حريم كفر أبو نعجة

[هبة عبد العظيم نور 2042]

حكايات حلوة وشيقة جدا ونا حبيتها

رائعة انت يا هبة والله ربي يبارك فيك وفي خفة دمك ههههه

-(مامعنى كفر ابو نعجة) è(والترعة ) (نقزقز لب بطيخة) ههههه توضيح منك ياست ستيتي أصل اني مش مصريي ياوليي واني زيي الطرشي في الزفي ههههههه

 

 

 

 

 

 

هههههههههههههههههههههههههههههه

 

اني يا ضنايي كنت عاملي قاموس لمفردات الكفر عشان الخواجات اللي بيزرونا

 

لكن اتسرق من قلم المحفوظات يا ضي عيني

 

بصي يا نضري الكفر هو قرية صغيرة

 

ابو نعجة دا اسمه ههههههههههههههههه

 

نأزأز لب يعني نفصل قشر اللب عن النواة بتاع اللب عن طريق استخدام الاسنان

 

اقولك بصراحة اني يختي مش بحب اللب من اساسه والله عشان بيدشدش في بقي وما بعرفش أأزأزه

 

اما عن الترعة يا سارة يا ضي عيني دي قناة مياه

 

بعدين اكملك يا فلذة كبد امك عشان مضطرة اغادر المنطقة في التو واللحظة على امل اللقاء

[هبة عبد العظيم نور 2042]

عواف يا خالة ستيتي

 

الله يعافيكي يا شلبية يا ضنايا

 

مش تباركي لامي يا خالة

 

ليه يا بت هما عينوها شيخة غفر

 

لا يا خالة اصل ابويا هيتجوز

 

يتجوز . وامك فرحانة ! طب ازاي . اتهفت في نفوخهي دي ولا ايه

 

يا خالة ماهو طول النهار طلباته ما بتخلص ويزعق وينطر ويشخط راحت امي دورتله على عروسة عشان يحل عن سماها شوية

 

هي امك هي اللي جابتله العروسة

 

إيوا أومال . عروسة حلوة اوي اوي

 

وكمان جابتهاله حلوة

 

إيوة عشان تضمن انه ما يجيش الدار عندنا تاني

 

احسن برضو يا ضنايا . عقبال جوزك

 

بعد الشر يا خالة

 

كلها كام سنة وتزهقي وتعملي زي امك

 

اني جوزي طيب ويتحط ع الجرح يطيب

 

يهدي سرك يا ضنايا قولي ان شاالله

[هبة عبد العظيم نور 2042]

ازيك يا خالة ستيتي

 

اهلا يا عوضين يابني اقعد اشرب شاي

 

اني جايلك عشان تجوزيني يا خالة

 

يا دي النيلة . يا واد ماني لسة مجوزاك السنة اللي فاتت .

 

ماحصلش يا خالة

 

ياواد انت هتمخولني معاك . دي مراتك كانت عندي من كام يوم وسألتها عليك

 

انتي شوفتيها بعنيكي يا خالة

 

إيوا يا واد . ليه هي بقت تلبس طاقية لخفا

 

يا خالة دي بتيجي الدار كل اسبوع مرة

 

يا حومتي . ليه . وبقيت الاسبوع بتروح فين

 

قاعدة عند امهي

 

ودا اسمه كلام يا ولا . ايه قلة الربايي دي

 

يا خالة انتي بتزعقيلي اني ليه . ماتروحي تزعقيلهي هي

 

هي فين مخفية الاسم دي .

 

ماني قولتلك عند امهي

 

ناولني خرزانة يا واد . اني هروح اجيبهي من عند امهي على عربية كاروا وافرج عليهي الكفر كلاته

[هبة عبد العظيم نور 2042]

افتحي يا ام المحروسي

 

اهلا يا خالة ستيتي

 

هي فين مخفية الاسم بنتك

 

ليه بس هي عملت ايه

 

فايتة دارهي وقاعدة حداكي ليه وبمناسبة ايه

 

يوه . قاعدة بتتونس وسط اخواتهي

 

وهو جوزهي مايعرفش يونسهي

 

ماهو طول النهار برا

 

مش بيراعي اشغاله وحاله وماله

 

طب وماله . واني بنتي قاعدة في حضني

 

خليها في حضنك على طول

 

يعني ايه يا خالة ستيتي

 

يعني من الآخر الراجل عايز يتجوز

 

 

يوه يوه يوه صوتي يابت يا عديلة جوزك هيتجوز عليكي

 

يالهووووووووووووووووووووي يتجوز ازاي . هو احنا لحقنا . اه الخاين الغدار اللي قيداله صوابعي العشرة شمع

 

صوابع ايه يا عديمة الصوابع . هو بيشوفك ولا بيشوف صوابعك عشان تقيديهاله يا كدابي

 

يا خالة هو جزائي اني بروح اشوف طلباته واغسله غسيل الاسبوع واطبوخله طبيخ الاسبوع . دا لولايا كان مشي بهدوم معفنة ومات من الجوع

 

خلاص يا ضنايي الكلام مالوش عازي . اني جايي اعزمك على فرحه ان شاء الله .

 

ومين المدعوءة اللي هيتجوزها دي

 

واحدة هتقعد معاه كل يوم وتروح لامها مرة في الاسبوع وتعملي الاكل صابح بصابح وتأكله بأديهي وكل يوم تلبسه جديد في جديد

 

اما . عن اذنك ياما . اني رايحة داري . ومش هاجي ازورك الا بعد شهرين

 

يكون احسن برضو . وياريت ما تجيش خالص .عشان بتخلصيلنا الأكل

 

 

صحيح . نساوين ما تجيش الا بالسك على دماغيتهي .

[sara soror 87]

يا حومتي معناها ايه الكلمة دي يا ست ستيتي فسري للخواجات

خرزانة ودي كمان

هههههههههههههههههههه

 

والله فكرة حلوة لما تزهقي من زوجك زوجيه وايه عروسة حلوووووووووووة ههههه

[هبة عبد العظيم نور 2042]

يابت يا سارة انتي كل شويي هتنطيلي زي عفريت العلبي تقوليلي الكلمة دي يعني ايه

 

هو يابت بتكلم لوندي ولا سنغفوري

 

هاتي ورقة وقلم واكتبي ورايي

 

يا حومتي يعني يا مصيبتي

 

خرزاني يعني عصايا رفيعة كدي بيضربوا بيهي الحلوين اللي زيك

 

يلا خدي حمارتك واسرحي يابت عشان عايزة انام ولا اقوم اجيبلك الخرزانة

 

ناولوني الخرزانة يا ولاد

 

 

اني هعملك امتحان عن قريب في معاني مفردات الكفر وإياكي تجاوبي غلط

[~ماريا~ 1340]

ههههههههههههههههههههههههههههههههههه

مين الست العسل الي جوزت جوزها دي

 

هههههههههههههههههههههههه

 

والله شاطرة

 

اما الي قاعده عن امها بحجه انه طول اليوم برا

فدي حجه بايخه

لانه اكيد برا بيشتغل مش بيلعب يعني وبيرجع تعبان وعايز يلاقي حد مستنيه واكله جديد مش بايت

 

 

جمييييل يا خاله ستيته

[اعتز بالاسلام 126]

عسل يا هوبة ايه الحلاوة دى

 

اسلوبك شيق فى معالجة المشاكل

 

زادك الله ياغالية وجعل موهبتك فى ميزان حسناتك

[sara soror 87]

هههههههههههه

أنا عملت لك ايه ومحتاجة ضرب بالخرزانة كمان لئ لئ لئ مش حاجي لكفر أبو نعجة ده ثاني

مشكورة يا ستي على الشرح (طيب اشرحي لي عفريت العلبي) ههههه هرووووووووووووووووووووووووووووب

[sara soror 87]

وانت يا بنت يا ماريا كمان عملالها اعجااااااااااااااب

ماشي يا اختي

[ام(عمير) 5]

ازيكم يا اهل الكفر

 

ازيك يا خاله ستيتة

كده اقطع المسافة دى كلها بحمارى علشان ازورك فى الكفر واتفرج على نساوينة هههههههههههههه وما تبقيش فى استقبالى

 

انا قاعده مستنياكى اهو بس لو اتأخرتى ها امشى ومش جايه عندكوا تانى.........

[ام(عمير) 5]

لا بصراحة مسلسل نكتة

 

واحسن موقفين ضحكونى اوى فعلا

 

المكرونة الشنافيلة والعجان المطوووووووووور ...

 

وبعدين يا خاله ستيتة هيا خاله نجفه ولا مش عارفة اسمها ايه لسه يا نضرى مخشبة ومش بترد عليكو ؟؟؟؟؟؟؟

 

 

 

هههههههههههههههههههههههههههههههههه

[هبة عبد العظيم نور 2042]

بت يا زهرية

 

انتي يابت

 

عايزة ايه ياما

 

قومي يابت ناوليني فرختين من ع السطح عشان ندبحهم اختك وعيالها زمانهم جايين

 

اني ياما مابعرفش ادبح فراخ وانتي عارفي

 

اللي ما يعرفش يتعلم يا عين امك

 

اني بقى مش عايزة اتعلم ياما

 

اومال هتتجوزي ازاي يا فالحي

 

هو اني لازمن اعرف ادبح فراخ عشان اتجوز

 

اومال هتفتحي دار ازاي يا حيلة امك

 

اني بصراحة ياما مش لادد علية العيشة في الكفر ومش عايزة اتجوز من الكفر اصلا

 

يا سلام يا سلام اومال عايزة تتجوزي فين ومين يا عين امك

 

اني ياما عايزة اتجوز بيه ملو هدومه من بهاوات البندر . يعني بواب في عماري ولا سواق توكتوك . عريس كدة يشرح القلب

 

يخيبك يا مضروبة . احنا مالنا ومال الآكابر دول . بصي على قدك يابت وما تبصيش لفوق لرقبتك توجعك . وبعدين الناس الكبارات دول هيبصولك على ايه يابت

 

اني حلوة ياما

 

يعني هو البندر ما فيهوش حلوين يابت . طب دا حريم البندر زي لهطة القشطي . هتروحي فيهم فين يا مقشفة انتي

 

برضو ياما مش هتجوز الا من أعيان البندر

 

لا لالا انتي اتخبطي في نفوخك واني مش هسكت عليكي واسيبك كل شوية ترفضي في عرسان الكفر وتحلمي ببتوع البندر لحد ما تعنسي ولا هتطولي عنب الشام ولا بلح اليمن

 

بقولك ايه ياما اني خارجة وفايتالك الدار

 

رايحة فين يابت

 

رايحة عند خالة ستيتة حبيبتي هي اللي هتفهمني

 

روحيلها ياكشي تديكي شومة على دماغك تفوقك

[وأشرقت السماء 1565]

^ـــــــــــــــــــــــــــــــــــــــــــــــــــــ^

 

عسل يا هوبة.

[هبة عبد العظيم نور 2042]

تن تن تن

 

مييييييييييييييييييييييييييييييييييييييييييييين

 

اني زهرية يا خالة ستيتة

 

زوقي الباب وخشي يا بت الباب مفتوح

 

 

عواف عليكي يا خالة ستيتة

 

الله يعافيكي يا ضي عيني . ازيك يا بت يا زهرية وازي امك

 

الحمدلله كلنا بخير يا خالة

 

كويس يا بت انك جيتي وفرتي علية المشوار

 

لا هو انتي كنتي جايالنا يا خالة

 

ايوة يابت . جيبالك عريس انما ايه

 

مش عايزاه يا خالة

 

يوه . هو اني قولتلك هو مين يابت عشان تقولي مش عايزاه

 

يعني هيكون مين . أهو واحد من مقاطيع الكفر

 

جرا ايه يابت . مالك كدة ماحدش مالي عينك وفاردة قلوعك ع الآخر . ديه عريس ما يترفضش . دا الواد محروس الغفير

 

والله لو كان شيخ الغفر حتى انا مش عايزاه

 

في ايه يابت . كلامك مش عاجبني

 

اني يا خالة عايزة اتجوز واعيش في البندر .

 

بندر ! واحنا مالنا ومال البندر وعيشة البندر يابت . مين ملا دماغك بالكلام دي

 

يا خالة هو انتي ماشوفتيش فيلم أفواه وأرانب

 

انتي نفسك في الأرانب يا ضنايا . أقوم ادبحلك جوز ؟

 

ياخالة ديه فيلم سيما . وشوفت فيه البيه أبو بنطلون وكرافيتي اتجوز الشغالي وخلاها هانم وساب خطيبته عشانهي كمان

 

يا حلاوة يا ولاد . وانتي بقى عايزة تسافري البندر وتشتغلي خدامة والبيه ابو بنطلون وزاكيتة يتجوزك

 

لا يا خالة اني ما اشتغلش خدامة اني هانم وهفضل طول عمري هانم . هو اني فيه في حلاوتي

 

ايوة الله على رأيك ياضنايا . انتي خسارة في رجالة الكفر . خليكي قاعدة مستنية البيه أبو بنطلون وزاكيتة

 

أهو انتي دلوقتي فهمتيني ياخالة

 

طب يا ضنايا .انا رايحة مشوار ازور واحدة حبيبتي . ما تيجي معايا

 

اجي معاكي يا خالة اني اصلا مش عايزة اروح دارنا دلوقتي وزهقاني

 

 

 

 

 

 

 

عواف يا نعيمة

 

الله يعافيكي يا ستيتة اتوحشتك والله . مين السنيورة اللي معاكي دي

 

 

دي زهرية زينة بنات الكفر كلاته

 

حلوة اوي اسم الله عليهي

 

تسلمي يا خالة نعيمة

 

 

قوليلي يا نعيمة انتي مش عايزة حاجة يختي

 

تسلمي يا ستيتة الحمدلله على كل حال

 

يختي ما تتكسفيش احنا اخوات

 

واكتر والله يا ستيتة . هو في حد بيطل علية غيرك يختي

 

دا واجب يا نعيمة يختي

 

اما اقوم اعملكو شاي

 

لا والله لسة شاربين . اني بس جيت اسأل عليكي واشوفك اذا كنتي عايزة حاجي

 

تسلمي يختي يارب ما تحرم منك ولا من سؤالك علية

 

طب فوتناكي بعافية بقى

 

الله يعافيكي يختي مع السلامة

 

 

 

قوليلي يا خالة ستيتة

 

نعمين يا عين خالة ستيتة

 

هي خالة نعيمة عايشة لوحدهي

 

ايوة يا كبدي لوحدهي بين اربع حيطان

 

ليه وولادهي ما بيسألوش عليهي ليه

 

هي كانت اتجوزت من اساسه عشان يبقى عندهي عيال

 

يوه يوه يوه . طب ما اتجوزتش ليه

 

ابدا يا ضنايا . لما كانت في شبابهي ماكانش في حد في جمالهي وكانت مستخسرة روحها في رجالة الكفر

 

والله يابت يا زهرية جالها عرسان ياما وياما وهي مارضيتش ابدا وتقول اني مش لاقية اللي يملا عيني

 

وفضلت قاعدة لحد ما عدت الخمسين عقبال ما اشوفك زيهي وافرح بيكي

 

بعد الشر يا خالة الف بعد الشر . ياحومتي اني ممكن يجري بيا الزمن وابقى لوحدي كدي

 

طيب بالإذن انتي روحي على دارك عشان هروح اعدي على أم محروس أقولها انك رفضتي ابنهي ونفكرله في عروسة جديدي

 

يوه يوه جرا ايه يا خالة . اني قولتلك برضو اني رفضت سي محروس . دي عريس ما يترفضش ابدا

 

لالالا يابت انتي تستاهلي بيه من بتوع البندر عشان يخليكي هانم

 

لا ياخالة اني عقلت خلاص . الهانم هانم في دارهي وسط عيالهي وراجلهي

 

الحمدلله ان عقلك رجعلك فوتك بعافية عشان اعدي على ام محروس ونشوف هنيجي لامك امتى

 

ربنا يخليكي ياخالة ستيتة يا جلابة الهنا والسعد

[هبة عبد العظيم نور 2042]

^ـــــــــــــــــــــــــــــــــــــــــــــــــــــ^

 

عسل يا هوبة.

 

يعسل مقدارك يا ست ام الاء

 

الكفر بينور لما بتطلي علينا

 

تعالي كلي جبنة اريش وفطير تلاقيكي لسة ما شقتيش ريقك يا كبد امك

[~ماريا~ 1340]

يا اهلا يا خالتي ستيته وحشاناني كتيييييييييييييييييير

فعلا والله دي مشكله بتحصل كتير من بنات الارياف وبيكون مصيرهم الوحده

[سماء الفردوس 305]

عسل يابت ياهبه ياللى زى لهطة القشطه انتى ههههههههههههههههه

 

وعلى راى المثل خطبوها اتعززت وفتوها اتندمت

 

بنات اخر زمن عايزه بواب ولا سواق توكتوك اهو ده اللى ناقص قربت تقول عايزه سواق مكروباص ماهو الافترى له

 

ناس هههههههههههههههه

[m.k.sanad 4]

اهلا ياخالة ستيتة

انا اول مرة ادخل الكفر دة وماقدرتش استأذن وامشى الا لما اسلم عليكو واحدة واحدة واقولك تسلم حنكك يا خالة وتسلم افكارك - انى راجعة تانى بس اشوف دارى وراجلى واعود لحس الحاج عصبى قوى

بس كنت عايزة اعرف ياخالة من اى محافظة انتى كلامك كدة بيقول انك من حدى كفرنا مش بعيدة عنا واخدة منا كتير انا من كفر العنب مع ان اصحاب البلد مابيزرعوش العنب ولحد دلوقت مش عارفة لية سموة كدة ما علينا

هقبلكو قريب وهجيب معاية طرمس الشاي وهعملكوا طاجن ارز معمر وعليكى تجيبى اللبن لزوم الشاى ........... فتكو بالعافية

[ساجدة للرحمن 2049]

^___^

الله يبارك فيك هبهوب

تعرفي وأنا بقرأ حاسة إني شايفاهم وسمعاهم :)))

...

هذا التمرد ليس في الريف وحده وإنما أكثر ما تشاهدينه في المدن ..

فالفتاة الآن لا تحلم بفارس الأحلام على الحصان الأبيض

وإنما تحلم بالشاب صاحب السيارة آخر موديل وأرصدة البنوك الممتلئة

وتظل تحلم وتحلم وترفض حتى تجد نفسها وحيدة بلا أنيس أو ونيس

هدى الله بناتنا وبنات المسلمين

وجزاك الله خيرا يا غالية

[~ أم العبادلة ~ 1903]

...................................

[قدوتي محمد -صلى الله عليه وسلم 31]

ما شاء الله عنك يا هبهوب هدا الدلع يا هبة

كيف بتقدري تألفي هذا الحوار

ولا إنتي معايشة ناس وبيكون هذا الحوار تقريبا

وكمان هل أنتي كاتبتيه على ورق أم ترتجلي الكلام إرتجالي يعني بكون الكلام بآخذ وقت حتى تفكري

 

أتحفتينا

[هبة عبد العظيم نور 2042]

يا اهلا يا خالتي ستيته وحشاناني كتيييييييييييييييييير

فعلا والله دي مشكله بتحصل كتير من بنات الارياف وبيكون مصيرهم الوحده

 

 

والله يا ضي عيني في الأرياف والبندر كمان

 

بنات عايزة كسر رقابيها جاتهم الهم

[هبة عبد العظيم نور 2042]

عسل يابت ياهبه ياللى زى لهطة القشطه انتى ههههههههههههههههه

 

وعلى راى المثل خطبوها اتعززت وفتوها اتندمت

 

بنات اخر زمن عايزه بواب ولا سواق توكتوك اهو ده اللى ناقص قربت تقول عايزه سواق مكروباص ماهو الافترى له

 

ناس هههههههههههههههه

 

ايوة يا بتاعة الأمثال يا حلوة انتي

 

اسم الله عليكي وحواليكي

 

عشنا وشوفنا عايزين بيه بكرافيتي

 

ماله الفلاح أبو حمارة

[هبة عبد العظيم نور 2042]

اهلا ياخالة ستيتة

انا اول مرة ادخل الكفر دة وماقدرتش استأذن وامشى الا لما اسلم عليكو واحدة واحدة واقولك تسلم حنكك يا خالة وتسلم افكارك - انى راجعة تانى بس اشوف دارى وراجلى واعود لحس الحاج عصبى قوى

بس كنت عايزة اعرف ياخالة من اى محافظة انتى كلامك كدة بيقول انك من حدى كفرنا مش بعيدة عنا واخدة منا كتير انا من كفر العنب مع ان اصحاب البلد مابيزرعوش العنب ولحد دلوقت مش عارفة لية سموة كدة ما علينا

هقبلكو قريب وهجيب معاية طرمس الشاي وهعملكوا طاجن ارز معمر وعليكى تجيبى اللبن لزوم الشاى ........... فتكو بالعافية

 

 

اهلا وسهلا يا ضنايا يادي الخطوة العزيزة يا ست ايه بي سي دي إي إف جي ايتش أي جيه كيه

 

معاكي لحد زد . لا مؤاخذة نسيت الحروف

 

ماعلينا من الحروف المهم انك نورتي الكفر يا عين اختك

 

لا يا نضري اني من القاهرة وبعدين اتجوزت في المنيا يعني محافظة من محافظات الصعيد

 

لكن دي لهجة فلاحي يا تفاحي

 

اتعلمتها من التلافزيون من المسلسلات القديمة

 

اصلي دلوقتي مابشوفش مسلسلات

 

جوزي لاغيلي كل القنوات ومخليلي القنوات الدينيي والإخباريي

 

وعايشة ع الذكريات بتاعة المسلسلات القديمة

 

 

بس اني واخدة على خاطري منك يا ست حروف هانم

 

ازاي ما تجبليش كام عنقود عنب من حداكو في الكفر