اذهبي الى المحتوى
هبة عبد العظيم نور

مراتي في السبعيناااااااااات

المشاركات التي تم ترشيحها

بارك الله فيك حبيبتي على تكملة المسلسل

كنت ساعلق على الحلقات لكن مش قادرة والله فقد جاءني خبر وفاة ابنتة اخت زوجي اليوم وهي مازالت رضيعة

لهذا دخلت لأرد عليك وان شاء الله اعلق فيما بعد

لكني متابعة معك حبيبتي =)

شارك هذه المشاركه


رابط المشاركه
شارك

بارك الله فيك هبة الحبيبة ()

نتابع معك بإذن الله

شارك هذه المشاركه


رابط المشاركه
شارك

:)

هو أنا مش بخجل إذًا ليه؟ ذذذ

متااابعة

  • معجبة 1

شارك هذه المشاركه


رابط المشاركه
شارك

متشوقين للتكمله ياريت ماتتاخريش علينا بحلقاتك الممتعه

شارك هذه المشاركه


رابط المشاركه
شارك

رائع يا هوبة اللهم بارك

واقع محزن للأسف ومازال هناك الكثير من هذه الأصناف

الله المستعان

 

متابعة معكِ حبيبتي بإذن الله

شارك هذه المشاركه


رابط المشاركه
شارك

صباح الفل والسعادة ع السادة الموظفين المحترمين ايوا جااااااااااااااي تطلبوا ايه يا بهوات

 

والله جيت في وقتك يا عم سرور . هاتلي سندوتشين طعمية وسندوتشين فول وسندوتش بطاطس بالمخللات بتاعتهم

 

يا سلااااااااااام واشمعنى سندوتش واحد بطاطس يا مدام اعتماد

 

عشان ما اكترش نشاويات واتخن

 

تتخني ايه يا ست اكتر من كدة .. الله يكون في عون اتوبيس الشركة اللي هتجيبي اجله

 

بتقول ايه يا عم سرور

 

بقول حاضر من عنيا يا ست اعتماد . هجيب السندوتشات والمخللات اللي هتفتح نفسك المسدودة

 

 

وانت يا استاذ مختار اجيب لحضرتك ايه

 

هاتلي كوباية شاي ع الحساب يا عم سرور والله يباركلك لفلي على المكاتب اشحتلي الجورنال من أي زميل محترم

 

شاي ع الحساب وكمان اشحتلك جورنال تقراه ! مش عايزني ادفعلك ايجار الشقة من جيبي كمان ؟

 

ياريت والله يا عم سرور . تبقى راجل جدع . حكم الميزانية خرمت ع الآخر

 

 

وانتي يا مدام رتيبة

 

ما ليش نفس ماليش نفس اووووووووووووووووووف

 

لا اله الا الله بتنفخي ليه ع الصبح

 

اتخنقت يا عم سرور ارفت من الراجل ومن الدنيا ومن العيشة الهباب والعيال اللي عايزين قطم رقابيهم

 

ربنا يهديلك الحال يا مدام رتيبة والله قعدتكو في بيوتكو احسن من الاصطباح بخلقكو . ال ستات تشتغل ال . وياريتكو بتشتغلوا من اساسه

 

بتقول ايه يا عم سرور مش سامعة

 

بتكلم في سري عن اهمية دور المرأة العاملة يا ست الاستاذة رتيبة

 

 

 

 

هو الاستاذ عليش لسة ماجاش ؟

 

ايوة . تلاقي المواصلات اخرته كالعادة . والمدير زمانه جاي واكيد هيخصمله

 

 

 

صباح الخير يا اساتذة

 

المدير المدير اقفوا يا جماعة

 

صباح النور يا فندم

 

اخبار الشغل ايه ومصالح المواطنين الشرفاء

 

بخير يا فندم العمل يجري على قدم وساق للنهوض بالمصلحة ورفع اسمها عاليا خفاقا

 

في ايه يا استاذ مرتضى . انت بتقول خطبة في الإذاعة في عيد العمال ولا ايه !

 

يا فندم انا بطمن حضرتك على مصالح المواطنين

 

اتفضلوا اقعدوا

 

فين الاستاذ عليش . مش على مكتبه ليه ؟؟؟؟؟؟

 

 

 

يااااااااااااااااااااااااا يقطع المواصلات وزحمة المواصلات واللي عايزين يركبوا مواصلات الواحد كأنه كان بيحارب مش راكب اتوبيس

 

 

انت جيت يا محترم ؟ مالسة بدري

 

ححححححضرة المدير . صباح الخير يا فندم

 

قول مساء الخير . الساعة 8 ونص صباحا ومعادك سبعة ونص

 

يا فندم والله المسافة بعيدة والمواصلات زفت ع الصبح

 

انتقي الفاظك يا محترم . زفت وقطران وهباب والالفاظ دي ما تتقالش في المصلحة عندي

 

حاضر يا فندم . اقصد المواصلات كانت في منتهى الجمال والراحة الواحد طالع والكمسري واقف ع الباب مبتسم وبيفرق ورد ع الركاب . الواحد راكب الاتوبيس وقاعد في الكرسي بتاعه كأنه قاعد في جنينة والعصافير عمالة تزقزق حواليه وناقص يفرقوا علينا ازايز مية معدنية وعصير

 

ماشاء الله . شيء عظيم . ولما المواصلات جميلة بالشكل البديع ده . اتأخرت ليه يا محترم

 

انا اسف يا فندم

 

واصرفها منين اسف دي . مخصوم منك تلات تيام عن اذنك . موظفين يثيروا الاعصاب

 

كدة ! طب مواصلات زفت ومصلحة زفت ومدير مهبب بهباب

 

 

بس يا استاذ عليش لحسن يسمعك

 

ما يسمع . هيعمل فيا ايه تاني . المرتب وخلصهولي خصومات ولغالي الحوافز والمكافآت ايييييييييييييييه هما هيذلونا باللي بنقبضهم

 

 

خلاص بقى يا استاذ عليش . قوليلي يا مدام رتيبة

 

نعم يا مدام احسان

 

هي الطماطم غليت ولا ايه حكايتها

 

اسكتي يا حبيبتي . جايبة كيلو بتلاتين قرش امبارح

 

يا لهوي . تلاتييييييييييين قرش انا جيباها اول امبارح بريال

 

ماعادش يا حبيبتي . غليت وخدت البطاطس في سكتها وهي طالعة . جايبة كيلو البطاطس بربع جنيه

 

لالالالالالالالا دي مش عيشة . الواحد هيلاحق على ايه ولا ايه . احنا ناكل مسلوق في مسلوف بلا طبيخ بلا كلام فاضي

 

 

على قولتك يا حبيبتي . ما تاخدي تقمعي معايا شوية البامية دول

 

بامية ؟ انتي مش هتبطلي تجيبي معاكي الخضار تنضفيه في المصلحة

 

 

يا حبيبتي اعمل ايه . انا بوصل يادوب قبل جوزي بساعة اروح يادوب عاملة الصلصة ورمية فيها حبة الخضار اللي منضافهم

 

على مايجي الراجل يكونوا استوا . نغرف وناكل

 

والله شاطرة بتطبخي لجوزك . انا جوزي ما داقش الطبيخ بقاله شهرين . كل يوم بناكل سلامون

 

 

 

انتي هتقوليلي ع السلامون يا مدام احسان . انا مراتي هرياني سلامون لما الواحد خلاص قرب يطلعله زعانف ويغطس في البحر

 

 

 

 

 

 

 

 

 

 

السلام عليكم يا سادة يا افاضل

 

والله يا استاذ مرتضى الستات معذورة . هنعمل ايه . ماهي مراتك موظفة زينا كتر خيرها هتلاقيها منين ولا منين

 

 

السلام عليكم يا محترمييييييييييييييييين

 

والله بعذر يا مدام اعتماد بس برضو الواحد بيحن لطبق خضار وحتتين لحمة

 

 

ربنا يرزقك ويرزقنا

 

تعيش يا استاذ مختار

 

يا ساااااااااااااااادة يا افاضل اووووووف وبعدين بقى في الجماعة الموظفين دول . عايز اخلص ورقي وامشي ماحدش بيرد علية كأنهم مش شايفني

 

 

بقولك ايه يا مدام احسان . انا عاجبني اوي اوي التايير لجديد بتاعك ده . انتي شرياه بكام

 

 

بسبعتاشر جنيه بعد الخصومات

 

يا استاذة حراااااااااااااااااااام عليكو حد يرد علية يا ناااااااااااااااااس

 

لالالالالا كتير اوي اوي اوي . انا افصل احسن ما اشتري جاهز

 

يا ناااااااااااااااااااااس

 

ما تعرفيش خياطة كويسة

 

 

انا اعرف يا جماعة . المدام بتاعتي شاطرة في التفصيل اوي وممكن تخدمكو

 

 

صحيح يا استاذ عليش

 

 

ايوة طبعا وهخليها تخفضلكو في الاسعار

 

 

يا ناااااااااااااااااااااااااااااس

 

والله يبقى جميل مش هننساه

 

انتووووووووووووووووو يا خلق هوووووووووووووووووووووووووووووووووووووو

 

 

ايه يا راجل انت سورت ودني بتزعق ليه . احنا ناقصينك؟

 

يا ناس حرام عليكو اتقوا ربنا في مصالح الناس . الواحد جاي من اخر الدنيا وانتوا مش مقدرين ولا عندكو احساس

 

 

الراجل ده بيشتمنا ولا ايه يا مدام رتيبة

 

ايوة يا حبيبتي بيشتمنا . بيتعدى على موظفين محترمين بالاقوال المهينة والمشينة اثناء تأدية اعمالهم الجليلة

 

 

جليلة مين يا ست انتي . واحد فيكو ماسك جورنال والتاني بيشتكي من السلامون اللي مراته بتطفحهوله

 

وواحد بيجيب لمراته الخياطة زباين والستات اللي ماسكالي ودن التانية بيتكلمو في البطاطس والطماطم

 

واللي بتتكلم في التايير الجديد والللي قاعدة تقمع بامية واحنا نتحرق بقى !!!!!!!!!!!!!!!!!!

 

 

جرا ايه يا عزيزي المواطن . ابتسم انت في مصلجة حكومية .

 

 

لو سمحتي امضيلي الاوراق دي خليني امشي يا مدام

 

اوراق ايه دي

 

اوراق جواز السفر بتاعي خليني اغور من البلد دي

 

ورينا يا سيدي اوراقك عشان تغور

 

اتفضلي اوووووووووووف اخيرا

 

 

ايه ده ايه ده الاسم مش واضح والختم اللي في الورقة دي مش واضح

 

يعني اعمل ايه

 

قطع الورق واعمل غيره وتعالى الاسبوع الجاي مع السلامة . ايوة يا مدام اعتماد كنا بنقول ايه

 

مش اختي اتخانقت مع جوزها

 

 

يا مداااااااااااااااااااااااااااااام خليكي معايا

 

لا حول ولا قوة الا بالله . ليه كفالله الشر ايه سبب الخناقة

 

بسبب امه طبعا

 

 

قطعوا الحموات اللي عاملين زي العقارب بورييييييييه يختي منهم بورررررررررررريه

 

يا ست يا بتاعة بوريه انتي اتوسل اليكي عايز اساااااااااااااااااااااااافر عايز اساااااااااااااااااافر

 

وانا مالي يا استاذ ما تسافر . شايفني واقفالك على باب الطيارة بشدك من قفاك

 

 

اسافر ازاااااااااااااااي لازم تمضولي الاوراق الاوراااااااااااااااق حرام عليكو

 

يا دي الاوراق اللي محيراك . بقولك ايه طلبك مش عندي

 

 

اومال عند مين

 

فوق

 

فوق فين

 

عند مدام محاسن او مدام فوقية . هما دول اللي هيفيدوك ويمضولك ورقك حل عن سمانا بقى .

 

 

 

 

ماكنتي تقولي كدة من الصبح . داهية تاخدكو

 

 

 

 

 

 

ااااااااااااااااه ياني ااااااااااه الواحد مش طايق نفسه ولا طايق يشتغل يا فوقية يختي . الحمل تاعبني اوي

 

 

ربنا يقومك بالسلامة يا حبيبتي . انتي في الكام يا محاسن

 

في الخامس في الخاااااااااااااااااااامسسسسسسس خمسة خمسة خمسة

 

جرا ايه يا حبيبيتي بقالي تلات شهور اسألك انتي في الكام تقوليلي في الخامس . هحسدك على ايه يا حبيبتي هو انا ناقصة عيال

 

فهمتيني غلط يا اختي

 

السلام عليكم

 

يا مرحب خير

 

 

لو سمحتي عايز امضي الاوراق دي

 

اوراق ايه دي . اوعي تكون اوراق مش نضيفة عشان بأرف

 

لا يا ستي نضيفة وابوس ايدك امضيها

 

واشمعنى انا يعني ما تروح لمدام محاسن

 

 

اوووووووووف هي اللي هناك دي ؟

 

هي ان شاء الله . بس الحقها قبل ما تنام

 

 

مدام محاسن من فضلك امضيلي الاوراق دي عشان عايز اسافر

 

هتسافر !. هتسافر فين ؟

 

هسافر الكويت

 

ماشاء الله . ماتعرفش تجيب عقد لابراهيم اخويا ينوبك ثواب ؟

 

يا ست ابراهيم مين .امضيلي الورق خليني امشي

 

وريني يا سيدي . هخدمك مع اني حامل والمجهود خطر عليا . ايه ده ايه ده يا فندي يا محترم

 

في ايه يا مدام محاسن

 

انت اسمك عدلية ؟ ازاي راجل واسمه عدلية !!!!!!!!

 

يا هانم اسمي عدلي عدلي . عدلية ازاي بس

 

اومال ايه التاء المربوطة دي

 

يا ستي مش تاء مربوطة دي الميم بتاعة اسم ابويا . اسمي عدلي محمود بس الاسمين لزقين جنب بعض

 

لالالالالالا ما ينفعش يا استاذ اوراقك مش سليمة . انزل تحت

 

تحت فين . يا ست انا نزلت تحت قالولي اطلع فوق

 

هما مين دوووووووووووول اللي عدموا الانسانية والضمير اللي بيرموا شغلهم علينا

 

مدام اعتماد قالتلي اطلع فوق

 

اعتماد !!!!!!!!!!! والله لنزلها اطين عيشتها .عمالة تبعتلنا في بلاوي طول النهار عشان تفضي للرغي والدش مع الاوغاد اللي تحت

 

 

يا استاذة استني استنييييييييييي يا ناس حرام عليكو

 

 

بقولك ايه يا استاذ . الساعة داخلة على اتنين بعد الضهر ومواعيد العمل الرسمية انتهت . فوت علينا بكرة

 

 

يااااااااااااااااااااااااااااااااااااااااااارب الله يخرب بيتك يا قاسم يا امين

شارك هذه المشاركه


رابط المشاركه
شارك

ماما انا نازلة عند تيتة

 

نازلة ليه عند تيتة يا دنيا . في حاجة حبيبتي ؟

 

لا يا ماما . نازلة اقعد معاها شوية

 

انزلي يا حبيبتي وسلمي عليها

 

 

حاضر يا ماما

 

 

 

 

 

 

تررررررررررررررررن تررررررررررررررررررررررررن

 

 

 

مييييييييييييييييين عايز ايه وليه

 

انا يا تيتة

 

هو ايه اللي انا . ما تقولي انتي مين ؟

 

انا دنيا يا تيتة افتحي بقى اهئ اهئ اهئ

 

 

دنيا !!!!!!!! اهلا يا دنيا ادخلي يا حبيبتي .في حاجة ولا ايه ؟ امك واخواتك كويسين

 

 

كويسين اهئ اهئ اهئ اهئئئئئئئئئئئئ

 

 

الله . مالك يا بنت بتعيطي ليه قلقتيني ؟

 

اهئ اهئ اهئ اهئئئئئئئئئئئئئئئئئئئئئئئئئئئئئئئئئئئ

 

 

يوووووووووووووه مالك يا بنت

 

هحكيلك يا تيتة اهئ اهئ اهئئئئئئئئئئئئئئئ

 

 

اااااااااه اهئ اهئ اهئئئئئئئئئئئ يا مامي اهئ اهئ عندك مناديل يا تيتة ؟

 

ماتقولي كدة من الصبح . خدي علبة المناديل عشان تاخدي راحتك في العياط وادي قاعدة

 

 

اهئ اهئ اهئئئئئئئئئئئئئئئئئئئئئئ

 

 

اهئ اهئ اهئئئئئئئئئئئئئئئئئ يا مامي ااااااه اهئ اهئ اهئئئئئئئئئئ

 

 

اللهم اطولك يا روح . طب يا حبيبتي انا هدخل انام شوية ولما تخلصي عياط صحيني

 

اهئ اهئ لا يا تيتة خليكي اهئ اهئ اهئئئئئئئئئئ

 

يا بنتي يا حبيبتي بقالك نص ساعة بتعيطي وخلصتي علبة المناديل اللي حيلتي ولسة ماقولتيش بتأوئي ليه

 

 

هقولك يا تيتة اهئ اهئ اهئئئئئئئئئئئئئئ

 

عارفة لو ما قولتيش دلوقتي انا هفتح الباب واطردك برا .

 

 

اهئ اهئ اصل يا تيتة مكسوفة اقول اهئ اهئ

 

عملتي ايه يا بنت احلاااااااااااااااااام استر يارب

 

انا عملت حاجة غلط خالص يا تيتة اهئ اهئ وندمانة اوي وضميري مأنبني خالص اهئ اهئ

 

في ايه يا بنت . في ايييييه انطقي رعبتيني

 

طب اقولك وماتقوليش لماما ؟ اهئ اهئ

 

في ايه يا دنيا طمنيني يابنتي حرام عليكي اعصابي باظت

 

يا تيتة . اصل حاتم قعد يطاردني كتير اوي اوي وبعدين يقولي بحبك يا دنيا وبعدين ........ اهئ اهئ مكسوفة اقول

 

يا لهووووووووي حاتم !!!!!!!!!!!!! عمل ايه حاتم مكسوفة تقوليه انطقييييييييييييي

 

يا تيتة اهئ اهئ اخدني سينما وكانت عارضة فيلم قليل الادب خالص وقالي بعدها كلام قليل الادب خالص اهئ اهئ

 

يا نهارررررررررررررررره زي وشه . . وبعدين حصل ايه

 

 

ماحصلش حاجة والله يا تيتة . حسيت انه بيضحك علية كدة ونيته مش كويسة فخوفت منه وجيت احكيلك عشان تقوليلي اعمل ايه اهئ اهئ

 

ياااااااااااااااا الله يطمن قلبك . قلبي وقع في رجلي . الحمدلله . جدعة يا دنيا انك جيتي قولتيلي يا حبيبتي

 

عشان نعرف نتصرف مع الافندي اللي مابيراعي قرابة ولادم ولا عنده دين . بس برضو انتي غلطانة يا دنيا

 

انتي اللي طمعتيه فيكي

 

انا !!!!!!!!! ازاي يا تيتة

 

هو انا ناسية يا دنيا الحفلة والرقص والتنطيط . خلتيه يتعلق بيكي وميلتيه ناحيتك وطمع فيكي

 

اهئ اهئ والله يا تيتة ماكان قصدي والله اهئ اهئ

 

خلاص يا حبيبتي بس لازم تعرفي ان البنت اللي تحترم نفسها الكل يحترمها

 

واللي تهين نفسها وتخضع بالقول وتهزر وتضحك بالشكل ده بتطمع الناس فيها

 

عندك حق يا تيتة . انا غلطانة غلطانة وندمانة ومش عايزة اعمل كدة تاني اهئ اهئ

 

ايوة كدة حبيبتي بنت بنتي هاتي بوسة يا حلوة انتي عشان جيتي تقوليلي وماعملتيش حاجة حرام

 

امووووووووووووه

 

ميرسي يا تيتة اهئ اهئ اهئئئئئئئئ

 

قوليلي يا دنيا هو اداكي معاد تاني ؟

 

ايوة يا تيتة قالي هيستناني في السينما النهاردة حفلة تلاتة لستة

 

كدة ! طب والله لما اشوفه . صبرك علية يا حاااااااااااااااااتم اخ ياني عايزة اكله بسناني

 

اطلعي انتي يا دنيا واوعي تردي عليه في تليفون ولا تقفي في البلاكونة خاااااااااالص

 

حاضر يا تيتة . اوعي تقولي لماما يا تيتة اهئ اهئ اهئ

 

لا يا حبيبتي انا هتصرف بعيد عن المحروسة ماما .

 

 

 

 

 

 

 

 

 

 

 

 

 

 

تررررررررررررررررررررن ترررررررررررررررررررررن

 

الو

 

ايوة يا ليلى حاتم عندك

 

اهلا يا ماما . ايوة حاتم موجود بس نايم

 

طب خليه نايم عشان اطلع اصحيه واخليهاله مفاجأة

 

 

 

 

 

 

 

 

حاااااااااااااااااااااااااااااتم انت يا وااااااااااااااااااااااد اصحى يا سي روميو جوليت في انتظارك

 

 

ايه ده مييييييين تيتة . غريبة ازيك يا تيتة

 

اصحى يا حبيبي عشان معاد السيما

 

سيمااااااااااااااااااااااا أأأأأأأأأأأأأ سي يسس سيما ايه يا تيتة ؟

 

عندك حفلة يا حبيبتي من تلاتة لستة مع دنيا بنت خالتك . انتي ناسي ولا ايه

 

يا نهار مش فايت . الله يخرب بيتك يا دنيا . هي قالتلك

 

ايوة يا حبيبي قالتلي عشان اطلع افكرك بالمعاد

 

يا تيتة أأأأأأأأ اصل يا تيتة أأأأأأأأأنااااااااااا

 

 

اخص عليك الف اخص . انت صحيح قليل الادب من صغرك واخلاقك طين بس عمري عمري عمري ما تخيلت انك تعض في لحمك وتبص لبنت خالتك وعايز تفسد اخلاقها

 

يا تيتة لا والله ابدا انا بحب دنيا وعايز اتجوزها

 

جاز عليك الهم انت وامثالك . وهي دنيا مالهاش اهل ياواد ! ماكلمتش ابوها ليه لما انت عايز تتجوزها

 

يا تيتة انتي عارفة ان بابا مش هيرضى , انا اخواتي الكبار لسة ما اتجوزوش يبقى ازاي هتجوز انا

 

تصدق بللي خلقك

 

ونعم بالله يا تيتة

 

انا عندي جوازك انت اهم من الكبار . الكبار مهما كان عاقلين لكن انت ولو سبوك من غير جواز هتجيلنا مصيبة

 

يا تيتة يا تظلمنيش

 

ما لاكش دعوة بدنيا فااااااااااااااااهم ولا اقول لابوك

 

حاضر يا تيتة

 

ولو عايز تتجوزها حقيقي انزل قولي وانا اكلملك ابوك

 

بجد يا تيتة ؟؟؟؟؟؟؟؟؟؟ هههههههههه يعني هتعرفي تقنعي بابا

 

اقنعه يا حبيبي . اقنعه اوي . اومال اسيبك تضيع وتضيعنا معاك

 

هههههههههه انت عسل يا تيتة هاتي بوسة يا تيتة يا قمر انتي اموووووووووووووووه

 

اوعي جاتك نيلة

 

 

 

 

 

 

 

 

 

 

 

 

 

 

 

 

 

دينا انتي مامتك عملالك ثندوتثات ايه ؟

 

سندوتشات جبنة بيضا ومربى ومعايا موزة كمان

 

موذة !! ما بحبث الموذ بحب الايث كريم

 

وانتي مامتك عملالك سندوتشات ايه يا ايمان

 

ماما عملالي لانثون وجبنة فلمنك تاخدي واحد ؟

 

لا مش عايزة انا هاكل سندوتشاتي

 

يا عيني . بثي يا دينا ! ابلة ايمان مث معاها ثندوتثات ياعيني

 

يمكن مامتها مش معاها فلوس تجيبلها سندوتشات يا ايمان

 

طب انا هديلها ثندوتث من بتوعي وانتي اديلها ثندوتث من بتوعك يمكن تكون جعانة ومكثوفة تقولنا

 

لأ انا هديلها الموزة

 

طب تعالي معايا

 

 

يا ابلة ايمان يا ابلة ايمان

 

اهلا بايمان الحلوة ههههه ازيك يا دينا يا جميلة

 

انا جاية اديكي ثاندوتث يا ابلة

 

وانا جاية اديكي موزة يا ابلة

 

ههههههههه لا يا حبايبي كلوا انتو . لازم تاكلو عشان تكبروا

 

يعني احنا بناكل عثان نكبر يا ابلة ؟

 

ايوة يا ايمان يا حبيبتي

 

طب والكبار بياكلوا ليه .

 

ههههههه لازم ياكلوا عشان يعيشوا ويخلوا بالهم من الصغيرين اللي زيكو

 

يعني ماما بتاكل عثان تخلي بالها مني

 

ههههههه وبعدين يابنت انتي دايما كدة سؤال يجر سؤال والواحد ما بيخلص من اسئلتك هههههه يلا روحي كملي اكلك

 

انا بحبك اوي يا ابلة ايمان . تعالي عيثي معانا في البيت . ماما طيبة اوي وبتعمل رذ طعمه جميل

 

ههههه لا يا حبيبتي انتي عيشي مع مامتك وانا اعيش مع مامتي ويلا بقى عشان الفسخة خلصت وعايزين نبدأ الحصة

 

طب اثتني يا ابلة لما اخلث ثندوتثاتي الاول

 

ايمان

 

نعم يا ابلة

 

انا بحبك اوي يا ايمان

 

هههههه هاتي بوثة يا ابلة

 

 

 

 

 

 

 

 

 

 

 

ايه يا هيام هو علاء لسة قالب عليكي

 

ايوة يا ست دنيا كل ما اتصل في الشركة يقولولي مش فاضي واتحرج وابقى في نص هدومي

 

وفي البيت خالتو ليلى ترد علية وحش وتقولي نايم . رغم اني ببقى سامعة صوته

 

ههههههههههه شكله مش طايقك ومخنوق منك ع الآخر

 

انا مش عارفة انا عملت ايه . فيها ايه يعني لما اهزر مع زمايلي الشبان

 

فيها انهم هيطمعوا فيكي ومش هيحترموكي

 

يا سلام يا سلام على العقل وست العاقلين اللي عقلت فجأة

 

الحمدلله يا ستي اني عقلت . انا رايحة اشوف ماما بتعمل ايه في المطبخ واساعدها

 

ههههههههه من امتى الادب ده

 

من هنا ورايح

شارك هذه المشاركه


رابط المشاركه
شارك

اااااااااااااااااه صفاء الحقيني يا صفاء الحقيني يابنتي اااااااااااااه صفاء

 

 

ماما مالك يا ماما

 

ااااااااااااه الظاهر ازمة القلب هتجيلي اااااااااه تعبانة اوي يا صفاء ومش قادرة اخد نفسي

 

مامااااااااااااا مالك يا ماما اهئ اهئ ماماااااااااااااااااااا اهئ اهئئئئئئئئئئئئئئئ اتصرف ازاي دلوقتي مامااااااااااا اهئ اهئ اهئ

 

 

 

ترررررررررررررررررن ترررررررررررررررررررررررررررررررررررررررررن افتحي يا طنط ليلى افتحي اهئ اهئ اهئ

 

ايه يا صفاء في ايه يابنتي مالك

 

ماما اهئ اهئ مامااااااا مامااااااا يا طنط الحقي مامااااااااااااا اهئ اهئ

 

 

لا اله الا الله مالها امينة ياعلاااااااااااااااااااااااااااااااااء علاء

 

ايوة يا ماما في ايه خير

 

تعالى يا حبيبي نشوف طنط امينة مالها يمكن ننقلها المستشفى بعربيتك ولا حاجة

 

طنط امينة !!!!!!!!!!!! حالا جاي يا ماما

 

 

فوقي يا امينة اهئ اهئ مالك يا حبيبتي اهئ اهئ لا حول ولا قوة الا بالله يلا يا علااااااااااااااااااااااااء ساعدني عشان ننزلها

 

ماماااااااااااااااااا اهئ اهئ ماماااااااااااا ماما يا طنط ليلى اهئ اهئ

 

اهئ اهئ ماما كويسة يا صفاء اهدي يا حبيبتي اهئ اهئ ان شاء الله هتبقى زي الفل

 

يارب يا طنط ليلى انا خايفة يا طنط ماما يجرالها حاجة اهئ اهئ يا حبيبتي يا ماما اهئ اهئ

 

اهئ اهئ لا يا حبيبتي ماما هتبقى زي الفل يلا عشان ننزل اهئ اهئ

 

 

 

 

 

ها يا علاء

 

الدكتور قالك ايه

 

حالتها حرجة اوي يا ماما ربنا يستر

 

مامااااااااااااااااااااا اهئ اهئ اهئ ماماااااااااااااا

 

اهئ اهئ بس يا صفاء بس يا حبيبتي والله انا قلبي حاسس انها هتبقى كويسة يابنتي اهدي عشان خاطري ما تعمليش في نفسك كدة اهئ اهئ . انزل هات لصفاء كوباية لمون ولا أي حاجة تهدي اعصابها يا علاء

 

لا حول ولا قوة الا بالله حاضر يا ماما . اهدي يا انسة صفاء ان شاء الله طنط امينة هتبقى كويسة

 

يارب يا باشمهندس علاء يارب اهئ اهئ يارب اشفي امي انا ماليش غيرها يارب اهئ اهئ اهئئئئئئئئ يارب هعمل ايه من غيرها اهئ اهئ اهئ

 

 

 

علاء خد صفاء روحها البيت وقول لبابا انا هبات مع طنط امينة اهئ اهئ اهئ

 

لا يا طنط انا اللي هبات معاها اهئ اهئ مش هقدر اروح واسيبها اهئ اهئ

 

اسمعي الكلام يابنت . ماتحرمنيش اني ارد جزء من جمايل امك علية اهئ اهئ خدها يا علاء اهئ اهئ

 

اهئ اهئ طب وانا هطمن عليها ازاي يا طنط اهئ اهئ

 

انا يا حبيبتي هتصل بيكي من تليفون المستشفى وخدي نمرة المستشفى عشان تتصلي بينا

 

 

وانا الصبح ان شاء الله يا صفاء هجيبك المستشفى واجي اطمن على طنط امينة قبل ما اروح شغلي

 

اهئ اهئ متشكرة ليكو اوي . والله مش عارفة كنت هعمل ايه من غيركو اهئ اهئ اهئ

 

 

 

 

 

 

 

 

 

يا خبر ابيض ومش فايت ايه اللي جاب صفاء في عربية علاء !!!!!!!!! ايه اللي لم الشامي ع المغربي

 

يا لهوي على صفاء اللي طلعت مية من تحت تبن . طب والله لخلي فضيحتها بجلاجل في العمارة

 

ال عملالي مؤدبة ال . بنات اخر زمن

 

 

 

 

 

ازيك يا فوقية

 

اهلا يا ابتسام

 

شوفتي يختي اللي انا شوفته

 

شوفتي ايه

 

ال ايه علاء افندي موصل السنيورة صفاء بالعربية لحد البيت لا وعمال يقولها اطمني اطمني وما تعيطيش

 

يكون وعدها بالجواز وبعد ما عمل عملته خلي بيها ولا ايه يا فوقية ؟

 

علمي علمك يا حبيبتي . بس واعدها بالجواز ازاي اذا كان خاطب هيام بنت خالته

 

انا سامعة انهم زعلانين وشكلهم سابوا بعض

 

سابوا بعض

 

ايوة يا حبيبتي بعد ما خد غرضه ومزاجه منها

 

 

 

بتقولي ايه يا ست انتي وهي يا جيران هم ما عندكومش دم .

 

ايه ده الحاجة ام رفعت ! ازيك يا حاجة

 

الله لا يسلمك لا انتي ولا هي . يا ناس اتقوا الله في اعراض الناس مش كدة . لا حول ولا قوة الا بالله

 

على فكرة بقى امينة تعبانة في المستشفى وعلاء جري بيها هو وليلى وصفاء وبعدين جاب صفاء في سكته وليلى باتت هناك

 

مش واجب برضو تسألوا صفاء على امها ؟ ولا انتو مالكوش في الواجب

 

 

يا عيني ! لا حول ولا قوة الا بالله زعلتينا يا حاجة . يلا يا فوقية نروح لصفاء نسألها على امها

 

 

ربنا يريحنا من الاشكال اللي ما بتبطل نهش في اعراض الناس زي الكلاب المسعورة

 

 

 

 

 

 

 

 

 

 

 

 

 

 

 

 

 

تررررررررررررررررررن ترررررررررررررررررررررررن

 

 

الو

 

ازيك يا علاء

 

اهلا دكتور مدحت ليك وحشة والله

 

مال صوتك كدة مش عاجبني

 

ابدا , واحدة جارتنا عزيزة علينا تعبانة في المستشفى ومتضايق شوية

 

يا سيدي ربنا يشفيها ويشفي كل مريض .

 

انت عامل ايه في التحضير لرسالة الدكتوراة

 

ولا دكتوراة ولا أي حاجة ولا دماغي رايقة لاي شيء . حالة من الركود النفسي والاجتماعي . بقولك ايه تعالى نخرج انا مخنوق

 

 

طب ما تخرج مع المدام

 

هههههههههههههههههههههههههههههه اهي دي احلى نكتة

 

مدام مين يابني . المدام يا إما في غرفة الكشف يا إما في غرفة العمليات . ماليش في الدنيا الا انت وامي

 

هههههههههههههههههههههه ربنا يخليلك امك

 

 

ويخليك ليا ههههههههههههههههه

شارك هذه المشاركه


رابط المشاركه
شارك

اهلا بحبيباتي كلهم

 

منورين والله

 

ليا عودة للترحيب بيكو جميعا ان شاء الله

 

بس بكرة ان شاء الله

 

المهم اني بحبكو كلكو والله وربنا مايحرمني من وجودكم ابدا

شارك هذه المشاركه


رابط المشاركه
شارك

حلقات جميلة ومميزة كعادتكِ حبيبتي بارك الله فيكِ

طبعا معجزة إن دنيا عقلت بس فعلا رُبَ ضارة نافعة وعقبال هيام هي كمان

في انتظار باقي حلقاتك الممتعة :D

شارك هذه المشاركه


رابط المشاركه
شارك

جزاك الله خيرا أختي هبة.

 

سبحان الله تصرف الموظفين في المصالح و معاملتهم للمواطنين متشابه في الدول المسلمة، و كأن المواطن يشحت منهم و هم يتكرمون عليه، و الآن في واقع العمل لو بقيت النساء في بيوتهن كما قال العامل سرور في القصة لكنا رأينا تطورا في مجتمعاتنا و رأينا بركة في حياتنا كلها، طبعا كله بإذن الله، و الله أكبر شيء أفسد المجتمع هو خروج المرأة للعمل ما انجر عنه الإختلاط و أمور أخرى نراها كل يوم، و للأسف نجد اليوم حتى الملتزمات قد خرجن بحجة الضرورة وووو.

 

سبحان الله المرأة تفقد الحياء بمجرد تعودها على الكلام مع الرجال و تصبح تتكلم مع زميلها و كأنه أخوها أو زوجها.

 

بالنسبة لصفاء ما كان عليها أن تركب مع علاء حتى و إن كانت في ضيق، لأن هذا أوقعها في شبهة جعلت الجارتين تتكلمان فيها، فهذا ما ينبغي أن تحذره المسلمة: أن تتصرف تصرفا يوقعها في إساءة الظن بها.

 

أعتذر على الإطالة.

شارك هذه المشاركه


رابط المشاركه
شارك

انا فرحت ان دينا بقت كويسه الحمد لله

انا بحبك اوي يا ابلة ايمان . تعالي عيثي معانا في البيت . ماما طيبة اوي وبتعمل رذ طعمه جميل

انا لما كنت بحضر فى المسجد دروس وكنت بحب الابله برضه وكنت بتمنى تيجى تعيش معانا زى ايمان كده ^ــ^

شارك هذه المشاركه


رابط المشاركه
شارك

حال الموظفين هو هو مبيتغيرش ابداااااا

فكرتيني بموقف من شهر كنت بجيب ورقي من الجامعه

والست الي هناك انت من سنه 2002 لسه هدورلك انا مش فاضيه قلتلها متتعبيش نفسك هدور انا دورت وطلعت ملفي

انت مدفعتيش ولا سنه قلتلها ازاي يعني والكرنيه دا طلعوه ازاي

تقولي كدا انت عايزاني اطلع ملف كل سنه قلتلها هطلعه انا وفضلت ادور لحد ما طلعتهم

قلتلها كدا تمام هاتيلي بقي الوصل لا خلاص اصلا الوقت انتهي والصراف قفل قلتلها لسه مقفلش قالتلي مش هيوافق قلتلها هساله رحت وسالته وقال ماشي قالتلي طيب

قلتلها طلعيلي الوصل قلتلي لا خلاص انا تعبت جداا النهارده مش عامله حاجه تعالي بكرا قلتلها هو حضرتك مش شايفه اني حامل

قالتلي اصلا مش انا الي هعمله وخلت واحده جمبها تعمله

 

بعدها باسبوعين رحت علشان اخد الشهاده تقولي طلع غلط ولسه قلتلها انا محتجاها ضروري وفين وفين لما طلعتها واصلا قاعده مبتعملش حاجه

 

 

 

نرجع لموضوعنا

 

عجبتني دينا جداااا

انها حكت للتيته العثوله دي

واجمل شيء ان تيتتها استقبلت كلامها بروح طيبه وقبلتها بالنصيحه

في ناس ممكن تخلي الواحد يندم انه حكي شيء

ازاي ومش ازاي وانت وانت وكلام فارغ كتير

 

 

 

 

صفاء

حاسسه احساس غريب

انها هي الي هتكون من نصيب علاء ههههههههههههههه

 

ايمان

عثل والله

:))

شارك هذه المشاركه


رابط المشاركه
شارك

ربنا يخليكى لينا ياهبه ويخللنا قصصك اللى بتفك على الواحد شويه من اللى هو فيه

:-) :-) :-)

شارك هذه المشاركه


رابط المشاركه
شارك

كل مااقرا صفحه من مسلسلك الجميل بيزيد اعجابى باسلوبك وصياغتك للاحداث يا احلى هبه

سلمتى وسلمت يمينك يا حبيبه مسلسل ممتع يدعو الى متابعه شيقه للقطات احس بانها حيه لزمن السبعينات بجميع احواله وعاداته وتقاليده المتجسده فى الصوره الغربيه وهذا بالفعل ماكان يحدث بل واكثر فى هذا الزمن العجيب من باب الفضول سالت والدتى عن الوقت اللى عاشته فى السبعينات قالتلى حاجات اكتر من كده كمان وقالتلى كان قليل جدا اللى تلبس محتشم واللى كانت تلبس ايشارب من غير ماتستر رقبتها بيقولوا عليها شيخه ههههههههههههههه حتى انا اتذكر وانا طفله لما كنت اتفرج على اى فيلم من السبعينات اللى كان ابيض واسود كان والدى يثور عليه ويقولى الافلام دى كلها مناظر قبيحه ومايصحش انى اشوفها وكفايه عليكم الكارتون وماما ساميه وبوجى وطمطم ههههههههههههههههههوليس من المثير للجدل وجود الفاظ او بعض كلمات للاغانى فهذه الالفاظ متداوله بشكل طبيعى بين كل زوج وزوجته وهذا ممايزيد من واقعية الاحداث وليست هناك من رايى وجود اى اثاره للغرائز او شك لوجود ذلك وهذا شىء طبيعى لسرد احداث وقت من الزمن حدث بالفعل

  • معجبة 1

شارك هذه المشاركه


رابط المشاركه
شارك

عجزت كلماتي عن وصف جمال الحلقات

 

ورقة الأسلوب

 

سلمكِ الله من كل سوء

شارك هذه المشاركه


رابط المشاركه
شارك

السلام عليم ورحمة الله

أولا أحبتي في الله لم أتقصد أن أقوم بهجوم على أي أخت من الأخوات حتى أتقابل بهذا الهجوم

ثانيا عندم تكلمت كل ما أردت أن أقوله أني رائيت منكرا وأردت أن أنكره بلساني كما علمني رسول ربي صلى الله عليه وسلم ... وكنت مخطئة لأني أنكرت شيئا ليس لدي فكرة عن نظرت الشرع له بل إتبعت أحاسيسي وأيضا أنتم مخطئون فقد أيدتم شيئا دون أن تذكرو فتوى تؤيد رأيكم

لذلك أقترح أن تختاروا أخت من الأخوات التي لم تشترك في قراءت المسلسل وتبدي رئيها وتحكم بيننا وأنا أعتذر من كل أخت قد ضايقتها وخصوصي من الأخت هبة

 

شارك هذه المشاركه


رابط المشاركه
شارك

السلام عليم ورحمة الله

أولا أحبتي في الله لم أتقصد أن أقوم بهجوم على أي أخت من الأخوات حتى أتقابل بهذا الهجوم

ثانيا عندم تكلمت كل ما أردت أن أقوله أني رائيت منكرا وأردت أن أنكره بلساني كما علمني رسول ربي صلى الله عليه وسلم ... وكنت مخطئة لأني أنكرت شيئا ليس لدي فكرة عن نظرت الشرع له بل إتبعت أحاسيسي وأيضا أنتم مخطئون فقد أيدتم شيئا دون أن تذكرو فتوى تؤيد رأيكم

لذلك أقترح أن تختاروا أخت من الأخوات التي لم تشترك في قراءت المسلسل وتبدي رئيها وتحكم بيننا وأنا أعتذر من كل أخت قد ضايقتها وخصوصي من الأخت هبة

 

 

وعليكم السلام ورحمة الله وبركاته

 

حبيبتي اولا شرفتي الموضوع ونورتيه والله

 

مسلسلاتي بناقش بيها واقع مرير ولا اقره يا حبيبية

 

فقط اعرض صورة الناس بعيدا عن الدين كيف تكون وكيف ان الدين والاخلاق تهذبها

 

الموضوع لا يحتاج لفتاوى ولا شيء هههههههه

 

وانا مش هقبل الموضوع يكون مجال للمناقشة والجدال

 

فمن فضلك حبيبتي اغلقي هذا الباب

 

ليس هنا مكان نقاش وجدال

 

 

اذا احببتي المتابعة فاوالله سأكون سعيدة جدا

 

واذا اثرتي الابتعاد فلك ذلك ولكِ مني كل الإحترام

 

 

اخيرا اقول كلمات العشق والغزل وحتى الكلمات الدلال المتزوجات يعرفن مغزاها

 

ويعلمن انها ليست كلمات عبثية

 

 

شرفتي الموضوع

 

واطلب من الاخوات غلق باب الجدال فضلا وليس امرا

 

 

 

لي عودة يا حبيبات لتكملة الحلقات والترحيب بكل الغاليات

  • معجبة 1

شارك هذه المشاركه


رابط المشاركه
شارك

لميا

 

نعم يا ماما

 

 

فين مها

 

 

مها بتذاكر في اوضتها

 

 

تن تن تن

 

ادخل

 

مساء الخير حبيبة قلب ماما

 

اهلا يا ماما مساء النور يا حبيبتي

 

 

يعني مش شايفاكي بتذاكري ولا حاجة هههههههه قاعدة ماسكة القلم وسرحانة بعيد عن الكتاب

 

ابدا يا ماما مش سرحانة ولا حاجة

 

مها حبيبتي مش انا ماما حبيبتك ؟

 

هههههه طبعا يا ماما

 

مخبية علية ايه بقى

 

انا يا ماما ؟

 

ايوة انتي . هو انا هتوه عن بنتي حبيبتي . انتي متغيرة خالص بقالك كام شهر ومش عاجباني

 

على طول ساكتة ولا بتتكلمي ولا عايزة تخرجي ومافيش غير الكلية اللي بتروحيها . حتى كل ما نروح عند تيتة مش بتيجي معانا . في ايه يا مها

 

يا ماما ما فيش حاجة صدقيني

 

علاء مش كدة ؟

 

علاء ! ماله علاء يا ماما ؟

 

انتي زعلانة من يوم ما عرفتي انه خطب هيام .

 

ماما الكلام ده مش صحيح

 

لا صحيح يا مها

 

 

ايه ده . هي لميا قالتك حاجة يا ماما

 

هههههههههههه شوفتي وقعتك ازاي في الكلام واديكي اعترفتي

 

يووووو يا ماما اهئ اهئ اهئ

 

حبيبتي الحب مش حرام لكن لما يكون بين الزوجين . لكن الحب قبل الجواز لا يا حبيبتي . ده يبقى شر كبير

 

شر ؟ الحب شر يا ماما

 

ايوة شر . لانه بيخليكي تفكري في واحد محرم عليكي .تنشغلي بيه عن دينك ودنيتك ويبقى محور تفكيرك وكل ده شر

 

بس يا حبيبتي دي مش غلطتك . لكن غلطتنا احنا

 

غلطتكم انتو ازاي يا ماما

 

ايوة يا حبيبتي غلطتنا . عشان احنا لو كنا ربيناكم تربية مقفولة من غير اختلاط مع شباب العيلة ما كانش ده حصل

 

طب بالله عليكي يا مها لو احنا مثلا روحنا عند تيتة وقلنا للبنات يقعدوا لوحدهم والولاد في مكان لوحدهم

 

لا دول يحتكو بدول ولا يشوفوا دول ولا يتكلموا والقلوب تضعف وتتعلق بالهوى . لو كنا عملنا كدة كنتي هتشوفي علاء ولا قلبك يتعلق بيه

 

 

اهئ اهئ لا يا ماما . ماكنتش هشوفه ولا هتعلق بيه ولا هتعذب بحبه بالشكل ده اهئ اهئ

 

عشان كدة مش قادرة الومك عشان لازم الوم نفسي والوم باباكي والوم المجتمع اللي فرض علينا الاختلاط

 

لكن حبيبتي خلاص اللي حصل حصل . انسي علاء . انسيه خالص يا مها

 

ياريت يا حبيبتي تبعدي خالص عن الاغاني الرومانسية

 

الاغاني ! طب والاغاني مالها يا ماما

 

لانها يا حبيبتي بتاخدك لعالم تاني وتخليكي تفكري ان كلامها متوجه لحبيبك سواء لوم او عتاب

 

او حتى كلام رومانسي

 

 

عندك حق يا ماما اهئ اهئ في اغاني كل ما اسمعها مش بقدر احوش دموعي اهئ اهئ

 

 

بنتي حبيبتي مها عايزة السنة دي امتياز في نهاية السنة . عايزة اشوف بنتي صيدلانية شاطرة , ولا يعني لما مامتك تعيا وصحتها تتدهور ما تعرفيش تديلها الدوا المظبوط ههههههههه

 

لا يا ماما اهئ اهئ بعد الشر عليكي . بالله عليكي ما تقوليش كدة . ربنا يديكي الصحة وطول العمر ويخليكي لينا يا ماما

 

تعالي في حضني يا مها محتاجة احضنك اوي يا حبيبتي

 

ماما حبيبتي بحبك بحبك اوي يا ماما

 

 

 

 

ايييييييييييه ده ايه الاشواق والعواطف دي يا ست ماما اللي مش بتطلع غير لمها . لكن الغلبانة اللي زي حالاتي يتشخط في شوها بس هههههههههههههه

 

هههههههههههههه انت ايه جابك . مش كنتي بتحمي القطة بتاعتك

 

حميتها ونامت من زمان . ما تغيريش الموضوع من فضلك يا ست ماما . انا عايزة حضن زي بتاع مها ماليش دعوة

 

ههههههههه بتغيري مني يا غيارة ههههههههه

 

ههههههههه تعالي يا حبيبة مامتك خدي حضن وبعدها نامي وما اسمعش صوتك

 

ههههههه حبيبتي يا مامتي امووووووووووووه

 

 

 

 

 

واقف مستني مين يا علاء

 

مستني صفاء تنزل عشان اوديها عند مامتها المستشفى

 

 

لا يا حبيبي صفاء نزلت من بدري راحت المستشفى

 

ليه كدة ! انا كنت هاخدها في سكتي

 

هههههههه هي امبارح رجعت معاك مضطرة عشان الدنيا ليل وخافت تركب تاكس لوحدها

 

لكن دلوقتي النهارطلع وشقشق وتعرف تركب المواصلات زي ماهي عايزة . صفاء بنت اصول ومتربية يا حبيبي

 

 

ماشاء الله . ربنا يزيدها حياء

 

عقبال ما تشوف هيام لما يطلعلها حياء وتفرح بيها يا حبيبي

 

ههههههههههههههههههههه يا تيتة انا مش عارف اني حاطة هيام في دماغك ليه

 

هيام مين دي يا واد اللي هحطها في دماغي . انا لما احط في دماغي حاجة احط حاجة عدلة مش واحدة حالها مايل وهتميلك معاها ان شاء الله

 

ههههههههه ادعيلي وادعيلها بالهداية يا تيتة

 

الله يهديك وينور قلبك قول آمين

 

آمين يا تيتة آمين يارب . عن اذنك هروح اطمن على طنط امينة في المستشفى وبعدين اروح الشركة

 

طريق السلامة يا حبيبي . ربنا يكفيك شر الطريق آمين

شارك هذه المشاركه


رابط المشاركه
شارك

يا ابيه مثطفى

 

ايوة يا موني

 

انا مث هروح المدرثة النهاردة

 

نعم نعم !!!!!!!! ليه يا ست هانم يا اوزعة انتي

 

انا اوذعة يا ابيه مثطفى ؟ الله يثامحك

 

هههههه اسف يا ستي . مش عايزة تروحي المدرسة ليه

 

عثان عايذة اروح اذور طنط امينة حبيبتي في المثتثفى

 

يا حبيبة قلبي يا جميلة انتي ههههههههه هاتي بوسة عشان انتي عسل

 

خد بوثة كبيرة عثان انت ثكر

 

امووووووووووه خلاص يا ستي تعالي نروح . والله انتي بتفهمي في الاصول اكتر مني

 

يعني ايه اثول

 

هههههههه لا مش فاضي اشرحلك يلا البسي عشان ننزل

 

 

 

 

 

السلام عليكم

 

الثلام عليكم

 

اهلا وعليكم السلام تعالى يا مصطفى . اهلا بحبيبة ماما ازيك يا موني وحشتيني من امبارح يا عقلي

 

اذيك يا مامتي وحثتيني وماحدث امبارح جابلي كوباية اللبن في الثرير

 

ههههههه يا عيني ! معلش يا روح قلبي بكرة هرجع البيت واعملك كل اللي بتحبيه

 

 

 

ازيك يا انسة صفاء

 

اهلا يا استاذ مصطفى

 

ياترى طنط امينة عاملة ايه النهاردة

 

يعني الحمدلله اتحسنت شوية

 

طيب عن اذنك هدخل اشوفها

 

اتفضل

 

يلا يا موني

 

 

ازي صحتك دلوقتي يا طنط امينة

 

اهلا يا مصطفى يا حبيبي . انا بخير الحمدلله

 

اذيك يا طنط امينة ثلامتك

 

اهلا اهلا بحبيبتي الصغيرة . انا كويسة يا موني يا حبيبتي . فرحتيني بزيارتك

 

دي اثول يا طنط

 

هههه ربنا يخليكي يا حبيبتي . طالعة لمامتك حنينة وقلبك طيب

 

 

 

 

بقولك ايه يا ليلى

 

نعم يا امينة يا حبيبتي

 

روحي لعيالك يا حبيبتي . صفاء معايا . كفاية تعبك معايا امبارح وبياتك بعيد عن ولادك

 

اخص عليكي يا امينة تعب ايه وبتاع ايه . ده كلام برضو . هو انا انسى جمايلك علية يا حبيبتي

 

انتي كنتي معايا يا امينة في كل ولادة رجلك كانت سابقة رجل امي . وكمان مين اللي كان معايا يوم علاء ما عمل عملية الزايدة ولا نسيتي مواقفك الجميلة معايا

 

يا حبيبتي ما تقوليش كدة . انتي قبل ما تكوني جارتي انتي اختي وحبيبتي يا ليلى , هو انا ليا مين غيركو بس في الدنيا يا حبيبتي

 

ربنا يديم المعروف يا امينة يارب ويشفيكي يا حبيبتي وتنوري بيتك وتفرحي ببنتك

 

اهئ اهئ يارب يا ليلى يارب . انا خايفة على صفاء والله . انا مش خايفة من الموت والله . اهئ اهئ الموت علينا حق . انا خايفة على صفاء

 

بس بس بقى الله يخليكي احنا ما صدقنا تتحسني شوية . ربنا يدبر الامور يا امينة . ادعيلها انتي بس

 

يارب يارب اديني الصحة والعمر لحد ما اطمن على بنتي في بيت جوزها يارب يااااااااااااااارب اهئ اهئ اهئ

  • معجبة 1

شارك هذه المشاركه


رابط المشاركه
شارك

مدحت دوحاااااااااااا حبيبي ههههههههههههه

 

دا ايه ده . وده من ايه . انتي سخنة ؟

 

هههههههه هو انا ما ادلعكش الا لما اكون سخنة هههههههه

 

اومال بتدلعيني ليه ؟

 

بدلعك عشان فرحانة فرحانة فرحاااااااااااااااااااااااانة يا دوحا ههههههههههههه

 

فرحيني معاكي

 

اختاروني يا حبيبي عشان اروح مؤتمر للأطباء في هولاندا

 

هولاندا ! بتوع السمنة ؟

 

هههههههه ايوة يا حبيبي بتوع السمنة

 

وان شاء الله مين قالك انك هتسافري

 

يعني ايه يا مدحت

 

يعني انا مش موافق

 

نعم افندم ايييييييييييييييه

 

في ايه يا نجلاء . ايه الاسلوب اللي بتتكلمي بيه ده !!!!!!!!!!

 

شوف انت بتقول ايه يا باشمهندس

 

بقولك مش هتسافري ومش موافق

 

انت بأي حق تمنعني

 

بحق اني جوزك وان ممنوع تسافري غير بإذني

 

اااااااااااااه يا سلاااااااااام وانت بقى بتلوي دراعي بحقوقك وعايز تخسرني مستقبلي العلمي عشان تثبت انك راجل

 

نعم ؟؟؟؟؟؟؟؟؟؟؟؟؟؟؟؟؟؟ ايه !!!!!!!!!!!!!! ايه اثبت اننا راجل دي . اومال شايفاني ايه ان شاء الله

 

راجل . راجل اوي . راجل شرقي متخلف بيفكر بعقلية البدو والصحارى

 

بدو وصحارى . شايفاني داخلك الشقة على جمل وجارر معزتين قدامي !. ما تتكلمي عدل

 

اقصد ان طول ما في مجتمعنا امثالك . عمر الست ما هتتقدم خطوة اعوذ بالله

 

اعوذ بالله منك ومن امثالك . ست قليلة الادب صحيح . وهعرف اربيكي

 

انت بتشتمني يا مدحت !

 

صحيح ؟ دي شتيمة لكن قلة ادبك واتهامي بالتخلف مش شتيمة مش كدة ؟ على العموم تخلف بتخلف وهوريكي المتخلف هيعمل ايه . وسفر مش مسافرة واخبطي راسك في احلى حيطة

 

 

يا افندي يا محترم انا دكتووووووووووووورة دكتورة مش ست جاهلة عشان تتحكم فيا

 

ايه دكتورة دكتورة. شيفاني مبيض محارة ولا سباك . انا كمان راجل مهندس ومعيد في الجامعة وليا وضعي ولازم انتي كمان تفكري فيا زي ما بتفكري في نفسك

 

يا هانم انتي صحيح دكتورة ناجحة لكن للأسف زوجة فاشلة وفاشلة جدا كمان وتجهلي يعني ايه حياة زوجية عن اذنك

 

 

اهئ اهئ اهئئئئئئئئئئئئئئئئئئئئئئئئئئئئئئئئئئئئئ يا مامي . ياريتني ما اتجوزتك اهئ اهئئئئئئئئئئئئئئئئئئئئئئئئئ فين التليفوووووون اهئ اهئ

 

 

 

 

 

ترررررررررررررررن تررررررررررررررررررررررررررررررن

 

 

 

الو

 

اهئ اهئ ايوة يا دكتورة فُتنة

 

مين معايا

 

اهئ اهئ انا دكتورة نجلاء يا فندم

 

دكتورة نجلاء . بتعيطي ليه يا دكتورة خير

 

مش هقدر اسافر المؤتمر

 

ليه يا دكتورة ايه الاسباب المنطقية للرفض

 

جوزي مش موافق

 

جوزك مش موافق ! وهو دخله ايه اصلا ؟

 

دخله ايه ازاي اهئ اهئ ما حضرتك عارفة ما ينفعش اسافر من غير اذن الزوج

 

قوانين جاهلة وعقيمة ومتخلفة وهتكون وبااااااااااااااااااال على المرأة . تبا للجهل والتخلف ورجعية الرجال

 

انتي لازم يا دكتورة نجلاء تنضمي معانا لجمعية علية وعلى اعدائي المعادية للمجتمع الذكوري

 

ذكوري ايه وحنطوري ايه دلوقتي , انا عايزة اسافر

 

اطلبي الطلاق

 

ايييييييييييييييييييييه انا اتطلق من مدحت!!!!!!!!!!!!!!!!!!!!!!!!!!!

 

ايوة طبعا . هو ايه لزمته في حياتك من اساسه غير انه بيطلع مركبات نقص وعقد الرجالة عليكي

 

بس انا بحبه اهئ اهئ

 

انتي هتعمليلي فاتن حمامة في فيلم سيدة القصر ؟. سيبك من العواطف النسائية الفاشلة انتي دكتورة ومكانك فوق قمة العمل الاجتماعي مش قاع قلب الرجل

 

 

لالالالالالالالالالا اهئ اهئ بحب جوزي يا ناس ما اقدرش

 

يعني جوزك ولا طموحك العلمي ؟

 

اممممممممممممممممم مش عارفة

 

طب بصي اطلبي الطلاق وهدديه . هتلاقيه زي فردة الشراب المقلوب في ايدك وهيقولك سافري يا حبيبتي وارجعي بالسلامة واوعي تطلبي الطلاق تاني

 

تفتكري يا دكتورة ؟

 

 

افتكر اوي يا حبيبتي

 

انتي عملتي كدة في جوزك يا دكتورة فُتنة في بداية حياتك

 

 

لا الحيقة عشان جوزي ما ادانيش فرصة اطلب منه الطلاق . طلقني هو من غير ما اطلب واوجع قلبي

 

جربي وادعيلي يا دكتورة نجلاء القمة في انتظارك يا حبيبتي . احنا مستنينك فوق

 

فوق فين

 

فوق القمة انا ونوابغ النساء فهلومي الينا

 

حاضر هحصلكو اهئ اهئ اهئ

 

طييييييييييييب يا مدحت . اول ما يرجع هطلب منه الطلااااااااااااااااق عشان يتهدد ويعقل

شارك هذه المشاركه


رابط المشاركه
شارك

تيتة يا تيتة ترررررررررررررررررررن ترررررررررررررررررررررن

 

 

مين يا ولاد

 

 

انا حاتم

 

 

اهلا يا حاتم يا حبيبي اتفضل

 

عملتيلي ايه في موضوعي انا ودنيا

 

يا حبيبي حاضر حاضر والله مش نسياك وهكلم ابوك . بس اديني يومين كدة لما تكون امينة خرجت من المستشفى والامور هديت عشان يبقى الجو مناسب للكلام يا حبيبي . عشان برضو الواحد مزاجه معكر بسبب مرض امينة

 

ربنا يشفيكي يا طنط امينة يااااااااااااااااااااااااااااااااارب

 

ههههههههههه كل ده عشان دنيا

 

هههههههههههه لا عشان طنط امينة هههههههه ربنا يخليكي لينا يا تيتة

 

ايه اللي معاك ده

 

دا الجيتار

 

هو ربنا مش هيتوب عليك منه ؟؟؟؟؟؟؟؟

 

ههههههههه هو الجيتار وحش

 

طبعا وحش وانت شايلة وعمال تعزف عليه وتتنطط زي القرد ابو سديري في وسط البنات المايعة

 

ما فيش اي شكل من اشكال الرجولة وانت شايله ولا شعرك اللي ناقصله توكة وفيونكة

 

ههههههههه هو مافيش حاجة فيا عاجباكي يا تيتة

 

يابني هو ربنا خلقنا ليه

 

عشان نعبده

 

ولما انت عاااااااااااااااااااارف يا نكبة العيلة ما بتصليش ليه . هات الجيتار اللي في ايدك والله لكسره على دماغك اوووعى هات

 

هههههه يا تيتة طب اهدي نتفاهم . انا بحب الجيتار

 

بتحبه عشان ماعندكش حاجة عدلة تحبها . قولي يا واد يا حاتم

 

نعم يا تيتة

 

اخر مرة دخلت الجامع امتى

 

يوم الجمعة اللي فاتت

 

هي الصلاة مفروضة علينا كل يوم جمعة

 

لا طبعا كل يوم خمس مرات

 

ما شاء الله حافظ . اسم الله عليك شاطر . تعرف لو قولتلي المغرب كام ركعة هديك كحكة بسكر

 

هههههههههههههههههههه المغرب تلات ركعات . بس انا ما بحبش الكحك ههههههههههههههههه

 

ماشاء الله . ما اتوقعتش النبوغ ده . طب يا حبيبي الله يرضى عليك ويصلح حالك نفسي قبل ما اموت اسألك كنت فين يا حاتم تقولي كنت في الجامع يا تيتة . بدل ما كل مرة اسألك تقولي كنت في الديسكو

 

 

والله يا تيتة اصل الموضوع عايز ترتيب نفسي وتغير

 

بقولك ايه

 

نعم

 

عارف الشيخ عبد الهادي

 

ايوة ايوة طبعا عارفه . كل ما يشوفني يقولي هترجع امتى يا حاتم

 

بقولك ايه هو في الجامع دلوقتي روح قوله يا شيخ انا جيت اصلي وراك وادعيلي بالثبات

 

 

طب بكرة يا تيتة عشان وعدت اصحابي اكون معاهم

 

 

طيب يا حبيبي وربنا بتخلف وعده ليه . انت كل يوم بتخلف معاه خمس مواعيد في الوقت اللي بتحافظ فيه على مواعيد اصحابك

 

ياااااا انتي اثرتي فيا بكلامك يا تيتة بجد . انا فعلا انسان وحش وحش اوي كمان وعاصي

 

العاصي يتوب يا حبيبي . الباب مفتوح

 

طب عن اذنك يا تيتة

 

على فين وسايب الجيتار

 

رايح الجامع

 

 

الله يهديك يابني ويصلح حالك ويثبتك وينور قلبك ويكرهك في المعاصي قادر يا كريم . عقبال ما يهدي امك وتلبس الحجاب وهي وكل الارشانات اللي ادها والبنات الصغيرين

 

 

 

 

 

 

 

 

 

 

هههههههههههههه نورتي البيت يا امينة ادخلي يا حبيبتي حمدالله ع السلامة هههههههه

 

 

حمدالله ع السلامة يا ماما يا حبيبتي . البيت كان وحش اوي من غيرك

 

الله يسلمكو يا جماعة . ربنا ما يحرمنيش منك يا ليلى

 

 

حمدالله على سلامتك يا طنط امينة

 

الله يسلمك يا علاء يا حبيبي . تعبتك معايا يابني . سيبت شغلك عشان ترجعني البيت بعربيتك مخصوص

 

هههه تعب ايه بس يا طنط امينة . انتي جمايلك مغرقانا والله

 

تسلم يا حبيبي

 

طب يا جماعة بعد اذنكو كنت عايزة علاء في كلمتين على انفراد

 

 

حاضر . يلا نخرج يا صفاء

 

 

 

 

خير يا طنط اتفضلي

 

اقعد يا حبيبي

 

تحت امرك يا طنط امينة

 

بص يابني انا هطلب منك طلب صعب على أي ام تطلبه لبنتها بس انا مضطرة

 

صفاء !!!!!!!!!!!!!!!!!!!!!!!!!!!!!!!!!! خير يا طنط ؟؟؟؟؟؟؟؟؟؟؟؟؟؟؟؟

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏‏من سورة النحل [99] ﴿ إِنَّهُ لَيْسَ لَهُ سُلْطَانٌ عَلَى الَّذِينَ آَمَنُوا وَعَلَى رَبِّهِمْ يَتَوَكَّلُونَ ﴾ لا يقوى تسلُّط الشيطان على الإنسان إلا مع ضعف الإيمان، وإذا قوي الإيمان ضعف تسلّطه. دُرَر الطَّريفِي

×