أريد أن أنظف البوتوجاز تنظيفاً شاملاً ... ساعدننى يا أخوات

[بُشرة خير 3]

السلام عليكن ورحمة الله

 

أخواتى ,,

عايزة أنضف البوتاجاز كويس جداً جداً

ومش عارفة إزاى ؟

 

بالنسبة للنضافة العادية عادى كنت بغسله كل مرة وأنا بغسل المواعين من فوق كدة وتنضيف سطحى مش بدعك أوى ولا حاجة

ومؤخراً بقيت أغطيه بورق فويل فحفظه شوية برضه من البهدلة

وهو مش قديم أوى .. لسة جايبينه من أقل من سنة

 

دلوقتى أنا عايزاكم تقولوا لى ازاى أنصفه تنضيفة كويسة جداً يعنى علمونى ازاى ؟

وأستخدم منظفات ايه ؟

وإزاى أرجع العيون بتاعته بيضا بعد ما اسودت ؟

وإزاى أنضف الفرن اللى ما كونتش أعرف أصلا انها بتتنضف :unsure: غير لما نور النهار قالت فى موضوعها جزاها الله خيراً

 

 

وإزاى أصون الإزاز بتاع غطا البوتاجاز عشان ما يتراكمش عليه دهون ؟ أغطيه بالفويل زى البوتاجاز ولا إيه ؟

 

 

وبعد إذنكم كمان نفسى أنضف الشفاط كمان

اللى هو الشفاط اللى بيبقى فوق البوتاجاز ( ماعرفش اسمه ايه النوع ده )

 

جزاكن الله خيراً

أنتظر مساعدتكن أخواتى

علماً بإن نظافة البوتوجاز والمطبخ ككل متوقفة على ردودكم :biggrin:

تم تعديل 4 مايو, 2010 بواسطة بُشرة خير

[موده واخاء 417]

بصى حبيبتى انا بجيب سلك مواعين واجيب جاز هتتخضى جاااااااز هقولك السلكة هتجرى فى الدهون سواء شفاط بوتاجاز زجاج البوتاجاز اى حاجة حتى السيراميك الجاز تحفففففففففففففففففففففففففففففففففففة وبيلمع الاشياء جدا وهتلاقى شفاطك فلة وبوتاجازك مش هتتعبى خااااااااالص وهتلمعيه احلى تلميعه ياقمر يللا ورينا وطمنينا

 

وعيون البوتاجاز اغليها فى ميه بخل بعد نقعها اربع ساعات بمية سخنة وخل

 

 

وطمنينى

[بُشرة خير 3]

حبيبتى أم عبد الله

ربنا يباركلك

هتكسبى في ثواب كبير عشان لو نضفت المطبخ كويس ماما هتتبسط منى أوى :lol:

 

ماعنديش مشكلة فى استخدام الجاز والله لو هو اللى هينضف البوتاجاز كويس

بس الرائحة ما أخبارها ؟ :ohmy:

هسيب المطبخ فى الاخر ريحته جاااااااز

 

طيب ماحدش يعرف ازاى أفك الشفاط عشان أنضفه ؟

 

كمان ماحدش قاللى حجة عن الفرن ؟

 

جزاكى الله خيراً يا أم عبد الله وهروح أنقعهم فى ميا وخل ... أحط كمية خل أد إيه كدة ؟

تم تعديل 4 مايو, 2010 بواسطة بُشرة خير

[فدوى المسلمي 531]

السلام عليكم ورحمة الله وبركاته،،

أهلا حبيبتي بشرة خير

بصي حبيبتي شفاط المطبخ

 

 

الدائرة في المنتصف هي القفل لفك وتركيب الشفاط

مرسوم عليها أسهم سهم لاتجاه الفتح وسهم لاتجاه الاغلاق

لفي مع اتجاه السهم

ولما تنفك هتشيلي الريش بسهولة لبره

 

وفي نوع آخر به زرار عند الضغط عليه تطلع الريش بسهولة

 

القطعة الزرقاء اللي تحت مكتوب عليهاoil pack

دي بترفعيها تجاهك بالراحة وبعدها تقدري تنزعي جسم الشفاط الأبيض بالكامل ولما تيجي تركبيه تاني بيركب بالضغط

يعني تضعي الجسم مكانه وتضغطي الأطراف هيركب تاني

تم تعديل 4 مايو, 2010 بواسطة جهاد و كفى

[محبة لربها، ادعوا لي بالثبات 72]

اولا امسكى سكينه ازيلى بها الشحم من الزوايا والاماكن الضيقه ثم السلك الاستانلس بصابون سائل ثم السلك الالومنيوم الناعم بصابون سائل

 

واذا كانت العمليه صعبه فانصحك بجيف jef بيقضي على الدهون ويسهل الجلى والتلميع جداااااااااا هتدعيلى

 

طبعا العيون والشفاط بالجاز كما قالت لك ام بيدو الله يحفظها

[موده واخاء 417]

الجاز ريحته بتطير فى نفس اليوم

 

فى زرار فى جنب مروحة الشفاط دوسى عليها هيطلع

[بُشرة خير 3]

وعليكم السلام ورحمة الله وبركاته

 

جزاكى الله خيرااااااااا جهاد وكفى

بس أنا آسفة أوى انى تعبتك ع الفاضى عشان مش هو ده الشفاط بتاعنا

الشفاط بتاعنا اللى هو بيكون فوق البوتاجاز وعريض كد زى البوتاجاز يارب ألاقى له صورة عشان مش عارفة أوصفهولكم

هو مش شفاط فى الحيطة

لأ هو شفاط متركب فى المطبخ بيكون فوق البوتاجاز

 

 

جزاكى الله خيراااا محبة لربها

هجيب المنظف ده ان شاء الله وهدعيلك ان شاء الله :rolleyes:

بس انا بستخدم السلك الالومنيوم بس .... ايه فايدة الاستانلس ؟

 

 

جزاكى الله خيراً يا أم عبد الله

حاضر حبيبتى

[بُشرة خير 3]

أهو يا بنات الشفاط بتاعنا شبه ده

 

[**حنين للجنة** 16]

ما شاء الله الاخوات كفوا ووفوا

انا الشفاط بتاعى ززى بتاعك بس بصراحة ما بفكوش لانى ماعتقدش انه بيتفك اصلا هو من برة بس بيتنضف بتشيلى الدهون زى ما الاخوات قالولك انا مابستخدمش جاز ممكن جيف او مستر ماسكل كويس جداااااااااااااااااااا

[محبة لربها، ادعوا لي بالثبات 72]

وعليكم السلام ورحمة الله وبركاته

 

جزاكى الله خيرااااااااا جهاد وكفى

بس أنا آسفة أوى انى تعبتك ع الفاضى عشان مش هو ده الشفاط بتاعنا

الشفاط بتاعنا اللى هو بيكون فوق البوتاجاز وعريض كد زى البوتاجاز يارب ألاقى له صورة عشان مش عارفة أوصفهولكم

هو مش شفاط فى الحيطة

لأ هو شفاط متركب فى المطبخ بيكون فوق البوتاجاز

 

 

جزاكى الله خيراااا محبة لربها

هجيب المنظف ده ان شاء الله وهدعيلك ان شاء الله :closedeyes:

بس انا بستخدم السلك الالومنيوم بس .... ايه فايدة الاستانلس ؟

 

 

جزاكى الله خيراً يا أم عبد الله

حاضر حبيبتى

 

 

الاستانلس الاول هيشيل اسرع بيشيل الكُتَل المستعصيه وقبل الاستانلس ملعقه للحك

 

يعنى الملعقه ثم الاستانلس ثم الالومنيوم ودوره فى اخر مرحله بييجى للتلميع فقط والباقى للنظافه

تم تعديل 4 مايو, 2010 بواسطة محبة لربها.ادعولى بالثبات

[بُشرة خير 3]

جزاكن الله خيراً

جزاكى الله خيراً أم محمد حسان

 

لكن مالقتش المنظف جيف يا محبة : (

اشتريت الحاجات وهبدأ وأقولكم النتيجة لما أخلص ن شاء الله

ربنا يكرمكم

[مُريدة القرآن 0]

مستنياكى لما تطبقى وراكى

[بُشرة خير 3]

نظفته الحمد لله رب العالمين

تنضيف على أدى بس مش مشكلة أهى أول مرة وان شاء الله مش ههمله تانى عشان يفضل نضيف وعشان ما يتبعنيش كدة تانى

وان شاء الله المرات الجاية ينضف أحسن

 

جزاكن الله خيراااااااااا بجد يا أخوات

نصائحكن نفعتنى كتيررررررر

والجاز طلع روعةةةةةة فعلا فيما عدا انى اتبهدلت ويحتى وهيدومى كلها جاز وبهدلت المطبخ كله جاز

والسلك الاستانلس كمان طلع روعةةةةة

 

ربنا يبارك فيكم ويسعدكم يااارب

[محبة لربها، ادعوا لي بالثبات 72]

منظف جيف يا قمورة يا قمر انت

هتلاقيه فى السوبر ماركت الكبيرة مثل كارفور والمحمل واولاد رجب والخ......

[بُشرة خير 3]

والله يا محبة كنت فى أولاد رجب

وفضلت ألف على المنظفات كلها رايحة جاية رايحة جاية وكل ده وأنا شاكة فى نفسى أنى انا اللى مش عارفة أدور

وفى الآخر ناديت الموظف المسئول وسألته وبرضه مالقهوش

معلش ان شاء الله المرة الجاية أجيبه

جزاكى الله خيرااا يا محبة

[محبة لربها، ادعوا لي بالثبات 72]

ركزى ف كارفور والمحمل انا واثقة منهما

 

طمنينى لما تلاقيه

[أم ربعي 21]

مكن تستخدمى بخاخ الكلور المركز

بيخلى البوتوجاز اكنه لسه طالع من الكرتونة والله

انا غسلت بتاعى كده

كل اللى شافه قالى انتى جبتى واحد جديد ولا ايه

رشي الكلور على كل حته فيها دهون

انتظرى خمس دقائق

وابداى ادعكي بالسلكة الاستانلس وبعدين السلك الالومنيوم

وهتستغربي هود ه بتوجازك ولا واحد تانى

بيلمع ويبرق

وزجاج الفرن

هتلاقيه مراية تشوفي نفسك فيها

[بُشرة خير 3]

جزاكى الله خيرا يا أم ربعى

ما اسمه هذا الكلور المركز ؟ أو من أين أشتريه ؟

 

جزاكى الله خيراً يا محبة

فعلا أختى قالتلى انه موجود عندها فى المحمل بجوارها

[يسرا عبد الرحمن 718]

للرفع

حتى يستفدن منه الاخوات

جزاك الله كل خير بشوره

اسال الله ان يتم زواجك على خير ويجعله زوجا صالحا لكى فى الدارين

[بُشرة خير 3]

يسورة انتى اللى جزاكى الله خيراً

مش راضية عن نضافة شقتى ومطبخى وكسلانة اقوم أنضف فقلت أدخل الساحة هنا أتشجع لقيت موضوعى القديم ده هههههه

قلت طب ما أنا كنت نشيطة وحلوة أهو إيه اللى حصل هههههههه

 

إن شاء الله أقوم اعمل حتى المطبخ بس

[حبيبة87 3]

والله يا حبيبتى انا كمان مش المطبخ بس دى الشقة كلها عايزة ازالة

 

لكن الكسل ربنا يعافينا منه

 

[ام زينة و ميسان 13]

موضوع جميل و الله يا بنات و الأخوات نصائحهن حقا مفيدة بالنسبة لي لا استغنى عن السلك الإستانلس فعلا و البوناجاز عمتا للتنظيف اليومي نكب عليه مياه ساخنة و كلور و فيبا و سيبيه شويه و بعدين من غير دعك هتلاقي الدهون ذابت و الجامده إدعكيها بالسلك قبل مسح المياه

طريقه مش بتاخد وقت خالص و سهله

أما العيون ففعلا زي ما قالت الأخت أم بيدو تتنقع في مياه و خل ثم تغلى و الزجاج الخاص بالفرن ممكن إستخدام الكلور بقطعة قماش للتلميع فقط أما إذا كان به دهون متراكمة فلابد من دعكها أولا بالسلك ثم شطفها بماء دافئ ثم جليها بالكلور والقماشة

و الله أختي أنا كنت لسه هأبدأ أنظف اليوم علشان عندي عزومة الجمعة القادمة فنزلت الستائر أغسلها و أكويها اليوم و الله المستعان التراب اللي فات ده قضى على الشقة فقلت حاجه حاجه علشان الجيوب الأنفيه بقى لو عاوزين تبدأوا معايا يا بنات و نشجع بعض كل يوم مفيش مانع فعلا يكون أحسن :):)

[سجدة55 18]

بصي يا غالية مستر ماسل رائع و لو لقيتي البخاخ يبقى افضل رشيه و خليه شوية و بعدين نظفي هيبقى زي الفل ان شاء الله

[سجدة55 18]

بالنسبة للعيون في وحدة قالتلي جربي ورق السنفرة لكن الصراحة لسه ما جربتهاش بس باستعمل مستر ماصل و سلك مواعين خشن و بعدين ناعم بس بينضف و يبقى زي الفل