أريد طريقة العيش البيتي الفلاحي المصري وبالتفصيل الممل

[~ أم العبادلة ~ 1903]

السلام عليكــم ورحمـة الله وبركاتــة ،،

 

أريد طريقة العيش البيتي الفلاحي المصري وبالتفصيل الممل

 

وهذه هي صور العيش الذي اقصده

 

 

وهذه

 

 

بورك فيكن

[~ماريا~ 1340]

وعليكم السلام ورحمة الله

بسيطة جداااا

بتجيبي الدقيق الكمية الي انت عايزاها كيلو اتنين بس مش دقيق ابيض لا

دقيق قمح اوك

بتنخلية في طبق كبير وتعملي حفرة في النص تحطي قولي م ص ملح

وترشي علي الدقيق خميرة فورية قولي بنص جنية كدا

المهم تدوبي شوية الملح دول الاول بماء وبعدين تعجني بماء دافيء لو انت في الشتا

تحطي شوية بشوية الماية وتعجني لحد ما تحصلي علي عجين شبة يابس شوي

وتسبية لحد ما يخمر بتلاقية ارتفع وريحتة ظهرت

تقومي مكوراه كور في حجم قبضة اليد

وتفرديها بايدك نص فرد كدا

وعارفة مكينة الخبير

بتحطيها فيها وتفرديها وتحطيها في الفرن

 

واي خدمة

[وأشرقت السماء 1565]

السلام عليكــم ورحمـة الله وبركاتــة ،،

 

شطورة يا مرمر برافو عليكى

 

جارتى وأفتخر بيكى هههههه

 

شوفى يا أمومة الصورة الأولى معمولة بماكينة الخبز ... الماكينة دى موجودة عن كل واحدة فينا (قصدى عندنا إحنا فى الريف) فى جهازها وهى بتتزوج

 

العجين عادى جدا جدا زى أى عجين لكنه الأفضل يكون بدقيق مخلوط مع دقيق ذرة لسهولة مضغه

 

هنا تستعيضى عنه بالدقيق البُر يعنى شوية أسمر لأن بيكون فيه ردة وعلى فكرة هو ده الصحى جدا

 

وممكن تخلطى عليه شوية دقيق أبيض وتضعى ملح وماء وخميرة وتتركيه يتخمر مثل ما قالت ماريا بالضبط وبعدين تقطعيه وتفرديه وتدخليه الفرن

 

فى الصورة الأولى معمولة بالماكينة بتفرد العجينة خالص ولها مطرحة معينة على مقاس العيش اللى يخرج من الماكينة ويوضع عليها ويوضع فى الفرن

 

وفى الصورة الثانية فدى الطريقة إللى كنا بنعملها قبل اختراع الماكينة بتعمليه دائرة كبيرة وتقسميها نصفين بالسكينة بعد الفرد طبعا وتدخليها الفرن

 

والله كنت ناوية أصور موضوع العيش ده لما كنت فى مصر لكن نسيت عموما المرة الجاية بإذن الله أصوره لكم

[~ أم العبادلة ~ 1903]

السلام عليكم ورحمة الله وبركاته،،

 

يا بنات شكلي هضربكم

 

أنا قلت عايزة الطريقة بالتفصيل

يعني المقادير بالضبط والكميات

والطريقة خطوة خطوة بالثانية والدقيقة

ومش مهم الصور

أنا كنت بشوف أمي وجارتنا بيعملوه في فرن فلاحي وأنا صغيرة

لكني مش فاكرة أي تفاصيل

 

وبالنسبة للماكينة فحاليا هستبدلها بالنشابة، ولو اتقنت العيش زوجي وعدني يجيب الماكينة

فهمتكم معايا يا حلوات علشان أتقنه مثل الفطير

[وأشرقت السماء 1565]

السلام عليكــم ورحمـة الله وبركاتــة ،،

 

ههههه تعرفى يا أمومة إن البنات عندنا بيكرهوا يوم الخبز ده أد إيه ؟؟؟

 

يمكن لأننا بنعمل كميات كبيرة تكفى لأسبوعين أو أكثر

 

أحلى حاجة فى العيش ده إنه يُخرج من الفرن البلدى طعم وريحة جونااااااااااان

 

وبما إنك عايزة تعملى يبقى تعملى كمية صغيرة جدا يعنى تكفيكى مثلا عشا وفطار

 

تعرفى تعجنى الفطير كويس دلوقتى صح ولا لأ؟؟؟؟؟؟؟؟

 

طيب هو نفس عجين الفطير بالظبط +الخميرة

 

وتتركيه يتخمر

 

وبعدين تقطعيه قطع صغيرة وبعدين تفرديه لكن ما تخليه رقيق أوى يعنى دائرة حلوة لا سميكة ولا رقيقة

 

وتكونى مسخنة الفرن وضعيه وعلى فكرة بيتحمر بسرعة ولما يتحمر طلعيه بس إوعى تحرقيه

 

جربى كمية صغيرة ولا تنسى تشترى دقيق بُر وتخلطيه مع الأبيض

[~ أم العبادلة ~ 1903]

طيب اقفل باب الفرن ولا أخليه مفتوح

ولو هقفل الفرن، هفتح الفرن بعد قد اايه؟؟

 

اسيبه يتخمر قد ايه ؟؟

ما هو مقدار الدقيق الابيض مقارنة للدقيق البر

[وأشرقت السماء 1565]

طيب اقفل باب الفرن ولا أخليه مفتوح

ولو هقفل الفرن، هفتح الفرن بعد قد اايه؟؟

 

لاااااا خليه مفتوح طبعا

ده مش هياخد دقائق ويتحمر

اسيبه يتخمر قد ايه ؟؟

 

ممكن نصف ساعة أو لما تلاقيه تضاعف حجمه

ما هو مقدار الدقيق الابيض مقارنة للدقيق البر

 

ممكن نصف أبيض ونصف بُر

[حياة إسلامية 135]

... شكله جميل .. شهاتني الصورة ^^

حبيباتنا المصريات مكفيات و موفيات ما شاء الله

امومه لما تعمليه علمينا ^^

نقل للطيبات

[~ أم العبادلة ~ 1903]

بورك فيكِ أشروقة

 

حياكِ الله أسلامية

ليه يا غالية ينقل للطيبات وهو من المعجنات ؟؟

[بنوته مسلمه مصريه 458]

السلام عليكــم ورحمـة الله وبركاتــة ،،

ممكن أسأل سؤال

هو العيش ده مش هو العيش الملدِن

اللى هو بيقرمش شويه

ولا ده عيش طرى

[أم زيــــاد 881]

الخبز ده عامل ايه من الداخل

طيب ممكن الاخوات من مصر

يصورو طريقة صنع الخبز ده

وماكينة ايه دي الي يتعمل فيها شكلها ايه

 

وسؤال عوزا اعرف انواع الخبز المصري

[~ماريا~ 1340]

بنوتة

العيش دا طري وفية الي بينشفة ويخلية مقرمش

ودا بيرجع لجودة دقيق القمح علي فكرة

 

 

ام زياد

 

دي المكينة الي بنستعملها

العيش دا خفيف جداا ام زياد

ما بعرف انواع الخبز بصراحة غير دا وحاجة اسمها الكماج

الي هي نزلتلك صورتها في موضوعك

[اميرة قلب زوجها 8]

ماشاء الله عليكى ماريا

 

ايه الشطارة دى

 

بصى امة الرحمن العيش البيتى الفلاحى بيتعمل فى الصعيد بس مش بالماكينه دى

بنعمله على فرن كدة ممكن يتعمل على فرن البوتاجاز وهو يدوى لاخر مرحلة فيه

بإذن الله هحاول أجيبلكم صورته

اما اللى انتى جايبة صوره دا اسمه عيش مصرى

مش بنعمله فى اليبت بتشتريه من الطابونه وموجود فى مصر كلها من اسكندرية لأسوان

[بنت الاسلام السلفيه 110]

شوفوا بقى انا داخله اتفرج وبس لانى مش حعرف افدكم فى الموضوع ده

احنا بنشترى العيش من الفرن جاهز بس حبيت اخد فكره يمكن افكر اعمله

تم تعديل 18 يناير, 2012 بواسطة بنت الاسلام السلفيه