[متميز] الست ذكية

[ريحانة زوجي 63]

هههههههههه شريرة أوي يا زكيه طب دا الرجل داخ معاكي هي دي أخرتها

أنا لو مكانه أقول عليكي فلة من الفلولات ههههههههههه

[هبة عبد العظيم نور 2042]

المثل بيقول ع الأصل دور

 

وكل واحد وجذوره

 

اصل ذكية من الناس اللي تحب تتباهى بأصلها وفصلها

 

وشغالة فرجة على التمثيليات التركي

 

 

ولما عبد الصمد زهق من كتر المسلسلات التركي سألها

 

 

 

تعالوا نشوف ايه حصل

 

 

 

 

 

 

ايه يا ذكية يعني كل ماادخل الا قيكي بتتفرجي على تركي

 

طبعا يا عبد الصمد مش كل واحد بيحن لأصله

 

ليه يختي هو انتي كان اصلك تركي

 

امال ايه يا عبد الصمد انا تركية اما عن ستا

 

امان يلالالي يختي

 

جرا ايه ياعبد الصمد انت بتتريق علية وعلى اصلي .لالالا مااسمحلكش يا اسمك ايه وبعدين اتعلم ازاي تتكلم مع الهوانم التراكوة

 

هما فين الهوانم التراكوة دول

 

سعادة جناب عظمتي ولا مش واخد بالك

 

ياشيخة اتلهي وبطلي تلزقي نفسك في العالم بقى

 

هو انت بتكدبني يا عبد الصمد

 

لا مش انا اللي بكدبك دا تاريخ عيلتك المشرف اللي بيكدبك يا بنت عم عويس بتاع الفول

 

شوف الجهل ياولاد اللي مضيع الناس .انا بقول تركية اما عن ستا مش ابا عن جدا . مين جاب سيرة ابويا دلوقتي

 

يا ذكية يعني ازاي امك الهانم التركية هتتجوز راجل غلبان بتاع فول

 

هذا هو الحب يا عبد الصمد ما يعرفش غني وفقير . امي ضحت عشان ابويا وعادت جدو كاظم باشا وخالو شوكت عشانه لولا تيتة صافيناز اتدخلت وصلحتهم على بعض

 

طب وامك سليلة التركوة عرفت ازاي بتاع الفول

 

ابدا ياخويا . ابويا كان بيعدي بعربية الفول قدام القصر بتاع جدو وكانت تيتة صافيناز تبعت امي كل يوم الصبح بطبق الامونيا عشان تجيب فول من ابويا وابويا كان دايما يتوصى بيها ويحطلها فول زيادة في الطبق ويديها قرنين فلف يعبرلها بيهم عن حبه قامت امي حبته من مصاميم قلبها ادي الحكاية يا عبده

 

ياسلام دي ولا الف ليلة وليلة فول وقرون فلفل وطبق الامونيا احمدك يارب . يعني ياذكية هما في السرايا بتاعتهم عدموا السفراجية والبوابين وباعتين امك تجيب فول من على العربية

 

سؤال لطيف وغير متوقع منك يا عبد الصمد . بس زي ماتقول ان تيتا صافيناز ماكانتش بتحب تتعب البوابين والسفراجية فكانت مقعداهم في اوض السرايا متعززين متكرمين وهي اللي كانت بتخدم عليهم عشان تذوب الطوابق الفرقية

 

 

 

طيب كاظم وشوكت مين يا ذكية انا معلوماتي ان جدك ابو امك اسمه عليش وخالك اسمه جعيدي وبعدين مين صافيناز دي . يا ذكية ستك ام امك اسمها بخيتة وعيب تستعري من اصلك

 

يا حفيظ يارب كل ده حقد جواك على عيلتي وهوانم عيلتي وبشواتها

 

يا ذكية خلاص هصدق ان امك تركية زي بعضه لكن ازاي خالتك خضرا تبقى تركية عمرك شوفتي واحدة تركية اسمها خضرا

 

لا ياعبد الصمد انا مش هخبي عليك اكتر من كدة خالتي خضرا مااسمهاش خضرا

 

امال اسمها ايه

 

اسمها الأميرة انجي . شوفت فيلم رد كلبي

 

شوفته ايام الضلال

 

هي دي قصة حياة خالتي خضرا اللي عادت ابوها الباشا واتجوزت الواد علي ابن الجنيني

 

يا سلام يعني امك عادت جدك واتجوزت بتاع الفول وخالتك عادت جدك واتجوزت ابن الجنايني على كدة جدك ماعرفش يربي وبناته خرجوا من تحت طوعه

 

طيب ما انا عاديت اهلي واتجوزتك يا عبد الصمد ولا ناسي ان ابوك بيسرح بعربية تين شوكي

 

اه معلش كنت فاكر بينا تكافؤ انا ابويا بتاع تين شوكي وابوكي بتاع فول لكن معلش امك بقى رجعتني لأصلي

 

لا يا عبد الصمد ما تقولش كدة يا خويا كلنا ولاد تسعة

 

تسعة ايه وعشرة ايه ياذكية هو انتي فاكرة ان امي شوية انا كمان امي اصلها فرنساوي

 

نعم ياخويا نعم هي مين دي اللي اصلها فرنساوي امك دي لو دورت ورا تاريخها تلاقيها جت مع الهكسوس ولا المغول

 

وسابوهالنا هنا الله ينتقم منهم بعدله عشان تنكد ع الشعب المصري كله وتزهقه في عيشته والمفروض نشوف اهلها في انهي مصيبة ونرجعهالهم تاني كفاية أذية لحد كدة . ال فرنساوية ال .دي امك شبه كومبليزا رايس

 

طيب ان شاء الله في عشا يا بنت اخت الأميرة

 

حاضر ياخويا حاضر ماهو آخر زمن ولاد الأمرا يخدموا ولاد الرعية . عجبي عليك يازمن

[دره بنقابي 55]

ههههههههههههههههههههههههههه

 

 

عثل يا هوبه والله من كفر ابو نعجه لذكيه هانم ههههههههههههههههههههههههههههههه ربنا ميحرمنا منك يختي ومن دمك الخفبف

[سماء الفردوس 305]

^{وانا برضه بقول ان ذكيه وراها حاجه اتريها طلعت تركيه ياصلاة النبى}

 

 

^{تكونش بنت عم الولا مهند ولا المزغوده نور ههههههههههههههه}

^{من كتر فرجتها على التركى بهت عليها ونسيت اصلها اللى شبه قدرة الفول}

^{وعبد الصمد باين عليه بيحب الاجنبى وهيطلع قريب جاكى شان فى الاخر}

^{لما اروح اقول للعيال يبطلوا فرجه كتير عالكرتون لحسن الاقيهم بيتحولوا ويبقوا نينجا هما كمان}

تم تعديل 16 يونيو, 2012 بواسطة سماء الفردوس

[~أملي بالله كبير~ 63]

خخخخخخخخخخخخخخخخخخ لعاد اصلها تركي وجوزها اصله فرنساوي

 

 

 

ياخراشي

 

 

وانا اصلي مسلمة عربية وكلي فخر :)

 

افتخروا بانهم من اصول اجنبية ونحن كلنا نفتخر باصلنا مسلمين من دول عربية لغة القرآن والحمدلله

[وأشرقت السماء 1565]

جزاكِ الله خيرا يا هوبة

ربنا يسعدك يارب

[إيماني عنواني 259]

^_____________^

أسعد الله قلبك هوبة الحبوبة

[هبة عبد العظيم نور 2042]

ماشاء الله

 

بجد بجد ذكية بتشكركو كلكو عشان سألتوا عليها وافتكرتوها

 

يلا زي بعضه

 

اسنوها في الموسم التاني وحلقات جديدة بعد العيد ان شاء الله وعليكو خير

 

شكرا لكل العسولات اللي زاروا الحلقة اللي فاتت

 

دمتم بود

تم تعديل 2 يوليو, 2012 بواسطة هبةنور

[حجابي هو عفتي 159]

هبهوبة الغالية فينك يا عسل انا اجيت لاسلم عليك وايه اخبار عبد الصمد

[ويبـا 39]

بصراحة الست ذكية ما خلتنيش ابطل ضحك انا فى الصفحة 10 ومش قادرة امال لما اخلص الموضوع هاعمل ايه ؟

 

بس بجد ده واقع حياه وساعات الاقى اخطاء فعلا باعملها بس اعمل ايه حديثة عهد بزواج سنتين بس لما اقضى فترة عقوبة كامله هاتغير باذن الله هههههههههههههههههه

[ويبـا 39]

اان شاء الله اكمل بكره لانى عينى تعبت من القراءه

[ام مريم وهاجر 16]

السلام عليكم كيفك يا هبه يارب تكونى بخير تقبل منا ومنكم صالح الاعما ل يارب العالمين

[نور قلبي القران 430]

السلام عليكم ورحمة الله وبركاته

 

للرفع رفع الله قدركن مع أنه الموضوع مرفوع من اصله

 

ههههههههههههه

 

جزاك الله كل خير هبة الحبيبة فعلا دي أغبى وحدة شفتها فحياتي

 

والراجل ده بيدخل في الصابرين ولا إيه؟؟؟؟؟؟؟؟؟؟

زودتها كتير

 

ع العموم لي عودة بإذن الله لانه الست الذكية طلعت فعلا ذكية وهتاخذ من وقتنا كتير