:::.. حكـــايـــــ زينات وسنية ــــات ... والسعادة الزوجــــية ..:::

[أشـــرقت 0]

 

 

حكايات زينات وسنية والسعادة الزوجية ..

 

o0o=o0o=o0o

يدق جرس الهاتف في منزل سنية .. لتجري سنية على التليفون .. قائلة:

خير يارب يا ترى مين بيتصل بينا بدرى أوى كده؟؟ .. اللهم اجعله خير..

لتجد على الطرف الآخر صديقتها الحميمة زينات لتبدأ مكالمة طويلة أوى والطرف الخسران في الحالة هو .... زوج زينات ..

سنية: السلام عليكم

زينات : وعليكم السلام .. إزيك يا سنية يا أختي عاملة أيه ..؟؟

سنية: كويسه يا حبيبتى الحمد لله .. أنتِ عاملة أيه ؟؟.. مال صوتك هو المحروس نكد عليكى تانى ..؟؟

زينات : هو أن شفت مع الرجل ده يوم حلو أبداً أجيله كده أجيله كده .. مش نافع .. أراضيه كده أراضيه كده مش نافع

خلاص .. زهقت يا أختى وطهقت ..

سنية: أه .. من جنس الرجاله دول .. كلهم كده ما بينفعش معاهم حاجه أبداً ..

وأحنا يا اختى ليه ننكد على نفسنا .. أحنا ندور على واحد يعمل لنا عمل يا أختى يرمي حبنا في قلوبهم كدهوه من غير أستئذان ..

زينات: عمل عمل أيه يا أختى؟! .. هما دول ينفع معاهم حاجه !!.. ده مافيش حاجه بتحوق فيهم ..

سنية : لالالا.. أسمعي أصل أنتِ ما تعرفيش الشيخ بلحة .. ده رجل طيب أوي وسره باتع .. هيعمل لنا عمل ما يخرش الميه..

زينات : إيدي على كتفك يا أختي ..

سنية : خلاص انا هفوت عليكِ بعد العصر ونروح يا أختي عند الشيخ بلحه يعملنا العمل ..

 

o0o=o0o=o0o

وتقابلت سنية وزينات وراحو عند الشيخ بلحه ..وحكوا له كل إل حصل من طأطأ لسلامو عليكم.. إلا إن الشيخ بلحه ما كان ساحر ولا حاجه ولا ليه في الأعمال ولا شئ.. إلا أنه علشان يعلمهم ويديهم موعظه عرض عليهم العرض التالى:

الشيخ بلحة :مافيش غير حل واحد بس علشان أزواجكم يرضوا عنكم ويعاملوكم كويس..

زينات وسنية في نفس واحد : قلنا يا شيخ.. إيدينا على كتفك ..

الشيخ بلحه: أما أنتِ يا سنية علشان أعمل العمل إل بتقولى عليه لازم تجيبيلى رمش عين قرد ..أما زينات فأنتِ لازم تجيبيلى شعرة من رقبة الأسد ..

وهنا بقى أصابت الدهشة زينات وسنية .. رمش عين قرد .. وشعرة من رقبة الاسد!!

رد الشيخ بلحه وقلهم: أيوة العمل مش هينجح إلا كده .. لو بجد عايزين أزواجكم يحبوكم ويحسنوا عشرتكم ..

هنا قالت زينات: بس الأسد حيوان مفترس ممكن يأكلني !!

وهنا حمدت سنية ربها أنها وقعت مع قرد مش مع أسد ..

رد عليها الشيخ وقالها: بس العمل مش هينفع إلا كده ..

 

وهنا عقدت زينات وسنية العزم على أنهم يروحوا حديقة الحيوانات علشان يجيبوا طلبات الشيخ بلحه .. وكل واحده فيهم أعدت عدتها..

 

جابت سنية معاها فول سوداني كتير وموز ..وراحت أتحايلت على حارس قفص القرود أنه يوافق أنها تدخل تلعب مع القرد وبعد طول نفس وافق الحارس ودخلت سنية قفص القرود.. وقعدت تلاعب القرد وتحايله وتاكله ( شويه موز.. شويه فول سودانى) وتغنيله .. لحد ما القرد أخد على سنية خالص.. ونعس على رجليها وهنا أخدت سنية رمش عين القرد بمنتهى البساطه والسهوله ..

 

تعالوا بقي نشوف زينات عملت أيه .. معلش زينات بتلعب مع الأسد لازم يكون نفسها طويل شويه .. لأنه مش سهل ترويضه ..

وقبل ما تروح للأسد سألت كل إل تعرفهم : أعمل أيه علشان الأسد ما ياكلنيش..؟؟

وكل ما تسأل حد يرد عليها ويقولها : لازم الأسد يكون واكل كويس لأنه لو جاع هياكلك أنتِ ..

وهنا بقى أخدت معاها لحم كتير أوى علشان تأكل الأسد ..وكل شويه ترميله شوية لحم وتبعد .. ترمي شويه لحم وتبعد ..

وهكذا استمر الحال لحد ما الأسد بدأ يألف زينات مع مرور الوقت ..وبدأت تقترب منه مع مرور الوقت .. إلى أن جاء اليوم المنتظر ..

;-) اليوم ده لاقت زينات الأسد قاعد جنبها ومدد وهو لا يشك في محبتها له .. وهنا بقي جت زينات ووضعت يدها على رأس الأسد وبدأت تمسح بها على رأسه ورقبته وبالتالي في الوقت ده والأسد مطمئن أخدت منه الشعرة بكل سهولة وبساطه .. وما تتصورا فرحتها كانت أد إيه .. هي خلاص هتجري بقى على الشيخ بلحه وتديله الشعرة علشان يعملها العمل وتكون بقى أسعد واحده في العالم هتبقى ملكة قلب زوجها ..(يا حلولي يا حلولي)..

 

o0o=o0o=o0o

واتفقت زينات وسنية أنهم يروحوا للشيخ بلحه زينات ومعاها شعرة الأسد وسنية ورمش القرد ..

ولما راحوا عند الشيخ بلحه وفرحة الأنتصار بتملى عيونهم ..

زينات : اتفضل يا شيخ شعرة الأسد..

سنية: اتفضل رمش عين القرد ..

قالهم الشيخ: أنتم عملتم أيه علشان تعرفوا .. تجيبوا الحاجات دى .. ؟!

ردت زينات وسنية وكل واحده حكت قصتها القوية إل عرفوا يجيبوا بها شعرة الأسد ورمش عين القرد..

وهنا أجابهم الشيخ بلحه : يا سبحان الله .. يا زينات عرفتِ تروضي أسد وتاخدى منه إل أنتِ عايزاه ومش عارفه تعاملي زوجك .. أعتقد أن زوجك مش شرس ومفترس زي الأسد ..

وأنتِ يا سنية: تلاعبي قرد وتحايله لدرجه تاخدى رمش عينيه ومش عارفه تعاملي زوجك؟! .. أعتقد زوجك مش في عفرتة القرد ..

يا سنية يا زينات .. كل واحده فيكم تفعل كما فعلت مع الأسد والقرد تملك زوجها .. تعرفوا على المدخل إلي قلوبهم .. واشبعى جوعته .. تأسريه وحطى الخطه لكده واصبروا ..

 

وهنا عرفت زينات وسنية أن السعادة الزوجية مش بعمل عمل على أيد ساحر .. بل أن قلوب أزواجهم وحبهم ليهم في إيدهم هما بس لازم يعرفوا إيه هو الطريق لقلب زواجهم ويصبروا عليهم ..وواحدة وواحده وكله يبقي تمام ..

 

يارب تعجبكم القصة .. ويوصل ليكم غرضي منها .. ويلا بقى على الأزواج والمتزوجات سرعة التنفيذ..

تم تعديل 11 يوليو, 2007 بواسطة أشـــرقت

[جوهرة العفاف 4]

السلام عليكم ورحمة الله وبركاته،

ههههههههههههههههههههههههههه

قصة جميلة

نسأل الله تعالى أن يصلح بيوت المسلمين

و دعواتكن لي بالزوج الصالح:)

[مُريدة القرآن 0]

الله جميله قوى ومفيده جدا

[مُريدة القرآن 0]

ربنا يرزقك الزوج الصالح ياجوهرة العفاف

من كل قلبى

احبك فى الله

[lemonada 0]

السلام عليكم ورحمة الله وبركاته

 

وأشرقت المشاكسه الجديده في جنتك ونارك أشرقت

 

أهلا بيكي مع المشاكسات

 

قصه جميله ومفيده وبالذات التشابه بين القرد وال00000

 

مش عيب كده بقى التعامل مع 000 زي ده برضه

 

LEMONADA

[درة الفؤاد 1]

الله جميله قوى ومفيده جدا

[أشـــرقت 0]

بسم الله الرحمن الرحيم

والحمد لله رب العالمين

والصلاة والسلام على سيدنا محمد..

 

أختي في الله: جوهرة العفاف

وعليكِ السلام ورحمة الله وبركاته

والحمد لله رب العالمين إن القصة عجبتك .. ويارب يارب يارب يرزقني وإياكِ وجميع الأخوات بالأزواج الصالحين ..

جزيتِ خيراً على المرور والمشاركة ..

 

:oops: :oops: :ohmy:

 

o0o=o0o=o0o

 

أختي في الله : مُريدة القرآن

الله سبحانه وتعالى يتقبل دعائك لأختنا جوهرة العفاف .. وأنا كمان ادعيلي بالله عليكِ ..

وجزاكِ الله خيراً على المرور .. والحمد لله إن الحدوتة عجبتك .. يارب تفيدك ..

 

o0o=o0o=o0o

 

أختي في الله: LEMONADA

أنا مشاكسة برضة ..؟! :oops: ده أنا مسكينة جداً .. :tongue:

أحنا كده دائماً ظالمين الجنس الآخر .. بس أنا قصدت أشبه فعالهم بفعال ال ... وال ...

الله ييسر الحال ويرزقنا أزواج يكونوا قرة عين لنا ..

مرحباً بكِ أخيتي .. وجزاكِ الله خيراً على ترحيبك بي .. والمنتدى مشرق بزهراته ..

 

o0o=o0o=o0o

 

أختي في الله : دموع التوبة 2

لا أبكى الله لكِ عيناً إلا من خشيته سبحانه وتعالى ..

جزاكِ الله خيراً على المرور والمشاركة ..

ويارب يصل لكم هدفي من الحكاية ..

 

 

والحكايات الجديدة في الطريق إن شاء الله ..