دعنى وربى ......... ومشاكل أخرى

[أم يُمنى 748]

السلام عليكم ورحمة الله وبركاته

 

الفترة الأخيرة شهدت تطورات مجتمعية خطيرة جدا

 

أهمها على الإطلاق فقدان الناس مصداقية الدعاة

 

لا يخفى على أحد تلك النغمة الجديدة ..( دعنى وربى )

 

خليك فى عبادتك انت , بس اعملوا باللى بتقولوه

 

بالتالى ظهرت أخلاقيات نفور وتنافر بين الناس وبعضها

 

أيضاً اتسعت الفجوة الاقتصادية خاصةً فى مصر حيث العدد السكانى الكبير

 

محاولة متواضعة جدا ( وياريت مساعدة الأخوات ) لرصد وتحليل الأوضاع الجديدة

 

بل وإيجاد حلول بإذن الله حتى يتماسك المجتمع مرة أخرى

 

وحتى لا نُحسب مع من يعيشون منفصلين تماما عن المجتمع

 

بهدوء وروية ومحبة ولا مانع من الاعتراف بالأخطاء وتفاديها

 

من قلب الحياة آتيكم بموقف رأيته أو حُكى لى , أو حدث لى

 

كونوا بالقرب حبيباتى

 

اللهم وفقنا لما تحب وترضى

[أم يُمنى 748]

فى أول رمضان سألتنى حبيبتى فلانة : تعرفى مسجد لسه بيصلوا لله ؟

السؤال صدمنى ... ببراءة مشوبة بالخوف بل والهلع : يعنى إيه ؟

بقالى كام سنة مادخلت جامع

ليه ؟

من ساعة ما شوفتهم مجرجرين الواد اللى بنصلى وراه

عيل صغير  يا حبة عينى ,صوته جميل , بيعلم الصغار بروح جميلة

كل الناس بتحبه .. كل ما اعدى على أمه أسأل عليه تقول لسه فى المعتقل

دخلت الجامع اصلى عشان ما ابقاش مرتبطة بشخص فى عبادتى

لقيت الشيخ قعد يدعى للجيش ويدعو نا  للحفاظ على ( قال إيه ) الأمن والأمان

طبعا اتخنقت ومشيت ومن ساعتها عملت مسجدى جنب سريرى

طب بتسألى على مسجد ليه دلوقت

أنا ست كبيره واخاف اتكتب هاجره المساجد

........................................................

شوفتوا وصلنا لفين .. ناس قد إيه أفسدوا عليهم عبادتهم

اللهم أغثنا من فتنة آخر الزمان

 

 

[أم يُمنى 748]

 أحد الشباب بيحاول يقنعنى بنظرية اللامبالاة

دار بيننا هذا النقاش

إزيك يافلان .. عامل إيه ياحبيبى

الحمد لله , ماشى الحال  ( الرد بشكل مالوش نِفس )

إيه أخبارك  

أهو بنعافر  ف الدنيا على مايجى الميعاد

.......................................................................

ــ كان موظف محترم  فى الجامعة  ( رغم كل ظروف المخروبة )  متفائل ان أكيد الوضع المقلوب ده مش هيستمر ,

الجامعة قررت  فجأة تعمل تحليل تعاطى المخدرات ع الموظفين

اختاروا من بينهم ( من يريدون  طيرانه من وظيفته ) وكان هو من بينهم

طبعا كم مهانة تعرضوا لها وكان بينهم أخت فاضلة متزوجة وحامل  زوجها طلقها فى هذه المشكلة

وراجل  كبير على وشك ترك الخدمة أصلا ( بس طلبت معاهم يطلّعوا الناس دى بفضيحة حتى لايطالبوا بحقوقهم  )

الحادثة دى مشهورة والإعلام العار علّق عليها شوية

المهم ان حقائب سوداء بها نتائج التحاليل راحت ل اللجنة  المختصة وهم عارفين انها جايه لهم يعتمدوها فقط

ابننا تعرض لأزمة نفسية  لولا وقوف أهله بجانبه وعملوا تحاليل فى معامل معتمدة ورفعوا قضية ع الجامعة لمجرد ان ابنهم يسترد ثقته ف نفسه ... حتى عشان الشوشرة عرضوا عليه يرجعوه وظيفته بس بشروط .. رفض

عاش بعدها حالة اللامبالاة

وماعرفش إيه الرد على أى جد أو  هزار  بــ  بلح

....................................................................

ميعاد إيه ياابنى  انت قد إيه عشان تتكلم كده

ياااااخاله انتِ ليه مش شايفة حالتنا بشكل جيد

الحالة اننا اقل من القرود والفيران والصراصير

الحالة ان زميلى اتاخد امبارح من قدام المطعم اللى شغّال دليفرى عنده  للاشتباه

الحالة ان ابن عمتى اتاخد وهو عنده 15 سنة وضيعوا عليه السنة

الحالة ان جت عربية مصفحة للحاج فلان صاحب محل الملابس  وبالأمر يعلّق صورة ..

قال انه هيقفل ويروح البلد  قالوا له برضه هتعلّق الصورة

الحالة انى سبت خطيبتى ومش ناوى افكر ف الرفاهية دى

الحالة اننا ملناش دعوة بأى حاجة  ,تقولى اتحرقت , غرقت , اتدينت , احتلوها

ملناش فيها .. ولا بإيدانا حاجة

الله يخليكِ  كبّرى دماغِك وعيشى مع صلاتِك وأذكارِك

على فكرة مش انا لوحدى عايش ف الطراوة كده

لا ده احنا أكبر حِزب ف ماسر 

حِزب اياكش تولع

 

 

[Nohano1977 0]

On 5/23/2018 at 6:42 AM, أم يُمنى said:

السلام عليكم ورحمة الله وبركاته

شكرا على هذا الموضوع المهم 

نحتاج الى وقفة مع ما انعم الله علينا مما نملك من النعم اكبر مشاكل المجتمع انه ينظر الى ما ينقصة ويتجاهل ما يملك ويركز على عيوب الاخرين ويتجاهل عيوبة مما نتج عنه ما نعيش اليوم من تذمر فقط

 

[أم يُمنى 748]

وعليكم السلام ورحمة الله وبركاته

نورتينى ياقمر

شكرا على مرورِك الكريم

بس ليه كاتبه ردك الشخصى  بإسمى انا  ؟

 

[أمة الله ~ عائشة ~ 496]

وعليكم السلام ورحمة الله وبركاته

الله المستعان

بارك الله فيك يا حبيبة ()

[أم يُمنى 748]

نورتينى جوهراية القمراية

حقا الله المستعان  ( نعم المولى ونعم النصير  )

وفيكِ بارك عسولتى الغالية

[أم يُمنى 748]

دعنى وربى .... تلك المقولة التى انتشرت على مدى واسع جدا

لم تترك حتى الأطفال

أيام هوجة النشيد الوطنى الشهير  قالوا إيه علينا

ــــ والله لولا انى أعلم جدية هذه الأسرة  كنت قلت بيهولوا ( بيأفوروا ) ـــ

مدرسة فى منطقة شعبية بسيطة

وأختنا بتروح مع أولادها ال3 لغاية المدرسة خوفا عليهم

فى زمن خطف الأطفال وبيعهم أعضاء  ده طبيعى

أختنا على ماوصلت البيت فوجئت ان العيال وصلوا البيت

بعدها بوقت قليل جدا

إيه اللى حصل , انا مدخلاكوا  المدرسة بإيدى

طردوا عيال كتير من الطابور

ليه

عشان مرضيناش نغنى قالوا إيه علينا

أختنا عصرت على أعصابها كيلو   ليمون .. طب ماغنتوش ليه  يعنى تضيعوا السنة

 العيال ف نفس واحد وبثبات غريب  : مش هانروح المدرسة

لأ انتوا ماصدقتوا  قال يعنى فالحين أوى .. إنتوا أصلا عايزنها هيصة

لأ طبعا انتِ همك المدرسة على خيبة إيه ؟

صاحبتنا دارت وشها عشان مايشوفوها وهى بتضحك

إستعدوا للرد على بابا

خرج بابا من غرفته  استعدادا للذهاب إلى عمله

علم الموضوع  طمأن الأم  : أنا اللى هاوديهم بكرة

راح بال3 بنتين وولد المدرسة وتعمد انه يروح بعد الطابور

فى الأول مارضيوش يدخلّوا العيال

لكنه بهدوء  ومع صديقه  مدير  المدرسة

أنا هاجيبهم كل يوم بعد الطابور  

( يا أستاذ فلان ماينفعش المسخرة اللى احنا فيها دى )

العيال أحرجونا ورافضين يروحوا المدرسة

فى هذه الأثناء دخل مجموعة من الرجال ومعهم أولادهم

ولعدم البلبلة وافق على حضورهم بعد الطابور لحين مرور الأزمة

 

 

[أم يُمنى 748]

من كام يوم كنت أزور حبيبتى فلانة ف المستشفى

القصر العينى .......... آن آااااه

حبايبى اللى رايحه معاهم أشفقوا علىّ وصراحة ع الأخت المريضة

أولا عشان صحتى

ثانيا  خوفا من ردة فعلى إذا شفت حاجة مش عاجبانى

ناهيكم عن المدخل اللى العيانين   مرمين جنب الصور

وعن لحظة الدخول من الباب ( بدون تذاكر  ) .. اللى تدفعيه ياحاجة

اذبهليت لثوانى كانت ام زياد خلصت معاهم الموضوع ودخلنا

لأ وسعوا لنا الناس كمان والإسانسير  شغّال

حاجة فُلّة ... طلعنا الدور اللى مش عايزينه  و .... إنزلو دور على رجلكم

ماشى ... الناس على السلالم وفى الطرقات بشكل لايمكن تصوره

فى مدخل الدور   زحام ... مين دول ؟  أهالى المرضى ....  ودى استراحة !

نسيت اقول اننا ف المكان الاقتصادى ( بالفلوس يعنى )

لى عودة بإذن الله  للتكملة   فكونوا بالقرب حبوباتى

 

 

[أم يُمنى 748]

وها نحن مرة أخرى ف القصر العينى

حبيبتى المريضة كانت ف غرفة العمليات

هى دخلت أول أمس يادوب تحاليل وتجهيز المريضة للعملية

اللى يشوف كده يقول احنا ف بلد محترمة  .. تمام

كله بالفلوس يمشى فُلة  .. 

الدكاترة موجودين  والممرضات هاين عليهم يشيلوا المريض على حجرهم

فى غرفة المريضة بانتظار خروجها بالسلامة ومن النافذة تطل ع النيل اللى مستوى المية نزل مترين تقريبا

عربية فول قدام الباب فجأة جت البلدية قلبت العربية وخدوا قِدرة الفول من الراجل

وهو بيبوس إيد الأمين يسيبه يسترزق

( ده الناس هنا محتاجة العربية دى أكتر من الراجل نفسه )

( إحنا جبنا شوية بسكوتات ومشروبات  دفعنا رقم لا يستطيعه الغلابة دول )

ماعلينا .. عشان افادى نفسى أزمة صحية بصيت الناحية التانية

طالما لاأستطيع إنكار المنكر ولا بالقول قلت ابص على شوية المية اللى فاضلين ف النيل

مساحة كبيرة جدا ع النيل فاضية خالص لأ وشوية ترابيزات وكراسى مفروشين بشكل منمق

حاجة تريح الأعصاب ....تلاقيها مجموعة كافيتريات  وأندية

بس غريبة مفيش ناس .. بصيت ع الزحام تانى والخناقة الدايرة ع الباب

إشى بياعين  متاخد بضاعتهم وإشى عيانين وإشى ناس بتصرخ عشان يدخلوا

وفضا الأندية الناحية التانية

مع المفارقة دى م نسيتش حبيبتى اللى ف العمليات

اتلهينا معاها وهم جايبنها غرفتها  واطمنا عليها فايقة  واستنينا    معاها شوية

واحنا ماشيين قصدت نمشى من ناحية الكافيتريات والأندية دى

 وكانت الصدمة حوالى اتنين كيلوا ع النيل كلها تابعة لجهات سيادية

تيقنت اننا تكملة ورث أهاليهم

ومن جوة قلبى وبــ زعيق  مش يسقط يسقط حكم العسكر

يحرق يولع حكم العسكر  وبـــــ زفت وقطران

وإلى الله المشتكى

[(أم *سارة*) 981]

السلام عليكم ورحمة الله وبركاته

شفى الله مريضتكم وعافها 

ورب يصلح الأحوال وجعتي قلبي يا أم يمنى على الراجل صاحب قدرة الفول رب يغنيه من فضله العظيم آمين

[أم يُمنى 748]

وعليكم السلام ورحمة الله وبركاته

قلوب المصريين كلها موجوعة والله ( غنى وفقير )

نورتينى ياقمر