اذهبي الى المحتوى

المشاركات التي تم ترشيحها

منور ة يا مبدعة

كده برضه تنسيني (أكيد سقط سهوا ^__^)

بامزح طبعا الواحد داخل ينسي الهموم ويخفف عن نفسه ويطبق درس سجودة

 

التعليق محتاج تركيز ان شاء الله لي عودة

 

بالله ماتزعلي يا قلبي

 

كله الازعلك

 

والله انتي لوجيتي عندي البيت تفطسي من الضحك

 

بكتب اسامي الاخوات وجزأ من تعليقاتهم في ورقة عشان ارد عليهم هههههههههههههه

 

معلش والله حقك عليا يا ام مريم

ولا يهمك يا جميلة

بس بحب أشوف كل ردوك علي الأخوات علشان ابتسم ربنا يسعدك يارب يا هوبة

مليش دعوه انا رديت مرتين فى ام فتحى تردي مرتين زيهم ^___^

أنت عارفة مريم أما تشوفك في أي موضوع تقول خالتو اللي بضحكك يعني أنت عالمية اهو افرحي بقي

 

ههههههههههههههههههههههههههههههههه

 

قوليها يا عيون خالتو اللي بتضحك يا مريومة

 

ربنا يخليهوملك ويباركلك فيهم حبيبتي اللهم آمين

شارك هذه المشاركه


رابط المشاركه
شارك

:)

متابعة وأحسن ماعجبني في القصة هو اجتماع أكثر من طبقة اجتماعية وثقافية في القصة

وهكذا هي الحياة كلما خالطنا فيها أكثر كلما رأينا مالم نتخيله

خصوصا البنت بعد زواجها

 

بورك قلمك هبة الحبيبة

شارك هذه المشاركه


رابط المشاركه
شارك

تررررررررررررررررررررن تررررررررررررررررررررررررررررررن

 

الو ايوة يا سهير يختي يا حبيبتي وحشتيني

 

ازيك يا مديحة

 

الحمدلله بخير

 

انا متصلة افرحك

 

خير يختي فرحيني . غيرتي سيراميك الحمام ؟

 

لأ يا مديحة . نسمة بنتي جالها عريس

 

لالالالالالالالالالالالالالالالالالالالالالالا ازغرط يا ولاد ولا اعمل ايه . ايه الخبر الحلو ده . اخيرا بعد طول انتظار . مين العريس ده

 

عريس ولا كل العرسان راجل غني ومريش

 

مريش ! عنده كام ريشة يعني

 

ريش كتير اوي اوي ما تعديش اصله تاجر دواجن

 

تاجر دواجن ! فرارجي يعني . وده معقول . ونسمة رضيت ؟

 

كفاية انا راضية . بقولك راجل غني غني اوي مش صدمان وكحيان ومش لاقي ياكل زي ابنك

 

طب يختي كتر خيرك . دي حاجة تفرحني لما اشوف نسمة بنت اختي مبسوطة . وده عنده شقة

 

عنده عمارة سبع تدوار ساكن فيها هو وطيوره

 

ويسكن فيها هو وطيوره ليه . هو مالوش أهل ؟

 

ليه اهل وعزوة وناس . عريس ملو هدومه .واخد دور في العمارة للفراخ ودور للبط ودور للوز ودور للارانب وسايب دور فاضي عشان ناوي يتاجر في المعيز

 

والدورين الاخرانين عاملهم فيلا

 

فيلا ايه يختي اللي تحتها زريبة دي . دا الواحد يخاف يروح يزورها لجدي ينطحه ولا فرخة تنقره . ابقى اباركلها بالتليفون

 

انا متصلة بيكي عشان اقولك هاتي فتحي وممدوح عشان يتفقوا مع المعلم فرج

 

يتفقوا معاه بصفتهم ايه

 

بصفتهم ولاد خالتها

 

بس دول مش عصب يا سهير . لازم ابوها واعمامها ولو مش موجودين يبقى حد من ولادهم لكن اهل امها ما ينفعوش

 

كدة برضو يا مديحة . انتي بتتخلي عني في وقت زنقة

 

يا حبيبتي دا شرع ودين . كلمي ابوها ولا خلي حد يكلمه . لكن احنا ماننفعش

 

تصدقي انا عارفة انك هتستندلي معايا زي عوايدك . روحي منك لله يا شيخة

 

استني يا سهير استني ماتقفليش . الله يسامحك يا سهير قفلت برضو . هو جوزك طلقك من شوية

شارك هذه المشاركه


رابط المشاركه
شارك

العواف يا ستي ام هببببببببببببببببببه

بكسر الباء

ههههههه

عجبتني ام فتحي لما اعترفت بغلطها

ودا المفروض اي واحده تغلط وعرفت كدا المفروض ما تكابرش وتعترف بيه ودا مش عيب خالص

 

يا عيني عليك يا نسومه

بس حلو الفرارجي

كل يوم هتاكل فراخ وبط على راي امها

هههههههههههههههههههههههههههههههه

شارك هذه المشاركه


رابط المشاركه
شارك

:)

متابعة وأحسن ماعجبني في القصة هو اجتماع أكثر من طبقة اجتماعية وثقافية في القصة

وهكذا هي الحياة كلما خالطنا فيها أكثر كلما رأينا مالم نتخيله

خصوصا البنت بعد زواجها

 

بورك قلمك هبة الحبيبة

 

ايه النور ده

 

ازيك يا ام عمر

 

فرحتيني بمتابعتك والله يا قمر

 

جزاكِ الله خيرا

 

طبعا حبيبتي اختلاف الطبقات ده لازم وجوده

 

لان فعلا الدنيا كدة

 

فيها ثقافات وبيئات وافكار مختلفة وبنتعامل مع الجميع

  • معجبة 1

شارك هذه المشاركه


رابط المشاركه
شارك

ما شاء الله عليك هبة الحبيبة =)

بالنسبة لأم نسمة لما عرفت انها مطلقة ذكرتني بأمي لما طلقها ابي وبصراحة لو لم يكن جدي الذي اعتنا بنا انا وأخواتي البنات لكنا في الشارع

لكن الحمد لله وبفضله لا ينسى عباده عشنا وكبرنا في بيت جدي ولما مات اوصى علينا خيرا رحمه الله رحمة واسعة

 

ولما اتخطبت انا واخوتي كان ابي معنا وقد حضر كتب كتابنا

  • معجبة 1

شارك هذه المشاركه


رابط المشاركه
شارك

العواف يا ستي ام هببببببببببببببببببه

بكسر الباء

ههههههه

عجبتني ام فتحي لما اعترفت بغلطها

ودا المفروض اي واحده تغلط وعرفت كدا المفروض ما تكابرش وتعترف بيه ودا مش عيب خالص

 

يا عيني عليك يا نسومه

بس حلو الفرارجي

كل يوم هتاكل فراخ وبط على راي امها

هههههههههههههههههههههههههههههههه

ههههههههههههههههههههههههه

 

كفر ابو نعجة في صفحة تانية

 

الله يعافيكي يختي هههههههههههههههههه

  • معجبة 1

شارك هذه المشاركه


رابط المشاركه
شارك

ما شاء الله عليك هبة الحبيبة =)

بالنسبة لأم نسمة لما عرفت انها مطلقة ذكرتني بأمي لما طلقها ابي وبصراحة لو لم يكن جدي الذي اعتنا بنا انا وأخواتي البنات لكنا في الشارع

لكن الحمد لله وبفضله لا ينسى عباده عشنا وكبرنا في بيت جدي ولما مات اوصى علينا خيرا رحمه الله رحمة واسعة

 

ولما اتخطبت انا واخوتي كان ابي معنا وقد حضر كتب كتابنا

رحم الله جدك رحمة واسعة اللهم آمين

 

حضور والدك ده تطبيق للشرع الحمدلله

 

سمعت كثيرا عن مطلقات يتعنتن عند زواج بناتهن ولا يخبرن والدهن

 

وللاسف فعقود زواجهن باطلة لعدم حضور ولي للزوجة

 

اسعدني وجودك حبيبتي ام هالة

شارك هذه المشاركه


رابط المشاركه
شارك

مبدعة ياهوبه كعادتك تسلمى ياغالية ....فعلا زوجة الابن لابد انها تسمع وتطنش لانها لو وقفت على كل كلمه مش هتخلص وهتجيب المشاكل ووجع القلب لنفسها .احيى نموذج الام الرائعه ام مروة فعلا انسانه طيبة وكلها ذوق وبتوجه بناتها لما فيه سعادتهن وبمعاملتها الحسنه قدرت تغير ام فتحى من ناحيتها عقبال ماتتغير للاحسن مع مروة ياااااااااااااارب .بجد مروة دى اصيله ومتربيه لانها بتستحمل كتيييييييييييييييير ربنا يصبرها .

شارك هذه المشاركه


رابط المشاركه
شارك

 

 

اهلا سندوسة قلبي منوراني حبيبتي

 

بحس انك بتقري افكاري بجد

 

مين قالك اني ناوية اقدم نموذج الحماة الطيبة في صورة ام احمد هههههههههههه

 

هتجننيني يا بنت انتي ههههههههههههه كأنك عايشة في عقلي وشايفة اللي بيدور فيه

 

طب ايه رأيك هغير الخطة واخليها شريرة عشان تبطلي تقري افكاري ههههههههه

 

 

 

لا خلاص هبطل التوقعات دى اللى هتخليكى تغيرى الافكار

الواحد بيفرح لما بيلاقى حموات زى ام مروة وام احمد بيدونا امل ان الحموات لسه بخير ههههههههههه

كفايه علينا ام فتحى

واللى شكلها زيها ام فرج الفرراجى ههههههههههههههههههههه

متابعين معك يا قمر

شارك هذه المشاركه


رابط المشاركه
شارك

كنتي بتكلمي مين يا امي

 

خالتك سهير . نسمة جالها عريس

 

عريس ! اخيييييييييييييييييييييييييييييييرا الحمدلله . وبيشتغل ايه

 

فرارجي بتاع فراخ

 

هههههههههههههههه وده هيقعدها في شقة ولا في تقفيصة ههههههههههههه

 

بقولك ايه يا واد انت انا مش ناقصاك

 

هههههههههههههه اصل مش متخيل ان نسمة اللي طالعة فيها ومناخيرها في السما دي تتجوز فرارجي

 

ايوة ماهو انت لا منك ولا كفاية شرك . يعني رفضت تتجوزها وكمان لما يجيلها عريس تتريئ عليه

 

يا ستي انا هتريئ عليه ليه يعني . انا عندي واحد صاحبي وابوه فرارجي عادي يعني الشغلانة مش عيب . العيب انه يكون مش مناسب ليها

 

كانت عايزاك تروح تتفق معاه انت وممدوح وانا قولتليها ما ينفعش لازم ابوها او حد من العصب

 

ماشاء الله عليكي يا ست الشيخة ام فتحي هههههههههه عرفتي الكلام ده منين

 

من الشيخ في برنامج الفتاوى

 

فعلا البرامج دي مفيدة جدا وبتعلم الناس ازاي يطبقوا الدين في كل مواقف الحياة

 

بس خالتك ماعجبهاش الكلام وقفلت السكة في وشي

 

ههههههههههههه دا العادي بتاع خالتي . مافيش مكالمة بتنتهي بينكو الا بالطريقة دي

 

فين الست هانم مراتك . مش هتغدينا السنة دي ولا نستنى السنة الجاية

 

 

هدخلها المطبخ

 

اياك تساعدها ولا تشيل معاها طبق فاهم ولا لأ

 

 

 

 

 

 

 

خلصتي يا مروة

 

ايوة يا حبيبي حالا هحط الاكل ع السفرا

 

نسمة جالها عريس

 

معقول . طيب الحمدلله انها هتشيلك من دماغها

 

بس تخيلي هيجوزوها للفرراجي

 

ايه ده . ليه كدة . طب هو متعلم

 

ما اعتقدش

 

طيب ازاي مامتها توافق وهي ازاي توافق

 

شكلها مضطرة تقبل عشان قلة العرسان

 

يا عيني ! والله رغم اني مش بحبها وخصوصا لما عرفت انها عايزة تلطش جوزي حبيبي بس صعبت عليا خالص . المفروض ترفض وتستنى الزوج المناسب

 

مالناش دعوة يا حبيبتي كل واحد حر في حياته

 

 

يا مروووووووووووووووووووووووووووووووووووووووووووووووووة الغدا فين . دا ايه وجع القلب ده

 

يا مامي اوعى يا فتحي خليني احط الاكل ع السفرا بسرعة انا مش عايزة اتنكد

 

ههههههههههههه يا جبانة

 

 

 

 

 

 

 

 

 

 

 

 

 

يااااااااااااااااااااااااه يا فتحي تعبت تعب النهاردة . شغل البيت هد حيلي

 

حبيبتي

 

نعم

 

بحبِك

 

بحبك يا حبيبي

 

وحشتيني

 

وحشتني

 

طيب ما .......................

 

يا فتحييييييييييييييييييييييييييييييييييييييييييييييي يابني تعالى شوف الدش مش عايز يشتغل ليه

 

يووووووووووووه هو ده وقته يا امي . الواحد مايعرفش يقول لمراته كلمتين حلوين

 

اخرج يا فتحي روح كلم مامتك . بتتعامل معاك زي ماتكون راجل مش متجوز وليك ست وليها حقوق

 

يا فتحييييييييييييييييييييييييييييييييييييييييييييييييييييييييييييييييييييييي انت نمت ولا ايه تعالى شوف الدش عايزة اتفرج ع المصارعة الحرة مش عارفة

 

حااااااااااااااااااااضر يا امي حاضر استغفر الله العظيم

 

 

 

 

خير يا امي

 

القناة بتاعة المصارعة مش شغالة

 

يا امي شوفي قناة تانية

 

بحب اتفرج ع المصارعة قبل ما انام والا ما يجليش نوم

 

حاضر يا امي

 

شكل الدش عايز يتظبط من فوق السطح

 

طب اطلع اظبطه

 

يا امي الوقت اتأخر يا حبيبتي . بكرة بعد مااجي من الشغل هطلع اظبطلك الدش

 

لا اطلع دلوقتي ولو بتخاف من الضلمة خد معاك شمعة

 

ولا شمعة ولا غيره حاضر هطلع

 

 

 

 

 

 

ايه يا امي قناة المصارعة اشتغلت . امي

 

أخخخخخخخخخخخخخخخخخخخخخخخخ

 

انتي نمتي يا امي . . طب اما ادخل الحق مروة

 

 

مروة حبيبتي انا جيت

 

ايه ده انتي كمان نمتي يا مروة . الله يسامحك يا امي الله يسامحك

  • معجبة 4

شارك هذه المشاركه


رابط المشاركه
شارك

ابدعتى ياهوبه

بس كله كوم وام فتحى تتكلم بالشرع كوم تانى

طب كانت فين البرامج دى من زمان كانت رحمت مروه منها شويه هههههههههه

مش مشكله بدايه الغيث قطره هههههههههه

شارك هذه المشاركه


رابط المشاركه
شارك

ترررررررررررررررررررررررن تررررررررررررررررررررن

 

الو

 

ايوة يا سي منصور

 

مين بيتكلم

 

طليقتك

 

ايه ده انتي لسة عايشة

 

عايشة غصب عنك

 

ازيك يا سهير وازي الواد

 

واد مين يا راجل انت ؟

 

ابننا يا سهير . هو في سنة كام دلوقتي

 

يا راجل انت انا مخلفة منك بنت مافيش غيرها مش واد

 

اااااااااااااااااه ايوة ايوة افتكرت . كان اسمها ............... مش فاكر . باين كان اسمها سوسن . هو كان اسمها فيه حرف السين مش عارف اوله ولا اخره

 

اسمها نسمة يا سي منصور . طبعا ماانت ليك حق . خلفتها ورميتها

 

هو انا رميتها في الشارع . ما انا سايبهالك تربيها

 

سايبهالي من غير ولا مليم . وبقيت ابيع في دهبي حتة حتة ولولا اختي مديحة ما كنتش عرفت اصرف عليها ولا اربيها

 

يا حفيظ عليكي وعلى سواد قلبك يا سهير . انسي بقى الماضي وجراحه . هي البت في سنة كام

 

بنتك اتخرجت من الجامعة من ست سنين

 

ماشاء الله . واتجوزت ولا لسة

 

ماهو انا متصلة بيك عشان كدة

 

لا بقولك ايه انا مامعيش فلوس اجهز الله يرضى عليكي انا راجل صاحب عيال

 

وهي دي مش بنتك زيهم برضو . على العموم مش عايزين منك حاجة . عايزينك بس تيجي تتفق مع عريسها وتحضر كتب الكتاب

 

اذا كان كدة ماشي اجيلكو على عنية

 

 

مستنينك بكرة الساعة سبعة

 

ان شاء الله يا ام نسمة مع السلامة

 

 

 

 

 

 

 

كنت بتكلم مين يا منصور

 

بكلم سهير طليقتي

 

يا سلام ! ودي ايه اللي فكرها بيك ان شاء الله . عايزة ترجع المية لمجاريها ولا ايه

 

يا ستي لا مية ولا مجاريها . اصل البت جالها عريس وعايزيني عشان كدة

 

ايوة ايوة فهمت . اكيد متصلة بيك عشان تدفع فلوس الجهاز . والله يا منصور لو دفعت مليم في الجوازة دي لكون لامة هدومي وواخدة العيال ورايحة عند اهلي ومش هتشوف وشي تاني

 

انا ولادي اولى بالفلوس دي . طليقتك وبنتها مالهومش عندنا حاجة

 

ومين قالك يا كريمة اني هتدفع حاجة . انا هروح امضي على العقد واجي . مسافة السكة يعني

 

مش مصدقاك . انا هروح معاك عشان اشوف بنفسي

 

بقولك ايه لو جيتي يبقى انتي الجانية على نفسك . وقسما بالله لو سهير مدت ايدها عليكي ما هحوش عنك . اصل انتي ما تعرفيش سهير . ست مفترية وايدها طرشة

 

وانت عرفت منين ان ايدها طرشة . شكلها كانت قايمة معاك بالواجب يا سيد الرجالة

 

فشر . انتي بتقولي ايه . ان عمري ما اضربت الم من سهير الا ورديتهولها . انا ما اضربش واسكت . كنت باخد حقي في ساعتها

 

انا كنت اخد منها الروسية ادوخ واقع في الارض لكن اقف تاني على رجلي اقوى من الاول وكنت ابصلها بكل قوة واقولها منك لله هتروحي من ربنا فين يا مفترية

 

ولا كان بيهمني منها . عشان تعرفي ان جوزك اسد يا كريمة

 

ماشاء الله عليك يا غضنفر . بس برضو هروح معاك . انا كمان زيك ما بخافش من سهير

 

 

الله يرحمك يا كريمة يا حبيبتي

شارك هذه المشاركه


رابط المشاركه
شارك

هههههههههههههههههههههههههههههههههههههههه

كريمة

اسم مش على مسمى خالص

مشكله كبيره ومتواجده في مجتمعنا بكثره الراجل الي يجيب اولاد ويرميهم

ولا بيسال فيهم ولا يعرف عنهم اي حاجه

 

الله المستعان

شارك هذه المشاركه


رابط المشاركه
شارك

هههههههههههههههههههههههههههههههههههههههههههههههههه

 

نكته

بالدات ابو نسمه ده هههههههههههههههههههههههههههههههههههههههههههه

جزاكِ الله خيرا يا هبه

 

متابعه معاكِ

شارك هذه المشاركه


رابط المشاركه
شارك

يا سارة

 

سارة

 

نعم يا هاجر

 

تفتكري البس ايه لكتب الكتاب

 

يا بنتي ماعندكيش اي حاجة مناسبة . تعالي ننزل نشتريلك فستان جديد . وفرصة انا كمان بالمرة اجيب فستان جديد ههههههههه

 

هههههههههه ان شاء الله تجيبي فستان فرحك قريب يا سارة

 

ربنا يخليكي يا هجورة . الف مبروك يا حبيبتي

 

الله يبارك فيكي يا اختي يا حبيبتي . اعملي حسابك هتلفي معايا ع المحلات الايام الجاية عشان اشتري هدوم كتير للسفر وحاجاتي الخاصة

 

طبعا يا حبيبتي . اومال مين يعني هينقيلك هدومك غيري

 

ربنا مايحرمنيش منك يارب يا سارة

 

 

 

 

 

 

 

 

يلا يا فتحي جهزت ولا لسة

 

حالا اهو يا مروة

 

هي ماما لبست ولا لسة هنتأخر على كتب الكتاب

 

يا ماما لبستي ولا لسة

 

ايوة انا جاهزة اهو . رغم ان رجلي وجعاني ومش قادرة بس هروح عشان خاطر امك جاتلي لحد هنا

 

يعني عشان خاطر ماما لوحدها . هو انا ماليش خاطر عندك

 

بصراحة ما لكيش . بس زي بعضه امك تستاهل كل خير

 

الله . ايه الكلام الحلو اللي بتقوليه على ماما ده

 

بصراحة امك تغلب الواحد بذوقها وطيبة قلبها . مش عارفة انتي طالعة عقربة لمين

 

 

 

 

لووولوووووووووووووووووووووووووووووووووووووووووووووووووولييييييييييييييييييييييييييييييييي

 

 

لوولوووووووووووووووووووووووووووووووووووووووووووووييييييييييييييييييييييييييييييييييييييييييييييييييييييييي

 

 

 

الف مبروك يا هاجر الف مبروك يا احمد

 

الف مبروك يا عرسانا يا حلوين

 

الله يبارك فيكو يا جماعة

 

 

مبروك يا هجورة

 

الله يبارك فيكي يا سارة عقبالك يارب

 

مبروك يا هجورتي

 

الله يبارك فيكي يا مروة يا اختي

 

هي فين ماما

 

قاعدة بتعيط على جنب اهيه ههههههههههههه

 

يا عيني . هي بتعيط عشان ايه بالظبط . عشان انا اتجوزت ولا عشان هسافر واسيبها

 

 

 

ماما حبيبتي انتي سايبة المعازيم لوحدهم ومارحبتيش بحد

 

حاضر حاضر يا مروة انا جاية حالا

 

بتعيطي ليه بس ياماما . كدة هاجر هتتنكد

 

هي مين دي اللي هتتنكد يا مروة . بصي كدة على هاجر نازلة ضحك وهزار مع عريسها وناسية الدنيا بللي فيها هههههههههههه

 

هههههههههههه اه والله على رأيك يا سارة . شوفتي بقى يا ماما انتي اللي متنكدة لوحدك

 

ربنا يهنيها ويسعدها يارب

 

يارب يا ماما

 

 

 

 

 

 

 

 

مبروك يا ابو حميد

 

الله يبارك فيك يا فتحي ربنا يخليك

 

 

 

 

 

فين عروسة ابني الغالية . مبروك يا هاجر يا حبيبتي

 

الله يبارك فيكي يا طنط

 

ماما . قوليلي ماما . ولا انتي مش معتبراني زي ماما

 

لأ ازاي بقى يا طنط ههههههههه قصدي يا ماما

 

اتفضلي يا حبيبتي . الخاتم دي هديتي ليكي . يارب ذوقي يعجبك

 

الله . جميل اوي اوي يا ماما ذوقك حلو خالص

 

بصي بقى انتي خلاص بقيتي بنتي واخت لمريم . تعالي يا مريم سلمي على عروسة اخوكي

 

مبروك يا هاجر الف مبروك

 

الله يبارك فيكي يا مريم

 

انتي امورة خالص يا هاجر

 

انتي احلى يا حبيبتي ربنا يخليكي

 

 

ايه ده . ايه يا جماعة سيبولي عروستي شوية مش عارف اتهنى بيها ههههههههههههه

 

ههههههههههههه ماشي يا سيدي الف مبروك

شارك هذه المشاركه


رابط المشاركه
شارك

عسسسسسسسسسسسسسسل ياهوبه

كله كوووووووم وابونسمة كوم تانى ههههههههههههههه

وبعدين هى نسمة دى مش بنته والمفروض يجهزها برضه

شارك هذه المشاركه


رابط المشاركه
شارك

سارة

 

نعم يا ماما

 

معلش يا حبيبتي اختك مروة النهاردة عايزة تنضف الشقة وانتي عارفة هاجر مشغولة وبتجهز للسفر . ممكن تروحي لمروة النهاردة

 

طبعا ياماما . يعني تفتكري هتخلى عن اختي

 

ربنا يخليكو لبعض يارب ويفرح قلبي بيكي عن قريب زي اخواتك يا حبيبتي آمين

 

 

 

 

 

 

 

 

اهلا سارة ازيك يا حبيبتي

 

 

الله يسلمك يا مورا انا كويسة ربنا يخليكي

 

معلش هتعبك معايا .

 

لا يا حبيبتي مافيش تعب ولا حاجة

 

 

ميييييييييييييييييييييييين اللي جه برا يا مروة

 

دي سارة اختي

 

سارة اختك . هو انتو كام اخت

 

 

ازيك يا سارة

 

ازيك يا طنط ام فتحي

 

هو في حد من اصحاب فتحي عايز عروسة وجي النهاردة ولا ايه

 

اشمعنى يا ماما

 

اومال اختك جاية ليه

 

اووووووووف جاية تساعدني في شغل البيت

 

ايوة زي زمزم برضو ماجت تساعدك وخطفت الواد من ع الباب . طب اياك تكونوا بتضحكو علية وجايبين عريس النهاردة

 

جرا ايه يا طنط . شايفاني بايرة وجاية ادور على عريس ولا ايه

 

بس يا سارة الله يكرمك مش عايزين مشاكل

 

طب خديني في حتة تانية غير اللي قاعدة فيها الست دي عشان مش طايقاها

 

طب وطي صوتك هتودينا في داهية

 

انتي مستحملة الست دي ازاي

 

نصيبي هعمل ايه

 

 

 

يا اسمك ايه يا سارة لمعي الموبيليا كويس . وامسحي الارضيات وحطي مسحوق في المية عشان السيراميك يلمع

 

حاضر يا طنط حاضر . دي بتعاملني على اني شغالة عندها

 

معلش حقك عليا

 

 

 

 

 

يلا يا مروة عشان اساعدك في الطبيخ قبل ما امشي

 

تعالي يا حبيبتي

 

انتي هتعملي ايه النهاردة

 

هعمل ملوخية . انا هقطفها وهديكي المخرطة عشان تخرطيها

 

ايه ده ايه ده يابنتي ليه العذاب ده كله . ماتجيبي الملوخية جاهزة من السوبر ماركت وتتحط في الشوربة من غير وجع القلب ده

 

ههههههههههههه احنا بنحبها فريش

 

طيب وليه المخرطة . انتي مش عندك كيتشن ماشين يابنتي

 

ايوة عندي طبعا بس بحب اخرطها بالمخرطة

 

ياربي عاملة زي ماما ربنا موسع عليها وعندها اتنين كيتشن ماشين وتحب تخرط الملوخية بالمخرطة . دانتوا عيلة كلاسيك اوي واللي زيكو انقرضوا

 

ههههههههههه طب يلا يا ام لسان طويل خلصيني

 

 

يا مروووووووووووووووووووووووووووة الغدا خلص ولا واقفة ترغي انتي واختك

 

سكتي الست دي لحسن اروح اخنقها

 

ههههههههههه بقولك ايه انا هروح الم هدومي واجي معاكي عشان شكلي هطرد بسببك النهاردة

 

 

 

 

 

 

 

انا ماشية بقى يا مروة

 

طيب ادخلي سلمي على حماتي

 

واسلم عليها ليه يعني

 

معلش ماتحرجنيش معاها

 

 

 

جود باي يا طنط انا ماشية

 

انتي خلصتي اللي وراكي

 

ايوة خلصت وطبخت كمان

 

وده تنضيف برضو تنضفيه . دا البلاط زي ماهو ولا كأن جت عليه نقطة مية . دي زمزم بتنضف احسن منك

 

استغفر الله العظيم . معلش استحمليني لحد مامروة تبقى كويسة وتقدر تعمل حاجتها بنفسها

 

يعني هي مروة اللي نضيفة اوي . جاتكو خيبة تخيبكو انتو الجوز

شارك هذه المشاركه


رابط المشاركه
شارك

ههههههههه عسل يا هوبة

 

وكأني اتفرج على مسلسل لكن مش اي مسلسل حلال مئة بالمئة ههههههههههههههه

 

ربي يزيدك ابداع

 

متابعات معك =)))

شارك هذه المشاركه


رابط المشاركه
شارك

عجبتني شخصية سارة بصراحة

هي صحيح لسانها شوي بدو ضبط

بس بحب الشخصية القوية متلها : ))

 

>> لا تحوليلنا ع شي تاني , خليكي مع نسمة وطنط سهير , بدي أعرف آخرتها مع نسمة رح تتزوج ولا لأ : )

شارك هذه المشاركه


رابط المشاركه
شارك

ههههههههه عسل يا هوبة

 

وكأني اتفرج على مسلسل لكن مش اي مسلسل حلال مئة بالمئة ههههههههههههههه

 

ربي يزيدك ابداع

 

متابعات معك =)))

وأنا

كمان .

ربي يزيدك ابداع يا هوبة

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×