اذهبي الى المحتوى
هبة عبد العظيم نور

نشرة أخبار المتجوزين

المشاركات التي تم ترشيحها

سيداتي وستاتي اللي قاعدين قدام شاشتنا العامرة

 

يجعل بيوتكم عامرة

 

يجعل البط والوز والديوك الرومي ماتفارق سفرتكم ابدا

 

ويبعد عن بيوتكم الفقر والنحس الدكر

 

ويجعل رجالتكو خواتم في صوابعكو الصغننة قولوا آمين

 

 

معاكم حشرية الرخمة من قناة مكسورين الجناح

 

 

هقولكو موجز الاخبار وهروح اشرب كوباية شاي واجيلكو بالتفاصيل

 

 

 

 

 

خناقة بين عواطف وحسين عشان طلبت زيادة في المصروف عشان مرتبه زاد

 

 

يادي الغلب ياولاد

 

 

أحمد ضرب منى عشان حرقتله البنطلون

 

تستاهل البعيدة عامية القلب والنظر

 

 

حماة كاميليا جت تزورها راحت كاميليا مكهربة جرس باب الشقة

 

فكرة مش وحشة برضو

 

 

 

وأخيرا وليس آخرا جوز مايسة جه من السفر لقاها أجرت الشقة مفروش وراحت قعدت عند امها

 

 

 

بعد شوية هنجيبلكو التفاصيل أوعوا تروحوا كدة ولا كدة لاكلكو باسناني

 

ايوة انا شرانية وانتوا ماتعرفونيش

  • معجبة 11

شارك هذه المشاركه


رابط المشاركه
شارك

ياما خضيتيني يا شرانية انت ههههههههههههه

دخلت سخنة من أولها كده ومع ذلك حتابع معاك لكن من بعيد عشان متاكولنيش هههههههههههه

شارك هذه المشاركه


رابط المشاركه
شارك

ههههههههههههههههه جميل ياهبه فكرة نشرتك الحافله بمصايب الستات

 

اشجينى كمان وكمان بالتفاصيل عشان عجبتنى فكرة كاميليا مووووووت ههههههههههههههه

شارك هذه المشاركه


رابط المشاركه
شارك

بقلم " هبةنور"

 

معاكو حشرية الرخمة أنا روحت شربت الشاي وحبست بسندوتشين كفتة وجيت أهو

 

تعالوا نشوف الاخبار بالتفصيل

 

جيران عواطف وحسين صحيوا على خناقتهم وصوتهم العالي وبهدلة متبادلة من الطرفين

 

ال عشان الست عواطف شايفة جوزها مرتبه زاد وهي عايزة زيادة في مصروف البيت

 

معانا على الهاتف مراسلتنا الحاجة أم محمد من قدام شقة عواطف وحسين

 

ايوة يا ام محمد

 

ام محمد انتي سمعاني يختي

 

الصوت بعديد يا ست حشرية

 

الصوت بعيد ولا انتي اللي انطرشتي

 

علي صوتك يا ست حشرية اصلهم يختي بيتخانقوا بصوت عالي وانا مش عارفة اسمعك كويس

 

هما لسة بيتخانقوا يا ام محمد

 

اه يختي لسة بيتخانقوا والجيران ملمومة

 

طب خلينا نكلم حد من الجيران نسألهم

 

استني لما استنضفلك حد

 

تعالي ياست

 

ياحلاوة انتوا هتطلعوني في التليفزيون

 

ايوة يختي . كلمي الست حشرية الرخمة

 

ايوة ياست حشرية معاكي خالتك أم ودان

 

أهلا يا خالتي ام ودان احكيلنا سمعتي ايه بودانك

 

بصراحة احنا زهقنا من الست دي ومن عمايلها المطينة

 

ازاي ازاي احكيلي

 

كل شوية طلبات طلبات مش بتبطل

 

وجوزها مش ملاحق على طلباتها

 

الراجل طلبت منه تدخل العيال مدارس لغات قالها حاضر

 

اعملنا اشتراك في النادي بدل لعب العيال في الشارع زي المتشردين قالها حاضر

 

ركبلي تكيف عشان الدنيا حر نار قالها حاضر

 

غير الطلبات اليومية وكل يوم والتاني تجرجره على الهايبرات وتجيب شنط فيها شيئ وشويات

 

وبعد ده كله عايزة زيادة في مصروفها كمان

 

لأ لأ لأ دي كدة ست مفترية ومش تمام إديني أم محمد يا أم ودان

 

ايوة ياست حشرية كانت معكم ام محمد من قلب الأحداث

 

شكرا يا ام محمد مانجلكيش في حاجة وحشة يختي

  • معجبة 1

شارك هذه المشاركه


رابط المشاركه
شارك

بقلـــم " هبةنور"

 

 

 

سيداتي وستاتي رجعنالكم بعد الفاصل عشان نشوف حكاية مقصوفة الرقبة منى اللي حرقت بنطلون أحمد الغلبان

 

معانا على الهاتف منى شخصيا

 

ايوة يامنى

 

اهئ اهئ اهئ

 

ايوة يامنى

 

اهئ اهئ اهئ

 

يختي ردي علية وبعدين كملي عياط براحتك

 

ايوة ياست حشرية

 

احكيلنا يختي على ملابسات حادث حرق البنطلون

 

ابدا ياست حشرية أحمد قالي لو سمحتي يامنى ياروح قلبي اكويلي البنطلون عشان نازل بسرعة

 

قولتله حاضر ياأحمد ياحياتي

 

وبعدين يختي كملي

 

ابدا ياست حشرية لسة يادوب ابتديت في كوي البنطلون وجاتلي رسالة كلمني شكرا من ماما

 

ليه هي امك مامعهاش رصيد

 

لأ معاها بس هي مش بتحب تكلف نفسها

 

ناصحة زي امي كملي وبعدين

 

اتصلت بماما ونسيت المكوى على البنطلون والبنطلون اتحرق يا مامييييييييييييييييييييييييييييييييييييييييييييييييييي اهئ اهئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ

 

عيطي يختي عيطي يمكن الدموع تكفر عن خطاياكي في حق الراجل المسكين .اقفلي السكة يابت

 

 

 

فاصل ونواصل النشرة المقندلة دي

شارك هذه المشاركه


رابط المشاركه
شارك

والله يا هبه انا دخلالك مخصوص

ههههههههههههههههههههههههههههههههههههههههه

فظيعه

كنت مكسله اسجل علشان مش قاعده علي جهازي بس لما قرات قلت لالالالالا

لازم ادخلها ست حشريه دي

متااااااااابعه معاكي بقيت النشرة

لاننا اصلا حشريين وبنحب نعرف كل حاجة

هههههههههههههههههههههه

شارك هذه المشاركه


رابط المشاركه
شارك

ههههههههههه نشره تضحك

مستنياك إن شاء الله بس ياريت متطوليش فى الفاصل ^ــ^

 

ممكن بس تعدلى دى

زمن أغبر

هى دى غلط فى الزمن ؟

لو كده عدليها عشان مينفعش ^ــ^

بارك الله فيكِ

شارك هذه المشاركه


رابط المشاركه
شارك

دمك زى العسل ياهبة والله

شارك هذه المشاركه


رابط المشاركه
شارك

بجد يا هوبه أنا هاحرم أدخل مواضيعك تاني لعده أسباب :

 

أولا بتفطسني من الضحك ونا مش واخده على كده

 

 

 

ثانيا بتعليلي الضغط مش عرفه خيفه مره تجبلي السكر كمان بسبب دمك السكر وطبعا كيلو السكر وصل سبعه جنيه فيا بختها اليجلها السكر حتى توفر لجوزها عشان متكونش زي عواطف

 

يعني انا بحسد جوزك عرفه ليه لانه أكيد مش بيشتري سكرر وبيعورك ويحط نقطه من دمك جوه كوبايه الشاي وخلاص ههههههههههههههه

 

ثالثا قلبي بيدق بسرعه بسرعه لما بقرأ الكوارث والمصايب

 

 

 

بس أنا لي سؤال انتي متحامله على الستات كده ليه على فكره في منهم برضو كويسين وطيبين

 

هههههههههههه أنا حاسه انك راجل متنكر وداخل في وسطينا عشان يطلع همه فينا ههههههههههههه

  • معجبة 2

شارك هذه المشاركه


رابط المشاركه
شارك

ههههههههههههههههههههههههههههههههههههههه اهلا هبهوب رجعتى ورجع المرح معاكى

 

متابعه معاكى ان شاء الله النشرة الرهيبة دىىى^____^

شارك هذه المشاركه


رابط المشاركه
شارك

ماشاء الله هي دية النشرة ولا بلاش

 

جميل يا هوبة

 

بس فيها اية يعني لما عواطف تطلب زيادة من زوجها وفيها اية لما تطلب منه الطلبات دية مادام بطريقة كويسة ومش فوق طاقته

 

ماهي المدارس اكيد هي عايزة تعليم كويس لاولادها والنادي كمان فعلا افضل من الشارع يعني هي مش غلط

 

اما بقى الهايبرات والشنط فدة حسب مقدرتهم

 

شكل زوجها بيتلكك اكيد ام ودان موافتكيش بجميع الاخبار

 

 

متابعين معك يا ست حشرية امقصدي يا هوبة:)

شارك هذه المشاركه


رابط المشاركه
شارك

نواصل مع حضراتكو نشرة الاخبار

 

بس الاول نقرا التعليقات اللي جت على ايميل البرنامج

 

تعليق من الحاجة حواء أم المحروسة وردة بتقول انها خايفة لاكلها

 

واحب اقولها لأ يا حبيبتي مش هاكلك طول مانتي ست شاطرة وبتابعي النشرة باستمرار

 

تعليق من ام جومانا وجنى بتقول انها متابعانا

 

وانا بقولها تسلمي وتعيشي عقبال مانجاملك في الفرح يارب

 

تعليق من المشاهدة المشاغبة سماء الفردوس فهمت منه انها بتشاور عقلها تقلد كاميليا

 

وانا بقولها ماتكبريهاش في دماغي انا كمان يختي

 

تعليق من سندسة ام مريم بتقول انها متابعانا

 

وانا بقولها يعلي مراتبك ويجبر بخاطرك قادر ياكريم

 

تعليق من ماريا بتقول انها هي كمان حشرية زي حالاتي

 

بقولها ماجمع الا اما وفق ودا حال كل الستات الحمدلله

 

تعليق من سارة محمد بتقول ان كلمة زمن اغبر لاتجوز

 

بقولها معلش ياضنايا زلة لسان غير مقصودة بس هي دعابة مش سب زمن والله

 

تعليق من همتي صلاح امتي بتقول ان دمي زي العسل

 

انا بقولها انتي اللي دمك زي الشربات ياشربات انت

 

تعليق من المشاهدة درة بنقابي بتتهمني اني راجل

 

كدة برضو بقى انا راجل يا انسة حنفي ههههههههههههههههه

 

وبقولها والله مش تحيز للرجالة ضد الستات ولا حاجة بس بحب اننا نحط ايدينا على اخطاءنا ونحلها عشان نحافظ على الرجالة هههههههههههههههههههههه

 

تعليق من اتمنى رضاه بتقول انها مبسوطة من النشرة

 

وانا بقولها انتي لسة شوفتي حاجة هههههههههههههه

 

تعليق من ام رقية بتقول ادي النشرة ولا بلاش

 

وانا بقولها ادي الستات العسل ولا بلاش

 

تعليق من المشاهدة سجودة بتقولي بتجيبي اسامي الستات دي منين

 

وانا بقولها اكيد معجبة بالأسامي ونفسك اختارلك اسم للنونو اللي جاي يا عفريتة هههههههههههههههههه

  • معجبة 3

شارك هذه المشاركه


رابط المشاركه
شارك

بقلـــم " هبةنور"

 

 

سيداتي وستاتي جينالكو بعد الفاصل

 

اللي في ايديها حاجة تسيبها واقعدوا عشان نكمل ياست انتي وهي

 

 

بنواصل الخبر بتاع الست كاميليا اللي لعبت في سلوك الجرس عشان تكهرب حماتها

 

اليكم الانباء بالتفصيل

 

نظرا للنكد الأزلي اللي كاميليا شايفاه من حماتها قررت تكهربلها صباعها

 

واول ماحماتها حطت صباعها ع الجرس راحت مصرخة وكاميليا المهبولة بدل ماتسكت قعدت تعيط واعترفت على نفسها

 

بس جوزها عمل نفسه مسامحها واول ما عرف ان امها جاية راح حط قشرة موز ع السلم وزحلق امها

 

وقالها اللي يكهرب لامي صباع اكسر لامه رجل

 

 

 

يلا أهم كدة بقوا خالصين المفروض يفتحوا صفحة جديدة احنا ولاد النهاردة وبلاش فيلم غرام وانتقام ده

 

 

 

فاصل ونواصل موضوع مايسة

  • معجبة 3

شارك هذه المشاركه


رابط المشاركه
شارك

بقلـــم " هبةنور"

 

 

سيداتي وستاتي جالنا خبر عاجل

 

المعلم أبو سريع راح يسأل شيخ الجامع عن يمين الطلاق الأخير اللي رماه على الغلبانة مراته

 

وأكد شهود عيان ان الراجل ده عمال يرمي ايمان طلاق على الفاضية والمليانة

 

وبصراحة الاشكال اللي زيه كتير ربنا يهديهم ويبطلوا استهبال

 

 

ومعانا المعلم أبو سريع ع الهاتف

 

الو

 

ايوة يا معلم ابو سريع سامعني

 

ايوة سامعك يا ابلة المذيعة

 

يامعلم ابو سريع سامعني ياخويا

 

سامعك يا ابلة المذيعة

 

انت يا معلم ابو سريع سامعني

 

علية الطلاق سامعك ياست

 

اهلا يا معلم ابو سريع

 

اهلا بيكي ياابلة

 

قولي ياخويا الشيخ قالك ايه

 

قالي الطلاق بالنية وانا ماكانش في نيتي الطلاق عدم الامؤاخذة

 

امال كان نيتك ايه

 

انا هحكيلك يا ابلة واحكمي انتي

 

قول ياخويا احكي احكي

 

انا كنت عازم المعلم أبو الروس على فتة كوارع امبارح

 

الله انتو كالتو كوارع امبارح دانا نفسي فيها اوي . هي بكام اليومين دول يا معلم

 

دافع فيها من لحمي الحي سبعين لحلوح

 

لالالا دي غالية اوي بلاش منها كمل يا معلم

 

المعلم ابو الروس خلص اكل وقايم وانا اقوله كمل أكلك يا معلم يقولي شبعت بلا أفية

 

أقوله ياراجل زود الخير كتير

 

يقولي شبعت روحت قايله علية الطلاق لو ماكلت الحتة دي لكون مطلق مراتي وبرضو مارضيش ياكل

 

ياخويا أن شالله ما طفح داهية تاخدك وتاخده . ايه يعني ماكلش بقيت الكوارع . تقوم انتي برضو ترمي يمين على الغلبانة من غير سبب . دا كلام برضو يامعلم

 

علية الطلاق ما كان قصدي يا ابلة المذيعة

 

ياراجل انت بتحلف بالطلاق تاني

 

علية الطلاق مااقصد احلف بالطلاق أنا بس عايزك تصدقيني

 

تصدق بالله ياراجل انت

 

لا اله الا الله

 

أنا لو مكان مراتك لكنت خلعتك

 

علية الطلاق انتي مذيعة فاشلة واللي طلعك في التلافزيون راجل كروديا مابيفهمش في الستات

 

اقفل السكة يا راجل ياابو لسان زي العقربة انت

 

 

الراجل نكد علية الله ينكد عليه .بعد الفاصل هننتقل بالأقمار الصناعية نصور محمود وهو واخد اهله ورايح يصالح مراته ربنا يستر

شارك هذه المشاركه


رابط المشاركه
شارك

بجد بجد أنتِ رائعه وموهوبه بشكل غير طبيعي اللهم بارك

 

مش لا قيه كلام أعبر بيه عن إعجابي الشديد بالحلقات وبأسلوبك الشيق

 

الله يزيدك من فضله يارب ويسعد قلبك كما تسعدينا بحلقاتك :)

شارك هذه المشاركه


رابط المشاركه
شارك

معلشِ

 

صحيح وانا كمان متضايقه من الرجاله اللى دايما تحلف بالطلاق

 

^^

شارك هذه المشاركه


رابط المشاركه
شارك

بقلـــم " هبةنور"

 

 

السلام عليكم

 

معاكم حشرية الرخمة من قناة مكسورين الجناح

 

لنا عودة للخبر بتاع مايسة اللي جوزها جه من السفر لقاها أجرت الشقة مفروش وراحت قعدت عند أمها

 

مراسلتنا أم محمد راحت لمايسة عشان تعرف السبب اللي خلاها تستهبل وتعمل كدة

 

ايوة يا ام محمد

 

ايوة يا ست حشرية

 

انتي قابلتي مايسة يختي

 

ايوة ياست حشرية ولسة نازلة من عندها

 

شربوكي حاجة ؟

 

ايوة الحمدلله بعتوا جابولي إزازة سفن أب

 

بس ده مقاطعة يا أم محمد

 

يختي الناس جابولي حاجة اشربها وقدروني . يعني بدل ما اقولهم كتر ألف خيركو أقولهم مقاطعة

 

طب خشي في الموضوع بلاش قلبة دماغ

 

انا روحت قابلت مايسة وقالتلي انها أجرت الشقة عشان جوزها مابيبعتلهاش مصاريف ليها وللعيال وكانت محتاجة فلوس عشان المدراس

 

أخص عليه راجل من دون الرجالة . امال هو متغرب عشان مين

 

هو متغرب عشان يكنز على قلبه ياست حشرية ومش مهم العيال يجوعوا

 

طب وهو عمل ايه لما عرف بللي عملته

 

فرح اوي اوي وقالها خير مافعلتي يا مراتي ياحبيبتي وراح قبض ايجار الشهر وخده معاه وسافر

 

يالهوي . كمان طمع في الإيجار وخده معاه

 

اسكتي ياست حشرية دي الست مايسة عنيها منفخة من العياط ومش عارفة تعمل ايه

 

ربنا معاها بقى هنعمل ايه

 

طب ماتيجي نلملها قرشين يا ست حشرية

 

واحنا مالنا يا ام محمد هو احنا يختي هنشيل هموم الناس كمان . هو المرتب بيكفينا عيش حاف يا ام محمد

 

على رأيك يا ست حشرية . كانت معكم أم محمد من قلب الأحداث

 

أهو ده اللي انتي فالحة فيه . عاملة نفسها شخصية اوي . ال كانت معكم أم محمد من قلب الأحداث ال

 

كانت معكم حشرية الرخمة أو عوا تروحوا كدة ولا كدة لاخنقكو

شارك هذه المشاركه


رابط المشاركه
شارك

جالنا تعليق على التويتر من المشاهدة راغبة بالفردوس بتشيد بالنشرة

 

وانا بقولها ربنا يكرمك ويستر اصلك يا فخر المشاهدين

 

كله بنفسكو ولمتكو حلولين النشرة

 

 

جالنا تعليق من المشاهدة سارة محمد بتقول انها مش بتحب الرجالة اللي بيحلفوا بالطلاق

 

وانا بقول للرجالة دول عيب كدة مراتك مش لعبة عشان تحلف بالطلاق في كل الامور حتى اللي مابتخصهاش

 

شيلوا اللفظ ده لو سمحتوا ونضفوا لسانكو ومن كان حالفا فليحلف بالله

 

واللي هنسمعه بيحلف بالطلاق تاني هنكتفه ونحطله شطة في بقه

شارك هذه المشاركه


رابط المشاركه
شارك

نشرة المتجوزين

 

معكم في قلب الشقة

 

نحن نرصد بلاوي الستات

 

نحن نرصد استعباطات الرجالة

 

نشرة المتجوزين بيوتكم على الشاشة

  • معجبة 1

شارك هذه المشاركه


رابط المشاركه
شارك

هههه

ماشاء الله وبارك

ربي يحميك ويحميلك ذماغك العبقري

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×