نصائح بخصوص لبس الاخت الملتزمة(بس من غير زعل)

[أختكم آيات 1]

نصائح بخصوص لبس الأخت الملتزمة (بس من غير زعل)

السلام عليكم ورحمه الله وبركاته

 

 

انا عارف طبعاً ان كل الاخوات الي موجدين هنا فضليات وبفضل الله افضل من 100 مثلي ..

 

انا بس هذكرهم ببعض الاشياء ممكن تكون بتقع فيها الاخت من غير قصدها .. او تكاسلاً

 

او هذكر ليكم هذه الاشياء عشان الاخوات الفضليات ينصحوا الاخوات الي بيقعوا في الكلام ده انهم ميقعوش في الكلام ..

 

 

انا عايز اقول كلمة صغيره .. لبس النقاب مش هو المقصد ( فقط ) من الالتزام .. ومش هو نهاية الالتزام ..

 

لبس النقاب مش مجرد تغطية ملامح الوجه .. النقاب ده شيء كبير اوي .. شيء محترم اوي ( قمة العفه والعفاف )

 

 

النقاب مش بس إخفاء أنف وفم .. النقاب سمو في الروح .. وعلو في الهمه .. ونقاء في القلب

 

 

النقاب مش بس إخفاء للوجه .. النقاب ده شعار للبنت بتقول فيه للناس ابعدوا عني انا محترمه .. محدش يبصلي بصه وحشه .. محدش يروادني عن نفسي ( المعاكسه )

 

 

يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلَا يُؤْذَيْنَ وَكَانَ اللَّهُ غَفُوراً رَّحِيماً [الأحزاب : 59]

 

يعني بحجابك هتتعرفي انك انسانه محترمه مؤمنه وده جزاءه في الدنيا انك متتأذيش ..

 

متتأذيش من سماع كلمات قبيحه .. ومن نظرات سيئه .. وهكذا ..

 

 

لكن بالرغم ان في اخوات بالفعل انتقبوا إلا ان ممكن تلاقي واحد ماشي بعربيه ويعاكس واحده منتقبه ..

 

او واحد يروح جي واحده منتقبه ويقول ليه بصوت منخفض ( من برا هلا هلا ومن جوا يعلم الله ) ده موقف لسا حاصل من اسبوع مع زوجة أخ ..

 

 

 

وطبعاً السبب في ان بعض الاغبياء بيتعرضوا للمنتقبات في المعاكسه وغيره .. ان في بعض الاخوات التانين بيتساهلوا ويستهينوا ببعض الامور .. وده ادى ان الفكره تتاخد ان الاصل في المنتقبه انها مش محترمه .. دي بقت فكره عند بعض العامه ..

 

 

مفيش واحد تقف معاه دلوقتي الا لما تلاقي عنده عشرات القصص يقولك ياعم الشيخ ده انا شوفت واحده منتقبه ومش باين منها حاجه ابداً وكانت بتعمل كذا وكذا

 

وواحد تاني يقولك ده انا شوفت واحده وكانت قاعده تشيش في القهوه والدخان بيطلع من فتحه عنيها .. وتلاقي واحد يقولك ويقولك .. ولا تجد واحد من الناس معندوش عشرات القصص ..

 

السبب في ده تهاون بعض الاخوات وتساهلهم مع وجود فئه ( **** ) بيداروا خلف النقاب في اعمال اباحيه ..

 

وعشان كده موضوعنا النهارده عن تصحيح بعض التساهلات والاخطاء عند المنتقبات ..

 

 

طيب بس الاخطاء الي هذكرها دي هيقراها في المنتدي اخوات فضليات كلهم بفضل الله احسن من 100 زيي يبقا ليه جي انصحهم ..

 

انا بنصح من باب التذكير .. والتاكيد .. وكمان عشان اجمع ليهم المخالفات والاخت بقا الملتزمه تنصح عن طريق النت بالنشر في المنتديات النسائيه ... وده مهم عليها كدعوه ..

 

وكمان ممكن تطبع المخالفات دي وتلزقها في المسجد .. ممكن تنصح صديقتها .. الف فكره وفكره ممكن تعملها الاخت الملتزمه .. بس ياريت كفايه كسل من الاخوات وبالفعل تعمل شيء ايجابي لان المشهور عن الاخوات انهم في الدعوه صفر .. وان شاء الله الاخوات هيثبتوا بالموضوع بتاع النهارده انهم مش كده وبالفعل هينشروا الموضوع .. سواء في النت والمنتديات او سواء في انها تنصح صاحبتها او تنشرها عن طريق ورقه في المسجد ...

 

 

هندء بعض الاخطاء وهحاول انها تكون منظمه الي حد ما ..

 

 

 

 

 

 

 

 

 

 

نبدء بسم الله

 

 

ان شاء الله النصيحه باللون الاسود والحل البديل باللون الازرق .

 

 

 

أخطاء فى اللباس

 

1- الكعب العالى لما يصدره من صوت وحركة مائله في المشية .

والحل انك تلبسي حذاء او كـُتش يكون فلات ( علي الارض يعني )

 

 

 

 

2- لبس الاسدال او الملحفه أو العباءه ويكون الكـُم بتاعها واسع .. بحيث ان مع اي حركة ورفع لليد بيظهر الذراع كامل .. ولا شك دي فتنة حتى وان كنتي لابسه جونتي بيكون ايده صغيره يدوب بتداري كف اليد .. ومفيش اخت تقول انا بخلي بالي ومش برفع ايدي .. طبعاً ده غلط المفروض تعملي الصح ومتعلقيش عفتك علي هخلي بالي او مش هخلي بالي ..

عندك حل من اتننين للموضوع ده . إما تلبسي حاجه بكـُم قميص او تيشرت بكم بحيث مع الجونتي ذراعك ما يظهرش .. ولو الجو حر ومش عارفه تلبسي شيء بكم .. يبقي تشتري حاجه اسمها معصم .. هتلاقي في اي محل محجبات وده عباره عن دراع من القماش بيتلبس عشان ميظهرش الذراع .. للمرأه .

 

 

 

3- عباءة سوداء لكنها براقة بها شويه خرز علي ترتر .. وشويه شغل سوري .. أو مثلاُ بها خط سيلفر ( فضي ) او ذهبي .. او خامة الاسدال والملحفه نفسها اشبه بالساتان .. تحس انه عامل زي خامة قميص النوم .. او ستارة الحمام .. وهذا طبعاً يلفت الانتباه جداً جداً جداً والناس لما بتشوف اللبس بالطريقه دي بتفهم ان دي بنت مش محترمه .. او انها بنت خليجيه مش ملتزمه لابسه الحجاب عاده يعني . وطبعاً ده بيترتب عليه المعاكاسات وغيره ..

يبقي الاخت لما تيجي تشتري ملحفه تشتريها ساده .. مفهاش اي شغل ... منها تعف نفسها ومنها توقف حال البيعات الي يبيعوا مثل هذه الاشياء وهم لما يلاقوا العبايات الي فيها شغل الاخوات بتنفر منها مش هيجبوها .. يبقي ضربتي عصفورين بحجر . ( عفيتي نفسك , وعملتي سنة حسنه .. واوقفتي بدعة )

 

 

 

4- اسدال او عباية تكون ضيقه .. بحيث تجسم الجسم من عند الوسط او من عند الصدر .... وهذا تبرج وليس له علاقة بالحجاب ابداً ولا بالالتزام .. وهذه الفتاه التي تلبس الضيق لو اظهرت شعرها ستكون فتنتها أقل .. فاتقي الله يا اختي .. واعلمي لماذا خـُلقتي !!!

وعشان الاخت متقلش طيب انا جسمي مليان اعمل ايه .. اقولك سيبك من الملحفه الي ب50 جنيه وروحي اشتري قماش وفصلي لنفسك ملحفه تكون واسعه جداً مهما كان جسمك مليان .. فصلي شيء يكون واسع عليكي ( لا يكلف الله نفساً الا وسعها ) وربنا امرك بالستر والعفاف ..

 

 

 

5- الاخت التي لبست النقاب .. وتظهر يديها كيف تظهري يديك بعد لبسك النقاب !! ( أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ ) !!

يبقي اختنا الفاضله لازم تلبس جونتي عشان متظهرش ايدها

 

 

 

6- الاخت المسلمه تلبس الجورب " الشراب " حتى لا تظهر القدمين لانها فتنة للرجال . والاخت الي بشوفها لابسه نقاب ومخبيه ايدها .. وقدمها ظاهره مش لابسه عليهم شراب .. وده طبعاً ميصحش يا اختنا الفاضلة ..

يبقي الاخت المسلمه المفروض تلبس شراب ومتظهرش قدمها ويفضل بلاش الشراب الي باللون ( البيج ) بيكون لون البشره وده بردو بيلفت النظر وبيعملك شبهه انك مبينه رجلك .. وقدمك .

 

 

 

7- ملحفة واسدال لكن النقاب صغير بحجم كف اليد وكانها تضع كمامة زي الممرضات وده الخطر فيه من ناحيتين .. الاولى ان ممكن مع اقل حركة للهوء او للرأس او اثناء الشرب .. بيظهر الوجه والخطر التاني هو تجسيم الصدر وذلك بسبب عدم اسدال النقاب عليه .. وهذا الامر يتهاون فيه الكثير من اخواتنا الفضليات ..

يبقي الافضل تشتري النقاب الكبير .. منها يداري الصدر ومنها تقدري تشربي وتاكل براحتك ولو جه هوا وجهك ما يظهرش ولو عايزه تاكدي عليه يبقي تربطي النقاب مع الملحفه من عند الصدر بدبوس .. عشان الهواء ميرفعش نقابك ...

 

 

8- اختنا الفاضله تلبس نقاب لكن فتحة العين واسعة جداً فتظهر العينين كاملتين بكل ما فيهما من زينة .. أليس هذا فتنة ؟

ألا يكفيكي ان تظهري القدر الذي تستطيعي من خلاله ان تكون رؤيتك واضحة !! او تغطي عينيك لو كنتي تستطيعي الرؤيه من خلف ( البيشه ) يبقي يا اما تغطي عنيكي خالص ..

يا اما تفتحي فتحه صغيره جداً بحيث انتي تنظري وفي نفس الوقت الناس لا تنظر لعينك .

 

10- أختنا الفاضلة تلبس نقاباً محتشماً واسعاً فضفاضاً ولكن تلبس بعض الاشياء الملونه مثل الحذاء او ( توكه ) او الجونتي او الشراب .. والاصل في حجاب المرأه انه غير ملفت للنظر ..

فالمفروض الاخت الفاضله ملتبسش شيء يلفت النظر خالص عشان متضيعش ثواب حجابها علي حاجات تافهه ..

 

11- المنتقبة التى تتزين تحت النقاب وهى ذاهبة للمسجد . ويكون لهذه المكياجات رائحه وكانها عطر واذا قلت لها هذا لا يجوز تقول هذه مكياجات وليست رائحه او تقول انه مزيل للعرق وليس عطر ... الحرمه كانت ظهور الرائحه وليس اسم المعطر .. وايضاً لمن تتزينين في المسجد ؟؟ مع العلم ان هذا يثير الشبهه وسط نساء المسجد .. علي هذه الاخت .

 

يبقي الاخت الفاضله تخرج من بيتها ( للضرورة ) ما رايت في حياتي انسان يخرج مضطر ( فيحط مكياج وعطر ) كيف تتعطري وتتزيني وقد قطعت عنك عبادتك ( القرار في البيت ) وخرجتي الي الدنيا والعياذ بالله !!!

يبقي الاخت تخرج بدون عطر ( سواء مزيل للعرق او رائحه حتى ولو كانت مسك .. حتى وان كانت عطر للاطفال حتى وان كانت كلونيا ثلاث خمسات ... لاء مينفعش .. ولا حته ينفع تعطري ابنك الصغير وبعد كده تشيليه .. لان المفسده تحققت وان الرجال يشمون رائحتك .. فالاخت تخرج بدون عطر و بدون مكياج .. وتتقي الله وتعلم ان رائحتها بدون عطر أحب الله من خروجها متعطره بافضل انواع العطور ..

 

 

12- التساهل في رفع النقاب امام اخو الزوج او بعض الرجال بحجة انهم أقارب هذا مالا يرضاه الله ورسوله . وايضاً التساهل في رفع النقاب في بعض المحلات بحجه ( عشان اعرف اتفرج علي الحاجه الي هشتريها ) او لو في مطعم بحجه عشان اعرف اكل واشرب ..

يبقي الاخت الملتزمه الي عايزه تاكل برا .. عندها كذا حل . اما يشتروا الاكل ويروحوا ياكلوا في البيت .. او انها تاكل من تحت النقاب الكبير الي لسا شاريه من شويه بعد ما عرفت ان الصغير غلط زي ما قلنا من شويه .. ومفيش حل ثالث مفيش حاجه اسمها انا هقعد في ركن ومحدش يشوفني .. فكرتني بالاخت الي دخلت محل ادت ظهرها للزباين واعطت وشها للحيطه ناحية الشارع ... بس للاسف كان الحيطة دي زجاج لانها كانت وجهه المحل فكانت الاخت استخبت من الزباين واظهرت وجهها للشارع ككل ( دي مش نكته رأيتها بعيني ) ... فالاخت اما تاكل في بيتها يا اما من تحت النقاب .

13- التساهل في كشف الوجه أمام بواب العمارة – أو جامع القمامة ( الزبّال ) عن طريق ( الكسل في لبس النقاب عند فتح باب الشقه لهما )

 

الحل ان مفيش شيء اسمه كسل في ستر عورتي .. والحل العملي انك تدقي مسمار عند باب الشقه تحطي عنده اسدال ونقاب يكون خاص بفتح الباب منفصل تماماً عن اسدالك ونقابك بتاع الخروج بحيث يكون مكانه عند باب الشقه فقط خاص بفتح الباب .. واتقي الله اختنا الفاضله .. في نفسك ..

14- عدم لبس النقاب عند فتح باب البيت أو عند الوقوف في الشباك او وقت نشر الغسيل ( سواء بالنهار أو بليل ) و التساهل فى ذلك .. كل ذلك من الاستهانة بأوامر الله.

 

يبقي الوقوف في الشباك ( اذا كان للضروره ) او نشر الغسيل لازم يكون بالنقاب مينفعش من غير نقاب سواء بالليل او الصبح .. ومفهاش حل تاني ..

15- عباية مفتوحة وتحتها سروال" بنطلون جينز " يظهر من الجانبين.. وهذا مما يدمي القلب .. فانتي لبستي النقاب لانك عفيفه لماذا تتشبهين بالفاسقات ...

مش هقولك متلبسيش بنطلون .. لكن هقولك لا تظهري هذا البنطلون .. ولبس البنطلون مهم لان الاخت لو اكتفت بالجيبه ممكن تظهر ساقها او رجلها عند الطلوع والنزول من المواصلات فالبنطلون مهم ... وايضاً الجيبه مهمه عشان الهواء لما يكون شديد ميخليش الملحفه تجسم الرجل فالجيبه بتمنع الملحفه من تجسيم الرجل .. فالجيبه والبنطلون مهمين معاً تحت الملحفه

 

17- بعض المنتقبات تلبس معصم ملون وتشمر تحته اسدالها وكانها خارجه من خناقه وتختار المعصم بالالون فسفوريه ... وينقصها الجنزير وضربتين موس في وشها .. هذا من التبرج الصريح وتجسيم اليد .. ناهيك عن خامات هذه الباديهات أو ( المعصم ) الملتصقه بالجسد .

المعصم يكون اسود ومن تحت الملحفة .. عصمني الله واياكي من الفتن

18 - بعض المنتقبات يلبسن .. الحجاب كاملاً ولكنها تزيد علي اسدالها طرحه ( ايشرب ) يكون ملون .. وبكده تكون بوظت الاكله عشان بقرشين ملح ...

الملحفه كافيه .. مش عارف ايه ده لازم ايشرب تاني !!

19 – الاخت الملتزمه عندما تمشي في الشارع وشايفه الهواء شديد ... تقف علي جنب .. ولا تتحرك .. لانها ان أكملت سيرها في الهواء تجسد كل جسمها .. وهي لا تبالي .الاخت الملتزمه لا تتشبه بالرجال في لبسها .ومشيتها

يبقي لما يكون يوم حلو كده كله مطر وهواء واشياء خطره الافضل الاخت تاجل مشاورها .. لو منفعش تبقي تعمل المفسده الاقل فالاقل فبدل ما تمشي في الهواء تركب تاكسي وهكذا .. تراعي ستر جسدها يعني .. وربنا يسترنا ونساءنا جميعاًً

20 – الاخت الملتزمه إن امسكت في يديها شنطة .. صحيح هذه الشنطه ليست من لبسها ولكنها من زينتها فتراعي ان لا تكون شهره ولا فتنة

تكون شنطه سوداء وبلاش بقا ميكي ماوس وبطوط والكلام ده

 

 

اقول لكي في نهاية النصائح المتعلقه باللباس .. ان من مقاصد الشريعة في لبس المراه هو إخفاء الزينة .. فبلاش يكون لبسك ضد مقاصد الشريعة ..

واقول لكي كما قال الشيخ خالد الراشد .. اننا في عصر اتخذ البنات فيه حكمة ( خير اللباس ما قل ودل ) فلا تكوني ممن دل بحجابه على ضعف ايمانه .. وتشبهي بالكريمات العفيفات .. لعل الله ان يلحقك بهن في جنات النعيم ..

ويغفر لنا جميعاً ويرضى عنا ويجمعنا جميعاً في جناته ويرزقنا النظر إلى وجهه الكريم .. قولوا امين ..

 

 

 

[منارة الاسلام1 0]

أختي العزيزة بوركت وتقبل الله منك وجزاك الله عني وعن كل الملتزمات خير الجزاء

بوركت على التذكرة على الرغم من اني غير منتقبة فادعوا لي يا اخوتي

[نجمة فلسطين 34]

حبيبتي آيات

مو عارفة كيف اشكرك الموضوع رااااااااااااااااااااائع

مثلما عهدناك دوماً :)))))

 

رح انشره حالاً

 

جزاك ربي كل خير

بانتظار جديديك

 

احبك في الله

[بريق الهدى 5]

رااااااااائع جدا

 

بورك فيكِ ياغالية

 

اسال الله ان يعافينا ويسترنا ويستر نساء المسلمين اجمعين

 

سلمت يمناك

[أم ربعي 21]

ماشاء الله لاقوة الا بالله

بارك الله فيكِ وبكِ اختى أيات

كلام احسبه خرج من القلب ووصل الى القلوب

[دموع الاسى 2]

بارك الله فيك

 

اسال الله ان يرزقني لبس النقاب يارب امين

[**حنين للجنة** 16]

السلام عليكــم ورحمـة الله وبركاتــة ،،

ما شاء الله لا قوة إلا بالله موضع رائع جعلة الله فى ميزان حسناتك

 

 

بس كان ليا سؤال هو ينفع ان الأخت تركب تاكسى لوحدها؟؟؟؟ اعتقد انها خلوة بس موش عارفة فى الضرورة يجوز أم لا

 

ارجو الرد على سؤالى

[أختكم آيات 1]

السلام عليكم ورحمة الله وبركاته،،

أخواتى منارة الإسلام -دموع الأسى

جزاكم الله خيرا

حبيت أقول لكم ان من صدق مع الله صدقه الله

ربنا يكرمكم بلبس النقاب قريب

اختى نجمة فلسطين الحبيبة

وإياكى حبيبتى

انشريه ولك الأجر إن شاء الله

نورتى

أختى بريق

اسال الله ان يعافينا ويسترنا ويستر نساء المسلمين اجمعين

ااامين جزاك الله خيرا

جزاك الله خيرا أختى ام ربعى

[أختكم آيات 1]

أختى ام محمد حسان

جزاك الله خيرا

بس كان ليا سؤال هو ينفع ان الأخت تركب تاكسى لوحدها؟؟؟؟ اعتقد انها خلوة بس موش عارفة فى الضرورة يجوز أم لا

اعتقد لا والله أعلم لانها تعتبر خلوة بس يمكن قصد الكاتب ان يكون معاها محرم ماتركبش لوحدها

[♥ أمـ نـادية ♥ 4]

كلام فى الصميم

 

وكمان فعلا فعلا بتحصل للاسف من بعض الاخوات هداهن الله

 

فأسأل الله ان يهدينا ويهدى الجميع

 

وجزاك الله خيرا لطرحك الموضوع ..

[نسمة الريحان 0]

عليكم السلام ورحمة الله وبركاته

 

بارك الله فيكى حبيبتى ايات وجعله في ميزان حسناتك

 

انا للاسف لسه مالبستش النقاب بس استفدت كتير من موضوعك لانى ناوية لما اتجوز بعد كام شهر ان شاء الله البس النقاب (يارب قدرنى ) وكنت لما اتخيل نفسي في النقاب كنت بشوف نفسي عامله اخطاء من اللي قلتى عليها وكنت شايفاها عادى فجزاكى الله خيرا صححتيلي حاجات ككتير وليا بعض الاستفسارات اسمحيلي بيها

 

انا عايز اقول كلمة صغيره .. لبس النقاب مش هو المقصد ( فقط ) من الالتزام .. ومش هو نهاية الالتزام ..

 

 

لبس النقاب مش مجرد تغطية ملامح الوجه .. النقاب ده شيء كبير اوي .. شيء محترم اوي ( قمة العفه والعفاف )

 

 

 

النقاب مش بس إخفاء أنف وفم .. النقاب سمو في الروح .. وعلو في الهمه .. ونقاء في القلب

 

اول ماخطيبي كلمنى في حكاية النقاب كنت بقله ان النقاب مسئوليه مش قدها وشايفه نفسي انى فيا حاجات كتير لازم اصححها عشان يبقي جوة زى بره مش يبقي نقاب من بره ومفيش حاجه في قلبي وكان بيقولي ان النقاب هايساعدك تكونى احسن وأفضل ودلوقتى أنا اتلخبطت الواحدة تستنى لما تبقي شايفه نفسها قد النقاب ولا تلبس النقاب وتحاول تبقي قده وربنا يعينا علي نفسنا

 

السبب في ده تهاون بعض الاخوات وتساهلهم مع وجود فئه ( **** ) بيداروا خلف النقاب في اعمال اباحيه ..

 

تانى حاجه عن موضوع اللي بيداروا ورا النقاب والدى مثلا واخد فكرة وحشة جدا عن المنتقبات ومش هو وبس كتير جداوبيستشهد بجرايم بتحصل بسبب النقاب ورجالة بتستخبي وراه وسلوك بعض المنتقبات في تعاملها مع الناس وبصراحه لنى بشوف ده بعينى مش بعرف ارد مع انى مقتنعه بانه أمر من ربنا ومقتنعه بالرأي اللي بيقول بوجوبه الا انى برضه مش بعرف ارد عليه

لو مكانى هاتردى بايه ده بس عشان نفسي اقنعه لنى خايفه من رد فعله لما ربنا ييسر لي لبس النقاب في بيت زوجى

 

الكعب العالى لما يصدره من صوت وحركة مائله في المشية .

 

والحل انك تلبسي حذاء او كـُتش يكون فلات ( علي الارض يعني )

 

تقصدى بالكعب العالي اللي بيصدر صوت ولا أى كعب عالي لنى للأسف متعوده عليه ومش بعرف امشي في الأرضي وببقي بشهادة ناس كتير معوقه فاستبدلت الكعب العالي ده اللي هو الرفيع بكعب عالي بس فلات مش بيصدر صوت فأرجو الإفادة في ده كمان

 

 

كفايه كده عشان ماتزهقيش منى وابقي اكمل في وقت تانى

 

أحبك في الله

[طامعه في رضا الله 0]

مجهود ممتاز

وجزاك الله كل الخير

[MARYM 0]

السلام عليكــم ورحمـة الله وبركاتــة شكراً لك اختي الكريمة على هذه النصيحة

[~*أم جويرية*~ 71]

السلام عليكم و رحمة الله بركاته؛

 

 

بمركتِ اخت آيات على هذا النقل الطيب ، و نسأل الله أن نكون مِن من يستمعون القول فيتبعون أحسنه

 

أريد بس أن اعقب على قوا الأخت نسمة الريحان

 

أعفك الله يا أختي و رزققي لبس النقاب قريبا جدا إن شاء الله

 

أولا: بالنسبة لموضوع أن النقاب هو مسؤلية و أنه ليس آخر المطاف، نعم هو كذلك، و لكن ليس معنى ذلك أن تنتظري أن تصلحي الداخل أولا ثم تلبسيه، لسببين

1- لأن ذلك هو أمر الله لنا و ليس لنا الخيرة في أمرنا في أمر الله و رسوله( دا إذا كنت فعلا مقتنعة إنه الحجاب الشرعي المطالبين به أمام الله)

2- ان الإنسان يظل طوال حياته يجاهد نفسه على إصلاح الداخل، فهل يستطيع أحدا أن يقول " خلاص يا جماعة أنا تمام كده من جوه أبيض "، و نحن خطائين و نظل نجاهد أنفسنا حتى الممات

 

ثانيا: بالنسبة لموضوع الشبهات التي تدور حول النقاب من أن هناك من يتخفين ورائه من نساء غير صالحات أو رجال أو .. او..

أرد عليكي بأجابتين

1- كما رد الشيخ أبو إسحاق الحويني حفظه الله

و هل إذا تخفى شخص مجرم في هيئة ظابط شرطة أو طبيب، هل يدل ذالك أن نمنع تلك الملابس حتى لا يتخفى فيها مجرمون؟

و إجابتي

2-و هل إذا كان هناك بعض النساء الفاسقات يتخفين في أي هيئة أخرى كالعبائة مثلا أو حجاب عادي ( فليس كل الفاسقات يتخفين خلف النقاب!) فهل يجب على كل محجبة و لو حجابا عاديا أن تترك الحجاب مطلقا حتى لا يتم الشبها فيها؟

الحل أن يتقين الأخوات أنفسهن في لباسهن كمت هو موضح في الموضوع و يحفظن سلوكهن ، فبذلك يتضح الملتزمات حقا من غيرهن

 

و نسأل الله أن يعفنا و يبعد عنا الشبهات،فإن هذا هو زمن الفتن،و الماسك على دينه كالماسك على جمرة من نار

 

و بالمناسبة وحشتيني يا أخت نسمة الريحان في موضوع كلمني إنجليزي :smile:

 

 

!

[(:بسمة تفاؤل:) 4]

وعليكم السلام ورحمة الله وبركاته،،

جزاكِ الله خيراً آيآت الحبيبة

لا حرمكِ الله الأجر

وتقبلي اعتذاري لأن الموضوع مُكرر

https://akhawat.islamway.net/forum/index.php?showtopic=89817