اذهبي الى المحتوى

المشاركات التي تم ترشيحها

بداية موفقة و مشوقة .. ياريت ماتأخريش علينا :)

حكايات جميلة من أشجان اللي معرفش أتعاطف معاها ولا اكرهها (ما انا مثل بهيرة الرغاية هههه ما حبش اللي يتجوز على مراتو كان الأولى يدور لها على عريس) و خفة دم بهيرة ,و حلاوة أم عصام و هاني الجمييلة (ربنا يهدي ولادها خايفة عليهم من اللي جااي ههه) و أهل رشا

 

متابعين معك .. بالتوفيق

شارك هذه المشاركه


رابط المشاركه
شارك

السلام عليكم ورحمة الله وبركاته

الف مبااارك المسلسل الجديد حبيبتي هوبة يا مبدعتنا الجميلة : )

بداية جميلةة جدا وممتعة تخيلت ت نفسي معهم هههه

متاااااابعة معك كالعااادة من تحت البطانية ههه

شارك هذه المشاركه


رابط المشاركه
شارك

@@حواء أم هالة

 

بطانية ايه في الحر ده يا عم الحج هههههههههههه

شارك هذه المشاركه


رابط المشاركه
شارك

:) وعليكم السلام ورحمة الله وبركاته

حيا الله مبدعتنا وكاتبتنا الرائعة

مبارك المسلسل الجديد يا حبيبة

باين اننا سنعيش احداث رائعة

بداية مشوقة

بهيرة الظاهر انها سكرة المسلسل

نتابع معكِ لنرى ما تخفي ورائها هذه الجدران

 

 

 

 

@حواء أم هالة

 

بطانية ايه في الحر ده يا عم الحج هههههههههههه

 

ههههه

مستنيين جواب يا حواء

شارك هذه المشاركه


رابط المشاركه
شارك

عليكم السلام ورحمة الله وبركاته

مسلسل راااائع وبداية قوية

بس عندى ملاحظه بالنسبه للانسه نسرين

بتقولك كانت فى ديفليه وشافت شوية فساتين

تطلب من والدها الفين جنيه يا بنتى اقل فستان فى ديفليه ما يقلش عن 5000 جنيه

يعنى خليها تروح تطلب من والدها 20 الف جنيه اقل حاجه

ههههههههههههههههههههههه

بس مسلسل رائع صراحة

وهنشوف زوجات ولاد الحاجه ام عصام هيكونو ايه

بس انا حاسه ان اخوهم التالت لما يجى يختار هيختار واحده على اساس دينها

وهتكون احسن زوجه

موفقه حبيبتى

شارك هذه المشاركه


رابط المشاركه
شارك

السلام عليكم ورحمة الله وبركاته

 

كعادتك هوبة تجنني

وسبحان الله نماذج متواجدة بينا فعلا

وما يحزن أن تكون الأم متعبدة لله وكل أمالها أن تزوج أبنائها من فتيات صالحات وتربيهم على ذلك

فيخرج من أحشائها ابن لا يهمه إلا أن يصل سريعا للقمة حتى وإن تزوج ممن تعيش بطريقة غربية بحته لا تمت للإسلام بصلة

والآخر يختار فتاة لمجرد إنها حقانية وذات نسب فقط دون النظر بعلاقتها بالله مع إن هذه فيها أمل لأنها تخاف أن تأكل حق أحد فمن الممكن توجيهها للصواب

أما صاحبة الكلب اللولو فصعب على من مثلها أن يتغير إلا بمعجزة من الله

أما هذه التي وافقت على الزواج لمجرد إن ما فيش لها أحد وتسببت في توتر العلاقة في البيت الأساسي فخليني بعيد أحسن

في انتظار البقية يا هوبة

شارك هذه المشاركه


رابط المشاركه
شارك

تررررررررررررررررررررررررررررررررررررررررررن تررررررررررررررررررررررررررررررررررررررررررررررررررررررررررررررررررررررررررررررررررررررررررن

 

 

مييييييييييييييييييييييين

 

 

افتحي يا حماتي انا حسين

 

حسين ! استخبي يا ياسمين , ابوكي جاي ياخدك

 

 

هيييييييييييييييه بابا باباااااااااااااااااااااااااااا

 

 

يا بت استخبي مش تقولي هيييه بابا !!!!!!!!! ايوة ايووووووووووة هفتح اهووووووو

 

 

اهلا يا حسين

 

السلام عليكم

 

وعليكم السلام خير ان شاء الله

 

 

خير يا حماتي , مش هتقوليلي ادخل ؟

 

اصل انا لوحدي وما يصحش شابة صغيرة زيي تدخل راجل غريب وهي لوحدها عشان بخاف من كلام الناس

 

يا حماتي انا جوز بنتك جوز بنتتتتتتتتتتتتتتك

 

اه صحيح , جوز بنتي يبقى زي اخويا برضو , ادخل يا حسين

 

 

شكرا يا حماتي

 

 

باباااااااااااااااااااا باباااااااااااااااا وحستني

 

 

حبيبتي حبيبتييييييييييييي اهلا حبيبة بابا تعالي اشيلك هووووووووووبا ههههه كدة برضو يا ياسمين تبعدي عن بابا حبيبك ! انا مخاصمك

 

لأ مس تخاصمني , تيتة مس حايزاني امسي

 

هههه لا يا ستي انا جاي اخدك عشان وحشتييييييييييييني اموووووووووووووووووه

 

 

جرا ايه يا حسين ! تاخدها يعني ايييييييييييه هي سايبة ولا سايبة ولا وكالة من غير بواب

 

 

في ايه يا حماتي ! بنتي وجاي اخدها فيها ايه دي

 

لأ مش هتاخدهاااااااااااااااااا

 

 

لا حول ولا قوة الا بالله , انا مش هسيب بنتي أسسسسسسسسسسسسف

 

يا سلااااااااااااااام ما انا سايبالك بنتي , شوفتني جيت في يوم قولتلك هاتهااااااااااا !!!!!!!!!

 

عايزة بنتك خديها وسيبيلي بنتي

 

اخص عليييييييييييك تضحي ببنتي عشان بنتك المفعوصة دي ,حرام عليك يا حسين يا جوز بنتي اهئ اهئ انا قاعدة لوحدي بين اربع حيطان وياسمين مونساني اهئ اهئئئئئئئئئئ حرام عليك تاخدها مني اهئ اهئئئئئئئئئ

 

 

يا حماتي يا حمااااااااااتي انا الف مرة اقولك تعالي عيشي معانا بدل القعدة لوحدك وانتي مش راضية

 

ايوة طبعا ما ارضاش , انا ما برتحش الا في بيتي , ايه اللي يخليني اسيب بيتي واروح عند اللي يسوا واللي ما يسواش والناس تتحكم فيا وفي مستقبلي

 

 

يا حماتي ما هو كمان ما ينفعش اسيب بنتي , انا اسف جداااااااااااا على العموم بهيرة بتجيلك كل يوم خميس وبتقضيه معاكِ هي وياسمين ولو عوزتي أي حاجة اتصلي بيا انا تحت امرك

 

اهئ اهئ لا عايزة حاجة ولا محتاجة اهئ اهئئ خد بنتك يا خويا وورينا عرض كتافك اهئ اهئ

 

 

يلا يا ياسمين يا حبيبتي , فين الصندل بتاعك ؟

 

اهووووووووو اهو يا بابا , هكيبه حسان تلبسهولي

 

طيب يا حبيبتي ههههههه

 

 

اهئ اهئ كدة يا ياسمين ! اهئ اهئ وانا اللي معتبراكِ اختي الصغيرة يا ياسمين , تقومي تبعيني عشان ابوكِ اهئ اهئ يا خسارة الايس كريم والشيكولاتة اللي غرقتك بيهم اهئ اهئ

 

محلس يا تيتة , تحالي حندنا كلي مم

 

 

اكل عندكو ايه يا جعانين انتو ! مع السلامة سلمي على ماما يا ياسمين

 

 

يلا يا ياسمين , عايزة حاجة يا حماتي ؟

 

لأ , سلم على بهيرة بنتي حبيبتي

 

 

الله يسلمك

 

 

 

 

 

 

ترررررررررررررررررررررررررررررررررررررررررن تررررررررررررررررررررررررررررررررررررررررررررررررررررررررررررررررن

 

 

مييييييييييييييين

 

افتحي يا بهيييييييييرة

 

افتحي يا مامااااااااااااااااااااااااااااااااااا

 

 

 

ههههههه اهلا اهلا اهلاا حبايبي , قمر شايل قمر يا نااااااااس حمدالله ع السلامة يا حسين وحشتيني يا ياسمين

 

 

ماماااااااااا

 

حبيبة ماما نور عين مامااااااااا النسمة الرقيقة اللي في حياتي اللي هتجيب البيت عاليه واطيه في غمضة عين ازيك يا حبيبتي امووووووووه , ازيك يا حسين يا حبيبي

 

ههه الله يسلمك يا ستي خدي الفرخة اهيه جبتهالك

 

تعيش وتجيب يا غالي انت يا مهنيني

 

تعيشي يا ستي , بنتك اهيه واخر مرة تسيبيها عند امك , الكلام اتسمع ولا اعيده ؟؟؟؟؟؟؟؟؟؟؟؟

 

 

لا يا حبيبي لا تعيد ولا تزيد , طلباتك اوامر يا حسين يا حبيبي , ياسمينة حبيبتي امووووووووووه وحشتيني

 

وانتي كمان , فين الحروسة بتاحتي

 

الحروسة جوا يا حبيبتي في اوضتك , العبي بنظام وما تبهدليش الدنيا , الاوضة بتاعتك مترتبة وزي الفل , ايااااااااااك ادخل الاقيكي قلبتيها زريبة , الكلام اتسمع ولا اعيد تاني ؟؟؟؟؟؟؟؟؟؟؟؟؟؟

 

مس فاهمة حاكة

 

 

 

 

 

الغدا يا بهييييييييييييييييييييرة واقع من الجوووووووووووووووع واقف سبع حصص على رجلياااااااااااااااا

 

 

حاضر يا حبيبي حاااااااااااااااضر خمس دقايق , مسافة ما تغير هدومك تكون السفرة جاهزة يا حسين يا نور العين وعليها مالذ وطااااااااب ههههههه

 

 

 

 

 

 

 

 

 

 

 

يلا يا حسين الغدا جاهز يا حبيبيييييييييييي الملوخية اللي بتحبها ام طشة ترد الروح , صنية البطاطس اللي تشرح القلب الحزيييييييييين الرز المحمر بالسمنة البلدي يا سبب سعدي , البتنجان المخلل الفاتح للشهية يا نور عنية

 

 

في ايه في ايييييييييييييه , ما تعرفيش تقولي الغدا جاهز وتسكتي !

 

بعرفك المنيو اللي ع السفرا عشان افتح نفسك يا حبيبي

 

بقك ده ما بيتقفلش دقيقتين على بعض !

 

ههههه اخص عليك يا حسين , ما انت بتشوف بقي مقفول وانا نايمة

 

 

حتى وانتي نايمة بتتكلمي برضو يا بهيرة

 

 

ههههههه وماله يا حبيبي اديني بسليك على ما تصحى

 

فين يا سميين , يا سميييييييييييين , ياسمين فين يا بهيرة

 

تلاقيها بتعمل مصيبة وجاية على طول يا حبيبي ما تقلقش

 

 

دشششششششششششش دشششششششششششششششششششششششش مامااااااااااا الكوباية اتكسرت

 

 

 

سامع يا حسسسسسسسسسسسين ؟ بنتك ما كملتش ربع ساعة وكسرت كوباية

 

فداها يا ستي , خدت الشر وراحت , تعالي يا ياسمين اتغدي معايا ومع ماما يا حبيبتي

 

 

تعالي يا ياسمينة كلمي بابا

 

 

انا كيت اهو انا والحروسة بتاحتي ,

 

 

تعالي اقعدي هنا جنب بابا عشان بيحب يأكلك بإيده , والله يا حسين يا حبيبي كل ما اشوفك بتأكل ياسمين بإيدك بفتكر ابويا لما كان بيأكل اخويا محمود بإيده وياخد حتة اللحمة من قدامي ويدهاله , الله يرحمه كان طيب وأمير

 

 

جهل والله يا بهيرة , البنات دول ربنا وصانا عليهم والرسول عليه الصلاة والسلام , ولازم نحسن معاملتهم

 

 

ايوة طبعا , بس الظاهر ابويا مات قبل الهجرة وما لحقش يسمع الوصايا

 

 

خدي طبقك اهو يا ياسمين يلا يا حبيبتي امسكي المعلقة

 

فين طبق الحروسة ؟

 

هههههه العروسة بتعتك اتغدت من شوية , كلي انتي يا حبيبتي من ايد بابا ربنا يخليهولك يارب

 

 

خدي يا ياسمين حتة الكوكو دي اموووووووووه , بقولك ايه يا بهيرة

 

نعم يا عيون بهيرة

 

خالتي وولادها جايين من البلد وهيقعدوا معانا كام يوم

 

يا لهوووووي , قصدي يا مرحب يا الف اهلا وسهلا , ودول ايه اللي فكرهم بينا بعد الشر ؟

 

ابدا , جايين يشوفوا امي

 

طب لما هما جايين يشوفوا امك هيجو عندنا ليه ؟

 

امي هتيجي معاهم

 

يا دي الوقعة المنقرشة يادي الاخبار المزركشة يا دي ليالي الانس اللي هتهل علينا , طيب سؤال اهبل يعني وسامحني فيه عشان عارفني عقلي على ادي , هي امك مش هتستقبلهم في بيتها ليه ؟؟؟؟؟؟؟

 

انتي عارفة يا بهيرة ان شقة امي صغيرة لكن احنا شقتنا بسم الله ماشاء الله واسعة وتساع من الحبايب الف

 

 

تساع من الحبايب الف !!!!!!!! يا اخي يا الف الف الف اهلا وسهلا اهئ اهئ اهئئئئئ يا ضهرك اللي هيتقطم من الخدمة يا بهيرة يا شقتك اللي هتتقلب مخيمات ايواء ومراتب ع الارض يا بهيييييييرة اهئ اهئ

 

بتقولي حاجة يا حبيبتي

 

بقول انا مش عارفة من غيرك انت وامك كانت حياتي بقى شكلها ايه يا حبيبي , ربنا يخليك ليا وما يحرمنيش منك ولا من امك

 

ههههه ولا منك يا ام ياسمين يا قمر , طول عمرك اصيلة وسدادة ومشرفاني قدام الناس

 

يا حبيبي انا هفضل سدادة ومشرفاك لحد ما حيلي يتهد ونفسي يتقطع وتدفني بإيدك يا غالي

 

ههههه ربنا يديكِ الصحة يا حبيبتي , واكيد طبعا لما اخواتي البنات يعرفوا ان خالتي وولادها هنا هيجوا يقعدوا معاها هما وولادهم كام يوم

 

 

.........................................................................

 

 

بهيرة , بهييييييييييييرة . مالك يا حبيبتي ؟ ردي عليا يا بهيييييييييييييييرة , هو انتي كل ما تفرحي يغم عليكِ !!!!!!!!

 

 

هي ماما مالها يا بابا ؟

 

 

هاتي كوباية المية دي عشان افوقها يا ياسمين

  • معجبة 6

شارك هذه المشاركه


رابط المشاركه
شارك

سرفينااااااااااااااز , سرفيناااااااااااااااز , الهانم فين يا فوقية

 

حمدالله ع السلامة يا دكتور هاشم , سرفيناز هانم مع الكوافيرة بتاعتها بتعمل مانيكير وباديكير

 

طب اديلها خبر اني وصلت وقوليلها اني طالغ اغير هدومي وهنزل انتظرها في الهول هي ونسرين

 

 

 

 

 

 

 

حاضر يا دكتور هبلغ سرفيناز هانم

 

سرفيناز هانم , الدكتور هاشم وصل ومنتظر حضرتك انتي ونسرين هانم في الهول تحت

 

 

وصل ! وعايزني انا ونسرين !!!!! مممممم اكيد الموضوع كبير كبير كبير خالص , من فضلك خلصي يا مودمازيل عشان عندي موضوع عائلي

 

 

خلاص اهو يا هانم قربت اخلص

 

 

وانتي يا فوقية بلغي نسرين هانم ان باباها عايزها وانا هحصلهم على طول بعد ما اخلص المانيكير والباديكير

 

 

حاضر يا هانم عن اذنك

 

 

 

 

 

 

 

 

 

 

 

 

كيتيييييي يا كيتي روحتي فين يا قطة يا شقية كيتيييييي بس بس بسسس كيتي

 

 

نسرين هااااااااااااااانم

 

 

هاي دادة فوفو , ما شوفتيش كيتي القطة بتاعتي

 

يا حبيبتي كيتي ايه وبيتي ايه بس دلوقتي , باباكِ عايزك

 

 

سوري , اعتذريله , انا مش لاقية كيتي ومتضايقة خااااااااااااالص

 

يا نسرين هانم ما ينفعش , الدكتور هاشم عايزك انتي وسرفيناز هانم ضروريييييي

 

اوف بقى !!!!!!!! طيب من فضلك دوري على كيتي عشان ساندي اختها زعلانة خالص ومش عايزة تلعب من غيرها

 

 

حاضر يا حبيبتي ! اصحاب العقول في راحة ! ماليانا البيت قطط وكلاب وبتعاملهم زي ما يكونوا من بقيت اهلها

 

 

 

 

 

 

 

 

 

 

 

 

 

هاي هاشم , ازيك حبيبي

 

هاي سرفيناز , ايه الجمال ده يا حياتي ههههه

 

هههههه ميرسي يا روح قلبي , كنت عايزني انا ونسرين في ايه ؟

 

 

استني طيب لما تيجي نسرين

 

 

هااااااااااااااااااااااااي

 

اهي نازلة اهيه

 

 

هااااي دادي هاي مامي

 

هاي حبيبتي

 

هاي يا روح مامي

 

 

اقعدي يا نسرين عشان عايزك في موضوع مهم يا حبيبتي

 

 

أهااااااا ايه هو يا دادي

 

هههههههه الدكتور عصام عايز يتقدملك

 

 

واااااااااااااااااااااااات !! حضرتك تقصد الدكتور الكلاسيك ده اللي شوفته عندك في المستشفى دااااااااااادي ؟؟؟؟؟؟؟؟؟؟

 

ايوة هو يا حبيبتي

 

 

نوووووووووووووووووو نوووووووووووووووووووووو نووووووووووووووووووووووو مرفوووووووووووض , عن اذنكو

 

 

يا بنت يا بنتتتتتتتتتتت تعالي هناااااااااااااااااااا

 

 

في ايه يا هاشم ما تفهمني ايه الموضوع

 

 

اوووووووووووف هقولك عشان تعقلي بنتك يا سرفيناز اللي بتدلع دي , دكتور شاب ناجح ومستقبله باهر ومن عيلة كبيرة ويشرف أي عيلة انها تديله بنتها والهانم بنتك راااااااااااااااافضة

 

ممممم هي شافته عندك صحيح

 

شافته يا ستي ومش عارف ايه وجه اعتراضها على انسان هايل بالشكل ده

 

ممممم يمكن شكله مش امور وجذاب بالنسة لها

 

افندمممممممممممممم ! وعلى العموم يا ستي الولد شكله وسيم وامور حسب مقاييس الوسامة اللي بتحطوها كأساس لاختيار العرسان في عيلتكو الموقرة

 

مممممممم غريبة , طالما دكتور وامور ومن عيلة كبيرة , ليه نسرين رافضة ؟

 

وانا اعرف منيييييييين اتفضلي روحي اسأليها , حاجة غريبة والله

 

 

طيب عن اذنك يا هاشم هطلع اشوف البنت رافضة ليه

 

 

اتفضلي يا هانم , بنات آخر زمن

 

 

 

 

 

 

 

 

يا مامي مش ينفع مش ينفع خااااااااااااااااااااااالص

 

يا روح مامي فهميني رافضة ليه

 

يا مامي عنده شنب عنده شننننننننننننب , عارفة يعني ايه عنده شنب اهئ اهئئئئئئئئئئ يعني مش ممكن يكون رومانتيك اهئ اهئئئئئ يعني لو اصحابي شافوه معايا في النادي هيضحكو عليه ويقولوا اللي جوزها بشنب اهيه العبيطة اهيه اهئ اهئئئئئئئئئ ولا طريقة لبسه يا مامي اهئ اهئ دا لابس بنطلون وقميص موضة سنة ستين اهئ اهئئئئئئئئ انتو كدة اكيد عايزين تموتوني اهئ اهئئئئئئئئئ

 

 

 

اوووووووووو لالالالالالالالا شنب !!!!!!!! انا اجوز بنتي الوحيدة لراجل بشنب ! حاجة تخوف

 

اهئ اهئ شوفتي بقى يا مامتي ان عندي حق اهئ اهئ

 

يا حبيبتي دي عيوب ممكن تتغير , الشنب يتحلق , اللبس يبقى ع الموضة , لكن ما ينفعش دكتور زي ده يترفض يا روح مامي , اسمعي نصيحتي يا نسرين يا حبيبتي

 

ممممممم طيب انا مش هوافق غير لما يحلق شنبه ويبقى على الموضة , اوكيه مامي ؟؟؟؟؟؟؟

 

اوكيه روح مامي اوكيه , هخلي يور داد يحدد معاد معاه وتقعدي وتتشرطي براحتك

 

 

هههههه اذا كان كدة اوكيييييييييييييييييييييه

 

 

 

 

 

 

 

 

 

 

 

 

 

 

 

 

 

 

 

 

 

 

 

ترررررررررررررررررررررررررررررررررررررررن ترررررررررررررررررررررررررررررررررررررررررررررررررن

 

الو

 

السلام عليكم استاذ عبد المجيد

 

وعليكم السلام مين بيتكلم يا فندم

 

انا الرائد هاني زاهر

 

 

ههه ايوة ايوة رشا بلغتني ان حضرتك اخدت الارقام عشان تكلمني , يا ترى خير يا حضرة الظابط

 

ههه خير يا فندم ان شاء الله , لو تسمحلي اجي اخد فنجان قهوة في مكتبك اكون شاكر جدا

 

حضرتك تشرف يا سيادة الرائد

 

يناسب حضرتك الساعة الخامسة مساءا ؟

 

كويس اوي معاد مناسب

 

 

اتفقنا يا فندم , هكون عن حضرتك في المعاد , السلام عليكم

 

وعليكم السلام ورحمة الله يا سيادة الرائد

 

 

 

 

 

 

 

 

 

 

 

 

 

 

هههههه نورت مكتبي المتواضع يا حضرة الظابط

 

ههههه شكرا جزيلا يا فندم

 

اشرب قهوتك

 

ممممم البن ده ممتاز جدا

 

هههه حضرتك واضح انك من عشاق القهوة وبتفهم كويس في نوعية البن

 

هههههههههه ايوة فعلا , مش أي قهوة تعجبني واشربها ولازم يكون البن ممتاز , ندخل في الموضوع عشان ما اضيعش وقت حضرتك

 

اتفضل يا سيادة الرائد

 

والله يا استاذ عبد المجيد انا شوفت الانسة رشا وفي الحقيقة معجب بيها جدا وشوفت فيها الزوجة المناسبة اللي بتمناها , ويسعدني جدا اني اتقدملها بعد موافقة حضرتك وموافقتها طبعا

 

هههه والله حضرتك فاجئتني يا سيادة الرائد , على العموم دي حاجة تشرفني بالطبع , بس طبعا لازم اخد رأيها في الأول

 

طبعا يا فندم طبعا

 

على العموم حضرتك سيبلي ارقامك الخاصة وهبلغ حضرتك اذا البنت وافقت

 

شكرا يا فندم

 

 

 

 

 

 

 

 

 

 

 

 

 

معقول يا عبد المجيد ! الظابط اللي شاف رشا في القسم عايز يخطبها ؟ تكونش يا عبد المجيد فهمته غلط ويكون مشتبه فيها ولا حاجة ؟

 

مشتبه فيها ايه بس يا احساااااااااان , الراجل كلامه واضح وصريح , البنت عجبته وعايز يتقدملها , قولتي ايه ؟

 

 

ههههههه ودي عايزة قواله موافقة وباصمة بالعشرررررررررررة , حد في الدنيا تجيله فرصة يناسب الحكومة ويبقى من الاسياد ويقول لأ !!!!!!!! موافقة طبعاااااااا ههههه ال وانا اللي كنت زعلانة ومش عايزة رشا ترجع القسم تاني ! اتاريها كانت معرفة السعد كله ههههههه

 

طيب اهي رشا جاية اهيه فاتحيها بقى

 

يارشاااااااااااااااا اتخطبتي يا حبيبتي الف مبرووووووووك

 

 

هاااااااا !!!!!! انا اتخطبت !!!!!!! ههه مين خطبني

 

 

ههه سامع بنتك اللي بتتلائم علينا ! يا بنت اطلعي من دول يا بنت , ما انتي عارفة ان حضرة الظابط خد رقم ابوكِ عشان كدة

 

ههه مش واخدة بالي

 

 

ها يا رشا يا بنتي , سيادة الرائد مستني ردي عليه , نرد ع الراجل نقول ايه ؟

 

 

افكر يا بابا

 

 

تفكري ! سيبهالي يا عبد المجييييييييييييد , تفكري دا ايه يا بنتتتتتتتتت بقولك هتتجوزي ظااااااااااااااابط يعني هنأمر ونحكم ع الخلق ونتعالى عليهم والكل هيتمنى يخدمنا يا مرات حضرة الظاااااااااااابط , مبروك عليكِ الجاه والعز , يا صباح الطبنجات الميري والنجوم والنسور والهيبة والمناخير اللي في السما

 

 

 

ايه الكلام الفاضي اللي بيتقوليه للبنت ده يا احساااااااااان ! مين قال ان الظابط يستغل وظيفته ووضعه في التعالي على الناس والتحكم فيهم !!!!!!!!!! الظابط المفروض يكون في خدمة الشعب , مش الشعب هو اللي في خدمة الظابط واهله !!!!!!!!!! على العموم انا لما وافقت عليه لبنتي ده لاني لمست فيه حسن الخلق مش عشان هو ظابط شرطة

 

ما تسمعيش كلام ابوكِ يا بنت , مرات الظابط دي من حقها تأمر وتنهي زيه بالظبط وتتعالى ع الناس ومناخيرها تبقى في السما واللي مش عاجبك لفقيله تهمة واحبسيه , وأهو مفاتيح الزنازين مع جوزك

 

 

مممممممم ههههه موافقة يا بابا

 

على خيرة الله يا بنتي

 

, مبسوطة يا ماما ؟ ههههههه

 

 

هههههههه اوي اوي اووووووووووي يا عيون مامااااااا يا مشرفة ماما ورافعة راس ماما يللي ماما هترفع مناخيرها في السما على حسك وتأمر وتتأمر ع الخلق , مانا حماة حضرة الظابط هههههههههههههههه

 

 

 

 

 

 

 

 

 

 

 

اهلا يا عصام يا ابني , ايه رأيك في قعدة الجنينة جنب البسين كدة ؟ هههههه

 

ههههه القعدة هنا ظريفة جدا حقيقي

 

 

انا اسف طبعا اني قولتلك نسرين حبت تشوفك على انفراد عشان عندها شوية شروط قبل ما تشرفنا انت والست الوالدة

 

 

يا دكتور هاشم انا تحت امر الانسة نسرين وشروط الانسة نسرين , شروطها كلها مجابة

 

 

 

اهي نسرين جت اهيه هي وروكي هههههه

 

 

هوووووووووووو هوووووووووو ههوووووو هوووووووووووووووووو

 

 

بس يا روكي , هااااااااااااي

 

 

هاي يا انسة نسرين

 

طب اسيبكو انا لوحدكو عشان تتفقوا براحتكو وتسمع شروط نسرين , عن اذنكو

 

 

 

اتفضل يا دكتور هاشم

 

 

ازيك يا انسة نسرين

 

 

هاي . ازيك

 

ههه كويس , انتي عاملة ايه , ازيك يا رووووووكي , لطيف اوي الكلب بتاعك ههههه

 

ثانك يو

 

الدكتور هاشم قالي ان حضرتك عندك شروط للموافقة على الجواز

 

أهااااااا

 

 

هو هو هوووووووووووووووووو هو هوووووووووووووووووووو

 

 

اتفضلي انا سامع يا فندم

 

 

شنبك

 

 

شنبي !!!!!!!!!!!!!!!! مش فاهم

 

 

مش عايزاه

 

 

ههههههههه مش عايزاه في ايه , دا شنبي انا مش شنب حضرتك

 

شكله معسبني معسبني معسبنيييييييييييييييي

 

معسبك !!!!!!!!!! ومعصب حضرتك ليه

 

 

يا دكتور انت المفروض تكون سبور وما فيش راجل سبور عنده شنبات في وشه , شكلك بالشنب متوحش وبيخوفني اهئ اهئئئئ يا ماميييييي

 

للدرجة دي !!!!!!!! خلاص يا ستي انا, مافيش داعي للشنب خااااااااااااااالص

 

 

 

هو هو هووووووووووووووووووو هووووووووووووووووووووووووووووووووو

 

وهدومك دي اللي جايباها من الكرون الوستى مش تنفع خااااااااااااالص المفروض تلبس اخر فاشوووووووووون

 

قرون وسطى !!!!!!!!! انا بلبس كلاسيك

 

سوري مش بحب الكلاسيك , انا احب الراجل المودرن , الراجل الاسبووووووووور

 

 

مممممممم خلاص يا ستي , دي طلبات بسيطة جدا جدااااااااا , هخرج من هنا على الحلاق احلق شنبي واروح اشتري هدوم سبور عشان اعجب حضرتك

 

هههههههه كدة انت هايل

 

يعني موافقة

 

اهااااااا

 

هههههه اشكرك يا انسة نسرين

 

 

 

 

 

 

 

 

 

 

 

 

اووووووووووووف انا مش عارف بعد ما حلقت شنبي هوري وشي لامي ازاي , دي كانت عايزاني اربي دقني , اقوم احلق شنبي ! ممممم ربنا يستر من رد فعلها بقى لما تشوفني بالمنظر ده وبالهدوم دي

 

 

انت جيت يا عصام يا حبيبي

 

 

ايوة ايوة السلام عليكم

 

 

انت مالك داخل بجنبك كدة وحاطط ايدك على بقك , وايه اللبس دددددددده !!!!!!!! ايه يا ابني المسخرة دي ! فين وقارك يا دكتور , انت اتجننت يا عصاااااااااااااام!

 

 

ههههههه اتجننت ايه بس يا امي ! انا لسة شاب صغير , ايه اللي يكتفني في اللبس الكلاسيك والبدل , انا محتاج اعيش سني

 

مممممممممممم فهمت , والله اعلم بكرة هتتنازل عن ايه . انت حرررررررررر , بس انا بصراحة يا ابني ما حبش الست اللي تمشي كلامها على راجل , والست اللي تهتم بالشكليات الفارغة دي تبقى سطحية وعقلها فارغ

 

 

ايه يا امي اللي بتقوليه ده ! انا اناااااااا أأأ انا اللي قررت اغير الاستيل بتاعي مش حد أمرني بكدة

 

 

تصبح على خير يا عصام يا ابني

 

 

 

 

 

 

 

 

 

 

 

 

 

 

 

 

 

 

 

 

يلا يا اميييييييي اهل نسرين منتظرينااااااااااااا وعايزين نخلص بسرعة عشان هتروحي بعد كدة مع هاني عند اهل عروسته

 

 

اه ياااااااااااني يعني يا ولاد لازم انتو الاتنين تحددوا مواعيد في يوم واااااااااااااحد ! كان يجرا ايه لو واحد حدد معاد النهاردة والتاني حدد بكرة ولا بعده

 

 

هههههههه انا وهاني مستعجلين يا ماما , وبعدين دي قعدات تعارف

 

تعارف ! بتضحكو علية ولا على نفسكو , انتو متفقين على كل حاجة وواخديني صورة ورأيي ما يهمكوش في أي حاجة , يلا زي بعضه , اهم حاجة ان دي اختياراتكو وانتو المسؤولين عنها , يلا يا دكتور توكلنا على الله

 

 

هههههه ربنا يخليكِ لينا يا ست الكل , ايدك ابوسها امووووووووووووه

 

 

 

 

 

 

 

 

 

 

 

 

 

هههه شرفتينا يا مدام أمينة

 

الشرف ليا انا مدام سرفيناز

 

 

تحبي نقوم من الجنينة وندخل الفيلا ؟

 

لالالا هنا كويس اوي , خلينا في الهوا

 

اشربي الجوس بتاعك

 

اسفة والله , انا صايمة

 

صايمة !!!!! هو رمضان جه امتى ؟ ماحدش قالي

 

يا سرفيناز هانم , رمضان لسة ماجاش , انا اللي متعودة اصوم اتنين وخميس

 

يا خبر !!!!!! طول السنة !!!!!!! انا بستغرب من الناس اللي بتصوم رمضان اقوم الاقي ناس بتصوم اتنين وخميس !!!!!!!

 

لا حول ولا قوة الا بالله ! هو حضرتك ما بتصوميش رمضان يا سرفيناز هانم

 

نوووووووووو

 

ليه يا فندم ! الصيام في رمضان فررررررررررض

 

والله !!!! زي الصلاة تقريبا ؟ , انا اسمع ان الصلاة فرض برضو

 

لا اله الا الله . هو حضرتك ما بتصليش ؟؟؟؟؟؟؟؟؟؟؟

 

في الحقيقة لا , انا مشغولة جداااااااا جدا جدااااااااا

 

مشغولة بايه يا هانم

 

مشغولة بالجمعيات الخيرية والعمل العام , عندي اكثر من نشاط ومن ضمنهم جمع التبرعات لفقراء جاردن سيتي والزمالك

 

 

جاردن سيتي والزمالك !!!!!! هو في فقراء في جاردن سيتي والزمالك برضو يا سرفيناز هاااااااااااانم !

 

طبعا مدام امينة , الفقراء اللي مش قادرين يغيروا موبيليات بيتهم كل سنة ومش قادرين يغيروا العربيات بتاعتهم اهئ اهئئئئئئئئ هحكي لحضرتك قصة اليمة الييييييمة اهئ اهئ واحدة مسكينة من دول يا حرام بقالها خمس سنين , خمس سنين يا امينة هانم مش قادرة تغير عربيتها اهئ اهئئئئئئئئئئ يعني دي بقى نسيبها تنحرف ولا تسرق عشان تغير العربية !!!!!!!! طبعا لازم نتكاتف كجمعية بتدعم الفقراء ونجمع لها تمن عربية جديدة اهئ اهئئئئئئ اعصابي بتتعب اوي كل يوم لما بشوف المآسي دي قدامي اهئ اهئ ما بنامش كل ما افتكر دموع الست المسكينة دي اهئ اهئئئئئئئئئئئ

 

 

اللهم لا حول ولا قوة الا بالله , يا هانم في ناس بتنام تحت الرصييييييييييييف في ناس بتاكل من الزباااااااااااااالة وانتي تقوليلي ناس مش قادرين يغيروا العربية والموبيليا !!!!!!!!!

 

 

ياكلوا من الزبالة !!!!!! طب ليه !!!!! يروحوا ياكلوا من جروبّي , بلاش جروبّي يرحوا ياكلوا من كنتاكي , البلد مليانة مطاعم شيك

 

ممممم عندك حق يا مدام سرفيناز , لا حول ولا قوة الا بالله , دي ناس مش حاسة بالفقرا ولا كأنهم عايشين في دنيتنا

 

والتانين اللي بينامو ع الرصيف دول , غلطانين خالص خالص عشان كدة هياخدوا برد وهيفضلوا يعطسوا طول الليل ممممم تصوري يا مدام امينة ! حضرتك اوحتيلي بعمل عظيم جدا لازم اقوم بيه بالنسبة للناس اللي بينامو تحت الرصيف دول

 

 

خير يا مدام سرفيناز , لقيتيلهم حل يرحمهم ؟

 

انا هطبع ورق ملون على حسابي من نوعية فاخرة جدا في ارقى المطابع وهنكتب فيه اسماء اشهر واكبر الاوتيلات في القاهرة ونوزعه ع الناس اللي بينامو تحت الرصيف دول , عشان اكيد اكيد هما ما يعرفوش عنواين الاوتيلات دي وعشان كدة بينامو تحت الرصيف

 

ااااااااه يا دمااااااااغي , الله يسامحك يا عصام يا ابني الله يسامحك

 

 

مالك يا مدام امينة

 

تعباااااااااااانة دماغي هتنفجررررررررر

 

سلامتك خاالص

 

 

هي فين العروسة ولو ان الجواب باين من عنوانه , لا امها محجبة ولا تعرف حاجة عن دينها ولا هي محجبة واكيد زي امها في كل حاجة

 

اهي نسرين جاية هناك اهيه ومعاها روكي الكلب الولو بتاعها هههه

 

 

 

هاااااااااااااااااي

 

 

 

يا خبر ابيض !!!!!!!! ايه اللبس الخليع ده !!!!!!!!! الولد عصام ده اكيد اتجنننننننن اتجنن , دي ممكن تكون زوجة ابني وام احفادي !!!!!!! انا مش ممكن اسمح بالمهزلة دي ابدااااااااااااااااااااااااااااااااااا

  • معجبة 1

شارك هذه المشاركه


رابط المشاركه
شارك

منورين يا بنااااااااااااااااااااااااااااات

 

ليا عودة للترحيب بكرة ان شاء الله ولتكملة باقي الحلقات

 

 

اسيبكو مع الحلقات دي وانتظروا ما هو آت من مفاجآت ههههههههههههه

 

 

ان شاء الله

شارك هذه المشاركه


رابط المشاركه
شارك

حلقات رااااااااائعه هوبه

تسلميلنا ياقمر

شكل الاحداث هتسخن قوووى بكرة

منتظرين زيارة عائلة حسين الموقرة لبهيرة ووقوف أم عصام امام المهزلة ال ابنها ناوى عليها

للاسف فى شباب كتير <هداهم الله > لايهمهم الا الحسب والنسب والجمال ولا يفكرون فى الدين والاخلاق

متابعه معك بشوق هبة الحبيبة

شارك هذه المشاركه


رابط المشاركه
شارك

تسلم ايدك هبه الغالية

دائماً متألقه

ربنا يحفظك يارب ويجعله في ميزان حسناتك

شارك هذه المشاركه


رابط المشاركه
شارك

السلام عليكم ورحمة الله وبركاته

 

في ايه في ايييييييييييييه , ما تعرفيش تقولي الغدا جاهز وتسكتي !

 

بعرفك المنيو اللي ع السفرا عشان افتح نفسك يا حبيبي

 

بقك ده ما بيتقفلش دقيقتين على بعض !

 

ههههه اخص عليك يا حسين , ما انت بتشوف بقي مقفول وانا نايمة

 

حتى وانتي نايمة بتتكلمي برضو يا بهيرة

 

ههههههه وماله يا حبيبي اديني بسليك على ما تصحى

 

ههههههههه أعوذ بالله من الشيطان الرجيم .. حتى وهي نايمة : )

 

بقول انا مش عارفة من غيرك انت وامك كانت حياتي بقى شكلها ايه يا حبيبي , ربنا يخليك ليا وما يحرمنيش منك ولا من امك

 

لحقتي نفسك يا بهيرة -_- يا ريت كانت دي أصل العاملة من البداية!

 

ههههه ربنا يديكِ الصحة يا حبيبتي , واكيد طبعا لما اخواتي البنات يعرفوا ان خالتي وولادها هنا هيجوا يقعدوا معاها هما وولادهم كام يوم

 

.........................................................................

هههههههههه حلوة نقاط الإغماء دي : )

..

هاشم حاف كده يا نسرين؟ : )

افندمممممممممممممم ! وعلى العموم يا ستي الولد شكله وسيم وامور حسب مقاييس الوسامة اللي بتحطوها كأساس لاختيار العرسان في عيلتكو الموقرة

............

 

بس عشان نتعالى على الناس وتبقى حماة حضرة الضابط!!!

ايه الكلام الفاضي اللي بيتقوليه للبنت ده يا احساااااااااان ! مين قال ان الظابط يستغل وظيفته ووضعه في التعالي على الناس والتحكم فيهم !!!!!!!!!! الظابط المفروض يكون في خدمة الشعب , مش الشعب هو اللي في خدمة الظابط واهله !!!!!!!!!! على العموم انا لما وافقت عليه لبنتي ده لاني لمست فيه حسن الخلق مش عشان هو ظابط شرطة

 

تعجبني يا عبد المجيد : )

 

شنبك

ههههههههههههههه

 

 

مممممممممممم فهمت , والله اعلم بكرة هتتنازل عن ايه . انت حرررررررررر , بس انا بصراحة يا ابني ما حبش الست اللي تمشي كلامها على راجل , والست اللي تهتم بالشكليات الفارغة دي تبقى سطحية وعقلها فارغ

........

 

اهئ اهئ ما بنامش كل ما افتكر دموع الست المسكينة دي اهئ اهئئئئئئئئئئئ

..........

 

جمييل هبوش زادكِ الله من فضله .. متابعة معاكِ : )

تم تعديل بواسطة صـمـتُ الأمــل

شارك هذه المشاركه


رابط المشاركه
شارك

ههههههههههههههههههههههههههههههههههه

فظيييييييعه بهيرة دي ..

عثثثثثثل شربااااااااااااااااات ههههههههههههههههه

 

تلاقيها بتعمل مصيبة وجاية على طول يا حبيبي ما تقلقش

 

هههههههههههههههههههههه حلوة دي .. وكمان متقلقش هههههههههههه

 

جهل والله يا بهيرة , البنات دول ربنا وصانا عليهم والرسول عليه الصلاة والسلام , ولازم نحسن معاملتهم

 

 

ايوة طبعا , بس الظاهر ابويا مات قبل الهجرة وما لحقش يسمع الوصايا

 

هههههههههههههههههههههههههههه

لا تعليق

 

 

نسرين دي انسانة تافهه وان شاء الله مش هتكمل مع عصااام

 

 

 

احسان بقى انا حاسة انها تعبااانة في مخها . ربنا يعافينا

 

تسلمي يا خالتو هوووووووبة

الحلقات نحفففففففففففة ما شاء الله . وبدأنا نسخن أهو هههههههه

شارك هذه المشاركه


رابط المشاركه
شارك

رآآآآئع هبهوبة

 

بهيرة صعبانة علي أوي بتفكرني بمروة مرات فتحي ^ــــــــــــــــــــــــــــــ^

 

الدكتور عصام ده بئه مش عايزة أسمع اسمه تاني هههههههههههههههههههه الحمد لله إن أمه مااتشلتش لما شافت مربية القطط والكلاب دي

 

بارك الله فيكِ حبيبتي وفي انتظار حلقاتك الأروع إن شاء الله علشان نشوف أخرتها ايه مع الناس دي :D

  • معجبة 1

شارك هذه المشاركه


رابط المشاركه
شارك

@@هدوء الفجر

 

بسم الله الرحمن الرحيم طلعتي منين يا بنت انتي

 

وأنا عمالة أقول فينك

 

حمدا لله بالسلامة

شارك هذه المشاركه


رابط المشاركه
شارك

حلقات خطييييييييييييييييييييييييييييييييرة

دي ام بهيرة طلعت في التراوة خالص اكتر من بنتها

هههههههههههه

بهيرة عسل

ولا ياسمين

 

يا اخي يا الف الف الف اهلا وسهلا اهئ اهئ اهئئئئئ يا ضهرك اللي هيتقطم من الخدمة يا بهيرة يا شقتك اللي هتتقلب مخيمات ايواء ومراتب ع الارض يا بهيييييييرة اهئ اهئ

 

بتقولي حاجة يا حبيبتي

 

بقول انا مش عارفة من غيرك انت وامك كانت حياتي بقى شكلها ايه يا حبيبي , ربنا يخليك ليا وما يحرمنيش منك ولا من امك

 

ههههه ولا منك يا ام ياسمين يا قمر , طول عمرك اصيلة وسدادة ومشرفاني قدام الناس

 

يا حبيبي انا هفضل سدادة ومشرفاك لحد ما حيلي يتهد ونفسي يتقطع وتدفني بإيدك يا غالي

 

ههههه ربنا يديكِ الصحة يا حبيبتي , واكيد طبعا لما اخواتي البنات يعرفوا ان خالتي وولادها هنا هيجوا يقعدوا معاها هما وولادهم كام يوم

 

 

.........................................................................

 

 

بهيرة , بهييييييييييييرة . مالك يا حبيبتي ؟ ردي عليا يا بهيييييييييييييييرة , هو انتي كل ما تفرحي يغم عليكِ !!!!!!!!

 

هههههههههههههههههههههههههههههه

فظيييييييييييييييييييييييييييييعه

انا فضلت اضحك وبنتي بصالي مش فاهمة في ايه

هههههههههههه

 

 

عصام دا

مش عاجبني شخصيته خالص

دلدوووووول

انا فكرت انه ناوي يخطبها ويعدلها

اتاريه هي الي هتمشيه زيها

 

سرفيناز

اسم غريب ومنها كتير بنفس افكارها

 

بس ازاي يا جماعه في حد ميغيرش عربيته لمده خمس سنين ؟؟؟

انا عن نفسي مشفتش كدا في حياتي

هههههههههههههههه ازاي كدا

  • معجبة 1

شارك هذه المشاركه


رابط المشاركه
شارك

وعليكم السلام ورحمة الله وبركاته

رائع يا هوبة اللهم بارك

بهيرة حتة سكرة اه يا مرارتي من الضحك

سافيناز هانم لا والله وفكرت باللي بيناموا على الرصيف

اوراق على حسابها وعليها اسماء افخم الاوتيلات الله المستعان

ربنا يكون في عونك يا أم عصام : )

في ناس كتير مش شايفة قدامها

نتابع معك يا سكرة

شارك هذه المشاركه


رابط المشاركه
شارك

ياخبر ايه الوليه اللى اسمها سارفيناز دى

طبيعى جدا ان بنتها تكون كده

 

شكل ام عصام هتاخد موقف اهيه من الجوازة دى

 

رائع هوبه تسلمى ياقمر

شارك هذه المشاركه


رابط المشاركه
شارك

^___________^

قرأت عدة فقرات فقط

وإن شاء الله أكمل غدا

ولكن بصراحة ما حبيت أخرج بدون أن أحيي مدام بهيرة

حقيقي عسولة ..عيبها هو ميزيتها في نفس الوقت

شارك هذه المشاركه


رابط المشاركه
شارك

السلام عليكم ورحمة الله وبركاته

 

حلقات ممتعة يا هوبة

 

هههه الست بهيرة عسولة خالص مالص :))

 

اما البت اللي ما تتسماشي دي مش تصلح للزواج لكن عصوم ده حيندم في الآخر طبعا لكن بعد فوات الأوان =)

 

متابعات معك يا مبدعتنا الرائعة

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×