اذهبي الى المحتوى
لؤلؤة الجنان

حملة العناية بك يا أحلى أنثى .. الجمال قوة والابتسامة سيفها♥ ♥ حملة مع

المشاركات التي تم ترشيحها

السلام عليكــم ورحمـة الله وبركاتــة ،،

 

كيف حالكن أخواتي الحبيبات اشقت إليكن كثيرا في غترة غيابي عنكن التي ربما لم يشعر بها أحد ولكني أحبكن جميعا في الله وأسأل الله العلي العظيم أن يظلنا في ظله يوم لا ظل إلا ظله

 

وجدت هذا الموضوع الرائع ووجدت فيه الكثير من الفوائد على منتدى فتكات للنساء وكاتبته د / بكره احلي من النهاردة فقررت نقله إليكن سائلة المولى أن ينفعكن به سأبدأ بنقل مشاركاتها

 

أحبكن في الله

 

دمتن في حفظ الرحمن

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

 

قمرات كل أخوات طريق الإسلام اكبر المنتديات النسائية كلها ان شاء الله

و زائرات و عضوات قسم الجمال الطبيعي قسم العناية بالبشرة

اهلا وسهلا بيكم معانا دايما كل وقت واي وقت ان شاء الله وتستفيدوا معانا

 

 

 

النهاردة بامر الله رب العالمين هقدم لكم موضوع باذن الله عاوزين نفيد بيه اكبر قدر ممكن من العضوات

الا وهي حملة

 

الجمال قوة الابتسامة سيفها

 

 

هدف الحملة:

 

باختصار هدف الحملة هو اننا نحس بجمالنا كل انثي تحس بجمالها الداخلي والخارجي

يعني بامر الله هنتعلم من الصفر ازاي نهتم بجمالنا الخارجي يعني بشرتنا وشعرنا وجسمنا وانوثتنا بمعني ادق.

وفي نفس الوقت نحاول ناخد بالنا كمان من جمالنا الداخلي ونحافظ علي بسمتنا و كل حاجة حلوة فينا.

 

 

 

المشتركات في الحملة:

الحملة ان شاء الله موجهة للجميع بس بشكل خاص ومباشر الحملة انا بحب تكون موجهة للسيدات المتزوجات وبس.

عشان نقدر نفيدهم بشكل مكثف ونغير حياتهم و نجدد الروتين اللي الازواج بيشتكوا منه قبل ما يهربوا ويطفشوا.مخنوق

 

 

 

برنامج الحملة:

 

ان شاء الله اسبوعيا علي الاقل هيكون فيه محاضرة (يمكن يكون في اسبوع محاضرتين او موضوعين جداد في الحملة هنزلهم لكم بامر الله بس علي الاقل هيكون فيه محاضرة واحدة علي حسب ظروف شغلي ان شاء الله ادعوا لي)

المحاضرات هتبدا من مستوي الصفر يعني هنبدا من اول السلم في العناية بنفسنا من الاول خالص مالص ما تقلقوش مش عاوزين حجج.

ان شاء الله اوعدك انك لما هتدخلي معانا من البداية وتتابعي باخلاص وتطلعي خبيرة ان شاء الله والناس هتيجي تتعلم منك.

محاضراتنا هتتكلم عن كل حاجة تتخيليها ان شاء الله تهتم وتصقل جمالك كانثي و بامر الله هحاول اجمع لكم فيها مادة مفيدة جدا و حصريه اكيد ومن مصادر متعددة.

وبامر الله هننزل برامج مختلفة للعناية بالبشرة والجسم و نلتزم بيها ونشوف النتيجة.

وفي يوم في الاسبوع هيكون مخصص للاستفسارات والاسئلة من العضوات وهيتم التنويه عنه قبلها بيوم.

وهيتم تجميع المحاضرات وملخص الاسئلة هنا في موضوع الحملة عشان ما تتوهوش بين المشاركات

 

 

ملحوظة مهمة:

انا بريئة من استعمال اي حاجة هنتعلمها او نتكلم فيها في غير ما يرضي الله تعالي الهدف من البداية واضح واتمني الالتزام به.بريئة يا بيه

 

تم تعديل بواسطة لؤلؤة الجنان

شارك هذه المشاركه


رابط المشاركه
شارك

 

المحاضرة الاولي:

يعني ايه انثي؟ وليه المفروض تهتم بنفسها؟

 

 

* معني كلمة انثي:

 

تعريف كلمة الانثي معقد جدا ولكل شخص فينا تعريف منفصل لكلمة الانثي

يعني ممكن نلاقي حد يقول ان الانثي معناها الكائن الرقيق مرهف الحس.

حد تاني يقول الانثي هي الكائن الجميل اللي بتنظر له في اي وقت يسرك.

راي تالت يقول الانثي هي المخلوق الرومانسي اللي بيخلي للحياة لون وطعم وشكل تاني خالص والنظرة لها تشبع.

راي اخير بيعتقد ان الانثي تعريف لكل معني حلو ورقيق ومبهج في الحياة وانا مع الراي ده قلبا وقالبا يعني انتي انثي يبقي لازم تبقي كل معني حلو في الحياة.

التدين والتراحم والحب والحنان والجمال والامان والخصوبة والرقة والرومانسية كل حاجة حلوة تبقي هي الانثي.

و لازم نقول كمان ان الانثي مش شكل وبس

لا الانثي شكل ومضمون كمان و توازن بين الاتنين وكل ده في اعتدال من غير ما تميل ناحية اتجاه علي اتجاه.

 

 

 

* ليه الانثي لازم تهتم بنفسها؟

 

 

 

بناء علي التعريف اللي قدمناه فوق بان الانثي هي كل حاجة حلوة في الحياة فلازم كل حاجة حلوة في الحياة تبقي بيرفكت مفيهاش غلطة وماتديش لزوجها ان عينه تقع علي غلطة فيها لازم كل ما عينه تقع عليها يشوف كل حاجة حلوة

(الكمال طبعا اولا واخيرا لله تعالي وحده بس انا بتكلم عن طبيعة البشر و متطلبات البشر)

والانثي لازم تهتم بنفسها عشان نفسها كمان لانها كل ماكانت جميلة ورشيقة و مميزة كل ما بتزيد ثقة في نفسها (بدون كبر والا غرور طبعا لو سمحتوا )

 

و لو مش مقتنعة بكلامي وشايفة ان الاهتمام بنفسك ده عبء عليكي انا هحاول اقنعك ان شاء الله في النقط اللي جاية:

 

* تعالي معاي كده اقري علي سبيل المثال لا الحصر افضل الخلق سيدنا محمد عليه افضل الصلوات واتم التسليم قال ايه في اهمية اهتمام الانثي بنفسها وبنضافتها؟

 

ففي صحيح مسلم عن أبي مالك الأشعري أن النبي -صلى الله عليه وسلم- قال: " الطهـور شطر الإيمــان "

والطهور -بضم الطاء- هو الطهارة، والطهارة في الإسلام تشمل الطهارة المعنوية من رجس الكفر والمعصية والرذيلة، كما تشمل الطهارة الحسية، وهي تعني: النظافة، وهي شرط لصحة الصلاة، سواء كانت الطهارة من الحدث بالوضوء والغسل، أم من الخبث؛ بالتنظيف المناسب، وهي طهارة الثوب والبدن والمكان.

 

وفي الحديث الصحيح: " لا يقبل الله صلاة بغير طُهور " (رواه مسلم، وابن ماجه عن ابن عمر، وابن ماجه عن أنس وأبي بكرة، وأبو داود، والنسائي، وابن ماجه عن والد أبي المليح).

وقد أثنى القرآن الكريم على أهل قباء لحرصهم على التطهر وحبهم له، فقال تعالى: (لمسجد أسس على التقوى من أول يوم أحق أن تقوم فيه فيه رجال يحبون أن يتطهروا والله يحب المتطهرين) (التوبة: 108).

 

وقال تعالى في سياق التطهـر بعـد الحيض: (إن الله يحب التوابين ويحب المتطهرين) (البقرة: 222).

 

ومن درس السنة النبوية وجد فيها حشدًا من الأحاديث الصحاح والحسان، تحث على النظافة في كل المستويات: نظافة الإنسان، ونظافة البيت، ونظافة الطريق.

وفي نظافة الإنسان أمرت بغسل يوم الجمعة، حتى عُبر عنه في بعض الأحاديث بلفظة واجب: " غسل يوم الجمعة واجب على كل محتلم" (رواه مالك، وأحمد، وأبو داود، والنسائي، وابن ماجه عن أبي سعيد).

وفي حديث آخر: "حق لله على كل مسلم في كل سبعة أيام: يوم يغسل فيه رأسه وجسده " (متفق عليه عن أبي هريرة).

ويتأكد ذلك إذا وجدت أسبابه من العرق والوسخ ونحوه، حتى لا يكون مصدر إيذاء لمن يخالطه.

 

وأكدت السنة وشددت على أجـزاء معينة من الجسـم تحتاج إلى عناية خاصة مثل الفـم، والأسنان، ومن ثم كان الأمر بالسواك وتأكيد استحبابه، وقال فيه -عليه الصلاة والسـلام-: "لولا أن أشق على أمتي لأمرتهم بالسواك عند كل صلاة " (رواه مالك، وأحمد، والشيخان، والترمذي، وابن ماجه عن أبي هريرة وأحمد، وأبو داود، والنسائي عن زيد بن خال الجهنمي). أي أمر إيجاب وإلزام.

 

ومش الانثي بس ده الاسلام اهتم بنضافة المسلم بشكل عام

 

 

* الجزئيةالتانية انا هستعين بها في حاجة من الذاكرة عندي كنت قريتها من كام سنة في جريدة الاهرام من رسايل القراء اللي كانت بترسل للاستاذ عبد الوهاب مطاوع رحمه الله في بريد الجمعة ولما قريت الرسالة ديه اتاثرت بيها قوي و حفظتها في دماغي

 

كان في الرسالة زوج بيشتكي من زوجته واهمالها لنفسها وله و عاوز يلاقي تصرف مناسب معاها لانه مش عاوز يجرح شعورها ويلفت نظرها بشكل مباشر

وذكر انه متضايق من ايه بقي في زوجته (اكتبي وسجلي عندك لو سمحتي وشوفي احنا بنعمل كام حاجة من دول واعرفي ازواجنا مستحملينا قد ايه)

 

زوجته وزنها زادعلي الاقل عشرين كيلو جرام من يوم الزواج - مش بتاخد حمام الا مرتين اسبوعيا بس واحيانا لغسل الجنابة فقط مش للنضافة الشخصية - زوجته ممكن تقعد يومين بنفس الملابس بدون تغييرها - بتنام بملابس شغل البيت - نادرا ما بتقعد تتكلم معاه - من سنين ماشافش شعرها سايب - من سنين ما حطتش مساحيق تجميل علي وجهها - الروايح والمعطرات قلما بتستعملها مع انه بيشتري لها كتير جدا رغبة منه في انها تستعملها مخنوقة

 

شفتوا الكلام الجميل بقي

 

مش يمكن ازواجنا شايفين مننا احنا كمان حاجات كتيرة مش عجباهم ومش عاوزين يجرحوا شعورنا؟

طيب هو لو انا بحب زوجي بجد هبقي حريصة انه ما يشوفش في الدنيا حد حلو غيري صح والا لا؟مش لازم استني انه يقولي خدي بالك من كذا انتبهي لكذا

لازم اكون انا بالنسبة له اجمل انثي في كل الدنيا حتي لو انا مش اجمل انثي

بس الانثي الجميلة هي الانثي اللي عارفة ازاي تعتني بجمالها وكمان تبرز وتظهر لزوجها كل الحلو فيها واهم من كل تتحلي بثقة نفسها

يعني هندور علي الحلو فينا ونبرزه و نحاول نغير اللي مش حلو فينا ان شاء الله.

ما تفكريش ان النجمات اللي في التلفزيونات والراديوهات و البنات والسيدات القمرات اللي بتشوفيهم دول اجمل منك

دول يمكن اجسامهم مش حلوة زيك والا شعرهم حلو زيك والا طبعهم حلو زيك.

يبقي لازم تاخدي بالك بقي والا لا؟وتنتبهي كده علي الاخر وتلمعي نفسك علي الاخر

وعاوزة افكرك بحاجة مهمة

كفاية انك انثي مصونة زي الجوهرة المكنونة كده مش بتاعتة اي حد يتفرج عليكي ويقول ديه حلوة لا ديه وحشة جسمها ابيض لا اسمر لون جسمها موحد لا مش موحد.

انتي بتاعتة حد واحد وبس هو زوجك حلالك بشرع الله.

و انتي اكيد اسعد منهم بكتير جدا

 

وافتكرت لكم دلوقت حاجة كده تثبت لكم كلامي (زمانكم بتقولوا عني رغاية معلش انا عارفة)

الغرض من المثال اللي هضربه ده مش التشبيه او السخرية لا قدر الله ربنا يصلح حال الجميع و ايانا بس الغرض احسسك بالسعادة اللي بين ايديكي وانتي مش واخدة بالك

 

من كام سنة كده يجي 10 والا 15 كانوا جايبين الممثلة المشهورة اللي الناس كلهم بيحبوها وبيعجبوا بيها ليلي علوي في برنامج ما من اللي كان الواحد بيتفرج عليها ايام الشباب والرياضةمخنوقة

والمذيعة بتسالها في اخر اللقاء نفسك في ايه السنة الجاية

عارفين قالت ايه؟

قالت اتجوز رجل محترم ويكون عندي بيت واولاد

 

القلب ده بعيد

شفتي بقي انتي احسن من الناس ديه ازاي؟ علي الاقل عندك بيت واسرة واستقرار

يبقي نحافظ علي نفسنا حلوين وقمرات في عيون ازواجنا والا نطنش ونكبر دماغنا؟ ونعامل ازواجنا علي انهم اخواتنا مننا وعلينا بقيزعلانة و باعيط

قدامهم نلبس اي حاجة و ناكل كل حاجة و نبان باي مظهر ينفع يعني؟

 

بريئة يا بيه

 

 

* واجب المحاضرة الاولي :

 

الواجب ده مش هفتش عليه والا هسالكم فيه لانه حاجة شخصية بس ماتتعودش علي كده لازم تعلموا الواجب وتلتزموا

 

لو سمحتي هتجيبي اجندة اوكراسة صغيرة وقلم وتسطريها وتكتبي الاتي:

 

1- حصر تام لكل المشاكل اللي انتي شايفاها في جسمك او بشرتك او في شعرك ( هتخبي الاجندة ديه طبعا محدش غيرك هيشوفها مش المفروض نوري الراجل عيوبنا ونقوله تعالي شوف انا في وفي وفي).

2- مشغوليات بيتك وشغلك يوميا كام ساعة ومطلوب منك تعملي ايه امته وبيبدا امته ويخلص امته.

3- اوقات تواجد زوجك في البيت (لاننا طبعا مش هنهتم بنفسنا وهو موجود عاوزينه يشوف النتيجة بس).

4- افتحي ادراجك و دولايبك وطلعي كل اللي عندك كريمات و زيوت و معطرات وبرفانات واكتبيها كلها اعملي لها حصر وارمي القديم كله اللي مالوش لزمة او صلاحيته خلصت وطلعي الجديد او اللي لسه صالح للاستعمال وحطيه في مكان ظاهر قدامك.

5- امكانياتك واستعدادتك المادية قد ايه شهريا او اسبوعيا انك تجيبي حاجات ومستحضرات نقصاكي لنفسك ولعنايتك

 

 

انتهت المحاضرة الاولي ومحتواها حصري تماما غير منقول ولا ابيح النقل بغير ذكر المصدر

ذاكروها كويس واعملوا الواجب اللي قلته و استنوا المحاضرة التانية

وهستني رايكم بصراحة في اول محاضرة

تم تعديل بواسطة لؤلؤة الجنان

شارك هذه المشاركه


رابط المشاركه
شارك

المحاضرة الثالثة: برنامج الاسبوع الاول:

 

في الاسبوع الاول اللي احنا فيه ده وهنقول هيبدا من اليوم لمدة اسبوع بامر الله ان كان لنا عمر

انا مش عاوزة اتقل عليكم وصفات وماسكات وحوارات كبيرة لاني عارفة انكم هتزهقوا وتملوا بسرعة ساعتها.

ومش هطلب نشتري حاجات كمان كل حاجتنا من البيت وبنفس نظامك لاني عارفة الموضوع جه فجاة وكلنا في اخر الشهر (ألا اللي معاهم فلوس تحت البلاطة بقي)

 

انا قصدي بس اننا في اول اسبوع بامر الله اننا نوصل لنقطة ان يبقي عند كل واحدة برنامج يومي ولو بسيط نسبيا تلتزمي بيه يوميا وتشوفي تاثيره في نفسك هيظهر ازاي بامر الله ومشيئته

وبالتالي لما ننزل بشغل مكثف شوية يبقي اخدتي جرعة حماس كفاية تخليكي تلتزمي بيه من غير زهق و الا كسل والله المستعان اولا واخيرا.

 

 

 

برنامج العبادات:

 

1- الالتزام التام بالصلوات الخمسة في اوقاتها وخاصة صلاة الفجر و العصر ولو قدرنا علي النوافل يبقي فضل و نعمة من الله سبحانه وتعالي وبعد كل صلاة ياريت لو نفتح كتاب الله ونقرا ولو ربع حزب في كل مرة

(انا عارفة ان فيه ناس ماشاء الله عليهم ملتزمات بالفروض والنوافل والتلاوة ولكن الكلام موجه بشكل خاص للمقصرين احيانا).

 

2- أذكار الصباح والمساء الالتزام بكل ماجاء فيها قدر الامكان.

 

3- استغفار الله عزل وجل طول مانتي واقفة في المطبخ او بتعملي اي شغلانة طول وقت فراغك بمعني اصح استغفري في سرك كل ما تلاقي فرصة استغفري كتير تربحي كتير ان شاء الله.

 

4- الصلاة علي رسول الله عليه افضل الصلاة والسلام علي الاقل عشر مرات غير المفروضة في الاذكار.

 

5- نمسك اللسان اللي هيودينا في داهية ده وبلاش نم و لوك لوك في سيرة الناس وفي اي كلام فاضي نقفل بقنا لو الكلام مالوش لزمة قدر المستطاع نعود نفسنا علي كده بلاش خدمة حوللي شكرا يعني نغلط في الناس ونجيب سيرتهم ونحول لهم من حسناتنا.

 

6- الزكاة باي شيء مهما كان بسيط ولو بدقيقة موبايل.

 

7- بر الوالدين (اهلك واهل زوجك علي حد سواء) وطبعا ده من غير ما اقوله.

 

برنامج معاملة الزوج (ان وجد)

 

 

1- البشاشة

 

يعني كل ما يشوفك تضحكي في وشه مش تضحكي بهبل او باستخفاف لا تبتسمي بسمة كده تديه تفاول تحسسه بالانوثة

حاجة زي كده

 

 

2- الصوت المنخفض

 

اكتر حاجة بتضايق اي رجل في زوجته هو الصوت العالي والجعير اسمحوا لي في اللفظ (اانا اسفة علي اللفظ بس متعمدة اكتبه)

مهما العيال يزهقوكي ويقرفوكي

زعقي فيهم وعنفيهم من غير صوت عالي يسمعه الجيران ويخلي زوجك يتضايق منك

لان الصوت العالي رمز من رموز الرجولة لما تزعقي انتي بقي هو بيحس ان فيكي ملمح من الخشونة بالتالي بيتضايق وانوثتك ورقتك تنقص عنده.

وافتكري ان زميلاته في الشغل ما بيزعقوش والا بيعلوا صوتهم والبنات الحلوين في الشارع ما بيعلوش صوتهم برضه بيتكلموا صيو صيو زي العصافير.

 

3- الاستقبال الحلو

 

اول ما يجي من الشغل ولو انتي لسه داخلة قبله بثانية واحدة من شغلك معلش

تنادي عليه انت جيت يا...حمد الله علي السلامة ياحبيبي ثواني وجاية لك

و تروحي له في ايدك اي حاجة حلوة ولو كباية عصير فراولية شوكلاته طوفي كباية لبن اي حاجة حلوة تعوضه مر الشغل والشقا طول اليوم.

ولو بيتجوا مع بعض اسبقيه ادخلي مطبخك وهاتي له حاجة من دول

صدقيني ديه مفعولها مفعول السحر علي قلبه

وتدي له هدومه اللي اكيد نضيفة ومترتبة وتساعديه لو انتي معوداه علي كده.

 

ومازال للحديث بقية كتيرة قوي بس نلتزم بدول بس واللي بتعمل كده تخليها علي كده و تزود جرعة الحنان شوية.

 

 

برنامج التغذية

 

1- التقليل من النشويات اللي بتاكليها تدريجيا.

يعمي نصغر حجم الطبق اللي بناكل في الرز او المكرونة ونقلل العيش.

 

2- ممنوع الحلويات او المعجنات تماما الا حتتين صغيرين ومرة واحدة بس في يوم واحد في الاسبوع

(الاتنين دول اللي بيكبروا الموخرات خدوا بالكم منهم).

 

3-الشاي او القهوة او النسكافيه مرة واحدة بس في اليوم وباقي اليوم لو بتحبي الحاجات السخنة يبقي ينسون و نعناع وبابونج

لان الشاي و القهوة بيصبغوا الاسنان و بيتعبوا المعدة علي الفاضي اهتمي بشرب المواد المفيدة تنضف معدتك وبالتالي تنصف جسمك وتنقيه و تبقي اكيد احسن.

 

4- لو بتاخدي اكتر من معلقتين سكر في اليوم قللي تدريجيا ولو نص معلقة الاسبوع ده بس.

 

5- شرب الميه الكتير جدا.

 

6- علي الريق معلقة عسل ابيض وممنوع العسل الاسود لانه بيتخن جامد جدا وبيزود نسبة السكر في الدم وده عن تجربة.

 

 

برنامج الرياضة

 

1- شفط البطن وانتي واقفة علي الاقل خمس مرات في اليوم وكل مرة تعدي من واحد لعشرة وانتي شافطة بطنط وبعدين تسيبيها تشفطي وتسيبي وهكذا.

 

2- ترفعي ايدك الاتنين فوق راسك وبعدين ترميهم لورا تلات مرات ويتكرر في اليوم علي الاقل خمس مرات (لشد الصدر)

 

3- تسندي عالحيط وتتني ركبك وانتي شافطة بطنك وتنزلي وتطلعي مرتين وايدك في وسطك يتكرر خمس ست مرات.

 

التمارين سهلة الاسبوع ده وتتعمل وانتي في المطبخ مش محتاجة وقت والا حجج فارغة.

 

 

 

برنامج العناية بالجسم:

 

 

 

1- النوم بدري يعني بالكنير الساعة 12 ولو سيادتك سهيرة والا بتابعي برنامج ما روحي بصي لوشك في المراية

شوفي الهالات السواد واعرفي انها بتاكل انوثتك وانتي هتنامي تحلمي بيها.

ولو مش قادرة تنامي خشي خدي لك شاور واستغلي الطاقة السلبية ديه في نضافة جسمك النت والا التلفزيون مش هيطيروا انما جمالك و شبابك وانوثتك وقبل كل حاجة صلاة الفجر هما اللي هيطيروا.

 

2- هنحاول الشاور يكون يومي

مش عاوزة اقول مرتين مرة بعد ما نيجي من الشغل او الكلية و مرة قبل النوم

او مرة بعد ما نخلص الطبيخ وشغل البيت ومرة قبل النوم

لا هقولك مرة بس بعد ما نخلص شغل البيت لو ربة منزل

او بعد ما نرجع من الشغل لو عاملة او بتدرسي.

 

3- مرتين في الاسبوع بس شاور الصنفرة وباقي الاسبوع شاور عادي

الطريقة الاولي:

وهو بسيط مش عاوزة منك حاجة الاسبوع ده خدي معاكي الحمام سكر ابيض و شوية زيت زيتون واخلطيهم الاتنين ببعض كويس (كمية مثلا تلات معالق سكر علي اتنين زيت)

وافرديه علي جسمك كله من تحت لفوق وعلي ما تسرحي شعرك وتدلكي فروة راسك وتلبسي البونيه البلاستيك (غسيل الشعر مرتين اسبوعيا بس)

تفركي بالليفة المغربي او جوانتي التقشير او قطعة من قماش صوف قديم

القصد يعني اي ليفة تحكي بيها جسمك برفق.

وفي الاخر شطف بميه دافية وتجفيف بطريقة طبطبة عالجسم وترطيب باي حاجة ولو بكريم علي خفيف كده.

 

الطريقة التانية:

هنجيب نشا ونعجنه بالميه الدافية لحد ما يبقي قوام تقيل شوية وندهنه في كل الجسم زي ماسك و نخرج من الحمام ربع ساعة او تلت ساعة كده

و في الوقت ده جهزي شوية شاور جيل من اللي بتستعمليه او لو مش عندك شاور جيل هاتي ربع صابونة وابشريه و اغليه مع كباية ميه عاديه لمدة خمس دقايق اما الصابونة تسيح

وحطي فيه كمية سكر مساوية لكمية الشاور و خل وياريته يكون خل تفاح

يعني لو نص كباية شاور جيل حطي نص كباية سكر و معلقتين كبار خل تفاح

 

وادخي الحمام اغسلي خليط النشا من علي جسمك بنفس الطريقة بس مع استعمال الشاور والسكر مش هنفرد علي الجسم لا هناخد منه بالليفة وندعك بيه الجسم بشكل دائري برقة برضه مش بعنف.

و نشطف وننشف ونرطب.

 

4- كعوب الرجلين في اخر وضوء في اليوم ادعكي رجليكي بحجر الرجلين اي نوع الموجود عندك واعملي بين صوابع رجليكي وبالليفه اعملي تحت الضوافر و التنيات

و قبل النوم افركي بنص ليمونة كويس الكعب وبين الصوابع وبعدين نرطب باي كريم وندلك حلو اما يتشرب كويس جدا وتنامي.

 

5- المناطق الحساسة ديه موضوعها كبير معانا لسه

بس مبدئيا كل يوم قبل النوم هنمسح المنطقة كويس بالميه او لو عندك مطهر زي سيتيال او غيره خففي شوية منه وحطيه في زجاجة نضيفة و امسحي منه بقطنة المنطقة من قدام لورا

تلات مرات هنغير القطنة مرة للمنطقة الامامية

ومرة للخلفية

ومرة تانية للامامية وسوري التنيات الجلدية في المكان.

 

6- بالنسبة للشعر

يتغسل مرتين في الاسبوع بالشامبو و البلسم يستعمل مرة واحدة بس

و بنفس الانواع اللي انتي شغالة عليهم مش هغير لك حاجة

ويتسرح مرة الصبح ومرة بليل و ياريت اكيد لو المشط خشب

والصبح بدري تبللي ايديكي بميه دافية وتدلكي فروة الراس كويس جدا جدا زي ما تكوني بتهرشي.

والشعر يتلم او تسيبيه مع لبس سورتيت او توكة بسيطة كده.

يعني نظامك في الشعر زي ماهو بس ندلك و نسرح مرتين في اليوم.

 

7- بالنسبة لايدين

كل مرة ايدنا فيه هتلمس الميه سواء كان وضوء او شغل بيت او غسيل او اي شيء لازم هنرطب ايدينا باي حاجة ولو بسيطة كريم مثلا

وقبل النوم هنفرك الايدين ومكان العقل بقشرة ليمونة ونرطبهم كويسة ونخبطهم في بعض كويس (من الضهر) لحد ما الكريم يتشرب كويس جدا.

 

 

 

برنامج بشرة الوجه:

 

لكل انواع البشرة بشكل عام اللي عندها مستحضرات بالفعل

هتغسل وشها بغسولها او صابونتها عادي مرتين في اليوم وتسيب الرغوة شوية علي وشها وتدلك بيها علي خفيف وتشطف بالميه

تقفل المسام باي تونر (الا البشرة الدهنية وام مسام واسعة بلاش مية ورد)

ترطب باي كريم

تعمل اسكراب مرتين في الاسبوع

 

ماسكاتنا علي وش نضيف مغسول بميه دافية والشعر ملموم لورا والماسكات للوش والرقبة

 

 

اولا :البشرة الجافة:

 

مرة في اليوم هنمسح بلبن الوش كله باستعمال قطنة

وهناخد من تحت لفوق يعني من الدقن لفوق وهكذا ونسيبه دقايق ونشطفه

اللبن ما يكونش ساقع قوي عشان ما يبقاش شديد علي البشرة

 

ماسكات مرتين في الاسبوع

 

* ماسك تنظيف وتعذية من بياض البيض و معلقتين الزبادي مع نص معلقة عسل

 

* وماسك تاني للتنضيف وعلاج البهتان من معلقة خميرة فورية و نفس الكمية الدقيق والميه الدافية لحد ما يمسكوا كويس ونقطتين زيت زيتون او سمسم و يفضل انه يكون زيت سمسم.

 

 

والاسكراب

زيت زيتون وسكر

 

 

ثانيا: البشرة الدهنية و المختلطة

 

هنجهز تونيك البقدونس و النعناع

هنجيب بقدونس فريش ونقطعه ولتكن كمية كباية مليانة مثلا

هناخد تلت كباية نعناع

ونحطهم علي النار مع كبايتين مية ونسيبهم يغلوا لحد ما الميه تخضر تقريبا عشر دقايق و قبل ما نقفل هنزود نص كباية ميه

ونصفي ونشيل في التلاجة

وتلات مرات في اليوم نسمح منه وشنا ورقبتنا بقطنة ونسيبه دقايق ثم نشطفه

 

ماسكين اسبوعيا

 

* الاول: تلات معالق دقيق و تلات معالق عصير جزر ونص معلقة صغيرة جدا عصير ليمون (بلاش منه لو بشرة حساسة)

 

* الثاني: زبادي و عسل ابيض وترمس مطحون او رز مطحون وده بيتشال بطريقة الفرك وبعدين يتغسل بالميه

 

 

الاسكراب

سكر معلقتين يتعجن بمعلقة ميه.

 

ثالثا:البشرة العادية:

 

هنعمل تونيك من ميه سلق البطاطس مع شوية لبن وناخد منه برضه بقطنة وبنفس الطريقة

 

وماسكين اسبوعيا

 

* الاول زبادي بعسل وبشر قشرة ليمونة

 

* والتاني بطاطس مسلوقه مهرية مع عصير جزر ولبن بودرة

 

 

الاسكراب

زيت زيتون وسكر

 

 

رابعا البشرة الحساسة

 

تونيك التنضيف هو نفس تونيك البشرة الجافة وهو تونيك اللبن

 

الماسكات

 

* زبادي وبس

 

* و الجزر بالعسل واللبن

 

اللي هو نص جزرة مسلوقة و مهروسة مع معلقة عسل ومعلقة او نص معلقة لبن حسب الكمية

 

الاسكراب

معلقتين زبادي مع نص معلقة سكر يتفردوا علي الوش لحد ما الزبادي يتشرب ثم يتفركوا ويتشطفوا بميه دافية.

 

 

العيون

 

كله يعمل يوميا ماسكات من شرايح الخيار الساقع وتتساب لحد ما تفقد حرارتها علي العين

 

 

 

الشفايف

 

زبدة كاكاو يوميا مرتين تلاتة مش مهم

و تلات مرات في الاسبوع عسل يتساب علي الشفايف ربع ساعة بعدين يتفرك بفوطة قطن برفق

وقبل النوم ياريت ان وجد نفتح كبسولة فيتامين e علي الشفايف

وان لم يوجد كفاية زبدة الكاكاو

ممنوع الفازلين تماما

 

 

الرووس السودا

 

مرتين في الاسبوع

فوطة سخنة علي الانف او منطقة حرف الT

وبعدين نجرب طريقة بياض البيض

او لاصقات بيور

او الجيلاتين

او الفرك باستعمال البيكنج بودر

او اسكراب الطماطم المهروسة مع القرفة.

ولو ما نضفتش قوي هيجي لها دورها لسه اصبري عليها

اوعي تستعملي الابره لانها بتوسع المسام.

 

الفم:

 

غسيل الاسنان واللسان مرتين علي الاقل في اليوم وبعدين نستعمل السواك ان وجد

قبل النوم مضمضة

اول ما نصحي من النوم مضغ ورقتين نعناع.

 

 

 

واجب المحاضرة التالتة:

 

 

1- ارجو الالتزام باللي قلته انا بقالي ساعتين بكتب لكم عشان تنفذوا وتدعوا لي بلاش تخلوني اطلع الخرزانة والا الفلكة بدري كده.

 

2- تجميع قشر الليمون والبرتقال واليوسفي اللي هيستعمل في البيت لمدة يومين وحطيه في كيس في التلاجة.

 

3- نفتح درج المعالق و طلعي معلقتين كبار (معالق استنلس استيل عادية من اللي بناكل بيها) فاضيين والا عليهم حاجة والا فيهم حاجة

وحطيهم في الفريزر لحد ما اقولك هاتيهم.

 

4- توضيب الميزانية عشان علي الاسبوع الجاي هنشتري حاجات مهمة.

 

 

المحتوي حصري وطالع عيني فيه والله اعلم

لا ابيح النقل بدون ذكرالمصدر

 

وطبعا المصدر كما قلت منتدى فتكات لكاتبته د/بكرة أحلى من النهاردة

تم تعديل بواسطة لؤلؤة الجنان

شارك هذه المشاركه


رابط المشاركه
شارك
السلام عليكم ورحمة الله وبركاته،

أعجبني العنوان فجئت للمتابعة :)

 

وعليكم السلام ورحمة الله وبركاته

 

سعيدة بمتابعتك حبيبتي أمة الرحمن

 

جزى الله خيرا كاتبته

شارك هذه المشاركه


رابط المشاركه
شارك

المحاضرة الرابعة:علاج الانتفاخات تحت العين في أسبوع

 

♥.♥♥.♥♥.♥♥.♥♥.♥

 

ازيكم يابنات عاملين ايه؟وحشتوني من المحاضرة اللي فاتت

انا مبسوطة قوي من البنات اللي عملوا انجاز وابتدوا يلتزموا وعقبال الجميع ان شاء الله

 

 

النهاردة بامر الله هحاول اعلمك وبالصور ازاي نتخلص من الانتفاخات تحت العين بطريقة سهلة قوي وموجودة في كل بيت(أنا مش هنقل الصور لأنها لإمرأة مكشوفة الوجه والتطبيق سهل وبسيط باذن الله)

 

الصور حصرية وخاصة بي وبالمنتدي وبس وياريت محدش يلطشها من غير مايذكر المصدر

مش انا اللي في الصور علي فكرةيا سلام وانا مدارية لكم عنيها عشان ماحدش يعجب بيها و ينشر صورها واخد انا ذنوب.

 

 

الخطوات:

 

 

1- المعلقتين الاستنلس استيل اللي حطناهم في الفريزر واجب المحاضرة اللي فاتت.

هاتيهم وطلعيهم من الفريزر وسيبهم ثانية اتنين كده بره الفريزر.

 

2- اغسلي وشك كويس بميه دافية وتعالي.

 

3- اقفلي عينك وهاتي معلقة من المعلقتين وحطيها علي عينك زي الصورة بالظبط لحد ما تحسي ان عينك اخدت منها كل الحرارة اللي فيها.

 

 

4- وانتي عينك لسه مقفولة برضه اقعدي طلعي ونزلي في المعلقة بحيث تبقي زي الوصع في الصورة ديه و زي الصورة الاولي بالتبادل ورا بعض.

 

 

5- كرري للعين التانية نفس الكلام باستعمال المعلقة التاني.

 

6- في النهاية خالص اعملي المعلقة جنب العين اليمين والشمال بنفس الشكل اللي في الصورة.

 

7- كرري يوميا نفس العملية وياحبذا لو قبل النوم مباشرة.

 

الواجب:

1-جهزي لبكره ان شاء الله النشابة بتاعتة فرد العجين او السريع اي حاجة بنفرد بيها العجين وشكلها كده.

http://t0.gstatic.com/images?q=tbn:A...im-Jb1DwlGpdCg

 

2- وضبي ميزانيتك زي ماقلت لك عشان عاوزين حاجات مهمة خلال المحاضرتين الجايين.

 

3- النهاردة ان شاء الله اغسلي شعرك وماتحطيش عليه بعد الغسيل اي زيت او كريم او اي شيء نهائي الا ممكن سيرم للاطراف.

 

4- الالتزام بالبرنامج اليومي اللي قلت عليه قبل كده مع عمل اللي قلته في محاضرة اليوم كل يوم منواصل لمدة اسبوع

 

مع السلامة يابنات انتظروا المحاضرة اللي جاية بامر الله.

شارك هذه المشاركه


رابط المشاركه
شارك
16752077566271407.gif

المحاضرة الخامسة:: علي العيد ان شاء الله هتكوني بسيقان زي الملبن يالا جهزي الميني جيب

 

اخواتي القمرات ازيكم عاملين ايه وحشتوني قوي قوي من محاضرة امبارح

ازي حالكم وازي تطوراتكم ان شاء الله ابتدينا نشوف تغيير مش كده والا ايه؟

 

يالا يابنات محاضرة النهاردة ان شاء الله جديدة المحتوي جدا واتحدي في محتواها الحصري جدا في كل المنتديات العربية مش اي اي والا زي زي ده احنا في فتكات عم المنتديات كلهم

 

ازاي نخلي السيقان بيضاء وقشطة و زي الملبن كده ونلبس ميني جيبات ونظبط نفسنا

لا تقولوا لي سيلوليت والا شعر تحت الجلد والا الوان غامقة وفاتحة في السيقان والا كلام من ده خلاص ان شاء الله

 

لون الجلد

 

 

يالا يابنات جهزوا نفسكم

 

قشر الليمون اللي قلت لكم حوشوه وخزنوه في التلاجة هتجيبوه لو سمحتوا وتغلوه في الميه خمس دقايق ولما تيجوا تقفلوا علي الخليط زوده لكل نص كباية ميه ورد وبس هيتشال في زجاجة نضيفة في التلاجة.

الكمية هتكون لكل كباية مثلا مليانة قشر ليمون هنحط كباية ميه (يعني هتجيبي قشر الليمون بعد ما تعصريه وعبيه في الكباية قشرة فوق قشرة يعني الكباية ممكن تاخد ست قشرات فهمتوا قصدي).

ما تعملوش كمية كبيرة يعني افضل تعملي كل يوم بالكتير قوي كل يومين مثلا وشيليهم في التلاجة عشان الزيوت الطيارة في الليمون ما يروحش فايدتها.

وهتستعمليه يوميا مرتين لمدة اسبوع وبس تدهني بيه كل ساقك من فوق لحد تحت دهان خفيف مع مساج كده لحد ما جلدك يشربه ومش هيحتاج يتشطف والا يتمسح.

ومناسب لكل انواع البشرة.

والطريقة ديه علي فكرة اللي بتوحد لون الساق وتخليه ابيض و حلو كده.

الطريقة ديه مضمونة 10000% لاني مجرباها وواخدها من موقع ما بيعلم خبيرات تجميل اللي بيشتغلوا في ارقي الاماكن العالمية بالاف الدورات يعني مش اي حاجةفلوس فلوس.

وهنا الطريقة بالصور من العضوة ياكريم توبة وقلبي بيندم

جزاها الله خيرا

الليمون بالصو

 

السيوليت

 

 

وهو طبعا زي مانتم عارفين الجلد اللي بيكون متني و زيادات كده بتبوظ شكل الساق و بتخليها شكل قشور البرتقال علي الرجلين.

وهو مش بيظهر للمليانين بس علي فكرة ممكن تكون واحدة برضه جسمها مظبوط بس عندها سيلوليت ورجليها مش نازلة صبة واحدة كده لا مش عاجباني.

 

بصوا بقي هنعمل ايه عشان نقضي علي السيلوليت

ببساطة هنعمل تدليك استمري عليه علي طول يوميا وعلي الاقل نقدر نقول من هنا للعيد استمري عليه وشوفي الفرق من اول مرة بامر الله

 

ممكن تجيبي زيت مساج تعملي بيه (تقدري تستعملي جونسون بيبي اويل)

وممكن تستعملي كريم اي كريم

وممكن من غير اي حاجة خالص بس ده مش مفضل.

 

بصي الصورة المتحركة ديه بتعمل ازاي واعملي زيها في منطقة الفخد عندك

اضغطي بصباعين علي منطقة الفخد وافضلي اطلعي وانزلي علي الجناب لمدة علي الاقل خمس دقايق علي منطقة الفخد من اماكن تراكم السيوليت.

اتمني انكم فهمتوا قصدي والصورة ان شاء الله واضحة

13197165451515.gif

 

يالا بقي هاتي النشابة اللي قلت لك امبارح حضريها واعملي زي ما هقولك

بصي في الصورة ديه الاول

 

13197167103125.jpg

 

وانتي واقفة او قاعدة وفاردة رجليكي علي ترابيزة قدامك بس تكون مفرودة جدا

اعملي بالنشابه في الاتجاه اللي باين في الاسهم من فوق لتحت ومن تحت لفوق من قدام ومن ورا رجليكي.

ثم اركني النشابة واشتغلي بايدك

زي تدليك بايديكي بشكل دائري مع الضغط طبعا علي مناطق السليوليت.

و تيجي علي المنطقة المكلبظة اللي بتكون في ضهر الرجل كده وتضغطي عليها بايدك لحد ما تحسيها طريت شوية.

وفي الاخر خالص ضغط علي خفيف عشان تفكي العضلة بعد ما حركتي شوية تراكمات السليوليت.

تتكرر العملية ديه اي عدد من المرات كل يوم.

واتحدي بالقياس هاتي مازورة وقيسي اول مرة محيط رجلك قد ايه وبعد التدليك كام مرة هيكون محيطها قد ايه

عن تجربة شخصية هتشوفي الفرق من اول مرة.

 

الشعر تحت الجلد

 

ده امره سهل جدا ركزي معاي في الخطوات ديه:

1- قبل ازالة الشعر بتلات ايام متتالية (يعني لو هتعملي سويت والا واكس والا سيلك ابيل ليلة الوقفة قبل ليلة الوقفة بتلات ايام اعملي اللي هقوله ده)

هاتي كارباميد كريم لو عندك

زيت زيتون من المخصص للجسم لو موجود

جيل بيبي اويل مش الزيت الجيل اللي بيكون لزج اكتر

وادهني بيه بوفرة قوي في اماكن ظهور الشعر تحت الجلد عندك في الساق.

وياريتك لو تلفيهم بالبلاستيك الخاص بالسندوتشات Plastic Wrap

وتسيبيه لحد ما تحسي ان جلدك اتشربه كويس جدا وشربه قوي.

 

2- ادخلي الحمام بقي وانتي بتاخدي الشاور اليومي بتاعك هاتي شوية سكر افركي كويس في اماكن ظهور الشعر تحت الجلد كده شوية بشوية

وبعدين تفركي كويس نفس الاماكن بالحجر الابيض بتاع الرجلين مش الاسود.

 

3- لو عندك اسكراب خاص بالجسم ممكن تستعمليه بدال السكر وتعملي بعده برضه بالحجر.

4- اشطفي كويس جدا بالميه الدافية ونشفي ورطبي وخلاص علي كده.

5- يتكرر الموضوع تلات ايام ورا بعض.

6- بعد ازالة الشعر يتكرر الموضوع تاني يوم من ازالة الشعر لمدة يومين.

يعني لو هنعمل يوم الوقفة ازالة الشعر تاني يوم اللي هو اول يوم العيد هتكرري نفس الموضوع اللي فوق مرة

وتاني يوم العيد مرة تانية.

 

النتيجة بامر الله مذهلة وهستناكم تيجوا تقولوا لي.

هنكرر العملية ديه كل مرة نشيل فيها الشعر سواء مرة كل اسبوعين او مرة كل شهر.

 

الواجب:

 

 

1- جهزي نفسك لدرس الميك اب لانه مهم جدا ظبطي الميك اب بتاعك وطلعي القديم ارميه.

2- الميزانية باكد عليها يابنات وفري لك قرشين حلوين عشان نشتري طلباتنا.

3- استمري في تحويش قشر الليمون.

4- استمري في عمليه المعلقة عشان العين.

5- التزمي بالجدول الاسبوعي و زودي عليه محاضرة النهاردة لو عاوزة رجليكي تبقي ملبن.

 

6- جهزي لك حاجة زي كده تلبسيها عالعيد في البيت

 

Ips59076.jpg

 

محتوي المحاضرة حصري تماما و غير موجود في اي منتدي تاني وتحدي

لا ابيح النقل بدون ذكر المصدر(منتدى فتكات)

وغير مسئولة عن الاستعمال في غير الاغراض الشرعية

igmjyx7g2gup8ozims09.gif

شارك هذه المشاركه


رابط المشاركه
شارك

المحاضرة السادسة انواع الشعر المختلفة:

 

 

مش هضيع وقت بقي هندخل علي المحتوي علي طول

من كم يوم طلبت منكم تغسلوا شعركم وتسيبوه من غير اي دهان او غير

ده كان بغرض التعرف علي نوع الشعر

 

 

الشعر عندنا اساسي له تلات انواع

1- الشعر الجاف

2- الشعر الدهني

3- الشعر العادي

وفيه تحت منه نوع اسمه الشعر العادي المائل للجفاف وهو الشعر العادي لو قسيتي عليه او اهملتيه.

 

هنقول الخصائص العامة لكل نوع منهم وباختصار كده ازاي تعتني بيه لما تعرفي نوعي

وعلي فكرة استعمالك المنتجات التجميلية غلط ممكن يخليكي تعتقدي ان شعرك نوع غير نوعه الاصلي (فهمتوا حاجة)في نص هدومي

بس هنقول الاساسيات والانواع خطوط عريضة عشان تقدري تحددي محتاجة ايه وهتستعملي ايه

 

الشعر الدهني

 

هو غالبا حسب ما قريت بيكون معاه حاجتين

صاحبته بشرته دهنية

وكمان القشرة او الافرازات احيانا بتغطي فروة الراس بكميات قليلة او كتيرة

وبيتميز انه بيكون دايما رطب نوعا ما

واطرافه بتكون مش مقصفة

وعادة بيهيش بسرعة بس بيكون محتفظ بنعومته فاهمين قصدي

 

وده العناية بيه صعبة شوية

بيحتاج يتغسل علي الاقل تلات مرات في الاسبوع و التونيك والكريمات الخفيفة بتكون مناسبة له اكتر من الزيوت

وشامبوهات الحمضيات بتكون انسب حاجة واستعمال البلسم له بيكون مرة واحدة في الاسبوع بس مش علي طول

 

ولازم يتسرح بفرشاة مش بمشط عشان نحرك الغدد الدهنية في فروة الراس وده بيخلي شكل الشعر صحي اكتر.

وزي ما المفروض صاحبة البشرة الدهنية تعمل انها تقلل الدهون والزيوت في الاكل لازم برضه صاحبة الشعر الدهني تعمل نفس الكلام

 

الشعر الجاف

 

هو علي طول ناشف ومقصف وهايش و مش بيلمع ويادوب تسرحيه وتدهنيه وتلميه تلاقي لونه تاني رجع بهتان ومفيهوش حيوية

 

وهو ممكن يكون شعرك جاف من طبيبعته او بسبب الفرد والكوي والصبغات خلته جاف

 

 

وده مش بيحتاج غسيل كتير يعني اسبوعيا بالكتير قوي مرتين وممكن مرة كل خمس ايام كفاية قوي

وبتستعملي البلسم في الغسيل وتسيبيه فترة مش طويلة بالكتير قوي تلات دقايق ويتشطف كويس

ولازم يتعمل له حمام زيت قبل كل مرة غسيل

 

وكل مرة تسرحيه استعملي كريم او تونيك يرطبه و دلكي فروة راسك يوميا بالفرشاة احسن من المشط.

و استعملي سيرم للاطراف الجافة المقسومة والهايشة.

 

 

الشعر العادي

 

 

وهو وسط بين الدهني والجاف ومش بيحتاج عناية خاصة وغالبا بيحتفظ بشكله فترة طويلة و لما بيترطب وتهتمي بيه صح بيكون شعر مثالي

وفي نفس الوقت لو اهملتيه ونشفتيه وفرديته وصبغتيه بيقلب شديد الجفاف

 

بيتغسل مرتين في الاسبوع مرة واحدة بس باستعمال البلسم

وحمامات الكريم مناسبة جدا له لو اتعملت بانتظام

وبرضه يفضل استعمال الفرش في تدليك فروة الراس

ويستعمل السيرم برضه علي الاطراف

 

 

 

مفيش واجب المرة ديه لاني ماصدقت عرفت اكتب كلمتين من السيرفر الواقع ده

اعذروني المحاضرة مش عجباني قوي

بس لي رجعة بامر الله للشعر والعناية بيه والمنتجات المناسبة

 

 

بس ممكن ناخد واجب انك تحددي نوع شعرك وتكتبيه في الاجندة بتاعتك

شارك هذه المشاركه


رابط المشاركه
شارك

جزاك الله خيرا حبيبتى

دوره حلوه بس ليه مستعجله في طرح الحلقات

براحه علينا علشان نطبق

جزاك الله خيرا

شارك هذه المشاركه


رابط المشاركه
شارك
جزاك الله خيرا حبيبتى

دوره حلوه بس ليه مستعجله في طرح الحلقات

براحه علينا علشان نطبق

جزاك الله خيرا

 

وجزاكِ مثله حبيبتي

 

خلاص هستنى عليكم شوية ونخليها بالراحة يا قمر عشان عيونك حبيبتي

شارك هذه المشاركه


رابط المشاركه
شارك

ممكن تقوليلى انواع مستحضرات استخدمها لشعرى هو جاف يعنى كحمام زيت او كريمات تصفيف

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،، فين الباقى يا قمر بوركت حبيبتى

شارك هذه المشاركه


رابط المشاركه
شارك

لنا عودة باذن الله انتظروني

 

معذرة كنت مشغولة في العيد

 

كل سنة وانتم واهليكم والمسلمين جميعا بخير

 

أحبكن في الله

 

دمتن في حفظ الرحمن

شارك هذه المشاركه


رابط المشاركه
شارك

المحاضرة السابعة : منتجات ومستحضرات الجزء الاول:

 

ازيكم يابنات عاملين ايه؟

محاضرة النهاردة بناء علي طلباتكم كلها عبارة عن افضل المنتجات اللي محتاجينها للشعر والبشرة والجسم

يعني هنقول المنتجات اللي لازم تبقي عندنا و هنحاول نذكر افضل المنتجات

والافضليه هتكون بناء عن تجارب او نصائح من بعض الاطباء والصيادلة.

في الجزء ده هنتكلم عن كل المنتجات تقريبا ماعدا بشرة الوجه

 

 

كريمات الايدين:

 

جليسوليد

كريمات اورفليم للايدين كلها ممتازة ريحة وملمس ونعومة

كريم اماندا بفيتامين e والكيرياتين

اوتوديرم من بايوديرما

لوشن فازلين للايدي (فازلين الاصلي مش ايفازلين)

كريم جونسون بالعسل ممتاز للايدي مش للبشرة

 

كريم الافوكادو من اورفليم

كريم القرفة من اورفليم

كريم ازالة التشققات من ايفون مجموعو rich moisture

اوتوديرم من بايوديرما

كارباميد كريم

جليسوليد

والكعوب المشققة قوي اما

اكرتيه من ايفين

او ديبروساليك

او زيت الحلبة

 

 

مرطبات الجسم واللوشن

 

لوشن فازلين بزبدة الكاكاو

لوشن فازلين المجدد للجسم (مناسب قوي لمناطق الخطوط البيضا علي فكرة)

لو شن نفيا الازرق او الابيض اللي بال Q10 او اللي بالبابونج

البادي باتر من بادي شوب مناسبة للاماكن الجافة في الجسم

زيت جونسون للاطفال

او جيل جونسون للاطفال

لوشن Rich Moisture من ايفون

ولوشن الكريسماس لما بينزل بس بتكون ميزته انه بيدي لمعة شوية

لوشنات اورفليم عادية مقارنة باسعارها

اوتوديرم من بايوديرما

كريمات الجسم من اورفليم كويسة بس تقيلة في الامتصاص

 

مزيلات العرق

 

كل الرول اون من شركة نفيا ممتازة خاصة اللي بالصبار للبشرة الحساسة والابيض اللي بخلاصة اللولو

والرول اون من اورفليم ممتازة مش بتبقع والا بتجير

الرول اون من ايفون كويس بس بيسمر احيانا خاصة لو العبوة مفتوحة اكتر من تلات شهور

ليدي اسبيد استيك

اسبريهات دوف ونفيا و 4*8 بس من مكان موثوق منه لان التقليد مالي السوق

بودرة اصالة لازالة ريحة العرق (تستعملي في البيت بس لانها مش فعالة قوي)

صابونة الكبريت مهمة تقدري تستعمليها كل مرة قبل استعمال مزيل العرق كمرتين في اليوم

 

 

تندر كير من اورفليم ممتاز

بلسم الشفاة من اورفليم

مرطب الشفاة من نوكسNuxe (اغلي نوع في مرطبات الشفاة)

لابيلو زبدة كاكاو

نيفيا زبدة كاكاو

اماندا زبدة كاكاو

كبسولات فيتامين e

 

الشاور جيل

 

كامينا

جونسون

لوكس

دوف

كاميه

مينك

شاور اورفليم كلهم كويسين

شاور ايفون كويسين وخاصة البابل باث

شاور ماي واي الجامبو حلو وسعره حلو جدا

 

 

البادي اسكراب ( وهي المنتج اللي بنستعمله عشان نشيل الجلد الميت من الجسم)

 

البادي اسكراب من اورفليم ممتازة

من بادي شوب اكيد فوق الممتازة بس غالية اكيد

كامينا

فروتيني غالية طبعا

ملح الحليب

 

 

البادي اسبلاش او معطرات الجسم بعد الحمام

 

بادي اسبلاش فيكتوريا سيكريت

بادي اسبلاش بادي شوب

بادي اسبلاش فروتيني

بادي اسبلاش ايفون

بادي اسبلاش كازانوفا السعودي

 

 

منتجات المنطقة الحساسة

 

غسول سيتيال او مالفا بس سيتيال افضل

غسولات اورفليم كويسة بس تجميلية مش طبية

معطر المنطقة الحساسة من اورفليم

كريم زبدة الشيا لترطيب المنطقة الحساسة من اورفليم

اوتوديرم لترطيب المنطقة الحساسة

لبوس امريزول او البوثيل(ده عند الحاجة ولازم استشارة طبيبة الاول بس بقول احتياطي يبقي عندك طبعا للمتزوجات)

الة او جهاز الدش المهبلي (للمتزوجات بس)

الفوط الصحية اليومية للي بيخرجوا او بيشتغلوا او بيدرسوا والافرازات عندهم زيادة شوية

 

 

مستحضرات مهمة لازم تبقي عندك

زيت الورد

زيت الزيتون الخاص بالجسم(هو خفيف شوي عن زيت الاكل ولو مش موجود مش مهم)

زيت اللوز الحلو

زيت السمسم

زيت ياسمين او لافندر

طمي مغربي

لبن بودرة نوع رخيض مش شرط يبقي غالي

ترمس مطحون

ليفه مغربي او اي ليفة علي شكل جوانتي او جزء من هدوم صوف قديمة

ملح خشن

ميه الورد

 

 

 

الشامبوهات والبلسم

 

دوف

بانتين

اكرينال

لوريال

كيرتيه

تريسمي

شامبوهات مجموعة ايفون اللي بتكون بزيت اللوز والمانجو م فاكرة اسم المجموعة للاسف

بالمناسبة شامبوهات اورفليم كلها ملهاش لزمة

 

 

حمامات الكريم

 

ماسك اكرينال

فاشكول

بوناويل بالمشمش

مينك

كرتييه

هيرسيلك بزبدة الشيا

بانتين حمام كريم (الاصلي من صيدليه محترمة)

ايجو الايطالي

 

حمامات الزيت

 

باراشوت بجوز الهند

مجموعات زيوت الكابتن بعض الانواع منها (الخروع - السمسم - اللوز المر)

مجموعة زيت الحية من ماي واي

دابر املا الاصلي

جوز الهند الاصلي اللي من سوق ليبيا في مطروح

جدايل الاصلي من عبد الصمد القرشي

برداهان املا

زيت صانسيلك الشفاف والبرتقالي

كازانوفا بالتوم

 

تصفيف الشعر

 

فازلين تونيك

بالمرز تونيك

جي كازانوفا

باراشوت الاصلي

مينك بالنخاع النباتي

بالمرز بجوز الهند

بالمرز للشعر الجاف والمتقصف (وده عرفته من الدكتورة مي جزاها الله خيرا قمر المنتدي)

 

السيرم

 

زيرو فريز

كيرتييه

دوف

 

 

الواجب:

 

1- هتظبطي لي ميزانيتك كده ياقمر و اديكي عرفتي ايه المستحضرات اللي المفروض تبقي عندك وبالانواع في السوق المصري.

كل شهر اشتري حاجة لحد ما تجمعي كل طلباتك.

واي استفسار عن الاسعار اساليني وانا اقولك لاني فاكرة بعض الاسعار بس مش قوي كده.

 

2- عاوزة ضروري في خلال يومين او تلاتة طمي مغربي و لبن بودر وترمس مطحون وميه ورد.

 

3- ظبطي الميك اب بتاعك واللي مفتوح بقاله اكتر من سنة او ست شهور بالنسبة لمنتجات العين بما فيها الكحل ارميه فورا عشان عاوزة اظبط درس الميك اب في اقرب فرصه بامر الله.

استمري علي اللي فات كله

 

 

المحاضرة محتواها من مصادر كتيرة معظمها تجارب شخصية و كمان من موضوعات للعضوات في المنتدي

خاصة مشرفتنا الجميلة فارميسيت

و لا ابيح النقل بدون ذكر المصدر

 

في امان الله ياقمرات

شارك هذه المشاركه


رابط المشاركه
شارك

جزاك الله خيرا موضوع جميييييييييييييييل وسهل كتير

أول مره أقرأ حاجه زي كده أحس انها سهله وعمليه

وكلي حماس اني أطبق وأضبط والأجر كله يرجعلك باذن الله

بس ادعيلي أطبق

ودي ورده حلوه علشانك يا قمر القمرات

post-532499-1321316427.gif

شارك هذه المشاركه


رابط المشاركه
شارك
جزاك الله خيرا موضوع جميييييييييييييييل وسهل كتير

أول مره أقرأ حاجه زي كده أحس انها سهله وعمليه

وكلي حماس اني أطبق وأضبط والأجر كله يرجعلك باذن الله

بس ادعيلي أطبق

ودي ورده حلوه علشانك يا قمر القمرات

وجزاكِ خيرا حبيبتي

إن شاء الله نحاول كلنا نطبق وربنا ييسر لنا الوقت

ومتحرمش منك على الوردة الجميلة دي يا قمر

شارك هذه المشاركه


رابط المشاركه
شارك

الموضوع ممتاز ياقمروبيهم كل ست :rolleyes:

ماشاء الله

مستنيينك تكملي

:smile:

جزاكِ الله خيرا حبيبتي

 

إن شاء الله أكمل بس حسة إن مفيش أي رد فعل من الاخوات فظننت انه لا يعجبهن

شارك هذه المشاركه


رابط المشاركه
شارك
401156.gif

 

المحاضرة الثامنة:العين و ازاي نعتني بيها؟

187713381473661443.gif

 

ازيكم يابنات عاملين ايه وحشتوني قوي بقالي كم يوم مانزلتش لكم اي حاجة

مقصرة معاكم اعذروني

انا عاوزة اتكلم معاكم النهاردة عن العين ومنطقة الجلد الرقيق حول العين وازاي بنعتني بيها

عشان ناخر ظهور التجاعيد وكمان نقلل الهالات السودا قدر الامكان

منطقة العين منطقة خاصة وحساسة لابعد الحدود فلازم لها عناية شديدة جدا وخاصة جدا

18155436382000202013.gif

مشكلة الهالات السوداء:

 

سبب الهالات السوداء احيانا بيكون وراثي.

اجهاد العين بسبب القرب من اشعة التلفزيون والكمبيوتر و التعرض لهم فترات طويلة.

جفاف العين لاسباب كتيرة منها علاج بعض الامراض الاخري وكتاثير سلبي لبعض الادوية.

وانيميا او سوء تغذية

واكيد السبب الاصلي اللي عند معظمنا هو قلة النوم وتاخير النوم (الاستهبال في السهر بمعني اصح).

 

 

علاج الهالات السوداء:

 

1- اول حاجة لازم نتاكد ان مش عندك انيميا والا لا يعني تعملي صورة دم كاملة وتعرضيها علي دكتور.

2- تروحي لدكتور عيون وتكشفي علي عينك كويس جدا و لو عندك نضارة تقيسي نظرك كل ست شهور بشكل دوري و تطلبي من الدكتور قطرة ترطيب للعين.

3- النوم بشكل كويس جدا علي الاقل 8 ساعات في اليوم.

4- نشتري مستحضرات تجميل وكريمات ماركات كويسة وما نستخسرش لو مش معاكي فلوس الشهر ده حوشي وخليها الشهر الجاي بلاش تجيبي حاجة تتعبك بدال ماتريحك.

5- علاجات طبيعية:

مسكات يومية من شرايح الخيار الساقعة جدا كل يوم مرتين

ومسكات من قشر البطاطس كل يوم مرتين بالتبادل مع ايام الخيار يعني دول في وقت ودول في وقت تاني في يوم تاني.

وممكن كمادات من عصير النعناع الفريش تعمليها بدال البطاطس مفعولها كويس واسرع من البطاطس.

احذري من كمادات الشاي ملهاش اي لزمة.

واستعمال طريقة المعلقة اللي قلتها لكم قبل كده.

استعمال كريمات مناسبة لترطيب المنطقة حول العين eye contour cream وديه ضرورية لو انتي فوق 25 سنة

وفي منها تجميلي من شركات كبيرة زي

All about Eyes Clinique

clinique-richjpg.jpg

وده من كلارينس

CL_Adv_Extra_Firm_Eye_Contour_Cream.jpg

وده من لوريال

11622351101.jpg

من لانكوم

lancomeabsolueyeux.jpg

ده من ايفين

AVE_Soothing-Eye-Contour-Cream_10ml_SML.jpg

 

ده من اورفليم ممتاز وسعره ممتاز

 

http://t1.gstatic.com/images?q=tbn:A...3txndnU6Dq-OZQ

 

وفيه ماركات كتيرة شانيل و هيمالايا واستفيز وغيرهم كتير

وكمان فيه كريم كويس من شركة ايزيس فارما خاص لمنطقة العين

 

 

وفيه كريمات طبية للهالاات

1- مون ليت كريم

2- شايد اوت

وغيرهم كتير بس دول اللي جربتهم شخصيا وجابوا افضل نتايج

 

 

 

مشكلة التجاعيد:

 

وهي اكيد سببها التقدم في العمر وبتبدا تظهر بعد 30 سنة تقريبا.

 

 

علاج مشكلة التجاعيد:

 

 

1- الاهتمام الشديد بترطيب منطقة العين بكريم من الكريمات اللي اتكلمنا عنها فوق.

 

والكريم ده لوريال كويس جدا للتجاعيد

000995.gif

 

2- شرب الميه الكتير قوي.

3- راحة العين واننا ما نتكلمش بعنينا يعني ماتخليش وشك ياخد تعبيراتك يعني ما تكشريش عنيكي والا تقطبيهم لما تيجي تتكلمي.

4- النوم بدري والراحة قدر الامكان.

 

مشكلة الانتفاخ تحت العين:

 

 

اسبابها هي نفس اسباب مشكلات العين العادية

وبيزيد عليها النوم علي مخدة منخفضة شوية

واحيانا مشاكل في الكلي او القلب

 

علاج مشكلة الانتفاخ تحت العين

 

1- شرب السوايل كتير جدا.

2- التاكد من اننا ماعندنش اي مشاكل عضوية تسبب الانتفاخ ده.

3- مساج العين بشكل دوري يومي.

4- طريقه المعلقة.

5- غسيل الوجه والعين بميه ساقعة

 

تحذيرات مهمة:

 

1- طريقة الفازلين والكركم لازالة الهالات.

2- منتجات جارنييه للعيون ابعدوا عنها ارجوكم.

3- كمادات اكياس الشاي السودا.

4- مستحضرات التجميل القديمة استعمال مستحضرات الغير.

eyemassage.jpg

 

مفيش واجب

 

التزموا بالجدول

وجهزوا لي لبن بودر وطمي مغربي

 

 

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×