البيت النظيف يعطى إحساسًا بالراحة

[**أم سلمى** 657]

تنظيف المنزل

 

تعلمنا منذ صغرنا أن " النظافة من الإيمان " ، وقال رسول الله - صلى الله عليه وآله وسلم -: ( إن الله طيب يحب الطِّيب ، نظيف يحب النظافة.. ) .[رواه الترمذي] .

والبيت النظيف يعطى إحساسًا بالراحة لمن يقيمون فيه ومن يزورونهم ، والعلاقة وثيقة بين نظافة البيت وصحة ساكنيه ؛ فالبيت النظيف بيت صحي .

 

 

وتتحقق النظافة بالوقاية والعلاج ؛ فالوقاية تكون عن طريق تجنب ما يؤدي إلى قذارة البيت ، أمـا العـلاج فيكون عـن طريق التنظيف الدائـم بشكــل يومــي أو أسبوعي أو شهري ، حسب حاجة المكان إلى النظافة . ويجب ألا تكون نظافة البيت مهمة عشوائية تقليدية ، بل على ربة المنزل أن تخطط لها بالتعاون مع أفراد الأسرة ، حتى يكون البيت مكاناً ملائماً للسكن النفسي والراحة .

 

 

واليكِ اختي الكريمة بعض النصائح

 

 

نصائح بسيطه لازم تعمليها في الأول علشان هتسهل عليكي كتير وهتخليكي مش تضيعي وقت ومجهود كتير اثناء التنضيف

 

والنصائح دي هي...

قبل كل حاجه جددي النيه واستعيني بالله وياريت تشغلي قرءان جنبك او اي محاضره دينيه حلوه علشان تستفيدي من الوقت وانت بتنضفي

 

النصيحة الأولى

اختاري اليوم الصح اللي هتنضفي فيه الشقه :

خليكِ ذكية واختاري اليوم اللي هتنظفي فيه .... يعني مثلا ميكونش يوم اجازه العيال وابو العيال ...ميكونش قبل مشروع سفر قريب او هتخرجي بالليل لمناسبه مثلا ...مهم جدا تراعي الحاله الجويه وده عن طريق إنك تشوفي نشرة الأخبار الجوية قبلها بيوم علشان تعرفي حالة الجو هتكون أخبارها إيه.. لو عرفتِ إن الجو بكرة فيه تراب أو ممطر يبقى بلاش تنظفي في اليوم ده علشان مجهودك هيضيع على الفاضي، و التراب هيدخل تاني وكأنك ماعملتيش حاجة..

 

النصيحة التانية

ابدئي بالصعب

ياريت تبدئي بالأوضة اللي هتحتاج منك وقت طويل في التنظيف وده علشان هتكوني لسه في البداية وعندك حماس كاف وهتروقيها كويس جدا..

 

وسيبي اللي مش محتاجة شغل كتير إلى النهاية علشان هتكوني تعبتِ وبالتالي الأوضة دي هتكون مش محتاجة منك مجهود كبير.

 

النصيحة الثالثة

خلي أدوات التنظيف جنبك

خدي كل أدواتك اللي هتحتاجيها في التنظيف معاكِ إلى الأوضة أو المكان اللي أنتِ هتنظفيه وده علشان تريحي نفسك من الخروج والدخول من أوضة إلى التانية. ممكن تجمعيهم كلهم في باسكت واحد

 

وياريت و أنت بتنظفي يكون معاكي 2 كيس أسود كبير علشان لو لقيتي لعبه مكسوره او اي حاجه ملهاش لزمه ومكركبه الحته علي الفاضي ترمي علطول اول باول ........والكيس التاني تجمعي فيه الحجات اللي مش محطوطه في مكانها علشان تفرزيها في الاخر بدل ما تفضلي رايحه جايه ترجعي الحاجه مكانها وطبعا الامهات اللي عندهم اولاد مهمه اوي النقطه دي ليهم

 

النصيحة الرابعة

شيلي أي أسلاك كهرباء قبل ما تبدأي في الترويق

زي سلك التليفزيون أو التليفون أو الكمبيوتر أو أسلاك الأباجورة وغيرها من الأسلاك الموجودة في البيت. وياريت بعد ما تخلصي تحاولي تظبطي الاسلاك بحيث يكون ليها مكان ثابت ومش ظاهر علشان مش تلف علي بعض وتكون بعيده عن الاطفال

 

كمان ياريت إنك تشيلي أي فازات أو أي حاجات تخافي عليها إنها تقع وتنضيفها الاول قبل اي حاجه وتحطيها في مكان بعيد .

 

النصيحة الخامسة

قبل ما تنضفي اي اوضه اكنسي السجادة وشيليها الاول علشان مفيش أي تراب ييجي عليها ويبهدلها لك زيادة.

 

النصيحة السادسة

روقي من أعلى إلى أسفل

ياريت وأنت بتروقي الغرفة تبدأي تنظفيها من أعلى إلى أسفل وده علشان التراب اللي في السقف ينزل إلى أسفل وبعد كده تبدأي إنك تكنسيه بالمكنسة.

 

 

النصيحه السابعه

روقي مطبخك كويس وابعدي عن الكركبه وخففي من الحجات الموجوده في دواليب المطبخ ومش بتستعمليها

 

النصيحه الاخيره

لازم يكون ليكي لمستك ...خلي لبيتك أجواء خاصة في رمضان....حاولي وانت بتنضفي البيت تعملي حسابك انك تفضي مساحه او ركن في البيت تحطي فيه مصاحف وبخور وسجاجيد وتخلي الركن ده مميز ومخصص للعباده علشان رمضان

 

بس يا ستي دي نصائح عامة علشان تبقي محددة أنتِ عايزة تعملي إيه بالضبط..لو حد حابب يضيف حاجه كمان يبقي ربنا يجزيه كل خير :)

 

 

من تجميعي * أم سلمى *

 

[مهدية العباسية 0]

ماشاء الله عليك حمستيني

الله يبارك فيك

[ظِلّ زَهرَة 73]

موضوع رائع كعادتك حبيبتي ام سلمى <3

بارك الله فيك على النصائح القيمة :)

[**أم سلمى** 657]

جزاكم الله كل خير <3