~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتكلمك عن زرع الحب بين الطفل واخوه المولود جديد رنا بتحب ماما جدا ،،، بس ماما حامل ورنا بتساعدها هما اصحاب ورنا بتحكي كل حاجة لماما ماما بتحكي لها قصص وبتبتسم في وشها رنا ليها صاحبة اسمها آية...برضه مامة اية حامل ...بس هي ولدت قبل مامة رنا .. رنا لاحظت ان اية اتغيرت اوي بقت بتنسي الكراسات وبتيجي مش حالة الواحب ومامتها ماجاتش اجتماع المدرسة اية حزينة وقالت لرنا (انا بأكره اخويا اسماعيل ده اخد ماما مني) رنا رجعت قلقانه.....ومش بتضحك ماما سألتها (مالك).. رنا قالت لها (انا خايفة لما تولدي البيبي يكون وحش زي اخو اية اللي خلي مامتها مش تيجي المدرسة)... ماما ابتسمت ورغم تعبها حضنت رنا وقالت لها.. (ده هيجي معايا المدرسة ليكي انا وانتي وهو وبابا هنكون ان شاء الله زي صوابع الايد الاربعة دول اللي جنب بعض ما ينفعش يفترقو)... رنا قعدت تتأمل صوابع ايدها وابتسمت ،،، ماما ولدت رنا راحت تزورها مع تيته ماما فرحت اوي برنا ورنا شافت البيبي (الله يا ماما ده حلو اوي).. (ايه رأيك نسميه ايه يا رنا)..ماما قالت كده،، تيته قالت (علي..وممكن عمر) بابا قال "يوسف"... ماما بصت لرنا وحرصت تسألها (وانت رأيك ايه)... رنا قالت بفرحة (محمد)..علي اسم النبي ،، تيتيه وبابا قالو (عليه الصلاة والسلام)... ماما وافقت جدا ..رنا بصت لاخوها بحب اصل هي اللي سمته...وقالت لماما (ينفع ابوسه؟).. تيتة كانت هتمنعها بس ماما ابتسمت وقالت (ينفع طبعا )،، (انتي اقرب حد ليه)... (انتي مسؤلة عنه زيي بالظبط)،،، رنا عنيها نورت من الفرحة وحست بالمسئولية وباسته بهدوء في خده... ماما حضرت اجتماع المدرسة هي ومحمد كان ده بعد الولادة بشهر ،، رنا كانت فخورة اوي بمحمد ماما دايما تقول لرنا (يا رب اشوف محمد مؤدب زيك ومطيع) رنا ترد بفرحة (ان شاء الله احسن مني يا ماما)... رنا رغم صغر سنها بس ماما علمتها تقعد وتشيل محمد احيانا ... الاهل مستغرببين من امومة رنا مع محمد بس ماما مش مستغربة لانها بتعامل رنا باحترام وثقة فرنا بتديها اكتر من اللي تتمناه.... شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 (معدل) حدوتة هتكلمك عن ... (ازاي ابني ثقة طفل بنفسه بعد ما كان فاقدها تماما).... هبة وناسي توأم بس الفرق بينهم كبير ! هبة شعرها كاريه ونانسي بترفع شعرها بس مش ده الفرق ! هبة دايما ماما راضيه عنها لانها نشيطة ومجتهدة ونانسي ماما بتقول عليها كسولة ! هبة بترجع من المدرسة تغير هدومها فورا وتاكل بسرعة وتحل الواجب اما نانسي بترجع مرهقة نفسها ترتاح شوية وبعدين تغير لكن ماما بتزعق لها وبتقول انها كسولة، وهبة بترجع تحكي لماما كل اللي حصل اما نانسي ما بتعرفش تتكلم كتير ! هبة عاجبة ماما جدا..، وماما دايما تقول (سبحان الله انتو توأم ازاي!)... نانسي بتشوف الاعجاب في عنين ماما بهبة ...ن انسي بتزداد كل يوم اكتر في البطء والفشل من وجهة نظر ماما ! ماما..كلمتها كتير (خليكي شاطرة زي هبة. اسمعي الكلام زي هبة) كلمة زي هبة دي كانت بتجنن نانسي وبتبان ولا كأنها سامعة! نانسي بقت المشكلة الكبري للاسرة ماما بتعيط من بطئها وكسلها وقلة سماعها للكلام ، وفي يوم نشاط الاعمال الفنية بالمكتبة نانسي اتفاجئت بوجود مدرسة جديدة اسمها "نجوي".. نانسي قعدت ما تعملش حاجة وهبة هي اللي بتشتغل بنشاط...عادي.. (ما انا كسولة) نانسي بتقول كده لنفسها.. المدرسة لاحظت وقربت منها وبلطف قالت (مش بتشتغلي ليه يا نانسي).. نانسي قالت (انا دايما كده)... (اصلي مش بعرف).. المدرسة اهتمت جدا واخدت نانسي تعلمها لكن لقيت ان نانسي فاقدة التركيز اصلا ومش مهتمة خالص... الميس قالت لها (انتي بتحبي ايه طيب).. نانسي قالت (ولا اي حاجة بحب انام بس).. (مدام انا هاعمل الحاجة وحش اعملها ليه اصلا).. الميس ابتسمت في وشها وطبطبت عليها .. نانسي اندهشت من انها عاملتها بطيبة ، الميس طلبت من ماما من غير ما نانسي تعرف انها ما تلومهاش علي انها ما اشتغلتش ف حصة العمل الفني ماما اتغاظت من نانسي (برضه ..البنت دي هتموتني مش عاوزة تعمل حاجة).. الميس قالت لماما (انا دارسة تربية وبانصح حضرتك انك تبطلي تلوميها كتير حتي لو مبتعملش الحاجة واوعدك ان احنا هنحل المشكلة بإذن الله )... نانسي اتفاجئت ان ماما بطلت تلومها كتير وتزعق لها ... وفي حصة الاعمال الفنية ميس نجوي اهتمت بنانسي وجابتها قبل الحصة وقالت لها بتركيز (نانسي انا محتاجاك ضروري)...انا مضطرة النهاردة اروح اجتماع في اول الحصة وهاسيبكم مع ميس ناريمان )... نانسي قالت (بس ميس ناريمان مدرسة عربي!!!) ميس نجوي كملت (عشان كده انا معتمدة علي الله ثم عليكي هاعلمك دلوقتي المطلوب وانت تنفذيه للولاد انت اد المسئولية).. نانسي ارتبكت جدا وعيطت (يا ميس انا مش هاقدر ) الميس قالت بثقة (حركي ايديكي...كده...) نانسي حركتهم ،، الميس قالت (حركي رجليكي) نانسي حركتهم... الميس قالت (بصي انا كمان عندي ايدين ورجلين انتي تقدري تتعلمي اللي هاقوله وتنفذيه)... (انا واثقة انك مش هتكسفيني) الميس كانت بتتكلم بثقة ... ونانسي اطمنت (اكيد الميس فاهمة الصح ما هي مش معقول تختارني الا لو عارفة اني هاقدر!) الميس علمت نانسي...وهي مش مصدقة مدي التركيز والاستجابة اللي ابدتهم نانسي! فعلا نانسي كانت اد الموقف وقفت في ثقة عقلها قال لها (انتي مش اقل من حد انتي عندك ايدين ورجلين انتي الميس اختارتك ).. الاطفال كانوا في الاول بيسخروا لكن شطارة نانسي سكتتهم .. وحتي هبة سألتها (هو كده مظبوط)..وهي بتشتغل! فرحة نانسي كانت ما تتوصفش وشها كان واثق اوي وميس نجوي بتراقبها من بعيد ...،، نانسي الموقف ده غيرها خالص دايما بقت تقول لنفسها انا ان شاء الله قادرة ، ماما بطلت تلومها وبقت بتستوعبها .. نانسي النهاردة عندها مشروع ناجح...بس عمرها ما بتنسي تدعي لميس نجوي في صلاتها.... لما اقول للطفل انت كسول بيتبرمج علي الكسل ولما اعامله بثقة واحترام بيحس انه اد المسئولية دورنا نبني شخصيتهم مش نهدها... تم تعديل 3 ديسمبر, 2014 بواسطة ~ أم العبادلة ~ 1 شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة سيف هتكلمك عن مفهوم مهم جدا اسمه الاحساس بالامان ،،، سيف طفل مش دايما ييكون فرحان لان باباه بيزعق كتير هو بيحب باباه لكن بيكره الزعيق...باباه بيزعق له علي اي غلطة زعيق جامد...ومامته بتزعل كتير من زعيق باباه وتقول بالراحة عشان الولد لكن الامر بينتهي بخناقة بينهم وماما تنام معيطة وبابا يتعصب ع الاخر....سيف مش مرتاح من جواه وحتي لما بيخرج معاهم بيكون مستني لحظة انقلاب بابا ،، لو حد غلس عليه في السواقه او فريدة اخت سيف عيطت اصلها بيبي وبتعيط كتير """علي طول بابا بيزعق ويتعصب وماما تكشر وتعيط،،، سيف بقي مش بيحب الخروج لكن بابا بيصر يخرجهم كل جمعة ....سيف من جواه مش حاسس بالراحة ونفسه يوم الجمعه ميبقاش اجازة،، سيف بدأ يحط صباعه دايما علي بقه ويمسك شفته بيحس انه مطمن لما يعمل كده...الامر بدأ مش ملحوظ بس زاد...وماما قالت له " بلاش كده يا سيف" سيف مسمعش كلامها وبقي دايما يعمل كده ،تيته كان مرة سيف عندها هو بيحبها اوي ...قال لها"هو ليه الكبار بيحبو الزعيق؟"...تيته طبطبت عليه كانت عارفة ان قصده علي باباه تيته قالت لجدو"عاوزين نكلم حسين يبطل عصبية" ....بابا؟؟؟ سيف كان يائس وقال لتيتة"متحاوليش...بابا مش هيسمع كلامك"...الايام بتعدي وسيف دايما بيلعب في بقه في كل مكان وفي يوم..سيف كسر كوبايه ...بابا انفجر فيه "انت غبي ما بتفهمش..."سيف معيطش فضل يبص لبابا قوي وبابا بيزعق ..وبابا قال"انت ما بتردش ليه انت اطرش"....سيف فجأة وقع علي الارض...مكانش مركز ...بابا وماما اترعبوا ...جريوا بيه علي الدكتور ...الدكتور حاول يفوق سيف...كان وشه باهت ودموع ماما نازله باستمرا ر...وبابا خايف عليه جدا...اخيرا فاق بصعوبة لكن لما شاف بابا صرخ....الدكتور خرج بابا من الاوضه ،، بابا لاول مرة يحس بالخطر ...وعينه تدمع ويقرر يشوف اسلوب تربيه تاني غير الصراخ والشتم المستمر...سيف بقه احسن ...وبابا بدأ يقرأ في التربية وفهم ان سيف طفل حساس جدا بتؤذيه الشتيمه. ..وانه حاسس بالرعب من جواه وبيحاول يعوض احساسه ده بالحركة اللي بيعملها علي بقه،،وان الطفل اللي من النوع ده معرض للصدمات النفسية اذا اتعامل بالعصبية ...بابا بدأ هو نفسه يتعالج ويفهم هو عصبي ليه وعرف انه جواه رغبة في الا يحدث خطأ من حوله ....عشان كده هو عصبي والدكتو ر فهم بابا ان الرغبة في سير الامور نموذجية بدون اخطاء رغبة مستحيلة...بابا بدأ يهدأ.....وسيف لاحظ انه احيانا بدأ يشوف بابا مبتسم!!!! سيف بدأ يستريح شوية...وبابا بدأ يحضنه ويكون حنين معاه ...ماما كانت فرحانه جدا ولاحظت ان سيف قلل الحركة اللي بيعملها ...ولادنا امانه ولو مش عا فين نعاملهم صح ...نسأل ونصلح من نفسنا قبل فوات الاوان ♡ شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 (معدل) حدوتة هتفهمك تأثير حالتك النفسية علي ولادك وليه بندعو الي توفير جو نفسي مناسب للام وان التربية مسئولية الام والاب معا... خديجة بتحب ماما اوي واحلي اوقاتها بتكون معاها ماما لطيفة وبتكلم خديجة كأنها صاحبتها وبتقرأ معاها..قصص..ودايما تسيب خديجة تقول رأيها وتحترمه... ماما بقت حامل..وبرضه لسه مصاحبة خديجة هي بس بقت تعبانة شوية والدكتورة قالت انها حامل في توأم... خديجة فرحانة وماما كمان .. وماما قالت لخديجة "انتي هتساعديني في كل حاجة وهتربي معايا"... (الله يا ماما شكرا ) خديجة كانت فرحانة جدا ...، ويوم الولادة خديجة راحت عند تيتة وماما كانت مجهزة لها الاكل اللي بتحبه..من امبارح ومجهزة لها لعبة جديدة (يا حبيبتي يا ماما عمرك ما بتنسيني).... خديجة ماما معلماها الدعاء الي الله فدعت ربنا ماما تبقي كويسة هي والبيبي..والبيبي التاني،،،، واكتر شئ فرح خديجة ان ماما اول ما فاقت اتصلت بيها كان صوت ماما تعبان بس قالت "جالك اختين يا خديجة".. ماما حبيبتي دايما فاكراني، خديجة قالت كده لنفسها، ،، لما رجعوا البيت خديجة كانت فرحانه جدا برؤي ورضوي وماما كمان وبابا وتيته....،، ماما برضه دايما تكلم خديجة وتاخد رأيها ، وخديجة بتناولها الحاجات وبتساعدها وتجيب البامبرز.... وتيته بتشيل رؤي وماما تشيل رضوي او العكس.... ولما خديجة طلبت من ماما انها تشيل البيبي ماما وافقت بس قعدت خديجة وحطت اختها علي رجلها...وخديجة فرحانة جدا، بس بعد فترة من الولادة تيتة مشيت...!!! ماما مش بتنام وخديجة صعبان عليها ماما ....دايما رؤي لو سكتت"،، رضوي تعيط!!! خديجة بتساعد ماما علي اد ما تقدر وبتحاول تعمل اصوات باللعب عشان اخواتها يسكتو وفعلا ساعات بيسكتو بس علي طول يعيطو تاني....،، ماما شكلها بقي تعبان...وبعدين بقت دايما تعيط ، خديجة بتزعل جدا وتطبطب علي ماما،، "انا ام مش شاطرة يا خديجة"ماما تقول كده،، وتعيط وبعدين خديجة تطبطب عليها... (لأ يا ماما انت حلوة )... خديجة بقي عندها احساس بالخوف علي ماما احسن تعيط وهي مش موجودة !! وما تلاقيش حد معاها لان بابا دايما مشغول! خديجة ما بقتش عاوزة تروح المدرسة بعد ما كانت شاطرة جدا ودايما عياط وماسكة في ماما وماما انهيارها زاد وبقت علي طول بتعيط وتزعق! وبابا اتدخل يهديها مفيش فايدة وخديجة مش راضية تروح المدرسة.... "ليه يا خديجة" بابا سأل،،، وخديجة قالت "لو ماما عيطت وانا مش موجودة مين يسكتها"..."ماما حلوة ورؤي ورضوي خلوها تبقي زعلانة" ... بابا حس ان خديجة مش مطمئنة علي ماما ولاول مرة في حياته ياخد اجازة ويقعد مش عشان مصيف ولكن يقعد في البيت،، ماما اندهشت وخديجة ضحكت لما لقيته بيشيل رؤي ومش عارف يديها الببرونة خديجة ساعدته! خديجة بدأت تشوف ماما احسن ،، بابا خلاها تدخل تنام وبيقعد مع رؤي ورضوي هو وخديجة.... ماما رجع وشها كويس ،،، خديجة كمان رجعت فرحانة وباست بابا.... "اوعي ترجع الشغل" خديجة قالت كده! بابا قال "متخافيش" خديجة معدتش خايفة تروح المدرسة ، هي بس خايفة اجازة بابا تخلص! فكلمت تيته علي الموبايل "تيته تعالي بعد ما اجازة بابا تخلص احنا عاوزينك ضروري....."،،،، الام تحتاج الي دعم كي تظل قادرة علي الوفاء بمتطلبات الاسرة ولا سيما الام الجديدة.... ادعي الله ان يقوي ظهرك ولا يخفف حملك .... الابناء مسئولية الاب والام،،، حالتنا النفسية اول من تنعكس عليهم ابناءنا... تم تعديل 3 ديسمبر, 2014 بواسطة ~ أم العبادلة ~ شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك يعني ايه طفل معندوش ثقة في ذاته وايه اللي بنعمله بيسبب ده.... وازاي احنا بندمر علاقتنا بيهم من غير ما نشعر..وازاي احنا ليهم دايرة ألم يتمنوا يهربو منها زينه بنت امورة...اتكلمت بسرعة من صغرها وبتفهم اللي بيدور حواليها...وعشان كده هي فاهمة ان ماما وبابا مش بيحبوا بعض! هي عرفت كده من عياط ماما وزعيقها وصوت بابا العالي ورزع الابواب... وساعتها بيشتموا زينه او بيزقوها بعيد فهي اتعلمت متروحش عندهم وهم بيزعقوا... عندها لعب كتير بس مش فرحانه بيها... وماما بتجيب لها لبس بس مش بتتكلم معاها ودايما تقولها بعصبيه "انتي رغايه ليه"... رغم ان ماما طيبة وساعات بتحضنها... وبابا بيوديها النادي. ...،،، زينه سمعت ماما بتقول "انها مش هتخلف تاني...عشان بابا مش مريح ليها" كانت بتتكلم في التلفون ، زينه فكرت بحزن مش هيبقي عندي أخوات؟ ... ماما وبابا دايما مشحونين ومتخانقين وزينه بتتغدي لوحدها.... زينه بتحب الناس وطيبه ، وشاطرة في المدرسة بس مش بتلاقي حد تحكي له انه الفصل صقف لها... ولا ان الميس ادتها هدية، ،، السنه دي فيه ميس انجلش جديدة عند زينه شكلها مش امور اوي بس زينة بتموت فيها عشان مبتسمة وصوتها مش عالي اسمها ميس"داليا،".... ميس داليا ملاحظة انكسار زينه رغم شطارتها ودايما بتشجعها وتكلمها .... ومرتين باستها والاحلي انها...اخدت رأيها تسمي البيبي ايه لان ميس داليا حامل.... زينه اقترحت"اسم ملك" بس الميس قالت لها انه ولد ...زينه اقترحت اسم "مالك،" وعجب الميس جدا....،، بس هي قالت لزينه انها لسه هتولد في الاجازة،،، الحفلة قربت والميس اختارت زينه لدور البطوله في مسرحية الانجلش وزينه طايرة من الفرحة... وماما جابت لزينه طلبات الحفلة كلها وهي مكتئبة كالعادة ومسألتش زينه هتقدم ايه بس هي وبابا جايين ،،، زينه ماما ساعدتها تلبس يوم الحفلة من غير ما تقول حاجة، ،، زينة كانت مستنية تروح المدرسة عشان تشوف فرحة ميس داليا بيها وفعلا ميس داليا كانت فرحانة اوي بفستان زينه وشعرها وحضنتها... زينه قالت لها فجأة "انتي احلي من الامهات كلهم".... زينة وفصلها كانوا روعة ع المسرح كل البنات بيبصوا لامهاتهم وزينه بتبص لميس داليا... وبعد الفقرة جريت عند مكان ميس داليا وشالت وردة من...الورد الكتير اللي جايباه المدرسة للحفلة واستنت ميس داليا..... كان شكل زينه يغني عن الكلام ....ميس داليا اخدتها ف حضنها وشكرتها بالدموع علي الوردة..... ماما كانت واقفة من بعيد ....كانت مندهشة ان زينه ما جاتش عندها زي البنات ما عملو مع امهاتهم ... وبابا كمان كان ملاحظ،،، وكمان في فقرة تكريم المتفوقين. .. زينه اتكرمت وكانت فرحانه وبتبص برضه لميس داليا .... ماما دموعها نزلت وحست كأنها ما جاتش... وبابا حس بيها وطبطب عليها بصت له بحزن ..... كانت عينيهم بتتكلم زينه بعدت عننا اوي واحنا مش حاسين ، احنا عاملنها زي ما تكون حيوان اليف نأكله ونشربه ونصرف عليه. ...، زينه مالهاش ذنب في عدم توافقنا.... النهاردة هي مش قادرة تهرب مننا لانها صغيرة لكن بكرة تلاقي غيرنا ونكون ذكري أليمه في حياتها....،،، ماما عيطت كتير ...وبابا همس في ودنها "دي رساله لينا ...انا عاوز اتكلم معاكي ...".... ماما همست من بين دموعها "وانا كمان" بس زينه كانت لسه بتبص للي احترمتها ميس داليا....مش للي خلفتها ماما شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك ايه اخر ضغطك المتواصل علي ابنك...وليه فيه اطفال بيتقال عنهم عارف ومش بيجاوب... اسماعيل الابن الوحيد لماما وبابا وسمع ان ماما وبابا متجوزين من زمان.... بس ماكنش عندهم ولاد واتعالجو كتير عند الدكتور... لحد ما خلفو اسماعيل....،،، اسماعيل معندوش مشكلة مع بابا ،بابا بيحبه وبيتكلم معاه لكن ماما هي اللي بتقول "اسماعيل يالا الوقت مهم*" وبابا يبص لها ويسكت .... اسماعيل ....كان فرحان اوي بيروح اربع تمارين ....سباحة وفولي وجمباز وكاراتيه بيحب الرياضة جدا... وبيجيلو مدرسين في كل المواد ووقته دايما مشغول ...لكن ماما عاوزة منه يكون اشطر واحد في كل شئ اسماعيل فعلا كان شاطر بس هو اشطر واحد في الجمباز و..مروان ومعتز اشطر منه في السباحة.... ماما تزعل وتقوله حاول ...حاول....، هو شاطر في القرآن وبيحفظ بسرعة لكن مش بيحب الانجلش أوي ...بيذاكره لكن مش اشطر واحد... ماما تقول له حاول ....وبتبقي مصرة....، ، جدول اسماعيل مشحون..السباحة الصبح بدري وبعدين المدرسة وبعدين الجمباز وبعدين مستر العربي هيجي البيت "نفسي انام والعب...."اسماعيل كان بيفكر كده.... ونام علي نفسه قدام مستر العربي في البيت،، مستر محمود طبطب عليه "انت عاوز تنام يا اسماعيل"،،، ماما سمعت وزعقت "قوم يا اسماعيل".. اسماعيل قام فورا ولكن .....فيه شئ اتغير عقل اسماعيل خلاص اقتنع ان ارضاء ماما مستحيل... احاول ليه ؟ المستحيل مستحيل .... اسماعيل اتغير اوي وبقت الكلمة اللي بتتقال عليه.."عارف ومش بيعمل الحاجة"... المدربين يقولوا كده والمدرسين...وماما تشد شعرها... اسماعيل خلاص مش مهتم وبيسرح وبيتجاهل كلامها وهي تعيط ...وتزعق وولا هو هنا ... ويوم امتحان الانجلش..اسماعيل اخد صفر لانه اصلا ما كتبش بابا اتدخل وماما منهارة.."سيبي لي الموضوع".... بابا اخد اسماعيل لدكتور لطيف ...وقعده معاه...الدكتور كان بيكلم اسماعيل وهو مردش. ... لكن فجأة الدكتور قال لاسماعيل "انا كنت هأقولك علي حاجة مهمه بس خلاص مش هاقول"... اسماعيل قال له "اصلا مفيش حاجة مهمة".. الدكتور اخد اسماعيل لاوضة في المستشفي كان فيها طفل مريض نايم وبيتألم.... اسماعيل قال، "هو ماله" ""اديله الدوا".... الدكتور قال له بصوت منخفض "مش مهم..مفيش حاجة مهمه" "انا ماشي" اسماعيل بحلق في الدكتور....الدكتور اعطي الطفل المريض علاجه...وخرج من الحجرة مع إسماعيل. ... "انت ليه قلت ندي له الدوا مش مفيش حاجة مهمة؟" اسماعيل اتحرج بس قال "انا قصدي المذاكرة والتمارين" الدكتور قال "ما هو انا كنت زيك في يوم بأذاكر وعشان كده بقيت دكتور وعالجت الطفل ده"... اسماعيل. ..فكر وقال"بص انت اكيد مامتك كانت مش زي مامتي""...اسماعيل عيط ... الدكتور قال له"تقصد ايه.. " اسماعيل قال "انا زهقت اوي ....هي بتخليني اعمل حاجات كتير وانا تعبت وفي الاخر هابقي مريض زي الولد اللي انا شفته معاك.. ".. الدكتور ابتسم وطبطب علي اسماعيل "طيب ايه اللي انت مش عايزه؟" اسماعيل قال وهو بيعيط "انا مش بحب فولي ولا الكاراتبه ولا الانجلش...ونفسي انام والعب".. "بس انصحك ما تحاولش يا دكتور ماما مش هترضي هي فاكرة ان الولد الشاطر مش بيتعب ابدا".. الدكتور ابتسم... اسماعيل حب الدكتور اوي لكن اكتر شئ عجبه فيه ان ماما سمعت كلامه وبطلت تودي اسماعيل فولي وكراتيه بس اسماعيل لسه برضه مش ببيلعب حلو جمباز زي الاول لكن فجأة بعد اسبوع عقل اسماعيل استوعب انه ممكن يرجع شاطر في الجمباز ورجع يحاول بس مكنش اشطر واحد واتفاجئ ان ماما مزعلتش لكن شجعته"رائع"....،، اسماعيل مصدقش نفسه...وحكي للدكتور الدكتور قال "اصلي مش لازم اكون الاول دايما كفايه اكون من الشاطرين".... اسماعيل اتملي حماس .... محدش متصور ايه اللي حصل لاسماعيل دايما بيجاوب في المدرسة ودايما مجتهد في التمارين...وبيحب الدكتور جدا مطالبة العقل بمهام فوق طاقته تجعله فاقدا للرغبة وعاجزا عن المحاولة تذكروا أن الله تعالي نفسه لا يكلف نفسا إلا وسعها.... شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 (معدل) حدوتة هتفهمك اهميه الحوار والاحتواء منك لطفلك.. وخاصة اثناء المشاكل الزوجية ...الاطفال يفهمون ويفكرون كريم ...بيحب اوي كل الالعاب ونشيط ..وسعيد ،،، فجأة ماما وبابا حصلت بينهم مشكلة كبيرة ... كريم كان متوقع انها تتحل زي غيرها لكن اتفاجئ انها ما اتحلتش وبابا ساب البيت!!! ماما علي طول بتعيط وكريم بيكره يشوفها كده لكن هو كل ما يسألها تقول له انت صغير متتدخلش! كريم بقه دايما متوتر حتي وهو بيلعب بلاي استيشن،،، الامور اتطورت وبابا جا واخد بقية حاجته! كريم وبابا سلمو علي بعض وبابا قال لكريم "هابقي اتصل بيك!!! كريم عيط" ارجوك يا بابا استني وفهمني ايه اللي بيحصل"،،،، ماما قالت بغضب من بعيد "كريم تعالي" كريم قعد ينقل عينيه بين ماما وبابا ...وبابا مشي ، وماما عيطت ...كريم قعد يبص لها ويقول في نفسه دايما قدام بابا قوية وانا عارف انك هتعيطي،،، كريم فقد شهيته ومش بيذاكر بس فجأة سمع تيته بتحكي ان بابا هيتحوز!!!!! كريم كان منهار "وانا"..... محدش كلم كريم ولا فهمه ....كريم قعد يدعي ربنا "يارب انقذ بيتنا" كان بيعيط وفجأة خطر على باله يتصل ببابا وفعلا اتصل بيه "ازيك يا كريم" كان صوت بابا متأثر اوي وهو بيقولها...، كريم كان صوته بيرتعش "عاوز اقابلك...هاعمل نفسي نازل اشتري حاجة من السوبر ماركت وتعالي "،، فعلا بابا جا واخده في حضنه تحت البيت وركب معاه العربية ....كريم كانت دموعه نازلة وهو بيقول لبابا "ماما متعرفش اني معاك وممكن تقلق عشان كده هابعت لها رساله...اصلي مش بحب اقلقكم" بابا حس ان كريم بيعاتبه باسلوب غير مباشر كأنه بيقول انتم بتقلقوني...، في النادي كريم قال لبابا "بص يا بابا انا عاوز افهم ايه اللي بيحصل" ومتقوليش اني صغير عشان كده مش هتقولي لو انتم عارفين اني صغير سيبوني معاكم مش تهدمو بيتي" بابا بكي"ليه يا ابني بتقول كده" "ما انت مع مامتك"،، كريم قال له "البيت انتو الاتنين "ارجوك فهمني " بابا اتكلم مع كريم..."ماما ست محترمة بس هي لما بتصمم علي حاجه مش بتفكر فيا، هي عاوزة ترجع شغلها وانا مش موافق"' الكلام اتطور واتهمتني اني خانق حياتها فقلت لها هاسيب حياتك" كريم ابتسم بحزن وقال "يعني انا يا بابا لو مفهمتش حاجة من المستر يسيب لي المدرسة؟"، بابا ابتسم بدهشة....كريم قال "انت ليه رافض شغلها،؟" بابا قال "عشان هي صحتها ضعيفة ولما اشتغلت قبل كده صحتها تعبت دي نقطة والنقطة التانية قصرت في البيت " كريم قال له، "وهي ليه عاوزة تشتغل؟ " بابا رد "بتزهق من قعدة البيت".... كريم فكر لحظة وبعدين قال "بس فيه عمتو بتشتغل يوم ويوم لأ" بابا ابتسم..."نص الوقت يا كريم عمتو واخدة نص الوقت...فعلا" بابا ابتسم وشكله كان بيفكر .... كريم قال لبابا "ماما عماله تتصل بعد ما قرت الرساله وهتزعق لي يالا روح معايا" بابا سكت كريم قال "يالا يا بابا كل مشكلة وليها حل"... كانت مفاجأة لماما رجوع بابا وكريم ...... سكتت وكشرت كريم قال لها "ممكن ترحبي ببابا ...وعيطي ....زي ما بشوفك بتحضني صورته وتعيطي"... وش ماما كان احمر وزعقت كريم" كان. ....بابا مبتسم .... كريم قال لماما "ارجوكي اعملي زي عمتو وخدي نص الوقت ..وبلاش مشاكل".... ماما كانت هتزعق لكن سكتت وعيطت وصعب عليها كريم ..... بابا وماما حضنوه ... كريم اتنهد جامد وقال "ارجوكم اوعدوني متعملوش كده تاني" بابا وماما قعدوا بعدها فترة طويلة يعالجوا كريم عند الدكتور من فقد الشهية تم تعديل 3 ديسمبر, 2014 بواسطة ~ أم العبادلة ~ شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوته هتفهمك نظرة الابن الكبير لاخته الصغيرة وليه دايما متغاظ منها زينه صغيرة و اخوها الكبير مروان في سنه سته ابتدائي ، بس زينه دايما تتخانق معاه وهو بيضربها جامد وبعد كده زينه تشتكيه لماما وماما تعاقبه وتضربه ... مفيش هدوء خالص في البيت...زينه مش لاقيه حد تلعب معاه ....،، ودايما يتخانقوا ...ودايما مروان بيبص لها بطريقه غريبة اوي بعد ما ماما تضربه بسبب خناقه مع زينه... زينه سألته "بتبص لي كده ليه" فقال لها "باكرهك ""يا ريتك ما اتولدتي".... زينه كانت هتروح تشتكي لماما علي طول بس لقيت ماما نايمة وقعدت تتفرج علي التلفزيون كان فيه برنامج فيه ولد طلع الاول في مسابقة القرآن الكريم. .بس كان فيه بنت صغيرة بتصقف له جامد ... والمذيع قال انها اخت الولد وصوروهم مع بعض ، البنت اللي في التلفزيون قالت" انا بحب اخويا اوي ونجاحه بيفرحني".... اشمعني هي بتحب اخوها ...زينه فكرت ...،،، زينه فكرت ليه معملش زيها ...،، مش هشتكي لماما...وهتجرب طريقة تانية. .. مروان لاحظ انها ساكتة...، وهو بيذاكر...، ماما صحيت لقيت البيت هادي ومفيش خناق...واستغربت تاني يوم مروان جاب الدرجة النهائية في العربي وقال لماما مروان وماما اتفاجئوا بزينة بتصقف لمروان وبتقوله"شاطر" مروان مردش ، وماما استغربت مروان ضايق زينه وهي بتلعب ...زينه ما راحتش تشتكي مروان استغرب "ايه يعني ساكتة"... زينه كانت بتسرح للعروسة بتاعتها وبتقول له "انت اخويا حبيبي" البيت بدأ يتغير اوي زينه بطلت تشتكي ومروان لها وهي دايما بتقف له لما يجيب درجات حلوة.... وماما اتفاجئت ان مروان جاي بيقول لها وهو بيعيط "اخيرا حاسس ان لي اخت يا ماما زينة طيبه اوي انا كنت الاول بحس انها عدوتي مش اختي....لانك دايما كنتي بتنصريها علي" ماما قالت "ياااه للدرجة دي يا مروان؟ " مروان رد "واكتر ....انا كنت حاسس كأني مش ابنك..." البيت اتغير للاحسن وفي يوم سعيد مروان اشتري من فلوسه عروسة تحفة لزينة....ولما كبروا فضلوا أصحاب. .... ويوم فرح زينة .... حكت لمروان البرنامج اللي شافته وهي صغيرة وغيرها.. واخدت معاها في بيتها العروسة اللي اشتراها لها مروان زمان .. الاخ الكبير مالوش ذنب انه كبير احترموا احساسه...وبلاش دايما تلوموه وتضربوه.....عشان ميكرهش الصغير.... 1 شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 (معدل) حدوته هتفهمك خطورة اعطاء معلومات مش صحيحة في التربية مثل "الرجل لا يبكي" يوسف من صغره ماما دايما تقول له لو عيط "وبعدين يا يوسف الراجل ميعيطش"... لو حد ضايقه... او حس ان حاجة بتوجعه... او خاف من حاجة دايما تمنعه من العياط بالجمله دي "لو عيطت تبقي مش راجل".. يوسف دايما بيحس ان نفسه يعيط ومش عارف وبيحس حاجة بتوجعه في زوره ساعتها! لكن ماما بتسيب اخته مريم تعيط عادي! ويوسف بيقول في نفسه يا بختك يا مريم! يوسف ملاحظ فعلا ان ماما بتعيط وبابا لأ ... خلاص يبقي كلام ماما صح،،، لكن! مرة يوسف كان قاعد مع بابا بيتفرجوا علي برنامج بيحكي سيرة النبي الكريم محمد صلي الله عليه وسلم. .. وكان المذيع بيحكي رحلة طويلة ومتعبة اسمها رحلة الطائف النبي رجع منها بعد ايذاء من الكفار،،، يوسف كان نفسه يعيط لانه اتأثر اوي بس بلع الاحساس ده وزوره وجعه كالعادة لكن المفاجأة ان بابا دموعه نزلت وهو بيقول "حبيبي يا رسول الله"!!! يوسف استغرب... "كده يا بابا ؟ تعمل حاجة مش صح الراجل ميعيطش!"هو فكر كده لكن مقالش لبابا ،،، بس في المدرسة مستر الدين كان بيدرس عن ابي بكر الصديق رضي الله عنه وقال "كان بكاء"!!!!" يعني ايه؟؟؟؟؟ يوسف سأل،،، المستر قال "بيبكي ويتأثر بسرعة!!! ماما لسه بتقول ان الراجل مش المفروض يعيط ويوسف ساكت في يوم... سمير زميل يوسف.. وهو ولد مشاغب سمير ده ،، اخد كتاب علياء وحطه في شنطة يوسف... والاطفال كلهم كانوا في الجاردن،،، لما الحصة جات.. علياء قالت انا مش لاقية كتابي '' سمير قال للميس "انا شفت يوسف بيخبيه!!! يوسف اتخض،،،، والميس اندهشت لانها عارفه ادب يوسف لكن المفاجأة ان الكتاب طلع فعلا في شنطة يوسف،،، علياء عيطت...وقالت "كتابي" يوسف معيطش ومسك دموعه، وقال "انا مش عملت كده....سمير بيكذب" سمير عيط....ومحدش صدق يوسف.... وكان شكله وحش اوي قدام الفصل والميس كتبت تستدعي ولي امره!!! بعدها جات حصة الانشطة وكل الفصل راحوا غرفة الانشطة لكن يوسف كان لوحده في الفصل ورفع ايده وقال لربنا "انت عارف يا ربنا اني مش عملت كده ...بين الحقيقة" يوسف عيط كتير وقال لربنا "انا بحبك عشان انت بتحبني" "ارجوك عرفهم" "انا عارف اني غلطان اني عيطت ومش سمعت كلام ماما يا ربنا بس اصلي متضايق اوي" فجأة يوسف سمع صوت بيناديه كان صوت الميس ..ايه ده دي معاها مروان وسمير وعلياء... الميس طبطبت علي يوسف وقالت "انا اسفة يا حبيبي مروان طلع كان شايف سمير من الشباك وهو بيخبي الكتاب بس كان خايف يقول صح يا مروان؟، مروان رد "ايوه كنت خايف لكن فجأة حاجة جوايا قالت لي اقول.... علياء اعتذرت والميس وسمير هيتعاقب..... يوسف دموعه نزلت...وبص للسماء وقال"شكرا يا ربنا انت طيب اوي" من اليوم ده يوسف قرر انه يقول لماما انه اكتشف ان الراجل ممكن يعيط ارجوكم لا تقدموا معلومات خاطئة في التربية ليس معني اننا نريد منهم الا يبكو ان نخدعهم بمقولة الرجل لا يبكي وندفعهم لكتمان مشاعرهم... لكن ممكن نرشدهم لتقليل البكاء ولا نصادر حقهم ولا نقدم معلومات خاطئة تم تعديل 3 ديسمبر, 2014 بواسطة ~ أم العبادلة ~ شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك لماذا يكرر طفلك اخطاءه؟ هنا..بنوتة لطيفة نفسها ماما تشكر فيها ليل ونهار بس ده مش بيحصل للاسف! لان ماما غالبا بتكون زعلانه من هنا، لانها ضايقت عمرو اخوها الكبير وهو بيذاكر وعملت دوشة وبابا نايم ووقعت مايه وهي بتشرب ماما دايما بتقول لهنا"انت ايه قردة ما تقعدي بقه" هنا عقلها بيقولها "ماما عندها حق انا قرده" "القرد دايما بينط" هنا دايما بتنط وماما خلاص مش طايقة "انتي ما بتعرفيش تسكتي؟" هنا" عقلها بيقول انا مبعرفش اسكت وعلي طول بتتطنطط ماما حاولت تتكلم مع هنا "يا هنا انا تعبانه لو بقيتي هادية هاجيب لك لعبة وهاحبك" هنا هديت شوية عشان اللعبة لكن فجأة عقلها اداها امر انها تتنطط "انتي قردة نسيتي ولا ايه" ماما عيطت و حاولت تاني وبقت بتقول لتيته في التليفون وهنا سامعاها "خلاص يا ماما انا مش قادرة عليها..دي ما لهاش حل لا كلام نفع ولا هدايا" هنا فكرت"انا مفيش حاجة بتنفع معايا" وفعلا كل حاجة وحشه زادت ومحدش عارف يتفاهم مع هنا وهزارها مع عمرو بقي سخيف دايما تاخد حاجته وتضايقه جدو وتيته جم زاروا ماما وهنا اخدوها في فسحة حلوة... وكمان عمرو ... هنا برضه كانت بتعمل حجات متعبة تزق عمرو وتوقع عصير .... لكن جدو وتيته ما زعقوش وكانو مبتسمين في وشها من زمان محدش ابتسم في وشي "هنا قالت كده لنفسها "دلوقتي يزعقوا عادي،،،،"هنا فكرت كده ... لكن جدو وتيته ما زعقوش كانو دايما لما تعمل غلط يقولو "احنا عارفين ان مش قصدك" هنا حست فجأة ان حد فاكرها مؤدبه.... حاولت تكون واخدة بالها من تصرفاتها شويه بطلت زق وقرص في عمرو جدو علي طول شجعها "شاطرة يا هنون" هنا استغربت !"انا؟". ..تيته ردت "ايوة طبعا...انتي " هنا حبت تقعد مع جدو لما تيته وعمرو راحوا عند المراجيح... عشان جدو مبتسم ...وقالت "انا بحبك من وشك الحلو".. جدو ضحك من قلبه..وقال لها "وانا بحب شطارتك" هنا قالت "انا مش شاطرة يا جدو انا بزعل ماما..." جدو قالها "انا برضه بزعل تيته احيانا بس مش قصدي" هنا قالت بحماس "والله ولا انا ...انا بحب ماما...بس هي بتزعل مني.."،،، جدو قال "انتي جميلة وتقدري تكوني اشطر واحدة والله العظيم".. هنا ركزت في وش جدو كان بيتكلم بصدق اوي وحست انها مصدقاه.... هنا في باقي الخروجة كانت متلخبطة ساعات تتصرف حلو اوي وساعات تعمل حاجات غلط بس جدو وتيته كانوا بيقولو لها بثقة "احنا متأكدين ان مش قصدك" عقل هنا قال لها "انتي فعلا طيبه ومش قصدك هم عندهم حق" هنا كانت في قمه الفرحة وطلبت تبات عندهم... وعمرو رجع عند ماما ولما هنا صحيت عند تيته قالت لها "ينفع اساعدك" هنا كانت فرحانه اوي بابتسامه جدو وتشجيع تيته ولما بتوقع حاجة بيقولو "مش قصدك وهتعرفي تاخدي بالك احنا متأكدين" هنا قالت لجدو وتيته وهم بيروحوها "عندي طلب ...قولو ا لماما ان مش قصدي" "مش انتو عارفين" تيته وجدو اتكلموا مع ماما كانت مذهوله ... ماما بدأت تعمل زيهم هنا اتحسنت كتير وفي يوم عملت ايدها علي شكل قلب وبصت منه علي جدو وتيته وهم بيشربو الشاي وقالت لهم وهي بتضحك "بحبكم اوي" شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك خطورة كلمة اللي يضربك اضربه،،،، وكمان هتفهمك ليه الاطفال بيضربو بعض؟ "منير"طفل مطيع جدا لماما وبابا بس دايما بيضربوه لو ضيع حاجته او مسمعش الكلام او زعل تيته دايما، ،، ينضرب منير دخل المدرسة كان خايف لكن لقي المدرسة لطيفة وحب اصحابه بس المشكلة انهم بيضربوه مش هو اللي متضايق هو عادي بيسيبهم يضربوه! عقله بيقوله "انضرب زي عادتك" لكن ماما هي اللي متغاظة وبتقوله اللي يضربك اضربه؟ منير حاسس انها صعبه عليه بس ماما قالت له لو رجعت مضروب تاني هاضربك انا،،، منير خاف منها وبدأ يضرب زمايله اللي بيضربوه... بيضرب جامد اوي والمدرسة بدأت تبعت لبابا "منير بقي عنيف"... ماما كانت محرجة لكن قالت لمنير "خلاص اللي يضربك قول للميس ومتضربوش":::: فعلا منير سمع كلامها لكن المشكلة انه رجع ينضرب من الولاد ... وبيقول لماما "الميس ما بتعملش حاجة"....ايه الحل ؟ منير بقي بيكره المدرسة وزمايله مش بيحبوه... وكان قاعد في حصة الالعاب بعيد لكن مستر محسن بتاع الكورة نادي له..."مالك يا منير؟" منير عيط..."انا زهقان يا مستر" مستر محسن سأله "ليه..يا منير"...مستر محسن سمع المشكلة من منير ...وقال له "انا عندي حل يا منير بس مش هاقوله الا لما تبتسم" ....منير مسح العياط ...وقال"حل ايه؟" مستر محسن قاله "انا كنت زيك وانا صغير....ولقيت الحل ان اللي يضربك امنعه!" "حوش ايده ابعدها عنك وقفه عن الاذي وبعدين ابقي اشتكي "... منير فكر وقال له "فكرة حلوة بس لما تكون ماما هي اللي بتضربني يا مستر؟" مستر محسن طلب يقابل ماما وبابا ... سألهم وقالوا انهم بيضربو منير مستر محسن قال لهم "انا بالاحظ ان الولاد اللي بينضربو يا اما يبقوا جبناء يا اما بيحبوا العنف.... ومنير طيب كان موافق انه ينضرب ...بسبب ضرب البيت ولما زعلتو حاول يبقي عنيف .... أرجوكم بلاش تضربوه،،،،،" التفكير كان واضح علي ماما وبابا.....وشكرو مستر محسن منير لما بطل ينضرب في البيت اصبح في المدرسة مش عنيف ولا جبان. .. ولما الولاد التانيين يحاولوا ضربه بيمنعهم وبعدين يبقي يشتكي.. شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوته هتفهمك ليه بيكذبو؟؟؟؟ حلا وحبيبة اختين حلا الكبيرة.....وحبيبه الصغيرة ماما دايما تقول "الكذب حرام....الكذاب بيروح النار" حلا ....مش عاوزة تكذب ....،،،، كانت مرة عاوزة تشرب لبن ووقعت في المطبخ.... "طبعا هاقول لماما"حلا قالت كده لنفسها ماما زعقت لها جامد"هو انتي عميا؟؟؟؟" حلا خافت ودخلت الاوضة يوم تاني حلا كانت بتجري وخبطت حبيبة حبيبة عيطت....ماما جات "ايه اللي حصل" حبيبة شاورت علي حلا حلا قالت "وقعتها غصبا عني ...." ماما زعقت "اكيد بتجري بسرعة زي عادتك انتي وحشة ومش بتسمعي الكلام".... بعد كده ...حلا وقعت ورق يخص شغل بابا.....لما ماما سألت حلا ما ردتش...... ماما كشرت وقالت لحلا وحبيبة "مين اللي عملت كده....اللي بتكذب هتروح النار" حلا فجأة قالت لماما "واللي بتغلط هتروح فين؟؟؟" كونوا منطقيين مع انفسكم وصغاركم لا تنتظرو منهم دوما عدم الخطأ... شجعوهم علي الاعتراف بأخطائهم..بتقبلها والتوجيه الهادئ عليها.... الطفل بطبيعته يريد اخباركم لكن...اذا شعر ان الصدق سيعود عليه بالمتاعب سيكذب.... عقله هيديله رسالة "ما تجيبش لنفسك المشاكل" "اخبرهم بما يرضيهم لا بالحقيقة" خلو بالكم شارك هذه المشاركه رابط المشاركه شارك
ساره أم حمزه 1041 أرسلي تقرير عن المشاركة قامت بالمشاركة 3 ديسمبر, 2014 فعلا بصراحه قصص روعه الاخ الكبير مالوش ذنب انه كبير احترموا احساسه...وبلاش دايما تلوموه وتضربوه.....عشان ميكرهش الصغير.. فعلا ده بيغيظنى لما اشوف كتير امهات يقولوا للاخ الكبير اديله اللى عايزه عشان هو صغير او استحمله هو اصغر منك شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوته هتكلمك عن الطفل اللي مش بيبطل يقول عايز... دايما عايز لعب او حلوي ولا يكتفي.... جومانة...امورة جدا ....وعندها اخت توأم اسمها جوري.... بس فيه حاجة مضايقة جومانة...... جوري....هاديه ومش بتوقع لعبها ومش بتتنطط كتير .... ودايما كلمات ماما الحلوة لجوري "شاطرة يا جوري....شايفة يا جومانه هدوء جوري".... جومانه بتحب تتنطط ...وتتحرك...لكن نفسها تعجب ماما ...ومش قادرة!!!! كلام ماما دايما عن شطارة جوري؟؟؟؟؟ جومانة حاولت تقعد هادية لكن مقدرتش وفي الاخر نطت برضه ... وماما بصت لها بزعل كان عندهم ضيوف!!! جومانه سألت جوري "هو انتي ازاي هادية؟" جوري قالت "باقعد ساكتة" جومانه مش عارفة تخلي ماما تتكلم عنها مع انها شاطرة اوي في الرسم والجمباز .... جومانه بقت كل ما تشوف ماما تطلب اي حاجة عصير ...حاجة حلوة....جنيه....خروجة... بالطريقة دي ماما مش لاقية وقت تشكر في جوري..... ماما تعبت وبقت تزعق لجومانه "انتي مش بتبطلي طلبات؟" ماما بتقفل علي نفسها وبتشتكي من جومانة لتيته وجدو تيته جات تقعد النهاردة مع جومانة وجوري عشان ماما هتتأخر في مشوار... تيته شافت رسم جومانة "روعه يا جومانة" جومانه فرحت اوي وفرجت تيته علي الرسومات تيته عجبتها اوي الرسومات زي ما عجبها هدوء جوري ولما لعبت البنتين بالعرايس ...تيتة عجبها اوي نشاط جومانة زي ما عجبها هدوء جوري. .. جومانة كانت فرحانه اوي وما طلبتش من تيتة طلبات كتير... ماما رجعت مجهدة فوجئت ان البنتين قاعدين بيلعبو مبسوطين وتيته مبتسمه..... جومانه لاحظت ان تيته اخدت ماما علي جنب..تكلمها.. الطفل الذي يشعر انه غير قادر علي ارضائكم ولا جعلكم تمدحونه.... يحاول ازعاجكم كي تلتفتوا اليه بأي صورة ... كل طفل له ميزاته من فضلكم لا تمدحوا واحدا وتتركوا الاخر فريسة للالم النفسي لانه سيكون فيما بعد مشكلتكم الكبيرة اشباع الطفل يكون بارضائه عقليا ومهما جبتي لعب وهو مهزوز نفسيا لن يستريح شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوته هتفهمك يعني ايه طفل بصري؟ وازاي اعامله؟ جني...بتحب اوي الالوان الحلوة....والكرتون....والفيس بتحب اوضتها منظمة وبتكره الكركبة وبتحب البسمة وتكره التكشير والتبريق في وشها.... بس للاسف!!!!! ماما دايما لو جني غلطت تبرق وتبص لها نظرات جامده كده،،،،، وبابا...اصلا دايما بكشر في وشها وفي وش ماما..... حتي في يوم العيد بعد ما ماما اشترت لها الفستان الكحلي التحفة ....جني قالت "هيييه"في الشارع فماما بصت لها جامد وقالت"عييييييب نعلي صوتنا في الشارع".....جني سكتتت.... في البيت جني قاست الفستان تاني وقعدت تتخيل نفسها وسط بنات عمها...بيه بكرة في العيد ...وتقول "هييييه" ماما قالت"بس بلاش دوشة"...وكانت برضه بتبرق اوي بنظراتها..... جني نفسها تعرف هو ايه اللي مش عيب؟.... بابا كان برضه مكشر...حد ضايقه في الشغل!!!! حتي النهاردة!!!! جني مش فرحانه لكن فجأة غمضت عينيها واتخيلت نفسها في منظر رائع وسط الزهور وبتدور بفستانها ... خيال جني كان رافض وجود ماما اللي بتبص جامد وبابا اللي بيكشر ..... جني بس......السعادة رجعت لجني بس من اليوم ده بقت بتغمض عينيها كتير حتي وماما بتكلمها....بابا وماما بيزعقوا مش مهم اوي الزعيق مش بيضايق جني زي التبريق والتكشير:::::: جني كانت عند جدو.....لاحظ انها مش مغمضة عينيها. ..بالعكس بتضحك كتير جدو حضنها....جني قالت "عارف يا جدو انا نفسي ابنك بابا كان يبتسم زيك.....،" جدو قال "بتحبيه يبتسم ؟" جني قالت "بس هو مش بيعرف انا عمري ما شفته بيضحك " جدو حضن جني .... وجني قالت له "وماما بتبص لي بطريقة ...صعبة".... اقولك حاجة يا جدو لو عاوز محدش يضايقك غمض عينيك ومش تشوفه""" مر يومين....وجني لاحظت ان جدو اتصل ببابا .... ومر يومين تانييين ... جني كانت في اوضتها بتعمل الواجب اتفاجئت ببابا داخل عليها ومعاه هديه ملفوفة بس بابا كان مبتسم جني اندهشت وقعدت تبص كتير. ...لبابا....وفجأة ضحكت وحضنته...وفتحت الهديه...كانت عروسة تحفة .... بابا قال وهو مبتسم "اصلي فكرت ان التكشير مش بيحل مشاكلي" جني ضحكت اوي "هيييييبه" ومن اليوم ده بابا دخل في عالم جني .....بتحب تبص له وتكلمه..... ****الطفل البصري يكره التكشير والعبوس ويعشق التبسم والهدايا...والتخيل شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 .....قصة معتز هتكلمك عن من فقد الاب او الام .... معتز كان بيحب ماما اوي اكتر من بابا.... بابا طيب برضه لكن بيزعق ماما حنونة ...ومش بتزعق لمعتز خالص ودايما تكلمه....بالراحة وتفهمه غلطه ان غلط ....بس بهدوء.... وفي يوم معتز رجع من المدرسة متخيل مقابلة ماما ليه وبيفكر هتكون عامله له فراخ بانيه ولا ﻷ.. اتفاجئ بناس كتير قدام البيت خالاته كلهم وعمه.....وبابا اهو ....وجدو .....في ايه؟؟؟؟؟ يا ماما....يا ماما معتز نادي. ... لكن خالتو اخدته في حضنها وكانت بتبكي...معتز استغرب . ..."مالك يا خالتو مين زعلك؟؟؟" معتز سمع الناس بتقول "يا عيني...اتيتم...؟؟؟؟" ماما فين؟؟؟؟؟ معتز جري من ايد خالتو لكن عمه مسكه.... في ايه يا ناس انتو اتجنننتو؟؟؟؟؟؟ معتز .....سمع ان ماما ماتت ...في حادثة وهي راجعة بالتاكسي .... معتز معيطش .....معتز ساكت....وبيودي وشه في كل مكان يدور عليها.... الوقت عدي ....ولقي نفسه مع بابا لوحدهم...اول مرة تحصل!!! كان كتير يكون مع ماما لوحدها لكن مع بابا؟؟؟ ﻷ.... بابا حضنه....معتز ساكت ....بابا راح في النوم .... يا حبيبتي يا ماما....اخيرا دموع معتز نزلت....معتز مش عارف ينام ....وكل يوم بقه كده... وبابا وداه للدكتور....ومفيش فايدة.... خالتو اخدته ومفيش فايدة.... معتز معرفش ينام الا لما رسم بالطباشير صورة ماما علي الارض ونام في حضنها ماما احسن من الناس التانية واطيب... معتز رجع ينام لكن علي الارض ***الاطفال الذين يفتقدون الام...او الاب يحتاجون للحنان والعطف والتفاهم لا تركهم للواقع يعني نتكلم ان ماما ذهبت عند الله يا بخت المؤمن بذلك.... اعطف علي الطفل وامسح علي رأسه... اذا وضعك الله في موقف مع طفل كمعتز كن له حضنا ... كن به عطوفا.. تقبل كلماته عن امه استوعبها.... قل له اننا جميعا ذاهبون عند الله... وان الله لن يتركه.... احضر له العابا... وجهه برفق الي اخطائه احذر من القسوة عليه أدر معه حوارا... قل له انك قوي وستنجح في حياتك بإذن الله.... علمه الدعاء واللجوء لله شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 قصة حقيقية..... حدوتة هتفهم كل اب تأثير غيابه علي نفسية طفله عمار ولد طيب ورقيق وبيحب بابا اوي وماما اوي لكن هو مش بيشوف بابا كتير... بابا دايما مشغول يا اما في شغله يا اما مع اصحابه.... وماما هي اللي بتعمل كل حاجة النادي والمذاكرة والفسح والتمارين....واجتماعات المدرسة... بابا كان واحش عمار اوي لكن مش بيديلو فرصة اصلا انه يكلمه.... الميس...طلبت من عمار وزمايله انهم يكتبو كارت تهنئة لمامتهم عشان العيد.... كل الولاد لونوا صورة الام وخلاص وكتبو بخطهم كل عام وانتي بخير الا عمار عمل..شئ غريب لون صورة الام وعملها شنب!!!!! الميس استغربت اوي ......واهتمت بالامر "ليه رسمت لماما شنب يا عمار" عمار رد "عشان ماما هي بابا" "بابا واحشني اوي يا مس سارة" مس سارة طلبت من ادارة المدرسة الاتصال ببابا عمار وجا فعلا ... افتكر ان عمار جري له حاجة،،،،، مس سارة ورته رسمة عمار وحكت له كلامه.....وسألته"هو حضرتك بتسافر كتير؟؟؟ "بابا كان سرحان......ومس سارة لمحت في عينه دمعة....ورد "انا علي طول مسافر" المفاجأة الحلوة لعمار ان مش ماما اللي اخدته لوحدها من المدرسة..لا بابا كمان كان معاها ... عمار كان طاير من الفرحة.... واتغدوا بره.... وراحو جابو لعمار لبس العيد ..اول مرة بابا يبقي معاهم!!! عمار كان كل شوية يقول"ايه رأيك يا بابا" وعين ماما كانت بتقول... الرسمة بتاعتك يا عمار عملت اللي انا معرفتش اقوله الابناء يحتاجون الاب والام...معا شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 الطفل ذو الذكاء اللغوي المرتفع " اللي اتكلم بدري.. وبيفهم ما يدور حوله جيدا" انتبهوا له...انه يستوعب اكثر مما تعتقدون حدوتة "معاذ" هتفهمك ده.... معاذ شاطر اوي في المدرسة وبالذات في العربي و الانجليزي... وهو بيحب مامته اوي ....وبيحب باباه برضه لكن بيزعل منه لانه بيتخانق مع مامته.... معاذ بيسمع الخناقات وهو ساكت ...وساعات ...بيبقي نفسه يتكلم.... بيسمع بابا بيقول لماما...انها انانيه وانها مش حاسة بتعبه!!! معاذ مش مقتنع... لان وبابا في الشغل هو بيشوف ماما بترتب البيت...وبتعمل الاكل...ونفسها تسعد بابا.... معاذ شايف ان بابا مش بيشجعها عشان كده هي بتبقي زعلانة ....ولما تقول بابا يرد انها انانيه.... معاذ فكر يكلم بابا لكن ازاي؟؟؟ بابا بيغضب بسرعة ودايما فاكر ان معاذ مش بيفهم ... ولما ماما تقول بلاش زعيق عشان الولد ... بابا يقول "هو يعني فاهم!!!" مرة برضه كانت المناقشة مستمرة بين بابا وماما... وماما قالت "بلاش زعيق عشان معاذ"... بابا قال " هو فاهم حاجة" معاذ قال "ايوة فاهم" بابا مسكه جامد من ايديه"بتقول ايه يا ولد".... معاذ قال"باقول اني فاهم....بص يا بابا ماما حلوة...لكن هي عاوزاك تقول لها متشكر......" بابا بص له بغضب..... معاذ غمض عينيه وكمل "لما تقول لها كده هي هتبقي سعيدة والخناق هيمشي!!!" معاذ توقع انه يفتح عينيه علي ضربة من بابا ....لكنه حس بايد بابا بتبعد عن دراعه وبابا دخل اوضته وقفل عليه.... ماما كانت عينيها فيها دموع....وحضنت معاذ.... معاذ قال "مش اللي انا قلته هو اللي انتي بتحبيه"..... ماما حضنته اوي "انت كبرت يا معاذ"...... بابا مكلمش ماما ولا معاذ خالص...وراح الشغل..... معاذ لما رجع من المدرسة ودخل البيت لقي ماما شكلها غريب قالت له "بابا استأذن وجا بدري من الشغل وبيقول عايزنا" معاذ....كان قلقان؟؟؟؟ لكنه اتفاجئ ان بابا مبتسم وطلع من جيبه علبة فيها خاتم وقال لماما" متشكر اوي علي كل تعبك في حياتنا...." معاذ بص بسرعة لعين ماما حبيبته.....عيطت بفرح....وحضنت بابا.... بابا قال لمعاذ "تمام كده يا ميزو" معاذ ابتسم.....ابتسامة حلوة اوي..... الاطفال اللي ذكاؤهم اللغوي مرتفع...خلوا بالكم بيفهمو بسرعة جدا شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك اعجابك بطفل من اطفالك تأثيره ايه علي الآخر ابراهيم عنده اخت صغيرة اسمها شهد... ابراهيم متضايق اوي لانه عارف ان شهد هي احسن منه عند بابا وماما... بيضحكو علي كلامها... وبيحبوها اما هو دايما يقولو له "عيب يا ابراهيم..انت كبير" ابراهيم عارف ان ماما بتزعل منه عشان مش شاطر في المدرسة...لكن شهد شاطرة..... ابراهيم شاطر بس في الكورة في النادي وماما اصلا مش بتحب الكورة بتحب السباحة... ابراهيم طيب لكن هو مش عارف يبقي طيب مع شهد... بيضربها ويزقها وماما وبابا يخاصموه... ومفيش فايدة... برضه بيضربها... ابراهيم كان عند جدو ....هو بيحب جدو عشان جدو بيكلمه كلام حلو وبيدلعه "هيما".... جدو قال له "تيجي نرسم" ابراهيم رسمه حلو ...رسم بابا وماما ونفسه في بيت حلو اوي جدو قال "امال فين شهد" ابراهيم قال "مشيت....البيت هيكون حلو من غيرها" جدو قال "ليه يا هيما" ابراهيم قال "كان هيبقي مفيش غيري...ومحدش يقول ان فيه حد احسن مني" جدو بص لابراهيم وسأله "هي شهد احسن منك" ابراهيم قال "للاسف ماما فاكرة كده" "عارف يا جدو انا لما اكبر هاخاصم ماما وبابا...عشان مش بيتفرجو علي وانا بأسجل الجون في الماتش..." ابراهيم مشي من عند جدو بالليل مع بابا وماما .... لكن قبل ما يمشي لاحظ ان جدو قعد معاهم... هو معرفش جدو قال ايه.... لكن في اليوم التاني.... ماما وهي بتدخل ابراهيم تمرين الكورة ما قالتش"هارجع بعد ساعة" لا دي قعدت في المدرج!!!!! ابراهيم مصدقش نفسه؟؟؟ لعب حلو جدا....الكابتن كان فرحان بيه....ابراهيم شاف ماما بتصقف له....ولاول مرة يبقي الكلام عليه حلو في البيت ... وشهد كانت بتقول له "علمني الكورة يا ابراهيم". ... البيت اتغير....بابا.وماما بيشكرو في ابراهيم...وشهد....،،،، وبيتفرجو علي الكورة .. ابراهيم كان نفسه اوي يسعدهم وبقي بيذاكر اكتر شوية....وكان فخور ان شهد الاولي..في فصلها ومبقاش بيضربها عشان البيت يفضل حلو......وعند جدو ....ابراهيم رسم البيت تاني....بس شهد كانت فيه مع بابا وماما.... وقال لجدو"احنا اسرة سعيدة يا جدو" جدو ابتسم...ولقي ابراهيم بيرسم تاج رائع.... جدو سأل "لمين ده يا ابراهيم" ابراهيم قال "للملك...جدو .....اللي بيفهم الناس الصح..." جدو عنيه دمعت وحضن ابراهيم حضن كبير اوي شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك..معني الطفل الذي ليس لديه قدرة علي الاختيار...وازاي اعالج ده مصطفي كان بيحب اللون الاحمر لكن مامته قالت له "لا هنجيب تي شيرت اخضر" مصطفي كان بيحب صاحبه عمار لكن مامته قالت له ما تصاحبوش من غير ما يفهم السبب مصطفي كان بيحب الكورة لكن مامته قالت "السباحة اهم" مصطفي بيحب مامته ومش عاوز يضايقها...كل حاجة بيسمع كلامها... ما بقاش بيعرف يختار حاجة الا لو هي قالت... النهاردة في حصة الرسم الميس قالت"ارسمو شئ بتحبوه" مصطفي. ..ضيع الحصة كلها بيفكر ...وما رسمش حاجة. ...الميس استغربت. ... قال لها "اصلي مش عارف ماما هتعوز ارسم ايه".... خلاص مصطفي مش بيعرف يختار.... لما ماما اخدت بالها بدأت تقو له "عاوز ده ولا ..ده...يا مصطفي" فكان رده دايما"مش عارف ........اي حاجة"..... الميس قابلت ماما وقالت لها "ان الذكاء الشخصي هو ان يعرف الطفل ماذا يريد..." ماما قالت"لكن مصطفي دلوقتي ما بقاش عاوز يختار حاجة" الميس نصحت ماما بأنها تكتب ورقة بما كان مصطفي يحبه وتبقي تفكره بيه...ازاي؟ يعني مثلا لما مصطفي راح مع ماما يختاروا لبس العيد... مصطفي قال لماما لما سألته :عاوز انهي لون؟ رده"مش عارف".... ماما قالت"انت بتحب الاحمر خد الاحمر" ماما بدأت تنمي عند مصطفي تاني قدرته علي الاختيار من فضلكم قدرتهم علي الاختيار...جزء من ذكائهم الشخصي لا تكسروهم بحجة الطاعة العمياء لكم شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 قصة هتبين لك تعملي ايه لما يموت حيوان اليف عند ابنك ياسمين عندها حب كبير للحيوانات والطيور ولما حفظت جزء عم بابا جاب لها عصفور رائع ... ياسمين حبته اوي وسمته "سمسم" كانت بترعاه وبتقول لماما دايما هاتي اكل الاكل بتاعه هيخلص وبعدين في يوم ياسمين جات تشوف العصفور لقيته نايم علي الارض؟؟؟؟ شكله غريب ندهت"سمسم"ما قامش ولا رد!!!! ياسمين اتخضت ونادت"ماما"......ماما جات ..."العصفور ماله" ياسمين سألت..... ماما ردت "امم......العصفور يا بخته. ..راح لربنا" ياسمين سألت باندهاش "يعني ايه" ماما قالت..وهي بتبوسها "مات ...." ياسمين عيطت... لكن ماما قالت "يا بخت اللي يروح عند ربنا....ربنا كريم ...احنا كنا بنحب سمسم وبنرعاه....لكن ربنا اللي خلقه بيحبه اكتر وهيرعاه احسن" ياسمين قالت "بجد" ماما قالت "اكيد.....ربنا اللي خلق...وبيحب مخلوقاته...يا بخت اللي يروح عنده" ياسمين قالت "يعني سمسم كده مبسوط" ماما قالت "اللي بيروح عند حد كريم وطيب بيبقي مبسوط" ياسمين قالت "طبعا" ماما قالت "وربنا اكرم من اي حد" . شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 (معدل) حدوتة هتفهمك تأثير ترك الاولاد لوحدهم في المنزل علي نفسيتهم "للاسف...قصة حقيقية" زياد...بيحب اخته..سلمي اوي....وبيلاعبها وطيب معاها...بس زياد...بيسمع ماما بتقول"انا هارجع الشغل".... هو عارف ان مامته مدرسة بس في اجازة ... سألها "امتي" قالت "بعد اسبوع" ماما رجعت الشغل ومفيش مشكله. ..لان زياد وسلمي بينزلو معاها ...زياد يروح فصله وسلمي في البيبي روم.... لكن لما الاجازة جات بقي فيه مشكلة ماما لازم تروح اجتماعات في المدرسة....وممنوع تاخد الولاد....وتيته ساكنة بعيد...وبابا في الشغل....؟؟؟؟ زياد صحي لقي نفسه لوحده مع سلمي...زياد عيط واتخض ....وراح يدور علي ماما ؟؟؟؟ مش موجوده وباب الشقة مقفول....زياد عيط .....وبطنه وجعته وسلمي صحيت علي عياطه...زياد ما لاعبهاش ولا ضحك لها....هي كمان عيطت زياد ارتبك ...وقعد يكلمها كان حاسس انه كبير اوي "بس ...يا سلمي"..... ماما لما رجعت اتفاجئت ان سلمي كويسة لكن زياد تعبان اوي .ومش بيتكلم..... "معلش يا زياد اضطريت انزل وانتم نايمين".... زياد ....كان ساكت. ..ومن اليوم ده بدأ يجيله ارق بالليل....وساعات مغص... وماما جابت له موبايل عشان يتصل بيها...في المدرسة...لكن هي بتقول متتصلش كل شوية اتصل في الضرورة!!! زياد مش عارف يعني ايه ضرورة.....بس ماما لاحظت انه دايما بقي عصبي علي سلمي وبيزعق لها...ومش بيلاعبها خالص. .... ترك الاولاد الكبير مع الصغير بالمنزل قبل السن المناسب...يسبب كراهة من الكبير للصغير لانه بيحس انه عبء عليه....و كمان مش بيجمد قلب الولاد لأ ده بيخليهم متوترين ..وممكن يعرضهم لخطورة نفسية غير البدنية كمان....اولادك اماااااااانة تم تعديل 3 ديسمبر, 2014 بواسطة ~ أم العبادلة ~ شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك..تأثير حزنك لفقد احبابك علي نفسية اولادك نور بتحب ماما جدا ..وبتحب جدو "فوزي" بابا مامتها...لان مامتها بتضحك كل ما تتقابل مع باباها جدو فوزي ... اسعد اوقات نور لما هي وماما يخرجو مع جدو...لان ماما بتكون سعيدة .. نور بتحس ان جدو طيب اوي ودايما يسمع ماما ويقول لها كلام مريح ليها.... بس نور اتفاجئت ان جدو فوزي تعب ودخل المستشفي هي وماما علي طول عنده وبابا نور بيجي يزوره نور ملاحظة ان جدو فوزي مبتسم زي عادته حتي وهو مريض لكن ماما هي اللي بطلت تبتسم.. وبتتكلم كتير مع الدكاترة وساعات بتعيط لوحدها...ومرت ايام ونور شافت ماما بتعيط جامد وبابا بيحضنها...وسمعت ان جدو فوزي مات....." نور مش متأكدة ...يعني ايه مات...هي حاجة حلوة ؟؟؟؟" لكن عياط مامتها علي طول عرفت منه ان الموت حاجة وحشة جو البيت غريب ناس كتير لابسين اسود وماما مش بتبطل عياط ومش بتضحك ودايما حاضنة صورة جدو فوزي نور خايفة اوي...راحت سألت باباها "هو اللي بيموت بيروح فين" بابا قال "عند ربنا" نور...في المدرسة سمعت الميس بتقول "ربنا كريم...رحيم" نور سألت "يعني ايه" الميس قالت "يعني طيب وبيحب الناس المؤمنين" نور فرحت اوي...هي عارفة ان جدو فوزي كان بيصلي وبيصوم نور قالت لماما "ماما بطلي عياط انا خلاص اطمنت علي جدو فوزي"..... لا تجعلي من موت احبابك كارثة عند اولادك بل قولي "الله رحيم بالناس الطيبين ...يا بخت من راح عنده..... شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك تأثير الاهانة علي نفسيتهم محمود تلميذ مجتهد..دايما الاول...وبيحب زملاءه وحريص علي مساعدتهم... محمود كان بيحب بابا وماما جدا لكن بابا اضطر يسافر لشغل خارج مصر... ماما اخدت محمود وقعدت بيه عند جدو ...وتيتة...خال محمود ...اسمه تامر ولسه في الكلية محمود بيحترم كل اللي اكبر منه ...لكن خالو دايما يشتمه بهزار يقول مثلا "يا حمار...يا فاشل..." محمود كان بيتضايق وبيستغرب...ماما كانت مش ملاحظة ضيقه.... "محمود"بيحس ان الكلام الوحش ده بيخليه مش عارف يذاكر ودايما يفكر هو انا فعلا غبي؟ زي ما خالو بيقول!!! محمود بيقول لبابا في التليفون "ارجع" خالو ضحك عليه "بيبي عاوز بابا" محمود عيط ومحدش شاف دموعه وفي يوم قعد يفكر كتير ازاي ينصح خالو ان الشتيمة حرام...؟؟؟ لكن معرفش يعمل ايه... خالو رجع اليوم ده متضايق ومتعصب... محمود سأله "مالك" خالو قال له "ما لكش دعوة" محمود زعل ...بس ما عيطش لكن قال لخالو"حضرتك شكلك متضايق. .وانا بسألك عشان مهتم بيك " "وعلي فكرة يا خالو انا بافتكر كل كلامك اللي مزعلني...ولما اكبر وترضي تسمعني هاقولك عليه" .... تامر استغرب.......شكله مندهش جدا.....لكن محمود راح يصلي...بعدها لقي خاله تامر بيناديه"محمود..." محمود قال"نعم"... خالو قاله،"انا باهزر معاك" محمود قاله "بس فيه هزار باحبه وهزار بيضايقني. ...انا مش بحب اتشتم".....خالو بص لمحمود.....وسكت... تاني يوم....محمود كان راجع من المدرسة لقي في الاوضه هدية مكتوب عليها "الي محمود...اللي كبر..بسرعة ...وعرف ينصحني...انا اسف. .خالو تامر" محمود فرح بمعاملة خالو الجديدة اكتر ميت مرة من الهدية من فضلكم السباب والشتائم اخطاء قاتلة في التربية شارك هذه المشاركه رابط المشاركه شارك
~ أم العبادلة ~ 1903 أرسلي تقرير عن المشاركة قامت بالمشاركة 3 ديسمبر, 2014 حدوتة هتفهمك ازاي تتعاملي مع الطفل اللي بيسأل كتير زينة...جميلة اوي ودايما...بتسمع الكلام.. اغسلي وشك...حاضر .. اغسلي سنانك ...حاضر ... وشاطرة وفي المدرسة محبوبة من المدرسات....بس فيه مشكلة زينة بتحب تسأل ماما كتير "بابا اتأخر ليه" "تيته اتصلت ليه"" "وكمان بتسمع الكلام اللي ببدور بين الكبار اللي جنبها....وتبقي عاوزة تفهم الموضوع ... ماما بتقول"هو انتي دايما رامية ودنك" زينة مش فاهمة يعني ايه....بس حست ان ماما زهقانه منها زينة بقت مش بتسأل....وبتسكت كتير ...ومش بتحب حاجة بابا لاحظ كده...واتكلم معاها....زينة عيطت... (محدش بيحبني) عمو محمد عم زينة طبيب.. كان فاهم طبيعة زينه...شرح لبابا وماما (الطفل اللي زي زينة طفل مركز السمع عنده نشط مينفعش نتكلم قدامه وبعدين نقول له انت رامي ودنك) (وكمان طفل بيحب التفاصيل....مينفعش نكلمه باختصار...ممكن نؤجل معه الكلام لوقت مناسب لكن لا نهينه) زينة فرحت اوي بالتغييرات ...ماما بتفهمها وتتكلم معاها ....ومش بتحكي قدامها الا اللي ينفع زينه تشارك فيه... اما بابا بيناقش زينة وبيحترم اسألتها ....زينة الاولي ....ودايما محل ثقة.... شارك هذه المشاركه رابط المشاركه شارك
