22 رد (ردود) على هذا الموضوع

[أم ريتاج]

السلام عليكم و رحمة الله و بركاته

اخواتى حبيباتى

كلنا اكيد فاكرين ان كفتة الحاتي لها صنعه مختلفة و صعبه علينا

انا برضوه كنت فاكرة كده

لكن ضحكت على نفسي كتير بعد ما عرفت انها سهلة للدرجة ديه     

يالا ناكل.................... لألألألألألألألألألألألأ قصدى يالا نعملها
بصى و خالى بالك لحسن مقاديرها كتتتتتتتتتتتتتتتتتتتتتتيييييييييييييييييييييير قوىىىىىىىىىىىىىى

بصى يا ستى

1- هاتي كيلو الا ربع لحمة كندوز مفرومة لو جبتيها صحيحة افرميها في المفرمة وشين ( معلش اصل ديه لغة الجزار و من ثم لغة الحاتي )  يعنى مرتين

ماشي

2 - هاتى ربع كيلو ليه ضاني ( اللى هى بتاعة الخروف )  و افرميه مع اللحمة

3- هاتى بصل وافرميه او ابشرية ناعم بالمبشرة بس مش هنحطه لآ هنعصره و نأخد الميه بتاعته بس

4- هاتى ملح و فلفل اسود و بهارات و الاحسن تحطى

بهارات السبع توابل

و هقولكم بتتعمل ازاى البهارات ديه بس فى الاخر

5- حطى بقا اللحمة المفرومة هي و الليه على مية البصل و البهارات و الملح و الفلفل و سيبيها تتبل مع بعضها شوية حلوين

6- بعد كده هاتى الاسياخ بتاعك و صبعى الكفته و اشويها على الفحم ( اهههههههه يا حبيبي عليها امممممممممممممممممممممم ) أو صبعيها على قلم " بس مش تجيبى اللحمة عند سن القلم طبعا " و اشويها فى الفرن و فى الاخر هاتى حتة فحمه و ولعيها و بعد ما الكفته تستوى حطى الفحمة في السمن اللى نزل من اللحمة هتبقى عاملة زى المشوية على الفحم و تاخد ريحة الفحم
بس طبعا اللى تشوي على الفحم احسن

7- بعد ماتستوى حطيها في طبق مفروش ( مش ايجار ههههههههه ) بالبقدونس

و بالهنا و الشفا
لا تنسونا من صالح دعواتكن

اه نسيت اكتبي يا ستى ال 7 توابل هما ممكن يكونوا اكتر شوية بس هو اسمهم كده

هاتى كل حاجة من اللى هكتبها بكميات متساوية
- كسبرة ناشفة
- قرنفل
- قرفة ( يمكن الاستغناء عنها )
- كبابه صيني
- زعتر
- حبهان
- كمون
- ورق لورو
- جوز الطيب
- فلفل أسود

هاتى كميات متساوية منهم و يا سلام لو تجيبيها صحيحة مش مفرومة من عند العطار و تحمصيها الاول شوية على النار
و بعدين تحطيهم كلهم على بعض فى الكبه و تطحنيهم
على فكرة بنحطها على حاجات كتير يعنى مثلا اي حاجة مشوية بنحطها عليها فراخ لحمة اى حاجة
و كمان تتبيلة البانية و تتبيلة فراخ الكنتاكي و ممكن اى حاجة هنقليها بالبقسماط المفروم أو الدقيق نحط منها شوية على البقسماط و الدقيق دول بتبقى روعة

يالا بقا طولت عليكم

استودعكن الله

السلام عليكم و رحمة الله و بركاته

[أم اليسر]

ماشاء الله عليكِ أم ريتاج
دي وصفة سهلة.....وصفة هايلة
هنعملها ونجرب

[بنت الصادق]

جزاكي الله خيرا اختي الحبيبة على الوصفة الرائعة.. بس انا لية إضافة

الحقيقة انا نفس الطريقة دي كنت بعمل بيها الكفتة بتاعتي مع إضافتين اتنين عشان بس الكفتة تمسك نفسها، لأنك لو عملتيها بالطريقة دي وجيتي تصبعيها هتفك مني .. وسدئيني انا مجربة كل دة لحد ما نجحت في عملها

عشان الكفتة تبأة ماسكة نفسها.. اكسري عليها بيضة نية وقلبيها كويس، وبعدين هاتي رغيف فينو.. (فرنساوي) بلي واعصريه كويس من المية، وبعدين حطيه على الكفتة واعجني بإيديكي لحد ما كل المقادير تختلط ببعضها..

لما تيجي تصبعيها عالقلم هتلائيها ماسكة نفسها كويس، وكمان طعم العيش مش هيبان بعد كدة في الكفتة

وفي كمان إضافة هضيفها للي عيزة تعملها.. هي أكلة اسمها عندنا هنا في الكويت خشخاش. الأكلة دي إيرانية وهي عبارة عن كفتة مشوية وتحتها طماطم مشوية مهروسة ومعجونة بالبقدونس.. الحقيقة طعمها مش ممكن بجد روعـــــــــــــــــــــــــة

انتي ممكن تشوي طماطم وبعد ما تتشوي تهرسيها بالشوكة وتحطي عليها بقدونس مفروم وبعدين تقلبيهم مع بعض.. وترصي فوقيها صوابع الكفتة

يا الله.. بجد الطعم عجيب وهيعجبك اوي... وكمان حاجة جديدة متعملتش ابل كدة :)

[لواء العزة]

السلام عليكم ورحمة الله وبركاته،،
بارك الله فيكِ حبيبتي
ام ريتاج
على الوصفة الرائعة
وبارك الله فيكِ حبيبتي
بنت الصادق
على الاضافة الرائعة أيضاً

[أم ريتاج]

السلام عليكم و رحمة الله و بركاته
غاليتى بنت الصادق
جزاكى الله خيرا حبيبتى على الوصفة الكويتية الخاصة بالطماطم و البقدونس هي شكلها حلو ان شاء الله اعملها و اجربها مع الكفته
و برضوة بالنسبة اننا نحط  بيضه او رغيف فينو مبلول ديه فكرة كويسة و كنت بعملها الأول
لكن تنفتكرى الحاتى بيجط بيض او فينو
عايزة اقولك ان السبب فى فك الكفته هو مرحلة الفرم عشان كده قولت اننا بنجيب اللحمة المفرومة الجاهزة من عند الجزار و هي عادتين بتبقى مفرومة  ( وشين ) يعنى مرتين ثم بحط عليها الليه و افرمها مرة كمان مع بعض يعنى بتبقى مفرومة 3 مرات
و ده برضوه بيطبق على اللحمة الصحيحة لو جبتيها بالبيت تفرميها مرتين الاول لوحدها و المرة الثالثة مع اللية
و الطريقة ديه من واحد حاتى و شفته و هو بيعملها من الاول للأخر
بس لو لا قدر الله برضوه و الكفته صممت على رأيها بعد كل ده و مش عايزة تمسك معاكي ابقى بقا حطى لها رغيف فينو او بيضة يمكن يخلوا الكفتة تغير رأيها
بس و انتى بتعمليها سمى بالرحمن
استودعك الله

تم التعديل بواسطة أم ريتاج, 05 August 2007 - 01:45 PM.

[بنت الصادق]

الحبيبة ام ريتاج

لا اعتقد ان الحاتي لو حط عليها عيش هيقولك، انا اسمع اصلا ان الكفتة الي بناكلها منه بيضيفلها عيش كتير، والي ضميرهم صاحي قليلين اوي.. عموما جايز فعلا يكون عندك حق، انا هجرب ان شاء الله الطريقة دي وابأة اقولك

عزيزتي مروة تركي
وجزاكي الله خيرا، اسعدك الله في الدارين :)

[أم ريتاج]

بنت الصادق, في Aug 6 2007, 09:00 AM, كتب:

الحبيبة ام ريتاج

لا اعتقد ان الحاتي لو حط عليها عيش هيقولك، انا اسمع اصلا ان الكفتة الي بناكلها منه بيضيفلها عيش كتير، والي ضميرهم صاحي قليلين اوي.. عموما جايز فعلا يكون عندك حق، انا هجرب ان شاء الله الطريقة دي وابأة اقولك

السلام عليكم و رحمة الله و بركاته
اخيتى بنت الصادق
انى احبك فى الله
استودعك الله

[لواء العزة]

السلام عليكم ورحمة الله وبركاته،،

حلوه المناقشة  دي ^_^
كملوا لعلنا نستفيد
بس على فكرة انا سمعت بموضوع رغيف الفينو
وعموما  الفكرتين ان شاء الله حلوين طالما مجربين
وكمان هاقولكم على شيء انا كنت الاول بضع البصل مفروم ناعم
مش عصير البصل وعلشان كده ممكن تكون من اسباب تفككها  البصل المفروم

ربنا يبارك فيكم ويطعمكم من ثمار الجنة حبيباتي

[طالبة العفو والغفران]

السلام عليكم ورحمة الله وبركاته،،
موضوع رائع تسلموا يا غالين
مناقشة حلوة احنا المستفدين من وراها كتير
ربنا يبارك فيكم ويطعمنا جميعا من ثمار الفردوس الاعلى
اللهم امييييييييييييييييييييييييييييييييييييييييييييييييييييييين

[وفاء سالم]

ريقنا جرى الله يسامحكو أم ريتاج ايه الحلاوة دى ابداع فى الوصف انا فتحت بقى وانا بقرأ الوصفة  
والله عليكى بنت الصادق مداخلتك مفيدة خصوصا الطماطم المشوية مع البقدونس هاجربها  باين عليها حلوة ا
الله الله هادور فى الاكلات التانية يمكن الاقى منافسة مفيدة كدة اطلع منها بجديد احبكن فى الله أخواتى .

[ام عمر 2003]

جميل وجزاكم الله خيرا بس ازاي اعمل عصير البصل

[أم ريتاج]

ام عمر 2003, في Nov 16 2007, 06:47 PM, كتب:

جميل وجزاكم الله خيرا بس ازاي اعمل عصير البصل

السلام عليكم و رحمة الله و بركاته

ده انت اللى جميل يا عسل

شوفى يا ام عمرمر

انتى بتجيبى البصل و تبشريه و بعدين تمسكيه بايديك و تتضغطى عليه ( تعصريه) لحد ما ينزل الميه بتاعته

بتاخدى الميه ( عصير البصل) و ترمى الباقى او ممكن تحطيه على حاجة تانية بدل ما ترميه

بس

[ايا نفس اصبرى فالموعد الجنة]

طبعا وصفات ام ريتاج حبيبتى
بقالى كتير مشفتش ليكى مواضيع وحشتينى جداااااااااااااااااااااا
فانى احبك فى الله والاخت ج جهاد
وحشتونى انتم الاثنين
انت مش عسل بس داه انتم عسل وسكر وقمر وكل حاجة حلوة
وجزاكم الله خيرا خصوصا على الوصفات المثبتة

[ناهد ابو النور]

السلام عليكم هذة الطريقة جميلة جدا ولكن عندى طريقة سهلة جدا.
المقادير
1كيلو لحم مفروم-بقدونس-5بصلات-ملح-فلفل اسود-بهارات لحمة.
الطريقة
نحضروعاءونضع فية اللحم والبصل المبشور ناعم جداوالبقدونس المقطع ناعم والفلفل والبهارات والملح ويعجن بليد جيداحتى تتجانس.
نحضر الحلة ونضع فيها قليل من الزيت ونصبع الكفتة بليد اليمنى ثم نضع كل الا صابع الواحدتلوالاخرحتى اخر اصبع نضع القليل من الماءكوبان ماءمثلا ثم ضع رشة زيت على الوجة الان اغلقى الحلة وتوضع على نار هادئة حتى تلا حظى ان الاصابع متماسكة بعد ذلك نحضر صينية نرص الاصابع فيها وتوضع فى الفرن تحت الشواية حتى تحمر.
وبلهنا والشفا.
(ملحوظة)
الملح وانتى بتعجنى اللحم تذ وقى الحدق كماتريدين.   

[قلب منكسر]

يسلموووووووووووووووووو.

[~رؤى~]

جزاكِ الله خيرا حبيبتي ام ريتاج

بس حبيبتي بالنسبة لاستخدام جوزة الطيب

شوفي الرابط ده

http://akhawat.islam...showtopic=69192

[اهل القران]

مشكورة يا اختى على الوصفه الحلوة دى

[القمر المضئ]

عندى استفسار لام ريتاج بس ماتتضحكوش عليا انتى قلتى الفحمه  احطها فين بالظبط فى الصينيه الى فيها الكفته ولا تقصدى ايه فهمينى  ييووووه بقى  اشرحى لو سمحتى

[oumo anass]

السلام  اختي سوهندا في الحقيقة انا التي اضحك لنفس السؤال لازم ننتظر ام ريتاج

[أم ريتاج]

السلام عليكم و رحمة الله و بركاته
اخواتى الغاليات سوهندا و أم أنس
بارك الله فيكن على مروركن الطيب

بالنسبة للفحمة
بصوا

لو انتى بعد ما صبعتى الكفته حطيتيها على الشبكة من دون صينية يعنى تنزل الدهون بتاعتها في صينيه تحت منها فمن الطبيعي انك هتحطى الفحمة في الصينيه اللى بينزل فيها الدهون

اما بقا لو صبعتيها و سويتها في صينيه فطبعي انها هتنزل الدهون في نفس الصينيه يبقى هتحطى الفحمة في نفس الصينية اللى فيها الكفته

و في الحلتين بعد ما تفتحي الفرن و تحطى الفحمة اقفلى الفرن بسرعة عشان الريحة تفضل في الفرن و الكفته تتبخر بريحة الفحم عشان تكون زي المشوية على الفحم

و بالهنا و الشفا