اجتماع للأمهات اللى أطفالهم أقل من سنتين

[أم دعاء1 0]

ما شاء الله فكرة رائعة

 

بس الي لو أطفال أكبر مالوش نصيب

 

أنا باقترح نعلم قسم خاص بتربية الأطفال

 

واعذروني لأني اقترحت في الصفحة دي بدل قسم الاقترحات

 

لاني بصراحة وقتي ضيق جدا ولا أملك نت البيت

 

ايه رأيكن ؟

[om_mohamed 0]

انا معنديش مانع يا اختى ام دعاء وباذن الله نلاقى اقبال ورد من جميع الاخوات وكل عام وانتى بخير

[أم عائشة المصرية 242]

حبيبتي ام محمد جزاك الله خيرا وأنا فعر كنت ناوية أرفع الموضوع بعد رمضان فبارك الله فيك..

 

أختنا أم دعاء أهلا بك في منتدانا وهو فعلا في قسم خاص بأطفال اسمه آمال المستقبل فأرجو أن تتصفحيه وستجدي ما يفيدك..

[om_mohamed 0]

لا ده انتوا كسلانين خالص

طب انا عاوزة نصيحة بنتى بتتبرز كل يومين او تلاتة ؟؟ هل هذا طبيعى ام اعرضها على الطبيبة؟؟؟

[~ أم العبادلة ~ 1903]

لا ده انتوا كسلانين خالص

طب انا عاوزة نصيحة بنتى بتتبرز كل يومين او تلاتة ؟؟ هل هذا طبيعى ام اعرضها على الطبيبة؟؟؟

السلام عليكم ورحمة الله وبركاته،،

ابني عمره اقل من شهرين و كان ساعات بيقعد 4 ايام من غير براز ولما قلت للدكتورة قالتلي طالما مش تاعبه يبقى مافيش مشكلة

اما لو عندها امساك يبقى اديها لبوس جلسرين وفي ثواني هتنحل المشكلة ولكن ما تعودهاش على كدة احسن تيجي في فترة ما تعرفش تتبرز من غيره

 

الاهم من ده كله انت عندك اسهال ولا امساك ولا عادي لان الطفل دايما زي امه وبيتاثر باكلها فانت كلي الاكل اللي بيلين المعدة ويعملك اسهال ده لو عندك امساك وان شاءالله تفرج

وعليكم السلام ورحمة الله وبركاته،،

[~ أم العبادلة ~ 1903]

السلام عليكم ورحمة الله وبركاته،،

الاسم: أمة الرحمن

السن: 28 سنة

الاطفال: عبدالرحمن الاول والوحيد عمره 55 يوم

 

نصائحي: الا تعاملي ابنك\بنتك على انهم اطفال لا يفهموا شيئا وانما تحدثي معهم باستمرار وحاوريهم كانهم كبار ويفهمون كل شئ وسيساعدهم ذلك على النمو بشكل افضل واسرع من غيرهم مما هم في سنهم لانك تعليميهم و تعوديهم منذ صغرهم حتى لو لم يفهموا ما يحدث ولكن من كثرة رؤيته سيتعلمون ان هذا شئ اساسي وبعد ذلك سيفهمون ما هو

ايضا لكل من تقول انه صغير لا يفهم: ممكن تقولوا لي ما هو اليوم والساعة والدقيقة واللحظة التي يصبح فيها يفهم ويستوعب؟ فانا لست على استعداد ان انتظر بعد مرحلة نضجه بفترة بما اني لا اعرف متى تكون ثم ابدا بتعليمه وقد يكون قد فات الاوان

[~ أم العبادلة ~ 1903]

ايضا لكل من تقول انه صغير لا يفهم: ممكن تقولوا لي ما هو اليوم والساعة والدقيقة واللحظة التي يصبح فيها يفهم ويستوعب؟ فانا لست على استعداد ان انتظر بعد مرحلة نضجه بفترة بما اني لا اعرف متى تكون ثم ابدا بتعليمه وقد يكون قد فات الاوان

اسفة على الدخول الهجومي ولكن سببه هو انتقاد الجميع لي في اسلوب تربيتي وافكاري و بيسموني "بتاعة الكتب"

 

وده سببه ان كنت اعيش بالخارج وادرس رياض الاطفال "من يوم ولادة الطفل الى سن 10 سنين" وبالتالي اطبق ما درسته وتعلمته في المعهد او الشغل و استغله في تربية ابني وبما انه منافي للعادات والتقاليد هنا فهو مرفوض

[om_mohamed 0]

جزاكى الله خيرا يا اختى amutal_rahman وانا معك جدا ان العلم مفيد واهم شئ ان يتربى الطفل بطريقة سليمة حتى لو خالف ذلك التقاليد والعادات القديمة

وياريت تفيدينا بقراءاتك فى هذا الموضوع

[~ أم العبادلة ~ 1903]

جزاكى الله خيرا يا اختى amutal_rahman وانا معك جدا ان العلم مفيد واهم شئ ان يتربى الطفل بطريقة سليمة حتى لو خالف ذلك التقاليد والعادات القديمة

وياريت تفيدينا بقراءاتك فى هذا الموضوع

وجزاكي كل خير حبيبتي

 

هحاول افيدكم على قد ما اقدر وعلى فكرة انا درست سنة واحدة بس وبعدها سافرت واتجوزت فخبرتي هتكون قليلة وتعتمد على التدريب العملي اللي عملته علشان كده انا بعتمد على الكتب على قد ما اقدر

 

انا بقى اللي عندي استشارة:

انا ابني داخل على الشهرين وعايزة اعرف امتى الوقت المناسب انه ينام لوحده في سرير منفصل وحجرة منفصلة؟؟

 

انا كنت هنيمه لوحده من الاول بس زوجي حفظه الله سافر ومش راجع الا بعد فترة وعلشان كده من يوم ما اتولد وهو نايم جنبي وساعات في حضني. قلت ادينا نونس بعد وعلشان الغرفة التانية بعيدة وممكن ما اسمعوش لما يصحى بالاضافة اننا داخلين على شتا والجو هيكون ساقع عليه لوحده

 

انا عارفة ان ده غلط بس اعمل ايه؟؟

اللي قلقني انه بالرغم انه صغير بس لو نيمته بليل ورحت اعمل حاجة، بالكتير نص ساعة ويصحى يصرخ ومش يسكت الا لما انام جنبه مع انه بطبيعته مش بيصرخ واخر مرة حصل كده كان من شوية وده قلقني اني ممكن معرفش انيمه لوحده

 

انا عايزة ادربه على النوم لوحده قبل ما زوجي ربنا يحميه يرجع من السفر وهو هيرجع في شهر يونيو باذن الله

 

اعمل ايه وابدا من امتى؟؟

 

وعليكم السلام ورحمة الله وبركاته،،

[ساجدة للرحمن 2050]

بسم الله الرحمن الرحيم

أنا قرات مشاركتك أختي أمة الرحمن و أسمحيلي أجاوب عليها

أنا بصراحه من أنصار إن الطفل الصغير ينام مع والدته في نفس الغرفه , يعني ممكن تجيبي سرير أطفال في نفس الغرفه بحيث لو بكى بالليل تقدري تسمعيه,, وكمان إحنا داخلين على الشتاء و لازم كل شويه تطمني أنه ماشلش الغطاء من عليه

وبكده هايتعود أنه بينام في سرير لوحده وفي نفس الوقت هايحس بالأمان لأنه مع والدته في نفس الغرفه لحد مايكبر شويه و بعدين يروح غرفه خاصه به

والسلام عليكم و رحمة الله و بركاته

[ام هبة2 0]

 

انا عايزة ادربه على النوم لوحده قبل ما زوجي ربنا يحميه يرجع من السفر وهو هيرجع في شهر يونيو باذن الله

 

اعمل ايه وابدا من امتى؟؟

 

وعليكم السلام ورحمة الله وبركاته،،

 

وعليكم السلام ورحمة الله

اسمحيلي اجاوبك اختي وانا معنديش خبرة كبيرة لكن المفروض انك تبداي من يوم ولادته وزي ماقالت الاخت ساجدة انت تجيبيلو سرير صغير بغرفتك, وانا برضو مش من انصار انو الطفل ينام لوحدو من الاول الا لما يكبر, وانا نصحتني بده الممرضة من ولادتي قالت لي لو نيمته جنبك مش حيرضى ينام لوحدو ابدا لانو جسمك بكون دافي ليه وبحس بالفرق لو نام لوحدو. وطبعا الام وحنيتها بتخليها تحضنو عليه لكن يااختي ده عشان مصلحتو ولازم يتعود يعتمد على نفسو. فانتي حتلاقيها صعبة بالاول وحيبكي كتير بس اوعى تشيليه عليك يعني التردد مش كويس مش تحطيه يوم وبكرة يبكي تاخديه كدة مش حيتعود ابدا, وابداي من الان روحي جيبيلو السرير وممكن تخلي السرير لصق سريرك عشان تحسي بيه لو صحي واصبري كم يوم وهو حيتعود.

وطولت عليك لكن انا بنتي من الاول عودتها على سريرها الحمد لله, لدرجة انها لما اكون شايلاها وتنعس مبتنامش وتفضل تبكي لما احطها على سريرها تنام على طول ولوحدها.

اتمنى اكون فدتك.

[~ أم العبادلة ~ 1903]

انا ما جبتش سرير على اساس ان زوجي ربنا يحميه كان مسافر فقلت مش هحتاجه ومش هقدر اجيب واحد دلوقتي

انا امبارح نيمته وروحت اعمل حاجات بالمطبخ فصحي وما شفنيش جنبه واسمعي صوت الصريخ مع انه هو بطبيعته مش بيصرخ وعياته ضعيف فسبته كتير وبقى ينام ويصحى يعيط كل شوية وبعدين قلت اروحله عشان ممكن يكون جعان بما انه مرضعش كويس

 

العجلة بتاعته بتتفرد زي السرير فهنيمه فيها مع اني اظن انه مش هيعجبه علشان مش هيعرف يتحرك براحته اصله تبارك الله بيتحرك كتير ولو نايمتيه بالطول تصحي تلاقيه نايم بالعرض

 

بالنسبة لاحتياجه ليا بلليل المفروض ده لقاية ما يبدا ياكل يعني ممكن على الشهر الرابع او الشادس لانه وقتها مش هيحتاج يرضع بلليل

 

وعلى فكرة انا معنديش مانع انه ينام معايا بس انا مقطنعة ان الطفل بيلقط اللي بيحصل بين امه وابوه وحتى لو مش فاهمة بس بيتخزن في الذاكرة ده بالاضافة انه لو اتعود عليكي صعب ينام في حته تانية علشان كدة عايوة اعوده بدري

 

كلكم بتقولوا يكبر شوية، تقصدوا يكبر لاي عمر؟؟

[om_mohamed 0]

اختى الغالية انا من رايى برضه ان الطفل لازم ينام فى سرير لواحده بس يكون فى غرفتك ..حتى لو حطيتى لو فرشة على الارض بس يكون معاكى فى الغرفة علشان يتعود ينام على سرير لوحده وفى نفس الوقت تبقى جنبه لو احتاجك فى حاجة وربنا يخليهولك يارب

[~ أم العبادلة ~ 1903]

انا فردت العجلة بتاعته وخليتها سرير وحطيتها جنب سريري وسيبته فيها طول اليوم وعيت كتييييييييييييييييييييييييييييييييييييييييييييييييييييييييييييييييييييير جدا لغاية ما انا نفسي تعبت ومن كتر العيات كان مهدود طول اليوم ونام كتير وبلليل نفس الحكاية واظاهر انه لقى مافيش فايدة واستسلم الحمدلله

 

اتمنى انه يفضل كده بس في نفس الوقت سيبته شوية على السرير جنبي ولما برضعه وينام بحطه بالعربية وربنا ييسر

 

لو العربية نفعت يبقى ممكن اسيبه كده لغاية الشتا ما يخلص اما لو طوله زاد عن 5 سم يبقى لازم انقله الغرفة التانية

[~ أم العبادلة ~ 1903]

كنت بتكلم مع خالتي وجدتي دلوقتي على ابني وازاي اني بخليه ينام لوحده علشان اخليه ينام في غرفة لوحده بعد كده ممكن على ما يتم 6 او 7 شهور فخالتي قالت مش هينفع لانه هيكون لسه عايز يرضع بلليل

 

اللي انا اعرفه ان العيل طالما بدا ياكل من اكلنا يبقى هينام بلليل من غير مشاكل ومش هيحتاج رضاعة، صح ولا انا غلطانة؟؟

[ساجدة للرحمن 2050]

هي بتختلف من طفل لأخر في طفل ينام و طفل لأ

 

يعني أنا إبني مجنني الأيام دي مش عارفه ليه مع إنه بدأ ياكل (عنده 7 شهور ) و كان بينام الأول كويس بس الأيام دي كل شويه يصحى وعايز يرضع لما الواحد تعب

 

خالص ومش عارفه أعمل أيه

[~ أم العبادلة ~ 1903]

مش عارفة والله بس العملية دخلت في تحدي وقالولي ورينا بقى هتطبقى الحاجات بتاعتك ازاي وهتربي ابنك ازاي والله المستعان

 

عقبال ما عبدالرحمن يكبر هكون اتقعدت

 

اكثر شئ مش بحبه في العرب انهم مش بيشجعوكي ويرفعوا من معنوياتك وانما بيهبطوكي وعايزينك تمري باللي مروا بيه

[ساجدة للرحمن 2050]

,ولا يهبطوكي و لا حاجه

ده ابنك أنتي..... ربيه زى ما أنتي عايزه و اللي أنتي شايفاه إنه صح و ماتخليش حد يأثر فيكي

وما تعقديش نفسك و لا حاجه وبعدين عبد الرحمن يطلع متعقد هو كمان ههههههه

ماتزعليش نفسك ماأنا كمان أبني مجنني و مع ذلك بضحك حتى شوفي هههههههه

يلا ورينا البتسامه الحلوه و مايهمكيش من حد ....وإن شاء الله ربنا يهدي أولادنا كلنا

[om_mohamed 0]

ازيكم يا حبايبى معلش بقالى كتيير مدخلتش على الموضوع بس تتعوض باذن الله..يا امة الرحمن يا حبيبتى اوعى تغلطى غلطتى وتسمحى لحد يتدخل فى تربية ابنك ..للاسف انا سبت حماتى واعمامه وعماته يدلعوه ..وبقيت اربيه فى البيت ولما نروحلهم زيارة كل اللى عملته بيتهد ..لحد مطلع مدلع ..ودلوقتى ابتدوا يشتكوا من شقاوته ..ومش عارفة اتصرف معاه ازاى ..بحاول اكون هادية على اد مقدر وساعات اعصابى بتفلت وبضربه .. اعمل ايه بس دلونى..دلوقتى بقه انا فى مشكلة معاه .عاوز الكرتون 24 ساعة ويصرخ لما يطفى التلفزيون..انا طول النهار بمنعه واسيبه يصرخ ..انما ابوه اول ميرجع من الشغل يشغلهوله ويقولى انا مش عاوز وجع دماغ انا عاوز اريح

اقوله غلط على دماغه ومستوى ذكائه ..يقولى مليش دعوة انا عاوز ارتاح والولد طبعا يسوق فيها ادام ابوه..اتصرف ازاى دلونى بالله عليكم

 

وحاجة كمان لو حد يعرف اختبارات ذكاء الاطفال اجيبها منين اكون شاكرة جدا

[ساجدة للرحمن 2050]

فينك يا أم محمد و الله و حشتينا

الواحد مش عارف يعمل إيه في العيال كل واحده عندها واحد مطلع عنيها

المهم بالنسبه لإختبارات الذكاء أنا كنت عملت لإبني الكبير إختبارات لأنه قعد لحد 3 سنين مش بينطق كلمه (الحمد لله هو دلوقتي في الصف الثالث الإبتدائي ) و دي بتكون في المستشفي بتطلبي إنك تعملي إختبار لإبنك ...بس عن طريق النت أنا ماعرفش ...وما تقلقيش كل الأطفال متعلقين بالكرتون بس أنت ممكن تحاولي تلاهيه في حاجه تانيه يعني مثلا إديله ورقه و قلم و خليه يرسم و حاولي تكوني معاه المهم إشغليه بأي حاجه ومايهمكيش من عياطه لو سيبتيه كام يوم يعيط في الأخر هيزهق و هايعرف إن في أوقات للتلفزيون معينه مش كل وقت

وربنا يهدي أولادنا و أولاد المسلمين

[~ أم العبادلة ~ 1903]

بسم الله الرحمن الرحيم

 

السلام عليكم ورحمة الله وبركاته،،،

 

ان شاءالله هواظب على الطريق اللي انا فيه مع ابني وربنا ييسر ... ام محمد اظنك من الواجب تقوللي النصيحة دي للعرايس علشان ما يتعبوش مع ولادهم

 

بالنسبة لابنك هو زهقان وعنده فراغ والحاجة الوحيدة اللي بتشده هي التليفزيون والكرتون وعلشان كده بيقضي معظم وقته قدامه وللاسف طالما عرف ان ابوه هيسمحله يتفرج يبقى انسي خلاص لانه كل ما هيشوف ابوه هيعيط علشان يخليه يتفرج عليه بس انتي ممكن تخليه ما يتفرجش الا لما ابوه يكون موجود وبكده هيقعد وقت اقل قدام التليفزيون.

 

في كتاب انجليزي اسمه TV Free Acticities وهو الغرب مصممينه مخصوص علشان خاطر عيالهم ما يقعدوش امام التليفزيون وهو مليان بانشطة والعاب تغري الاطفال وتخليهم يقضوا وقتهم فيها والحلو فيه انك تقدري تعملي الالعاب بنفسك من حاجات قديمة في البيت ومش بتستعمليها وهما مقسمين الانشطة ... يعني في انشطة الطفل يعملها معاكي في المطبخ وفي انشطة يعملها بالحديقة وفي انشطة يعملها بالبيت ... غير انهم عاملين انشطة لتنمية المهارات الذهنية وانشطة لتنمية المهارات الجسدية وهكذا ... وكمان هتلاقي ان بعض الانشطة عبارة عن ان اطفالك يقوموا بشغل البيت بس بطريقة ممتعة كانهم بيلعبوا

 

انا شفت منه جزئين واحد للاطفال من سن 1-4 سنين والثاني للاطفال من سن 2-10 سنين لو عايزة تشتريه من على النت ممكن في تجيبيه من المواقع دي

http://www.amazon.com/365-TV-Free-Activiti...d/dp/1558505857

http://www.amazon.com/365-Tv-Free-Activiti...d/dp/1580627552

وليكي الاختيار في شراء نسخة مستعملة او نسخة جديدة - على فكرة النسخ المستعملة بتبقى في حالة جيدة واسعارها حلوة

 

ادي بعض المواقع اللي فيها بعض الافكار علشان تشغلي عيالك بس برده بالانجليزي

http://www.frugalmom.net/tv_free_activities.htm

http://www.catholicmom.com/tv_free.htm

http://www.thenewhomemaker.com/25tv-freesu...amilyactivities

http://parenting.ivillage.com/tp/tpactivit...0,,44pp,00.html

 

الموقع ده حلو وفي حاجات كتيرة

http://www.enchantedlearning.com/crafts/

 

والسلام عليكم ورحمة الله وبركاته

تم تعديل 26 اكتوبر, 2007 بواسطة amatul_rahmaan

[om_mohamed 0]

ازيك يا ساجدة يا حبيبتى ..انا موجودة اهوه بس مبلاقيكيش كتيير ..هنعمل ايه مع العيال ربنا يقوينا ده هما اللى بيربونا مش احنا اللى بنربيهم ..ربنا يهديهم يارب

 

الف شكر يا اختى امة الرحمن على المواقع الحلوة دى وربنا يسهل واقدر انفذ من كلامهم حاجة

[om_mohamed 0]

فينك يا امة الرحمن مش باينة ليه؟؟؟؟

عاوزة استشارتك فى حاجة

لما طفلك الصغير يسالك اسالة عن ربنا ..مثلا هوه جه منين ؟؟ والكلام بتاع الاطفال ده

اقوله ايه

عاوزة افهمه بطريقه مبسطة وفى نفس الوقت مقولوش حاجة غلط اعمل ايه؟؟؟

[ساجدة للرحمن 2050]

أنا هاجاوب يعني على قدي

أول حاجه أنك مش لازم تزعقيله لما يسأل أسئله جامده عن ربنا لأن كل الأطفال عندهم فضول في الموضوع ده

ولازم تفهميه بهدوء إن ربنا مش زينا ..ربنا بيسمع بس مش بيسمع زينا لأ ربنا بيسمع كل حاجه حتى اللى أنت بتقوله في مخك هايقولك يعني هو بيسمع أنا بقول إيه دلوقت قوليلو أيوه .....وكمان ربنا شايفك على طول حتى لو أنت في أي مكان

أنا كنت أعرف واحده صحبتي كانت بتقول لإبنها كده فالولد نزل تحت السرير و قالها كده ربنا مش ها يشوفني فقاليتله لأ ربنا برده شايفك و في أي مكان ربنا شايفك

الموضوع كبير و لازم تتأني في الأجابه عليه وطبعا زي ماقولتي أوعي تقوليله معلومه غلط

وأنا منتظره معاكي رد أمة الرحمن

[ايناس احمد كنجو 0]

بارك الله اخواتي

واعانكن على تربية الابناء على الوجه الذي يرضي المولى عزوجل

اخواتي

انا اقدم لكن دعاية لساحة آمال المستقبل

تابعنها لتجدن فيها اجابةعن كل التساؤلات ان شاء الله

بس مطلوب منكن تحريك الاصابع جيدا

لتجدن الاجابة امام ناظريكم

جربن

وردوا علي