اذهبي الى المحتوى

المشاركات التي تم ترشيحها

السلام عليكم ورحمة الله وبركاته

بارك الله فيك هوبة الحبيبة

يابنتى أنا مش منياوية أنا من أسيوط بس والله بحب المنيا وأهلها جداا لأن أهلها طيبين..

الحلقات جميلة بس الإختلاط ده ما ينفعش زى ما قالوا الأخوات .

عجبتى خالص الأغانى بتاعت هدير بس ما ينفع تتكلم فى الحاجات دى دلوقتى خالص .

ياترى سعاد هتعمل إيه؟؟؟؟

إيه أخبار دراهم ودنانير ونسرين ونجلاء وباقى الأبطال ...

سلوى صعبت عليا خاالص .

شارك هذه المشاركه


رابط المشاركه
شارك

السلام عليكم ورحمة الله وبركاته

بارك الله فيك على هذه الحلقة.

التربية على حب الوطن و زرع كراهية اليهود حاجة رائعة. تحتاج لجرعات مكثفة خاصة في هذه الايام .

واتت كمان وحشتيني جدا جدا.

الله يعطيك ليرضيك .

شارك هذه المشاركه


رابط المشاركه
شارك

الحلقات قصييييييييييييييييييييرة يا هبه اهئ اهئ اهئ

على العموم سلمت يداك وقلمك ، انا عندي اقتراح ... طولي الحلقات واللي عنيها "بتزغلل" بلاش تقرأهم كلهم ، تقرأ على قدها بس هههههههههههههههه

المهم الحلقات جميلة، سعاد اكيد وراها شر ، الله يستر منها يا رب

بانتظارك يا هبه

شارك هذه المشاركه


رابط المشاركه
شارك

السلام عليكم ورحمة الله وبركاته

 

جزاك الله خيرا على الحلقات

 

جميلة المعلومات عن سيناء كتير مننا ميعرفهاش خصوصا بعد تشويه سورة القبائل السيناوية من زمان و وصفهم أنهم تجار سلاح و مخدرات

 

ممكن يكون فى جاسوس فى المينا بيقول لسعاد على تحركات عادل

 

بس عادل غلطان مبيعدلش خالص بينهم صحيح هو مبيروحش لأشجان كتير

بس طول ما هو معاها فسح و دلع لكن سعاد مبتتفسحش خالص على طول سايبها فى البيت ليها حق بصراحة تغير أوى

أتوقع أنها هتضرب أشجان

 

شارك هذه المشاركه


رابط المشاركه
شارك

@هبةنور

 

 

السلام عليكم ورحمة الله وبركاته

إزيك هبة ما شاء الله بارك الله فيكى وجزاكى خيرا

الحلقات راااااائعة وجميلة ولو إن لحد دلوقتى إنت

مدخلتيش فى التقيل فين آخر أخبار دراهم ودنانير

......خالد وضحى......واللى هيعمله أدهم.....

وايه اللى هيحصل لما أوسا تعرف بجواز جوزها....

وايه موقف سعاد منه .....ولا عصام ومرتاته.....

يااااااه دا الجزء ده هيكون طويل فعلاً .

 

بالنسبة لموضوع إن بعض الأخوات بيستطول الحلقات

والبعض الآخر بيستقصرها زى كدة أنا عندى حل يريح

الجميع ....شوفى إنت بتنزلى كام حلقة فى الإسبوع وخلى

حلقة منهم قصيرة والباقى طويل لو هما مثلاً ثلاثة ولو أربعة

برضة حلقة واحدة إللى قصيرة ههههه

 

بجد يا هبهوب بصراحة الكلام ده معناه إنى هولد والمسلسل

لسه مخلص لااااااا مينفعش خالص إنت خلصى المسلسل الأول

علشان أعرف أولد وأنا مستريحة......

ربنا يجزيكى الخير يارب ويخلف عليكى بالخلف الصالح

وعلى فكرة عجبتنى فكرة الإستراحة اللى إقتراحتها أخت من

الأخوات الخاصة بذكر الله ما بين الفواصل مشكورة جزاها الله خيراً ومشكورة المنفذة أيضاً .....بوركتن ورزقكن الله السعادة فى الدارين

شارك هذه المشاركه


رابط المشاركه
شارك

post-110778-0-12052100-1415551058.jpg

 

 

 

ههههههههه وربنا كانت فسحة حلوة يا اشجان , يلا هاتي ايدك عشان نطلعوكِ من المركب

 

 

حمدالله ع السلامة يا عرسااااااااااان , بتعيدوا شهر العسل من تاااااااااااااني !!!!!!!!

 

سعااااااااااااااد !!!!!!!!! ايه اللي جابك المينااااااااا ؟

 

ههههه جيت نتفرج ع العشااااااااااااق , ازيك يا حلوة يا صغيرررررررة

 

بنقولولك ايه يا سعااااد , اني لا جاية اسكندرية نتعارك ولا في نيتي نشوفوكِ من اسااااااسه

 

ماما ما تخافيش منهاااااا , عايزة ايه يا سعاااااااد

 

عيب يا رحمممممممممة , دي مهما كان مرات ابوووووووووكِ , روحي ع الفيلا يا سعاد وما يصحش كددددددددة

 

واللي انت بتعمله ده يصح يا عااااااااادل , مخاصمني وبتتلككلي من ساعة السنيورة ما شرفت اسكندرييييييييييية , ورميني وما بتسألش فيا وداير معاها تتفسح في المينااااااااااا

 

لمي الدور يا سعااااااد , نتكلم في البيت

 

هي كلمة واحدة هنقولوها يا عاااااااااادل , البت دي وبنتها ما يباتوش في اسكندريييييييييييييية , تطلعوا من المينا ع القاهرة دوغررررررري , ويا ويلها ويا سواد ليلها لو صبح عليها الصبح في اسكندرية سلااااااااااااااام هيهيهي , سلام يا صغيرررررررة

 

 

يا لهووي , نزلني القاهرة دلوقتي يا عاااااااادل

 

جرا ايه يا اشجاااااااااان , انتي هتخافي منهااااااا , خلاص , ركبت عربيتها ومشيت , واني والله ما هنعديهالهااااااا , لولا اننا في المينا ومش عايز فضايح كنت علمتها الأدددددددب

 

لالالالالالا ماليش دعوووووووة , اني خايفة على بنتي يا عادل اهئ اهئئئئئئئ

 

ايّووووووووووووه ماحدش يقدر يمس شعرة من البت طول ما اني عايشششششششش

 

لالالالا اني ماليش دعوة بالكلام دددددددده اني هنمشي الليلة يعني هنمشي الليلة , يلا عشان نروحوا الشقة نلموا هدومنا يا رحممممممممممممة , جيالك يا بهيررررررررررررررة جيالك يختيييييييييييي

 

 

 

 

 

 

 

 

 

 

شوقييييييييييييييية هههههههه خدي طلعي الشنطة والمفاتيح في اوضتي

 

حمدالله ع السلامة يا ست سعاد

 

الله يسلمك يا شوقية هههههههههههههه

 

هههه بتضحكي على ايه يا ست سعاد , ضحكيني معاكِ عشان ما ضحكتش من اول امبارح

 

هههههههههههههههههههههههه كل ما نفتكروا شكل البت اللي اسمها اشجان وهي بتتنفض اول ما شافتني وخدت بنتها في حضنها من الخوف بنضحكوا ههههههههه

 

الست اشجان ! وانتِ شوفتيها فين ؟

 

في المينا يا بت يا شوقية , ال ايه عادل واخدها وواخد مقصوفة الرقبة الصغيرة وراكبين فلوكة وبيتفسحوا في المية , اول ما نَزَلوا من المركب لقوني قصادهم , واشجان وشها إحمّر واخضّر واصفّر وعادل عرقه بقى مرقه وناقص يقول يا أرض انشقي وابلعيني ههههههه

 

ليه ده كله ! هو انتِ ظبطيه مع واحدة ماشي معاها في الحرام ! دي مراته يا ست سعاااااااد

 

اخرسي يا بتتتتتتتتت , عادل مالوش ست غيري , انتي هتساوي البت دي بيااااااااااااا !!!!!!!

 

انتِ روحتي اتخانقتي ولا ايه يا ست سعاد ؟

 

اني يا بت اكبر من كدة , مش اني يا بت اللي نروحوا نهلل ونعلي صوتي قدام النااااااااااس , اني روحت عشان نرعبوها ونهددوها

 

يا لهوي ! انتِ ناوية تخلصي عليها امتى انتي والعصابة ؟

 

جرا ايه يا بتتتتتتت ! شايفاني قتالة قتلا !!!!!! اني بس بنحسسوها بالخطر لو قعدت هنا يوم زيادة عشان تاخد البت وتغور مطرح ما جتتتتتتت طول ما هي هنا عادل مش على بعضه واتعلم البجاحة وبقى يشوفها كل يوووووووووووووم

 

استغفر الله العظيم ! بيشوف مراته كل يوم !!!!!! لالالالالا , المفتري عليه ربناااااااااااااااااا

 

مش كدة برضو يا شوقية ؟ على العموم قومت معاها بالواجب وخدها ونَزَل على القاهرة وزمانهم في السكة هههه

 

مممم لكن مين اللي قالك انهم في المينا يا ست سعاد

 

ماحدش قالي , اني اللي مراقباهم

 

مراقباهم ! ايوة ايوة عشان كدة خرجتِ من صباحية ربنا ما رجعتيش الا دلوقتي

 

نعملوا اييييييييه الراجل ركبني الهم والوساوووووووس , كان هاين عليا نقتلووووووهم , ايّووووووووووه على جبروت الرجالة وقٌدرهمممممم , بقالك نص ساعة واقفة ترغي وتلتي وتعجني وعرفتي المستخبي كككككككككككله , اجري طلعي الشنطة والمفاتييييييييييييييييييييييييح

 

حاضر يا ست رياااااااا قصدي يا ست سعاااااااااااد , قطيعة ماحدش بياكلها بالساااااااهل , حاسة اني عايشة مع رئيسة عصابة , في واحدة عاقلة تعمل العمايل السودة دي , تلف ورا الراجل بالعربية وتشوفه رايح فين وجاي منين هو ومراته ! هو كان مع عشيقته عشان تراقبه !!!!! الحمد لله ان الست اشجان مش عايشة في اسكندرية وإلا اكيد كانت هتقلب بدممممممممم عيني عليكي يا ست اشجاااااااان

 

 

 

 

 

 

 

 

 

 

 

 

 

 

 

 

 

 

رحمممممممممة مممممم دي لسة نايمة , اني هنروحوا لبهيرة نصبحوا عليها ههه ما تعرفش اني رَجَعت امبارح بالليل , ناخدولها معايا الهريسة والهدايا دي

 

 

 

 

 

 

 

 

 

تررررررررررررررررررررررررررررررن تررررررررررررررررررررررررررررن

 

 

مييييييييييييين

 

افتحي يا ياسمين اني طنط اشجااااااااان

 

طنط اشجااااااااااان حبيبتي ههههههه

 

هههههه يا حبيبتي يختي امووووووه امووووووووه ازيك يا ياسمين

 

الحمدلله يا طنط

 

اومال ماما فين يا ياسمين ؟

 

ماما خرجت مع طنط ناهد

 

ناااااااااهد !!!!!! خرجت مع نااااااااهد !!!!!! مممم طيب يا ياسمين , خدي الشنطة دي ولما تيجي ماما قوليلها اني سألت عليها

 

حاضر يا طنط , متشكرين ع الهدايا هههه

 

 

 

 

 

 

 

 

 

 

 

انتي صحيتي يا رحمة ؟

 

ايوة يا ماما , انتِ كنتي فين ؟؟؟؟؟؟

 

عند بهيرة

 

ياسر هناااااااك

 

ماشوفتش حد وما اعرفش حاجة , اوعى اما نقوموا نحضرولك الفطار

 

طيب مش عاوزة لبن

 

 

 

 

 

 

 

 

 

 

 

بقى اشجان جت يا ياسمين ؟؟؟؟؟؟ههههه

 

ايوة يا ماما , سألت عليكِ وما لقيتكيش

 

يا حبيبتي يا اشجااااااااااااااان هههههه خلي بالك من اخواتك على ما ارجعععععععع

 

حاضر يا ماما

 

 

 

 

 

 

 

 

 

 

تررررررررررررررررررررررررن ترررررررررررررررررررررررررررررررررررن

 

ميييييييييين

 

افتحي يا رحمة يا رحومة يا عسوووووووووولة ههههه انا طنط بهيررررررررررة

 

طنط بهيرررررررررررررة هههههه هاتي بووووووسة

 

بوستين يا قمررررررر اموووووووه اموووووووه , شوفتي الكرم ؟ ههههه فين ماما

 

في المطبخخخخخخخخخ

 

طيب انا داخلالها

 

وانا رايحة لياسيررررررررر

 

 

 

 

اشجاااااااااااااااااااااااان انتي فين يا اختي

 

اني هنا يا ست بهيرة

 

ههههههههههه جايالك المطبخ يا عسسسسسسسسسسل

 

 

اشجاااااااااااااااان بالحضن يا اختييييييييي , اه يا وحشة يللي غيبتي وقولوتي عدووووووولي

 

 

اهلا يا بهيرة

 

يا مامااا !!!!! ايه المقابلة الساقعة دي يا اختي

 

اهئ اهئئئئئئئئئئئئئئئئئئئئئئئئئئئئئ اخص عليكِ يا بهيررررررررة داني طول عمري نقولوا اني عدمت الحبايب الا بهيرررررررة اهئ اهئ داني طول عمري نقولوا ما ليبش بخت مع حد الا بهيرة اهئ اهئئئئئئئئئئئئئئئئ

 

يا لهوي ! هو انا عملت ايه يا اختي زعلك مني كدة !!!!!!! دانا كنت في بلد وانتِ في بلد وما حصلش أي اشتباكات بينا !!!!!!!

 

اهئ اهئئئئ ايوة يختي , اني مشيت من هنا وانتي اتصاحبتي ع الست نااااااااهد , كل ما نتصلوا البت ياسمين تقولي ماما عند طنط نااااااااهد ودلوقتي جيت لقيتك خرجتي معاها اهئ اهئئئئئئئ اخص عليكِ يا بهيرة

 

ههههههههههههههههههههههههه يا لهوي ع الغيرة المرة يا اشجان ! ههههه يا بت دا حسين ما بيغيرش عليا كدة هههههههه ده لو بيغير عليا كدة كنت فرقت شرباااااااات هههه والله انتِ ظالماني يا اختي , الاخت ناهد جت العمارة جديد وكان لازم ارحب بيها كما ينبغي وبعدين النهاردة والله خرجت معاها عشان اعرفها طريق محل كانت عايزة تعرفه , انما انت الحبيب الأولو يا اشجان ههههههه دانتي اختي وحبيبتي والله يا شجونة , وبعدين والله انتِ ظالماني , انا امبارح اتصلت بيكي ماحدش رد عليا

 

امبارح !!!! ايوة ايوة كنت بنستحموا

 

ونضفتوا ولا لسة ؟؟؟؟؟؟ ههههههههههههه

 

هههههههه اني طول عمري نضيفة يختي

 

طب رحمة ما ردتش ليه

 

رحمة يختي التوكة بتاعتها جريت تحت السرير ونَزَلت وراها عشان تجيبها

 

التوكة جريت تحت السرير ! هي كانت توكة بعَجَل يا اختي ! هههههههههه حمدالله ع السلامة نورتي العمارة يا اغلى جااااااااااارة

 

هههه تسلمي يختي , ال واني جاية وكلي شوق ليكِ عشان نرموا همومي عليكي

 

يا دي المرار ههههههه جاية بهمومك من اسكندرية ! ما رميتيهومش في البحر ليه قبل ما تيجي يا اختي ؟ ههههه , هي القاهرة ناقصصصصصصة , كمان هتيجيبوا هموم من اسكندرية ترموها عليناااااااا ! داحنا عندنا هموم تكفي الجيل اللي بعد القادم ههههههههههههههه

 

ههه واني ليا مين غيرك بس نفضفضوله يا بهيرة

 

فضفضولي يختي فضفضوا هههههههههه

 

طب نفطروا مع بعض الاول

 

والله فطرت وشربت الشاي

 

خلاص , نأجلوا الفطار ونقعدوا نحكوا شوية , هي رحمة بنتي راحت فين

 

راحت عندنا عشان احنا فاتحينها ملجأ هههههه اقعدي بقى احكيلي انبسطتي ولا عملتي ايه واخبار العريس والعروسة ايه

 

زي الفل يختي عقبال ولادك , الفرح كان جمييييل ههههه والعروسة طيبة وحتة سكرة والله , طيبة الدنيا فيها يا بهيرة هي وامها , بصراحة احمد يستاهلها وهي تستاهله

 

ربنا يهنيهم يا حبيبتي , اومال مالك بقى وايه اللي حصل عشان تشيلي الهم ؟ مين زعلك يا اختي ؟

 

هيكون مين غير سعاد الله لا يسامحهاااااااا , هددتني اني نسيبوا اسكندرية والا ذنبي على جنبي , امبارح يختي عادل خدني يفسحني في البحر اني والبت وخدنا فلوكة وقضينا وقت جميييييييييل وسط المية , ونيجي يختي نازلين من الفلوكة نلاقيلك سعاد في وشنا حاطة ايدها في وسطها ورافعة حاجب ومنزلة التاني وبتتهددنننننننني

 

بتهددك ! ولا بتهددك ولا حاجة , انتِ بس اللي قلبك ضعيف وخواااااااافة , تلاقيها كانت بتلعب معاكِ لعبة امنا الغولة وانتِ فهمتيها غلط

 

يا سلام لو كل الناس طيبين زيك يا بهيررررررررة

 

ههههههه والله الطيبين كتير وانتي اولهم يا شجووووووونة

 

هههههههههههه والله وحشتني يا بهيررررررررررررة

 

تسلميلي يا اختي , اومال جوزك فين ؟ انتِ جيتي لوحدك ؟

 

لالالالالا ازاي بقى نيجي لوحدي ! وصلنا وبات معانا والصبح فَطَر ومَشَى بالسلامة

 

الله يسلمك يا اختي هههههه اسيبك بقى تفطري

 

طب ابعتيلي رحمة عشان نفطروها الله يخليكِ

 

هفطرها عندي , هأكلها بتنجان بالخل والتوم عشان تحرم تيجي عندنا تاني ههههههههه

 

هههههههههههههه

 

 

 

 

 

 

 

 

 

 

 

 

 

 

 

 

ترررررررررررررررررررررررررررن تررررررررررررررررررررررررررررررررررن

 

اوعى يا وائل يا حبيبي اما ارد ع التليفون

 

 

الو

 

ايوة السلام عليكم , انا عصام يا طنط

 

الداكتور ! اهلا وسهلا , عايز اماني طبعا

 

ايوة يا ريت لو سمحتي

 

ممم طيب , خليك معايا , يا اماااااااااااني , امااااااااااااااااني

 

ايوة يا مامااااااااا

 

تعالي كلمي بسلامته الداكتور

 

عصوووووووووووووومة ههههههه حاضر يا ماما جاية طيراااااااااااااان

 

الوووووو هههههه ازيك يا عصووووووووومة

 

ايه كنتِ فين ؟

 

ابدا , ممدة ع السرير وماسكة مجلة بقلب فيها , اصلها مجلة فيها شوية موديلات من اللي بتحبها , هتهبلك لما تشوفها عليا ههههههه

 

ههه طيب انا رايح ع الشقة حصليني واعملي حسابك هنقعد يومين هناك

 

ههههههههه ده ايه الهنا ده ! يعني مش هنروح في نفس اليوم زي كل مرة ؟

 

قولتلك لا , يلا , ما تتأخريش , السلام عليكم

 

باي بااااااااااااي يا حبيبي هههههههه مامااااا انا هلبس واروح لعصام وهبات في الشقة يومين

 

ممم سمعتك وانتي بتتكلمي , إييييييييييييييييييه كل واحد ينام ع الجنب اللي مريحه ومش مهم غيره

 

تووووووووء اوووووووووف تقصدي مين يا ماما

 

اقصد ابنك الغلبان اللي حتى وانتِ موجودة عمرك ما خدتيه في حضنك ولا حسستيه بحنيتك

 

ههههه كفاية حنيتك انتِ يا ست ماما , وبعدين يعني اعمل ايه ! اتطلق من عصام واقعد جنبك !

 

هههههههههههههههههههههههههههههههه والله يا بنتي ضحكتيني , بتتكلمي زي ما تكوني مراته بصحيح

 

يا سلااااااااااام ! اومال انا ايه بقى !!!!!!!

 

ههههه انتِ ادرى يا ضنايا , شوفي هو بيتصل بيكي ليه وعشان ايه وغير كدة راميكِ وما بيسألش

 

ممممممم بيتصل لما بوحشه يا ماماااا انتِ ما تعرفيش عصام بيحبني قد ايه

 

هههه مممم طيب , روحي الحقي حبيبك عشان الشوق واكله

 

 

ههههههههه على العموم يا ماما انا مبسوووووووطة ومفرفشة وما عنديش استعداد اسمع كلام ينكد عليا , انا داخلة البسسسسسسسسسسس ههههههه , ادووووووب ادوب ادووووووووووووووووب يا حبيبي وعايشاااااالك يا دووووووووب

 

منك دايبة دووووووووووب , منك دايبة دوب يا حبيبي وعايشاااااااااالك يا دووووووووووووووووب

 

منك دايبة دووووووووووووووووب

 

 

 

رايح فين يا وائل

 

داخل عند مامااااااا , يا ماماااااااااااااا

 

 

ادوووووووووب ادوب يا حبيبي وعايشااااااالك يادوووووووووووب

 

فين الجزمة الحمرا , ممممممم اهيه هههههههههه

 

منك دايبة دوووووووووووووب يا حبيبي وعايشالك يا دوووووووووب

 

ماماااااااا مامااااااا

 

يييييييي ايه يا وائل في ايه , اوعى يا حبيبي خليني اكمل لبسي

 

رايحة فين

 

ممممم رايحة بيت جوزي يا حبيبي

 

اهئ اهئئئئئئئ خديني معااااااااكي

 

لالالالالا ما ينفعش يا وائل , كلها يومين يا حبيبي واجيلك اموووووه , باي باي بقىىىىىىىىىىىىىى

 

ادووووووووب ادوب يا حبيبي وعايشااااااالك يا دووووووووووووووب ههههه منك دايبة دووووووووووووووووب , سلام يا ماماااااااااااااا

 

ممممم سلام يختي يا دايبة دوب

 

اهئ اهئئئئئئئئ مامااااااااااااااااااااااااااا

 

 

بس يا وائل تعالى يا حبيبي , تعالى هنا جنبي , انا تيتة اللي بتحبك

 

اهئ اهئئئئئئئ عايز مامااااااااااا

 

معلش يا ابني , انا معاك اهو , عارف يا وائل انا كمان شوية هاخدك وننزل الجنينة اللي على اول الشارع , اصل في راجل بتاع مراجيح واقف في الجنينة وانا بقى هاخدك وامرجحك طول النهاااااااااار هههههه

 

هيييييييييييييه هيييييييييييه هييييييييييييه هنروح المرجيحة ؟

 

هههه ايوة يا حبيبي هنروح المرجيحة , انا عايزاك مبسوط يا وائل عشان انا بحبك , مممم ااااااااخ ياني , يا ترى يا ابني هتعمل ايه من بعدي ؟ معاك ام زي قلتها , المهم سعادتها هي وعمرها ما فكرت في حد غير روحها وانت اللي اتظلمت , لا ام ولا اب يا حبيبي , لا حول ولا قوة الا بالله

 

 

 

 

 

 

 

 

 

 

 

 

 

 

 

 

 

هههههه ها يا عصام مبسوط مني يا حبيبي ؟

 

ههههههههههههههه جدااااااا , ها , قوليلي مبسوطة في الشقة الجديدة دي ؟

 

اوي اووووووي يا عصومة , انا بصراحة كنت مخنوقة لما بيعت الشقة اللي قبل دي وقولت مش هنعرف نعوضها , بس بصراحة دي احلى بكتيرررررررر

 

هههه طيب الحمد لله انك مبسوطة

 

ممممممم هي مراتك هترجع امتى البيت ؟

 

بتسألي ليه ؟؟؟؟؟

 

عادي يعني , دردشة

 

لما تيجي الشغالة

 

هههههه يارب ما تلاقي شغالة عشان تفضل قاعدة عند امها واشوفك كتير زي ما بشوفك دلوقتي , اصلها لما بتبقى موجودة حياتنا بتتلخبط ومش بعرف اشوفك , مممممم بقولك ايه يا عصومة

 

خير

 

ممممم بصراحة كنت عايزة عربية

 

عربية !!!!!!!!

 

ايه ! كتير عليا !!!!!! هو انا أقل من الهانم مرااااااااااتك

 

اولا مراتي انا ما بجيبلهاش عربيات , باباها هو اللي بيجيب وبيغريلها العربية كل سنة

 

ممممم طب واللي مالوش بابا ؟ هههههههههه

 

عايزة العربية ليه ؟

 

هو ايه اللي ليه يا عصومة يا حبيبي ! المكان هنا بعيد , دانا بركب تلات مواصلات عشان اوووووووصل , لكن لما هيكون معايا عربية هنجز في الوقت بدل بهدلة المواصلات والطلوع والنزول والبهدلة وسط الناااااااس , ده يزق وده يخبط , ولا انت ما بتغيرش عليا

 

لا ازاي ! هه اكيد بغير

 

بتحبني يا عصام ؟

 

هااا أأأ ايوة ايوة بحبك , اومال اتجوزتك ليه !

 

مممم طيب طالما بتحبني هاتلي عربية بقى , عايزاها شيك وموديل السنة دي عشان تليق بمرات الدكتور عصاااام ولا هو انا عشان متجوزاك في السر ما يبقاش ليا حقوق علييييييك

 

طيب طيب يا اماني , هشوف الموضوع ده , عن اذنك هعمل مكالمة تليفون

 

وانا هقوم احضرلك العشا يا عمرررررررررري هههههه

 

هه ميرسي

 

 

 

ترررررررررررررررررررررررررررررن ترررررررررررررررررررررررررررررررررررررررررررررررن

 

رد ع التليفون يا عبد الرحمن , لو حد عايزني قوله اسف والله بابا مرهق ومش قادر يكلم حد

 

طب ما اقول نايم وخلاص يا بابا

 

لالالالا ما بحبش الكدب , إلا الكدب يا عبد الرحمن , قول الصراحة يا حبيبي

 

حاضر يا بابا

 

الووووووووووووووو

 

ايوة يا عبد الرحمن , اديني بابا

 

مين معاياااااااااااااااااااااااا

 

انا عمك عصام يا ولد

 

ازيك يا عمو , اسف والله بابا مرهق ومش قادر يتكلم مع حد

 

افندممممممممم !!!!!!!!! قوله تعالى اتعطف واتنازل وارد على اخوك الكبيررررررررررر

 

بابااااااا عمو عصام عايزك وبيزعققققققققققققق

 

بيزعق !!!!!!!! مممم طيب , هرد عليه حاضر

 

 

السلام عليكم يا عصام

 

وعليكم السلام يا سيدي , ايييييييه ! ما فيش احترام لاخووووووك ازاي ابنك يقول مرهق ومش قادر يتكلم

 

هههه طب اهدا بس , انا فعلا والله مرهق جدا وبعدين قولت للولد أي حد عايزني قوله كدة , معلش جت فيك حقك عليا

 

عايز اشوفك

 

تحت امرك , بس اوعى تقولي دلوقتي عشان والله ما قادر

 

اووووووف مش دلوقتي , انا كمان مش فاضي قبل يومين , اشوفك على يوم الخميس

 

ما تخليها الجمعة يا عصام

 

يوووووووووو , يا اخي ايه حكايييييييتك , انا الفترة الاخيرة طلبت اشوفك اكتر من مرة وكنت بتتهرب وتقولي مشغووووووووووول ودلوقتي احدد معاد حضرتك بتحدد غيررررررررره , ايه رأيك مش هشوفك غير يوم الخميس بقى

 

هههههه طب خلاص خلاص , حقك عليا , حاضر تحت امرك , يوم الخميس الساعة تسعة كويس ؟

 

كويس , نتقابل تحت العمارة وهاخدك بعربيتي نتعشى برا ونتكلم عشان عندي موضوع مهم اوي يا هاني عايز اخد رأيك فيه , موضوع حتمي ومصيرررررررري

 

استر يا رب , حاضر , ان شاء الله هستناك في المعاد , السلام عليكم

 

وعليكم السلام

 

 

 

مممممممم هو ايه المعاد بتاع يوم الخميس ده يا هاني

 

اوووووووووووف هو انتِ مش هتبطلي العادة السخيفة ددددددي , مالك انتِ بمعاد يوم الخميسسسسسس , حاجة ما تخصكيششششششششش

 

حقك علياا , كنت بحسب انه معاد يخص عيلتكو عشان استعد واحضر

 

لا يا ستي , حاجة خاصة باخويا عصام

 

خاصة بعصام !!!!!! ممممم هي ايه الحاجة دي يعني ؟

 

اوووووف داخل انااااااااام

 

تصبح على خير يا حبيبي , عيلة غامضضضضضة كل كلامهم اسراررررررر , يا ترى يكون في ايه يوم الخميس ورايحين فين وليه وعشان ايه ؟؟؟؟؟؟؟؟؟؟ ممممممم افكر

شارك هذه المشاركه


رابط المشاركه
شارك

اذكروا الله يا حبيبات واستغفروه , غفر الله لي ولكن وجعلنا من الذاكرات

 

post-110778-0-12539000-1415553124.jpg

 

 

استغفر الله وأتوب إليه

 

 

 

 

post-110778-0-94818700-1415553240.jpg

 

سبحان الله , الحمدلله , الله اكبر , لا اله إلا الله

 

 

 

post-110778-0-17456800-1415553291.jpg

 

 

سبحان الله وبحمده , سبحان الله العظيم

شارك هذه المشاركه


رابط المشاركه
شارك

يا مصلحييييييي ابعتلي عسكري من عندك , صباح الخير يا هاني

 

اهلا صباح النور يا حازم , عن اذنك رايح لجلال باشا

 

هههههه اكيد عشان تسأله عمل ايه في موضوع أمجد الزيات

 

ايوة فعلا , انا مش عارف لحد دلوقتي ما اتقبضش عليه لييييييييييه !!!!!!!

 

هههههه قلبك ابيض اوي يا هاني , ان شاء الله هيتقبض عليه في المشمش

 

يا اخي انت كمااااان , انا رايح لجلال باشا

 

 

 

 

 

السلام عليكم يا جلال باشا

 

اهلا يا هاني وعليكم السلام خير

 

خير !!!!! انا كنت عايز اعرف ليه لحد دلوقتي ما اتقبضش على امجد الزيات

 

يا إبني الموضوع مش بالسهولة اللي انت متخيلها دي , امجد الزيات من كبار رجالات الدولة , يعني لازم نتأكد كويس اوي قبل ما نتهمه وإلا النتيجة مش هتكون في صالحنا والداخلية هتتقلب علينا

 

يا فندم لكن انا متأكددددددددد , الراجل ده فعلا محل مشك من زمااااااااان

 

فين الإثباااااااااات

 

توووووووووء اعترافات المغازي وشركااااااه والأوراااااااااق

 

مش كفاااااية , لازم نتأكد , وعلى العموم انا بعمل تحريات دقيقة جداااااااا وكلها اسبوع بالكتير وتسمع اخبار كويسة برفع الحصانة عن الزيات والقبض عليه

 

اووووووف لا حول ولا قوة الا بالله

 

الصبر يا هاني , الصبر يا إبني , على العموم انت دورك لحد كدة انتهى ومكافأتك واخدتها , عايز مننا ايه تاني ؟ هههههه

 

يا فندم انا مكافأتي الحقيقية هي تقديم مجدي الزيات للعدااااااااااالة

 

قولتلك هتسمع اخبار كويسة , خلاص بقى , روح شوف شغلك عشان انا كمان اشوف شغلي

 

 

عن اذنك يا جلال باشا

 

اتفضل يا هاني

 

 

 

 

 

 

 

 

 

 

 

 

 

 

 

 

يا مصيلحييييييي اعملي واحد قهوة مظبووووووط الواحد اتخنقققققققق

 

حاضر يا هاني بيه

 

ههههه ايه يا هاني , مش طايق نفسك ليه ! القضية وخلصت والمغازي اترمى في الحبس , خلاص بقى , هدي اعصابك , انا لو منك والله اخد المدام والولاد واروح أي مكان فيه هوا ومية وافسحهم بعد التعب والمجهود اللي بذلته الفترة اللي فاتت

 

اووووووووووف خليك في حالك

 

هههههه ماشي يا عم هاني

 

 

هتصل بمدام امل اخت مدام شمس عشان عايزها ضروري

 

عايزها في ايه ؟

 

يا عم انت ماااااااالك , بتتدخل في شغلي لييييييييه

 

ههههههه اعوذ بالله منك يا هاني لما بتكوت عصبي , الله يكون في عون مراتك , انا سايبلك المكان كله , طالع حملة

 

حملة فين ؟

 

هههههه وانت مالك

 

هههههه لا صحيح رايح فين يا حازم

 

وكر يا سيدي للإتجار وتعاطي المخدرات , وقعتهم سووووووووووووووووودة

 

 

ههههههه وبتقولي الله يكون في عون مراتك ! الله يكون في عون المجرمين اللي بيقعوا تحت ايدك يا حازم يا ديب

 

هههههههههههههه ال امشي عدل يحتار حازم الديب فيييييييييك

 

لا يا شيخ ! ههههه يا عم امشي انت عدل وبطّل تستغل سلطاااااااااااتك , انت بعت العسكري يقضيلك طلبات خاصة ليك ولولادك بعربية الشرطة لييييييييييه !!!!!!!

 

ييييييييييييييي بقولك ايه يا هاني , اطلع من دماغي , انا طالع الحملة , اشوفك بكرة

 

ان شاء الله

 

 

ترررررررررررررررررررررررررررررررررررررن تررررررررررررررررررررررررررررررررررررررررررررررررررررررررررن

 

 

رد ع التليفون يا اشررررررررررف , انا ايدي مشغوووووووولة

 

طيب طيب يا اممممممل هرد اهو , الو

 

السلام عليكم استاذ اشرف

 

وعليكم السلام مين معايا ؟

 

مقدم هاني زاهر

 

اهلا اهلا هاني بيه , خير يا فندم , في أي حاجة حصلت ؟؟؟؟؟؟

 

هههه ما تنزعجكش كدة , خير إن شاء الله , انا بس كنت عايز مدام امل تعدي على القسم بكرة الساعة عشرة صباحا بنفسها عشان تاخد متعلقات خاصة باختها مدام شمش الله يرحمها وتمضي بالاستلام

 

يعني مش ممكن اجي انا بدالها

 

لا يا فندم , لازم هي بنفسها عشان تمضي على الورق

 

خلاص يا هاني بيه , هتكون عند حضرتك في القسم في المعاد المحدد

 

شكرا جزيلا استاذ اشرف , السلام عليكم

 

وعليكم السلام هاني بيه

 

مين يا اشرف

 

ده هاني بيه زاهر , عايزك بكرة في القسم

 

ايييييييييييه !!!!!!! ليه , حصل ايييييييه

 

ههههه ما فيش حاجة يا امل , بيقول هيسلمك متعلقات خاصة باختك , الساعة عشرة الصبح تكوني هناك ان شاء الله

 

ممممم ان شاء الله , متعلقات ايه دي ؟؟؟؟؟

 

 

 

 

 

 

 

 

 

 

 

 

هاني بيه , امل المنزلاوي برا

 

خليها تدخل يا مصيلحي

 

السلام عليكم يا هاني بيه

 

اهلا مدام امل , وعليكم السلام , اتفضلي اقعدي يا فندم

 

شكرا , اشرف جوزي قالي ان حضرتك بعتلي عشان تسلمني متعلقات خاصة باختي

 

في الحقيقة هي متلعقات خاصة بيكِ انتِ

 

بيا انا !!!!! متعلقات ايه يا فندم

 

الصور المفبركة بتاعتك اللي كانت عند يوسف المنزلاوي , واللي وعدتك اني هجيبها واحرقها قدامك

 

يااااااااااااه ههه حضرتك ما بتنساش حاجة , انا نسيت الموضوع ده خالص

 

لكن انا ما نسيتش ان في حاجة ممكن تأذيكي ولازم اتخلص منها قبل ما تقع في ايد حد ماعندوش ضمير

 

بجد مش عارفة اشكرك ازاي , يا ريت كل الناس زيك يا هاني بيه

 

ده واجبي يا مدام أمل , سمعة الناس واعراضهم امانة ولازم تصان

 

لكن حضرتك لقيتهم فين ؟

 

لقيتهم بعد ما فتشنا كل الاماكن الخاصة بالمنزلاوي وكان حاططهم في خزنة خاصة , جايز كان بيفكر انه يحتفظ بيهم كسلاح تهديد في إيده

 

يااااااااااااه انسان حقيرررررر مجررررررررررم , الله ينتقم مننننننننننه , انا كان اسعد يوم في حياتي يوم ما قريت في الجرايد انه اتقبض عليه , ذنب اختي المسكينة اللي راحت ضحيته

 

زي ما قريتي يا مدام امل هو اتخلص منها عشان عرفت عنه معلومات خطيرة وكان معاها أوراق تدينه

 

صدقني يا حضرة الظابط , شمس اختي ما كانتش ناوية تبلغ عنه ولا حاجة

 

ممممم حضرتك كنتي عارفة بموضوع الأوراق يا مدام أمل ؟

 

شمس اختي عمرها ما خبت عليا حاجة , اتصلت بيا وحكتلي على موضوع الاوراق وعلى تهديدها ليوسف , لكن اخر حاجة كنت اتصورها انه يقتلها اهئ اهئ اهئئئئئئئئئئ

 

اومال حضرتك متخيلة ايه من مجرم زي يوسف المنزلاوي ! كان لازم ياخد قرار هو وأعوانه بالتخلص منها عشان يحمي نفسه , لكن سبحان الله , دم مدام شمس كان اللعنة اللي نزلت عليهم وكانت السبب في وقوعهم تحت طائلة القانون

 

الإعدام قليل على يوسف المنزلاوووووي اهئ اهئئئئئئئئئئ ارجوكو هاتولي حق اختي المسكينة اهئ اهئ اهئئئئئئئئئئئئئ

 

ان شاء الله يا مدام أمل , تأكدي انه مش هيفلت من العقاب الدنيوي , غير عقاب ربنا وعدالته وقصاصه للمظلومين , على فكرة انا ما رضيتش اقول لزوجك على اني عايزك بخصوص الصور , مش عايز يحصلك مشاكل من لا شيء , وادي الصور هحرقها قدامك اهو

 

متشكرة اوي يا حضرة الظابط , انت انسان نبيل , ياااااااااااه لو كل ظباط الشرطة زيك

 

ههه قولتلك ده واجبي يا مدام امل , مش مستاهل المدح يعني , على العموم انا عملت حسابي اني اجيبلك حاجة خاصة باختك عشان لو زوجك سألك عن المتعلقات اللي روحتي تستلميها , جبت لحضرتك مفتاح شقة مدام شمس , خلاص , الحراسة اترفعت من عليها وتقدري تستلميها , اتفضلي المفتاح

 

مفتاح شقة شمس ! استلمها ! انا مش ممكن اقدر اخطي خطوة في شقة اختي ولا استمتع بحاجة كانت تملكها اهئ اهئئئئئ مش هقدررررررر

 

على العموم ليكِ مطلق الحرية يا مدام أمل , المفتاح اهو , تقدري تبيعي الشقة لو مش حابة الاحتفاظ بيها , شرفتينا يا مدام امل

 

اشكرك يا حضرة الظابط , السلام عليكم

 

وعليكم السلام يا فندم

 

 

 

 

 

 

 

 

 

 

 

 

 

 

 

 

 

 

يلا يا ضحى انزلي من العربية من غير مطرود هههههههه

 

ههههههه بقى كدة يا أمير !!!! ماااااشي , هو انت مش طالع معايا تسلم على ماما ولا ايه ؟

 

لا طالع طبعا , هنركنوا العربية وطالع وراكِ

 

لا , اني هنستناك ونطلعوا سوا

 

ماشي يا قمر هههه

 

 

 

 

يلا يا ستي نطلعوا , ولا اقولك استني , تعالي نروحوا نجيبوا ايس كريم من المحل ده ونطلعوا ناكلوه في البلكونة مع امي هههه

 

ههه ماشي , اني عايزة فستتتتتتتتتق

 

هههه عارفك تموتي في ايس كريم الفستق , من عنيا يا ستي اناااااااا هههه

 

هههه ربنا يخليك ليا يا امير يا اخويا ياااااااارب

 

 

 

 

 

 

 

 

 

ادينا وصلنا عند باب الشقة يا ضحى , تيجي نرن الجرس ونجري ؟ هههههههه

 

ههههههه انت مش هتكبر بقى يا أمير !

 

هو في احلى من حركات العيال ! هههه

 

ههه لا يا سيدي اني نتكسفوا نعملوا كدة

 

يا سلام يختي يا برييييييييئة ههههههه دانتي كنتي غاوية تعملي كدة اكتر مني , فاكرة لما كنتي صغيرة في تالتة ابتدائي كدة , ماما استنتك ورا الباب من كتر ما زهقت من رنك للجرس وجريك كل شوية ؟ هههه

 

هههه ما تفكرنيش , مسكتني وعضتني حتة عضضضضضضة هههه واني قعدت نعيط وخاصمتها من العصر لحد المغرب وحبست نفسي في اوضتي عشان هي تيجي تصالحني وبعدين لما ما سألتش فيا روحت اني اتأسفت وبعدها ما عملتش كدة تاني هههههه

 

هههه عشان جبانة وخوافة ههههه اني بقى اتهريت عض من امي وما حرمتش برضو

 

هههه طول عمرك شقي وتحب الهزار يا امير , طب رن الجرس بقى خلينا ندخلوا , احنا بقالنا كتير واقفين ع السلم ههه

 

ماشي يا ستي

 

تررررررررررررررررررررررررررررررررررررررن تررررررررررررررررررررررررررررررررررررررررن

 

 

 

افتحي يا اعتماااااااد ده اكيد أمير جاب ضحى ههههه افتحي البت وحشتنييييييييييي

 

حاضر يا حاجة سميرة هههه ربنا ما يغيبها عن عنيكي الا في الخير يااااااااارب

 

 

السلام عليكم يا دادة اعتماد ههه

 

ههههه وعليكم السلام يا كابتن , ازي الكتكوتة الصغيرة والست لينة ؟

 

كويسين الحمدلله

 

ازيك يا دادة وحشتيني ههههه

 

ههه ازيك يا ست ضحى , والله انتِ اللي وحشتيني اكتر والبيت من غيرك مالوش لا طعم ولا حسسسسس

 

ههه ربنا يخليكِ يا دادة , هي ماما فين ؟

 

الحاجة في الانتريه

 

اني هندخلولها اني وامير عن اذنك

 

اتفضلي يا حبيبتي

 

اتفضلي يا دادة عملنا حسابك في الايس كريم

 

ههههه ان شالله تسلم يا كابتن امير , دايما كدة داخل علينا بالحاجات الحلوة هههه

 

 

 

 

 

 

 

 

 

 

مامااااااااااااااا ههههههه حبيبتي وحشتييييييييييني

 

ضحىىىىىىىىىىىىى ههههههه يا حبيبتي يا حبيبتييييييييييي تعالي في حضني وحشتييييييييني امووووووووووووه اموووووووووووووووووه , كدة يا بت نهونوا عليكِ اني وابوكِ تسيبينا تلات تيام بحالهممممممممممممم

 

هههه معلش يا ماما , كل ما نيجي نمشي لينة ومامتها وتيتة ليز يمسكو فيا

 

 

اميييييييي هههه على فكرة اني واقف من الصبح

 

ههههه معلش يا امير , اصل ضحى وحشتني اووووووووي , مش واخدة انها تغيب عن عيني كدة

 

يا امي انتي محسساني انها كانت مخطوفة ورجعت هههههه نازلة فيها بوس واحضان زي اللي بقالك سنة ما شوفتيهاش

 

هههههه بنتي ونور عيني يا ولا وبنحبوهااااااا ايّوووووووووووووووووه هههههه

 

ههههه ربنا يخليكِ ليا يا ماما يا نور عنيااااااااا اموووووووووه

 

مممممم يا عيني عليك يا امير يللي امك باعتك ببلاش

 

ههههههه اخص عليك يا ولا , طب دانت قلبي وروحي وعنيا يا اميرررررررر

 

بعد ايه بقىىىىىىى , ال واني اللي جايبلك ايس كريم عشان ماادخلش عليكِ بإيدي فاضية هههه

 

هههههههههههههه تعيش وتجيب يا حبيبي , تعالوا يا ولاد ناكلوه في البلكونة تعالواااااااا

 

 

 

 

 

 

 

 

 

 

 

 

الا بالحق يا أمير , انت ما عَرَفتش ان احمد ابن عمك عادل سليم اتجوز من يجي اسبوعين ؟؟؟؟؟

 

اتجوززززززز ! ومن اسبوعين كمااااااااان , طب مش تقوليلي يا امي عشان نقوموا معاه بالوااااجب ! توووء , الراجل يقول عليا ايه دلوقتي

 

هو ما يعرفش انك هنا من الاساس , خلاص يا ابني احنا لسة فيها , اتصل بيه وحدد معاد وروح زوره

 

طبعا هيحصل ان شاء الله يا امي ,

 

انت عارف اتجوز مين يا أمير يا ابني ؟

 

مين يا امي ؟ واحدة نعرفوها ولا ايه ؟

 

عارف خالد اللي متكلم على ضحى اختك ؟

 

ايوة

 

احمد بقى اتجوز هيام اخته

 

والله ! ههههه كويس اوي والله , يعني احنا كدة هنبقى نسايب احمد لما نجوزوا ضحى لاخت مرات احمد ههههه

 

ههههه ايوة ان شاء الله , اهي ضحى اتكسفت ووشها إحمر من السيرة يا أمير هههه

 

هههه ما تقومي يا ضحى تجيبلنا عصير ولا حاجة نشربوها , ايه البخل ده هههههه

 

مممم من عنيا يا أمير , نجيبولك عصير يا ماما ؟

 

هاتي يا حبيبتي يا مكسوفة انتي ههههه

 

 

 

 

 

 

 

 

 

 

 

 

 

 

 

 

 

ده يحيي جه اهو يا رياااااااااض

 

اخيراااااااااا , ده ادهم بيه قالب الدنيا عليه من بدري

 

 

هههههه ازيكو يا رجالة

 

اهلا يا سيدي , ادهم بيه مستنيك ادخله على طووووووووول

 

ههه ماشي يا ريااااااااااض , راجعلك عشان نشربوا الشيّ سوااااااااا

 

ماشي يا يحيي

 

 

 

 

 

تن تن ادهم باشااااااااااااا

 

يحيييييييييي ادخل ادخخخخخخل ادخل واقفل الباب وتعااااااااااااالى

 

 

ههههه مساء الفل يا برنسسسسسسسسس

 

هاااااا عملت ايييييييييييه

 

 

الست ضحى رجعت البيت النهاردة , اخوها وصلها وطَلَع معاها لحد فوق

 

رجعت اخيراااااااا , احكيليييييييي بالتفصيل شوفت ايييييييه

 

ولا حاجة يا ادهم بيه , اني من ساعة ما راحت عند اخوها وانا كل يوم من الصبح لبليل هناك على اليمة التانية من العمارة , نراقبوا اللي طالع واللي نازل , طب داني ما بنمشيش من هناك قبل واحدة بالليل ولما الانوار تطفي عندهم ويناموا واروح تاني يوم من الصبح الساعة سبعة نقفوا نراقبوا بيت اخوها , المهم النهاردة لقيتهم نازلين , خدوا العربية ومَشوا , روحت مشيت وراهم

 

اوعى يكونوا شافوك ولا خدوا بالهم انك مراقبهم

 

لالالالا ما تخافش يا ادهم باشاااااا , اني حويط وبناخدوا بالي كويس

 

المهم ايه اللي حصل بعد كدددددددة قوووووولي

 

ولا حاجة , وصلوا تحت العمارة وبعدين راحوا على محل الايس كريم , جابوا ايس كريم وطلعوا , فضلت واقف لحد ما اخوها نَزَل لوحده وخد عربيته ومَشَى

 

مممممم طيب يا يحيي , خد دول عشانك

 

ههههه خيرك سابق يا سعادة البيه , ممم بس اني يعني ولا مؤاخذة كنت عايز نسألك سؤال محشور في زوري

 

عايز تسأل على ايه ؟

 

انت بتراقب الست ضحى ليه ؟ اصل ولا مؤاخذة دي بنت ناس ومحترمة اوي , بتلبس هدوم واسعة وطويلة وعليها طرحة طويلة , وعنيها في الأرض , يعني مش من الصنف اياه , هو انت عايز منها ايه يا ادهم باشا

 

يحييييييييييييييييييي , ما تتدخلش في اللي مالكش فيييييييييييه , اللي نقولولك عليه تنفذه من غير كلااااااااااااام فاهم ولا نفهموووووووووك

 

لالالا فاهم يا ادهم باشا ,

 

ومن بكرة الصبح تروح تراقب بيت حامد مندور ولو ضحى راحت أي مكان تراقبها و تيجي تقوووووولي , لو أي حد غريب دخل البيت تقوووووووووولي

 

 

حاضر يا ادهم باشا , بالإذن

 

اذنك معاك يا خويااااااااا

 

 

 

 

 

 

 

 

 

 

 

 

 

 

 

 

 

الحق يا سعييييييييييد الحق يا رمضاااااااااااااااان إبراهيم هلال وقف بعربيه قدام محلنا وجاي على هنا وشكله شايططططططططططط , يا فتاح يا عليم يا رزاق يا كريييييييم , في ايه ع الصبححححححح

 

 

ايييييييييييه !!!!!! ده الاستاذ سامي لسة ماجااااااش , روح كلمه انت يا سعيييييييد

 

 

 

 

 

انت يا جدع انت وهوووووووو فين اللي اسمه سامي مرشدددددددددي ؟؟؟؟؟؟؟؟؟؟؟؟؟؟؟

 

 

اهلا يا استاذ ابراهيم , الاستاذ سامي راح مشوار والله

 

وفين عم مرشدددددددددددددددي

 

الحاج مرشدي ع القهوة قاعد مع الحاج صالح

 

طيييييييييييييب اني هناخدوا عربيتي ونروحوله على هناااااااااااااااااك

 

استر يارب , شكل الموضوع مش هيرسي على خير

 

 

 

 

 

 

 

 

الله ! عربية مين اللي وقفت قدام القهوة ومين الجدع اللي نزل منها ورزع الباب ده

 

ده ابراهيم هلال يا حاج مرشدي

 

يااااااااااااه ابراهيم هلال , داني بقالي يامَا ما شوفتوش

 

 

سلامو عليكو

 

اهلا يا ابراهيم يا ابني وعليكم السلام

 

يرضيك يا عم مرشدي اللي بيعمله سامي ابنننننننننننننك , يرضيك ياخد الزباين من قدام المحل وعايز يوقف حاااااااااااالي , وكمان يعيب في بضاعتنااااااااا ! اني شاري خاطرك يا عم مرشدي عشان انت مهما كان كنت صاحب ابويا الله يرحمه وليك معزة عنددددددددددي لكن عمايل ابنك دي ما ترضيش ربناااااااااااااا

 

طب اقعد يا ابني اقعد يا ابراهيم

 

اني مش جاي نقعدددددددددد اني جاي نشكيلك ابنك وعمايله , وقوله ان ما كانش يقصر الشر عليا الحرام من بيوتي الاربعة لنكونوا معلمينه الادددددددددددددددددب

 

طب بس اقعد , اقعد يا ابني الله يرضى عليك

 

اسمع كلام عمك مرشدي واقعد يا ابراهيم يا ابني ما تفرجش علينا الناس , استعيذ بالله من الشيطان واقعد

 

اعوذ بالله من الشيطان الرجيم , استغفر الله العظيم يااااااااااااااارب

 

ولا يا هنداووووووووي واحد لمون للاستاذ ابراهيم هلال

 

عنينا يا حاج مرشدددددددددي

 

ازيك يا ابراهيم وازي عيالك

 

الحمدلله يا عم مرشدي , اني يعز عليا اني نعلي صوتي عليك كدة , بس والله ابنك خرجني عن شعوري

 

اني هنربيه , هنجيبوه لحد عندك يتأسفلك , اني ما يرضنيش زعلك يا ابراهيم , دانت ابن الغااااااااالي , طب والله ابوك وقعدته الحلوة ما بتروح عن بالي , يا سلاااااااااام كان راجل ونعم الناس والله

 

الله يخليك يا عم مرشدي , انت ركبتني الغلط والله , حقك عليا يا راجل يا طيب

 

يا ابني لا حق ولا مستحق , أي حد غيرك كان هيعمل اللي انت عملته واكتر

 

اللمووووووووووون اتفضل يا استاذ ابراهيم

 

شكرا يا هنداوي

 

اشرب يا ابراهيم يا ابني

 

اني هنشرب اهو , ازيك يا عم صالح وازي احوالك

 

بخير يا ابني الحمدلله , ماحدش بيشوفك ليه يا ابراهيم , بقالي يامَا ما شوفتكش

 

نعملوا ايه بس , كنت مسافر والله في مصلحة كدة والحمدلله قضيت ولسة راجع امبارح

 

ربنا ييسرلك حالك يا ابني , بس اني زعلان منك يا ابراهيم يا ابني

 

ليه بس يا عم صالح ؟

 

من شوية وانت متعصب قولت عليا الحرام من بيوتي الاربعة , ده يصح يا ابني ! هو الحلف بالطلاق يجوز ! وذنبهم ايه حريمك تحلف عليهم بالحرمانية وهما مالهومش ذنب ولا ليهم في الطور ولا الطحين ؟؟؟؟؟؟؟؟؟

 

عندك حق يا عم صالح , ربنا يسامحني ويغفرلي , صحيح حريمي مالهومش ذنب , يدوم اللمون يا عم مرشدي

 

يدوم عزك يا ابني , ما تزعلش يا ابراهيم وما تكونش شايل في نفسك من سامي ابني , معلش , اخوك الصغير وهنشدلك ودنه , هتصل بيك ونحددوا معاد ونصلحكو على بعض ان شاء الله

 

ان شاء الله يا عم مرشدي , يعني امشي وانت مسامحني على صوتي اللي علي عليك ؟

 

ما حصلش حاجة يا ابني , انت ابني يا ابراهيم

 

ربنا يديم المعروف يا عم مرشدي , ياريت سامي ابنك يتعلم اخلاقك اللي محببة الناس فيك دي

 

الله يكرمك يا ابني

 

طب استأذن اني

 

بالسلامة يا ابني

 

خلينا نشوفك يا ابراهيمممممممم

 

ان شاء الله يا عم صااااااااااالح

 

 

 

 

 

 

 

 

 

 

 

 

 

 

 

 

 

صباح الخير يا طنط رهف هههه

 

هلا يا بعد جلبي ههههه فطرتي ولا باقي ما فطرتي ؟

 

ايوة يا طنط الحمدلله , اخدت ساندوتش وكوباية شاي

 

ممممم واختك ؟

 

مش عارفة والله , انا لقيتها صاحية في اوضتها بس مش عارفة فطرت ولا لأ , اومال فين فهد ؟

 

كان يلعب الحين , والله ما بدري وين راح ههههه يا فهدددددددد فهددددددددددددددد

 

أي يومّاااااااااا

 

وينك يا بعد جلبببببببببببي ؟؟؟؟؟؟

 

العب بالمسدس حججججججججججي

 

هههه اصل فهد فرحان بمسدس المية ههههه امبارح رش عليا مية غرقني يا طنط هههه وعمال يضحك ويطنطط

 

ههههه ولدي يحبك يا دراهم

 

وانا كمان بحبه اووووي , اخويا حبيبي مممممممم أأأأ

 

ههه تبي تجولي شي ؟؟؟؟؟

 

بصراحة يا طنط رهف ماما وحشتني اووووووووي , كل يوم بحلم بيها , بحلم انها بتعيط وبتجري عليا انا واختي وبتاخدنا في حضنها اهئ اهئ اهئئئئئ , بجد وحشتني اووووووي

 

يا بعد جلبي ! حاسة فيكِ حبيبتي , والله انا ما ابي احرمك من امك ولا للحظة واحدة , انا اعرف قد ايش الأم غالية , انا ما بجدر يمر اسبوع واحد بدون ما ازور امي , انا اتكلمت كتير مرة مع ابوكِ ولكن كل مرة يرفض وما يبيكِ تكلمي امك انتِ واختك , الأمر مو في يدي حبيبتي مممممم لكن اسمعي يا دراهم , انا بخليكِ تكلميها بدون عمله , لكن ما تجولين اني انا اللي سمحتلك , مو ابي احد يعرف وابوكِ يزعل , حتى اختك ما تجولي امامها

 

ههههه يا حبيبتي يا طنط رهفففففف اموووووه , ربنا يخليكِ يااااااارب , مش هقول لحد ولا حتى دنانير

 

 

 

 

 

دنانيررررر هههههه لوين ررررايحة ؟

 

اووووووووووف انت مالك انتتتتتتتت , هو انا ناقصاك انت كماااااااااااان , اوعى من وشييييييي

 

هغرجك بالمسدس حجييييييييي هههههههههه

 

ييييييييييييي ايه قلة الأدب ددددددددددي , طب والله لتتضرررررررررررب اهوووووووووووووووو

 

 

اهئ اهئئئئئئئئئئئئئئ يومّااااااااااااااااااااااااااااااااااااااااا اهئ اهئئئئئئئئئئئئئئئئئئئئئئئئئ

 

 

 

هااااااااا ويش صااااااااااااااار , ولدي بيبكييييييييييييييييي , فهدددددددددددددد , ويش فيك يا بعد عمررررررررررررررري

 

 

في ايييييييييه فهد بتعيط لييييييييييييه

 

 

 

 

حبيبي ويش فييييييييييك

 

اهئ اهئئئئئئئئئئئئ دنانير طجتني على رااااااااااسي ووجهييييييييييييي اهئ اهئئئئئئئئئئئئئئ

 

 

انتِ ياااااااااااااابنت , ليش بتطجي ولددددددددددددددي

 

عشان قليل الادددددددددددددب , غرقني بمسدس المييييييييييية

 

اسمعي يا بنت انتتتتتتتتتتتتتتِ , هنا تجعدي بأدددددددددبك , مالك حكم على ولدددددددددددي , وانا لما بيجي بوكِ بخبره على اللي صار منننننننننك , ايااااااااااااك تمسي ولدي بسوء ولا يدك تتمد له بأذى تاااااااااااااني , انا سكت على جلة حياكِ كتيررررررررر لكن والله ما بسكت على اللي راح تسويه بعد الحييييييييين

 

هههههه والله ! هتعمليلي ايه يعني , هتضربيني ؟؟؟؟؟؟؟؟؟؟

 

مش هجولك غير انك جليلة رباية وما لجيتي حد يربيييييكِ

 

اسمعي يا ست انتييييييييي , انتِ تحترمي نفسك وما تتكلميش عن تربييييتي

 

دنانيررررررر , عيب كدددددددددددة , انتي زودتيهاااااااااااا

 

وانتِ كمان مالكيش دعوة يا ست دراهمممممممممم , ما هو خلاص بقى ولائك ليها وبتزعلي على زعلهااااااااااا , عيشة تأرررررررررررررف , اوعى يا واد انت كمان من وشي وإلا المرة دي هقتلك مش هضربك بسسسسسسسس

 

يومّاااااااااااا اني خايف يومّاااااااااا اهئ اهئئئئئئئئئ

 

مو تخاف يا بعد جلبي , والله ما بسكت بعد الحين على جلة حياهااااااااا

 

ما تزعليش يا طنط رهق , حقك عليا

 

وانتِ ويش ذنبك يا دراهم ! اختك هي اللي مو بتحترم كبير ولا صغير , انا حاولت كتير اكسبها لكن انتِ تدرين ايش بتسوي فيني , وانا اتحملتها كتير , لكن مو بتحمل انها تأذي ولدي , مو في جلبها رحمة , تطج طفل صغير مثل فهد بهذه الجسوة !!!!!!

 

ممممم معلش يا طنط , هي اعصابها تعبانة من ساعة ما جت من مصر

 

ما في حل غير ان ابوكِ يرجعها مصر , هي لا تبغي الحياة معي وانا صرت ابغض الحياة معهاااااااا

 

مممممم مش عارفة اقولك ايه يا طنط , معلش , ان شاء الله ربنا يصلح حالها ويهديها , فهد حبيبي هههههه لسة زعلان ؟؟؟؟؟ راسك ابوسها اموووه , وكمان بوسة ع الخد الجميل ده امووووووووه ههههههه ما تزعلش بقى

 

ههه

 

طب يلا رشني بمسدس المية زي امبارح وانا اجري منك هههههه

 

هههههههههههههه اجري وانا بغرجك بالمووووووووية

 

ههههههههه يا مامااااا لا هجري بسرعة ومش هتلحقني

 

ليندااااااااااااااا

 

يس ماااااااام

 

اعطيني الهاااااااتف , ابغي اجول لمرزوج على اللي صار فيني من بنتتتتتتتتته , لازم البنت هذه ترجع على بلدهااااااا

شارك هذه المشاركه


رابط المشاركه
شارك

السلام عليكم يا حلوين يا طعمين

 

شوفت كدة كلام عن اختلاط والعياذ بالله والكلام استوقفني ههههههه

 

عن نفسي ما عندناش اختلاط خااااااااالص , انا وزوجي كأسرة يعني , لكن عيلة زوجي عادي يعني عندهم , بس هما ملتزمين بالحجاب الشرعي برضو ومافي خضوع بالقول ولا شيء من ذلك , افتكر مرة لما اخوه اتجوز احنا عزمناه هو ومراته على العشا , طبعا جاب مراته وجه , وجوزي فتح الباب ودخل اخوه الصالوه راحت مراته جت تدخل وراه , جوزي منعها وقالي اقعدي برا في الريسبشن هههههه جوزها قعد يضحك عليها وخصوصا ما كانوش لسة قفلوا باب الصالون وهي قاعدة في الريسبشن قدامه وهو يضحك عليها وهي قاعدة متغاظة هههههههه المهم قفلوا باب الصالون وانا خرجت ارحب بيها , قالتلي جوزك كبسني كبسة وحشة اوي ههههههه وحكيتلي الموقف , قولتليها معلش والله حبيبتي , ده نظامنا واللي يجي عندنا يمشي على طبعنا هههههههه

 

موقف تاني مش هنساه ابداااااااا هههههه اول جوازنا , واحد صاحب جوزي قاله انا هجيب المدام واجي عشان نبارك وكمان المدامات يتعرفوا على بعض , مرات صاحبه مدرسة قرآن والدها يبقى المدرس بتاع جوزي في ابتدائي وصاحبه مدرس انجليزي والاتنين من عائلات كبيرة هنا ومن اثرياء البلد

 

المهم مرات صاحبه منتقبة برضو وملتزمة جدااااااا وفاهمة النظام طبعا , بس هي كانت قلقانة من مقابلتي انا هههههه قالت لجوزها بقولك ايه يا وائل انا لو روحت عند مرات صاحبك ولقيتها طالعة فيها وشايفة نفسها عشان هي من القاهرة وهتتكبر عليا عشان انا من الصعيد مش هقعد , انا هتصل بيك واقولك يلا اخرج عشان نمشي , قالها خلاص ماشي

 

المهم انهم جم وجوزي نزل فتح بوابة البيت والناس طلعوا وانا كنت قاعدة في اوضة نومي لحد ما يدخل هو وصاحبه الصالون ويقفلوا الباب واخرج انا ارحب بالضيفة

 

لكن اللي حصل بقى ان ما حسيتش ان حد دخل الشقة اصلااااااااا , وفضلت اقول هو ايه اللي حصل ! كل ده يجيب صاحبه ومراته من تحت !!!!!! وفضلت قاعدة حوالي تلت ساعة تقريبا وسايبة الست قاعدة برا في الريسبشن , المهم هي مش عارفة تتصرف , راحت اتصلت بجوزها , هو اول ماشاف اسمها افتكر انها اتخنقت مني ومن مقابلتي الوحشة ومتصلة عايزة تمشي هههههههه قام ما ردش عليها ههههههه قعدت تتصل وهو يكنسل عشان محرج يقول لجوزي انهم ماشيين بالسرعة دي , المهم في الآخر ومع الحاحها رد عليها بعصبية وقالها في ايييييييييه ؟؟؟؟؟ قالتله مرات صاحبك ما خرجتش ولا عبرتني ههههههه , راح جوزها قال لجوزي , وفجأة سمعت صوت جوزي بيقولها متأسفين يا فندم والله , وجه جري على اوضة النوم يقولي ايه يا هبة سايبة الست قاعدة لوحدها برا وما خرجتيش سلمتي عليها ليه ؟ قولتله هو انت جيت امتى اصلا من تحت ! هههههه قالي من بدرررررري , يلا اخرجي رحبي بالضيفة , انا طبعا خرجت وانا عمالة اضحك واقولها والله اسفة حبيبتي حقك عليا ما اعرفش انك هنا هههههههه قالتلي حصل خير ما فيش حاجة ههههه وقعدنا انا وهي نحكي ونرغي كتير والحمدلله لما جوزها سألها عن انطباعها كان ايجابي بس قالتله كلمة غريبة اوي , بتقوله دي فيها طيبة امهاتنا والناس بتوع زمان هههههه مع ان ده مش حقيقي , انا شريرة جدا هههههههه

 

المغزى من كلامي ان انا ما عنديش اختلاط وبكرهه جدا بالطبع لانه يسبب فساد القلوب والعياذ بالله

 

لكن واحد قريبي ويبقى جوز خالة امي الله يرحمها ومريض جدا واتصل بجوزي وقاله انا عايز اشوف هبة , بالله عليك هاتها القاهرة عشان اشوفها , جوزي وعده انه هياخدني وننزل القاهرة , الراجل اتصل اكتر من مرة والله , وكمان اتصل باخويا عشان عايز يشوفه برضو ,وصوته فعلا يقطع القلب , وجوزي متعاطف معاه واول ما جت فرصة نزلنا القاهرة عشان نزوره , وانا قعدت معاه انا وزوجي وقعدت في الكرسي المجاور ليه بالتحديد , وكانت بنته موجودة وملتزمة بحجابها الشرعي واطفالها الصغيرين موجودين , والكلام كان عن امور الحياة العادية , قعدنا حوالي ساعة ومشينا , انا عن نفسي شايفة ان مافيهاش اي حاجة , الموقف ده ممكن نضطر ليه , وطالما في حفاظ على الحجاب الشرعي وعدم الخضوع بالقول مافيش مشكلة , وده بناء على فتوى

 

 

 

اما بالنسبة ل ( مريم ) حبيبتي لما قالت ان الولاد لو شافوا اختلاط هيفتكروا ان ده عادي , فأنا احب اقول لا طبعا يا مريومة , لان الولاد اكيد بيشوفوا امهم ما بتقابلش اصدقاء ابوهم ولا ابوهم بيقابل اصدقاء امهم وشايفين ان في فصل بين الجنسين , لكن في حالة ام عصام والجلسة اللي حصلت برضو واضح جدا ان ام عصام من القواعد من النساء والظابط راجل مسن ومريض , والكلام كان عن حرب اكتوبر وبالاخص اهل سيناء اللي انا سوقت هذه القصص لتكون بمثابة توضيح لنبل اخلاقهم ووطنيتهم , اما عن وجود رانيا فكانت بالحجاب الشرعي ومافي احاديث جانبية بينها وبين زوج اختها , وكانت موجودة للترحيب بأمه مش اكتر , هذا ما عندي , وبالطبع عارفة ان ممكن كتير يختلفوا معايا , لكن انتو بتشوفوا دايما الابطال الملتزمين عندي من الشباب ما بخليهم يختلطوا مع النساء , زي ما بتشوفوا من خلال الاحداث , وللمرة التانية هقول ان القواعد من النساء لهم حكم في الشريعة , فبالله لا نضيق واسعا يا حبيبات

 

 

 

وعلى فكرة انا بلاحظ ان غير الملتزمين من الرجال يعتبرون ان غض البصر من النساء عنهم يعتبروه اهانة وده حصل معايا

 

لما كنت باخد كورسات انجليزي عند واحد جاي من لندن , هو كان يكلمني وانا ارد وانا باصة في الارض , فكذا مرة يقولي بصيلي وانا بكلمك يا هبة لو سمحتي

 

وانا طبعا مصرة اني ما ابصش ,كذا مرة يقولي كدة وانا برضو مصرة اني ما ابصش عليه , وده كان قبل انتقابي , لكن انا بطبعي اخجل من النظر في وجه رجل اجنبي عني , وده من صميم الدين , الراجل اخر ما زهق راح مزعقلي قدام كل الطلبة وقالي من فضلك بصيلي وانا بكلمك , ايام نوت ايه بيست , يعني انا مش وَحْش ههههههه روحت اتعصبت انا كمان وجزيت على سناني وملامح وشي اتغيرت للضيق , راح مصلح كلامه واتكلم بذوف , المهم انه من بعدها ما قاليش كدة تاني هههههه , يعني ده لو عارف دينه اكيد كان عرف ان غض البصر مأمورين بيه , الله المستعان

 

اسيبكو للحلقات بقى وكفاية رغي , انا النهاردة كان عندي وقت اتكلم واتناقش معاكم لكن بالله خليكو فاكرين اني مش فاضية والله عشان الكتابة , لكن في الآخر انا احترم ارائكم يا حبيبات

 

 

اااااااه بالنسة لهدير طبعا غلطانة جداااااا المفروض البنت تتحلى بالحياء , هي صحيح مش بتفكر في حاجة غلط ,واغلب البنات في سنها يفكروا في الجواز لكن ماحدش يجهر بللي جواه بالشكل ده ههههه بس انا شايفاها بتتصرف ببراءة وسذاجة وعدم خبرة ولازم الام توجه البنت ما ينفعش تسيبها

  • معجبة 4

شارك هذه المشاركه


رابط المشاركه
شارك

جزاك الله خيرا حبيبتي علي الفتوي

وفقهنا في الدين ونفع بِنَا

احب نظام بيتك كما هو بيتي والحمد لله

شارك هذه المشاركه


رابط المشاركه
شارك

جزاك الله خيرا حبيبتي على الحلقات .يا رب تكون في ميزان حسناتك .حلوة جدا فكرة الذكر .حقيقة لم اتخيلها بتكون بهذا الشكل. جزى الله من صممها خيرا

الواحد صار يخاف على ضحى من ادهم .ربنا يكفينا شره

شارك هذه المشاركه


رابط المشاركه
شارك

كلكم عليا ؟ ^ــ^

كنت مشغوله اليوم كان عندى امتحان

 

ايوة احسن ان اشجان صممت تسافر القاهره محبش انا الرجاله يقولوا محدش يقدر يجى يمك ومعرفش ايه

انا مبحبش المشاكل بحب ابعد عنها ^^

 

وهى لازم تلتمس العذر لصديقتها بهيره لانها كانت بتتصل بيها وهى متعرفش

 

مكملتش خالص

شارك هذه المشاركه


رابط المشاركه
شارك

السلام عليكم ورحمة الله وبركاته

الحلقات رائعة ياهوبة

انا كنت فاكرة امير هو اللى بعت الفستان

معقول تكون سعاد؟!!

بهيرة مش عجبانى خالص فى انها سابه المسئولية كلها على ياسمين البنت مازالت طفلة برضوا

مبسوطة بأحمد وهيام ووليد وريم

بس ياترى ضحى مصيرها ايه

بصراحه بدءت أخاف من أدهم

منتظرين الحلقات القادمة إن شاء الله بفارغ الصبر

شارك هذه المشاركه


رابط المشاركه
شارك

تسلمى ياهبه على الحلقات الجميلة

ربنا يجزيك خير ويجعل ماتكتبين فى ميزان حسناتك

أمانى انسانة أنانيه جدا لاترى احد الا نفسها ومصلحتها حتى ابنها لاتفكر فيه

ياترى عصام عاوز هانى ليه ؟ ومتى سيفيق ويصحح اخطاءه ؟

هانى انسان نبيل يهمه حفظ اعراض الناس

شارك هذه المشاركه


رابط المشاركه
شارك

هوبة حبيبتي الحلقات رائعة جدا

ولكن قصيرة جدا جدا

ارجوا ان تطيلي الحلقات اكثر

بالنسبة لنظام بيتك فهو نظام رائع جدا

كما هو الحال عندنا

اسال الله ان يبارك لك في زوجك

شارك هذه المشاركه


رابط المشاركه
شارك

ازيك يا هوبتنا

ايه رأيك ابعتلك صنيه مكرونة شانفلي انا شطورة خالص في عمايلها ..ها تاكلي صوتبعك وراها ..ههههه

احب اعلق علي موضوع الاختلاط القواعد ماشي لكن رانيا بتقعد كتييير مع ماجد وده غلط حتي لو كان مدرسها بكره الاختلاط جداااااا....

واعتقد ان عصام عاوز هاني علشان يقله علي انه عاوز يتجوز نجلاااااء هههههههه

وطبعا الزيني ده مفيش حد ها يقدر يكلمه هما دول حد يقدر يغلطهم اصلا ربنا يعز الاسلام والمسلمين ويرزقنا تحكيم شرع الله يااااارب...

واشجان خوااااافه اوووي فعلا هههه ربنا يعافينا..

وبرضه بهيره متقله خاااالص علي ياسمين كل حاجة عليها مش اوووي كده يعني دي زهقتها خالص .والمفروض تخلص كل متطلبات بيتها الاول قبل ما تروح لجيرانها مش ترمي المسؤليه علي ياسمين وتطلع تضيع وقتها مع جاراتها مش بحب كده ابداااااا...

ونسيت اقول ان وائل صعبان عليا خااااالص....

  • معجبة 1

شارك هذه المشاركه


رابط المشاركه
شارك

معلشي يا جماعة انا بكتب من الموبيل علشان كده تلاقوا اخطاء في كلامي

علشان تعرفي يا هوبه المعاناه الي بعانيها مع كتابه كل رد ههههههه

 

شارك هذه المشاركه


رابط المشاركه
شارك

السلام عليكم

حلقات حلوة وقصيرة كمان بس ماراح ألومك خالتو لانك نوهتي بأنها نصف حلقة هه . تسلمي.

هدير: اعجبتني جداا نظرتها للزواج. وكمان فهمها ان الحب يأتي بعد الزواج مش قبله.

سعاد: بما ان عادل مع اشجان فأنا بقى مش خايفة عليها.

مش عارفة نفسية رحمة حتبقى إزاي بعد الموقف ده...

كفاية كده. وبانتظارك خالتو هبة...

شارك هذه المشاركه


رابط المشاركه
شارك

انا اسحب كلامي خالتو الحلقات مش قصيرة هي بس حلوة ورائعة.

اصل انا مشفتش الحلقتين الاخيرة إلا بعد ما كتبت الرد السابق.

وعن هدير: نعم يجب ان تتصف بالحياء وعادة نحنا البنات بنستحي نحكي مثل هكذا كلام.

وادهم كل حلقة الا وهو اللي بيسودها . الله يحفظ ضحى منه بس.

مش عارفة اعلق اكثر من كده لاني نعسانة فأنا سهرت مخصوص علشان اقرأ الحلقات...

والله يعينك خالتو هبة.

شارك هذه المشاركه


رابط المشاركه
شارك

سعاد على الرغم من انها مفترية بس ده عشان مش لقت حد يوقفها عند حدها مهما كانت شخصية الست قوية الا ان الراجل بجد بيعرف ازاي يخليها بحدود واكبر دليل ان عادل زي قلته انه وافق اشجان وخلاها تسافر المفروض كان خلاها يوم على الاقل وبات معاها وراح لسعاد ادبها على موقفها انما هو وافق اشجان وسافرها

 

 

اشجان جبنها دة مش حلو ولازم تتغير واعتقد دة ممكن يحصل لما عادل يموت وتتلقى الصدمات من ولاده

 

 

اماني ابتدت الشغل اهي اي حاجة تطلع بيها ....وائل ابنها صعبان عليا جدا بس اكيد هي كمان هتحتاجه في يوم ومشش هتلاقيه

 

 

 

 

كلامك عن اهلنا فسيناء جميل جدا وجه في وقته الصراحة ربنا يفرج كربهم ويعينا ويعينهم على الظالمين

شارك هذه المشاركه


رابط المشاركه
شارك

حبيت اعلق شوية ههههه

بالنسبة لاماني

فكما قلت هذه النوعية من الناس تقززني جدا

لا اشعر اتجاهها باي نوع من العطف

ليس لانها قد تزوجت عصام وهو متزوج

فالزواج الثاني ليس عيب وان كان صعب علي الزوجة الاولي

ولكنه شرع الله وكلنا نعلم ان الله ما شرع شيئا الا فيه الخير لنا

ولكن مايجعلني اتضايق منها هو عدم حيائها المراة وان كانت متزوجة يوجد بداخلها حياء فطري قد فطرها الله عليه

اما ما فعلته اماني من عرض نفسها علي عصام وهي في ذلك الوقت كانت متزوجة

وحتي كلامها مع عصام ينم عن سوء خلق

وطريقة تعاملها مع ابنها طريقة مثيرة للاعصاب

فهي حقا مثال للبنت السئ والام السئ والزوجة السئ

نعم هي من اسوء الزوجات وهذا واضح من طريقة تعاملها مع زوجها السابق

حتي وان كانالزوج به ما به فهو ليس مبرر اطلاقا لخيانته وارتكاب المعاصي

بل هي مثال عن الشخصية الانانية التي تعيش لنفسها فقط

المهم كفاية عليها كده لانها اثارت اعصابي

الله المستعان

  • معجبة 1

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×