يا أخوات حد عنده غسالة أطباق فريش

[امة الله ش 9]

السلام عليكــم ورحمـة الله وبركاتــة ،،

 

أول طلب لى فى منزلك الجميل

 

ماما جابت غسالة أطباق فريش بس الكتالوج ضاع ومش عارفين حاجات كتير فيها

 

ديه صورتها من برة

وديه من الداخل

 

وده اللى أنا مش فهماه

 

المسحوق بيتحط فين ؟

 

والعلبه ديه والبكرة اللى جمبها وظيفتهم إيه ؟؟

 

 

وتقريبا العلبة اللى جوه ديه بيتحط فيها ملح الليمون صح ؟؟

 

 

واللى عامل زى القمع ده جاى معاها مش عارفين وظيفتوه ؟؟

 

 

وفى علامات كتير على البكرة ديه أنهى فيهم الغسيل الإقتصادى والباقى وظيفتوه إيه ؟؟

 

 

وزر plus ده وظيفه ؟؟؟

 

 

 

وكفاية عليكم كده بقة :tongue:

بس ياريت تساعدونى لأنى مش عارفة أستخدمها

[فدوى المسلمي 531]

السلام عليكــم ورحمـة الله وبركاتــة ،،

حبيبتي

أنا غسالتي وايت ويل لكن فيها شبه كبير من فريش

 

العلبة دى للمسحوق والمفروض انه جاي مع الغسالة ملعقة المسحوق وهي بتاخد تقريباً ملعقة ونصف

البكرة اللي جنبها بتتلف في اتجاه معين وتتفتح ويوضع فيها الزيت أو مساعد الشطف أو الشامبو كلها مسميات لشييء واحد

 

 

ده مكان الملح القمع اللي صورتيه بيوضع بزاوية معينة بعد فتح هذا الغطاء وتسكبي فيه الملح حتى لا يسكب في الخارج

 

بالنسبة للازارا طبعاً مختلفة عن غسالتي وكمان الصورة صغيرة مش قادرة أحدد وظيفتهم

وأنصحك بالنسبة للازرار الرجوع للكتالوج فيه وظيفة كل زر

[فدوى المسلمي 531]

نسيت أقولك اللي جنب علبة الملح ده الفلتر

اللي بيمنع الشوائب والمواد الصلبة من النزول مع ماء الصرف

المفروض يتفتح كل فترة ويتنضف

 

أرجو أن أكون أفدتك حبيبتي شوشو

[امة الله ش 9]

ربنا يكرمك يارب حبيبة قلبى

 

طبعا أفدتينى جدا جدا

 

عرفت معظم الحاجات

 

بس بقبلى بس وظيفة هذا الزر

 

 

إن شاء الله يفيدنى الأخوات

 

وصحيح يانفس توبى ...

 

هيه الغسالة عامة حلوة ؟؟ عملية يعنى ؟؟

[محبة لربها، ادعوا لي بالثبات 72]

حبيبتى ش بارك الله فيك وفى غسالتك انا عندى الصغيرة

بس مش عارفه ليه ان الغسيل على الايد اسرع عموما مع التجربه هتعرفى

مبروك

تم تعديل 18 نوفمبر, 2009 بواسطة محبة لربها.ادعولى بالثبات

[فدوى المسلمي 531]

محبة

فعلاً الغسيل على الايد أسرع لأن برنامجها طويل

لكن هي مفيدة جداً لو كان حجمها وسط أو كبير

لأنها بتاخد كم كبير ومش مهم الوقت

يعني مثلاً أنا باشغلها بالليل

طول النهار أضع فيها كل شييء يتسخ ولما تمتليء أشغلها وتخلص وقت ما تخلص مش مهم تاخد قد ايه

 

شوشو

الغسالة الحقيقة بتوفر علي جهد كبير

بس أنصحك لما ينقص الملح تزوديه

وهو بينقص بعد فترة طوييييلة جداً

كنت فاكرة انه المهم المسحوق والزيت بس

بس لما جربت اكتشفت ان الملح بيأثر

طبعاً عشان تحصلي على نتيجة جيدة لا تضعي أي الومنيوم أو ستانلس

إلا لو كان مكان تسخين لبن أو عمل مهلبية أو أرز باللبن أو جيلي اذا كان كده بتنضف ان شاء الله

لكن غير كده الأكواب والأطباق و الملاعق كلها بتنضف كويس

وطبعاً البايركس

لو بتستخدمي صواني بايركس أو تيفال برضو بتنضف في الغسالة

 

ومبارك عليكِ حبيبتي

[ام نسيبه 0]

حبيت اشاركك في الرد ولو اني مش عارفه ياتري عرفتي الي انتي عاوزاه ولا لا لان الموضوع تاريخه قديم

بصي اولا بالنسبه لقمع الملح فمالوش لازمه لا هو ولا الملح لان غسالات فريش مش بتحتاج ملح لان الماء في مصر مش عسر

ثانيا بالنسبه لبكره الزيت تظبطيها علي مستوي معين هتلاقي ارقام 1 2 3 4 افضل مستوي هو 2 اقتصادي ومعقول وتحطي الزيت بوعائه الخاص الي جاي مع الغساله

بالنسبه لدرج المسحوق الي جنب البكره ده بتحطي فيه بالمعلقه الي جايه مع الغساله حوالي معلقه ونص كده

بالنسبه للفلاتر الي تحت خالص جنب السخان دول كل شويه تطلعيهم وتغسليهم وهما 3 فلاتر

بالنسبه للزراير الزرار الي مكتوب عليه plus ده للاواني المخزونه وفيها ددهون شديده ولكن ما ينصحش بيه بياخد وقت فوق الساعتين ونص و مش عملي

زرار ال rapid وده انا شايفاكي ضغطاه هو زرار بيسرع من البرنامج الي اختارتيه ومش عملي برضه مش بينضف كويس

بالنسبه لبكره الزراير اول برنامج ده لشديده الاتساخ يليه متوسطه الاتساخ يليه شطف بس وبعد كده بيبقي ستوب ويليهم برنامج الزجاج فقط ده لو كوبايات و كاسات وبعديه ستوب و اخر حاجه ده للشطف لحين الغسيل وده تستخدميه لما تكوني لسه ما جمعتيش للغساله عشان المواعين ما تديش ريحه للغساله وما يلزقش فيها الدهون

يارب اكون افدتك واي شيء انا في الخدمه لانها زي بتاعتي

[امة الله ش 9]

السلام عليكــم ورحمـة الله وبركاتــة ،،

محبة لربها جزاك الله خيرا

فدوى جزاك الله خيرا

أم نسيبة أفدتينى جدا جدا ربنا يكرمك