يا ترى انا صح و لا .......؟؟

[*-* أم يوسف *-* 0]

السلام عليكم و رحمة الله و بركاته .....

 

عندي موضوع يا حبيباتي عاوزة آخد رأيكم فيه موقف حصلي من سنة بس قالقني شوية ( معلش لو هطول عليكم بس عشان تبقوا واخدين فكرة مظبوطة عن الموضوع )

 

 

السنة اللي فاتت ابني كان في رياض أطفال السنة الأولى KG1 زي ما بيقولو، دخلتو متأخر اسبوع عشان ظروف معينة مريت بيها و لما دخلتو المدرسة مكنش في مكان و بعدين فضي مكان فقبل.

بعد ما دخل بكام يوم كده تعب و الحالة اللي جاتلو كانت جاتلو قبلها بحوالي اسبوعين بس لأول مرة و ماكنتش عارفة وقتها انو عندو حساسية في الصدر و كل المستشفيات اللي رحتها قالولي ده مجرد دور برد قوي شوية المهم اني في يوم بعت الدوا في شنطة ابني و كتبت ورقة لمدرسة الفصل انه لو حست انو بيكح زيادة شوية تديلو 5 ملم على حسب وصية دكتورة المستشفى .

اتصلت بيه في البيت في نفس اليوم ده السكرتيرة و قالتلي احنا مالناش دعوة بالموضوع ده لازم تكلمي الممرضة بتاعت المدرسة و تقوليلها، مدرسة الفصل مش من سلطتها تعمل كده و حيث اني ما كنتش عارفة ابني عندو ايه بالظبط حاولت أفهمها ان الموضوع مش مستاهل و كنت كل لما أقولها بس أنا عاوزة افهم حضرتك حاجة تقاطعني و تقولي انا ماليش دعوة بالموضوع ده و ما ادتنيش فرصة اتكلم خالص و لا كانت عاوزة تسمعني ، بصراحة ضايقتني جدا ، المهم قولتلها اديني الممرضة أكلمها قالتلي مش موجودة خرجت المستشفى اتكلمي كمان نص ساعة ، انا من قلقي على ابني و عشان شوفتو لما ضيق التنفس جالو خفت عليه و حسيت انهم بيرموا المسؤولية من عليهم فاتصلت بعد 10 دقايق مش نص ساعة و كانت هي دي غلطتي فلما اتصلت تاني ردت عليه السكرتيرة نفسها و قالتلي ايه يا ام يوسف انتي عاملالنا مشاكل ليه من أول السنة ده انتو لسة مبقالكوش يومين في المدرسة و احنا قبلنا ابنك عشان فيه مكان فضي طبعا أنا اتنرفزت من اسلوب الكلام و قلتلها فيه اسلوب أحسن للكلام عن كده و انت من الول مش عاوزة تسمعيني و خلصت المكالمة على كده .

 

و لما كلمت الممرضة حكتلها عن اللي حصل و كانت موفقاني ان مدرسة الفصل ممكن هي اللي تديله الدوا ده مدام عند اللزوم و لما لقتني مضايقة قالتلي اني ممكن أشتكي لمديرة المدرسة عشان هي مافيش في ايدها حاجة فقلتلها أنا مش عاوزة أصعد الموضوع أنا بس كنت عاوزة حد يفهمها تحسن من اسلوبها شوية ..... على آخر اليوم قبل الدوام ما يخلص كلمتني السكرتيرة دي باسلوب وحش و قالتلي بالحرف ( بقى انت بتشتكيني للمرضة و راحة تعيطلها و منهارة ) الكلام كان كده من غير ام يوسف و لا حضرتك و لا أي حاجة و بالاسلوب ده فعلا .... قلتلها بهدوء برضه ، فيه اسلوب أحسن للكلام ، قالت أنا مش عارفة أكلمك بأنهي اسلوب عشان يبقى كويس المهم اديتني المديرة أكلمها و المديرة طلبت مني آجي تاني يوم في المدرسة قولتلها ماشي أنا كده كده كنت جاية .

 

لما رحت بقى و المديرة استقبلتني استقبلتني كأنها بتحقق معايا و اني أنا اللي غلطانة و قالتلي ان المفروض ما أحطش الدوا مع الولد في الشنطة قولتلها أنا معنديش مشكلة ان ده غلطت فعلا في كده بس أنا هنا عشان الاسلوب اللي اتعاملت معايا بيه السكرتيرة و بعد ما واجهتني بالممرضة و عرفت انها بعد ما خلصت كلام معايا قابلت المديرة و قالتلها اني بشتكي السكرتيرة مع اني قولتلها اني مش عاوزة أصعد الموضوع بس هي لما لقتني مضايقة أوي و مخنوقة لدرجة صوتي حشرج في آخر المكالمة فبلغت المديرة ... لما جت السكرتيرة بقى عشان نتواجه المديرة بتقولها دلوقتي المدام مضايقة من اسلوب المعاملة ...... تعرفو ردها كان ايه ...... مش هتصدقوا ان ده رد يطلع من سكرتيرة في مدرسة و كمان قدام مديرتها ....... قالت بالحرف ( معلش يا مسز فلانة أصل بابا قبل ما يموت ما ربناش ) :icon15: :icon15: ........... ايه رأيكوا في الرد ده طبعا انا معرفتش أقول و لا كلمة و لما لقيت الكلام داخل في صفصفة قلتلها بصي من الآخر كده أنا هنا ولية أمر طالب في المدرسة مش طالبة غلطت و هتتزنب على الحيط و اذا كنت مش قادرة تسمعي لأولياء الأمور كويس و معندكيش وقت ليهم يبقى تسيبي مكانك للي يقدر عليه و غصب عني بكيت من الخنقة و سلمت على المديرة و مشيت......

 

الكلام ده كان في رمضان قبل اللي فات و بعد ما هديت قلت بلاش يبقى بيني و بين أي حد أي مشاحنة و احنا مسلمين و في رمضان و خفت لأكون من اللي الرسول صلى الله عليه وسلم قال فيهم فيما معناه ان المتشاحنين لا ينظر في عملهم حتى يتصالحا و ان خيرهم من يبدأ بالسلام ، فاتصلت في آخر رمضان و ردت عليه مدرسة ابني و طلبت أكلم السكرتيرة و قالتلي انها مش موجودة ممكن اتكلم بعد شوية تكون جت و لما اتكلمت بعدها قالتلي البنت بتاعت الاستقبال انها مش بتستقبل مكالمات .... و حتى بعد كده لما كنت بطلب المدرسة عشان أي حاجة تخص يوسف و هي ترد عليه و تعرفني كنت و الله بكلمها كويس و لما كنت أقولها في آخر المكالمة شكرا ما تردش عليه و تقفل السكة على طول مع اني مغلطتش فيها و هي اللي غلطانة أصلا بس أنا كنت عاوزة أنهى الموضوع و ربنا راضي عن تصرفي ....

 

 

هي دي الحكاية كلها مش عارفة ايه رأيك أو تعليقكم على الموقف ده ...... ممكن رأيكم لو سمحتم

[*-* أم يوسف *-* 0]

مع العلم اني عرفت بعد كده ناس ليهم أبناء في نفس المدرسو و كلهم بيشتكوا من نفس الشخصية ...

[*-* أم يوسف *-* 0]

كده برضه ..... :icon15: محدش يفيدني في موضوعي أبدا من اللي مر عليه

 

بجد زعلت أوي :icon15:

[أم البطل عبد الملك 19]

لا تحزنى بارك الله فيك ....ولكنى لم اتزوج بعد

[*-* أم يوسف *-* 0]

و لا يهمك بس برضه شكرا على الرد حبيبتي a&h

[يارب لك اتوب 0]

السلام عليكم ورحمة الله وبركاته

 

انا هحاول افيدك على اد ما اقدر ان شاء الله

 

انا رايى انك طالما حاسه ان مش عاوزة يكون بينك وبين حد مشاحنه ولا زعل وانك نفسيا مش مرتاحه انا شايفه انك فى يوم تروحى تزوريهم كلهم فى المدرسة وتاخدى معاكى هدايا بسيطة كده وتديهالهوم

 

مش مهم مين اللى غلطان ومين اللى وحش ان شاء الله لو كل البلد بتشتكى منهم مش مهم خليكى انتى الاحسن وروحى اديهم هدايا واتعاملى معاهم بالحسنى

 

وخلى نيتك ان كل حاجه بتعمليها لله ، انت تتعاملى معاهم حلو عشان دول من مخلوقات ربنا يبقى نعاملهم حلو لوجه الله

 

فهمانى؟؟؟؟؟

ارجو انى اكون افدتك بخبرتى البسيطة

 

جزاكى الله خيروا وبارك لك فى ابنك ان شاء الله ويعافيه من اى مرض :wub:

[muslima2009 5]

السلام عليكم و رحمة الله و بركاته

 

جزاك الله خيرا و بارك فيك أنك عايزه تنهى الموضوع و ربنا يعينك و يؤجرك ... آمين

 

أذهبي بنفسك إلى المدرسة و سلمي عليها و انهي الموضوع برفق ابتغاء وجه الله( و خيرهما الذي يبدأ بالسلام) و جزاك الله خيرا

 

لا يجوز أن يتشاحن المسلمين ، ابدئي أنت حتي لو لم تكوني أنت الغلطانة و لك الأجر عند الله إن شاء الله

 

قال رسول الله صلى الله عليه و سلم " تفتح أبواب الجنة يوم الإثنين و يوم الخميس فيغفر لكل عبد لا يشرك بالله شيئا إلا رجلا كان بينه و بين أخيه

 

شحناء " صحيح الترغيب و الترهيب الألباني و في رواية لمسلم قال رسول الله " اركوا هذين حتى يصطلحا" اركوا : أخروا

 

اللهم أرنا الحق حقا و ارزقنا اتباعه و ارنا الباطل باطلا و ارزقنا اجتنابه .... آمين

تم تعديل 11 نوفمبر, 2008 بواسطة muslima2009

[*-* أم يوسف *-* 0]

بارك الله فيكن أخواتي ( يا رب لك اتوب ) و ( MUSLIMA2009)

 

و بجد هو ده اللي أنا عاوزة أعمله عشان أكون مرتاحة ان مافيش أي مشاحنة بيني و بين أي حد لأن محدش ضامن عمره ربنا يسهلي و في أقرب وقت هروح رغم خوفي من رد الفعل

 

بس ربنا يسهل ان شاء الله

[امة من اماء الله 1245]

السلام عليكم ورحمة الله وبركاته

اختي ام يوسف اهلا بك ..على فكرة انا اكتب لك بعد ان قرات الموضوع مباشرة ..واساله تعالى ان يبارك في صحة ابنك وان لا يريك فيه مكروها ان شاء الله.

ماشاء الله اختي انت طيبة ولا ازكي على الله احدا, بدليل انك سارعت الى هذا الخير العميم, وقطعت الطريق امام الشيطان فانا احييك اختي ..لا باس اختي هناك من تكون لديها مشاكل في الاخلاق ,او لا تحسن التصرف, ولا الحديث او ماشابه, وقد لا تدرك ذلك .. وجميل اختي ان نلتمس الاعذار فاعقل الناس من يفعل ..وقد اعجبتني فكرة الهدايا لان فيها تطبيقا لامر رسول الله صلى الله عليه وسلم, فيما معناه, تهادوا تحابوا ..اعرف انك داخليا مقتنعة بالموضوع, وستفرحين لو وجدت الطرف الاخر فهم مغزى الذي ترمين اليه, لكن وكما قدمت انك تخشين من ردة الفعل, وهذا شيء طبيعي فطبعا الجواب الذي لا يوافق الكلام, ويكون غير موزون يزعج, ويكون ثقيلا على النفس تقبله ,وخاصة ممن نعلم مسبقا -من خلال التجربةوكما هو الشان بالنسبة اليك-ردة فعلهم لهذا ادعوك اختي الفاضلة الى ان تتمعني معي في هاتين الايتين الكريمتين:* ولا تستوي الحسنة ولا السيئة ادفع بالتي هي احسن فاذا الذي بينك وبينه عداوة كانه ولي حميم34 وما يلقاها الا الذين صبروا وما يلقاها الا ذو حظ عظيم35 *. سورة فصلت

يا الله ..نعم اختي من الممكن ان تتغير المراة معك ,وان تكون كما اردت واكثر, وان تحدث اشياء اخرى لا تخطر على البال ..فاستمري في نيتك اختي واجعليها واقعا ولن يضرك ردة الفعل مهما كانت, فانت تعاملك مع الله تعالى ولن يضيعك .

تقبلي مروري اختي الطيبة.

[*-* أم يوسف *-* 0]

تسلمي حبيبتي ( أمة من اماء الله ) على نصيحتك

 

و جزاكي الله كل خير على الرد و أنا فعلا نويت و المرة دي مش زي المرة اللي فاتت ان شاء الله هنفذ لأني حاسة اني سامحتها من قلبي لكن المرة اللي فاتت حسيت انها ما تمتش عشان مكنتش لسة مسامحة بجد و الله المستعان ادعيلي أنفذ في أسرع فرصة باذن الله

[امة من اماء الله 1245]

ماشاء الله اختي ..اكتشفت الان انك فعلا صادقة -ولا ازكيك على الله تعالى-وانا احبك في الله تعالى اختي على ذلك ..دعواتي الخالصة بالتيسير وان شاء الله لن يكون الا خيرا

تم تعديل 11 نوفمبر, 2008 بواسطة امة من اماء الله

[*-* أم يوسف *-* 0]

و انا كمان بحبك في الله

 

ربنا يكرمك

[امة من اماء الله 1245]

احبك الله الذي احببتني فيه.

[صاحبه القلب الطيب 12]

السلام عليكم ورحمة الله وبركاته،،

 

ماشاء الله عليكى اختى ام يوسف وطبعا انتتى صح جدا غاليتى يارب يبارك فيكى انتى طيوبهخ اووى وبصى هقولك حاجه انتى متعرفيش ظروف الاانسانه ديه ايه جايز عندها من المشاكل الكثير وحياتها معقده عشان كده بتتعامل مع الناس كلها ياسلوب مش حلو عشان كده انتى نيتك خير ماشاء الله اذهبى وانوى ان يكون ذهابك من اجل ابتغاء مرضاه الله وحده

 

ولا تخافى من رده الفعل فافعلى ما عليكى واسألى من الله التوفيق

 

انتظر اخبارك الحلوه ان شاء الله

[راضية بالله رباوبمحمد رسولا 0]

وعليكم السلام ورحمة الله وبركاته،،

 

جزاكي الله خيرا على نيتك في الصلح هوا دا سلوك المؤمنة بجد وابقي عرفينا عملتي ايه

 

اللهم اشفي مرضى كل المؤمنين

 

غفر الله لكي ورحمكي وكل المؤمنين والمؤمنات الاحياء منهم والاموات

[*-* أم يوسف *-* 0]

ربنا يبارك فيكن أخواتي

 

صاحبة القلب الطيب

راضية بالله ربا و بمحمد رسولا

 

بجد ردودكم شجعتني أوي اوي و ان شاء الله تسمعوا خير قريب

أشكركن جميعا من كل قلبي و جزيتم عني كل خير

[(المشتاقة الى الله) 0]

كان حصلى مشكلة زى مشكلتك كده يعنى مشاحنة بينى وبين ناس وتعبت بعدها اوى عشان خايفة ان ربنا ميتقبلش عملى وحاجات تانية كتير

وفضلت ابعت رسايل ع الموبايل ليهم فى رمضان وغيرها واقولهم متزعلوش وكده ومحدش رد خالص عليا

 

لحد ما صاحبتى شافت واحدة منهم واللى كانت زعلانة منى بتقول لصاحبتى ان انا يعنى كويسة وتكلمت عنى حلو

 

بعد ما كنا زعلانين وارتحت بس ارتحت قبلها بردو لانى كنت عملت عشان اصالحهم كتير اتكلم كتير ومحدش يرد وابعت رسايل

فانتى واصلى لحد ما ترتاحى ولو حتى هى عاملتك وحش بعد ما روحتبلها وكلمتيها اعملى نفسك مش واخدة بالك من معاملتها وكلميها حلو وامشى

وربنا يسعدك حبيبتى

[(:بسمة تفاؤل:) 4]

السلام عليكم ورحمة الله وبركاته،،

 

 

غاليتى أم يوسف

 

أحسبُكــِ ولا ازكى على الله أحداً أنكــِ على خير وتخافين الله

 

 

أحيى فيكِ هذا الشعور الطيب وحرصكــِ على ألا تكونى من المتشاحنيـــن

 

لكن عليكــِ بالمحاوله والذهاب إلى هذه السكرتيره - هدانا الله وإيــاها - وتذكرتها بذلك أنكِ لا تريدى أن تكونى من المتشاحنين وأنكــِ تحبيها ولا تقبلى لها ذلك أيضاً لأنكــِ تريدى أن يغفر الله لكــِ

 

 

ولها معاً

 

ولكن ان لم تستجب فأنا أُفضل أن تتركيها وشأنها و تدعى لها ,,, فأنتِ قد عملتِ ما عليكِ وذهبتِ اليها

 

 

وفقكــِ الله لما يحبه ويرضاه

 

وشفى الله ولدَكِــ يوسف عاجلاً غير آجل وجعله الله من الصالحين ومن أولياؤه

[noranyyat 1]

ياحبيبتى ما تشغليش بالك كتير

ادفع بالتى هى أحسن فإذا الذى بينك وبينه عداوة كأنه ولىٌ حميم.

واستغفرى فالاستغفار علاج لكل مشكلة

وجزاكى الله خيرا كثيرا

واوعى تزعلى مننا