ارجوكم ساعدونى انا فى مشكله كبيره

[نسمه الايمان 1]

السلام عليكم ورحمة الله وبركاته،،

بسم الله الرحمن الرحيم

مرحبا باخواتى فى الله بجد كلكم وحشتونى بقالى كتير مقعدتش على الكمبيوتر نفسى بجدارجع تانى المهم ارجوكم افيدونى فى مشكلتى انامحتاره اوى بين قلبى وعقلى انا هحكيلكم وهستشيركم وارجوكم وجهونى واللى شايفونه صح اوعدكم هعمله لان اكيد فى امهات واخوات يكبرن سنا منى وعندهم خبره ومتزوجات ارجوكم افيدونى

انا عندى 20 سنه ومنتقبه ومكتوب كتابى بقالى سنه واربع شهورالمهم انا انعقد قرانى على طول من غير فتره خطوبه من غير طبعا معاشره اهله ومعرفه طبايهم او هو ولو فتره قليله على الاقل ولكن اتسرعنا عشان نقابى وامى ايضا وابى كان قرب يسافر فتسرعنا المهم اول فتره فى كتب الكتاب كانت كلها مشاكل لان طبايعه كانت غيرى خالص وخاصة فى الدين وكانت حلفناته كتيير عاليا يعنى هو لومش عاوزنى اعمل حاجه يحلف عليا بالطلاق المهم بدء يتغير واحده واحده وانا حبيته فكنت مستسلمه لارائه اى كانت ايه هى وكنت بدخله فى كل شى فى حياتى ومرت السنه على كده وطبعااشهدله انه اتغير دينيا يعنى بدء يلتزم المهم بابا نزل من فتره فى العيدالكبير اجازه فافوجىء بعدم زياره احد من اهله ليسلموا عليه ولا حتى انافى العيدالمفروض انهم يتصلوا بيا على الاقل كعروسه ابنهم وطبعا مفيش موسم زى كل مره وطبعا بابا اتنرفز منهم ومن قله زوقهم واللى نرفزه اكتر ان خطيبي معملش اى حاجه فى الشقه وكمان مشتغلش راح بابا قالى فكرى انك تستمرى او لا وانتى حره المهم محمد حس انى خلاص هسيبه وقولتله بلى بابا قاله فجاه لقيت ودامى شخص اخرواحد اول مره اشوفه اعد يترجانى انى مسبهوش وانه هيتغير عشانى وانى مش هندم ولا لحظه لو استمريت معاه وهيدينى اللى انا عوزاه المهم اعد يحاول انى اديله فرصه تانى وقولت لبابا بابا قالى انتى حره بس تعتبر الفتره اللى جايه فتره خطوبه ومفيش خروج خالص زى الاول ويجى يجلس فى الصالون زيه زى اى ضيف لحد مانشوف اخرته ايه وبلفعل اديتله فرصه تانيه وفعلا اتغير معايافى معاملته ليا وبدء يحسنى انى اروح دروس شرعيه وانى اهتم بدينى و اشتغل وبدء شغل فى الشقه بس ده من ناحيه قلبى

 

 

واما من ناحيه عقلى ماما عماله تزن عاليا وكل من حواليا ان اسيب محمد لان مش هينفعنى بعد كده ومش هيقدر يصرف عاليا وهيرجع لطبعه الاول وغير كده ان فى واحد من ناحيه ماما مستوى وقبطان وعيله ومستعد يتجوزنى النهارده قبل بكره لانه بيحبنى اوى وامى بتقولى فكرى بعقلك وفكرى فى بكره وفى المسقبل وعيالك ، خطيبي مستواهم قليل وكمان هعيش فى بيئه ريفيه بعض الشىء وكمان مستواه التعليمى اقل منى وكل الكلام ده بسمعه كل يوم وطبعا فى الاخر انتى حره اللى بيشيل اربه مخرومه ؟؟/واللى بياكل على درسه!!!!!وطبعا امثال اول مره اسمعها بس خطيبي بجد ممكن يضيع من غيرى وكمان هو بدء يلتزم وبيحبنى اوى هى ماما بتحبه كمان بس شايفه انه مش هيعيشنى زى بنات خالتى ومش مستوى انا مش عارفه استمر مع محمد وهو اتغير وبيتمنالى الرضا ارضا وربنا هيكرمنا مع بعض ولا امشى ورا عقلى واتجوز اللى هيقدر يعيشنى ماديا ومستوى انا عارفه ان المستقبل بايد ربنا بس بجد محتاره وعاوزه اخد واقفه مع نفسى وصليت استخاره بس لسه محتاره خطيبي لو انا مستحملتهوش مين اللى هيستحمله وذنبه ايه ان ظروفه كده او هله كده وفى نفس الوقت انا نفسى اعيش مرتاحه زى اى بنت

 

 

ارجوكم افيدونى امشى وراء عقلى ام قلبى

 

 

واللى انتم هتوجهونى اليه اعودكم انى هعمله بجد

 

بجد انا مستنيه ردكم

ارجوكم ادعولى

اختكم نسمه

[سُميّــة 0]

وعليكم السلام ورحمة الله وبركاته

 

أهـــلا ومـــرحبا حبيبتى نسمة

 

الله يكرمك ويبارك فيكِ

 

منوورة بإذن الله

 

عـــودا حـــميدا

 

انا لسه بنوته شويه يعنى مش من الامهات

 

بس انا عايزة اقولك

 

متبصيش من ناحية الحالة المادية

 

بصى من ناحية الخلق والدين

 

وربنا سبحانه وتعالى هو الرزاق

 

وكمان ممكن تتزوجى واحد غنى ومتبقيش سعيدة معاه

 

وممكن تتزوجى واحد متوسط الحال وتعيشوا سعداء طالما انتوا على طاعه الله

 

فانتى تشوفى هو ملتزم بجد ولا ايه

 

وقررى

 

طيب انا هكتبلك حاجة من كتاب فقه السنة

 

( وعلى الولى أن يختار لكريمته فلا يزوجها إلا لمن له دين وخلق وشرف وحسن سمت فإن عاشرها عاشرها بمعروف وإن سرحها سرحها بإحسان .

 

قال رجل للحسن بن على : إنى لى بنتاَ فمن ترى أن ازوجها له ؟

قال : زوجها لمن يتقى الله فإن احبها اكرمها وإن ابغضها لم يظلمها .

 

قالت عائشة رضى الله عنها : النكاح رق فلينظر أحدكم أين يضع كريمته .

 

أحبكِ فى الله يا نسومة

 

ربنا ييسر لك الحال

وفقكِ الله لما فيه الخير

حفظكِ الله من كل سوء

[ناهد ابو النور 0]

السلام عليكم ورحمة الله وبركاته،،

 

والله يا اختى سميه انتى قلتى الى اناكنت هقوله بارك الله فيكى . :dry:

[نسمه الايمان 1]

السلام عليكم ورحمة الله وبركاته،،

ارجوكم انا محتجالكم اوى ارجوكم عملا بقوله <وامركم شورى بينكم>ارجوكم افيدونى ياخوات انا استخرت الله وقولت اشاوركم ارجوكم لا تبخلوا على

جزاكى الله خيرا اختى فى الله سميه واختى ناهد وجمعنى الله بكم فى الجنه

[كفى بالموت واعظا 0]

اختى الكريمة انا صاحبة المشكلة المعروضة ساعدومى ارجوكم اقرايها ممكن تستفيدى

ولكن راى انك اصبر شويه وزى ما قال والدك كانك مخطوبه لان العريس لما يخرج ويدخل معها بيستسهل ولا يسرع وكمان هتعرفى هو فعلا اتغير ولا لا

[كفى بالموت واعظا 0]

حبيبتى اكملك فى مثل بيقول خدى اللى يحبك ومتخديش اللى تحبيه وطالما الراجل حب يكون اسهل كتيييير ولكن لا تتنازلى عن شيىء وكل شويه شوفى اخر التطورات وسيبك خالص من العريس الجديد لانه ممكن بعد الفسخ العقد لا يتجوزك اصلا وممكن يكون شكاك وينكد عليكى على طول من شكه وخاصة انك كنتى عاقدة قبل كدة وبتخرجى مع خطيبك

فخليكى مع زوجك الحالى ولكن حاولى معاه واتفقوا على ورد مثلاوطاعة مثلا وهكذا ونصيحة لو كان بيحبك هيعمل المستحيل عشانك لكن الثانى ممكن يوم يعيرك ويقولك انتى سيبتى خطيبك عشانى وووووووكتير من هذا القبيل

اتمنى انى اكون فتحت لكى ابواب للتفكير

[نسمه الايمان 1]

جزاكى الله خيرا

[الامانة 1]

السلام عليكم ورحمة الله وبركاته،،

اكييييييد ها رد عليكى دة حق الاخوة وحق بنات البلد بس انا هاكتفى بانى ادعيلك النهاردة وبكرة هاقولك ردى ربنا ييسر لكى امرك اللهم اميييييييين

[نسمه الايمان 1]

جزاك الله خيرا

[الامانة 1]

السلام عليكم ورحمة الله وبركاته،،

أختى الحبيبة روان انتى بتقولى انك بتحبية وهو كمان بيحبك ومستعد يعمل أى شيئ علشان يرضيكى ، هل هذا كلام فقط ام فعل ،إذا كان كلام فقط فعليك اخذ القرار اما يتقدم بافعال تدل على حبة لكى ، واما اذا كانت افعال يعنى بجد وفعليا بدء يتغير فاصبري علية الى ان ترى هل هو هايفضل على كدة ولا اية ، وذى ما قالت اختى روان لاتتنزلى عن اى شيئ انتى حاسة انة مهم وعدم وجودة هايسبب مشاكل لانك مش هاتقدرى تستمرى فى الحيا وكلها تنازلات ،يعنى يا اختى اذا انتى فعلا شايفة ان دة هو اللى هاتقدرى تتعايشى معاة طول العمر وهو كدة وخلى باك حطى فى اعتبارك ان ممكن يرجع ذى الاول لان الطبع بيغلب الططبع فاستمرى ،

وكانت حلفناته كتيير عاليا يعنى هو لومش عاوزنى اعمل حاجه يحلف عليا بالطلاق

خلى بالك لو ما بطلش الحلفان فا هاتكون حياتك اختيارية اجبارية يعنى يكون قدامك الشيئ ومجبرة انك تعملى اللى هو عايزة يا كدة يا الطلاق ودة ما ينفعش، اصبري علية وشوفى علشان ما تحسيش بالذنب لو انفصلتى عنة دلوقتى وتكونى ادتية فرصة ، كل اعترضى على اختلاف التدين والطباع وليس على المادة لان دة شيئ بأيد ربنا وربك الرزاق اهم شيئ الاخق والدين هم اساس الحيا بجانب المادة لانك مش تقدرى تعيشى من غيرهم فى وجود المادة
وفقك الله لما يحب ويرضي

[بنت عاديه 0]

السلام عليكم ورحمه الله وبركاته

انا كنت عايزه اعلق علي حاجتين :

اولا..فيه ناس كتير بيضغطوا علي بناتهم عشان يتجوزوا اللي هما عايزينه.....انا اعرف واحده اتقدملها واحد واهلها رفضوه رفض تام لانهم اعتقدوا انه فيه فرق كبير بينها وبينه في التدين.....هو كان خطيب في مسجد وهي بنت من الناس العاديه(متوسطه التدين)........وطبعا هي مغلوبه علي امرها وعلي الرغم من ذلك استخارت ربنا وفعلا ربنا اراد ان اهلها يوافقوا فجاءه بالزواج وفعلا تم العقد.........وما شاء الله عليها دلوقتي سعيده معاه وربنا هداها علي ايده

ثانيا..مش ممكن هو ميرضاش يطلقها لو هي صممت علي الطلاق .........ساعتها ايه العمل؟؟؟!

انا بصراحها ارأي انها تديله فرصه تانيه يمكن ربنا يهديه علي ايديها .......وانها تبعد عن كلام اهلها......مش كل حاجه فلوس وماديات الفلوس ممكن في لحظه تروح كلها.......ساعتها مش هيبقي غير حسن العشير

معلش طولت عليكوا

ربنا معاكي اختي نسمه ويسدد خطاكي

[خير أمة 6]

السلام عليكم و رحمة الله و بركاته

 

اختنا الفاضلة صاحبة المشكلة

 

بدايةً أين أنت من الإستخارة إن شاء الله تكونى بتستخيرى على طول

أختى أرى انك تسرعتى فى عقد زواجك من هذا الشاب

تقولين إنك منتقبة طيب الشاب اللى تقدملك هل هو علىى قدر مستواك الدينى؟ و لا لأ

الناس دايماً فاكرة انه بالخلق بس

لكن إنت منتقبة و منتهجة منهج معين فى دينك مهما يا أختى حاولتى تغيرى الرجل الرجل هو الرجل

ممكن بيكون بيتغير أمامك بس

مافكرتيش فى الأمر ده قبل كدة

و انه ممكن يعود مثل الأول بعد الزواج

لازم تكون توبة نصوحة فى بداية الطريق

لكن بدأ يلتزم و بدأ و بدأ

لازم يكون فى خطوة فعلية إن أصبح منهجكم واحد فى الدين و أكيد انت عارفة المنهج الواحد الفكر الواحد فى الدين اللى هو إتباع القرآن و السنة فقط

يعنى ممكن يكون فى فرح و هو عايز يروح و انت مش عايزة تروحى عشان مختلط و ناهيك عن ممكن يكون فى اختلاطات اسرية

هو ممكن يكون فى بداية الإلتزام و انت متقدمة عنه هو شايف حاجة و انت شايفة حاجة تانية عشان انت بيحكمك دينك

أختى انظرى أولاً و آخراً لراحتك من الناحية الدينية هنكون مرتاحين عشان فكرنا واحد و لا لأ

قلتى ان والدتك بتقولك على واحد ميسور الحال و بكدة نكون رجعنا لنفس الموضوع مرة تانية

اختى استخيرى المولى عز وجل و ادعي كتير ربنا يرزقك الزوج الصالح

ربنا يكرمك و ييسر لك أمرك

و حاولى تعجلى بأخذ قرار قبل ما تزداد عواطفك أكثر ناحية هذا الشاب و قبل ما تأخذى خطوة تكون الظروف فيها تعقدت أكثر و هى الزواج

لإن مجرد ما جاء الأبناء يصعب الإنفصال أكثر و أكثر

شوفى هل انت مرتاحة حياتياً معاه و لا لأ فكركم الدينى واحد و لا لأ

و ربنا ييسرلك

[omhabibi 0]

السلام عليكمورحمة الله

 

كيف حالك حبيبتى نسمة؟

 

يارب تكونى بخير

 

بالنسبة لمشكلتك حبيبتى (انا لسة مش متجوزة لكن كتير حليت مع صحباتى مشاكل مشابهة)

 

اولا اسالك بعض الاسئلة:

 

1:اية اخباره مع والدك واهلك ؟ ممكن اوى بد الزواج يمنعك منهم

2:ملتزم وى بجد ولاتصنع؟(كان ملتزم من زمان ولا التزامه جديد.

3:بدا يشتغل فعلا ولا بيهدى الجو؟(بيسايس امورهيعنى)

4:هل تحسى بصدق مشاعره من ناحيتك؟

5:هتسكنى مع امه فى نفس امنزل؟

 

حبيبتى ردى عليكى على حسب المعلومات المتاحة

طبعا طالما هو ملتزم وبيحاول يجتهد انه يخلص الشقةوبيامرك بالمعروف لكن مشكلته بس المادة فلا تدعيه يواجه امواج الحياة بمفرده بل كونى معه بالتشجيع والمواساة والمساندة لانه زى كل شاب اكتر حاجة تجرحه المادة-والله هو الرازق-وكما الت لك احدى الاخوات ممكن يبقى غنى ويضيعك وممكن يبقى على قده ويحافظ عليكى هو دلوقتى زوجك لاتفكرى فى غيره بل كل تفكيرك ازاى تغيريه وتعملى منه اللى تتمنيهنسيت اقولك حبيبتى لازم ينسى موضوع الحلفان ده لانه بيعيش الواحدة فى قلق مستمر

 

مهم جدا تردى على اسالتى ولى عودة باذن الله

 

لاتنسى صلاة الاستخارة وكثرة الاستغفار

 

اختك (ام حبيب)

[Dam3etAmal 0]

السلام عليكم ورحمة الله وبركاته

اختى الحبيبة نسمة أسأل الله أن يعينك على حسن الاختيار ، ولكنى أريد ان أعرف منكى

اولا: هل خطيبك لا يعمل حتى الان ؟ ومن أين ينوى أن يصرف على بيته بعد الزواج؟

ثانيا:هل لا يزال يحلف عليك بالطلاق فى كل صغيرة وكبيرة؟لانه ان استمر على ذلك فقد يكون هذا من طباعه مثل كثير من الرجال وكم سمعنا من بيوت انهارت بسبب تلك الصفة الذميمة.

ثالثا:و لى سؤال اخير لا يستطيع غيرك ان يجيبب عليه هل ترى خطيبك هذا عندك افضل من اى شخص اخر مهما كان اقل من غيره علميا او ماديا او اجتماعيا؟

اعلم انه صعبا ان تحمل الاسرة القرار لابنتها بقول " انت المسؤلة عن اختيارك ده ومترجعيش بعدها تندمى عليه وتشتكى" لانك وقتها ستسألين نفسك هل هو فعلا يستحق منى ذلك ولن يخذلنى ولهذا يجب عليك ان تستخيرى المولى عز وجل وتحكمى عقلك ولكن لا تهتمى الان بمن تقدم لكى وان كان مستقبله افضل ولكن حاولى ان تحسمى موقفك مع خطيبك بعيدا عن الثانى اى دون ان تستبدليه بشخص اخر ولكن اجعلى قرارك هذا وان كان بالإنفصال يكون ناتجا على حكمك عليه كشخص دون مؤثرات خارجية من حولك وانا مع الاخوات فاصبرى عليه واجعلى الفترة القادمة فترة اختبار له وأسأل الله العلى القدير ان ينير بصيرتك ويصرف عنك الشر ويعجل لكى بكل خير..

[ايمان راجية الجنة 0]

السلام عليكم ورحمة الله وبركاتهأ

انا جديدة معكم ولكن اسمحيلي من تجربتي الحب والراحة النفسية مع الخطيب او الزوج أهم بكثير من الأمور المادية

 

فكم من فتاة تزوجت انسان مرتاح ماديا ولم تجد معه الحب والراحة النفسية والانسجام الكافي فانفصلا

 

استخيري فالله يختار لنا الأفضل دائما

[أم منو نه 8]

أختى الغالية

أود أن ألفت انتباهك إلى عدة أمور الأخوات الكريمات ذكرن بعضها

1-الإستخارة قبل أى تصرف أو قرار

2- كما فعلت قللى الإحتكاك بزوجك إلى أن تستقرى على قرار حتى لا تتعقد الأمور

3- أهم شىء دينه والتزامه وخلقه ولا تأخذى من هو أقل منك فى الإلتزام غالبا بعد الزفاف كلام الرجل هو الذى ينفذ ،خذى من يأخذ بيدك إلى الطاعة

4- الأهل مهمين جداً جداً ،على الأقل يكونوا على خلق طيب إن لم يكونوا ملتزمين لأن أهل الزوج لهم أثر فى حياتك بشكل كبير ،ومن بعد ذلك أبنائك .

5- ممكن التغاضى عن بعض الفروقات الإجتماعية البسيطة والمادية إذا توافرت النقاط السابقة

6-أكثرى من الدعاء أن يرزقك الله الحكمة والقرار الصائب وأكثرى من الإستغفار

مع دعائى لك بالتوفيق فى حياتك وأن يلهمك الله القار السديد

[نسمه الايمان 1]

بسم الله الرحمن الرحيم

 

اولا اسالك بعض الاسئلة:

 

1:اية اخباره مع والدك واهلك ؟ ممكن اوى بد الزواج يمنعك منهم

2:ملتزم وى بجد ولاتصنع؟(كان ملتزم من زمان ولا التزامه جديد.

3:بدا يشتغل فعلا ولا بيهدى الجو؟(بيسايس امورهيعنى)

4:هل تحسى بصدق مشاعره من ناحيتك؟

5:هتسكنى مع امه فى نفس امنزل؟

 

ارد على اسئلتك وجزاكى الله خيرا على اهتمامك بى وايضاجميع الاخوات

اولا:هو خدوم جدا لاهلى وكويس جدا امامهم بس بينى وبينه كثير النقد عليهم لتصرفاتهم الغير لائقه معه وهذا من وجهه نظره

ثانيا:هو بدا بجد يلتزم فى اشياء كتير

ثالثا:لا بدء يشتغل وبيدور على فتره تانيه

الرابعه:اه بجد بحس انه بيحبنى وبيحاول دلوقتى انه ميزعلنيش غير الاول خالص

خامسا:اها فى نفس العماره يعنى هى فى شقه وانا فى شقه

جزاكم جميعا خيرا على اهتمامكم بى جعله الله فى ميزان حسنكم

[emy20007 0]

حبيبتى ماشاء الله البنات قالوا اراء اجمل من بعض

 

انا بصراحه افضل القلب اكيد مع الدين والاخلاق

 

لان بالحب هتقدروا توجهوا اى مشكله او اى صعب فى حياتكم وخلى بالك ان ده هتعيش معاه طول العمر مش يوم اوشهر يعنى لازم يكون فى حب لما الحياة مش هتكون حلوه وانتى مش هتكونى مبسوطه حتى لو عنده فلوس ايه

 

ربنا يوفقك وتكون حياتك كلها حب وسعادة

[قلب ينبض بحب الله ورسوله 1]

السلام عليكم ورحمة الله وبركاته،،

 

 

 

أختي عاامله إيه دلوقتي ربنا يهديكي للصواب

 

أختي ممكم أسألك سؤال واتحمليني مااعليش

 

لو ماكانش قريبكم الغني ده عايز يتقدملك كنتي هتفكري تسيبي خطيبك؟

 

أختي لو عايزة تسيبي خطيبك ومن جواكي مش مقتنعه بيه صدقيني سيبيه من دلوقتي أحسن ما تتبي بعدين

 

بدون أي تأثير تاني

 

ومش عشان شخص تاني

 

سيبيه عشانك لأانه هو االشخص اللي هتكملي معاه عمرك كله

 

وباالنسبه لكلامهم خدي اللي بيحبك والحاجات دي

 

من رأيي وعن تجربه غلط

 

لأنه هو كمان من حقه إنك تحبيه

 

ولو ما حبيتيه هتعيشي تعبانه

 

بلنسبه لخطيبك

 

يابنتي سيبك من كل الكلام اللي بيتقال

 

وركزي مع نفسك

 

ياترى هو اتغير بجد ولا بس قدامك

 

صدقيني فيه تصرفات صغيره بتخرج تلقائي هتقدري تعرفي منها هو بجد اتغير ولا بيمثل

 

ولو سبتيه مش عشان قريبك

 

يمكن ما ترتاحيش معاه هو كماان

 

ركزي

 

وصدقيني ممكن الواحده تكون عايشه مرتاحه مادياً وكل اللي حواليها بيحسدوها لكن هي من جواها مش فرحانه

 

 

المهم الشخص اللي هتفضلي معاه العمر كله بعيوبه ومميزاته

 

وأهلك مش هيفضلوا معاكي على طول

 

هتفضلي انتي وهو وحياتكم طوووووول العمر

 

 

صلي يا حبيبتي استخارة كتيييييييييييييييييير

 

 

وإن شاء الله خير

 

وطمنينا عليكي

[حارسة الاسلام 0]

السلام عليكم ورحمة الله وبركاته،،

أسعدك الله أختى فى الدارين فى الدنيا والاخرة

صراحة أنا رأيى انك تستخيري.الله....فالله أعلم بالأحوال

فأنتى لاتعلمين بعد الزواج هل سيبقى كما هو....فالانسان لايبقى على حاله

 

يعنى انتى استخيرى ولاتنتظرى أى رؤية

خلاص اذا فيه خير لالك ربنا راح يكمل ويوفق بينكم.......واذا مافى خير ربنا راح يفرق بينكم

يعنى ما الك الا الله......فهو علام الغيوب

[الامانة 1]

السلام عليكم ورحمة الله وبركاته،،

طمنينا عليكى عملتى اية والله الموفق

[نسمه الايمان 1]

انا توكلت على الله وهديله فرصه تانيه وهنسى اى شخص تانى الان والاهم من كده انه بدء يلتزم فانا هستمر لحد ماشوف ايه اللى ربنا كاتبولى والله المستعان

ولا ايه رايكم ياخواااااااااااااااتى

[الامانة 1]

السلام عليكم ورحمة الله وبركاته،،

انا رأيى كدة ايضاً فمن الاحسن انك تديلة فرصة علشان لو ربنا هداة يبقى خير ومتندميش انك سبتية
وفقك الله لما يحب ويرضيييييييييي

[ام احمد المصرية 0]

السلام عليكم ورحمة الله وبركاته،،

اختي في الله نسمة

انا رايي ان لو كان زوجك فعلا تغير تغيير جاد وداخلي

وانه فعلا ملتزم وعل خلق الاسلام ويطبق شرع الله في معاملاته ويتقي الله فيكي بجد

وكل التغيير ده بسببك فلا تفرطي فيه اكيد حتى لو امكانياته محدوده

ممكن مع الصبر والايمان بالله وحكمته في توزيع الارزاق

ومكافحتك معه انتي واهلك يبقى حاجة تانيه ويعيشك في المستوى اللي اي بنت

تحب تعيش فيه ونصيحه مني متبصيش لحد زي بنت خالتك كل واحده

بتاخد نصيبها والله الموفق اوعي تخلي كلام والديك يغيرك من نحيته لو كان

فعلا بيحبك وبتحبيه ومستعد يعمل اي حاجه عشان تفضلي معاه

اوعي تكسري قلبه وقلبك عشان الماديات ممكن لو سبتيه تندمي جدا

ولو تزوجتي التاني عشان الماده ممكن تزول منه وخاصة لو مش ملتزم

خليكي مع زوجك وساعديه انتي واهلك مش عيب ومش ذنبه ان

امكانياته محدوده اصبري عليه مش مشكله لما تتعبي في اول حياتك شويه

واجرك عند الله كبير لا تضحي به من اجل الماده

والفتره اللى انته عرفتيه فيها كبيرة كافيه

انك تشوفيه من كل الجوانب تمسكي بيه لو كان ملتزم فعلا

واهله بعد كده هيبقي بينكم زيارات وكل واحد في حياته

وربنا يبارك فيكما ولكما ويجمع بينكما في الخير

[نسمه الايمان 1]

جزاكن الله خيرا

والله المستعان

بس ارجوكم ادعولنااااااااااااااااااا

بلهدايا ويجعلناالله للمتقين اماما وثبت قلوبنا على الايمان ولايزغ قلبه ولا قلبى بعد اذ هدينا

اللهم امين

 

 

ارجووووووووووووووكم ادعوله بتوسيع رزقه

 

 

 

اللهم امين

 

معلش انا عارفه انى تقلت عليكم بس انتم اخواتى ومليش غيركم بعد ربنا

ربنا مايحرمنى منكم