تعالى نفهم رمضان - توأم رمضان (عمرو عبد الجليل واخوه التوأم الشيخ ايمن)

[امانى يسرى محمد 327]

- توأم رمضان1

 

 

** في برنامج يجمع عمرو عبد الجليل واخوه التوأم الشيخ ايمن**

عمرو عبد الجليل: أحب أعرفكم بأخويا التوأم اللي أنا تقريباً ماعرفوش، لأننا بقالنا سنين كبيرة جداً ما بنقابلش بعض ، هو مسافر بره مصر، وأنا اكتشفت إن أنا ماعرفوش فعلاً ،، فاكتشفت إن أنا وهو بعيد عن بعض، فجايبه النهارده بقى جايبله شوية أسئلة كده من الناس إن شاء الله نتعرف عليه ويرد على الأسئلة دي.
الشيخ أيمن: عليكم السلام ورحمة الله وبركاته.. رمضان كريم إن شاء الله بإذن الله تعالى.

عمرو عبد الجليل: الله أكرم.. السؤال بقى، هو فعلاً رمضان كريم؟

الشيخ أيمن: أكيد طبعاً 100%.

 

 

عمرو عبدالجليل: طب إيه بقى.. يعني إيه اللي يفرق الشهر ده عن بقية شهور السنة؟

الشيخ أيمن: يفرق إنه الوحيد اللي في الشهور كلها كريم، وكريم معناها إنه يتميز عن جميع أقرانه بجميع صفات الكمال. الرسول عليه الصلاة والسلام قال: "من صام رمضان إيماناً واحتساباً غفر له ما تقدم من ذنبه".. كل ذنوبك كلها، 40 سنة، 50 سنة، 100 سنة، تصوم بس الشهر ده وعمل بسيط جداً يقدر عليه الطفل الصغير والراجل العجوز.. فبس صوم الشهر ده، عمل بسيط جداً يغفر ذنبك كله بفضل الله عز وجل. ومن قام رمضان إيماناً واحتساباً غُفر له ما تقدم من ذنبه.. ومن قام ليلة القدر لوحدها إيماناً واحتساباً غُفر له ما تقدم من ذنبه. الله سبحانه وتعالى بيعرض عليك التوبة والمغفرة والرحمة ببلاش، وقد تُعتق من النار في هذا الشهر الكريم، ولله عز وجل في كل ليلة عتقاء من النار.
 

عمرو عبد الجليل: وإيه كمان بيميزه؟

الشيخ أيمن: إذا كان أول ليلة من ليالي رمضان فُتحت أبواب الجنان فلم يُغلق منها باب، وغُلقت أبواب النيران فلم يُفتح منها باب، وصُفدت الشياطين. أنت مشكلتك في حياتك الإيمانية تلات حاجات: الشياطين (وده اتكتف)، والنفس الأمارة بالسوء (والصيام بيكسرها)، وأصدقاء السوء (وفي رمضان الصاحب ده بيبقى صايم وبيعمل خير فالمجتمع كله بيبقى في اتجاه واحد). فإنت بس سيب إيدك في الوقت ده وامشي معاهم في التيار تعتق من النار.

عمرو عبد الجليل: طب ليه اللي مابيتغفرلوش في رمضان بيدعى عليه؟

 

الشيخ أيمن: النبي عليه الصلاة والسلام طلع المنبر وقال "آمين" تلات مرات، ولما سألوه قال إن جبريل جاله وقاله: "يا محمد، من أدرك رمضان ولم يُغفر له فمات فدخل النار فأبعده الله، قل آمين"، فقال آمين. الدعاء ده مستجاب مليون في المية، وليه العقاب كده؟ لأن رمضان فرصة عظيمة، ولو عدى عليك وأنت ما اتغفرلكش يبقى أنت اللي ضيعت نفسك، لأنك بتذنب من غير دافع؛ شيطانك متكتف ونفسك مكسورة وصديق السوء بيعمل خير، فإنت ليه بتعصى ربنا في الوقت ده؟

 

 

عمرو عبد الجليل: طب كلمنا بقى عن المفطرات في رمضان إيه هي؟

 

الشيخ أيمن: أي شيء يُؤكل أو يُشرب بيدخل من الفم، أو ما يقوم مقامهم زي الإبر المغذية. وطبعاً الجماع في نهار رمضان دي كبيرة وكفارتها مغلظة جداً. ولو الإنسان تقيأ متعمد يفطر، والحجامة كمان بتفطر.

عمرو عبد الجليل: والكذب في رمضان ما يفطرش؟

الشيخ أيمن: لا ما يفطرش، لكن طبعاً دي معصية وهياخد عليها ذنب وهتقلل من أجره، لكن مش من المفطرات.
 

عمرو عبد الجليل: طب كلمنا عن حال المسلم في رمضان.

الشيخ أيمن: حال المسلم إنه يكون داخل رمضان عارف إنه مقبل على شهر ما ينفعش إنه ما يُعتقش فيه من النار، وما ينفعش ما يُغفرلوش فيه ذنبه. ربنا بيعتق في رمضان كل ليلة بدون عدد محدود، وفي آخر ليلة بيعتق قد اللي أعتقهم في رمضان كله، فاللي يضيع فرصة زي دي يستحق اللي يجراله.

عمرو عبد الجليل: طب دلوقتي واحد صام رمضان وقام.. إزاي يستمر بعد رمضان على العبادة؟

الشيخ أيمن: دي مسألة أوتوماتيكية، لو فعلاً صام وقام حق الصيام فروحانياته هتعلى وهيدوق طعم الإيمان، واللي بيدوق طعم الإيمان لا يمكن يعرف يستغنى عنه. لو صام بجد وقرأ قرآن بجد هيوصل لدرجة إيمانية مكنش واصلها قبل كده وهيمسك فيها بإيده وأسنانه.
 

 

[امانى يسرى محمد 327]

أنواع التوبة - توأم رمضان 2

 

في هذه الحلقة :
ما هي التوبة؟ معناها الحقيقي ولماذا هي من أعظم الهدايا الإلهية.
أنواع التوبة وكيف يختلف كل نوع عن الآخر في الأثر والقصد.
شروط التوبة الصحيحة كما جاءت في القرآن والسنة.
كيف نتوب؟ خطوات عملية تساعدك على بداية جديدة مع الله.
كيف يتوب الله علينا؟ وتأملات في رحمة الله الواسعة.

التوبة من ذنوب العباد وكيف يتجاوز الإنسان ما بينه وبين الناس. هذه الحلقة ليست مجرد كلام… 

هي فرصة لبدء صفحة جديدة في رمضان

 

 

[امانى يسرى محمد 327]

 

[امانى يسرى محمد 327]

الصلاة

عمرو عبدالجليل : طب يعمل إيه بقى اللي بقاله سنين ما بيصليش؟ يصلي بقى مع كل فرض الفرض كذا مرة؟
أيمن عبدالجليل : مسألة ترك الصلاة.. اللي ترك الصلاة خالص بقاله كام سنة ما صلاش
اولاً الرسول عليه الصلاة والسلام قال: "العهد الذي بيننا وبينهم الصلاة فمن تركها فقد كفر"، والله عز وجل قال: "وأقيموا الصلاة ولا تكونوا من المشركين ترك الصلاة عند الناس هينة جداً، لكنها كبيرة من الكبائر
.


طب يصلي مع كل فرض كذا مرة؟
المسألة دي خلافية بين العلماء. اللي معتقد إن تارك الصلاة كافر كفر أكبر مخرج من الملة (وبيُخلّد في جهنم)
قالوا إن الكافر لما بيدخل في الإسلام ما بنقولوش صلي اللي فاتك (يعني لو دخل الإسلام وعنده 50 سنة مش هيصلي صلاة الـ 50 سنة). "الإسلام يَجُبُّ ما قبله
.
انتهى الموضوع من النهاردة هيتحاسب توبة النهاردة بفضل الله عز وجل، وما يتركش الصلاة تاني أبداً لأي سبب، واللي فات انتهى
ومش بس كده، "إلا من تاب وآمن وعمل عملاً صالحاً فأولئك يبدل الله سيئاتهم حسنات"، هياخد مكان السيئات دي كلها حسنات
.
وعلماء تانيين شايفين إن تارك الصلاة مش كافر كفر أكبر، بل كافر كفر أصغر، فهو ما يخرجش من الملة لكنه مسلم عاصي. فالمسلم العاصي ده عليه الصلاة كلها اللي فاتت يصليها، فيقولك صلي مع كل فرض فرضين، أو 20 أو 50 على قد ما تقدر! طبعاً أنا شايف الكلام ده مستحيل، وناس كتير جداً قالتلي ما أقدرش أعمله وجربت ولقيت نفسي هسيب الصلاة تاني لأن الموضوع صعب جداً.
.
فالحمد لله وجهة النظر الأولى بفضل الله هي الأرجح، لأن الصحابة جميعاً كانوا لا يرون عملاً تركه كفر إلا الصلاة. وكان بإجماع الصحابة إنهم ما يتخيلوش أصلاً إن في مسلم ما بيصليش!
.
تارك الصلاة اللي عندهم الكافر ده لا يُغسّل لو مات، ولا يُكفّن، ولا يُدفن في مقابر المسلمين، ولا يُصلى عليه، وحرام تقول رب اغفر له وارحمه لأنه كافر، ولا يورث ولا يُورث! مصيبته كبيرة جداً وكلنا مستسهلين الموضوع لأننا ما نعلمش المعلومات دي
.
حرام تقدمه للمسلمين يصلوا عليه لأنك كده بتغشهم، وحرام تدفنه وسط المسلمين لإن هيتعذب عذاب شديد في القبر واللي حواليه مسلمين.
.
الواحد لو فهم المعنى ده هيصلي جري!
.
لكن اللي فاهم إن ربنا غفور رحيم وخلاص، دي في غير موقعها؛ ربنا قال: "نبئ عبادي أني أنا الغفور الرحيم * وأن عذابي هو العذاب الأليم". ربنا غفور رحيم لو تاب وآمن وصالح إسلامه
لكن مُصرّ على المعصية ومش ناوي يسيبها، أكيد مش غفور رحيم. فأنا مع المذهب الأولاني، لو تاب بفضل الله وصلى من النهاردة، اللي فات مات ومش هيتحاسب عليه بمشيئة الله، بس يُحسن فيما بقي يغفر له ما سلف


 

[امانى يسرى محمد 327]

سر الخلود

 

عمرو عبدالجليل : طب يعمل إيه بقى اللي بقاله سنين ما بيصليش؟ يصلي بقى مع كل فرض الفرض كذا مرة؟

 

أيمن عبدالجليل : مسألة ترك الصلاة.. اللي ترك الصلاة خالص بقاله كام سنة ما صلاش

اولاً الرسول عليه الصلاة والسلام قال: "العهد الذي بيننا وبينهم الصلاة فمن تركها فقد كفر"، والله عز وجل قال: "وأقيموا الصلاة ولا تكونوا من المشركين ترك الصلاة عند الناس هينة جداً، لكنها كبيرة من الكبائر

.

طب يصلي مع كل فرض كذا مرة؟

المسألة دي خلافية بين العلماء. اللي معتقد إن تارك الصلاة كافر كفر أكبر مخرج من الملة (وبيُخلّد في جهنم)

قالوا إن الكافر لما بيدخل في الإسلام ما بنقولوش صلي اللي فاتك (يعني لو دخل الإسلام وعنده 50 سنة مش هيصلي صلاة الـ 50 سنة). "الإسلام يَجُبُّ ما قبله

.

انتهى الموضوع من النهاردة هيتحاسب توبة النهاردة بفضل الله عز وجل، وما يتركش الصلاة تاني أبداً لأي سبب، واللي فات انتهى

ومش بس كده، "إلا من تاب وآمن وعمل عملاً صالحاً فأولئك يبدل الله سيئاتهم حسنات"، هياخد مكان السيئات دي كلها حسنات

.

وعلماء تانيين شايفين إن تارك الصلاة مش كافر كفر أكبر، بل كافر كفر أصغر، فهو ما يخرجش من الملة لكنه مسلم عاصي. فالمسلم العاصي ده عليه الصلاة كلها اللي فاتت يصليها، فيقولك صلي مع كل فرض فرضين، أو 20 أو 50 على قد ما تقدر! طبعاً أنا شايف الكلام ده مستحيل، وناس كتير جداً قالتلي ما أقدرش أعمله وجربت ولقيت نفسي هسيب الصلاة تاني لأن الموضوع صعب جداً.

.

فالحمد لله وجهة النظر الأولى بفضل الله هي الأرجح، لأن الصحابة جميعاً كانوا لا يرون عملاً تركه كفر إلا الصلاة. وكان بإجماع الصحابة إنهم ما يتخيلوش أصلاً إن في مسلم ما بيصليش!

.

تارك الصلاة اللي عندهم الكافر ده لا يُغسّل لو مات، ولا يُكفّن، ولا يُدفن في مقابر المسلمين، ولا يُصلى عليه، وحرام تقول رب اغفر له وارحمه لأنه كافر، ولا يورث ولا يُورث! مصيبته كبيرة جداً وكلنا مستسهلين الموضوع لأننا ما نعلمش المعلومات دي

.

حرام تقدمه للمسلمين يصلوا عليه لأنك كده بتغشهم، وحرام تدفنه وسط المسلمين لإن هيتعذب عذاب شديد في القبر واللي حواليه مسلمين.

.

الواحد لو فهم المعنى ده هيصلي جري!

.

لكن اللي فاهم إن ربنا غفور رحيم وخلاص، دي في غير موقعها؛ ربنا قال: "نبئ عبادي أني أنا الغفور الرحيم * وأن عذابي هو العذاب الأليم". ربنا غفور رحيم لو تاب وآمن وصالح إسلامه

لكن مُصرّ على المعصية ومش ناوي يسيبها، أكيد مش غفور رحيم. فأنا مع المذهب الأولاني، لو تاب بفضل الله وصلى من النهاردة، اللي فات مات ومش هيتحاسب عليه بمشيئة الله، بس يُحسن فيما بقي يغفر له ما سلف

[امانى يسرى محمد 327]

الرزق

 

[ تفريغ الحلقة الجديدة من توأم رمضان ]

 

عمرو عبد الجليل: ليه ربنا مخلاش الناس كلها أغنياء؟ أو خلاهم كلهم فقراء ونرتاح؟

الشيخ أيمن عبد الجليل: في واحد مات أول ما اتولد.. فين الـ 24 قيراط بتوعه؟

 

عمرو عبد الجليل: بيتقال إن الأرزاق بتتقسم الفجر بدري، ده حقيقي؟

الشيخ أيمن عبد الجليل: النعمة دي فتنة من عند ربنا.

 

عمرو عبد الجليل: في سؤال بقى بيقول: "أنا شغال في شغلانة حرام بس بطلع صدقات كتير وبعمل خير.. ده ممكن يظبط الدنيا مع ربنا؟"

الشيخ أيمن عبد الجليل: "إن الله طيب لا يقبل إلا طيبًا".. لازم مالك يكون حلال عشان تتصدق منه ويُقبل، لو المال حرام "بحت" متقدرش تتصدق منه. وعشان العمل يكون صالح ومقبول عند ربنا يوم القيامة لازم يتوفر فيه 3 شروط:

- العمل نفسه يكون صالح.

- النية تكون خالصة لوجه الله تعالى.

- يكون العمل ده على هدي النبي صلى الله عليه وسلم.

لو شرط من التلاتة دول نقص، العمل مش مقبول إطلاقًا. يعني مثلاً أنا بصلي، لازم أصلي بهدي النبي صلى الله عليه وسلم مش بهدي حد تاني، مروحش أعمل صلاة بوذية أو يوجا وأقول "أنا بصلي"، مش هتتقبل لأنها مش على هدي النبي.

الشرط التالت الإخلاص لله وهي النية، "إنما الأعمال بالنيات وإنما لكل امرئ ما نوى".. النية هنا معناها هل عملك ده خالص لربنا ولا لغيره؟

طيب اللي بيسرق عشان يتصدق على الفقراء والمساكين، صدقته مقبولة؟ النية كويسة بس متسرقش ولا تتصدق بالشكل ده، ربنا مش محتاجك عشان ترزق عباده، "إن الله هو الرزاق ذو القوة المتين".

الإنسان يخلي ماله حلال الأول عشان عمله يُقبل عند ربنا. أكل الحرام بيبطل كل الأعمال، وحتى الدعاء ممكن ميتستجابش.. زي ما النبي صلى الله عليه وسلم قال عن الراجل اللي بيطيل السفر وأشعث أغبر وبيرفع إيده للسما يقول "يا رب يا رب" ومطعمه حرام ومشربه حرام وملبسه حرام وغُذي بالحرام، فأنّى يُستجاب له؟ أطب مطعمك تكن مستجاب الدعوة.

لو أكلت حرام لا صلاتك ولا صدقتك مقبولة. وهو ليه بيسعى في الحرام أصلاً؟ لو عارف إنه حرام يشوف شغل حلال، الحلال كتير بس هي القناعة. لو الواحد آمن إن الرزق عند ربنا وفي السما "وفي السماء رزقكم وما توعدون" مش في الأرض، هيطلبه بطاعة ربنا.. طلبته بمعصية مش هتوصل لحاجة أو هتلبسك في حيطة في الدنيا والآخرة.. نطلب ما عند الله بطاعته.. والله أعلم.

 

عمرو عبد الجليل: في حد تاني بيقول: "أنا فقير ورزقي ضيق.. ليه ربنا مخلاش الناس كلها أغنياء أو كلهم فقراء عشان نرتاح؟"

الشيخ أيمن عبد الجليل: ده في الجنة.. إن الناس كلها تكون أغنياء ده في الجنة. لأن الدنيا دار ابتلاء زي ما اتفقنا، "إنا خلقنا الإنسان من نطفة أمشاج نبتليه فجعلناه سميعًا بصيرًا". كل واحد في الدنيا دي في اختبار، بنختبر بالضراء والسراء وبالنعمة وبصرفها، "فأما الإنسان إذا ما ابتلاه ربه فأكرمه ونعمه فيقول ربي أكرمن، وأما إذا ما ابتلاه فقدر عليه رزقه فيقول ربي أهانن.. كلا!".

الموضوع مش إكرام ولا إهانة، ده اختبار. الغني مختبر بالشكر "وقليل من عبادي الشكور"، والفقير مختبر بالصبر. الإنسان غالبًا بيقدر يتحمل الشدة، وربنا أدرى بينا من أي حد، "ألا يعلم من خلق وهو اللطيف الخبير؟". ربنا عارف كل حاجة، عارف إن في ناس لو اغتنت هتبقى طاغية وجبارة وده هيوديهم النار، فمن حكمته ورحمته إنه يفقره عشان يفضل يدعي ويفضل من الذاكرين..

وفي ناس لو افتقرت هترتشي وتسرق فمن حكمته ورحمته إنه يغنيه. كل شيء بمقدار وبقدر الله وحكمته، الإنسان بيُبتلى على قد إيمانه وقدرته.. لو آمنا بحكمة ربنا في خلقه ورزقه هنستريح.

 

عمرو عبد الجليل: في أغنياء وفقراء والأرزاق بتختلف، هل حقيقي إن ربنا قسم الأرزاق لـ 24 قيراط وكل واحد واخد الـ 24 بتوعه؟

الشيخ أيمن عبد الجليل: دي خرافة.. مش حقيقي. في واحد مات أول ما اتولد.. فين الـ 24 قيراط؟ في واحد عاش طول عمره كفيف.. فين الـ 24 قيراط؟ في واحد قضى نص عمره مشلول "في واحد حُرم من الإنجاب، في.. في.. ده فين الـ 24 قيراط؟ مفيش حاجة اسمها كدة.

يُبتلى المرء على قدر دينه، مفيش 24 قيراط على كل الناس، ولا يمكن.. اللي قال المقولة دي مش فاهم حاجة والناس فاهمة إن ده الدين! فلما بتلاقي الدنيا ماشية عكس اللي اتقال، فبيشكوا في الدين وبيشكوا في ربنا، لكن الكلام ده مش حقيقي، مفيش حاجة اسمها 24 قيراط، لم يرد لا في كتاب الله ولا في سنة الرسول ﷺ إن في حاجة اسمها 24 قيراط، كويس؟ فالمسألة كدة، لكن ربنا سبحانه وتعالى أسباب الرزق كتيرة جداً جداً جداً بشكل ما حدش يتخيلها، لكن الإنسان ما يعرفش في أسباب الرزق غير باب أو بابين أو تلاتة بالكتير؛ الوظيفة اللي بتشتغلها، وإن كان عندك محل مأجره، أو وظيفة بعد الظهر مثلاً.. ده اللي إنت تعرفه في أسباب الرزق.

أسباب الرزق لا يتخيلها أحد في الدنيا، الله عز وجل قال: {وَمَنْ يَتَّقِ اللَّهَ يَجْعَلْ لَهُ مَخْرَجًا * وَيَرْزُقْهُ مِنْ حَيْثُ لَا يَحْتَسِبُ}. من حيث لا يحتسب يعني يفتحله أبواب لا يمكن يتخيل إن كان هنا في باب، واقف هنا بقاله كام سنة وما يعرفش إن تحت رجليه في باب، بس لما يتقي الله يتفتح الباب ده، ويرزقه من حيث لا يحتسب، يعني مكان لا يمكن يتوقع المكان، ولا يمكن يتوقع إن ده سبب من أسباب الرزق، ويجيله رزق وفير جداً ما كانش يتخيله

.

سبب الرزق ده إيه؟ التقوى. {وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْرًا}، كويس؟ سبحان الله. الآية التانية: {فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ} - أهو الفلوس اللي الناس كلها مموتة نفسها عشانها - {وَبَنِينَ} - اللي ما بيخلفش - {وَيَجْعَل لَّكُمْ جَنَّاتٍ} - في الآخرة - {وَيَجْعَل لَّكُمْ أَنْهَارًا}. كويس؟ كل ده بس بسبب الاستغفار. فالإنسان من لزم الاستغفار، الرسول ﷺ قال: 'من لزم الاستغفار جعل الله له من كل ضيق مخرجاً ومن كل هم فرجاً ورزقه الله من حيث لا يحتسب'.

باب أهو من أبواب الرزق مين واخد باله منه؟ مين بيستخدمه؟ مين بيطرق هذا الباب؟ وأي حد بأي كمية من الناس يطرق الباب ده ربنا حتماً هيرزقه لأن ده وعد النبي ﷺ، مستحيل الله عز وجل يخلف وعده ولا الرسل تخلف الوعد، فالمسألة حقيقية 100%. بس الناس مش فاهمة في الرزق غير باب أو بابين وانتهينا على كدة. أبواب الرزق كتيرة جداً جداً، من أبرزها وأعظمها ذكر الله عز وجل والاستغفار تحديداً وتقوى الله سبحانه وتعالى وعز وجل، والله تعالى أعلى وأعلم."

 

عمرو عبد الجليل: "طب هل في فرق بين الرزق والنعمة؟"

الشيخ أيمن: "ما هو الرزق نعمة والنعمة في حد ذاتها رزق. السؤال مش هنا، السؤال إنت لو رُزقت بنعمة أو أُنعم عليك برزق، إيه المطلوب منك؟ تاكل وتشرب وتشهيص نفسك؟ لا.. مطلوب منك شكر النعمة.

النعمة دي ابتلاء من الله زي الفقر ما هو ابتلاء، برضو النعمة ابتلاء، الصحة ابتلاء والمرض ابتلاء، الغنى ابتلاء والفقر ابتلاء، الإنجاب ابتلاء وعدم الإنجاب ابتلاء، كل حاجة في الدنيا ابتلاءات، الدنيا كدة مليانة، والدنيا دار ابتلاء مش حاجة تانية. فإنت مختبر بكل الكلام ده.

النعمة مطلوب منك فيها إيه؟ الشكر. والشكر ده حاجة صعب جداً الناس تعملها، يعني فعلاً قليل جداً اللي بيؤدي شكر الله عز وجل، حتى الله عز وجل قال: {اعْمَلُوا آلَ دَاوُودَ شُكْرًا وَقَلِيلٌ مِّنْ عِبَادِيَ الشَّكُورُ}. قليل الشكور، فإنت الآن بتمنى نعمة ونعمة، هل تقدر على شكر النعمة؟ تقدر عليه؟ قال ما تقدرش ومعظم الناس ما بتقدرش.

فالباب الأوسع عليك الصبر، إنك لما يجيلك ابتلاء مثلاً، مثلاً أبوك مات، هتعمل إيه؟ هتعمل إيه؟ هتنطط، هتصوت، هتلطم، هتشيل، هتحط، في الآخر هتصبر وهتسلك كما تسلك البهائم، لكن في الآخر هتصبر. هترجع في الآخر للصبر، فأوسع باب ليك الصبر، لكن لو بدأت الأمر نفسه بالصبر بفضل الله عز وجل والرضا بقدر الله دخلت الجنة من أوسع أبوابها. لكن سخطت وقنطت وعملت مشاكل في الأول، هتنتهي في الآخر غصب عنك للصبر، ما عندكش حيلة غيره، لإنه هتعمل إيه؟ هترجع أبوك؟ مفيش حاجة ترجعه، انتهى الموضوع.

فالباب الصبر أوسع باب سبحان الله، لدرجة تلاقي معظم الناس فقراء، معظم الناس مرضى، معظم الناس مبتلين بالضراء مش بالسراء، ليه؟ لأن ده أوسع باب وأسهل باب تدخل منه الجنة، بس لما تبقى فاهم المسألة. إنما ربنا يفقر إنسان يسخط ويقنط من رحمة الله ويعترض على قدر ربنا ويقول ليه يا رب وأشمعنا أنا وإزاي كدة، راح في داهية، لا كسب دنيا ولا كسب آخرة. والله تعالى أعلى وأعلم."

 

عمرو عبد الجليل: "طب نتكلم عن الأرزاق بقى، يقال إن الأرزاق بتوزع الصبح بدري، ده حقيقي؟"

الشيخ أيمن: "نعم. الرسول ﷺ قال 'تتعاقب فيكم ملائكة بالليل والنهار'، في ملائكة بينزلوا من الفجر يقعدوا مع الإنسان لحد العصر وملائكة بتنزل العصر تقعد مع الإنسان لحد الفجر، {لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ}. الملائكة دي حفظة وفي نفس الوقت بكونوا جايبين الأرزاق. وبعد الفجر بالذات وقت الأذكار، أذكار الصباح دي وأذكار المساء، اللي بيكون صاحي وقاعد يذكر الله سبحانه وتعالى في مجلسه خلاص بيقوله 'خذ' بياخد رزقه، 'بارك الله لك فيه'.

اللي بكون غافل أو لاهي أو نايم مش واعي في الوقت ده ولا بيذكر الله عز وجل بيقوله 'خذ' برضو لأن مفيش حد بيرزق غير الله عز وجل ومستحيل ربنا يخلق إنسان ما يرزقوش، لكن يقوله 'خذ لا بارك الله لك فيه'.

فالوقت ده وقت البركة في الرزق، مش بس توزيع الرزق، وقت البركة في الرزق، وقت بعد الفجر وقت أذكار الصباح. الوقت ده مَنهي عن الصلاة فيه، الإنسان ممنوع يصلي لأن ده وقت أذكار، تقول أذكار الصباح. تخيل إن الصلاة حُرمت في الوقت ده عشان تقول أذكار الصباح. ووقت بعد العصر لحد المغرب محرم الصلاة فيه عشان ده وقت أذكار المساء.

اللي بيذكر الله عز وجل في الأوقات دي بفضل الله عز وجل ربنا بيبارك له في رزقه أولاً وبياخد رزقه بفضل الله عز وجل من الملائكة، وبفضل الله سبحانه وتعالى الذكر اللي بيذكره ده ينجيه من عذاب القبر وينجيه يوم القيامة بإذن الله عز وجل، {قَبْلَ طُلُوعِ الشَّمْسِ وَقَبْلَ غُرُوبِهَا} {بِالْغُدُوِّ وَالْآصَالِ}.

الوقت ده وقت أذكار الصباح والمساء، اللي بيذكر ربنا في الوقت ده في القبر ما بيتعذبش، 'بالغدو والآصال'، اللي ما بيذكرش ربنا في الوقت ده بيُعذب في القبر في 'الغدو والآصال' في الوقتين نفسهم دول."

 

عمرو عبد الجليل: "يعني إن شاء الله نفهم من الكلام ده إن إحنا لازم نصحى بدري، أو إحنا طبعاً في رمضان هنبقى صاحيين طول الليل عشان نصلي الفجر، نهتم جداً بقى بأذكار بعد الصلاة عشان ده وقت توزيع الرزق ووقت البركة في الرزق، ربنا يبارك لكم في رزقكم إن شاء الله.

.

• توأم رمضان | الحلقة السادسة

 

[امانى يسرى محمد 327]

السحر والشعوذة - توأم رمضان 7

 

 

تفريغ الحلقة الجديدة من أهم حلقات الموسم: السحر والشعوذة  :

عمرو عبد الجليل: "عمالة تروح لده، يقولها حطي حجاب مش عارف إيه تحت المخدة، وحطي مش عارف إيه، ورشي ده فين، ويا نهار أسود، يا ريته خد فلوس، خد دينك، سلبك دينك."
 

الداعية أيمن عبد الجليل: "اقرأ دي مش عارف 500 مرة، ودي 333 مرة، ودي 4 أربعات، ودي 5 خمسات، يحصلك ما أعرفش إيه، والناس بالهبل بتعمل الكلام ده، وبيتلبسهم شياطين وبيصرخوا."

 

عمرو عبد الجليل: "طب إن شاء الله عايزين نتكلم في السحر والشعوذة، أولاً بقى فيه فرق بين السحر والشعوذة؟"

الداعية أيمن عبد الجليل: "الحمد لله، طبعاً السحر بيعمله ساحر، والساحر بيعمل سحر حقيقي، وبيأثر في الناس بجد. الشعوذة حد بيعمل شوية حاجات كده، يعني زي اللي هي خفة اليد، الخيالات، البتاع، يعني بالبلدي كده نصاب يعني، ما بيعملش حاجة حقيقية يعني. لكن الساحر بيعمل سحر حقيقي، وبيسخر جن حقيقي، أو الجن بيسخره مش هو اللي بيسخر الجن يعني، حقيقي وبيأذي الناس حقيقي.
والسحر مذكور في كتاب الله سبحانه وتعالى في سورة البقرة:
﴿وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ ۖ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ﴾
فالسحر كفر، حتى الملائكة وهي بتعلم الناس السحر بتقولهم ده كفر إوعى تتعلمه، بيصروا يتعلموا، يقولهم كفر ما تعملوش يصر يتعلموا، تالت مرة كفر ما تعملوش ويصر يتعلموا، فبيعلّموا السحر كويس، فيتعلمون منهما ما يفرقون به بين المرء وزوجه، سحر التفريق مذكور بالاسم في كتاب الله سبحانه وتعالى وسنة رسوله، التفريق بين المرء وزوجه، التفريق بين واحد وصاحبه، بين واحد وأمه وأبوه وجاره وشريكه في الشغل، بين أي اتنين مع بعض كويس، كل ده سحر تفريق يقع بين كل الناس دي وبين بعضها يعني، فالقرآن قال كدة سبحان الله ربنا تعالى كمّل الآية بقى وقال:
﴿وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ﴾

هنا إيه بقى وما هم بضارين به من أحد إلا بإذن الله، ما هو كل شيء في الدنيا، كل النفع بإذن الله، وكل الضر بإذن الله، لا يحدث شيء في أرض الله وفي ملك الله إلا بإذن سبحانه وتعالى، سواء إذن شرعي أو إذن كوني، فيه إذن شرعي ربنا أمرك بده وما أمرش ونهى عن ده، إذا عملت ده اتبعت الشرع الحمد لله، فيه إذن كوني خلاص ربنا سمح بالزنا أن يكون، سمح للسرقة أن تكون، أذن لها لكن مش إذن شرعي، ده إذن كوني كويس، سمح بالحلال وبالحرام، سمح للشيطان أن يوسوس للناس ويضلهم ويمنيهم ويغرهم وهكذا، سمح بده لكن هو لا يرضى بذلك، وعقوبة ذلك شديدة جداً في الآخرة، لكن سمح بده، إذاً كل شيء بإذن الله أو كل شيء بقدر الله عز وجل.
اشمعنى دي بالذات في السحر ربنا سبحانه وتعالى نص ووضح إن وما هم بضارين به من أحد إلا بإذن الله، ما هو أي شيء أنا لما بيصيبني مرض ما هو بإذن الله، أومال بإذن مين؟ أكيد بإذن الله، لو أصابني أي شيء بقى خسارة في مال في صحة في ولد في أي شيء ما هو بإذن الله مش بإذن حد تاني، اشمعنى ده بالذات عشان فيه بني آدم في الموضوع، فعشان فيه بني آدم الناس دايماً بتتعلق بالأسباب، فبيحسوا إن الساحر ده ملك الدنيا، سيطر على الكون، ممكن بقى يقول للشيء كن فيكون، قادر على كل شيء، الناس بتخاف منه وبتعمله حساب وبتتبعهم في بعض الأوقات وده خطير جداً، لذلك ربنا بيصلح عقيدة الناس عشان مش عايز الناس تضل كويس فبيصلحلهم عقيدتهم خد بالك إن ده حتى لو مُكن من ده برضه بإذن الله ما خرجوش عن طاعة الله ولا عن ملك الله، فالسحر بيقع وموجود ومذكور في كتاب الله وسيظل موجود إلى يوم القيامة، مش حد يقولك السحر كان زمان أيام الرسول صلى الله عليه وسلم ودلوقتي خلاص خلص، مفيش دليل إنه خلص، السحر بالفعل المضارع فالمضارع معناه الاستمرار على طول بإذن الله عز وجل يعني والله تعالى أعلى وأعلم."

 

 

عمرو عبد الجليل: "طب سؤال بقى، هل فعلاً الجن ممكن يدخل في جسم البني آدم؟"

الداعية أيمن عبد الجليل: "طبعاً، مكتوب برضه مذكور في كتاب الله عز وجل سورة البقرة، الله عز وجل قال:
﴿الَّذِينَ يَأْكُلُونَ الرِّبَا لَا يَقُومُونَ إِلَّا كَمَا يَقُومُ الَّذِي يَتَخَبَّطُهُ الشَّيْطَانُ مِنَ الْمَسِّ﴾
"اللي بياكلوا الربا في الدنيا، لا يقومون يعني يوم القيامة من قبورهم إلا كما يقوم الذي يتخبطه الشيطان من المس، إنت شفت ربنا بيدي مثال على شيء غيب هيحصل يوم القيامة بشيء مادي ملموس ومحسوس إحنا شفناه في الدنيا، اللي بياكل ربا في الدنيا يوم القيامة لما يجي يقوم من القبر هيقوم زي اللي إنت شفته في الدنيا بيتخبطه الشيطان من المس كويس، يعني يقولك طب ده مس مش لبس، لا ما هو المس هنا معناه لبس، يعني الجن جوه، إيه الدليل؟ كلمة (يتخبطه) الكلمة دي معناها إن الجن جوه، إزاي؟ النهاردة أنا في إيدي عصاية أو خشبة خلاص خبطتك بيها اسمي إيه؟ خبطتك، طيب أنا مسكتك إنت نفسك كدة وخبطتك في الحيطان من الحيطة دي للحيطة دي من الحيطة دي للحيطة دي اسمي إيه؟ خبطتك، ماشي، إزاي بقى أنا نفسي أتخبطك أجيبها إزاي دي؟ أتخبطك لازم أكون جواك وبتخبط بيك، أنا اللي بعمل فعل التخبط والفعل بيقع عليك إنت، فاهمني؟ فأنا كدة بتخبطك، ما يجيش إلا كدة، ده اللغة العربية بتقول كدة، فلازم يكون الجن جوه الإنسان لابسه جواه والجن نفسه اللي بيفعل فعل التخبط لكن الفعل واقع على الإنسان نفسه، فهو كدة بيتخبطه، أدي المسألة، فده دليل إن الجن جوه الإنسان لابسه والجن بيتخبط بالإنسان، الأمر واضح تماماً واللغة العربية بتقول كدة.

 

 

عمرو عبد الجليل: "ماشي، طب إيه بقى جزاء السحرة والمشعوذين والناس دي؟

 

الداعية أيمن عبد الجليل: "إحنا قلنا في الآية "وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ" فالسحر كفر، وجزاء السحر السحر فعل من أفعال الكفر الأكبر المخرج من الملة، والرسول صلى الله عليه وسلم قال "من سحر فقد كفر"، الساحر كافر ولا يجوز مطلقاً لأي إنسان مؤمن موحد بالله يسحر، وإن سحر خرج من الملة، وإتيان الساحر برضه كفر، اللي يروح لساحر أو دجال أو مشعوذ كما قال عليه الصلاة والسلام "من أتى كاهناً أو عرافاً فصدقه بما يقول فقد كفر بما أنزل على محمد"، الموضوع مش سهل أبداً، مش موضوع معلش أصل كان لازم أروح عشان أعرف ما كنتش أعرف إنه دجال ولا ساحر إلا لما رحت، لا لازم تعرف قبل ما تروح، طب إزاي أعرف قبل ما أروح؟ علامات الساحر ظاهرة جداً جداً جداً لا تخفى وما يقدرش يخفيها، إزاي بقى؟ هقولك إزاي، زي الناس إنت الآن هتقولي مثلاً أنا تعبان عندي كدة كدة كدة، هقولك طب فيه شيخ كويس هوديك ليه، طب استنى قبل ما توديني للشيخ الكويس بتاعك ده بيعمل إيه؟ أقولك أبداً هياخد اسمك واسم أمك بس على طول وأنت مغمض ده ساحر، خلاص هيقولك هيجيب هيقولك هات شيء من أترك عشان يكشف عليك فيك إيه وما فيكش إيه، شيء من أترك يعني من ملابسك من ضوافرك من شعرك أي شيء فيه الـ dna بتاعك، الجن بيشم ريحة الإنسان يعرف يجيبه من وسط 100 بني آدم ولا مليون بني آدم كويس، زي الكلب كدة الله يعزك الكلب لو شم ريحة الإنسان يتتبع الأثر لحد ما يجيبه، الجن عنده نفس حاسة الشم دي اللي عند الكلب بالظبط، لو شم ريحتك في أي مكان يقدر يتبعك، فلذلك الساحر يقولك هاتلي حاجة من أثره اللي إنت عايز تسحره، تجيبله شيء من أثره يبعتله جن، ومعناه إنه هيسلط عليه جن فالجن هيتبع الأثر ده لحد ما يوصله وبعد ما يوصله هيأذيه أو هيدخل فيه أو يعمل أي شيء فيسلط الجن عليه.

لما أقولك هيقولك هات حاجة من أترك 100% سحر مفيش حل غير كدة، فاهمني؟ هيخبرك بأشياء ما حدش يعرفها، حاجة حصلت معاك في الماضي خلاص، إنت يوم التلات اللي فات وقعت في الحمام؟ أه عرف عرف منين؟ هو كان معايا في البيت؟ عرف منين؟ ما حدش في الدنيا يعرف الكلام ده، يوم الخميس اللي فات ماعرفش إنت أختك اطلقت مش عارف مين مين، إنت أبوك عمل ما عرفش إيه، كلام كله فات مضى، حقائق حصلت، طب هو عرف المعلومة دي منين؟ هل يعرف كل شيء عن كل الناس؟ ده يبقى ربنا، ما حدش يعرف كل شيء عن كل الناس إلا الله سبحانه وتعالى، أومال هو عرف منك إنت إزاي المعلومة دي دلوقتي أو عنك المعلومة دي إزاي دلوقتي مع إن معاه جن وجنه بيتصل بقرينك وقرينك يعرف عنك كل حاجة، فقرينك قال للجن اللي معاه واحد اتنين تلاتة والجن قاله في ودنه واحد اتنين تلاتة فقالك إنت حصلك كدة وحصلك كدة وحصلك كدة، على طول أول ما تسمع الكلمتين دول يا نهار أبيض تسلم بقى، ده عارف كل حاجة، ما شاء الله بقى يا مولانا وكلام الغريب جداً اللي يقعدوا يقولوه ده، فيقولك بقى هيحصلك كدة في المستقبل، ده شرك بالله لا يجوز أبداً حد يتكلم فيه، لأن ربنا سبحانه وتعالى قال "قُل لَّا يَعْلَمُ مَن فِي السَّمَاوَاتِ وَالْأَرْضِ الْغَيْبَ إِلَّا اللَّهُ"، ما حدش في السماوات والأرض يعلم الغيب إلا الله عز وجل، وده بيتكلم في هيحصل في المستقبل، فلا يجوز مطلقاً أي حد في الدنيا يتكلم في ده إلا الله عز وجل أو نبي مرسل من الله بعلم من الله يتكلم عن المستقبل، غير كدة ما حدش يتكلم، فأي حد من هؤلاء يتكلم عن المستقبل 100% ضل ومضل أو كافر كمان واللي يتبعه أو يصدقه يبقى كافر زيه، عشان كدة الرسول صلى الله عليه وسلم قال "من أتى كاهناً أو عرافاً فصدقه بما يقول فقد كفر بما أنزل على محمد"، فلازم الإنسان يحتاط جداً لدينه، يقولك والله ده كويس جداً ده ما بياخدش فلوس! يا نهار أبيض يا ريته خد فلوس.. خد دينك سلبك دينك.
هو الشيطان مستفيد إيه من الفلوس؟ هو الشيطان بيصرف فلوس؟ بيتعامل بفلوس الشيطان؟ الشيطان أهم حاجة عنده يخصرك دينك. إبليس نفسه ما يفرقش معاه أنت يعني معاك كتير معاك قليل كذا.. أو ده يديك فلوس كمان المهم إنك تشرك بالله هو ده الهدف عنده.

فاللي بيأتي كاهن أو عراف فيصدقه خرج من الملة "قد كفر بما أنزل على محمد".
ومن لم يصدقه فلا تقبل له صلاة أربعين يوم. فاللي صدق خرج من الملة واللي مصدقش ترد عليه الصلاة أربعين يوم.
ما يتركش الصلاة ترك الصلاة كافر، حيصلي وتترد عليه الصلاة أربعين يوم.

فأمر خطير جداً إتيان الكاهن أو العراف أو الدجال أو الساحر خطير جداً جداً على دينك. فالناس السذج يقولك ده طيب جداً ما بياخدش فلوس!

يا ريته خد الفلوس.. إيه الفلوس ولا ليها أي قيمة أصلاً يعني، إنما ده خد دينك سلبك دينك اللي أهم من كل شيء بوظلك الدنيا والآخرة كمان والله تعالى أعلم.

 

 

عمرو عبد الجليل: لا إله إلا الله.. طب دلوقتي في واحدة بتقول إيه إن هي حاسة إن هي معمولها عمل وعندها عكوسات بقى وتعطيل في الشغل وفي البيت وفي المشاوير وفي الحياة وكده يعني.. نعم.. وعمالة بقى تروح لده يقولها حطي حجاب مش عارف إيه تحت المخدة وحطي مش عارف إيه إيه ورشي ده فين والاستغلالات دي.. نعم.. إيه بقى الحل؟

أيمن عبد الجليل: طيب أول هيقول الحلول كتير أولاً هي فعلاً عندها شيء ولا متوهمة؟ نمرة واحد، نمرة اتنين إحنا قولنا الابتلاءات في الدنيا كتيرة جداً قد يُبتلى الإنسان بذنب عمله وما تابش منه.. خلاص "ما من مصيبة إلا بذنب ولن ترفع إلا بتوبة" فقد يكون مصائب هي عملتها قبل كده أو ذنوب عملتها وما تابتش منها عشان كدة سُلّط عليها شيء أو يكون عندها أي ابتلاء من الله عز وجل مفيش جن ولا سحر ولا حاجة قد يكون.
فالأول تفتش في نفسها عندها أي خلل في العبادة، خلل في.. الناس للاسف لا بتصلي ولا بتصوم ولا تعرف ربنا وبعدين تقولك أنا معمولي ومعمولي.. حاجة غريبة جداً، الأول صلح أنت من نفسك وبعدين نشوف. نمرة اتنين الأشياء دي ليها أعراض زي أي مرض في الدنيا ليه أعراض، كويس؟ أي حد أي واحدة مثلاً عندها تساقط في الشعر غزير خلاص الشعرة بتنزل خصلة كاملة من جدورها، عندها نسيان كتير عندها تشتت ذهني عندها آلام في الكتاف أو تقل في الكتاف عندها آلام في أسفل الظهر ضيق في النفس من غير سبب كتمة في الصدر من غير سبب نفسها صعب وكويس وضيق بقى وطفش وزهق وخنقة وبتاع من غير سبب، ألم في البطن في المعدة غثيان حموضة انتفاخ ألم في البطن بأي شكل من غير سبب برضه.. كل الكلام ده مع كوابيس في المنام مزعجة تحلم إنها حد بيطاردها عايز يأذيها حد بيجري وراها بتقع من مكان عالي تحلم إنها بتطير في الهوا، الأشياء دي كلها دليل على إن الكلام ده فيه جن. كويس؟ فبإذن الله لو فيه أعراض زي كدة تدور على حد يكون بيعرف ربنا يكون بيعالج بالقرآن بجد لأن الآن كتير جداً بيقولوا بيعالجوا بالقرآن وكلهم سحرة ودجالين.
كويس؟ والرسول عليه السلام قال في صحيح مسلم إن في البحر شياطين مسجونة أوثقها سليمان عليه الصلاة والسلام يوشك أن تخرج وتقرأ على الناس قرآناً.. فكتروا جداً جداً جداً هؤلاء الشياطين في الزمن ده وبيقرأوا على الناس قرآن، لكن بيقرأوا القرآن غلط ويقولك القرآن يجيبوا آيات مالهاش علاقة بالموضوع يقولك اقرأ الآية دي قد كدة من الأعداد، والكلام ده ما أنزل الله به من سلطان.. ربنا الوحيد في الكون اللي يشرع الأمر يقولك اقرأ الآية دي بالعدد ده يحصلك كدة، أمر بتاع ربنا محدش يجرؤ يدخل فيه إلا الله عز وجل أو رسول بأمر من الله، إنما أنا أحدد آية معينة اقرأها بعدد معين وأرتب عليها أجور ده أنا كدة بضاهي نفسي بالله عز وجل أنا كدة شريك لله في ملكه وفي حكمه، لا يجوز الكلام ده مطلقاً وده مالي الدنيا الإنترنت واليوتيوب مليان كلام من ده. حروف مقطعة في القرآن الكريم طه وحم وكهيعص وغيره ويقولك اقرأ دي مش عارف خمسمية مرة ودي تلتمية تلاتة وتلاتين مرة ودي أربع أربعات ودي خمس خمسات يحصلك ما أعرفش إيه والناس بالهبل بتعمل الكلام ده وبيتلابسهم شياطين وبيصرخوا من الجهل ومن الشرك بالله اللي بيعملوه ده وهما لا يدروا إنه بيعملوا شيء خطير جداً على دينهم والله تعالى أعلم.

 

عمرو عبد الجليل: إزاي الواحد يحصن نفسه من السحر؟

 

أيمن عبد الجليل: يحصن نفسه.. ممتاز جداً بفضل عز وجل. أول تحصين في الدنيا الصلوات الخمسة، لازم تصلي الخمسة هتبقى مسلم الأول، كويس؟ بعد الصلوات الخمسة بإذن الله عز وجل لما تصليها في أول وقتها بتفيد جداً جداً جداً. وبعد كدة بعد الصلوات الخمسة عندي خمس أنواع من الأذكار لازم أقولها كل يوم في أوقاتها:

١. أذكار الصباح والمساء اللي هي بعد الفجر وبعد العصر.

٢. أذكار بعد الصلاة.. ماقومش من على السجادة لما أكون قولت أذكار الصلاة ده تحصين تحصين ضخم جداً جداً جداً.

٣. أذكار النوم.. قبل ما أنام في أذكار معينة تقرأ لابد تقرأ بإذن الله عز وجل قبل ما أنام.

٤. ذكرين خفيفين.. ذكر دخول الحمام والخروج منه. "بسم الله اللهم إني أعوذ بك من الخبث والخبائث" وأنا خارج من الحمام أقول "غفرانك" بس.

٥. قبل الأكل وبعد الأكل.. "بسم الله" وبعد الأكل "الحمد لله".

بسم الله.. اتفضلوا معانا. الله يبارك فيك.

فالفكرة إن "بسم الله" بس مش "بسم الله الرحمن الرحيم".. فيه فرق بين التسمية والبسملة. التسمية "بسم الله" فقط لا غير، دي كل الأذكار عندنا تبتدي ببسم الله وبعدين تقول الذكر. دخول الخلاء "بسم الله اللهم إني أعوذ بك من الخبث والخبائث" داخل البيت "بسم الله ولجنا وباسم الله خرجنا وعلى الله ربنا توكلنا" خارج من البيت "بسم الله توكلت على الله ولا حول ولا قوة إلا بالله" إلى آخر الحديث، كل الأدعية كدة في الأذكار كدة بسم الله ثم الذكر، بسم الله ثم الذكر. في ذكر مهم جداً الرسول صلى الله عليه وسلم برضه نبه عليه قال: "ستر ما بين أعين الجن وعورات بني آدم - أي رجل أو امرأة بيبدل هدومه في غرفة النوم أو في الحمام - لازم يقول الذكر ده عشان الجن بيطلع على عورته وممكن الجن يلبسه بسبب الاطلاع على العورة ده للشهوة، فإزاي يستر نفسه عن الجن.. ستر ما بين أعين الجن وعورات بنو آدم بسم الله الذي لا إله إلا هو" بس كدة، يقول الذكر ده باللفظ كدة "بسم الله الذي لا إله إلا هو" فقط، يستر عورته عن الجن، فكل ما يقلع ملابسه يقول الذكر ده بفضل الله عز وجل مش هيحصل أي أذية بإذن الله. نوع من أنواع التحصين برضه.

فالإنسان يقول الأذكار دي كلها بسم الله بس فقط لا غير، لكن مش بسم الله الرحمن الرحيم.. بسم الله الرحمن الرحيم دي آية من آيات الله في كتاب الله في القرآن ودي خاصة بالقرآن بس، جمع الله عز وجل الرحمن مع الرحيم مع بسم الله لأن القرآن كله رحمة مافوش أي حاجة تانية، لكن أي حاجة تانية بنعملها مش كلها رحمة فقط.. فبذلك أي حاجة نقول بسم الله فقط لا غير، لكن القرآن "بسم الله الرحمن الرحيم".

 

فإحنا قولنا أول حاجة الصلوات الخمسة، بعدين أذكار الصباح والمساء، أذكار بعد الصلاة، أذكار النوم، ثم دخول الحمام والخروج منه، وقبل الأكل وبعد الأكل.. اللي يحافظ على الكلام ده بإذن الله يحافظ نفسه من الجن من السحر من العين من الفيروس والميكروب والجرثومة والبكتيريا والطفيليات وكل ما ترى وكل ما لا ترى ومن الابتلاءات كلها ومن الحرق والغرق والسم والحسد وكل شيء بفضل الله عز وجل، فمهم جداً كل إنسان يحصن نفسه ويومياً.. اللي ما بيحصنش نفسه الله يعينه بقى اللي عايش كدة هلهلي كدة الله يعينه بيحصلوا إيه والله تعالى أعلى وأعلم.

 

عمرو عبد الجليل: الله يكرمك.. ناخد بالنا يا إخوانا إن كل واحد يقول الأذكار دي ويتمسك بيها عشان يحصن نفسه من أي تهيؤات لأن التهيؤات كترت جداً ما شاء الله.

 

أيمن عبد الجليل: نعم، الشرور فوق وتحت وحوالينا في كل مكان وفي كل لحظة وإحنا لا نرى كل الكلام ده وربنا أنعم علينا بشوية أذكار بسيطة نقولها تحصنا من كل شيء وهتلاقي نفسك لما تحافظ على الأذكار دي كلها من "الذاكرين الله كثيراً والذاكرات"

هيبقى لسانك رطب بذكر الله عز وجل، نعمة كبيرة جداً بتقترب جداً جداً جداً من معية الله وولاية الله لك وحكمة الله ورحمة الله عز وجل سبحانه وتعالى.. فمين في الدنيا يستغنى عن شيء زي كدة أو مين مش محتاج؟ محدش كلنا محتاجين جداً جداً جداً.. فبفضل الله إن ربنا بين لنا الطريق وعرفنا التحصينات شكلها إيه فنلتزم بيها بإذن الله عز وجل

[امانى يسرى محمد 327]

 

القضاء والقدر - توأم رمضان 8

 

 

عمرو عبد الجليل: هل الدعاء بيغير القدر؟

أيمن عبد الجليل: كل كون بالنسبة لربنا سبحانه وتعالى شيء حصل خلاص انتهى.



عمرو عبد الجليل: يعني ندعي إزاي؟

أيمن عبد الجليل: أنت عارف ربنا كاتب إيه في اللوح المحفوظ؟ لا، ولا حد يعرف.



عمرو عبد الجليل: هنتكلم بقى إن شاء الله عن القضاء والقدر، أولاً قولنا إيه الفرق بين القضاء والقدر.

أيمن عبد الجليل: الحمد لله، والصلاة والسلام على رسول الله صلى الله عليه وسلم، القضاء هو علم الله عز وجل المطلق الأزلي الأبدي اللي في اللوح المحفوظ، ربنا سبحانه وتعالى خلق الزمن، الزمن مخلوق والمكان مخلوق، فالله عز وجل يعلم كل شيء في الكون، اللي كان واللي هيكون واللي ماكانش أصلاً لو كان كيف كان يكون، كويس؟
فمافيش حاجة أبداً تبعد عن علم الله سبحانه وتعالى، ربنا سبحانه وتعالى بيتكلم عن يوم القيامة اللي هو غيب الغيوب بالنسبة لنا بصيغة الماضي، "وسيق الذين كفروا إلى جهنم زمراً" سيق خلاص انتهى مش لسه حيا، كويس؟ "وأدخل الذين آمنوا وعملوا الصالحات جنات تجري من تحتها الأنهار" "وسيق الذين اتقوا ربهم إلى الجنة زمراً" "وقال الشيطان لما قضي الأمر" "ونفخ في الصور فصعق من في السماوات ومن في الأرض" كله في الفعل الماضي، فربنا سبحانه وتعالى علمه محيط بكل المخلوقات، لأن الله عز وجل مش زينا، ربنا علمه أزلي أبدي، أنا مخلوق جوه الزمن،
عندي حاضر ومستقبل وماضي، النهاردة بالنسبة لي حاضر، امبارح ماضي، بكرة مستقبل، ربنا ماعندوش الكلام ده لأن ربنا سبحانه وتعالى خالق الزمن والزمن مخلوق والله عز وجل بائن عن خلقه، مش حيدخل في خلقه لا يحل في مخلوقاته ولا مخلوقاته تحل فيه، كويس؟

فبالتالي ربنا ماعندوش حاضر ومستقبل وماضي، كل الكون بالنسبة لربنا سبحانه وتعالى شيء حصل خلاص انتهى، فربنا يعلم كل شيء، بمعنى أنت خلقت في علم الله سبحانه وتعالى وخيرت بين الأقدار وعرضت عليك كل الأقدار وخيرت بين الأقدار واخترت أقدارك بنفسك بحرية تامة وبإرادة مطلقة اخترت كل شيء كويس في علم الله، وربنا كتب الكلام ده كله في اللوح المحفوظ، نمرة اتنين بعد كدة جيت الدنيا دي عشان تنفذ اللي أنت اخترته وتشهد على نفسك ويشهد عليك سمعك وبصرك وإيدك ورجلك وجلدك والملائكة والأرض والسماء وكل شيء يشهد عليك كويس والله عز وجل فوق كل ذلك شهيد، فالمسألة إن أنت جاي تعمل اللي أنت اخترته، دي المسألة ده القضاء، ده القضاء اللي هو في اللوح المحفوظ، القدر نزول علم الله عز وجل المطلق اللي في القضاء ده في الدنيا تحققه، ماشي كويس كدة؟

فالنهاردة ربنا مقدر عليك أو مش مقدر عليك إن بمعنى عليك كلمة عليك دي بتشكل جداً مع الناس ويقولك طب أنا ذنبي إيه؟ ربنا قدر أو كتب من علمه أنت اخترت وربنا كتب اللي أنت اخترته فدي اختياراتك أنت، ربنا كتب كذا وكذا وكذا وكذا وانتهى الموضوع، فربنا بقى اللي هو كاتبه ده بيتحقق في الدنيا وهو نازل في الدنيا حتى يتحقق عندك فرصة تانية إنك تغير القدر بقى، القدر هو نزول القضاء من اللوح المحفوظ للدنيا.


عمرو عبد الجليل: طب سؤال بقى، هل الدعاء بيغير القدر؟

أيمن عبد الجليل: طبعاً، جداً، الرسول صلى الله عليه وسلم قال لا يرد القدر إلا الدعاء، كويس؟ فالدعاء فعلاً يغير القدر بفضل الله عز وجل، بمعنى إن أنت دعيت دعاء لله عز وجل أي دعاء أياً كان، ربنا قال سبحانه وتعالى "وقال ربكم ادعوني أستجب لكم" فاللي يجي يقولك أنا دعيت ربنا بقى له أد إيه بيدعي وربنا مابيستجبش كداب، إوعى تقول ربنا مابيستجبش أنت كدة كأنك والعياذ بالله بتكدب الله عز وجل، ربنا بيقول "ادعوني أستجب" مقتولش مابيستجبش هو الاستجابة مشكلتها إنها تلات أنواع مش نوع واحد، إما إن ربنا يديك اللي أنت عاوزه ده اللي أنت متخيل إنه هو ده الاستجابة، يديك اللي أنت عاوزه الآن، ربنا لو يعلم إن اللي أنت عاوزه ده ومحتاج له فيه خير ليك الآن حيديهولك، ربنا يعني هو اللي بيرزق الخلق كله منذ خلق الأرض ومن عليها حتى تقوم الساعة، كل الكائنات بقى إنس وجن وطيور وحشرات وحيوانات وأسماك في البحار وكل شيء في الكون الرزاق الله عز وجل ربنا اللي بيرزق ده كله، فشوف قد إيه أنفق سبحانه وتعالى وعز وجل من أول ما خلق الدنيا لحد ما تنتهي الأرض ومن عليها مش هيعجزه حاجة يديهالك ولا يديها لده أو ده لكن ربنا حكيم، ربنا مابيديش إلا بحكمة لو يعلم سبحانه وتعالى إن أنت لو اداك اللي أنت عاوزه الآن فيه مصلحة ليك حيديهولك مش حيفرق معاه حاجة مش حياخده لنفسه مش حيعمل بيه حاجة مثلاً، لكن لو عالم سبحانه وتعالى إن اللي أنت عاوزه الآن ده مافيش خير ليك كويس مش حيديهولك، إن كان ليك خير فيه قدام شوية حياجله لقدام شوية مالكش خير فيه خالص مش حيديهولك، يبقى أنا كدة دعيت وربنا مأستجابش؟ لا استجاب بس الاستجابة هنا اختلفت، إيه بقى نوع الاستجابة؟ إن الدعاء بتاعك يكون طالع ونازل بلاء من السما من اللوح المحفوظ فيتعالجان يتصارعان الاتنين إلى يوم القيامة، البلاء نازل والدعاء طالع فالاتنين يقعدوا يتصارعوا مع بعض ليوم القيامة، إذن البلاء مانزلش بإيه؟ بالدعاء اللي أنت دعيته، إذن استفدت من الدعاء ولا ماستفدتش؟ استفدت فايدة عظيمة جداً رفع عنك بلاء ولا تعلم أي شيء عنه وحجمه قد إيه بالدعاء بتاعك، طب افرض ماكانش في بلاء نازل مش مقدر بلاء ينزل دلوقتي خلاص يبقى الدعاء ده بإذن الله عز وجل هتجده يوم القيامة حسنات لا يمكن تتخيلها ولا تحلم بيها لما تشوف ساعتها الكرامة اللي حصلتلك من الدعاء بتاعك كنت ساعتها تتمنى أو ترجو الله عز وجل إنه ماكانش استجابلك ولا دعاء في الدنيا وأجله كله يوم القيامة للكرامة اللي هتشوفها، فإذاً ربنا استجاب ولا ماستجابش؟ استجاب وربنا سبحانه وتعالى يعني 100% ربنا سبحانه وتعالى صادق في اللي بيقوله يعني "ومن أصدق من الله قيلاً" لا أحد فربنا استجاب فعلاً لكن نوع الاستجابة أنت ماتعرفش هو إيه، فإحنا مشكلتنا إن إحنا نعرف نوع واحد بس من الاستجابة إن يا رب اديني فيديني اديني ده فيديني ده ودلوقتي، إذا مأعملش كدة يبقى مأستجبش لا استجاب فاهمني؟ لكن نوع الاستجابة بيفرق،

فطبعاً هنا الدعاء بيرد القدر بفضل الله عز وجل، كدة فرقنا بين القضاء اللي هو علم الله عز وجل المطلق المحيط في اللوح المحفوظ وبعدين نزول القضاء في الدنيا هو ده القدر، القدر ممكن يرد عنك عندك فرصة كمان تانية بعد كل اللي فات ده إنك تغير أقدارك بفضل الله عز وجل لما تدعي، بعض الدعاء يغير بعض القدر مش كل الدعاء ومش كل القدر بحكمة برضه المسألة مش بمزاجنا بحكمة يعلمها الله سبحانه وتعالى فلذلك الدعاء فعلاً يرد القدر بإذن الله تعالى.

 

عمرو عبد الجليل: طب سؤال بقى، قالك بقى إيه علمت إن الجنين وهو في بطن أمه بيتكتب قدره وبيتكتب رزقه وبيتكتب هو شقي ولا سعيد، طب اللي يعني طبعاً الشقاء والسعادة دي هتبقى في الآخرة يعني، طب اللي مكتوب له إنه شقي ده بقى ذنبه إيه ده لسه مأتولدش ومأعملش أي حاجة؟ أيمن عبد الجليل: ما هو المشكلة هنا أنت بتتكلم في لسه مأتولدش يعني بتتكلم جوه الزمن، ربنا اللي قدر المقادير دي هو خارج الزمن سبحانه وتعالى، مش خارج وداخل يعني زماني إن ربنا في داخل مكان أو خارج المكان ربنا سبحانه وتعالى لا يحل في شيء ولا يخرج من شيء إنما ربنا بائن عن خلقه منفصل عن خلقه مش مايدخلش كويس ؟، فالفكرة إن ربنا معندوش زمن، إنت في علم الله نفس الكلام، خلقت وخيرت واخترت وربنا كتب كل اللي إنت اخترته، ففي علم الله سبحانه وتعالى من قبل ما يخلقك في الدنيا، خلقت في علمه، خلقت في علم الله عز وجل، كويس؟ في عالم اسمه عالم الذر، قبل ما نخلق في الدنيا، خلقنا في عالم اسمه عالم الذر الأول، ثم عالم الرحم، في رحم أمك 9 شهور، ثم عالم الدنيا، ثم بعد كدة عالم البرزخ، ثم بعد كدة عالم الآخرة بإذن الله يوم القيامة، ثم الجنة أو النار. فكل دي عوالم بنعيش فيها، أول عالم خلقت فيه عالم الذر. في الآية في سورة الأعراف: ﴿وَإِذْ أَخَذَ رَبُّكَ مِن بَنِي آدَمَ مِن ظُهُورِهِمْ ذُرِّيَّتَهُمْ وَأَشْهَدَهُمْ عَلَىٰ أَنفُسِهِمْ أَلَسْتُ بِرَبِّكُمْ ۖ قَالُوا بَلَىٰ ۛ شَهِدْنَا ۛ أَن تَقُولُوا يَوْمَ الْقِيَامَةِ إِنَّا كُنَّا عَنْ هَٰذَا غَافِلِينَ، أَوْ تَقُولُوا إِنَّمَا أَشْرَكَ آبَاؤُنَا مِن قَبْلُ وَكُنَّا ذُرِّيَّةً مِّن بَعْدِهِمْ ۖ أَفَتُهْلِكُنَا بِمَا فَعَلَ الْمُبْطِلُونَ﴾ يعني ربنا خلقك وخيرك وإنت اخترت، وأشهدك على نفسك أنا ربك قلت أيوة، اقتنعت واعترفت وكل شيء. فجيت الدنيا بقى تنفذ اللي إنت اخترته ده، هتقولي بس أنا مش فاكر أي حاجة من الكلام ده، معرفش، بس ربنا ذكره في القرآن إذاً 100% حصل. هتقولي مش فاكر حاجة، طب إنت يقيناً قعدت في رحم الأم 9 شهور، كل البشر كدة، ولا حد يقول مقعدتش؟ كله قعد، فاكر 5 دقايق؟ فاكر دقيقتين؟ فاكر ثانية؟ مش فاكر حاجة، إذاً برضو نفس ما إنت خلقت في عالم الذر ومش فاكر منه أي حاجة، فاهمني؟ ومع ذلك عشت فيه. عالم الذر بالنسبة لعالم الرحم ده يعني أكبر جداً جداً جداً، ثم جيت عالم الرحم، بالنسبة لك عالم الرحم ده رحب تماماً عن عالم الذر، وبعد كدة عالم الدنيا أكبر وأرحب بكتير جداً من الرحم، ثم البرزخ أكبر بكتير جداً وأرحب من الدنيا بشكل ضخم جداً، ثم الآخرة يوم القيامة الواحد 50 ألف سنة: ﴿تَعْرُجُ الْمَلَائِكَةُ وَالرُّوحُ إِلَيْهِ فِي يَوْمٍ كَانَ مِقْدَارُهُ خَمْسِينَ أَلْفَ سَنَةٍ﴾. فسبحان الله، وبعد كدة يوم القيامة بقى خلود في الجنة أو خلود والعياذ بالله في السعير. كويس؟ فإنت خلقت وعرض عليك كل شيء واخترت كل شيء، وربنا كتب من علمه مش كتب عليك، يعني إنت في الآخر مش هتلقى غير اللي إنت اخترته واللي إنت عملته، اللي إنت عملته فعلاً. كل شيء قدامك، ﴿وَهَدَيْنَاهُ النَّجْدَيْنِ﴾، ﴿إِمَّا شَاكِرًا وَإِمَّا كَفُورًا﴾، شكرت، ﴿وَمَن يَشْكُرْ فَإِنَّمَا يَشْكُرُ لِنَفْسِهِ﴾. كويس؟ فالمسألة في إيدك إنت وكل شيء بإرادتك بإذن الله عز وجل، فمش هتجزى إلا بما تفعل، ﴿يَا أَيُّهَا الَّذِينَ كَفَرُوا لَا تَعْتَذِرُوا الْيَوْمَ ۖ إِنَّمَا تُجْزَوْنَ مَا كُنتُمْ تَعْمَلُونَ﴾ فإنت بتجزى بعملك مش باللي ربنا كاتبه، إنت عارف ربنا كاتب إيه في اللوح المحفوظ؟ لا، ولا حد يعرف، فمتحتجش باللوح المحفوظ، إنت الآن بتحتج بعملك وربنا مش هيسألك ع اللي كاتبه في اللوح المحفوظ، هيسألك عن عملك اللي إنت بتعمله، فإنت هتيجي في الدنيا وتعمل اللي إنت اخترته، وهيُكتب عليك اللي إنت اخترته وهتتحاسب على اللي إنت اخترته، "وَلَا يَظْلِمُ رَبُّكَ أَحَدًا، وَمَا ظَلَمْنَاهُمْ وَلَٰكِن كَانُوا أَنفُسَهُمْ يَظْلِمُونَ". واضح الكلام؟ والله تعالى أعلى وأعلم. عمرو عبد الجليل: الله يفتح عليك، الله يكرمك. طيب بما إن الدعاء بيرد القدر أو بيغير القدر، إحنا عايزين بقى نعرف إيه صيغة الدعاء؟ يعني ندعي إزاي؟ أيمن عبد الجليل : نعم، الحمد لله، أولاً الدعاء بيرد القدر أي دعاء، مش دعاء محدد بصيغة معينة، أي دعاء بتدعيه في حياتك بأي شكل من الأشكال، إنت محتاج كل شيء من ربنا، محتاج الصحة والمال والولد والنفس والرزق والبركة، ومحتاج كمان الجنة ومحتاج إنك تبعد عن النار، ومحتاج نعيم القبر، ومحتاج كل شيء، إدعي بما شئت. فالدعاء نفسه اللي إنت بتدعيه، ربنا أي دعاء أياً كان، إما ربنا سبحانه يديهولك في الدنيا، أو يرد بيه بعض القدر، قلنا ببعض الدعاء بعض القدر مش كل دعاء ولا كل القدر، يرد بيه بعض القدر أو يديهولك في الآخرة فإنت كدة كسبان 100%. ﴿وَلَمْ أَكُن بِدُعَائِكَ رَبِّ شَقِيًّا﴾، مفيش حد بيشقى أبداً طول ما بيدعو الله عز وجل، لأن 100% هياخد مع الدعاء خير عظيم جداً بإذن الله تعالى. فالإنسان يدعو الله بما شاء وقتما شاء حيثما شاء، ولكن ربنا هيرد بإيه؟ ده مش في إيدينا ولا نعرف عنه حد. لكن إيه صيغة الدعاء؟ أي دعاء إنت عاوزه، بأي حاجة، لكن أكثر أكثر من الدعاء وإنت اللي كسبان في كل الحالات بإذن الله تعالى، والله أعلم. عمرو عبد الجليل: طب ممكن بقى تدعلنا دعاء كدة لينا وللأمة الإسلامية وللناس أجمعين. أيمن عبد الجليل: اللهم مستعان. الحمد لله والصلاة والسلام على رسول الله صلى الله عليه وسلم، اللهم اهدنا فيمن هديت، وعافنا فيمن عافيت، وتولنا فيمن توليت، وبارك لنا اللهم فيما أعطيت، وقنا واصرف عنا شر ما قضيت. اللهم إنا نسألك موجبات رحمتك، وعزائم مغفرتك، والغنيمة من كل بر، والنجاة من كل إثم، والفوز بالجنة، والنجاة من النار. اللهم اجعل اجتماعنا هذا اجتماعاً مرحوماً، وتفرقنا من بعده تفرقاً معصوماً، ولا تجعل فينا ولا منا ولا بيننا شقياً ولا محروماً. اللهم آمين يا رب العالمين. سبحانك اللهم وبحمدك، نشهد أن لا إله إلا أنت، نستغفرك ونتوب إليك. عمرو عبد الجليل: السلام عليكم ورحمة الله وبركاته.

[امانى يسرى محمد 327]

 

[امانى يسرى محمد 327]

الرد على اسئلة الكومنات1 - توأم رمضان10 مع عمرو عبد الجليل

 

[امانى يسرى محمد 327]

: سؤال مهم يا شيخ أيمن: هل حقيقي في ناس عندها كرامات؟ وإزاي أفرق بين الولي وبين الد..جال؟

= ده سؤال كبير شوية. في الإسلام عندنا حاجة اسمها "خوارق العادات" ودي ثلاث أنواع لا رابع لها

 

. النوع الأول هو "المعجزات"، ودي خاصة بالأنبياء فقط، ربنا بيجريها على إيد نبي عشان يثبت للناس إنه مرسل من عند الله

. زي سيدنا إبراهيم لما أُلقي في النــ.ار، ربنا قال للنـ.ار كوني برداً وسلاماً ولم يحترق

معجزة بكل المقاييس كسر بها الله القوانين عشان يثبت نبوته

. وبما إن النبي عليه الصلاة والسلام هو خاتم الأنبياء، فمفيش معجزات تاني هتحصل لأي حد بعده

.

النوع التاني هو "الكرامات" ودي بتكون "للأولياء"

. ربنا قال: "ألا إن أولياء الله لا خوف عليهم ولا هم يحزنون، الذين آمنوا وكانوا يتقون"

. يعني أي إنسان مؤمن وبيتقي الله في عمله وقوله ممكن يكون من أولياء الله، مش لازم الولي يكون مدفون في قبر وعليه قبة ومقام والناس تطوف حواليه!

الكرامة بتيجي للإنسان من غير ميعاد ومن غير وقت ما يعرفش هتيجي إمتى، زي ما حصل مع السيدة مريم لما كان بيجيلها رزق من عند الله بدون أسباب

الولي الحقيقي بيكون شايف نفسه ولا شيء وفقير جداً وذليل لله، وربنا بيجري على إيده كرامة لحل مشكلة عنده، ومش بيستخدمها عشان يتمنظر بيها على خلق الله

.

: أومال الناس اللي بتطير في الهوا وتاكل إزاز وتمشي على المية، دول إيه ظروفهم؟

= : ده بقى النوع التالت من خوارق العادات، وهو "الأحوال الشيــ..طانية"

. لما واحد يقولك تعال يوم الخميس الساعة 4 هعملك كذا وأحط سيخ في ودني، أو أمشي على المية وأطير في الهوا، دي 100% أحوال شيــ..طانية!

الإنسان معندوش الخاصية دي، الشيــ..اطين هي اللي بتحمله عشان تفتن بيه الناس

. تلاقي الناس المخدوعة تقول "ده ولي"، بس لو فتشت في حاله الظاهر هتلاقيه قد يكون لا يصلي أو بيرتكب محرمات مقطوع بحرمتها زي الزنا أو شرب الخمر، فمستحيل يكون ولي وهو مفيش عنده تقوى!

 

الولي لا يعلم مكان الكرامة ولا موعدها وما بيطلبهاش، أما الد..جال فبيعتمد على الشيا...طين لخداع الناس

الولي الحقيقي مستتر بتقواه لا متباهٍ بخوارقه، فمن خالف شرع الله في ظاهره، لا تصدق كرامته ولو طار في الهواء!

.

[امانى يسرى محمد 327]

الرد على اسئلة الكومنات2 - توأم رمضان11

 

 

 

الرد على اسئلة الكومنات2 - توأم رمضان11

 

شفت حلم يخوف وقمت تجري تحكيه لكل من هب ودب عشان تطمن؟ طب تعرف إنك كده ممكن تكون بتدمر حياتك بإيدك وبتجيب لنفسك المصــ..ايب؟ اقرأ الحوار ده عشان تفهم
.
حد بيقول أنا شفت رؤية في المنام وخايف جداً.. أعمل إيه؟
= : طبعاً إحنا ما نعرفش هي كانت رؤية ولا مش رؤية! الإنسان لو نام بيشوف حاجة من تلاتة: يا إما رؤية بتكون من الله عز وجل
يا إما حلم من الشيــ.طان لان الاحلام كلها هي ف الاساس من الشــي.طان
يا إما أضغاث أحلام (ودي عبارة عن تفريغ للعقل الباطن، بيكون الإنسان مر بخبرات معينة سيئة في حياته فبتطلع عشان ما تعملهوش عقدة نفسية أو شخصية فبتطلع على هيئة أحلام)
. وعادةً الإنسان ما يقدرش يفرق بين التلاتة، المعبر الحقيقي بس هو اللي يقدر يميز إذا كانت رؤية ولا لأ، ويكون معبر فاهم مش زي الدجا.لين اللي ماليين الدنيا دلوقتي
.
الرسول صلى الله عليه وسلم له هدي معين في المسألة دي.. لو شفت شيء يعجبك ويفرحك وتظن إنه خير بإذن الله، قال عليه الصلاة والسلام: "إذا رأيت ما تحب فلا تحدث إلا من تحب"، وفي رواية قال: "لا تحدث إلا عالم أو ناصح"
عالم بالتأويل، وناصح يعني حد بيحبك جداً لدرجة إنه يختارلك الخير لان الرؤية الواحدة ممكن تحتمل تأويلين أو تلاتة أو أربعة، والرسول صلى الله عليه وسلم قال: "الرؤيا معلقة على رِجل طائر ما لم تُؤَوَّل"، يعني طول ما الرؤية ماتفسرتش هي معلقة، لو اتفسرت سقطت ووقعت!
. عشان كده خطير جداً حد يفسر الرؤية غلط أو يفسرها وحش، ياما بيوت خربت وحياة ناس اتدمرت بسبب رؤية اتفسرت بشكل غبي
.
هديك مثال: لو واحد شاف في المنام إنه "محمول على الأعناق"، الرؤية دي ممكن تتفسر بإيه؟ ممكن تحتمل إنه هيــمو..ت ويُحمل في جنازة، وممكن تحتمل إنه يُفتضح وأمره ينتشر على رؤوس الخلائق، وممكن تحتمل إنه يعلو قومه ويسودهم ويبقى سيد في قومه!
تخيل بقى لو رحت حكيتها لواحد بيكرهك وحاقد عليك، هيختارلك المو..ت أو الفضــ..يحة، وتقع الرؤية على التفسير ده! ولو رحت لواحد جاهل قالك "دي معناها إنك هتتجوز"، هيبوظ الرؤية كلها ومش هينزل منها لا خير ولا شر، مع إن كان ممكن يكون فيها خير كتير
. عشان كده لو شفت رؤية دور على حد مشهور بالصلاح والتأويل، بلاش الد..جالين اللي بيسمعوا من القرين ويقولولك تفاصيل حياتك ويوهموك إنهم بيفسروا أحلام
.
أما لو شفت حلم يخوفك وشكله مش كويس وحسيت إن فيه شر، فده حلم من الشيــ..طان، لأن الشيطان بيجيلك في المنام يتلاعب بيك وعايز يهمك ويحزنك ويكئبك ويضايقك
. هدي النبي صلى الله عليه وسلم هنا إنك تعمل تلات حاجات: أولاً: تستعيذ بالله من شر ما رأيت ومن شر الشيــ.طان
ثانياً: تتفل (تنفخ هوا بريق بسيط) على يسارك تلات مرات
ثالثاً: لا تحدث بها أحداً.. اقفل بقك وماتحكيش التفاصيل لأي حد، فإنها لا تضرك
كمان من هدي النبي إنك لو نايم على جنبك اليمين تغير لجنبك الشمال والعكس، ده بيغير طقوس الشيــ..طان اللي كان بيسيطر بيها عليك وبيصرفه عنك تماماً، وبتحتاج منه مجهود كبير عشان يرجعلك تاني، فهتكمل ليلتك في أمان بفضل الله، وطبعاً تواظب على أذكار النوم وخاصة آية الكرسي
.
الكلمة نور، وبعض الكلمات قبور.. فاحفظ سر منامك، فالرؤيا على جناح طائر متى فُسرت وقعت، ولا تطلب تفسيرها إلا من مُحبٍ ناصح أو عالمٍ فاهم.

 

هل الميت بيحس بينا أو بيسمعنا لما بنروح نزوره في القبر؟

.

= الميت لما بيدخل القبر بيقعد فيه بس دقايق معدودة لحد ما يجي الملكين يسألوه السؤالين وينتهي الموضوع

. وبعد كده بيدخل في عالم تاني خالص ومختلف كلياً عن العالم اللي إحنا فيه، اسمه "عالم البرزخ"، وبيفضل فيه إلى يوم القيامة

. في ناس بقالها 300 ألف سنة ومليون سنة في البرزخ! بمجرد ما الإنسان يموت الجسد ده بيتحلل في القبر وبياكله الدود، والروح بتروح عند الله عز وجل؛ لو مؤمنة بتكون في "عليين"، ولو كافــ.رة وفاجــ.رة بتكون والعياذ بالله في "سجين" البرزخ ده يا إما بيكون برزخ من الجنة يا إما برزخ من النا..ر

.

عشان كده لما تروح تزور القبر، الزيارة دي أصلاً مش للميت.. الزيارة دي للحي!

الرسول صلى الله عليه وسلم قال: "كنت نهيتكم عن زيارة القبور ألا فزوروها فإنها تذكر بالآخرة"

. أنا بروح أزور أبويا في القبر مش عشانه .. أنا بروح عشان أنا اللي أتعظ وأتذكر آخرتي، وأشوف إن الإنسان اللي كان ملء السمع والبصر، وكان بيأمر وينهى ودخوله ليه معنى وخروجه ليه معنى، انتهى تماماً وأصبح طي النسيان

"الميت مش موجود في القبر أساساً ومش هيحس بيك"

.

. الميت مش هيستفيد أي حاجة من الزيارة دي، لكن بيستفيد من الدعاء

. ولما تدعي للميت، ربنا هو اللي بيسمع الدعاء، لإن ربنا قال: "إنك لا تسمع الموتى ولا تسمع الصم الدعاء إذا ولوا مدبرين"

ربنا بيبعت ملائكة للميت بهدية ويقوله دي هدية ابنك دعالك بكذا، أو الميت يلاقي نفسه ارتفع درجة واتخفف عنه أذى فيقولوله دي بكرامة دعاء ابنك فالدعاء بيوصل في أي زمان ومكان.

حتى النبي صلى الله عليه وسلم لما حد بيسلم عليه، ربنا هو اللي بيسمّعه وبترد إليه روحه عشان يرد السلام، لكنه عليه الصلاة والسلام في عالم آخر مختلف كلياً

. زي بالظبط الفرق بين حياه الرحم (9 شهور) وحياتنا في الدنيا اللي أوسع بكتير ... حياه البرزخ بقى أعظم وأفسح بكتير جداً وعمرها أطول من حياه الدنيا، وبعدها بتيجي القيامة 50 ألف سنة، وبعدين الخلود في الجنة أو النار

.

الميت بعد الوفاة ملوش إرادة ومقهور تماماً لله الواحد القهار

. كل حاجة بتتعمل فيه غصب عنه ومبنية للمجهول (وسيق، وأدخل)، حتى إنه يجيلك في المنام ده مش بمزاجه!

واحد يقولك "أبويا زعلان مني بقاله فترة مجاليش في المنام".. أبوك لا في إيده يجيلك ولا في إيده ميجيلكش، ولا هو دريان بيك أساساً في العالم اللي إنت فيه إلا لو ربنا أطلعه على حاجة

. أنا شخصياً عمري ما شفت أبويا في المنام لا وهو حي ولا وهو ميت، إلا مرة واحدة بس بعد ما عملت حلقة عن "بر الوالدين"، وربنا هو اللي أذن لروحه إنها تجيلي مش هو اللي جالي بمزاجه

. فادعوا لموتاكم من أي مكان وسيبوكم من وهم إن الميت قاعد في القبر مستنيكم

.

لا تبحث عن أحبائك في تراب القبور المظلمة، بل ابعث لهم نوراً من الدعاء يضيء برزخهم.. فالمسافة بينك وبينهم ليست تذكرة سفر ومقبرة، بل سجدة صادقة ويد مرفوعة للسماء.

 

 

قراءة الفاتحة من البدع ولم يفعلها رسول الله

إحنا ليه بندخل آيات ربنا في العادات عشان نعقد نفسنا

.

- شاب باعت بيقول: "أنا قريت فاتحة بنت وعايز أسيبها، بس خايخف،  أسيبها عشان قرينا الفاتحة!"، إيه رأيك في الكلام ده؟

= خايف يسيبها ليه؟! يعني هي الفاتحة مقدسة بالنسبة له للدرجة اللي تخليه يترعب؟

. أولاً، سورة الفاتحة دي "أم الكتاب"، القرآن كله من أوله لآخره موجز في الفاتحة، وهي شيء عظيم جداً والشافية وركن من أركان الصلاة، لا صلاة لمن لم يقرأ بفاتحة الكتاب

. لكن إحنا للأسف أخدنا الفاتحة في حتة تانية خالص! بقينا نقول "أقرا فاتحتها"، " كأن ليها فاتحة وليها قفلة"

وأروح أشتري أرض أو عربية أقرأ الفاتحة! إحنا كده بنحط القرآن في مكان مش بتاعه ولم يُنزل ليه، وبنستخدمه فيما لم يُشرع له

.

-يعني قراءة الفاتحة في الخطوبة أو البيع والشراء مش من الدين؟

= تعتبر قراءة الفاتحة من البدع، لم يفعلها النبي صلى الله عليه وسلم ولا الصحابة ولا التابعين ولا أهل العلم

. في حاجة شرعية اسمها "خِطبة"، لكن مفيش حاجة اسمها "قريت فاتحتها مقدرش أسيبها ده هيحصلي مصيــ.بة!" كأن الفاتحة دي لعــ..نة اللي يفكها يتأذي! الفاتحة ما شُرعتش عشان تُقرأ هنا، وعادي جداً تسيب البنت مفيش مشكلة مش هيحصل لك حاجة لو سبتها ولقيتها مش مناسبة ليك

.

-طب لو حد خطب وبعد فترة لقى الأمور مش متظبطة، يعمل إيه عشان ما يظلمش حد؟

= الخطبة دي أصلاً فترة تعارف. لو اتعرف عليها ولقى الطباع مش متوافقة، الأسلوب مش مناسب، مش مطيعة أو مش زي ما كان متخيلها، من حقه يفسخ الخطبة عادي جداً، والبنت كمان ليها الحق إنها تفسخ الخطبة لو الشاب طلع مش مناسب ليها، مفيش أي حاجة حرام لو عملنا كده

. المفروض الإنسان يستخير الله عز وجل جداً قبل الزواج، ولو كل شيء مرضي بيتوكلوا على الله. التوفيق بعد الجواز ده 2% تقريباً، والـ 98% في علم الغيب لا يعلمه إلا الله، عشان كده بنستخير ربنا يختار لنا الخير ويبعد عننا الشر

.

لا تُحمّل آيات الله ما لم تنزل له من العادات والتقاليد، فالخطبة وعد بالزواج وفترة للتعارف، والرجوع في الحق والاختيار الصح خير من التمادي في الباطل خوفاً من كلام الناس!

 

 

 

 

[امانى يسرى محمد 327]

الزكاة - توأم رمضان 12

 

بتروحي للصايغ تدي له دهبك القديم وتدفعي الفرق وتاخدي دهب جديد وتفرحي بيه؟ يا فرحة ما تمت.. إنتي كده وقعتي في فخ "الربا" الصريح

سؤال المذيع "عمرو عبدالجليل":
: في واحدة بتقول إن عندها دهب قديم حوالي 22 جرام، وعايزة تدخله في غويشة أو إسورة 25 جرام.. إيه رأيك؟
رد الشيخ "أيمن عبدالجليل": = : اللفظ ده عجيب وخطير جداً! دي نقطة معظم المصريين، وخصوصاً الستات، واقعين فيها وهي تبديل الذهب بالذهب مع دفع الفرق. الرسول عليه الصلاة والسلام حدد أصناف ربوية منها الذهب، وقال: "الذهب بالذهب.. يداً بيد وسواء بسواء، فمن زاد أو استزاد فقد أربى". يعني لو هتبدل ذهب بذهب، لازم يكون نفس الجرامات بالظبط (22 جرام بـ 22 جرام) والتسليم في نفس الوقت في المجلس. طبعاً الصايغ مستحيل يوافق يديكي 22 جرام جديد بـ 22 جرام قديم من غير مصنعية وفرق، طب إيه الحل الشرعي عشان نهرب من الربا؟ الحل الوحيد إنك "تبيعي" الذهب القديم بتاعك للصايغ وتاخدي الفلوس في إيدك، وبعدين "تخرجي" من المحل تماماً عشان البيعة الأولى تتم شرعاً (عملاً بحديث: البيعان بالخيار ما لم يتفرقا). وبعدين ترجعي تدخلي المحل تاني كأنك زبونة جديدة وتشتري الذهب الجديد اللي إنتي عايزاه بالفلوس اللي معاكي. ما ينفعش تبدلي ذهب بذهب وتدفعي فرق، أو تعملي بيعتين في بيعة واحدة. الكلام ده مطبق في دول زي السعودية والناس هناك فاهماه، بس هنا في مصر الجهل بيه منتشر جداً، وده ربا صريح ولازم نحترس منه!
نصيحة البوست: "الجهل بأحكام البيع والشراء قد يوقعك في كبائر الذنوب كالربا وأنت لا تدري.. فتفقّه في دينك تنجُ بمالك وآخرتك.







بتوزع فلوسك على الشحاتين في الشارع وفاكر إنك كده بتطلع زكاتك وربنا هيتقبل؟ للأسف زكاتك دي أصلاً متقبلتش ولسه دين في رقبتك!

عمرو عبدالجليل: إيه الفرق بين الزكاة والصدقة؟ وهل لما أتصدق على حد في الشارع تعتبر زكاة؟

رد الشيخ "أيمن عبدالجليل"الزكاة طبعاً ركن من أركان الإسلام وتجب على كل إنسان توفرت فيه الشروط، أما الصدقة فهي سنة ونافلة، اللي يشاء يعملها ياخد أجر عظيم، واللي ما يعملهاش مفيش عليه إثم لأنها مش واجبة. بالنسبة لسؤالك عن الحد اللي في الشارع، دي مشكلة كبيرة! إنت بتشوف مسكين بتديله فلوس وتعتبرها زكاة، لكن الزكاة بالذات ليها 8 أصناف مذكورين في القرآن لازم تُصرف ليهم حصراً. لو الحد اللي في الشارع ده فعلاً من الأصناف التمانية وإديته فلوس، فدي إن شاء الله تجزئك. لكن لو ما كانش من الأصناف التمانية، لا تجزئك أبداً وتعتبر لسه الزكاة عليك وموقعتش عنك. وكمان لازم تاخد بالك من نقطة مهمة: لو هو مش من الأصناف التمانية وإديتله حاجة غير الفلوس (زي أكل أو لبس) دي لا تجزئك كزكاة، لأن زكاة المال لازم تطلع مال متطلعش حاجة تانية.
نصيحة البوست: "النية الطيبة وحدها لا تكفي إن لم توافق شرع الله، فاعرف مصارف زكاتك الحقيقية لتبرئ ذمتك، فالزكاة حق الله في مالك، وليست مجرد إحسان عابر."




واحد فقير تماماً ونفسه يبقى مليونير،

فقال لك هو المليونير عليه زكاة مال قد إيه؟ قد كدة يعني 25 ألف..
قال لك خلاص أنا هطلع زكاة الـ 25 ألف وإن شاء الله ربنا يرزقني المليون. عمل كدة سبحان الله ما عداش الحول السنة إلا لما كان جاله المليون!
راح مطلع زكاة 2 مليون جاله الـ 2 مليون.. ماشي بالشكل ده عجيب، ماشي بالعكس بس سبحان الله ظبطت معاه. أنا ما بقولش الناس تعمل كدة، ده إنسان عنده يقين عالي جداً جداً إنه هيقدم الزكاة المال مش عنده وعلى يقين إن ربنا هيدي له المال ده، ما إحنا ما أمرناش بكدة ولا ده من السنة، إنما الراجل ده عمل الحكاية دي ونفعت معاه لأن يقينه على الله عز وجل 100% وده اللي نفع. فابشر خير وطلع الزكاة اللي عليك واستبشر تماماً بالخير لأن ربنا لا يمكن يضيع أجر من أحسن عملاً، لابد ربنا يحسن إليك أكثر من عملك مليارات المرات.


 

[امانى يسرى محمد 327]

مستخسر تطلع الزكاة وشايف إن المبلغ اللي طلعلك في الحسبة صغير وميستاهلش تدفعه؟ أو خايف فلوسك تنقص؟ اسمع الكلام ده ...

عمرو عبدالجليل : فلوسي بلغت النصاب بس أنا شايف إن المبلغ اللي هيطلع مش كبير.. أعمل إيه؟

 

رد الشيخ "أيمن عبدالجليل": = : كونك شايف إن المبلغ مش كبير دي مشكلتك إنت للأسف! أولاً إنت مش اللي بتحدد إن كان المبلغ كبير ولا صغير. طالما المال بلغ النصاب اللي حدده ربنا سبحانه وتعالى، وحال عليه الحول، يبقى تجب عليك الزكاة فوراً. وما تخافش المبلغ والله ما هيقل، ده هيزيد وهيزيد كتير جداً. معنى كلمة "الزكاة" في الأصل هو الطهارة والنماء.. هي بتطهر المال من أي شبهة دخلت فيه، وبتنميه وتزوده. والنبي عليه الصلاة والسلام قال: "ما نقص مال من صدقة"، والصدقة هنا مقصود بيها الزكاة كمان. الزكاة دي ركن من أركان الإسلام مش مجرد فريضة عادية. ولنا في التاريخ عبرة، لما توفي الرسول عليه الصلاة والسلام وبعض الناس امتنعوا عن دفع الزكاة لسيدنا أبو بكر الصديق وقالوا "خُذ من أموالهم" دي كانت لسيدنا محمد ومحمد مات.. سيدنا أبو بكر غضب بشدة وقال مقولته الشهيرة: "والله لا ينقص الإسلام وأنا حي! والله لو منعوني عقال بعير كانوا يؤدونه لرسول الله لقاتلتهم عليه". وفعلاً حاربهم في حروب المرتدين عشان يرجع الناس للنصاب الصحيح، والحمد لله بفضل وقفته الزكاة باقية في الأمة ليوم القيامة.

 

الخلاصه"الزكاة لا تنقص المال بل تطهره وتطرح فيه البركة، فمن جاد بماله لله، جاد الله عليه بفضل وعطاء لا ينفد."

فاكر إنك لما تدي زكاتك للغريب يبقى إنت كده عملت اللي عليك؟ طب تعرف إن أقرايبك ليهم حق في زكاتك، وممكن كمان تطلع زكاتك لواحد مش مسلم وتؤجر عليها!!

 

سؤال المذيع "عمرو عبدالجليل":

: هل ينفع أطلع الزكاة للأقارب؟ ومين هما المؤلفة قلوبهم؟

 

رد الشيخ "أيمن عبدالجليل": = : مش بس ينفع للأقارب، ده يجب! الأقربون أولى بالمعروف، بس لازم نوضح إن مش أي أقارب. الأقارب اللي "تجب" عليك النفقة عليهم (زي مراتك وأولادك، أو أبوك وأمك لو محتاجين) دول ما ياخدوش من الزكاة لأنك كده كده ملزم تصرف عليهم. أما الأقارب اللي "لا تجب" عليك النفقة عليهم (زي أختك، ابن خالتك، ابن عمك) لو كانوا محتاجين، فهم أولى الناس بزكاتك. إنت بكده بتاخد أجرين: أجر إخراج الزكاة وتطهير المال، وأجر صلة الرحم وبر الوالدين لأنك بتصل أقاربهم. تغطي قريبك المحتاج الأول وبعدين تشوف الغريب. أما بالنسبة لـ "المؤلفة قلوبهم" اللي مذكورين في الآية الكريمة (إنما الصدقات للفقراء والمساكين...)، فدول ممكن يكونوا ناس غير مسلمين! الإسلام من عظمته ورحمته سمح لك تدي فلوس الزكاة (الفرض مش بس الصدقة العادية) لشخص غير مسلم محتاج عشان تؤلف قلبه للإسلام. لما يشوف روعة وجمال ورحمة الدين، قلبه هينشرح، وممكن ده يكون سبب في دخوله الإسلام عن اقتناع، لأنه مش هيلاقي دين في الدنيا زيه.

 

[امانى يسرى محمد 327]

ايمن عبد الجليل : لو جيت جيبتك كده قصادي وقولتلك دول 10 شنط وقولتلك واحدة منهم فيها 100 مليون دولار
هل هتختار واحدة بس وتفتحها وتطلع هي او لا مش مهم؟
ولا هتفتحهم كلهم؟ طبعا هتقولي هفتحهم كلهم هي دي فيها هزار،

طب اي رأيك بقى أن عشر ليالي كل ليلة فيهم والله اغلي وافضل من الدنيا وما عليها مش بس الشنط

وفيهم ليلة لو فوزت بيها كأنك في عبادة أكتر من 84 سنة،
هل هتختار ليلة واحدة وتقول انا بخمن ان دي ليلة القدر وتصلي فيها وتقرأ قرآن ولا هتجتهد في كل الليالي علشان تكون ضمنت أنك فوزت بيها إن شاء الله؟

براحتك بقى هي ليلة واحدة بس

[امانى يسرى محمد 327]

الاستخارة - توأم رمضان 13

 

المفاهيم الخاطئة حول صلاة الإستخارة

وهناك بعض المفاهيم الخاطئة لصلاة الاستخارة

 كما ذكرها  الدكتور محمد بن عبد العزيز المسند:

    اعتقاد بعض الناس أنّ صلاة الاستخارة إنّما تُشرع عند التردد بين أمرين، وهذا غير صحيح، لقوله في الحديث: ( إذا همّ أحدكم بالأمر..).ولم يقل ( إذا تردد )، والهمّ مرتبة تسبق العزم، كما قال الناظم مبيّناً مراتب القصد:مراتب القصد خمس: (هاجس) ذكروا فـ (خاطر)، فـ (حديث النفس) فاستمعايليه (همّ) فـ (عزم) كلها، رُفعتْ سوى الأخير ففيه الأخذ قــد وقعافإذا أراد المسلم أن يقوم بعمل، وليس أمامه سوى خيار واحد فقط قد همّ بفعله، فليستخر الله على الفعل ثم ليقدم عليه، فإن كان قد همّ بتركه فليستخر على الترك، أمّا إن كان أمامه عدّة خيارات، فعليه أوّلاً ـ بعد أن يستشير من يثق به من أهل العلم والاختصاص ـ أن يحدّد خياراً واحداً فقط من هذه الخيارات، فإذا همّ بفعله، قدّم بين يدي ذلك الاستخارة.
   

 اعتقاد بعض الناس أنّ الاستخارة لا تشرع إلا في أمور معيّنة، كالزواج والسفر ونحو ذلك، أو في الأمور الكبيرة ذات الشأن العظيم، وهذا اعتقاد غير صحيح، لقول الراوي في الحديث: (كان يعلّمنا الاستخارة في الأمور كلّها..).ولم يقل: في بعض الأمور أو في الأمور الكبيرة، وهذا الاعتقاد جعل كثيراً من الناس يزهدون في صلاة الاستخارة في أمور قد يرونها صغيرة أو حقيرة أو ليست ذات بال؛ ويكون لها أثر كبير في حياتهم.
   

 اعتقاد بعض الناس أنّ صلاة الاستخارة لا بدّ لها من ركعتين خاصّتين،وهذا غير صحيح، لقوله في الحديث: (فليركع ركعتين من غير الفريضة..).فقوله: “من غير الفريضة” عامّ فيشمل تحيّة المسجد والسنن الرواتب وصلاة الضحى وسنّة الوضوء وغير ذلك من النوافل، فبالإمكان جعل إحدى هذه النوافل ـ مع بقاء نيتها ـ للاستخارة، وهذه إحدى صور تداخل العبادات، وذلك حين تكون إحدى العبادتين غير مقصودة لذاتها كصلاة الاستخارة، فتجزيء عنها غيرها من النوافل المقصودة.
 

   اعتقاد بعض الناس أنّه لا بد من انشراح الصدر للفعل بعد الاستخارة،وهذا لا دليل عليه، لأنّ حقيقة الاستخارة تفويض الأمر لله، حتّى وإن كان العبد كارهاً لهذا الأمر، والله عز وجل يقول: “وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ” }البقرة:216{.وهذا الاعتقاد جعل كثيراً من الناس في حيرة وتردد حتى بعد الاستخارة، وربّما كرّر الاستخارة مرّات فلا يزداد إلا حيرة وتردّداً، لا سيما إذا لم يكن منشرح الصدر للفعل الذي استخار له، والاستخارة إنّما شرعت لإزالة مثل هذا التردد والاضطراب والحيرة.وهناك اعتقاد أنه لابد من شعور بالراحة أو عدمها بعد صلاة الاستخارة وهذا غير صحيح فربما يعتري المرء شعور بأحدهما وربما لا ينتابه أي شعور فلا يردده ذلك بل الصحيح أن الله يسير له ما أختاره له من أمر ويتمه.
   

 اعتقاد بعض الناس أنّه لا بدّ أن يرى رؤيا بعد الاستخارة تدله على الصواب، وربّما توقّف عنالإقدام على العمل بعد الاستخارة انتظاراً للرؤيا، وهذا الاعتقاد لا دليل عليه، بل الواجب على العبد بعد الاستخارة أن يبادر إلى العمل مفوّضاً الأمر إلى الله كما سبق، فإن رأى رؤيا صالحة تبيّن له الصواب، فذلك نور على نور، وإلا فلا ينبغي له انتظار ذلك.

 

اسلام اون لاين

 

[امانى يسرى محمد 327]

دايماً بنسمع قصة سيدنا الخضر مع سيدنا موسى كأنها حدوتة، إيه السر العظيم ورا القصة دي وإزاي بتشرح لنا أنواع القدر اللي بنمر بيها في حياتنا؟القصة دي عبقرية جداً ومن أعجب القصص في التاريخ وفي القرآن الكريم وياريت الأمهات والآباء يحكوها لأولادهم قبل النوم عشان يتربوا عليها


. القصة بتبدأ لما سيدنا موسى ظن إنه أعلم أهل الأرض لأنه نبي الله وكليمه، فربنا عاتبه وقاله إن في عبد من عبادنا عند مجمع البحرين أعلم منك


. سيدنا موسى ما استكبرش وخد الفتى بتاعه وحوت مملح في مكتل كعلامة للمكان، ومشي مسافات طويلة جداً بتواضع عشان يطلب العلم


. لما قابل سيدنا الخضر .. الخضر اشترط عليه ميسألوش عن أي حاجة يعملها لحد ما هو اللي يوضحله السر، وموسى وافق
.



وهنا بدأت الرحلة اللي بتشرح أنواع القدر الثلاثة:


أول حاجة ركبوا سفينة مع شباب مساكين شغالين في البحر، ضيفوهم وركبوهم ببلاش، فجأة سيدنا الخضر خرم السفينة!
سيدنا موسى اتصدم وقاله إزاي تعمل كده في ناس أكرمونا؟
السر هنا كان إن في ملك ظالم بياخد كل سفينة سليمة غصباً، فربنا أمر الخضر يعيب السفينة عشان الملك يسيبها للمساكين دول


. ولما الملك يمشي، هيصلحوها ويكونوا هما الوحيدين اللي شغالين في البحر، وربنا يفتح عليهم أبواب رزق وعمرهم ما كانوا يحلموا بيها


. ده النوع الأول من القدر: ظاهره شر شديد، وباطنه خير عظيم جداً بيتعرف في الدنيا
.
تاني موقف، لقوا غلام صغير بيلعب، فقام الخضر قاتـــ...له! سيدنا موسى اعترض بشدة وقاله قتـــ...لت نفساً زكية بغير نفس؟!
الحقيقة إن الغلام ده كان أبواه مؤمنين جداً، ولو كبر كان هيطغى ويكــ..فر ويدخل أبوه وأمه معاه النار من حبهم ليه


. فربنا أراد إنه يقبضه صغير عشان يحمي الأب والأم، ويبدلهم بطفل تاني بار بيهم وتقي


. ده النوع التاني: ظاهره شر، وباطنه خير، بس الأب والأم مش هيعرفوا الحكمة دي إلا يوم القيامة، وساعتها هيسجدوا لله شكراً
.
تالت موقف : دخلوا قرية بخيلة جداً أهلها رفضوا يضيفوهم، ولقوا جدار هيقع، فقام الخضر صلحه وبناه من غير أي أجر


. سيدنا موسى استغرب وقاله دول رفضوا يأكلونا، على الأقل خد أجر!
السر كان إن الجدار تحته كنز لغلامين يتيمين، ولو الجدار وقع أهل القرية الجاحدين هياخدوا الكنز ويقـــ...تلوا اليتامى
. فربنا أراد إن الجدار يتبني لحد ما اليتامى يكبروا ويستخرجوا كنزهم بقوتهم
.
وده النوع التالت: ألطاف خفية وجدران ربنا بيبنيها لنا كل
يوم في حياتنا عشان يحمينا واحنا مانعرفش عنها حاجة
طول ما إنت شايف إن ربنا ممكن يكتب عليك شر، إنت لسه ما عرفتش ربنا بجد! كل المصا...يب اللي بتمر بيها هي رسائل حب وحماية من ربنا، بس إنت اللي مش واخد بالك.





-نفهم من كده بقى إن كل أقدار الله خير وخير فقط، ومفيش شر بيجي من عند ربنا أبداً؟ وإزاي اليقين ده بيغير حياتنا؟
= : الله يفتح عليك .. ربنا له صفات الكمال المطلق ولا يمكن
أن يكون مصدر شر مطلقاً



. أي قدر طالما من عند الله فهو مليار في المية خير محض


. شوف الأدب مع الله في قصة الخضر؛ لما اتكلم عن خرم السفينة (اللي ظاهره عيب) قال: "فأردت أن أعيبها" فنسب العيب لنفسه، ولما اتكلم عن قتـــ..ل الغلام قال: "فخشينا أن يرهقهما" نسب الفعل ليهم، لكن لما اتكلم عن الخير الخالص في بناء الجدار قال: "فأراد ربك أن يبلغا أشدهما" فنسب الخير لله عز وجل


. حتى الجن قالوا: "وأنا لا ندري أشر أريد بمن في الأرض أم أراد بهم ربهم رشدا"، فبنوا الشر للمجهول ونسبوا الرشد لربنا


. الخير كله بيد الله والشر ليس إليه
.
الإنسان لما يعلم إن أفعال الله كلها خير، بيوصل لمرحلة "النفس المطمئنة"
. دي النفس اللي بترضى عن كل أقدار ربنا في الدنيا، فربنا يرضى عنها يوم القيامة ويقولها: "ارجعي إلى ربك راضية مرضية فادخلي في عبادي وادخلي جنتي"


. العلماء المفسرين بيقولوا إن دول بيدخلوا الجنة بلا حساب ولا عقاب لأنهم كانوا مطمئنين لمراد الله في الدنيا


. لازم نعرف إن طول ما إحنا عايشين ربنا بيبنيلنا جدران يحمينا بيها واحنا مش حاسين؛ ممكن يعطلك عن مشوار عشان يحميك من حادثة، أو يمنع عنك حاجة عشان يرزقك بالأفضل


. لو استطعمنا المعاني دي وعلمناها لأولادنا، هنعيش براحة عظيمة جداً في الدنيا، وهنفوز بالجنة في الآخرة بإذن الله
.
.لو كُشف لك الغيب لاخترت الواقع.. فما تراه اليوم مصيبة أو شراً لا مبرر له، قد يكون هو عين النجاة التي دبرها لك أرحم الراحمين ليعصمك من هلاك محقق.

[امانى يسرى محمد 327]

الإعجاز العلمي في القرآن - توأم رمضان 15

الإعجاز في القرآن الكريم باب عظيم يُظهر عظمة هذا الكتاب، وكيف أن آياته تحمل دلائل ومعاني تسبق زمنها.

في هذه الحلقة نتحدث عن: • ما معنى المعجزة؟

• معجزة سيدنا موسى عليه السلام مع سحرة فرعون، وكيفادركوا انها معجزة من الله وليس سحرا؟

• الإشارات القرآنية إلى مراحل خلق الجنين كما وردت في القرآن الكريم.

• خلق الجبال وعظمة الله في خلقه كما ذكره القرآن.

رحلة نتأمل فيها بعض جوانب الإعجاز في كتاب الله، وكيف تدل هذه الآيات على عظمة الخالق سبحانه وتعالى.

 

[امانى يسرى محمد 327]

العلاج بالطاقة - توأم رمضان 16
 

قانون الجذب اللي قالبين بيه دماغنا طلع شرك صريح
وبيخليك تطلب من الصنم عربية وفلوس وناسي رب الكون كله

: عمرو عبدالجليل: طب وإيه حكاية "قانون الجذب" اللي الناس كلها بتتكلم عنه ده وبيطلبوا من الكون يحققلهم أمنياتهم؟
= : أيمن عبدالجليل: قانون الجذب ده بيقولك ادعُ شيء، قوله تعالى هيجيلك! عايز عربية، عايز طيارة، عايز عمارة، قولها تعالي تعالي وهي هتجيلك

. ادعو الكون والكون هيستجيب لك! ده عبادة للكون، بيدعو الكون من دون الله عادي جداً

. البديل الشرعي للكلام ده عندنا إحنا كمسلمين هو "حسن الظن بالله"، الإنسان إذا أحسن الظن بالله، فربنا قال في الحديث القدسي: "أنا عند ظن عبدي بي، فليظن بي ما شاء؛ إن خيراً فخير، وإن شراً فشر"

. لو ظنيت بالله عز وجل خير هيجيلك الخير، ولو ظنيت شر هيجيلك الشر، فالمسألة ليها علاقة بظنك أنت بالله سبحانه وتعالى مش بالكون

. هما بقى عندهم موضوع تاني خالص، يقولك اطلب من الكون نفسه اللي إنت عايزه، اقعد قول مثلاً "مرسيدس حمراء، مرسيدس حمراء" كتير جداً والكون هيستجيب وتلاقي عندك مرسيدس حمراء! تخيل هذا الهراء اللي الناس بتصدقه وبتردده


. ده كلام هوس ومجانين، والمصيبة السودة إن بعضهم فعلاً بيبقى عنده شياطين بتهيأله أشياء، أو بتعمله حاجات تحسسه بسعادة شوية وبخفة في جسمه، أو تقضيله حاجات محدش يقضيها إلا الشياطين عشان يصدقوا

. والشيطان ممكن يزقلك أحداث أو يهيألك إن الحاجه حصلت عشان يثبتلك خرافاتهم

الخلاصه: لا تطلب أمنياتك من المخلوق أو من الكون الصامت، بل ارفع يداك لمن بيده مقاليد الأمور، فحسن الظن بالله هو "قانون الجذب" الحقيقي الذي لا يخيب صاحبه أبداً.




لسه بتدفع فلوس عشان حد يقرألك التاروت والفنجان وتعرف حظك اليوم؟ مبروك.. أنت بتستشير جن وشياطين يمشوا حياتك!

- عمرو عبدالجليل: طب بالنسبة للناس اللي مابتاخدش أي خطوة في حياتها، ولا بتخرج من البيت غير لما ترجع لبتوع التاروت والأبراج وتسألهم أعمل إيه وماعملش إيه.. إيه تفسيرك؟
= أيمن عبدالجليل: ده بيحصل من سلطان الشياطين عليهم، لأن التاروت ده هو هو قراية الفنجان، وقراية الودع، والطالع، والكوتشينة، كلهم حاجة واحدة

. الحكاية كلها إن الدجال أو الساحر ده بيبقى معاه جن، الجن ده بيتصل بقرينك ويسأله عن تفاصيلك، ويقولها للجن اللي في ودن الدجال، فيقولك حصلك كذا وكذا وتصدقه!

. اللي بيسأل التاروت ده زيه بالظبط زي اللي كانوا في الجاهلية بيعملوا حاجة اسمها "الاستقسام بالأزلام"، يجيبوا أقلام مكتوب عليها "افعل" و"لا تفعل"، ويختاروا عشوائي عشان يمشوا حياتهم على أساسها، ده استخارة للشيطان وشرك بالله

. والنهاردة اتطور وبقى اسمه برجك وحظك اليوم، ومفيش حاجة اسمها أبراج

. أنا وأنت (يا عمرو) مثال قوي جداً على كذب وفشل الأبراج، إحنا توأم اتولدنا في نفس اليوم واللحظة والثانية ومن نفس الأب والأم، هل حظنا وقدرنا واحد؟ أبداً، إحنا مختلفين كلياً، يوم ما كنت أنت بتتجوز أنا كنت في المستشفى!

. دي عقيدة اسمها "الجبت" (عقيدة الأوهام)، الإنسان اللي إيمانه بالغيب ضعيف جداً بيبقى محتاج يمسك في حجر أو نجم أو أي حاجة مادية يتعلق بيها، وقله الدين دي بتفتح أبواب الشياطين للتحكم في الناس

. الإنسان لو مات على الشرك ده مخلد في النار والعياذ بالله، فلازم نستمسك بالله والعروة الوثقى ونفوق من الأوهام دي

الخلاصه : من توكل على الله كفاه، ومن علّق قلبه بالأبراج والتاروت والأحجار تاه في بحور الأوهام وسلّم حياته للشياطين.. فاجعل يقينك واستخارتك دائمًا في خالقك ومدبر أمرك وحده.

 

[امانى يسرى محمد 327]

ليلة القدر - توأم رمضان 17

 

- إيه فضل ليلة القدر وايه قصة "ألف شهر"؟

= ليلة القدر خير من ألف شهر، وكلمة ألف شهر دي عجيبة جداً.. الصحابة كانوا لا يعلموا رقم أكثر من ألف، فربنا لما يقول (خير من ألف شهر) معنى كده إنه لو كان عندهم مليون كان قال خير من مليون شهر، ولو عندهم مليار كان قال خير من مليار شهر.



- هل ليلة القدر تساوي 83 سنة فعلاً؟

= الناس بتروح تحسبها تقول لك يعني حوالي 83 سنة.. لا هو قال (خير من)، ما قالش تعادل 1000 شهر، خير بقد إيه؟ ما نعرفش، بعض العلماء بيقولوا لو الصحابة يعرفوا رقم أكتر من ألف كان نزل الكلام ده، لكنهم ما يعرفوش أكتر من كده.


- إيه اللي حصل للقرآن في ليلة القدر؟

= الليلة دي الوحيدة اللي نزل فيها القرآن كله كامل من اللوح المحفوظ للسماء الدنيا كتلة واحدة مرة واحدة، وبعد كده نزل للأرض على الرسول ﷺ منجم في 23 سنة مفرق حسب الأحداث.



- إيه الحرمان الحقيقي في الليلة دي؟

= المحروم الحقيقي هو اللي يُحرم الليلة دي، حرمان مهول إن الإنسان يحرم ليدرك، والمسألة بسيطة جداً، حط نفسك في أي مسجد وصلي مع الإمام حتى ينصرف كما قال النبي ﷺ: (من صلى مع الإمام حتى ينصرف كتب له قيام ليلة).


- ندعي نقول إيه في ليلة القدر؟

= الرسول ﷺ سُئل السؤال ده من السيدة عائشة، قال لها قولي: (اللهم إنك عفو تحب العفو فاعفو عنا)، تلات كلمات وبس، أنا شخصياً ما بزيدش عنهم طول الليلة.
في ناس بتقول (اللهم إنك عفو كريم)، لا مفيش كريم، النص كده: (اللهم إنك عفو تحب العفو)، التزم بالنص بالضبط ما تجودش، الرسول لو يعلم أفضل من كده كان قال لنا، وما تزودش كلمة ولا حرف، لأن الزيادة دي والعياذ بالله كأن الإنسان بيستدرك على الرسول ﷺ إنه ما أخدش باله وأنا أخدت بالي.
 

[امانى يسرى محمد 327]

الدعاء المستجاب - توأم رمضان 18