هي المواد دي حفظ ولا فهم؟؟انا مش عارفه!!

[برحمتكـ استغيث 297]

السلام عليكنَّ ورحمة الله وبركاته

كيف الحال يا طالباااات

اسأل الله ان يوفقنا لتحصيل العلم النافع وان ينفعنا به ويجعله حجة لنا لا علينا

 

بصوا بصراحة انا في حيرة من امري ومش عارفه اعمل ايه

عارفين طبعا الفيزياء والكيمياء والاحياء

المواد العلمية الجميلة دي

المهم انا عايزه اعرف حاجة

هل هي مواد حفظ ولا فهم؟؟

يعني مثلا الاحياء حفظ ما فيهاش فهم

هو كل الموضوع انك تشوفي الحاجة عالحقيقة وتحفظي المطلوب منك

ولكن الفيزياء والكيمياء تصنَّف تبع ايه؟؟

اصل المدرس عندنا بيقعد وياخد كشكول ويكتب واحنا متفرجين او مستمعين

والمطلوب اننا نحفظ ولما نقول للمستر احنا مش فاهمين يقولنا احفظوا التعريف زي ما هو كدا

والبنات اللي معايا متربسين دماغهم على ان المواد دي فهم مش حفظ ومش عايزين يحفظوا

هو الصراحة فعلا في حاجات مابتبقاش مفهومة فبنقوله فبيشرح ولما الموضوع يبقى صعب بيقولنا خلاص احفظوها كدا وخلاص

ولكن معظم الكلام بيبقى مفهوم

وبيبقى المطلوب مننا بعد الفهم الحفظ

فهل حجة عدم المذاكرة بعدم فهم المواد دي حجة فعلا ولا دا دلع؟؟

علما بقا بأن البنات دول كلهم عايزين طب!!

انا عن نفسي ماعنديش رأي في الموضوع دا فعايزه اقتنع بواحد من اتنين..

وجزاكم الله خيرا واسفه عالتطويل

بس ياريت اللي ليها خبرة في اي مجال من مجالات التعليم او اي حاجة تفيدني وربنا يكرمها

[أمّ عبد الله 2370]

وعليكم السلام ورحمة الله وبركاته ،،

 

حياكِ الله يا حبيبة : )

بارك الله بكِ وبأخواتكِ ووفقكم لما يحبه ويرضاه ..

 

بالنسبة للفيزياء والكيمياء فيجتمع فيها الفهم والحفظ .

القوانين تحفظ حفظا جيدا حتى يتم استحضارها وتطبيقها في التمارين والمسائل ، كذا الأمر بالنسبة إلى التعريفات ..

أما حل المسائل والتمارين وغيرها فلا يتم حفظها وهنا يأتي دور الفهم ..

 

ستفيدكِ بقية الأخوات إن شاء الله تعالى .

[ام هانيا 35]

نعم ياحبيبة الامر يحتاج الي الاثنين معا

في البدايه الفهم ثم بعد ذلك الحفظ

[أم جهاد ومريم 205]

حبيبتى أنا عندى خبرة بسيطة من مذاكرة البنات عندى

 

شوفى حبيبتى أتأكدى من حاجة عمرك ما تحفظى أى حاجة من غير فهمها الأول

 

أفهمى كل حاجة الأول وبعدين أحفظيها وحتكون معاكى أسهل كتير

 

شكلك كده فى أولى ثانوى صح ولا إيه ؟؟

 

ربنا يوفقك يارب

 

وأى سؤال حبيبتى أنا تحت أمرك

[برحمتكـ استغيث 297]

ام عبد الله:عندك حق فعلا القوانين طبعا تتحفظ والباقي فهم

بس البنات عايزين يفهموا القوانين نفسها!!

وتسلمي عالمرور خالتو :)

 

 

ام هانيا:اه صح فعلا الاتنين مع بعض جزاكِ الله خيرا :)

 

 

خالتو تقى: بس انا ساعات احفظ بس من غير فهم خاصة ان المواد عندنا كتيييير يجي تقريبا 18مادة او اكتر

فصعب كل مادة اقعد اركز فيها وافهمها وبعدين احفظها فبحفظ لخبطيطه

اللي فهمته في الحصة بيتحفظ بسهولة ام اللي مش مفهوم بيتحفظ بصعوبة وبيتنسي :D

فأنا الصراحة مش عارفه انظم الوقت ازاي

والله يا خالتو تخيلي وصل معايا الموضوع الى اني ممكن يعدي عليا اسبوع وما فتحتش كتاب اذاكر بجد

يعني يادوب احل الواجب واقوم انام والنوم دا ماسك فيا بطريقة :unsure:

وانا والحمد لله في تانيه ثانوي وهي سنه بشهادة الكل صعبة وخاصة الترم التاني

فبجد مش عارفه اعمل ايه!!

خاصة وان السنة الجايه شهادة وانا عايزه اشد حيلي السنة دي عشان اكون مستعدة للسنة الجايه

واسفة يا خالتو هتعبك معايا بس جزاكِ الله كل خير :)

[نسمة*امل* 54]

ربي يعينك ياحبيبة

أنا أعتقد وكما قالت ام عبد الله

انها جميعها تحتاج للفهم والحفظ

واليك التفصيل :)

الفيزياء وهي تحتاج للفهم اكثر من الاثنتين .وبعض الخيال كما ان الخطوة الاولى للمذاكرة الجيدة ان تفهمي الدرس بشكل عام جيدا

ثم تأتي مرحل الحفظ.وان تحفظ شيئا تفهمه اسهل من ان تحفظ ما لا تفهم ،كما ان ذلك ادعى لعدم نسيانه

وهي علم جميل لانها تربطك بالطبيعة وما يحدث فيها"خارج النص"

الكيماء يغلب عليها جانب الحفظ لك ايضا تحتاج للفهم وكذلك التطبيق

الاحياءفيكثر فيها الحفظ لكنها تحتاج ايضا لفهم واسع ومقدرة عالية لتخيل كل ما يقال

 

 

فهل حجة عدم المذاكرة بعدم فهم المواد دي حجة فعلا ولا دا دلع

لا طبعا دا دلع :D

حاولنّ دائما الفهم أولا معا ولتحفظ كل واحدة منفردة

قسمنّ الدروس عليكنّ واشرحنها معا؛وحتى ان قصرت معلماتكنّ في الشرح فهذا لا يعني ابدا عدم المذاكرة

[برحمتكـ استغيث 297]

الفيزياء وهي تحتاج للفهم اكثر من الاثنتين .وبعض الخيال كما ان الخطوة الاولى للمذاكرة الجيدة ان تفهمي الدرس بشكل عام جيدا

ثم تأتي مرحل الحفظ.وان تحفظ شيئا تفهمه اسهل من ان تحفظ ما لا تفهم ،كما ان ذلك ادعى لعدم نسيانه

وهي علم جميل لانها تربطك بالطبيعة وما يحدث فيها"خارج النص"

الكلام حلو ولكن..

المستر مافيش عنده حاجه اسمها كدا

هو احنا فهمنا فهمنا مافهمناش نحفظ عشان في الامتحان نكتب اللي حفظناه وخلاص!

 

الكيماء يغلب عليها جانب الحفظ لك ايضا تحتاج للفهم وكذلك التطبيق

صح فعلا عشان المعادلات وكدا ولكن بصراخة مع اننا مدرسة خاااصة مافيش معمل او بلغة اخص هو في معمل ولكنه فاارغ كله احواض وحاجات منظر فقط!

 

 

الاحياءفيكثر فيها الحفظ لكنها تحتاج ايضا لفهم واسع ومقدرة عالية لتخيل كل ما يقال

اه ايوا صح هي مش محتاجة فهم اوي هو بس انك تستوعبي اللي المدرسة بتقوله وبعدين تروحي تحفظي

[♥●آية إبراهيم●♥ 253]

لؤلؤتي الحلوة أوعي حد يقنعك بموضوع الفهم بس ده حتى عندنا في تاريخ ماتقدري تحفظي شئ من غير فهمه أولا وربط الأحداث معا ثانيا أنتي في أولى ثانوي المواد كثيرة أنا أعرف ولكن بتتيسر صدقيني معظم المدرسين آخر الترم هيقولوا على اللي هيجي في الإمتحان لان الإمتحانات بتكون متشابهه تقريبًا بس ماتعتمدي على كلامي وما تذاكري : ))

الله ييسر لك ويوفقك لما يحب ويرضى

[نسمة*امل* 54]

المستر مافيش عنده حاجه اسمها كدا

ربنا يسامحو يابنتي لازم تفهمو لوحدكم

فيزياء بدون فهم لا تعني شيئا

[برحمتكـ استغيث 297]

لؤلؤتي الحلوة أوعي حد يقنعك بموضوع الفهم بس ده حتى عندنا في تاريخ ماتقدري تحفظي شئ من غير فهمه أولا وربط الأحداث معا

عندك حق ياميس فعلا..وبحاول ما اقتنعش عشان لو اقتنعت احم احم -_-

ثانيا أنتي في أولى ثانوي المواد كثيرة أنا أعرف ولكن بتتيسر صدقيني معظم المدرسين آخر الترم هيقولوا على اللي هيجي في الإمتحان لان الإمتحانات بتكون متشابهه تقريبًا بس ماتعتمدي على كلامي وما تذاكري : ))

معلش انا في تانيه ثانوي وهو مهم انبه عليه لأن اولى ثانوي دي تقريبا كانت لعب :dry:

يعني المواد فيها تعتبر درس واحد في كل ماده احنا بندرسها حاليا:.الله المستعان

عارفه ميس الاحياء رسمت معانا كل الرسما واتدربنا وكل حاجة فيما عدا فقط رسم القلب لأنو كان مستحيل ييجي

ثم وفي اول سؤال في الامتحان "ارسم مسار ضربات القلب" :blink:

فأحب اقولك ان كل التوقعات حاليا غير مجديه لأنهم بدأوا يحطوا حاجات عكس التوقعات100%

 

الله ييسر لك ويوفقك لما يحب ويرضى

اللهم امين وتسلمي عالمرور ميس :D

[برحمتكـ استغيث 297]

ربنا يسامحو يابنتي لازم تفهمو لوحدكم

فيزياء بدون فهم لا تعني شيئا

تقريبا هذا هو المطلوب

شكلك بتحبي الفيزيا :P

[أم زيــــاد 881]

برأيي لو فهمتي كويس حتحفظي عادي

وحيكون الحفظ سهل جدا

 

الفيزياء مثلا فيه معادلات وحجات اساسية لا تتغير لازم فهمها وحفظها لانك حتحتاجيها دايما

 

عشان تعرفي تطبقيها بعدين

 

لكن حفظ كده من غير فهم

مش حستفيدي حاجة

ومش حينفع من الأساس

 

الاساتذة دلوقتي بيطلعو من باب واسع

ويقولوا احفظو

لكن انت اكيد تهمك مصلحتك

لو مش فاهمة قولي انا مش فاهمة عشان يشرح

وده دور الأستاذ

انو يشرح ويشرح ويشرح

وده مفيشهوش كسوف

[ملاذ الفرح 292]

كل المواضيع تحتاج ان تفهم وتحفظ،

اولا نفهم المادة بقراءة الموضوع ثم نحفظه، يعني الشرح لازم تحفظيه وتكوني فاهمته بنفس الوقت

اما المسائل فتفهميها، لكن انك لا تحفظي شيء بحجة ان الموضوع فهم فهذا طريق للفشل ذذذ

[أمل الأمّة 1093]

حياك الله ياغالية ، وبارك الله في الحبيبات اللاتي أجابن.

>> يُنقل للسَّاحة المُناسبة بإذن الله (:

[ريحانه عبد الرحمن 102]

هو فعلا كما قالت الأخوات كل حاجه بتحتاج فهم وحفظ

 

لكن في حاجات الحفظ فيها لازم يكون أكثر

 

لكن في كل حاجه لازم يكون فيها فهم على درجه عاليه قصدي تفهمي الحاجه كويس

 

واسألي فعلا الأستاذ لما تكوني مش فاهمه - طبعا مكنتش بعمل كدا لإني كنت بتحرج - بس نصيحه مني لازم تسألي على الحاجه إلي مش فاهماها بس متفكريش قوي يعني متكونش الحاجه واضحه وتصعبي الأمر على نفسك يعني خدي الموضوع بسهوله واستعيني بالله هتلاقي نفسك بتفهمي إن شاء الله

 

ولما تفهمي الحاجه حاولي تكتبي ورا المدرس إيه إلي فهمتيه ولما تروحي فكري فيه كويس وافهمي بالورقه والقلم حاولي تكوني مدرسة نفسك

 

وفي حاجه كنت بعاني منها في الدراسه إني لما دخلت الثانوي كنت خايفه من الفزياء والكيمياء أوي من إلي الناس كانوا بيقولوه إنها صعبه بس لما درست بنفسي وشوفت المواد عامله إيه لقيتها سهله بس لو إحنا أخدنا الموضوع على حقيقته

 

ومن الحاجات إلي تساعد على الفهم والحفظ إنك لو في تعريفات جمعيها وانتي بتذاكري في كشكول أو على جانب من الكتاب أو الملزمه أو في ورقه

وكذلك المعالات جمعيها

وكرري الحاجه ثلاث مرات على الأقل وسمعي لنفسك كتابة

 

ولو في حاجه حبيتي تسألي فيها في الكيمياء أو الأحياء خاصة - لو فاكره حاجه ممكن أفيدك -

 

ربنا يوفقك ويعينك ويرضى عنكِ

[برحمتكـ استغيث 297]

كلامك حلو اوي يا ريحانه عندك حق فعلا

طيب بالنسبة للكيمياء احنا مش بنعمل في المعمل حاجة

فبصراحة انا شايفه انها غامضة جدا ومش عارفه اذاكرها

طب بصي هو انتي مصرية يعني درستي مناهج مصرية

وانتي اد ايه؟؟

وجزاكِ الله خير بجد حسيت ان في حد حاسس بيا :blush:

[ريحانه عبد الرحمن 102]

وإياكِ يا حبيبتي :)

 

انا مصريه ودرست المناهج المصريه وأنا لسه مخلصه كليه قربت على سنه كدا

 

ولو انتي في ثانوي أنا كنت معتمده على الدروس فمكنتش بشوف معامل أساسا فعادي إنت ممكن تتخيلي التجارب بتاعة الكيمياء بدل مش بتدخلي معمل حاولي إن تتخيلي

 

الكيمياء محتاجه حفظ معادلات وتخيلها وفهمها وتحبيها ومتنقصيش حاجه من دول وسهل أوى لما تتخيليها إنك تحبيها فمتتعامليش معاها على إنها ماده ليها إمتحان وخلاص

 

لكن اتعاملي معها كإنك بتقرأي في حاجه شيقه وبتسلي وقتك بيها

 

لو في حاجه حابه تسألي فيها أنا متابعه معاكي

[برحمتكـ استغيث 297]

ماشاء الله

يعني انتي اكبر مني بكتير

طب انتي اتخرجتي من كلية ايه؟؟

بس مش فاهمة ازاي اتخيلها

طب قوليلي انتي كنتي بتذاكريها ازاي واحاول اذاكرها زيك

[ريحانه عبد الرحمن 102]

بصي أنا كنت بسمع المدرس بيقول إيه في الدرس وأحاول أفهمه ولو في حاجه مش مكتوبه في ملزمته أو في الكتاب طبيعي بضيفها

ولما أحس إن في حاجه شرحها ممكن بعد لما أروح أنساها بكتبها وأنا في الدرس حتى لومفيش غيري بيكتب

 

وبعد كدا بجيب ورقه وقلم وبقسم الموضوع مثلا في تعريف الذره مثلا بفهمه وأحفظه وأتخيل إزاي الذره دي مكونه من إيه وهي عباره عن شحنات إيه كتلتها عامله إزاي فبفكر هي فيها نيترون وبروتون وحواليها إلكترون

فبرسم الموضوع دا على ورقه وارسم دائره واحط فيها شحنه موجبه وأعمل سهم عليها وأكتب دا بروتون و أحط دائره تانيه جواها واكتب دا نيترون (متعادل الشحنه) يبقى عندي شحنه موجبه داخل الذره

وبفكر بعدكدا هلاقي الكتاب بيقولي الذره متعادلة الشحنه هفكر ليه هلاقي إن بيدور حواليها إلكترونات سالبة الشحنة تعادلت مع البروتونات موجبة الشحنة

 

وكل دا أنا معايا الكتاب وبقرأ جزئيه جزئيه وبمسك كل جزئيه إن فهمتها من المدرس أكتب إلي فهمته وإن مفهمتهاش بحاول أفهمها لنفسي وأحاول أفهم إيه المقصود ولو في معادله لازم مع فهمها تتحفظ مينفعش تتفهم بس وكنت قبل لما بروح ساعات كنت بكون معلمه على حاجات واسأل المدرس فيها لإني كنت بتحرج أسأل وسط الدرس

 

 

معلش أنا شرحتلك على أي موضوع أنا مش عارفه إنتي في سنه كام بالضبط (أولى ثانوي)

 

أنا قصدي لو في تجربه وبيقول مثلا أحضرنا كذا ووضعنا كذا وعلى الموقد كذا وهيظهر كذا تخيلي كل دا لو إنتي مش بتدخلي معمل

 

التخيل جزء من الفهم يعني إنتي لو تخيلتي العالم دا فكر في الفكره دي إزاي هتفهمي قصده وممكن ساعتها فهمك يغنيكي عن حفظ الحاجه دي

 

لي عوده بس فكريني إنتي بتاخدي إيه مثلا حتى لو عناوين

 

أنا خريجة كلية علوم -كيمياءحيويه- :ph34r:

[برحمتكـ استغيث 297]

الله شرحك جميل تبارك الله الللهم بارك

انا في تانيه ثانوي بس ازهر

يعني المناهج كلها مقسمة على كل ترم

مش عارفه انتي فاهماني ولا لأ

اقصد يعني السنة الجاية بردوا هندرس كيميا وفيزيا واحياء ورياضة وكلللل حاجة

الله المستعان

بصي بما ان تخصصك كيمياء فأنا هاقولك عالأبواب اللي عندنا

تقريبا احنا عندنا بابين الترم دا وهما:

العناصر الانتقالية

والكيمياء الكهربية

 

احنا حاليا لسه في الباب الأول دا اللي بيتكلم عن عناصر السلسلة الانتقالية الاولى

السكانديوم,التيتانيوم, الفاناديوم,الكروم ,المنجنيز,الحديد ,الكوبلت ,النيكل ,النحاس

اتمنى تكوني افتكرتيهم

وجزاكِ الله كل خير واكرمكِ في الدارين

[ريحانه عبد الرحمن 102]

ربنا يبارك فيكِ ويوفقك يارب

 

افتكرت العناصر الانتقاليه بس إنتوا بتاخدوا كل عنصر لواحده فيه إيه وألا في حاجات معينه

قصدي إنتوا عليكم تعرفوا كل حاجه في كل عنصر

 

بتاخده توزيع العنصر وتفاعلاته واستخداماته ؟ بس وألا في حاجه تانيه

[برحمتكـ استغيث 297]

اه توزيعه وتفاعلاته واستخداماته بس كدا

وبعدين بندخل في الحديد وخواصه وحاجات كتير

الله المستعان

[أمل الأمّة 1093]

اللهم بارك .. ريحانة كثير أعجبني ردك : ) بارك الله فيك وجزاك خيرا ، وبإذن الله كثيرات يستفدن منك.

[ريحانه عبد الرحمن 102]

اللهم بارك .. ريحانة كثير أعجبني ردك : ) بارك الله فيك وجزاك خيرا ، وبإذن الله كثيرات يستفدن منك.

 

وخيرا جزاكِ أمل الغالية وبارك الله فيكِ

[ريحانه عبد الرحمن 102]

حبيبتي آلاء

 

لو في حاجه وقفت معاكي وحبيتي تسألي فيها في الكيمياء أو الأحياء أنا متابعه معاكي

 

أو حاجه معينه مش عارفه تذاكريها إزاي

 

هفكر معاكي

 

ربنا ييسر لكِ ولكل الطالبات يارب ويوفقكن

 

 

وتذكري ( إن الله يحب إذا عمل أحدكم عملا أن يتقنه )