اذهبي الى المحتوى
قلب يخشى الله

مسرحية " اجري ... الحق ... اوكازيووووون "

المشاركات التي تم ترشيحها

24.gifالمشهد الاول24.gif

 

المكان: غرفة نوم وفيها مكتب مخصوص لمذاكرة أخ فى الثانوية العامة

الزمان: بعد صلاة العشاء بشويه.

 

image358.gif

اتنين إخوة زملاء فى المدرسة ......الأخ الاول جاي يعطي أخوه التاني مذكرة عشان عندهم إمتحان فيزياء قريب و قعد يتكلم معاه شوية

"زى ما انتوا عارفين مايحلاش الكلام غير ايام الامتحانات "

image358.gif

الاخ الاول: صحيح...سمعت عن العرض الخاص؟

التانى:عرض ايه؟

الاول:اوكازيون كبييييييير اوى فى المول و فى كل الاقسام

التانى:ده فى مول ايه ده ؟

الاول: ده مول كبيييييييييير اوى ....فيه اقسام لكل حاجة تعرفها و متعرفهاش.... اكل ايييييه و عربيات اييييييه و بارفانات و لبس و موبيلات و لاب توبات حسب الطلب... و فيه كمان قسم للاسئلة بتاعت الامتحانات....و الكميات رهييييييييييييبة و مفيش حاجة اسمها حتى نفاذ الكمية

الثاني : ايه العظمة دى؟؟؟سمعت عنه فين ده؟

الأول :مكتوب فى الكتاب

الثاني : كمان موزعين له كتاب؟دا الواحد مش عايش يا اخى

الأول : استنى انت لسة شفت حاجة

الثاني : فى ايه اكتر من كده....ياللا بينا يابنى

الأول: انت لسه ماعرفتش...الساعة كام ؟؟

آه لسة شوية على الاوكازيون بتاع كل يوم

الثاني : اوكازيون كل يوم؟ انا اعرف ان الاوكازيون ده بيبقى للبواقى كل موسم او فى المناسبات

الأول : لأ يا سيدى هناك اوكازيونات كل يوم..عشان كل يوم فى مناسبة كبيرة

الثاني : يا عم انت بتشتغلنى.......عايز تعمل فيه مقلب...مش كده؟

الأول : لا و الله.... انت عارف انى مش بتاع الحاجات دى...اسمعنى بس و متستعجلش...نسيت اقولك.....

 

مش خصم 20ولا 50 ولا 70 الخصم 100%

يعنى كل حاجة ببلاش و شيل يا باشا على قد ما تقدر......

و لسه كمان العرض الخاص لل vip

الثاني : و ده اييه ده كمان؟؟شامبو و لا جوز شرابات؟؟؟

"بيضحك الاخ مستهزءا"

الأول : لأ يا اخى ده عرض للاشخاص المهمين اللى بيروحوا المول على طوول و ده بقى قسم الهدايا ..

واللى يعرف يدخله الحاجات بتجيله لحد عنده و تلاقى الهدايا نازلة ترف عليه من غير ما يكلف نفسه و يتحرك اصلا ....تخيل!!!!!

الثاني : اييييه ده بقى؟؟؟؟؟؟؟ .

انا عمرى ما سمعت عن كده ده حتى امريكا المولات اللى فيها آخرها قبل الكريسماس و لا عيد الشكر بتاعهم ده الناس يا عينى تفضل واقفة فى الطابور من الساعة 12 باليل لتانى يوم الصبح تتجمد فى البرد عشان اول ما المول يفتح يدخلوا جري "دا طبعا اللى لسه قادر يمشى منهم و رجليه متجمدتش اوى "و اللى يقدر يلحق له كاميرا بنص الثمن و لا لاب توب يبقى فاز عشان الكميات محدودة ....و بعدين تعالى هنا قلى.... القسم اللى vip اللى بتقول عليه ده اكيد عايز واسطة كبيرة اوى........ طبعا الزحمة عليه بتبقى جامدة مش كده؟

الأول : و ليه منعرفش ندخله؟..مفيش زحمة و لا حاجة..

معلش انت شكلك مش مصدقنى...ياللا روح ناملك كام ساعة و اصحى معايا الساعة 2 بالليل و انا هاقولك و هاوديك كمان..ياللا توصيلة ببلاش..حد لاقى؟؟

الثاني :ايه؟؟؟ 2 بالليل؟؟و بعدين توصيلة ايه؟ انتوا ماعندكوش عربية اصلا..و الله شكلك بتسرح بيا

الأول : خليك معايا ..خدنى على قد عقلى يا سيدى

الثاني :ماشى...اما نشوف آخرتها معاك أيه

الأول : طيب قوم يالا اضبط المنبه على الساعة 2و انا هاروح انام انا كمان

الثاني : بس الساعة 2 دى صعبة قوى ..و بعدين هاقولهم ايه فى البيت ...يعنى هتنزل من وراهم؟

الأول :لأ طبعا ...بالعكس دا هما لما يعرفوا هييجوا معانا ان شاء الله و معلش يعنى اسألك سؤال:لو حد قالك اسئلة الثانوية العامة باجاباتها النموذجية هتتوزع فى اسوان مثلا بكرة..مش هتنزل تلحق اول قطر ؟؟؟؟و مش هتنام اصلا لحد ما توصل و تجيبها؟

الثاني : اكيد طبعا..ماشى يا عم..خلاص ميعادنا الساعة 2 بالليل ان شاء الله

بأذن الله..ياللا انا ماشى بقى عشان الحق انام شويه...

الأول : السلام عليكم و رحمة الله و بركاته

الثاني :و عليكم السلام و رحمة الله و بركاته .

منقووووووووووووووول

الطريق إلى الله

هااااااااااااا يا بناااااااات

أكمل ولا لأ

اللى جاى أحلى

تم تعديل بواسطة قلب يخشى الله

شارك هذه المشاركه


رابط المشاركه
شارك

السلام عليكم ورحمة الله وبركاته،،

تسلمى يا عسل

شكلها حلوة قوى

كملى مستنية الباقى بسرعة

شارك هذه المشاركه


رابط المشاركه
شارك

24.gifالمشهد التانى24.gif

 

المكان: نفس غرفة النوم. يظهر الاخ التانى فى سابع نومه و المنبه جنب راسه على طول

الزمان:الساعة 2 بالليل

image358.gif

يرن المنبه...ينتفض اخونا من نومه:

بسم الله الرحمن الرحيم...ايه ...مين!!!

 

و يقعد على السرير يفوق شوية و يقول لنفسه:

آآه الساعة بقت 2 حالا كدة...

بس الجو ساقع اوى..

اكمل نوم و اطنش؟؟....

.بيفكر تانى....بيفكر..بيقرر و يقول لنفسه

لأ لما اقوم اشوف ايه الموضوع بتاع المول ده ..

يا سلاااااااااام لو كان بجد ...هاخد كل حاجة انا عايزها...الموبايل و الكاميرا الديجيتال اللى همووت عليهم....و الساعة الغالية اللى زى اللى مع الواد صاحبى فى المدرسة . وبالمرة اشوف موضوع عرض ال vip يمكن تجيلى هدية جامدة.فرصة

ويقوم الاخ و يمسك التليفون و يتصل بزميله

.....

 

 

هااااااا عايزين تعرفوا صديقه قاله إيه

ومين رد عليه

>> ");} // -->[/size][/font]

شارك هذه المشاركه


رابط المشاركه
شارك

24.gifالمشهدالثالث24.gif

 

"وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ"فصلت 33

image358.gif

الزمان: الساعة 2وربع بالليل "على ما اخينا فاق من النوم و غسل وشه"

المكان:غرفة معيشة متواضعة ...و تليفون على ترابيزة جانبية بيرن

image358.gif

 

يظهر من جانب المشهد رجل يبدو عليه الوقار

"ده يا جماعه يبقى والد الاخ الاول"

يرد على التليفون:السلام عليكم و رحمة الله و بركاته

اخونا يتخض!!!! و بعد تردد

ايوة و عليكم السلام يا عمو....اسف على الازعاج...و الله هو اللى قالى اتصل بيه دلوقتى

 

الاب يضحك:

ازعاج ايه يا حبيبى؟ احنا كلنا صاحييين.. اتفضل اخوك معاك

 

اخونا يفكر:

كلنا صاحيين؟؟؟؟ ايه ده؟؟يبقى الموضوع بجد !!ده ماكنش اخويا بيشتغلنى و شكلهم كلهم رايحين كمان....و ابتدا مخه يسرح و يروح ناحية الموبايل و الكا...........

السلام عليكم

 

"آآه نسيت اقولكم...حبل افكارة اتقطع لما الاخ الاول جه و رد على التليفون"

 

الاول:السلام عليكم؟؟؟؟انت فين يا اخى مابتردش ليه...سرحت فى ايه؟

 

التانى:وعليكم السلام يا اخى......مفيش يا سيدى مسرحتش ....انت باباك صاحى دلوقتى ليه؟؟

 

الأول:ماهو جاى معانا....و كمان امى و اختى

 

كماااااااااان؟؟؟؟؟؟؟ آآآآآآآآه ده عشان الافتتاح ؟؟؟

 

بص يا سيدى ....انا هشرحلك موضوع الموول و الاوكازيوون الخطير ده

 

اتفضل يا باشا....اهو بقيت كلى عبارة عن ودن كبيرة اوى...اشرح

 

الساعة دلوقت اتنين و ربع تقريبا ...يعنى احنا فى "التلت الاخير من الليل" وفاضل ساعتين على الفجر....يعنى دلوقتى ربنا سبحانه و تعالى ينزل للسماء الدنيا نزولا يليق بجلاله... و ده مش كلامى ..

ده حديث عن الرسول عليه الصلاة و السلام.

"إن الله يمهل ، حتى يذهب شطر الليل الأول ، ثم ينزل إلى السماء الدنيا ، فيقول : هل من مستغفر فأغفرله ؟ هل من سائل فأعطيه ؟ هل من تائب فأتوب عليه ؟ ، حتى ينشق الفجر"

 

 

عليه الصلاة و السلام...........قصدك ايه يعنى ؟مش فاهم

 

يعنى يا حبيبى ان لو حضرتك قمت و توضأت و صليت ركعتين قيام ليل دلوقتى و قعدت تدعى و تقرا قرآن..مع نفسك كده و الناس نايمة كل دعوات حضرتك ربنا هيستجيب ليها .......و على فكرة ربنا كبير قوى و نعمه مالهاش حدود..يعنى مفيش حتى نفاذ الكمية او كمية محدودة او اى كلمة بتتقال عشان الناس تتسابق و تشترى الحاجة......

وده بردو مش كلامى

 

ده في حديث عمرو بن عبسة رضي الله عنه قال: قال رسول الله: (أقرب ما يكون الرب من العبد في جوف الليل الآخر، فإن استطعت أن تكون ممن يذكر الله في تلك الساعة فكن)

 

يعنى لما تصلى دلوقتى هاتكون اقرب لربنا من اى وقت...مش عايزه يستجيب لك؟؟؟؟ازاى؟؟؟؟,

.والحديث القدسى اللى هو كلام ربنا سبحانه و تعالى نفسه

(لو أن أولكم وآخركم . وإنسكم وجنكم . كانوا على أفجر قلب رجل واحد . ما نقص ذلك من ملكي شيئا . يا عبادي ! لو أن أولكم وآخركم . وإنسكم وجنكم . قاموا في صعيد واحد فسألوني . فأعطيت كل إنسان مسألته . ما نقص ذلك مما عندي إلاكما ينقص المخيط إذا أدخل البحر)

"سمعت عن الحديث ده قبل كده؟

ايوة ...سمعت عنه...... اخونا بيرد وهو سرحان تانى لبعيد قوى المرة دى.......و بيقول لنفسه :انا فعلا سمعت الاحاديث دى قبل كدة بس مافكرتش فيها بالطريقة دى....سبحان الله الواحد بيسمع الاحاديث و زى ما تكون بتعدى من ودن و تخرج من التانيه فى ساعتها

 

يا اخى؟؟؟؟انت رحت فيين؟؟؟اوعى تكون زعلت منى اننا صحيتك دلوقتى... بس على قد ما الدنيا برد و انت بتقاوم و تقوم تصلى على قد ما تاخد ثواب مش ربنا قال "﴿إِنَّ نَاشِئَةَ ٱلَّيْلِ هِىَ أَشَدُّ وَطْأً وَأَقْوَمُ قِيلا [المزمل:6 ]

 

واخونا يفوق لنفسه و يرد:

لا و الله ربنا يكرمك.. معلش انا سرحت شوية..طيب انا كده فهمت ..يعنى انت كان قصدك بالموول قيام الليل ..و الاوكازيوون اجابة الدعاء...تمام؟

 

تمام ...و الله يا اخى انا كنت عارف انك مش هتزعل منى عشان انا متوسم فيك الخير و بحبك فى الله ...طيب..اسيبك تقوم تصلى ..

يلا السلام عليكم و رحمة الله و بركاته

 

و عليكم ال..........استنى يا بنى ....فاضل حاجة واحدة...ايه حكاية عرض الvip بقى؟؟؟

 

آآآآه فكرتنى ..كنت نسيت...ربنا سبحانه و تعالى بيقول في الحديث القدسي

( من شغله القرآن عن ذكري ومسألتي أعطيته أفضل ما أعطي السائلين وفضل كلام الله تعالى على سائر الكلام كفضل الله تعالى على خلقه )

واخد بالك انت من "افضل ما اعطى السائلين"؟

يعنى انت لما تقرأ القرآن اللى هو كلام ربنا فى وقت الاجابة زى الحديث ما بيقول" ان في الليل ساعة لا يوافقها عبد مسلم يسأل الله شيئا إلا أعطاه الله إياه، وذلك كل ليلة".......

ربنا بيديك احسن من اللى انت عايزه كمان....الحاجة تجيلك لحد عندك من غير ماتطلب يا عم...بالله عليك ده مش عرض لل VIP ؟

 

فعلا مفيش احسن من كدة...

 

لأ لسة فيه..... ايه رأيك؟؟؟

 

احسن من كده؟؟

ايوة يا اخى ...الجنة ..احنا عمالين نتكلم عن الدنيا و اللى عايزينه فيها و نسينا الجنة...شوف ربنا بيقول إيه :

{قُلْ أَؤُنَبِّئُكُمْ بِخَيْرٍ مِنْ ذَلِكُمْ لِلَّذِينَ اتَّقَوْا عِنْدَ رَبِّهِمْ جَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا وَأَزْوَاجٌ مُطَهَّرَةٌ وَرِضْوَانٌ مِنَ اللَّهِ وَاللَّهُ بَصِيرٌ بِالْعِبَادِ الَّذِينَ يَقُولُونَ رَبَّنَا إِنَّنَا آمَنَّا فَاغْفِرْ لَنَا ذُنُوبَنَا وَقِنَا عَذَابَ النَّارِ الصَّابِرِينَ وَالصَّادِقِينَ وَالْقَانِتِينَ وَالْمُنْفِقِينَ وَالْمُسْتَغْفِرِينَ بِالْأَسْحَارِ}

[آل عمران:15-17]

وقال رسول الله صلى الله عليه و سلم

( أفشوا السلام، وأطعموا الطعام، وصلوا بالليل والناس نيام،تدخلوا الجنة بسلام )

 

 

آآآآآآه...والله يا اخى انت ماخلتش حاجة الا لما وضحتها..ربنا يخليك..انا هقوم اتوضا و اصلى و اقعد اقرا قرآن شوية...جزاك الله كل خير.

 

 

جزانى و اياك يا اخى ...ربنا يجمعنا على طاعته دائما ان شاء الله...السلام عليكم و رحمة الله و بركاته

 

و عليكم السلام و رحمة الله و بركاته

 

لسه مخلصتش الباقى أحللللللللللللللللللللى

شارك هذه المشاركه


رابط المشاركه
شارك

24.gifالمشهد الرابع24.gif

"مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ "النحل 97

image358.gif

الزمان:بعد 15سنه...الساعة 9مساءً

المكان:فيلا دورين بحى راق ...وامامه تقف سيارة فارهه موديل السنة دى...

image358.gif

يترجل من السيارة رجل وقور و زوجته و ابنهما شاب مهندم الثياب وفى يده لفه حسنة المنظر"باين عليها هدية عليها القيمه" ينظر للمنزل فيظهر وجهه

 

"دا الاخ التانى يا جماعة...وفقه الله تخرج من كلية الهندسة واشتغل و هو الآن نائب مدير احدى شركات البناء الكبرى"

image358.gif

ينظر الاخ فى ساعته

الحمد لله وصلنا على الميعاد بالضبط....على الرغم من الزحمة الخانقة.

الا صلاتى ما اخليهاااااااا يرن تليفون حديث بكاميرتين "ماركه نضيفة مش صينى "

و يرد الاخ

السلام عليكم ..ايوه يا اخى احنا تحت البيت اهو وطالعين..فرشت الارض ورد ولا لسه؟

image358.gif

يظهر الاخ الاول من نافذة المنزل ضاحكا ملوحا بالتليفون

:حمدا لله على السلامة تفضلوا...

و ينزل مسرعا لمقابلته .

فى الدور الارضى يظهر والده

"اللى رد على الاخ التانى فى التليفون فاكرينه؟"

ويتوجه لمقابلة الضيوف على الباب ببشاشة مع ابنه .

image358.gif

يدخل الضيوف المنزل ويتجه الرجال الى الصالون بينما والدة الاخ التانى تقابلها ام الاخ الاول و تصعد السيدات للطابق الثانى ...تستقبلهم اخت الاول على استحياء ووشها احمر وحالتها ما يعلم بيها الا ربنا.

image358.gif

والده الاخ التانى تاخدها بالحضن و دموعها غصب عنها تنزل من الفرحة:

ماشاء الله عروسة زى القمر.!!!

image358.gif

باختصار الاخ التانى جاء خاطبا لشقيقة الاخ الاول الذى اصبح طبيبا ماهرا على صغر سنه و انتقل بعائلته الى منزل اوسع بفضل الله ... و بدون الدخول فى تفاصيل الشبكة و المهر و خلافه...و مادام الأساس موجود و كلنا عارفينه بالنسبه للاخت"فاظفر بذات الدين تربت يداك"

والاخ التانى هو مثال حى على "من ترضون دينه و خلقه" فالباقى مجرد شكليات ...مش كده ولا اييييييه؟؟؟

ادعولهم بقى بس متقولوش "بالرفاء و البنين " عشان الدعاء ده من الجاهليه

"بارك الله لهما و بارك عليهما و جمع بينهما فى خير"...ايوة صح كده

image358.gif

استنوا .... انتوا رايحين فين؟

مش دى النهاية....

سامعاكوا و انتوا بتقولوا" بعد ده كله النهاية التقليدية..

.و عاشوا فى تبات و نبات و خلفوا صبيان و بنات الى ان جاء هادم اللذات و مفرق الجماعات".

...لااااااااااااااا

المسرحية دى مالهاش نهايه..اقسم بالله مالهاش نهاية...مش على الارض...لا فوقها و لا تحتها و لا على المريخ..ماتستغربوش.. ومتقولوش انى ضحكت عليكوا...صبرا... لسه المشهد الاخير

شارك هذه المشاركه


رابط المشاركه
شارك

24.gifالمشهد الاخير24.gif

 

"مَا عِنْدَكُمْ يَنْفَدُ وَمَا عِنْدَ اللَّهِ بَاقٍ "النحل 96

(تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنْفِقُونَ * فَلا تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ ) السجدة/15-17.

image358.gif

الزمان:غير محدد...بس اكيد بعد اكتر من خمسين الف سنه مما تعدون

المكان: غرفة ...بس المره دى مافيهاش مكتب مذاكرة...ولا ترابيزة تليفون..دى غرفه مالهاش حل .. تشوفها من بعيييييييييييد زى الكوكب المنور.. ايه النور ده و ايه الجمال ده؟؟؟ ده مش وصفى انا ..

اقرا كده

( قال رسول الله صلى الله عليه وسلم إن في الجنة لغرفا يرى ظهورها من بطونها, وبطونها من ظهورها, فقام إعرابي فقال: يا رسول الله لمن هي؟ قال: لمن طيب الكلام ,وأطعم الطعام, وأدام الصيام ,وصلى بالليل والناس نيام)

image358.gif

الاخ الاول :

بس شكله اتغير اوى...طويل قوى ...وسيم جدا.. مفيش لحيه.." يظهر ضاحكا مستبشرا يستقبل اخوه ضيفه اللى جاى يزوره من بعيد"لأن الاخ الاول غرفته اعلى من غرفة اخيه عشان اعمال التانى وقيام ليله هو و اسرته كلها فى ميزان الاول...مش قلتلكم

"وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ"..

هو ده الجزاء..هو ده الثواب "الدال على الخير كفاعله" يا جماعة..اللهم اجعلنا ممن حسن قولهم و صلح عملهم..قولوا آمين

image358.gif

آآآه احنا سرحنا فى الكلام و سبناهم .. يا ترى بيعملوا ايه دلوقتى؟؟

اهم قاعدين بيشربوا حاجه ساقعة"بس ايه.. لا تقولى افتح تفرح ..و لا التطور الطبيعى للحاجة الساقعة و الكلام الفاضى ده"دى كاس مزاجها كافورا....ومين اللى بيقدمها ده؟؟ ولد صغير منور زى اللؤلؤ ..

{ويطوف عليهم ولدان مخلدون إذا رأيتهم حسبتهم لؤلؤا منثورا }

image358.gif

الاخ الاول ضاحكا: فاكر المول و الاوكازيون؟؟؟؟

التانى:و قسم الvip ....طبعا فاكر.. و دى حاجه تتنسى بردو؟؟؟يومها قعدت احلم بموبايل و ساعة....سبحان الله الواحد كان تفكيره قاصر جدا...بارك الله فيك يا اخى ..جزاك الله عنى و عن اسرتى و ذريتى الى يوم القيامة خيرالجزاء...و ها هو خير الجزاء....الحمد لله ..قد وجدنا ما وعدنا ربنا حقا...

{قَالُوا إِنَّا كُنَّا قَبْلُ فِي أَهْلِنَا مُشْفِقِينَ{26} فَمَنَّ اللَّهُ عَلَيْنَا وَوَقَانَا عَذَابَ السَّمُومِ{27} إِنَّا كُنَّا مِن قَبْلُ نَدْعُوهُ إِنَّهُ هُوَ الْبَرُّ الرَّحِيمُ{28} الطور

image358.gif

الاخ الاول:طيب ياللا بينا عشان ما نتأخرش...عايزين الزياده

يخرج الاخين من الغرفة ويعلو صوتهم فى نفس واحد :

" اللهم لك الحمد..اللهم لك الحمد..سبحان الله و الحمد لله و لا اله الا الله و الله اكبر"

image358.gif

سبحان الله فالتسبيح و التكبير لون من الوان النعيم المقيم فى الجنة يا اخوانى اهل الجنه يلهمون التسبيح كما نلهم نحن النفس.. ينضم اليهم اخوانهم من اهل الجنان و يمشون سويا جنبا الى جنب فى البساتين و الحدائق بين القصور و الخيام اللى وصفها الآتى"لا عين رأت و لا اذن سمعت و لاخطر على قلب بشر"...

ايه ده؟ محدش عنده فضول يسأل هم رايحين فين؟؟...انتوا سرحتوا فى الجنه مش كده؟؟طيب انا هقولكوا من غير محايلة.... رايحين ياخدوا الزيادة...عارفين ايه الزيادة؟ الزيادة هى اعظم نعيم..ده مش اعظم نعيم و بس لا ..ده نعيم هينسيهم كل اللى قاعدين فيه..عارفين ايه الزياده؟

الزياده هى رؤيه لله عز و جل

{وُجُوهٌ يَوْمَئِذٍ نَاضِرَةٌ إِلَى رَبِّهَا نَاظِرَةٌ }

{لِلَّذِينَ أَحْسَنُوا الْحُسْنَى وَزِيَادَةٌ

}

image358.gif

 

اللهم متعنا بالنظر الى وجهك الكريم

اللهم متعنا بالنظر الى وجهك الكريم

اللهم متعنا بالنظر الى وجهك الكريم

قولوا آمين

image358.gif

و لن يسدل الستار

24.gifكلمة اخيرة:

مش قلتلكوا..المسرحية دى مالهاش نهايه ..و لا بعيشة حلوة و لابالموت حتى ...ماتحاولوش ...

نعيم مقيم و جنات عرضها السموات والارض..

مستنياك..بتنادى عليك ..

ياللا اجرى..

لسه جايلك نوم؟؟بعد الكلام ده كله؟

اصحى ..صلى ركعتين بينك و بين حبيبك و اقعد كلمه و ادعى له يرحمك و يدخلك و يدخلنا معاك الجنة و يمتعنا بالنظر لوجهه الكريم....هذا هو اعظم النعيم

و السلام عليكم ورحمة الله و بركاته

 

شارك هذه المشاركه


رابط المشاركه
شارك

بورك فيكى حبيبتى رااااااااائعة

اللهم ارزقنا الجنة

شارك هذه المشاركه


رابط المشاركه
شارك

جزيت خيرًا أختي الحبيبة على النقل الرائع

اللهم إنّا نسألك الجنة وما قرب إليها من قول أو عمل

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

كن ثابتاً في إيمانك، كثيرَ التزوِّدِ بالْخير كي تتجَذَّرَ شجرةُ إيمانِك وعطائِك، فتثبت جذورُها وتقوى، وتسمو فروعُها وتنتشِر وتكثر ثمارُها

×