اذهبي الى المحتوى
يمامة المسجد .

أعمل إيه ، كان لازم ألبس النقاب .. قصة مؤثرة

المشاركات التي تم ترشيحها

السلام عليكم ورحمة الله وبركاته

 

بمناسبة الحرب الفظيعه على النقاب حبيت اكتبلكم قصة التزامى وقصتى مع النقاب لعلها تكون سبب فى ثبات ولو اخت واحده على النقاب

 

ومعلش هكتب بالعاميه ومعلش هطول

 

اولا انا من مدينه من المدن الصغيره البعيده وهذه المدينه ليس بها ولا كليات ولا معاهد.. مفهاش غير مدرسه ثانويه واحده وطبعا مختلطه

 

وانا كنت الحمد لله من المتفوقين وكان حلم حياتى اطلع مهندسه واسافر بره والكلام ده "كلام المسلسلات العربى"

 

المهم من الله عليه بمجموع عالى وفعلا دخلت كلية الهندسه... بس كان لازم اتغرب "وده شئ عادى كل الطلبه كانت بتتغرب" رغم ان اقرب بلد لينا كانت المسافه بينا 5 ساعات

 

المهم روحت بورسعيد وبدأت الحكايه

 

اول سنه ليه فى الكليه كانت الغربه تعبانى جدا جدا جدا وبما ان بلدى تبعد عن بور سعيد 7 أو 8 ساعات فكنت دايما بسافر الشرقيه عند أهل أبويه وكنت ماشيه مع الاخوان المسلمين فى الشرقيه

 

وكنت فاكره نفسى التزمت خلاص وبقيت الاخت اللى محصلتش وخاصة انى كنت شغالة دعوه فى مساجد البلد وكان لبسى طبعا عبارة عن جيب جينز وطرح لف كبيرة وكنت متخيله كده ان انا فى شدة الالتزام وكنت دايما ماشيه بالمطويات والشرايط فى الشنطه اوزع منها فى كل حته

 

وكنت طول السنه دى مخططه انى احول هندسة الزقازيق عشان افضل مع اخواتى "اللى هم الاخوان"

 

وقدر الله انى شلت مادتين... فطبعا مينفعش احول

 

المهم فى اول السنه التانيه وانا راجعه من الزقازيق لبورسعيد كنت حزينه اوى اوى لفراق الاخوات وفضلت طول طريق السفر ابكى وادعى الله انى اعرف احول وانى اتعرف على اخوات فى بورسعيد "طبعا كنت مسافره بدون محرم" لانى مكنتش اعرف ان لا يجوز سفر المرأة الا مع ذى محرم

 

وصلت بورسعيد على المغرب وكان فى رمضان فطرت ونزلت اصلى التراويح

 

وانا فى المسجد خبطت فى واحده فزعقتلى جامد

 

فكنت على وشك البكاء

 

واحده تالته شافت اللى حصل فنادت عليه: اسمك ايه انتى منين والكلام ده

 

وفى اخر الكلام قالتلى انا عازمه اخوات على الفطار يوم الاتنين الجاى ياريت تيجى معاهم وبعد الصلاة قالتلى استنى لما اشاورلك على البيت

 

وروحت وانا مش فى دماغى انى اروحلها خااااااااالص لانى اكيد وانا مغتربه مش هروح بيت معرفوش

 

عدت الايام وجه يوم الاتنين ورجعت من الكليه صليت العصر وقلت انام.......

 

وبعدين افتكرت الاخت اياها... سبحان الله معرفش ايه اللى قومنى... صليت استخاره اروح ولا ﻷ

 

وبعد صلاة الاستخاره وبعد حيره شديده لقيت نفسى قمت ولبست ونزلت جرى عشان الحق اروح

 

وصلت العماره ووقفت تحت وانا خايفه اطلع وبعدين لقيت 3 اخوات والله كنت عمرى فى حياتى ما شوفت زيهم قبل كده

 

لابسين اسود فى اسود وهدوم واسعه قوى وبتجرجر فى الارض ومش باين منهم اى حاجه ولا حتى عنيهم

 

اول ما شفتهم حسيت بحاجه غريبه اوى اوى جوايا

 

المهم دخلنا للاخت وهى بتحط الفطار اتكلموا معايا

 

فأول حاجه قلتهالهم وكنت بقولها بكل فخر "على فكرة انا من الاخوان المسلمين"

 

يعنى بالبلدى كده محدش احسن من حد انا برضه ملتزمه زيكم

 

لقيتهم ابتسموا كلهم لكلامى وسكتوا

 

قعدت الح عليهم انتو ضحكتوا ليه انتو ضحكتوا ليه

 

فقالتلى واحده منهم بمنتهى البساطه : ضحكت عشان انتى فرحانه انك من الاخوان

 

قلتلها مش فاهمة قعدت بقه فهمتنى واتكلمت معايا كتييييييييييير عن الجماعات والسلفيه وووو

 

وسبحان الله كان اول مره برضه اعرف الكلام ده

 

وروحت وانا مصدومة...... وفضلت كذا يوم دماغى هتنفجر من كتر التفكير

 

وبعدها اتصلت بيه وقالتلى تعالى معانا الاعتكاف فى المسجد الفلانى

 

طبعا طبعا خوفت ومروحتش

 

وجريت على بلدى ومرجعتش غير بعد العيد

 

رجعت تكلمنى تانى وعزمتنى على الغدا وبعد الغدا قالتلى فى درس للشيخ فلان انهارده تيجى معايا

 

والشيخ ده كان من طلبة الشيخ مصطفى العدوى

 

روحت معاها ولما بدأ الشيخ لقيت كل الاخوات ماسكين اقلام وعمالين يكتبوا ورا الشيخ ومفيش ولا واحده رفعت عينها من على ورقها وبدأت اسمع الشيخ وكان درس فقة "فقة الحج"

 

وطبعا مفهمتش اى حاجه ومعرفتش اكتب ورا الشيخ اى حاجه

 

بس كنت مستغربه اوى اوى

 

ناس غير الناس ودنيا غير الدنيا ولقيت فرق كبييييييير وغريب بين اخوات الزقازيق واخوات بورسعيد

 

وتانى يوم روحت معاهم درس عقيده فى معهد اعداد الدعاه

 

وقعدت قارنت بين درس هنا ودرس هناك والحال هنا والحال هناك

 

ومن هنا كانت البداية

 

والحمد لله تركت الاخوان وسلكت طريق طلب العلم الشرعى

 

وبدأت طريق الاستقامه ولله الحمد

 

 

 

 

وبدأت معاناتى مع النقاب

 

ابويا وامى كانو زى كل الناس اياميها

 

كانوا متاثرين بالاعلام دا غير الجهل دا غير مشايخ التلفزيون والكلام ده

 

المهم حبيت البس الخمار "واخدين بالكم الخمار"

 

طبعا ابويه بهدل الدنيا وقطع الخمارات اللى اشتريتها وقلب البيت كله

 

نشفت دماغى ومسكتش غير لما لبست الخمار

 

بس كنت على قد ما اقدر احاول مظهرش فى وشه

 

اصله كان بيتعصب اوى اوى ويتحرق دمه لما يشوفنى لبساه

 

دا غير بقه التغيرات اللى جايه مع الخمار

 

مبسلمش على رجاله مبسمعش اغانى مبقعدش معاهم اتفرج على التلفزيون...... والكلام ده كله

 

كان جديد فى بيتنا... جديد فى بلدنا كلها

 

طبعا كنت فى نظر بابا اتحولت لارهابيه وانضميت لجماعه من الجماعات والكلام ده

طبعا كان نفسى البس النقاب بس كان مستحيل اعرض على بابا الكلام ده

 

وفى الوقت ده قدر الله انى سقطت فى الكليه

 

وطبعا بابا ربط ده بده على طول وفعلا كانت من اشد الايام فى عمرى

 

روحت محوله من قسم ميكانيكا دخلت سنه اولى من تانى بس بحريه

 

وساعتها خلاص عرفت ان النقاب فرض واتاكدت من كده وخلاص لا يجوز انى امشى سافرة الوجه

 

فقولت لبابا عايزه البس النقاب

 

متتخيلوش البهدله اللى اتبهدلتها عشان عايزه البس النقاب

 

بابا ضربنى ضرب غريب الشكل لدرجة ان جسمى كله كان معلم

 

وشال الشرايط كلها رماها فى الزباله والكتب كلها حرقها وكل الخمارات قصها بالمقص والجونتيات كمان وحبسنى فى البيت لحد معاد السفر

 

سافرت للكليه وان خلاص كأنى طالعة من المعتقل حبس وتعذيب وقهر نفسى

 

طب وبعدين لازم حل مينفعش اخرج فى الشارع بوشى اعمل ايه

 

توكلت على الله ولبست النقاب

 

بس من غير ما حد من اهلى يعرف طبعا

 

رجعت فى اجازه من الاجازات وكان لازم اخويا يعرف لانه هو اللى بيسافر معايا

 

وربنا يصلح حاله ويبارك فيه ويرزقه الفردوس الاعلى وقف معايا وساعدنى

 

كنا نسافر بليل متاخر ولما نوصل اخلع النقاب فى الشارع قدام البيت وارميه وسط الشجر وادخل البيت وافضل محبوسه او حابسه نفسى طول الأجازه لحد معاد السفر اخرج وانا شايله النقاب فى استك الجيبه تحت الخمار ولما ابعد عن البيت شويه اطلعه البسه فى الشارع

 

وفضلت لبساه على الحال ده 4 سنين

 

عارفين يعنى ايه اربع سنين

 

اربع سنين بدخل واخرج زى الحراميه

 

وطول الفتره دى طبعا بطلب العلم الشرعى وكمان فى الاجازات لما اروح عند بابا كنت اجيب المجموعات العلميه واقعد افرغها كتابه

 

وطبعا طول الأربع سنين دول كل فتره اطلب من بابا انى البس النقاب ويرفض

 

وقفشنى فى الاربع سنين كذا مره

 

وكنت لما بتقفش كان بيبهدلنى

 

والله مره من المرات فضل يضرب فيه لحد ما اغمى عليه من الضرب

 

وتعبت خالص واتنقلت المستشفى

 

واخواتى قالولى انه حتى بعد ما اغمى عليه فضل يضربنى لحد ماشالونى من قدامه

 

وطبعا هو كان فى الايام الاخيره حاسس انى لبساه بس مش عارف يعمل ايه

 

فكان منكد عليه لو لقى المطبخ مش نضيف يدخل يدينى 4 اقلام على وشى

 

لو حاجه اتكسرت يقوم يضربنى

 

كنا 6 اخوات محدش كان بيضرب غيرى

 

والله حتى لما حد من اخواتى يغلط انا اللى كنت بضرب

 

وسبحان الله بعد 4 سنوات مكن الله ليه

 

 

 

اه نسيت … طوال لالربع سنين غير بهدلة بابا دى كنت متبهدله برضه فى بور سعيد

 

اطردت من المدينه

 

وبعدها اطردت من دار المغتربات

 

وبهدلة الكلية والدكاتره

 

ومشاكل الامن

 

لدرجة مره مديرة الدار حكمت عليه مخرجش من اوضتى خالص غير للحمام بس

 

وبعدها كانت عايزه تمضينى على اقرارات عدم التحدث فى الدين مع طالبات الدار وبعدها طردتنى

 

 

 

 

واتبهدلت والله بهدله لدرجة ان فى ايام مكنش فى حته ابات فيها

 

وكنت خايفه اقول لبابا ﻷن سبب البهدله دى انى منتقبه وابى ميعرفش ومينفعش يعرف

 

بس الحمد لله فتح الله عليه "بس دى قصه تانيه خالص وطويله"

 

 

 

 

وعلى فكرة ده مش حالى لوحدى

 

والله انا واكتر من 10 اخوات غيرى كنا فى عذاب

 

واى عذاب.. بهدله واهانه وطرد

 

والله فى اخت كانت من الفلاحين وكان ابوها بيبيتها على السطوح "سطوح فاضى خالص"

 

وفى عز البرد ومكنش بيطلعلها اكل خالص

 

وفى الاخر تظاهرت بالاستسلام ولبسته فى السر برضه

 

 

 

واخت كان ابوها محامى وكان مبهدلها بجد وقالها لو مخلعتهوش شوفيلك حته تانيه عيشى فيها وهى راجعه من الكليه راملها شنطتها وطردها وقالها متجيش هنا تانى

 

وفى الاخر برده لبسته من غير ما يعرف

 

 

 

والله كان اشبه بكفاح

 

كنا اكتر من 10 كلنا لابسينه فى السر وكلنا كانت لينا قصص لو قعدت احكيها مش هيكفى

 

وكلنا شفنا ايام محدش شافها

 

 

 

 

المهم زهق بابا من اللى بيعمله فيه وفقد الامل فى انى اتغير وبقه يعمل نفسه مش عارف انى لابسه النقاب

 

وفضلت سنتين لبساه وهو عارف بس عامل نفسه مش عارف

 

وفى السنتين دول عرفت اطلع من بيت بابا واخرج وازور الاخوات والحمد لله فتح الله عليه باب الدعوه وفضلت السنتين دول اعلم الاخوات اللى اتعلمته فى بورسعيد

 

والحمد لله نشرت المنهج السلفى فى بلدى

 

ووضعت اقدامهن على الطريق

 

وشرحت لكثير من الاخوات كتاب الثمرات الزكيه فى العقائد السلفيه للشيخ احمد فريد

 

مع شوية فقه مع مصطلح واصول فقه

 

 

 

 

وده كان حاجه كبيره فى بلدنا لان بلدنا مفهاش علم شرعى خااااااااااااالص

 

 

 

 

والحمدلله بعد 6 سنين من النقاب من الله عليه بزوج صالح وتزوجت ورزقت ببنت

 

وفتح الله عليه والف بين قلبى وقلب ابى وفتح على ابى واهلى جميعا

 

 

 

سبحان الله 7 سنوات بالنقاب اولهن شدة واخرهن فرج....... وأى فرج والله

 

فعلا .. كلما ضاقت حلقاتها فرجت

 

 

 

 

وسبحان القائل

 

((الم * أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لَا يُفْتَنُونَ * وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ))

 

 

 

وصدق تعالى حين قال

 

و من يتق الله يجعل له مخرجا و يرزقه من حيث لا يحتسب

 

معلش حاجة برة الموضوع

 

بالله اى واحد عنده بنت او اخت أوعى تغربها

 

ولو ايه الاسباب

 

خليها معاك احسن عشان وهى معاك هتعرف تحافظ عليها

  • معجبة 3

شارك هذه المشاركه


رابط المشاركه
شارك

السلام عليكم و رحمة الله و بركاته، و الله مش عارفة أقولك إيه،الحمد لله الذي عوضك بحياة أفضل من 7سنوات اللاتي أمضيتهن في العذاب يا رب يسعدك دائما و إن شاء الله أتمنى أن يأخذ الأخوات عبرة منك،على فكرة أنا لسة منتقبة من 15 يوم و الحمد لله،كانت أمي طردتني من البيت و رجعت على أساس أن ألبسه خفية لكني لم أستطع حسيت أني حعمل فتنة في حينا،لكن ربنا عوض صبري خير حيث وافقت أمي أن ألبسه شرط ألا أتزوج حاليا.

أنت ما زلت زهرة جديدة معانا في المنتدى،إن شاء الله تستفيدي و تفيدي معانا.على فكرة و الله أنا محتاجة لأخت زيك تساعديني في طلب العلم،مثلا تحددي ما هو الكتاب الذي سيدرس و تشرحيلي إذا كان عندك وقت طبعا

جزاك الله خيرا و رزقك الفردوس الأعلى، و الله إني أحببتك في الله من الآن

شارك هذه المشاركه


رابط المشاركه
شارك

السلام عليكم ورحمة الله وبركاته،،

الحمد لله .ان مع العسر يسر ا.

جزاك ربي خيرا على القصة المؤثرة

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

أخيتى يمامة المسجد بارك الله فيكِ

 

أحزنت فعلا قلوبنا من أجلك وما لاقيته من أجل نقابك .

 

ندعو الله أن يجعله خالصا لوجه الله ويجعله فى ميزان حسناتك .

 

وأن يجزيكِ الله الخير الكثير ويعوضك بالجنه إن شاء الله .

شارك هذه المشاركه


رابط المشاركه
شارك

السلام عليكم ورحمة الله وبركاته،،

ما شاء الله قصتك مؤثرة جداااا

ولها اثر على النفس

سبحان الله

الحمد لله فانتي صدقتي الله فصدقك

نسال الله ان ييسر لنا جميعا لبس النقاب

عاجلا

شارك هذه المشاركه


رابط المشاركه
شارك
السلام عليكم ورحمة الله وبركاته،،

الحمد لله .ان مع العسر يسر ا.

جزاك ربي خيرا على القصة المؤثرة

 

 

ادعوا الله لى بلبس النقاب

ونجمة فلسطين

ونقابى نعمة من ربى

وكل بنات وزوجات المسلمين

امين

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

ما شاء الله قصتك مؤثرة جداااا

شارك هذه المشاركه


رابط المشاركه
شارك

ماشاء الله عليكى اختى

 

ربنا يزيدك ايماناٌ ويثبتك ويجعل حياتك اجمل واسعد

 

اسأل الله لكى الفوز بالفردوس الاعلى

شارك هذه المشاركه


رابط المشاركه
شارك

وعليكم السلام ورحمة الله وبركاته،،

أختى الفاضلة يمامة المسجد

أولا أهلا بكِ وسهلا فى منتدانا بيتكِ الثانى..حللت أهلا ووطئت سهلا

ثانيا أحب أن أقول لكِ أننى أحببتك فى الله من قصتك..حقا قصتك جميلة..ثبتكِ الله وجعل كل ذلك فى ميزان حسناتك..

على فكرة أنا بحب كتاب الثمرات الزكية جداااااااا فهو أول كتاب أعرفه فى التوحيد..

 

 

بالنسبة لقصة أخواتك فى الله اللواتى لبسن النقاب سرا أرجو منكِ بشدة أن تحكى لنا قصتهم فى موضوع آخر لعلنا نستفيد ونشعر بقدر النعمة..

 

بإذن الرحمن إن تفرغت قليلا لى عودة للرد على مواقف مما حصلت معك.

شارك هذه المشاركه


رابط المشاركه
شارك

السلام عليكــم ورحمـة الله وبركاتــة

 

أتعلمين أن قصة هذه ويعلم الله من أروع ماقرءت أختى العين تبكى ووالله إنى أحسبكِ على خير ولاأزكى على الله أحدا

 

أسأل الله أن يجعل ألامكِ بميزان حسناتكِ وأن يزيدكِ الله من فضله

 

سبحان الله الذى وفقكِ لذلك وثبتكِ على الحق

 

وننتظر المزيد وأسأل الله أن يهدى بقصتكِ هذه الكثير فوالله إنها لأثرت بقلبى

 

أسأل الله أن يجمعنى بكِ ومن نحب فى الجنة مع الحبيب محمد صلى الله عليه وسلم

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

اللهم بارك فيكِ على صبرك ومجاهدتك

مشاء الله قصة رائعة سبحان الله

والله اعرف الكثير والكثير من البنات من يقول لها ولدها لاترتدى النقاب

ويكون رد فعلها سلبى وتوافق على ذالك وتتنازل بكل سهولة

وابنت خالتى والدها سلفى وملتزم من زمن وامها ايضاً وربما خالتى امها كانت تشجعى دائماً على النقاب لما ذكرت

انى نفسى ارتدية لكن ترفض بشدة ان تلبسه ابنتها والبت تشتاق له بشدة بحجة انهاصغيرة ومصابة بحساسية فى الصدر

 

اسأل الله ان يهدى اباء وامهات المسلمين ويرزق كل من تشتاق للنقاب ان ييسر الله لهاالنقاب

بارك الله فيكِ وانرتى منتدانا الغالى

شارك هذه المشاركه


رابط المشاركه
شارك

ايااااااااااااااااااااا ملكه قلبه عليكى الدنيا ادخلى يالا دعياكى للعشاء يالالالالا تعالى بسرعه

تم تعديل بواسطة نسمه الايمان

شارك هذه المشاركه


رابط المشاركه
شارك

قصه راااااااااااااااائعه

جزاكى الله خيرا حبيبتى

انى احبك فى الله

شارك هذه المشاركه


رابط المشاركه
شارك

مشاء الله عليكى انتى شوفتى كتير فى حياتك بسبب النقاب بس انتى كونتى بنت مينفعش انك تنتردى من البيت وبعدين بلد ارياف فصعب انا كانت اختىفى المدينه الجامعيه وهناك اتعرفت على بنات ملتزمات وشجعوها امى الاول كانت مش حبه الموضوع وبعد كده وافقت دا درس احنا نتعلمه لما اولادنا يقولو شى مش حبينه نتفاهم معاهم بحب واستماع جزاكى الله كل خير والله يوفقك

شارك هذه المشاركه


رابط المشاركه
شارك

وعليكم السلام ورحمة الله وبركاته،،

ما شاء الله تبارك الله عليكِ يا أختى

ثبتكِ الله ورزقكِ كل ما تتمنين يارب

أحببتكِ فى الله

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

اللهـم بـــــــــارك ،،

 

قصتك رائعه ومؤثره ،، اسأل الله جل وعلا ان يُثبتنا وإياكِ علي الحق وان لا يجعل مُصيبتنا في ديننا ،،

 

بارك الله فيكِ وجزاكِ خير الجزاء ،،

شارك هذه المشاركه


رابط المشاركه
شارك

السلام عليكــم ورحمـة الله وبركاتــة ،،

 

أخيتى يمامة المسجد بارك الله فيكِ

 

اللهـم بـــــــــارك ،،

 

قصتك رائعه ومؤثره ،، اسأل الله جل وعلا ان يُثبتنا وإياكِ علي الحق وان لا يجعل مُصيبتنا في ديننا ،،

 

بارك الله فيكِ وجزاكِ خير الجزاء ،،

 

ندعو الله أن يجعله خالصا لوجه الله ويجعله فى ميزان حسناتك .

 

وأن يجزيكِ الله الخير الكثير ويعوضك بالجنه إن شاء الله .

 

احبكِ فى الله

شارك هذه المشاركه


رابط المشاركه
شارك
السلام عليكم ورحمة الله وبركاته،،

الحمد لله .ان مع العسر يسر ا.

جزاك ربي خيرا على القصة المؤثرة

شارك هذه المشاركه


رابط المشاركه
شارك

وعليكم السلام ورحمة الله وبركاته

 

جوزيتي خيرا اختي الكريمة على هذه القصة المؤثرة

 

ثبتنا الله وإياكِ

 

بالفعل يا ريت لو تقدري تخبرينا قصة اصحابكِ علنا نتعظ ونشكر الله تعالى على نعمته

 

شارك هذه المشاركه


رابط المشاركه
شارك
السلام عليكم ورحمة الله وبركاته،،

ما شاء الله قصتك مؤثرة جداااا

ولها اثر على النفس

سبحان الله

الحمد لله فانتي صدقتي الله فصدقك

نسال الله ان ييسر لنا جميعا لبس النقاب

عاجلا

شارك هذه المشاركه


رابط المشاركه
شارك

السلام عليكم ورحمه الله وبركاته

اخيتى قصتك مؤثره جدا

اتمنى افعل ما فعلتى

لكن ابى يرفض تماما النقاب

وحينما ارتديته امامه

قال انه سيحرقه

وانا مش ينغه ارتديه سرا

بالله عليكم ادعو لى ان ييسر الله لى وارتديه

شارك هذه المشاركه


رابط المشاركه
شارك

بارك الله لكى عزيزتى ماشاء الله عليك صابره ان شاء الله دومن يارب قصه مؤ اثره وجميله اسعدك الله

سبب التعديل :تغيير الكلمة الى ان شاء الله

تم تعديل بواسطة ثـروة

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ - ‌‏أسوأ الأزمنة هي التي يُفعل فيها الشر باسم الخير، والخير باسم الشر، ففي الأثر (يأتي على الناس زمان يرون المنكر معروفا والمعروف منكرا) ♢ عبدالعزيز الطريفي ♢

×