من هي الطباخة الماهرة ؟؟

[بنت الصادق 9]

أخواتي الحبيبات..

السلام عليكم ورحمة الله وبركاته

 

الموضوع دة هيكون شامل لكل الأطعمة من كل بلد..

 

انا ان شاء الله هتجوز قريب.. وأخدت دورة تدريبية في الطعام كله.. وخاصة الطعام المصري.. وفكرت اني اعمل ملف شامل عن كل الأكلات.. بس مش اي اكلة.. لأ لازم تكون مجربة

 

وهحتاج معايا هنا مساعدتكن.. وهقسم الموضوع لقسمين

 

1- القسم الأول (أكلة من كل بلد):

- الطعام المصري

- الطعام الخليجي (كويتي - سعودي - بحريني - وغيره)

- الطعام الشامي (فلسطيني - لبناني - سوري)

- الطعام المغربي والجزائري والتونسي

 

وياريت الأخوات كلهم يشاركو معايا.. انا محتاجة عالأقل من كل بلد اتنين يكتبو عن أكلات بلدهم..

 

 

2- القسم الثاني (أنواع الطعام)

- شوربات

- مقبلات

- سلطات

- المعجنات

- الأطباق الرئيسية

- الحلويات

- العصائر

 

 

 

والقسم الأول هيكون الكلام فيه مفتوح.. يعني البنات يدخلوا من كل البلاد ويكتبو الأول الأكلة من اي بلد وبعدين يكتبو الوصفة والمقادير وكل حاجة.. بس شرط ان الأكل يكون مجرب.. مش مجرد وصفة وخلاص.

 

بالنسبة للقسم التاني هنقسمه.. يعني الأول مثلا هنتكلم عن الشوربات.

 

وهنتكلم عنها حسب كل بلد..

 

وعشان اوضح اكتر

 

اول حاجة انا هسجل في قسم الأكل مصري..

هتكلم اول حاجة عن الشوربات

وكل واحدة تدخل بعدي من اي بلد بردو هتتكلم عن الشوربات لحد ما نخلص الشوربة وندخل في قسم تاني

 

وفي الآخر خالص في الهدف من دة كله حاجتين

اولهم: انه يبأة ملف كامل متكامل لأي بنت او زوجة عيزة تتعلم الطبخ او تجدد في أكلها

تاني حاجة: في الآخر هنختار اكتر واحدة متعاونة معانا وهنسميها الطباخة الماهرة.. :angry:

 

طبعا بالإجماع.. يعني هنشوف أيه احلا الطبخات والوصفات واكترها.. وخلو بالكو اهم حاجة لازم تكون مجربة

مش عيزين حالات تسمم هنا الله يخليكو :tongue:

 

يلا يبنات نبتدي بسم الله

وانا هبدأ الاول.. بس محتاجاكو معايا ضروري

مستنياكو

[بنت الصادق 9]

القسم الأول: الشوربة

 

شوربات مصرية

 

شوربة اللحم:

 

المقادير:

1- الكمية المطلوبة من اللحم. (كيلو او نص كيلو او اي كمية)

تفضل ان يكون اللحم طازج وينقع في ماء وخل. اما اذا كان ضأن فينقع بماء به نعناع حتى لا تصبح فيه رائحة

 

2- مقدار وعاء ماء متوسط حسب كمية اللحم

 

3- بصلة متوسطة

 

4- توابل (فص حبهان +ملعقة صغيرة فلفل أسود + ملعقة صغيرة ملح

 

 

الطريقة:

 

يوضع وعاء الماء على نار متوسطة ويغطى ونتركه حتى يغلي

يقطع اللحم مكعبات متوسطة ويصفى من الماء والخل ويشطف جيدا بالماء الفاتر ويصفى

تقطع البصلة 4 قطع ويوضع عليها ملعقة فلفل اسود

 

بعد أن يُغلى الماء توضع عليه البصلة ثم يوضع اللحم حتى يُسوى

يوضع عليه الحبهان

 

وبعد ان يسوى يوضع الملح..

 

وبالهناء والشفاء.. :)

 

 

ملحوظة:

1- يمنع منعا باتا وضع الملح على الشوربة قبل ان تسوى اللحمة لأنها تمنع نضوج اللحم

2- يزود الملح حسب الكمية

3- من عندها اي اضافات على الشوربة أرجو ان تضيفها حتى توضع الوصفة بأفضل طريقة على الإطلاق

تم تعديل 13 مايو, 2006 بواسطة بنت الصادق

[محبة عائشه وخديجه 0]

أنا سعيده بدخولك المطبخ معانا أهلا وسهلا فيك لكن أنا أقولك من البدايه البنات كسلانيين أوي ما يحبوش الطبخ :angry:

بمعنى أصح محدش مشارك معانا حتلا قيني أنا وأنت بس ههههههههههههه

بالنسبه لي أنا عاجبني إقتراحك وراح أشارك معاك بس عندي حاجه بقولها لحضرتك أنا عملت طبخات الدنيا هنا مش معقول أعيد الي وضعته من قبل يعني بحاول أجيب وصفات جديده إنشاء الله تعجبكم

الأن

نقسم المواضيع حسب فهمي

1 الطبخ الخليجي /شوربات *سلطات*حلويات*مأكولات رئيسيه

2 الطبخ المصري / " " " "

3 الطبخ الشامي / " " " "

4 الطبخ المغربي / " " " "

نفتح لك بلد موضوع صح ولا لا

[بنت الصادق 9]

شوربات مصرية

 

شوربة الدجاج

 

المقادير:

 

- دجاجة كاملة (منزوعة الجلد او غير منزوعة حسب الطلب - مقطعة او غير مقطعة)

(يفضل ان تكون طازجة وتنقع في ماء وخل)

- بصلة متوسطة

- توابل (ورق لوري - حبهان - مستكة - فلفل اسود - ملح)

- وعاء متوسط ملئ بالماء.. او حسب كمية الدجاج

 

الطريقة:

 

يوضع وعاء الماء على نار متوسطة ويغطى حتى تغلي الماء

تقطع البصلة اربع اجزاء ويوضع عليها ملعة صغيرة فلفل اسود.

تصفى الدجاجة من الماء والخل وتشطف جيدا ثم تصفى ويوضع عليها ملعقة كبيرة فلفل اسود ويتم دعك الدجاجة بها من الداخل والخارج حتى لا تكون هناك رائحة زفارة.

بعد ان يغلى الماء توضع الدجاجة وننتظر مدة 5 دقائق

بعدها سيتكون ريم اسود على وجه الماء.. يُزال هذا الريم بالملعة.. ثم توضع المستكة وورق اللوري والحبهان والملح.

وتترك حتى تسوى الدجاجة

يضاف الماء حسب الطلب إلى ان تستوي الدجاجة

 

وبالهناء والشفاء

[بنت الصادق 9]

نقسم المواضيع حسب فهمي

1 الطبخ الخليجي /شوربات *سلطات*حلويات*مأكولات رئيسيه

2 الطبخ المصري / " " " "

3 الطبخ الشامي / " " " "

4 الطبخ المغربي / " " " "

نفتح لك بلد موضوع صح ولا لا

 

هلا حبيبتي.. والله كنت متأكدة انك اول واحدة هتشتركي..

مظبوط كلامك.. بس الأهم من كل دة إنك لازم تكتبي كل الوصفات الكويتية لأنك من الكويت على ما اعتقد

لأني زي مقلتلك كلنا هنا هنستفاد من بعض.. انا مثلا نفسي اتعلم أكلات كويتية.. مش بس الأكل الجديد .. فهمتيني

ابدئي بالشوربة الأول ومستنياكي..

عشان لما اعملها ان شاء الله لجوزي ادعيلك ;)

[سعيدة بحجابي 1]

السلام عليكم

اه اه اه

بنت الصادق في المطبخ

كيف حالك

 

 

 

عشان لما اعملها ان شاء الله لجوزي ادعيلك ;)

 

والوالدين ما لهما نصيب من طبخك

[سعيدة بحجابي 1]

أنا سعيده بدخولك المطبخ معانا أهلا وسهلا فيك لكن أنا أقولك من البدايه البنات كسلانيين أوي ما يحبوش الطبخ :tongue:

بمعنى أصح محدش مشارك معانا حتلا قيني أنا وأنت بس ههههههههههههه

محبة ماهداالكلام :tongue:

انا دائما معك في المطبخ :angry:

اتدوق وصفاتك واشجعك 8-)

اغسل المواعين واكنس :-

واطبخ لك وصفات مغربية :wink:

[محبة عائشه وخديجه 0]

محبة ماهداالكلام :tongue:

انا دائما معك في المطبخ :angry:

صحيح والله أنتي حبيبتي بتشجعيني والله

اتدوق وصفاتك واشجعك 8-)

صح غاليتي أنت مش كسلانه بالعكس نشيطه ووضعتي أكلات جميله

اغسل المواعين واكنس :-

هههههههههههههههههههههههههههههههههههههه

واطبخ لك وصفات مغربية :wink:

كلها لذيذه بالذات الحريره :tongue:

لكن نريد منك طبخات مغربيه جديده مقبلات حلويات وجميع الأكلات

أنا أسفه حبيبتي ولا تا خذي بخاطرك

محبتك / محبة عائشه وخديجه

[بنت الصادق 9]

هههههههههههههه

أسعد الله قلوبكن دنيا وآخرة أخواتي الحبيبات

محبة عائشة وخديجة وسعيدة بحجابي

 

حبيبتي سعيدة بحجابي.. اهلا بيكي معانا.. وورينا بأة شطارتك في الطبخ.

 

وبالطبع الوالدين ليهم نصيب.. بس اكتبلنا وصفات مغربية عشان اعملها لجوزي ان شاء الله وادعيلك انتي كمان

[بنت الصادق 9]

شوربة الخضار (لذيذة)

 

 

المقادير:

 

- عدد 2 جزرة كبيرة

- عدد 4 كوسات حجم وسط

- نص كيلو فاصوليا خضرا

- نص كيلو بسلة

- توابل (ملح - فلفل اسود - مرقة دجاج ماجي - حبهان - مستكة- ورق لوري)

- 2 بصلة متوسطة

- وعاء متوسط به ماء او شوربة دجاج او لحم

- حزمة كرفس

 

 

الطريقة:

 

يغسل الخضار جيدا بالماء الفاتر ثم تقطع الكوسة حلقات بدون تقشيرها والجزر مكعبات وتقطع الفاصوليا ويغسل الكرفس جيدا ويقطع

يوضع وعاء الماء على نار متوسطة ويغطى..

بعد الغليان يقطع البصل 4.. ويوضع عليه قليلا من الفلفل الأسود ثم نضعه في الماء

بعد تجهيز الخضار وغلي الماء ووضع البصلة.. يوضع الخضار بالوعاء كله ويقلب

وبعد الغليان توضع مرقة الدجاج والملح والفلفل الأسود وورق اللوري والكرفس والمستكة..

نترك الخليط على النار حتى يُسوى

 

اذا كان عندك شوربة: بعد غلي الشوربة ضعي الخضار واتبعي نفس الخطوات السابقة بدون وضع البصل والتوابل.. لأن الشوربة ستكون بها كل هذه المكونات سابقا

 

 

وبالهناء والشفاء :)

تم تعديل 17 مايو, 2006 بواسطة بنت الصادق

[بنت الصادق 9]

شوربة لسان العصفور

 

 

المقادير:

 

كوب كبير لسان عصفور

وعاء وسط شوربة دجاج او لحم (متبلة بالملح والفلفل الأسود والحبهان... إلخ) نفس الطريقة المذكورة أعلاه

ملعقتين سمن

 

 

الطريقة

نضع السمن في وعاء على نار هادئة وعند القدح يوضع لسان العصفور ويقلب حتى يحمر لونه

توضع عليه الشوربة ونتركه حتى يغلي وحتى يُسوى

 

ملحوظة: إذا لم يكن عندك شوربة دجاج او لحم.. اصنعي شوربة بنفسك من مرقة الدجاج.. اغلي الماء في وعاء ثم ضعي عليه بعد غليه بصلة متوسطة عليها فلفل اسود.. ثم ضعي مرقة الدجاج.

بالهنا والشفا :)

تم تعديل 14 مايو, 2006 بواسطة بنت الصادق

[بنت الصادق 9]

يلا يابنات.. يامصريات..

 

عيزين شوربة العدس.. فينكو يامصريات هو مفيش غيري :(

[محبة عائشه وخديجه 0]

ما شاء الله إنتي تستاهلي لقب الطباخه الماهره

 

ماهذه الشوربات العجيبه لماذا لم تذوقينا من زمان ينفع أعملهم كلهم في يوم واحد :ohmy:

 

لأني والله مش قادره أحدد واحده كلهم لذيذات :biggrin: :oops: :wub: :wub:

 

شكلي بعمل شوربة لسان العصفور :tongue: أوصفيلي شكل لسان العصفورعندي وحده غبيه تقول يذبحو عصافير وياخذوالسانهم ياسلام على الذكاء الخارق

مارأيك بنت الصادق ؟؟؟

 

هل لسان العصفور هو الشعيريه ماجي ؟؟ :wub:

[مسك الجنان 2]

لا لا لا

 

انا مش موافقة يا بنت الصادق :oops:

 

 

مكا ينفعش الكلام ده

 

 

المفروض لو انتي عندك انتماء للوطن

 

تعملي ملف الاكلات المصرية و بس :wub:

 

 

مش اكلات خليجي و اكلات شامي :wub:

 

ده خيانة عظمي و يشرفني اني ابلغ امن الدولة عليكي :wub:

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

لا بجد بجد :tongue:

 

الموضوع حلوووووووووو اوي و فكرته حلوة جدا

 

 

و انتي احلي بصراحة و ملفاتك كلها جمييييييييييييلة جدا جدا جدا

 

جعل الله كل حرف تكتبين في ميزان حسناتك و مما يسرك ان تلقيه في صحيفتك

 

 

احبك في الله

 

مسك الجنان

 

 

ملحوظة فكري في حكاية الملف المصري بتاع الاكل و بلاش خيانة يا خاينة :biggrin:

[ام حلا 6]

عن جد الموضوع حلو كتير و ان شاء الله اجيب وصفات سورية

[بنت الصادق 9]

شكلي بعمل شوربة لسان العصفور أوصفيلي شكل لسان العصفورعندي وحده غبيه تقول يذبحو عصافير وياخذوالسانهم ياسلام على الذكاء الخارق

مارأيك بنت الصادق ؟؟؟

 

 

ههههههههههههههه.. أضحكتيني حبيبتي محبة الله يسعدك دنيا وآخرة..

احنا كنا زمان نقول كدة بردو.. بصي لسان العصفور هتلائيه في الجمعيات وهو للأسف مش شعيرية ولا ليه اي اسم تاني..

بس لو سألتي عليه في الجمعيات هنا بالكويت هتلائيه.. او هتلائيه مع القسم الي فيه المكرونات بأنواعها والشعرية .. هتلائيه فعلا عامل زي لسان العصفور..ههههههههه

شكل بيضاوي زي السمكة وصغير جدا جدا.. ونفس مكونات المكرونة..

 

لو لئيتيه قوليلي اوك.

[ام ادريس 0]

السلام عليكم ورحمة الله وبركاته

اولا اقول لكى كما وصنا الرسول صلى الله عليه وسلم

[بارك الله لكما وبارك عليكما وجمع بينكما فى خيرا]

وكل ما تحتاجيه من الاكلات المصريه انا موجودة

[بنت الصادق 9]

لا لا لا

 

انا مش موافقة يا بنت الصادق

 

 

مكا ينفعش الكلام ده

 

 

المفروض لو انتي عندك انتماء للوطن

 

تعملي ملف الاكلات المصرية و بس

 

 

مش اكلات خليجي و اكلات شامي

 

ده خيانة عظمي و يشرفني اني ابلغ امن الدولة عليكي

 

 

 

لا بجد بجد

 

الموضوع حلوووووووووو اوي و فكرته حلوة جدا

 

 

و انتي احلي بصراحة و ملفاتك كلها جمييييييييييييلة جدا جدا جدا

 

جعل الله كل حرف تكتبين في ميزان حسناتك و مما يسرك ان تلقيه في صحيفتك

 

 

احبك في الله

 

مسك الجنان

 

 

 

ملحوظة فكري في حكاية الملف المصري بتاع الاكل و بلاش خيانة يا خاينة

 

 

ههههههههههههههههههههههههههه

 

يامسك انتي واضح انك لسة صغيرة ومش فاهمة السياسة الي انا ماشية فيها..

ممممممممممم

بيني وبينك كدة.. (في حد سامعنا؟؟) طب انا هقولك بس اوعي تقولي لحد

 

شوفي ياستي... طبعا الأكل المصري احسن اكل في الدنيا.. ومقدرش اقول غير كدة..

 

البنات الي من البلاد التانية ميزعلوش.. (كل واحد حر مع بلده بأة)

 

وانا عملت المسابقة دي عشان انا بطبخ حلو.. وعشان الأكل المصري هو الي يكسب في الآخر بإجماع الكل .. فهمتي..ههههههههههههههههههههه

 

إلا إذا.............

 

إلا إذا البنات أثبتو العكس.. وأثبتو إن أكلهم احسن.. ساعتها بأة منقدرش نتكلم ..

 

وبعدين ياستي عمالة تقولي خيانة خيانة..

 

طب متورينا بأة انتمائك كدة وتدخلي المطبخ معايا زي الشاطرة بدل منا لوحدي كدة.. اكتبي ياستي اي حاجة.. إنشالة حتى طريقة عمل الفول.. ههههههههههههههه او الأوملت..او تحمير البطاطس

 

انا بتكلم جد مش بهرج.. يابنات الفايل دة انا عملاه عشان البنات الي مبيعرفوش حتى يولعو عود كبريت.. ودي هتبأة فرصة كويسة ليهم انهم يتعلمو الطبخ.. وخاصة الي داخلين على جواز

 

مستنينك ياست منتمية (مسك) :)

تم تعديل 15 مايو, 2006 بواسطة بنت الصادق

[بنت الصادق 9]

السلام عليكم ورحمة الله وبركاته

اولا اقول لكى كما وصنا الرسول صلى الله عليه وسلم

[بارك الله لكما وبارك عليكما وجمع بينكما فى خيرا]

وكل ما تحتاجيه من الاكلات المصريه انا موجودة

 

وعليكم السلام ورحمة الله وبركاته

ماشاء الله عليكي اختي في الله ام ادريس على كلامك الجميل ودعوتك الرقيقة..

وفيكي بارك الله وجزاكي الله خيرا

 

وبالطبع سأحتاجك.. اولا..هل تنقص اي نوع آخر من الشوربات المصرية؟؟

 

هل تعلمين كيفية عمل شوربة العدس..

وهل عندك اي اضافات على وصفات الشوربات التي كتبتها أعلاه.. فإن كان عندك ارجو ان تكتبيها بارك الله فيكي

وبانتظارك ان شاء الله

[بنت الصادق 9]

عن جد الموضوع حلو كتير و ان شاء الله اجيب وصفات سورية

 

 

ام حلا انا بانتظارك حبيبتي.. في الجزء المخصص لموضوعك :)

[محبة عائشه وخديجه 0]

يا مسوكه يا حلوه بنت الصادق قاعده تكتب وصفات طبخ مصري ما كتبت في المطبخ الخليجي هي هنا تكتب وصفات مصريه واضح

والله ما خانت أحد بلعكس هي مخلصه قاعده تكتب لوحدها

وبعدين كل واحد يحب طبخ بلده هذا شيء عادي وكل واحد يقول طبختي هي الحلوه وأنا أقول كل نعم ربنا حلوه مصري أو خليجي أو شامي أو مغربي أو هندي كله عندي حلو الحمد لله

وإذا الموضوع تحدي إحنا على قد التحدي هههههههههههههههههه

عل فكره أنتي بنت الصادق مقيمه بالكويت ؟؟

ولسان العصفور لمحته مره بالجمعيه بس ما دققت فيه راح أروح للجمعيه وأدور عليه

[أمل عبدو 0]

السلام عليكم ..

والله فكرة حلوة أوي يا بنت الصادق وانا على فكرة بحب الاكل المصري وخاصة الحمام المحشي يا سلام عليه بس ليه انسيتي الاكلات الليبية في الاقتراح بتاعك مش احنا جيراكنو برضو .. طيب يا ستي مش حازعل منك والدليل على كلامي حاكتبلك الاكلات الليبية الحلوة واللي يا حرام لذيذة اوي بس مش معروفة اوكي .

[مسك الجنان 2]

 

 

إلا إذا البنات أثبتو العكس.. وأثبتو إن أكلهم احسن.. ساعتها بأة منقدرش نتكلم ..

 

ما حدش يقدر يغلب المصريييييييييييييين ابدا ابدا ابدا

 

مستنينك ياست منتمية (مسك) :)

 

 

انا يا ستي عندي امتحانات اولا

 

ثانيا انا الحاجات اللي باعرف اعملها هي

1- عصير ليمون عمرك ما حتدوقيه في حياتك

 

2- طحينة و انتو عارفين ان الطحينة ليها كذا نوع و انا حاقولهم ليكو ان شاء الله انتو طبعا عارفين ان الناس اللي بيعملوا الطحينة مزبوطة في العالم كله محدودين جدا و انا اولهم لاني محترفة طحينة

 

3- باعرف اسلق المكرونة طبعا ده حاجة صعبة جدا و عايزة تركيز فظيع

 

4- اعرف ارمي البطاطس المحمرة في الزيت من علي بعد عشرة متر و نص و اهم حاجة نص المتر ده لانه بيدي طعم مختلف للبطاطس عما تقفي عن بعد عشرة متر بس

 

5- باعرف اعمل شاي ( و طبعا بابا يروح كابب الشاي في الحوض )من كتر حلاوته

 

6- باعرف اعمل سلطة تجنن و التتبيلة بتاعتها تحفة (ده بجد)

 

 

اخر حاجة لازم تعرفوها اني محترفة طحينة و سلطة :wub:

 

و ان شاء الله اقول لكم االطريقة كمان اسبوعين بالزيط ان شاء الله

 

و بجد فكرة الملف حلوة جدا خصوصا للي ما بيعرفوش يطبخوا زي مسوكة :icon16:

 

المهم انا عندي فكرة

 

ايه رايكو بعد كل كام اكلة نعمل عليها تطبيق في البيت و نقول النتيجة هنا ؟؟

 

بس بعد امتحاناتي لوسمحتوا

 

و حاجة كمان كل اهت عندها تجربة في المطبخ ياريت تقولها

 

يعني مثلا الحاجات الصغيرة المحترفة

 

زي مثلا ما تحطيش الفلفل قبل الملح و حطي الملح الاول

 

او ما تسلقيش اللحمة في مية ساقعة لكن اسلقيها في مية دافية من الحمام :icon16:

 

حاجات كده يعني

 

فهمتو قصدي

 

 

 

يا رب تكونو فاهمتو

[محبة لربها 1]

فكرة حلوة جدا

انا كدة اتطمنت انى ممكن اعرف اطبخ احسن ابو العيال كاتم فى نفسه وساكت

وبصراحة انا خايفة اشترك معاكم تدعوا عليا

على العموم هاحاول اشجع نفسى واشترك معاكم ولحد ما اتشجع هاتفرج عليكم وانتم بتطبخوا

[بنت الصادق 9]

عل فكره أنتي بنت الصادق مقيمه بالكويت ؟؟

ولسان العصفور لمحته مره بالجمعيه بس ما دققت فيه راح أروح للجمعيه وأدور عليه

 

 

ايوة انا مقيمة بالكويت.. عشان كدة عيزة اعرف الأكلات الخليجية وخاصة الكويتية.. عشان انا هتجوز ان شاء الله بعد شهر وهنزل مصر وعيب علية اوي لما الناس ييجو ياكلو عندي وانا نازلة من الكويت ويلائوني مبعرفش اعمل اي اكلات خليجية.. وبصراحة انا عيزاهم ياكلو صوابعهم وراهم..

دة غير اني عرفت عن خطيبي انه بيموووووووووووت في الأكل.. عشان كدة اخدت دورة تدريبية في الأكل كله بس المصري بس :(

وعلافكرة .. انا اتعلمت ازاي اعمل البرياني.. وبعمله فعلا وبيعجبهم اوي في البيت. .. اول مانخش عالأطباق الرئيسية تكتبي الطريقة وانا اقولك بعمل زيها ولا لأ.. لأن انا جبت طريقتها من نسج خيالي..ههههههههههههههههه

 

 

السلام عليكم ..

والله فكرة حلوة أوي يا بنت الصادق وانا على فكرة بحب الاكل المصري وخاصة الحمام المحشي يا سلام عليه بس ليه انسيتي الاكلات الليبية في الاقتراح بتاعك مش احنا جيراكنو برضو .. طيب يا ستي مش حازعل منك والدليل على كلامي حاكتبلك الاكلات الليبية الحلوة واللي يا حرام لذيذة اوي بس مش معروفة اوكي .

 

 

سلام مربع لأهل ليبيا.. وكمان سلام لأهل ليبيا..

ياستي حقك عليا.. .. ورينا بأة شطارتك.. وهستنا الأكلات الليبية.. هستنا اوعي تتأخري..

وعشان خاطر عيونك وعيون أهل ليبيا كلهم هعدل على المسابقة وهعمل قسم للأكلات الليبية وهفتحلك ملف خاص وانتي كل الي عليكي انك تدخلي تكتبي فيه..

وخلي بالك تمشي معانا بالترتيب..

الشوربات الأول.

 

مستنياكي ياجميل