يوميات الست ذكية بدون ردود بقلم المبدعة "هبة نور"

[حواء أم هالة 1895]

*~* يوميــ الست ذكية ـــــــات *~*

(26)

بقــ هبةنور ــلم

 

ذكية النهاردة قاعدة فى البلاكونة فى الطراوة هى وجارتها فتحية

 

وعمالين يتسامروا ويتجاذبو اطراف الحديث لحد ماقربت تتقطع منهم بعيد عنكو

 

 

تعالوا نشوف بيقولوا ايه

 

 

 

الله يا ذكية .اما بلاكونتك طراوة بشكل

 

ليه يختى هو انتى محرومة من البلكونات .دانتى بلكونتك فوق بلاكونتى لزم

 

 

اصل ياذكية يختى مكومة فيها البصل والتوم بتوع الخزين ومش بعرف اخشها

 

اخص عليكى يعنى مخزنة بصل وتوم ومش هاين عليكى تدينى منهم كيلو ولا اتنين

 

ياحلاوة يختى .ماتشترى انتى يا ذكية .هو انتى كدة على طول عايزة ابو بلاش

 

كدة برضو يا فتحية .طيب يختى مش عايزة منك حاجة

 

احسن برضو

 

بصى كدة يا فتحية شوفى مين البت اللى داخلة العمارة دى

 

سلامة نظرك دى البت شاكيرا بنت ماجدة

 

ومالها نضفت اوى كدة

 

اسكتى مش ابوها جه من السفر امبارح وجايبلهم شئ وشويات عقبال امالتك

 

اتارى ماجدة مش باينة النهاردة بطوله .عشان جوزها جه بقا .طيب خليكى لما اقوم اصطاد البت ع السلم واستفهم منها

 

 

 

بت يا شاكيرا

 

نعم يا خالتى ذكية

 

تعالى لما اقولك كلمة يا عين خالتك ادخلى

 

حاضر

 

يحضرلك الخير يختى

 

اقعدى يا شاكيرا

 

طيب حضرتك عايزة ايه يا خالتى ذكية عشان كدة هتأخر على ماما

 

طب خدى قشرتلك يوستفندياية كلى

 

شكرا يا خالتى ذكية

 

الله فستانك حلو اوى يا شاكيرا جايباه منين عشان اجيب لدودو واحد

 

لا يا خالتى مش هتلاقى زيه هنا .اصل بابا جابهولى وهو جاى من السفر

 

هو بابا جه يا حبيبتى .ماكنتش اعرف .حمدلله على سلامته

 

الله يسلمك

 

وتلاقى امك بقا كانت عملاله المحمر والمشمر

مااعرفش ياخالتى ذكية

 

وياترى جاب لامك ايه بقا

 

مااعرفش ياخالتى ذكية

 

يابت ماتبقيش سوسة كدة زى اللى خلفتك .ماتقولى ابوكى جاب ايه لامك

 

مااعرفش ياخالتى ذكية

 

هو هيسافر تانى ولا هيقعد معاكو على طول

 

مااعرفش يا خالتى ذكية

 

يابت عيب عليكى انطقى ماتبقيش رزلة زى امك

 

ماما قالتلى لما حد يسألك عن حاجة تخص البيت قولى مااعرفش

 

جاتك مصيبة طالعة لامك الواحد مايعرفش ياخد منها معلومة مفيدة .هاتى يابت اليوستفندياية خسارة فيكى

 

اهيه مش عايزاها

 

قولى لامك هطلع ازورها كمان شوية

 

حاضر

 

 

 

 

 

اهلا ياذكية يختى منورة

 

ايه الحلاوة دى كلها يا ماجدة يادلعو يادلعو .ايه العباية الملوكى اللى انتى لبساها دى

 

محمود جابهالى معاه يختى

 

حلوة اوى اوى يختى

 

اتفضليها ياحبيبتى ماتغلاش عليكى

 

صحيح يختى طب هاتيها وماترجعيش فى كلامك

 

اشربى الشاى ياذكية

 

هو انتى جايبة شاى من ابو فتلة .داانا بحبه اوى

 

وماله ياحبيبتى اديكى علبة بحالها من عينى .هاتى علبة شاى لخالتك ذكية ياشاكيرا

 

حاضر ياماما

 

يابختك يا ماجدة .جوزك بيسافر ويجيبلك الحلو كله .مش زى حالاتى

 

يختى يابختى على ايه .انتى اللى يابختك ياذكية جوزك قاعد جنبك داخل خارج عليكى ولو عوزتيه فى اى وقت تلاقيه جنبك

 

الله اكبر فى عينك يا ماجدة .ماانا عارفاكى طول عمرك تحسدى الاقرع على شعر حواجبه

 

مش برد على كلامك ياذكية .صونى النعمة اللى انتى فيها يختى .والله ياذكية انا عندى اكلها بدقة بس جوزى يبقا جنبى وجنب العيال

 

طيب يختى انا نازلة اشوف حالى

 

بالسلامة يا ذكية

 

 

 

 

 

 

 

 

 

 

السلام عليكم

 

عليكم السلام يا عبد الصمد

 

خدى يا حبيبتى جبتلك حلاوة طحينية

 

يا دى الوكسة اللى انتى فيها ياذكية عبد الصمد اتشملل وجابلك حلاوة طحينية ياما جاب الغراب لامه ياخويا

 

انا غراب يا ام قردان .وبعدين فى لسانك اللى عايز قصه ده

 

ياخويا انتى مابتشوفش الرجالة بيجيبو ايه لستاتهم .انا طلعت عند ماجدة اتفرست ونزلت التفاح الامريكانى من كتره معلاقاه فى النجف

 

غير الجبنة الجنزوريلا والجبنة الفاكفورت وحاجات عمرى ماسمعت عنها

 

وده يديكى الحق تقلى ادبك على جوزك يعنى الحق عليه جايبلك الحلاوة الطحينية اللى بتحبيها

 

كرهتها يا عبد الصمد كرهتها سم ومش عايزاها تعتب بيتى تانى

 

ياذكية الست لما جوزها يجيبلها حاجة حتى لو بسيطة لازم تشكره وكفاية انه افتكرها ومش ناسيها

 

ياذكية انا كنت دايما اشوف امى حتى لو ابويا داخل بحزمة فجل تقوله ربنا يخليك وتعيش وتجيب وعمره ماغلطت وقالت ياما جاب الغراب لامه

 

 

سيبنى فى حالى ياعبد الصمد

 

طيب قوليلى نفسك تاكلى ايه واجيبه حالا

 

بجد ياعبد الصمد

 

طبعا هو انا عندى اعز منك

 

نفسى اكل كباب وكفتة وطرب

 

حاضر .هتصل اجيب حالا من الحاتى يا حياتى

 

 

 

 

 

 

 

 

الكباب وصل ياولاد يلا بسرعة

 

 

يلا ياذكية

 

ايه رأيك فى ريحة الكباب والكفتة

 

حلوة حلوة حلوة اوى يا عبد الصمد

 

طيب ادينى شممتك ريحته ادعيلى بقا

 

ربنا يخليك ياخويا . ناولنى رغيف

 

لا يا روح قلبى انسى انتى مش هتدوقيه اصلا

 

ايه ايه ايه يعنى ايه يا عبد الصمد .انا نفسى فى الكباب حرام عليك

 

لازم تتعلمى الادب وتقدرى جوزك وماتغلطيش فيه

 

طيب وانا هاكل ايه دلوقتى

 

روحى اسألى الغراب وامه

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(27)

بقــ هبةنور ــلم

 

الحلقة دى حلقة مستعجلة كتبتها من غيظى

 

ذكية بتتابع الاخبار مع عبد الصمد

 

وهموا هيطقوا يا عينى تعالوا نشوف ايه اللى بيسمعوه

 

 

 

 

 

اووووووووووووووووووووف

 

مالك يا عبد الصمد بتنفخ ليه

 

 

ياذكية يعنى انتى مش سامعة الاخبار المهببة دى عن المؤامرات ضد الاسلام

 

ياخويا انت بتتلكك .هو حد جاب سيرة الاسلام بكلمة لا سمح الله

 

ياذكية معنى ان هما يستبعدوا مرشح عايز يطبق الشريعة الاسلامية تبقا دى مؤامرة ضد الإسلام مش ضد المرشح

 

هو فى ايه يا عبد الصمد انا مش فاهمة حاجة ياخويا

 

امريكا بتتآمر على الاسلام

 

ياخويا هى امريكا مالها ومالنا هى فى حتة واحنا فى حتة .هو احنا كنا اتدخلنالها فى حاجة يوم مااختاروا كليمبون

 

 

كلينتون مين ياذكية اللى بيحكم امريكا دلوقتى اوباما .التخطيط لتدمير الاسر المسلمة على اشده

 

هو كل بلوة عايز تلبسها لامريكا يا عبد الصمد

 

طيب ايه رأيك فى اتفاقية السيداو

 

مين السيد كاو ده

 

دى اتفاقية عملاها امريكا للمساواة بين الرجل والمرأة مساواة كاملة

 

يا حبيبتى يا امريكا طول عمرك جدعة يختى

 

ياست بقولك مساواة كاملة انتى مش فاهمة حاجة اصلا

 

يعنى الستات يطلعلوهم شنب والرجالة يرضعوا العيال ويغيروا البامبرز يا عبد الصمد

 

دول عايزين يعبثوا فى الشريعة الإسلامية ويلغوا العمل بأيات الميراث اللى بتعتمد على ان الرجل له مثل حظ الانثيين

 

لالالالالالالالا كله الا الدين .عايزين يلعبوا يلعبوا بعيد عن الدين .والا ربنا يطربقها على دماغهم ودماغنا

 

يعنى انتى فاكرة امريكا تعرف ربنا وبتخاف منه

 

اخص عليها امريكا .طيب واحنا هنسمع كلامها ياعبد الصمد

 

والله اللى هيمشى وراها يبقا هيخسر الدنيا والأخرة .وبعدين دانتى ماعرفتيش المصيبة الكبيرة

 

استر يارب خير ياعبد الصمد خضتنى

 

الاتفاقية بتبيح ممارسة الرزيلة .وتبيح الحرية الجنسية للمراهقين

 

يا واقعة طين .انتى بتتكلم جد ياعبد الصمد

 

بصى ياذكية الاسلام حرم ممارسة الرزيلة واتخاذ الاخدان وهما بيبيحوها .وقال للذكر مثل حظ الانثيين وهما مش عايزين وطبعا فى نصوص تانية للإتفاقية كلها عايزة تجرد الناس من دينهم

 

ودى مش بس ضد الشريعة الاسلامية وحدها لكن ضد كل الشرائع السماوية

 

طيب وبعدين يا عبد الصمد هنعمل ايه

 

الله اعلم بللى هيحصل وعشان كدة الناس عايزة حاكم يحكم بشرع الله ويكفينا شرور امريكا اللى عايزة تفضل مسيطرة على العالم

 

وعشان هى عارفة ان لو رجعنا لشرع ربنا دا يعتبر تدمير لسطوتها على العالم وده لأن قوتنا فى دينا واتباع تعاليمه عشان كدة هى بتعمل المستحيل عشان مايحكمناش حاكم اسلامى

 

بقا هى الحكاية كدة .الله يخرب بيت سنينك يا امريكا يا وش الخراب .

 

الهى يا بعيدة يهد قواكى ومايقوملك قومة تانى

 

قادر كريم يجى شلل لتمثال الحرية والشوعليلة تقع من ايده يا بعيدة

 

الهى يرزقك بمطاريد شيكاغو يسممولك البهايم وماتلاقى عندك ولا معزة

 

الهى يجى شوطة للدورار بتاعك ويبقا بربع جنيه مصرى ويبقا فى ايدين العيال ويجيبو بيه نداغة

 

قادر كريم تلف بيكى الكورة الارضية تصحى تلاقى نفسك فى كفر ابو طشت بترعى البقر زى زمان ولا نسيتى اصلك يا عديمة الاصل

 

ان شاء الله هيحكمنا شرع ربنا وانتى هتقعدى بنارك يا غلاوية يا صفرا يا امريكا البوبى

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(28)

بقــ هبةنور ــلم

 

كل واحدة تشوف اسمها ايه

 

يعنى هل ابوها وامها احسنوا اختيار اسمها ولا لأ

 

اصل منكسرة اخت ذكية ولدت

 

تعالوا نشوف جابت ايه ونبارك ونشرب الموغات

 

اهى ذكية جت ياولاد من المستشفى

 

تعالوا يلا

 

 

 

 

 

 

 

 

مبروك لاختك ياذكية وحمدلله على سلامتها

 

الله يسلمك ويبارك فيك يا عبد الصمد

 

وياترى ربنا رزقهم بايه

 

رزقهم ببت زى القمر شبهى بالظبط

 

ربنا يستر

 

بس ياخويا سايبة منكسرة وجوزها عبد المقصود بيتخانقوا ومفرجين عليهم المستشفى

 

لا اله الا الله .هى اختك دى حتى وهى والدة وتعبانة بتتخانق

 

امال ايه ياخويا عايزها تسكت على حقها

 

وبيتخانقوا ليه

 

هى عايزة تسمى البت نانسوا على اسم نانسو عجرن وعبد المقصود عايز يسميها عطيات على اسم امه لكن هى قالتله امك اسمها موضته انقرضت راحت حماتها زعلت وقالت لو ماسمتش البت

 

عطيات ياعبد المقصود لا انتى ابنى ولا اعرفك وهحرمك من الميراث وهكتب الطبلية وحلتين النحاس بأسم اختك لوحدها

 

طيب وانتى رأيك ايه

 

انا كان رائى يسيبوها يااخويا من غير اسم ولما تكبر تبقا هى تختار عشان ماحدش يزعل

 

ماشاء الله ربنا يحرسك ويرعاكى

 

يخليك يا عبد الصمد

 

طيب ليه مايختاروش اسم من اسماء سيدات بيت النبوة عندك عائشة وحفصة وفاطمة وزينب او خديجة زى مااحنا سمينا بنتنا

 

اسكت ياخويا دى البت دودو زعلانة اوى من الاسم ده وتقولى ياماما مالقتيش غيره

 

معقول .ازاى البنت تقول كدة ده اسم زوجة الرسول عليه الصلاة والسلام وحبيبته

 

ماهى ماتعرفش

 

عشان للأسف احنا مش بنخلى ولادنا يحبوا الصحابة من خلال سيرهم ونخليهم يتعلقوا بيهم ويفرحوا انهم اتسموا بأساميهم .تعالى شوفى النصارى اد ايه بيعتزوا بأسامى القديسين عندهم ويسموا

 

ولادهم على اساميهم

 

ترررررررررررررررررررتررررررررررررررررررررررن

 

موبايلك بيرن ياذكية

 

الو

 

ازيك ياذكية يا حبيبتى

 

اهلا ياابراهيم يا خويا عامل ايه

 

الله يخليكى كويس .انا متصل عشان افرحك .انا لقيت بنت الحلال

 

ياحلاوة ياولاد الف ليلة بيضة ياخويا .طيب تعالى احكيلى الكلام ماينفعش فى النوبايل

 

حاضر هجيلك حالا

 

 

 

 

 

 

 

 

اهلا ياابو نسب

 

ازيك ياجوز اختى

 

الحمدلله ياابراهيم .ايه ياعم الاخبا ر الحلوة دى اللى سمعناها

 

اه الحمدلله اخيرا لقيت اللى بدور عليها

 

الحمدلله انك اخترت بنفسك وماخلتش اخواتك البنات يجيبولك

 

ايوة والله عندك حق

 

ازيك يا هيما

 

اهلا ياذكية وحشانى يختى

 

ان شاالله تتهنا ياخويا .احكيلى على العروسة اسمها ايه وحلوة وبيضة ولا لأ

 

 

اسمها فؤاد

 

فؤاد مين ياخويا

 

العروسة

 

يا مصيبتى العروسة اسمها فؤاد .انت بتتكلم جد ياابراهيم

 

ايوة امال بهزر

 

ودى اتلميت عليها من انى مصيبة .اكيد كانت راجل وقلب ست

 

لا ياشيخة حرام عليكى دى اخت احسان صاحبى

 

يادى الخيبة القوية هى اسمها فؤاد واخوها اسمه احسان

 

ياحبيبى ماهو الاسم بمعناه برضو .فؤاد يعنى قلب

 

قلب ايه وفشة ايه ياابراهيم .انا كان قلبى حاسس ان نهاية عيلتنا على ايدك

 

ربنا يسامحك

 

طيب ياخويا هما اهلها عدموا الاسامى ومالقوش الا اسم راجل

 

انا هقولك الحكاية .اصل ابوها قبل مايتجوز امها كان بيحب واحدة تانية اسمها روح الفؤاد بس ماحصلش نصيب ويتجوزا عشان اهلها رفضوه راح مألف شعر سماه فؤاد مكسور

 

وقال لو ربنا رزقه ببنت لمايتجوز هيسميها فؤاد مكسور

 

هى كمان اسمها فؤاد مكسور

 

الحمدلله

 

طيب ياخويا اوعا تقول لحد على اسمها ولا تكتبه فى دعوة الفرح

 

ليه بس ياذكية

 

عايز الناس تقول ابراهيم هيتجوز فؤاد ويطلع عليك اشاعة انك شوز جنسى كفالله الشر

 

لا حول ولا قوة الا بالله ادى اخرة عدم احسان اختيار اسامى الابناء

 

اللهم اكثر من مريم وفاطمة وعائشة وخديجة وزينب

 

امين يا عبد الصمد امين

 

قولوا يا ولاد ورايا

 

جواز إبراهيم من فؤاد باطل

 

باااااااااااااااااااااااااااااااااااااااااااااااااطل

 

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(29)

بقــ هبةنور ــلم

 

عبد الصمد صحى من النوم شم ريحة غريبة فى الشقة

 

ريحة ايه دى يا ترى تعالوا نشوف

 

 

 

يا حفيظ يارب

 

ايف ايف

 

ياذكية

 

انتى ياست هانم

 

نعم يا عبد الصمد

 

ايه الريحة المنتنة اللى فى الشقة دى

 

اه يا خويا كل سنة وانت طيب دا ريحة الفسيخ

 

حرام عليكى والله حرام يعنى اصحى الصبح بدل مااشم ريحة حلوة اشم ريحة فسيخ انا مش عارف هتاكلى ازاى البتاع ده

 

هو انت فاكرنى جايبة الفسيخ عشان اكله برضو

 

امال جايباه ليه يختى

 

عشان ارسمه يا خويا

 

ترسميه .ليه يختى من حلاوته وحلاوة ريحته

 

لأ اصل انت مش فاهم يا عبد الصمد

 

فهمينى يا ست الستات

 

دى لوحة فنية برسمها اسمها وردة وفسيخة طلبوها منى اتحاد ملاك العمارة بتاعتنا عشان عيد الربيع كل سنة وانت طيب

 

وان شاء الله هتعلقى اللوحة المعفنة دى فين

 

هنعلقها فى مدخل العمارة يا عبده

 

طب وايه علاقة الورد ابو ريحة حلوة بالفسيخ اللى ريحته تجيب المرض

 

اقولك يا عبد الصمد .الوردة بتعبر عن الربيع وجماله والفسيخ بيعبر عن تلوث البيئة

 

ماشاء الله .وانتى بقا هتجمعيهم فى لوحة واحدة

 

ابوة امال ايه هو ده الفن السروالى

 

ربنا يحميكى من العين

 

انت كمان ماشوفتش باقى لوحاتى عشان تعرف قيمة مراتك الفنانة

 

لا شكرا كفاية لحد كدة بلاش اذية

 

استنى بس ياخويا ماتبقاش عدو الفنون المسترقية . دى لوحات فشر لوحة منى وعزيزة

 

اسمها لوحة الموناليزا يا ذكية . طيب ورينى يا ستى

ايه رأيك فى الصورة دى

 

ايه ده معناها ايه دى .انتى راسمة صابونة وليفة .حد فى الدنيا يرسم صورة فيها صابونة وليفة

 

ماهو ده الفن الهداف

 

اه يعنى عايزة تقولى ايه من خلال الصابونة والليفة

 

عايزة اقول للمعفنين يقوموا يستحموا

 

وايه دى كمان . انتى راسمة شجرة وكاتبة على الصورة امسك حرامى

 

ايوة يا خويا ماشاء الله عليك بتعرف تقرا

 

هو فين الحرامى ده اصلا

 

مش هتشوفه يا عبد الصمد عشان مستخبى ورا الشجرة

 

ممكن ترحمينى وترحمى نفسك وتبطلى رسم

 

ياسلام .ماتبطل الحئد ده ياعبد الصمد انت غيران عشان انا بعرف ارسم وانت لأ

 

طيب خلصتى رسم الفسيخة ولا لسة هتقرفينا بيها تانى

 

لأ خلاص خلصت .بس عن اذنك هطلع الفسيخة لفتحية عشان بتتوحم على الفسيخ

 

 

 

ماما

 

ايوة يادودو

 

الفيلم الكرتون جه

 

طب استنى يادودو عشان نتفرج سوا يا ضنايا

 

انا فرحانة اوى ياماما عشان انتى بتشوفى الكرتون معايا انا وحمادة

 

وانا فرحانة اوى عشان بشوف الكرتوم حتى لو انتو مش معايا انتى وحمادة اصل انا بحب الكرتوم اوى يا بت من ايام مازينجر وكابتن ماجد الله يمسيهم بالخير

 

ربنا يخليكى ياماما

 

ويخليكى يا ضنايا

 

حلو اوى يا ماما الكرتون بتاع الجميلة النائمة ده

 

هى هتفضل نايمة كدة طول الفيلم يا بت

 

هى اصلا مش هتصحى الا لو الأمير اداها بوسة

 

الامير اداها ايه يا بت

 

هى القصة كدة يامامى .انا ختها فى المدرسة

 

يا ليلة طين هما بيعلموا قلة الأدب للعيال فى المدارس .اتارى الجيل طالع بايظ واحنا بنقول العيال بتبوظ من ايه الحقنا يا عبد الصمد

 

فى ايه يا ذكية

 

شوفت المرار الطافح اللى احنا فيه .لأ ويقولك ال التربية والتعليم اتاريهم هيضيعوا العيال واحنا نايمين فى العسل

 

فى ايه يا ذكية

 

ال يا خويا الاميرة نايمة ومش هتقوم الا لما تاخد بوسة من الامير انا خلاااااااااااااااااااااااااااص عقلى هيطير ومش مصدقة اللى بيحصل

 

لا حول ولا قوة الا بالله .على العموم كويس اوى يا ذكية انك بتقعدى مع الولاد وتشوفى بيتفرجوا على ايه عشان تحميهم من الخطر

 

ده يا ستى الادب الانجليزى للأطفال

 

دى قلة الأدب الانجليزى وانت الصادق .ال عيشنا وشوفنا ال الاميرة مش هتقوم من النوم الا لما تاخد بوسة .باسها حنش ان شاالله هى واللى كتب الكلام الفاضى ده .اقفلى التلا فزيون يا دودو

 

 

طيب يا ذكية انا معاكى انك فى البيت ماشاء الله مصحصحة للولاد واللى بيشوفوه .انا عارف طبعا انك مش قاعدة تراقبيهم لكن قاعدة عشان تشوفى الكرتون اللى بتحبيه لكن دى جت فى مصلحة

 

الولاد وانك هتنقى الحاجات اللى يشوفوها واللى مايشوفوهاش لكن مناهج المدرسة بقا هنعمل فيها ايه

 

ايوة صحيح يا عبده دول بيدوا العيال حاجات عيب اوى وكلها انحولال

 

حاجات زى ايه

 

كتاب الجلينيزى بتاع دودو فيه صور قلة ادب وانا مش عايزة اتكلم

 

مكتوب تحتها ايه

 

هو انا بعرف اقرا عربى كويس لما هقرا جلينيزى يا عبد الصمد

 

ورينى يا دودو كتابك ياحبيبتى

 

 

اتفضل يابابا

 

 

 

ياااااااااااااااااااه يا نهار مش فايت ايه قلة الادب دى .معقول واحد بيطلب واحدة للرقص وواحد بيعزم واحدة تروح معاه البيت . ايه الفكر المسمم ده

 

الله يسم بدنهم البوعدا قادر كريم .ان شالله يناموا مايلاقوا حد يديهم بوسة عشان يقوموا ويفضلوا نايمين ليوم الدين

 

اللى ماتعرفيهوش يا ذكية انهم لغوا تحية الاسلام وعودوا الناس علي هاى وباى وكمان فى حديث عن الرسول صلى الله عليه وسلم شالوه من المقررات

 

وهو خيركم من تعلم القرآن وعلمه بحجة انه صعب على الولاد ومش هيعرفوا يحفظوه

 

يا سلام ياسلام ده العيال بيحفظو زى القرود .العيل من دول يسمع اغنية نانسو عجرن ويقعد يعيد ويزيد فيها كأنه هو اللى مألفه بذات نفسه . ال مابيعرفوش يحفظو ال

 

 

على العموم اسرائيل هى اللى ورا المناهج دى وورا الغاء ايات الجهاد من كتب الولاد وصلتوا علينا الاميرة النائمة والبوسة وتعليم الرقص والجينز وربنا يتولانا برحمته

 

 

ربنا ينتقم منهم بعدله بس انا مش هسكت يا عبد الصمد

 

هتعملى ايه يا ذكية

 

هقوم اعمل كسكسى عشان نفسى فيه اوى

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(30)

بقــ هبةنور ــلم

 

النهاردة يا جماعة عبد الصمد جه يقول لذكية انه هيعزم ناس مهمين اوى

 

ناس اجانب ونفسهم ياكلوا اكل مصرى ويشوفوا بيت مصرى والطبيعة المصرية الجميلة

 

 

هو انا هرغى كتير ليه احسن تعالوا شوفوا بنفسكو ايه اللى حصل

 

 

ذكذوكتى حبيبتى

 

نعمين يا عبد الصمد يا حبيبى

 

 

على فكرة حبيبتى الشركة بتاعتنا عملت تعاقد مع شركة ايطالية

 

 

يعنى ايه يا خويا عملته ازاى يعنى

 

 

مش مهم يا حبيبتى تعرفى عشان انا عارف عشان افهمك يكون العقد مدته انتهت ورجعوا بلدهم ونسيونا . المهم فى وفد ايطالى جاى ونفسهم ياكلوا اكل مصرى

 

 

طيب ما ياكلوا فى بلدهم قبل مايجوا ياخويا هى مصر ناقصة ولا احنا بيبات عندنا رغيف عشان نأكل بيه حد

 

 

يا حفيظ يا شيخة .داانا اللى اقترحت عليهم يجوا عندى عشان عارف اكلك مايعلاش عليه يا ذكذوكة يا قمر

 

ودول جاين منين يا خويا

 

جايين من ايطاليا بقولك

 

دى فين دى يعنى

 

معقول فى حد مايعرفش ايطاليا يا ذكية

 

ايوة ايوة افتكرتهم ياخويا .مش دول الجماعة بتوع المكرونة

 

ايوة الحمدلله انك عارفة .هما بتوع المكرونة يا ذكية

 

طيب هما جم ولا لسة ياخويا

 

جم خلاص وصلوا امبارح

 

طيب ماقولتليش ليه يا عبد الصمد كنا قولنالهم يجيبولنا كيسين مكرونة اسباكيتو معاهم وهما جايين

 

يعنى هو مافيش مكرونة اسباجيتى فى مصر يا ذكية

 

في يا عبد الصمد في ياخويا بس كان نفسى اكل مكرونة من اللى بيزرعوها فى اوطاليا بيقولوا حلوة اوى ومش بيرشوا عليها بوبيدات

 

 

يزرعوها .ربنا يسترها ويكفينا شر الفضايح . طيب ياذكية يا حبيبتى انا عايز اتشرف بيكى وعايز عزومة على التراث المصرى الاصيل

 

حاضر ياخويا هعملوهم عزومة على الطراظ المظرى الاظيل انت تؤمر يا عبده

 

تسلميلى يا حبيبتى . العزومة بكرة يا ذكية عايز حاجة تشرف

 

 

عينى ياخويا

 

 

 

 

 

 

لولولولوىىىىىىىىىىىىىىىىىىىىىى

 

لولولوىىىىىىىىىىىىىىىىىىىىىىىىىىىىىىىىىى

 

لولولولوىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

 

لولولوىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

 

 

 

ايه ده يا استاذ عبد الصمد ايه الزيطة اللى فى عمارتكو دى الوفد الاجنبى مفزوع وخايفين يطلعوا

 

 

لا لا لا يا فندم خليهم مايخافوش قولهم دى زغرايط فلكلور مصرى ومعلش وامسحها فية انا هطلع الاول اشوف فى ايه وأأمن الطريق

 

 

 

 

لولولوىىىىىىىىىىىىىىىىىىىىىىىىىىىىىىى

 

لولولوىىىىىىىىىىىىىىىىىىىىىىىىىىىىىىىىىىىىىىى

 

 

 

 

يا ذكية انتى يا ست

 

 

اهلا يا عبد الصمد فين الخواجات الاكل جاهز

 

 

مين الستات الغجر اللى ملمومين ع السلم بيطبلوا ويزغرطوا دول

 

ايوة يا خويا دول الستات الافاضل اللى كانوا واقفين مستنين الانابيب

 

قولتلهم تعالوا عايزاكو فى مهمة وطنية على ما الانابيب تيجي واديت لكل واحدة خمسة جنيه فى ايدها ولميتهم فى مكروباظ وجيبتوهم على هنا

 

الله ينتقم منك يا شيخة انتى فضحتينى

 

كدة برضو يا عبد الصمد انا غلطانة انى عايزة اشرفك واعمل للجماعة الخواجات استقبال يليق بيهم

 

 

اهم خايفين يطلعوا من الستات اللى واقفين اللى ماسكة صنية بتطبل عليها واللى عمالة تزغرط

 

ده لسة كمان يا عبد الصمد هيقولوا النشيد اللى حفظتهولهم يا خويا اصبر على رزقك

 

نشيد ايه الله يهد قواكى

 

هيقولوا وقف الخلق ينظرون جميعا كيف استنا الانبوبة وحدى

 

واسرائيل تاخد الغاز بتاعى بتراب الفلوس يا فرستى يا خيبتى

 

 

بقولك ايه يا ست انتى مشى الستات دول من هنا خلى يومك يعدى

 

 

حاضر ياخويا هنزل امشيهم

 

 

 

 

 

 

 

 

اتفضلوا يا فندم الغدا جاهز

 

ماشاء الله ايه الصحون المغطاة دى كلها شكل المدام بتاعتك عاملة وليمة عظيمة

 

ههههههههه اخجلتم تواضعنا يا فندم . اتفضلوا

 

 

ايه ده يا نهارك اسود يا ذكية الله ينتقم من حبابى عنيكى كل مااشيل غطا الاقى يا اما فول يا إما طعمية وعاملة بتنجان مقلى كمان عايزة تشلينى يا بعيدة

 

 

 

ايه ده يا استاذ عبد الصمد دى مش عزومة دى تهريج

 

اهدا بس يا فندم بلاش فضايح قدام الاجانب

 

انت مش شايف نظراتهم اللى كلها استياء

 

طيب معلش يافندم انا هبعت اجيبلوهم دليفرى من اى مكان . الله لا يسامحك يا ذكية

 

 

 

 

 

 

انتى يا هانم

 

ايه يا عبد الصمد الاكل عجب الجماعة

 

اكل ايه يا ذكية اقولك عايز عزومة ماحصلتش تعملى فول وطعمية

 

يا دى النيلة على ذكية وسنين ذكية مش انت اللى قلت عايز عزومة طراظ مظرى اظيل

 

اتقى الله يا شيخة فضحتينى وانا اللى قلت هتعملى اللى ماحش عمله

 

 

فين الفاكهة يا وش الاذى

 

اهيه يا خويا جبتلك لبشة قصب بحالها هات لكل واحد جلابية وشبشب واقعدوا فى الارض مصوا بس ماتبهدلوش الدنيا عشان لسة ماسحة الشقة

 

ربنا يمسح اسمك من على وش الدنيا .ربنا يخدك ويريحنى من بلاويكى

 

الله اكبر اعوذ بالله من فالك بعد الشر علية وعلى شبابى

 

 

غوري من وشى السعادى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(31)

بقــ هبةنور ــلم

 

 

 

ايه رأيكو فى التعليم المختلط يا جماعة

 

 

يعنى انتو مدخلين ولادكو مدارس مختلطة ولا منفصلة

 

 

 

تعالوا نشوف التعليم المختلط وفوايده وثماره اللى بنجنيها كل يوم

 

 

 

 

 

 

 

 

 

 

مامي عايزة اسألك سؤال

 

 

اسألي يا دودو يا ضنايا

 

 

هو انتي اتعرفتي على بابي ازاي وفين

 

انا اتعرفت على ابوكي فى مستشفى المجانين يا ضنايا

 

 

يا خبر يا مامي هو حضرتك وبابي كنتو سوري يعنى

 

 

ماتكمليش يابت قطع لسانك انا وابوكي اسياد العاقلين

 

امال ازاي يعنى اتعرفتوا على بعض فى مستشفى المجانين

 

اقولك يا ضنايا انا كنت راجعة من عند خالتى محاسن فى العباسية وكنت معدية قدام باب مستشفى المجانين

 

لقيت واحد طالع يجري من المستشفى وافتكرتوا مجنون هربان روحت مصوتة بأعلى صوتى وقلت الحقوا يا ناس امسكوا المجنون

 

راحوا جريو وراه ولحقوه وشالوه ودخلوه المستشفى تانى وهو عمال يقول ياناس حرام عليكو انا خارج اجري عشان الحق الاتوبيس

 

انا اتأخرت على شغلي نزلوني وانا دخلت وراهم عشان اشهد عليه باللى شوفته بس ياعين امه فعلا كان بيزور واحد معرفته اتجنن بسبب عمايل مراته

 

وخلص الزيارة وشاف الاتوبيس فطلع يجرى عشان يحصله بس الحمدلله خرجنا بالسلامة وكانت معرفة خير واتجوزنا

 

 

معقولة يامي يعنى تعملي فيه كدة ويتجوزك

 

امال يابت قال علية شهمة وايجابوية ومش سلبوية لكن انتى بتسألى ليه يا دودو

 

كنت عايزة اعرف حبيتو بعض انتي وبابي ولا لأ

 

عيب يابت الكلام ده قومى ذاكريلك كلمتين ينفعوكى

 

 

تن تن تن

 

حد بيخبط يامامي

 

طيب ادخلى اوضتك ذاكري انا هفتح

 

مساء الخير يا طنط ذكية

 

يسعد مساكي يابت يا توتة ازى امك مش باينة ليه

 

مامي تحت فى الشقة

 

عقبال يختى ماتطلع فوق فى الفيلا .خشى يا ضنايا

 

لا شكرا يا طنط . ادى الجواب ده لحمادة

 

جواب ايه يا بت .يالهوي ليكون جواب رفد من المدرسة

 

لأ يا طنط ده جواب مني انا

 

منك انتي .وتبعتيله جواب ليه ياضنايا ماهو متلئح قدامك فى الدكة اللى جنبك

 

بس اديله الجواب ياطنط

 

حاضر يختى يمكن يكون فيه اسئلة مراجعة تنفعه ولا حاجة كتر خيرك يا نضرى مع السلامة

 

اما افتح الجواب اشوف الاسئلة المهمة واستعيد معلوماتي

 

 

 

يالهوووووووووووووووووووووووووووي يا دى الخيبة التقيلة البت عندها تسع سنين وراسمة للواد قلب ومخرجة سهمين وكتباله بحبك ياحمادة

 

 

انت يا واد يا حمادة

 

نعم يا مامي

 

انت فيه ايه بينك وبين البت توتة بنت سعاد يا خلف الندامة

 

ولا حاجة يا مي هى بتحبني وبتقعد تلاعيبلي حواجبها فى الفصل وانا ماليش دعوة بيها خالص

 

ان مانتفتلها حواجبها شعرايا شعرايا الميصة بنت سعاد دي .بس انت جدع ياضنايا مالاكش فى قلة الادب دي

 

لأ يا مامي اصل انا بحب روشام اوى وببعتلها جوابات وعشان كدة توتة غيرانة واتخانقت مع روشام وعضتها

 

ايه شغل غرام الافاعي ده ايه الايام الغابرة دي انا هنزل لسعاد اشوف صرفة معاها وبعدين هطلع احدفك من شباك المنور حقنا لدماء بنات الديسكو والميكرو

 

وقعتك سودة لما يجى ابوك يارميون شبرا

 

 

 

انتي ياست سعاد

 

اخص عليكي ياذكية بتيجى فى اوقات غريبة يختي البطل كان لسة بيسبل عنيه للبطلة

 

 

بطلة ايه يا كوم الطين انتي ماتفوقي خلينى اكلمك

 

اطلعيلي كمان شوية عشان بتفرج على فيلم غرام فى الكرنك

 

داانا هكرنكها على دماغك ودماغ بنتك تقاوي فتاة الليل دي

 

مالها توتة حبيبة امها

 

بنتك بتبعت جوابات غرامية لابنى

 

يختي ياسكر يا ماشاء الله ياتوتة كبرت يختي كبرت

 

يختى كبرت علتك انت وبنتك دي البت عيارها هيفلت الحقى لميها

 

جرا ايه ياذكية يختى ماتبقيش عدوة المشاعر النبيلة كدة

 

انتي اصلا في غيبوبة ومش هينفع اتفاهم معاكى انا نازلة يا عذراء الربيع

 

 

 

 

 

تن تن تن

 

مساء الخير ياطنط

 

يامرحب يا يختي

 

ياترى دودو موجودة

 

ايوة يا عسل اتفضلى

 

 

شكرا يا طنط

 

انتي اسمك ايه يختى

 

انا الدلع بتاعى دوحا

 

دوحا .يبقا اكيد اسمك مديحة انا افهمها وهي طايرة

 

لأ يا طنط انا ....

 

الله شعرك طويل وسايح يا دوحا وحلوة اوى القوصة دى

 

ميرسى ياطنط

 

بس يختى بنطلونك ضيق اوى عيب لما تنزلى كدا . الصبيان يعكسوكى وانت حلوة وفيكى الطمع .

 

 

هى دودو فين ياطنط

 

تعالى يادودو كلمى دوحا

 

بنجور محمود وحشتنى اوى

 

اهلا يادودو . وبعدين انا زعلان منك قولتلك مش بحب اسم محمود ده قوليلى دوحا

 

هو انت اسمك محمود يا خلف القرود نهارك اسود على ايدي ان شاء الله . ولما انت محمود ايه اللى جايبك تزور دودو ياواد

 

دودو الجيرل فريند بتاعتى وبنحب بعض خالص

 

يالهووووووووووووووووووووووووووووووى يا لهووووووووووووووووووووووووووووووووووووى وانا اللى نازلة اتخانق مع سعاد عشان بنتها

 

جبتيلى العار يابت عبد الصمد ياريتنى ماخلفتك

 

ايه بس يامامى ايه اللى انتى عاملاه ده دى حاجة عادية جدا احنا مش عملنا حاجة غلط

 

انزل يا واد يا مديحة انت وغور من هنا بدل مااحلقلك شعرك زلبطة

 

لالالالالالالالالالالالالالالالا شعرى لا شعرى لا يا مامىىىىىىىىىىىىىىىىى

 

 

اجرى جتك مصيبة

 

 

 

 

 

 

 

وبعدين يا عبد الصمد هنسيب العيال يضيعوا كدة

 

انتى السبب ياذكية انتى اللى صممتى تدخليهم مدارس مختلطة ودى عيوب التعليم المختلط اللى مايناسبش دينا واسلامنا

 

عندك حق يا خويا انا محقوقة لك بس ايه الحل دلوقتى

 

اه نضيع دينا وولادنا بايدينا وبعدين نقول ايه الحل

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(32)

بقــ هبةنور ــلم

اعوذ بالله على الستات النكدية اللى مايحلالهومش يجيبوا سيرة الاخباراللى تسد النفس الا لما يشوفوا الراجل

 

بس طبعا ذكية مش من دول

 

ست ما تحبش الا الفرفشة ومفرفشة جوزها على طول

 

حتى تعالوا شوفوا

 

 

 

إهئ إهئ إهئ اه يانا ياما إهئ إهئ

 

 

اعوذ بالله مالك يا ذكية

 

 

إهئ إهئ إهئ لأ مافيش حاجة ياخويا إهئ إهئ إهئ

 

مافيش ازاي امال ايه العياط والشحتفة دى كلها دانتي خلصتي علبة المناديل على دموعك

 

إهئ إهئ إهئ لا ياعبد الصمد انا مش بعيط دا انا بعمل تمرين

 

تمرين ايه الحزايني اللى يسد النفس ده

 

اصل انا ماقلتلكش ياخويا اصل خالتي كئابة الله يرحمها وصتني بالوصية دي من زمان بس انا كنت ناسياها

 

وصية ايه ياشيخة الله يسامحك انتي وخالتك

 

قالتلي يا بت يا ذكية لازم كل يوم قبل ماتنامي تعيطي ساعتين وتطلعي كل مشحونات الحاجات اللى مضايقاكي عشان تنامي على نضافة

 

الله ينتقم منك بعدله .وإمتا ان شاء الله خالتك وصتك الوصية اللى تقصر العمر دي

 

وصتني بيها قبل ما جوزها يقتلها بأسبوع ياخويا

 

والله تستاهل خالتك بصراحة عشان الراجل مش ناقص بعد مايرجع من ارف شوغله يلاقى ندابة فى البيت قاعدة تعيط من غير سبب

 

الله يسامحك ياعبد الصمد يعني ايه من غير سبب أهو انت كدة ظلمت خالتى عشان هي قالتلى افتكري اي حاجة زعتلتك فى دنيتك وعيطي يا ذكية يابنت اختي

 

وان شاء الله افتكرتي ايه ياعيون خالتك

 

 

ابدا ياخويا قعدت ادور على حاجة مزعلاني مالقتش اليومين دول روحت راجعة بالذاكرة لأيام طفولتي وافتكرت اليوم اللى امي ضربتني فيه

 

عشان طلعت جلابية من بتوعها من دولابها وقصيتها بالمقص عشان اعمل منها كام فستان للعروسة بتاعتي

 

 

طيب وبعدين يا ذكية انا عايز انام لو سمحتي

 

اهئ اهئ اهئ ماتنام يا عبد الصمد هو انا حايشاك يا خويا اهئ اهئ اهئ اه ياما يانا اه اهئ اهئ

 

طيب ان شاء الله هتخلصي ساعتين النكد دول امتا

 

اهئ اهئ اهئ هى الساعة كام دلوقتي

 

الساعة واحدة بعد نص الليل يا سبب هنايا

 

اهئ اهئ خلاص هانت ياعبد الصمد فاضل ساعة الاربع اهئ اهئ

 

عارفة ياام اوئ لو مابطلتيش عياط هخليكي تحصلي خالتك وخليني انام يا إما اتفضلي برا الاوضة

 

وبعدين ياولاد فى قلة المزاج دي خلاص بطلت عياط عشان خاطرك بس

 

 

الحمد لله تصبحي على خير

 

عبد الصمد

 

نعم

 

انت هتنام

 

اوف ان شاء الله

 

طيب ياخويا مش تستنا لما اقولك على الاخبار اللى عندي

 

الصبح يا ذكية النهار ليه عنين

 

يعني هو النهار ليه عنين والليل عدم عيونه ياخويا

استغفر الله العظيم خير عايزة ايه اديني قومت

 

اسكت ياخويا مش جوز نبوية بنت عمتي دخل السجن

 

لا حول ولا قوة الا بالله ليه كدة بس هو عمل ايه

 

ابدا ياخويا اصله زور إمضا المدير بتاعه وصرف لنفسه شهرين مكافأة

 

وازاي يعمل كدة بس طبعا يستاهل ده جزاء عمله

 

هو ياخويا اللى يزور يخش السجن ؟

 

طبعا يا ذكية

 

يالهوي يعني انا ممكن اتسجن على كدة بقا

 

ليه يا مصيبة زورتي ايه

 

لأ مش دلوقتي اصل وانا صغيرة كنت بجيب كحك فى الشهادة كل شهر وكنت بخاف اوري الشهادة لأبويا فكنت بمضي بداله

 

وكنت انا ولية امر نفسي يعني

 

وازاي المدرسين مااكتشفوش التزوير ده

 

ياخويا يعنى كانوا هياخدوا الشهادة يودوها لخبير الادلة الجناوية

 

الحمدلله انا غير ابوكي انا مصحصح وكل شهر لازم اشوف الشهادات بتاعة الولاد بنفسي . تصبحي على خير

 

ايه ياعبد الصمد اصحى لسة ماكملتش اخباري

 

اوف نعم نعم فى ايه تاني

 

مش عم جمعة عيان ياكبد امه

 

عم جمعة مين

 

البواب بتاع مدرسة العيال

 

سلامته عنده ايه

 

عنده مركوب فى المعدة بيعمله صداع على طول

 

مركوب فى المعدة . والله ماحد عايز مركوب على دماغه غيرك نامي بقا نامي

 

استنا بس نسيت اقولك مش الواد ابن اختي منكسرة دماغه اتفتحت وخد سبع غورز

 

ياحفيظ يارب ليه كدة

 

اصله وقع من ع السلم ونزل على ماغه

 

سلامته الف سلامة ناااااااااااااااااااااااااااااااااااااااامي تصبحي على خير

 

انا لسة ماخلصتش اخبار الغم اللى عندي

 

يعني انتي متعمدة تقولي اخبار غم قبل ماننام

 

امال ايه دي ظاهرة صحية ياخويا لازم الست تنكد على جوزها قبل ماينام بالبكى والنواح والاخبار اللى تغم النفس

 

لا حول ولا قوة الا بالله ليه كدة بس يا مفترية

 

عشان الراجل يكره الجواز وسيرته ومايفكرش يجيب للست ضرة تنكد عليها .يعني لما يشوف اد ايه الجواز غم فى غم يعيش في حاله ومايفكرش يجيب هم على الهم

 

 

الا قوليلي يا ذكية هو جوز خالتك قتلها ازاي

 

ابدا يا خويا كانت عمالة تعيط وتفتكر الاحداث الحزينة وعاملة مناحة جنب ودنه راح شايلها مطوحها من البلكونة

 

طيب عن اذنك

 

رايح فين يا عبده

 

هفتح البلكونة واجي اشيلك عشان خالتك مستنياكي تحت

 

يالهوووووووووووووى اخص عليك يا عبد الصمد انا خارجة وسيبالك الاوضة انت راجل مالاكش امان لحسن تلاقيني روحت فى النوم تقل عقلك وتعملها راجل دموي صحيح مالاكش فى الفرفشة

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(33)

بقــ هبةنور ــلم

 

الأمانة يا ولاد الأمانة

 

من آمنك لم تخونه ولو كنت خاين

 

ربنا يكفينا شر خيانة الأمانة

 

تعالوا نشوف ذكية اخبارها ايه مع الأمانة

 

 

انا زعلانة من امك اوي يا عبد الصمد

 

ليه ان شاء الله

 

يرضيك يا خويا ابعتلها طلب صداقة على صفحتها على الفيس بوك تقوم عملالي بلوك

 

وهي امى برضو عندها صفحة على الفيس بوك يا ذكية ولا تفهم في الكمبيوتر اصلا

 

والله انت ما عارف امك ولا امكانياتها يا عبد الصمد

 

دي يا خويا عندها صفحتين على الفيس بوك وبتلعب المزرعة السعيدة طول النهار

 

لا لا مش ممكن امي ما لهاش في الكمبيوتر

 

امك يا عبد الصمد بتفهم فى الكمبيوتر اكتر من بل جيتس نفسه بس أنت ما تعرفش وبعدين انت مستغرب ليه ماهي امي كمان عندها صفحة

 

على الفيس بوك وخالتي محاسن عندها وخالتي خضرا كمان عندها

 

حتى خالتك خضرا كمان

 

امال ايه يا عبد الصمد .بس خالتي خضرا داخلة الفيس بوك لأسباب علمية

 

اسباب علمية بتاعة ايه دي كمان

 

ايوا يا خويا داخلة تشوف حل للقضاء على البلهارسيا اللى في الترعة عشان تعرف تستحما فيها براحتها وحل للقضاء على الناموس عشان مابتعرفش

 

تنام منه يا كبدي

 

طيب يا ست ربنا يوفق الجميع خدي شيلي معاكي المبلغ ده

 

ايه الفلوس دي كلها يا عبده

 

دول حوالي خمسين الف جنيه اخويا اداهوملي اشيلهم معايا على ما يرجع من السفر

 

وهو هيرجع امتا بالسلامة

 

ان شا ء الله بعد سنة بالظبط

 

حاضر ياخويا هشيلهوم في عنية

 

تسلملي عنيكي يا ذكية

 

 

 

 

السلام عليكم ازيك يا ست ذكية

 

اهلا اهلا اهلا وشك ولا وش القمر يا ام خوخة اتفضلي يا حبيبتي

 

وحشااني اوي والله يا ذكية يختي

 

تسلميلي من كل وحش يا حبيتي عيالك عاملين ايه

 

الحمدلله بخير وانتي ازي عيالك

 

حلوين يختي الحمدلله تشربي ايه

 

بصراحة يا ذكية يختي انا جاية قصداكي في خدمة

 

خير يختي

 

البت تفاحة فرحها بعد اسبوعين بس باينه مش هيتم

 

بعد الشر يختي ما يتمش ليه

 

لسة يا ذكية ناقصها حاجات كتير في الجهاز وانا الفلوس اللي معايا ومع ابوها خلصت ومش لاقية حد يسلفني

 

يا حبيبتي يختي طيب ما تاجلوا الفرح شوية

 

ما ينفعش يختي ما ينفعش دي هتسافر مع جوزها وهو مرتبط بمواعيد شغل هناك

 

يادي الحيرة طيب وانتي هتعملي ايه

 

ما هو انا جيالك عشان كدة تديني اد عشرة اتناشر الف وانا هقبض الجمعية بعد شهرين وهديهوملك على طول

 

خلاص يا ام خوخة هدهوملك بس تقبضي الجمعية وتجيبيهم على طول عشان دول مش بتوعنا دول امانه وانا هدهوملك من ورا جوزي

 

تسلميلي ياذكية يا حبيبتي بنت اصول وصاحبة واجب ناوليني الفلوس خليني اجوز البت

 

ربنا يتمم بخير يختي

 

 

 

 

ذكية

 

نعم يا عبد الصمد

 

هاتي الفلوس اللى شايلها معاكي

 

فلوس ايه يا خويا

 

الخمسين الف جنيه بتوع اخويا

 

طيب ولما هما بتوع اخوك انت مالك ومالهوم

 

يا ست اخويا جه من السفر

 

يا لهوي ايه اللى جابه هو مش قال جاي بعد سنة ايه الاستعباط بتاع خلق الله ده

 

حصل مشاكل في شغله وفسخ العقد وعايز فلوسه عشان يكمل عليها ويبدأ مشروع

 

مشروع ايه وكلام فاضي ايه احنا ما عندناش رجالة تعمل مشاريع وخليه يتهد في ايامه المهببة دي

 

لا اله الا الله الراجل عايز فلوسه

 

طيب اديني فرصة لحد بكرة ان شاء الله

 

ذكية وديتي فلوس الراجل فين

 

الفلوس موجودة ياعبد الصمد هجبهالك ماتزعقليش كدة عشان بتخض

 

سلامتك من الخضة يختي .ارجع من شغلي ان شاء الله بكرة الاقي الفلوس على الطربيزة

 

بس احنا ما عندناش طربيزة يا عبد الصمد

 

تصبحي على خير يا ذكية

 

 

 

 

 

 

 

 

 

 

 

تن تن تن

 

مييييييييييييييييييييييييييييييييييييييييين

 

افتحي يا ام خوخة

 

انتي مين

 

انا ذكية

 

ذكية مين انا ما اعرفش حد بالأسم الغريب ده

 

افتحي ياست انتي ما تستهبليش انا مش ناقصاكي ع الصبح

 

 

خير ياست ذكية

 

عايزة الاتناشر الف جنيه اللى ختيهم

 

انا يختي لا خت حاجة ولا شوفتك قبل كدة اصلا وبالسلامة يختي عشان الاكل ع النار

 

نعم نعم نعم بقولك ايه يا ام جميزة انتي هاتي الفلوس بدل ما اوديكي فى داهية

 

انا يختي فى السليم الحمدلله ومافيش اثبات اني خت منك حاجة ويلا من هنا بدل ما اطلبلك البوليس واقول حرامية وجاية تسرقني

 

كدة برضو يا ام خوخة ده جزاء المعروف الله ينتقم منك اهئ اهئ اهئ

 

اجري عيطي بعيد يختي عشاء بتشاءم عن اذنك

 

 

وكمان بتقفلي الباب في وشي يا ام خوخة الله يسامحك اهئ اهئ اهئ

 

 

 

 

 

اهئئئئئئئئئئئئئئئئئئئئئئئئ اهئ اهئئئئئئئئئئئئئئئئئئئئئئئئئئئئئئئئ

 

اهئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ

 

مالك يا ذكية

 

عبد الصمد بصراحة الفلوس ناقصة عشان سلفتوهم لأم خوخة ونصبت علية ومش عايزة ترجعهم

 

انا كان قلبي حاسس انك ضيعتي الفلوس اقلعي بقا الكام غويشة الى في ايدك عشان نبيعهم ونكمل للراجل فلوسه

 

نعم نعم انت بتقول ايه

 

والله يا ذكية لو فتحتي بقك بكلمة لأبلغ عنك بتهمة تبديد الأمانة واسجنك

 

اهئ اهئ اهئ يا حبايبي يا غوايشي يا عشرة عمري

 

هاتي الغوايش

 

اهم يا عبد الصمد .اهئ اهئ الله ينتقم منك يا ام خوخة

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(34)

بقــ هبةنور ــلم

 

يا سلام على الست لما تفكر جوزها كدة كل شوية بجمايلها

 

عشان دايما يعرف انها صاحبة افضال عليه ايوة امال ايه

 

تعالوا شوفوا ذكاذيكو عملت ايه

 

 

 

عبد الصمد

 

نعم

 

 

فاكر ياخويا القميص الحلو اللي كان كل كم بلون واللياقة بلون والاساور بلون ووشه بلون وظهره بلون اللي اشترتهولك السنة اللي فاتت

 

ماله ان شاء الله

 

اصلي ياخويا مش بشوفك بتلبسه

 

بصراحة من ساعة ماكنت لابسه وواحد صاحبي قالي انت ناقصلك تركب مناخير حمرا وتلون وشك وتروح تشتغل في السيرك وانا مش بحب البسه

 

ياسلام هو قالك كدة .اكيد طبعا من فرسته منك دا كان قميص ولا كل القمصان انا جيباهولك من العتبة والراجل كان فارش على الرصيف

 

وماسك مكرفون وعمال يقول كله بسبعة ونص وتعالى بص

 

لا وانتي ذوقك ما يعلاش عليه

 

امال ايه الذوق ما يجيبش الا الذوق

 

طيب متشكرين

 

العفو يا عبد الصمد دي حاجات بسيطة

 

 

عبد الصمد

 

افندم

 

فاكر ياخويا لما اتزنقت في فلوس العفش وابويا قالك ماتشيلش هم يا ابني انت عايز كام وانا اساعدك

 

وانت قولتله انا عايز عشرتلاف جنيه وابويا اداك خمسة وعشرين جنيه بحالهم وقالك فك زنقتك يا ابنى

 

 

اه فاكر فاكر ياستي

 

لأ وابويا كمان جابلك موسين حلاقة على حسابه عشان ظروفك كانت ملطشة ومش لاقي تحلق يا عين امك

 

 

ربنا يخليكي انتي وابوكي في حاجة تاني ناسياها

 

لأ ياخويا انا منساش جمايلي عليك ابدا يا عبد الصمد انا ست اصيلة وبنت اصول

 

اه ماهو واضح يختي

 

عبد الصمد

 

نعم

 

فاكر ياخويا لما اختك جالها عريس ومالقتش حاجة تلبسها يا نضري وجت خدت مني العباية المرقعة بتعتي

 

ايوة فاكر يا ذكية فاكر

 

كانت عباية السعد والهنا والعريس مسك فيها بأيده واسنانه عشان بركة عبايتي حلت على اختك اللي كان كل ماعريس يشوفها يطفش

 

 

اوف ربنا يكرمك ويزيدك من نعيمه

 

ويكرمك يا عبد الصمد

 

قوليلي يا ذكية

 

اقولك ايه

 

انتي ليه كل شوية لازم تقعدي تفكريني بجمايلك انتي واهلك علية

 

دا واجبي يا عبد الصمد عيب عليك .الست لازم تفكر جوزها بجمايلها عشان دايما يفتكر افضالها ويشيلها فوق دماغه ويعرف ان مراته شعلة عطاء

 

مين اللي قال كدة

 

أمي حبيبتي هي اللى قالتلي

 

الله لا يسامحها

 

يا لهوي انت بتدعي على امي يا عبد الصمد

 

طبعا لازم ادعي عليها عشان اديتني ست منانة حولت حياتي لجحيم

 

ايه يا خويا الكلام اللى انقرض من ايام الاربعينات ده

 

لاء ده مش الكلام اللي انقرض ده حبي ليكي هو اللي انقرض بسبب عمايلك

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(35)

بقــ هبةنور ــلم

 

ايه رأيكوا يا جماعة في تنظيم الاسرة ؟

 

طيب ايه رأيكوا في تحديد النسل ؟

 

طيب يا ترى ايه رأي ذكية ؟

 

تعالوا نشوف

 

 

اسكت يا عبد الصمد مش انا اختاروني المرأة الزموزجية على مستوى الجمهورية

 

اختاروكي ايه يختي

 

اختاروني المرأة الزموزجية يعني الناس تعمل زي ما بعمل ويمشوا ورايا عشان يكسبوا

 

اه قصدك المرأة النموذجية

 

ايوة يا عبد الصمد افرحلي ياخويا

 

ومين الحمار اللي اختارك

 

اخص عليك ياعبد الصمد ليه كدة دي جمعية عملينها عشان الستات اللي نسلهم متحدد

 

لا اله الا الله ايه اللي بتقوليه ده ياست انتي ومين قالك اننا مححدين النسل

 

يوه ياعبد الصمد مش احنا معانا عيلين بس

 

ومين قالك اني هكتفي بيهم انا عايز عيال تاني

 

بقولك ايه ياعبد الصمد مش كل خرابة تطلعلي منها عفريت ياخويا انا واحدة مهمة في البلد دلوقتي والناس هتعمل زي

 

ياسلام واختك منكسرة اللي معاها ماشاء الله سبع عيال ايه رأيك فيها

 

وانا مالي ياخويا ومال منكسرة .وبعدين منكسرة عضوة في جمعية هيا نتكاثر

 

 

انا مش موافق على الكلام الفاضي ده

 

ياعبد الصمد اسمع كلامي بس دول ناوين يدوني جايزة كبيرة اوي عشان انا زموزجية

 

والله مهما قلتي كلامي انا اللي هيتنفذ

 

طيب انا هحضر الحفلة ياعبد الصمد عشان التلافزيون هيصورني

 

ياشيخة روحي هيصوروكي على ايه على خيبتك التقيلة وبعدين لازم تعرفي ان دي خطط مدبرة وهما مش عايزين المسلمين عددهم يزيد

 

دول نفسهم يبيدونا اصلا مش يحددولنا النسل بس

 

ترررررررررررررررنتررررررررررررررررررررررن

 

ردي على موبايلك ياست

 

الو مين

 

ايوة الست ذكية معايا

 

ان شاء الله انتي مين يختي

 

انا شجرة

 

ياسلام يختي هو فيه شجرة بتتكلم ياست انتي ماتبطلوا الحاجات اللي بتطعاطوها دي

 

ياست ذكية انا شجرة الدر

 

ايوة ايوة يختي عرفتك اللي اتلموا عليكي الستات وضربوكي بالقباقيب ياكبد امك . والله زعلت عليكي اوي بس سبحان الله انتي لسة عايشة لحد دلوقتي بعد العلقة اللي ماخدهاش حرامي في مولد دي

 

 

ياست انتي بتقولي ايه انتي رجعتينا لأيام المماليك تاني هي ناقصاكي .اللي بتتكلمي عليها دي شجرة الدر مرات السلطان ايبك

 

امال انتي مرات السلطان مين

 

يا ستي انا مدام شجرة الدر رئيسة جمعية عيلين وكفاية

 

يختي ماتقولي كدة من الصبح بقي وجعني من الكلام اهلا وسهلا ومرحبا يا ست الريسة

 

انتي هتعملي ايه عشان الحفلة بقا ياست ذكية

 

انا يختي ناوية بعون الله اعمل حلة رز بلبن واجي افرق عليكو بالمناسبة السعيدة دي

 

رز بلبن ايه بس ياست ذكية انا اقصد حضرتي الكلمة اللي هتلقيها في الحفلة

 

هو الكلام بيحضرولوا يا خالتي الريسة انا اللي هيجي على لساني هقولوا وخلاص هو الكلام عليه جمرك

 

بقولك ايه ياست ذكية انا هكتب الكلمة اللي هتلقيها وطبعا هقف جنبك وامليكي وانتي تقولي بدل مانروح في داهية

 

خلاص يختي اتفقنا هقوم اعمل حلة الرز بلبن واجيبها واجي

 

 

 

السلام عليكم ورحمة الله وبركاته

 

 

الآن مع كلمة المرأة النموذجية الست ذكية فلتتفضل

 

يزيد فضلك يا حبيبتي تسلمي وتعيشي

 

 

قولي ورايا ياست ذكية وخلي بالك من اللي هقوله يلا نبدأ

 

ايها السيدات الفاضلات

 

ايها السيدات الفضلات

 

يسعدني التواجد في هذا الجمع الطيب

 

يسعودني التواجد في هذا الجمع المطين

 

كم ارى امامي من وجوه وضيئة مثالية

 

كم ارى امامي من وجوه وضيعة مصدية

 

معا لرفض السطوة

 

معا لفتح المطوة

 

يجب ان نتخلص من جبروت الرجل سعيا وراء حرية المرأة

 

يجب ان نتخلتص من جربوت الرجل سعيا وراء حمورية المرأة

 

فالرجل لا يحب المرأة المنتجة صاحبة الحضارة

 

فالرجل لا يحب المرأة المنتنة ساحبة الحمارة

 

لذا فهو يريد ان يقيدها برعاية الاطفال ويحرمها من ان تكون مرأة متفردة

 

لوزة فهو يرود يقيودها بعراية الاطفال ويحرومها ان تكون مرأة متشردة

 

 

 

واخيرا اود ان اشكر السيدة الهمامة صاحبة هذه الاطروحات

 

واخيرا اود ان اشكر السيدة اللمامة صاحبة هذه الطرطوشات

 

 

 

ايه الهباب اللي هببتيه ده ياست ذكية

 

ايه يختي انا عملت ايه يا ست شجرة الدر

 

ايه الكلام الفارغ اللي قولتيه ده الاعضاء مستائين جدا

 

وانا مالي ياست هو انا جايبة الكلام من عند امي مش انتي اللي قاعدة جنب ودني بتوزيني على اللي اقوله .

 

ايه ده ايه الدوشة دي

 

يا لهوي الحقي ياست شجرة الدر دول قالعين القباقيب وجاينلك اجري استخبي يختي عيالك عايزينك يالهوووووووووى

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(36)

بقــ هبةنور ــلم

 

الحقوا يا جماعة ذكية جاية تجري من برا ومش عارفة مين بيجري وراها

 

عمالة ترن الجرس وترزع على الباب وتقوووووووووووووووول

 

تعالوا نشوف فيه ايه

 

 

 

 

 

 

تررررررررررررررررررن تررررررررررررررررررررررررررررن دب دببببببببببببببببببببب دبببببببببببببببب تررررررررن

 

 

افتح يا عبد الصمد افتح ياخويا

 

 

 

ايه ايه ايه كل ده خبط استني هفتح

 

ايه ياست بالراحة

 

 

خبيني يا عبد الصمد خبيني ياخويا

 

 

في ايه اخبيكي من مين ايه اللي حصل

 

 

الست المفترية مرات الجزار ماسكة الساطور وطالعة تجري ورايا

 

ليه ياستي عملتيلها ايه ختي منها لحمة ومادفعتيش تمنها ولا ايه

 

 

ياريت ياخويا ياريت اصل انا

 

 

 

دددددددددددددددب ددددب دببببببببببببببببببببببببب ترررررررن تتتتتتتتتتتتتتتتتتتررررررررررررررررررررررررن

 

اوعا تفتح ياعبد الصمد دي هي ياخويا هي اصلها حالفة تقطعني وتبيع مني بالكيلو

 

ترررررررررررررن تررررررررررررررررن دببببببببببببببببببببببببببببببببب دببببببببببببببببببببببببببببببببببببب

طيب ادخلي انتي وانا هفتح اشوف في ايه

 

 

 

تررررررررررررررررررررن ترررررررررررررن

 

 

ايوة يا ست ايوة في ايه

 

فين المدعوئة مراتك

 

مالها بس عملتلك ايه

 

يرضيك يا استاذ عبد الصمد اطلب منها عروسة لابني ضنايا الوحيد اللي جايباه على خمس عجول قصدي خمس بنات

 

واقولها الواد عنده خمسة وعشرين سنة وعايز واحدة ماتزيدش عن عشرين تقوم جايباله عروسة عندها سبعة وتلاتين سنة

 

وتضحك علينا وبعد مانجيب الشبكة ونتدبس في العفش والقايمة نيجي نكتب الكتاب نلاقيها اكبر من الواد بسنين السنين

 

 

معقووووووووووووووووووووول ذكية عملت كدة

 

ايوة يا استاذ عبد الصمد ودلوقتي لا طايلين الدهب ولا طايلين حقنا والواد اتعقد وعمل اضراب عن اللحمة وبياكل نباتات وخس النص يا عين امه

 

كله من عمايل مراتك .قولي يا استاذ عبد الصمد مراتك تستاهل تتقطع بالساطور ولا لأ

 

ياسلام تستاهل طبعا هو اللي بتعمله فية وفي الناس شوية

 

 

 

ترررررررررررررررررررن تررررررررررررررررررررن

 

مين

 

بوليس افتح الباب

 

خير يافندم

 

جالنا بلاغ من الست ذكية عويس ان في واحدة جاية تتهجم عليها في بيتها

 

ايوة يا بيه هي الست المفترية اللي ماسكة ساطور دي اقبضوا عليها

 

لا يا فندم الست دي مظلومة انا اللي مراتي اتسببتلها في مشاكل واتصلت بيكو عشان تعمل فيها بلاغ كيدي اقبضوا على مراتي

 

 

يالهوي ياعبد الصمد انت عايز تخلص مني وتوديني في مصيبة

 

يا فندم يا ريت تحبسوها وما تطلعوهاش تاني عشان دي خطر على الأمن العام

 

انا خطر على الإمن ياعبد الصمد ليه ياخويا شايفني شايلة اربيجيه وبجري ورا الخلق في الشارع

 

اتفضلي معانا ياست ذكية على قسم الشرطة

 

احسن تستاهلي ده ذنب ابني الغلبان

 

 

 

 

 

 

 

اهئ اهئ اهئ الله يسامحك ياعبد الصمد انا ابيت في القسم اربع تيام بسببك مع حسالة المجتمع واخرج بكفالة

 

 

ههههههههههههههههههههههه تستاهلي فرحان فيكي فرحة مش عارف اوصفها واحمدي ربنا اني رضيت ادفعلك الكفالة

 

بس مش قادر اوصفلك كانوا اجمل واحلى واروق اربع تيام في حياتي من ساعة ما تجوزتك

 

الله يسامحك ياعبد الصمد ياناكر جمايلي اهئ اهئ اهئ

 

 

تررررررررن تررررررن

 

 

تليفونك بيرن روحي ردي وبعدين ادخلي استحمي عشان ريحتك وحشة اوي والبيت اتملا حشرات من ساعة مادخلتي يا رد السجون انتي

 

ترررررررررررررررررررن ترررررررررررررررررن

 

طيب ياعبد الصمد طييييييييييييييييييييييييييييييب حاضر مسري اردهالك

 

 

الو ايوة يامنكسرة عايزة ايه انتي كمان

 

يوه مالك يا ذكية مش طايقة دبان وشك كدة

 

ماتجيبليش سيرة الدبان ولا الناموس ولا البراغيت انا بقالي اربع تيام بايتة في حضنهم فاهمة ولا مش فاهمة

 

اه يختي سمعت انك كنتي محبوسة في القسم

 

غيري السيرة وخشي في الموضوع عايزة ايه

 

اصل يختي اخو جوزي بيدور على عروسة وانا قلت انتي اللي هتجيبي التايهة

 

ابوس ايدك يا منكسرة لو لية غلاوة عندك ما تجيبليش سيرة الجواز ولا اللي عايزين يتجوزوا كفاية اللي جرالي يختي انا مش ناقصة

 

يختي انتي غلطتي ياذكية كان المفروض تقولوا الصراحة لأهل العريس وسن العروسة الحقيقي ده جواز يختي والصراحة مطلوبة

 

اعمل ايه يامنكسرة ام العروسة هي السبب قعدت تعيط وتقولي ماتقوليش سن البت ويمكن يشوفها تعجبه وبعدين نقول سنها

 

يبقا انا ذنبي ايه عملت ايه

 

طيب يا ذكية خلينا في اخو جوزي

 

طلباته ايه

 

عايز واحدة بنت حلال وبيضة

 

بنت حلال وبيضة .بنت حلال وبيضة .ايوة ايوة عروسته عندي البت دنيا بنت الحانوتي

 

حانوتي يختي ايه الفال ده

 

يختي دي البت حلوةى وبيضة وبنت حلال وهتعجبه سيبك من شغلة ابوها

 

طيب هنشوفها امتا

 

هتصل بامها واحدد معاد

 

 

 

 

 

 

اهلا اهلا اهلا يا ست ذكية منورة انتي والجماعة

 

الله يخليكي يا ام العروسة

 

يخلي مين يختي كله فاني مادايم الا وجهه

 

لا اله الا الله

 

انا اول ماقالوا عايزين عروسة بنت حلال وبيضة قلت مافيش الا دنيا بنتك

 

اصيلة يا ست ذكية اصيلة اخدمك نهار خارجتك يارب

 

اللهم احفظنا يختي الملافظ سعد

 

تشربوا شاي وقرص ولا تاكلوا بلح ابريمي وبرتقان

 

ياست احنا جاين نخطب ولا نقري على الترب لا حول ولا قوة الا بالله

 

خلاص اجيبلكوا قهوة سادة

 

هو احنا مش هنشوف المرحومة بقا

 

ايه

 

يوه يختي قصدي العروسة

 

 

حاضر يختي . تعالي يادنيا ماتتكسفيش

 

ماشاء الله ماشاء الله بدر منور

 

وحدوووووووووووووووووووووووووووووه

 

لا اله الا الله

 

وانتي طلباتك ايه ياام العروسة

 

طلبات ايه بس يختي دي دنيا منفاتة واللي متغطي بيها عريان

 

ونعم العقل يختي . على كدة مالكوش طلبات

 

احنا يختي طلباتنا بسيطة عايزين شقة شرحة وبرحة وبتطل على الارافة

 

ياحفيظ يارب وتطل على الارافة ليه بس

 

عشان يتعظوا يختي امال ايه

 

عندك حق يا ام دنيا وايه تاني طلبات يا ام العروسة

 

عايزين شبكة خمسين الف جنيه وزيهم مهر وفرح مايقلش عن تمانين الف جنيه والعفش من بلاد برا امال ايه

 

ياسلام وايه كمان يختي

 

عندنا طلب اخروي مش دنيوي

 

ايه هو يا ام دنيا

 

يسفرها كل سنة اروبا

 

وده طلب اخروي برضو يختي

 

ايوة يختي هو انتي فاكراني عايزاها تروح تتفسح في اروبا

 

امال تروح تهبب ايه كل سنة

 

تروح تغسل ميتين وتطلعلها بقرشين

 

يخرب بيت فالك يابعيدة

 

طلعيني من هنا ياذكية يختي حاسة روحي بتنسحب مني ونفسي طابق علية الحقيني

 

 

يالهوي مالك يا منكسرة

 

اختك باين عليها هتودع يا ست ذكية الحمدلله رزق وجالنا لحد دارنا

 

يا لهوي قومي يا منكسرة قومي يختي

 

مش قادرة ياذكية من ساعة مادخلت الشقة دي وانا حاسة اني هطلع منها على ضهري

 

غالية والطلب رخيص من عنينا يا ست منكسرة داانا هخدمك بعنية وهغسل غسل ماغسلتهوش لحد قلبك ولا بعدك ربنا يهون عليكي ساعتك يختي

 

اعوذ بالله يا شيخة كانت شورة مهببه يوم مادخلنا عليكو

 

 

اخص عليكي يا ست ذكية انتو مش هتخطبوا دنيا

 

لا يختي مش هنخطبها عشان دي دنيا منفاتة زي ما قلتي وحدوووووووووووووووووووووووووووووووووووه

 

 

لا اله الا الله

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(37)

بقــ هبةنور ــلم

 

 

هو الام لازم تقعد محتشمة قدام الابن

 

والبنت لازم تقعد محتشمة قدام الاب

 

ولا لأ

 

اصل ذكية راحت تزور بنت خالتها وشافت

 

تعالوا نشوف شافت ايه

 

 

 

 

 

 

 

اهلا يا ذكية يا حبيبة قلبي واحشاني اوي

 

 

ربنا يخليكي يا نعمة يختي تسلمي .هو انا يختي كل ما جي الا قيكي لبسة هدوم خفيفة ولحمك باين من تحتها كدة

 

 

يختي الدنيا حر يا ذكية

 

بس برضو يا نعمة يختي ولادك الصبيان كبروا وما يصحش يشوفوكي كدة

 

مالي كدة يختي ما انا زي الفل أهو

 

صباح الخير يا خالتو ذكية

 

اهلا يا بت يا سوسو عاملة ايه

 

الحمدلله كويسة

 

هو انتي كمان زي امك لبسة شورت وفانلة يللي عايزة ضرب الكاتانيلا

 

 

امال عايزاني البس ايه احنا في البيت الواحد يلبس على راحته

 

يا بت يلللي تنشكي ما بتتكسفيش من ابوكي واخواتك الصبيان

 

وانا هتكسف من بابا واخواتي برضو يا خالتو

 

 

ازيك يا خالتو ذكية وحشاني كتير

 

اهلا يا بت يا فوفو هو انتي كمان لابسة الهدوم المسخوطة دي زي امك واختك يا مضروبة

 

 

امال البس ايه يا خالتو انا حرانة خالص خالص ومش طايقة هدومي

 

 

 

ازيك يا خالتي ذكية

 

يا لهوي ايه يا واد يا ميدو اللي انت لابسه ده يا قليل الأدب مش عارف ان انا موجودة

 

الدنيا حر يا خالتو ما حدش طايق هدومه

 

ايه يختي العيلة اللي طالعة من هدومها دي انا ابتديت اقلق من القعدة معاكو انا هقوم اروح

 

تروحي فين بس يا ذكية احنا لازم نتغدا سوا

 

مش عايزة يختي من وشكو حاجة

 

زعلانة مننا ليه بس

 

عشان انتوا عيلة ما تختشوش وعلى رأي المثل اللي اختشوا ماتوا

 

 

لا حول ولا قوة الا بالله احنا عملنا ايه بس يا ذكية يختي

 

 

يا نعمة عيالك كبروا يا نعمة الاصول ما تقعديش قدامهم كدة دول صبيان وسنهم خطر ممكن والعياذ بالله يبصولك كدة ولا كدة

 

وبناتك كمان المفروض ما يقعدوش كدة قدام ابوهم واخواتهم الصبيان ده غلط

 

 

ايه يا ذكية الكلام الفاضي ده دول اخوات يختي ولا انتي متأثرة بتمثلية العشق الممنوع

 

ايه تمثلية العجل المنقوع دي انا ما شوفتهاش ما علينا من التمثيليات والكلام الفاضي اللي فيها

 

المفروض تعودي بناتك على الحشمة وانهم يتكسفوا ويبقا عندهم حيا

 

يختي بلا حيا بلا عيا بلا وجع دماغ يلا الغدا جاهز

 

 

مش هاكل عندكو ولا لقمة انا مش عاجبني حالكو يا عيلة تلفانة الامل انتو

 

يختي ان شا الله ما طفحتي قومي روحي لعيالك فلقتينا

 

لا وانتي الصادقة انا هطلع من هنا على بوليس الأداب يجي يلمك انتي وعيالك

 

 

يا سلام يختي واحنا تهمتنا ايه ان شاء الله

 

تهمتكو قالعين قدام محارمكو ملط مع سابق الإرصاد والترصد

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(38)

بقــ هبةنور ــلم

 

ذكية النهاردة صوتها جايب لآخر الدنيا وعمالة تنده على جارتها اللي في الشقة اللي قصادها

 

ومتعصبة خالص يا ترى ليه

 

تعالوا نشوف ايه الحكاية

 

 

 

يا عواطف انتي يا عواطف يا عواااااااااااااااااااااااااااااااااااطف

 

انتي يا ست عواطف عواااااااااااااااااااااااااااااااااااااااااااااااااااااااااااطف

 

ايه يا ذكية في ايه يختي مالك بتزعقي كدة ليه

 

 

هو انتي يا جارة الهنا مش بعتي الواد المقروض ابنك امبارح عشان ياخد عشرين مشبك غسيل

 

ايوة يا ذكية طيب ما انا رجعتهوملك مع الواد انهاردة

 

انتي رجعتي تمنتاشر مشبك بس وطمعتي في مشبكين يا حرامية المشابك

 

لا حول ولا قوة الا بالله . والله يا ذكية انا عدتهم قبل ما ارجعهوملك وكانوا عشرين

 

عيب عليكي يا عواطف اطلعي بالمشابك بدل ما اخلي فضيحتك بجلاجل

 

والله يا ذكية انتي مفترية انا ماختش منك حاجة

 

طيب انا عرف ارجع مشابكي ازاي . الواد ابنك عندي جوا بيلعب مع حمادة انا هاخده رهينة ومش هتشوفيه تاني الا لما تقبي بالمشابك

 

 

طيب بالله عليكي غديه يا ذكية عشان الواد على لحم بطنه من الصبح

 

انتي هبلة يا ست انتي انا بقولك هاخده رهينة مش هاخده اعوضه عن حنان امه . انا بعون الله هربطه في رجل السرير واخلعله ضوافره وانتفله حواجبه

 

واعميله عنيه

 

 

يا لهوي يا ذكية كل ده عشان مشبكين وكمان ظالماني فيهم . طيب خلاص سيبي الواد وانا اقولك خبر حلو

 

خبر ايه الحلو ده يا شيخة منصر المشابك

 

مش انتي كنتي عايزة تشتغلي

 

ايوة امال ايه عايزة

 

طيب في واحدة ست هانم كدة كانت عايزة بيبي سيتر

 

عايزة ايه دي يعني

 

عايزة جليسة اطفال لولادها

 

طيب ما تجلس هي مع ولادها ولا الحوجة للبوبي سيتو

 

لأ يا ذكية لأ اصلها موظفة ووقتها مش ملكها ومش فاضية تقعد بالعيال

 

طيب وهتديني كام

 

هتديكي بالدولار يا بت يا ذكية

 

صحيح يا عواطف يعني الدنيا هتضحكلي يابت وهجيب التوكتوك اللي نفسه فيه وابقى من الأكابر

 

طبعا طبعا يا ذكية

 

طب اديني العنوان

 

سيبي الواد الأول

 

حاضر يختي . روح لامك يا عبده عشان تحميك وتغيرلك الهدوم المعفنة اللي انت لابسها دي وماتجيش تاني الا وانت لابس شبشب في رجليك

 

بهدلتلي الدنيا جاتك الهم

 

 

حاضر يا خالتي ذكية

 

 

 

 

 

اسكت يا عبد الصمد مش انا هشتغل بوبي سيتو

 

بوبي ايه يختي

 

يعني جليسة اطفال ياخويا

 

انا مش موافق يا ذكية وبعدين انا مش محتاج لشغلك

 

لكن انا محتاجة لشغلي

 

ليه يا ذكية .انتي كل طلباتك مجابة ومش ناقصك حاجة وعمري مارفضتلك طلب

 

لا يا عبد الصمد انا طلبت منك كوتشي من اللي بينور الشهر اللي فات وماجبتليش

 

طيب هجيبهولك وشيلي فكرة الشغل من دماغك

 

لأ يا عبد الصمد هشتغل

 

والعيال يا ذكية

 

العيال مش محتاجينلي والاكل في التلاجة والمكوجي بيكوي زي الفل والحمدلله

 

عن اذنك عندي معاد مع الست اللي عايزة البوبي سيتو

 

عايزة الحق يا ذكية انتي بوبي من غير سيتو

 

 

 

 

 

 

 

صباح الخير يا ست

 

انتي البيبي سيتر

 

ايوة يا ست واسمي ذكية

 

اهلا يا ذكية . تونة

 

لأ تشكري لسة متغدية قبل ما اجي

 

لأ انا اسمي تونة

 

مفتتة ولا قطع يختي

 

انا بابي هو اللي سماني الأسم ده عشان مامي كانت موظفة وكان مافيش اكل في البيت غير التونة

 

يا كبد امه يعني سماكي الاسم ده من قهرته

 

ومامي اسمها سردينة عشان برضو تيتة كانت موظفة وماكانش في اكل في البيت الا السردين

 

ايوة ايوة فهمت يبقى اكيد ستك الله يرحمها كان اسمها الحاجة سلمون

 

انتي عرفتي منين

 

ماهي شجرة عيلتكو باينة

 

 

طيب بصي تخلي بالك من الاولاد كويس اوي وتهتمي بمواعيد اكلهم لكن خلي بالك اكتر من توتي عشان لسة بيرضع

 

طيب وده هرضعه ازاي ده محتاجك انتي يختي عشان اللبن الطبيعي بتاعك ايها المرأة الحلوب

 

 

لأ انا مش برضع

 

يا عيني يختي يبقى اكيد واحدة دخلت عليكي نشفت لبن صدرك

 

لأ ماحصلش انا اللي مش بحب ارضعه

 

ايوة ايوة يبقا اكيد الواد ده ابن جوزك وبلاكي بيه وانتي بتربيه وسط العيال عشان بنت اصول

 

لأ لأ طبعا مش كدة

 

يبقى اكيد لقتيه على باب جامع وختيه عشان تكسبي فيه ثواب

 

انتي بتقولي ايه ده ابني نور عيني

 

جاكي قلع عينك يا بعيدة

 

 

 

 

تونة انتي ياتونة يا توووووووووووووووووونة

 

عن اذنك هكلم جوزي

 

روحي يختي طريق السلامة

 

خير خير في ايه يا صبري

 

انا نفسي اكل طبيخ ورز ولحمة زي زمان ايام امي

 

يعني شايفني فاضية انا ست موظفة وماعنديش وقت للكلام الفاضي ده

 

والله انتي ظلماني وظالمة العيال اللي بتنزلي وهما نايمين وترجعي وهما نايمين ومالكيش اي علاقة بيهم

 

والله انا مش هتنازل عن طموحاتي ومركزي عشان شوية عيال

 

ده اخر كلام عندك

 

ومافيش غيره عندي

 

طيب انا ماشي واستني ورقتك

 

ايه انت بتقول ايه استنى يا صبري استنى نتفاهم ارجوك يا صبرى صبرى

 

اهئ اهئ اهئ

 

ايه يا ست تونة مالك

 

صبري مشي ومش راجع تاني عشان مش لاقي راحته معايا

 

يعني ايه ياست هيطلقك

 

ايوة ايوة اهئ اهئ اهئ

 

يا لهوي طيب خدي يختي شيلي المحروس توتي عشان الحق اعمل حلة محشي لعبد الصمد وادعكله رجليه بالحجر يمكن يسامحني يا ام توتي

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(39)

بقــ هبةنور ــلم

 

النهاردة ذكية بتتكلم عن الانتخابات هي وعبد الصمد

 

 

ياترى هي هتختار مييييييييييييييييييين وهتسانده ازاي

 

تعالوا نشوف

 

 

 

الا قولي يا عبد الصمد

 

نعم يا ذكية

 

انت ياخويا هتعمل ايه في الاستنخابات اللي هيعيدوها دي

 

 

انا هصوت لمرسي يا ذكية

 

غلط يا عبد الصمد اكبر غلط ياخويا صدقني

 

لا حول ولا قوة الا بالله ليه بس ياذكية

 

ازاي يعني تصوت لمرسي مش حرام عليك يا راجل

 

حرام ازاي يعني

 

عشان ده فال منيل بنيلة لما كلكوا كدة تروحوا تصوتوا لمرسي وتنحسوا الراجل بصواتكو

 

انا اتفقت انا وعواطف وباتعة بعون الله هنروح نزغرط لمرسي عشان يبقى فال اخضر والنحس يتفك

 

 

والله يا شيخة انا بحمد ربنا على عقلي لما بشوفك

 

ماله عقلي ياخويا ده جزائي عشان عايزة انقذكو من الغرقة اللي انتو فيها والنحس الدكر اللي جيبتوهولنا بصواتكو لمرسي وداخلتكو على الراجل

 

بالحزن والصوات والنكد لما الناس اتشاءموا منكو ومارحوش الاستنخابات

 

لكن انا وعواطف وباتعة هنخش بالفرح والزغاريط وان شاء الله منصورين

 

 

طيب ياذكية وقتها يحلها ربنا

 

عبد الصمد

 

نعم

 

انا عايزة اروح ازور خالتي منظورة

 

هو انتي عندك خالة غير خالتك محاسن وخالتك خضرا الله لايرجعها وخالتك كئابة الله يرحمها

 

ايوة يا عبد الصمد انت مش فاكرها ولا ايه دي كانت موجودة لما جيت تخطبني

 

ايوةايوة افتكرتها الست التخينة اللي كانت عمالة تخمس في وش امي وترش ملح

 

ايوة ياخويا هي دي اصلها بتخاف من الحسد اوي اوي

 

طيب هنزورها ليه لما هي بتخاف من الحسد

 

يوه يا عبد الصمد هو احنا هنحسدها ولا هنحسدها ياخويا

 

هي ساكنة فين

 

ساكنة في الجيزة عند عم ابو الهول

 

طيب اتصلي بيها وحددي ميعاد

 

 

هو اصلا مش هينفع نزورها الا يوم الخميس او خمسة في الشهر والا مش هتفتح الباب

 

يا حفيظ هو لسة في ناس بالتفكير المتخلف ده . وعلى فكرة حرام الحاجات دي اللي زي الخمسة والحدوة والنجمة

 

كل واحد ليه تفكيره بقى يا عبده

 

 

 

 

 

هي دي العمارة يا ذكية

 

ايوة يا عبد الصمد الشقة اللي متعلق على البلكونة بتاعتها يافطة مكتوب عليها للبيع دي

 

 

هي خالتك عارضة الشقة للبيع ؟

 

لا يا عبد الصمد لا هي بس بتحصن روحها من عين الحسود اصل شقتها حلوة وشرحة وتنفع ملعب كورة قدم زي بتاع نادي شبرالونة

 

 

طيب قولي ماشاء الله يا ذكية

 

هو انا هحسدها ولا هحسدها يعني

 

 

 

انتي متأكدة هي دي الشقة يا ذكية

 

ايوة امال ايه يا عبد الصمد انا ماتوهش عن شقة خالتي منظورة . ادي حدوة الحصان وفردة الشبشب متعلقين اهم وكمان ادي اليافطة اللي مكتوب عليها

 

 

العين صابتني ورب العرش نجاني

 

 

هههههههههههههههههههههه

 

لالا انت لسة هتلاقي بلاوي متعلقة جوا يا عبد الصمد

 

 

خبط يا عبد الصمد خبط

 

 

تن تن تن

 

مييييييييييييييييييييييييييييييين

 

افتحي يا خالتي انا جيت انا وعبد الصمد

 

استني يا ذكية اما اجيب طبق الملح من جوا يابت

 

ماشي ياخالتي احنا مستنظرين مش هنيأس

 

 

هي هتجيب طبق ملح ليه

 

عشان ترش على العتبة قبل ماندخل لحسن نحسدها

 

لا حول ولا قوة الا بالله

 

 

يا خمسين الف اهلا وسهلا يا خمستلاف مرحب يا ذكية يا خمسوميت اهلا وسهلا يا عبد الصمد يابني

 

الله يخليكي يا حاجة

 

ازيك يا خالتي وحشاني عاملة ايه

 

عيانة يا ضنايا وتعبانة واجي من عند دكتور اروح لدكتور وصحتي في النازل

 

يا حفيظ يارب ليه كدة بس سلامتك الف سلامة

 

 

اعمل ايه يا بنتي واحدة الله يسامحها جت عندي شافتني كنت لابسة اسورتين دهب جداد بعيد عنك هي نقرتهم من هنا وانا العيا والدهولة مسكوني من هنا

 

 

سلامتك الف سلامة ياخالتي

 

تشرب ايه يا عبد الصمد يابني

 

ولا تتغدوا احسن

 

لا لا يا حاجة مافيش لزوم للغدا احنا هنشرب شاي

 

 

اتفضلوا الشاي

 

 

متشكرين يا حاجة

 

تسلمي ياخالتي

 

 

اسكتي يابت يا ذكية كان عندي كتكوت اشتريته كان لسة طالع من البيضة وربيته على ايدي احسن تربية

 

لحد ما كبر وبقى ديك ملو هدومه ولا العرف اللي على راسه يابت يا ذكية تقوليش افندي بطربوش

 

ولا لما كان يمشي في الشقة كدة نافش ريشه تقوليش داكتور ناقصله سماعة

 

طيب وما سفرتهوش يكمل علام برا ليه يا خالتي

 

هو انا لحقت افرح بيه يا ذكية يا بنت اختي بعيد عنك واحدة جت شافته قالت الديك ده كبير اوي لو ادبح يكفي عيلة بحالها

 

هي قالت الكلمتين دول من هنا وهو شتح على الارض وفرفر في ساعتها

 

ياعيني عليه ياخالتي معلش ربنا يعوض عليكي . هي سامية وعيالها عاملين ايه

 

حالهم حال الشوم والندامة يا كبدي عيانة هي وعيالها وجوزها باع الشقة ومقعدها عند امه عشان تخدمها وعليه ديون واقساط وقضايا وكان عنده شريك

 

نهب حقه وعربيته اتسرقت وسامية باعت دهبها يا عين امها والدمعة مابتفارقش خدها

 

ايه يا خالتي ده هو انتي بتقري صفحة الحوادث دا ايه وجع القلب ده

 

 

يوه ياذكية مش بتسأليني عن سامية واحوالها

 

 

طيب وعايدة عاملة ايه

 

مش رجليها اتكسرت يا ذكية وهي نازلة ع السلم عشان تلحق الواد قبل العربية ما تشوطه وجوزها عنده مية زرقا على عنيه

 

خلاص ياخالتي صلي ع النبي انا مش هسأل على حد تاني انا هاخد جوزي وامشي

 

 

يكون احسن برضو بصراحة انا ولا احب ازور حد ولا حد يزورني بلا هم

 

يلا ياعبد الصمد

 

 

يلا يختي مانابني من عيلتكو الا التهزيئ وقلة القيمة كان المفروض لما اعرف ان خالتك بتخاف من الحسد بالطريقة دي ما نزورهاش اصلا

 

سيبك انت يا عبد الصمد انا فرحانة انك مش بس بتسيبني ازور قرايبي انت كمان بتودهم معايا

 

يعني انتي مقدرة

 

طبعا طبعا يا عبودي

 

طيب ايه رأيك مادام احنا في الجيزة نعدي على عمي نسلم عليه

 

ايه ايه احنا ايه يودينا عند عمك يا خويا انا عايزة اروح اشوف العيال .عمك ده يخصك انت لوحدك انا مالي

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(40)

بقــ هبةنور ــلم

 

ذكية شايفة عبد الصمد ماسك كتاب ولابس نضارته ومندمج في القرايا

 

وسألته عن الكتاب اللي في إيده

 

 

 

تعالوا نشوف ذكية عملت ايه

 

 

عبد الصمد

 

عبد الصمد

 

يا عبد الصمد

 

ها . نعم ياذكية

 

انت بتعمل ايه

 

انا بقرا واحد من امهات الكتب

 

يا حلاوة يا ولاد هي الكتب كمان بتخلف وبتبقى امهات

 

يا فتاح يا عليم . ايوة يا ذكية

 

يعني الكتاب اللي في ايدك ده من امهات الكتب

 

ايوة يا ذكية

 

وعنده عيال اد ايه

 

عنده أحمد وعزة

 

ماشاء الله ربنا يخلي ودول في سنة كام

 

ذكية قومي من وشي شوفيلك شغلانة غيري خليني اقرا الكتاب

 

انا ماوريش حاجة يا عبد الصمد

 

طيب والكراكيب والهدوم المرمية في كل حتة والبطاطين اللي مااطبقتش والاطباق اللي مالية الحوض ان شاء الله والشقة اللي زي الزفت والعنكبوت اللي مالي البيت كأننا عايشين في خرابة . كل ده ومافيش وراكي حاجة

 

مالها الشقة ماهي زي الفل اهيه ولا انت بتتلكك وخلاص ياخويا

 

يا ذكية انا لما حد بيجي عندي بتكسف من منظر الشقة . انا مش ناسي صاحبي اللي جه عندي ومارضيش يشرب حاجة من قرفته من الكوباية المعفنة الصفرا اللي قدمناله فيها العصير

 

ان شالله ماشربو احسن برضو وماتخليهوش يجي عندنا تاني

 

هو اصلا مش هيجي عندنا تاني وبصراحة عنده حق

 

ياسلام عنده حق في ايه ان شاء الله

 

اصلك ماشوفتيش بيته ونضافته والله يا شيخة الواحد اول ما دخل شقته كأنه داخل جنينة من الريحة الحلوة ولا النظام والنضافة حاجة تشرف . حقيقي ربنا يباركله في مراته

 

 

وانت رايح تزور صاحبه ولا تبصبص لمرته يا عبد الصمد وتقع في معصية

 

لا حول ولا قوة الا بالله . انا والله ماشفت مراته ولا هي شافتني دول ناس ملتزمين

 

ياشيخ هو في ناس ملتزمين يوقعوا الناس في بعضيها كدة

 

يوقعوا الناس في بعضيها إزاي يا ذكية

 

يعني لما انت تروح تلاقيها شقتها نضيفة ومنظمة وتكره عيشتك مع مراتك يبقوا دول ناس كويسين برضو ؟

 

انتي مش لاقية حاجة تقوليها وتداري كسفتك يا ست انتي ولا ايه

 

اتكسف من ايه يا خويا هو في شقة في حلاوة شقتي ووسعها

 

انا مش عارف والله انا جايبلك شقة واسعة عشان تنضفيها ولا عشان تمليها زبالة

 

طب سيبني ادافع عن نفسي ياعبد الصمد

 

هتدافعي تقولي ايه

 

اولا المواعين اللي مالية الحوض دي فخر لينا

 

يخرب بيت كدة يا شيخة . فخر في ايه ان شاء الله

 

ان لما الناس يشوفوا مواعينا يقولوا علينا بيتنا مليان خير وواكلين وشبعانين وعندنا مواعين

 

لكن اللي ماعندهومش مواعين في الحوض دول ناس جعانين ومش لاقين ياكلو

 

يا سلام طيب والعنكبوت اللي مالي الشقة

 

يا عبد الصمد العنكبوت بيجي عندنا عشان احنا ناس طيبين وبيتنا مفتوح للكل ويساع من الحبايب الف ولا انت عايزني اشوف العنكبوت وهو بيبني بيته وفرحان انه هيستقر ويتجوز واقوم انا اكسر بخاطره

 

واطرده واهدله بيته . امال فين الرحمة يا عبد الصمد

 

يا شيخة ربنا يرحمني منك ومن عمايلك كمان بتدافعي عن الغلط يا مفترية . طيب والزبالة اللي مالية المطبخ وشكلها يأرف والحشرات ملمومة عليها

 

طيب ما هو انا اللي حاطة الزبالة بالخصوص عشان الحشرات تتلم عليها

 

الله ينتقم منك بعدله . وانتي عايزة الحشرات تتلم عليها ليه

 

يا عبد الصمد حرام عليك هما الحشرات دول مش ارواح ومن حقهم يتغذوا كويس عشان يعرفوا يعيشوا ويربوا عيالهم ولا هي القسوة ملت قلوب الناس خلاص وماحدش بقى يهمه الا نفسه

 

انا بصراحة مش عارف انا عايش في بيت ولا في زريبة وسط بهايم

 

قصدك ايه يا عبد الصمد اني انا بهيمة . الله يسامحك على العموم تشكر يا ذوق يا ابو الذوق

 

امبارح ياذكية كنت طالع وسامع واحدة من الجيران بتقول عليكي معفنة وبترمي ريش ورجول الفراخ على باب الشقة

 

هي مييييييييييييييييييييين دي اللي قالت كدة قولي عليها وانا اقوم اكلها بسناني

 

لا مش هقولك انا مش عايز مشاكل

 

عرفتها اكيد عواطف الجعانة وبصراحة انا برمي رجول الفراخ قدام باب شقتي عشان تشوفها وتتحسر على عيشتها وتعرف اني باكل ظفر وهي لأ اللي الفول ما بيتقطعش من بيتها دي

 

بصراحة يا ذكية انتي ست معفنة بجد على رأي جارتك . طيب والتراب يا ذكية اللي على الإزاز تقولي فيه ايه

 

الحق عليه يا عبد الصمد اني بسيت التراب على الإزاز عشان اكتبلك بحبك على الإزاز . طيب بالله عليك لو الإزاز ماعليهوش تراب ينفع اكتبلك بحبك

 

بقى كدة . طيب استني لما اكتب على الإزاز انا كمان

 

هتكتب ايه

 

هكتبلك الكلمة اللي نفسي اقولها من زمان واللي هتنهي المهزلة دي

 

يالهوووووووووووي اوعا تقوله ولا تكتبها يا عبد الصمد ساعة زمن وتلاقي البيت زي الفل ياخويا

 

يلا قدامك ساعة واحدة والا لا تلومي الا نفسك يا راعية الحشرات وسيدة الزبالة الأولى

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(41)

بقــ هبةنور ــلم

 

عبد الصمد سمع صوت ذكية في المطبخ عمالة تعيط ياعيني

 

ولما دخل عرف الحكاية

 

تعالو نشوف ايه اللي حصل

 

 

 

 

 

 

اهئ اهئ اهئ يا خسارة تعبك وشقاكي ياذكية يا مسكينة يا غلبانة

 

ايه يا ذكية بتعيطي ليه

 

سيبني في الغلب اللي انا فيه يا عبد الصمد اهئ اهئ اهئ اهئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ

 

مالك بس حصل ايه

 

اصل ياخويا اتفرجت على حلقة من حلقات بص شوف خفة اليد بالصلاة ع النبي اهئ اهئ اهئ

 

وده برنامج عامله واحد حاوي ولا قرداتي

 

لا ياخويا ده برنامج طبيخ بس بيقدم في الحلقة الواحدة يجي خمس اكلات مع بعض وتلاقي الشيف عمال يعمل حلويات على نشويات على بروتونات

 

وايده ماتشوفهاش من خفتها يحط الحلو ع الحلو والحادق ع الحادق وانا قلت اعمل زيه واقلده اهئ اهئ اهئ يا غلبك يا ذكية ييلي اكلك باظ يا شابة اهئ اهئ اهئ

 

عملتي ايه يا ذكية

 

اصل ياخويا الشيف عمل بطاطس بالصلصة وكيكة بعصير الفراولة ومكرونة بشاميل وكنافة بالكاستر

 

المهم ياعبد الصمد انا حضرت كل كل كل الطلبات دي وحطيتها ع الطربيزة وابتديت اطبق اللي شوفته

 

طيب كويس اوي

 

لا مش كويس يا عبد الصمد عشان انا اتلخبطت و حطيت عصير الفراولة ع البطاطس وسقيت الكيكة بالصلصة

 

وعملت كنافة بالبشاميل ومكرونة بالكاستر والأكل كله باظ ياعبد الصمد اهئ اهئ اهئ

 

لا فالحة يختي . وانتي مالك انتي تقلدي الشيف ليه

 

طيب وهو ليه يلخبط خلق الله ويعمل كل الاصناف دي في نفس واحد .انا مش معترضة ياعبد الصمد انه يعمل خمسين صنف في الحلقة هو حر فلوسه وماحدش دافعله حاجة من جيبه

 

بس المفروض يعمل صنف صنف عشان نعرف نفهم ونتابع مش يكون بيعمل محشي وانا متابعة الطريقة وبعدين يقول وبعدين نسقيه شربات وفي الاخر يطلع انه بيتكلم ع البسبوسة

 

في دي عندك حق ياذكية والله

 

 

معلش ياعبد الصمد هناكل سلمون النهاردة

 

سلمون يووووووووووووووووه

 

خلاص بلاش سلمون يا عبد الصمد هقوم اغرفلك بطاطس بالفراولة اذا كان نفسك فيها

 

اه بوظي الاكل واتريئي اوي يختي

 

 

 

 

 

 

 

عبد الصمد

 

ايه

 

هو ايه اللي ايه ده انت بتكلم مراتك يعني ترد كويس خليك راجل مؤدب

 

عايزة ايه يا مراتي يا سبب هنايا

 

عايزة فلوس عشان اخد هدية وازور منكسرة اختي

 

تزرويها ليه كفالله الشر

 

عقبال امالتك عزلت في شقة جديدة واديتني العلوان

 

طيب يختي حاضر تبوظي الاكل وتاخدي مكافأة كمان اتفضلي

 

هات فلوس التاكس بالمرة

 

اه وماله اتفضلي

 

 

 

 

 

 

 

 

 

تاكس

 

انت يا تاكس

 

ايوة ياست رايحة فين

 

رايحة عند منكسرة اختي

 

وانا مالي ياست تروحي عند منكسرة ولا متصلحة . عايزة تروحي فين

 

بص ياخويا انا معايا العلوان في شبرا المظلات

 

اركبي ياست

 

 

 

 

 

 

 

 

 

 

ادينا وصلنا شبرا المظلات

 

طيب هي فين منكسرة مش شايفاها

 

اسم الشارع ايه

 

لا هي ماقلتليش بس قالت فيه على اول الشارع صالون حلاقة اسمه قفا الحبايب وعلى الناصية التانية محل كشري

 

مافيش في الشارع ده ياست

 

طب ادخل الشارع اللي بعده

 

اوف حاضر

 

 

مافيش ياست

 

مافيش ازاي انت المفروض اول ماتدخل الشارع تلاقي قفا الحبايب في وشك على طول

 

حاضر هدخل الشارع اللي بعده

 

 

 

 

ياست مافيش هنا لا كشري ولا الحبايب ولا قفاهم

 

وبعدين في الحيرة دي بقى

 

ياست حرام عليكي انتي كدة موقفة حالي لما انتي مش عارفة رايحة فين بتتعبيني معاكي انا نازل اكل عيش مش نازل اتعطل

 

وانا مالي ماتاكل عيش ولا تاكل فينو شايفني فاتحة فرن وموقفاك في الطابور

 

ياست طب اتصلي بالحاجة اللي انت رايحالها

 

ياخويا يسمع من بقك ربنا يكتبهالك ويكتبهالنا ان شالله ونقف على عرفات

 

لا حول ولا قوة الا بالله

 

طيب اصبر اصبر هتصل بيها رغم كنت عايزة اعملها مفأجأة واروح على غفلة

 

الو ايوة يا منكسرة

 

اهلا ياذكية

 

يابت لفيت شبرا المظلات شارع شارع مش لقياكي هو انتي سيبتي شبرا وختي المظلات ومشيتي

 

وانتي ايه اللي وداكي شبرا المظلات يا ذكية

 

يوه مش انتي عزلتي وروحتي هناك

 

يختي انا روحت العياط

 

عيطو عليكي بدري يابعيدة اقفلي السكة

 

 

معلش ياعم الحاج رجعني مطرح ماجبتني تاني

 

نعم يختي ارجعك فين . اتفضلي انزلي ياشيخة وكفاية العطلة اللي عطلتيهالي

 

كدة برضو هي دي الرجولية والشهومية يا سواق الندامة تسيب واحدة ست هانم زيي في ساعة زي دي الرجالة يعاكسوها

 

ياشيخة يعاكسو مين بس هي دي خلقة حد يعبرها هاتي الاجرة

 

اجرة بتاع ايه ان شاء الله على حلاوة لسانك اوي والله مامدياك ولا مليم

 

لا بقولك ايه هاتي الاجرة بالتي هي احسن

 

طيب والله لو مامشيت لصوت واقول الحقوا ياناس ظابط إمن دولة ومتنكر وعامل سواق تاكسي شوف الخلق هيعملوا فيك ايه

 

الله ينتقم منك يا مفترية

 

 

منتديات أخوات طريق الإسلام

[حواء أم هالة 1895]

*~* يوميــ الست ذكية ـــــــات *~*

(42)

بقــ هبةنور ــلم

 

 

المثل بيقول ع الأصل دور

 

وكل واحد وجذوره

 

اصل ذكية من الناس اللي تحب تتباهى بأصلها وفصلها

 

وشغالة فرجة على التمثيليات التركي

 

 

ولما عبد الصمد زهق من كتر المسلسلات التركي سألها

 

 

 

تعالوا نشوف ايه حصل

 

 

 

 

 

 

ايه يا ذكية يعني كل ماادخل الا قيكي بتتفرجي على تركي

 

طبعا يا عبد الصمد مش كل واحد بيحن لأصله

 

ليه يختي هو انتي كان اصلك تركي

 

امال ايه يا عبد الصمد انا تركية اما عن ستا

 

امان يلالالي يختي

 

جرا ايه ياعبد الصمد انت بتتريق علية وعلى اصلي .لالالا مااسمحلكش يا اسمك ايه وبعدين اتعلم ازاي تتكلم مع الهوانم التراكوة

 

هما فين الهوانم التراكوة دول

 

سعادة جناب عظمتي ولا مش واخد بالك

 

ياشيخة اتلهي وبطلي تلزقي نفسك في العالم بقى

 

هو انت بتكدبني يا عبد الصمد

 

لا مش انا اللي بكدبك دا تاريخ عيلتك المشرف اللي بيكدبك يا بنت عم عويس بتاع الفول

 

شوف الجهل ياولاد اللي مضيع الناس .انا بقول تركية اما عن ستا مش ابا عن جدا . مين جاب سيرة ابويا دلوقتي

 

يا ذكية يعني ازاي امك الهانم التركية هتتجوز راجل غلبان بتاع فول

 

هذا هو الحب يا عبد الصمد ما يعرفش غني وفقير . امي ضحت عشان ابويا وعادت جدو كاظم باشا وخالو شوكت عشانه لولا تيتة صافيناز اتدخلت وصلحتهم على بعض

 

طب وامك سليلة التركوة عرفت ازاي بتاع الفول

 

ابدا ياخويا . ابويا كان بيعدي بعربية الفول قدام القصر بتاع جدو وكانت تيتة صافيناز تبعت امي كل يوم الصبح بطبق الامونيا عشان تجيب فول من ابويا وابويا كان دايما يتوصى بيها ويحطلها فول زيادة في الطبق ويديها قرنين فلف يعبرلها بيهم عن حبه قامت امي حبته من مصاميم قلبها ادي الحكاية يا عبده

 

ياسلام دي ولا الف ليلة وليلة فول وقرون فلفل وطبق الامونيا احمدك يارب . يعني ياذكية هما في السرايا بتاعتهم عدموا السفراجية والبوابين وباعتين امك تجيب فول من على العربية

 

سؤال لطيف وغير متوقع منك يا عبد الصمد . بس زي ماتقول ان تيتا صافيناز ماكانتش بتحب تتعب البوابين والسفراجية فكانت مقعداهم في اوض السرايا متعززين متكرمين وهي اللي كانت بتخدم عليهم عشان تذوب الطوابق الفرقية

 

 

 

طيب كاظم وشوكت مين يا ذكية انا معلوماتي ان جدك ابو امك اسمه عليش وخالك اسمه جعيدي وبعدين مين صافيناز دي . يا ذكية ستك ام امك اسمها بخيتة وعيب تستعري من اصلك

 

يا حفيظ يارب كل ده حقد جواك على عيلتي وهوانم عيلتي وبشواتها

 

يا ذكية خلاص هصدق ان امك تركية زي بعضه لكن ازاي خالتك خضرا تبقى تركية عمرك شوفتي واحدة تركية اسمها خضرا

 

لا ياعبد الصمد انا مش هخبي عليك اكتر من كدة خالتي خضرا مااسمهاش خضرا

 

امال اسمها ايه

 

اسمها الأميرة انجي . شوفت فيلم رد كلبي

 

شوفته ايام الضلال

 

هي دي قصة حياة خالتي خضرا اللي عادت ابوها الباشا واتجوزت الواد علي ابن الجنيني

 

يا سلام يعني امك عادت جدك واتجوزت بتاع الفول وخالتك عادت جدك واتجوزت ابن الجنايني على كدة جدك ماعرفش يربي وبناته خرجوا من تحت طوعه

 

طيب ما انا عاديت اهلي واتجوزتك يا عبد الصمد ولا ناسي ان ابوك بيسرح بعربية تين شوكي

 

اه معلش كنت فاكر بينا تكافؤ انا ابويا بتاع تين شوكي وابوكي بتاع فول لكن معلش امك بقى رجعتني لأصلي

 

لا يا عبد الصمد ما تقولش كدة يا خويا كلنا ولاد تسعة

 

تسعة ايه وعشرة ايه ياذكية هو انتي فاكرة ان امي شوية انا كمان امي اصلها فرنساوي

 

نعم ياخويا نعم هي مين دي اللي اصلها فرنساوي امك دي لو دورت ورا تاريخها تلاقيها جت مع الهكسوس ولا المغول

 

وسابوهالنا هنا الله ينتقم منهم بعدله عشان تنكد ع الشعب المصري كله وتزهقه في عيشته والمفروض نشوف اهلها في انهي مصيبة ونرجعهالهم تاني كفاية أذية لحد كدة . ال فرنساوية ال .دي امك شبه كومبليزا رايس

 

طيب ان شاء الله في عشا يا بنت اخت الأميرة

 

حاضر ياخويا حاضر ماهو آخر زمن ولاد الأمرا يخدموا ولاد الرعية . عجبي عليك يازمن

 

 

منتديات أخوات طريق الإسلام

تم تعديل 31 يوليو, 2012 بواسطة حواء 2010

[حواء أم هالة 1895]

*~* يوميــ الست ذكية ـــــــات *~*

 

الجزء الثاني

 

(1)

بقــ هبةنورلم ...

 

الست ذكية رجعت تاني بحكايات وحكايات

 

وعايزين نشوف ايه غلطتها في حلقتنا

 

 

النهاردة عبد الصمد قاعد ماسك ورقة وقلم وعمال يظبط ميزانية الشهر ومش عارف يظبطها وعمال ينفخ ومش طايق نفسه

 

ودخلت عليه ذكية

 

تعالوا نشوف ايه الحكاية

 

أوووووووووووووووووووووف استغفر الله العظيم

 

اعوذ بالله مالك يا عبد الصمد بتنفخ كدة ليه

 

الطلبات كتير ياذكية والمرتب مش هيكفي . انا مش عارف أعمل ايه

 

طلبات ايه اللي كتير ياعبد الصمد دا إنت معاك ست قنوعة ومالهاش في الطلبات

 

اه صحيح انتي ست مظلومة وغلبانة . لازم أمي بقى هي اللي طالبة جمبري وواستاكوزا

 

يعني هما الجمبري والاستاكوزا هما اللي هيوقفوا المراكب السايرة ياعبد الصمد . انت اللي مش عارف تظبط الميزانية ياعبد الصمد

 

وان شاء الله اظبطها ازاي يافالحة

 

بص يا عبد الصمد انا جاتلي فكرة

 

خير ان شاء الله

 

انت تخليني امسك الميزانية ومصروف البيت وانت تخليك بعيد عن وجع القلب ده وتعيش سلطان زمانك

 

ياسلام يا ام العريف . عايزة تمسكي الميزانية عشان تخنسري منها من ورايا

 

يا شيخ روح هو انت حيلتك حاجة عشان اخنسرها . طيب بكرة تشوف لما امسك الميزانية هوفر أد ايه وهنحوش وهنبني عمارة في ظرف شهرين تلاتة بالكتير

 

بصي ياذكية انا فعلا تعبت من الحسابات وشيل الهم .اتفضلي ياستي ادي المرتب بحاله أهو

 

من إيد مانعدمهاش ياعبده

 

تن تن تن تننننننن

 

مييييييييييييييييييييييييييييييييين

 

افتحي ياذكية انا ماجدة

 

 

اهلا ياماجدة ياجارة الهنا ادخلي ياحبيبتي

 

لا يختي انا مش فاضية انا كنت رايحة الهايبر ماركت الجديد اللي فتح في الشارع اللي ورانا وقلت اعدي عليكي يمكن تحبي تروحي

 

ايه يختي الهامبر فاركيت ده

 

ده سوق كبير اوي اوي يابت ياذكية وفيه كل لوازم البيت اللي تخطر على بالك

 

 

اللهم اخزيك يا شيطان . يختي ماكنتي روحتي من غير ماتعدي جريتي ريقي

 

 

براحتك يا ذكية أنا هروح لوحدي

 

اخص عليكي ياماجدة استني هلبس واجي معاكي

 

ايوة كدة جدعة يا ذكية

 

 

يلا ياذكية ادخلي برجلك اليمين وهاتيلك عربية بعجل من الحلوين المركونين دول وانا هاخد عربية خلينا نملاهم من خيرات ربنا

 

بس انا مش عايزة الا علبة جبنة وباكو شاي ياماجدة

 

جرا ايه يا ذكية هو انتي جاية الهايبر عشان تفضحينا ولا ايه

 

ليه يختي داانا حتى بجيب جبنة وشاي من الانواع المفتخرة

 

ماينفعش ياذكية يختي . الناس اللي في الهايبر يستقلوا بينا ويبصولنا باستحقار

 

خلاص هاخد كيس ملح كمان عشان يعرفوا قيمتنا

 

اسكتي ياذكية وتعالي ورايا وانتي من نفسك هتلاقي حاجات تهبل وهتلاقي نفسك عمالة تملي العربية

 

طب يلا سوقي ياماجدة

 

الله ايه ياماجدة العصاير دي كلها شكلها حلو اوي

 

حطيلك عشرة اتناشر علبة في العربية ياذكية

حاضر والله عندك حق .

 

 

الله بصي ياذكية الزبادي ده عليه عرض

 

ازاي يعني

 

تاخدي عشر علب زبادي وعليهم علبة هدية . وانتي أولى بالعلبة برضو ياذكية

 

بس العيال مابيحبوش الزبادي

 

يعني ده سبب يخليك ماتجبيش الزبادي وتفوتي العرض اللي ماحصلش ده ياذكية . ال وانا اللي بقول عليكي ناصحة

 

عندك حق يا ماجدة انا هاخد الزبادي واكيد الأعادي

 

ايه العلب دي ياماجدة

 

دي انشوجة

 

ايه الأنشوفة دي

 

معقول ياذكية ماتعرفيش الأنشوجة

 

لأ يختي الكدب خيبة

 

خلاص خدي خمس علب جربيهم

 

طيب يختي

 

تعالي ياذكية نروح عند اللحوم والأسماك

 

نروح عندهم نعمل ايه ياماجدة ماتخلينا في حالنا

 

هنروح نشتري ياذكية دا كيلو اللحمة البلدي هنا ارخص من برا نص جنيه

 

ماشاء الله دا أنا هوفر توفير وهفرح عبد الصمد عشان بقاله كتير مافرحش

 

 

ها يا ذكية هتاخدي كام كيلو

 

هاخد كيلو ونص

 

انت بتستهبلي ياذكية . كيلو ونص ايه بس . خدي خمسة ستة كيلو كدة

 

كتير يختي كتير

 

يختي ولا كتير ولاحاجة فرحي العيال

 

وماله يختي نفرحهم احنا ورانا إيه

 

 

 

ها ياذكية هتاخدي كام فرخة

 

هاخد فرخة واحدة

 

ياشيخة بطلي فقر بقى خديلك ستة سبعة دي فراخ نضيفة ومجمدة

 

 

ايوة يختي بس دي كتير اوي كدة هنعمل بيها ايه

 

ياذكية الفراخ بيتعمل بيها ألف طريقة وطريقة كلي واتهني انتي وجوزك وعيالك

 

 

يلا ياذكية على قسم الاجهزة الكهربائية

 

جرا ايه ياماجدة احنا مالنا ومال الاجهزة الكهربائية هو احنا عرايس بنتجهز

 

يا عبيطة دول عليهم خصومات . تعالي تعالي يمكن خلاط ولا مروحة يعجبوكي

 

تعالي يختي

 

 

الله ياماجدة ايه البوتاجاز ابو ست عيون ده

 

امال انتي بوتاجازك بكام عين ياذكية

 

جاتوا نيلة باربع عيون بس

 

اخص اخص معقولة واحدة في القرن الواحد وعشرين بوتاجازها باربع عيون

 

خلاص والله ماهزعلك انا هاخد البوتاجاز الحلو ده .ولا اقولك مش هينفع ياماجدة انا مامعايش فلوس كفاية

 

ولا يهمك ياذكية أنا معايا . وبعدين ابقي رجعيلي الفلوس على مهلك

 

يختي هاتي بوسة ياجارتي ياحبيبتي

 

 

 

تن تن تن

 

مين

 

افتح ياعبد الصمد انا جيت

 

 

 

ايه ده كله ياذكية ايه الشنط دي كلها

 

دا خير وجايلنا ياعبد الصمد وهيملا بيتنا فرحة

 

ياستي انتي بتفسريلي رؤية . انا بسألك ايه كل الشنط دي

 

طب بس اوعى من قدام الباب عشان العمال بتوع الهامبر جايبين البوتاجاز

 

بوتاجاز ايه ياذكية

 

بوتاجاز بست عيون وكمان ادولي عليه مشط كبريت هدية

 

الله يهدك يا شيخة وينتقم من حبابي عنيكي

 

انت بتدعي علية ياعبد الصمد بدل ماتدعيلي . واحد غيرك شايف مراته داخلة عليه شايلة ومحملة المفروض يبوس ايده وش وضهر على الأملة اللي ربنا كرمه بيها

 

جيتي الفلوس منين ياذكية

 

ختهم من ماجدة حبيبتي

 

 

الله ينتقم منك ومنها ياشيخة

 

 

رايح فين ياعبد الصمد

 

رايح في داهية

 

طب ابقى هاتلي معاك ولاعة للبوتاجاز لحسن نسيت اجيب

 

منتديات أخوات طريق الإسلام

تم تعديل 9 سبتمبر, 2012 بواسطة حواء 2010