اذهبي الى المحتوى

المشاركات التي تم ترشيحها

alsalam alykom okhty

jazaky allah khairn ala el halakat

maalysh el key board andy englesh kan nefsy aalk bs in shaa allh ahawel akteb araby elmarh elgaya

r u ander stand

thank u my love

<3 :blush: ^_^ :)

شارك هذه المشاركه


رابط المشاركه
شارك

ايووووووووووووووووووووووووووووووه عليكى يابت باهبه حلقات زى اللوز تسلم افكارك اللى عمرت ودخلت نغاشيش الادمغى

هههههههههههههههههههههه يجد تسلم اديكى عجينى اوى حوارات امير ولينه مع اهله قمه فى الروعه وخايفه اوى على احمد من امه وبوه بسبب جوازته

وربنا يستر من ادهم وعمايله لما يتقدم لضحى واكيد هيترفض وهينتقم من خالد و فى انتظار اعرف واطقس من البت اللى وقفت احمد من بعربيته

شارك هذه المشاركه


رابط المشاركه
شارك

تسلمي يا هبة على الحلقات الرائعة

الغريب في عادل سليم انه لم يتعظ من تجربته ابدا، لقد تزوج سعاد البعيدة عن الدين وها هو يدفع ثمن خطئه مضاعفا ، ولكنا نراه يريد لابنه احمد زوجة من نفس الطراز (البعد عن الدين) كل همه من عيلة اكابر وتشرف، والدين ليس له اهمية بتاتا، ترى متى سيفيق من غفلته؟!!!

  • معجبة 1

شارك هذه المشاركه


رابط المشاركه
شارك

السلام عليكم

الحلقات ما شاء الله جميلة جدا

بصى يا ستى أنا من ديروط يعنى جنبكوا على طول يادوب فركة كعب

وعلى فكرة أنا بأحب المنيا جدا والله وأحب أهلها خاالص لأننى ذهبت إليها عدة مرات

نرجع للحلقات ....

أعتقد إن إللى وقفت أحمد هى داليا.هيشوفها وينفر من عدم إلتزامها من غير ما يعرفها .ويمكن لماتشوفه تسأله من هو ويدخل دماغها وتبقى الحرب من جبهتين

أما أدهم شكل نهايته السجن .لأنه أكيد هيأجر ناس يخلصو على خالد ودى هتكون نهايته

إيه أخبار ريم وصبحى ههه

 

  • معجبة 1

شارك هذه المشاركه


رابط المشاركه
شارك

الحقيقة اختي ام بشار وعبد ان عادل سليم لم يشعر و لا مرة انه مخطئ في اختياره سواء الزوجة الاولى سعاد او حتى الثانية اشجان والتي اتوقع انه تزوجها لجمالها ..هو يعتبر انه اخطأ حين يرى سوء اخلاق سعاد ولكن الدين ليس في حساباته

نسأل الله له الهداية لذلك لن يضع الدين أساسا في الاختيار .

وهذا حال كثير من الناس يرون المتدينين وسعادتهم وتفاؤلهم ووووو...ولكن حين يريد الاختيار لنفسه او لاولاده يختار حسب الجمال او المال او الجاه

  • معجبة 1

شارك هذه المشاركه


رابط المشاركه
شارك

لسه منزلتيش الحلقات يا هبه؟

شارك هذه المشاركه


رابط المشاركه
شارك

طيب انا ماشي يا عم موردي , عايز حاجة

 

عايز سلامتك يا ابني , روح ربنا يسلم طريقك ويكفيك شر ولاد الحرام آمين يارب

 

 

 

 

 

سلام يا رجاااااااااالة

 

الله يسلمك يا استاذ احمد

 

مع السلامة يا استاذ احمممممممممد

 

 

 

 

 

بسم الله توكلت على الله

 

 

 

اما نشغلوا سورة من القرآن نستمتع بيها في الطريق على ما نوصلوا

 

 

 

مممممممممم ياااااااااااااااه , الجو برد اوي النهااااااااردة , شكلها هتمطر , ايه ددددددددددده , في بنت واقفة ع الطريق وعربيتها عطلانة , مممممم دي بتشاورلي عشان اقف , اما نقف نشوفوها محتاجة حاجة

 

 

السلام عليكم , أي خدمة يا انسة ؟؟؟؟؟؟؟؟؟؟؟؟؟؟

 

من فضلك , كاوتش العربية فرقع وانا لوحدي ومش عارفة نعملوا ايه

 

طيب لحظة واحدة هركن عربيتي وانزل اساعدك

 

متشكرة اوي يا فندم

 

حضرتك معاكِ استبن ؟

 

ايوة , موجود في شنطة العربية , لحظة نفتحوهالك

 

لا , ما تتعبيش نفسك , اني هنفتحها ونطلعوا الأستبن

 

ميرسي اوي

 

 

ممممممم طلع الكاوتش وقفل شنطة العربية وجاي يركبه

 

يااااااااااه , الجاكيت مقيدني , اني هنقلعوه ونحطوه على عربيتي

 

مممممم عنك الجاكيت , اني هنمسكهولك على ما تخلص

 

مافيش داعي , حطيه على عربيتي

 

لا , هنمسكوه لحد ما تخلص

 

على راحتك , نغيروا بقى الكاوتش اللي فرقع ده ونركبوا الجديد , بسم الله الرحمن الرحيم

 

 

مممممممم انا اسفة والله , تعبتك معايا

 

مافيش تعب ولا حاجة

 

ممممممم هو حضرتك ساكن قريب من هنا

 

 

.......................................

 

 

هو ما بيردش ليه !!!!!!! ممممم يمكن ما سمعش , نعيد السؤال تاني , هو حضرتك ساكن قريب من هنا

 

 

ساكن في سموحة

 

ممممممم انا ساكنة في زيزنيا

 

 

.....................................

 

برضو ما بيردش ! مش المفروض يقولي اهلا وسهلا ولا أي حاجة !!!!!

 

 

كدة تمام , ركبتلك الكاوتش الجديد , اتفضلي اركبي عربيتك وفي امان الله , بعد اذنك الجاكيت

 

ممممممم هو انت بتشتغل ايه ؟

 

والسؤال ده ايه لزومه !!!!!!!

 

هههه عادي يعني

 

مالوش لزمة السؤال , وكمان الاجابة , عن اذنك , السلام عليكم

 

هههههههه وعليكم السلام ورحمة الله وبركاته

 

 

 

 

 

 

 

 

 

 

 

 

 

 

 

انتِ جيتي يا داليا , اتأخرتي كدة ليه حبييتي ؟؟؟؟؟؟؟؟؟

 

ههههههههه كاوتش العربية فرقع

 

فرقع ! وايه اللي فرقعه

 

هههههههههه اني اللي فرقعته

 

الله ! انتِ اتجننتي ولا ايه يا ديدي !

 

ولا اتجننت ولا حاجة يا مامي , اقولك على سر بس ما تفتنيش عليا لبابي ؟؟؟؟؟؟؟؟؟

 

مممممممممم شكلك عملتي كارثة

 

هههههه لا والله يا مامي , مممممممم مش انتِ كنتِ عايزة تجوزيني لاحمد ابن عمو عادل سليم ؟

 

وايه علاقة احمد ابن عادل سليم بكاوتش عربيتك اللي فرقع

 

ههههه بصراحة يا مامي , الفضول قتلني اني نشوفوه , من ساعة ما كلمتيني عنه واني عمالة نتخيلوا شكله , تخيلت انه راجل ضخم ودقنه طويييييييييييييلة وسوووووووووووودة ونظراته حاااااااااادة مخييييييييييييييفة ومكشررررررررررر وصوته مفزع , عشان كدة فكرت في خطة عشان اشوفه بيها ونتكلموا معاه , روحت المينا وسألت العمال هناك , فين احمد عادل سليم , قالولي في مكتبه , وزمانه نازل , عشان بيروح في المعاد ده , فضلت واقفة لحددددددددد ما شوفته , لقيت واحد مبتسم في وش الناس كلهم وبيقولهم السلام عليكم يا رجالة , بس ما قدرتش نفسروا ملامحه اوي , خدت عربيتي ومشيت بيها شوية بسيطة وروحت نزلت بسرعة فرقعت الكاوتش بالمقص الصغير اللي معايا ووقفت استناه عشان اقوله يساعدني هههههههه كان كل همي نلاقوا طريقة نتكلموا بيها معاه , وكمان عايزة نشوفوه شهم وهيساعدني ولا هيقولي تنحي عني يا امرأة هههههههههههههههههههه

 

يا خبررررررررر , دانتِ بنت مش سهلة بقى

 

هههههه والله يامامي انا مسكينة , بس كنت عايزة نعرف , مين احمد ده و وشكله ايييييييييييه واهم من كل ده طريقة معاملته للستات , بيحترمهم ولا زي ما بنشوفوا في الافلام والمسلسلات ان الملتحي بيعامل المرأة على انها حشرة , بس بصراحة لقيت راجل يحترم المرأة قمة الاحترام , ساعدني من غير ما يفتح معايا أي حوار

 

هههههه شكله ايه ؟ هههههههههههه

 

هههههههههه قمر يا ماميييييييي قمرررررررر واللحية لايقة عليه بشككككككككككل , اول مرة نشوفوا واحد ملتحي ومسمسم كدة هههههههه شكله صغيور ولذيذ اووووووي وشيك جداااااااااا شيك جدا يا مامييييييي مهتم بمظهره اوووووووووي , اني نحبوا الراجل اللي يهتم بمظهره , وحاطط برفان يجنننننن ريحته حاسة بيها لحد دلوقتي , ولا طريقة كلامه يا ماااااااامي , صوته كله حننننننان , هاااااااااااادي

 

عرف انتِ مين ؟

 

لالالالالالالا خالص , ما رضيش يتكلم معايا زي ما قولتلك ههههههه تعرفي يا مامي اني اتعلقت بيه اوووووووووي , امتى يا مامي طنط سعاد هتيجي تخطبني له ؟

 

هههههه هيقولك البسي الحجااااااااب

 

البسسسسسسسسسسسسه , البسه عشان خاطره هههههه تعرفي اني حبيت الحجاب اوي من ساعة ما شوفته ههههههه

 

بس انتِ كدة هتلبسي الحجاب عشانه لكن مش عن اقتناع

 

هههههه هو يبقى يقنعني بقى بعد ما البسه ههههههه لما نروحوا نزوروا اوسا هروح بالحجاب يا مامي , بس ادعيلي بقى نتجوز بسرررررررررررررعة

 

ههههههههه ربنا يجعله من نصيبك يا حبيبتي

 

يارب يا مامي يااااااااااااااااااااارب , متهيألي هنباتوا طول الليل نحلموا بيه

 

ههههه , طب نسيبوكِ لاحلامك ونروحوا نشوفوا الطباخين هيعملوا ايه عشان عزومة بكرة

 

احنا عندنا عزومة بكرة يا مامي ؟؟؟؟؟؟؟؟؟

 

ايوة يا ديدي , عازمين ناس اجانب بمناسبة العقد الجديد اللي مضوه مع باباكِ

 

أهاااااااااااا , طيب انا بقى هدبس بابي الصبح في تمن فستان جديد عشان احضر بيه العزومة هههههه

 

يا بنت مش قولتي هتتحجبي ؟

 

مش دلوقتي يا ماما , قولتلك لما نيجي رايحين لاوسااااااااااااااا , عايزة احمد يشوفني بالحجااااااااااااب ههههههه

 

هههههههه اه يا نصاااااااااااااابة , عايزة تنصبي على الجدع وتعملي شيخة ؟؟؟؟؟؟؟؟؟؟؟

 

ههههههههههه ده نصب غرضه شريف يا مامي هههههههه وبعدين انا كدة كدة كفتي راجحة عنده , عشان مامته هي اللي مرشحاني , يا حبيبتي يا طنط سعاااااااااااااد , يا قمر يا طنط سوسووووووووو هههههههههههه

 

 

 

 

 

 

 

 

 

 

 

 

 

 

 

 

اهلا اهلا يا ام خالد ههههه خطوة عزيزة والله يا حبيبتي , يا مرحب يا مرحب هههههه

 

ههههه الله يرحب بيكِ يا ام امير , تسلمي وتعيشي يختي

 

يا اهلا يا هياااااااااام هههههه نورتي يا بنتي

 

الله يخليكِ يا خالتي سميرة ههه

 

هههه انتِ لسة بتتكَسَفي ! هههههه عاملة زي ضحى بنتي

 

ههه ربنا يحفظلك ضحى ويخليهالك ويخلي اخوها

 

الله يخليكِ يا ام خالد , كلوا الجاتوه يا جماعة

 

ههههه اتفضلي الشيكولاتة الاول , ادي لخالتك علبة الشيكولاتة يا هيام

 

اتفضلي يا خالتي , الف مبروك هههه

 

ههههه الله يبارك فيكِ يا هيام , عقبالك يا حبيبتي , والله ما كان ليه لزوم التعب ده , مجيتكو لحد عندنا تساوي كتير والله

 

الله يعزك يا ام امير , دي حاجة بسيطة والله ما تليقش بمقامكو

 

هههه تعيشي يا ام خالد , كتر الف خيرك , نردهالك يوم ما تفرحي بهيام , اهي ضحي جاية تسلم عليكو اهيه , تعالي يا ضحى هههه

 

 

ههههه السلام عليكم , ازيك يا خالتي ام خالد

 

اهلاااااااا وعليكم السلام , اللهم صل ع النبي هههههههه القمر زاد حلاوة على حلاوته الله اكبر , ربنا يحرسك من عين حسادك يا ضحى هههه

 

ههههه هتتحسد على ايه بس يا ام خالد ! ههههه

 

هههه انتي بتخزي العين عن بنتك يا ام امير ولا ايه ! هههههه ما تخافيش مني , اني عيني عليها باردة والله , ماشاء الله , اللهم بارك

 

هههه ولا بنخزي العين ولا حاجة , يعني انتِ هتحسدي بنتك !

 

أي والله ضحى بنتي , زيها زي هيام

 

هههه ربنا يخليكِ يا خالتي ام خالد , ازيك يا هيااااااااام وحشتيييييييني

 

هههه حبيبتي يا ضحى ازيك انتِ , وحشتيني اكتر والله

 

هههه ربنا يخليكِ يارب , قوليلي اخبارك , قاعدة في البيت ولا بتشتغلي ؟

 

لا , قاعدة في البيت هههههه وانتِ عاملة ايه في دراستك

 

تمام الحمدلله ههههه انتو نورتونا والله النهاردة

 

هههه النور نورك ونور ام امير يا ضحى يا بنتي , يسلم لسانك الحلو وسِنِك البسّام ده هههه

 

روحي يا ضحى هاتي مرات اخوكِ تسلم على خالتك ام خالد وهيام

 

حاضر يا ماما , عن اذنكو

شارك هذه المشاركه


رابط المشاركه
شارك

السلام عليكم ههههه

 

ههههه اهي لينة جت اهيه , وعليكم السلام , تعالي يا عسل سلمي على خالتك ام خالد وعلى اختك هيام

 

ههههههه اهلا يا عروسة , بسم الله ماشاء الله , زي القمر

 

ههه شكرا طنط , ازيك هيام

 

هههه اهلا يا عروسة , الف مبروك يا حبيبتي

 

شكرا , الله يبارك فيكِ

 

 

بصي بقى يا عروسة يا حلوة انتِ , حماتك دي ست ولا كل الستات , تتحط ع الجرح يطيب , يعني تشيليها في عنيكِ وتقولي الحمدلله انه اداني حما طيبة وحنينة وسكرة زي ام امير هههههه

 

ههههههه تعيشي يا ام خالد

 

ههههه انا احب ماما سميرة كتير , هي زي ماما , طيبة كتيرررررررررر

 

يختي عليها يختي اموووووووه ههههههه تسلميلي يا مرات ابني , والله انتِ في غلاوة ضحى

 

سَمَعت انها حامل يا ام امير

 

ايوة , حامل , ادعيلها ربنا يتمملها على خير يا ام خالد , اني عايزة ناخدوها للدكتورة عشان تطمني عليها , بس والله من ساعة ما جم ما فضيتش , بكرة ان شاء الله ناخدوها ونروحوا عشان نطمنوا على الجنين ووضعه

 

ربنا يطمن قلبكو ويتمم فرحكو يا ناس يا طيبين يا مؤدبين

 

هههههه اللهم آمين يا ام خالد , ويفرح قلبك بولادك يا رب , والله مجيتك دي على راسي من فوق , كتر الف خيرك يا حبيبتي

 

أمير ده ابني زي خالد , ولو اني ما شوفتوش هههه بس خالد كلمني عنه وعن ادبه واخلاقه , قال عنه كلام حلو اوي والله , قولتله يا ابني هو يعني جايب الادب والذوق من برا ! الادب والذوق طبع امه وابوه

 

هههههه من ذوقك ومن ذوقه , انتو الأحسن والله , يا اعتماااااااااااااااد , فين الأزووووووووووووووووزة

 

حالا يا حاااااااااجة

 

 

 

 

 

 

 

 

 

 

بت يا رحاااااااااااااااب انتِ يا بت هههههههههه

 

 

نعم يا ماماااااااااااااااا

 

 

عريسك جاي بكرررررررررررررررة , امه لسة قافلة معايا السكة

 

 

هو جاي ليه يا ماما ؟

 

جاي ليه !!!!!!!!!! جاي يشوفك يا بت

 

يشوفني ليه !!!!!! هو اني فورجة !!!!!!!! مش امه واخواته جم وشافوني وانتِ قولتي انهم هيوصفوني له ؟

 

ايوة , لكن هو كمان لازم يجي يشوفك بنفسه , دي الرؤية الشرعية يا حبيبتي

 

 

ييييييييييييييي ! اومال ايه لزوم مجية امه واخواته عندنا وقعدوا يبصولي ويتغمزوا وجابوني من فوقي لتحتي لما برضو هو هيجي يشوفني ؟؟؟؟؟؟؟؟؟؟

 

يا بت انتِ امه جت واخواته جم يتعرفوا علينا ويشوفونا على طبيعتنا عشان لو عجبناهم يروحوا يقولوا للعريس ان اهل العروسة كويسين والعروسة كويسة وتعالى انت بقى اتأكد وشوف بنفسك

 

ايّووووووووووووووووووه , ده ايه الناس الفاضية دي !

 

ههههههههههه طيب ادخلي ناديلي اختك فاتن عشان نقعدوا احنا التلاتة نشوفوا هنعملوا حلويات ايه عشان نقدموها للعريس وابوه

 

هو ابوه كمان هيجي ! ما تخليه بالمرة يجيب جوز خالته وجوز عمته وجيرانهم

 

ههههههه هيجوا كلهم , لو عجبتيه وعجبك واتفقنا على كتب الكتاب الكل هيجيييييييي والحبايب هيتجمعوااااااا , اني داخلة المطبخ وحصليني انتِ واختك

 

 

مممممممممممم , ايه ده ! اني نسيت نسألوا ماما على حاجة , نروحولها المطبخ نسألوها

 

 

مامااااااااااااااا

 

نعم يا رحاب

 

 

مممممم طب افرضي ان العريس جه شافني واني ما عجبتوش , هيعمل ايه ؟

 

ههه ولا حاجة , هيمشي ومش هيورينا وشه تاني , بس اني متأكدة انك هتعجبيه ويمسك فيكِ يإيده وسنانه

 

مممممممم طيب , انا هروح انادي فاتن

 

روحي يلا

 

 

 

 

مممممممم نسيت اسأل سؤال تاني , هروح لماما المطبخ

 

ماماااااااااااااااااا

 

ايّووووووووووه , نعم يا رحاااااااااب

 

طب افرضي يا ماما اني عجبته لكن هو ما عجبنيش نعملوا ايه ؟؟؟؟؟؟؟؟؟

 

ولا حاجة يا ستي , هنقولوله كل شيء قسمة ونصيب وربنا يرزقك باحسن من بنتنا

 

مممممممم بس كدة ممكن يزعل يا ماما ويصعب عليه نفسه لما يعرف ان اني مش عايزاه وممكن كمان يعمل في روحه حاجة ولا ينتحر ولا يرمي نفسه في المالح وابقى اني السبب , بصي يا ماما , حتى لو ما عجبنيش اني هنوافق عليه , عشان حرام نكسر بخاطره وهو جاي متعشم فينا

 

هههههههههههههههههههههههه طب يلا يا حنينة ناديلي اختك , اصحاب العقول في راحة , العريس محظوووووووووظ هياخد واحدة مخها ابيض وممسووووووووووووووح

 

 

 

 

 

 

 

 

 

 

 

 

 

 

 

اهلا يا نادر يا ابني , منورنا

 

اهلا بيك يا عمي

 

منور يا استاذ محمد

 

هههه النور نورك يا استاذ صفوت , فرصة سعيدة والله اننا اجتمعنا بيك النهاردة وان شاء الله ربنا ييسر ويحصل نصيب ونبقى نسايب ونتشرف بيكو

 

هههه الشرف لينا احنا والله , عن اذنكو لحظة

 

 

اتفضل

 

 

يا كريييييييييمة

 

اني في المطبخ يا صفوت بنحضروا المشروبات اللي هنقدموها للناس

 

فين البنت يا كريممممممممممممة الناس قاعدين من بدري

 

 

حاضر , هبعتلها اختها , روحي يا فاتن قولي لرحاب تروح اوضة الصالون عشان تشوف العريس وهو كمان يشوفها

 

حاضر يا ماما

 

 

 

 

 

 

 

 

 

تن تن تن يا رحاااااااااااااب , ماما بتقولك العريس برا بقاله نص سااااااااااااعة يلا عشان تخرجي

 

 

تووووووووووء اني مش عايزة نخرج يا فاتن , والله اني مكسوفة اوي يا اختي

 

هههههه اني يختي ما ليش دعوة , انا جيت نقولك على اللي ماما قالته وخلااااااااااص , ماما جاية على هنا اهيييييه

 

 

 

 

ايه يا رحاب ! ما جتيش ليه ؟ يلا عشان العريس مستني

 

اهئ اهئ يا ماما اني مكسوفة وقلبي بيدق

 

يا بت قووووووووووومي قومي يلا , نزلي النقاب على وشك وقدام العريس ابقي ارفعيه

 

تووووووووووووء ايّووووووووووووووه على كدة بقىىىىىىىىىىى !!!!!!! حاضر اني جاية اهو

 

 

 

 

 

 

 

 

 

 

السلام عليكم

 

 

ههههه وعليكم السلام , دي بنتي رحاب , ادخلي يا رحاب

 

 

ادخلي يا عروسة ما تتكسفيش هههه اني عمك محمد , والد نادر

 

 

اهلا وسهلا يا عمي

 

 

ههههه وده نادر ابني

 

 

.............................................

 

 

هههههههه ما ردتش ولا قالت اهلا وسهلا المرة دي ههههههههههههه

 

هههههه معلش يا استاذ محمد , الموقف صعب برضو , حتى ابنك عرق وبص في الأرض

 

هههههههههه ايه يا نادر , كسفتنا

 

هاااااا

 

ههههههه لا يا ابني ولا حاجة

 

 

هو ده بقى العريس ! مممممم هو حلو , حلو شوية يعني مممم مش اوي , اني احلى منه بكتيرررررررر , يلا زي بعضه , , اهم حاجة انه متدين وبيصلي وملتزم وعشان التزامه هنجبروا بخاطره و مش هنكسفوه , بس اني بقى اللي مكسوفة ومش عارفة هنرفعوا النقاب ازاي !!!!! تووووووء

 

 

طيب عن اذنك يا استاذ محمد عشان البنت هترفع النقاب

 

هههه انا باصص في الارض اهو , لو عايزني اخرج برا ما فيش مشكلة

 

لالالا خليك مستريح

 

ارفعي النقاب يا رحاب عشان نادر يشوفك

 

....................................

 

 

ارفعي النقاب يا بنت يلا , دي رؤية شرعية , يلا يا رحاب

 

 

مممممم هو الولا العريس باصصلي اوي كدة ليه ومستنيني ارفع النقاب , ماسك كاس العصير ومتنحلي

 

 

يا بنت ارفعي النقااااااااااااااب

 

 

بابا هقولك كلمة في ودنك

 

نعممممممممممممممم

 

خليه يدور وشه عشان ارفع النقاب عشان اني مكسوفة اوي

 

ايّوووووووووووه , يا بت ما تطلعيش عفاريييييييييتي , يلا عشان انتِ زودتيها اووووووي

 

 

حاضر , امري لله , بسم الله الرحمن الرحيم

 

 

بسم الله ماشاء الله ياااااااااااه دي حلوة اووووووووووي

 

 

حاسب يا ناااااااااادر , يا ابني وقعت كاس العصير على السجاااااااادة , كدة برضو ؟

 

 

اسف والله , جيت احط الكاس على الطرابيزة وقع على الأرض

 

ايوة يا إبني , بس تخلي بالك برضو , السجادة اتبهدلت , الناس يقولوا علينا ايه بس !

 

هههههههه معلش يا استاذ محمد , الجماعة هينضفوه , روحي انتِ يا رحاب

 

 

,

 

 

 

مامااااااااااااااااااا

 

هههههههه جيتي يا عروسة

 

هههههههه قوليلنا يا رحاب , العريس اتخض لما شافك واغم عليه من الخضة ولا لسة ؟ هههههههه

 

بس انتِ يا فاتن , تعالي شوفي يا ماما , الولا العريس وقع العصير ع السجادة اللي تعبنا في غسيلها وتنضيفهااااااااا , روحي بقى زعقيلوووووووووووووووه

 

ههههههههههه بس يا بت انتِ يا بت , نزعقوله ده ايه ! , قوليلي ايه رأيك في العريس ؟

 

مممممممم كويس

 

وهو ايه رأيه فيكِ

 

ممممممم ما اعرفش , اول ما شافني فرح كدة وعنيه برقت من الفرحة وراح موقع العصير

 

هههههههههههههه يبقى اتلخبط من حلاوتك وجمالك يا بت , عقبالك يا فاااااااااااااااتن

 

 

هههههه يارب يا ماما ياااااااااااااااارب , ركزي معايا في الدعاء , انا بنتك المسكينة

 

ههههههه طب يا مسكينة , ربنا يفرحني بيكو انتو الاتنين قادر يا كريم , رصي اطباق الجاتوه على الصنية وحطي شوكة وسكينة مع كل طبق وفضي الازوزة في كاسات يا فاتن عشان نقدموهم

 

يا سلام يا ست مامااااااااا , هو اني العروسة عشان تتعبوني في تقديم الطلبات !!!!!!!!!

 

هههههههه لا يا حبيبتي , العروسة بندلعوها وما بنخلوهاش تتعب في حاجة , عقبال ما ندلعوكِ يا قلب ماما اموووووووه

 

يارب يا ماما ياااااااااااااااااارب ههههههههه

 

 

 

 

 

 

 

 

 

 

 

 

 

 

 

 

 

 

ههههههه يعني اتفقتوا على كتب الكتاب يا نادر ؟

 

ههههههه الجمعة الجاية ان شاء الله يا أميررررررررر

 

وانا معزوم انا والمدام ؟ هههههههه

 

هفكر وارد عليك هههههههههه بنفكروا ما نعزمكش هههههههه

 

ههههههههه حتى لو انت ما عزمتنيش , خالتي هتعزمني وهاجي غصب عنك ههههههه ولا ناسي ان العروسة تبقى بنت خالتي

 

هههههههههههههه احلى بنت خالة وربناااااااااااااااا

 

هههههههههههههه يا جدع انت اتحشم , مالك في ايييييييييييييه !!!!!!!!!! انت حطولك حاجة في العصير سطلتك ولا ايه حكايتك ؟ هههههههه

 

ههههههههههههههه اتسطلت من جمال العروسة , ماشاء الله , بصراحة ناس محترمين اوي , والدي بيشكر فيهم وبيقول ونعم النسب

 

ههههه طبعا يا ابني , دخولكو عيلتنا ده شرف كبير ليكو ههههههههههههههههه

 

ههههههههههههه عارف يا سيدي , كتر الف خيركو انكو منحتونا الشرف ده

 

ههههههههههه بنهزروا معاك يا جدع , اوعى تكون زعلت , احنا اللي اتشرفنا بيكو والله يا نادر , ولولا انك طيب وابن حلال اني ما كنتش اتدخلتلك في الموضوع ده , احنا كسبنا راجل يا نادر يا ابني هههههههههه

 

ههههههههه متشكر يا أمير يا عمي هههههههههههههه , نسيبوك بقى عشان نعزموا الناس ونشوفوا هنرتبوا ازاي لليوم الموعود ده ههههههههه السلام عليكم

 

ههههه وعليكم السلام يا عريس

 

 

 

 

 

 

 

 

 

 

 

 

 

 

 

تررررررررررررررررررررررررررررررررررن تررررررررررررررررررررررررررررررررررررن

 

 

شوفي مين ع الباب يا بت يا بدوووووووووور ااااااااااه ياني يا ضهررررررري

 

 

من عنيا يا ست اوساااااااا

 

 

اهلااااااااا ههههه ازيك يا ست توحا

 

ازيك يا بت يا بدور , ستك اوسا هنا ؟

 

ستي !!!!! اوووف , ايوة , الست جوا في اوضتها متهننة ومتبغددة

 

طيب قوليلها اني مستنياها يابت

 

من عنيا يا ست توحا

 

 

 

 

تن تن تن ست اوساااااااا , الست توحا برا

 

خالتي توحا ! ايه اللي جابها من غير معاد ! طيب يا بت روحي انتِ شوفيها تشرب ايه واني جاية وراكِ

 

 

حاضر يا....... يا ستي اووووووووف

 

 

 

 

 

 

 

 

اهلا يا خالتي توحا . ازيك اااااااااه ياني يا ضهري مش قااااااااادرة

 

هههه اسم الله يا حبيبتي , ماشاء الله عليكِ يا مرات ابني , واحدة واحدة يختي , على مهلك تعاااااااالي اموووووووووه اموووووووووه وحشاني يا اوسااااااا ههههه

 

ازيك انتِ يا خالتي , نورتي ااااااه ياني , تعبانة اوي ياخالتي , ما بناموش من الخبط والرزع اللي في ضهري طول الليل

 

معلش يا اوسا , هانت يا حبيبتي , كلها شهرين وتقومي بالسلامة , هو الحمل متعب وبيهد الحيل , اني دوقت المرار واني حامل في الولا سامي

 

 

 

اتفضلي الأزوزة يا ست توحا

 

 

شكرا يا بت يا بدور , روحي انتِ , كتر ألف خيرك

 

منورة يا خالتي , اشربي الأزوزة

 

 

بنشربوا اهو , الله ! انتِ غيرتي الستاير يا أوسا ؟

 

ايوة يا خالتي توحا , غيرتها , نزلت اخترت قماش ستاير جديد وعملناها أهو , حلوة يا خالتي ؟

 

حلوة يا حبيبتي , بس كان لزومها ايه يعني ؟ الستاير بتاعتكو كانت جديدة وزي الفل ما لحقتش تقدم عشان تغيروها

 

ايّووووووه , زهقت منها يا خاااااااااالتي , اني بتنخَنَق بسرعة ونحبوا التجديد

 

على راحتك يا اوسا , اني بس بنقولوا رأيي , أمك عاملة ايه ؟

 

 

 

كويسة , كنت عندها امبارح

 

ايّوووووووووووه ! هو انتِ بتروحي كام مرة عند امك يا بت ؟ اني كذا مرة نسألوا عليكِ سامي , يقولي راحت عند امها

 

الله ! ما نروحوا زي ما نروحوا يا خالتي ! ايّووووووووووووه , هو اني هنروحوا عند ماما بمواعيد ولا ايييييييييه !

 

انا ما نقصدوش حاجة يا حبيبتي , اني بس بنقول كفاية تروحي عند امك مرة واحدة في الاسبوع

 

 

خالتي توحااااااااا , بنقولولك ايييييييييه ! انتي تيجي هنا تقعدي معايا ونغرقوكِ شيّ وازوزة على راسي من فوووووووق , لكن تتدخلي في حياتي وتحاسبيني , اهو ده اللي ما نقبلوش ابداااااااااا , اني طول عمري صوتي من دماااااااااغي , حتى ماما اللي هي ماما عمرها ما حكمت عليا ولا حاسبيتنيييييييييي , اني نعملوا اللي على كيف كيفي وماحدش يتدخل يا خالتييييييييييييييييييي

 

 

بقى كدة يا اوسا !!!!!!!! اهئ اهئ اخص عليكِ يا مرات ابني الف اخصصصصصص اهئ اهئ اني اللي بنقولوا اوسا دي زي بنتي ومش بنعتَبرك مرات ابني تقومي تعملي فيا كددددددددددة !!!!!!! كتر خيرك يا بنت اختي اهئ اهئ وادي الازوزة بتاعتك اهييييييييه اني ماشية وليكِ كبير يترد علييييييييييه اهئ اهئئئئئئئئئئ

 

 

اوووووووووووووف يا شيخة روحي , ايه البلاوي اللي بتتحدف دددددددي

 

 

 

 

رايحة فين يا ست توحاااااااااا , استني بسسسسسسسسسس , ايّووووووووووووووه دي خرجت ورزعت الباب وراهااااااااا , يا لهوي على قلة ادبك يا اوساااااااااا! ست اوسااااااااااا هي الست توحا زعلت كدة لييييييييه ؟

 

ما تزعل ولا تتفلققققققققققققق ! اني لازم نحط النقط ع الحروق قصاد الكل عشان ماحدش يعدي حدوده ويتجرأ علياااااااااااا

 

ايوة بس كدة سي سامي هيزعل على زعل امه

 

وانت مالك انتِ يا بتتتتتتتتت ! بتتدخلي في امور ما تخصكيش ليييييييييه ؟ انجري انشري الغسيل اللي في الغساااااااااااااالة

 

 

حاضر يا ست اوساااااااااااااااا , قادرة وقوية , ليها ضهر ومسنودة عليه , عيني علياااااااا

 

 

 

 

 

 

 

 

 

 

 

فين اللب والسوداني يا بت يا شوقية , التمثلية هتبدأ وعايزة اللب عشان نتسلوا واني بنتفرج يا بتتتتتتتتت

 

 

حااااااااااضر , اجيبلك بندق ولوز يا لوز مقشر انتِ ؟ هههههههه

 

هههه ينيلك يا بت يا شوقية , لا يختي , اني ما نحبوش الا اللب والسوداني , وهاتي بسرعة يا بت التمثلية هتبدأ وعايزة نعرف الراجل هيتجوز السكرتيرة على مراته واللي اني اتوكست لوحدي

 

 

ههههههههه بعد الشر عليكِ من الوكسة ألف مرة يا ست سعاد , اديني جيت اهو , هحط اللب والسوداني ع الطرابيزة قصادك وهنقعدوا في الأرض جنب رجليكِ نتفرجوا ع التمثيلية

 

 

اقعدي يا بت , يا لهوي يا لهوي , دا الراجل بيتسحب من جنب مراته في عز الليل عشان يقوم يكلم السكرتيرة , شوف يختي الرجالة وعمايل الرجااااااااااااالة , اخص على كدددددددددددددة , ال يا مأمنة للرجال يا مأمنة للمية في الغربااااااااااااال

 

ما تبس يا ست سعاد , هو احنا هنتفرجوا ولا هنقعدوا نتحسر على عمايل الرجالة نقولوا امثال شعبية !!!! , اني ما سَمَعتش الولا بيقول ايه للسكرتيرة في التليفوووووووووووووون ,

 

اديني سكت يختي , اسمعي ومتعي ودانك بالخيبة التقييييييييلة , حتى الرجالة في التمثيليات بيتجوزوا على ستاتهم , واللي في الحقيقة بيتجوزوا على ستاتهم , الواحد هيلاقيها منين ولا منيييييييييين

 

بنقولولك ايه يا ست سعاد , احنا نطفي التليفزيون واقعدي اندبي براااااااااحتك

 

 

 

ترررررررررررررررررررررررررررررررررررررررررررن ترررررررررررررررررررررررررررررررررررررررررررررررررررررررررررررررررررررررررررررررررررن

 

 

طب قومي افتحي الباب يختي شوفي مين

 

 

ييييييييي وده وقته ! حاضر يا ست سعااااااااااااااد

 

 

اهلا ست توحااااااااا هههههه اتفضلي يا ست الكل

 

اهئ اهئ اهئ سعاد اختي هنا يا بت يا شوقية ؟

 

ايوة , الله ! مالك يا ست توحا كفا الله الشر ؟

 

اهئ اهئ فين اختي يا بتتتتتتتتت ؟

 

 

الست سعاد جوا بتأزأز لب وبتتفرج على التمثيلية في الانتريه

 

 

اني هندخلولها اهئ اهئ اهئئئئئئئئئئئئ

 

 

 

سعاااااااااااااد اهئ اهئ اهئ

 

ايه ده ! توحااااااااا ! مالك يختي ؟ بتعيطي ليه !!!!!! ادخلي واقعدي واستهدي بالله كدة وقوليلي ماااااااااااااااالك , متخانقة مع مرشدي ولا ايييييييييييه ؟

 

اهئ اهئ اهئ لا يختي , اني جاية نشتكولك من اوسا اهئ اهئ

 

اوساااااااااا ! عملت ايه البت دي ؟؟؟؟؟؟

 

الست اوسا هي اللي زعلتك يا ست توحا ؟ اخصصصصصصصصصص

 

استني انتِ يا بت يا شوقية , في ايه يا توحا ؟

 

اهئ اهئ البت يختي قولت نروحوا نطلوا عليها ونشوفوها اذا كانت عايزة حاجة , ويادوب يختي قعدت والبت الشغالة جابتلي الازوزة , وبعدين يختي بنقولولها يا اوسا ما تروحيش يختي عند امك كتير , كفاية مرة في الاسبوع , بعيد عنك يختي , اني قولت كدة وما خلصتش من لسانها اهئ اهئ اهئ بهدلتني يا سعاد وصوتها علي عليا وترفع حاجب وتنزل حاجب وكإنها بتتعارك مع واحدة من دورها مش مع حماتها اهئ اهئ تقولي اني حرة اني نروحوا عند ماما براحتي وماحدش يحاسبني , وانتي تيجي هنا تقعدي زي الكرسي وتشربي الشيّ والأزوزة وانتِ ساكتة اهئ اهئ يرضيكِ كدة يا سعاااااااااااااد ؟

 

 

يا وقعتها طيييييييييييييين ! البت دي اتهبلت ولا اييييييييييييييه ! ازاي تكلمك بالطريقة دي !!!!!!! اني هنتصلوا نبهدلوهااااااااااا , دا إلا انتِ يا توحاااااااا , زعلك غالي علية يختي

 

اهئ اهئ دا العشم يا سعاد

 

خلاص يا ست توحا , ما تزعليش , الست اوسا طبعها حامي , يامَا شَرَبنا من عمايلها وحطينا في قلبنا وسكتنا , ما تزعليش

 

روحي يا بت يا شوقية هاتي حاجة لتوحا تشربها واني هنروحوا نكلموا البت دي ونطينوا عيشتهاااااااااااا

 

ايوة يا ست سعاد , طيني عيشتها وبهدليهااااااااااااااااا

 

 

 

 

 

 

 

 

تررررررررررررررررررررررررررررررررررررررررن ترررررررررررررررررررررررررررررررررررررررررررررررررررررررررررررررررررررررررررررررررررررن

 

 

الو

 

 

ايوة يا بت يا اوسااااااااااااااا

 

هههههه ماما حبيبتي

 

لو كنت حبيبتك كنتي احترمتي اختيييييييييييي , انتِ ازاي يا بت تقلي ادبك على خالتك وتمشيها معيييييييييييييطة ؟

 

ايّوووووووووووووه ! هي جت اشتكيتلك عشان توقع بينا !!!!!!!!!!

 

اخرسي يا بتتتتتتتتتتتت , ايه اللي حصل يعني عشان تطولي لسانك على اختيييييييييي

 

يا مامااااااا يا ماما دي من ساعة مادخلت الشقة وهي عمالة تسأل عن كل صغيرة وكبيرة , اشتريتي الستاير الجديدة ليه , بتروحي عند امك ليه .لالالالالا اني ما نحبش كدة يا مامااااااااا , عايزة تيجي عندي اهلا وسهلا لكن تتحشر في حياتي لالالالالالالالالا

 

اه يا قليلة الاددددددددددددددب , وكمان تقوليلها اقعدي زي الكرسي ما تنطقيششششششش ؟؟؟؟؟؟؟؟؟

 

 

اني !!!!!!!! اني ما قولتش كدة يا ماماااااااااااا , اني قولتيلها بس اني ما نحبش حد يتدخل في حياااااااااتي

 

انتِ تجيبي بعضك وتيجي على طول تبوسي راس خالتك وتتأسفيلهااااااااااااا

 

اييييييييييييييه ! يا ماما اني تعباااااااااااانة ضهري واجعني ومش هنقدروا نيجي

 

 

بنقولولك ايه يا بتتتتتتتتتت ما تطلعيش عفاريييييييييتي , اني قولت تلبسي وتيجي دلوقتي تبوسي راس خااااااااالتك وإلا مش هندخلوكِ الفيلا تاني , وخليكي بقى في شقتك اولدي لوحدك ومش هنعبروووووووووووكِ , خلي الشغالة تراعيكِ واني مش هنيجي ولا هنقفوا جنبببببببببببك

 

كدة يا ماما ! للدرجة دي ! يعني خالتي اغلى عندك مني ؟؟؟؟؟؟؟؟

 

مافيش اغلى من الضنا يا بت , لكن اني ما نحبوش عيل من عيالي يقل ادبه على اختي الكبيررررررررررة

 

 

حاضر يا ماما , اني هنلبس ونيجي رغم اني تعبانة ااااااااه يا ضهري , سلام يا ماما

 

 

الله يسلمك يختي

 

 

 

 

 

 

 

 

 

 

 

 

 

 

هههههههه خلاص يا خالتي مش زعلانة ؟

 

هههههه خلاص يا بت يا اوسا , عشان خاطر امك مش زعلانة , ومش هنجيبوا سيرة لسامي عن اللي حصل

 

ههه كتر خيرك يا خالتي

 

 

راضية يا توحا يختي ؟

 

راضية يا سعاد , اني اشتريت خاطرك والله وما رضيتش نقولوا لسامي وقولت نقولولك انتِ عشان اني عارفة ان زعلي مش هيهون عليكِ

 

هههه أي والله زعلك ما يهون ابدا يا توحااااااا , , نتعشوا سوا بقى

 

لا يختي , اني يا دوب نقوموا عشان مرشدي ما يستعوقنيش

 

طيب , بالسلامة يا توحا وسلمي على مرشدي

 

يوصل يختي , وانتِ مش هتروحي بيتك يا اوسا ؟؟؟؟؟؟؟؟؟؟

 

اوووووووف مممممم , هنتصلوا بسامي يجي ياخدني يا خالتي

 

طيب , ما تتأخريش عند امك , سلااااااااااااااام

 

اوووووووووووووف , شايفة يا مامااااااااااااا ؟ طبعااااااااااا , ليها حق تديني اوامررررررررر , مش انتِ نصرتيها عليااااااااااااااا ؟

 

بس يا بت اخرسييييييييي , ما تديكِ اوامر , انتِ مين يعني ! طَلَعتي ولا نَزَلتي حتة عيلة , ولا عشان اتجوزتي هتكبري علينا

 

اشمعنى يا ماما يعني خالتي توحا اللي تخافي على زعلها كدة ! مع ان انتِ عارفة ان طبعي حامي مع الكل

 

قلي ادبك على أي حد الا اختي يا بت , توحا دي اختي الوحيدة اللي طَلَعت بيها من الدنيا وما نحبوش حد يزعلها , طب دا مرة ابوكِ رجع من المينا لقاها سهرانة عندي , كشر في وشها وطلع من غير ما يسلم عليها , وهي زعلت وقالتلي جوزك بيطردني بالذوق وخدت بعضها ومشيت , طلعت اتعاركت مع ابوكِ عاركة انتهت بنومته في اوضة الضيوف , إلا اختي يا بت إلا اختي , طب ده هي الصدر الحنين ليا بعد امي الله يرحمها

 

الله ! اومال ليه يا ماما ما خلتنيش انا واخواتي نحبوا بعض اوي كدة ! هههههه متهيألي كل واحد فينا بيدور على مصلحته حتى لو على حساب اخوه

 

إلا احمد ! احمد بيحبك ويحب ادهم وما بيطيقش عليكو الهوا , لكن انتو اللي قلبكو جامد من ناحيته

 

ممممممممم هتفضلي مغشوشة في احمد لحد امتى ! يا بتاعة يللي اسمك شوقيييييييييية , هاتيلي حاجة اكلها عشان هفتاااااااااااااااانة

 

 

هفتانة ! حاضر يا ست اوساااااااااااا

شارك هذه المشاركه


رابط المشاركه
شارك

السلام عليكم ورحمة الله وبركاته

 

ازيكو يا بنات وحشتوني

 

 

شكرا على التفاعل والتعليقات على الشخصيات , حاجة بجد بتسعدني و جزاكن الله خيرا

 

اسيبكو مع الحلقات واشوفكو بكرة ان شاء الله

 

مستعجلة معلش يا قمرات

شارك هذه المشاركه


رابط المشاركه
شارك

الله يسعدك يا رب .احنا اللي سعداء وفرحانين جدا مع القصة .وبننتظرها يوميا .

يا رب على مكر الستات لما يحطوا في عقولهم حد .الله يبعد الشر عن احمد .صار كم واحد بيكيد له

شارك هذه المشاركه


رابط المشاركه
شارك

اممممممم معجبتنيش داليا

ربنا يهديها

 

حتة ان العروسه تدخل يوم الرؤية الشرعيه بالنقاب ولا من غيره دى محيرانا

الصح ايه ؟ ( :

بس احنا عندنا بنخلى العريس يجى لوحده اول مره ممعهوش لا ابوه ولا امه ولا أى حد

شارك هذه المشاركه


رابط المشاركه
شارك

هى توحا عارفه ان ابنها متجوزة بدور ؟

 

عايزه شوية لب ابيض واسمر وجاكو يا هبه ( :

شارك هذه المشاركه


رابط المشاركه
شارك

السلام عليكم

ازيك يا هبه اعتذارات عشان معلقتش علي الحلقات القديمه بس باذن الله هعلق دلوقتي

 

@@ساره محمد

فعلا يا سوسو عندك حق موضوع محير

بس احنا بردو عندنا العريس بييجي لوحده الاول وبندخل بالخمار بس

----------------------------------------------------------------

بصراحه بقي يا هوبه الحلقات اللي فاتت كانت رووووووووووووعه

عجبني اوي استقبال اهل امير ل لينا

واكتر حاجه لفتت انتباهي ان ضحي ماشاء الله مواظبه علي الورد بتاعها حتي في اجمل مناسبه

اوسا دي نفسي تعرف ان سامي متجوز عليها يمكن تنهد وتهدي بقي شويه

وحلو موقف سميره مع اختها بس يا ريتها بتعمل كده مع الكل

كنت متوقعه ان البنت اللي وقفت احمد هي داليا بس ربنا يبعدها عنه

احنا في انتظار قصة وليد وريم والست بتاعة عصير القصب الدكتوره جيهان صح مش كان اسمها كده؟

 

تسلم ايدك علي الحلقات يا هبه بجد الله ينور جميله جدا ماشاء الله

شارك هذه المشاركه


رابط المشاركه
شارك

ساره

هيا دخلت بالنقاب عشان ابوه موجود

لكن لو لوحده اعتقد بتدخل عادي بطرحه او بحمار

انا عملت كده :)

لا اعتقد ابدا ان ام سامي تعرف انه متجوز بدور

شارك هذه المشاركه


رابط المشاركه
شارك

تسلم ايدك يا هبه

ها ابدا بالتعليق

او حاجة ابو العريس ايه الى جابه اصلا وبعدين حتى فو جه المفروض يخلوا رحاب ونادر فى اوضه تانيه مش على الملا كده الصراحة قف محرج اوى لرحاب انهإ تدخل بالنقاب وبعدين ترفعه والعريس باصص عليها علشان يشوفها والمحرج اكتر ان ابوه كمان قاعد بص كان باصص لارض الحاج الصراحة عداه العيب هههه

وكمان ازاى الاستاذ نادر يقعد يمدح فى جمال رحاب قدام امير زعلت منه اوى مش بيغير عليها حتى لو كان امير قريبها ويعرفها اصلا

سعاد بقى امرها غريب اشمعنا اختها الى هيا باقيه اووى عليها كده ولا شوقيه عسل اوووى حبيتها هيا وشغاله ام امير الاتنين عسل بس شوقيه عسلين

وام خالد ست طيبة اوووى

 

شارك هذه المشاركه


رابط المشاركه
شارك

بعد اذنك يا هبه كنت عاوزه اقول لسارة محمد انى احبك فى الله من تعليقاتك ومواضيعك حسيتك انك عسولة وبريئه خالص وبحب اقراء تعليقاتك اوووى وكمان بحس انك على نياتك مش شكل بنات اليومين دول بيبقوا فاهمين فى كله حاجة يعنى عسووووولة اوى وحبيتك بجد فى الله وعلى فكرة اسمنا زى بعض هههههه

يا رب هبه ما تكرشنيش انا اسفه ةالله يا ابله هبه مش ها اتكلم فى مواضيع جانبية تاااانى

  • معجبة 1

شارك هذه المشاركه


رابط المشاركه
شارك

الله يكرمك يا قرانى حياتى

انا بصراحه اول مقرأت عايزه اقول حاجه لساره محمد فكرتك هتزعقيلى ههههه

لكن الحمد لله لاقيت غير كده

الله يكرمك يارب وانا كمان حبيتك واول مره اعرف ان اسمك زيي ( :

احبك الله الذى احببتينى فيه

انا بصراحه مش عارفه ارد واقول كلام حلو زيك ( :

شارك هذه المشاركه


رابط المشاركه
شارك

رغم ان التفاعل يجيب احباط

 

وخمسة بس اللي علقوا على آخر حلقة

 

ورغم اني اتخنقت والله

 

بس برضو معلش , انزل الحلقات عشان عارفة ان في ناس بتستناها من غير انتظار ردود ولا تفاعل عشان ما احرقش دمي

 

 

شكرا للحبيبات

 

سارة محمد

 

ام افنان المغير

 

مريم

 

 

همسات في صمت

 

قرآني حياتي

 

ريحانة زوجي

 

حواء ام هالة

 

ام بشار وعبد

 

يحبهم ويحبونه

 

ام البنات 4

 

سماء الفردوس

 

 

لحظات وانزل الحلقات ان شاء الله

تم تعديل بواسطة هبةنور

شارك هذه المشاركه


رابط المشاركه
شارك

يا حبيبتي يا ست هبة .والله اني من الساعة التاسعة والنصف مساء حتى الان وانا بفتح وبسكر الموبايل مستنية الحلقات .

ما تزعليش ساعات بيخوننا التعبير امام ابداعاتك وما بنعرفش نقول حاجة .

بس عارفة انه قلبك كبير .

شارك هذه المشاركه


رابط المشاركه
شارك

ماتزعليش ياهوبه حقك عليا

انا متبعاكي كل يوم

بس المشكله اني بدخل من الموبايل والكتابه من الموبايل ممله

تسلم ابداعاتك ياحبيبة قلبي

تم تعديل بواسطة رحيق الزهره
  • معجبة 1

شارك هذه المشاركه


رابط المشاركه
شارك

اعذرينى ياهبة الايام دى النت عندى سئ جدااااااا

بس بجد حلقات رااااااااائعه ابدعتى فيها

جزاك الله خيرا

البنت داليا دى جريئه جداااا لم احب تصرفها مع أحمد.

البنت رحاب دى شكلها طيبه وعلى نياتها قوى

اما أوسا فقلة أدبها زادت عن الحد .

شارك هذه المشاركه


رابط المشاركه
شارك

قصة رائعة واكتر من رائعة

عندك موهبة ربنا يحفظك ويباركلك فيها يارب

متابعاااااك يوميا وببقي نفسي اعلق بس انا ع الموبايل والعيال مش بيسبوني امسكه لازم واحد يضغط على زوار والتاني يشد

 

 

سامحيني ع التقصير يا حبيبة

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ - ‌‏أسوأ الأزمنة هي التي يُفعل فيها الشر باسم الخير، والخير باسم الشر، ففي الأثر (يأتي على الناس زمان يرون المنكر معروفا والمعروف منكرا) ♢ عبدالعزيز الطريفي ♢

×