لو عروسة جديدة او على وش جواز تعالى ندردش شوية

[om_mohamed 0]

حبيبتى noursama

ونا مش حتردد وحوصل الخبر الحلو دا لصحبتي وحتدعي لك باذن الله

ربنا يسعدها ويسعدك يارب

احبك في الله

احبك الذى احببتنى فيه

[امة الله العفو 0]

جزاكي الله خيرا يا اختي وحبيبتي في الله اسأل الله ان يجعل ابنك محمد من علماء هذه الامه ويثبتك علي الحق دائما ابدا ما حييتي

[مُحـبـَّة الصالحين 6]

السلام عليكم ورحمة الله وبركاته،،

كيفكن يا اهل الخير :?: :!:

انا متابعة مخلصة للصفحة منذ ايام و اللهم بارك يعني نقاش جميل و مفيد

ربي يبارك فيكِ يا ام محمد

انا بقى يا ستي على وش جواز رغم انه مش مديني وشه كويس يعني لكن هدورهولو باذن الله ههههههههههههههه

 

بس عايزة اسأل عن شيء محيرني

مرة سمعت الشيخ يعقوب بيدي نصايح للخاطب بيقول في مامعناه انه لازم يتحرى ان عيلة البنت يكونو كلهم ملتزمين

بمعنى ان اخوها هيبقى خال الاولاد و ابوها جدهم ...الخ فلازم الوسط يكون ملتزم

انا بقى شايفة ان ده ظلم

ايوة ظلم :angry:

يا ناس يا عالم احنا التزمنا وسط الهرج و المرج و بندعي ليل نهار ربنا يطلعنا منه

و حاولنا نغير مقدرناش

فلما ييجي الاخ الملتزم مياخدش غير اللي ابوها شيخ و اخوها داعية

فمش هينفع كده الاخت اللي بتعاني وسط العيلة تثبت على طول كده لوحدها :sad:

 

انا رايي ان دي انانية

لازم يشوف و يراعي ان البنت اللي التزمت لوحدها و محدش غصب عليها دي اقوى دينا و لازم يقدر صبرها و ثباتها

مش يقولها معلش خال ولادي و جدهم

 

معلش بقى انا دمي فاير استحملوني

 

و ان شاء الله لي عودة باسئلة تانية ان شاء الله

[om_mohamed 0]

حبيبتى امة الله العفو

جزاكي الله خيرا يا اختي وحبيبتي في الله اسأل الله ان يجعل ابنك محمد من علماء هذه الامه ويثبتك علي الحق دائما ابدا ما حييتي

جزاكى الله كل الخير على دعوتك الحلوة دى لى ولابنى وربنا يسعدك فى حياتك ويرزقك بالذرية الصالحة يارب العالمين

 

يا حبيبتى محبة الصالحين

اهلا بيكى معانا وربنا يبارك فيكى ..وروقى دمك شوية

انا اعتقد ان الشيخ قصده ان الخاطب يبحث عن اهل زوجة يكونوا على اخلاق عالية مش لازم داعية ..هوه يعنى فيه كام داعية فى البلد يبقى كل البنات هتعنس بقه ههههههههههه

انا اعتقد ان قصده ان اهل الزوجة يكونوا على خلق مش فاسدين فى اخلاقهم يعنى وعلى الاقل يكونوا بيؤدوا الفروض علشان هيكونوا قدوة لابناء الزوجة .

وانا اعتقد ان الخاطب لما هيلاقى البنت الملتزمة والزوجة الصالحة مش هيفرط فيها

وربنا يسعدك ويجمع بينك وبين زوجك بالحلال ويرزقك الذرية الصالحة

ومستنية باقى اسئلتك

[مُحـبـَّة الصالحين 6]

آمين آمين ربي يبارك فيكِ يا غالية

 

و يبارك فبيتك و زوجك و يحفظ ذريتك و يجعلهم قرة عين لكِ و له

 

بصي يا ستي انا بطبعي رغاية و احيان كثيرة الناس اللي حواليا بتفهمني غلط

و حاولت كثير اصلح ده و اقلل كلامي مفييييييييييييييش فايدة ابدا

و خايفة جدا اني اخسر زوجي *لما يهل ان شاء الله* زي ما خسرت ناس كثير بسبب لساني

 

لو في نصائح عملية و ياريت دعائك ليا بالهداية عن ظهر الغيب :angry:

[om_mohamed 0]

بصى يا حبيبتى انا اعرف ناس كتير اوى عندهم نفس المشكلة بس لانى معاشراهم من زمان مبزعلش منهم لكن اللى ميعرفهمش بيزعل منهم

فانا عاوزاكى تعملى حاجة كويسة اوى .. قبل متتكلمى فى مكان ما مثلا وانتى قاعدة مع صاحباتك فكرى لو اللى انتى هتقوليه ده اتقالك انتى شخصيا هتزعلى ولا لا؟؟ لو هيزعلك متقوليهوش ..لو مش هيزعلك فكرى تانى هل هيسبب حرج للى هتقوليله الكلام ده ؟؟

لو اخدت الوقت ده فى التفكير قبل متتكلمى مش هتغلطى باذن الله

 

هحكيلك موقف ..كنا قاعدين انا وصاحباتى ومعانا صديقة مش متجوزة ..فواحدة مننا بتشتكى من تعب العيال والزوج ..فواحدة قاعدة قالت لصاحبتنا الغير متزوجة (طبعا انتى مريحة دماغك من الدوشة دى كلها احسن يا شيخة) صاحبتنا ابتسمت ابتسامة صفراء كده زى مبيقولوا وحسينا كلنا انها اتجرحت لانها لسة متزوجتش

فخلى بالك لان ابسط كلمة ممكن تجرح من غير قصد

وبالنسبة لزوجك المفروض انك تتكلمى معاه براحتك ..لانك المفروض تخليه صديقك وحبيب قلبك وتحكيله كل اللى نفسك تحكيه..بس اهم شئ انك متقوليلوش كلام يخنقه ويضايقه

يعنى مثلا لو عمل حاجة ضايقتك .متنفجريش فيه وتقولى انت عملت كذا وكذا ..اهدى خالص وعاتبيه بهدوء وبكلام حلو هتلاقيه هدى واعتذر

 

وبدل العتاب بالكلام خليه بالفعل

لو اخدتى بالك انا نصحت الاخوات مرة انها دايما تنادى زوجها باسم دلع لطيف ..ومتندهلوش باسمه الا لما تكون زعلانة فهوه هياخد باله انها مدلعتوش وهيسالها مالها وتبدا تعاتبه بالراحة خالص ومن غير زعيق

 

وكمان فكرى فى الملكين اللى عمالين يكتبوا وراكى كل كلمة.. وفكرى هاخد حسنة لو قلت الكلمة دى؟؟ ولا هاخد سيئة ؟؟؟ وباذن الله لو حاولتى تعملى كده هتلاقى نفسك بتفكرى اكتر مبتتكلمى وباذن الله خير ومش هيحصل مشاكل مع زوجك باذن الله

[مُحـبـَّة الصالحين 6]

حد قالك قبل كده انك سكر؟؟؟؟؟؟؟؟؟؟؟؟؟؟

 

و الله سكر يا ناس :wub:

بارك الله فيكِ

اوعدكِ اني هنفذ النصائح بالحرف مع اني حاسة كده و الله اعلم اني عقبال ما افكر تكون القعدة انفضت و كل واحد راح لحاله ههههههههه

و الله ففترة حاولت اعمل كده فعلا و بقم هما يستغربو من سكوتي؟؟ ايه ؟؟ مالك؟؟ عيانة؟؟ تعبانة؟؟ :wub: :wub:

زعلانة من حد؟؟ لا تكون سخنة يا جماعة؟؟ لا شوفو يمكن سخنة؟؟؟ :wub:

 

هههههههههه

ما هما اللي مش مخليين حد يقفل بقه :wub:

 

و بخصوص النصيحة اللي انتِ قلتي استوحتيها من حديث امنا عائشة -ض- فاسمحيلي اقولك احسنتِ و الله يبارك فعقلك :sad:

فعلا فكرة ممتازة و فيها اقتداء و لعل الله يكتب لك بها اجر

 

ربي يخليكِ و يبارك فيك :rolleyes:

 

هعصر دماغي و ارجع لك باسئلة ان شاء الله :ninja: :wub:

دمتِ بود و سلامي للاخ محمد و للكتكوتة :wub: :wub:

تم تعديل 5 نوفمبر, 2007 بواسطة مُحـبـَّة الصالحين

[om_mohamed 0]

حبيبتى الغالية انتى اللى سكر وعسل والله وربنا يديم الود والمعروف بينا باذن الله

اوعدكِ اني هنفذ النصائح بالحرف مع اني حاسة كده و الله اعلم اني عقبال ما افكر تكون القعدة انفضت و كل واحد راح لحاله ههههههههه

و الله ففترة حاولت اعمل كده فعلا و بقم هما يستغربو من سكوتي؟؟ ايه ؟؟ مالك؟؟ عيانة؟؟ تعبانة؟؟

زعلانة من حد؟؟ لا تكون سخنة يا جماعة؟؟ لا شوفو يمكن سخنة؟؟؟

 

هههههههههه

ما هما اللي مش مخليين حد يقفل بقه

خلاص طالما هما كده يستحملوا بقه هههههههههههههههههههههههههههه

 

بخصوص النصيحة اللي انتِ قلتي استوحتيها من حديث امنا عائشة -ض- فاسمحيلي اقولك احسنتِ و الله يبارك فعقلك

فعلا فكرة ممتازة و فيها اقتداء و لعل الله يكتب لك بها اجر

الحمد لله رب العالمين ..مهو الواحد لو يقتدى لالصحابيات الجليلات مكنش حد تعب فى حياته او على الاقل كان لقى حل لمعظم المشاكل وربنا يوفقنا جميعا لما يحبه ويرضاه

 

هعصر دماغي و ارجع لك باسئلة ان شاء الله

وانا فى انتظارك دايما

دمتِ بود و سلامي للاخ محمد و للكتكوتة

ادامك الله لمن تحبين يارب

[emy20007 0]

كلامكم جميل جداااااا وفعلا مفيد

 

وانا مبسوطه انى بقيت معاكم وبستفيد منكم

 

وشكرا ياام محمد على ردك ليا وخطيبى الحمدلله افعاله كويسه وهو طيب جدا وحنين بس هو طبعه انه مش بيحب الكلام كتير وانا بحاول اعمل بنصائح ساجدة وكلامك وربنا يسهل

[om_mohamed 0]

ربنا يسعدك باذن الله يا ايمى ويرزقكم الذرية الصالحة

[أنوار المحراب 0]

ما شاء الله عليكم ,,, الله يجزيكم الف خير ...

 

بالنسبة لخطيبي هو حنون ... بس عيبه انه بيعصب زيادة شويه ... بس طبعا و اكيد ما بيغلط علي ابدا الحمد لله

 

بس انا احيانا بتضايق من هاي المشكلة ... و بعد ما يهدي بيعتذر مني و بيصير يحكي لي انه ما كان بقصد .. و راح يتغير و لما يعصب اذكره بوعوده الي ( انه ما يزعلني ابدا )

 

يعني اذا في خطوات عملية تناسب انه هو ما زال خطيبي بس مكتوب كتابنا ع بعض ... اخذ فيها لما يكون بحالة غضب

 

 

و الله يجزيكم الخير

 

 

اختكم

[om_mohamed 0]

حببيتى أنوار

 

انا كمان زوجى من النوع العصبى زيادة شوية بس قلبه طيب جدا والحمد لله

فانا عن نفسى لما بلاقيه بيزعق مثلا او متعصب بسكت خالص ومبردش نهائى ..وببصله بصه كده بمسكنة قال يعنى انى زعلانة ..يقوم يسكت على طول ويقولى انتى زعلتى ؟؟ ويصالحنى ..

لكن لو زعقتيله ساعتها او ناقشتيه ممكن يتعصب اكتر ويقولك هوه انتى هتربينى وهتعلمينى الادب والكلام ده ..لانى للاسف كنت بعمل كده اول الجواز كل ميزعق ازعق قصاده والمشكلة كانت بتكبر لحد معملت الطريقة بتاعة السكات دى بصراحة جابت نتيجة احسن مالجيران يطلبولنا البوليس ولا حاجة ههههههههههههه

 

بس زى متفقنا طالما مفيش اهانات يبقى دى احسن طريقة ..لكن لا قدر الله لو هانك بعد الزواج او قال كلمة كده طلعت غلط يبقى فيها خصام على طول علشان ميتعودش على كده

وفترة الخصام دى تتوقف على نوع الكلمة الغلط ..لو كلمة خفيفة ..ممكن تخاصميه ساعة او ساعتين ..لو كلمة وسط ..نص يوم مع تكشيرة محترمة.. لو كلمة كبيرة بقه ..يوم يومين لحد ميعتذر

 

بس اهم شئ فى فترة الخصام متقصريش معاه فى طلباته الاكل والشرب واللبس علشان ميلاقيش حجة يمسكها عليكى غلطه وعلشان تحسسيه بالذنب ..واول ميصالحك صالحيه على طول وبلاش تقل اوى

 

اما حاليا قبل الزواج ممكن تخاصميه شوية ..متكلميهوش فى التليفون مثلا ..تكشرى تكشيرة خفيفة كده مع نظرة لوم ..هيلين على طول

 

وربنا يصلح حالك وميجبش زعل ولا خصام يارب العالمين

[omjana 6]

ام محمد ازيك عملة ايه يارب تكونى بخير

 

 

مفيش اى نصيحة لاختك ده قبل الزواج بقليل ؟

[om_mohamed 0]

حبيبتى زاد ..انتوا حددتوا معاد الزواج ولا ايه؟ ربنا يتمم بخير يا رب .. شوفى يا ستى هقولك على شوية حاجات كده باذن الله هتريحك كتير بعد الجواز باذن الله

 

1- نصائح للجسم

 

1- قبل الزواج باسبوعين كده تجيبى ترمس مطحون + عسل ابيض + لوفة بس تكون ناشفة وكل يومين تخلطى الترمس على العسل وتدعكى جسمك بيهم على الناشف قبل متبليه وبعد كده تشطفيه كويس هيديلك نعومة ولما تيجى تزيلى الشعر مش هيؤلمك باذن الله.

2- بالنسبة لو هتلونى شعرك لونيه قبل الزواج باسبوع واحد ..واستعملى حمامات كريم علشان يفضل طرى وناعم ..وممكن كمان تجيبى كوب لبن زبادى وتدلكى فروة راسك وتسيبيها نص ساعة وبعدين تغسلى شعرك وممكن تعملى كده يوم بعد يوم ..هيخلى شعرك يلمع ويبقى طرى.

3- لوجهك حاولى تنامى كويس ولو ان ده بيبقى صعب قبل الجواز مع توضيب الشقة بقه بس حاولى تنامى كويس واشربى مية كتير علشان بشرتك.. وكل يوم او يوم بعد يوم تخلطى العسل والترمس وتحطيه على وجهك وتسيبيه لحد مينشف وبعدين تشطفيه بمية دافية هيخلى وشك فى منتهى النعومة.

 

2- نصائح التجهيز

 

1- اعملى قائمة بادوات المطبخ وشوفى ايه اللى ناقص وكمليه علشان متتفاجئيش بعد الجواز انك عاوزة تعملى حاجة ومتلاقيش الادوات بتاعتها.

2- بالنسبة للملابس اتاكدى انك اشترينى هدوم للفصلين الصيفى والشتوى - انا اتفاجات وانا بوضب هدومى فى بيتى ان معنديش هدوم شتوى - وكان فاضل على الفرح يومين رحت اشتريت بسرعة

3-اتفقى على فستان الفرح وحددى الاكسسوارات وكل شئ قبلها بشهر على الاقل وخلى بالك هاتى الفستان ماسك شوية لانك لما هتيجى تلبسيه هتلاقى نفسك خسيتى من كتر الشغل والتوضيب فى شقتك فالفستان هيوسع.

4-اكتبى قايمة بمعازيم الفرح قبلها بشهر علشان كل متفتكرى حد تضيفيه ومتحدديهمش فى آخر لحظة.

 

3- بالنسبة للعقد

1-يفضل كتب الكتاب - العقد يعنى - قبل يوم الزفاف باسبوع على الاقل علشان لو جوزك حب يساعد معاكى فى فرش البيت يبقى حلالك ومفيهاش حرمة

2- كمان علشان مياخدش وقت يوم الزفاف ويبقى اليوم كله للفرح

3-وعلشان تتقبلى فكرة انك خلاص اتجوزتى ومتبقاش الخضة كلها فى يوم واحد هههههههههههههه

 

4- بالنسبة للعلاقة الزوجية

1-حاولى تتكلمى مع والدتك عن كل شئ انتى متخوفة منه لانها هتقولك بصراحة ومش هتغشك ولا هتخوفك زى مفى بنات كتير بترعب صديقاتها

2-يوم الدخلة ده باذن الله هيبقى احلى يوم فى حياتك بس تخليكى هادية ومتسمعيش كلام حد

 

وعلشان تستفيدى خدى اقرى الكتاب ده اسمه تحفة العروس

 

___________.doc

 

وحاولى تديه هدية لزوجك يقراه وباذن الله خير وربنا يتمم بخير

ومتنسيش شربات وملبس الفرح

وانا لو افتكرت حاجة تانية هكتبلك تانى باذن الله

[emy20007 0]

شكرا حبيبتى ام محمد وربنا يخليلك محمد

[ساجدة للرحمن 2050]

بقى كده و لا حد سائل و لا حاجه

ماشي

أنا زعلانه بس برده مش هسيب الموضوع (رزاله ) صح

[*أم رقية* 473]

ام محمد عاملة ايه

رجعتلنا وانهالت الاسئلة عليكي يالا ربنا يخليكي لينا :icon15:

المهم بقي انا الفترة دية بتحصلي حاجات غريبة دايما اشعر بكابة ومليش نفس لاى حاجه خالص ومش عارفة اتعامل مع حد بيقوللي ان ده طبيعي قبل الولادة بس انا قلقانة لاني حسة بالتقصير في كل شي في عباداتي وزوجي عارفة بيني وبينك ساعات مش بعمله اكل واقوله نجيب جاهز وهو ساعات بعذرني لاني بكون فعلا تعبانه

اما بقي عن علاقتي باهله فماليش نفس خالص انزل لاني مش عايزة اتكلم مع حد واللهي كل دة بحس انه غصب عني بس خايفة يزعلوا ومش عارفة اعمل اية :biggrin: :wub:

معلش طولت عليكي

احبك في الله :wub: :

[om_mohamed 0]

الشكر لله يا ايمى يا حبيبتى وربنا يكرمك بالذرية الصالحة يارب

 

يا بت يا ساجدة سئلت عليكى والله اول مرجعت من عند حماتى ارجعى صفحة هتلاقينى سائلة عليكم كلكم

اخواتى الحبيبات وحشتونىىىىىىىىىىىىىىىىىىى كتييييييييييييييييييييييييييير .. الحمد لله رجعت من عند حماتى انبارح ..اخيرا

 

وانا لقيت عضوات جديدات اهلا بيكوا نورتوا الموضوع يا حبايبى

 

اول شئ واجب اعتذار حار لحبيبتى ام دنيا اذا كنت قصرت فى السؤال عنها ..واحشانى جدا والله انتى وكل البنانيت الحلوين

ميار و noona298 و البت دموعة فجر و rime والصفاء و ساجدة للرحمن و sohandaو ام هبة 2 و انسيتم الجنة

zad1983 و ام مصعب2 و amatul_rahmaanو rafaa و غربة وحنين و الزهراء ونور 84

 

كلكم واحشنى اوى اوى ونرجع نتابع مع بعض تانى ..

 

شفتى بقه انا مبنساش حد ازاى وحشانى ووحشتنى اسئلتك يلا ارغى بقه ههههههههههههههههههه

 

حبيبتى ام دنيا

رجعتلنا وانهالت الاسئلة عليكي يالا ربنا يخليكي لينا

ربنا ميحرمنيش انا منكم والله انا بحس انى وسط اخواتى واحلى وقت هوه اللى بقضيه معاكم وربنا يديم المعروف

 

بالنسبة للى بيحصلك ده طبيعى جدا جدا

اوعى تخافى انا قبل مولد محمد كنتى تعالى اتفرجى عليا ..عياط 24 ساعة ..وشوية زهقانة وشوية خايفة وشوية عصبية ..ومكنتش بعمل حاجة نهائى فى البيت ومكنتش طايقة حد حتى زوجى واهلى ومكنتش برد على التليفونات حتى ..كل ده طبيعى ..ده فيه تغييرات فظيعة فى هرمونات الجسم فى الفترة دى لان الجسم بيستعد لعملية الولادة والحوض بيوسع والرحم بينزل تحت ومهرجانات جوه ولا احنا داريين سبحان الله

 

علشان كده كل اللخبطة دى حاصلة ..بس تعرفى بقه ..اول مهتحضنى النونو فى حضنك باذن الله هتنسى الدنيا باللى فيها والسعادة اللى هتملى قلبك فوق الوصف

بس خليكى هادية ودايما اذكرى الله واذا قصرتى شوية فى القرآن ولا حاجة معلش دى ظروف وهتمر باذن الله وجوزك هيستحملك يا ستى وهيسامحك اول ميشوف ولى العهد او ولية العهد هههههههههههههههه

 

واهل زوجك برضه هيقدروا وكله هيتنسى لما يشوفوا حفيدهم او حفيدتهم

 

وربنا يتملك على خير وتقومى بالسلامة انتى والنونو يارب

بس قوليلنا امتى المعاد باذن الله علشان نيجى ناكل السبوع

[*أم رقية* 473]

السلام عليكم ورحمه الله وبركاته

طمني ردك حبيبتي وياريت الكل يقدر

بس قوليلنا امتى المعاد باذن الله علشان نيجى ناكل السبوع

ان شاء الله هتكوني اول المدعوين

[مُحـبـَّة الصالحين 6]

السلام عليكم ورحمة الله وبركاته،،

حبيباتي كيفكن؟؟

يا رب دايما بخير و متجمعين على الخيرات

انا شايفة الاحداث وصلت لحااااااد الولادة؟؟ :laugh:

 

ربنا يتملك على خير يا ام دنيا و عقبال الكل يا رب :smile:

 

حبيبتي ام محمد كيفك؟؟ :wub:

 

انا بقى هرجع الشريط من الاول تاني و نرجع للخطوبة بقى :ninja:

 

في اخت انخطبت لشاب بتقول كانو بيحبو بعض من زمان جدا لكن بحكم الالتزام معملوش علاقة نهائي و الاخ اشتغل بقالو سنتين

و جه طلب ايدها على طول

لحد هنا القصة حلوة و عال العال

و كمان اهله ناس على قد حالهم و طيبين جدا

الاخت بتسال بتقول في اخوات بينصحوها و بيقولولها مترخصيش نفسك حتى لو انتِ متاكدة انه بيحبك و متتنازليش

لان الاخ مرتبه ضعيف يعني فهي مش عايزة تتثقل عليه

بس الاخوات بيقولو لا لازم تغلي نفسك

مع اني انا شخصيا مش من رايهم

مش النبي صلى الله عليه سلم قال اكثرهن بركة اقلهن مهورا او كما قال صلى الله عليه و سلم؟؟

 

يعني احنا هنسمع كلامهم و نسيب كلام سيد الخلق؟؟

بس هما بيقولو بقى ان الناس مش كلهم بيتعاملو بميزان الشرع

و ان حتى لو كان الاخ كريم و طيب اهله مسيرهم يييجي يوم و يسترخصوها لانها استرخصت نفسها

 

هي بقرة؟؟ :smile: :dry:

 

ما علينا

المهم هي فحيرة و انا معاها كمان يعني مش معقول الصدام اللي بين التقاليد و الشرع ده

انتِ رايك ايه يا ام محمد و الاخوات؟؟

افيدونا بارك الله فيكم

[om_mohamed 0]

حبيبتى ام دنيا ربنا يطمن قلبك ويقومك بالسلامة

 

بصى يا محبة يا حبيبة قلبى

انا هجبلك من الآخر زى مبيقولوا الواحدة مش لازم تسيب حقها بالكامل وفى نفس الوقت مش لازم تغالى فى طلباتها

انا مثلا لما تخطبت مرضيتش انه يجيبلى شبكة واكتفيت بالدبلة والخاتم بس لان الشبكات عندنا بصراحة بتقطم ظهر العريس ..وقلتله بدل الشبكة نوضب بيها حاجة فى الشقة بدل منوضب توضيب عادى نعمل شوية ديكورات وحاجات ..الراجل فرح وبالعكس اهله لسة شايلنهالى لحد دلوقتى وبيقولولى ربنا يصلح حالك زى مريحتى ابننا

 

بس فيه حاجات مينفعش العروسة تطنشها خالص ..يعنى العفش يكون معقول متجيبش عفش رخيص وشكله وحش لان ده هيحسسها بانها اقل من غيرها وبالتالى هتتخنق من جوزها لانه السبب فى ده كله بالمعقول بيبقى كويس

 

مثلا مش لازم فرح ضخم ..على الاد كده والفرحة فى القلب مش بالقاعات الضخمة ولا التكاليف الباهظة

 

بس الاجهزة المنزلية مثلا تخليه يجيبها ماركة كويسة وبلاش يسترخص علشان متخسرش بسرعة

 

فهمتينى ؟؟ انا اقصد انها توازن الامور ..الحاجات الشكلية ممكن تنطشها لكن فى اساسيات بيتها والتجهيز لازم تجيب حاجات كويسة

 

وبالعكس اهل الزوج لو هما ناس طيبين زى مبتقولى هيشيلولها دى جميل فى رقبتهم وربنا ييسر امرها يارب

[omjana 6]

ام محمد جزاكِ الله خيرا ويارب اعرف اعمل بالنصايح الجميلة دي بس مفيش حاجة تانية اخلطها بالترمس المطحون للجسم

 

؟

 

 

ان شاء الله هحجز واقولك المعاد بالظبط وتنورينا طبعا

[om_mohamed 0]

ازيك يا زيودة

انا معرفش غير الوصفة دى بصراحة واللى قالتلى عليها كوافيرة معرفة بس فى منتدى زينتك وجمالك اختنا ام ريتاج كاتبة وصفات تحفة للجسم والبشرة ادخلى وبصى بصة ونقى اللى يعجبك

وربنا يتمم بخير يا قمر

[om_mohamed 0]

تصدقوا يا بنات عملنا 200 رد لحد دلوقتى وبالمناسبة الحلوة دى ..دى هدية لاول عروسة هتتجوز فى موضوعنا ..يلا مين هتكون دى من حظها ؟؟؟

[ساجدة للرحمن 2050]

شفتى بقه انا مبنساش حد ازاى وحشانى ووحشتنى اسئلتك يلا ارغى بقه ههههههههههههههههههه

ماشي يا ستي براءه المره دي

أنا فتحت ليكي باب أودة الفران ,,,,,أصل أنا كنت دخلتك فيها معلش هههههه

بجد و حشتوني قوي عدى عليا كام يوم إنما أيه ...العيال كلها تعبت مره واحده و النت فصل في نفس الوقت بس الحمد لله هما أحسن دلوقتي

وأنا شايفه الأسئله عماله يا عيني نازله عليكي ترف بس انتي قدها و قدود

وكل الأخوات الجداد منورين كلهم

و يا رب يعينهم و يبارك فيهم