~ يا زهرآت الثانوية ^^ تعالي انتِ وهي ~

[برحمتكـ استغيث 297]

السلام عليكم ورحمة الله وبركاته

كيف الاحوال يا حبيبات؟؟

اسأل الله ان تكونوا جميعا في تمام الصحة والعافية

ومصرنا الحبيبة ايضا :"(

 

الآن اصبحت نفسيتي سيئة للغاية والحمد لله مما يحدث في ببلدنا

وانا مقدمة على الشهادة الثانوية بإذن الله

لدرجة اني لم احجز في اي مادة

ولم احوِّل من معهدي

المهم الحمد لله هذا كله قدر ولعله خير

وربي هو العالم اين الخير لي

انا هنا جئت لأوقظ من نامت مثلي

على الاقل نفسيا

ربما لا يكون هنا الكثيرات في سني ولكن ربما تستفيد ضيفة من كلامي ^^

سأخصص هذا الموضوع بإذن الله لنقل الكلمات التي نصحتني بها الفتيات

وايضا نصائح فتيات اخريات لا اعلمهن ولكن جزاهن الله خيرا في منتديات اخرى

ولن يكون هذا الموضوع للمناقشة

فهناك موضوع الحبيبة ياسمين في هذا الركن للمناقشة

وهذا رابط الموضوع لمن تحب ان تسأل وتجيب احدى الاخوات اللاتي مررن بالتجربة

https://akhawat.islamway.net/forum/index.php?showtopic=313717

 

ارجوا ان لا اثقل على احد بهذا الموضوع

ولكن لما رأيت النصائح الجميلة احببت ان لا ادخرها لنفسي فقط

واحببت ان اشاركها معكن

سأبدأ بإذن الله من المشاركة القادمة

وسأكتب عن كل مشاركة اذا كانت منقولة او واحدة نصحتني

وربما يكون الكلام كثير بعض الشيء ولكنه مفيد

وايضا نحن ليس وراءنا شيء الان فنحن بانتظار نصر الله القريب بإذن الله

وانفراج هذه الازمة

فلنمضيها في قراءة ما يفيدنا

حيث عند دخول هذه السنة اعتقد يعني لن يكون هناك وقت و(خُلق للقراءة)

واعتذر عن عدم تنسيق الموضوع

فسامحنني لعدم توفر امكانية اضافة الصور

[برحمتكـ استغيث 297]

بسم الله الرحمن الرحيم وبه نستعين

هبدأ بالكلمات دي لرفع النفسية شوية

عجبتني اوي

اتفضلوا:

 

الفكــره الاولــى : مـــره واحـــده . . !!

 

تصدق . . انت اتولدت مـره واحــده

 

و هتعيـش مره واحــده

 

و هتمـوت مـره واحـده

 

و كمـــّان هتتحاسب مـره واحــده

 

يعنـى يا صآبت يـا خآبـت . . مـ هى مـره . . !!

 

طب انت دلوقتـى اتولدت . . خلاص شرفتنـــا

 

و بعدين . . ؟!

 

هتعيـش . . افتكر معايا مـّره واحـده

 

بــُص طالمـا انت هتعيش مـره واحـده يبقـى تعالى نحسبها ببساطه

 

الفـرصـه الواحـده . . مش لازم نضيعهـا

 

يعنــى , انت ليه تزعل !! مـ هى حياه واحده

 

طب ليه كمـان تتخاصم !! مـ هى حياه واحـده

 

طب تصدق كمـان انت ليه تحرق فـ اعصابك

 

مـ هى مره واحـده يابنــى . . ليه تقعد تضيع فـ المره دى

 

و تطلع فـ الاخـر فـ المولد بلا حــُمص . . !!!

 

و ليه كمـان متذاكرش . . مـ يوم النتيجه يوم واحـد

 

و هتكون الفـرحه واحـده

 

و ليه كمـان مـ تبقاش مبسوط و فرحـان

 

مـ هى الابتسامـه واحـده

 

يطول شرحـه الموضوع ده . . بس افتكـر انـى قولتلكـّ مـره واحده

 

يمكن كمـان هتقرأ التوبيكـ ده مـره واحـده

 

بس تعالى نفكـرّ مع بعض . . هى مره واحـده فـ آيه . . !!!

 

الوسيلـه . . مره واحده

 

بس النتيجـه مرات كتيييييييييييييييييييييير اوى

 

يعنـى : انت هتدخل امتحـان المـاده مـره واحده

 

و هتنجح مـره واحــده

 

بس هتشوف فرحـه آسرتكـّ كام مره . . !!

 

هتفضل فرحان بنفسكـّ كام مـره . . !!!

 

يمكن هتضغط على نفسكـّ و تتصالح مع الـِ مش بيحبكـّ

 

بس شوف بعد كده هيحترمكـّ كام مـره . . !!

 

يمكــن هتعيش حياتكـّ مـره واحده

 

بس لو عشتهـا صحّ

 

شوف ربنــا هيكأفئكـّ كـام مره . . !!

 

و هيديكـ حقكـّ كـام مــره . . !!

 

يبقـى هى المعادله :

 

مـره واحــده = كـــام مــره . . و آحسبهـا انت بقــى . .

 

 

**************************************************

 

 

الفكـره التانيــه : حــآصر حصاركــّ

 

تخيـل انكـّ فـ قلعه و العدو محاصركـ . . !!

 

بس انت مش عارف تخرج . . يآترى هتخرج ازاى . . !!

 

طبــّق مبدأ . . " حاصر حصاركـّ "

 

مفيش حـل غير انكـ تحـاصره بـ المواجهه

 

نقول تانـى فـ مثل تانـــى :

 

لو انت بتخـاف مـ الضلمــه

 

اقعد فـ الضلمه . . حتى لو النور مـوجود

 

لو بتخاف مـ الكلاب . . آمشى جمبهم و فكر فـ حاجه تانيـه

 

ببساطه هتلاقى نفسكـ مشيت جمبهم

 

هتتفأجا من نفسكـّ . . و مـُمكن تضحك عليها كمـان

 

ده انا كـُنت بخاف مـ الضلمه . . طب مـ انا قاعد فيها اهوو , حصل حـاجه . . ؟!

 

طب مـ انا كـُنت بترعب مـ الكلاب . . طب مـ انا عديت من جمبهم

 

و عملت حسابـى انـى افكر فـ حاجه تانيـه و مخوفتش . . محصليش حـاجه . . !!

 

طب كمـان بتخاف تتكلم قدام النـاس . . او بتخاف ترد عليهم

 

حــآصر حصاركـّ

 

ايووووووه خليكـّ معايا . . حآصر حصاركـّ

 

اتكلم و افرض موضوعكـّ و رآيكـّ . . متخافش

 

هتلاقيهم بيسمعولكـّ . . معملولكش حـاجه . . !!

 

رد عليهم . . و حط رآيكـّ . . بينّ انكـّ موجود

 

آيه ده . . !! , طب مـ انت حلو اهوو و بتعرف تتكلم و ترد كمـان

 

آومـال مالكـّ . ؟! , يبقـى انت كنت حاجه تانيـه

 

حصاركـّ محاصركـّ

 

آيوووووه انت لو مش كـده يبقـى كده

 

يـا آمـا تحاصره يـا آمـا يحاصركـّ

 

بس صدقنــى فـ الحاله الاولى . . انت الكسبان مهمـا خسرت فـ الاول

 

مـُمكن تخاف مـ الضلمه فـ الاول و تقعد فيها ربع ساعه

 

تانـى مره نص ساعه . . تالت مره هتنامـ فيها كمــان . . !!

 

مـُمكن تخاف تمشى فـ الشاره بتاع الكلاب

 

تانـى مره هتقف فـ النص . . تالت مـره هتمشـى ومش هتخاف . . !!

 

يمكـن الناس هتحرجكـّ فـ الاول . . تانـى مره عرفوا انكـّ اتشجعت

 

تالت مـره هياخدو بـ رآيكـّ كمــان . . !!

 

اختـار انت حاجه مـ الـِ اتنين

 

1 - حـآصر حصاركـّ

 

2 - حصاركـّ مـحـآصركـّ

 

و ليكـّ انت القرار . .

 

***********************************************

 

الفكــره الثالثـه : بــُص فـ ساعتكـّ

 

كام الساعـه . . ؟!

 

آى كـانت بـُص تانـى بعد شويه

 

اكيـد هتلاقيها اتغيرت . . !!

 

طب مـ ده طبيعـى . . مـ هى مش ثابتـه

 

يبقـى ازاى تكون انت ثابت فـ حياتك مش بتتغيـر

 

هتلاقيهـا كمان بتتغيـر بـ نظام . . !!

 

يعنـى عـُمرها مـ كانت الساعه 12 و بعديـن فجأه بقت 10 . . !!

 

حتـى فـ التغيير بـ نظام . . !!

 

طب مـ تبـُص لـ نفسكــّ . . و شوفها بعد شويه

 

آتغيرت و لا لسه زى مـ هى . . و لو آتغيرت بنظام . . !!

 

بـُص فـ الساعه . . بـُص على نفسكـّ

 

و طبـّق الـِ فـ الساعه . . على نفسكــّ

 

 

*****************************************

 

التوبيكـّ خلاص خـّلص

 

مـُكون من 3 آفكــار . . فيها افكــار طويله . . و فيها افكـار قصيره

 

آتمنـــى تـكون وصلت كـُل فكــره بـ مضمونهـا و كلمـاتها البسيطـه

 

و آتمنـى انـى مكونش طولت عليكمـّ اوى

 

ربنـــا معاكمـّ جميعـــا

 

 

Yes We Can

[برحمتكـ استغيث 297]

دا موضوع كامل (بتصرف)

لواحدة في كلية طب حاليا

عجبني اوي بردوا

اتمنى تستفادوا منه

 

السلام عليكم ورحمة الله وبركاته

 

بصي يا ستي

دلوقتي انتى داخلة على ثانوية عامة

حاجة هتحدد حاجات كتير اوووووووووى ف حياتك

حاجة ممكن تغير حياتك كلها سواء للأحسن أو للأوحش

حاجة هتحدد مستقبلك كله

الموضوع كبيييييييييير

كبير جداااااااااااااااااااااا ولازم تعرفي حجمه قبل ما تدخليله

 

*****************

 

- أول حاجة و أهم حاجة ومش هوصيكي عليها , الصلاة ثم الصلاة ثم الصلاة , بتفرق فى النفسية 180 درجة بجد

لازم تحافظي عليها مهما حصل , وبلاش تتحججي لنفسك وتقولي المذاكرة ومش المذاكرة , مش بتاخد وقت نهائي أصلا و هتديكي طاقة نفسية رهيبة ....

والله ما هو كلام وبس انا بديكوا تجربة شخصية ان فعلا لما تحسي انك قريبة من ربنا كده قلبك هيتطمن وهتحسي ان ل حاجة سهلة ,

وكلمة قريبة من ربنا دي مش قصدي بيها صلاة وبس طبعا ,

دي ليها مكونات كتير جداااااااااا أكيد كلنا عارفنها , انا بقولك على الأساسيات بس ( الصلاة عماد الدين )

على قد ما تقدري تحافظي عليها على الأقل الفروض الخمسة .

 

- والدتك ووالدك لازم علاقتك بيهم تبقى تمام , أى توتر فى العلاقة هيأثر عليكي واحنا مش عايزين الكلام ده

 

- المذاكرة تبدأ من أول السنة , كلنا قدراتنا بتختلف وفي اللي بيقدر يبدأ متأخر و يلم , بس برضه عمر ما اللي بيبدأ من أول يوم زي اللى بيبدأ من اخر شهر ,

مش هقولك قطعي نفسك واحبسي نفسك فى الاوضة وماتاكليش ولا تشربي و ذاكري بس

بالعكس خالص , طبعا انتى هتبقي بتاخدي دروس ف كلللللل المواد , أهم حاجة تاخدي الدرس من هنا ترجعي تذاكريه على طووووووووول

 

هبقى صريحة معاكوا وهقولكوا انى ماكنتش بعمل كده دايما

و ساعات كنت بأجل المذاكرة لغاية ما معاد الدرس الأسبوع اللى بعده ييجي , بس ندمت انى كنت بعمل كده

 

هقولك على حاجة لما تروحي الدرس وتركزي جداااااا و وتستوعبي الموقف وترجعي تذاكري اللى لسه واخداه الموضوع هيبقى أسهل بكتيييييييييير

و هياخد من وقت قليل اوى اوى اوى يعني هتوفري كمية وقت رهيبة

 

- كل ما المدرسة يقول ان في امتحان لااااااااااااازم تذاكري للامتحان ده , بجد الحكاية دي هتساعدك جداااااااااااا انك تراجعي اللي ذاكرتيه ,

ومذاكري من غير مراجعة تساوي فشل عشان ولا كأنك ذاكرتي حاجة , لازم تراجعي مرة واتنين وعشرة

 

- بلاش أفورة فى الأمور , يعني مش تذاكري 19 ساعة فى اليوم وتقولي ده انا مقظعة نفسي ومابنامش ومش عارفة ايه ,

الكلام ده تشيليه من دماغك خالص واعرفي ان اتر ناس بتفشل هي اللى بتعمل كده

 

- تنامي ال 8 ساعات بتوعك ميزدوش ولا ينقصوا , و تفطري وتتغدي وتتعشي و تاكلي براحتك ,

وف اول 5 شهور عادي جدا اخرجي كمان مع أصحابك كل فترة والتانية بلاش تقفلي على نفسك اووووووووى

 

- نصيحة بقى لوجه الله ودي على فكرة أكبــــــــــــــــــــر حاجة ساعدتي ... شيلي الكمبيوتر أو اللاب توب نهائي , ولو بتفتحي نت من موبايلك اغصبي نفسك انك متفتحيش او متخليش معاكي كريدت أبدا بحيث متفتحيش نت خالص , الموضوع اول اسبوعين هيبقى صعب بعدين ولاااااااااا هتحسي بحاجة هيبقى عادي جدا وهتكوني وفرتي كمية وقت رهيييييييييييييييييييييييبة

(النقطة دي ممكن ناس تقدر وناس ل على حسب التعود)

 

- ماتقولي انا النهاردة كله هذاكر مادة واحدة ... غلط اوووووووووووووووى , خلي اليوم متنوووووووع لفي على كذا مادة فى اليوم

 

- خليكي انسانة طموحة , بلاش شغل الفشل والكسل ده

ولما أقول طموحة يبقى طموحة ف كل حاجة , أهمها الطموح للمعرفة ,

وماتتحججيش وتقولي نظام التعليم فاشل ومعرفش ايه , هو فاشل طبعا بس مش معنى كده ان مستقبل حضرتك يضيع وتدخلي كلية انتى مش عايزاها

ولا حباها لمجرد ان النظام فاشل , الموضوع فى الكلية بيختلف تماما

 

- اتحدي نفسك داااااااااايما و دايما خلي عندك ارادة انك تكسري أرقام قياسية

 

- خلي عندك يقين رهيب ان ايوة انتى تقدري تطلعي من أوائل الثانوية العامة !!! والله الموضوع مش صعب نهائي مجرد محتاج ذكاؤ وتنظيم وقت

 

- افهمي اللى بتاخديه , بلاش نظام يلا نحفظ وخلاص , فى الدرس وهو بيتشرح اسمعي كويس كلام المدرس وافهمي كل حاجة بيقولها ايه

ولو مفهمتيش حاجة اسألي ماتتكسفيش

 

- النصيحة دي بقى مش مقصود بيها حاجة وحشة لا سمح الله

بس لما تختاري مجموعتك مع المدرسين دايما اختاري مجموعة البنات بس

انا ممكن أحلفلك من هنا لبعد بكرة ان الموضوع ده هيفرق جدا جدا جدا

المهم ان لما تبقى المجموعة كلها بنات بس مش هتهتمي اوى بفكرة ان الطرحة مش معدولة لا هتضيعي وقت بتختاري ف لبسك

صدقيني الحكاية هتبقى أسهل بكتييييييييييييييييييير و تركيزك ف الدرس هيبقى أعلى 180 درجة

انا عملت اللي علينا وقلتلكوا

 

- اهتمي بأكلك أوى اوى اوى اوى اوى , الفطار ده حاجة أساسية بجد , وماتكليش كتير فيه !

عشان ماتبقيش تقيلة , كل حاجة بالمعقول حلوة

 

- طبعا مش هوصيكي على مكان مذاكرتك , اختاري أهدى مكان فى البيت ويبقى مقفول , المكتب اللى انتى قاعدة عليه بيفرق , اه والله العظيم بيفرق

اختاري حاجة طولها مناسب و كرسي كويس بحيث قعدتك تبقى مظبوطة و يبقى في شباك يجيبلك هوا

 

- رتبي دايما كتب ومذكرات المواد مع بعضها عشان ماتضيعيش وقت وانتى بتدوري

 

- موبايلك ده يتقفل تماما , صدقيني محدش مهم هيتصل بيكي اصحابك بيرغوا ف اى حاجة

كبري دماغك واقفلي او على الأقل اعمليه سايلنت طول فترة المذاكرة

على حسب قدرة كل واحدة

 

- بلاش تغيري المدرسين كتير , يعني حاولي من الأول تحجزي مع ناس موثوق فيهم وأسامي كويسة , عشان لو قعدتي كل أسبوع تغيري ف المدرسين

هتتلغبطي وتحتاسي ويفوتك كتير

مش قصدي تعدي مع نفس المدرس حتى لو مش عاجبك , قصدي حاولي على قد ما تقدري من الأول تختاري ناس كويسة

 

- نامي بدري واصحي بدري , دي من أهم النصايح اللى ممكن أديهالك , بجد والله العظيم فرق كبييييييييييييير جدا بين المذاكرة الصبح وبالليل , وجربي بنفسك وانتى هتعرفي

 

- اختاري طريقتك المفضلة فى المذاكرة يعني بلاش تقولي لناس تعلمك تذاكري ازاى , مش بعد 16 سنة تعليم ولسه مش عارفة المذاكرة ازاى يعني

 

- ادخلي الكلية اللى انتى عايزاها بس هاتي مجموع يشرف ^^

 

- مكان مذاكرتك ميكونش فيه ااااااااااااى حاجة تشغلك و ده يشمل الحاجات دي ( كمبيوتر , موبايل , مراية )

 

-تحطي جمبك ازازة ماية ديما بحيث متقوميش كل شوية

 

- بلاش الكدب فى الكلام , مش لما حد يقولك اخبار المذاكرة تقولي زفت وقطران وانتى اصلا نازلة دح فى البيت

لما حد يسألك قولي الحمد لله

وعلى فكرة الناس بتكره اوى الناس اللى بتعد تقول ده انا هضييييييييييع وفى الاخر يجيبوا درجات نهائية

ملهاش لازمة نهائي الحكاية دي

ربنا مش بيضيع تعب حد بلاش تفكري فى الحسد والحاجات دي

 

- اؤمني بنفسك وبقدرتك , ايوة والله العظيم انتى تقدري تحققي حاجات انتى ذات نفسك ماتتخيليهاش , اوعى تحبطي نفسك او تقولي انا مقدرش ,

تقدري وووووووووووونص , اتعبي ! أى حاجة حلوة فى الدنيا دي لازم تتعبي علشانها

 

- وانتى بتذاكري ومثلا عندك موضوع 15 صفحة هاتي قلمك السنون أول ما تبدأى و اكتب فووووق ف كل صفحة جملة تشجعية لنفسك ,

مثلا اكتبي " ان شاء الله من الأوائل " او " هكمل يعني هكمل " او " يا انا يا الثانوية العامة "

او " ان شاء الله هفرح ماما وبابا وهخليهم يطيروا من الفرحة " .... الخ الخ الخ ,

كل ما تفتحي صفحة جديدة الجملة اللى انتى كاتباها هتحمسك لحد ما تخلصي مذاكرة

 

- حلي اسئلة كتيييييييييييييييييييييييييييييييييييييييييييييييي ييييييييييييييييييييير ,

كل ما تذاكري موضوع لاااااااااااااااااااااااااااازم تحلي عليه أسئلة الحكاية دي أساسييييييييييييييية ومذاكرة من غير اسئلة تساوي صفر

 

- لما تيجي داخلى على امتحانات حلي كللللللللللللللللللللللللللللللل اسئلة السنين اللى فاتت ف كل المواد , كلها بلا استثناء , و تبقي ماسكة كتاب المادة جمبك ولما سؤال يقف قدامك تفتحي وتشوفيه و تذاكريه تاني , ف الاول هتلاقي نفسك مش عارفة حاجة و بتفتحي الكتاب كل شوية , بعدين هتلاقي انك ماشي زي الصاروخ فى الامتحانات كلها وهتتعودي على جو الامتحان اوووووووووووووى و دي من اهم اهم اهم اهم اهم الحاجات اللى ممكن تعمليها

 

- الخطوة اللى فاتت طبعا ما تبدأيهاش الا لما تكوني مخلصة مذاكرة المادة كلها , يعني عادة بتبدأيها ف اخر شهرين قبل الامتحانات كده

 

- ادي نفسك راحة , يعني مثلا ف الاول كده خدي كل اسبوع يوم راااااااااااحة متعمليش فيه أأأأأى حاجة نهائي ولا تفكري فى المذاكرة أصلا , ومتفتحيش نت عشان لو فتحتيه يوم هترجعي للادمان

اعملي اى حاجة مختلفة ف اليوم ده بحيث تفرفشي شوية بس طبعا مش تغضبي ربنا عشان تفرفشي ^^

 

*********************

 

 

استمتعي ^^

ثانوية عامة الواحد مبيعرفش قيمتها الا بعد ما يسيبها

بجد كانت أصعب و أجمل فترة ف حياتي كلها و أدفع نص عمري و أرجعلها

مع اننا كنا سنتين و كانوا سنتين صعبين جدا جدا جدا ف حياتي بس هيعدوا و هيوحشوكي اووووووووووووى

 

أيام النتيجة كانت أحلى أيام حياتي

بجد السعادة اللى هتبقى عند الناس اللى فى البيت عندك هتنسيكي كل لحظة تعب تعبتيها , يااااااااااه بجد على ده احساس

هتحسي انك حققتي حاجة بجد

و هتقولي الحمد لله انى تعبت و كافحت وقدرت أحقق حاجة

كفاية فخر مامتك وباباكي بيكي بجد

مهما انت الكلية اللى هتدخليها

حتى لو مش محتاجة مجموع

برضه متحرميش نفسك من الاحساس ده ابدااااا

احساس انك تعبتي جامد اووووووووووووى وشوفتي نتيجة تعبك

والله انا مش عارفة أوصفه بكلام

 

مجرد هقولكوا أعملكوا اللى عليكوا وسيبوا الباقي على ربنا والخير هو هيجيبه

 

اه على فكرة انا جايبة 99,8% ف ثانوية

وحاليا انا ف سنة تانية كلية الطب

وبقولكوا كده عشان تثقوا فى اللي بقوله بس

 

ادعوووووولي بقى

 

انتهى

:)

تم تعديل 23 أغسطس, 2013 بواسطة برحمتكـ استغيث

[برحمتكـ استغيث 297]

نصائح اخرى من فتاة اخرى جزاها الله خيرا

 

السلام عليكم

بالنسبه للنصايح اللي اهديكم اياها:

وهي التنظيم ثم التنظيم ثم التنظيم

فى كل حاجة , الانسان المنظم ديما انسان ناجح

وصعب جدا انسان منظم يفشل

فا وانتوا داخلين كدة على 3 ثانوى اول حاجة تكونوا مؤمنين بيها

ان قدرك مكتوب من قبل ما تتولدى ومكتوب هتكونى ايه وباقى حياتك ايه

تانى حاجة متعلقيش حياتك على 3 ثانوى او انك تدخلى طب او خيره

خلى عندك حلم آه , لكن ممكن يجي وممكن لا مش تنطوى على نفسك

وتخوفى نفسك وانك ممكن الحياة تقف لو مدخلتش الكلية اللى انا عازياها

كل قدر ربنا خير وربنا مش هيكتبلك تدخلى غير الاصل ليكي بأذن الله

ثالثا عليكِ بالدعاء الدااائم لله فى كل الصلوات وطبعا لازم تطيعى والديكِ

وتتصدقى على اد ما تقدرى وتقربى من الله

رابعا وده الاهم خليكِ ديما منظمة وماشية بجداول يومية فى مذكرتك

حتى مذاكرة ليلة الامتحان محتاجة جدول

عشان تشوفى هتبتدى تراجعى من ايه لحد ايه الاول

ومن اهم مميزات العمل بالجدول انه بيديكِ امان

هتخلصى امته ويوم ايه والساعة كام كمان

وآخر حاجة احب اقلهلكم انكم تتكلوا على الله وتثقوا فيه

بانه لن يضيع تعبكم ابدا بأذن الله

وخليكوا ديما مؤمنين ان حتى لو متوفقتوش ودخلتوا الكلية اللى نفسكوا فيها

باذن الله ربنا يعوضك فى حاجة تانية فى حياتك

وممكن تدخلى كلية تانية وتتفوقى فيها وتحضرى درسات عليا

وتبقى افضل من اى حد فى طب او هندسة او اى كلية قمة

المهم اى مجال تدخليه تكونى بتحبيه وتتفوقى فيه

واهم حاجة برضوا لو حد طلب مساعدة منك سؤال فى اى مادة

ولا مسالة ساعديه , لان مساعدتك دى هتقفلك بأذن الله

فى مذاكرتك وفى حالك وفى كل حاجة

لكن اوعاكِ من اللى بيسالك ذاكرتى ايه انهرضا وعملتِ ايه انهرضا

اوعاكِ لان مبيسالش بكدة الا وهوا عايزلك سوء

لو تعرضتى للاسئلة دى قولي ادينى بحاول نذاكر ربنا يوفقنا جميعا

لكن لو حد طلب منك مساعدة فى الدراسة متتاخريش

 

وربنا يوفقنا جميعا اللهم آمين

[برحمتكـ استغيث 297]

كلمات مشجعة :)

منقولة طبعا

 

حاجات حلوة كده اهى تشجعنا

* اكتشف القدرات والمواهب التي تتميز بها ثم وظفها في سبيل بناء ذاتك .

 

 

* اعمل بقدر ما تستطيع وابذل ما في وسعك من جهد وطاقة .

 

 

* لا تؤجل عمل اليوم إلى الغد بل سارع إلى تنفيذ أعمالك في أوقاتها .

 

 

* حذار من التسويف والمماطلة فالوقت هو الحياة يجب أن تستغله في العطاء والإنتاج.

 

 

* إياك والكسل والضجر والملل وعليك بالمثابرة والجدية والعمل المتواصل .

 

 

* استوعب حقائق الحياة الكبرى واطلع على قوانينها وأسرارها وسننها .

 

 

* استفد من تجارب الآخرين فإن في التجارب علما مستحدثا .

 

 

* قاوم الشهوات والغرائز والأهواء التي تقبع في داخلك بالعقل والإرادة والترشيد .

 

 

* لا تستسلم للإحباطات والإخفاقات بل حول إخفاقاتك إلى دروس عملية تتعلم منها كيفية النجاح .

 

 

* لا تكن ضعيفا أمام المشكلات والعقبات وأعلم بأن طريق العظمة مزروع بالأشواك والمشاق .

 

 

* خطط لحياتك بطريقة علمية ولا تجعل الأمور هكذا بل اجعلها تسير كما خططت .

 

 

* اطلع على حياة العظماء واقرأ سيرتهم وتعرف أسرارهم واطلع على مذكراتهم ففي حياتهم الكثير من الدروس والعبر .

 

 

* صادق العظماء وتعلم من تجاربهم في الحياة .

 

 

* ثق بنفسك وتأكد من أنك لست أقل قدرا من الآخرين .

 

 

* استثمر الفرص التي تمر عليك فإن الفرص تمر مر السحاب .

 

 

* ابتعد عن التوافه ولا تشغل نفسك بسفاسف الأمور وعليك الاهتمام بمعالي الأمور .

 

 

* فكر قبل الإقدام على أي عمل ثم اعمل ولا تعمل ثم تفكر .

 

 

* عش في الحاضر ولا تندم على الماضي وخطط من أجل المستقبل .

 

 

* تعاون مع الآخرين فإنك لا تعيش في عالم وحدك والتعاون هو طريق التكامل .

 

 

* اعتن بصحتك العامة ولا تفرط فيها فإنها أغلى من الذهب .

 

 

* اعتمد على الله ثم على نفسك في كل شيء ولا تكن اتكاليا على الغير .

 

 

* لا تجعل لطموحك سقفا ولكن الأفضل أن يكون طموحك ضمن استراتيجية معينة .

 

 

* احرص دائما على أن تشجع نفسك بنفسك ولا تنتظر من يشجعك .

 

 

* لا تتردد في اتخاذ قراراتك وإذا اتخذت قرارا فاحرص على تنفيذه .

 

 

* ثق بنفسك فأنت تملك كغيرك كل عوامل النجاح والسعادة إن شاء الله .

 

 

* لا تفقد الأمل فمهما طال الليل ، فلا بد من شروق الشمس .

 

 

* أعرف الأولويات واعمل على تحقيقها أولا .

 

 

* لا تغضب واحتفظ بهدوئك في تعاملاتك مع الناس

 

 

 

وأخيرا واصل لعمل لاتتوقف إلا في نهاية الطريق صمم على تحقيق هدافك …

لا تنهزم في معركة الحياة ..

استقم حتى تصبح عظيما

[ذليلة إلى اللـَّـه 417]

وعليكم السلام ورحمة الله وبركاته

 

الموضوع أكثر من ممتاز

فكرة رائعة فعلاا جداا جداااااا جدااااااا جدااااااااا

 

جزاك الله خير يا حبيبتي

ووفقك الله وكل طلبة وطلاب المسلمين

 

لن أزيد عما قالته تلك المقالات البارعة

فقط أحب التأكيد على شيء بسيط

 

إن الثانوية الكل يدخلها وهو ينوي أن يحصل على درجات عالية بنسبة 100 % من الطلبة

ثم بعد شهرين يصبح من ينوي ويستمر في الصمود والمثابرة 80 %

وبعدها 50 %

والقليل من يستمر في المثابرة والصمود والاستذكار بجد حتى النهاية وهذآ هو الفرق وهؤلاء من ينجزون بإذن الله

 

لكل حبيبة تدخل الثانوية ,,,لا تدعي همتك تثبط مطلقا

بالتأكيد ستقابلين صعوبات وتواجهين مشكلات

بالتأكيد ستشعرين بملل وفتور وتريدين الخلاص والانتهاء

 

تذكري أنه من أراد أن يتميز ويصبح مميز عليه أن يتميز أي يختلف

فالتميز في اللغة هو الاختلاف

 

عليك ان تثابري وتصمدي على الكتاب

وبالتدريج لا مذاكرة كثيرة في البداية

ولكن التركيز التركيز التركيز

 

ركزن جيدا على محاولة استيعاب وفهم المادة

وخااااصة المواد العلمية

وحقا ستشعرون بفارق هااااااائل بين مستوى الطالب الحافظ عن غير فهم والحافظ عن فهم

وللعلم إن كل امتحان ثانوية تكون في نقاط تميز وتلك ما يكون يتميز فيها بفضل الله ,,الطالب الفاهم

 

فركزن على الاستيعاب والفهم من المدرس واسألن جيدا ولا تتركن أي نقطة في الكتاب بدون قرآءة

فكثيرا ما تكون الامتحانات عن اسئلة بين سطور وكذلك ركزن جيدا على الحل والتطبيق وخصوصا من السنوات السابقة

 

قد تواجهين مشكلة

مادة لا تحبينها وتكرهين دراستها

اتبعي المقول التي تقول " حب ما تعمل حتى تعمل ما تحب "

ضعي امامك هدفا نصب عينيك دائما بإذن الله

هو - سأرض ربي بإن الله

- سأعمل جاهدة لأجل أبي وأمي

- سأجتهد حتى تكون لي مكانة

- سأجتهد حتى أنفي عن نفسي الكسل والخمول

- سأجتهد حتى أثبت نفسي الملتزمة

- سأجتهد حتى أنال مجال عمل متميز بإذن الله [كلية جيدة]

 

وعندها ستحبين المادة جدا ان شاء الله

وحاولي اقناع نفسك انك تستطيعين

yes we can

تلك الكلمة قالها زعيم امريكي

لكن هي رائعة بمعنى الكلمة تطبيقها

نعم تستطيعين بحول الله

 

ونقطة ايضا مهمة جدا

لا تقولي انا فاشلة ,,المواد صعبة عليّ ,,,لن أفهمها ,,الفيزياء عقدة ,,, الاحياء مصيبة ,, انا حمقاء

كل تلك الكلمات امسحيها من قاموس حياتك

" الشيطان يعدكم الفقر "

 

 

" اللهُ وليُّ الذين آمنوا يخرجهم من الظلمات إلى النور "

 

الله وليك

توكلي عليه

بإذن الله ,,انت قدّها وتستطيعين فهمها

مرة ومرة ومرة ومرة

مراجعة بعد مراجعة

تجدي نفسك متقنة

 

سبل المذاكرة لن امليها عليك فبالطبع تجيدينها بإذن الله ,من خلال خبرتك

تذكّري الله كلما تفتحين كتابا

تذكري أنها عبادة لله فحسب

 

دعي عنك كل ما يقول انك لا تستطيعين

ومن استطاعوا ونجحوا ليسوا يزيدون عنك بشيء

بشر مثلنا يأكلون ويشربون كما نفعل

لكنهم اتسموا بالصمود والاصرار والثبات

 

وضعوا هدفا وهو التفوق بإذن الله وسعوا لتحقيقه

في طريقهم اليه قابلهم عوائق فلم ينتبهوا لها

عوائق مثل الخوف من الفشل -- القلق --- الصعوبة --- الاصدقاء --- التلفاز --- النوم الكثير الزائد عن الحد

لم يلتفتوا ولم يتعطلوا بفضل الله

 

تذكري كلما ضاقت بك السبل

ان تلجأي إلى الله

وترتاحي من الدراسة ولو لساعة ترفيه حلال ستجدين فرقا شاسعا بإذن الله

 

والعبرة بالتحصيل الدراسي

ليست بمجرد حفظ لأن الحفظ سينسى

لكن الحفظ بالاستيعاب والتحصيل وتشرب المادة سيميزك بإذن الله

 

أعلم ان الكلام غير مرتب والافكار غير مرتبطة وغير متماسكة

لكن كل ما جاء في بالي كتبته

وعندما أتذكر شيء آتي أكتبه بإذن الله

[برحمتكـ استغيث 297]

@ذليلة إلى اللـَّـه

 

بجد بجد جزااااااااكِ الله كل خير

ومع ان الكلمات التي نقلتها فادتني بالفعل الا ان كلماتك افادتها اكثر بكثييير

اكرمكِ الله ووفقكِ في كليتكِ ياااااارب

وانتِ اول من سأبشرهن بإذن الله بالمجموع ^^

انقل الى هنا كلماتكِ التي كتبتها لي في ملفي :)

ومعاها كمان هدية كلام الحبيبة دعاء الكروان

 

• 
   
  آلآء الله
   
  ربنا يوفقك اطمني خالص وما تشديش اعصابك انا كانت اعصابي مشدودة وتعبت نفسي على الفاضي وفي الاخر اكتشفت بفضل الله انه مالوش لازمة التوتر وكده وكانت الاخوات من هنا في المنتدى بيساعدوني جدا برضه بفضل الله مثل الاخت بنت ام عبد والاخت دعاء الكروان والاخت حفيدة الانبياء فلو تسأليهم برضه تستفيدي من نصائحهم الذهبية
  Jul 20 2013 06:55 PM
  
• 
   
  آلآء الله
  فاطمني المهم تذاكري اللي عليك وتحاولي تفهمي المناهج كويس وتحفظيها كويس
  وبإذن الله تجيبي اعلى الدرجات ^_____^
  موضوع الحجز ده ما تقلقيش بسببه برضه كان قالقني لكن المهم تستشيري الاكبر منك في منطقتك عن المدرسين وكده وتختاري الانسب والاقرب ولا تختاري حد بعيد عن البيت الا للضرورة القصوى
   
  Jul 20 2013 06:56 PM
  
• 
   
  آلآء الله
  واختاري مدرسين خبرة عارفة مش شرط مدرسات يعني والله أعلم ,,لا اعرف رأيي صح ولا غلط
  لكن طالما اخترتي مدرسين عندهم خبرة كبيرة وطلبة كثير جابوا درجات نهائية وشايفين شغلهم كويس وقريبين من البيت فليه مش تروحيلهم
  وأكيد هتلاقي ان شاء الله لإن المدرسين كثير جدا بفضل الله
  خذي من اول السنة اجتهاد وحفظ اول بأول ومراجعة وماتشديش على نفسك في الأول خاااااالص ولا تحفظي زيادة ولا مجهود اكبر من اللي بتتحمليه علشان ما تتعبيش على نص السنة
  Jul 20 2013 06:58 PM
  
• 
   
  آلآء الله
  وفترة المراجعة بقى إن شآء الله
  يبقى ضاعفي المجهود او كثفيه يعني وراجعي وكده
  لكن المهم ما تتعبيش نفسك من اول السنة واكرر على النقطة دي علشان كانت هتضيعني ^_^
  ولو اي حاجة في اي مادة عايزة تسألي عنها انا تحت امرك إن شآء الله
  Jul 20 2013 06:59 PM
  

• 
   
  دعاء الكروان3294
   
  رربنا يوفقك يا ألاء يارب و ييسرلك كل عسير يا حبي :)
  متقلقيش والله اهم شيء النية الصادقة انك تنوي انك بتدرسي عشان العلم قوة و المؤمن القوي خير من المؤمن الضعيف
  وكمان عشان تدخلي السرور على أهلك
  و كفاية رغبتك انك تساعدي غيرك بعد ما تتعلمي و تفيدي الناس
  والله ان شاء الله ربنا هيباركلك بكل هذه النوايا
  
  • 
     
    آلآء الله
    الله يكرمك يا عسل ويبارك فيك
    معلش انتباه بسيط
    فيه طلبه كثير -معظم الطلبة - بيترعبوا ا...
    Jul 22 2013 06:18 AM
    
  • 
     
    آلآء الله
    - بيترعبوا ايام التنسيق يخافوا هيلحقوا الكلية اللي عايزينها ولا لأ
    وممكن ما يلحقوه...
    Jul 22 2013 06:18 AM
    
  • 
     
    آلآء الله
    وممكن ما يلحقوهاش على نصف درجة وطبعا دي اقدار
    بس تعملي حسابك طول السنة انك حاطة قدامك هدف ابتغاء وجه الله
    لان المؤمن القوي خير وأحب عند الله من المؤمن الضعيف
    Jul 22 2013 06:19 AM
    
  • 
     
    آلآء الله
    اما تكوني بإذن الله متفوقة تكوني ممكنة وتكوني قوية في مكانة متميزة بإذن الله وكلية كويسة
    وكمان علشان لإن لا شيء بلا ثمن و لا ثمار بلا زرع فيجب أن تزرعي طوال السنة بمذاكرة اللي عليك والاجتهاد بدون غلو ومبالغة في المذاكرة اللي بتتعب الاعصاب لاني صدقيني بجد مالهاش لازمة نهائي
    Jul 22 2013 06:19 AM
    
  • 
     
    آلآء الله
     
    لكن بالتوكل على الله وتحطي قدامك رضى ربنا
    والتقرب إلى الله برضى الوالدين والعمل للدين
    والتمكين في الارض
    في زمن الملتزم فيه بيقولوا دراويش لا يفقهون شيئا
    بل اثبتي باخلاقك وتميزك ان شاء الله
    وقولي في نفسك ذاتي ليست شيئا أنا أمة الله فحسب
    "إن الله اشترى من المؤمنين أنفسهم وأموالهم بأن لهم الجنة "
    جهاد المذاكرة برضه يكون في سبيل الله
    وكل هدف دنيوي نخليه ابتغاء وجه الله بإذنه
    Jul 22 2013 06:21 AM
    
    • 
       
      آلآء الله
      معلش تنبيه بسيط كمان معلش
      في النص كده او على الاخر هتلاقي فتوووور وكسسسل وخنقه من كل حاجة
      هتبقى تعبتي بقالك كثير وفاضل على الامتحانات مثلا شهرين ولا حاجة
      تعملي ايه بقى؟
      حطي في بطنك بطيخة صيفة >> على حساب دعاء الكروان نياااااهاهاهاهاهاه
      احم
      اقصد ريحي نفسك وقتها شوية وليكن نصف يوم مثلا في زيارة عائلية
      في جلسة مع والدك ارتياااااح من الدراسة
      في تسلية بسيطة يوم على الأكثر
      Jul 22 2013 06:25 AM
      
    • 
       
      آلآء الله
      وبعد كده ابدأي اللي عليك وبس
      خلصيه وخلاص
      واشحني الهمة
      لحد بإذن الله
      فترة المراجعة تفضي البطارية بقى ^_______^
      وتبذلي ما تستطيعين وليس أكثر ما تستطيعين أبداااا
      وخذي بالك اوووووي من التركيز والفهم
      اكثر من الحفظ لانه مهم جدا ودي اسئلة التميز اخر السنة
      والطالب المتمكن بإذن الله وفضله بيكون مستوعب المادة
      Jul 22 2013 06:26 AM
      
    • 
       
      آلآء الله
      ومعلش معلش معلش تنبيه كمان معلش سامحيني
      ممكن تقابلك حاجات جديدة حبتين صعبة 3 حبات
      بس ما تقلقيش ولا تترعبي زي ما كنت بعمل احيانا ^______^
      حاولي معاها مرة واثنين وثلاثة براحتك خالص
      وبعدين الحاجات الصعبة دي هي اللي بتميز فكوني متميزة فيها بإذن الله دون اهمال الباقي
      Jul 22 2013 06:27 AM
      
    • 
       
      آلآء الله
      كان استاذ الاحياء بتاعنا-- الله يصبحه بالخير--
      كان اما ييجي عندنا حتة رخمة في المنهج ولا حاجة صعبة يقولنافيمضمون كلامه
      في طلبة فاهمين الحاجات دي وحافظينها ولو السؤال ده جه هيتميزوا
      فلازم نحفظها كويس يعني لان الطلبة دول مش احسن مننا بفضل الله
      >>وبيني وبينك لازم نكون متميزين لإننا نمثل الالتزام بالدين بفضل الله في المجتمع البسيط (الدرس )
      Jul 22 2013 06:29 AM
      
    • 
       
      آلآء الله
      ولو وقفت قدامك - لاقدر الله -اي اي اي اي اي اي اي اي اي اي اي حاجة
      اسألي العبد لله ^_^ ويآرب يقدرني واكون لسه فاكرة الحاجات دي (:
      Jul 22 2013 06:30 AM
      
    • 
       
      آلآء الله
      تذكري بقى
      الاعمال الخفية بينك وبين الله
      كالصدقة في السر والتبرع لجهة مثلا موثوق فيها او اخذ نسبة ثابتة من مصروف يومك كل شهر لمن يحتاج
      أو القيام الليل بالسر في تذلل وافتقار وتوكل على الله تاااام في كل امور الحياة
      او تلاوة ورد يومي من القرآن وختمه بصورة مستمرة طوال العام متواصل بإذن الله
      Jul 22 2013 06:32 AM
      
    • 
       
      آلآء الله
      بجد بجد بجد اقولها بكل صراحة
      اللي وفقني كان ربنا وفضل ربنا عليا
      لا بقولك علشان انا كذا وكذا وكذا أستغفر الله
      بل كل فضل ومنة علينا كلنا هي من ربنا سبحانه وتعالى
      فالجأي إليه أن يمن عليك ويرزقك من حيث لا تحتسبين والعلم رزق
      "اتقوا الله ويعلمكم الله"
      وحل الاسئلة رزق
      والذكاء رزق
      والحفظ رزق
      والعقل رزق
       
      Jul 22 2013 06:33 AM
      
    • 
       
      آلآء الله
      وارزاقنا بيد الله سبحانه وتعالى
      علينا اليقين فيما يد الله والزهد فيما نمتلكه فلا حول لنا ولا قوة
      لأنه لا حول ولا قوة إلا بالله
      الله وحده هو المستعان
      Jul 22 2013 06:34 AM
      
    • 
       
      آلآء الله
      وعلى فكرة حاجة كنت اتعلمتها بفضل الله
      ,من الاخت دعاء الكروان
      كانت بتقول انها كانت ب...
      Jul 22 2013 06:37 AM
      
    • 
       
      آلآء الله
      ^__________^ الرد طار لعله خير ان شاء الله
      كان خلاصته بتقول
      ان العبرة بالتحصيل الدراسي مش بكثرة اعداد المذاكرة
      المهم التوكل على الله اولا واخيرا وقبل كل شيء
      بان يعينك على الفهم والحفظ والتحصيل الغزير بإذنه وفضله وكرمه
       
      Jul 22 2013 06:38 AM
      
    • 
       
      آلآء الله
      وعلى فكرة
      حاجة قالتهالي زميلة عزيزة كانت
      بمركز متميز على المحافظة بسم الله ما شاء الله
      قالت إن اللي وفقها وغيره
      كان توفيق ربنا
      يعني سبحان الله ,,
      اناادرك البنت تبارك الله كانت بتذاكر وتجتهد قد ايه
      لكن سبحان الله
      ,ما وفقها وجعلها تجيب مجموع متميز ليس كثرة المذاكرة
      ولكن توفيق الله
      فتوفيق الله الذي يجعل المذاكرة تثبت في الدماغ
      وتظل على الذاكرة لفترة طويلة
      وهي التي تجعل بفضل الله التحصيل الدراسي اعلى
       
      Jul 22 2013 06:40 AM
      
    • 
       
      آلآء الله
      أعتذر على كثرة الكلام والاطااااااااااااالة الفظيييييييييييييييييعة
      لكن سامحيني ^_^
       
      Jul 22 2013 06:41 AM
      
    • 
       
      آلآء الله
       
      معلش بقى تنويه بسيط >>> بس ما تضربيش ماشي معلش
      ركزي اوي اوي اوي على DNA
      وبإذن الله يبقى ناقشيه معايا برضه
      اذا أردتي يعني لإنه مهم جداااااا في الاحياء
      وفي الفيزياء عندكم كهرباء وحديثة
      والاثنين بفضل الله كنت بحبهم جدا
      اكثر من الحاجات العقيمة اللي في الاول
      فحبيهم انتي برضه مع نفسك بإذن الله وخذيهم على رواقة
      واستيعاب وحفظ الحاجات المطلوبة بإذن الله
      Jul 22 2013 06:46 AM
      

[ملاذ الفرح 292]

يااااااااااااا في ناس أصغر مني في المنتدى ذذذ

الله يعينك أنا لسة طالعة من الثانوية :)

الله يوفقك ويفرحك بدرجة عالية، لا تجعلي الظروف عائق في طريق نجاحك، أعرف الكثير من الأخوات عانوا من ظروف سيئة ولكن أكملوا

فما أسوأ من مقتل الأب في فترة الثانوية؟ أو اصابته ونقله إلى المستشفى؟ ولكنهم الحمد لله أكملوا فلا تيأسي -تجارب واقعية من المعارف-

[برحمتكـ استغيث 297]

@@ملاذ الفرح

 

اللهم آآمين

جزاكِ الله خيرا

وربنا يوفقك ياااااارب

 

 

السلام عليكم يا بنات

بصوا دي واحدة صحبتي جدا ربنا يخليهالي ياارب ويوفقها

هي اكبر مني بسنة وكانت معايا ف باص المعهد :(

وخلاص مش هتبقى معايا تاني

الحمد لله

لعله خير يقى

المهم هنقللكم كلامه الي كتبتهولي

وللعلم الكلام هتلاقوا فيه كلام كتير يتعلق بمواد الازهر وكدا

ودا كلام ف الاول عن اختيارها لكلية شريعة وقانون وهي ماشاء الله جايبة 96.8 تقريبا على ما اذكر

المهم هي في ادبي واعلى حاجة ف ادبي ازهر لغات وترجمة انجليزي ففي كلامها دا بتقولي هي ليه اختارت الكلية دي بالذات:

 

بصي بالرغم من كله بيقعد يقوللي لغات وبتاع بس انا مش مقتنعة بيها ..

عايزة حاجة مميزة مش اي حاجة بمجموع كبير وخلاص وخسارة مجموعك والكلام ده ..

أنا عايزة استفيد بالأزهر وابقى مميزة عن العاديين ..

لو دخلت كلية لغات ممكن اعدي بس هخرج مش زي ما تمنيت ..

عادية ..

اللغات على قفا من يشيل

إلى جانب إن فيه حاجات برة تمسحنا باستيكة زي auc miu guc

والسن وخلافه هبقى مطولتش اي حاجة ومستفتدش بالدراسة الشرعية كما ينبغى

واللي هي اهم حاجة ف الازهر

لغات وترجمة كمان دفعاتها كبيرة جدا جدا

وده من اكبر الحاجات اللي تعيب الكلية

اي كلية اصلا كان ممكن اختار اصول دين وخلافه

بس بردو على قفا من يشيل .. عايزة حاجة متميزة اقدر اظهر فيها ..

فكرت ف شريعة خصوصا إن تفكير البنات فيها محدود حسيتها الانسب

ودراستها ممتعة بدرجة كبيرة وغير تقليدية وتفتح مخك انا اصلا ادبي

كان ممكن افكر زي اي حد فكر وقعدوا يقولولي ادبي لييه خليكي علمي

وادبي بتاع الخايبين خليكي دكتورة وبتاع والكلام المتخلف ده

بس انا ببساطة بصيت لقدراتي وميولي

والحمد لله استخرت ربنا وإلى الان استشعر الرضا بكامله كل ما فكرت ف اختياري

كذلك مش حابة اكون زي ما الناس بتعمل مجموع كبير يبقى ادخلي الكلية العالية وخلاص

انا بستخدم مجموعي وسيلة مش اكتر . . مش هو اللي بيمشيني

 

اللغات ممكن احصل عليها كورس محترم

وبموهبتك ضربتي خريجي الجامعات

فيه حاجات من العلوم منحصلش عليها إلابالدراسة

 

<<هنا بتتكلم على ان الناس بتقولها يعني ازاي تدخلي ادبي وهي ما شاء الله ممتازة وكدا:

 

عايزة اقولك ادبي نفس الحوار

 

قعدوا يقولولي ده بتاع الخايبين

ايه اللي دخلك ادبي

 

مش قادرين يفهموا

 

انا ميولي ادبية عقليتي مش رياضية يا بشر .. الموضوع مش مسطرة شاطرة تدخل ادبي

 

لو كنت دخلت علمي زي ناس كتير من صحابي ملهمش فيه مكنتش طلت حاجة

 

الحمد لله يا رب اولا .. بابا ثانيا بردو وقف جنبي

 

زي اي بنت صغيرة كان ممكن اسمع كلام صحابي كلهم ف علمي وبتاع

والله بنات كتيرة

 

افتكرت انها عشان شاطرة تدخل علمي

 

مبصتش لميولها

انا واثقة انها لو كانت ادبي كانت طلعت من الاوائل

 

بس مطالتش حاجة للاسف

 

ما هو الواحد يحلم على اد امكانياته

لو سمكة فضلت تحلم بانها تطير هتفضل طول عمرها عاجزة حتى عن العوم

 

>>>وهنا بقى النصايح اللي كانت ليا ^^ :

 

إنتي اعملي اللي عليكي بس

 

وذاكري بذكاء

بذكاء مش مجهود عالفاضي

بصي يعني تظبطي مجهودك في المفيد

 

مش دح وخلاص

 

كتب المدرسة دي تراجعي اسئلتها جامد

 

لو هتذاكري من المرشد يبقى تراجعي من كتاب المدرسة في اول مرة مذاكرة

 

عشان لو حاجة ناقصة تزوديها بإيديكي

 

بعد ما تخلصي المنهج مذكرة بافكاره كلها تفكرك بيه متقعش منك حتة

عشان تبصي عليها ليلة الامتحان متاخدش منك وقت

كنت مثلا بلاقي المرشد مزود رواة وتعريفهم من عنده

 

اراجع بكتاب المدرسة

 

اللي مش موجود فيه مذاكرهوش

 

ودروس كذلك

 

المرشد كان بيزود

 

مذاكرهوش

 

حاجات بتبقى ف نص الصفحة بيحطها هو هامش

 

اذاكرها كويس

انتي مطالبة بكتاب المدرسة بس

ومحدش له عندك حاجة غير كده

فمالموضوع مش ناقص مجهود

اقسملك بالله الامتحانات صيغة اسئلتها حتى

 

نفس ما محطوطة فالكتاب

يعني مثلا الكتاب كاتب ويرجع سبب نقص استهلاك اللحوم في العقدين الآخرين إلى كذا وكذا

يقول يقولك بم تفسر نقص استهلاك اللحوم في العقدين الآخرين

 

ميغيرش في طريقة السؤال

ده بالنسبة للمواد الحفظ

 

(تقصد الادبية والشرعية للازهريين)

كده باذن الله انتي ضمناها

اما العلمي

 

فاتمكني من المنهج

 

وحافظي على اعصابك وثقي بنفسك

 

التركيز في اللجنة نص الزتونة

 

متتاثريش بكلام صحابك

 

ولا بطرق مذاكرتهم

 

ولا بانطباعهم عن المنهج

 

الا اللي بتثقي فيهم

والواحد مش ناقص مشاعر سلبية اصلا

ياما عانيت من الموضوع ده

 

كنت بحس باهتزاز

 

وبتأنيب ضمير

 

بس الحمد لله

مأثرش عليا

 

برغم اني أثر عليا نفسيا

ودخلني في صراعات نفسية

 

اصل حتى لو نقلتي

 

هتلاقي كتير من كده ف كل حتة

 

انتي شطارتك بقى

 

تقضي معاهم وقت

 

مبقولكيش دحي وابعدي عنهم

 

لا قضي معاهم وقت عادي

 

بس عند مذاكرتك واستوب

 

الا لو واحدة قريبة منك جدا

 

دي خلاصة خبرتي والله في موضوع الصحاب ده انا شفت العجب

 

وتخرجي من الامتحان متقوليش لحد انتي حلة ايه

 

ممكن تراجعي مع المستر بتاعك لو حبة

 

بس لو المراجعة مش هتاثر عليكي

 

انما صحابك المراجعة هتاثر مش هتاثر لأ

اوعي تراجعي مع صحابك

 

ممكن مع مدرسك لو المراجعة مش هتاثر عليكي

 

واوعي اول امتحان لا قدر الله يوقعك ف الباقي

 

والله فيه امتحانا انا شخبطت فيه

 

وكنت متوقعة هجيب درجة مش اوي

 

بس كنت مجاوبة صح

 

ولما خرجت اراجع اجابات صحابي تحسي انك غلطانة

 

وانك مش مذاكرة

 

جبت فيه 40

 

المنطق ده

هتكتشفي السنادي كل صحابك

 

انا مبقولكيش خاصميهم

بس خذي حذرك

 

كل واحدة هتجري ورا مصلحتها بطريقة اوفر

 

وانتي هتكوني مش متوقعة كده

 

فالسنة مش حمل صدامات

 

خليكي ضيف ظريف عليهم

 

فالهزار دوسي

 

روحي عن نفسك

 

فالمذاكرة الحمد لله يا جماعة

 

تقولك ده الفيزيا صعبة

 

قوليلها الله المستعان

 

انتي عملتي فيها ايه ذاكرتي

 

قوليلها بذاكر اهو بس مستعصية عليا

 

متخزيش العين وتكدبي من الباب للطاقة

 

وف نفس الوقت المؤمن كيس فطن

والله السنادي هتشوفي الكلام ده مهم جدا

بصي مفيش مانع كل واحد يجري ورا مصلحته

 

حقه

 

بس انتي بردو مصلحتك

 

وف نفس الوقت انتي مش هتاذي حد

 

انتي بس هتحافظي على نفسك من اي نفس مريضة

 

كله بالعقل كويس

فزي ما بقولك

 

انتي مش هتعملي زيهم

 

انتي بس هتحافظي على نفسك

داومي عالاذكار

 

وزي ما قلتلك مجهودك بذكاء

 

متغيريش ملازم مذاكرتك

 

مكان واحد تذاكري منه

 

مش كل مدرس يعملك ملخص تغيري طريقتك

يعني كتاب المدرسة هو الاضمن

يا بنتي انا اخدت ملازم بديني

 

ولا بسأل فيها

 

ما دام مذاكرة من كتاب المدرسة خلاص

 

الحمد لله

 

وجت الامتحانات كلها زي الفل

 

موقعش مني اي حاجة

 

غير ف الحديث بس خطأ مني

 

مراجعتش الدرس

 

من الكتاب مع المرشد

 

وملازم هتاخديها للآخرة

 

بس اتمسكي بحاجتك

 

وبعد ما تخلصي المادة تلخصي افكار المنهج كله

 

بحيث اول ما تمسكيها تفتكري المنهج

مثلا الدرس الاول

 

نقطة التعريف بكذا

 

نقطة كيف كذا

 

كل نقاط الدرس ملمومة بس بدون تفاصيل

 

يعني مش هتعملي سؤال واجابة زي المرشد مثلا

 

لا فكرة كل فقرة تفتكري بيها اللي تحت

والله ليلة الامتحان بلم المنهج كله الحمد لله

لو حاجة نسيتها برجع للكتاب

 

الطريقة اللي تريحك

 

المهم حاجة تفكرك بالمنهج وتختصر الوقت

 

مراجعة بس

 

انتي هتبقى ذاكرتي باذن الله

 

مش هتقعدي ليلة الامتحان تصمي وتحفظي

 

تصحي بدري

 

وتنامي بدري

 

احسن طريقة للاستفادة من اليوم

 

بس وهنا انتهت النصايح

اتمنى تستفيدوا منها يا حبيباتي

واستنوني مع بقية النقولات بإذن الله ^^

تم تعديل 24 أغسطس, 2013 بواسطة برحمتكـ استغيث