خلف هذه الجدران

[~ محبة صحبة الأخيار~ 354]

السلام عليكم ورحمة الله وبركاته ،

أخواتى الحبيبات كيف حالكن ؟ : ))))

أوافق الأخوات في توقعاتهن بأن ما يفعله وليد ليس سلبيا ولكنه يحتاج

لوقت في اتخاذ قرار حاسم كهذا لما سينتج عنه من خلافات أكبر بين العائلتين .

وأيضا أعتقد أن كل ما ستخبر به جيرمين للمغازي أن يفعله هو من تخطيط وتفكير هانى .

 

لى بعض التعليقات على القصة ككل ولكنى لم أكتبها فى وقتها فسأكتبها قبل أن أنساها :

 

****وهى أن الأم يجب عليها تربية أبنائها تربية اسلامية صحيحة وتعويدهم علي الأخلاق والسلوكيات الحميدة

وبذلك تكون أدت ماعليها ، حتى إذا شب أحد أبنائها مختلفا عن بقية أخواته فى سلوكة وأفعاله فليس

اللوم عليها هنا كما هو الحال مع أم عصام ، وفي الحقيقة مثلها كثير .

فكثيرا ما نجد الأم الصالحة وأبنائها مثلها الا أنه قد يشذ بعض الأبناء ، فهذا ليس بدافع لأي أم أن تتحجج

به وتقول انظري إلي فلانة كيف تربى أبنائها ولكن أحدهم سلوكياته وأخلاقه لا تطاق فلماذا أتعب

نفسى مع أبنائى فأكيد سيكون هناك منهم الصالح والطالح لأن البيئة لها دور في تربيتهم والمجتمع

الخارجى له أيضا دور في التأثير عليهم ..... وبالتالى تتناسى دورها فى التوجيه والارشاد والتربية

الصحيحة التى هى مأمورة بها ،،

 

 

 

****أيضا ليتنا نستفيد من القصة أن الانسان اذا وقع في خطأ فعليه أن يراجع نفسه بما يرضى الله

لأنه لو أراد تعديل خطأه على هواه فستكون النتيجة خطأ أشد من السابق (كما حدث مع عصام وأيضا أمانى

التى مرت بتجربة زواج فاشلة ولكنها تعيد الكرّة دون أن تتعلم وتركت ابنها اقرب الناس اليها ).

 

 

**** سعاد التى دبرت وكادت لتخطف زوج من زوجتة بعد أن عقد عليها مر الزمان بها

ورأت بعينيها من تأخذ زوجها منها ( فكما تدين تدان )

أما الأخري كريمة التى لم يقدر لها الزواج من عادل فقد رزقها الله خير زوج بعد أن مرت بأصعب المواقف

( وعسى أن تكرهوا شيئا وهو خير لكم ) فتقدير ربي كله خير .

 

منتظرين مفاجآتك ياهبة بس لا تتأخري علينا : )) .

[هبة عبد العظيم نور 2042]

ترررررررررررررررررررررررررررررررررررررررن تررررررررررررررررررررررررررررررررررررررررررررررررررررررررررررن

 

التليفون بيرن يا مامااااااااا

 

ردي يا رحمة , اني بنحضروا الفطار يا حبيبتي

 

 

حاضررررر , الوووووووو

 

ههههه اهلا اهلا يا صباح الفل والياسمين

 

انت مييييييييييين ؟

 

انا ابوكِ يا بت هههههه مش عارفة صوتي !

 

ههههه ازيك يا بابا , مش جيت عندنا ليه , انت وحشتني

 

وانتِ كمان والله يا حبيبتي , اومال فين ماما ؟

 

ماما في المطبخ بتعمل فطار , هي ابلة اوسا جابت نونو ؟

 

ههههه ايوة يا حبيبتي , جابت نورهان

 

يعني ولد ولا بنت ؟

 

ههههههههههه يا بت انتِ في ولد هيسموه نورهان برضو !!!!!!

 

انا اعرف بقى ! استنى يا بابا , اوعى تمشي من التليفون , هناديلك مامااااااااا

 

ههههه ماشي يا عسل

 

يا مامااااااااااااااا تعالي كلمي باباااااااااااااا

 

بابا ههههه طيب اني جاية اهو

 

 

 

الو , ازيك يا عادل

 

ازيك انتِ يا اشجان

 

تَوَك ما افتكرت تتصل يا راجل ! مش كان المفروض تتصل تطمني على بنتك من امبارح ؟

 

نعملوا ايه بس يا اشجان , اصل انتِ ما تعرفيش اللي حصل للبت

 

يا لهوي ! خير , خضتني يا عادل

 

لا ما تتخضيش , ربنا سلم الحمدلله , الدكاترة نسيوا في بطنها فوطة وفتحوا بطنها مرتين , مرة عشان يطلعوا العيل ومرة عشان يطلعوا الفوطة

 

معقووووووووووووول , ايه ده ! انت وديتها تولد في مستشفى حكومي ولا ايه !

 

وده معقول برضو يا اشجااااااااان ! اني وديتها مستشفى كبيرة وبمصاريف غالية والله , بس نعملوا ايه في الاهمال , بس احمد ما سكتش , قدم فيهم بلاغ في الشرطة غير البلاغ اللي قدمه لوزارة الصحة , والتحقيقات شغالة وان شاء الله المستشفى هتتقففففففففففففففل , الله يباركله احمد ابني والله

 

احمد طول عمره جد وحقاني وما يسكتش ع الغلط , الحمدلله , قدر ولطف يا عادل , مش البت كويسة دلوقتي ؟

 

الحمدلله , امها قاعدة معاها في المستشفى من امبارح

 

والله يا عادل لو كانت علاقتي بيها كويسة ولا هي بتقبلني من اصله كنت اتصلت قولتليها حمدلله على سلامة البت يا سعاد , لكن انت عارف اللي فيها

 

ولا يهمك يا اشجان , اني عارف ان قلبك عليا وعلى ولادي وعمرك ما كَرَهتي حد , نشوفوا وشك بخير الاسبوع الجاي بقى ان شاء الله , مع السلامة

 

الله يسلمك يا عادل , يلا يا رحمممممممممممة , يارحمة يللي لزقتي قدام التليفزيوووووووووووووون

 

 

بستنى برنامج سينما الاطفال يا مامااااااااا , عشان اول ما يجي هروح اقول لياسررررررررر

 

طب تعالي افطري , لسة فاضل يجي نص ساعة ع البرنامج

 

طيب , عملتيلي ايه فطار ؟

 

هههههه يا سلام ع الدلع , عملتلك يختي بيض اومليت

 

لالالالالالالا مش عايزاه

 

ليه بقى ! انتِ كنتِ بتحبيه وعلى طول تطلبيه

 

ما بقتش احبه , زهقت منه بقى , انا هاكل جبنة رومي اللي انتِ بتقولي عليها تركي وبتضحكي عليا

 

اني يا بت بنضحك عليكِ ههههههه هي اسمها جبنة تركي

 

لا يا ست ماما , انا قولت كدة للعيال في المدرسة ضحكوا عليا , قالولي اسمها جبنة رومي يا عبيطة , مامتك بتضحك عليكِ

 

هههههههه لا يا حبيبتي , قوليلهم ماما اسكندرانية واهل اسكندرية بيقولوا عليها تركي

 

طب قولي عليها رومي زينا عشان ما حدش يضحك عليكِ

 

ههههه حاضر يا ست رحمة يللي معلماني الادب , يلا كلي بقى عشان البرنامج ما يبدأش فجأة وتسيبي الاكل وتجري

 

انا باكل اهو

 

مش اختك اوسا طلعوا من بطنها فوطة

 

فوووووووووووطة ! هو النونو كان بيستحمى جوا وكان معاه فوطة ؟

 

هههههه لا , الدكاترة يا عيني نسيوها في بطنها

 

معلش يا ماما , يمكن كانت بطنها مبلولة من جوا عشان كدة سابوا جواها فوطة

 

هههههه على رأيك يارحمة , كلي يختي كلي

 

 

 

 

 

 

 

 

 

 

 

 

 

 

 

يا ياسيرررررررررررررررررررر دببببببببببب دببببببببببببب دببببببببببببببببببببببببب يا ياسيرررررررررررررررررررررر دددددددددب دببببببببببببببببببببب دببببببببببببببببببببب

 

 

هههههههه عن اذنك يا حسين , افتح للمخبر اللي هيكسر الباااااااااب

 

هههه روحي يا ستي

 

 

 

 

اهلا يا ست رحمة

 

ازيك يا طنط بهيرة , فين ياسيرررررررررر

 

ياسر بيستحمى عقبال عندك

 

انا استحميت قبل ما انام , ازيك يا عمو حسسسسسسسسسسين

 

هههه اهلا يا رحمة ازيك يا حبيبتي

 

انا كويسة , انا بحبك يا عمو , عشان ماما قالتلي وانا نونو كنت عيانة بالليل وانت وديتني للدكتور

 

ههههه انتِ بنتي يارحمة

 

هههههههههه ماشاء الله اصيلة زي امك وبتفتكري الجميل يا بنت اشجان , تعالي اقعدي

 

لا انا مش فاضية انا عايزة ياسيررررررررر

 

يا بنتي بقولك بيستحمى

 

قوليله كفاية كدة , تعالى كلم رحمة

 

 

اهو خرج اهو

 

رحمممممممممممممممممممممممممة هههههههه ازيك يارحمة

 

ازيك انت يا ياسر , انت كمان حاطط فوطة على رقبتك

 

ايوة , كنت بتنشف بيها

 

عارفة يا طنط بهيرة , اختي اوسا بلعت فوطة

 

ايييييييه هههههههه اختك بلعت فوطة ازااااااااااي

 

ايوة , ماما قالتلي الدكاترة طلعوا من بطنها فوطة النونو كام بيتنشف بيها

 

هههههههه ماشاء الله , النونو طالع بيحب النضافة من يومه , اكيد طبعا الموضوع غير كدة خااااااالص , لما حسين ينزل هروح اسأل امك ايه اللي حصل , بقى انتِ ما مفعوصة انتِ بقيتِ خااااااااالة هههههههه

 

لا , انا بقيت انام بدري , يلا يا ياسر عشان تلعب معايااااااااااا

 

طيب , انا رايح العب مع رحمة يا ماما

 

سرح شعرك الاووووووووووول

 

هاخد المشط معاياااااااااااا , باي باي يا بابااااااااا

 

طب ما تتأخرش عشان تروح تصلي الجمعة مع بابااااااااااااا

 

حاضر يا مامااااااااااااااااااااا

 

 

وبعدين يا بهيرة !

 

في ايه يا سونسون ؟

 

الولد والبنت متعلقين ببعض اوي اكتر من الازم

 

ههههه يا حسين عادي يا حسين , من سن بعض وفي مدرسة واحدة وكمان رحمة غلبانة مالهاش حد هي وامها , يعني احنا نعتبر بالنسبة لهم الأسرة اللي اتبنتهم ههههه

 

ايوة يا بهيرة انا ما قولتش حاجة , لكن انا خايف بعد كدة التعلق ده يتحول لحب

 

يتحول لحب ! ههههههههه يا صباح الحب يا سونسون لالالالا ما تخافش , اول ما يبلغوا هنفصلهم عن بعض , احنا ما نحبش الحال المايل هههههه , احنا بس سايبنهم براحتهم عشان اطفااااااااااااال

 

مممممم طيب , هاتيلي الشاي في الصالون , هروح اقرا الجورنال اشوف اخبار الدنيا

 

ههههه حاضر يا سونسوووووووون , ربنا يطمنك ع الدنيا وعلى اخبارها , ياسميييييييييين , تعالي يا حبيبتي خدي كوباية الشاي لبابااااااااا

 

حاضر يا ماماااااااااااا

 

يحضرلك الخير يا قلب ماما , يا مراضياني يللي ما بتقوليش غير حاضر وطيب , فرحني بيها يااااااااااارب

 

 

 

 

 

 

 

 

 

 

 

 

 

 

انا ماشية باي يا صاصووووووو يلا يا ايتين

 

يلا يا مامي

 

رامي بقى كويسسسسسسسس ابقي عدي خديه من عند امي

 

اوكيه , هاخده واوديه عند مامي في الفيلا مع ايتين يلا يا روووووووووكي حبيبي يا روووووووكي ههههههه

 

هووووووووووووووو هووووووووووووووووووووووو هووووووووووووووووووووووو

 

 

 

 

 

 

 

 

 

 

تررررررررررررررررررررررررن تررررررررررررررررررررررررررررررررن

 

 

هوووووووووو هوووووووووووووووو هوووووووووووووووووووو

 

 

مين

 

انا يا طنطي , انا نسرين

 

نسرييييييين !!!!

 

 

هاي طنطي

 

اهلا نسرين

 

 

عايزة رامي عشان اخده معايا

 

لحظة واحدة , رامي , تعالى كلم ماما يا حبيبي

 

اوكيه تيتة

 

 

 

راااااااااامي هههههه هاي ماي بيبي , ازيك

 

ازيك مامي ههه ازيك ايتين ازيك روووووووووووووكي وحشتني كتير روووووووكي

 

هههههه انت تحب روكي رامي

 

يسسسسسسسسسس يس مامي هههههههههه روكي حبيبي

 

هههههههه سامع يا روكي , رامي يحبك كتيرررررررر

 

هوووووووووووووو هوووووووووووووووووو هوووووووووووووووووووووووووووو

 

ان ما وريتك يا رووووووووووكي !!!!!!!! اصبر عليااااااااااااااااااااا

 

 

 

 

 

 

 

 

 

 

 

 

 

هااااااااااااااااني

 

 

هههه نعم يا رشااااااا

 

ممممممم الله الله ع الشياكة والبرفانات اللي ريحتها مالية الشقة كلهاااااااااا

 

هههههه عجبك البرفان الجديد ؟

 

ممممممم على فين يا هاني بيه بكل الاناقة والشياكة دي ؟

 

ههه عندي معاد مهم

 

افندممممممممممم معاد ايييييييييييه , اكيد طبعا معاد غرااااااااااااامي , اوعي تضحك عليا وتقولي انك رايح تقابل واحد صاحبك وانت بالشياكة ددددددددي , انا مش عبييييييييطة

 

هههه انت ست العاقلين يا روحي , فعلا معاد غرامي , عندك مانع ؟

 

افندمممممممممم , انت بتعتررررررررررررف ؟؟؟؟؟؟؟؟؟؟؟

 

هههه ايوة , سلام بقى يا حلوة

 

استنى هناااااااااااااا

 

اوعي ايييييييييدك , اتكلمي وانت منزلة ايدك جنبببببببك

 

نعمممممممم ما تطلع المسدس وتقولي ارفعي ايدك لفوق احسن يا حضرة الظاااااااااااابط , ممكن بقى اعرف شكلها ايييييييييييييه

 

هههههه مالهاش وصف , اقولك ايه ولا ايه عنهااااااا , اتكلم عن جمالها ولا عن رقتها ولا عن سحرها هههههه حاجة فوق الوصف , سلام يا رشروووووووووشة

 

استنى عندكككككككككككككك يا هاااااااااااااااني اهئ اهئئئئئئئئئئ هاااااااااااني , طيييييييييييييب , والله ما انا عاملة اكل ولا شرب النهاااااااااااااااردة , يبقى يخلي الهانم اللي مالهاش وصف تطبخخخخخخخخخخخله اووووووووووووووف

 

 

 

 

 

 

 

 

 

 

 

 

 

مممممممم وصلت القصر عند المغازي باشا ههههه ايه ده , الحرس مبتسمين وبيفتحوا الباب , واضح انه مديهم خبر اني جاي

 

 

اهلا يا سعادة الباشاااااااااااا هههههه افتحوا البووووووووووووووووابة شرفت يا سعادة الباشااااااااااا

 

هههه شكرا , ياترى المغازي باشا جوا ؟

 

ايوة يا فندم , في انتظار سيادتك

 

 

 

 

 

 

 

ههههههه المغازي قاعد هو وجيرمين على البسين

 

 

هاني زاهر وصل بعربيته يا مغازي باشا هههه

 

ههه طب تعالي نستقبله

 

ااوكيه

 

 

اهلا اهلا اهلا هاني بيه , نورت القصر ههههه

 

هههه اهلا بيك يا مغازي باشا , اتفضل بوكيه الورد ده مني

 

هههه مين فتنلك عليا وقالك اني بحب الورد ؟

 

هههه مش عارف ليه من اول ما شوفتك حسيت انك رومانسي

 

هههههههههههههه احساسك في محله يا حضرة الظابط

 

 

 

لحظة ارحب بالأنسة الرقيقة دي ممممم انسة ياسمين اعتقد ؟

 

ههه جيرمين

 

اهاااااا ههههه اسف , نسيت الاسم

 

ولا يهمك يا حضرة الظابط

 

اتفضل جوا يا هاني بيه , اتفضل , جيرمين من فضلك خلي السفراجية يجهزوا السفرا

 

امرك مغازي باشا , نورتنا يا هاني بيه

 

هههه اشكرك انسة جيرمين , رقيقة اوي السكرتيرة بتاعتك يا مغازي باشا وواضح انها شعلة نشاط

 

هههه جيرمين دي معايا من اكتر من عشر سنين , حقيقي فعلا سكرتيرة هايلة , شايلة عني حمل كبير

 

احترم رجل الاعمال اللي يعرف يختار سكرتيرته بعناية

 

ههه اشكرك يا عزيزي , هااااا تحب تشرب حاجة قبل الغدا ؟ انا عن نفسي متعود اخد كاس نبيذ فرنساوي قبل الغدا

 

لالالا اعفيني

 

ليه ! ما بتشربش ؟

 

في الحقيقة لا , اعمل ايه بقى في تحكمات امي ههههه بتعاملني زي ما اكون طفل صغير , ده لا وده حرام وده عيب , لما الواحد خلااااااااص مش قادر يتحمل استقامة اكتر من كدة هههههههههه

 

هههه انا عندي ليك مفاجأة هتخلصك من كل التحكمات دي , بس لما يجي وقتها

 

هههههه شوقتني يا مغازي باشا

 

 

 

 

 

السفرة جاهزة يا مغازي باشا

 

طيب يا جيرمين , اسبقينا ع السفرة , اتفضل يا هاني بيه

 

اشكرك مغازي باشا

 

 

 

 

 

 

 

 

هاااااا , ايه رأيك في الأكل , على فكرة ده من افخم واشهر المطاعم

 

ههه واضح جدا , حقيقي الاكل هاااااااايل , بس واضح انه مش عاجب الانسة جيرمين لانها ما بتاكلش

 

في الحقيقة انا عاملة دايت , عشان كدة مش بتقل في الاكل

 

دايت ! غريبة اوي , مع انك رشيقة جدا يا انسة جيرمين

 

ههه اشكرك يا حضرة الظابط , اعمل ايه , لازم احافظ على رشاقتي عشان اليق بكوني سكرتيرة واحد من اكبر رجال الاعمال في مصر , وعشان المغازي باشا ما يستغناش عن خدماتي هههه

 

هههههه ايه اللي بتقوليه ده يا جيرمين ! من رابع المستحيلات اني استغنى عن سكرتيرة في ذكائك ونشاطك وووو ههههه وجمالك هههههههههههههههههههههههههه ولا ايه يا هاني بيه ؟

 

هههه فعلا يا مغازي باشا , متشكر جدا على الغدا الظريف ده

 

ايه ده يا هاني بيه ! كمل اكلك يا راجل

 

شبعت والله , كدة كويس اوي , شكرا جزيلا مغازي باشا

 

, جيرمين , انا هاخد هاني بيه ونقعد في الجنينة , اديلهم اوردر بالشاي و حصلينا

 

امرك مغازي باشا

 

امممممممم مغازي باشا

 

ايوة يا جيرمين

 

انا هجيب معايا الخاتم السوليتير عشان تقدمهوله كهدية لزوجته ونشوف رد فعله اول ما يشوفه وهيقبله ولا هيرفضه

 

مممممم تفتكري هيقبله ولا هيرفضه يا جيرمين ؟

 

ههه هنشوف يا مغازي باشا

 

ااااااه يا جيرمين لو قبل الخاااااااااااتم , يبقى كدة خلاص بقى في جيبنا وهيساعدنا نخرج من الورطة السودة اللي حطنا فيها المنزلاوي بغباووووووووووووووته

 

ههه اهدا يا مغازي باشا , شكلك بيتوتر اوي كل ما تفتكر المنزلاوي , اتفضل حصل هاني بيه عشان ما يقلقش من غيابنا , وانا هطلع الاوضة بتاعتنا اجيب الخاتم واحصلكو على طول

 

طيب يا جيرمين , ما تتأخريش

 

اوكيه يا باشا

[هبة عبد العظيم نور 2042]

هههههه انت نورت القصر يا هاني بيه

 

هههه منور بصاحبه والسيجار اللي في بقه

 

ههههههههههههه حقيقي انا ما اقدرش استغنى عن السيجار

 

وانا ما اقدرش اشوفك من غير السيجار يا مغازي باشا , بحس انه جزء منك وصعب تظهر من غيره ههههه

 

ههههه ظريف يا هاني بيه , السفرجي جاي بالشاي اهو

 

 

الشاي يا مغازي باشا

 

شكرا , روح انت

 

عن اذنكو

 

 

 

اتفضل اشرب الشاي يا هاني بيه

 

ههه هشرب طبعا , اومال فين الأنسة ........ مممممم هههههه مش عارف بنسى اسمها ليه ههههههه

 

هههههه اسمها جيرمين , معلش هو اسم صعب شوية , بس لذيذ

 

ههههههه لذيذ فعلا

 

اهي جيرمين جاية اهيه

 

 

هههههه اتأخرت عليكو ؟

 

هههه ابدا يا انسة جيرمين

 

مممممم كنت عايزة اسألك يا حضرة الظابط , هو انت متجوز ؟

 

هههههه جايبالي عروسة ؟

 

ههههههههههههه انت تأمر

 

في الحقيقة متجوز وعندي ولد وبنت , متهيألي انتِ شوفتيهم معايا لما اتقابلنا كلنا في المطعم من فترة

 

اهاااااااا هههه ايوة فعلا , افتكرت , لطيفة المدام بتاعتك

 

ههه انتِ تعرفيها ؟

 

ههه اكيد ست رائعة طالما حازت على اعجاب ظابط عظيم زي حضرتك واتجوزتها

 

ههههه اشكرك لذوقك يا انسة جيرمين

 

 

المرة الجاية تجيب المدام والاولاد معاك يا هاني بيه , وعشان كمان المدام تتعرف على جيرمين

 

لالالالالالالا مدام واولاد ايه بس ! الواحد ما بيصدق يرتاح من دوشتهم ههههه

 

يا اخي كنا عايزين نهادي المدام بتاعتك

 

تهادوا المدام ! مش فاهم

 

ههههه سيبهولي يا مغازي باشا , المغازي باشا من عوايده مع ضيوفه اللي بيشرفونا في الفيلا انه يهادي المدامات بتاعتهم بخاتم سوليتير زي ده

 

هاااااااااااااا أأأأأ ايه الخاتم الفخم دددددددده

 

ههه شايف يا مغازي باشا عنيه لمعت ازاي ووسعت اول ما شاف الخاتم

 

ههه ملاحظ

 

ايه رأيك في الخاتم ده يا هاني بيه ؟

 

ههه في الحقيقة جميل وقيّم اوووووي , ذوق مين ده يا ترى ؟

 

ههه ذوق جيرمين , صممت تجيب الخاتم على ذوقها

 

هههه انتِ رائعة يا انسة جيرمين ممم بس انا مش هقدر اقبل الخاتم

 

ليييييييييييه ! انت كدة هتزعلني منننننننننننك , قولي حاجة يا جيرمين

 

اظن يا حضرة الظابط مش من الذوق ولا اللياقة انك ترفض هدية المغازي باشا

 

ايوة يا انسة جيرمين بس مممممم , انااااا , انا هاخد الخاتم بأي صفة ؟

 

ههههه عربون صداقة بريئة بينك وبين المغازي باشا

 

هتقول ايه بقى بعد اللي قالته جيرمين ! ولا انت بترفض صداقتي ؟

 

ههههه ما اقدرش يا مغازي باشا

 

ههههههههههههههههه ايوة كدة يا راجل , تصدق بإيه يا هاني بيه ؟

 

اصدق بالله يا مغازي باشا

 

انا حبيتك من اول ما شوفتك ومن غير أي اغراض هههههههههه

 

ههههههه ربنا يديم المحبة يا مغازي باشا , ياااااااه الساعة سبعة مساءا , انا كدة اتأخرت , مضطر استأذن دلوقتي حالا

 

طيب يا هاني بيه , ياريت تسيبلي رقم تليفونك عشان نتواصل , لان اكيد هشوفك قريب

 

هههههه وانا تحت امرك يا مغازي باشا , اتفضل رقم تليفوني , بس من فضلك لما تتصل ما تقولش انك المغازي

 

 

مممممم اومال اقول ايه ؟

 

تقول مممممممم تقول ممممممم تقول نسيم

 

هههه ماشي يا هاني بيه , اوصلك لحد عربيتك

 

لالالا ما تتعبش نفسك

 

ازاي بقى ! لازم اوصلك يا هاني بيه

 

هههههه وانا كمان هاجي اوصلك يا هاني بيه

 

هههه كلك ذوق يا انسة جيرمين

 

 

 

 

 

 

 

 

 

 

 

هههههه ايه رأيك يا مغازي باشا ؟

 

ههههههههههههه بلع الطُعم يا جيرميييييييييين

 

ههههه ودي البداية يا مغازي باشاااااااااااااا

 

 

 

 

 

 

 

 

 

 

 

 

 

 

ادهم ركن عربيته ودخل المستشفى يا سعاد

 

 

ادهممممممم , طب لما نشوفووووووه , خدي شيلي البت حطيها في سريرها يا توحا

 

تعالي يا نورهان يا قمر يللي طالعة لتيتة توحااااااا ههههه اموووووووووه

 

 

 

بالراحة عليها يا خالتي , ما تبوسيهاش من بقها عشان دي ما تستحملش , لحسن تلقط ميكروب ولا حاجة

 

سامعة بنتك يا سعااااااااد , خايفة البت تلقط ميكروب لما ابوسها , اصل انا مربية كلاب في بقي

 

ايّوووووووه البت ما تقصدش يا توحاااااا , قصدها يعني ان البت لسة حتة لحمة حمرا واي حاجة تأثر فيها , مش ده اللي تقصديه يا اوسا ؟

 

ايوة يا مامااااااا ااااااااه يا بطني يللي فتحوكِ مرتين ااااااااااااه

 

 

 

اوساااااااااا ههههههههه مبروك يا اوسا ع الننوسة ههههههه

 

اهلا يا سي ادهم , وليه تاعب نفسك وجاي لحد هنا

 

جاي نباركلك يا بت , عشان تعرفي قيمتك عندي , ازيك يا امّااااااااا

 

لا يا شيخ , لسة فاكر ؟

 

لسة فاكر قلبي يديلك امان ههههههههه معلش يا امّا , اصل عَرَفت ان اوسا تعبت اوي , وما حبيتش اجي وهي تعبانة عشان اني قلبي رهيّف زي ما انتِ عارفة , ازيك يا خالتي توحاااااااا

 

ازيك يا ولا يا ادهم , تعالى شوف النونة يا خال النونة ههههههه

 

هههههه اني جاي اهو , هاتي يا خالتي

 

اديهاله يا توحا , سمي يا ولا قبل ما تشيل البت

 

بسم الله , ايه الوحاشة دي هههههه طالعة لامك يا بنت اوسااااااااا ههههههههه

 

سامعة يا مامااااااااا ؟

 

بيهزر معاكِ , انتِ عارفة ادهم يحب الهزار

 

ما تزعليش يا اوسا ههههه انت طول عمرك قمر يا قمر هههه

 

ايوة كدة اعدل كلامك عشان نحبوك هههههه

 

 

, اومال فين جوزك

 

سامي في المحل , جه بص عليا وعلى البت ومَشَى عشان يشوف حاله

 

لسة فاكر يا ولا تيجي لاختك بعد تلات اياااااااااام , دي هتخرج بكررررررررررة

 

طيب كويس , يعني لَحَقتها قبل ما تخرج

 

 

تن تن تن امي

 

ده احمد اخوك جه , ادخل يا احممممممممد

 

ييييييييييييييي , داني قولت نيجي في وقت ما يكونش موجود فيييييييه

 

السلام عليكم ورحمة الله

 

اهلا يا احمد وعليكم السلام ورحمة الله

 

ازيك يا خالتي توحا

 

ههه ازيك يا احمد , قولي لخالك ازيك يا بت يا نورهاااااااان , انجغا يختي انجغااااااا ههههههه

 

ازيك يا ادهم

 

اهلا , طب انا ماشي يا امّا عشان عندي مواعيد مع تجار كبار , كبار اووووووي , بيتفقوا معايا على شغل

 

 

انت هتبدأ امتى الشغل يا ادهم

 

كلها اسبوع ولا اتنين يا امّا

 

مبروك يا ادهم يا خويا على المكتب

 

الله يبارك فيك , بس اوعى تفتكر اني هنسيبولك الشرررررررررركة , تبقى بتحلممممممممم , سلاام يااااااا ........... يا ريس ههههههههههههههههههههههههههه

 

 

لا حول ولا قوة الا بالله , بيعاملني زي ما اكون عدوه مش اخوه , ازيك يا اوسا , عاملة ايه النهاردة

 

الحمدلله يا احمد , اني احسن بكتير , هنخرجوا بكرة اخر النهار

 

طيب , الحمدلله , اني هنعدوا عليكِ بكرة عشان ناخدوكِ انتِ وامي وخالتي نوصلوكِ الفيلا

 

تسلم يا احمد يا خويا هههه

 

امي , من فضلك ابقي استعدي بكرة بعد المغرب وجهزي اوسا عشان لما نيجي ان شاء الله نمشوا على طول

 

حاضر

 

اني هنروحوا دلوقتي الحسابات عشان نشوفوا لو ليهم حاجة ندفعوها

 

طيب يا احمد

 

 

 

 

 

 

 

 

 

 

 

 

 

 

ريم , مش كفاية مذاكرة كدة يا حبيبتي وتنامي

 

 

شوية كدة يا ماما , قربت اخلص

 

بتذاكري مادة ايه ؟

 

بذاكر القانون الجنائي

 

ههههههه يا ستير يارب , ما لقتيش الا الجنائي تذاكريه قبل ما تنامي ياريم !

 

هههههههههههههههه مرغم اخاك لا بطل , مادة ومقررة عليا , اعمل ايه بس يا ماما

 

ربنا يوفقك يا حبيبتي , اجبيلك كوباية لبن دافية يا حبيبتي ؟

 

 

...................................................

 

الله ! ريممممممم ههههه سرحتي في ايه يا بنت

 

هااااااا ! بتكلميني يا ماما

 

ههههه كنت بسألك اجيبلك كوباية لبن دافية لقيتك شردتي بعيد , كنتِ بتفكري في ايه بقى

 

ممممممم صبحي

 

صبحي !!!!!!! وايه اللي فكرك بيه , يمكن عشان هو مجرم وانتِ بتذاكري القانون الجنائي قومتي افتكرتيه ؟ هههه

 

هههه والله يا ماما انا ما نسيتوش خالص , دايما افكر في مصيره , ياترى ايه جراله ؟ رجع للإجرام تاني ولا تاب

 

يا بنتي كل واحد ربنا مديله عقل وإرادة وهو لو عايز يتوب ويبعد عن الاجرام اكيد هيتوب , ولو عايز يستمر يبقى هيستمر ويقول غصب عني ومضطر

 

مممممم طب تفتكري يا ماما صبحي هيتوب ولا هيفضل مجرم زي ما هو

 

وانا ايش عرفني يا بنتي , مممممم وبعدين انتِ شاغلة نفسك بيه اوي كدة ليه يا ريم ؟

 

لا والله يا ماما , مش زي ما حضرتك متخيلة , انا بس متعاطفة معاه وحاسة ان جواه انسان كويس اوي وممكن يتغير

 

ربنا يهديه يا بنتي ,ويصلح حاله

 

ممممم تعرفي يا ماما , انا بيحصلي حاجة غريبة اوي

 

حاجة غريبة ازاي يعني يا ريم

 

دايما لما بغمض بشوف صبحي واقف قدامي بكل هيئته الاجرامية المخيفة وماسك الرشاش وفجأة يتحول لشاب جميييييييل طويل وعريض وابتسامته هادية وشايل بوكيه ورد وبيقدمهولي

 

هههههههههههههههههههههههههه لالالالالا حبيبتي دي اسمها احلام اليقظة , انتِ بس عشان نفسك الشاب ده حاله ينصلح بتتخليه كدة

 

مممم انا برضو بقول كدة يا ماما

 

هجيبلك كوباية لبن , ركزي في القانون الجنائي عشان تجيبي تقدير وسيبك من احلام اليقظة دي هههههه

 

هههه ان شاء الله يا ماما مممممممم يا ترى ايه جرالك يا صبحي ! مممممممم خليني في القانون الجنائي احسن

 

 

 

 

 

 

 

 

 

دادة عزيزززززززززة

 

ايوة يا وليد يا حبيبي

 

فين شيري وسما ؟

 

هههههه باهر بيه خدهم من النجمة وراح يفسحهم

 

ههه طيب , كويس اوي , انا رايح مشوار

 

رايح فييييين ههههههه ولا هتخبي على دادة عزيزة !

 

هههه انا عمري ما خبيت عليكِ حاجة يا دادة , رايح لمنار عشان اصالحها

 

ربنا يصلح ما بينكو يا ابني , اتصلت بيها واعتذرلتلها ؟

 

لالالالالالا انا هروح عشان اعتذر بنفسي , هعدي على محل اخد اجمل بوكيه ورد واجيب شيكولا واروح اعتذرلها , وبعدين اخدها ونخرج , عايزة حاجة قبل ما امشي ؟

 

لا يا حبيبي , سلم على عروستك

 

الله يسلمك يا دادة عزيزة

 

 

 

 

 

 

 

 

 

 

 

 

 

 

 

 

تررررررررررررررررررررررررررررررن ترررررررررررررررررررررررررررررررررررررررررررررررررررررررررررررن

 

مين

 

وليد يا دادة سعيدة

 

ههه اهلااااااااا اهلا اهلا وليد بيه , اتفضل

 

اشكرك , يا ترى عمتي فريدة ومنار موجودين ؟

 

ايوة , اتفضل في الصالون وهدي فريدة هانم خبر

 

اوكيه

 

وليد بيه

 

نعم

 

على فكرة بوكيه الورد اللي معاك ده جميل اوي ههههه

 

هههه شكرا دادة سعيدة

 

 

 

 

 

 

 

 

تن تن تن فريدة هانم

 

ادخلي يا سعيدة , عايزة ايه ؟

 

وليد بيه برا , الظاهر جاي يعتذر للست منار , وجايب معاه علبة شيكولاتة شيك اوي وكمان بوكيه ورد جميييييييييييل

 

هههههههههه ممممم طيب , روحي انتِ يا سعيدة قدميله حاجة يشربها , وانا هروح ابلغ منار بنفسي

 

حاضر يا فريدة هانم , ربنا يتمملهم بخير ياااااااااارب

 

 

 

 

منااااااااااار موني تن تن تن

 

 

ادخلي يا مامي

 

ايه ده بقى , انتِ لسة نايمة في السرير لحد دلوقتي !

 

عايزاني اقوم اعمل ايه بس يا مامي

 

ههههه تقومي تشوفي وليد وهو جاي راكع عشان يقدم فروض الطاعة والولاء لمولاته الجميلة منار

 

ولييييييد ! هو وليد جه يا مامي ؟

 

ايوة هههه قاعد في الصالون , سعيدة بتقول جايب بوكيه ورد شيك اوووووي

 

يعني بعد اللي عمله ده يا مامي فاكر انه هيصالحني بالسهولة دي !

 

ههههه حلو اووووووووي , انا بقى عايزاكي تلبسي وتتشيكي وتحطي الميك اب بتاعك والبرفان اللي بياخد عقل وليد وتخرجي تقابليه , بس بنفس التكشيرة دي هههه عايزاكِ تطلعي عينه لحد ما تفكي التكشيرة , وقوليله بقى الجملة اللي قولتيهالي , انه مش ممكن يصالحك بسهولة

 

هههه حضرتك فرحانة ليه اني مكشرة

 

عشان كنت خايفة مجرد ما تعرفي انه برا تقومي تجري عليه , لكن بصراحة انبسطت جداااااااا لما لقيتك مش فارق معاكِ وجوده

 

مين قال انه مش فارق معايا !

 

حبيبتي لازم تحسسيه الاحساس ده , لازم يعرف انك بتمني عليه بوجودك في حياته , لازم تتغيري يا منار , خليكِ انتِ في موقف قوة وهو في موقف ضعف , هو اللي يتوسل اليكِ عشان ترضي عنه , مش العكس يا حبيبتي هههههه

 

مممممم عندك حق يا مامي , فعلا هغير طريقتي مع وليد , لانه استهان بيا اوي , ومهما عمل مش هنسى انه ماجاش حفلة عيد ميلادي وكسفني قدام كل اصحابي

 

برافو عليكِ , طيب يلا قومي اجهزي وانا هروح اقعد معاه في الصالون على ما تيجي , وكمان هعلمه الادددددددددب

 

ههههههه برافو يا مااااااامي

 

 

 

 

 

 

 

 

 

 

 

 

 

 

بنسوار وليد

 

بنسوار عمتي فريدة , ممكن احظى بشرف تقبيل ايدك ؟

 

اتفضل

 

امووه هههه شكرا عمتي

 

اتفضل اقعد

 

اشكرك , عمتي انا حاسس انك زعلانة

 

رائع ان لسة عندك احساس

 

هههه لازم يكون عندي احساس , اكيد طالع لحضرتك يا صاحبة الاحاسيس الراقية

 

انت ازاي يا ولد تعمل اللي عملته ده ! ازاي تتجرأ وتحرجنا قدام ضيوفنا وما تجيش الحفلة

 

عمتي عشان كدة انا جاي اعتذر لحضرتك ولمنار

 

مممم على العموم منار هي صاحبة الشأن ولو رضيت عنك انا كمان هرضى

 

ههههه اشكرك يا عمتي

 

 

اهي منار جت اهيه

 

 

بنسوار

 

هههه بنسوار حياتي وااااااااااااااو ايه الجمال ده يا موني , معقول الرقة والجاذبية دي كلها ! اسمحيلي بتقبيل ايدك

 

اموووه ياااااااااااه البرفان اللي بياخدني لعالم تاااااااااني , دايما تذهليني بجمالك

 

ههه ميرسي

 

بنت يا مناااااار اتقلي

 

أأأأ انت متخيل انك هتصالحني بالبساطة دي يا حضرة الظابط !!!!!!!

 

لا , طبعا , لان عارف اني اخطأت في حق ارق واروع انسانة في الوجود , وعشان اصالحها لازم على الاقل اقدملها الاسورة دي كإعتذار رقيق , اتفضلي

 

ممم هههه واوووووووو شايفة يا مامي , الاسورة شيك اوووووووي

 

وريني كدة ممممم عادية مش شيك اوي ولا حاجة , على العموم مرسي يا وليد

 

هههه العفو يا عمتي , يا ترى قبلتيها يا منار كاعتذار عن الخطأ الفادح اللي صدر مني ؟

 

ممممممم هي صحيح ما تليقش بيا , بس اوكيه , هقبلها

 

واضح انك لسة زعلانة

 

طيب اسيبكو انا تاخدوا راحتكو

 

اتفضلي يا عمتي هههههه ها يا حياتي , رضيتي عني ولا لسة ؟

 

زعلانة منك يا وليد زعلانة اووووووووي , انا تعمل فيا كدة يا وليد قدام صحباتي وتشمتهم فيا !!!!!!!

 

سيبك من صاحباتك وسيبك من كل الدنيا , انا لما جيت عشان اصالحك ما فكرتش غير فيكِ انتِ , لان انتِ بس اللي في دنيتي , انسي اصحابك وانسي الدنيا كلها وروحي البسي فستان سواريه شيك عشان هنخرج نتعشى برا

 

هههه اوكيه يا وليد , هجهز حالا , اطلبلك قهوة على ما اخلص لبس ؟

 

يا ريت يا حياتي

 

ههه اوكيه

 

 

 

 

 

 

 

هههههههه يلا يا حياتي فتحتلك باب العربية انزلي , هنتعشى هنا في الريستورانت ده

 

ههههههه اوكيه ليدو حبيبي ,بحب الريستورانت ده اووووووووي , بس للأسف مش باجي هنا كتير

 

ههههه كل ما الاقي فرصة هجيبك هنا يا روحي , اتفضلي بالدخول يا سيدتي الجميلة

 

هههه ميرسي

 

 

 

ايه ده ! غريبة اوي ! الريستورانت فااااااااااضي , ما فيهوش حد غير الباند اللي بيعزف موسيقى

 

ههههه والجرسونات كمان موجودين حبيبتي , مش بس الباند

 

ايوة يا وليد , بس ممممم فين الناااااااااس

 

 

انتِ كل الناس يا حبيبتي , انا اللي طلبت ان الريستورانت ما يبقاش فيه غير انا وانتِ وبسسس , و إدارة الريستورانت اعتذروا لكل رواد المكان

 

ياااااااااااااه ! ليه ؟

 

هههههههه هتعرفي , اتفضلي ع الطرابيزة اللي قدام الباند الغربي اللي بيعزف ده

 

ههههههههههه مش ممكن , انت هايل يا وليييييييد , للدرجة دي بتحبني ؟

 

عندك شك يا حياتي ؟

 

ههههه لا , كنت بشك الفترة اللي فاتت لكن اللي عملته معايا النهاردة خلاني اتأكد انك بتحبني واني اتسرعت في الحكم عليك

 

ههه , لسة عندي مفاجآآآآآآآآآت

[هبة عبد العظيم نور 2042]

السلاام عليكمممممممممم

 

وحشتوني يا حلوين والله

 

ليا عودة للترحيب , عذرا لضيق الوقت بسبب الكتابة والله

 

اتمنى لكم متابعة ممتعة ومفيدة

 

انتو كمان انتظروا المفاجآآآآآآت زي منار هههههه

 

اشوفكو بكرة ان شاء الله , تحياتي لكن جميعا يا حبيبات

[**نحو غدٍ أفضل** 15]

السلام عليكم ورحمة الله وبركاته

 

جزاك الله خيرا و ربنا يقويك

 

كنت فاكره وليد هيسيب منار

 

بس انتى خارج التوقعات

 

ربنا يستر على هانى من المنزلاوى دا

 

أما ريم ياريت تشيل صبحى من دماغها و ربنا يرزقها ابن الحلال

[حواء أم هالة 1895]

لا لا لا أنا احتج فالحلقات قصيرة يابت يوليها شوية أرجوك هههه

منتظرة المفاجآت بفارغ الصبر^^

[حواء أم هالة 1895]

@@**نحو غدٍ أفضل**

انت عارفة أن صبحي هو نفسه وليد صح ولا لأ ههه

[~ أم العبادلة ~ 1903]

هممم

 

عندي توقع غير تقليدي

طبعا مش ممكن وليد فجأة يتغير كده وموسيقى وغيره

فربما عمل الحركات دي كلها وفي الاخر هيقول انا عملت كده علشانك بس مش دي الحياة اللي ارغب فيها، واللي انا عايزه هو كذا وكذا وكذا ولو بتحبيني اقبلي رغباتي

 

طبعا توقع خاطئ بس من صدمتي في اللي حصل

[ام افنان المغير 56]

اهئ اهئ اهئ ليلة الخميس بطولها بعدين الخميس طوييييييييل بعدين ليلة الجمعة طوييييييلة بعدين يوم الجمعة طوييييييل بعدين السبت طوييييييل ومن بعد المغرب بنفتح المنتدى ونقفل وبعدين بنفتح وبنقفل أكتر من خمس مرات وبعدين فرحة غامرة ...أخيييييرا نزلت الحلقات .نيجي نلاقي حلقتين وبس ...حرام عليك يا اختي ..ارحمي انتظارنا يوم السبت بالذات ...اهئ اهئ اهئ .ربنا يسامحك ...احنا كدة مظلومين ..اهئ اهئ اهئ

[قرانى حياتى 2010 11]

اولا انا اضم صوتى لصوت الاخت ام افنان

انت ظلماااانا خاااااالص بقى كده حلقتين بس يا ابله هبه اهىء اهىء اتقى الله فينا هههههههه

 

ووليد ده مش عارفة بيفكر فى ايه بالظبط غريب وعجيب اكيد فى مفاجاءه غير متوقعة عاملها لمنار اكيد يعنى امال هوا ها يتقلب فجاءه كده من كره لحب ؟؟؟؟

وادهم ده مش ها يبطل الحقد الى جوا قلبه ده اعوذ بالله منه

احمد ربنا يبارك فيه ويرزقنى بولد مطيع زيه كده مش بيقصر فى اى حاجة ويارب اوسا بقى تفهم ومش تقعد تدبر هى وادهم مكائد لاحمد ....

مش ها تفرحينا بقى باخمد وخالد

عاوزين نفرح بقى عاوزين فرح اسلامى علشان نحضر بجد وابقى قوليلنا من قبلها علشان نوضب نفسنا كده مع اننا حلوين من غير حاجة :-) هههههههههه

[ساره أم حمزه 1040]

بهيره غلطانه هى بتقول هتبعدهم عن بعض لما يبلغوا كده كتير اوى

ده العيال بتفهم من بدرى

لما كنت فى 5 ابتدائى وكنا لسه اطفال كانوا الصبيان بيقعدوا يهزروا بصوت عالى ويقول كذا بيحب كذا " على واحده من البنات "

وشغالين كل شويه كده

اصلا بيتفرجوا على المسلسلات والحب وبيتعلموا

 

وهانى معجبنيش ليه بيقول لمراته رشا ايوة شكلها حلو ومش عارف ايه هما ليه بيحبوا يغيظوا الحريم

ومش بيراعوا مشاعرهم إلا من رحم ربى

 

طب هو المغازى قاله عندى لك خطه هيتفكك من اللى انت فيه انه هيجبله شقه جنبه ساعتها لو قاله تشرب هيعمل ايه ؟

[بنوته مسلمه مصريه 458]

أنا انصدمت مرتين على فكرة

مرة فى تصرف وليد ومرة فى قصر الحلقة يا هانم

 

أنا مع ام العبادلة فى توقعها بصراحة

[ساره أم حمزه 1040]

امممممممم وليد بيعمل كده ليه

مش عارفه وراه ايه

[**صفا** 208]

طب ليه ياهبه كده

احنا يابنتى عملنا فيكى حاجه وحشه لا سمح الله

دى حته توقفى عندها

وكمان حلقات قصيره

لالالالالالالالالالالالالالالالالالالا

اسجل اعتراضى وبشده

نيجى لتوقعاتى

وليد بعد ما يعمل الجو ده كله

هيبص فى عنين منار ويقولها بصوت حنون

منار ياحبيبتى انتى متلزمنيش

تيررا

:))

[أمة الرحمن الرحمن 68]

سيبك من صاحباتك وسيبك من كل الدنيا , انا لما جيت عشان اصالحك ما فكرتش غير فيكِ انتِ , لان انتِ بس اللي في دنيتي , انسي اصحابك وانسي الدنيا كلها وروحي البسي فستان سواريه شيك عشان هنخرج نتعشى برا

 

ماهوه يااما أنا ال ساذجه انى متوقعه انه هيتغير

يااما وليد هوه ال ساذج وهنضيع كلامنا فيه على الفاضى

وان كنت مصره انه مش ساذج هوه يدبر لامر سيظهر سيظهر

هوه اعتذر اه!!! بس مش هيتغير فى تعامله مع منار لحد ماهيه ال هتزهق من تغييره معاها فتطلب الانفصال بنفسها -_-

 

يااما مستنى يحل مشكلة ريم

مضحكيش الناس علينا هبة نور على رأى ياسمين

 

 

ماشى هبة نور -_-

مافيش امامنا غير اننا نصبر وننتظر المفاجآآآآآت

واحتج على قصر الحلقات اه أنت بتتعبى و جهدك مشكور

بس احنا برضه راعى مشاعرنا قليلا

تم تعديل 13 سبتمبر, 2014 بواسطة أمة الرحمن الرحمن

[آلآء الله 269]

شكرا هبة الغالية على ذوقك الشديد في الردّ : )))

أسعدتيني واللهِ ^___^

والقصة رائعة ربنا يوفقك ويزيدك يا حبيبة : )))

 

 

بالنسبة للقصة معلش مش متابعة من الأول مين صبحي ده ؟

 

معلش يا حبيبات مينفعش نقول " حرام عليكي " في حاجة مش حرام شرعاً فعلاً

لإن ده تساهل بالدّين والمفروض لا تقال عمال على بطال من غير دليل : )

تم تعديل 13 سبتمبر, 2014 بواسطة آلآء الله

[ريحانة زوجي 63]

ايه يا هبه دا هو واليد شارب حاجه ولا بيحلم وعنده كابوس ولا بيضيع وقتنا

وهو كدا كدا هيكمل مع منار ولا ماشي مع التيار حبه فوق وحبه تحت

بصراحه امره غريب معقوله كل علاقته بريم انه هايساعدها ويرجعلها ورثها بس :O

 

يعني بهيره هتسيب ياسر ورحمه يلعبو مع بعض لما يبلغو

لا فلتت منها دي كدا هيزيدو تعليق ببعض اكتر

والمفروض ان اشجان تنتبه لرحمه اكتر من كدا

الصح ان البنت بتتربى على الحياء من صغرها

 

أعتقد رشا هتعمل زي مامتها وتتقمس شخصية كرومبو وتراقب هاني

 

ياترى رامي هيعمل ايه فى روكي ومامته

كنت فكراه هيرفض يرجع معاها بس شاكله راجع ينتقم

[ام بشار وعبد 83]

منار نائمة وتحلم بان وليد جاء يعتذر لها وووو ... لانه من غير المعقول ان وليد حتى لو قرر يصالحها ويعتذر لها ان يطلب منها ارتداء فستان سواريه وان يطلب من المطعم عازف موسيقى ووو ... هذا حلم اكيد ....

[((مــريــم)) 35]

طبعا اكيد ليه تخطيط في دماغه بيعمله

بس مش عارفه هوا ايه

عشان دماغ الظباط اللي انتي جيباهم هنا يا هبه متكلفه

مش بتاعه 50٪

اكيد في ده وده وان كان المعروف عنهم الظلم والغباء

بس ما علينا

معجبنيش ابدا تفكير بهيره انها هتفصل ياسر ورحمه عن بعض

لما يكبرو

طب ازاي!!

رحمه وياسر بالنسبه لبعض خوات وصحاب ميقدروش يستغنو عن بعض مينفعش يبقي في تسيب كده وكله مباح

في قعدتهم مع بعض لوحدهم !

اكيد هيكون ليه وقع سئ جداً عليهم هيفهمو انهم بيفترو عليهم وعايزين يبعدوهم بس عن بعض وهما لسه اطفال معندهمش ادراك ان ده خلاص دخل في مرحله الحرام ومينفعش التمادي

الأصح طبعا من الاول خالص بهيره وأشجانهم الاتنين كانو يبقو عندهم وعي عن كده

يلعبو مثلا بحكم ان رحمه ملهاش حد هنا بس الكل يلعب مع بعضه ياسمين لازم تكون معاهم وكمان ياسين معاهم

عشان يكون في بالهم ان ده جو اسري

بهيره فعلا عجباني في حاجات كتير جداااااا

لكن في النقطه دي هيا بردو مبتاخدش كل احتياطتها

[**نحو غدٍ أفضل** 15]

حواء

 

أنا واخده بالى إن وليد هو صبحي

 

بس مستغربة موقفه مع منار و مش عايزة ريم تفكر فيه

[حواء أم هالة 1895]

أكيد عنده مفاجأة بتصرفاته تلك

ننتظر ونشوف : )

[ساره أم حمزه 1040]

بس حتى لو عنده مفجأة

مفيش واحد عارفه ان الحجات دى حرام ويقوم عامل كده بحجة ان عنده خطه هينفذها

[~ أم العبادلة ~ 1903]

على فكرة هو لسه لم يشغل موسيقى بالمطعم - على ما اتذكر - فممكن الباند يشغل شيء ثاني

[ساره أم حمزه 1040]

لا حتى هو قالها البسى فستان سواريه

[ام افنان المغير 56]

.