حبيتك لالتزامك ( راااائعة )

[♥ أمـ نـادية ♥ 4]

السلام عليكم ورحمة الله وبركاته

 

يا اخواتى قصيدة بالعامية لكن فيها معانى راقية جدا

 

اعجبتنى كثييييييييييرا فاحببت ان تشاركونى قرائتها

 

وجزى الله كاتبها كل خيرا ...

 

 

 

حبيتك لإلتزامك . . . . . . . . . . . . حبيتك لاحترامك

 

حبيت فيكي التواضع . . . . . . . . . . . . والعزة اللي ف كلامك

 

مبسوط منك لأنك . . . . . . . . . . . . إسلامك كل همك

 

أنا أصلي قابلت بابا . . . . . . . . . . . . واداني فكرة عنك

 

وسألته عن طباعك . . . . . . . . . . . . إن كانت يعني هادية

 

فحكالي عن سماعك . . . . . . . . . . . . لكلامه وانت راضية

 

وازاي بتسلي نفسك . . . . . . . . . . . . بذكرك وانت فاضية

 

وحلاوة صوت تلاوتك . . . . . . . . . . . . وازاي بتكوني شادية

 

 

وسألته إن كنتي فاهمة . . . . . . . . . . . . معنى كلمة زوجين

 

قالي هتكونوا ورقة . . . . . . . . . . . . مطبوعة نسختين

 

غني كنت أو فقير . . . . . . . . . . . . ليك عند بنتي دين

 

سرك هيكون في بير . . . . . . . . . . . . معرفش مكانه فين

 

تفضل دايماً كبير . . . . . . . . . . . . في نظرها حبتين

 

لو جيت بفلوس كتير . . . . . . . . . . . . تطمن جت منين

 

 

هتكون دايماً معاها . . . . . . . . . . . . سيرتك هتكون هواها

 

والشوق اللي ف خيالك . . . . . . . . . . . . تلقاه لحظة لقاها

 

لو جيت زعلان ف مرة . . . . . . . . . . . . إرمي همومك وراها

 

ومهما شوفت بره . . . . . . . . . . . . مش هتشوف مستواها

 

واطمن يابني خالص . . . . . . . . . . . . عقلها مافيهوش تفاهة

 

وزي ما هي بنتي . . . . . . . . . . . . بنت حماتها وحماها

 

 

 

وسألته عن ولادي . . . . . . . . . . . . منك هيكونوا إيه؟

 

قاللي هيكونوا عادي . . . . . . . . . . . . فسألته يعني إيه؟!

 

قاللي العادي إللي كان . . . . . . . . . . . . عند الناس من زمان

 

العادي بتاع سراقة . . . . . . . . . . . . وحذيفة بن اليمان

 

العادي بتاع أسامة . . . . . . . . . . . . وابن الحكيم لقمان

 

 

ده العادي بتاعنا إحنا . . . . . . . . . . . . بنربي عليه عشان

 

لو جينا ولا رحنا . . . . . . . . . . . . هنقابل الرحمن

 

عمرك ما تخاف عليهم . . . . . . . . . . . . ولادك في الأمان

 

أنا بنتي هتربيهم . . . . . . . . . . . . ع السنة والقرآن

 

هتشوف ابنك بيصحى . . . . . . . . . . . . مادام سمع الأذان

 

ينزل في الفجر يقرا . . . . . . . . . . . . بالسجدة والانسان

 

 

هتشوف في حجاب بناتك . . . . . . . . . . . . العفة والإحسان

 

هتشوف إزاي مراتك . . . . . . . . . . . . هتعينك إنت كمان

 

 

وسألته عن حياتك . . . . . . . . . . . . من قبل الالتزام

 

قال أتذكر في ليلة . . . . . . . . . . . . مش فاكر أنهي عام

 

أذان الفجر أذن . . . . . . . . . . . . وقالتلي سيبني أنام

 

فدخلت الأوضه جوه . . . . . . . . . . . . أجيب منها الحزام

 

وعبال ما رجعت تاني . . . . . . . . . . . . كات رجعت ف الكلام

 

الله يجازي الشيطان . . . . . . . . . . . . خلاها تقول أنام

 

بس اطمن خلاص . . . . . . . . . . . . دلوقتي بقت تمام!

 

 

 

 

قدملي مكة كولا . . . . . . . . . . . . قاللي اتفضل وسمي

 

أحسن من سكة كولا . . . . . . . . . . . . صدقني وخدها مني

 

 

 

قلتله طيب ياعمي . . . . . . . . . . . . يسعدني أقولك إني

 

بطلب بنتك ونفسي . . . . . . . . . . . . تناسبني وترضى عني

 

راح شادد فجأه لبسي . . . . . . . . . . . . وقلب وشه وسألني

 

 

حافظ كم جزء يابني . . . . . . . . . . . . وقاري كم كتاب

 

احكيلي كده عن مؤتة . . . . . . . . . . . . أوغزوة الأحزاب

 

وسمع كم حديث . . . . . . . . . . . . في الأخذ بالأسباب

 

وكمان سمعلي آيه . . . . . . . . . . . . ذكرت فيها الدواب

 

ولو شايفها صعبة . . . . . . . . . . . . قللي بتاعة الذباب

 

واحكيلي حلم يوسف . . . . . . . . . . . . وبراءة الذئاب

 

واخواته لما جولوه . . . . . . . . . . . . دخلوا من أنهي باب

 

واديني فكرة برضه . . . . . . . . . . . . بتقبض كم ثواب

 

وناوي ازاي تحسن. . . . . . . . . . . . أنا شايفك لسه شاب

 

 

وسأل نفسه وسألني . . . . . . . . . . . . هيعوز إيه يعني مني؟

 

لو عندي كل حاجه . . . . . . . . . . . . وديني مش شاغلني

 

أحسن لك تنسى بنتي . . . . . . . . . . . . ومهرك مش لازمني

 

قلتله صبرك ياعمي . . . . . . . . . . . . وبراحتك امتحني

 

يبقى اما أسأل تجاوب . . . . . . . . . . . . خليك دايماً فاهمني

 

سألتك وانت ساكت . . . . . . . . . . . . خليتني أظن ظني

 

وفضل يسأل واجاوب . . . . . . . . . . . . وعشان خاطرك عصرني

 

وظهرت النتيجة . . . . . . . . . . . . وبفضل الله قبلني

 

 

قاللي مقبول في نظري . . . . . . . . . . . . مبروك عليك ياسيدي

 

لكن في نظرها هي . . . . . . . . . . . . نجاحك مش بإيدي

 

وهي زمانها راجعة . . . . . . . . . . . . من تمرين السويدي

 

خليك قاعد شوية . . . . . . . . . . . . استنا لما تيجي

 

هعملك من إيديا . . . . . . . . . . . . كباية شاي صعيدي

 

 

سابني وقعدت أفكر . . . . . . . . . . . . هل ممكن ترفضيني

 

طاب قولي حتى أفكر . . . . . . . . . . . . مش يمكن تفهميني

 

وفضل مخي يلاعبني . . . . . . . . . . . . يجيبني ويوديني

 

وخايف م المقابلة . . . . . . . . . . . . مرعوب بينك وبيني

 

ودق الباب في ثانية . . . . . . . . . . . . وشوفتك مرة تانية

 

مش قادر أنسى يومها . . . . . . . . . . . . وفاكر كل ثانية

 

 

ونده والدك عليكي . . . . . . . . . . . . عشان أول لقاء

 

دخلتي وشوفت وشك . . . . . . . . . . . . عليه نور الحياء

 

نور والله فعلاً . . . . . . . . . . . . مش نور بودرة وزواء

 

كان أول مرة أخاف . . . . . . . . . . . . من فتنة النساء

 

أخلاقك مش عادية . . . . . . . . . . . . وجمالك كان شفاء

 

 

قعدتي جنب والدك . . . . . . . . . . . . وسألتيني وجاوبتك

 

وفكل مرة أجاوب . . . . . . . . . . . . كنت باشوف ابتسامتك

 

ف أقول من جوه نفسي . . . . . . . . . . . . يارب أكون عجبتك

 

وبعد شوية قمتي . . . . . . . . . . . . ندهت عليكي مامتك

 

ورحتي دخلتي جوه . . . . . . . . . . . . وراح وراكي والدك

 

وانا قلت مش مروح . . . . . . . . . . . . غير لما أكون خطبتك

 

 

وابوكي جاني تاني . . . . . . . . . . . . وقرب من وداني

 

لابس كرفته سوده . . . . . . . . . . . . وبدله لون فراني

 

المنظر يعني كله . . . . . . . . . . . . ميدلش ع التهاني

 

قلتله مالك ياعمي . . . . . . . . . . . . من فضلك قول عشاني

 

عرقي غرقلي كمي . . . . . . . . . . . . سايبني ليه أعاني

 

قاللي مستني إيه . . . . . . . . . . . . فين إيدك إديهاني

 

البنت مش موافقة . . . . . . . . . . . . تتجوز حد تاني

 

 

كان أول مرة أعرف . . . . . . . . . . . . إزاي الناس بتفرح

 

سعادتي كات غريبة . . . . . . . . . . . . مش ممكن هقدر أشرح

 

من كتر حبي ليكي . . . . . . . . . . . . نويت أضحي وادبح

 

رحت اشتريت خروف . . . . . . . . . . . . وكان خروف بينطح

 

ده أخيراً هبقى جوزك . . . . . . . . . . . . وشجرة صبري تطرح

 

 

خطوبتنا كات بسيطة . . . . . . . . . . . . مكانش فيها زيطة

 

وفرحنا كان في جامع . . . . . . . . . . . . يعني مش خلطبيطة

 

ومامتك جت في يومها . . . . . . . . . . . . ورقعت كام سويطة

 

هاتولي بنتي منه . . . . . . . . . . . . دي مش فاهمة العبيطة

 

إنه هيخطفها مني . . . . . . . . . . . . وهتوحشني الغتيتة

 

 

صعبت عليا مامتك . . . . . . . . . . . . الموقف كان شديد

 

لكن فعلاً خطفتك . . . . . . . . . . . . ورحنا مكان بعيد

 

فاكرة ولا انتي ناسية . . . . . . . . . . . . أكيد فاكرة أكيد

 

من يوم ما بقيتي زوجتي . . . . . . . . . . . . وانا متهني وسعيد

 

معايا ف كل يوم . . . . . . . . . . . . ويوم لؤاكي عيد

 

عمرك ما دقتي نوم . . . . . . . . . . . . وانا تعبان أو مريض

 

فلوسي كات بتكتر . . . . . . . . . . . . والخير عندك يزيد

 

وعامله ليه دفتر . . . . . . . . . . . . ومرتبه المواعيد

 

وبفضل الله قدرتي . . . . . . . . . . . . وجبتيلي الوليد

 

وبعديها بشوية . . . . . . . . . . . . جبتيلنا عليه يزيد

 

وبعديه جت سمية . . . . . . . . . . . . وآخرهم كان حميد

 

 

بدعيلك كل يوم . . . . . . . . . . . . وأفضل أعيد وازيد

 

ربيتي عيالي دول . . . . . . . . . . . . ع القرآن المجيد

 

طول عمرك وانتي صافية . . . . . . . . . . . . قلبك لون الجليد

 

أخلاقهم مش عادية . . . . . . . . . . . . طلعنلك مش بعيد

 

وليد دلوقتي ضابط . . . . . . . . . . . . ومعاه رتبة عقيد

 

ودعوة قلبي صابت . . . . . . . . . . . . ويزيد أهو مات شهيد

 

وبنتك صيدلية . . . . . . . . . . . . وحميد أصبح معيد

 

الله برحم أبوكي . . . . . . . . . . . . راجل من نوع فريد

 

كل اللي قاله فيكي . . . . . . . . . . . . أنا عشته بالتحديد

 

 

عشت معاكي ف حكاية . . . . . . . . . . . . أحلى وأجمل رواية

 

حكايتي كات معاك . . . . . . . . . . . . وحكايتك كات معايا

 

اديتك كل عمري . . . . . . . . . . . . وهمك كان رضايا

 

وعمرك خدته منك . . . . . . . . . . . . وقربك كان دوايا

 

وخلاص العمر راح . . . . . . . . . . . . راحت أيام صبايا

 

ومسافر رحله صعبة . . . . . . . . . . . . وزادي مش كفايه

 

مش عاوز أشوف دموعك . . . . . . . . . . . . بالذات ف يوم عزايا

 

أنا عارف إنتي عارفة . . . . . . . . . . . . إن الموت مش نهاية

 

دي لسة الرحلة طالعة . . . . . . . . . . . . والموت خط البداية

 

إدعيلي يمكن أوصل . . . . . . . . . . . . وأشوف هناك حمايا

 

أنا عارف إنه فيها . . . . . . . . . . . . محجوزله هناك سرير

 

وسلامي في النهاية . . . . . . . . . . . . أنا خلصت الحكاية

 

لو يوم فكرتي فيه . . . . . . . . . . . . إقري شعري وغنايا

 

وأمانه ف كل مرة . . . . . . . . . . . . تدعي لي بالهداية

 

عسى ربي بدعائك . . . . . . . . . . . . يغفر ليا الخطايا

 

 

يارتنا كلنا بنات وشباب واباء نكون كده .. :icon15:

تم تعديل 9 أغسطس, 2009 بواسطة الصـــ ضياء ـــبر

[سمية يحيى 3]

روووووووووووووووووووووووعة والله

جزاكى الله خيرا حبيبتى

فيها حتت بضحك

 

واحلى حاجة ان فيها اسمى

وكمان صيدلانية

 

راااااااائعة

مش عشان اسمى طبعا

ههههههه

[♥ أمـ نـادية ♥ 4]

روووووووووووووووووووووووعة والله

جزاكى الله خيرا حبيبتى

فيها حتت بضحك

 

واحلى حاجة ان فيها اسمى

وكمان صيدلانية

 

راااااااائعة

مش عشان اسمى طبعا

ههههههه

 

 

وجزاكِ خيرا يا سمية

 

الحمد لله انها عجبتك

 

وطبعا اسمك فى اى حاجة يحليها وينورها :icon17:

[مُقصرة دومًا 1261]

السلام عليكم ورحمة الله وبركاته،،

 

بسم الله ماشاااااااااااااء الله جميلة جدا والله

[رحيق العفه 2]

اكتر من روعه

[راجيةرحمةخالقها 0]

حقا انها قصيدة اكثر من روعة

بارك الله فيك اختي الغالية

[♥ أمـ نـادية ♥ 4]

السلام عليكم ورحمة الله وبركاته،،

 

بسم الله ماشاااااااااااااء الله جميلة جدا والله

 

 

بارك الله فيكِ يا اسراء

 

وحشتينى جداا يا ترى انتى فين

["عابرة سبيل" 0]

السلام عليكم ورحمة الله وبركاته،

 

بجد راائعة و أكتر من رائعة

 

جزاكِ الله خيرا و أسأل الله أن يرزقني و اياكي الأزواج الصالحين و الذرية الصالحة و جميع بنات المسلمين

[♥ أمـ نـادية ♥ 4]

اكتر من روعه

 

 

جزاكِ الله خيرا :rolleyes:

[أزفـــ الرحيل ـــ 20]

جميلة جدا جدا يا بسمتى

يا ريت كل شبابنا وبناتنا يكونوا كده

جزاك الله خيرا

[بشاشة الزهور 16]

راااااااااااااااائع جداً بارك الله فيكِ :) ..

[محبة المصطفى المختار 0]

وسألته عن ولادي . . . . . . . . . . . . منك هيكونوا إيه؟

 

قاللي هيكونوا عادي . . . . . . . . . . . . فسألته يعني إيه؟!

 

قاللي العادي إللي كان . . . . . . . . . . . . عند الناس من زمان

 

العادي بتاع سراقة . . . . . . . . . . . . وحذيفة بن اليمان

 

العادي بتاع أسامة . . . . . . . . . . . . وابن الحكيم لقمان

 

 

ده العادي بتاعنا إحنا . . . . . . . . . . . . بنربي عليه عشان

 

لو جينا ولا رحنا . . . . . . . . . . . . هنقابل الرحمن

 

عمرك ما تخاف عليهم . . . . . . . . . . . . ولادك في الأمان

 

أنا بنتي هتربيهم . . . . . . . . . . . . ع السنة والقرآن

 

هتشوف ابنك بيصحى . . . . . . . . . . . . مادام سمع الأذان

 

ينزل في الفجر يقرا . . . . . . . . . . . . بالسجدة والانسان

 

 

هتشوف في حجاب بناتك . . . . . . . . . . . . العفة والإحسان

 

هتشوف إزاي مراتك . . . . . . . . . . . . هتعينك إنت كمان

*************************************************************

>> ");} // -->أختي الغالية ضياء الصبر

 

جزاك الله خيراً :icon_eek:

:mrgreen:

 

[/size]

تم تعديل 19 فبراير, 2010 بواسطة محبة المصطفى المختار

[ذليلة إلى اللـَّـه 417]

حلوة

 

أووووى

[♥ أمـ نـادية ♥ 4]

سبحان الله

 

اول ما دخلت المنتدى اجد الموضوع مرفوع

 

وكأن رب العزة اراد ان يرسلى رسالة

 

ربنا هب لنا من ازواجنا وذريتنا قرة اعين واجعلنا للمتقين اماما

[البتول. 0]

رووووووووووووووووووووووووووعة

جزيتى الخير

وربنا يجعل كل بيوت المسلمين كده

[نور قلبي القران 430]

عجبتني كتييييييييييييييييير

كأني أرأ قصة وهي فعلا أحسن قصة

مشكورة على النقل الطيب وجعله الله في ميزان حسناتك