سؤال :الملابس الخاصة بالمولود الجديد

[*ميمونة* 104]

بسم الله الرحمن الرحيم

 

كيف حالكن يا أخوات ؟

اشتقت إليكن حقا وإلى منتدانا الجميل

 

أنا بفضل الله حامل في ولد _ان شاء الله _في الشهر السابع وده أول حمل ليا ومش عارفة أيه متطلبات المولود وأنا بعيدة عن أمي وحماتي فبالتالي مش عارفة أشتري أيه ولا أي شئ

 

 

ياريت لو أي واحدة عندها معلومة تفيدني بيها وجزاكن الله خيرا

رزقكن الله جميعا الذرية الصالحة التي تقر أعينكن بها في الدنيا والآخرة

[*أم رقية* 473]

ماشاء الله اللهم بارك مبارك ميمونة حبيبتي أتم الله حملك على خير ورزقك الولد الصالح

 

أنت كدة بإذن الله هتولدي في شهر 10 يعني شتا

 

الغيارات فنلات داخلية النص والكم والكات بألاعداد اللي تناسبك ( ممكن 6 من كل نوع)ويا سلام لو يكونوا سيلوبتات اللي هي بكباسين من تحت

 

الاول هيلبس واحدة كات واحدة نص ولما الدنيا تبرد تزودي الكم وياريت كله يكون قطن عشان جلد النونو

 

 

سيلوبتات خارجية( للبيت وللخروج)

 

 

 

 

 

كوفرته وبطانية

 

ودة بديل للبطانية

 

 

بفتات

 

بناطيل (دة طقم كامل)

 

شنطة لملابس البيبي ةأخرى لحمله لو بتحبيها (الكاريكوت)

[*أم رقية* 473]

البيجامات والسيلوبتات والغيارات يفضل 6 من كل نوع وطبعا حسب ما أنت عايزة

 

وكمان

 

متنسيش علبة البامبرز وفوط صحية لكِ (كتير من الأمهات الجدد بينسوها)

 

قطن وناديل ناعمة جدا وإن امكن بدون رائحة

 

ببرونة للاعشاب

 

زيت البيبي وشامبو البيبي وفرشاة لشعره كمان :)

 

شربات ولكاليك وممكن تستغني عنهم لو لبسه كله سيلوبتات

[ام مريم وهاجر 16]

اللهم بارك بسم الله ما شاء الله اتم الله عليكى حملك ورزقك بمولود سليم معافى ان شاء الله

 

بصى يا حبيبة انا معايه اربع اولاد اللهم بارك عقبالك مثلى ان شاء الله جربت كل حاجة فيهم وفى حاجات اشتريتها واتركنت هاتى اللى هتحتجيه فقط

 

دائما اول مولود الام بتكون فرحانه وتشترى من غير حساب وتلاقى نصف اللى اشترته ولا ليه لزمة

 

بارك الله فيها ام رقية احلى حاجة السلوبتات وبالاخص انتى هتولدى فى الشتاء هتدفى الطفل واهم حاجى اهتمى بالشربات

 

وانا ارجح البطانيه فى الشتاء والكوبرتات فى الصيف والفنلات لازم تكون قطن وطبعا دلوقت كله بيل بامبرز وللازم طبعا بناطيل خفيفة للصيف وبشكير فى الشتاء

 

انتى يا حبيبة محتاجة ملابس فقط ولا محتاجة حتى الاحتياجات الشخصية مثل الشامبو والببرونه والاستعمالات الاخرى

 

انا تحت امرك ان احتاجتى حاجات تانية

 

ربنا يكملك على خير ويحفظك من كل شر وسؤ

[سدرة المُنتهى 87 1318]

السلام عليكم ورحمة الله وبركاته،،

 

ميمونة حبيبة قلبي

كيفك يا غالية

والله مشتاقين كتير.. لا تغيبي كده يا بخيلة

 

ما شاء الله ربنا يبارك ويتمم لك على خير ويجعله الذرية الصالحة

ما شاء الله أم رقية كفت ووفت

لن أزيد على كلامها

 

فقط أؤكد عليك في إنك تشتري سلوبتات داخلية لأنها عملية أكتر من الفانلات ووجهة نظري فيها أنها لما تشتالي المولود ما بتترفعش مثل الفانلات وبالتالي لا يظهر لا ظهره ولا بطنه

والبافتات تكتري منهم

 

ولا تهتمي بلبس الخروج من الأول لأنه هيكبر بسرعة والهدوم هتتركن على جنب وهتبقى محتاجة تشتري من أول وجديد

 

ويبقي طمنينا عليكي دايما يا حبيبة

[*ميمونة* 104]

أم رقية الحبيبة

جزاكِ الله خيرا يا غالية بجد استفدت كتير جدا جدا من مشاركاتك

بس يعني ايه بفتات وبتستخدم في ايه؟

وياريت لو تعرفي اسم شامبو للاطفال

جوزيتي الجنان يا حبيبة

[*ميمونة* 104]

ام مريم وهاجر

جزاكِ الله خيرا حبيبتي وبارك لكِ في أولادك وأقر عينك بهم في الدنيا والآخرة

 

أنا عايزة أعرف كل حاجة ملابس وشامبوهات وكريمات وكل شئ ممكن يكون مفيد ليا وللبيبي حاسة اني محتاسة

[*ميمونة* 104]

سدرة المنتهى

 

وعليكم السلام ورحمة الله وبركاته

انا بأفضل حال الحمد لله

وأنا والله اشتقت كثيرا لكن بس معلش كنت فعلا مشغولة جدا بس والله لما يكون عندي وقت بدخل علطول

جزاكِ الله خيرا يا حبيبة لنصائحك

أقر الله عينك بما تحبي

[محبة الفجر 4]

الف مبروك حبيتى يارب تقومى انتى وطفلك بالف سلامه اختى البيفته بتستعمل عند اخذ البيبى الرضاعه فى الببرونه عشان لو تف حاجه مش يغرق صدره ماشى

وبما انك هترزقى بولد فنصحتى ابلغى زوجك يتفق مع الدكتور انه يقوم له بعمليه الطهاره قبل خروج من المشفى ليه انتى بعيده عن امك الله يحفظها فالولد لو اطهر ف العمر ده مش بيحس بيها وبيشفى بسرعه انا عملت كده مع ابنى مروان والحمد لله شفى قبل السبوع حتى

اما الشامبو الافضل هو جنسون جميل ولطيف وامان على جسمهم وعيونهم

 

[ام ملك محمد 8]

السلام عليكم ورحمة الله وبركاتة

مبارك على الحمل حبيبتى بصى يا ستى انا حامل معاكى فى ولد بس انا اشطر منك :D ههههههههه فى الشهر ال8 وخلاص الحمد لله هانت وقربت اولد تعالى بقى نشوف هنجيب إيه؟

الهدوم ::::: الفانيلات هاتيها 6 نص و6 بكم وتكون خامة كويسة قطن وفيه فانيلات تقيلة تستحمل بس المهم كمان انك ماتقوليش عاوزة حديث ولادة لانه

اولا: هيصغر بسرعة. ثانيا :عمر الشتا قصير فهتلبسيهم شوية ويصغر فهاتى مقاس كبير اللى هو مقاس ال3 شهور متستغربيش :D هههه وابقى اتنى الهدوم عادى جدا لانك حبيبتى ان شاء الله يا إما هتستخدميهم بعد كدة لنفس النونو بردوا قدام يا إما للنونو اللى بعديه تمام وقيسى كدة بقى على باقى الهدوووم

السالوبتات انا مش بفضلها قوى لان انا طويلة وجوزى كذلك فعيالنا ماشاء الله طواااااااال :)فعلى ما بجيبها بتقصر فبجيب البيجامات اللى هى طبعا مش مفتوحة من قدام سواء بكباسين او زراير الا فى حالة لو كان دوران الرقبة مش على شكل 7 بجيبها اللى فيها كباسين او زراير من جنب عند الرقبة ليه بقى ؟؟ لان الاولنية لما الطفل بيقشط ياعنى يرجع اللبن اللى شربة لما يشبع بيدخل اللبن على صدرة حتى لو لابس بافيته ماشى وطبعا تجيبى مقاس كبير زى ما اتفنا هتحتاجى مثلا 6 دلوقتى لانه ما شاء الله هيكبر بسرعة فبعد كدة هتجيبى تانى وحاجة كمان مهمة البيجامات او السالوبتات القطيفة تحفة جدااااا فى اللبس او كمان النظافة بتستحمل الاوساخ وبتنظف بسرعة

 

 

 

كمان تجيبى بناطيل فردانى تكون قطن ومقاس كبير بردوا علشان لو البامبرز سرب يبقى تغيرى مثلا بنطلون البيجامة وتلبسيه بنطلون من دول او لوجاله تسلخات من البامبرز تلبسيه من دول علشان لو عمل حمام يعمل فيهم ومتبوظيش البيجامة

الكوفرته فيها كذا نوع هاتى المبطن طبعا علشان الشتا والنوع اللى بسوستة احسن لانة بيطمنك ان النونو مش هيقع منك مهاما اتحرك وانتى شايلاه

البافيته دى حاجة بتتحط تحت رقبة النون وتتربط من ورا علشان اى حاجة تنزل تنزل عليها متبهدلش الهدوم طبعا القطن احسن من اللى عليها طبقة بلاستيك ممكن تجيبى اتنين لانك هتلاقى معظم الهدوم اللى هتجيبيها فيها بافيتات

الطاقية دى اختيارى كدة كدة معظم الهدوم اللى هتجيبيها فيها طاقية بس انا بفضل البس الطاقية وقت ما يكون الجو ساقعة قوى او وانا خارجة بيه بالليل فى الساقعة لكن غير كدة بخليه حر طليق وطبعا لو لقتية سقعان لبسيه الطاقية

الشربات او اللكلوك دى بردوا مهمة علشان يتدفى هاتى مثلا 3 كفاية

المستلزمات الطبية ::::: البيبرونة هاتى حجم صغير لانك ان شاء الله هترضعى طبيعى مفش هتحتاجيها الا لما تولدى لما يكتبوا للنونو على اعشاب عقبال ما تفووقى وكدة ولو بردوا احتاجتى يشرب حاجة من السوايل بس الكلام دة قدددددددام لما يكبر شوية او حسب ما يقولك الطبيب

شامبو جونسون هاتى حجم كبير لانه موفر وكمان هيعقد معاكى مدة طويلة

هاتى كمان زيت جونسون حجم كبير وانا بحب اللى بالكاموميل وكدة كدة الدكتورة اللى هتولدك هتكتبلك على كريم ملطف لجلد الطفل

هاتى سافنجة اللى هى ليفة للاطفال هتلاقيها فى الصيدلية علشان لما يستحمة

هاتى كمان الفوطة اللى هتنشفى بيها هاتى اتنين واحدة للوش والجسم وواحدة للجزء اللى تحت علشان لما تيجى تغيرى بس مكان الحمام مينفعش ننشف ببتاعت الوش

هاتى المشط والفرشة بيبقوا عند الصيدلية بردوا

الكادليز نوع بامبرز حلو وخفيف جدا على الاطفال وبعد ال3 شهور هاتى اى نوع اللى يعجبك فيه مثلا سليبى التركى سعرة خفيف شوية

انتى بقى هاتى الفوط الصحية ليكى نوع اولويز الترا اللى هى غزارة اكتر لانها فعلا بتشيل كتير وبتستحمل ومش بتبهدلك

كمان من دلوقتى حاولى تدلكى ثديك بكريم ملطف وتجذبى حلمة الثدى للامام علشان النون لما يجى ان شاء الله يعرف يرضع وكمان علشان متحصلش التهابات للحلمة

ده كل اللى اقدر عليه دلوقتى :Dههههههههههه ربنا يقومك بالسلامة يا حبى

[في جنة الله أحيا 103]

اللهم بارك بسم الله ما شاء الله اتم الله عليكى حملك ورزقك بمولود سليم معافى ان شاء الله

[*ميمونة* 104]

الف مبروك حبيتى يارب تقومى انتى وطفلك بالف سلامه اختى البيفته بتستعمل عند اخذ البيبى الرضاعه فى الببرونه عشان لو تف حاجه مش يغرق صدره ماشى

وبما انك هترزقى بولد فنصحتى ابلغى زوجك يتفق مع الدكتور انه يقوم له بعمليه الطهاره قبل خروج من المشفى ليه انتى بعيده عن امك الله يحفظها فالولد لو اطهر ف العمر ده مش بيحس بيها وبيشفى بسرعه انا عملت كده مع ابنى مروان والحمد لله شفى قبل السبوع حتى

اما الشامبو الافضل هو جنسون جميل ولطيف وامان على جسمهم وعيونهم

 

جزاِ الله خيرا اختي الحبيبة نصيحة مفيدة

 

بس عندي سؤال انا سمعت ان ختان الطفل على السبوع أفضل يعني الختان أول ما يتولد مش فيه ضرر

[*ميمونة* 104]

أم ملك محمد

 

يا سلام يا أم ملك

ماشاء الله عليكِ كفيتِ ووفيتي

جزاكِ الله خيرا حبيبتي

فعلا استفدت جدا من مشاركتك الرائعة

أتم الله حملك على خير وأقر عينك بما تحبي

[*ميمونة* 104]

اللهم بارك بسم الله ما شاء الله اتم الله عليكى حملك ورزقك بمولود سليم معافى ان شاء الله

 

ربنا يبارك فيكِ يا أختي

جزاكِ الله خيرا يا حبيبة

اسعدني مرورك

[أم زيــــاد 881]

وعليكم السلام ورحمة الله وبركاته غاليتي ميمونة

اشتقت لكِ جدا

مبارك حملكِ

وتمم الله لكِ على خير

 

ان شاء الله استفدتي من نصائح الأخوات