اذهبي الى المحتوى
صاحبه القلب الطيب

قصة واااقعيه لزوجة اصبحت مطلقه وببنت بعد شهور .ادعو لها وخذو ا العبره !!

المشاركات التي تم ترشيحها

السلام عليكــم ورحمـة الله وبركاتــة ،،

 

اخواتى الحبيبات قرأت قصه لاخت لنا فى الله قسما بالله قطعت قلبى تقطيع وجعلتنى لا اعرف انام من امس وجعلت الدموع تتحجر فى عينى وجعلتنى افكر كيف يكون فى ناس كده فى الدنيا ؟؟.... وفعلا قلت كصاحبه القصه "حسبى الله ونعمه الوكيل"

وقررت انشرها هنا لندعو الله ان يعوضها الله ويخلف عليها لانها ظلمت ظلم لا يتحمله انسان فما بالكم بفتاه صغيره حلمت ان تكون زوجه فاصبحت مطلقه بعد شهور بلا اى حول ولا قوه منها وليس هذا فحسب بل اصبحت اما لطفله ايضا

 

اسأل الله العظيم رب العرش العظيم ان يعوضها خير مما فقدت ويخلف عليها ويبارك لها فى ابنتها عاجلا غير اجلا ان شاء الله

والله انى لا اعرفها ولكن كما يقولون تمزق فؤداى والله المستعان

 

اترككم مع القصه ... وبالطبع اوصيكم بالدعاء لها بظهر الغيب

وبالاكيد لنا من القصه عبر بل وعبرات

اهمها ان يرحم المجتمع المطلقه من نظرته لها فاخت مثل تلك لو ما كانت طلقت ماذا كانت تفعل ؟؟؟؟

 

ثم ارجو من كل بنت مقبله على حياه جديده لا تتسرعى لا تتسرررعى ابداااا فى الاختيار

مش معنى ان فرص الزواج قلت انك تتجوزى وخلاص اى شخص يتقدم ليكى والله انك فى بيت اهلك مكرمه الف مره وطبعا فى الخطبه اجعليها فتره لمراقبه تصرفات هذا الشخص من خلال علاقاته بكى وباهلك ووباهله وخاصه امه واخواته وان وجدتى ما لا يعجبك او ما لا تتحمليه فكرى مرات ومرات والقصه سثبت لكى

 

وكلماتى لكل متزوجه ..ان كان زوجك به عيب بسيط فتحمليه واحمدى الله لانك بعد ان تقرأى تلك القصه ستعرفى ان

همومنا بالنسبه لهموم من حولنا لا شئ

 

واترككم مع القصه بلسان صاحبتها ربما تكون طويله بعض الشئ ولكنى اختصرت منها الكثير فهى صفحات وصفحات تملؤها الدموع ولكن رجاء الدعاء لها

 

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

مشكلتي انا فى العشرينات خريجه كليه متزوجة من حوالي 5 شهور وحامل في الشهر الرابع

 

مشكلتي ان زوجي ابن مامته زي ما بيقولوا اي شئ صغير كبير هايف اي شئ يجري يقوله لامه لغاية لما اتخنقت من اول يوم تزوجته لقيت المشاكل بتقول لي اهلا هو ابن وحيد علي بنتين وامه حاسة اني خطفت منها ابنها لدرجة انها بتفضل قاعدة معانا اول ما نصحي من النوم تقريبا هي يوميا بتصحينا من النوم وتفطر معانا وتتغدي معانا وتتعشي معانا مع العلم ان زوجها عايش بس هي مش قادره تصدق ان ابنها خلاص بقت له حياته الخاصة المشكلة مش في كده ابتدت تبين هي اد ايه بتغير مني لما تلاقيني لابسه مثلا حاجة زي برمودا وبلوزة كت تلاقيها تعد تقول لي متلبسيش متحطيش ميكب طيب البس امته لزوجي ولا احط ميكب امته مش عارفة لقيت نفسي بتحول لخدامه لامه واخواته البنا لما بنت من بناتها عاوزة تعزمها تعزمها عندي وكل ده في بداية الزواج من اول يوم ومع الاسف زوجي مش عاوز يحس ان الواحد المفروض له خصوصيات لغاية لما تعبت جدا من الحمل لقيتها هي اللي طبخت مرة وبعد كده عايرتني بيها ومرة تعبت في يوم ومغسلتش المواعين وسبتها في اليوم التالي لقيت زوجي صحاني علي زعيق قومي يا هانم نضفي المطبخ الزبالة قلت له كنت تعبانة قال لي ايه يعني اتبدل انسان تاني كل همه الاكل والشرب والحاجات التانية وامه بس اتنقل شغله لبلد بعيده تبعد حوالي 8 ساعات سفر قلت يا فرج الله اخيرا هيكون لي بيت لوحدي واعيش مع زوجي اخيرا مع العلم ربنا يعلم انا عمري ما بينت اني مضايقة او تعبانه لاني في يوم بقول لنفسي بكره اكون حماه وممكن ربنا يبعت لي مرات ابن تطلع عيني وبقول مهما عاملتني برده هعاملها مثل امي و ربنا يشهد المهم سافرنا برده مفيش فايده التليفون برده شغال يحكي لها بالتفصيل يقول لها احنا انهارده مطبخناش فكلمتها لسه بقول لها ازيك ياماما لقيتها ردت عليه انت مش طبختي ليه قلت لها تعبانة قالت لي يا سلام لا ابني لازم ياكل كويس هوه بدورة يشتكي لها مني مش بتاكلني في اول زواجي كان يعد يقول لها دي مبتعرفش تطبخ دي ضربتني بمخده وكنت بهزر معاه لقيتها بتزعق لي انت ان شاء الله بتضربيه معرفتش ارد

المهم في واحد حسبي الله ونعم الوكيل راح نقل كلام وزوقه وقال له نسايبك بيشتموك وزوج اختها شتمك ومراتك قاعده ومش بترد غيبتك

فجاة لقيته انفجر فيه انتي مش بتحترمين واهلك مش بيحترموني حلفت له دا انسان كداب عاوز يوقع ما بينا هاته ليه اواجهه ويحلف علي المصحف قال لي مش مصدقك ولقيته قال لي انا مش عاوزك وهطلقك علشان انتي مش امينه علي في غيبتي طبعا تعبت جدا نفسيا وانعكس عليه جاب لي دكتور وقال له تفضل نايمه علي ظهرها بعد الموضوع ده انفتح تاني بعدها 3 اسابيع لقيته تاني يقول لي مش عايزك و ياريت يحصل اجهاض علشان مفيش حاجة تربطني بيكي انا مش عاوزك المهم لبس هدومي ومشيت رحت المحطة لقيته جه ورايا قال ايه علشان يركبني ويديني فلوس الظاهر صعبت عليه فالظهر اذن لقيته يقول لي تعالي نصلي الظهر فرحت معاه وقلت له لما ننزل اجازة انا لازم اتواجه بالشخص ده

 

لما نزلنا اجازة اتصل علي الشخص هرب ومديش يتواجه بحجة انه مسافر ومرديش يجي في الفترة دي كنت عاملة اجازة من شغلي فلما الحمل بتاعي بدات احس انه مستقر قلت له عاوزة انزل اشتغل قال لي ماشي فلقيت الست والدته قالت له لو مراتك اشتغلت خد مرتبها وهاته ليه واديك مصروف يكون في اديها فقال لي قلت له ازاي ازاي شغلي ليه وللبيت ازاي مامتك تاخد مرتبي ؟؟؟؟؟قال لي هوه كده انا بدي مرتبي لاهلي انت عاوزة تاخدي مرتبك علشان تعطيه لاهلك قلت له لما اشتغل يبقي يحلها الحلال

 

واحده صحبتي كلمتني وقالت لي جوزك هيتجوز عليكي قلتها ازاي قالت لي والله فلما شفته واجهته قال لي كنت بهزر فضغطت عليه لقيته قالي بالحرف الواحد انا لو اهلي قالول لي طلقها هطلقك انتي مراتي وبحبك بس ما اقدرش اتمسك بيكي هم هيساعدوني ويوقفوني علي رجليه ويجوزوني اما انتي مش هتنفعيني لو اتمسكت بيكي انا بار باهلي وابني لما يكبر هيرجع لي انا زي ما بريت اهلي ابني هيبرني صعقت من كلماته ليه وانا وحيده في بلد غريبة ومش قادره احكي لاهلي ولا عاوزة فضايح اطلق بعد 5 شهور انا مصدومة فيه هوانا بالنسبة له لعبه لما يخدوها منه ويجيبوا له واحده جديدة يفرح بيها ويرمي الاولي اللي هيه انا اعمل ايه انا حاسة ان مخي هيقف من كتر التفكيرانا بقي لي 3 شهور مشفتش اهلي بكلمهم بس في التليفون وخايفة اوووي من المستقبل اكتر من مرة يتخلي عني وخايفة امه تقول له طلقها يروح مطلقني علي طول

 

 

اللي مزعلني ومضايقني اني مش في الحسبة بتاعته وهتخنق لو قلت حاجة لاهلي هيقولوا لي انت قاعده عندك بتعملي ايه سيبه قبل ما يسيبك المشكلة انه دايما يقول لي انا بحب كل اللي حواليه مبسوطين بس للاسف انا مش مهمه نفسي اساله سؤال هو اتجوزني ليه هل وامه معترضه عليه انا بالذات ولا في دماغها حد زي ما صحبتي قالت لي وهم خلاص اتفقوا في كل شئ انا ببكي وساعات يدخل عليه وانا ببكي مش بيسالني ولا مرة انت بتبكي ليه وعادي جدا دا بعد ما حرق دمي بالكمتين انه ممكن يطلقني لو قالوا له طلقها راح خرج وجاب حاجة ساقعة وصب لي كباية وقال لي اشربي يا حبيبتي روقي دمك حاسة انه انسان غريب بارد حقوقي كزوجة ضايعة

ربنا يعلم انا بعامل حماتى ازاي انا بأكلها بإيدي ولما بتكون معايا بفتح معاها كلام بس بلاقيها ميلها اكتر لابنها وبناتها مش عارفة ليه هي ليه كارهاني تخيلي تعد تدعي ربنا ان ربنا يرزق ابنها صبيان مش تدعي له اني اقوم بالسلامة

هو يعد يقول لي انتي بتهتمي بوالدي ووالدتي اكتر مني بس برده مش هتحبيهم اكتر مني ودايما يعد ينتقضني ادامهم ولما ازعل يعد يصالحني ويقول كنت بهزر مثلا انا اول ما حملت بقيت بنام كتير راح يقول لها لقيتها بتقول لي انتي بتنامي كتير كده ليه قلت لها عادي بنام عادي

بالنسبة للبس هي قاعده معانا 24 ساعة

حاليا احنا بعيد بس بننزل اجازات اسبوعين وقريب جدا هنرجع تاني نستقر تاني معاهم في بيت العيلة يا فرحة ماتمت مش قدامي الا الصبر بس خايفة جدا اعمل ايه اسكت ومكلمش لما بلمح له بلاقيه يزعل مني ليه اطالب بحقوقي كاني طالبته يعق والديه حاولت افهمه قال لي انا هفضل كده دول اهلي انا كلي لهم فسكت وهفضل ساكته لحد ما يجري لي حاجة

 

ربنا يعلم انا نفسي حماتى تحبني بس هي قافلة مني كان مني عينها تاخد بنت اختها لابنها

 

حاليا حماتي عاوزة تقبض عليه مرتبي و اعمل توكيل لجوزها ويروح يقبض مرتبي ويدوني مصروف ايدي انا وزوجي

انهارده كلمتها في التليفون تقول لي انا ابني مش راجل لو ابني راجل مش هيخليكي علي زمته ثانية واحده بس لما اشوفه قلت لها ليه يا ماما قالت لي انت عاوزة تخدي مرتبك وتديه لاهلك قلت لها لأ اعدت تزعق ليه ومدتنيش فرصه اكلمها كل المكالمة كانت ادام ابنها قفلت معاها وبقول له سمعت مامتك بقتول ايه قال لي لو اهلي قالوا لي طلقها هطلقك انا ما اقدرش اخالف امي وابويا و اختار اعيش وياكي هم هيوقفوني علي رجليه انتي مش هتنفعيني

انهارت واعدت اعيط ولا صعبت عليه حسيت اني مليش قيمه ولا كرامه عنده ولا حتي ابنه اللي في بطني قال لي ابيعك انتي واللي في بطنك ب 5 جنيه

قلت له انت مادي قال لي جدا

والاستاذ مسافر لامه بكره وهيسبني لوحدي طلبت منه اسافر وياه مرديش انا خلاص قربت انفجر مش قادره استحمل هو بيعمل معايا كده ليه يا رتني كنت وحشه معاه ومعاهم علشان استاهل المعاملة دي منهم حسيت اني غريبه عن جوزي ولوحدي هتخنق للدرجة دي بسهولة يتخلي عني عندي احساس من زمان انه يبيعني في اي وقت قلت له حسسني بالامان انا خافية تتخلي عني في اي وقت حاسة ان نهايتي معاه قربت

بكلم زوجي تاني يوم كنا حوالي الساعة 2ظهرا لقيته رد عليه وقال لي وحشتيني كان نفسي تكوني معايا قلت له هتيجي امته قال لي كمان 3 ايام قلت له تيجي بالسلامه وعشت حياتي عادي بقية اليوم وبعدين حوالي الساعة 12 بالليل لقيت جرس الباب بيرن خفت افتح وعملت ان اكن محدش في الشقة وقتها لقيته اتصل عليه عالموبايل رديت لقيته بيقول لي افتحي الباب قلت له باب ايه؟ قال لي انا ادام باب الشقة متعرفوش الفرحة والروح اللي دبت جوايا لما شفته كنت عاملة زي الطفل الصغير اللي مامته كانت سايباه وقافلة عليه الباب كنت مرعوبه جدا خايفة افتح شباك خايفة اعمل صوت في الشقة لحسن حد يعرف ان زوجي مش هنا ويعني كنت قلقانة لاني في بلد غريبة مش بلدي

لقيته دخل اكل وغير هدومه ولقيته بقول لي البسي قلت له ليه هنتفسح دي الوقت قال لي هروحك لاهلك احنا قررنا انك هتطلقي فاتبسمت قال لي والله العظيم هتطلقي احنا خلاص قررنا امي وابي خلاص قرروا انا مش هختارك واكون في صفك وابني هيكبر ويرجع ليه راجل اما انت فلو الناس اتدخلوا هرجعك واسيبك خدامه لامي واتجوز واحده تانيه لنفسي هنا واعملي اللي انتي عاوزاه اعلي ما في خيلك اركبيه روحي اشتكيني مش هتاخدي حق ولا باطل مني

كل الكلام ده قالوا ليه وانا مش بنطق بكلمه ومستسلمه ومراجعتوش ما قلتش الا كلمة اللهم اجرني في مصيبتي واخلفني خيرا منها قلت له نستني للصبح قال لي لأ دي الوقت وشقتك مش هتدخليها تاني المشكلة اني كمان سابني في نص الطريق ابن خالي سايق عربيته شافنا وقف فاخدني وهوه روح علي امه يعطيها التمام انه نفذ المهمة بنجاح

انا بقي لي يومين في السرير مش قادرة اتكلم ولا عارفة اتحرك

انا خايفة اواجه مستقبل ومعايا طفل ومطلقة خايفة من المجهول خايفة من نظرة المجتمع للمطلقة محدش يعرف الاسباب

 

عاوزة افضفض شوية

انا والدتي ربتني تربية صحيحة يمكن في زمننا هذا مش كويسة انا كنت خجولة في الكلية ولا عمري كلمت اي حد من زمايلي ولما كان حد يكلمني وشي يضرب الوان الحمد لله ربنا حماني كتير عمري ما خالطت حد ولا كان ليه تجارب مع العلم معظم البنات في الجامعات زي ما انتوا عارفين وكمان انا كنت مغتربة وكان في بنات بيلاقوا فرصة بعيد عن اهلهم وكان بيعملوا اللي هم عايزينه طالما محدش هيعرف اهلهم

كان دايما زوجي يقول لي انت للاسف خام ودايما التجربة الاولي بتكون فاشلة لانه كان خاطب قبلي مرتين فعنده خبرة اما انا فمكنش عندي اي تجارب كنت بصدق كلامه ليه انه بيحبني بس للاسف الظاهر انه كان بيضحك عليه

صاحب زوجي كلمه قال له مينفعش كده لازم تروح تصالحها فرد عليه قاله عادي هي لو عايزة ترجع لي تيجي عادي براحتها لو عايزة ترجع

زوجته اتصلت عليه وبلغتني قلت لها ازاي اذا ماجاش لغاية عندي انا هفضل في بيت اهلي انا كرامتي قبل اي شئ انتي عاوزة مامته تقول ما ادرتش تعيش في بيت اهلها وجرت اول ما شاور لها

بفضل اسال نفسي كل دقيقة ليه عمل كده ليه هتجنن من كتر التفكير لا كان له جواز ولا تكوين اسرة ولا اد المسئولية ليه يظلمني معاه انا وابنه

كنت فى شغلى لنقل اوارقى وبصراحة اوووي كان نفسي اطلبه واقول له انا هنا مش عاوز تشوفني للمرة الاخيرة بجد يا جماعة وحشني اوووووي مش عارفة قسوة القلب اللي هو فيها دي ايه؟بصراحة كنت خلاص هكلمه بس مسكت نفسي وقلت اللي يبيعني ابيعه "لا حول ولا قوه الا بالله "

انهاردة رحت شقتي لقيت امه هي دايما معاها المفتاح شقتي البيه مديه ليها المهم لقيت شقتي زبالة بمعني الكلمه مش قادرة اتصور كل شئ مبهدل الصالون والصاله والستاير هم كانوا بيعملو ايه دخلت المطبخ لقيت حله هنا وغطاء هنا الشقة مبهدله لقيت امه طالعة لي قالت لي متخشيش الشقة اطلعي برة لغاية لما ابني يجي انا اتصلت عليه وقال لي متخليش مراتي تدخل الشقة قلت لها ازاي مدخلش انا هتصل عليه لقيته بيقول لي انا هاجي بعد اسبوعين انتي عاوزة ايه دي الوقت قلت له انت هتمنعني ادخل بيتي انت وامك انا هدخل وهاخد اللي عاوزاه لقيت امه ندهت علي جوز بنتها وعلي جوزها واعدت تشتمني وجوزها يقول لي انت خاينة ابني مينفعش يعيش معاكي بعد كده انتي لا يؤتمن تعيشي ما ابني بعد كده وراحت فتحت الدولاب وبقت ترمي لي هدومي وحاجات داخلية وترميها في الارض وتنفضها كانت ماما معايا معرفتش اقول لها انا عملت معاكي ايه انتي طلبتي من ابنك يطردني الساعة 12 باليل ترضيها لبنتك تقول لي ايه يعني وتصرخ وكانت عاوزة تضربني بس كان جيرانهم واقفين

بعد ما روحت اتصلت عليه قلت له امك بهدلتني و شتمتني انا خاينة خنتك في ايه لقيته بيقول لي انتي مكبرة الموضوع علي ايه امي اتصلت بيه وقالت انك اخدتي كل هدومك مسبتيش حاجة ترجعي عليه قلت له امك رمتها لي واسال جوز اختك راح قال لي وفيها ايه انتي نزلك بالليل هي للدرجة دي عندكم اهانة ايه يعني قلت له بدل ما تيجي تعتذر وتاخدني وترد كرامتي راح قال لي تعالي انتي انا مش جاي اخدك

قولولي اعمل ايه انا قربت يجي لي انهيار عصبي هموت والله حسبي الله ونعم الوكيل اللي مش شايف ان دي اهانة وبهدله يقول لي هي بنات الناس لعبة

ادامي اختيار من ثلاثة

الاول اني اصبر لغاية لما اهل الخير يتدخلوا بينا ويجبروه يجي يصالحني ويرجعني خدامه لامه زي ما كان بيقول وافضل مليش كرامه وتكرر نفس اللي اتعمل مرة تانية وامه عمرها ما هتطلع من حياتنا لغاية لما تموت

التاني اني افضل معلقة لا حصلت كده ولا كده وهوه ده اللي هو عايزه

التالت اني اطلب الطلاق وساعتها يساومني علي حقوقي وهوه يرده عايز كده

ابني لما يكبر يسالني انتي ليه ما احسنتيش اختيار بابا ليه اعمل ايه انا

امبارح لقيت محضر جايب ورقة فيها انذار بالطاعة

لقيته فيها كاتب ان في يوم كذا تركت منزل الزوجية فجاه بدون اسباب وواصف الشقة والجيران وان الشقة فيها رفاهيات الحياه اجهزة كهربائية ودش ملوش لزمة ولو انا منفذتش انذار الطاعة ابقي ناشز وتسقط كل حقوقي عند اخدت الورقة و رحت لمحامي وبدأت المشوار في المحاكم وعملت توكيل انهارده ورفعت قضية طلاق

 

وذهبت للكشف والدكتوره قالت لى انها بنت انا بحمد ربنا علي اللي انا فيه بقول هتكون معايا بنتي هتأنس وحدتي احسن ما كنت فضلت من غير جواز يا تري ايهما افضل؟ عانس ولا مطلقة ببنت

انهاردة بعد العصر مباشرة زوجي رن عليه وانا مردتش عليه لقيت اخويا قلت له رد عليه انت

المهم اخويا رد قال له هو الصح انت تجيب اختي بالطريقة دي انت حطيت ايدك في ايد مين؟ علشان تعمل كده رد عليه بقلة ادب وراح قايل له انت مش راجل علشان احط ايدي في ايدك قام اخويا زعق لها انا راجل غصب عنك علي الاقل مش بطلع مراتي في نص الليل علشان خاطر امي وقام اخويا قافل في وشه

المهم بعدها واحد اتصل قال له هات اختك وتعالي دي الوقت علشان زوجها هيطلقها دي الوقت تعالي بسرعة وهاتها هيطلقها راح اخويا قال له انت مين قال له انا زفت راح زوجي اخد التليفون وقال له هات اختك قال له انت مين قال له انا فلان انا هطلق اختك قال له طلقها فراح قايل له اختك طالق بالتلاتة وراح قافل السكة وبعدها بعت لي 3 رسايل علي الموبايل اني طالق بالتلاتة والورقة في الطريق

قال في الرسالة اني مش هاخد الهوا من الشقة واشتكيني في المحكمة يعني حتي مش ناوي يديني حقوقي بالمعروف

وماطل فى اعطاء حقوقى ويقول اذا كانت عاوزه تاخد حاجتها يجوا هى واهلها يتذللوا ليا

انا بسال ربنا وبدعيه الثبات والرباط علي قلبي بس انا خايفة من مسئولية البيبي اللي جاي هيسالني كتير ومش هعرف ارد عليه اتمني من ربنا بنتي تفهمني كويس وتلتمس ليه العذر متحاكمنيش في اختياري لابوها

انا فوضت امري لله بس اللي نفسي فيه والدي يخف عني شوية بالكلام لاني مش ناقصة اشيل هم انا مليش ذنب في انه يجهزني واطلق ويتخرب بيتي او بيته زي ما بيقول لي دايما

زوجي ولا طليقي مش عاوز يديني حقوقي ولا عاوز يرجعني ونربي البنت بيينا

كان قال مرة لواحد انا بحبها بس ما اقدرش اقول كده اهلي هيزعلوا مني هم اللي دايمين لي انا ما اقدرش اخالفهم

اما ان كان عليه انا والبنت نتفلق بقي مش مشكله عنده اهم حاجة امه وابوه

الراجل ده قال له حب وامك وابوك شئ وحقوق زوجتك شئ تاني انت كده بتظلمها فلما واجهه بالحقيقة بعد عنه ومعتش بيسمع له اي كلام وبعد ومعتش بيقتنع بكلامه لانه مجاش علي هواه

انا سمعت الناس جم قالوا لي انه خطب وكتب كتابه وبيجهز ورقه وهيسافر مع العروسة الجديدة

بالنسبة ليه رفعت قضايا في الوقت الضايع تقريبا مش هلحق اخد حقي بالقانون لانه وقتها هيكون خارج البلاد وهعد سنين لغاية لما اطلق رسمي ولا ايه مش عارفة

ادعوا لي انا بنهار بتمني اموت وارتاح من الهم ده والدي مش مخليني ارتاح بحس في كلامه ونظراته بلوم شديد في فولس جهازي اللي ضاعت كاني انا اللي خربت بيتي بايدي ادعو لي بالثبات لاني خلاص معتنش قادرة استحمل بجد تعبت انا حاسة بغربة هنا في بيت اهلي مليش حد

المفروض ان اهل الواحدة يكونوا جنبها في محنتها و يقولوا لها فداكي الحاجات اللي في الشقة كانها ولعت كفاية انتي كويسة كده يعني عاوزة اسمع كلمة كويسة مفيش غير امي اللي معايا اما والدي عاوزني اخد جهازي لو اخدته هيرتاح

زوجي كتب كتابه وسافر مع مراته الجديدة وانا اتعلقت لا طلت سما و لا ارض

اعمل ايه طيب فيه حد هنا يقول لي اعمل ايه؟ انا تعبت خلاص حسبي الله ونعم الوكيل فيهم

اللهم اني مغلوب فانتصر

اهله فعلا نفذوا وعدهم ليه هيقفوا جنبه وجوزوه وسفروه كمان للخارج والله اعلم هيرجع امته كل حقوقي وحتي حق بنته هيتعلق لغاية لما يرجع مصر

قلبي معدتش مستحمل انا مش بنام ومش عارفة افكر

 

جاتني انهاردة ورقة الطلاق علي يد محضر من القسم

والغريب ان اللي قام بالطلاق والده بتوكيل عام من ابنه

شفتوا يا جماعة الجواز والطلاق سهل ازاي

مش عارفة افرح و لا اعيط انا نازل عليه شعور غريب مش عارفة اوصفه

الحمد لله علي كل حال

حسبي الله ونعم الوكيل

طليقي مش عاوز يسبني في حالي حسبي الله ونعم الوكيل فيه

بعت ليه رسالة

نصها عارفة فلان ومراته فلانة اللي جم باركوا لنا واحنا في اول جوازنا فكراهم دي تبقي اخت مراتي شفتي الدنيا صغيرة

ازاي مش عارفة هو عاوز مني ايه؟ يسبني في اللي انا فيه

 

انا تعبانه جداا وميعاد ولادتى قرب

الحمد لله ولدت قيصرى وجبت بنوته وبقيت ام

الحمد لله علي كل حال انا لما شفت بنتى حسيت ان هم الدنيا كله راح ومش عاوزة اي حاجة من الدنيا انا رضية والحمد لله

انا طالبة دعاؤكم ليه

الحاجة الوحيدة اللي خلتني اعيط لما فقت سالت مين اللي اذن في اذنها قالوا لي ماما واخويا حسيت ان بنتي يتيمة اعدت اعيط جامد لما كل اب يضم ابنه ولا بنته كده في اول يوم في الدنيا وانا بنتي ملقتش ابوها جنبها اقول ايه ولا اعمل ايه؟

ادعو لي ولبنتي

 

يا جماعة اهله بيساوموني علي بنتي كاني واقعة ومستنية حقوقي من ابنهم

حسبي الله ونعم الوكيل فيهم

انا راضية بقدر ربنا والله بس بتيجي ليه لحظات ضعف

للاسف انا عايشة حاليا مع اهلي وكانت عادية قبل الزواج لكن حاليا انا مش متحملاها

نفسي يكون عندي شقتي الخاصة ومطبخي بصراحة مش عارفة اخد راحتي

انا ملحتقتش اعيش حياتي واتمتع بزواجي ولا حسيت ان ليه بيت

كاني غبت شوية عن بيت اهلي سافرت سفرية مطولتش فيها ورجعت معايا بنت بس

نفسي احس باستقلاليه انا قربت انهار تاني بعد ما تماسكت

ربنا يصبرني ويعوضني نفسي افرح تاني وبنتي كمان متحسش انها اقل من اي حد

بالله عليكوا تدعوا لي واعو تنسوني من دعاؤكم

 

كل يوم بحط راسي علي المخده وبنتي في حضني وافتكر اللي عملوه فيه وافقل اوضتي واقفل عليها احزاني اتقطع من جويا

مش قادرة اعيش تاني في بيت اهلي كنت عايشة في شقتي ومطبخي براحتي انا دي الوقت لا املك شئ بحس اني ضيفة

انا نفسي اعيش حياتي انا كنت عروسة مسابونيش اتهني زي باقي الناس حسبي الله ونعم الوكيل فيهم

 

 

شارك هذه المشاركه


رابط المشاركه
شارك

وفى الختام لم تاخد الاخت حقوقها الى الان واهله ولا هو بيسألوا عن البنت وهى بدئت تعمل دراسات عليا وتشتغل وتربى بنتها وليس لها الا امها وابوها وامها حالتها تدهور يوم بعد يوم بسبب ما حدث لابنتها وربنا يشيفها ويعافيها لاجل تلك المسكنيه

 

والاخت كل فتره يتقدم لها شخص بالطبع متزوج او مطلق ويريدها بدون ابنتها ولكن ترفض من اجل ان تظل مع ابنتها وتنتظر ان يعوض الله عليها بالزوج الصالح الذى يكون عونا لها ولابنتها

وربنا يرزقها بيه ويعوضها خيرا ما فقدت

 

تاهت الكلمات من بين يدى

ادعو لها بظهر الغيب

رجاء

شارك هذه المشاركه


رابط المشاركه
شارك

حسبنا الله ونعم الوكيل

اللهم ارزق جميع بنات المسلمين الازواج الصالحين

تم تعديل بواسطة شمعة بذكر الله

شارك هذه المشاركه


رابط المشاركه
شارك

لا حول ولا قوةالا بالله

قصة الانسانة هده تقطع القلب عن جد

 

الله يرزقها بزوج صالح يقبلها مع بنتها ويحبها عن حقيقي ومش زي الاول الي شافت الويل منوا

 

بس هذاابتلاء من الله عز وجل حتى يجرب قوت ايمانه

 

انصيحها باستغفار كثيرا وتسجد لله كثيرا حتى يفرج كربتها

 

ولها مني دعاء في ظهر الغيب باذن الله العلي العظيم

 

الله يحمينا ويسرلنا طريقنا يا رب ارزقنا زوجا صالحا يحبنا فيك و يرضيك فينا

 

وعليكم السلام

شارك هذه المشاركه


رابط المشاركه
شارك
تاهت الكلمات من بين يدى

بصراحة مش معقول انو في ناس مثل هؤلاء الله يجازيهم بمثل ما ظلموا هالبنت المسكينة

اللهم اجرها في مصيبتها وارزقها زوجا صالحا يحبها ويحب ابنتها

اللهم امين

شارك هذه المشاركه


رابط المشاركه
شارك
لا حول ولا قوةالا بالله

قصة الانسانة هده تقطع القلب عن جد

 

الله يرزقها بزوج صالح يقبلها مع بنتها ويحبها عن حقيقي ومش زي الاول الي شافت الويل منوا

 

بس هذاابتلاء من الله عز وجل حتى يجرب قوت ايمانه

 

انصيحها باستغفار كثيرا وتسجد لله كثيرا حتى يفرج كربتها

 

ولها مني دعاء في ظهر الغيب باذن الله العلي العظيم

 

الله يحمينا ويسرلنا طريقنا يا رب ارزقنا زوجا صالحا يحبنا فيك و يرضيك فينا

 

وعليكم السلام

 

والله ياحبيبتى تقطع القلب وتمزقه

فبنت كانت بنايه احلام وكلها طلعت اوهام للاسف الشديد

وخرجت لتواجه الدنيا بلقب مطلقه وطفله لا ذنب لها فى شئ

 

اكثر ما وجعنى وجعلنى اتألم لتلك القصه كلمه الفتاه تلك

الحاجة الوحيدة اللي خلتني اعيط لما فقت سالت مين اللي اذن في اذنها قالوا لي ماما واخويا حسيت ان بنتي يتيمة اعدت اعيط جامد لما كل اب يضم ابنه ولا بنته كده في اول يوم في الدنيا وانا بنتي ملقتش ابوها جنبها اقول ايه ولا اعمل ايه؟

 

ومن قلبى بدعليها ربنا يعوض عليها ويرزقها اكثر مما تتمنى ويبارك فى بنتها

 

ويرزقك ياغاليه بزوج صاااااااااااالح عاجلا غير اجلا

شارك هذه المشاركه


رابط المشاركه
شارك

السلام عليكم ورحمة الله وبركاته،،

 

قصة مؤثرة جدا بجد مش عارفة اقول ايه ؟

 

الكلام ميوصفش بس اللى الواحد يقدر يقوله حسبى الله ونعم الوكيل

 

واذكركم واذكر نفسى ان احنا فى نعمة وهى الزوج الصالح اللهم احفظ لنا ازواجنا

 

ويعوض عليك بالزوج الذى يقر عينك ويعوضك عن ما اصابك

شارك هذه المشاركه


رابط المشاركه
شارك

حسبي الله ومعم الوكيل

الله يرزقها الزوج الصالح ليعيمها ويعين ابمنتها

والله يمتقم من يالي كان السبب

الله ينتقم منهم ياااااااااااااااااااااااااااااااااااااااا رب

شارك هذه المشاركه


رابط المشاركه
شارك
بصراحة مش معقول انو في ناس مثل هؤلاء الله يجازيهم بمثل ما ظلموا هالبنت المسكينة

اللهم اجرها في مصيبتها وارزقها زوجا صالحا يحبها ويحب ابنتها

اللهم امين

 

اللهم اميييييييييين

 

حبيبتى شمعه بذكر الله

 

ويارب يذقوا ويتجرعوا مراره الكأس الذى ساقوه لتلك المسكنيه

 

حسبى الله ونعمه الوكيل فيهم وفى امثالهم

 

شارك هذه المشاركه


رابط المشاركه
شارك

قريتها يا أم حبيبة...قريتها كلها وقطعت قلبي جدا..

بس سبحان الله أكيد هى وأهلها عليهم المسئولية الأكبر لم يحسنوا الاختيار من قبل..فين صاحب الدين؟؟

فين فترة الخطوبة؟فين وفين وفين؟؟

فين علاقة هذا الشخص بربنا؟؟

 

 

والله حبيبتى البنت تكون عانس<<زما بيقولوا..أحسن مليااااار مرة من إنها تكون ذليلة عند ناس..هم مش ناس أساسا..

بجد بجد مش عارفة أقول ايه..

الحمد لله الذى نجاها من هذه الحياة..

"وسيعلم الذين ظلموا أى منقلب ينقلبون"

حسبها الله سيعوضها خيرا بإذن الله..وتأكدى حبيبتى أن الله لا يقدر شيئا إلا وله حكمة فيه وخير لصاحببه..

بشرها الله بالسعادة هى وابنتها فى الدنيا والجنة فى الآخرة..اللهم آمين

شارك هذه المشاركه


رابط المشاركه
شارك

من ساعت ما قرأت القصة وانا مصدومة

ايه دة هو فى ناس كدا؟؟؟؟

مش عارفة اقول اية

 

حسبنا الله ونعم الوكيل

 

ربنا يصبرها ويعوضها خير ويباركلها فى بنتها وينبتها نباتا حسنا ويرزقها بالزوج الصالح اللى يعوضها عن اللى شافتة

شارك هذه المشاركه


رابط المشاركه
شارك

قصة مؤثرة جدا بجد الله يصبرها ويكون بعونها ويعوضها بالخير

 

الكلام ميوصفش بس اللى الواحد يقدر يقوله حسبى الله ونعم الوكيل

 

واذكركم واذكر نفسى ان احنا فى نعمة وهى الزوج الصالح اللهم احفظ لنا ازواجنا

 

ويعوض عليك بالزوج الذى يقر عينك ويعوضك عن ما اصابك

شارك هذه المشاركه


رابط المشاركه
شارك
من ساعت ما قرأت القصة وانا مصدومة

 

وانا مثلك ياغاليه

 

لى عوده

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

ويبا

 

التائبه للمولى الغفور

حسبى الله ونعمه الوكيل فى اناس

 

نسوا معنى كلمه نخوه

وضاعت منهم كلمه رجوله

 

 

جزاكن الله خيرا ياغاليات

شارك هذه المشاركه


رابط المشاركه
شارك
قريتها يا أم حبيبة...قريتها كلها وقطعت قلبي جدا..

بس سبحان الله أكيد هى وأهلها عليهم المسئولية الأكبر لم يحسنوا الاختيار من قبل..فين صاحب الدين؟؟

فين فترة الخطوبة؟فين وفين وفين؟؟

فين علاقة هذا الشخص بربنا؟؟

 

 

والله حبيبتى البنت تكون عانس<<زما بيقولوا..أحسن مليااااار مرة من إنها تكون ذليلة عند ناس..هم مش ناس أساسا..

بجد بجد مش عارفة أقول ايه..

الحمد لله الذى نجاها من هذه الحياة..

"وسيعلم الذين ظلموا أى منقلب ينقلبون"

حسبها الله سيعوضها خيرا بإذن الله..وتأكدى حبيبتى أن الله لا يقدر شيئا إلا وله حكمة فيه وخير لصاحببه..

بشرها الله بالسعادة هى وابنتها فى الدنيا والجنة فى الآخرة..اللهم آمين

 

تسلمين ياام عائشه على الحضور المميز ولكن ياغاليه كم ننخدع بالمظهر الملتزم ! والشخص المحترم واهله الطيبن ذو الكلام المعسول ويكون هذا ماسك يخبئ حقائق لا تضح الا بالعشره

 

بالطبع مثل عليها وعلى اهلها كافه انواع الالتزام والتدين

ما بالك انى مره سمعت اخت تشكو زوجها فى برنامج ومن هو زوجها هو ابن عمتها يعنى حماتها تكون عمتها

وهى سيده قاسيه جداااا فما بالك ان كانت عمتها وما عرفتها الا بعد الجواز

فما بالك بالاغراب !!!!!

 

وربنا يتقبل دعائك ياغاليه لها فانا متابعه لموضوعها فى منتدى اخر وان شاء الله ان جد جديد ساخبركن به

شارك هذه المشاركه


رابط المشاركه
شارك

السلام عليكم ورحمة الله وبركاته،،

 

لا حول ولا قوة الا بالله

اللهم أجرها في مصيبتها واخلفها خيرا منها يارب العالمين

ومن ظلمها عليه من الله ما يستحق

شارك هذه المشاركه


رابط المشاركه
شارك
من ساعت ما قرأت القصة وانا مصدومة

ايه دة هو فى ناس كدا؟؟؟؟

مش عارفة اقول اية

 

حسبنا الله ونعم الوكيل

 

ربنا يصبرها ويعوضها خير ويباركلها فى بنتها وينبتها نباتا حسنا ويرزقها بالزوج الصالح اللى يعوضها عن اللى شافتة

 

اللهم امين حبيبتى

 

ووحشيتنى جداا

فينك مختفيه ؟؟؟؟؟

شارك هذه المشاركه


رابط المشاركه
شارك

والله مصدومة وفي نفس الوقت استغربت لماذا يعاملها بهذه الطريقة طيب اذا كان لا يريدها لماذا تزوجها و اكثر ما المني انها طلقت بدون سبب

الله يصبر هذه المسكينة و اسال الله ان يسعدها و يعوضها الله امين يا رب العالمين

الرجال و ما ادرانا ما الرجال

ما نقول سوى حسبنا الله و نعم الوكيل

اسال الله ان يهدي الازواج

شارك هذه المشاركه


رابط المشاركه
شارك

انامش عارفة اقول ايه بجد

انا تعبت و عينيا ورمت من العياط و مش هاعرف انام لأنى متأثرة اوى بجد

بجد مش مستحملة و انا يا دوب قارئة للحكاية دى

لا حول و لا قوة الا بالله

حقك هتاخديه يا حبيبتى بإذن الله

بس المهم حقك ف الأخرة

ربنا عمره ماهينساكى و اصبرى و ادعى دايما: "اللهم أجرنى فى مصيبتى و اخلف لى خير منها"

و اعرفى ان كل حقوقك هتاخديها و ان شاء الله لكى الجنة انتى و ابنتك و ربنا يخليهالك و يحفظهالك وتعوضك و تكون فرحتك

والحمد لله ان احنا مظلومين و ليس ظالمين

انتى تعرفى ان يوم القيامة هتاخدى حقك كله منهم و هيتعذبوا كلهم

اصبرى حبيبتى و احتسبى

و انتى مظلومة و دعوة المظلوم مستجابة

و متخافيش من نظرة الناس

انتى معملتيش حاجة غلط و لا حرام

و كمان زى مابتقولى انك خام و تربيتك حسنة و الحمد لله

يبقى هيكونوا متأكدين ان المشكلة مش فيكى و انك اتظلمتى

 

يارب صبرها و فرج همها و أرح صدرها يارب

يارب قوى قلبها بالإيمان يارب و جازيها خير يارب

تم تعديل بواسطة sagda2

شارك هذه المشاركه


رابط المشاركه
شارك

وفى الختام لم تاخد الاخت حقوقها الى الان واهله ولا هو بيسألوا عن البنت وهى بدئت تعمل دراسات عليا وتشتغل وتربى بنتها وليس لها الا امها وابوها وامها حالتها تدهور يوم بعد يوم بسبب ما حدث لابنتها وربنا يشيفها ويعافيها لاجل تلك المسكنيه

 

والاخت كل فتره يتقدم لها شخص بالطبع متزوج او مطلق ويريدها بدون ابنتها ولكن ترفض من اجل ان تظل مع ابنتها وتنتظر ان يعوض الله عليها بالزوج الصالح الذى يكون عونا لها ولابنتها

وربنا يرزقها بيه ويعوضها خيرا ما فقدت

 

تاهت الكلمات من بين يدى

ادعو لها بظهر الغيب

رجاء

 

شفا الله أمها وألهمها الصبر

أجارها الله في مصيبتها وخلف لها خير منها

ولكي يهون عليه ماحدث والله ربنا نجاها تنظر في من هم أشد منها في البلاء وفي وحده زوجها ضربها أفقدها احدي عيناها وكانت تعمل وحبسها ولم يسمح لها بالنزول إلا لتاتي بالمرتب فخدت بنتها ونجدوها زملائها وحكم لها بالطلاق وترك أبنته ورزقها الله بزوج لم يتزوج قبلها وأعد لأينتها غرفه لتعيش معهم ورزقها الله بولدين منه وكان نعم الزوج والأب لابنتها

وتذكري أن الله ليس بغافلا عما يعمل الظالمون

وان الديان لايموت

هذا مثل وتذكري انه لو علمنا الغيب لخترنا الواقع

ونصيحة للاخت ياريت تغير نمرة تلفنها لانه واضح أنه لا ينوي ان يتركها في حالها

.........................

أما بالنسبه لحقها فلو هي في مصر ومادام طلقت رسمي فابسهوله تطالب بعفشها أرضائآ لوالده لو كانت كاتبه قائمة المنقولات لدرجة إن الزوجة ممكن تتمكن من عفشها وهيه علي زمته

وبالنسبه للنفقه ايضأ سهلة ترفع قضيه ولو غن سلامتها هي وبنتها بالدنيه بس ده تأديب ليه عشان بنات الناس مش لعبه وحقك مكنتيش هتاخذي في الدنيا ففي الأخره ولكن السعي مجرد سبب وربنا يخلف عليك بكل خير

ولن ننسها بالدعاء بظهر الغيب إن شاء الله

ومعذرتآ للأطاله

تم تعديل بواسطة أم أحمد العلواني

شارك هذه المشاركه


رابط المشاركه
شارك

وعليكم السلام ورحمة الله وبركاته،،

 

لا حول ولا قوة الا بالله

والله مصدووووووووومة ...!!!

قلبي تقطع حين قرائتي لقصتها المؤلمة

ربنا يـــــــــــارب يفرجها عليها ويبدل همها وغمها سرورا وفرحـــــــــــا عن قريب بإذن الله

ويعوضها خير

أما طليقها هذا الظالــــــــم فعليه من الله ما يستحق هو ومن معه

اللهـــــــم إنصرها عليهم ...اللهم أنصرها عليهم

 

لن ننساها من دعائنا حبيبتي صاحبة القلب الطيب

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×