اذهبي الى المحتوى
هبة عبد العظيم نور

مراتي في السبعيناااااااااات

المشاركات التي تم ترشيحها

سبحان مغير الاحوال

الشيخ خالد بقى ينصح باللين وشاهيناز هي الي بدات تتنرفز وهي بتدعي

:))

وحماته بدات تحبه ومتخفش منه

:))

 

علاء كنت قلقانه هيسيب بنت خالته ازاي وعمه هيزعل بس كويس انها جت منها وكمان زكيه راحت لام لسانين علشان تاكد انها الي سبته

هههههههههههههه

 

 

ليلى تستاهل هي مش هتيجي غير بكدا

 

 

محمد

الواد ديه هو الي فعلا جاي من تحت الجاموسة

مش بيفكر غير في مصلحته وبعدين ايه موضع التبادل دا جوزني اختك واجوزك اختي

 

بس يا ترى ايه هيحصل اظن ان مصطفى هياخد قرار سريع هو وابوه وهيسيبو ليلى

ههههههههههههههههه

 

 

موني

هههههههههههههههه

بحب الاغنيه دي فكرتين بيها اما اروح اغنيها لعاليا

هههههههههه

 

 

دنيا

اظن بتقول يا رب عمي ما يمشي من عندنا طالما فيها كباب

 

 

جميل يا هبه جدااااا

 

 

طيب منتظرين الحلقات الاخيره الواحد هيزعل والله

شارك هذه المشاركه


رابط المشاركه
شارك

يا خساره يا هوبه ليه كده طيب ما تعملى جزء تانى عادى

أبو زينه ده عسل اوى هو واخوه وطيبين

سبحان الله محمد ده كأنه مش ابنهم خالص

مصطفى وعلاء فظاع ههههههههههههه دمهم خفيف

الشيخ خالد كويس ان حماته بقت تحبه مش تخاف منه

اعتقد مصطفى هياخد قرار ويروح يتزوج زينه

اما علاء اعتقد كده انك هتفجأينا بسالى تدخل فى الموضوع بعد ما ربنا يهدى امها والله اعلم

الاغانى اللى البت مونى بتغنيها دى كانت فى اوائل التسعينات يا امى هههههههههههه

شارك هذه المشاركه


رابط المشاركه
شارك

هو ايه ده

محمد ده عايز ينضرب

يا سلام عايز البنات مالهاش رأى وهو اللى يمشى رأيه

 

شفتى حماة خالد حبته لما لقت معاملته بالحسنى وكويس

 

زعلتينى يا هبه هافتقد المسلسل كده

طب ينفع تعملى واحد بعده على طول ؟ ^^

شارك هذه المشاركه


رابط المشاركه
شارك

سارة محمد

 

حبيبة قلبي كان هاين علية امبارح ابعتلك جواب شكر عشان انتي الوحيدة اللي جبرتي بخاطري ورديتي على حلقات باليل هههههههه لولا ردك كنت نمت معيطة هههههههه تسلميلي يا سوسو

ههههههه طب الحمد لله

الله يسلمك من كل سوء

ده انا كنت وقتها نيمانه وقلت اقرأ بس الحلقات وبعدين انام ^^

شارك هذه المشاركه


رابط المشاركه
شارك

أنا هنا يا هوبة بس كنت متغاظة منيك عاد عشان بتأخري الحلجات علينا ( بقيت اتكلم صعيدي :))

 

عندي تعليقات كتيييييييييييييييييييير بس الوقت مش مساعدني ان شاء الله اجي واكتبها

 

جوتيم هوبة

شارك هذه المشاركه


رابط المشاركه
شارك

@@هبة نور @

انتى الجمر ياجمر وعثل كمان <3

بس معلش مشغوله شويه ومش بعرف اعلق غلى الحلقات بقرئها بس وكمان المشكله البتنزليها متأخر قوى قوى

بس بجد روووووووووووعه وكفايه مجهودك فى التأليف والكتابه كمان

ربنا يرضى عنك ويسعدك فى الدنيا والآخره

وياريت بعد ما المسلسل ده يخلص تبتتدى مسلسل تانى على طول عااااااد :Dلحسن زعلنا وحش قوى قوى

شارك هذه المشاركه


رابط المشاركه
شارك

السلام عليكم ورحمة الله وبركاته

 

وده اعتذااااااااااااار برضه هتقبليه صح؟؟؟

 

لو ماقبلتيش اعتذاري يبقى شوفي هتصالحيني ازاي -_- -_- -_-

 

ههههههههههههههههههههههههههههههههه

 

وأنا ناقصني إيه علشان ماحللشي زيهم :D :D

 

بصي هي زينة هتتجوز مصطفى يعني هتتجوزه رغما عن الكيبورد بتاعك

 

وأحمد+لميا..ومها مع امممممممممم نسيت...وخالد + شاهي...ودنا + حاتم....وسوزي + أدهومة = حياة زي الأفلام والمسلسلات بالضبط..رغما عن صوابع غيدك

 

موني دي هتكبر وهتبقى زي العثل بالضبط ياختي..أما تشوفي أبوها وأمها هتصالحيهم انت ازاي..أيوة وماله

 

وعلاء ده هيتجوز بنت من البنات...عارضيني لشوف :D

 

نسيت حد...ولا لأ

اممممممممممممممممممممممممممممممممممم

 

 

أيوة أيوة..هي تيتة في الآخييييييييييير هتموت صح...رغما عنك هتموت يعني هتموت -_- -_-

 

**الله يرحمها يااااااااااااارب**..بحبها علشان كده دعيت معاها..والله يرحمك انت برضه ياهبهوبة...ماتقولي آمين يابنتي الله يطول بعمرك

 

تذكرت حالي وأنا بحكي عن جدو مثى فبقول الله يرحمه..بعديها على طول بقول أستغفر الله..أو نسيت جدو ده لسه عايش

 

شفت فردوسة بتفكر ازااااااااااااااي..ماتتعلمي ياستي

 

ملليتي ولا مستحيل صح صح صح :P

 

الله يفرح قلبك ياااااااااااارب...شوفي الساعة كم..وفردوسة بتكتبلك تعليق علشان مش تنكري محبة ومعزة ومودة وإيه كمان؟؟؟؟؟؟؟؟؟؟

  • معجبة 1

شارك هذه المشاركه


رابط المشاركه
شارك

جميلة جدا الأحداث

جزاكِ الله خيرا هبة الحبيبة

 

كويس جدا إن هيام خلعت وأكيد ربنا هيرزقه بأحسن منها

 

ما تشوفيلنا صرفة في محمد ده ولا حاجة

طلعيلنا عليه ديب من ديابة الجبل أو عيار طايش : ))

ربنا يهديه هو وأمثاله يارب

شارك هذه المشاركه


رابط المشاركه
شارك

ان شاء الله حبيبتي اشوفلها قصص اخري

انا قبتلها البارحة هيك

 

بالنسبة للحلقات

انا عرفت ليه مبينتيش سالي لحد دلوقت

لانها اتحجبت التزمت بدبنها

ولو بينتيها دلوقت راح نعرف انك راح تزوجيها لعلاء؟

عشان كدة قلت ادخلها في الاحداث في الوقت المناسب صح تخميني هههههههههههه؟

 

علي فكرة انا قبل كنت منتظرة من الشيخ الذي يدرسه التجويد ان ياتيه بعروسة ههههه.

بس مع اخر حوار ما شفتش حاجة :huh:

قلت منشيل هاي الفكرة من الراس :D

 

بالنسبة لمصطفي راح ياخد ابوه واخوه علاء والجدة وراح يخطبو زينة ويكتبو الكتاب وترجع معاهم علي المنطقة البحراوية :ph34r: ؟

ولو ان من عاجباني هاي الطريقة التي ستتزوج بها ( :( ).

 

يكفي هاي التخمينات هههه

ان شاء الله يطلع فيها شوي صواب :))

 

في امان الله حبيبتي هبة

شارك هذه المشاركه


رابط المشاركه
شارك

السلام عليكم ورحمة الله وبركاته

^___^

عيارين في الجو مرة واحده ..تسلمي يا حبيبة

الأحداث ماشية برتم سريع ولكن مشوقة

مدحت ..لا أدري ولكن أظن أنه سيكون قاسيا أن يترك نجلاء بعد كل ذلك

فهي في يوم من اليام كانت زوجته ..والله يقول " ولا تنسوا الفضل بينكم "

 

..

دنيا تحسيها طفلة تحتاج إعادة تأهيل للحياة الزوجية وإلا ستقترف الكثير من الأخطاء : )

حاتم .. الله يعينه على دنيا ..ولكن مؤكد الحياة معها لها رونق خاص

...

الشيخ خالد ..شاهي ..ما كان الرفق في شيء إلا زانه ..صدق رسول الله

الرفق واللين يجمع القلوب ؟؟

ما يعجبني أن الدعوة هم بالنسبة له ولا يترك فرصه إلا وينتهزها

...

ليلى .. تظن أن أولادها من ممتلكاتها الخاصىة ..فهي التي تأمر فتطاع

وهذه أسرع وسيلة لخسارة الإبناء

أعلم أنها ستوافق على زينة بعد أن تراها وةلكن أتمنى أن تغير رايها قبل أن تراها ..

فالجمال ليس أساس لحياة زوجية متينة ..

ربما عندما تشعر أنها خسرت الجميع تنتبه على نفسها ..

...

أجمل ما في الفصول الأخيرة متابعة حلقات الصعايدة

صدقا رائعة ..ومضحكة جدا : )

والأجمل أن الشيخ مناع متعود على إن زوجته وبنتها بيرغوا بالفرنسي وهو ساكت وراضي : )

الله يسعدك هوبة كما تسعدينا

ولكن حقيقي أخشى من محمد كثيرا ..لا أدري ماذا سيفعل

ولكن المؤكد أنه لن يستسلم سريعا ..

......

الوجة الجديد هذا ..ماذا يريد ومن هو ؟؟؟؟

الله يسعدك هوبة

شارك هذه المشاركه


رابط المشاركه
شارك

راااااائع يا هبة

من فضلك خلي زينة لمصطفى و لا تلصقيها بعادل هاذ

 

ايه اخبار الرقاصة و بنتها؟؟؟ و زميلتها لي حملت؟؟؟

منتظرين البقية و متشوقين لها

الله يسعدك يا حبيبة

لا تتأخرييييييييييي

شارك هذه المشاركه


رابط المشاركه
شارك

@@هبة نور@

ماتكونيش بتفكرى تجوزى هياااااااااام لمحمد :P

وبكده نكون ضربنا عصفورين بحجر واحد وخلصنا منهم هما التنين

أيه رأيك فى تخمينى ؟؟؟

وانا مع @أم آيه @فى ان ممكن علاء يجوز سالى بعد ما اتحجبت والتزمت -_-

  • معجبة 2

شارك هذه المشاركه


رابط المشاركه
شارك

حلقات ولا أروع : " )

بورك فيك ِ يا غالية وجزاك الله كل خير

 

لديك أسلوب جذاب ، ومشّوق ، ومرح ، وسلاسة الأحداث متابعة معك بإذن الله

 

أحببت أن أنوه بفتوى ان زواج البدل حرام ٌ شرعًا :

جئت لأحد الإخوان وطلبت منه أن يزوجني ابنته وقال لي: زوجني بنتك ولا عندي مانع، وبقيت في حيرة من الأمر، أرجو من فضيلتكم توضيح الطريق الصحيح، وهل في هذا الشيء حلال أم حرام؟ وفقكم الله لعمل الخير وجزاكم الله خيري الدنيا و الآخرة شاكرين لكم وللعاملين على هذا البرنامج؟

نكاح الشغار ويسميه بعض الناس نكاح البدل لا يجوز، وهو أن يقول زوجني بنتك أو زوج ولدي أو أخي أو ابن أخي وأزوجك بنتي أو أزوج ولدك أو ابن أخيك هذا لا يجوز، هذا هو الشغار الذي نهى عنه النبي صلى الله عليه وسلم وذكر عنه في عدة أحاديث، والرسول صلى الله عليه وسلم ......نكاح الشغار وهو ما يسمى بنكاح البدل، فلا يجوز أبداً لأي مسلم أن يتزوج نكاح الشغار ولو بالمهر المعتاد، لا يجوز هذا، لأن الشرط نكاح بنكاح،وعقد في عقد، فهو..... بيعة لبيعة ولأنه يفضي إلى فسادٍ كبير، إلى نزاع وخصومات وإلى إجبار النساء وظلم النساء من أوليائهن لمصالحهم أو مصالح أولادهم أو أبناء إخوتهم ونحو ذلك،....... النساء بعد ذلك أن يكون تنازع الزوج مع زوجته خرجت الأخرى فالمقصود أنه منكر لهذا الرسول نهى عنه عليه الصلاة والسلام ويكفي هذا، كون الرسول صلى الله عليه وسلم نهى عنه يكفي هذا، ولكن مع هذا كله يقع أهله في مفاسد كثيرة، وهذا من سوء الذنوب وسوء المعصية، معصية الرسول صلى الله عليه وسلم، فالمعصية لها عواقب وخيمة، فالذين يقعون في الشغار، ويعصون الرسول صلى الله عليه وسلم تقع له مشاكل مع نسائهم في الغالب فالواجب على المسلم أن يحذر ذلك وأن لا يتزوج بالشغار أبداً، والنكاح بالشغار غير صحيح. ابن باز

  • معجبة 5

شارك هذه المشاركه


رابط المشاركه
شارك

بنت يا هوبة لسة ما كتبتي الجديد

يلا يا بنيتي قبل ما زوجي يجي يطجني عيارين وهو ما هيصدق عاد :blink:

 

 

اممممممممممم نبدأ من الآخر حسين دة هو زوج نهى تقريبا اللي هي زميلة علاء اللي كانت في اول الحلقات صح ولا اية :(

لكن عايز اية من علاء

 

مدحت انا شايفة ان مرواحه لنجلاء عادي لانه حب يرد جزء من كرامته اللي هي اهانتها انما فعل صفاء اللي معجبنيش خصوصا ان اخلاقها في الحلقات اللي فاتت بتقول عكس كدة لكن كيد النسا بقى

 

دنيا وحاتم عساسيل خالص ولون في السبعنيات كان السن دة مناسب للزواج والبنت تقدر تتحمل المسئولية انا حماتي اتجوزت صغيورة خالص بس مش في السبعنيات :P

 

ليلي كنت في اول الحلقات فكراها عاقلة سبحان الله عقلها طق مبتدمش لحد :O

 

الحاج فكري ماشاء الله مثال للزوج الصراحة

 

وتيتة عسولة خالص هزعل لو موتيها يا هبة

 

محمد دة مشكلة عافانا الله من شخصيته حاجة صعيبة

لكن راوية مش هتسكت دية مكس صعيدي على بحاروه

زينة العسولة ان شاء الله هتكون من نصيب مصطفي والا هطجك عيارين يا هوبة :P

 

سالي ومامتها ياريت يكون ربنا هداهم

 

وهيام دية ربنا يهديها

 

في مين مين تانييييييييييييييييي

 

لما افتكر اجيلك

شارك هذه المشاركه


رابط المشاركه
شارك

@@ساره محمد

 

وأنت من أهل الجزاء : )

شارك هذه المشاركه


رابط المشاركه
شارك

زواج البدل دة شفته كتير وتقريبا لازم حد يطلع وحش وينكد على الاكل او زوجه غيارة وتقوم اخوها على التانية لكن هل بكدة زواجهم يكون حرام ؟؟؟؟؟

شارك هذه المشاركه


رابط المشاركه
شارك

جميييييييييييييييييل ماكتبت هوبه

اظن ظهور محمد سيعجل بزواج مصطفى وزينة

واهى فرصه يروحوا يكتبوا الكتاب وهم مخاصمين مامتهم بدل ماتنكد عليهم

مستنينك هوبه ماتتاخريش علينا ياغاليه

شارك هذه المشاركه


رابط المشاركه
شارك

باشمهندس علااااء

 

افندم

 

كابتن طيار حسين رشدي عايز يقابل حضرتك

 

حسن رشدي !!!!!!!!!!!!!!!!! مين حسين رشدي ده . خليه يتفضل

 

 

 

 

 

 

السلام عليكم ورحمة الله وبركاته

 

ههههههههههههه اهلااااااااا وعليكم السلام ورحمة الله وبركاته يا كابتن حسين اتفضل يا فندم

 

هههههههه واضح انك لسة فاكرني وذاكرتك فولاذية ماشاء الله هههههههه رغم اني انا اللي ما عرفتكش باللحية يا باشمهندس ههههههه

 

هههههه انسى ازاي بس يا كابتن . انتي ناسي انك شوفتك في الجامعة وبعدين حضرت فرحك انت ومدام نهى

 

هههه والله كنت خايف الاقيك ناسيني واقعد افكرك لكن الحمدلله . مبروك على اللحية يا باشمهندس

 

الله يبارك فيك يا فندم وازي مدام نهى

 

قصدك ام علي ههههههه ربنا رزقنا بعلي وعنده تلات شهور دلوقتي

 

هههههه ماشاء الله . دا بقى راجل هههههه ربنا يخليهولكم يا كابتن

 

وانت تزوجت ولا لسة . معلوماتي انك كنت خاطب

 

لا والله ما فيش نصيب . فسخت الخطوبة

 

يا سيدي معلش . ربنا يعوضك ان شاء الله

 

الكلام اخدنا يا كابتن ونسيت اسألك تشرب ايه

 

قهوة سكر زيادة

 

حاضر يا فندم . ترررررررررررن ترررررررن يا عم صبحي

 

ايوة يا باشمهندس

 

قهوة سكر زيادة للكابتن وقهوتي المظبوط

 

حاضر يا باشمهندس

 

هههههه شكلك نفسك تسألني ايه سبب الزيارة

 

هههههه حضرتك تشرف في أي وقت بدون ابداء اسباب يا كابتن

 

اشكرك يا باشمهندس . ده من ذوق حضرتك . الموضوع يا سيدي ان عندنا قطعة ارض ملك الوالد الله يديلوه الصحة والعمر

 

وعايزين نبني عمارة من اتناشر دور وطبعا سمعة شركتكو ملئ السمع والبصر في مجال المعمار ماشاء الله

 

وانبسطت جدا لما عرفت من نهى ان والدك صاحب الشركة وانت بتشتغل معاه

 

ههههه عنده مش معاه هههههههه على العموم اشكرك على المدح في شركتنا وان شاء الله نكون عند حسن ظنك

 

اشكرك يا باشمهندس .انت طبعا هتيجي تعاين الارض بنفسك

 

ايوة طبعا

 

 

 

اتن تن القهوة يا باشمهندس

 

شكرا يا عم صبحي . كنا بنقول ايه يا كابتن

 

هههههه بنقول ان حضرتك هتيجي تعاين الارض بنفسك وحضرتك قولت ايوة طبعا هههههه

 

ههههههه اتفضل القهوة يا كابتن . والله انا فاضي بكرة ان شاء الله بعد الضهر وممكن اعاين

 

وهو كذلك يا باشمهندس . تحب اعدي على حضرتك اخدك

 

لا يا فندم ما فيش داعي . يكفي انك تديني العنوان وتقابلني هناك

 

ان شاء الله . بس معلش هنتعبك معانا شوية في طلبات اختي ههههههه

 

طلبات اختك !!!!ههههههه مش فاهم

 

هههههه يا سيدي اختي ليها تصور معين عن شكل العمارة وماحدش فاهمه ههههه قولنا يمكن يفهمها مهندس معماري

 

هههههه هي مهندسة ؟

 

هههههه لأ . جميلة اختي في اخر سنة اداب انجليزي

 

هههه ماشاء الله . بس واضح ان لها اهتمامات خاصة بالمعمار هههههههه

 

هههه هنتعبك معانا يا باشمهندس

 

يا فندم تحت امرك

 

طيب يبقى كدة ان شاء الله بعد المعاينة هاخد حضرتك البيت عشان الاستاذة جميلة تقولك على تصورها الخاص لشكل العمارة

 

وانا تحت امرها وامركم في أي طلبات ههههههههه

 

هههههه كلام مبشر بالخير والله هههههههه طيب استأذن انا دلوقتي وعلى معادنا بكرة ان شاء الله

 

ان شاء الله يا كابتن في حفظ الله

 

 

 

 

 

 

 

 

 

 

 

 

 

ترررررررررررررررررررررررررن ترررررررررررررررررررررررررررررررررررررررن

 

تررررررررررررررررررررررررررررررررررررررررررررررررن

 

تررررررررررررررررررررررررررررررررررررررررررررررررررررررررررن

 

الو

 

ايوة يا دنيا انا خالتك ليلى

 

اهلا يا خالتو صباح الخير

 

صباح النور يا حبيبتي . حاتم في الشغل طبعا ؟

 

ايوة وعمو فكري كمان

 

هو فكري عاجباه القعدة عندكو ولا ايه ؟

 

هههههههه والله عمو ده حبيبي وكل يوم يجيبلنا عشا من برا . مرة فراخ مشوية ومرة سمك وجمبري ومرة كباب وكفتة والواحد مش عايزه يمشي بصراحة هههههههههههههههه

 

اااااااه يا فجعانة يللي ماشية ورا بطنك . بقولك ايه يا دنيا انا عايزة طلب

 

خير يا خالتو

 

عايزاكي تعاملي فكري وحش وتزهقيه وتهقيه لحد ما يقول حقي برقبتي ويمشي من عندكو ويرجع البيت

 

ايه يا خالتو اللي بتقوليه ددددددده !!!!!!!!! مش ممكن طبعا . انا والله من غير حاجة انا بحب عمو فكري وبنبسط جدا بوجوده

 

حتى والله لو مش جاب أي حاجة . كفاية حنيته علية وكلامه الجميل . انا ما اقدرش اعمل كدة يا خالتو انا اسفة

 

كدة !!!!!!!!! دنيا طاوعيني وماتخلنيش احطك في دماغي انتي كمان واسود عشتك

 

اهئ اهئ هو انا عملت ايه يا خالتو عشان تزعقيلي ؟؟؟؟ اهئ اهئ طب والله لاقول لماما اهئ اهئئئئئئئئئئئئئئئئئئئ

 

انتي يا بنت يا بنتتتتت استني ما تقفليش السكة يووووووووووه بنت قليلة الادب . طب والله صبرك بالله يا ست دنيا . بس اما افوق من المشاكل اللي عندي . هتصل بحاتم في الشركة اكلمه اووووووووووف

 

 

تررررررررررررررررررررررن تررررررررررررررررررررررررررن

 

 

الو

 

اكلم حاتم

 

مين معايا

 

امممممممممممممممممممممممممه

 

يا ماااااا حاضر يا فندم لحظة واحدة . استااااااااذ حااااااااااااتم ارفع السماعة وقول يامااااا قصدي قول الو

 

حاضر يا استاذ شعبان . الوووووو

 

ايوة يا ولد يا حاتم

 

اهلا يا ماما ازيك

 

زي الزفت . بقولك ايه . هي كلمة واحدة اطرد ابوك من عندك

 

هههههههههههههه اطرد ابويا من عندي !!!!!!!!!!!!!!! اذا كان ابويا مديلي الشقة هدية ههههههه يبقى ازاي اطرده منها

 

يا ماما قولي كلام معقول

 

واللي ابوك بيعمله فيا ده معقووووووووول حرام عليكو والله حرااااااااااااااااااام

 

يا ماما حضرتك اللي عاملة في نفسك كدة . يا ماما يا حبيبتي يا نور عنيا ما ينفعش محاولة الغاء شخصياتنا دي

 

طب ترضي الناس يقولوا على ولادك مش رجالة وماشين ورا امهم ؟؟؟؟؟؟؟؟؟؟؟؟

 

ايوة يرضيني . ساعتها الناس تقول عليكو مطيعين وبارين بأمكم

 

البر شيء واللي حضرتك بتطلبيه من اخواتي شيء تاني . حضرتك ما تقدريش تنكري بر علاء ومصطفى ومعاملتهم الرائعة ليكي واحترامهم الكامل . علاء ومصطفى بيحبوكي جدا يا ست الكل وانتي عارفة كدة كويس

 

ااااااااه بيحبوني اوي بأمارة ما خلوا ابوهم يطفش من البيت ويسبني لوحدي اهئ اهئئئئئئئئئئئئئ

 

ههههههههههههه هو بابا وحشك ولا ايه ههههههه على العموم هبلغه اشواقك الحارة يمكن يعفو ويصفح ويرجع البيت

 

اخررررررررررس اياك تقوله حاجة . لازم يعرف قيمتي ويرجع من نفسه . انا مش هتذل لفكري عشان يرجع البيت

 

على راحتك يا ماما . معلش مضطر اقفل عشان عندي شغل

 

اوووووووووف كلكو مشغولين اوي وعاملين مهمين وانتو ما تساووووووش

 

هههههه شكرا ع المدح يا ست الكل بعد اذنك مع السلامة

 

 

 

اهئ اهئئئئئئئئئئئئئئ طيييييييييييييب يا فكري . الشايب اللي عاملي عيل وغضبان ال

 

اهئ اهئئئئئئئئ انا بخاف اقعد في البيت لوحدي يا ماماااااااااااا اهئ اهئئئئئئ مش عارفة انام من ساعة ماسابوني اهئ اهئئئئئ

 

 

 

 

 

 

 

تررررررررررررررررررررن تررررررررررررررررررررررررن

 

 

الو

 

اهئ اهئ اهئئئئئئئ عايزة حاااااااااااااااااتم اهئ اهئ

 

اقوله مين يا فندم

 

اهئ اهئئئئئئئ مراته اهئ اهئئئئئئئئ

 

مراته !!!!!!!! ومن شوية امه !!!!!!!!! الظاهر في خناقة بين امه ومراته والموضوع كبير . لحظة يا فندم استااااااااااااذ حااااااااااااتم

 

نعم يا استاذ شعباااااااااان عايز اشوف شغالي

 

ارفع السماعة وكلم المدام ربنا يعينك

 

دنياااااااا الو ايوة يا دنيا خير

 

اهئ اهئئئئئئئئئ امك بتهددني اهئ اهئ يا إما ازهق ابوك من البيت يا إما تسود عيشتي اهئ اهئئئئئئئئئئئئئئ

 

ههههههههههههههههههه يا ستي وماهي مسودة عيشة الكل يعني جت عليكي ههههههه ادخلي في الطابور واستني دورك هههههههههههههههه

 

اهئ اهئئئئئئئئئئ احميني منها اهئ اهئئئئئئئئئ

 

يعني احميكي منها اعمل ايه يعني

 

اهئ اهئئئئئئئ بلغ البوليس يا حاتم اهئ اهئئئئئئئ

 

ههههههههههه حاضر يا حبيبتي لو هنبلغ البوليس عن كل حماة يبقى البوليس مش هيلاحق عليهم

 

المسامح كريييييييييم معلش عشان خاطري

 

اهئ اهئ لأأأأأأأ اهئ اهئ

 

هههههههه بقولك عشان خاطري تقولي لأ !!!!!!!!!!!

 

اهئ اهئ طب هاتلي دستة جاتوه عشان تصالحني بيهاااااا اهئ اهئئئئئئئئئ

 

لأأأأأأأأأأ اتفلقي يا حبيبتي واخبطي دماغك في الحيط مع السلاااااااااااااااااامة ال اصالحها بدستة جاتوه ال

 

اهئ اهئ الله يسلمك اهئ اهئئئئئئئئ

 

 

 

 

 

 

 

 

 

 

 

 

 

مساء الخير ممكن اقابل ادهم بيه

 

مساء النور . اقوله مين

 

حاتم فكري

 

لحظة واحدة ابلغه

 

 

 

 

 

اتفضل يا استاذ

 

 

شكرا

 

 

 

مساء الخير

 

مساء النور اهلا اتفضل اقعد

 

هههههه واضح ان حضرتك مش فاكرني يا ادهم بيه

 

امممممم اسف والله مش واخد بالي . احنا اتقابلنا قبل كدة ؟؟؟؟؟؟؟

 

هههه ايوة يا فندم وحضرتك دفعتلي فاتورة العشا انا والمدام

 

اناااااااا !!!!!!!!!! مش فاكر حاجة زي كدة

 

ههههههه يا ادهم بيه انا قابلت حضرتك لما كنت بتتعشى مع مدام سوزانا في مطعم ديليسيو بلا

 

اهاااااااا ايوة ايوة افتكرت هههههههه اهلا استاذ سامح

 

هههههههههه يا فندم اسمي حاتم

 

اسسسسسسسسسف والله اسف اعذرني تشرب ايه يا استاذ حاتم

 

لا والله ما فيش داعي انا جاي ارجع لحضرتك قيمة الفاتورة . والله ساعتها ما كنتش عامل حسابي على العشا برا عشان كدة ماكانش معايا فلوس كفاية . وبعتذر عن تأخير المبلغ

 

هههههه يا راجل ياراجل د ا اسمه كلام برضو لالالالالالا طبعا مش ممكن اخدهم . ما يصحش

 

لالالالا ارجوك عشان خاطري مش هينفع لازم تاخدهم من فضلك انا مصمم

 

عيب كدة يا استاذ حاتم . يعني ينفع اهاديك هدية وترجعهالي ؟ لالالا مش اصول يا راجل شيل فلوسك عيب

 

يا استاذ اكرم انت كدة بتحرجني

 

اكرم !!!!!! انا اسمي ادهم

 

هههههههه يا سلاام ! اشمعنى انت غلطت في اسمي وسكتلك !!!!!!! ههههههه

 

هههههههههههههههه ظريف يا استاذ اشرف هههههههههه

 

هههههههههههههههههههههههههههههه واضح ان ذاكرة حضرتك في الباي باي اسمي حاااااااااااااااااااااتم

 

هههههههه الحمد لله اني فاكر اسمي والله . من كتر المشاغل يا استاذ حاتم . متأسف يا سيدي تشرب ايه بقى

 

قبل ما اشرب حاجة معلش ريحني وخد فلوسك بالله عليك . دي ماكانتش عزومة منك دي كانت تدبيسة من المدام بتاعتك لحضرتك هههههههههههه

ههههههه طيب يا سيدي طالما مصمم خلاص انا هريحك واخدهم . تشرب ايه بقى

 

أي حاجة ساقعة

حاضر هطلبلك حاجة ساقعة حالا

 

تررررن تررررن حاجة ساقعة يا اسماعيل

 

حاضر يا ادهم بيه

 

قولي يا استاذ حاتم اخبار الدنيا معاك ايه

 

الحمدلله والله . المدام حامل عقبال حضرتك هههههههه قصدي عقبال المدام بتاعة حضرتك

 

ههههههه المدام حامل برضو الحمدلله . وانت بتكمل دراستك في معهد الموسيقى ياترى ؟

 

لا والله الحمدلله سيبته واشتغلت موظف في شركة والدي

 

عال والله كويس اوي . كدة افضل كتير .ربنا يصلح الاحوال ويهدي الجميع

 

شرفتني والله يا استاذ حاتم

 

الله يخليك يا ادهم بيه . الشرف ليا انا

 

 

 

 

 

 

 

 

 

سوووووووووووووووووووووووووووووووووزي حياااااااااااااااااااتي انتي فين يا قلبي

 

انا في المطبخ يا حبيبي هههههههههه اهلا ادهومتي

 

السلاام عليكم ورحمة الله حبيبتي

 

وعليكم السلام ورحمة الله وبركاته حبيبييييييييي وحشتنييييييييييييييييييييييييييييييييييييييييييييييييييييييي

 

ههههههههه والله وحشتيني اكتر . بتعوكي ايه يا حبيبتي هههههههه

 

هههههههههه بعوك صنية كوسة بالبشاميل يا حبيبي . اصل انا حالفة اكرهك في الاكل كله هههههههههههههه

 

ههههههههههههه ارحميني ارحميني ابوس ايدك هههههههه استني هغير هدومي واجي اساعدك حالا يا حياتي

 

مستنياك تعملي الرز المحمر اللي بموت فيه من ايديك الحلوين يا ادهومتي

 

هههههههه ياربي ع الست المستغلة دي ههههههههه حاضر يا عقلي امووووووووووووه

 

هههههههههه انتي اللي عقلي وقلبي وروحي يا ادهومتي . ربنا مايحرمني منك ويسعدك ياااااااااااااااارب على اد السعادة اللي ادتهالي يا حبيبي

 

 

 

 

 

 

هااااااا وصلتي لحد فين في الكوسة الله يرحمها هههههههه

 

هههههههه دفنتها في البشاميل ودخلتها الفرن يا حبيبي ههههههههه

 

هههههههههه فين الرز يا ستي اللي محيرك

 

اهو يا حبيبي

 

غسلتيه

 

طبعااااااااا ههههههه

 

اااااااه صحيح نسيت اقولك حبيبتي . حاتم زميلك اللي دبستيني في عزومته هو ومراته في دليسيو بلا هههههه جه النهاردة الشركة وصممممممم يرجع فلوس العزمة

 

يا خبر !!!!!! واخدتهم منه

 

اخدتهم والله بعد اصرار منه . ريحته واخدتهم عشان اصراره

 

ههههههههههه شكلك انت اللي ارتحت بعد ما رجعتلك فلوسك يا حبيبي ههههههه

 

هههه والله ابدا يا سوزي . انا كنت ناسي الموضوع ده خالص

 

ههههههه خلاص هااااااااااااااات المبلغ اخده انا حلال عليا هههههه

 

ههههههه حاضر يا ستي مش خسارة فيكي . دايما مقشطاني اول باول هههههه

 

امممممممم ريحة الكوسة تجننننننننن ههههههه

 

امممممممم ريحة الرز روعة ههههههه يلا عشان جوعت اوي انا والنونو يا حبيبي

 

بقولك ايه كفاية عليكي تعب وشقى في مطبخ الزوجية لحد كدة ههههه روحي ارتاحي وانا هكمل الباقي

 

مش باقي حاجة غير السلطة . هعملها وخلاص حبيبي

 

سيبيهالي حبيبتي روحي ارتاحي بقى بالله عليكي

 

ههههه ماشي يا سيدي . مستنياك يا ولد يا ادهم على السفرا اووووووووعى تتأخر جعااااااااااااااااااانة هههههههه

 

ههههه من عنيا يا ست سوزي هانم هههه ايوا جااااااااااااااااااااااااي هههههههههههه

 

 

 

 

 

 

 

 

 

 

 

 

بنت يا موووووووووووني انت يا بنت استنيييييييي

 

نعم يا ماماااااااااا

 

اهئ اهئ كدة برضو يا موني اهئ اهئ هانت عليكي ماما حبيبتك تسيبيها تعيش لوحدها اهئ اهئئئئئئئئئئئ

 

اهئ اهئئ مث تعيطي يا ماما اهئ اهئئئئئئئ انت وحثتيني اهئ اهئئئئئئئئ هاتي بوثة

 

هههههههه بنتي حبيبتي ونور عيني ياناااااااااااااااس امووووووووووووووووووه يلا بقى تعالي اطلعي معايا

 

لاااااااااااااااااااااأ لما بابا يجي وكلنا نطلع ثوا باي باااااااااااااااااي

 

بنت بنتتتتتتتتتتتتتتتت اهئ اهئ اهئ طييييييييب يا موني اهئ اهئئئئئئئئ

 

 

 

كنتي فين يا بنت يا موني

 

كنت عند عمو نافع البواب . قولتله اثتريلي ايث كريم . تاخدي ايث كريم يا تيتة

 

لا يا حبيبتي شكرا

 

طيب انا هدخل اثلي وبعدين اكتب الواجب

 

ادخلي يا حبيبتي شاطرة برافو عليكي بتصلي

 

ايوة ثندريلا علمتني اثلي واديتني فثتان طوووووووويل وايثارب

 

هههههههه سندريلا !!!!!!!! البت دماغها ضربت زي امها

 

 

هو التليفون فين اما اكلم رفعت يجي يشوف حل في اخته

 

 

تررررررررررررررررررررن ترررررررررررررررررررررررررررن

 

الو

 

اكلم رفعت بيه لو سمحت

 

اقوله مين يا فندم

 

قوله والدتك

 

ههههه اهلا يا حاجة لحظة واحدة

 

اهلا بيك يا ابني . شكرا

 

 

رفعت بيه والدتك ع التليفون

 

امي !!!!!!! الو هههههههه اهلا يا امي ايه النور اللي ملا التليفون ده يا حاجة وداد

 

ههههههه وداد في عينك يا واد . انت هتصاحبني ولا ايه هههههههه

 

هههههههه انا اطول اصاحب امي القمر دي ههههههه ازي صحتك يا حاجة

 

والله رجلي وجعاني يا رفعت ومش نافع معاها ولا دهان ولا مرهم ولا أي حاجة

 

ليه كدة بس يا حاجة !! لالالا انا هشوفلك دكتور عظام كويس واخدك ووديكي في اقرب فرصة ان شالله النهاردة حتى

 

لالالالالالا يا حبيبي ما تعطلش نفسك يا نور عيني انا عارفة مشاغلك كتير

 

بتقولي ايه يا امي !!!!!!!! الدنيا كلها ما تشغلنيش عنك يا ست الكل . انت بركة حياتنا يا حاجة . طب والله انا عارف ان ربنا بيكرمني ببركة دعاكي وبس ربنا ما يحرمني منك يا امي

 

هههه يا حبيبي !!!!!! ربنا يكرمك ويرزقك ويحبب فيك خلقه يا رفعت يا ابني ويباركلك في بناتك ويتمملهم على خير ويسعدهم مع اجوازهم يارب

 

ههههههه اللهم آمين يا ست الكل . اخواتي عاملين ايه وولادهم

 

اسكت يا رفعت البت ليلى اختك اتجننت وطردت العيال وابوهم من الشفة

 

اييييييييييييه !!!!!!!!!!! ايه الكلام ده !!!!!!!! ايه اللي حصل

 

احكيلك يا حبيبي عشان تيجي تشوفلك حل في جنانها . ماحدش قادر عليها وانت اخوها الكبير

 

احكيلي يا حاجة خير حصل ايه

 

 

 

 

 

 

 

 

معقووووووووول كل ده يحصل من ليلى !!!!!!!!!!!

 

اه والله زي ما قولتلك كدة

 

لالالالالالالا دي تبقى اتجننت رسمي الست هانم . ليه بس كدة لييييييه . دانا اللي اسمي عندي بنات ما غصبتهومش على جوازة وكل شيء برضاهم وعمري ما محيت شخصياتهم تقوم هي عايزة تسيطر على رجالة !!!!!!! لالالالالا انا لازم اجي بنفسي اتفاهم مع الهانم . بس هتصل بفكري برضو عشان اعتذرله على سوء تصرفاتها اللي دفعته يسيبلها البيت

 

اه والله يا رفعت انت لازم تيجي

 

انا جاي النهاردة بالليل بعد الشركة ان شاء الله

 

ان شاء الله يا حبيبي . في انتظارك

 

 

 

ترررررررررررررررررررن ترررررررررررررررررن

 

 

ميييييييين

 

مصطفى يا تيتة

 

اهلا حبيبي حمدالله ع السلامة

 

الله يسلمك يا حبيبتي

 

ادخل غير هدومك يا حبيبي على ما احطلك الغدا

 

لالالا هستنى علاء ولو اني جعاااااااااان جدا هههههههه

 

طب ما تاكل يا حبيبي ولما يجي علاء كل معاه تاني

 

ههههههه ليه يعني يا تيتة . مش للدرجة دي الفجعة يعني

 

قولي يا مصطفى

 

افندم يا تيتة

 

انت لسة مصر على جوازك من زينة

 

كل يوم تصميمي واصراري بيزيدو ياتيتة . كل ما بشوف الخلاعة والانحلال بفتكر زينة قدامي وابتسم ههههه

 

راااااااااائعة يا تيتة رااااااااائعة

 

ههههههههه انا ولا زينة ؟ هههههههه

 

ههههههههه اممممم بتحرجيني يا تيتة ههههههه بصي هقولك حاجة . زينة رائعة وانتي اروع ههههههه

 

بس يا مصطفى انت ماشوفتهاش يا حبيبي

 

وايه المشكلة يا تيتة

 

يا حبيبي افرض بعد ما اتجوزتها واتدبست طلعت مش حلوة ؟ هتعمل ايه

 

هههههههههه يا تيتة والله الجمال مش مشكلة خااااااااالص عندي . شيء ما لوش أي اهمية . اهم حاجة ثقافتها وعقليتها وتدينها

 

وهي ماشاء الله متدينة ومثقفة وتفكيرها رائع .

 

طب افرض طلعت وحشة اوي يعني ههههههههههه

 

هههههههه هرضى بنصيبي واحمد ربنا واقول الواحد ما بياخدش كل حاجة هههههههههه

 

ربنا يسعدك يا ابني يارب

  • معجبة 2

شارك هذه المشاركه


رابط المشاركه
شارك

ترررررررررررررررررررن تررررررررررررررررررن

 

باين علاء جه

 

ميييييييين

 

علاء

 

اهلا وسهلا باابو دقن اللي طفش العروسة هههههههههههههه

 

هههههههههههه الحمدلله يا تيتة . لو كنت اعرف ان دقني هتطفشها كنت ربيتها ن زمان هههههههههه

 

هههههههههه الحمدلله يا ابني جت من عند ربنا يا حبيبي

 

اهلا علاء حمدالله ع السلامة . يلا بقى ادخل غير هدومك خلينا نتغدا وااااااااااااااااااااقع من الجوع

 

هههههه وانا والله . فين موووووووووني

 

انا اهوووووووو خلثت الواجب كله . اذيك يا ابيه علاء

 

اهلا حبيبتي الجميلة هاتي بوثة ههههههههههههههه

 

وطي ثوية عثان ابوثك

 

اديني وطيت يا ستي هههههههه امووووووووووه . عملتي الواجب صح ؟؟؟؟؟؟

 

مث عارفة . ابقى ثوفه

 

حاضر يا ستي نتغدا ونقعد نشوف الواجب

 

لالالالالا ثوفه لوحدك انا عايذة اتفرج ع التليفذيون

 

ما فيش برامج اطفال دلوقتي

 

في فيلم بحبه خالث جاي النهاردة

 

لالالالالالالالا موني حبيبتي الجميلة الصغنونة حبيبة اخوها مافيش افلااااااااااااام انا جبتلك قصص جمييييييييييلة جدا عن الرسول عليه الصلاة والسلام وعن كل الانبياء حلوة حلوووووووووة اوي وفيها صور كمان يا ستي وهنقعد سوا نقرا انا وانتي

 

هيييييييييييه هييييييييييييييييييه انا بحب القثث اوي . خلاث مث هثوف الفيلم

 

هههههههه حبيبتي حبيبتي هاتي بوووووووووسة يا طعمة انتي هههههههه

 

وطي تاني عثان تاخد بوثة

ههههههههه ماشي امووووووووووووووه

 

 

ايه العواطف دي انت واختك هههههه عامل ايه يا علاء يا حبيبي

 

كويس والله يا تيتة الحمدلله . بقولك ايه يا تيتة شوفي انتي عايزة اد ايه لحمة وفراخ عشان شكل قعدتنا هتطول عندك ههههههههه

 

جرا ايه يا ولد . هو انا هاخد منكم تمن اكلكم !!!!!!!!

 

معلش يا تيتة . بصراحة حاسس اننا ماعندناش ذوق . من ساعة ما جينا عندك ما دفعناش ولا مليم

 

يا حبيبي خير ربنا كتير الحمدلله . خالك رفعت مش منقصني حاجة الله ويباركله على طوووووووووول الفريزر مليان عندي والفراخ واللحمة مكومين والله مش لاقين اللي ياكلهم . اقوله يابني الحاجات دي كتير عليا يقولي يا امي مش كتير عليكي دي حاجات بسيطة وما تليقش بيكي . الله يكرمه ويوسع عليه

 

ههههههه خالي رفعت بصراحة بار بيكِ جدا

 

الحمدلله يا ابني . وانتو والله بارين بأمكو الله يهديها ويشفيها من اللهفة اللي صابت نفوخها

 

هههههههههههههه ماما ست العاقلين يا تيتة . هو سوء تفاهم وان شاء الله يروح لحاله

 

 

 

 

 

 

 

 

 

 

 

 

 

 

 

 

ايه دددددددده !!!!!!!!!!!!! نجلااااااااااااااااء !!!!!!!!!!!! ايه اللي موقفها جنب عربيتي كدة

 

 

مساء الخير يا دكتورة

 

مساء النور يا باشمهندس

 

اهلا وسهلا سلامات كدة

 

الله يسلمك

 

عن اذن حضرتك هركب عربيتي

 

تركب عربيتك وتروح فين

 

هههههههه مروح

 

مروح فين

 

مروح بيتي

 

اني بيت فيهم

 

نعمممممممممم !!!!!!!!! انا ماعنديش غير بيت واحد يا فندم

 

يا سلااااااااااااااااااااااااااااااااااااام عندك بيتين يا باشمهندس . انا رجعت العفش الشقة

 

عارف

 

يا سلاااااااااام مش المفروض تشكرني

 

ههههههه اشكرك على ايه . ناس سرقوا حاجة وبعدين ضميرهم صحي ورجعوها فيها ايه يعني ههههههههه

 

ايييييييه اهئ اهئ يعني انا حرامية يا دوحا اهئ اهئ

 

دوحاااااااااااااا !!!!!!!!!!!!! هو حضرتك ناسية اننا اطلقنا ولا حاجة

 

لا يا باشمهندس حضرتك ناسي اننا في فترة العدة وممكن ترجعني

 

هههههههه لا والله يا فندم فرصة سعيدة جدا ما نجلكيش في حاجة وحشة عن اذنك

 

استنى هناااااااااااااا

 

افندم

 

افتح باب العربية عشان اركب عشان نروح بيتنا

 

نعم يختي !!!!!!!!! انا مش عايز اردك

 

بس انا عايزة ارجع اهئ اهئ وكفاية بقى من فضلك ولا انت ناوي تذل فيا اكتر من كدة

 

اووووووووووف نجلاء انا مش عايز اعيش معاكي نفس الحياة اللي كنا عايشينها . انا زهقت من العيشة دي وعشان كدة قررت اتجوز واعيش حياة مع زوجة مقدرة يعني ايه حياة زوجية

 

اهئ اهئ اهئ متشكرة يا باشمهندس متشكرة جدا على ذلك ليا رغم انك عارف اني راجعة ندمانة وعايزة ارجع بيتي واعيش معاك اهئ اهئ لانك وحشتني وحشتني اوي وافتقدت حياتي الجميلة معاك اهئ اهئ انا عارفة اني قصرت في حقك كتير اوي وانك استحملتني كتيراوي اهئ اهئ اهئئئئئئ لكن برضو انت حتى ما ادتنيش انذار اهئ اهئ انت اخدت قرارك بالجواز والبعد عني من غير ما تخيرني وكأنك اصلا مش باقي علية اهئ اهئئئئئئئ

 

يا نجلاء انا حاولت كتير لكن انتي للأسف ماكنتيش شيفاني . انتي ماكنتيش شايفة غير نجاحك وطموحك حتى على حساب حياتنا اللي بتتدمر ومشاعرنا اللي بتجف . انا انسان عادي وليا حقوق على زوجتي زي ماهي ليها حقوق عليا

 

واعتقد اني ماقصرتش معاكِ في حاجة . يلا لو سمحتي

 

اهئ اهئ اهئئئئئئئئ يلا امشي ؟؟؟؟؟؟؟

 

هههههههههه لا يلا اركبي يا ستي عشان نروح بيتنا . عشان حاسس بجد انك اتغيرتي

 

هههههههههه بجد يا دوحا ؟؟؟؟؟؟؟؟؟؟؟

 

بجد يا عيون دوحا هههههههه

 

بس على شررررررررررررط

 

كمان هتتشرطي ههههههههه

 

يا سلاام !!!!!!!! وما اتشرطتش ليه ان شاء الله

 

هههههههه تحت امرك ياستي

 

عايزاك تاخدني نقضي اسبوعين في أي مكان زي مااخدت الهانم مراتك التانية

 

ههههههههه ايوا ابتدينااااااااااااااا ههههههههههههه الحلقة الاولى من مسلسل صراع الزوجات . حبيبتي انا اخدت صفاء وسافرنا عشان كان عندي اجازة والله . لكن دلوقتي الامتحانات بتاعة الطلبة فاضل عليها حوالي شهر ومش هينفع والله حبيبتي

 

هههههههه مسامحاك مؤقتا عشان قولت حبيبتي بس في اجازة اخر السنة لااااااااااااااااازم نسافر ماليش دعوووووووووة الهانم مش احسن مني وكمان توديني مكان احلى من اللي وديتهولها هاااااااا

 

ههههههههه ماشي يا ستي . بس انتي معقووووووووول هتقدري تستغني عن المستشفى والعيادة المدة دي كلها

 

هههههههههههه حبيبي انا اخدت اجازة لمدة اسبووووووووووووووووع بحاله عشان اقضيها معاك

 

ههههههه حبيبتي ما تنسيش اني عندي زوجة تانية ما ينفعش اجور على حقوقها . انتي يوم وهي يوم

 

لااااااااااا ماليش دعوة يا دوحا . هي المفروض تخلي عندها دممممم وتسيبك الاسبوع ده كله . انت كنت معاها طول الفترة اللي فاتت وانا كنت لوحدي

 

طيب نستأذنها الاول . على العموم يلا عشان وقفنا كتير كدة . بس هتعشيني ايه يا حبيبتي يا مراتي عشان جعان جدا

 

اعشيك !!!!!!!! بصراحة مش عاملة حسابي

 

طب خلاص اوكيه اجلي موضوع الرجوع لبكرة عشان صفاء عملالي صنية رقاق باللحمة المفرومة ودكر بط ههههههههه

 

لالالالالالالالالالالالا ما ليش دعوة نشتري لحمة واحنا مروحين ورز وخضار وساااااااااااعة واحدة والاكل يكون ع السفرة

 

ههههههه يا فشارة هتلحقي تطبخي كل ده في سااااااااااعة

 

هههههههه يا اخي ما تبقاش دقيق اوي كدة مع تعبيرات الستات هههههههه

 

 

ربنا يستر هههههه يلا يا ستي عشان كمان الحق اكلم صفاء اعتذرلها

 

 

 

 

 

 

 

تررررررررررررررررررررن ترررررررررررررررررررررررررن

 

 

ترررررررررررررررررررررررررررررررررررررررن

 

انت بتطلب مين يا مدحت

 

تررررررررررررررررررررن تررررررررررررررررررررررن

 

بطلب صفاء . انتي هتفضلي واقفة جنبي ههههه روحي شوفي الاكل اللي ع النار

 

لأأأأأأأأأ هشوفك هتقولها ايه

 

 

تررررررررررررررررررررررررن

 

ههههههه

 

تررررررررررررررررررررررررن ترررررررررررررررررررررررررررن

 

الو

 

ايوة يا صافي يا حبيبتي

 

ماتقولهاش يا حبيبتي

 

هششششش هششششش

 

ايه ده ايه يا مدحت انت بتقول لمين هش يا حبيبي

 

ههههههه ابدا حبيبتي دي ناموسة كانت هتقرصني ههههههه

 

انا نامووووووووسة !!!!!!!!! طييييييييييييب

 

ههههههه ايوة يا حبيبتي

 

انت في حد جنبك يا مدوحتي ؟؟؟؟؟؟؟؟ سامعة صوت واحدة ست

 

ههههههههه دي نجلاء مراتي

 

ميييييييييييييييييييييييييييييييييييييييييييييييييييييييييييييين هو انتتتتتت انت رجعتها يا حبيبي ؟؟؟؟؟؟؟؟؟؟؟؟؟؟؟؟؟؟

 

ايوة يا حبيبتي . مش دي كانت رغبتك ؟

 

اهئ اهئئئئئئئئئئ تقوم تنفذها برضو ؟؟؟؟؟؟؟ حد ياخد على كلام الستات ياراجل انت ؟ اهئ اهئئئئئئئئئئئئئئ

 

حبيبتي انا النهاردة بايت عند نجلاء . يا نجلااااااااء بطلي شغل عيال سيبي السمااااااااااااااعة

 

هااااااااااااااااااات يا اخي خليني امسي على ضرتي ههههههههههههههه مساء الفل ياروحي

 

اهلا

 

ههههههههه اهلا بيكي يا سكر . معلش يا حبيبي مدوحتتشششششششي مش فاضي لمدة اسبوع . ابقي كلي دكر البط لوحدك هههههههه احنا عندنا بامية باللحمة الضاني

 

اديني الخروف اللي جنبك يووووو قصدي مدحت

 

ايوة يا حبيبتي

 

طيب يا مدحت مش كان المفروض تعملي اعتبار وتديني خبر على القرار السعيد ده

 

والله يا حبيبتي ماكان في حسباني . انا ونجلاء قررنا من شوية صغيرة

 

ااااااااه اوووووووووف طيب . مبروك يا سيدي وبارك للدكتورة . بس ايه حكاية انك تقضي معاها اسبوع دي

 

دا بعد اذنك طبعا حبيبتي

 

ياسلااااااااااااااام هو انت بتستأذن منها ليه ان شاء الله . هي ناسية انك جوووووووووووووووزي

 

بس يا نجلاااااااااء روحي شوفي البامية لحسن تتحرق

 

يييييييييي البامييييييييييييييييييييييييييييية عن اذنك يا حبيبي

 

ايوة يا صافي يا حبيبتي . انا هكلمك كل يوم بالتليفون عشان اطمن عليكي حبيبتي

 

اهئ اهئئئئئ بس انت هتوحشني يا مدحت

 

وانت والله حبيبتي هتوحشيييييييييني هتوحشيييييييييييني جدا

 

هي مين دي اللي هتوحشك !!!!!! ما تقولهاش كلام حلو وتنرفذني يا دوحاااااااا

 

اهئ اهئئئئئئئ طيب يا مدحت سهرة سعيدة يا حبيبي

شكرا حبيبتي تصبحي على خير

 

تصبحي على خير يا بتاعة مدوحتشييييييييييي ههههههههههههههههههههههههههههههههههه

 

 

 

 

 

 

 

 

 

 

 

 

 

 

ترررررررررررررررررررررررن ترررررررررررررررررررررررررن

 

 

الو

 

ايوة يا دكتور فادي انا دكتو محمد

 

هههههه اهلا يا ابو نسب هههههههه عروستي عاملة ايه

 

 

في انتظارك يا سيدي ههههههه وانا اخبار عروستي ايه

 

ههههههه برضو في انتظارك . انا جاي بكرة ان شاء الله عشان لو حصل نصيب واتفقنا يبقى هكتب الكتاب واخدها معايا على فرنسا ان شاء الله

 

 

ههههههه طبعا هيحصل نصيب . مايكونش عندك فكر خالص . اختي ليك واختك ليا ههههههههه

 

ههههههههه ربنا يتمم بخير ياسيدي . هتغدونا ايه بكرة ؟؟؟؟ ههههههه انا بحب الحمام المحشي

 

هههههههه عنينا ليك يا دكتور فادي . ههههههه انت جاي تخطب ولا جاي تاكل وتملا كرشك ههههههههههه

 

ههههههههه الاتنين . الصعايدة اهل كرم والبحاروة يستاهلوا هههههههههههههههههههههههههههههههه

 

ههههههه ماشي يا دكتور فادي . انت هتوصل على الساعة كام

 

احنا جايين في قطر الساعة 12

 

ههههههههههههه ياوابور الساعة اتناشر يا مجبل ع الصاعييييييييييد هههههههههههههه

 

تعرف اللي مطمني ومخليني متأكد ان العروسة حلوة مع اني ماشوفتهاش ؟

 

ايه ؟؟؟؟؟؟؟؟؟

 

انت انت حلو واكيد اختك شبهك هههههههههه

 

ههههههههه يا نهارك اسود معنى كدة ان اختك شبهك ؟ ههههههههه لا ياعم بلاش الجوازة دي ههههههه

 

هو انا وحش ولا ايه يا دكتور محمد

 

لا ياسيدي حلو بس شكلك مايركبش على حريمي ههههههههه على العموم احنا لينا الشرف يا دكتور فادي

 

 

بس انا خايف اختك ما توافقش

 

يا فادي احنا البنات عندنا ماالهومش رأي .

 

خلاااااااااص ع البركة . يبقى كدة اتأكدت ان العروسة ليا

 

طيب مع السلامة ومنتظرينك انت واسرتك

 

 

ان شاء الله

 

زيييييييييييييييييييييييييييينة

 

 

نعمين ياخووووووووووووي

 

الدكتور فادي جاي بكرة ان شاء الله هو واهله عشان يشوفوكي

 

اهئ اهئئئئئئئئئئئ لالالالالالالالالالالا مش رايداه يا خوي مش رايداااااااااااااااااااه الجواز مش بالغصب عااااااااااااااااااد اهئ اهئئئئئئئئ حرام عليك حرااااااااااااااام . مش عشان تراضي صاحبك تغصب على اختك ياخوووووووووي اهئ اهئئئئئئئئئئئ

 

يا امّاااااااااااااااا يا بوووووووووووووي حد يجول حاجة يا ناااااااااااس حرام عليكوووووووو

 

 

 

 

محِمممممممممممممممممد الجوازة دي ما عتمش عااااااااااااد بتي ما هتتجوزش غصب عنيهاااااااااااااا

 

اميييييييي اني اديت كلمة لصاحبي وماعسحبهاش عااااااااااااااااااااااد زينة هتتجوز فاااااااااااااااادي

 

اهئ اهئئئئئئئئئئئئئ يابووووووووووي جول حاجة يا بوووووووووووووووووووووووي اهئ اهئئئئئئئئئئ

 

يا ولدي يا ولدددددددي كفانا من حديتك الماسخ ده وجول لصاحبك الداكتور شيماء ديه ما يجيش

 

يا بوي اسميه فاااااااااااااادي شيماء مين يابووووووووووووووووووووي انا اديته كلمة يا بوووووووووووووووي

 

يا ولدي واحنا ادينا موصطفى كلمة من جبليه عااااااااااااد ما تصغِرناش يا ولدي

 

يابووووووووووي يعني تديها لداكتور بسماعة ولا تديها لخوجة بطباشيرة

 

هتديها لابو طباشيرة ومالاكش داعي وبعِد عنينا يا محِمد ماتخلنيش ادعي عليك دعوة يجلبوك تمرجي ياولدي

 

 

 

ما عيحصلش يا بووووووووووووووووي على جثتي عااااااااااااااااد انا ليا مصااااااااالح مع الداكتور فاااااااااااادي وما عضحيش بيها عاااااااااااااااااد . انا محتاجله في شغلي

 

يخي استغلت عليك نفسك يا باعيد . جووووووووم يا واد جوووووووم فز من المندرة

 

اهئ اهئئئئئئئئ انت هتهمله يابوي يغصب عليّ

 

 

ماتخافيش يابتي . انا وعدت امك من يوم ماربنا ابتلاني بيها اني عمري ما عغصب عليها ولا على ولادي منيها في أي شي

 

يا حبيبي يا بووووووووي اهئ اهئ بس اني خايفة من محِمد يابوووووووووي

 

ماتخافيش يابتي . كفياكي بكا . جومي اغسلي وشك واحلبي جاموستك وروجي كديه يازينة

 

طيب والناس اللي جايين بكرة يابوي

 

ضيوف يابتي زي أي ضيوف . ياخدو واجبهم ويروحوا لحالهم

 

 

 

 

 

 

يا ماّااااااااااااااااا اهئ اعئ يا امّااااااااا هتفضلي ساكتة اكديه وماكلمتيش طنط مشيرة اهئ اهئئئئئئئ مش جولتي يامّا هتكلميها عشان تجول لمصطفى ياجي يلحجني ؟ اهئ اهئئئئئئئئ

 

والله يابتي اتصلت كاتير . باين تلافونهم عطلان عاد

 

اهئ اهئئئئئئئئئ يا بختك يا زينة اللي باين عليه هيميل عاااااااد اهئ اهئئئئئئئئئ

 

يابتي يابتي اهدي اهدي بالله عليكي . ان شاء الله اللي في دماغك مش هيحصل . مش هتتجوزي غير خطيبك ان شاء الله

 

اهئ اهئ يا امّا هي مش الخطبة ع الخطبة حرام يا مّا

 

معلوم يابتي حرام

 

اومال اخوي ماله يامّا . هو ماعارفش دينه ولا ايه يا امّا اهئ اهئئئئئئ

 

يابتي كفاياكي بكا حرجتي جلبي . ماتخافيش يابتي . اطمني عاد

 

اهئ اهئئئئئ والله كانكم بتسكتوني وبعدين ابص الاجي نفسي متجوازاة راجل مارايدهوووووش اهئ اهئئئئئئئئ

 

ااااااااااااااااه كله مجدر وكتوب عاد يابتي

 

 

 

 

 

 

 

 

 

 

 

الضيوف على وصول هههههههههههههه جهزوا الوكل يازينة انتي وامي عاد ههههههههههه

 

اهئ اهئ يارب يا يلحجوا يوصلووووووا اهئ اهئ انا هاين عليا احط سم في الوكل يامّا عاد اهئ اهئئئئئئ

 

اعملي الوكل وانتي ساكتة يا زينة . اني مش ناجصة هم يابتي . الجلب فيه كاتيييييييير استغفر الله العظيم

 

 

وينك يا موصطفى اهئ اهئ ويييييييييييييييييييييييييييييييييينك اهئ اهئئئئئئئئئئئئئ

 

 

يا حاج منااااااااااااااااااااااااااع ضيووووووووووووووووف ياحاج

 

 

يا مرحب بالضيوف خليهم يتفضلوا

 

 

يا محِمد ضيوفك وصلوا يا ولدي عاااااااااااااد

 

 

 

هههههههههههههههه خليهم يتفضلوا

 

 

 

اهئ اهئئئئئئئئئئ يا مّا العريس جه يا امّااااااااااا اهئ اهئئئئئئئئئئ جلبي واجع في رجلي يا امّاااااااااااا اهئ اهئئئئئئئ

 

 

يابتي يابتي اهدي . يعني نضرانا جبنا المأذوووووووووووون . اصبري لما نشوف ابوكي وجول ابوكي وعمك

 

احنا مهما كان حريم يابتي

 

اهئ اهئئئئئئئئئئئ اهئئئئئئئئئئئئئئئئئئ

 

 

 

 

 

 

 

 

 

 

يا امّااااااااااااااااا

 

ايييييييييه في ايييييييييه عايز من امك ايه يا خلف الشوم

 

بجى كديه يا امّا . طيب عاد . ام العريس وخواته البنات عايزين يشوفوا زينة

 

ماحدش هيشوف بتي ولا هينضرها

 

بجولك ايه ياامّااااااااااااااااااااااااااااااااااااااا ماتخلنيش اعلي حسيييييييييييي واطربج الدنياااااااااااااا

 

وانت لساك هتعلي حسك يا ولدي !!!!!!!!!! اه يا جليل الرباية . ياريتني ما خلَفتك

 

امي . افتحي اوضة زينة وحضريها عشان الحريم طالعين يشوفوها عاد

 

جولتلك ماحدش هينضر بتي . لو شافوا بتي ما عيهملوهاااااااااش هيمسكوا فيها بيدهم وسنانهم

 

هههههههه طب ما ادا المطلووووووب عاد

 

كانّك مش خابر عوايدنا وان العربيس ماينضرش عروسته الا ليلة الدخلة عااااااااااد ولا ايه ؟؟؟؟؟؟؟؟؟؟

 

هههههههه بجولك ايه يا امّا . دول ماعندهومش الحديت الماسخ دي

 

واللي رايد بتنا يمشي على عوايدنا عاد . ماحدش هينضر بتي وهملني واخفى من وشيييييييييييييييييييي

 

زيييييييييييييييييييييينة اجفلي بابك بالمفتاح لحد ضيوف الشوم دول ما يخفوا من النجع يابتي

 

حاضر يا امّا اهئ اهئئئئئئئئئئئئ

 

 

بجي كديه يا امّاااااااااااااااااااااااااااا طيب هتتجَوزوه يعني هتتجوزه ورجليها فوج رجبتها عاد وابجي خلي التاخين فيكو يجف جصاديييييييييييييييييييي

 

 

الله يحرج جلبك يا باعيد . خليتني اجسي جلبي وادعي عليك يا محراك الشر انت .

 

 

 

 

 

 

ترررررررررررررررررررررررررررن ترررررررررررررررررررررررررررررررررررررررررررررن

 

ترررررررررررررررررررررررررررررررررررررن ردي يا مشيرة رديييييييييي تررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررررن

 

 

الو

 

 

ياااااااااااااااااااااااااااااااااه مشيرة الحجيني يا مشيرة

 

مين راوية !!!!!!!!!! في ايه يا حبيبتي خضتيني

 

وين مصطفى وييييييييينه ابوس يدك يا مشيرة بلغي مصطفى ان زينة جايلها عريس واخوها محمد راسه والف سيف يجوزهولها واحنا مش موافجين . احنا رايدين موصطفى جوليله يا تلحجها يا متلحجهاش . لو شاريها يركب اول جطر ويااااااااااااااااجي . خليه يجيب بوه وخوه معاااااااااه

 

ياااااااااااااااااه طيب اهدي اهدي يا راوية اهدي

 

ماعهداش ماعهدااااااااااش بتي مش هتتجوز غصب عنها يا مشيرة . اجفي جنبي يختي

 

لا حول ولا قوة الا بالله . حاضر والله هتصل بمصطفى وهو هيتصرف ان شاء الله

 

 

 

 

 

 

تررررررررررررررررررررررررررررررن تررررررررررررررررررررررررررررررررررن

 

 

الو

 

 

ايوة يا ليلى مصطفى عندك

 

مين انتي

 

مشيرة انا مشيرة عايزة مصطفى ضروري

 

عايزاه ليه

 

اديهولي يا ليلى مش وقت كلام

 

هو فيه ايه . مش موجود . قاعد عند جدته

 

طيب طيب سلام

 

 

تررررررررررررررررررررررررررن تررررررررررررررررررررررررررررررررررن

 

 

الو

 

ايوة انا مشيرة مين معايا

 

انا علاء ازيك يا طنط

 

فين مصطفى

 

مصطفى نايم

 

صحييييييييييييييييييه صحيه حالاااااااااااا

 

حاضر حاضر هو في ايه

 

 

مصطفى مصطفىىىىىىىىىىىىىىىى اصحى طنط مشيرة ع التليفوووووووووون

 

ايه ! طنط مشيرة ! خير الو ايوة يا طنط

 

في عريس جاي لزينة واخوها مصمم يجوزهولها امها بتقولك لو شاري البنت اركب اول قطر وتعالى انت واهلك عشان تكتب كتابك عليها

 

ايييييييييييييييييييييييييييييييه عريس يعني ايه . مستحيييييييييييييييييييييييييييييييييييييييييييييييييييل ماحدش هياخد زينة منيييييييييييييييييي يا ناس حرام عليكو ابعدو عنيييييييي . زييييييييييييييييييييييييييييييييييييييييييييييييييييييييييييييييييييييييييييييييينة

 

 

 

 

في ايه يا مصطفى في ايه

 

انا مسافر مسافردلوقتي حالااااااااااا يا علاء

 

 

مسافر فين ياابني استنى في ايه فهمني

 

ماعنديش وقت افهم حد . تعالى معايا واتصل بابا يجي حالااااااااااااااااااااااااااااااااااا

 

 

حاضر حاضر حاضر

 

 

 

 

 

 

 

 

منورين يا جماعة عاد

 

بوجودك ياحاج مناع

 

 

والله الاكل ماشاء الله حاجة تفتح النفس . طيور وبط ووز وحمام وفراخ

 

مطرح يمرج يحرج ان شاء الله

 

هاااااا هو ابوك بيقول ايه يا محمد

 

بيقولكو بالهنا والشفا ههههههه نورتونا

 

يا اخي امي واخواتي البنات قاعدين لوحدهم في مقعد الحريم . هي امك مش ناوية تسلم عليهم هي واختك ولا ايه ؟

 

معلش امي واختي مشغولين بس امي هتنزل دلوقتي

 

ههههههه اومال فين العروسة

 

بتلعب مع الجاموسة . اصلها عبيطة باعيد عنك وعجلها على جديها عاد

 

ايه اللي بتجوله ده يابوي . ابوي بيهزر معاكو عاد

 

 

 

السلاام عليكم مراحب بالضيوف

 

اهلا يا دهشان ياخوي تعالى سلم ع الداكتور عزة

يا عمي انا اسمي فادي

 

هو ده اسم برديك يا ولدي ابوك يسميهولك عاد ؟ لما انت اسمك فادي اومال اختك اسميها ايه عاد

 

 

 

بالجودة يا داكتور عاد

 

 

ايه سبب الزيارة الكريمة دي يا واد الناس

 

ههههههههه انا جاي اتقدم واخطب الانسة زينة

 

احنا بتنا مخطوبة يا ولدي . ربنا يرزجك بغيرها عاد

 

اافندممممممممم ايه الكلام ده ؟؟؟؟؟؟؟؟؟ في ايه يا دكتور محمد . انا مش فاهم حاجة . لما اختك مخطوبة , جايبني هنا لييييييييييييييه ؟؟؟؟؟؟؟؟؟؟

 

ايه يابوي الكلام اللي عاتجوله دي . اختي مش مخطوبة

 

لع بت اخوي مخطوبة يا داكتور شادي

 

اسمي فاااااااااادي فاااااااااااااااادي

 

ياخوي ياتتجلب انت واسمك . جبر يلم العفش

 

يا بووووووووووووي يا عميييييييييييي مافيش حاجة اسميها مخطوبة . اختي هتتجوز الدكتور فااااااااااااادي انا بحب الدكتور فادي

 

 

طب ياولدي ماتتجوزه انت مدام بتحبه عاد . شرفتنا ياداكتور . جوم ياولدي خد اهلك وناسك والحجوا الجطر عشان ماعنديناش مكان نبيتكو فيه عندينا عاد . بالإذن

 

دكتور محمد انا اسف جدااااااااااااااا اني جيت هناااااااااااا . يلا يا بابا . اندهلي اخواتي وامي من مقعد الضيوف يا سي محمد

 

ودا اخر اللي بينا .

 

يادكتور فادي اسمعني ارجوك

 

مش هسمع حااااااااااااااااجة . كفاية التهزيئ اللي اتهزئته انا واهلي بسببك . حتى امك ماهانش عليها تقابلهم

 

اناااااااااا اناااااااااااا انا مش عارف اقول ايه ,انا اسف اسسسسسسسسسف

 

يلا يا جماعة احنا غلطانين اننا جينا هنا

 

 

 

 

 

 

بجى اكديه يابوووووووووووووووي بجى اكديه يا عميييييييييييييييييييييييي

 

طييييييييييييييييييييب انا جاعد ومش مهمل البلد وابجى خلي الحزين اللي اسميه موصطفى ده يهوب ناحية النجع عاد عشان يبجى هو الجاني على نفسه واحرج جلب امه عليه عاااااااااااااااد . والله ماهعديهالكو على خييييييييييييييييييير

  • معجبة 2

شارك هذه المشاركه


رابط المشاركه
شارك

ايه يا بت يا هبه التثبيته دى

هى دى حته تقفى عندها

يا عينى يا زينه صعبانه عليا

بس ابوها وعمها دول عسالات بصراحه

محمد ده ده عايز ديب ياكله عاد واكل ناسه جبر يلم العفش

ههههههههههه اكتر كلمه بحبها فى الصعيدى كلمه رومانسيه بصراحه هى وكلمة اتخرعت ههههههههههه

نجلاء خدت حقها ومحدش يقدر يلومها

مدحت بقى ولا عارف يتصرف اهم حاجه نفسه فقط ومش بيهمه مشاعر الاخرين

ساب نجلاء واتجوز واحده تانيه من غير ما يقول لمراته

رجع لمراته من غير ما يقول لمراته التانيه برضو

بصراحه شخصيه بايخه واسمه وحش ال مدوحتى ال

يلا كفايه كده

  • معجبة 1

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×