اذهبي الى المحتوى

المشاركات التي تم ترشيحها

السلام عليكم يا مستر

 

عليكم السلام ورحمة الله , افندم يا مدام

 

كنت عايزة مس عتاب

 

في حجرة المدرسيين على ايدك اليمين

 

متشكرين , ربنا يجعلنا من اهل اليمين آمييييييييييين

 

 

, تن تن السلام عليكم ههههههه

 

عليكم السلام ورحمة الله , افندم ؟

 

هههه حضرتك مس عتاب ؟

 

ايوة , أي خدمة

 

هههههه طب استني اما اطلع الطوووووووووبة

 

ايه ده يا مدااااااااااام ! انتِ جاية تتعدي عليا بالضرب اثناء تأدية عمليييييييي

 

تأدية عملك ايه يا مس ! ما انتِ قاعدة فاضية اهو هههه , ما تخافيش , الطوبة ليها مغزى , وإن عُرف السبب بطل العجب يا مس همسة عتاب ههههه اسمك بيفكرني بالبرنامج اللي بسمعه في الراديو بتاع همسة عتاب , مع اني مش جاية اعاتب ولا حاجة والله هههههه

 

اومال جاية ليه يا مدام ؟

 

بصي يا حبيبتي انا والدة الطالب المجتهد ياسر حسين

 

أهااااا ياسر صاحب رحمة !!!!!

 

هههه هو الثنائي ده مشهور اوي كدة عندكو !

 

ههه الاتنين مطلعين عيني يا مدام , متعبين جدااااا وما بيسمعوش الكلام وخصوصااااااا رحمة

 

رحمة مش موضوعي النهاردة , انا جاية بخصوص طريقة شرح حضرتك في العلوم

 

مممممم حضرتك جاية تشتكي ؟

 

هههه ربنا ما يجيب شكوى يا حبيبتي , اصل انتِ عارفة دول اطفال يعني والمناهج فوق انها صعبة فهي رزلة , فيعني لو تبسطيها شوية بالأمثلة والتجارب العملية يبقى حاجة لطيفة منك يا مس همسة عتاب

 

ههههه طيب ايه علاقة الطوبة اللي حضرتك ماسكاها بشرح العلوم

 

هههه انا مش جايبة طوبة بس , انا جايبة طوبة وكيس نايلون وطبق وشوية مية في الزمزمية

 

ههههه ليه ده كله يا مدام !

 

عشان اوريكي تشرحي المادة الصلبة والسائلة والغازية ازاي هههه

 

هههه معلش والله , اصل ما بحبش العلوم , بكرهه موووووووت

 

الله ! اومال بتدرسيه للعيال ازااااااي

 

انا اقولك , اصل انا اساسا مش مدرسة علوم , انا مدرسة انجليزي

 

افندممممممم ! طب وازاي المدرسة بتخليكي تدرسي للولاد علوم طالما مش فاهمة فيه حاااااجة , ما تدي انجليزي وتريحينا يا مسسسس

 

هههه اصل هنا في مدرسين انجليزي كتير , المدرسة كانت طالبة مدرسين علوم فالمدير قالي درسي علوم وخلاص

 

درسي علوم وخلاص ! هو التخلف اللي حصل للتعليم من شوووووية !!!!!!! انا مش بغلط فيكِ يا مس , انا بنتقد المنظومة كلهااااا

 

انا مقدرة يا مدام , بس والله غصب عني , انا بحاول على قد ما اقدر ابسط الشرح للولاد , بس على فكرة انا في الانجليزي والرياضة ممتااااازة , اصل بحب الحساب والارقام اوووووي

 

وانا ابني بيكره الارقام اوووووي , انا ممكن اذاكرله العلوم والعربي , لكن بصراحة الرياضة والانجليزي لا

 

ههه تعرفي يا مدام بهيرة , انا حبيبتك خالص , حضرتك شخصية لطيفة اوي

 

ههههه ربنا يلطف بينا كلنا يا حبيبتي وينجيناااااا

 

لو تحبي ادي لياسر درس انجليزي وعلوم انا ما عنديش مانع

 

احنا بقى عندنا مانع , الميزانية لا تسمح بالدروس الخصوصية والله يا مس همسة عتاااااب

 

ههه ممكن تدفعوا حاجة رمزية , مافيش مشكلة خااااالص , على فكرة انا مش مادية

 

ههههه اومال عايزة تدي دروس ليه يا حبيبتي

 

اصل بروح من المدرسة مش بلاقي حاجة اعملها وبقعد طول اليوم اتخانق مع اخواتي البنات بسبب ومن غير سبب , فلو اديت دروس هرتاح واريحهممممم

 

هههه ماشاء الله , انتِ صريحة اوي يا مس همسة عتاب

 

ههه لو مش عايزة تدفعي فلوس خالص مافيش أي مشكلة , اصل انا حبيتك خالص , في ناس كدة الواحد يشوفهم يدخلوا القلب , وانتي دخلتي قلبي والله , ونفسي اعملك أي خدمة

 

ههه ربنا يخليكِ كلك ذوق يا مس همسة عتاب , طيب اديني رقم تليفونك وقوليلي عايزة كام في الدرس وانا هستشير باباه وارد عليكِ

 

هههه مافيش مشكلة

 

 

 

 

 

 

 

 

 

 

 

 

 

 

دروس ايه بس يا بهيرررررررررة , يا بهيرة ارحميني يرحمك ربناااااااااا

 

ربنا يرحمنا جميعا يا سونسوووووووون , يا حبيبي اسمع بس كلامي للآخر , ياسر مستواه ضعيف في المواد دددي

 

طبعاااااا , ما هو البيه بيلعب ومش ملتفت لدرووووووسه

 

هو لما ياخد الدرس هيلتزم يا سونسون

 

وهجيب منين فلوس للدروس يا بهيررررررررة

 

يا حبيبي المدرسة قالت هتاخد عشرين جنيه في الشهر

 

نعممممممم ! عشرين جنيه بسسسسسس !!!!!

 

ههههه ايوة والله بس

 

يعني في المادة الواحدة هتاخد عشرين جنيه ؟

 

لالالالا الاتنييييييين , الاتنين يا سونسوووووون , شوفت مش طماعة ازاي !

 

اذا كان كدة ماشي , بس والله لو سقط ولا جاب درجات وحشة ليكون حسابه عسيررررررر

 

ههههه ربنا ما يجيب عسر يا سونسون

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

تن تن احمد

 

اتفضل يا بابا

 

ههه لقيت نور اوضتك منور قولت اكيد لسة ما نمتش

 

هه في الحقيقة حاولت انام لكن ما عرفتش , رغم اني مجهد ومحتاج انام

 

يبقى اكيد في حاجة شغلاك يا دكتور

 

ممممم في الحقيقة ايوة , موضوع مهم اوي بالنسبة لي , انا صليت استخارة وكنت ناوي افاتحك فيه بكرة الصبح

 

هههه شكلك كدة لقيت عروسة من ورايا يا ولد

 

هه يعني

 

لا مش يعني بقى , طالما صليت استخارة تبقى فكرت في الموضوع جديا

 

في الحقيقة انا محتار يا بابا

 

طب قولي مين العروسة ؟ حد من معارفنا أو قرايبنا ؟

 

لا , العروسة مريضة كانت بتتعالج عندنا في المستشفى

 

مريضة !!!!!!!

 

ايه يا بابا , غريبة اني افكر في الزواج من مريضة !

 

احمد يا إبني انا ما اتعودتش افرض عليك رأيي , انا بعد ما بنيت شخصيتك على الأخلاق والقيم وتحمل المسؤولية , عطيتك مطلق الحرية في الأختيار في كل شؤون حياتك , ده لاني واثق في رجاحة عقلك

 

هه متشكر يا بابا , في الحقيقة انا فكرت في الموضوع ده من فترة قصيرة , يمكن مدة ما اتجاوزتش ايام

 

هه هي مين ؟ رانيا عزت ؟

 

عرفت منين يا بابا ؟

 

ههه مجرد احساس

 

هه احساسك صادق

 

وليه رانيا بالذات ؟

 

................. في الحقيقة هو شعور بالإرتياح حسيته لما شوفتها , وكمان عجبتني اسرتها جدا , اسرة متدينة و متماسكة وجميلة ماشاء الله , وانا فعلا محتاج لبنت متربية في اسرة متدينة ومحافظة زي دي

 

ايوة يا احمد بس ما تنساش انها مريضة

 

وانا اكتر واحد هقدر اتعايش معاها لاني فاهم حالتها كويس , وان شاء الله هاخدها معايا للخارج في رحلة علاجية بعد الزواج وان شاء الله حالتها هتتحسن جدا

 

ههه يعني حضرتك هتقوم بدورين , دور الزوج ودور الطبيب

 

هه اتمنى اتقن الدورين وأأديهم ببراعة

 

هههه انا واثق إن شاء الله , خلاص يا إبني ,حاول تتواصل مع اهلها وحدد معاد نروح نزروهم فيه

 

بفضل الأول يا بابا اني اروح لوحدي واعرض عليها الأمر وفي المرة التانية ان شاء الله تكون معايا

 

زي ما تحب يا دكتور ههه , يااااه الوقت سرقنا وصلاة الفجر قربت , هقوم اتوضى

 

وانا كمان هحصلك يا بابا

 

 

 

 

 

 

 

 

 

 

 

 

 

 

 

 

تررررررررررررررررررررررررررررررن ترررررررررررررررررررررررررررررررررررررررررررن

 

ايه ده ! معقول ! دكتور احمد على التليفون ! السلام عليكم

 

عليكم السلام يا فندم هه ازي صحتك يا استاذ عزت

 

هه الحمدلله يا دكتور

 

اكيد حضرتك مستغرب اتصالي وبتسأل عن السبب هه

 

هه تحت امرك يا ابني , خير إن شاء الله

 

الأمر لله وحده يا فندم , في الحقيقة انا عايز حضرتك تحددلي معاد للزيارة

 

............. بخصوص ؟

 

هه الأنسة رانيا

 

رانيا ! حاجة متعلقة بحالتها الصحية ؟ صارحني يا إبني ارجوووك

 

لالالا الموضوع مش كدة خالص , في الحقيقة انا ............ انا يكون لي الشرف لو حضرتك وافقت على زواجي من الإنسة رانيا وده بعد موافقتها طبعا

 

هااا ! ههههه عايز تتجوز رانيا بنتي يا دكتور احمد ؟

 

هه ليا عظيم الشرف يا فندم

 

هه والله يا ابني انت فاجئتني ومش عارف اقولك ايه

 

ههه ياريت حضرتك تحددلي معاد من فضلك لو مافيش مانع

 

هه خلاص يا إبني , بكرة إن شاء الله بعد صلاة العشاء يكون معاد مناسب جدا

 

ههه هكون عن حضرتك في المعاد إن شاء الله , بس ليا طلب صغير

 

اتفضل يا إبني

 

ياريت يكون الموضوع مفاجأة للأنسة رانيا

 

مش فاهم يا ابني

 

يعني ياريت ما تعلنوش عن شخصيتي إلا لما تشوفني بنفسها هه نوع من المداعبة يعني هههه

 

ههههههههه خلاص يا إبني , فعلا رانيا محتاجة مداعبة ومحتاجة جو لطيف في حياتها

 

هه انا متشكر جدا , بكرة ان شاء الله هكون عندكو في المعاد , السلام عليكم

 

ههههه عليكم السلام يا ابني , سبحان الله , يااااااااااااااااااااااه , ما أروع تدبير الخالق العظيم

 

 

 

 

 

 

 

 

 

 

 

 

 

 

 

 

 

عريس مين ده بس يا ابلة منال اللي جاي النهاردة !!!!

 

هههه عريس لحضرتك

 

ايوة يعني مين ددددددده

 

وانت مااااااالك هههه بتتحشري ليه يا بنت !

 

افندمممممم ! مش بتقولي عريس جاي ليا يا ابلة !

 

ايوة ههههه

 

طيب مش لازم اعرف هو مييييييين ؟؟؟؟؟؟؟؟

 

لا مش لاااااااااازم , وبطلي زن بقى وروحي البسييييييي

 

كدددددة ! طب مش هلبس بقى إلا لما اعرف هو ميييييييييين

 

هههههه يا حبيبتي هتشوفيه وتعرفي , ما تستعجليش يا رانيااااااا

 

يا ابلة طب هو اسمه ايه

 

ممممم برضو مش هقول ههههه

 

طب اول حرف من اسمه بسسسسسس

 

مممممممممم اول حرف من اسمه مممم اول حرف من اسمه يا ستي ممممممم مش هقول هههههههه

 

كدة يا ابلة ! طب ايه الحكمة يعني انك مش عايزة تقوليلي

 

ههههه لا حكمة ولا حاجة , فكري وخمني جايز تعرفي

 

 

طييييييييب يا ابلة , ماااااااااشي , مريممممممم مريوووووووومة

 

نعم يا خالتوووو

 

ما تعرفيش مين العريس اللي جاي النهاردة ؟

 

جاي منين ؟

 

جاي منين !

 

هههههه ما تتعبيش نفسك , مريم ما تعرفش حاااااجة , روحي يا مريم العبي مع معاذ

 

انا عايزة اقعد معاكِ يا أمي

 

طب خدي ودي الإزازة دي التلاجة

 

حاضر يا أمي

 

كدة يا ابلة تحيريني !

 

هههه بنلعب معاكِ يارانياااااا , بلاش نلعب يا حبيبتي ! الحياة محتاجة شوية فرفشة وخروج عن المألوف هه

 

يعني المألوف ده ما تخرجوش عنه إلا على حساب اعصابي !

 

هههههه

 

طب هو شافني قبل كدة ؟

 

ممممم مش هقول هههههه

 

يييييييييييي

 

ادخلي البسي بقى يا حبيبتي الراجل زمانه جاااااي

 

توووووء اووووووووف طب يعني هو يعرف اني مريضة ؟

 

ممممممم انا شايفة يا رانيا ان لازم اللي هيتجوزك يعرف حقيقة حالتك عشان يتفهم الوضع كويسسسسس

 

مممممممممممممممممم وانا كمان شايفة كدة , بصي يا ابلة انا اول ما اشوفه هقوله اسمعععععععع انا بقى عندي مشاكل صحية في القلب ومش من دلوقتي لااااااا يا استاااااااذ من زماااااان من وانا صغيررررة عاجبك عاجبك مش عاجبك اتفضل امشي من هنا وما تجيش عندنا تااااااااااااني , مش كدة يا ابلة ؟

 

هههههههههههههههههههههههههه كدة يا حبيبتي , فعلا اذا كان عاجبه خلاص على بركة الله مش عاجبه يبقى يمشي ونستنى رزقنا

 

ايوة يا ابلة لازم الحسم والصراااااااااحة ايووووووة , طب ممكن يا ابلة هو يوافق بس مامته ما توافقشششششش

 

يبقى لازم يا رانيا نطلب منه يصارح والدته

 

ايوة بالظبط كدة يا ابلة عشان ما تعملش زي مامت باسم لا اعاد الله ذكراهاااااا , اول ما اشوف مامته هقولها اسمعي يا ام الاستاذ اسمه ايه , انا بقى مريضة وابنك هو اللي عايز يتجوزني مش اناااااااا ولو مش عاجب حضرتك اتفضلي خدي الننوس وامشي وما تجوش عندنا تااااااااااااني

 

هههههه دانتي ناوية تبوظي الجوازة بقىىىىىىىى

 

يا ابلة اصل انا اتعقدت , وبعدين استفدت من غلطتي وعرفت ان لازم الصراحة وغير كدة لازم العيلة اللي هدخل فيها تكون على قدر من التدين ويكون في قلبهم رحمممممة مش هقدر اتعامل مع ناس قاسسين يا ابلة

 

هههه ان شاء الله يا حبيبتي

 

رانيااااااااا

 

ايوة يا بابااااااااا

 

معقول يا بنتي لسة ما لبستيش !!!! ده اسمه كلام برضو ! الراجل زمانه جااااااااي

 

هههه طب قولي هو مين يا باباااااااا

 

ييييييي , يا بنتي البسي بقى وبعدين ابقي شوفيه بنفسككككككك

 

توووء واضح كدة انه عريس مالوش أي لزمة في الحياة وعايزين تلزقوهولي وخلااااااص , اومال يعني مصممين ما تقولوش هو مين ليه !

 

ترررررررررررررررررررررررررررررررررررررررن ترررررررررررررررررررررررررررررررررررررررررررررررررن

 

يا خبر ! ده باين عليه وصصصصصصصصصل

 

اجري يا رانيا البسي بسرررررررررعة , معاذ يا حبيبي روح افتح الباااااااااب

 

حاضر يا أمييييييييييييييييييييييي

 

 

 

 

 

السلام عليكم يا حبيبي ههه

 

عليكم السلام يا عمو هه

 

ههه اعتقد كدة انت حفيد الاستاذ عزت

 

ايووووة انا معاذ ماجد

 

هه اهلا معاذ

 

 

اهلا يا دكتور ههه اتفضل يا إبني

 

هه السلام عليكم استاذ عزت

 

عليكم السلام يا إبني اتفضل ههه اتفضل اهلا وسهلا

 

 

اهلا بيك يا استاذ عزت

 

اتفضل يا ابني في الصالون

 

متشكر يا استاذ عزت هه

 

 

اتفضل اقعد يا ابني

 

متشكر جدا

 

واخبار الوالد ايه ؟

 

بخير الحمدلله , ان شاء الله لو الأنسة رانيا وافقت يبقى اكيد هيجي معايا المرة الجاية

 

هه ان شاء الله يا إبني , شرفتنا والله يا دكتور

 

اشكرك يا فندم , الشرف ليا انا

 

 

 

 

 

تن تن رانيااااا

 

ايوة يا ابلة , لحظظظظظة

 

هه خلصتي لبس يا حبيبتي ؟

 

ايوة يا ابلة , تعالي بالله عليكِ حطيلي الدبوس ده في الطرحة

 

حاضر يا ستيييييي ههه وادي الدبوس ههه يلا بقى عشان العريس مستنيكي , استجمعي شجاعتك عشان تقوليله كل اللي نفسك فييييييييه هههه

 

طبعا يا ابلة طبعااااا مممم مع اني متوترة اوي ومش عارفة هقول ايه وابتدي ازاي

 

هههه ابتدي زي ما تبتدي , المهم تبتدي هههه يلا بقى عشان الرؤية الشرعية يا حبيبتي

 

حاضر يا ابلة , طب قوليلي انا كدة حلوة ؟

 

هههه انتِ كدة قمررررر اموووووووووه

 

هههه ربنا يخليكِ ليا يا ابلة

 

 

 

الله ! ريحة البرفان بتاعه تجننننننننننن مالية كل البيت , شكله بيهتم بنفسه اوي مممم انا قربت من باب الصالون بس خجلانة اوي ادخخخخخخل , موقف صعب اووووي , توووء دانا حتى مجرد دخول الاوضة واني اشوفه لاول مرة مش قادرة عليه , اومال ازاي بس هقوله عن ظروفي الصحية , يعني فيها ايه بس لو ريحوني وقالوله هما اني مريضة ! لازم يدبسوني انااااا , يلا , استجمع شجاعتي زي ما قالت ابلة منال واقوله على كل حاجة وزي ما يحصل يحصل بقىىىىىىىى , انا هدخخخخخخخخخل , السلااااااااا هااااااا , دكتور احممممممممممد !!!!!!!!!!!!

 

ههههه مفاجأة ولا صدمة يا انسة رانيا ؟

شارك هذه المشاركه


رابط المشاركه
شارك

@@طالبة الفردوس98

 

اهلا بيكي يا قمر ,, شرفتينا والله حبيبتي

 

اكيد هتلاقي ردود يا بنتي ,, لازم بيكون في يعد كل حلقة كلمتين محشورين في الزور بنكون عاوزين نكتبهم

 

دوري ع الكلمتين دول بقى وشاركينا بيهم هههههههههههه

 

 

عائشة أم حفص ,,

 

حد قالك قبل كده انك حتة سكررررة ههههههه ,, أيّووووووووه يا جدعااان ع الكلام اللي بينقط عثثثل هههههههه

 

تسلمي يا قمر على كلامك الجميل , وصلته لخالتو هبة وانبسطت بيه جداااااا بارك الله فيكي

 

ونورتيينا يا سكرررة ,, وأسعدنا جددا انضمامك حبيبتي : ))

 

 

 

رياحيينو القمر ,, الحلقة نزلت يا أمووورة

 

كل يوم !!! انت طماع اوي يا عم الحاااج هههههههههههههه

 

على عيني والله ,, بس الظروف الله المستعان ,, عندي امتحان يوم الحد الجاي دعواتكم : ))))

 

 

@@ريحانة زوجي

 

فينك يا قطة ؟؟؟؟ اختفيييتي في ظروف غامضة ليييه

 

 

حد يتبرع ويررررن الجرس على خالتو راماس ,, قولولها تنورنا لتكون مش عارفة ان الحلقات بتنزل

 

 

 

العسولة يحبهم ويحبونه

 

والسكرة ذليلة إلى الله

 

والمانجة حواء أم هالة

 

والبرقوقة سارة محمد

 

والمشمشه أم البنات 4

 

والخوخه فاتن

 

والعنباية أم عبدالرحمن وجنة

 

والموزة أم بشار وعبد

 

والفراولة أم البطل عبدالملك

 

والتفاحة أمة الرحمن الرحمن

 

والمانجة تاني محبة صحبة الأخيار

 

والبرتقالة أم العبادلة

 

والريحانتين الحلوين ,, ريحانة السماء , وريحانة زوجة

 

والشكولاته أم أفنان المغير

 

والبسكوتة أم المنذر

 

والعسل حبيبة الصديقة

 

والقمر عهد الوفاء

 

والبونبوني قراني حياتي

 

وشجرة التوت ظل زهرة

 

منووووووورين كلكو يا أحلى سلطة فواكه ههههههههههههههه

 

ربنا يسعدكو ويبارك فيكو يااارب ,, وربنا ما يحرمنا من طلتكو اللي أحلى من الفواكه دي كلها هههههههههههه

 

اللهم امين

 

وتحية خاصة للأخوات الحلوين اللي انضموا لنا

 

مريم البتول حبيبتي

 

رؤيات

 

عائشة أم حفص

 

أم الرياحين الحلوين

 

طالبة الفردوس 98

 

 

يارب ما اكون نسيت حد ,, أِشوفكم على خير يوم السبت بإذن الله

تم تعديل بواسطة هدوء الفجر
  • معجبة 1

شارك هذه المشاركه


رابط المشاركه
شارك

ههههههههههههههههه

انا اول وحدة قرأت الحلقات ؟؟!!! فنجان القهوة اليوم طعمه غير شكل ههههههههههههههههههههه

شكرا هبه العزيزة، شكرا هدوء .... جزاكما الله كل خير

شدي حيلك يا هبه بدنا نخلص المسلسل قبل رمضان .................

شارك هذه المشاركه


رابط المشاركه
شارك

حلقات رووعة اليوم

فرحت لرانيا فالدكتور هو الشخص المناسب لها ^^

 

البت سوسن اعوذ بالله منها دي تصلح تكون زوجة اهدم > <

 

وردة ست خجولة ونيتها طيبة وان شاء الله ربي يبعد عنها الشر

 

عصام كل الذي فعله ليس لوجه الله بل من أجل فدوى فَلَو كانت اخت اخرى لعاتبها -_- عامل فيها طيب وشهم

شارك هذه المشاركه


رابط المشاركه
شارك

السلام عليكم ورحمة الله وبركاته

كيف حالكم بنات

@@هدوء الفجر

معلش بقي سامحينا انا عارفة اني كنت زي المتطفلة بس ماكنش عندي وقت مش عارفة ليه

انا اصلا عرفت المسلسل من جروب عالواتس دخلت فيه فجأة تليوم ده كان نتيجة احمد و خالد

قعدت اسال الناس اي احداث المسلسل ماحدش رد قعدت ادور خلف الجدران في النت رحت لاقيت كزا حاجة مسلسغو حاجة خليجي لغاية ما كتبت الاسم و مع الشخصيات فظهرلي

م بعدين بقلب في الصفحات لقيت ضحي بتفسخ الخطوبة اتصدمت قعدت بس اتابع ضخي لغاية الصدمة الاكبر لما اتشديت للاحداث و لقيت المسلسل اتوقف و عملت لينك حفظته و كل ما ادخل الاقي لسة

لغاية ما نزلتي الحلقات بي دي اف و كان لازم اشترك في المنتدى علشان تحمب

  • معجبة 1

شارك هذه المشاركه


رابط المشاركه
شارك

مشكورة ياهدووووء علي نقل الحلقات

أخبار هوبة ايه وحشاني كتيييير

نفسي اشكرها بصراحه على مجهودها الرائع ماشاء الله مبدعه اللهم بارك

اانا قرات .ام فتحي.وزوجتي والمفتاح.وزوجتي في السبعينات.وزوجتي وحافة الهاوية

وانا وكيفين وضوء القمر اللهم بارك استفدت كتيييير ربنا يجعله في ميزان حسناتك

شارك هذه المشاركه


رابط المشاركه
شارك

يا اما ادهم يهتدي او يضرب ضحى وينزل حملها.. اماتجيب منو ابن وهي مش طايقاه وهو عاصي هيك..فبنزعل منك يا هبة

بلغيها يا هدوء هههههه

 

يمكن ادهم لما يعرف ان في مولود ينصلح حالو

 

وجود راوية كويس عالأقل بتخفف عن ضحى وبتونسها يمكن تشور عليها بحل

 

ويسلموا ايديك يا هدوء

شارك هذه المشاركه


رابط المشاركه
شارك

يا سلااام لما اكتب تعليقي وأتفاجأ ان في حلقة تانية كمان

 

نزل يا ابني شي لكل الأخوات حلوان الفرحة دي...ايوووووووه عالجمال ههههههه

 

 

حبيت موقف هيما مع مرته.. ويا رب يكتشف سوسن ويولع فيها نار بحبه لوردي

 

وموقف بهارات مع مس همسة عتاب هههههههه حلو وبعلمنا الذوق في التعامل مع المعلمين حتى لما يخطؤوا

 

وانها أحسنت تربية ياسمين.. وانها بتقول لأولادها شكرا وتفضل وبتتصرف بحكمة وعلى طول بدون تأجيل

 

 

تسلم ايديك با هبة ويا رب ترجعيلنا بسرعة

 

هدوء عاملة زي البنت الكبيرة اللي امها طلعت من البيت ووصتها تدير بالها عإخوانها وعالبيت.. او زي الطالبة اللي المعلمة قالتلها راقبي الصف والطلاب لحدما آجي وهي مش حابة يحسوا بالغربة فبتعاملهم بنفس الطريقة ههههههههه

 

وأبدعتي لما سميتيني بسكوتة لان بابا بيسميني بسكوتة من طفولتي ههههه😊

 

بانتظار يوم السبت 😄

تم تعديل بواسطة ** أم المنذر **

شارك هذه المشاركه


رابط المشاركه
شارك

السلام عليكم

بقي خلتيني مشمشه ياهدوء

ربنا يكرمك و ينجحك انتي و الي زيك يارب

حلقات روعه

ايوه كده عاوزين رتم الحلقات سريع علشان نلحق نخلص قبل رمضان تقبل الله منا ومنكم

واعملي حسابك انتي وهبه لما تخلصي امتحانات تحطيلنا كل يوم حلقه و اظن هبه المفروض تكون خلصت كتابه حلقات كتير في فترة الانقطاع

يعني مفيش حجه ياحلوه انتي و الحلوه هبه

وتاني الحلقات روووووووووعة كتييييييير

تسلم الايادي ياحلوين

ولابلاش تسلم الايادي دي علشان سريتها تجيب النكد

جزاكما ربي الجنه احسن آمين

شارك هذه المشاركه


رابط المشاركه
شارك

معلش نسيت اقول ان بهيره عجبتني في طريقة شرحها للعلوم فعلا لازم الاولاد تشوف عملي علشان تفهم و باسلوب بسيط

هبه لخصت ازمة التعليم في مصر في المشهدين دول

يارب امتي بقي هيكون الاصلاح مش عارفه حايكون ليا عمر و اشوفه علي احفادي ولا حيكون لسه ابعد من كده

شارك هذه المشاركه


رابط المشاركه
شارك

احم احم احرجتيني ههههههه <3

انتي اللي سكره مووووه

وخالتو هبه انا حبيتها لله ف لله :D

مبسوطه لتواجدي بينكم

ربنا يجمعنا ف الجنه ياقمر

  • معجبة 1

شارك هذه المشاركه


رابط المشاركه
شارك

حلقات جميله ما شاء الله

 

بهيره بتعلم ياسمين كل حاجه ما شاء الله عليها ^^ بس عايزه تهتم وتعلم ياسر الصح برضه

زى لما منعت ياسمين تطلع للجيران تمنع ابنها برضه انه يقعد مع رحمه ولا يتعامل معاها

وطريقة شرحها حلو الاطفال محتاجين الشرح بالطريقه دى عشان يفهموا

بس كنت خايفه من الابله عتاب انها تزعق معاها وميعجبهاش كلامها

كنت مفكره تقول ابنك هو اللى خايب وووو

 

عصام ينرفز بصراحه بيعمل ده عشان مصلحه لو كان واحده تانيه اساسا ان على حقيقته من اولها

 

دكتور احمد إن شاء الله يكون خير زواجه من رانيا

بس طريقة انهم ميقولوهاش اسم العريس ولا هو مين محبتهاش

عشان لازم نعرف هى موافقه على العريس الاول ولا لا قبل ميعملوا الرؤية الشرعيه

يمكن مثلا لما تعرف انه فلان تقول لا مش عايزاه كده

بس بحب فقرة رانيا مع منال ^ــ^

 

وورده ما شاء الله عليها

 

اما سوسن ربنا يهديها هى امها بس قالتلها الكلمتين دول ، يمكن مش عندها اب يقدر يحكمها فى البيت

 

جزاك الله خيرا هبه وحاولى تخلصيه قبل رمضان إن شاء الله زى مالاخوات قالوا ^ــ^

 

جزاك الله خيرا هدوء ضحكتينى باسامى الفاكهه بس اشمعنى قلتى عليا برقوق ( :

شارك هذه المشاركه


رابط المشاركه
شارك

بصي ياهدوء

انا كتبت تعليق ع الحلقات طويل عرييييض

واذ فجأه لقيته طار :O

وخلاص مش هكتب تاني بقا عشان اتغظت

عامله زي اللي قعد يكتب رساله مهمه ومش باصص ع الشاشه وف الاخر طلع عامل الكيبورد انجليزي اهئ اهئ

 

اعتبريه وصل بقا ههههههههه

شارك هذه المشاركه


رابط المشاركه
شارك

السلام عليكم ورحمة الله وبركاته

جزاك الله خيرا اخت هدوء الفجر على نقل الحلقات وجعلها في ميزان حسناتك يوم القيامة.

هبة نور كاتبتنا المبدعة سلام طويييييل جدا ونسأل الله ان يجعله في ميزان حسناتك وجزاك الله خيرا.

كلما طلبنا حلقات أكثر نجدها تقل حتى اصبحت 3 ايام بدلا من خمسة ايام طبعا نقدر ظروفك ولكن أضم صوتي للاخوات المطالبات باكمال المسلسل قبل رمضان .

الحقيقة المسلسل اصبح متشعبا وشخصياته كثرت واصبح من الصعب التوقع .فين الضابط هاني ورشا .وامها ودعاء وزوجها .وفين اماني وما حصل لها.وفين خالد وهيام وامهم وفين صابرين وابوها .وفين سلوى وآخر عرسانها .وفين وفين ....

عايزين حلقة طويييييييلة تضم كل الابطال و نريد أحداث وحبكة

منتظرين ابداعاتك ومفاجآتك يا هبة .مع تمنياتنا لك بالصحة والعافية

  • معجبة 2

شارك هذه المشاركه


رابط المشاركه
شارك

وانا كمااااان اضم صووووتي

عاوزينه يخلص قبل رمضااان

ربنا يعينك ياعمري

والله اسال ان يبلغنا جميعا رمضان لا فاقدين ولا مفقودين ^_^

شارك هذه المشاركه


رابط المشاركه
شارك

تسلمي يامريومة ياعسل على نقل الحلقات

وسلميلي على هوبه وقوليلها متبقاش توقف الحلقة في حتت صعبة كدا

فيها ايه لو تقولنا رانيا عاملت ايه واااااااااااااااااااء

 

كنت فاكرة أدهم هيعمل حادثة وهو مخمور ويريحنا

 

ابراهيم مش عارفة أقول عليه شرير ولا طيب

من ساعة ماتفق مع أدهم عالخطة الشريرة اللي هيعملوها مع ضحى

 

سوسن نموذج للبنت اللي ماشافتش ريحة التربية إطلاقا

 

أوسا طماعة وعدوانية بدرجة كبيرة غلوية اوى

 

ضحى ربنا يعينها عالى هي فيه

 

عصام شكله هيبدء في خطواته للزوجة الثالثة

والنتيجة ان فدوى هترفض

 

أخبار هيام ايه بألها كتير مش باينة

شارك هذه المشاركه


رابط المشاركه
شارك

تسلمي يامريومة ياعسل على نقل الحلقات

وسلميلي على هوبه وقوليلها متبقاش توقف الحلقة في حتت صعبة كدا

فيها ايه لو تقولنا رانيا عاملت ايه واااااااااااااااااااء

 

كنت فاكرة أدهم هيعمل حادثة وهو مخمور ويريحنا

 

ابراهيم مش عارفة أقول عليه شرير ولا طيب

من ساعة ماتفق مع أدهم عالخطة الشريرة اللي هيعملوها مع ضحى

 

سوسن نموذج للبنت اللي ماشافتش ريحة التربية إطلاقا

 

أوسا طماعة وعدوانية بدرجة كبيرة غلوية اوى

 

ضحى ربنا يعينها عالى هي فيه

 

عصام شكله هيبدء في خطواته للزوجة الثالثة

والنتيجة ان فدوى هترفض

 

أخبار هيام ايه بألها كتير مش باينة

شارك هذه المشاركه


رابط المشاركه
شارك

احم احم احممممممم

 

دخلت مخصووووص عشان اواجه التتار لوحدي وبمفردي و alone ، بس بعد ما استعين بالله ع الخناقة اللذيذة دي هههههههه

 

مين الحلوة الامورة الشتووووورة اللي لازم تروح تستخبى دلوقتي خلف الجدران ،، اللي عاوزة المسلسل يخلص قبل رمضان !!

 

تعالي هنا يا حلوة اوعي تستخبي ولا تروحي هنا او هنا ،،، هههههههه خوفتكو ، صححح

 

بصوا يا أمامير ، عندكو مقدرة واستعدااد تكتبوا كلللللل اسماء الشخصيات اللي في المسلسل ، الاساسية والفرعية ، قبل رمضان !!!

 

هههههههههه معتقدش يعني ،، مابالكم بقى باللي بتكتب كل يوم مشاهد عن كل شخصية وكل واحد فيهم عنده مصيبة بشكل ولون وطعم مختلف ههههههههههه

 

طب سيبك من الشخصيات واديني ودنك ...

 

العيال الصغننين اللي في المسلسل دول هيلحقوا يكبروا ويعيشوا شبابهم قبل رمضااان!!!! الا اذا كانوا راكبين صاروخ للمستقبل ههههه

 

بمعنى اصح ،، لسه المسلسل فيه احداث كتييييييير وتطورات رائعة (كما اخبرتني خالتو هبة العسولة) ،،

 

فخالتو هبة بتحاول بعون الله انها تتقن كل الاحداث وتكتبها وتسلسلها بدقة عالية ،، حتى تنهي المسلسل على افضل وجه باذن الله

 

وهي بتحاول تستغل كل ثانية في وقتها للكتابة ،، وبجد بتبذل مجهود كبيييير جدددا في كتابة واتقان المشهد الواحد

 

دعواتكم لها بالتوفيق والبركة في الوقت ،، ربنا يجعله في ميزان حسناتها ياااارب اللهم امين

 

 

 

*** انا بصراحة من وجهة نظري بشوف المسلسل كل مدى بيزيد ابداع وروعة ، والاحداث متطورة وشيييقة جدددا ما شاء الله ، موش بمل منها خاااالص

 

ولو قولتلكو اني خايفة المسلسل يخلص هتجروا ورايا وفي الحالة دي انا الي هجري واستخبى

 

ولا انتو ايه رايكم ؟؟؟

تم تعديل بواسطة هدوء الفجر
  • معجبة 3

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏‏ثبتت امرأةُ فرعونَ وهي في بيتِ أكبر طاغية! وانتكست امرأةُ نوحٍ وهي في بيتِ أكبر داعية! ضغط الواقع ليس عذرًا للتفلت من التكاليف الشرعية . ╰🌸🍃╮

×