جـــه ... ماجاش ... أديــنا قاعديــــــن !!

[أم لبابة بنت أحمد محمد 172]

وحشتوني يا أحلى بنات

 

 

- جـــه ... ماجاش ... أديــنا قاعديــــــن !!

 

 

= هو مين ده اللي ...

جـــه ... ماجاش ... أديــنا قاعديــــــن !!

؟؟؟

 

- وهل يخفى القمر ؟

 

أكيد العريـــــــس هو القمر

 

قمر الليالي اللي بيسهرني بالليل

أحلم به

وبشكله

وبكلامـــــــــه

و بـــ.......

 

= خلااااص استووووب

 

- قمر الليالي اللي يصلي معايا قيام الليل ويعينني على الطاعة

 

= ما قلنا ستوووووب

 

 

فطرة وطبيعي جدا البنت في سن الزواج تفكر في الزواج ..

و إلا ما تبقاش طبيعية !!

 

XX بس اللي مش طبيعي >> التفكير الزيادة XX

اللي بيخلي البنت ماتتصورش السعادة إلا في الزواج

ما تتخيلش طعم الحياة ولا لذة الطاعة إلا لو كانت مع زوجها "المستقبلي"

 

وده طبعا أكبر سكينة بتحز بها قلبها بالبطئ !

 

وماتقولش لنفسها الموضوع ده تسالي .. دي مجرد أحلام يقظة مسيري أصحى منها

 

لكن الفكرة أنك بتضعفي طاقة قلبك لأنك بتحمليه فوق طاقته

 

روشتة العلاج في كلمتين:

الانشغال + الالتزام

هم اللي بيضبطوا موضوع التفكير الزيادة

 

الانشغال >>> معلوم أن وقت الفراغ اللي هتفكري فيه في موضوع الزواج ..هيتملي بالتفكير في الحاجات اللي مشغولة بها

 

الالتزام >>> هيخلي جواكي سكينة وطمأنينة أن الرزق هيجي في وقته بإذن الله ..

 

ولو ماجاش بقى ؟؟؟؟

افتكري الجملة اللي كنا واحنا صغيرين نقولها:

وعايزاكي تقوليها بأكبر ابتسامة

جـــه ... ماجاش ... أديــنا قاعديــــــن !!

 

 

بس قاعدين بنعبد ربنا .. مشغولين بطاعته

 

والله فعلا بعد الزواج الواحد بيتحسر على حاجات كتير كان نفسه يخلصها قبل الزواج

 

اشغلي نفسك بدراسة علم شرعي .. حفظ القرآن .. الاشتراك في جمعيات خيرية أو نشاطات تبع المسجد

 

بجد هتحسي أن حياتك لها معنى و هدف وهيقل التفكير كتير

 

وتيقني..

اللي بيشتغل لربنا .. ربنا بيفتح عليه أبواب فضله

واللي بيطمع في ربنا .. ربنا بيرزقه من غير حساب

 

بس طبعا تكون النية الشغل لربنا مش لحاجة تانية

 

حاجة كمان نسيت أقولها .. الواحد مش ضامن عمره .. فلما يموت وهو في الطريق خير من أنه يموت وهو لسه واقف في مكانه

 

لأني بشوف ناس كتير بتعلق سبب فتورها عن الطاعة وكده بأنها منتظرة الزوج اللي يعينها عالطاعة و و و و

 

فبجد اللي بتفكر كده فعلا بتضيع عمرها لأنها ما اتخلقتش للزواج فقط .. ده جزء من رسالتها

 

وربنا اللي بايده مقاليد السماوات والأرض واللي قال سبحانه عن نفسه:

"ألا يعلم من خلق وهو اللطيف الخبير"

يعلم أن فلانة حالها هينصلح لو تزوجت

ويعلم أن علانة حالها هينتكس لو تزوجت

 

فالواحد فعلا يتوكل على ربنا ويسيب الأمر له وحده

 

هل أنتي تعرفي أنتي هينصلح حالك ولا هينتكس بالزواج ؟

 

هل تضمني أن زواجك يستمر أو يحصل تفاهم و ود بينك وبين زوجك أو العكس يحصل نفور ؟

 

 

 

 

ونصيحة لما تقعدي مع صحباتك اللي لسه غير متزوجات ماتتكلموش كتير أو خالص في موضوع الزواج

 

عارفة أنها نصيحة غريبة بس فعلا هتريح كتير

 

لأن الكلام ده لما بترجعي البيت وبتبقى لوحدك بتقعدي تفكري فيه تاني و أكتر

 

لأني كتير بشوف بنات مشغولة بموضوع الزواج جدا وكلهم أحسبهم على خير ملتزمات مش بتوع مصاحبة ولاد والكلام ده .. وعلى خلق وخير ربنا يبارك فيهم

لكن بلاقيها مثلا بتكتب رسايل لزوجها المستقبلي مع أنها لسه مش مخطوبة ولا متزوجة

 

بس شغل القلب والتفكير بالموضوع ده هيتعبها أوووي

 

لأنها على كل الأحوال هتبقى تعبانة

 

* لو لا قدر الله ما تزوجتش هتبقى حياتها كئيبة جدا

لأنها بانية سعادتها على شئ واحد >>> وهو الزواج

فلو الشئ ده ما اتحققش هتبقى حياتها ضلمة ومالهاش طعم

وده طبعا أكبر غلط

 

* ولو حتى اتخطبت .. معذرة في اللفظ "هتدلق زي الجردل" لأن قلبها هيبقى متعطش أوي لأي مشاعر .. وهيأثر جدا على اختياراتها للعريس .. هتتخيل كل كلمة كانت بتكتبهاله فيه حتى لو مش مقاسه ولا راكبة فيه

 

واللي بقوله من واقع تجارب شفتها ..

زي ما بيقولوا عندها فراغ عاطفي فهتشبعه في أي واحد يقع في وشها

 

حتى لو الظروف الظاهرة قدامها أنه مش مناسب لها هتوافق عليه

 

وهتفضل ولو حتى كان بيبص للأبجورة اللي جنبها هتقول ده عينه مازلتش من علي وهتبرر عيوبه و هتعيش نفسها في أوهام لحد ما تتقرص وتفوق

 

* ولو دخلت وخرجت في كذا تجربة خطوبة فاشلة .. قلبها مش هيتحمل الضغط وقلبها هيتهري بالتجارب دي

لأن استهلاك المشاعر بيستهلك قلبها معاه

 

وأنتي كده كده مش هتتزوجي إلا شخص واحد

 

ليه تقعد تهري وتهلك فيه بالشكل ده ؟

 

 

 

لكن لو الموضوع عندها من الاول في المستوى العادي المنضبط

zero state

أن كل شئ بقدر الله والمشاعر كلهاااااااااا كلهاااااااا وبأكد كلهااااا بتيجي بعد الزواج

والتفكير الكتير مش هيقدم ولا هيؤخر حاجة

 

 

مش هقول مش هتتأثر .. أكيد هتتأثر لكن هيبقى عندها صبر ويقين

 

 

اقفلي على قلبك لحد ما ربنا يأذن لك بصاحب النصيب

 

و صدقيني نصيبك و رزقك هو اللي بيجري وراكي.. مش أنتي اللي تجري وراه

 

اصبري واحتسبي صبرك ده عند ربنا

 

واستغلي فترة الصبر ده في اصلاح نفسك عشان تكوني زوجة صالحة بإذن الله

:)

[**راضية** 2011]

رائع جدا ما خطته اناملك

رغم ان العنوان أغاضني و ظننته من المواضيع اياه تبع هيا نتخيل عريس المستقبل او تكتب له رسائل او ما شابه وهو حتى لسه ما جاش

و صدقا صدقا لا تربطي سعادتك يا غاليتي بالزوااج فو الله و تالله و بالله كم من متزوجة تتمنى لحظة من العزوبية بسبب ما تعانيه مع زوجها او بسبب كثرة المشاغل و المشاكل

فاغتنمي اخية حياتك و كوني داعية او كوني بابا للخير و النفع للبشرية واصنعي ابذري ازرعي كوني مفتاح خير حياتك لا تتوقف على ذلك المجهول و حتى ان اتى فلا تتسرعي و احسني الاختيار فانت تختارين لحيااااااااااتك و لاولاااادك فاحسني الاختياااار

و السعادة حتما ليست في الزواج وحده

اغتنمن فرصتكن فو الله قد تتمنين دقيقة مثلها لكن هيهات..........

[خيوط ذهبية 803]

ولله مشكورة على الموضوع الجميل

كلام جدي

جزاك لله كل خير

[((ام خديجة)) 18]

موضوع راائع جزاك الله خيرا

 

نفعنا الله به

 

بوركت

[رضــــاك ربي 258]

جزاك الله خيرا

أتمنى لو أستطيع إيصال نصيحتي هذه إلى كل العازبات

"يا أخواتي الغاليات أكثرن من بر الوالدين قبل أن تندمن

أكثرن من بر أمهاتكن قبل أن يكون لقاؤكن بهن مرة في الاسبوع في بضع ساعات لا تغنمن فيهن حتى بمد شربة ماء لهن"

يا حبيبات إلحقن القطار قبل أن يفوتكن !!!!!!

[ساره أم حمزه 1042]

جميل

جزاك الله خيرا

[صدقه جارية 4686]

وعليكم السلام ورحمة الله وبركاته

 

بارك الله فيك أم لبابة : )

أسلوب جميل لتوصيل الرسالة .

وأسأل الله أن يرزق كل بنات المسلمات بأزواج صالحين .

[حواء أم هالة 1900]

وعليكم السلام ورحمة الله وبركاته

 

بارك الله فيك أم لبابة : )

أسلوب جميل لتوصيل الرسالة .

وأسأل الله أن يرزق كل بنات المسلمات بأزواج صالحين .

[ساره ابو اسنينه 37]

السلام عليكم ورحمة الله وبركاته

 

كـــــلام جميل اوى وفي مكانه المزبوط

 

سلمت وسلمت يمناكى يا غاليه ^_^

[أم لبابة بنت أحمد محمد 172]

جزانا واياكن يااارب

اسعدني مروركن

بارك الله فيكن

[**الفقيرة إلى الله** 991]

السلام عليكم ورحمة الله وبركاته

 

بارك الله فيكِ يا حبيبة ~

ولكن الموضوع مكرر هنا:

https://akhawat.islamway.net/forum/index.php?showtopic=285929&st=0#entry3387079