اذهبي الى المحتوى

المشاركات التي تم ترشيحها

مبدعه كعادتك ياهوبة .الله يعينك يامروة على العزومة الكبيييييييييييييييييييييرة شكلها هتخلص عليك ويارب يهديلك ام فتحى وتصعبى عليها

شارك هذه المشاركه


رابط المشاركه
شارك

لالالالا مش ممكن

انا مش قادرة امسك نفسي من الضحك

واختي عماله تتخانق معاياي وانا ولا هنا اصلا

وابصلها واااضحك

ههههههههههههههه

تحفة بالذات الاخت الفاضلة هاجر زي السكر

منتظرينك بكرا يا خالتو

تسلم ايديكِ

شارك هذه المشاركه


رابط المشاركه
شارك

كويس إن هاجر مسافرة مش عارفة لية حسيت ان مروة هتبتدي تراجع حياتها من الاول لما تشوف حياة هاجر

 

والدة أحمد شكلها حماة ممتاز نادر جدا لما تلاقي حماة توصي زوجة ابنها وتعرفها طباع ابنها وكمان توصي ابنها على مراتة

 

بس أحمد شخصيته مش مريحاني مش عارفة لية هو ماشاء الله اخد عليهم بسرعة وبيهزر بس موضوع متتخنيش دة وحش ووحش جدا كمان دية الواحدة لما بتكون قلبوظة بتبقي ملية مركزها -_-

 

 

نسمة بجد صعبانة عليا لانها ضحية أم قوية وأب ملوش شخصية ومستهتر

 

هي تقريبا عندها 27 او 28 سنة لية تستعجل في الجوازة دية

 

مع العلم في كتير بتوع فراخ بس ماشاء الله عليهم ناس ذوق واخلاق

 

جارتنا زوجها عنده ملح فراخ بس ناس ذوق جدا ومتعلمين والاودهم ماشاء الله عليهم

 

يعني المشكلة مش انه بتاع فراخ لا المشكلة ان البيئة اللي اتربي فيها مش تمام خالص

 

واسلوبة في الكلام انه مش بس مش متعلم لا دة جاهل في كل شئ وشكله من اللي بيسمع كتير لامه

 

وأمه نفسها ست مش سهل خالص

 

اما عن اخوات مروة اللي كل واحدة تجي تساعدها شوية مفيش مانع بس الصراحة حاسة ان مروة كان لازم تقنع زوجها يشوفلها واحدة تساعدها اسبوعيا لان كلام مامته مش حلو

 

 

اما مروة فماشاء الله عليها حتى الان عندها صبر رهيب بس اعتقد ممكن ينفذ في العزومة دية المفروض اول ما تعرف متخليش فتحي يروح الشغل لاما يساعدها ويقف معاها لاما يوديها عند مامته عشان ام فتحي ناوية على نية انما اية

 

لا ودينا بتتأمر كمان متيجي انت تعملي الاكل اللي كل واحد عايز صنف يا عيني عليك يا مروة

 

وكويس ان ام فتحي بنتها بقت حامل هنشوف التفرقة الجامدة في المعاملة

 

بس ياريت برنامج الفتاوي يتكملوا عن معاملة مرات الابن عشان ام فتحي تتعلم بقى

 

اممممممم فاضل مين مش اتكلمت عنه

 

ايوة ابو نسمة اللي خسارة فيه كلمة ابو دية بجد حرام عليه والنماذج دية في كتير منها في حياتنا

 

مش عارفة راجل ازاي ويسيب بنته ميعرفش اصلا ان كانت ولد ولا بنت

 

لا وكمان مش يرجع ندمان ويعوضها بجد اللي زي دة ميتقولوش الا حسبي الله ونعم الوكيل

 

 

 

 

 

يلا في انتظار 5أو 6 حلقات ورا بعض يا هوبة :huh:

شارك هذه المشاركه


رابط المشاركه
شارك

واحب افجأك يا منولة اني هجيب التالتة النهاردة ههههههههههههههههههههه

 

شريرة

 

 

في كام نقطة مستغرباها واضح إن أم فتحي من مستمعي البرامج الدينية وبتعمل باللي فيه

طيب هي عمرها ما سمعت عن المعاملة بالحسنى وعن حرمة الخوض في سيرة الغائب وخاصة بتلك الإهانات

وهل لم تسمع عن من لا يرحم ولا يُرحم بتخلي مروة تقوم بكل شغل البيت في ظروفها دي بدون رحمة

وكمان إذا أختها ساعدتها بدل ما تشكر لها صنيعها بتعاملها كخادمة مع أنها ليست ملزمة وفتحي هو اللي ملزم يجيب اللي يقوم بخدمة بيته وزوجته وكمان فرحانة ببنتها الحامل وبتدعي لها مع إنها عمرها ما دعت لابنها دعوة بمناسبة حمل مروة

وغير كدة ناوية تخليها تعمل عزومة لبناتها وأولادهم وأزواجهم لا وكل واحد له طلب

فهل ده من الرحمة ومن الشرع اللي بتسمع له أم فتحي في البرامج الدينية شيء عجيب ومستفز بصراحة

 

نيجي لنسمة ووالدتها يعني هي كانت سبب في خراب بيتها بإسلوبها وتتطاولها على زوجها

ومع ذلك لم تتعلم وبتعمل أكبر خطأ في بنتها لتصل لنفس النتيجة لأن إذا الجواز ده تم فهيكون مصيره الفشل بسبب عدم التكافؤ الثقافي

ووالدها ينطبق عليه حديث الرسول صلى الله عليه وسلم: "كفى بالمرءِ إثمًا أن يُضيِّعَ من يقوتُ" (صحيح الجامع)

لأنه لم يعلم شيء عن بنته ولا عن تربيتها وحياتها بالرغم من إنه عارف طبع أمها وأنها لن تربيها التربية الصحيحة غير إنه تنصل من الإنفاق عليها

ويوم أما عرفها وشاف زوج المستقبل لم يعنيه الأمر وشاف نفسه إنه مجرد بصمجي يوقع على العقد وخلاص

وواضح إنه ضيع أيضا أولاده من الزوجة التانية ولم يهتم بتربيتهم التربية الإسلامية ففيهم السارق وغيره يعني ضيع من يعول من الجانبين

الأولى بعدم المتابعة والإنفاق وأولاد الأخرى أنفق ولكنه لم يهتم بهم ولم يتابعهم المتابعة الصحيحة فانحرفوا

شيء محزن بجد وللأسف هذه النوعيات متواجدة بينا

بوركتي هوبة الحبيبة والحمد لله مش هتلاقي عندي حد تاني تسميه في مسلسلك

  • معجبة 4

شارك هذه المشاركه


رابط المشاركه
شارك

انا مش عارفه اخوات فتحى مش بيتكسفو وبيطلبوا اكل كتير كده ليه

انا اتكسف اطلب أى حاجه

شارك هذه المشاركه


رابط المشاركه
شارك

جزاكِ الله خيرا هوبة الحبيبة

ضحكت من قلبي ربنا يسعدك يارب

حلقات جميلة جدا وتناقش مشاكل كثيرة

الله المستعان

شارك هذه المشاركه


رابط المشاركه
شارك

مروة

 

انتي يا مروة

 

هي مابتردش ليه . يا مروووووووووووووووووووووووووووووووووووووووووووووووووة

 

نعم نعم يا ماما

 

مابترديش على طول ليه

 

كنت برتب الدولاب وكانت ايدي مشغولة

 

انا لما انادي عليكي تسيبي كل اللي في ايدك وتردي

 

حاضر . نعم حضرتك بتنادي علية ليه

 

هالة ودينا واجوازهم وعيالهم جايين بكرة ينورونا . انا كتبتلك طلبات دينا وجوزها وولادها على الاكل في ورقة عشان ما انساش ولا حاجة

 

يا ماما طلبات ايه واكل ايه . حضرتك عارفة اني مابقدرش اقف كتير عشان الحمل ويادوب بعمل اكل سريع مش محتاج مجهود

 

يادي الحمل اللي ذلانا بيه . هو مافيش حد حمل غيرك قبل كدة . انا خلفت خمسة ماعملتش عمايلك السودة دي

 

يا ماما لو سمحتي انا مش هقدر اخدم الاعداد دي كلها . اللي جايين عددهم كبير

 

الله اكبر في عينك . انتي هتحسدي ولادي ولا ايه .

 

هحسدهم على ايه يعني . انا بقول لحضرتك انا ما اقدرش اخدمهم . يعني ممكن هما لما يجوا يطبخوا او نبعت نجيب اكل جاهز

 

يا سلام على الهانم اللي هتمشي البيت على مزاجها وهترتب وتنظم على كيف كيفها . بقولك ايه هي كلمة واحدة تصحي مع ادان الفجر تطبخي كل الاصناف اللي بناتي حبايبي عايزينها

 

يعني يا ناس مش حرام الحامل التعبانة هي اللي تخدم وتطبخ وماحدش يساعدها حتى

 

هو انتي بس اللي حامل . دينا كمان حامل وتعبانة ونفسها في البط والمكرونة البشاميل

 

اوووووووووووووف استغفر الله العظيم

 

انتي بتقولي اوف وتسيبيني وتمشي . طب والله لما يجي جوزك لاقوله على البهدلة اللي مبهدلاها لامه .اما اشوف هيجيبلي حقي ولا لأ

 

 

 

 

 

 

 

 

 

فتحي لو سمحت تفهم مامتك اني تعبانة ولا هو مش واخدة بالها ان اهلي بيجوا يخدموني عشان خايفين عليا . يعني ماما تبعت اختي تخدمني عشان مااتعبش ومامتك تجيبلي اخواتك عشان اخدمهم ويتهد حيلي في خدمتهم

 

 

يا حبيبتي اهدي الامور ماتجيش كدة

 

اومال تيجي ازاي يا فتحي

 

انا هتصل بيهم وابلغهم انهم يقفوا معاكي ويساعدوكي

 

يبقى بتحلم يا استاذ . اخواتك لما بيجوا ما بيتحركوش من مكانهم وبيعاملوني زي الخدامة ليهم ولولادهم

 

لا ما تخافيش انا هتصرف

 

 

 

 

 

 

 

 

ترررررررررررررررررررررررررررررن ترررررررررررررررررررررررررررررررررررررررررن تررررررررررررررررررررررررررررررررن

 

 

مين

 

افتحي يا مروة انا دينا ومعايا هالة والولاد

 

اوووووووووووووووووووووووف حد يجي الساعة تمانية الصبح برضو . ايه البني ادمين دي

 

 

 

هيييييييييييييييييييييييييييييييييييييه هييييييييييييييييييييييييييييييييييييييييييييييييييييييييييييييييييييييييه هيييييييييييييييييييييييييييييييييييييييييييييييييييييه

 

هييييييييييييييييييييييييييييييييه هييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييه

 

 

 

 

اهلا وسهلا يا اهلا يا اهلا

 

اهلا بيكي يا مروة عاملة ايه

 

ازيك يا مرات فتحي

 

تعبانة . تعبانة اوي الحمدلله

 

سلامتك من التعب يا روحي . بسرعة بالله عليكي الفطار عشان نزلنا من البيت من غير فطار والولاد هيموتوا من الجوع

 

 

المطبخ قدامك اهو يا دينا حضري الفطار اللي انتي عايزاه

 

نعم نعم يا ست مروة . هي مين دي اللي تحضر . انتي جرالك حاجة في دماغك ولا ايه

 

باين عليها الحمل اثر على مخها يا دينا يا اختي

 

بقولك ايه بقى انتي وهي انا حامل وتعبانة واذا كنتوا انتوا مش خايفين عليا انا بقى خايفة على نفسي وعلى اللي في بطني

 

 

بقى كدة . طب والله لنقول لماما تيجي تشوف صرفة في المعاملة البايخة بتاعتك دي

 

 

 

 

 

 

 

 

ماما انتي فين يا ماما

 

اهلا اهلا يا حبايب ماما ازيكو يا بنات . على مهلك يا دينا بالراحة على نفسك يابنتي انتي حامل

 

شوفتي الهانم مرات ابنك اللي كان ناقص تطردنا من ع الباب

 

مالها ان شاء الله عملت ايه

 

ال ليه وليه يا ماما بقولها حضريلنا فطار . تقوم تقول ماليش دعوة حضروا انتوا انا حامل وتعبانة

 

هي قالت كدة . طب والله لهتعمل الطاق تلاتة النهاردة وان شالله تسقط حتى . انا ماحدش يعاندني ويمشي كلامه عليا

 

لا وايه كمان يا ماما سي فتحي متصل يقول ساعدوها في عمايل الغدا عشان مابتقدرش تقف

 

ولا تعبروها . سيبوها تعمل كل حاجة وماحدش يساعدها وتخبط راسها في الحيط . عشنا وشوفنا . واحدة ماتساويش هتتحكم فينا . اقعدي يا دينا يا حبيبتي الوقفة مش حلوة عشانك يا حبيبة ماما .

 

اه والله يا ماما ضهري واجعني اوي

 

ارتاحي ارتاحي يا روح قلبي . ماقولتليش انتي في الكام

 

في التاني يا ماما

 

ربنا يتمملك بخير يا حبيبة ماما . انتي يا مروة الفطار ماجاش ليه . يا مرووووووووووووووووووووووووووووووووووووووووووووووووووووووووة

شارك هذه المشاركه


رابط المشاركه
شارك

السلام عليكم و رحمة الله و بركاته

 

أول مرة أقرأ ما تكتبين و دمي تحرق من أم فتحي و فتحي كمان

 

يااااا الله لو كانت حماتي كده يمكن كان حصلي نزيف داخلي و مت من القهر قال بناتها قال ههههه

 

ربنا يكون في عونها و يااا رب ميكونش في حموات كده و رجاله كمان كده

 

و سلمت يمناك على ما تخطين

شارك هذه المشاركه


رابط المشاركه
شارك

ترررررررررررررررررررررررن تررررررررررررررررررررررررررن

 

الو ايوة يا مروة

 

فتحي تعالى شوفلك صرفة في مامتك واخواتك تعالى بسرعة ارجوك

 

يا مروة اجي فين . انا عندي شغل كتير ما ينفعش اسيبه واجي

 

يا فتحي اهلك مبهديلني اخر بهدلة . انا مش قادرة استحمل ارجوك تعالى بأي شكل

 

مروة بلاش دلع بقى . وبعدين هما مش عندنا كل يوم مافيهاش حاجة لما تتعبي شوية

 

كدة برضو يا فتحي .

 

مع السلامة يا مروة دلوقتي عشان مش فاضي

 

 

 

 

 

 

 

 

ها يا بنات ايه رأيكو في الغدا . كل طلباتك اتنفذت يا دينا . انا ماقدرش اشوف نفسك في حاجة وما اكلهالكيش

 

ربنا يخليكي يا ماما . الاكل يجنن . بصراحة مرات فتحي نفسها حلو في الاكل اوي

 

مش اوي يعني يا دينا . المكرونة مش عجباني ولا عاجبة ولادي

 

هما العيال فين

اهم بيطنططوا في كل حتة شوية . هما العيال بيقعدوا في حتة

 

 

 

دشششششششششششش دددشششششششششششششششششششششششششششش

 

ايه ده . صوت حاجة اتكسرت

 

انتوا يا ولاد . يا مازن يا طارق يا سما يا هدير . كسرتوا ايه

 

دي فازة

 

يا ماما مش احنا دول ولاد خالتو هالة

 

لا مس احنا دول ولاد خالتو دينا

 

مازن وهدير هاديين مش بيكسروا حاجة . اكيد ولادك يا دينا

 

لأ بقى طارق وسما مؤدبين واكيد ولادك هما اللي كسروا الفازة يا هالة

 

 

انتو هتتخانقوا ولا ايه . يا مروة تعالي لمي الازاز اللي اتكسر ده لحسن حد من العيال يتعور ولا حاجة

 

 

حاضر الخدامة جاية حاضر تحت امركو

 

 

 

 

 

 

 

 

مروة

 

 

يا مروة حبيبتي

 

مروة مابترديش علية ليه

 

لو سمحت يا فتحي مش عايزة اتكلم

 

حصل ايه بس

 

هو ايه اللي حصل ايه . ادخل المطبخ وشوف الحوض اللي مليان اطباق وكل ماغسل شوية الاقيهم زادوا تاني

 

ادخل الصالون وشوف الورق والزبالة اللي مرمية في الارض من ولاد اخواتك ومافيش واحدة في اخواتك تقول لولادها عيب

 

شوف سيراميك الحمام اللي دخلوا عليه بجزمهم واثار الطين اللي عليه

 

ولا تحب احكيلك على الالم اللي هيموتني في ضهري وبطني .

 

يا حبيبتي حصل خير معلش المفروض نستحمل شوية

 

ابوس ايدك مش عايزة اسمع منك ولا كلمة انا تعبانة وعايزة انام ومعلش ابقى اعتذر للهانم مامتك اني مش هقدر اغسل الاطباق ولا انضف البيت عشان خلاص ما عنديش ادنى طاقة اعمل بيها اي حاجة وشكرا ليكو جدا

 

مروة حبيبتي

 

تصبح على خير يا فتحي

 

 

 

 

 

 

 

 

 

 

ااااااااااااااااااااااااااااااااااااااااااه ااااااااااااااااااااااااااااااااااااااااااااااااااااااااااااااااه فتحي الحقني ااااااااااااااااااااااااااااااااااااااااااااااه

 

ايه يا مروة في ايه يا حبيبتي مالك

 

الم رهيب رهيب مش قادرة اتحمله ااااااااااااااااااااااااااااااااااااااااااااااه

 

ايه ده ايه الدم ده في ايه انتي جرالك ايه يا مروة

 

ااااااااااااااااااااااااااااااااااااه اتصلي بماما انا تعبانة حاسة روحي بتطلع هاتلي ماما هاتلي ماما ارجوك

 

يا حبيبتي احنا الساعة تلاتة بعد نص الليل ماينفعش اتصل بيها . انا هاخدك اوديكي مستشفى حالا

 

اتصلي بماما اااااااااااااااااااااااااااااه اتصلي بماما بقولك

شارك هذه المشاركه


رابط المشاركه
شارك

أخر حلقتين مستفزين كتير وبعدين فتحي ما كان لازم يردو عليه كدا على الأقل ياخذ اجازه من الشغل علشان يساعدها المسكينه ، عن جد يجيبوا الضغط أم فتحي و- بناتها ، الله يستر وما يسقط الجنين من مروه

شارك هذه المشاركه


رابط المشاركه
شارك

سبحاااااان الله

 

أهوووووه بسبب الشغل يا سي فتحي مراتك حتموووت

 

يااااااااااااااااااااا رب أنا بجد متغااااظة أوييي و الحمد لله إن جوزي مش كده أو حتى واحد في المئة من ده... ده لو جات أمه للغدا عندنا بيدخل المطبخ قبلي هههههه

 

يلاااا يا هوووبه عايزيييين نعرف حصلها إيييييييييه :(

شارك هذه المشاركه


رابط المشاركه
شارك

أكبر غلط أن الواحدة تعند على نفسها

خصوصا لو في بطنها روح اخرى ستسأل عنها والتفريط في حقها يعتبر من باب القتل الخطأ إن كان نفخ فيها الروح

 

سمعتها مرة فتوى وصدمت لما أفتى الشيخ بكفارة قتل الخطأ لأخت كانت تسأل أن حملت منضدة رخام وهي حامل فسقطت جنينها ومات

لما فتحي اشتد عليها في الكلام وانها تتصرف ده يوم وخلاص مش هييجوا كل يوم

فقامتت وأجهدت نفسها وهذا قمة الخطأ

فسترجع الأيام وسيلومونها أكثر وسيلومها زوجها وانها هي التي بذلت مجهودا كبيرا

 

منتظرة باقي القصة

شارك هذه المشاركه


رابط المشاركه
شارك

لاحول ولا قوة الا بالله

 

 

اعوذ بالله من الناس اللي مش بتخاف ربنا ولا تتقي ربنا فيهم هيا زوجه الابن بتبقى خدامه ولا ايه

 

ايه الظلم دا دا الظلم بعينوا وفتحي معجبنيش المرادي حتى لو مش كل يوم جايين المفروض

يحترموا زوجة اخوهم ويبقى تعاون بينهم ويعاملوها زي اختهم

 

حرااااااااااااااااام اللي بيحصل دا انا جالي صداع بجد يارب متسقطش الجنين

 

 

كملي ياهوبه كملي عاوزة اعرف اللي هايحصل

شارك هذه المشاركه


رابط المشاركه
شارك

حالات مثل هذه منتشرة جدًا، دائمًا وبين الأقارب لما تأتي الأخوات زيارة لبيت الأهل لا يحركن ساكن وزوجة الأخ أو الكنة كما نسميها تعمل وتخدم وتطبخ بأوامر من الجهات العليا.

لو أنا بدلها كنت شلت هدومي ورحت لبيت أهلي وخلي تصير مشاكل هذا ظلم.

شارك هذه المشاركه


رابط المشاركه
شارك

تررررررررررررررررررررررررررن ترررررررررررررررررررررررررررررن ترررررررررررررررررررررررررررررررررررررررررررررررررررررررررن

 

ايه ده

 

مين بيتصل في الوقت ده استر يارب في ايه

ترررررررررررررررررررررررررن ترررررررررررررررررررررررررررررررررن

في ايه يا راضية

 

ايه ده فتحي

 

الو في ايه يا فتحي مروة مالها

 

مافيش حاجة يا طنط كويسة

 

كويسة ازاي اومال متصل بيا ليه دلوقتي . بنتي مالها فيها ايه

 

هي تعبانة شوية بس وقالتلي اتصل بيكي

 

اقفل انا جاية حالا

 

في ايه يا راضية مروة مالها

 

بنتي تعبانة . زي مايكون قلبي حاسس . عمالة اتقلب في السرير ومش جايلي نوم وقلبي متوغوش عليها . انا هلبس واروحلها حالا

 

استني هلبس واجي معاكي

 

 

في ايه يا ماما

 

اختك مروة تعبانة

 

مروة ! مالها يا ماما بعد الشر

 

مش عارفة مش عارفة يا سارة سيبيني دلوقتي خليني البس ربنا يستر

 

انا هاجي معاكو يا ماما

 

خليكي انتي يا سارة مافيش داعي لوجودك

 

ازاي بقى يا بابا . دي اختي . مش هقدر استنى لازم اجي انا داخلة البس

 

 

 

 

 

ترررررررررررررررررررررررررررررررن تررررررررررررررررررررررررررررررررررررررررررن

 

دبببببببببببببببببببببب دببببببببببببببببببببببببببببببب تن تن افتحوا افتحووووووووووووووووا

 

 

اتفضلوا

 

بنتي فين

 

اتفضلي في اوضتها

 

 

 

 

مروة حبيبتي . مالك يا بنتي فيكي ايه

 

تعبانة تعبانة يا ماما حاسة بألم رهيب وفي دم كمان . انا مش قادرة

 

ايه اللي حصل يا مروة . انتي شيلتي حاجة تقيلة يا حبيبتي

 

يا ماما حماتي عزمت ولادها كلهم وخلوني طبخت ونضفت البيت كله وعمالة اخدم فيهم وفي ولادهم وطول النهار واقفة على رجلي وماحدش حتى ساعدني ولا حد حس بيا وبألامي

 

 

فتحي

 

نعم يا عمي

 

هي دي الأمانة اللي سلمنهالك ووعدتنا تحافظ عليها

 

والله يا عمي انا ماطلبت منها ترهق نفسها بالشكل ده .

 

يعني في الآخر بنتي هي الغلطانة

 

مالوش لزمة الكلام احنا هناخدها بالعربية نوديها مستشفى

 

 

 

 

 

هو في ايه مين اللي جه يا فتحي

 

دول اهل مروة

 

اخص عليهم ناس ماعندهومش دم . ازاي يجوا في وقت زي ده

 

جايين عشان مروة تعبانة

 

تعبانة من ايه

 

من كتر الارهاق بتاع امبارح

 

هو حد ارهقها ولا جه نحيتها ولا هي بتتلكك

 

ازيك يا ام مروة

 

اهلا . يلا يا سارة ساعدي اختك تلبس عشان نمشي

 

حاضر يا ماما حاضر . بس بجد بقى يا للي اسمك فتحي . انت مش راجل وماتستحقش يكون ليك زوجة زي مروة

 

سارة . عيب كدة مايصحش

 

هو ايه اللي مايصحش يابابا . هو ده لو راجل يسيب مراته تتبهدل وتتهان وتشتغل خدامة لأهله وهو واقف يتفرج عليها

 

بصي يا سارة والله لولا انك بنت ومايصحش اقل ادبي عليكي لكنت علمتك الادب دلوقتي

 

الادب ده تروح تعلمه لمامتك واخواتك

 

سارة وبعدين قولتلك مايصحش دا مهما كان جوز اختك

 

ويعني يرضيكو اهله اللي ماعندهومش اخلاق ولا ضمير دول يعملوا في اختي كدة . مين دول اصلا عشان يعلموا كدة

 

وانا عشان خاطر عمي وطنط مش هرد عليكي . بس ليا موقف تاني

 

يلا سندي اختك خلينا ننزل من هنا نشوف جرالها ايه

 

انا نازل يا امي

 

رايح فين . ماهم اهلها معاها . انت ايه اللي موديك

 

 

 

 

 

 

 

 

طمنيني يا دكتورة الجنين سقط ولا ايه

 

لالالا الحمدلله الجنين كويس بس هي محتاجة راحة تاااااااااااااااااااااامة يعني ماتقومش من السرير الا في أضيق الحدود . المرة دي ربنا ستر لكن اي حركة او مجهود يبقى خطر جدا

 

الحمدلله الحمدلله . مروة انتي هتروحي معانا يا حبيبتي

 

ياريت يا ماما

 

 

 

 

مروة حبيبتي سلامتك الف سلامة

 

مروة

 

كدة برضو مش عايزة تردي على فتحي حبيبك

 

ارجوك يا فتحي ارجوك سيبني في حالي

 

انتي فعلا هتروحي مع اهلك

 

لو ماعندكش مانع ولا ناوي تضحي بيا وبأبنك وتسيبني فريسة لمامتك

 

طيب يا حبيبتي على راحتك . ارجوكي سامحيني . انا ماكنتش اعرف انك تعبانة بالشكل ده وان المجهود خطر عليكي

 

واديك عرفت . بس بعد بهدلتي والجري ع المستشفيات

 

 

 

 

 

 

 

 

ترررررررررررررررررررررررررن ترررررررررررررررررررررررن

 

مين

 

يعني هيكون مين يا امي انا فتحي

 

اهلا يا حبيبي . اومال مراتك فين

 

يا امي مراتي كانت هتموت بسبب عمايلكو . والله العظيم حرام . انتي شوفتي منها ايه وحش عشان تكرهيها بالشكل ده بس

 

ايوة ايوة يبقى مراتك واهلها قلبوك على امك الغلبانة . وتلاقيها عاملة التمثيلية دي كلها عشان توقع بيني وبينك يا حبيبي

 

كفاية يا امي كفاية . كفاية انا اعصابي مش متحملة

 

يابني ماتعملش في نفسك كدة . مافيش ست تستاهل تزعل عشانها ز تروح واحدة يجي الف بدالها ولا تزعل نفسك .

 

يا امي انا بحب مراتي ومش هضحي بيها مهما كان

 

البت دي اكيد سحرالك . انت مش طبيعي ابدا

شارك هذه المشاركه


رابط المشاركه
شارك

ارتاحي يا مروة ارتاحي يا حبيبتي

 

ربنا يخليكي ليا يا ماما

 

لو عوزتي اي حاجة نادي علية انا مش هنام . اوعي تقومي من السرير

 

حاضر يا ماما . بجد نفسي انام

 

 

 

 

ماما

 

نعم يا سارة

 

انا زعلانة منك

 

زعلانة مني ! ليه يا حبيبتي

 

انتي السبب في كل اللي بيجرا لمروة ده

 

انا يا سارة ! انا السبب في ايه يابنتي

 

كام مرة مروة جاتلك واشتكيتلك من معاملة حماتها واخوات جوزها . وانتي كل مرة تقوليلها اصبري واستحملي بدل ماتقوليها خدي موقف ووقفيهم عند حدهم . هو احنا رخاص اوي عندك كدة يا ماما

 

لا حول ولا قوة الا بالله . يابنتي انا عايزاها تحافظ على بيتها

 

وهو فين بيتها ده اصلا . انا اللي شايفاه انها خدامة ببلاش لناس اغراب مش عارفين قيمتها . وزوجة لبني ادم ما يستاهلش ضافر رجلها

 

يابنتي الام كل مناها تشوف ولادها سعدا وفي مشاكل ممكن تتداوى وتعدي بدل ماتكبر . ولا انتي كنتي عايزاني اقولها اطلبي الطلاق

 

وفيها ايه يعني لما تطلب الطلاق اذا كان الجواز في اهانة لكرامتها

 

يا حبيبتي الطلاق مش حاجة ساهلة . دا كسر للست

 

ياسلام ! والحياة مع زوج مش قادر يحمي زوجته مش كسر للست ؟ ماما انتي المسؤولة عن كل اللي مروة وصلتله بسبب نصايحك السلبية

 

كدة يا سارة . يعني خوفي عليكو وحبي ليكو في الأخر بقى ولا حاجة ؟ انا أم سلبية ؟ ربنا يسامحك يابنتي

 

اللي حصل ده خلاني فوقت لنفسي يا ماما . انا مش ممكن افكر اتجوز الا من انسان قوي يقدر يحميني مش يخليني جارية لأهله

 

وكمان لازم اشتغل عشان ماحدش يذلني ولا يكسرني . مش هعمل زي مروة واضحي بشغلي ووظيفتي عشان راجل وياريته في الآخر كان يستاهل

 

انتي فاهمة الحياة غلط

 

وانا سعيدة اني فهماها غلط اذا كان الصح في نظرك هو الحالة اللي مروة وصلتلها

شارك هذه المشاركه


رابط المشاركه
شارك

بصراحه فتحى طلع انسلن سلبى للغايه وساره فشت غلى شويه

والمفروض انه تتحط حدود للتعامل مدام الاحترام والادب بيستغل كده يبقى لازم كل حد يعرف اللى ليه واللى عليه

شارك هذه المشاركه


رابط المشاركه
شارك

تررررررررررررررررررررن تررررررررررررررررررررررررررن

 

الو ايوة يا غادة يا حبيبتي

 

ازيك يا ماما وحشتيني

 

انتي وحشاني اكتر يا حبيبتي

 

ازي فتحي ومروة

 

مروة في عينها . بهدلتنا وفرجت علينا الدنيا واختها قليلة الادب شتمت اخوكي . كنت عايزة ارد عليها بس بعيد عنك كانت عاملة زي الغولا . خوفت منها بصراحة

 

في ايه يا ماما ايه اللي حصل لده كله

 

ال يختي عملت نفسها تعبانة وبتسقط واتصلت بأهلها واشتكتلوهم مني . من امك الغبانة يا غادة اللي لابتهش ولا بتنش يابنتي

 

لا حول ولا قوة الا بالله . طيب هي مروة كويسة !

 

شوفوا يا اخواتي البت اقولها امك اتبهدلت واخوكي اتشتم تقولي هي مروة كويسة

 

يا ماما انا بصراحة عمري ما بحكم من طرف واحد . هي مروة نايمة ولا صاحية

 

وانا ايش عرفني .

 

هي مش عندك ؟

 

راحت عند امها ال تعبانة يعني . كيد نسا نروح فين من كيد النسا

 

 

 

 

تررررررررررررررررررررن ترررررررررررررررررررررن

 

الو ايوة يا غادة

 

في ايه يا فتحي مروة مالها

 

تعبانة والله وكان الجنين هيروح مننا بسبب امك واخواتك . ارهقوها وتعبوها وماحدش هان عليه يساعدها وهما عارفين انها حامل وتعبانة

 

لا حول ولا قوة الا بالله . انا مش عارفة يعني هالة ودينا دول جنسهم ايه . استغفر الله العظيم يارب . فيها ايه يعني لما يقوموا يساعدوها ويحسوا بيها وبتعبها

 

الحمدلله على كل حال

 

طيب يا فتحي اقفل دلوقتي مع السلامة

 

 

 

 

 

 

 

 

ترررررررررررررررررررررررررن تررررررررررررررررررررررررررررررررررن

 

مين

 

انا غادة يا طنط

 

 

ياااااااااااااااااااه ايه النور ده ازيك يا غادة يا حبيبتي ايه المفاجأة الحلوة دي

 

ربنا يخليكي يا طنط . انا سمعت ان مروة تعبانة جيت اطمن عليها

 

يا حبيبتي يابنتي ! ربنا يكرمك يارب . يسلملي قلبك الطيب يا حبيبتي

 

الله يخليكي يا طنط . على ايه يعني . مروة دي ربنا يعلم غلاوتها في قلبي والله . انا بحبها وارتاحلها اكتر من اخواتي

 

ربنا يديم المعروف يارب ويهدي النفوس يابنتي

 

اللهم آمين يا طنط . ممكن اشوف مروة

 

اتفضلي يا حبيبتي

 

 

 

 

 

 

 

 

السلام عليكم . ازيك يا مرمورة عاملة ايه الف سلامة عليكي

 

غاااااااااااااااااااااااااااااااااااادة يا حبيبتي وحشتيني اوي

 

والله انتي اكتر . ها طمنيني عليكي عاملة ايه وازي ابن اخويا الشقي اللي جرجر عمته لحد هنا عشان تطمن عليه وعلى مامته هههههههههههه

 

هههههههههه الحمدلله ربنا ستر كان هيروح فيها هو ومامته

 

بعد الشر عليكي يا حبيبتي ربنا يتمم حملك على خير

 

يارب يا غادة ادعيلي

 

ماتزعليش يا مروة من اللي عملوه اخواتي والله يا حبيبتي انا مايرضيني اللي عملوه . سامحينا يا حبيبتي

 

وانتي ذنبك ايه بس يا غادة عشان اسامحك

 

اعمل ايه هما اخواته وعمايلهم بتتنسبلي

 

لا والله انا عمري ماجمعتك معاهم في اي حاجة . انتي والله وحنيتك ومعاملتك الحلوة بتخليني استحمل كتير

 

ربنا مايحرمنيش منك يا مروة . خليكي عند ماما لحد ما ترتاحي . ولما ترجعي يا حبيبتي برضو اوعي تعملي غير اللي في استطاعتك . ماتتعبيش عشان حد . عشان في الآخر نادر لما تلاقي ناس تقدر تعبك

 

الله المستعان يا غادة . بس سيبك انتي انا هموت من الفرحة اني شوفتك النهاردة

 

ايه ده يا مروة هو انتو مش هتقدمولي حاجة اشربها عشان زعلانين من ماما واخواتي ولا ايه ههههههههههه

 

ههههههههههه لا والله ازاي تلاقي ماما بس سايبانا نتكلم براحتنا

 

 

 

اتفضلي يا غادة يا حبيبتي عملتلك عصير فراولة عشان عرفت انك بتحبيه

 

تسلميلي يا طنط ربنا يخليكي

شارك هذه المشاركه


رابط المشاركه
شارك

يااااااااااربى

ايه يا بنتى حرقة الدم دى

لم يعجبنى موقف فتحى خالص المفروض كان يفهم امه ان مروة تعبانه

وبعدين اشمعنى بنتها يعنى مش قادرة تقف هما بنات الناس مابيحسوش

بجد ام فتحى دى فظيييييييييييعة

بصراحة بدات اشيل منها

 

 

 

 

 

 

 

 

مواقف حقيقية فعلا تسلمين هوبه

شارك هذه المشاركه


رابط المشاركه
شارك

:blink: :blink:

 

بصرااااااحة لا تعليييق !!!! (No comment)

 

باااااركَ الله فيكِ حبيبتي هووبة

وبانتظااار بااقي الحلقات بشوووق

شارك هذه المشاركه


رابط المشاركه
شارك

ايه الحلقات الجامدة يا هوبة عن جد تسد النفس ههههه

 

لكن انا احس ان دينا ستمر بنفس الموقف مع حماتها عشان تعرف وكمان امها تحس بذنبها ربي يهديهم

 

 

متابعات معك باقي الأحداث :)

شارك هذه المشاركه


رابط المشاركه
شارك

فتحي

 

نعم يا امي

 

هي الهانم مراتك مش هتحن علينا وتيجي بقى . دي بقالها شهر يابني عند امها

 

هروح اجيبها بكرة ان شاء الله بس يا امي لو سمحتي ما تكلفيهاش فوق طاقتها

 

اخص عليك يا فتحي . هو انا يابني عمري طلبت منها حاجة فوق طاقتها

 

ربنا يصلح الحال . وياريت بقى هالة ودينا يفارقونا الكام شهر دول ولما تحبي تشوفيهم ابقي روحيلهم

 

هي دي الطلبات الجديدة بتاعة الست ؟

 

امي بالله عليكي اذا كنتي هترجعي لنفس المعاملة انا هاخد مراتي وأأجر شقة ونقعد فيها ونبعد عن المشاكل

 

اخص عليك يا فتحي اهئ اهئ اهئ انا بتاعة مشاكل يابني

 

طيب معلش يا امي ما تزعليش حقك عليا . احنا اللي بتوع مشاكل

 

ربنا يهديكو يابني وتبطلوا تعملوا مشاكل . فتحي

 

نعم يا امي

 

انا عايزة اصالح مروة بس كرامتي مش سامحالي

 

بجد يا امي عايزة تصالحليها

 

اصلها بصراحة صعبت عليا والله وهي نازلة واختها مسنداها ووشها اصفر وعنيها مغربة كدة

 

والله يا امي مروة طيبة

 

والله وانا كمان طيبة بس الشيطان بيوزني عليها مش عارفة ليه

 

يا امي استعيذي بالله من الشيطان وعامليها بما يرضي الله

 

خلاص يا فتحي انا هفتح صفحة جديدة وهسامح مروة على كل اللي عملته فيا

 

ربنا يخليكي يا امي

 

وفرصة حلوة . فرح نسمة بعد اسبوع على المعلم فرج الفرارجي عشان تبقى تحضر انت ومروة . دول هيعملوا فرح كبير اوي اوي

 

 

 

 

 

 

 

 

 

فرج

 

نعم يا انوسة نوسمة

 

جيبت بدلة الفرح

 

بدلة ! هو انا هلبس بدلة عدم الامؤاخذة

 

اومال ناوي تفضحنا وتيجي بجلابية الشغل زي كل مرة وعليك بواقي ريش وريحتك انتن من ريحة الفراخ

 

وليه بس الدخلة الشمال دي يا مودام المستقبل . ليه بس كدة يا نسانيسوا

 

ايه نسانيسوا دي . شايفني نسناسة قدامك . ايه الجليطة دي

 

اومال عدم الامؤاخذة بيدلعوكي بأيه

 

ممكن نسومة أو ناسو

 

ههههههههههه ناسوا هههههههههههه ناسوا وأهله . دا نسانيسوا أرحم

 

بصراحة انا ارفانة منك ومن شغلتك ومن طريقة كلامك ومن كل حاجة انت لازم تتغير

 

طب ماانا مغير الجلابية ومستحمي قبل مااجي وحاطط في شعري فوزلين . اعمل ايه تاني عشان ترضى عني يا جميل

 

انا ناوية ادلعك واقولك يا فروج

 

ههههههههههه على فكرة حبايبنا بتوع لوبنان بيقولوا ع الفرخة فروج . يعني ماروحتيش بعيد يا اونسة نوسمة . شوبيك لوبيك فروج بتاع الفراريج بين ايديك يا جميل

 

يييييييييييييييييييييييييييييييييييي ارحمني يارب

 

 

فين الشاي يا حوماتي

 

الشاي أهو يا معلم فرج

 

تسلم الأيادي يا حوماتي يا وش السعد انتي

 

 

 

ايه ده ايه ده . انتي يابني ادم ايه اللي بتعمله ده

 

عملت ايه يا انوسة نوسمة

 

حد يشرب الشاي بالطريقة دي . اشرب من غير صوت

 

انا مابعرفش استمخ من كوباية الشاي الا لما اشربها بصوت وإلا دماغي ما تتظبطش

 

يا اخي ان شالله ما اتظبطط دماغك . صدعتني بالدوشة اللي انت عاملها دي . انت بتشرب ولا بتزمر

 

وبعدين بقى في قلة المزاج دي . ماتحضرينا يا حوماتي

 

ماتسيبي الراجل يشرب براحته يا نسمة .

 

يسلم فومك يا حوماتي

 

ماقولتليش يا فرج

 

يا عيون فرج

 

البوفيه هيبقى مفتوح ولا نظامه ايه

 

بوفيه ايه عدم الامؤاخذة

 

البوفيه بتاع الفرح . هنأكل الناس ايه

 

الله . واحنا نأكلهم ليه . هما جايين يباركلونا ولا جايين ياكلوا

 

لازم ياكلوا ماينفعش .

 

المحل وصاحب المحل تحت امرك . نجيب كام قفص فراخ واخلي الواد مرزوق يفرقهم ع المعزيم

 

يا اخي حرام عليك . هنفرق فراخ صاحية . انت عايز تفضحنا

 

 

خلاص ندبحها ونريشها ويبقوا ينضفوها هما بقى بمعرفتهم

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×