكتوب على باب الشقة شقة الاستاذ عبد العال زين الرجال رجل اعمال

 

وايه المشكلة يعنى

 

المشكلة ياخويا ان مودام اشعال قامت ترقص وتتنطط فى الفرح زى اللى عليها عفريت وعايزة تطلعه

 

وجوزها ازى يسمح لها بكدة

 

ياخويا ده كان فرحان فرحة الدنيا وعمال يسقفلها كمان

 

ايه الرجولة دى كلها . وبعدين

 

واحد من الشبان ياخويا صورها بالكامرا وهى بترقص وجوزها شافوه وراح ماسكه من لياقة القميص وقالوه انت ازاى ياواد يا خونفس انت تصور المودام بتاعتى وهى بترقص

 

راح قاله وانت لما عندك نخوة كدة بتخليها ترقص ليه اصلا

 

قاله مراتى وانا حر فيها يا سئيل يا رزل

 

راحت الست اشعال زعقت لجوزها وقالتله جرا ايه ياعبد العال هو كل ماتلاقينى برقص فى فرح ومعجبينى بيصورونى تعملى سكوندال ياعبد العال

 

قالها انا اسف يا حبيبتى اخر مرة خلاص ما تزعليش . قالتله صالح الراجل اللى زعلته

 

راح قال للشاب اللى صور مراته خلاص ماتزعلش يا سيدى حقك علية قاله خلاص مافيش حاجة وعشان خاطرك همسح الصورة

 

راح الاستاذ عبد العال قاله عيب عليك يا راجل انت كدة بتهينى وبتهين المودام الصورة دى هدية من اخ لأخوه والله ماانت ماسحها انا حلفت

 

قاله خلاص ياسيدى هدية مقبولة ربنا يزيدك رجولة وبعدين قال لمراته كملى رقصك يا حبيبتى انا اسف عطلتك

 

 

لا حول ولا قوة الا بالله . انتى قولتيلى اسمه ايه الراجل ده

 

اسمه الاستاذ عبد العال زين الرجال وتشوفه ياعبد الصمد ماشاء الله راجل طول بعرض وعليه شنب يقف عليه الصقر

 

لأ ده مش زين الرجال ده عرة الرجال وانتى الصادقة .ازاى يسيب مراته ترقص ويتفرج عليها الناس كدة .

 

 

وكله كوم والعروسة واخواتها كوم .تقول ياخويا غوازى مش شارع الهرم . دول رقصو رقص ياعبد الصمد

 

 

ونعم النسب يختى

 

 

ولا البوفين والاكل اللى فى البوفين .دا انا كلت اكل انا والعيال بفترا وكنت واخدة معايا كيس نايلون ولميت بقا من خيرات ربنا

 

اللى يقابلنى على البوفين احطه فى الكيس ايشى فراخ ولحمة وهم مايتلم غير علب الكونزى والجاتون .هغرفلك منهم دلوقتى

 

 

 

الله الغنى عنكو وعن اكلكو ياست . وانتى عاجبك الفرح المخالف للشرع ده ياذكية

 

ياخويا وانا مالى انا روحت كلت وانبسطت انا والعيال وهما حسابهم عند ربنا بقا

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(21)

بقــ هبةنور ــلم

 

عبد الصمد جه من شغله ويادوب فتح الباب ولقى كورة دب خبطت فى وشه

 

ولقى ستات وعيال وحس انه غلط فى الشقة وراح ناده على ذكية

 

تعالو نشوف ايه اللى حصل

 

 

ذكية

 

ذكيةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة

 

 

اهلا ياعبد الصمد

 

مين دول

 

دى خالتى خضرا وبناتها بهانة وباكينام وولادهم ربنا يخلى

 

وان شاء الله دول جايين زيارة ولا إقامة

 

لا ياخويا دول مابيطولوش مش هيزودو عن شهر او شهر ونص بالكتير

 

ياذكية طيب ليه ماراحوش عند امك

 

امى ياعبد الصمد غضبانة علية عشان ماوديتلهاش هدية عيد الام وقالتلى لاانتى بنتى ولا اعرفك

 

وراحت لمت هدومها وسافرت عند اخويا فى اسكندرية وسابت ابويا فى الشقة لوحده

 

طيب ماراحوش عند منكسرة اختك ليه

 

منكسرة بتبيض الشقة يا عبد الصمد عقبال ماربنا يكتبهالنا

 

 

يعنى هما هيقعدو عندنا المدة دى كلها

 

وماله ياعبد الصمد جايين يغيروا هوا ياخويا

 

 

طيب عن اذن سياتك داخل الحمام

 

لأ معلش استنى شوية عشان فى عيل من عيالهم دخل ولسة ماطلعش

 

ماشى انا داخل اوضتى ولما الحمام يفضى اندهيلى

 

لأ معلش أصل بهانة لسة مرضعة الواد ومنيماه فى اوضتنا وقالت ماحدش يخش عليه ليصحيه ويفزعه

 

ماشاء الله .يعنى انا اروح فين دلوقتى

 

خليك واقف زى ماانت لحد ماالواد يخرج من الحمام . اهو الواد خرج

 

 

استنى يابت انتى وهى عمكو عبد الصمد عايز الحمام . يابت انتى يابت . معلش ياعبد الصمد .استنى لما البت تخرج من الحمام

 

 

 

 

 

 

 

 

بقولك ايه ياعبد الصمد

 

خير

 

انت رايح فين

 

رايح اقعد على القهوة مادام مافيش حتة فى بيتى اقعد فيها

 

طيب ياخويا وانت جاى هات معاك اد خمسة كيلو لبن واتنين كيلو جبنة بيضة واتنين كيلو جبنة رومى وكرتونتين بيض وخمسين رغيف فينو عشان العشا

 

 

ارحمنى يارب برحمتك

 

 

 

 

 

 

ازيك يا شكرى

 

اهلا ياعبد الصمد . بقالك كتير ماجيتش القهوة

 

مشاغل الدنيا والاولاد يا شكرى ياخويا

 

مالك مهموم كدة ياعبد الصمد

 

البيت ما بقاش بيت ياشكرى ياخويا . قرايب الست بتاعتى مالينه ومش لاقى راحتى

 

غير المصاريف اللى تقتم الضهر فطار وغدا وعشا وفاكهة لما الواحد مش ملاحق على الطلبات

 

طيب ماتخلى الست بتاعتك تفهمهوم

 

لا إذا كان عليها هى مبسوطة وانا مش عارف اعمل ايه . ولا اقولك انا لقيت حل

 

خير ياعبد الصمد

 

انا هبعتلوهم امى .هى اللى هتتصرف معاهم

 

 

 

 

 

 

 

تررررررررررررررررررررن ترررررررررررررررررررررررررررررررررررررررررن

 

مين

 

افتحى يا جلابة الهنا

 

 

ايه النور ده ازيك يا نينة

 

فين قرايبك خلينى ارحب بيهم

 

اتفضلى هما فى الصالون

 

 

ازيك ياست خضرا

 

اهلا يا ام عبد الصمد يامرحب

 

يامرحب بيكى انتى يختى .منورة اوى اوى بيت ابنى

 

منور بوجودك يختى

 

انتى عارفة ياست خضرا . عبد الصمد ابنى بيحاول المستحيل معايا انى اجى ابات عنده ولو يوم واحد

 

وانا اقوله ابدا ياابنى انا مش برتاح الا فى بيتى

 

طب وانا مالى يختى ماترتاحى مطرح ماانتى عايزة انتى هتشيلينا همك ليه

 

اصل المثل بيقول ياخضرا يختى يابخت من زار وخفف

 

نخفف ازاى ياام عبد الصمد يختى دا الدنيا متلجة انا لابسة بروفرين وسقعانة

 

يادى الغلب ياولاد . انتى يختى بلدكو ايه ياست خضرا

 

احنا ياحبيبتى من كفر ابو غتاتة قبلى وانتو منين

 

احنا من كفر اللى هيطلع من هدومه بحرى

 

 

يامرحب يختى يامرحب ياست ام عبد الصمد

 

انا ماشية بدل مايجيلى جلطة

 

ليه يختى اقعدى دى ذكية بتعملى مكرونة فيجرسوكون اللى بحبها

 

ايوة يختى كله من شقا الغلبان حسبى الله ونعم الوكيل

 

بالسلامة ياام عبد الصمد هتوحشينى اوى ابقى تعالى كل اسبوع زورينى عند ذكية

 

 

 

 

 

 

ذكية

 

اهلا ياعبد الصمد وحشتنى

 

عايز الحمام ان شاء الله اذا كان فاضى بعد اذنك

 

معلش ياعبد الصمد خالتى دخلت تستحما بقالها ساعة الاربع وزمانها طالعة .ده حتى الواد حمادة كان عايز الحمام

 

روحت بعته عند الجيران

 

يعنى انا اروح اخبط على الجيران انا كمان اقولهوم انا ابو حمادة اللى كان عندكو فى الحمام من شوية وعايز اخش بداله

 

 

يوه ياعبد الصمد . اصل خالتى فرحانة اوى بالبانيو وبتقعد فيه وتنسى روحها

 

طيب ايه رأيك انا هجيب ايد الهون واكسر البانيو وارتاح من شره

 

اهدا ياعبد الصمد اهى خالتى طلعت

 

حمدلله على السلامة

 

الله يسلمك ياعبد الصمد ياضنايا .ايه يابنى النعيم اللى انتو فيه ده. ياحلاوة البلانيو بتاعكو . انا قاعدة فيه وعمالة افتكر ايام طفولتى

 

وايام الترعة الحلوة ابقا خلى امك تيجى تاخد غوطسين فى البلانيو ياعبد الصمد

 

ان شاء الله .لما اشريلها مايو .دى حاجة تغيظ

 

 

 

 

انت نازل ياعبد الصمد

 

ايوة رايح القهوة

 

يعنى رجلك خدت على القهوة اليومين دول

 

عشان بيتى بقا لوكاندة مكتملة العدد ياهانم ومش لاقى فيه راحتى

 

طيب هات معاك تلاتة كيلو لحمة واربع فرخات

 

يااااااااااااااااااااااااااااااااااااااااااااااااااااااارب

 

 

 

 

 

 

وبعدين يا شكرى ياخويا دول داخلين على شهرين عندى وشكلهم مش ماشين

 

طيب بقولك ايه ياعبد الصمد انا جاتلى فكرة

 

قول ياشكرى الحقنى بيها

 

انت تروح البيت دلوقت وترحب بالناس دى عادى وتقعد معاهم وانا هاجى وراك واعمل نفسى جاى من المحافظة

 

وجايبلك انذار بإخلاء البيت وهما اكيد هيخافو على نفسهم ويمشو

 

فكرة هايلة تسلم افكارك انا هسبقك على البيت

 

 

 

 

اهلا ياعبد الصمد

 

اهلا ياذكية فين خالتك وولادها وولاد ولادها

 

بيتعشوا ياخويا

 

وماله ماهى تكية عبد الصمد

 

 

 

 

ترررررررررررررررررررررررررررررن ترررررررررررررررررررررررررررررررن

 

 

مييييييييييييييييييييييين

 

محضر

 

ياحفيظ يارب خير

 

 

دا منزل الاستاذ عبد الصمد

 

ايوة يافندم

 

انا جاى من المحافظة ومعايا انذار لازم تخلو البيت خلال ساعتين بالكتير البيت هيقع

 

 

الحقى ياذكية البيت هيقع

 

يالهووووووووووووووووووووووووووووووى

 

اجرى ياخالتى

 

يالهوى يالهوى يلا يابت يابهانة انتى وباكينام هاتو العيال بسرعة البيت هيقع

 

 

يلا ياما بسرعة

 

استنى ياخالتى خدينا معاكى انا وعبد الصمد والعيال البيت هيقع

 

 

وانا مالى يختى هو انا فاتحة بيتى ملجأ للمشردين

 

 

يلا ياباكينام يلا يابهانة يلا ياعيال

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(22)

بقــ هبةنور ــلم

 

ذكية النهاردة مش بس زوجة مثالية لا دى كمان ام مثالية

 

وتستاهل ؟

 

 

تعالو نشوف تستاهل ايه

 

 

 

 

 

 

مامى

 

عايزة ايه يادودو

 

كنت عايزة اتكلم معاكى فى حاجة مهمة

 

خير ياضنايا

 

فى واحدة صاحبتى اشتركت فى معهد رقص وعايزة اشترك معاها

 

يا مصيبتى انتى عايزة تشتغلى رقاصة يابنت عبد الصمد

 

رقاصة ايه بس يامامى .دا معهد رقص راقى

 

هو الرقص كمان فتحوله معاهد . طيب ماانا عندى حل يابت

 

ايه يامامى

 

انزل اشترى طبلة واطبلك وابوكى يمسكلك الصاجات وانتى ارقصى براحتك والنقطة بالنص

ايه ياماما انتى فاكرانى هرقص الرقص البيئة ده . لا يامامى انا هرقص باليه

 

 

ايه البالين ده يابت .

 

يعنى يامامى ماشوفتيش بحيرة البجع

 

لا شوفت ترعة المحمودية وانا مسافرة البلد مع ابويا وانا صغيرة

 

يامامى حد مايعرفش الباليه برضو

 

ايوة ايوة افتكرته يابت .مش دول اللى تلاقى الواحدة عمالة تتحنجل على طراطيف صوابعها وهى لابسة ربع فستان مأزعر ومنفوش من الوسط

 

ويجى جدع هلف كدة يشيلها من وسطها من غير خشا ولا حيا ويقعد يطوحها فى الهوا ويرزعها فى الارض

 

برافو يامامى انتى شاطرة هو ده الباليه

 

طب قومى من وشى يا مقصوفة الرقبة

 

مامى دى مش طريقة تفاهم وعلى فكرة مامة صاحبتى هتتصل بيكى تقنعك

 

 

 

 

ترررررررررررررررن تررررررررررررررررررررررن

 

الو

 

الست ذكية معايا

 

ايوة يختى انتى مين

 

انا ام فيولا صاحبة دودو

 

اهلا وسهلا يا ست ام كسرولا

 

على فكرة انا بحب دودو زى فيولا بنتى بالظبط وعايزة مصلحتها زى فيولا بالظبط ومن مصلحة ولادنا اننا نديهم الحرية ويعملو اللى على مزاجهم بالظبط

 

وانا لقيت بنتك عندها نفس ميول بنتى بالظبط عشان كدة هيرقصو هما الاتنين بالظبط

 

قوليلى يختى انتى مين مصلتك علينا بالظبط

 

حبيبتى انا كمان عايزاها تيجى معانا الكنيسة عشان تاخد البركة من ابونا بالظبط

 

نعم يختى هو انتى متصلة بمنزل المقدس حنا ومراته المقدسة دميانة .هنا بيت موحدين بالله يختى

 

انا ماقولتش حاجة تمس العقيدة بالظبط

 

انتى عارفة لو اتصلتى هنا تانى هخلى مقام الكلب اعلى من مقامك بالظبط

 

 

 

 

انتى يابت يادودو

 

نعم يامامى

 

يابت عندك عشر سنين وعاملة البلاوى دى كلها امال لما تكبرى شوية هتعملى فينا ايه على العموم ابوكى زمانه جاى ونهارك مش معدى

 

 

 

 

 

 

ايه رأيك ياعبد الصمد فى الكلام اللى سمعته ده

 

انتى السبب ياست هانم انتى اللى شجعتيها على الرقص

 

ليه ياخويا شايفنى شايلة الشمعدان على دماغى ومتحزمة ودايرة فى الشقة اقول رنة خلخالى ياما

 

 

ياهانم كتير قولتلك خليها تروح تحفظ قرآن مع فاطمة بنت الجيران تقولى لأ دى لسة صغيرة

 

علميها الصلاة تقولى لسة صغيرة .كلميها عن الرسول عليه الصلاة والسلام والصحابة وعرفيها دينها تقولى لسة صغيرة

 

لحد ماقابلت ناس غيرو فكرها وملوا دماغها بأفكار ومعتقدات فاسدة . انتى مش ام صالحة ابدا

 

لا اله الا الله . انا قصرت مع بنتى فى ايه بس ياناس . شامبون وبشتريلها شاورجيلو مابستخسرش فيها

 

هدوم على الموضة وبجيب اعمل ايه تانى عشان ابقا صالحة ادخلها الجيش واحلقلها زلبطة عشان يعجبك

 

 

لبسها ده موال تانى لوحده

 

لأ ياعبد الصمد دى صغيرة حرام نعقدها ونلبسها الحجاب

 

 

طيب استحملى حملات التنصير اللى هاجمة علينا

 

لأ ياخويا انا مطعمة العيال من صغرهم فى الوحدة الصحية ماتخافش

 

للأسف طعمتيهم ضد عدوى الامراض ولكن ماطعمتيهومش ضد الافكار الفاسدة وهدم الدين

 

 

الله يسامحك ياعبده .اهى بنتك عندك واتصرف انت بقا عن اذنك ورايا غسيل

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(23)

بقــ هبةنور ــلم

 

ذكية خلت عبد الصمد نام وكالعادة قامت تمارس نشاطها

 

عمالة تنضف جيوبه من الزيادات

 

 

 

تعالو نشوف بتعمل ايه الست دى

 

 

انت صاحى يا عبد الصمد

 

عبد الصمد

 

الحمد لله نام

 

 

 

 

 

صباح الخير ياذكية

 

صباح النور ياعبد الصمد

 

الفطار جاهز

 

حالا ياخويا

 

طيب هاخد حمام والبس على ماتحضرى الفطار

 

 

 

 

ذكية

 

نعم ياعبد الصمد

 

مش عارف حاسس الفلوس اللى فى المحفظة ناقصة

 

ناقصة يعنى ايه ياعبد الصمد . عدها كويس

 

للأسف ماكنتش عاددها بس حاسس انهم ناقصين

 

متهيألك ياخويا . يلا الفطار جاهز

 

 

 

 

 

بقولك ايه يا عبد الصمد

 

نعم

 

قبل ماتنزل ياخويا سيبلى خمسوميت جنيه عشان عايزاهم ضرورى

 

عايزاهم فى ايه

 

اصل فى واحدة غلبانة ياعينى وبتجرى على يتامة ومحتاجة مساعدة

 

حاضر ياذكية انا مااقدرش اتأخر على الايتام .الرسول عليه الصلاة والسلام وصانا عليهم

 

ربنا يخليك يا عبد الصمد للمساكين والغلابة

 

ادى ياستى الخمسوميت جنيه والست دى لو احتاجت حاجة تانى قوليلى

 

شكرا يا عبده يخليك يارب

 

انا نازل . السلام عليكم

 

وعليكم السلام ياعبده

 

 

 

 

بت يادودو

 

نعم يا مامى

 

نوليلينى النوبايل بتاعى يابت

 

اتفضلى ياماما

 

 

 

الو . ايوة يا منكسرة يختى

 

ازيك يا ذكية وحشانى اوى اوى

 

ماتشوفيش وحش . بقولك ايه عايزاكى تيجى معايا عند الصايغ حوشت قرشين وعايزة اشترى غويشتين

 

طول عمرك شاطرة يا ذكية يختى وبتعملى حساب الزمن

 

امال ايه ياعين اختك . عبد الصمد ايده سايبة وكل يوم والتانى يجيب لأمه واخواته شئ وشويات وناسى ان عنده عيال

 

ليه يختى هو مقصر مع العيال

 

بصراحة لأ يختى مش مقصر لا معايا ولا معاهم . بس بعيد عنك النار بتقيد فى قلبى لما بيجيب لامه ولا لاخواته حاجة .

 

عندك حق يختى انتى اولى .بلا امه بلا عمته بلا هم . الواحد بيتكلم معاكى يطلع منك بمواعظ وحكم ياذكية يختى بس يختى افرضى سألك عن الدهب ده هتقولى ايه

 

ليه يختى هو انا هبلة .انا شايلة الدهب اللى بحوشه فى مكان مايخطرش على بال الجن الازرق

 

فين يختى

 

فى دولاب الخزين فى المطبخ شايلاه فى شوال مكرونة

 

يخرب عقلك ياذكية .ناصحة طول عمرك

 

طب يلا البسى وهفوت عليكى

 

 

 

 

 

 

ذكية

 

ياذكية انتى فين

 

مامى لسة ماجاتش يا بابى

 

اه لازم راحت للست الغلبانة . ربنا يقدرها على فعل الخير

 

بس احنا جعانين اوى يابابى ومش فى اكل خالص

 

معقول . ازاى ماما ماعملتش اكل قبل ماتنزل طيب ياولاد هشوف حاجة فى التلاجة ناكلها

 

مافيش يابابى

 

مافيش يعنى ايه امكو واخدة فلوس امبارح وقالت هتشترى لحمة وفراخ وطلبات للبيت

 

مش فى حاجة خالص يابابى

 

طيب انا هتصرف هتصل بيها

 

 

موبايلها مقفول . طيب انا هدور على اى حاجة ناكلها فى المطبخ

 

 

ياسلام كل الحلل فاضية

 

ايه رأيكو ياولاد اعملكو مكرونة بالصلصة على السريع كدة ونشطشطها زى مابتحبوها

 

فكرة حلوة يابابى

 

طيب روحو ذاكرو وانا هحضر الغدا . فكرتونى بأيام العزوبية ياولاد هههههههه

 

 

 

 

ايه ده

 

ايه العلبة اللى فى شوال المكرونة دى

 

ياالله ! ايه الدهب ده كله دا مش شوال مكرونة دى مغارة على بابا وفيها الكنز

 

الهانم بتحوش من ورايا وانا فلوسى بتنقص ومش عايز اتهمها عشان خايف اظلمها وطبعا الفلوس اللى خدتها تساعد بيها الغلابة هتحطها فى جيبها

 

طيب ياذكية . ان ماطلعته على عنيكى يا شيخة المنصر

 

 

 

بقول ايه ياولاد . بلاش مكرونة .انا هتصل اجيبلكو بيتزا

 

احسن برضو يابابى

 

 

 

 

 

 

السلام عليكم انت جيت ياعبد الصمد

 

ايوة جيت يا عيون عبد الصمد

 

ايه الحنان ده كله ياخويا

 

هو انتى لسة شوفتى حنان .التقيل ورا

 

هحضر الغدا حالا

 

لا ماتتعبيش نفسك . بعت اجيبلك بيتزا يا احلى من البيتزا

 

ربنا يخليك ليا يا عبده ياحبيبى

 

 

ماقلتلكيش ياذكية . فى ست مسكينة وغلبانة جت من شوية دورت على حاجة اديهالها فى المطبخ مالقيتش الا شوال مكرونة اديتهولها بحاله

 

 

 

اديت ايه . مين . فين . ازاى . قلبى قلبى الحقونى

 

هاتو مية لماما ياولاد . مالك ياذكذوكة يا حبيبتى . سلامة قلبك يا قلبى

 

اديت شوال المكرونة لمين ياعبد الصمد

 

للست الغلبانة

 

هى مين ساكنة فين

 

وانا هعرف منين . هو يعنى كنت هشوف بطاقتها قبل مااديها حسنة

 

حسنة . حسنة ايه .ازاى تديلها الشوال من غير ماتقولى

 

طيب اهدى واشربى ميه . وفيها ايه ياذكذوكتى .انتى بقيتى بخيلة ليه كدة .ده شوال مكرونة مالوش قيمة

 

 

الست دى شكلها ايه

 

ست غلبانة

 

هو انت عليك عفريت اسمه ست غلبانة . اوصفهالى ياعبد الصمد

 

هى زى ماتقولى كدة ست غلبانة

 

يوووووووووووووووووووووووووووووووه

 

انتى رايحة فين يا ذكذوكتى

 

هسأل الجيران عنها اكيد خبطت على كل الشقق

 

روحى اسألى يا امورتى ربنا يعطرك فيها

 

 

 

 

سعاد يختى الحقينى

 

مالك ياذكية وشك ازرق ليه كدة ومخضوضة

 

فى ست غلبانة عدت عليكى من شوية

 

لا مافيش حد خبط علينا

 

طب عن اذنك هطلع اسأل محاسن

 

محاسن . ماشوفتيش ست غلبانة ومعاها شوال مكرونة

 

 

شوال مكرونة بالصلصة ولا بالبشاميل يختى هههههههههههههه

 

هو انا نقصاكى يامحاسن اقفلى بابك يختى انا هطلع اسأل ماجدة

 

 

 

 

اه يانى اه مش قادرة اخد نفسى

 

 

ايه ياذكذوكتى لقيتى الست الغلبانة

 

سألت العمارة كلها وطلعت عشر ادوار على رجلى لما اتهد حيلى .ماحدش شافها ياعبد الصمد

 

بس حاجة غريبة اوى ياذكية .ايه يعنى شوال مكرونة . يلا البيتزا وصلت يلا ناكل

 

بيتزا ايه بس وبتاع ايه سيبنى فى حالى .انا هنزل ادور عليها فى الشارع

 

انزلى ياحبيبتى ربنا معاكى

 

 

 

 

 

ياناااااااااااااااااااااااااااااااس ماحدش شاف ست غلبانة معاها شوال مكرونة . اه ياشقايا وسنين عمرى يانى

 

 

يا شوال المكرونة انت فين تعالى حرام عليك

 

ياناس هاتولى شوال المكرونة من الست الغلبانة

 

 

 

 

يا استاذ عبد الصمد

 

خير يا عم عبده

 

الست ذكية عمالة تجرى فى الشارع يمين وشمال تنده على شوال مكرونة والعيال بيجروا وراها ويحدفوها بالطوب وبيقولو العبيطة اهيه

 

 

 

هى وصلت للدرجة دى . طيب انا هنزل اجيبها

 

 

 

 

 

 

حبيبتى فوقى

 

انا فين

 

فى بيتك وجنب جوزك اللى عايشة معاه فى بيت واحد وبتسرقيه

 

بسرقك

 

ايوة بتسرقينى

 

انا انا اصل . هو انت عرفت منين

 

من شوال المكرونة

 

يعنى الشوال موجود والدهب موجود

 

الدهب موجود . بس ثقتى فيكى هى اللى مابقتش موجودة

 

 

سامحنى ياعبده انا كنت بعمل كدة عشان ولادنا

 

انا عمرى ماقصرت معاكى فى حاجة كل طلباتك وطلبات البيت والولاد عندك وبزيادة بس على العموم فات اوان الكلام

 

طب هات شوال المكرونة

 

الشوال بالمكرونة اللى فيه تحت امرك اما الدهب انسيه

 

كدة ياعبد الصمد .الله ينتقم منك مش مسامحاك يا سارق شقايا

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(24)

بقــ هبةنور ــلم

 

 

 

ذكية هولمز راحت عند جوزها الشغل وسمعت كدة من بعيد

 

حوار غامض بينه وبين صاحبه

 

ياترى سمعت ايه

 

تعالو نشوف ايه الحكاية

 

 

 

 

 

مش ناويت خلاص يا عبد الصمد على الجديدة

 

ماشاء الله . الف مبروك يا مرزوق فرحتنى والله

 

عقبالك يا عبد الصمد لماتجيب الجديدة

 

يارب يا مرزوق ادعيلى ياخويا لحسن انا اتخنقت . لكن قولى هتعمل ايه فى القديمة

 

انا هرميها فى الترعة اللى جنب البيت دى جربانة وشكلها مؤرف

 

ههههههههههههههههههه الله يجازيك يا مرزوق

 

لا بصراحة يا عبد الصمد دى ارفتنى وطلباتها كتير وكانت هتخرب بيتى

 

الحمد لله يا مرزوق اديك هتخلص منها وترتاح

 

الحمد لله يا عبد الصمد

 

 

 

 

يالهوى الراجل زميل عبد الصمد ناوى يرمى مراته فى الترعة .اعمل ايه واسوى ايه دلوقتى

 

 

 

اهلا يا ذكية منورة يا حبيبتى

 

بقول ايه يا عبد الصمد انا ماشية عشان وراية مهمة صعبة

 

تمشى فين انا طلبتلك عصير

 

انا لازم امشى قبل العصير مايقلب بقهوة سادة

 

زى ماتحبى مع السلامة

 

طيب ادينى النوتة الصغيرة اللى فيها تليفونات كل معارفك

 

ليه ان شاء الله

 

اصل عايزة اتصل على التليفون الارضى باختك عشان وحشانى

 

ماتكلميها على الموبايل

 

لا اصل صوتها على التليفون الارضى وحشنى

 

خدى يا ستى

 

 

 

 

 

 

السلام عليكم

 

عليكم السلام

 

انتى يختى جماعة الاستاذ مرزوق

 

ايوة مين معايا

 

انا فاعلة خير يختى

 

عايزة ايه يا ست فاعلة خير

 

جوزك يا شابة ناوى يتجوز عليكى وقبل مايتجوز هيقتلك ويرميكى فى الترعة

 

انتى بتقولى ايه يا ست انتى .انتى مين بالظبط

 

قولتلك فاعلة خير ايه مش باين علية

 

لو ماقولتيش انتى مين هعتبرك بتهزرى وهقفل السكة

 

طيب هقولك وماتقوليش لحد .انا جماعة الاستاذ عبد الصمد زميل جوزك واسمى ذكية

 

وانتى عرفتى منين الكلام ده

 

سمعته بيقول كدة يختى وكمان بيقول عليكى جربانة . هو انتى مابتستحميش يختى

 

انا برضو جربانة الله يسامحه انا مش مصدقة ان مرزوق يطلع كدة

 

ده كمان بيقول عليكى شكلك مؤرف ويخوف

 

كدة برضو يامرزوق يا عشرة عمرى وانا اللى كنت بحسبه بيحبنى وال الاستاذ يقولى عاملك مفاجأة اتاريه ناوى يقتلنى ويتجوز انا هرفع عليه قضية خلع

 

بصى ياحبيبتى انا هنصحك لوجه الله لو خلعتيه هياخد اللى وراكى واللى قدامك انا شايفة انك تجيبى كام عربية لورى وتلمى عفشك كله وتخبيه وتروحى تستخبى عند امك

 

وبعدين ترفعى قضية تبديد عفش وربنا معاكى . وكمان انا اعرف محامى مالوش حل يا قلب اختك بيكسب كل قضايا الطلاق

 

ده فين ده

 

انا هوديكى ليه ماتخافيش .ده مطلق تلاتة حبايبى قبل كدة ويتمنى يخدم اسمه سيد اذية المحامى ادينى عنوانك وهاجى اخدك ونروح

 

ماشى خدى العنوان

 

هو انتى اسمك ايه صحيح

 

انا هايفة

لأ يختى ماتقوليش على روحك كدة انتى زى الفل

اسمى هايفة

 

اه . عشان كدة يختى استقل بيكى ماهو لو كان اسمك فتكات ولا عدلات كان عملك الف حساب

 

 

 

 

 

 

 

 

 

 

 

السلام عليكم

 

عليكم السلام

 

حضرتك الاسطى سيد المحامى

 

اسطى . شايفانى سمكرى قدامك ولا بمحر شقة

 

ياخويا ماتدقش . عايزين نطلق الست دى من جوزها ونفسك معانا

 

انا هخربلك بيته يا هانم وهبيعه اللى وراه واللى قدامه

 

ربنا يديك الصحة ياخويا

 

 

حضرتك لازم تروحى تعملى محضر لجوزك بعدم التعرض الاول

 

 

حاضر هروح حالا

 

 

 

 

 

 

لا حول ولا قوة الا بالله

 

مالك ياعبد الصمد

 

مرزوق صاحبى فى مشكلة كبيرة اوى

 

يستاهل الخاين قتال القتلا

 

تصدقى رجع البيت لقى مراته خدت العفش وسايبة ورقة بتقوله انها عايزة تطلق وانه كان ناوى يقتلها ويرميها فى الترعة

 

 

ايوة عارفة انا اللى قولتيلها

 

قولتيلها ايه يامصيبة انتى الله يهدك

 

ايوة انا سمعتكو وهو بيتكلم على الغلبانة دى ويقول عليها جربانة وهيجيب واحدة جديدة وهيرميها فى الترعة

 

الله يخرب بيت سنينك يا شيخة ده بيتكلم على عربيته القديمة وبيهزر ويقول هيرميها فى الترعة عشان هيشترى واحدة جديدة

 

يالهوى . انا فهمت غلط معلش .اما اقوم اعملك شاى

 

شاى ايه انتى ماعندكيش دم الراجل بيته اتخرب بسببك

 

طب وانا مالى ياعبده هو انا كنت اقصد

 

يعنى تعملى العملة السودة دى وتفرقى بين راجل ومراته وتقولى ماكنتش اقصد دى عملاله محضر وناوية ترفع قضية عند سيد اذية

 

طيب وانا اعمل ايه يعنى اللى حصل حصل ياخويا نصيبهم كدة

 

بصى يا خرابة البيوت انتى انا هجيبلك عنوان الست فى بيت اهلها وتروحى تفهميها كل حاجة وترجعيها لجوزها

 

طيب كمان يومين كدة عشان ورايا طبيخ وغسيل مش فاضية

 

قومى انزلى حالا يا سفيرة جهنم انتى والا انا اللى هرميكى فى الترعة

 

 

 

 

 

 

خلاص يا هييفا يختى انا فهمتك الموضوع وماشية بقى عن اذنك

 

معقول برضو عايزة تمشى من غير مانقوم معاكى بالواجب

 

معلش مرة تانية

 

لأ إزاى .يا انصاف . يا مديحة . يا اعتدال تعالوا

 

مين دول يختى

 

دول اخواتى جاين يعملو معاكى واجب . كل واحدة تجيب شبشب وتيجى عشان نعمل الواجب مع الست خرابة البيوت دى

 

يالهووووووووووووووووى الحقونى هيموتونى يا ناس . الحقووووووووووووووووووووووووونى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(25)

بقــ هبةنور ــلم

 

 

ذكية النهاردة يا بنات واقفة فى المطبخ بتحضر الفطار ودخلت عليها دودو بنتها

 

ياترى ايه اللى حصل

بنجور ماما

 

يسعد بنجورك يا عين امك روحى صحى اخوكى على مااحضر الفطار

 

 

داكور ماما

 

 

 

صباح الخير ياذكية

 

يسعد صباحك ياعبد الصمد

 

بنجور بابا بابا بابا ليه مش بترد علية

 

اتكلمى عربى وانا ارد عليكى

 

جى نى ايم با لا اراب

 

لا حول ولا قوة الا بالله .ليه يابنتى بس مابتحبيش العربى دى لغة القرآن الكريم

 

ياخويا ماتسيب البت تتكلم خواجاتى براحيتها دى كلامها عسل

 

جى فو دو لا كونفيتيور

 

لأ ياضنايا احنا ماعندناش فطير

 

بتقولك عايزة مربى

 

روحى هاتى من التلاجة يا دودو

 

على فكرة اختى منكسرة جاية تزورنا انهاردة

 

يامرحب بيها انا هلبس واروح شغلى

 

طريق السلامة يا خويا

 

 

 

ماما

 

عايزة ايه يادودو

 

ما طنط كوكى ايه فينو

 

يابنتى مااحنا لسة فاطرانين كوكى وفينو ايه تانى ايه انتى لسة جعانة

 

ياماما بقول لحضرتك طنط كوكى اخت حضرتك جت

 

هى منكسرة اختى بقت كوكى عوض علية عوض الصابرين يارب

 

 

ازيك يا ذكية

 

اهلا ياكوكى يختى نورتى

 

انا كوكى برضو يا ذكية الله يسامحك .شيفانى بكاكى

 

كى ايسك فو فوليه بوار ما طنط

 

ها يعنى ايه يا ضنايا

 

تشربى ايه يا طنط

 

هاتيلى شندوتش لحمة

 

 

داكور

 

يحضرلك الداكور يا بنت اختى

 

 

 

 

 

 

 

 

 

ذكية انتى فين

 

انا هنا ياعبد الصمد

 

انا قررت اجيب للولاد مدرسة لغة عربية واتفقت مع واحد صاحبى مراته مدرسة لغة عربية هتيجى بكرة وكمان هتساعدك انتى كمان تصلحى العربى بتاعك

 

ليه ياخويا شايفنى بتكلم هندى

 

تصدقى الهندى يتفهم عن كلامك

 

 

 

 

اهلا وسهلا يا ابلة منورانا والله

 

جزاك الله خيرا اختى الفاضلة

 

تشربى ايه يختى

 

اريد احتساء كوبا من الشاى

 

احتساء . سلامتك يختى الف سلامة

 

 

اين اطفالك الصغار

 

حاضر يختى هروح اندهوملك

 

هيا يا اطفالى الصغار الابلة جت

 

 

انتى اسمك ايه يا ابلة

 

انا ادعى روميساء

 

يشفيكى من كل داء يختى .

 

مرحبا ايها الصغار . احضروا الاقلام والاوراق كى نبدأ الدرس وانتى ابقى معنا ايتها السيدة الفاضلة فزوجك يشتكى من نطقك ايما شكوى

 

يشتكى منى انا .الله يسامحك يا عبد الصمد .هو فيه نطق فى الدنيا زى نطقى بس فين الراجل اللى يقدر

 

 

نبدأ بهذه الجملة

 

نحن نحب اللغة العربية حبا جما

 

قولى يا اختى الفاضلة الجملة السابقة

 

يعنى ايه ياست

 

نحن نحب اللغة العربية حبا جما

 

نحلو نحب اللغولا العربية جما حبا

 

 

يبدو اننى سأتعب معكى كثيرا . الله المستعان

 

 

 

 

 

اسكت يا عبد الصمد مش انا بقيت شاطرة فى العربى والابلة مبسوطة منى

 

اه طبعا انتى دلوقتى بقالك شهرين بتدرسى معاها

 

طيب اقولك جملة بالنحوى

 

قولى يا ذكية

 

لقد سوف اشتريت بلحا بالأمس

 

الله ينتقم منك بعدله . ايه اللى جاب سوف مع بالأمس

 

انت هتفهم اكتر منى يا عبد الصمد انا اتعلمت واتنورت وكفاية علام لحد كدة لحسن الشئ اللى يزيد عن حده يقلب ضده بعيد عنك

 

 

 

 

 

 

 

 

 

انت بتقر ا ايه ياعبد الصمد

 

بقرا الجورنال

 

مافيش حاجة مهمة فى الجورنان لفتت نظرك

 

اه فعلا .الاخوان هيدعمو خيرت الشاطر

 

مين شيرت الخاطر ده يا خويا

 

بالله عليكى اعمليلى انتى خاطر وسيبينى فى حالى

 

 

طب بص كدة فى الاعلونان هتلاقى اسمى منور زى القمر

 

اعلانات ايه . استر يارب .ايه ده .فصول ذكية لإنقاذ اللغة العربية

 

انتى اتجننتى ياست انتى .انتى مالك ومال اللغة العربية

 

مالى ازاى ياعبد الصمد .دى الحاجة الوحيدة اللى بفهم فيها

 

د انا هسجنك واوديكى فى ستين داهية لو مالغتيش الفصول دى

 

ياعبد الصمد افهمنى ياخويا انا خدت الاوضتين الفاضين فوق السطوح وهعملهوم فصول لحو امية ولميت كام ست من الامومين دول وهايجو الصبح بعون الله وكمان سيدة هاتساعدنى

 

سيدة مين

 

مرات البواب انت نسيتها

 

ودى هتساعدك فى ايه دى مابتعرفش تقرا اصلا

 

ايوة ماانا عارفة هى هتنظم الطوابير مقابل نسبة من الارباح

 

طيب ان ماوريتك ياذكية

 

 

صباح الخير ياستات يا شاطرين

 

انا مش لاقية مكان اقعد يا ابلة ذكية

 

خديها جنبك يا ام سيد

 

لأ مابحبش اقعد جنب ام سيد .عشان بتغش منى

 

روحى اقعدى جنب ام فوزى

 

لأ ام فوزى بتزقنى كل شوية من الدكة

 

وبعدين يا ام شلبى مش كل حصة يختى توجعى قلبى معاكى اقعدى فى الارض وريحينى وريحى روحك

 

حاضر ياابلة ذكية

 

 

يلا قولو ورايا يا ستات يا قمامير أ ارنب ب بطة

 

أ ارنب ب بطة

 

هو فين الارنب والبطة دول يا ابلة

 

اطلعى برا يا ام شلبى وماتحضرليش تانى

 

خلاص ياابلة سامحينى

 

يبقى تقعدى وماتفتحيش بقك بكلمة والا هجيبلك استدعاء ولى امر

 

 

 

تن تن تنن

 

مين ع الباب ياسيدة

 

ده البوليس يا ابلة جاى ياخدك بالسلامة

 

خير يا بيه انا ماعملتش حاجة

 

احنا جالنا بلاغ من السيد عبد الصمد عبد الصبور انك بتهدمى قواعد اللغة العربية

 

الله يسامحه . ودى عقوبتها ايه يابيه

 

اعدام ان شاء الله

 

يالهوى ليه كدة بس خيرا تعمل شرا تلقى يا فرحتك يا ابلة نصورة يا بتاعة قلم نابض اهئ اهئ اهئ

 

 

 

منتديات أخوات طريق الإسلام