لو عروسة جديدة او على وش جواز تعالى ندردش شوية

[ساجدة للرحمن 2049]

بسم الله الرحمن الرحيم

بصراحه الموضوع جميل

وعجبني جدا ردك يا أم محمد فعلا كل كلمه قولتيها صح جدا

لازم كل واحده تاخد بالها من خطيبها أو العاقد عليها و أهم حاجه هي الأحترام المتبادل بينهم

وكل واحده مقبله على الزواج تعرف أن النظام اللى هاتمشى عليه في أول حياتك هو اللي هاتمشى عليه في حياتك كلها فحاولي تكوني منظمه أولوياتك وعارفه الحاجات اللم ممكن تتنازلي عنها و اللي مش ممكن تتنازلي عنه

ولي عوده بإذن الله

والسلام عليكم و رحمة الله وبركاته

[*أم رقية* 473]

حبيبتي ام محمد موضوع رائع وردود جميلة :icon15:

وياريت تقبلي مشاركتي

انا متزوجة من 7شهور وطبعا حصلت بينا حاجات كتيرررررررررررررررر منها الحلو :wub: ومنها الوحش :lol:

وطبعا بعدالجواز في حاجات كتير بتتغيربس بالحب بتعدى الصعاب

وبالنسبه للاخت دمعة فجر كلام التليفون حاجة وبعد الجواز حاجة تانية خالص :biggrin:

وحاولي تستفيدي بكلام الاخت ام محمدلانه فعلا مفيد وجربي نصايحها بالنسبة العصبية والغيرة وطريقة كلامه وهزاره وحاولي تكوني لينة مرة وصلبة مرة

احبكن في الله :blink: :blink: :blink:

[ّالصفاءّ 0]

السلام عليكم ورحمة الله وبركاته

جزاكم الله خيراً أخواتى على الردود الحلوة

بس بردو محدش اتكلم آوى فى موضوع الرؤيا

يعنى مثلاً صحبتى حكتلى الرؤيا الشرعية بتاعتها وقالتلى أن اللى تقدملها ساعتها طلب منها أنها تقرأ قرأن ، أنا عن نفسى لو كنت مكانها

كنت هنكسف أقرأ قرأن أمامه ، وأنا أصلاً معرفش هل يجوز أصلاً ؟

وكمان أيه الأسئلة اللى المفروض أسألها له ؟

وهل المفروض أنه يشوف وشى كله ( أقصد الصراحة الحواجب ممكن ساعات بتغير الشكل ) فهل يجب أنه يشوف وشى كامل ؟

معلش هى اسئلة غبية شوية

وجزاكم الله خيراً

[om_mohamed 0]

ابدا يا حبيبتى اسئلتك مش غبية ولا حاجة .. انا مش فاهمة الرؤيا الشرعية تقصدى بيها ايه؟؟ قصدك يشوف وجهك يعنى ولا لا؟؟ دى بقى محتاجة فتوى وانا مقدرش اقول حاجة تطلع غلط

والاسئلة المهمة .اهم حاجة بيصلى ولا لا؟ بيدخن ؟ بيتفرج على التلفزيون؟ بيحب مين من الشيوخ لو متابع ؟؟ وبعدين خدى رايه فى حاجة مهمة مثلا هل هو من انصار عمل المراة ولا لا؟؟ وعلى حسب ردوده تقدرى تفهمى جزء من تفكيره ..والباقى ييجى باذن الله مع التعامل

يارب اكون قدرت اجاوبك وربنا يوفقك يارب

[om_mohamed 0]

فينك يا ميار انتى ودمعة فجر ..امال بس قلتوا هنصدعكوا اسالة ..فين بقه ده انتوا كسلانين خالص

[الهام كنجو 0]

السلام عليكم ورحمة الله وبركاته

موضوع جميل جدا اختي ام محمد بارك الله فيك وجعله في ميزان حسناتك

انا متزوجة منذ 9 سنوات ونصف يعني خبرة طويلة زي مابقولو

اعجبتني اسئلة المقبلات على الزواج لانها تدل على وعي وعلى رغبة في حياة هانئة

ام محمد ما شاء الله عليك ردودك واعية وجيدة وليس لي ان اضيف شيء عليها

لكن لي عودة باذن الله

تقبلوا تحياتي

[القمر المضئ 0]

ام الزهراء انا بحبك كــــــــــــــــــــــــــــتــــــــــــــــــيـــــــــــررررررر قوى وردك كافى ورائع

ام محمد ربنا يباركلك فى ابنك يارب كلامك لذيذ وعلى فكره انا بعمل كدا بيشوفبى كل يوم بشكل جديد

وعلى فكره ياختى الصفاء انا اكبر منك بسنه واحده يعنى انتى فى 3 ثانوى انا فى اولى كليه ومتزوجه وعندى بنت ومتزوجه من4سنين يعنى وانا فى 3اعدادى زواج مبكر جدا والحياه جميله وعاديه جدا بس فى شويه مشاكل وان شاء الله تتحل

[ام هبة2 0]

السلام عليكم ورحمة الله وبركاته

ماشاء الله عليك ياام محمد موضوعك جميل

جزاك الله خير واسمحيلي بالنسبة لسؤال الاخت الصفاء عن حدود الرؤية دي فتوى في الموضوع

ما يجوز في النظر للمخطوبة

[om_mohamed 0]

اختى الهام كنجو ما شاء الله عليكى وربنا يبارك فى عمرك انتى وزوجك ..الحمد لله على نعمة العقل وبنات المسلمين الحمد لله ربنا يزيدهم علم وفهم يارب وعلى فكرة بقه انا اللى عاوزة اسالك هل صحيح فيه حاجة اسمها هرشة السنة السابعة فى الجواز ..يعنى مشاكل وحاجات من دى ولا ده اى كلام منتظرة ردك يا غالية ونستفيد من خبرتك؟

 

والام الصغيرة sohanda ماشاء الله عليكى وربنا يسعدك يا حبيبتى ده انتى ام وشيلتى المسئولية بدرى بدرى ..عموما يا حبيبتى كل المشاكل تتحل بهدوء واحنا فى الخدمة اسالى بس وربنا الموفق

 

وحبيبتى ام هبة2 الف شكر على مساعدتك فى الرد على اختنا الصفاء وربنا وفقنا جميعا لما يحبه ويرضاه

[~~أم أسيل~~ 25]

السلام عليكم ورحمة الله وبركاته،،

 

ردودك جميلة يا ام محمد

 

انا علي وش جواز :(

 

بس مكتئبة اوي مع ان الاخ كويس وطيب

 

بس مش مرتاحة لموضوع الجواز حاسة الموضوع صعب اوي ومسئولية وانا مدلعة

 

وخاصة اني هسافر معاه لبلد تاني ونرجع كل سنة شهر

 

يعني هيستفرد بيا :( :(

 

دعواتكم

[om_mohamed 0]

اختى انسيتم الجنة انا ايضا متزوجة فى بلد اخرى غير بلد اهلى واصدقائى ولا ارى اهلى الا كام شهر مرة واحيانا بالسنة لا ازورهم لظروف خاصة ولكن هما بيزورونى بس مش كتير برضه ولكن بنتكلم على النت والتليفون كل يوم تقريبا ..فظروفنا واحدة متقلقيش

بصى يا حبيبتى اهم شئ انه يكون الانسان طيب وحنين عليكى علشان متحسيش بالغربة ..يعنى الحنية بتبان ..مثلا انا لما كنت بمرض ولا حاجة ايام الخطوبة كان يقلق جدا ويصمم انى اذهب للطبيب حتى لو عندى برد وكان يتصل بيا كل يوم مرتين وتلاتة رغم انه فى محافظة تانية فانا حسيت انه حنين عليا ..وفعلا بعد الزواج الحمد لله طلع راجل طيب وحنين لان ظروف حملى الاول كانت صعبة جدا ومكنتش بسيب السرير وواحد غيره كان زهق منى بس بصراحة هوه واهله الله يكرمهم يارب مسابونيش لحظة

 

فمتقلقيش بس اهم شئ اتاكدى من طيبته وحنيته عليكى وان شاء الله مش هتحسى بالغربة ولا حاجة ..والجواز مش صعب زى مانت متخيلة كده

هوه فى الاول بس بيبقى فيه ارتباك زى اى شئ جديد الواحد بيعمله ..يعنى مثلا هتبقى اول الجواز مش عارفى تظبطى كمية الاكل ساعات انا كنت بطبخ بكميات كبيرة وساعات كنت بطبخ قليل ونقوم جعانين..وساعات احرق الاكل رغم انى شاطرة والحمد لله فى المطبخ ..بس الربكة والتغيير بتبقى صعبة فى الاول بس ..وبعد كده هتلاقى نفسك استاذة فى كل حاجة وربنا يوفقك باذن الله

اهم شئ تختارى صح من الاول يا اختى .. والنصيحة الازلية اللى بقولها لكل واحدة .اختارى واحد فيه شئ مشترك بينكم ..لازم تلاقوا حاجة تقولوها بعد الجواز..لان مش كل الكلام حب وغرام ..فلازم يكون فيه شئ مشترك ..حتى لو اضطريتى تتعلمى اى شئ عن شغله او عن شئ بيحيه ..انا مثلا اضطريت اتفرج معاه على المصارعة الحرة والكورة لانه بيحبها وحفظت اسامى لاعبين بس علشان خاطرة وفعلا بيبقى مبسوط اوى لما اقعد واتفرج معاه

طبعا انا بحاول اغير عادة التليفزيون دى وربنا يهدى بس انا اقصد الفكرة يعنى ..لازم شئ مشترك والا الحياة هتبقى مملة بعد الجواز هتبقى طبيخ وعيال وبس ..فزى مقلتلك دورى على شئ مشترك بينكم علشان باذن الله ميبقاش فيه ملل

ومتخافيش وربنا يوفقك ويجمعك بيه فى الحلال ويرزقك الذرية الصالحة

 

ودلوقتى انا كنت وعدتكم اننا نتكلم عن الحماة وازاى تكسبيها فهل نبدا ولا نمتوا منى؟؟؟

[omjana 6]

جزاكِ الله خيرا موضوع رائع

 

 

يارب نستفيد منكم

 

ومبارك لميار ونونا

[omjana 6]

ام محمد بارك الله فيكِ

 

بس اقرأى الصمدية والمعوذتين يا حبيبتى وتعوذي بالله من الحسد

[omjana 6]

السلام عليكم

 

عايزين نصايح للمقبلات على الزواج كيف يكون التعامل بين الزوجين خاصة فى اول ايام الزواج

 

كمان نصايح فى كيفية الادارة المالية للمنزل

 

 

بس براحة وخطوة خطوة علينا احنا يا كتاكيت

[أم مصعب2 1]

:icon_eek: السلام عليكم ورحمة الله وبركاته،،

وانا متزوجة من ثلاث شهور وعقبال العزابيات يا رب :tongue: :wub: :ninja: :laugh:

حياة العزوبية حلوة :laugh: والحياة الزوجية حلوة ايضا :wub:

وتجي أوقات أحن فيها للحياة العزوبية والحرية .... :P

وعلى كل حال كل شئ في وقته حلوووو...وكل شئ مكتوب من الله سبحانه وتعالى....والحمد لله رب العالمين... :wub: :wink: :P

تم تعديل 18 اكتوبر, 2007 بواسطة أم مصعب2

[om_mohamed 0]

اختى الحبيبة zad1983 اشكرك على ردك وخوفك على والله هو الحارس ..والف مبروك عليكى يا اختى ام مصعب وعقبال منبارك على مجئ مصعب ويبارك لك فى زوجك وحياتك باذن الله وعندك حق ساعات الواحد يقول فين ايام الراحة وخلو البال ..بس بعد كده بقول ضحكة واحدة من اولادى بالدنيا كلها وربنا يرزقك بالذرية الصالحة ويسعدك يارب

 

بالنسبة لاسئلتك بقه يازاد فاول ايام الزواج على اد مهى حلوة على اد مهى صعبة ..الواحدة بتبقى حاسة بلخبطة شديدة جدا جسديا طبعا ونفسيا ..يعنى مثلا بتسمعى عن البنات اللى بتعيط ليلة الدخلة ..انا بقه عيطت رابع يوم ليه متعرفيش يا بنتى كنا بنتفرج على التلفزيون وفجاة انفجرت من العياط وقلت له ودينى لماما وحشونى عاوزة اروح .المهم الراجل كتر خيره صبر وقعد يطبطب عليا وقالى خلاص هوديكى متزعليش ..وبعد كده سيبك نسيت الدنيا واتلبخت بحياتى الجديدة بقه

 

المهم انك تكونى هادية وتعرفى انك مقبلة على مسئولية كبيرة اوى بس برضه على سعادة غامرة ..فالبيت بيتك ملكك ..تطبخى اللى انتى عاوزاه ..تعملى اللى تحبيه ..انا اول الجواز كنت لما اكسر كوباية او طبق اضحك اوىىىىىىىى..جوزى يقولى بتضحكى ليه اقوله اصل فى بيتنا كان زمان ماما اديتنى كلمتين فى العضم

المهم انه ده هيبقى بيتك مملكتك باذن الله واهم شئ ترتبى اولوياتك علشان متتعبيش

طبعا اول شهرين كده الاحوال المالية هتبقى اخر لخبطة وهتلاقى الفلوس بتطير ..طبعا فسح فى الاول بقه وهدايا ..والواحد مش عارف يصرف ايه ويجيب ايه وبعد كده بتظبطى نفسك

مثلا اول كل شهر تاخدى مصروف البيت من جوزك وتعملى ميزانية بسيطة خالص

تطلعى ايجار البيت والمية والنور على جنب

واحسن شئ تشترى الاكل بالشهر او بالاسبوع على حسب متقدرى تشيلى انتى وزوجك ..وعلى فكرة عوديه يجى معاكى السوف وتشتروا سوى بتبقى لحظات حلوة وكمان بيعرف الاسعار ويتابع علشان ميقولكيش الفلوس بتطير والكلام ده لما ينزل معاكى هيعرف

يعنى فى الاول مثلا تشترى الاكل وتطيه فى الفريزر علشان متنزليش السوق كل يوم ..وتطبخى واظبطى كمية اكلك حسب انتى وزوجك يعنى لو اكيلة اوى يعنى ابقى اعملى 3 كوباية رز لو بتحبوه ..لو مكرونة كفاية نص كيلو ..يعنى تظبطى كده وباذن الله كله خير ومتقلقيش الست بتتولد ست بيت وهيه مش عارفة وباذن الله هتبقى خبرة مع الوقت

وربنا معاكى باذن الله

ويرزق بنات المسلمين بالازواج الصالحين والذرية الصالحة وانا فى الخدمة اسالى بس

[~~أم أسيل~~ 25]

السلام عليكم ورحمة الله وبركاته،،

 

تسلمي يا ام محمد ..

طبعا مستنيين كلامك ازاي نكسب الحماه

 

الصراحة انا بحبها وهي كمان بتحبني وطيبة اوي

 

بس بردو نتعلم منكم :)

 

أحبكم في الله

[دمعة فجر 0]

فينك يا ميار انتى ودمعة فجر ..امال بس قلتوا هنصدعكوا اسالة ..فين بقه ده انتوا كسلانين خالص

ميار هربتي خافت مني :P :icon_eek: بمزح طبعا هو انتو مش بتمزحوا ولاايه :wub:

 

لا بجد حبيبتي ام محمد :ninja: معلش اصلي ما بقعد علي الجهاز الا بعد الفجر ومش دائما عشان كده مش مصدعاكي لسه

بس اصبري شوية عليا

ياستي زي ما ؤلتلك عروسة علي وشه جواز يعني كمان شهرين ثلاثة اربعة لسه مش باين وراح اسافر من بلدي للبلد اللي خطيبي بعيش فيها فيعني شوية فلفل علي شوية شطة :wink: قصدي شوية نصائح حلوة منك تفيدنا واذا ممكن تحكيلي كيف قضيتي اول ايامك مع ابو محمد وهل فعلا بتغير الراجل بعد الجواز عما كان عليه قبل الجواز يعني كل الكلام الحلو بيصير مر :P بجد لاني بسمع وبقرأ عن اشياء متل هاي

[om_mohamed 0]

بناء على طلب الجماهير .. اقصد اخواتى الحبيبات اول درس للحماة

اقرب طريق لقلب جوزك والدته

 

العلاقة بين العروسة والحماة حساسة جدا وهى تبدا من فترة الخطوبة وليس من اول الزواج كما تعتقد بعض النساء اهم شئ انك تعرفى نوع حماتك وطبيعة شخصيتها فمثلا:

1- النوع المنتقد دائما

تقبلى انتقادها بصدر رحب وعامليها كانها والدتك وفهميها ان انك بتحبى نصايحا علشان تستفيدى من خبرتها وخلى بالك طويل لان النوع ده بيخنق شوية بس مع طول صبرك هيه هتستسلم

 

2- النوع الحشرى

احذرى من النوع ده لانها هتعملك اختبارت كتيرة واوعى تكذبى لانها هتتاكد من كلامك من اكتر من مصدر فمثلا حماتى كانت تسال جوزى اشتريت دى بكام .وبعدين تسالنى نفس السؤال من غير معرف طبعا انها سالت جوزى وتشوفنى بكدب ولا لا لحد لما اتاكدت انى مبكدبش بقت مبتسالش والحمد لله

 

3- النوع المجامل

لازم تجامليها انت كمان فى المناسبات وخلى بالك اوعى فى مناسبة زى عيد الام مثلا تجيبى هدية لمامتك اغلى من هديتها جوزك هيزعل وهيقولك يعنى مامتك عندك اغلى من امى عندى

 

4- النوع الحنين

خليكى حنينة عليها مثلا انا كنت بسند حماتى فى المواصلات واساعدها فى الطلوع والنزول لما كانت بتخرج معاى ايام الخطوبة كانت بتفرح اوى وتقول لجوزى خطيبتك (اياميها ) حنينة وطيبة

 

واهم حاجة انك تحننى قلب زوجك على والدته ودايما تفكريه باحتياجاتها ..لو عاوزة دواء ..لو محتاجة تروح مشوار ولا اى حاجة

واذا زعلوا خلى بالك خدى صفها وقوليله اللى ملوش خير فى مامته ملوش خير فى حد وده لسببين:unsure:

1- انهم هيتصالحوا فمتبقيش عزول فى النص

2- علشان اولادك يحنوا عليكى باذن الله لما يكبروا

 

انا حاولت اكتبلكم على اد مقدر وباذن الله نكمل مع بعض واللى عندها اى استفسار او مشكلة مع حماتها تقول وهنحاول نحلها باذن الله

[om_mohamed 0]

وطبعا لما حماتك ترضى عنك جوزك هيرضى عنك هوه كمان

عرفتوا بقه ان اقصر طريق لقلب جوزك والدته

[om_mohamed 0]

يا واد يا جامد يا دمعة فجر خوفتى ميار :unsure: بس وبعدين هنلاقى مين يصدعنا بس :wacko: بضحك والله يا ميار

 

عموما يا ستى انا عندى رد بالنسبة لاول ايامى مع ابو محمد

فاول ايام الزواج على اد مهى حلوة على اد مهى صعبة ..الواحدة بتبقى حاسة بلخبطة شديدة جدا جسديا طبعا ونفسيا ..يعنى مثلا بتسمعى عن البنات اللى بتعيط ليلة الدخلة ..انا بقه عيطت رابع يوم ليه متعرفيش يا بنتى كنا بنتفرج على التلفزيون وفجاة انفجرت من العياط وقلت له ودينى لماما وحشونى عاوزة اروح .المهم الراجل كتر خيره صبر وقعد يطبطب عليا وقالى خلاص هوديكى متزعليش ..وبعد كده سيبك نسيت الدنيا واتلبخت بحياتى الجديدة بقه

 

والراجل يا دموعة (حلو الدلع ده) مش بيتغير زى مانت فاكرة كده يعنى مش هيبقى دراكولا ولا حاجة متخافيش ..بس لازم تفهمى ان الحياة مش كلها كلام حب ..الحب وكلام الحب بيبقى زيادة فى الخطوبة لانكم لسة فاضيين موراكوش حاجة ..بعد الجواز بيبقى فيه مسئوليات كبيرة فالوقت الفاضى بيقل والمفروض بقه ان الواحدة تراعى ده ومش كل شوية تقول لجوزها ان مبقتش تحبنى زى الاول مبقتش تخرجنى زى الاول ..مهو دلوقت مش زى الاول

 

الحب بيفضل موجود بس الشطارة انه يطلع فى الوقت المناسب وصدقينى بالكلمة الحلوة تقدرى تلينى الحديد ..متفتكريش ان الحياة كلها وردى لا هتقابلك مشاكل انا مثلا حصلتلى مشاكل تانى سنة من جوازنا واستمرت سنة كاملة ..وكانت اسود ايام فى حياتى كلها من يوم متولدت ..وكان بيجى عليا وقت عاوزة اسيب البيت واطلق ..بس لما فكرت مع نفسى لقيت ان بيتى ده ملكى وصعب ارجع اعيش ضيفة فى بيت حتى لو كان بيت اهلى واسيب بيتى اللى ملكى ..فربنا قدرنى وبالصبر عدت المشاكل وربنا كرمنا بمريم كمان اهيه نورت الدنيا

 

فالصبر ثم الصبر ثم الحب الكتيييييييييييييييييير لجوزك ولبيتك كله بيعدى

[*أم رقية* 473]

معاكي حق ياأم محمد في الكلام اللي بتقوليه

فأيام الجواز الاولي فيهاالحلو والصعب بس مبتتنسيس وبتمني انها ترجع تاني وعلي فكرة انا بداتها عياط من اول لحظة بعد الفرح يعني طول الفرح كنت مبسوطة وفرحانة وحسة ان الليلة للتي وخلص الفرح وركبنا العربية واول ماوصلنا الشقة مقوليكيش كنت حسة اني في غربة وهموت ولوني البيت قريب اوى من ماما واول ماصاحبنا مسك ايدى عشان انزل من العربية ونطلع شقتناحسيت انه هيطلعني عشان يموتني ورجعت في دماغي بيتنا وماما وباباوانهرت وفرجت عليه الناس :wacko: بس في الاخر طلعوني وشوية اضحك وشوية اعيط وتاني يوم قمت مخضوضةودخلت الحمام وقفلتة عليه والباب مصدق مكنش عايز يتفتح بس ومن ساعتها خلاص بدات اتعود بس رعشة جسمي مسبتنيس يجي اسبوع :wacko: :wacko: :unsure:

[om_mohamed 0]

هههههههههه لا بقه ده انا طلعت شجاعة باين عليا انا الوحيدة اللى معيطش يوم فرحى ..زى مكون مصدقت اتجوز ولا ايه ..عموما والله احلى ايام وربنا يسعدك ويسعد جميع بنات المسلمين ويرزقهم بالازواج الصالحين والذرية الصالحة يارب

[المشتاقة للفردوس 0]

بارك الله فيكم والله الواحد بيستفيد من تجاربكم

بس ادعولي ربي يرزقني الزوج الصالح عاجلا وليس اجلا

لاني مش مخطوبة الي حد الان واملي اتزوج رجل مرفوع دكره في السماء والارض عاجلا وليس اجلا

ويحبني واحبه يارب

ولكل بنات اخوات طريق الاسلام ربي يرزقهم جميعا ازوج صالحين

امـــــــــــــــــــــين

تم تعديل 18 اكتوبر, 2007 بواسطة المشتاقة للفردوس

[دمعة فجر 0]

انا الوحيدة اللى معيطش يوم فرحى ..زى مكون مصدقت اتجوز ولا ايه

هههههههه يقطع شرك ياام محمد

اضحك الله سنك صدقيني انا مش خايفة خااااااااااااااالص حتي بؤل لخطيبي احنا بعد الفرح كل واحد يروح لبيت اهله :unsure:

ادعيلي ياام محمد ربنا ييسر اموري

 

تعرفي قبل شوية قرأت عن المشاكل الزوجية :cool: فؤلت انا مالي ومال حكاية الزواج :wink: ماانا قاعدة وساكتة ميتة علي الجواز من بدري ليه ما اعرفش :wacko:

 

انامعك انو الحياة هي الزوجة اللي تقدر تحددها مع زوجها بس الحياة الزوجية مسئولييييييييية كبيرة جدا

لااقول سوي اعانني الله عليها وهداني الي طريق الرشاد انا وخطيبي