يا بنات السعودية، اين اجد الكرنب المصري للمحشي

[~ أم العبادلة ~ 1903]

السلام عليكم ورحمة الله وبركاته،

 

حياكن الله جميعا

 

أريد معرفة من أين أحصل على الكرنب المصري اللي بنعمل منه المحشي

لاني صراحة تعبت من الكرنب الموجود أيًا كان البلد المستورد منها وطبعا اللي جربته تعرف قصدي وتعرف المعاناة التي أعانيها لمجرد فك أوراقه من بعض والمعاناة الآخرى في حشوه ولفه

.

فيا ترى ماذا تفعلون؟؟

[وأشرقت السماء 1565]

وعليكم السلام ورحمة الله وبركاته

وحياكِ الله أمة

شوفى تقريبا ما تلاقى أبدا هنا الكرنب الموجود فى مصر وأقولك على طريقتى ممكن تنفع معاكِ

لأن الملفوف هنا تقريبا بيستعملوه للسلطات فقط

أنا أجيب الملفوف وأزيل الكيس الملفوف به وأتركها مكشوفة حتى تذبل أوراقها الخارجية قليلا وبعدين أشيل الورق الخارجى وأتركها أيضا تذبل قليلا ولو مستعجلة ممكن تقسمى الكرنب بالنصف بالسكين وتخلصى الورق ببطئ شديد حتى لا يتكسر

،

آخر مرة استريته قسمتها بالسكين نصفين وقطعت الأوراق وتركتها مفرودة تذبل تقريبا يومين وبعدها سلقته وعملت المحشى وكان جميل جدا

،

يارب تكونى فهمتينى وأى استفسار أنا فى الخدمة

[وأشرقت السماء 1565]

طريقة جميلة ساجدة

تصدقى فكرت فيها كتير لكن بصراحة ما طبقتها

وبصراحة أحببت أكثر فكرة ذبول الورق قبل السلق لأن الورق بيكون سهل فى الحشو ولا يتكسر منى نهائيا وبيتلف كويس جدا

بإذن الله المرة الجاية أجرب طريقتك

[ساجدة للرحمن 2050]

السلام عليك ورحمة الله وبركاته

حيا الله أمة الغالية

نعم غاليتي أتفهم ما تعانيه تماما ...وقد عشته فترة

حتى رزقني الله عزوجل بأخت حبيبه علمتني كيف أسلقه بدون أي تعب أو مشكلة

وحتى الآن كلما عملت محشي أدعوا لها ..أٍسال الله أن يكون هذا الدعاء من نصيبها

.

بصي يا غالية ...تجيبي الكرنب ...وسكينة لها سن

وقومي بإزالة الجزء العلوى من الكرنبه على شكل دائرة واسعة بعض الشيء حتى يكون سهل بعد ذلك تفكيك الأوراق

أغلي الماء عادي ...وضعي فيه الملح والكمون ... وبعدها ضعي الكرنبة كاملة في الماء مقلوبة على وجهها

أتركيها دقائق بسيطة وبعدها قومي بقلبها على الناحية الأخرى

ستجدي أن الأوراق تتفكك بسهولة ...لأن الماء المغلي يطري الأوراق فيسهل فكها ..وكذلك لأنك أزلت إرتباطها بالرأس عندما قطعتيها

وكل ما طبقة تسلق قومي بإخراجها حتى يتسنى للطبقات التي تليها بأن تسلق هي الأخرى

بهذه الطريقة ... ستنتهين سريعا وبدون أي تعب ^_^

أتمنى أن يكون كلامي مفهوما ... وإذا لم يكن كذلك أخبريني حتى أصورها لك

بارك الله فيك :)

[*امة الله حنان* 50]

السلام عليكم ورحمة الله وبركاته

انا باعمله تقريبا مثل ساجدة بالظبط

ولكن تظل مشكلة ان الورقة تكون ملعبكة قليلا واو مكرمشة بالمصرى وررقتها سميكة وغالبا يصعب حشوها

فنصحتنى امى بارك الله فيها انه بعد السلق اضع الكرنب فى الفريزر لمدة يوم وبعدها اخرجه ليفك ثم احشوه وهذا يساعد على فرده ولله الحمد

ارجو ان اكون اضفت اضافة مفيدة

يسر الله امرك اختى

[~ أم العبادلة ~ 1903]

بورك فيكن يا غاليات

ان شاء الله أجربها

انا عملت طريقتك سجودة بإني عملت حفرة وأزلت الرأس وحاولت فك الورق وبعد فكه قمت بسلقه

إن شاء الله أجرب ازيل الرأس وبعدها أسلقه واضعه في الفريزر وربي ييسر لأن بصراحة الأمر متعب جدا لدرجة اننا اصبحنا تقريبا لا نأكل محشي كرنب الا في مصر والله المستعان

[أم البطل عبد الملك 19]

حياك الله امومة الغالية

مما فهمته من مواضيعك قبل كدة انك تسكنى فى شمال الرياض صحيح؟

انا فى شرق الرياض .فى حى قريب منه اسمه الربوة . فيه اسواق اسمها اسواق الخضار بالربوة كان فيه كرمب عادى وكرمب محشى رااااائع زى محشى مصر بس الكرمبة كانت ب 10 ريال

غالية بس جميلة

 

برضة الناس اللى بتكون ف الشارع انا لاحظت ان خضارهم احسن من الهايبرات واحيانا بجيب منهم

 

لو يأست بقى بجيب من العثيم بسس دة اخر الحلول

 

لان زى ما قلتلك من الاسواق الاحلى

 

واحنا فى الشتا يعنى الكرمب بيكون فيه احلى

 

ممكن اعزمك عليه ايه رايك تنورينا ^_^ واديك كرمبتين هدية من احلى نوع

ايه رايك؟

 

 

أحبك فى الله أمومة وساجدة للرحمن

 

انا متابعة معكم من 4 سنوات ولكن اتابع فى صمت لذلك لا يعرفنى احد واعرفكم جميعا

 

اصلح االله احوالكم

[بنت الاسلام السلفيه 110]

السلام عليكم ورحمه الله وبركاته

امومه حبيبتى جايز انت ما تعرفينى

لكنى اعرفك من مواضيعك وردودك

وبالاكثر لما كنتى بالاسر الحمد لله على فكه

من كلامك فهمت ان الكرنب ده اللى احنا عندنا فى مصر بنعمله سلاطه

لان زى ما بتقولى ناشف وبيتكسر بسرعه ولعلك استفتدى من تجارب الاخوات

ولو مفيش فايده اعملك احلى حله محشى كرنب بس مصرى

وأجيبه لحد عندك يا قمر

تم تعديل 16 يناير, 2012 بواسطة بنت الاسلام السلفيه

[~ أم البطلين ~ 26]

انا كمان كنت بعانى منه وحماتى الله يكرمها قالت لى اعمل مثل ما قالت سجودة

 

انك تضعى الكرنبه بحالها بعد شيل الراس فى الماء المغلى.. وتقلبيها .ز وهيبتدى الورقق يتفكك .كل ماتحسي ان ورقه اتسلقت شيليها .. واللى بعده وهكذا

 

بتسسسهل كتتيير

 

وهتعمليه على طول ان شاء الله

[قلب ينبض بحب الله ورسوله 1]

جزاكن الله كل خير يابنات

استفدت منكن كتير

[سبيل الهدى 2 14]

قرأت في منتدى آخر .. أن تضعي الكرنبة كلها في الفريزر لمدة 24 ساعة.. ولما تطلعيها حتكون زي المسلوقة وتتفكك بكل سهولة..

وكده كمان حيكون الكرنب محتفظ بفايدته ومش راحت في مياه السلق..

 

بس أنا لسة مجربتش الطريقة دي بصراحة..

[~ أم العبادلة ~ 1903]

حيا الله الغاليات

ما شاء الله نصائح مفيدة وعزومات كثيرة شهية

أنا لسه ما جربتش لأني بنسى أقول لزوجي يشتري كرنب لكن إن شاء الله أجرب وأرجع لكم بالنتائج

[شذى الهمة 331]

ليه صديقتي كانت تشتريه من شارع البطحا بالرياض

بيوجد هناك كرنب مصري

أنا بقى الحمدلله عمري ما اشتريت كرنب لا هنا ولا في مصر

[~ أم العبادلة ~ 1903]

بجد والله في في البطحة؟؟

طيب ده يبقى ممتاز وأسهل على الأقل اقدر استعمل الكرنباية كلها بدل ما برمي نصفها لانه غير صالح

طيب تقدري تعرفيلي فين بالضبط في البطحة ؟؟

[وأشرقت السماء 1565]

ليه يا أمة ترمى بقية الكرنب

والله يا بنات أنا دايما بعملها بطريقتى التى ذكرتها وبتكون روعة لأنى بعد كدة بقطع الورق الصغير الذى لا يصلح للمحشى مع العيدان الطرية الجميلة وأعمله مخلل

ولو عندى مخلل أصلا بضعه معاه

من فترة كان عندى مش وخلص زودت عليه كمية لبن وكل لما أجيب كرنب أضع مثل ما قلت فى المش وأيضا الجزر إن كان كثير عندى أضعه معه وبيبقى روعة

.

كويس يا سجودة إنك قلتى على موضوع البطحة لأن زوجى بيروح هناك كل أسبوع بإذن الله أقوله يشترية وأجربه

[~ أم العبادلة ~ 1903]

برميه لأننا عندنا القولون والكرنب المخلل والني من الأشياء اللي بتهيجه

بالاضافة أن عبد الرحمن تعب منه وتقئ

وبالتالي لا نستطيع أكله غير للمحشي فقط والذي لا يصلح للمحشي نرميه

 

طيب الله يكرمك يا أشروقة لو زوجك وجده يا ريت تعرفي وجده فين بالضبط لأننا مش بنروح البطحة وهطلب من زوجي يروح مخصوص للكرنب ^^

[أم محمد وعائشة 11]

السلام عليكم كيف حالك أمة

 

بصى أنا كنت بعانى مثلك لكن فيه أخت سورية نصحتنى أجيب الكرنبة وأشقها للداخل بشكل دائرى حول الراس

 

وبعدين أغلى الماء وأضعها كاملة فتتفكك بالتدريج رصة ورا التانية وانشلى اللى هتنفصل اول باول

 

وبعد كدة قطعيه واحشيه

 

جربتها والله تقريبا ما رميت ولا قطعة

[وأشرقت السماء 1565]

برميه لأننا عندنا القولون والكرنب المخلل والني من الأشياء اللي بتهيجه

بالاضافة أن عبد الرحمن تعب منه وتقئ

وبالتالي لا نستطيع أكله غير للمحشي فقط والذي لا يصلح للمحشي نرميه

 

طيب الله يكرمك يا أشروقة لو زوجك وجده يا ريت تعرفي وجده فين بالضبط لأننا مش بنروح البطحة وهطلب من زوجي يروح مخصوص للكرنب ^^

 

حاضر بإذن الله لما يجيبه أقولك حتى ممكن أقوله يسأل أخيه هو ساكن هناك وهاقولك بإذن الله

[وأشرقت السماء 1565]

أنا سألت زوجى يا أمومة

قال إنه موجود فى سوق الخضار واللحوم تقاطع كوبرى البطحة مع طارق بن زياد بجوار مطعم سلامة

لكن هو لسة ما جابه لأنى أول مرة أعرف بوجوده هنا فالأفضل إنك تنتظرى لما يروح هناك ويجيبلى لكى تتأكدى أكثر من وجوده طالما أن زوجك سيذهب مخصوص له بإذن الله

[أمة_الرحمن 90]

ما شاء الله كلكم في الرياض... :*( بدي اجي عندكم واعزم نفسي عكرنب

 

امومة حقولك على طريقة امي

انا نفس مشكلتك ما باكله الا بالاردن

بس انا عرفت الحل وما جربته ...كسولة

الحل مثل ما قالة الاخوات تحطي الملفوفة بحالها بماء مغلي على النار وكل ما تذبل طبقة اوراق تشيليها وتقطعي اللي بينحشي منها

العروق الباقية اتوقع بترميها

بس امي بتعملها بطريقة لذيذة جدا وبتعطي نكهة رائعة للمحشي

وهي انك تقطعيها زي ما تقطعي اي خضار للطبخ يعني شرائح رفيعة مثلا

وتحطيها بقاع الطنجرة اللي بدك تحطي فيها الملفوف المحشي وتحوسيها عالنار شوي مع زيت وترشي عليها قرفة وبعدين رتبي الملفوف المحشي فوقهم

ولما تقلبي الطنجرة بعد ما تنضج حيكون ريحتها بتشهي وطعمها رائع وبيعطي شكل حلو احنا بناكل هاد الوجه بخبز

ومجموعة الاوراق اللي بنص الملفوفة اللي بيكونو اصغر من انهم ينلفو ...امي بتعمل فيهم التالي بعد ما ينسلقو طبعا بيصيرو طريين فبتفتحهم وبتفرغ شوية ورق من الصغار اللي جوا وبتحشيهم وبترجع تسكرهم عبعض يعني زي الوردة المغمضة...اتمنى تكون وضحت

وكنا بنسميها جاجة وبتعطيها لاصغر حد بالعيلة (اللي هو انا)وبنفرح عليها كتير ^_^

وهيك ما بترمي من الملفوفة اي حاجة

وبيطلع طعمها رائع

وما تنسي ترشي عصير ليمون عالوجه قبل الاكل

يممممممم

شهيت حالي وانا بحكي

[ام هانيا 35]

فعلا الكرنب في السعوديه معاااااااااناه

مع اني بطبق نفس طريقة ساجده

بس برضه تفضل مصر ام الدنيا

[~ أم العبادلة ~ 1903]

أشروقة أنا أرسلت لزوجي العنوان، مش عارفة يقدر يروح ولا لأ بس آهي تجربة ويظهر الموضوع هيجي بفايدة لبنات الرياض علشان عرفوا طريق الكرنب المصري بس يا رب يطلع كرنب مصري

 

أمومة طريقتك جميلة جدا بس مش هقدر أجربها الا لما أولد علشان القرفة مضرة للحامل

وأظن زوجي اتعقد من الكرنب لأنه آخر مرة على ما خلصت حشو فقط وطبخ كان على المغرب :)

 

أم هانيا

تعرفي جاتني فكرة

إني لما أنزل مصر في الصيف، اشتري كمية كرنب وأسلقهم وأخزنهم بالفريزر وأجيبهم معايا السعودية :))

[وأشرقت السماء 1565]

يارب يوصل له بالسلامة وعلى فكرة هو الطريق ما يتوهش دا لو راح هناك قبل كدة

وعلى فكرة يا أمة الرحمن 2 أنا بعمل كدة لو مش هاعمل مخلل كرنب بسلق كل الورق وبضع الورق الذى لا يصلح للمحشى فى قاع الحلة مع بصلة وطماطماية وفلفل

وقلب الملفوفة الصغير جدا إللى بتصلى له فى الآخر بضع الحشوة بين الطبقات وبعملها على شكل وردة فى منتصف الحلة

.

ههههههههههه يظهر إننا بنعمل إعلان للكرنب المصرى

ضحكتينى يا أمومة وفكرتينى بأبى ربنا يعطيه الصحة لما خرج على المعاش أجر قطعة أرض زراعية بجوار بيتنا وزرعها كرنب وكل لما أكلمه يقولى أبعتلك كرنباية

.

لكن ملحوظة كثرة تخزين الكرنب فى الفريزر يعطى مذاق مختلف للمحشى يعنى تحسى إن الورق بيقرمش بعد طبخه كأنه لم يُسلق جيدا ودى ما جربتهاش هنا إنما فى مصر لأننا كنا بنخزن ورق كتيييييير مسلوق فى الفريزر

.

يا لا ربنا ييسر الحال وتلاقى الكرنب وإوعى تنسى تعزمينا يا بنت

[~ أم العبادلة ~ 1903]

أنا أنسى برده بس قولي يا رب زوجي يقتنع يروح أحسن شكله مستثقل المشوار :(

[وأشرقت السماء 1565]

بينى وبينك الطريق هناك زحمة جدا وصعب

أنا بقول أحسن يا أمومة تستسلمى وتحاولى تقربى أكتر من الملفوف الملفلف ده وأمرك لله هههههههة يمكن تحصل ألفة بينكم وتحبوا بعض

لأن لو زوجك راح مرة وجرب الزحمة دى صدقينى كله هيطلع عليكِ وساعتها هتنسى المحشى تماما وهتقولى عمرى ما هاعمله بعد كده

.