هوصل صوتى من بلكونتى- بحبك يابلدى -نداء للمصريات

[المشتاقة لجنان الرحمن 0]

السلام عليكم ورحمة الله

بحبك قوى يا بلدى ... وعايزاكى دايما تكونى أحسن

بس بخاف قوى برضه على ولادى

فرحانه باللى بيحصل ...عايزه التغيير للأفضل

برضه عشان ولادى

بس مش قادره أنزل ولا أشارك

 

لو إنتى زيى

شايفه اللى بيحصل

ونفسك تشاركى

بس ماتقدريش

عشان أم

عشان حامل

عشان ظروفك ماتسمحش

أو حتى عشان خايفه من اللى ممكن يحصل

 

 

تعالى أقولك أنا فكرت فى إيه

سألت نفسى

هو أنا فرحانه ليه بالمظاهرات...وعايزه منها إيه

أنا مش عايزه النظام يسقط

لأن بدل النظام هايبقى فيه فوضى وخراب

 

لكن أنا ليه مطالب من النظام

نفسى يسمعها ويحاول يغيرها للأحسن

 

عشان كدا

كل واحده فينا مش قادره تنزل

قومى هاتى أى ملايه قديمه أو بياضة مخده أو أى حتة قماشه مش محتاجاها

وإكتبى عليها بالقلم الماركر بخط كبير إنتى عايزه إيه

وعلقيها على بلكونتك

إنشريها زى الغسيل بمشبكين

 

قولى لجارتك وكل اللى حواليكى

وكل صاحبه ليكى

 

إكتبى إنتى عايزه إيه

أنا كتبت

أنا عايزه ولادى يتعلموا كويس

عايزه مرتب يكفى إحتياجاتى الأساسيه

عايزه حياة كريمه

 

كل واحده تكتب طلب وتعلقه

من حقنا كأمهات وستات بيوت نشارك وبقوه

لو كل واحده عملت كدا

أكيد هايكون لينا صوت ودور

 

البنات ينزلوا يخبطوا على البيوت ويقولوا للستات يعملوا إيه

 

إكتبى إنتى عايزه إيه

عايزه تشتغلى ومش لاقيه شغل

عايزه تاكلى ومش لاقيه أكل

عايزه مرتب محترم يكفى بيتك

عايزه تعليم كويس لولادك

 

كل واحده تدخل تشارك معانا

خلينا نبدأ حمله ستات البيوت والأمهات

يكون ليهم صوت

 

ومن بلكونتى هاوصل صوتى

 

كل اللى تشارك معانا فى الحمله تدخل تقول كتبت إيه وكام واحده من جيرانها أو صاحبتها شاركوا معاها

ولو عرفت تصور الملاية من تحت البيت ياريت تنشر الصورة والادارة ح تحطها في اول مشاركة هنا

[دانة الاسلام 38]

كل الناس عايزة تشارك و تقول حاجات كتير

 

فى المظاهرات بس فيه ناس مش قادرة و فيه ناس خايفة

 

فكرتك جريئة بس لازم اذن الزوج بارك الله فيك

[malak.m.n 0]

لى مطالب مثل غيرى مثل رفع المرتبات - تخفيض الاسعار - محاربة الفساد - التعليم على اسس صحيحة - تنظيف البلد - الصحة ......... الخ

ولكن لا احبذ نكران الجميل فين ريسنا من رئيس تونس ياناس تونس كانت لا تسمع الاذان - لا للحجاب - لا للتعدد يا اخوات جعل البلد ماسخة علمانية صريحة باحتة مصيبة فى الدين مش عارفة كيف تحملوا هذا لكن عندنا ولله الحمد المصيبة ليست فى ديننا والحمد الله كلة يهون ويتحمل الا مصيبة الدين وبصراحة العيب فينا ماحدش ضرب حد على قيدة وقالة اسرق ما فية ناس مابسرقش لا بد نعدل من انفسنا اولا ثم نطالب غيرنا بالتعديل

[محبة عائشة رضي الله عنها 0]

وعليكم السلام ورحمة الله وبركاته،

ماشاءالله تبارك الله فكرة جميلة

 

انا ما بحب المظاهرات لاني بحس بتولد منها خراب اكتر مش عارفة ليه حرق عربيات تكسير المحلات ذنبهم ايه الناس دول !! و احيانا عنف.

و حاليا مش عارفة ايه رأي علماء الدين فيها، نشارك فيها و لا ﻷ؟ هل تعتبر خروج عن الحاكم ولا ﻷِِِ؟ ماهو سرها في هذا التوقيت ياتري؟ سمعت حد قال فتنة و ما ادري صحيح هي فتنة طيب ما هو موقف المسلم في الفتن؟ اسفة ما اقصد اغير موضوعك بس هي تساؤلات و ما دامك جيتي بهالفكرة توسمت فيك الخير اتمني اجد عندك لي اجابات تريحيني ارجو ما تبخلي علي وجزاك الله خيرا

 

عموما انا مش مصرية يعني ما انفع اشارك معاكي بفكرتك بس هي فكرة جميلة جدا

 

اعاذنا الله و اياكم من الفتن ما ظهر منها و ما بطن....آمين

[moolaa 0]

السلام عليكم

حبيباتى الى يقول ما احب المظاهرات لان يولد منها خراب

 

الخراب تعمله الحكومات الفاسدة فقط وليس ابناء المظاهرات .. وهذا م اشاهدته بعينى واقسم بالله على ذلك

ان من كان يقوم بالتخريب هم الظباط انفسهم لتشويه صورة المظاهرة السلمية

 

ولكن اى حكم طاغى لابد له من ضحايا ولا بد له من مواجهه ولا بد له من كلمة حق فى وجهه

 

اما انه هيصلح وننتظر منه التغير لن يتم لن يتم وهذا بعد تجربة 30 عام مع النظام وكل مرة ياى بفكر جديد

بعده ياتى الغلاء والغلق والحبس والتعاون مع الاعداء اكتر واكتر

ولا يخفى علينا ما يحدث للمسلمين فى مصر

اما الخوف من الطاغية فهذا ليس من الاسلام فى شىء

والخروج على الحاكم الفاسد ضرورة سواء بالقول او الفعل

 

وهذه ليست فتنة ولا شىء هذه استفاقة للمسلمين بعد ضياع احوالهم

لعل التغير للحكم ياتى بما هو افضل .. اما الضحايا والتخريب والتكسير هذا نتيجة المواجهات

وقال تعالى ( كتب عليكم القتال وهو كره لكم )

 

واى مريض ضعيف لابد له من شرب الداوء حتى لو كان مرا للشفاء

ادعوا معى ان ينصر الله المسلمين

يكفى ان الاخوات فى غزة فرحين بتغير الحكومة والمظاهرات لان التغير سياتى بنصر لهم بفتح المعابر المصرية

ومنع الغاز عن اسرائيل باذن الله

 

تحياتى للجميع بالتوفيق

[صاحبه القلب الطيب 12]

السلام عليكــم ورحمـة الله وبركاتــة ،،

 

حالا كنت اكتب ارد فى موضوع اخر ورأيت الموضوع وشعرت ان رأيى لابد ان يكون هنا ايضا

 

القلب به الكثير والكثير والكثير

 

منذ ان رأيت ثوره تونس وانا اقول هل يمكن للمصريين ان يثوروا هكذا ويشجبوا ها النظام ويطالبوا بحقوقهم الضائعه

 

للاسف نحن فى مصر اصبح الناس

 

البطاله والفقر والتكاسل والفساد السائد عندهم

 

يكفى انى رأيت بالامس رجل يصرخ ويقول مرتبى 500 ج

وايجار شقتى 400 ج وعندى 4اولاد وزوجه من اين اكل واشرب واربى واعلم ؟؟؟

 

نعم من ايييييييين ؟؟؟؟

 

كيف لناس تخرج من الصباح الباكر لتعمل 24 ساعه كالعبيد ولا يحصلون الا على ملاليم واخرون مرفهون ويقبضون بالمليارت

 

كيف لبلد يصور فيها الفنانين اعلانا لمده دقائق ويقبص 4 مليون ج واكثر واخر ممكن ان يعمل 40 سنه ولا يحصل على عشر هذا المبلغ حتى ؟؟؟

 

هل هذا عدل !!!!

 

كيف لبلد يتخرج فيها كل يوم الالاف والالالاف بتقديرات عاليه والبطاله تنتظرهم وترحب بهم اما ان يعملوا اى مهن او يبقوا بلا عمل او يهبوا لبلاد اخرى ليخدموا اهلها وبلادنا بها الخير ولا نراه

 

كيف لبلد مفسديها اكثر من مصلحيها لها ان ترتقى ؟؟؟

 

كيف نثق بالحكام الناس تتأوه وتعانى ..... خرجت الناس بالشوراع فى ثوره غير مسبوقه سموها ثوره الغضب وهى ثوره الفقر والضنك ...لو كانت الناس مرتاحه ما كانت خرجت

 

تطالب بحقوقها ...لقد سكتنا كثيرا وكثييييرا ولكن فعلا تعبنا وتعبت قلوبنا

 

الشباب لا يج فرص عمل ولا زواج ولا شئ ..كل ما يجده دعوات للانحراف

 

من حقهم ان يعبروا عن غضبهم ومن حقهم ان يجدوا من يسعهم ويلبى مطالبهم

 

تسلمى حبيبتى على الفكره الرائعه والتى قد تبدو غريبه عند البعض ولكنها جميله فعلا وياريت كلنا نعمل بها

لو كل السيدات قامت بها لامتلاءت الشرفات بمطالبنا ولصورت الفضائيات وعرفت كم المعاناه التى يعانيها ها الشعب المظلوم

 

والمظاهرات شئ راااقى جدااا بنظرى وماهى فتنه الفتنه ان نصبر على الظلم

 

كيف لبلد ان تتحرر وشعبها صامت وساكت عن حقه

 

ماهى مطالبنا مطالبنا بسيطه

 

 

عدل

عمل

غذاء

تعليم

مساواه

 

اليس من حقنا ذلك

 

كلمات انسانه مصريه حزنيه على بلدها

 

[صاحبه القلب الطيب 12]

اين رأيكم يامصريات ؟؟؟

 

حتى رأينا نبخل به

 

لا حول ولا قوه الا بالله

[* أم أروى * 0]

في مدينة السويس يرابط مئات المتظاهرين حاليا فى شارع الجيش ويؤكدون أستمرارهم في التظاهر، وسط توقعات بخروج مظاهرة ضخمة وتمت الدعوة لأداء صلاة الغائب على أرواح قتلى الاحتجاجات

 

ماهى مطالبنا مطالبنا بسيطه

 

 

عدل

عمل

غذاء

تعليم

مساواه

 

اليس من حقنا ذلك

 

كلمات انسانه مصريه حزنيه على بلدها

 

 

مطلوب تغيير محافظ السويس

ابسط ما يرضى السوايسه

[المشتاقة لجنان الرحمن 0]

فين المصريات ياأخوات يقولوا رأيهم

 

عايزين ننفذ الفكرة لااااااااازم نتعاون علشان نبقى قوة

[مشكاة الأنوار 0]

مش عارفه أقولكم ايه يا أخوات بس على أد ما أنا مبسوطة باللى بيحصل من شباب مصر على أد ما أنا خايفه للعواقب لأنى لو الثورة دى انتهت وكانت زوبعة فى فنجان ولاقدر الله فشلت هيتحول هذا النظام الحاكم الظالم الى غول لن يستطيع أحد الوقوف أمامه ,وخايفه حتى لو الثوره نجحت منلاقيش حد يصلح يمسك الحكم ونبقى عرضه للتدخلات الخارجية وتدخلات الأحزاب السياسيه التى لها شهوة للسلطة ونبقى معملناش حاجه غير انى مشينا واحد ظالم وجبنا مكانه ألف ونبقى فريسه لمطامع ذوى النفوس المريضه المتعطشه للسيطرة والتسلط على البلد ربنا يسترها أرجو انكوا متحسوش انى متشائمه بس بجد انا بنقلكوا احساسى لأنى بجد مش عارفه احنا رايحين على فين؟

[مشكاة الأنوار 0]

وبالنسبة لفكرة أختنا المشتاقه لجنان الرحمن بجد الفكرة هزتنى جدا وبجد نفسى أنفذها ومطالبى بسيطة

[وسط][/وسط]نفسى أحس بالأمان

[أم سوفي 0]

ماهى مطالبنا مطالبنا بسيطه

 

 

عدل

عمل

غذاء

تعليم

مساواه

 

اليس من حقنا ذلك

 

تسلم ايدك يا ام حبيبة هي دي فعلا مطالب المصرين

جزاك الله خير يا المشتاقة افكار رااااااااائعة بجد

ربنا يحمي شبابنا ياااارب