اذهبي الى المحتوى

المشاركات التي تم ترشيحها

وعليكم السلام ورحمة الله وبركاته

حيال الله كاتبتنا المبدعة

وكل عام وانت بخير يا حبيبة

هدوء الحبيبة

المتكلمة الرسمية بأسم الحبيبة هبة

بارك الله بكِ وكل عام وانت بخير

 

 

على الهامش " مش بتظهري ليه يا بنتي وحشاني ووحشني الكلام معاكِ"

شارك هذه المشاركه


رابط المشاركه
شارك

وعليكم السلام ورحمة الله وبركاته

 

ونحن بالانتظار :)

وكل عام وانتن بخير

شارك هذه المشاركه


رابط المشاركه
شارك

وعليكم السلام ورحمة الله وبركاته

كل سنة وإنت طيبة يا هبة

لقد طال غيابك عنا حبيبتى .فعودا حميدا

احم احم بس ياريت تجيبيلنا معاكى كحك العيد بقى كمالة التسالى علشان نتفرج ونعلق بمزاج

بهر معاك حبيبتى .ربنا ما يغيبك عناالمنتدى إلا فى كل خير

شارك هذه المشاركه


رابط المشاركه
شارك

السلام عليكم ورحمة الله وبركاته

هوبة انا عارفة انك كتبتي كذا حلقة ومجهزاهم

بس يا ليت لا تنشريهم مرة واحدة لاننا بنتعب لما بنقرأ كمية كبيرة جدا مرة واحدة وبنفقد متعتها

يا ليت كل يوم شوية لا تزيد مدة قرائتها عن ربع ساعة

في انتظارك يا حبيبة

  • معجبة 1

شارك هذه المشاركه


رابط المشاركه
شارك

جزاكِ الله خيرا اختي الحبيبه

وجزا الله مبدعتنا هبه خير الجزاء واثابها الفردوس

في المتابعه باذن الله

شارك هذه المشاركه


رابط المشاركه
شارك

وحشتينا يا هووووووووووووووووبه

 

أديني مستنيه O_o

يارب تكون احداث الجزء الثالث سعيده وتطمنينا على ريم وهاني :)

شارك هذه المشاركه


رابط المشاركه
شارك

انا مكنتش هعلق بس لما شفت رد ام العبادلة قلت ما بدهاش

 

عارفة يا هبة لو سمعتي كلامها هعمل فيك اية

 

 

وانت يا العبادلة تبريقة كبيرة اوي

 

 

ابقي اقرئي على مهلك انت

 

 

ال حلقات صغيرة ال دة ميجيش على الانتظار

شارك هذه المشاركه


رابط المشاركه
شارك

*أم رقية*

 

ريحانة السماء

 

أتفق معكما.....

شارك هذه المشاركه


رابط المشاركه
شارك

ضحكات مقرقرات على عقول البنات

 

شوفي يا هبة

لو سمعت كلامهم هتتحملي مسئولية غضب ازواجهم عليهم لما يسيبوا العيال وشغل البيت ويقعدوا على المسلسل بالساعات علشان يخلصوه

شارك هذه المشاركه


رابط المشاركه
شارك

السلام عليكم

منتظرين بشوق يا هوبة

كل سنة وانت طيبة حبيبتى

لما لقيتك اختفيتى خالص قولت البت أكيد بتركز : )

 

@@~ أم العبادلة ~

أنت بتقسى قلب البت علينا ليه بس ام العبادلة

اسمعى كلام أم رقيه يا هبه ما تسمعيش كلام ام عبد الرحمن

^ــــــ^

شارك هذه المشاركه


رابط المشاركه
شارك

انا بحب الحلقات قليله علشان متاخدش منى وقت كبير

لان لما هبه بتحط حلقات طويله لازم أخلصها فى وقتها عشان لو مخلصتهاش مش بستريح

فعشان كده عايزاها تحط حلقات قليله زى ام العبادله مقالت ( :

  • معجبة 1

شارك هذه المشاركه


رابط المشاركه
شارك

السلام عليكم ورجمة الله

وسعن يا بنات حواااء جااءت وسمعت كلام مش ولابد ههههههه ال عايزين حلقات قصيرة ال هههههه

اوعي تسمعي كلامهم والشغل احنا قدو وقدود متخفوش على أزواجنا ما هم يطفشو ويروحوا مع اصحابهم ويتركونا وبصراحة انا يعجبني ذلك عشان اقرأ براحتي ههههههه

يلا احنا منتظرات يا هوبة وكل سنة وانت طيبة حبيبتي : )

 

شارك هذه المشاركه


رابط المشاركه
شارك

السلام عليكن ورحمة الله وبركاته

 

 

 

وحشتووووووووووووووني

 

 

 

وحشتوني يا حلوين وحشتوووووووووووني

 

 

 

جبتلكو معايا كحك العيد , مش ده برضو اللي انتو عايزينه مني ومستنيني عشانه ؟؟؟؟؟؟؟؟ ههههههههه

 

 

بالهنا والشفا وصحتين على قلوبكو ههههههههه

 

 

 

 

متهيألي انتو مستنين حاجة تانية مممممم هي ايه كدة ! حد يفكرني ممممممم اهااااااااا مسلسل خلف الجدران الجزء الثالث ههههههههه

 

 

كونوا بالقرب حبيباتي

 

كل عام وانتن جميعا بخير وصحة وسعادة اللهم آمين

post-110778-0-90656200-1407265786.jpg

  • معجبة 2

شارك هذه المشاركه


رابط المشاركه
شارك

والآن ترفع الأستار عن أبطال وأحداث الجزء الثالث

 

 

مع تمنياتي بمتعة المتابعة والإفادة

 

اكشفي ايتها الأستار ما ورائك من احداااااااااااث

post-110778-0-51549700-1407267284.jpg

  • معجبة 1

شارك هذه المشاركه


رابط المشاركه
شارك

ما تخافيش يا ست ريم , انا مش هأذيكِ , بالعكس , اطمني خالص

 

اهئ اهئ اهئ اومال هتعمل فيا ايه ؟ اهئ اهئ اهئ

 

تعالى ورايا

 

على فين ؟؟؟؟؟ اهئ اهئ

 

ما تسأليش , تعالي ورايا وما تخافيش يا ست ريم

 

 

 

تعالي نخرج برا البوابة

 

 

اهئ اهئ اهئئئئئئئئئ انت هتعمل فيا اييييييييييه

 

قولتلك ما تخافيش يا ست ريم

 

 

 

 

يلا , تعالي اقفي هنا , هنستنى هنا شوية جنب البوابة

 

 

احنا هنفضل واقفين جنب البوابة كدة كتير ؟ اهئ اهئ اهئئئئئئ انت مستني حد يا صبحي ؟؟؟؟؟؟

 

 

ايوة

 

 

مستني مين ؟؟؟؟؟ اهئ اهئئئئئئئ

 

اهي العربية وصلت اهيه

 

 

عربية !!!!!!! اهئ اهئئئئئئئ مين دوووووووووول اهئ اهئ انا خايفة

 

 

هههههههه ازيك يا صبحي , ازيك يا حلوة

 

ازيكو يارجالة , الامانة اهيه

 

اهئ اهئ اهئ انت هتسلمني ليهم يا صبحي ؟

 

غصب عني , والله غصب عني يا ست ريم , انا لو عليا ما اسبكيش ابدا , لكن ......... خلاص , لحد كدة دوري انتهى ولازم ياخدوكِ

 

ياخدوني ! اهئ اهئئئئئئئ هما هيعملوا فيا ايه

 

 

ما تيلا بقىىىىىىىىىى , احنا هنفضل مستنين كتيررررررررررر , يلا اركبي يا حلوة خلينا نمشييييييييي

 

 

صبحي اهئ اهئئئئئ يا صبحي , ما تسبنيشششششششششششش يا صبحييييييييييييي ,

 

مع السلامة يا ست ريم , خلي بالك من نفسك , سلااااااااااام

 

 

انت دخلت الفيلا وقفلت البوابة وسبتني لييييييييييييه اهئ اهئئئئئئئئئئ صبحييييييييييييييييييي

 

 

 

 

يلا يا حلوووووووووووة يلا , اتأخرنااااااااااااااا اركبيييييييييي

 

اهئ اهئ اهئ امري لله اهئ اهئئئئئئئئئ حسبي الله ونعم الوكيل اهئ اهئ نجيني يارب نجيني اهئ اهئئئئئئئئئئ

اهئ اهئ اهئ امري لله , فوضت امري لله وحده اهئ اهئ اهئئئئئئئئ

 

 

 

 

ههههههه ازيك يا حلوة

 

اهئ اهئئئئئئئئ انا سمعت الصوت ده قبل كدة اهئ اهئ اهئ انت مييييييييييييين

 

هههههههه انا مراد , نسيتيني ؟ انا اللي انقذتك من عربية الترحيلات وجيبتك الفيلا عند صبحي انا وزمايلي

 

اهئ اهئئئئئئئئئئ انتو عايزين مني ايييييييييه اهئ اهئئئئئئئئئئ

 

هههههه ولا حاجة يا قمر , انا بنخدم بس , هنوصلك لحد باب بيتك

 

هاااااااااا ! طب أأأأأ طيب والبوليسسسسسسس

 

ههههه ولا يهمك منهم , مش انتِ بريئة ؟

 

ايوة والله بريييييئة برييييييئة اهئ اهئئئئئئئ

 

القاتل مسكوه واعترف على اللي دفعوه لارتكاب الجريمة , يعني انتي اكيد هتاخدي براءة والبوليس مالوش عندك حاجة

 

يعني البوليس مش هيدور عليا ؟

 

يدوروا عليكِ ليه !!!!!!!!! انتِ مالكيش أي ذنب

 

انتو مين ؟ مييييييييييين ؟

 

ما تسأليش

 

 

طيب انتو بتساعدوني ليه ؟ وايه مصلحتكو ان البوليس ما يوصليش ؟

 

كل اللي اقدر اقوله انها حسابات كبار وبيصفوها مع بعض , كان لازم انتي تخرجي برا الدايرة عشان مالكيش ذنبببببببببب

 

 

 

هو صبحي هيفضل هربان كدة ؟

 

صبحي ! هههههههههههههههه صبحي خلاص , انتهى يا حلوووووووووووة , اخر يوم في حياته النهاردة هههههههههههههههههههههههههههههههههههههههه الله يرحمك يا صبحي

 

 

 

ا يا خبر اسود !ا نتو هتقتلوه ؟ صبحي انسان كويس اوي والله , بس ظروفه الوحشة هي اللي دفعته للإجرام

 

هههههه معلش يا حلوة , نصيبه كدة

 

اهئ اهئ يبقوا هيقتلوني انا كمان اهئ اهئ اذا كان هما هيقتلوا حتى الراجل بتاعهم يبقى ازاي هيسيبوني اهئ اهئئئئئئئئئ ربنا يستر , خايفة تكون خطة عشان يخلصوا مني اهئ اهئ يا ترى هيودوني البيت ولا هيقتلوني ويدفنوني في الصحرا , يارب نجيني يارب اهئ اهئ اهئئئئئئئئئئئئئئئئئ

 

 

 

 

 

 

 

 

 

 

 

 

 

 

 

 

 

اهئ اهئئئئئئئئئئئئئ يا حبيبي يا هاني اهئ اهئئئئئئئئئئ يا حبيبي اهئ اهئئئئئئئئئئ اهئئئئئئئئئئئئ

 

اهدي يا رشا يا بنتي , هاني بخير الحمدلله

 

اهئ اهئ بخير ازاي يا طنط اهئ اهئ اهئ بقالهم اكتر من ساعتين في غرفة العمليات اهئ اهئ

 

ما تقلقيش يا بنتي , انا جوايا طمأنينة وسكينة بفضل الله , ومتيقنة ان ابني هيقوم بالسلامة ان شاء الله

 

اهئ اهئئئئئئ يا رب يا طنط ياااااااااااارب اهئ اهئئئئئئئئئئئئئ

 

اوعي تكوني قولتي حاجة للولاد ؟

 

اهئ اهئئئئئ لا يا طنط اهئ اهئئئئئ هما عارفين انه مسافر اهئ اهئئئئئئئ سيبتهم مع ماما وقولتيلهم هاجي اخدكو بكرة اهئ اهئئئئئئئئ

 

طيب يا بنتي , انا هروح اصلي ركعتين وادعيله

 

اهئ اهئئئئئ اتفضلي يا طنط , اهئ اهئئئئئئئ يا حبيبي يا هاني اهئ اهئئئئئئئئ يارب قومه بالسلامة ياررررررررررب اهئ اهئئئئئئئ اهئئئئئئئئئئئئئئ, ايه ده ! ده اخوه ماجد ومراته جايين بيجروا في الطرقة

 

 

 

السلام عليكم , هاني فيييييييييييين

 

اهئ اهئ وعليكم السلام يا استاذ ماجد اهئ اهئ هاني لسة في اوضة العمليات اهئ اهئئئئئئئئ ادعيله يقوم بالسلامة اهئ اهئئئئئئئئ

 

اللهم لا حول ولا قوة الا بالله , ان شاء الله هيقوم بالسلامة , اطمني يا مدام رشا

 

قلبي عندك يارشا , معلش يا حبيبتي , ان شاء الله هيقوم بالسلامة

 

اهئ اهئئئئئئئ ادعيله يا منال اهئ اهئئئئئئ

 

ما تقلقيش يا حبيبتي , ربنا كبير ورحمته واسعة , تعالي اقعدي , شكلك مجهدة اوي

 

اهئ اهئ انا لا قادرة اقعد ولا قادرة اعمل أي حاجة اهئ اهئئئئئئ انا عايزة اطمن على جوزي اهئ اهئئئئئئئئ

 

ربنا يطمن قلبك يا حبيبتي

 

, فين امي ؟

 

 

اهئ اهئئئئئئئ طنط دخلت الغرفة دي عشان تصلي

 

طيب عن اذنكو انا رايحلها

 

خدني معاك يا ماجد , عن اذنك يارشا , هسلم على ماما امينة واجييلك يا حبيبتي

 

اهئ اهئئئئئئئ اتفضلي يا منال اهئ اهئئئئئئئئئئئئ

 

 

 

 

 

ياااااااااااه , شايف يا ماجد ؟ ماما امينة قاعدة بتقرأ قرآن ودموعها نازلة اهئ اهئ اهئئئئئئئئ

 

 

اميييييييي

 

ماما اميييييييييينة

 

ماجد ومنال ! اهلا يا ولاد

 

 

ايه الدموع دي كلها يا امي

 

اهئ اهئ اهئئئئئئئئئ حاولت احبس دموعي قدام مرات هاني عشان هي منهارة ومش متحملة , قولت بلاش ازود همومها واحاول اتماسك قدامها عشان ما تنهارش اكتر اهئ اهئئئئئئئئئئئئئئ شوفت اللي حصل لاخوك يا ماجد ؟ اهئ اهئئئئئئئئئئئئئ

 

يا امي بالله عليكِ تماسكي , ان شاء الله هيقوم بالسلامة

 

اهئ اهئئئئئئ ان شاء الله يا حبيبي , اقعدي يا منال

 

 

اهئ اههئئئئئئئئ بالله عليكِ يا ماما ما تعيطيش , انا مش بتحمل اشوف دموعك والله اهئ اهئ ان شاء الله حاجة بسيطة

 

اهئ اهئ اهئ يارب يا حبيتي , الرصاصة جت في صدره اهئ اهئ بعيد عن القلب اتنين سنتي اهئ اهئئئئئئ الحمدلله

 

 

الحمدلله يا امي , ربنا كرمنا وماجاتش في القلب , هما قبضوا على المجرم اللي ضربه ؟

 

اهئ اهئ ايوة يا حبيبي , الحمدلله , ربنا يعامله بما يستحق اهئ اهئئئئئئئئئ يارب نجي ابني يارب اهئ اهئئئئئئئئ

 

 

ولسة عصام ما عرفش بللي حصل لهاني يا امي ؟

 

عصام ! هو انا عارفة عصام فين ولا راح فين يا ماجد ! لا طبعا ما عرفش بللي جرا لاخوه وإلا كان اكيد جه

 

 

طيب يا امي انا هروح اقف على باب غرفة العمليات وانتظر الدكاترة عشان اطمن

 

 

اهئ اهئ روح يا ماجد , وانتِ يا منال روحي وخليكي جنب رشا يا حبيبتي , حاولي تخليها تتماسك

 

حاضر يا ماما , ربنا يطمنا كلنا ان شاء الله

  • معجبة 1

شارك هذه المشاركه


رابط المشاركه
شارك

الدكاترة خارجين من غرفة العمليات اهمممم , دكتورررررررر طمني على اخوياااااااااا

 

حضرتك اخو المقدم هاني زاهر يا فندم ؟

 

ايوة ايوة طمني بالله

 

الحمدلله , خرجنا الرصاصة بصعوبة

 

وهو عامل ايييييييييه

 

لسة في البنج , هننقله العناية المركزة

 

طيب يعني حالته مطمئنَة يا دكتورررررر

 

ان شاء الله مافيش خطورة , عن اذنك

 

اتفضل , الحمدلله

 

 

ايه يا ماجد يا ابني , الدكتور قال اييييييييييييييييه

 

اطمني يا امي , خرجوا الرصاصة وهينقلوه دلوقتي العناية المركزة , اطمني يا حبيبتي وطمني مراته

 

 

 

اهم مخرجين هاني من اوضة العمليات اهو اهئ اهئ يا حبيبي يا ابني اهئ اهئ هااااااااااني يا هاني اهئ اهئئئئئئئئئئئ يا حبيبي يا ابني

 

 

بس يا امي ارجوكِ , احنا نحمد ربنا والله انه بخير والعملية نجحت

 

اهئ اهئ اللهم لك الحمد اهئ اهئ غصب عني والله يا ماجد اهئ اهئ انا ما بتحملش حتى شوكة تشك واحد فيكو اهئ اهئ صعب عليا اشوف هاني مضروب بالرصاص في صدره وعشان ايه ! عشان بيأدي واجبه اهئ اهئ اهئئئئئئئئئئئ

 

يا امي ده دوره كظابط بوليس , اومال مين يعني هيقضي ع الفساد ! الحمدلله انها جت على قد كدة

 

 

اهئ اهئ انا هروح اسجد سجدة شكر يا ماجد عشان اخوك خرج من اوضة العمليات بخير اهئ اهئ اهئ

 

روحي يا امي وانا كمان هسجد شكر ان ربنا نجى اخويا , اللهم لك الحمد

 

 

 

 

 

 

 

 

 

ماما , مش عارفة رشا مالها ؟

 

مالها يا منااااااااال

 

مش عارفة والله , من نص ساعة قعدت جنبي وبعدين لقيت عنيها غمضت , قولت يبقى اكيد نامت , دلوقتي بحاول اصحيها عشان اطمنها على جوزها بس مش بترد ولا بتستجيب , انا خايفة يكون مغم عليها ولا حاجة

 

مغم عليها ! وريني كدة , رشااااااا يارشا , الله ! دي مغم عليها يا منال , لا حول ولا قوة الا بالله , هاتي يا بنتي شوية مية ارشهم على وشها

 

لا حول ولا قوة الا بالله , اتفضلي يا ماما

 

رشااااا يارشا , قومي يا بنتي , قومي يارشااااا فوووووقي , فوقي يا حبيبتي , هاني كويس والله , هاني خرج من اوضة العمليات

 

هااااااااااااني اهئ اهئئئئئئئئ هاني فيييييييييين اهئ اهئئئئئئئئ انا عايزة هاني اهئ اهئئئئئئ يا هاااااااااني اهئ اهئئئئئئئئ

 

هاني كويس وبخير يا حبيبتي , خرج من اوضة العمليات والله , نقلوه العناية المركزة

 

اروح اشووووووووووفه اهئ اهئئئئئئئئئئئ

 

اقعدي اقعدي يا رشا , الزيارة ممنووووعة

 

لالالالالا ماليش دعوة اهئ اهئئئئئئئئئ انا هشوفه يعني هشووووووووووفه

 

 

لا حول ولا قوة الا بالله , جريت على العناية المركزة

 

الله يكون في عونها يا ماما , ده جوزها وحبيبها , ربنا يشفيه يارب

 

 

يارب يا بنتي يارب

 

 

 

 

 

 

 

اهئ اهئئئئئئئ من فضلك يا دكتور , انا حرم المقدم هاني زاهر , عايزة اشوفه من فضلك

 

اهلا بحضرتك يا مدام , الزيارة مننوعة والله , حتى لو دخلتي هتلاقيه لسة في البنج , يعني مش سامعك ولا هيرد عليكِ

 

اهئ اهئئئئئئئ اهم حاجة اشوفه ارجوووووووووووك اهئ اهئ انا مش هتكلم ولا هزعجه اهئ اهئئئئئئ بس اشوووووووووفه

 

مممممممم طيب , هسمحلك بدقيقتين بسسس

 

طيب طيب يا دكتور , اشكرك جدااااااااااا

 

 

 

 

 

 

اهئ اهئ هاني حبيبي اهئ اهئئئئئئئئئئئ هااااااااااني رد علية يا حبيبي اهئ اهئئئئئئئئئئ انا رشا يا هاني اهئ اهئئئئئئئئئئئئ سلامتك يا حبيبي اهئ اهئئئئئئئ سلامتك قوم بقى ورد علية يا حبيبي

 

 

مداااااااااااااام , اظن كفاية كدة , اتفضلي وسيبيه يرتاح

 

اهئ اهئ امرك يا دكتور اهئ اهئئئئئئئئئئئئ من فضلك هبوس ايده بس وهخرج على طول

 

 

اتفضلي يا مدام

 

هاني اموووه يارب تقوم بالسلامة يا حبيبي , انا مستنياك والولاد مستنينك عشان تنور حياتنا اهئ اهئئئئئئ الدنيا وحشة اوي من غيرك يا هاني اهئ اهئئئئئئئ

 

 

يلا يا مدام من فضلك

 

اهئ اهئ امرك يا دكتور , مستنياك يا هاااااااااااني اهئ اهئئئئئئئئئئئ

 

 

 

 

 

 

 

 

 

 

 

 

 

طيب يلا يا امي عشان تروحي البيت ترتاحي شوية

 

ارتاح ! ارتاح ازاي يا ماجد ! مش هرتاح الا لما اخوك يفوق واطمن عليه

 

 

يا امي يا حبيبتي , هاني لسة قدامه وقت على ما يفوق ويتكلم

 

وانا مش هقدر امشي واسيب ابني , خد مراتك وروحوا يا حبيبي , انا عارفة انك ما روحتش المدرسة النهاردة عشان تقعد جنب اخوك

 

 

طيب يا امي انا همشي دلوقتي واجي بالليل ان شاء الله , وبإذن الله تكون حالته اتحسنت ونطمن عليه , يلا يا منال

 

 

مممممم طيب استنى يا ماجد اقول لرشا حاجة

 

 

اتفضلي

 

 

رشاااااااا

 

نعم يا منال

 

هما الولاد فين يا حبيبتي

 

سايباهم عند ماما

 

طيب انا هعدي اخدهم انا وماجد عشان يقعدوا معانا لحد ما ترجعي البيت

 

لالالا بلاش اتعبك , كفاية عليكِ ولادك يا منال , ولادي متعبين ومش هتتحمليهم

 

ده كلام تقوليه برضو يا رشا ! يا حبيبتي احنا اخوات وولادك هما ولادي والله , وبعدين صدقيني عندي هيكون احسن عشان هيقعدوا مع ولاد عمهم ويلعبوا معاهم ويتسلوا , لكن عند مامتك اكيد هيزهقوا ويملوا , وكمان الكبار في السن مش بيتحملوا التعامل مع الصغيرين , بعد إذنك هعدي اخد الولاد وما تقلقيش عليهم , دول في عنيا والله

 

والله يا منال مش عارفة اقولك ايه ! دايما سباقة بالخير وخدومة وما تتأخريش في الواجب

 

ما تقوليش كدة , احنا اهل وعيلة واحدة , مش عايزة حاجة قبل ما امشي يا حبيبتي ؟

 

ربنا يخليكِ يا منال , متشكرة اوي

 

طيب , السلام عليكم ورحمة الله

 

وعليكم السلام ورحمة الله يا منال

 

 

 

 

 

انا ماشية يا ماما امينة , مش عايزة حاجة ؟

 

عايزة سلامتك يا منال يا حبيبتي , سلمي ع الولاد وعلى باباكِ

 

الله يسلمك يا ماما , السلام عليكم

 

وعليكم السلام يا بنتي , يا رشاااااااا اقعدي يا بنتي اقعدي بلاش التوتر اللي انتي فيه ده , الحمدلله هاني بخير وكله ساعات ويفوق ويتكلم معانا ويطمنا عليه

 

ان شاء الله يا طنط , منال هتعدي تاخد عبد الرحمن ومنة من عند ماما

 

فيها الخير والله , توقعت انها تعمل كدة , ما تقلقيش على الولاد , منال حنونة جدا وهتحتويهم

 

انا عارفة والله يا طنط , انسانة خلوقة وهايلة جدا , والله انا بحبها بس للأسف مش بتواصل معاها , بس بجد جميلها ده هفضل شايلاه طول العمر , كفاية انها اول ما سمعت الخبر جت جري وما سابتش جوزها يجي لوحده , مش زي التانية اللي ماحدش شاف وشهااااااااا ولا كأن اللي اتضرب بالنار ده اخو جوزهاااااااااااا

 

 

معلش يا بنتي , كل واحد ليه ظروفه , جايز ما تعرفش

 

ما تعرفش ! حتى لو عرفت هتعمل ايه يعني !!!!!!!!!!!! هو ده المتوقع منها

 

 

 

 

 

 

 

 

 

 

 

 

 

 

 

 

 

حميدة يا حميييييييييييدة

 

نعم يا سرفيناز هانم

 

فين هاشم

 

هاشم بيه في الجنينة بياخد الفطار وبيقرا الجرانين

 

ايه جرانين دي ! الف مرة اقولك اسمهم جرانيل جرانيييييييييييييل , جمع مذكر سامي من جورنال

 

سامي مين يا ست هانم !!!!!!

 

مش فاكرة والله , اصل انا تعليمي انجليزي , هو انا فاكرة كان اسمه جمع مذكر وبعدين اسم بني ادم مممم هسأل هاشم , روحي انتي صحي نسرين ورامي وايتن عشان ياخدوا الفطار

 

 

حاضر يا ست هانم

 

جود مورينج هاشم

 

 

اهلا حياتي ههههههه جود موريننج سيرفي

 

 

كنت عايزة اسألك سؤال في اسمها ايه دي اللغة العربية

 

ههههه وانت مالك ومال اللغة العربية من اساسه !!!!!!

 

ولا حاجة , مش ليا دعوة بيها , بس كنت عايزة اعرف لما بنقول جمع مذكر , مش بيجي بعدها اسم مواطن ؟

 

ههههههه ايوة , سالم , جمع مذكر سالم

 

هههه ايوووووووة اوكيه اوكيه , هو مستر سالم ده , مممممممم هات المجلة دي اشوف اخبار الازياء

 

 

اتفضلي يا روحي , مش هتاخدي فطارك ولا ايه

 

 

هستنى نسرين , واووووووووووووو شوف يا هاشم الفستان ده تري تري شيك

 

ههه حلو يا روحي

 

 

ممممممم اجيبه ؟

 

 

لنسرين ؟

 

نوووووووووووووو ليا انا طبعا

 

 

لالالالالا حبيبتي مش مناسب لسنك خاااااااااااااالص

 

 

افندممممممممممممممممم , سني !!!!!!!!!!! ايه سني دي !!!!!!!! شايفني ماسكة عكاز ولا مسنديني يا هاااااااااااشم , اسحبهااااااااا من فضلك اسحبها , انا لسة صغيرة ومن حقي البس واخرج وافرح بشبابي كماااااااااااااان

 

 

حياتي انا ما اقصدش , انا اقصد ان كل سن وليه لبس مناسب , يعني الفستان ده انسب لنسرين

 

 

يا سلااااااااااااااااام ! انا لسة ما عجزتش يا هاااااااااااااشم انا مسافرة الأسبوع الجاي اعمل عملية شددددددددد

 

 

ههههههه روحي يا حبيبتي , شدي , شدي اوووووووووي لحد ما وشك يتشقق , سيبيني اقرا الجورنااااااااااال

 

 

ما تقرا ولا ما تقراش وانا مالي انااااااااااااااا

 

 

ايه ده يا خبرررررررررررر , معقول اللي مكتوب في الجورنال ده !!!!!!!!

 

 

في ايه يا هاشم , اسهمك في البورصة جرالها حااااااااااااجة ؟

 

لالالالالالالا ده المقدم هاني زاهر اخو عصام جوز نسرين اتصاب برصاصة في صدره وهو بيواجه مجرمين وتجار مخدرات

 

 

اتصاب برصاصة وهو بيواجه المجرمين ! يستااااااااااااهل , ماله هو ومال المجرمين ! المفروض ما ينزلش للمستويات دي ولا يتعامل معاهاااا

 

والله ! دا ظابط بوليسسسسسسسس يعني لازم يحمي المجتمع من شر المجرمين دوووووووووول

 

 

طيب اهو خد طلقة في صدره , خلي المجتمع يبقى ينفعه

 

 

مش واجب نروح نزوروه ؟

 

نزور مين , المجتمع ؟

 

 

مجتمع ايه يا سرفيناز ! انا بتكلم عن اخو جوز بنتك

 

واحنا مالنا احنا !!!!!!!! حاجة ما تخصناش

 

ما تخصناش يعني ايه ! لالالالا مش معقول , المفروض نروح

 

لا تروح ولا تيجي , ابعت بوكيه ورد وخلاص

 

مممممم تفتكري كدة ؟

 

ايوة

 

خلاص , هبعت بوكيه ورد بإسمي واسمك , بس واجب نسرين تروح

 

ونسرين مالهااااااا , نسرين تروح تشوف واحد مضروب بطلقة في صدره ! انت عايز البنت تتعقد ويجيلها كوابيس ! انت عارف ان نسرين رقيقة ومش بتتحمل المواقف الصعبة دي

 

ممممممم , طيب , اهي جاية اهيه , نقولها ونشوف هتعمل ايه

 

 

هاااااااااااااااااااااي مامي هاااااااااااااااااااي دادددددددددددددي

 

 

هاي حبيبة مامي

 

ازيك يا نسرين

 

فاين دددددددددداد فاين , طول الليل مش نمت خالص يا مامي

 

ليه يا روحي ! عندك ارق ولا ايه ؟

 

نوووووووو مامي نوووووووووو , انا اصل كنت بفكر اصبغ شعري بغو ولا ارجواني ؟ هتجنن من التفكيرات , مش قادرة اوصل لقرار , لحد ادانات الفجر وانا عيني مفتوحة اد كدة وعمالة افكر , اقول بغوووو عقلي يقولي نوووووووووو اقول ارجواني عقلي يقولي فكري تاااااااااني , هتججن مامّوووووووو هتجنن

 

طيب اقولك تسألي مين ؟

 

مين مامي مين , خرجيني من حيرتي همووووووووووت من الحيرة اهئ اهئ اهئئئئئئئ

 

عارفة يا نسرين في واحدة صاحبة لي لي اختي فظيعة في اختيار الوان الشعررررررر , ذوقها واووووووووو , كل مرة كانت تعمل في شعرها الوان تبهرناااااااااا تخلينا واقفين فاتحين بقنا من جمال لون شعرها , ست شيك اوووووووووي

 

اسمها ايه دي يا مامي وانا اخد تليفونها من طنطي لولى واروحلها فوراااااااااااا

 

اسمها نيلي نينو

 

باباها اسمه نينو ؟

 

لا يا روحي , ده اسم الكلب بتاعها , اصلها تحبه اوي عشان كدة مسمية نفسها بإسمه

 

واوووووووووو , اد ايه ست مخلصة للكلاب , انا بعد ما اخد البريك فاست بتاعي هقوم اخد شاور وبعدين اخد عربيتي وطيران على طنطي لولى اشوف حكاية طنطي نيلي نينو دي

 

 

 

 

 

الفطار بتاعك يا نسرين هانم

 

 

جبتي عصير الجريب فروت ؟

 

ايوة يا ست هانم , اهو

 

ثانك يو دادة ميدا

 

اسمي حميدة حميدة مش ميداااااااااا

 

اسمك وحششششششش , في حد في الدنيا اسمه كدة ! وكمان زعلانة اني بعمله دلعات !!!!! يلا امشي يا ميدا امشي عشان انا زعلاننة منك ومن باباكِ ومامتك اللي سموكِ الاسم الوحش خالص ده

 

 

 

على فكرة يا نسرين يا بنتي , اخو عصام خد طلقة في صدره

 

ايه طلقة دي ! مين ادهاله يا دادي ؟ خدها من مين ؟ المفروض يرجعها لصحابه عشان ما يصحش ياخد حاجة مش بتاعته

 

يا بنتي خد طلقة يعني اتضرب بالنااااااااار بالرصااااااااااص

 

واوووووووووووووووو ! اخوه مين ؟

 

المقدم هاني

 

هههههههههه يا حرام , جوز رشا ! هههههههههه مع اني مش بحبها بس صعبت عليا خالص ههههههههه هو مات ولا لسة ؟ ههههههههههههه

 

صعبت عليكِ !!!!!!!!!!! ممممممم لا يا ستي ما ماتش , في المستشفى , هتروحي تزوريه ؟

 

ازور مين دادي ! هو انا فاضية ! انت لسة سامعني بتتكلم مع مامي في موضوع مهم وخطيرررررررر جدا وهو تغير لون شعري ولسة ورايا مشورات لطنطي لولى وطنطي نيلي نينو ولسسسسسسسسة هروح للكوافير عشان اعمل اللون اللي هتحدده طنطي نيلي نينوووووووووووووو عارفينو ولا مش عارفينوووووو ههههههههههههههههههههههههههههه

 

 

براحتك يا نسرين , انا رايح المستشفى عندي عملية كمان ساعة , عايزة حاجة يا سرفي يا حياتي

 

هات خمس الاف جنيه يا هاشم

 

بتوع اييييييييييييييييييه !

 

مش بتوع حاجة , اصل خارجة هقابل جروب لطيف من اصحاب القدام , جايز اعزمهم ع الغدا

 

مممممم واجب برضو , حاضر يا ستي , الخزنة عندك وخدي اللي انتي عايزاه

 

اوكيه هاشم

 

 

هتتغدا بخمس تلاف جنيه هي واصحابها ! لييييه ؟ عازمة غيلان نازلين من الجبل !!!!!!!!!!

شارك هذه المشاركه


رابط المشاركه
شارك

حبيبااااااااااااااااتي وكلكم حبيباتي

 

راماس

 

ام العبادلة

 

ام رقية

 

ام بشار وعبد

 

صفا

 

سارة محمد

 

يحبهم ويحبونه

 

ريحانة زوجي

 

ريحانة السماء

 

حواء

 

ام عبد الرحمن وجنة

 

 

 

وحشتوووووووووووووني

 

وكل الاخوات المتابعات وحشوني والله جدا ووحشتني تفاعلاتهم وتعليقاتهم الجبارة على الاحداث

 

 

واحب اقول بناء على طلب ام العبادلة يسعودوني ويشروفوني اني اقابل الطلب بالرفض هههههههههههههه

 

والله يا اختي غصب عني , الاحداث كتير وفيها زخم والشخصيات كتيرررررر

 

طب اعمل ايه بس يا حبيبتي !!!!!!!! الغي شخصيات ولا اعمل ايه ! هههههههههههه

 

على العموم مش هتبقى كتيرة بالدرجة اللي انتِ متخيلاها يا ام عبد الرحمن , يعني يادوب على ماتشوفي كل شخصية جرالها ايه هتلاقي الحلقة خلصت من غير ما تحسي ههههههههه

 

والكلام ليكِ يا سارة محمد يا سوسو يا قمر يللي وحشاااااااااااني

 

 

 

افرحي يا ام رقية , انتصرتي على ام العبادلة في المباراة الودية صفر صفر لصالح ساحل العاج

 

 

فكرتيني بواحدة صاحبتي كان غاوية كورة وكانت ساكنة في الشقة اللي قصادي

 

وانا بقى ماليش في الكورة خاااااااالص , بعد المبارة ما خلصت والفريق بتاعها فاز , فتحت الباب وقعدت تتنطط وتنادي علية وهي فرحانة وتقولي يا هببببببببببببببة الاهلي فاز اتنين صفر

 

قولتليها لصالح مين هههههههههههه قالتلي لصالح الاسماعيلي هههههههههههههه

 

مالنا احنا ومال مباريات كرة القدم ! خلينا في المباريات الودية وغير الودية بين ابطال المسلسل

 

اصبروا اصبرواااااااااا هتشوفوا بلاوي من الابطال هههههههههه الله المستعان

 

اسيبكو بقى عشان اروح اقمع البامية , مافيش واحدة بنت حلال تيجي تساعدني ؟ هههههههههه

 

اسيبكو مع الحلقات ويارب تعجبكو

 

اشفكو بكرة مع الاحداث المشوقة لمسلسل خلف هذه الجدران

 

السلام عليكم

شارك هذه المشاركه


رابط المشاركه
شارك

وعليكم السلام ورحمة الله وبركاته

اهلاااا هبه منوره

وانتى كمان وحشتينى

هو ده الكحكك بتاعك فعلا ؟ حقيقى ؟ ( :

جميل جزاك الله خيرا

 

كنت عايزاك كده تعملى نبذه مختصره عن الشخصيات تفكرينا بيهم ههههه

شارك هذه المشاركه


رابط المشاركه
شارك

يا ترى يا ريييم هيعملوا فيكي ايييييه!!!!!

أحلى حاجة فيكي ثقتك بربنا وتوكلك عليه دايما

كلنا لها يا ألبي

 

وصبحي الله أعلم مصيره هيبقى اييييه!! بس خلاص بقى مهمته معاكي انتهت شيليه بقى من دماااغك

يا قلبك الحنين هههههههه سايبه اللي انتي فيه وصعبان عليكي صبحي هههههه

 

 

الله يصبرك يا رشااا صعبتي عليا اووووووي ,, مع ان اللي يشوفك دلوقتي ميشوفكيش وانتي مطلعة عين جوووزك قبل كده هههههههه

والله منال دي محترمة اووووي وموقفها مع سلفتها جمييييل جدااااا ,,, آآآآه لو في منك اتنين يا منوووله ههههههه

 

 

اما نسرين وامها اللي عايزين الدبح دول مستفزين اووووووي ,,,

ايه يا سيرفي اتقي الله دا انتي على باب القبر اهو وعايزة تشتري فستان ,, يختي انجغا هههههه

 

ولا نسرين اللي عايشة في المريخ ههههههههههههههههههههههههههههههه خد رصاصة يبقى يرجعها هههههههههههههههه

والله انتي بلاااااء هههههههههه

شارك هذه المشاركه


رابط المشاركه
شارك

كده ارحم يا هبه متزوديش بقى هههه

 

والحمد لله ان هانى كويس

 

وهى نسرين قاعده عند امها ليه ؟

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏‏ثبتت امرأةُ فرعونَ وهي في بيتِ أكبر طاغية! وانتكست امرأةُ نوحٍ وهي في بيتِ أكبر داعية! ضغط الواقع ليس عذرًا للتفلت من التكاليف الشرعية . ╰🌸🍃╮

×