اذهبي الى المحتوى

المشاركات التي تم ترشيحها

سلمكم الله من كل سوء ومكروه خالتو هبة

العقيد ده شكله قابل هاني قبل كده ، تلاقيهم كانوا صحاب ولا حاجة ههههه

ربنا يكرمه ويجزيه خيرا ،، سبحان الله ! اللي يفعل المعروف ربنا بييسر له من يدعو له

( مثلا لما أكون معدية الطريق وسيارة تقفلي على ما أعدي أفضل أدعيله لحد ما أوصل للمكان اللي رايحاه ،، يا بخته فاعل الخير )

 

 

أدهم ده مستفز جددددا ،، نفسي أخنققققققه وأكتر حاجة استفزتني الجملة الأخيرة اللي قالها لضحى

 

خالة شوقية هيكون لها دور في كشف الحقيقة وممكن بدارة تفتكر وتقول حاجة هي كمان ،، ممكن مثلا تلاقي حاجة في البيت وهي بتنظف

 

ضحى صعبت عليا جدا ، لكن ما زالت على خطأها ،، ربنا يفرج كربهم الأسرة كلها

سبحان الله !

ما بين غمضة عين وانتباهتها ؛؛ يغير الله من حال إلى حال

الصبح كانوا في حال وبالليل بعد اللي حصل بين أدهم وضحى بقوا في حال تاني خالص

 

سامي لو فكر شوية في كلام العمدة ممكن يدور في إسكندرية على النصابة ،، صعبان عليا ، موقفه صعب ، بس يستاهل اللي جراله أبو عين زايغة ، ده درس له مش هينساه ، هو اللي ممكن يتنسي بسببه

 

ما شاء الله طول الحلقات في ازدياد ،، وأكثر تشويقا

جزاك الله خيرا خالتو هبة ، وربنا يكرمك ويسعدك زي ما بتسعدينا بحلقاتك ،، بتخفف عنا كتير والله .

تم تعديل بواسطة ♡ راجية الجنان ♡

شارك هذه المشاركه


رابط المشاركه
شارك

كده يا هبه انت فرحانه اننا حزانى وبيعيطوا -_-

 

ياااااه انا كنت بقول مع ضحى الجمله اللى قالتها لاوسا فى سرها ربنا ينتقم منك

 

الموضوع واضح ليه اخوها ميفكرش ان فى حاجه لانها مكنتش مبسوطه وبتعامله وحش

 

الله يكون فى عون سميرة لما انت مش عايزه تقابلى واحده وتدخل عليك غصب عنك استغفر الله العظيم

انا اعصابى تعبت

شارك هذه المشاركه


رابط المشاركه
شارك

الف سلامة عليكم يا رب .وان شاء الله ما تشوفيش شر .

عندنا مثل بيقول بالمال ولا العيال .والحمد لله كله بيتصلح اهم شيء السلامة .

 

 

 

بالنسبة للحلقات جزاك الله خيرا .جعلها في ميزان حسناتك .

ننتظر لنرى ابداعاتك

شارك هذه المشاركه


رابط المشاركه
شارك

يا ترى إيه اللي هيحصل بين سعاد وسميرة

وبعدين في حاجة اسمها استئذان ، مش تفاجأ بيها في أوضتها كده من غير إحم ولا دستور ( مش هي بتتقال كده برضو ؟! هههه )

ولا سعاد دي متعرفش حاجة اسمها استئذان ولا أدب ولا تربية ولا سمعت عنهم قبل كده

 

مع إني مبحبش المشاكل إلا إني نفسي تحصل مشكلة كبيرة بين سعاد وسميرة تؤدي إلى فصل أدهم عن ضحى وده صعب إنه يحصل لإن أدهم ماسك في ضحى بإيده وسنانه وميهمهوش اللي يحصل بين أمه وأمها

يا ترى المنديل هيكون له دور دلوقتي ولا راحت عليه خلاص !

 

توحا فرحانة بنفسها إنها كانت مبتتكسفش ،، مش مكسوفة على دمها وهي بتقول كده ! ،، إذا بليتم فاستتروا

شارك هذه المشاركه


رابط المشاركه
شارك

حمد لله علي سلامتكم يا هبة مرة آخري

كفاكم الله و صرف عنكم السؤ

شارك هذه المشاركه


رابط المشاركه
شارك

السلام عليكم ورحمة الله وبركاته ،،

حمد لله على سلامة زوجك هبة الغالية

 

بالنسبة لأدهم وضحى ..انت خلاص جوزتيهم

يبقى مافيش إلا حل من اتنين

إما إنه يموت ...أو ربنا يهديه على إيدها : )

  • معجبة 1

شارك هذه المشاركه


رابط المشاركه
شارك

دمعت عيني على كلامك عن ردة فعلك لما زوجك قالك انو عمل حادث

 

الحمد لله على نعمه

 

ذكرتيني في الحادث اللي عملته وكان معي أولادي التنين.. ولما نزلت من السيارة كان الباب اللي من جهة الصغير لا يفتح من الحادث وحسيت ان المسافة طويلة لحد ما اوصل للباب التاني أطمن عليهم.. صرت زي المجنونة مش عارفة وين اروح.. وأي جهة رح توصلني أسرع.. كان في رجل من اللي حضروا الحادث شافني مرتبكة لف بسرعة وفتح الباب قالي الولاد كويسين تعالي من هون شوفيهم.. وفعلا رحت واطمنت عليهم حسيت إن ما عندي مشكلة ما دام انهم كويسين... الحمد لله

بعدها اطمنت على اللي كانوا مع السائق اللي عمل معي الحادث.. وهان كل شيء

 

 

 

بس يا ريت كان ادهم واحد من الزلط اللي انخبط بالشارع هههههههههههه

شارك هذه المشاركه


رابط المشاركه
شارك

السلام عليكم هبه

الف سلامه علي زوجك ووقاه الله من كل شر وحفظه لك

انا من راي ساجده للرحمن

انا النهارده في قمه الحزن و الزعل بسبب زواج ضحي من واحد زي ادهم

كنت بقول يمكن هي حبته علشان هو قالها كلام جريئ عمرها ما سمعته من خالد وهي بنت خام مالهاش في الاكشن بتاع ادهم

مش عافه اظن مالوش لازمه اتوقع لان كل توقعاتنا بتطلع غلط

بس انا زعلانه وقلبي وجعني جدا

ربنا ينجيك يا ضحي

"ان الله يدافع عن اللذين آمنوا"

شارك هذه المشاركه


رابط المشاركه
شارك

الحمد لله حبيبتي ربي لطف ()

بما أن ضحى وأهدم تزوجا أظن أنها لن تسلمه نفسها وستتهرب منه وتشترط عليه أن يصلي ويلتزم وهو من حبه فيها سينفذ شروطها ويمكن يتوب فعلا على يديها وساعتها ضميره سيأنبه وهو الذي سيحضر خالد لها ويعتذر منه ويعترف بكل شيء -_-

احتمال بعيد لكن يمكن يحصل والله اعلم ^_^

شارك هذه المشاركه


رابط المشاركه
شارك

ازيكو يا بنات يا عسولات

 

قبل ما انزل الحلقة عايزة اسأل فين أم بشار وعبد ؟؟؟؟؟؟؟؟

 

بقالك كام يوم ما دخلتيش المنتدى حبيبتي , لعل المانع خير إن شاء الله

 

 

أم ميساء المسلمة

 

حبيبتي السافندي هو فاكهة اليوسفي او اليوستفندي ههههه في القاهرة بيقولوا عليه يوسفي او يوستفندي , لكن اخواتنا في اسكندرية بيقولوا سفندي

 

كل واحد ولغوته بقى ههههه , وانا سمعت معلومة زمان مش متأكدة من صحتها ان اللي دخل زراعة الفاكهة دي في مصر واحد اسمه يوسف افندي وبعدين الاسم اتحرف ليوستفندي ههههههه والله اعلم

 

المشكلة ان في مشكلة في المنتدى في رفع الصور وإلا كنت حطيت صورته , بس اعتقد انه عندكو , الله اعلم برضو هه

 

بالنسبة للسحلب فهو مشروب من ضمن مشروبات الشتاء عبارة عن مسحوق ابيض وبيتضاف له لبن وسكر ويتحط على النار ونستمر في تقليبه لحد ما قوامه يتقل ويتصب في كاسات ويتذوق بالمكسرات والزبيب ويتشرب بالهنا والشفا ههههه حقيقي طعمه حلو , اتفضلي معانا يا عسل هههه

 

 

 

بشكر كل اخواتي الحبيبات على الاهتمام والدعوات الطيبة , تقبل الله دعائكن ولكن بمثل إن شاء الله

 

ليا عودة للترحيب ان شاء الله يا عسولات

 

 

فين حبيباتي

 

رجائي في الله كبير

 

قرآني حياتي

شارك هذه المشاركه


رابط المشاركه
شارك

تن تن ست سميرة

 

ادخلي يا اعتماد

 

انتي صاحية يا حاجة ؟

 

الضيوف مَشَوا يا اعتماد ؟

 

هههه عايزاني نمشي من غير ما نشوفوكِ يا سميرة ونقولولك الف لا بأس عليكِ !!!!!!

 

سعااااااااد !!!!!!

 

ايوة سعاد هههه نستيني !!!!!!!!

 

اخرجي انتِ يا اعتماد

 

حاضر يا حاجة

 

عايزة ايه يا سعاد

 

طب ما انتِ كويسة اهو , اومال بيقولوا تعبانة ليه !!!!! ايه يا سميرة , مستكبرة ترحبي بينا في بيتك !!!!! داحنا حتى بقينا نسايب وابني اتجوز بنتك ودخلتهم بعد شهر , مبروك يا أم العروسة هيهيهيييي

 

.................. مبروك على اييييييييه ! على جواز ابنك من بنتي على غير رضايااااااا

 

ومش راضية ليه يا سميرررررررة لسة شايفة نفسك احسن مننا يا بنت الحاج جنيدددددددددي

 

ههه مهما عليتِ يا سعاد يا بنت الريس بنداري هتفضلي حاسة بالنقص , عقدة ومش هتتخلصي منها , نقولوا ايه

 

هي مين دي اللي حاسة بالنقص يا سميرة يا جنيددددددددي , فوقي لروووووووحك اني مرات الحاج عادل سليم اللي تتهزله اسكندررررررررية , اني اقل واحدة من معارفي ما تستنضفش تعرفكككككككك

 

هههههههههه مش بنقولك هتفضلي حاطاني في دماغك لحد ما تموتي ؟ اني لا جيبت سيرة اصلك ولا عايزة نفكروكِ بيه ولا انتِ في دماغي من اساسه , انتِ بقى اللي مش قادرة تنسي اصلك ومتهيألك ان كل الناس اللي يعرفوكِ وعارفين اصلك بيتكبروا عليكِ , لا يا سعاد , اني بنصلي ونعرف ربنا وعمري ما نفكر بالطريقة دي

 

هههههه بتصلي ! ربنا يجعلنا من بركاتك يا حبيبتي , ولما انتِ مؤمنة وتقية كدة مش كان الواجب ترحبي بضيوفك , داحنا مش أي ضيوووووف , احنا بقينا نسايب يا سميرررررررة

 

واني مش موافقة ع النسب ده , اوعى تقولي عشان الأصل والكلام الفارغ اللي في دماغك , لا يا سعااااد , اني مش موافقة عشان اخلاق ابنك اللي انتِ عارفاها كويسسسسس , اني كان عندي اهوّن نزفوا بنتي لقبرها ولا نزفوها لابنكككككككككككك

 

بقى كدة يا سميررررررة ! بقى موت بنتك عندك اهون من جوازها من ابني !!!!!!!! هو ده كلام بنات الأصول يا بنت الأصوووووول , يكون في علمككككك ابني ده تتمناه اكبر عائلات اسكندررررررية بس هو اللي ما بيفهمش في صنف الحريم واختار بنتك اللي ما تستاهلش تكون خدامة تحت رجلييييييييه , وكلامك ده هندفعوكِ تمنه غالي اوي انتِ وبنتك يا سميررررررررررة , اني ماشييييية

 

 

 

 

 

 

 

 

 

 

 

 

 

 

 

وصلنا الفيلا , خد امك وانزل يا ادهم واني هنوصل اوسا بيتها ونرجعوا

 

ماشي يا حاج هههههه , يا يامّاااااااا انزلي يا ام العريسسسسسسس

 

اني نازلة اهو يا ادهم , ما تغيبش يا عادل , وصل اوسا وتعالى على طول عشان عايزاك

 

ربنا يسهل يا سعاد

 

 

 

 

 

 

 

 

ترررررررررررررررررررررررررن تررررررررررررررررررررررررررررن

 

دي الست سعاد باين عليها جت

 

 

اهلا يا ست سعاااااااد ازي العروسة واهلهاااااااااا

 

اوعي من وشييييييييييييي

 

اديني وعيت , هي مالها داخلة بزعاببها كدة , شكلها راحت اتعاركت وجت , اني عارفاها ما تسترش في حتة , اهلا يا سي ادهممممممم

 

ههههه اهلا يا مرضعة قلوون , خلاااااااااص كلها شهر وسايبلك الفيلا ومااااااشي

 

اللهم لك الحمد , اني كنت بنستنى اليوم ده من زمااااااااان

 

قصدك اييييييييه , كنتِ مش طايقاني وعايزاني نمشييييييي

 

انت ما حدش يطيقيك برضو !!!!!!!!! هو اني هنكفر بالنعمة !!!!!!! طب دانت النار اللي مدفية البيت , انت الدبور اللي بيزن فوق راسنا ومونسنا , , دانت بلاعة الهنا والسعد اللي طفحت وغرقت الفيلاااااا داهية تاخدك اذا كنت بكددددددب

 

بلاعة في عينككككك , داهية في ملافظك اللي زي الدبش !!!!!! لا بتعرفي تتكلمي ولا تقولي كلمة عدلة جاتك الهمممممم , امييييييييي

 

 

لسة فاكر امككككككككك , امك اللي اتبهدلت من اللي يسوا واللي ما يسواااااااااااش

 

في ايه بس يا امّااااااااا احنا طول ما احنا في السكة وانتِ مكشرة وما بترديش على حد

 

كفاية انت قاعد تضحك وتكرر وفرحان بكتب كتابك ع المدعوءة بتاعتك ومش هامك امك اللي هتتفَلَق

 

طب ما تقولي يا امّا في اييييييه ؟ حد زعلك ؟ حد داسلك على طرررررف ؟؟؟؟؟؟؟؟؟

 

سميرة بنت جنيدي ما خرجتش تقابلني عشان مش موفقة على جوازك من بنتهااااااااا

 

ان شالله ما وافقتتتتتتتت واني عايز موافقتها في اييييييييه !!!!!!!

 

يرضيك تقول اني عندي نزفوا بنتي لقبرها اهون من اني نزفوها لابنك ؟؟؟؟؟؟؟؟؟؟؟

 

هي قالت كددددددددددة

 

ايوة قالت كدة بعلو حسهااااااا الست شايفاك مش قد المقاااااااااااام بتغلط فيك وفي اهلك كلهمممممممممم

 

بقى كددددددة ! طيب , اني هنربوهاااااااا وربنا ما هنعدوا اللي عملته ده مهما طال الزمممممممن

 

ههه ايوة كدة يا ادهم , هات حقك وحق امك من بنت جنيدي اللي فاكرة نفسها بنت بارم ديله , هاتيلي التليفون بتاعي من الشنطة يا شوقية خليني نكلم المحروس احمد نشوفوه ماجاش كتب كتاب اخوه لييييييييه

 

ايّوووووووووه ! طب ما هو سي ادهم برضو ما حضرش فرحححححححه

 

وانت مااااااالك حد سألك عن رأيك في حاااااااجة , بنقولولك هاتي التليفون يبقى تجيبيه وانتِ سااااااكتة , بتتحشري بيني وبين ولادي ليييييييييييه

 

اني مالي اني , ان شالله تاكليهمممممممم , خدي التليفون اهو يا ست سعاد ولا تزعلي نفسك

 

اووووووف الواحد هيلاقيها منين ولا منييييييين

 

تررررررررررررررررررررررررررررررن تررررررررررررررررررررررررررررن

 

دي امي ! السلام عليكم يا امي

 

وعليكم السلام يا خويااااااااا ما جيتش كتب كتاب اخوك لييييييييييييه

 

......... يا امي انتِ عارفة إن موقفي صعب

 

موقفك صعب قدام ميييييييييين قدام السنكوحة بتاعتك !!!!!!! خلاص عملتها واحدة ست وليها سعررررر !!!!!! بقى عشان الست تخسر اخوك يا جوز الستتتتتتتتتت

 

تووووء , يا امي من فضلك هيام ما غلطتش فيكِ عشان تغلطي فيها كددددة ! هيام بتتكلم عنك في غيابك بكل ادب

 

وهي تطلع مين دي عشان تغلطططططط , ما بقاش الا دي كماااااان ! وانت يللي بتصلي وعلامة الصلاة مالية وشك يللي ماسكلنا في الحلال والحراااااااام , مش حرام برضو تقطع اخوك عشان مراااااااااتك

 

يا امي من فضلك الموضوع مش كدددددددة ما تنسيش ان اللي اتجوزها اخويا كانت مخطوبة لاعز اصحاااابي

 

واعز اصحابك ده يكون مين ! مش اخو الست برضو !!!!!! يعني خلاص , استغنيت بالست عنناااااااا , كلها يا خويا واشبع بيهاااااااااا ويكون في علمك اني كل ما قلبي يتفتحلك انت اللي بتقفله , اني غلطانة اني اتصلت بيككككككككك

 

يا امي اميييييييي توووووء قفلت السكة , لا حول ولا قوة الا بالله

 

 

كنت بتكلم مين يا احمد ؟

 

............ امي يا هيام

 

في حاجة ؟

 

اصلها زعلانة عشان ما حضرتش كتب كتاب ادهم

 

............................... هو خلاص كتب كتابه ؟

 

ايوة

 

كنت روحت يا احمد عشان ماحدش يقول انك واخد صفنا

 

يا هيام صدقيني حتى لو ما كانش خالد يبقى اخوكِ وكان صاحبي ومافيش بيننا نسب برضو ما كنتش هحضر فرح اخويا اللي خد منه عروسته , اللي ما يعرفش انه حرام يخطب على خطبة اخيه

 

.............................. العيب مش على اخوك , العيب ع اللي وافقت تتخطبله وترمي الشبكة لاخويا , اني نفسي ننسى يا احمد , مش عايزة نفتكروا حتى اسمهاااااا , اني بنكرهوهاااااا بنكرهوها اوي اهئ اهئئئئئئئئ

 

معلش يا هيام , بكرة ربنا هيعوض خالد , ما تزعليش نفسك بقىىىىى , اذا كان خالد نفسه مش زعلان هه

 

خالد مش زعلان ! خالد بيتظاهر انه مش زعلان , بيداري عني وعن ماما عشان يخفف عننا وخصوصا عن ماما اللي لحد دلوقتي مش مصدقة اللي حصل من ضحى وطول ما هي قاعدة تضرب كف على كف وتقول ليه كدة يا ضحى , شوفتي مننا ايه وحش عشان تعملي فينا كدة , دي ماما هتتجنن بسبب سفر خالد اللي هيسيب البلد بسبب ضحى واللي عملته فيه

 

 

ترررررررررررررررررررررررررررررررن ترررررررررررررررررررررررررررررررررررررررررررررررررررررررررررررررررررررررررررررررررررن

 

ايه ده ! مين اللي جايلنا دلوقتي ! خشي جوا يا هيام اما نشوفوا مين

 

حاضر

 

 

 

 

ايه ده معقول ! خااااااااالد

 

هههه مفاجأة حلوة مش كدة ؟ السلام عليكم يا احمد

 

هههه وعليكم السلام يا خاااااالد , ايه المفاجآت الجامدة دي !!!! ههههههه اتفضل ادخل

 

طبعا هندخل , اومال فين اختي حبيبتي , يا هيوووووووووووومة

 

خاااااااااالد ههههه يا حبيبي نورتنييييييييي ايه المفاجأة الحلوة دددددددي

 

ربنا يخليكِ يا هيومة , لقيت نفسي فاضي وام خالد مالهاش مزاج تعمل عشا , وبنقولولها عايز نتعشى يا امي قالتلي عندك حتة جبنة في التلاجة , طلعها وطلع طماطامية واتعشى , قولتلها لاااااا اني هنروح نتعشى عند اختي ههههههه

 

ههههه يا حبيبي يا الف اهلا وسهلاااااااا

 

اني مش عايز ترحيب , اني عايز ناااااكل هههه طابخة ايه يا هيومة

 

داني عاملة صنية رقاق بالحمة المفرومة في الفرن وجنبها دكر بط يستاهلوا بقك هههه واني واحمد والله كل شوية نأجل العشا ومالناش نفس

 

اني هنفتح نفسكو , الحقينا بصنية الرقاق ودكر البط الله يخليكككككككِ ههههه

 

ههههه من عنيا حاضرررررر , والله فرحتني بمجيتك دي ياخالد الله يفرح قلبك يا خويااااااا

 

هههه تسلميلي يا هيوووووومة

 

ازيك يا خالد , عامل ايه

 

الحمدلله يا احمد , اني خلاص مسافر الاسبوع الجاي

 

بالسرعة دييييي !!!!!!

 

هه الإجراءات خلصت وتذاكر الطيران اتحجزت , اني عشان كدة قولت نيجي نقضي معاك الليلة دي انت وهيام , كنت حاسس انكو واحشيني اوووووي

 

.......................... اني مش عارف نقول ايه يا خالد , بس اني حزين , حزين اوي انك هتسافر , ومش عارف انت ليه اتسرعت في قرار السفر , انت هنا كان مستقبلك كويس وربنا مسخرلك الدكتور طلعت اللي بيعتبرك ابنه , يعني كان في مدة قصيرة اوي هتثبت كفائتك وتعلى في شغلك

 

اني عارف يا احمد ان الدكتور طلعت كان واقف جنبي ولحد دلوقتي واقف جنبي , وعارف ان فرصتي هنا في اثبات كفائتي كانت كويسة , لكن اني ...... اني عايز نبعد يا احمد

 

تبعد عن ايه بس يا خاااالد , اللي حصل حصل وهي اللي اختارت , والدنيا ما بتقفش عند حد , وانت مش ضعيف يا خالد

 

معلش يا احمد , اني حاسس ان راحتي في السفر , خلي بالك من امي , خلي بالك من هيااااااام , اختي امانة في رقبتك

 

ما توصنيش عليهم , اختك تبقى مراتي وحتة مني وامك هي امي , مش من النهاردة , هي امي من زماااااان , امي اللي يامَا سَمَعت شكوتي وياما خففت عني العذاب اللي اني فيه , ما توصنيش على امي يا خالد

 

ههه اني عارف يا احمد انك مش عايز توصية , بس برضو لازم نوصيك

 

ههههه دانت رزل بقى

 

هههههههههههههههههه

 

البط والرقاق العسل يا ناس يا عسسسسسسسل ههههههه

 

يلا يا خالد شمر وحصلني ههههههههههه اني مش هنستنوكككككك ده بط ورقاق يا عمممممممممم

 

ههههههههههه لا استنى نقلعوا الجاكيت بقى عشان نعرفوا ناكلوا براحتيييييييييي

 

 

 

 

 

 

 

 

 

 

 

 

 

 

 

 

 

 

تررررررررررررررررررررررررررررن ترررررررررررررررررررررررررررررررن

 

امّااااااااا افتحي يا امّااااااااااا اني اتنصب عليا يا امّااااااااااااااااا

 

ايه ده ! مين اللي بيجعر برااااااااا

 

اني سااااااااااااامي , هو في حد بيقولك يا امّا إلا انيييييييييي !!!!!!!!!!!!!

 

اهلا يا سامي , مالك يا حبيبييييييييييي

 

ااااااه يا امّاااااااااا اتنصب عليا يا امّاااااااااا

 

يا مصيبتي !!!!! اتنصب عليك يعني اييييييييييييه

 

بت حرامية ما تسواش تلاتة ابيض خدت بضاعة وما جابتش تمنهاااااااا

 

بضاعة بكام يا ولا

 

بخمسة وعشرين الف جنيي

 

يا وقعتك اللي زي الهباااااااااااب , خمسة وعشرين الف جنيي مرة واحدة يا ولاااااااااا , وازاي البت دي نصبت عليك ازاااااااااااي هو انت اهبل اوي كدة وبيضحكوا عليك الحريمممممممممم

 

يا امّا اني ما كنتش واخد خوااااااانة , اني بنتعامل مع البت دي بقالي اكتر من سننننننننة , بس باين عليها بت دماغها زي الداهية ومش سااااااااااهلة , كانت بتاخد بضاعة بسيطة ولو اتبقى عليها مبلغ تيجي تاني يوم تجيبه ال يعني البت امييييييينة

 

هي اسمها امينة يا ولاااااااااا

 

امينة مين يا امّا اني كماااااااااان ما تركزي معايا بدل ما نقوموا نولعوا في نفسييييييييي

 

لا اطمن , ابوك لما يعرف هو اللي هيولع فيككككككك , كمل يا هافيّة الحريممممممممم

 

يامّا نكمل نقول اييييييييه , البت هبرت الهبرة واختفت يامّاااااااا

 

عنوانها فين واني نروحوا نهدوا الدنيا ونجيبوا الفلوس من حبابي عنيهااااااااااااا

 

هو اني لو عارفلها عنوان هنيجي نعيط جنبك زي النسوااااااااان !!!!!! البت اديتني عنوان غلطططططط قالتلي انها ساكنة في المحلة الكبرررررررررررى

 

يادي الوكسة الكبررررررى , فأنهي حتة في المحلة يا ولا اخلصصصصصصص

 

يا امّا اني خدت الولا حمو وروحنا المحلة ولفيناها شارع شارع وحارة حارة وما عترناش في البت دددددددي وفي الآخر روحت عشان اعمل محضر الظابط قالي فين الضمانات اللي خدتها عليها وريته وصل الأمانة بص فيه ما لقاش رقم بطاقتها قالي بله واشرب ميته وما رضيش يعمل المحضررررررر

 

هو انت يا ولا خدت عليها وصل امانة من غير رقم بطاقتها ؟؟؟؟؟؟؟؟

 

ايوة يا امّاااااااا , كنت مآمنلها لكن طلعت غدارة ومالهاش آمااااااااااااااان

 

ممممم هي حلوة البت دي يا ولا ؟؟؟؟؟؟؟؟؟؟

 

ايّووووووووووه يامّا ايه اللي دخل حلاوتها في الموضوووووووع

 

حلاوتها هي اساس الموضووووووع , اكيد البت حلوة وعينك زاغت عليها وعشان كدة اديتلها البضاعة وانت بتضحك يا اهبببببببل , خلاص النسوان لحسوا دماغك يا ابو عين زايغغغغغغغة , ضيعت البضاعة وبكرة تضيع المحل يا خايب الرجااااااااااااا

 

كدة يا امّاااااااااا , واني اللي سايب الدنيا وجايلك اترمي في حضنك ونعيطططططططط

 

عيطوا عليك بدري يا تلفان يا صدمااااااااااان , واني اللي بنقول لابوك يكتبلك كل حاجة بيع وشرا عشان انت اولى من بنات كُوكبببببببببب !!!!!!!! اهي بكرة كوكب تعرف هي وبناتها بالخيبة اللي احنا فيها ويعملوا سيرتنا مستيكة في بقهممممممم , يا فرحة قلبك فينا يا كُوكبببببببببببب

 

الله يخرب بيت كوكب وسنين كُوكب يا امّاااااااااااا , هو اني جايلك تشوفيلي حل ولا جايلك عشان تندبي !!!!!!!

 

حل ايه يا خويا اللي هنشوفوهولككككككك

 

ياامّا ابويا لو عَرَف بالليلة دي هيبهدلنييييييييي ده ممكن يطردني من المحل ويشردني

 

والله يبقى راجل من ضهر راجل لو عملهاااااااا , عشان انت عايز تتعلم الأدببببببببببب

 

استري عليا يامّاااااااا , استري عليا وما تفضحنيشششششش , عايزين نحط المبلغ ده بتاع تمن البضاعة في الخزنة عشان لما ابويا يسأل ع البضاعة نقولوله بعناها وتمنها اهووووووو

 

يا سلااااااااام ! وهنجيبوا خمسة وعشرين الف جنيي منين يا حيلة قلبي !!!!!!!!!

 

منين ايه بس يا امّا ! من الفلوس اللي انتِ مخزناهاااااااااا

 

انيييييييي ! هو اني يا ابني حيلتي ابيض ولا اسود !

 

يامّا دانتِ لابسة صيغة تفتح محلين مجوهرااااااااات

 

الله اكبر في عينكككككك , اوعى ليك دعوة بالدهب ده ولا تجيب سيرتتتتتته , اني كل ما كان يتكسر معايا قرش كنت اروح اجيب حتتين صيغة واقول اهم مسيرهم للزمن , تقوم انت جاي بصنعة لطافة عايز تاخد مني صيغتي !!!!!!!!! روح اتصرف بعيد عني يا سااااااااااامي , الدهب ده اللي طَلَعت بيه من جوازي من ابوووووووووك , ولّا اني يعني كنت متجوزاه عشان سواد عيونه !!!!!! ده شقى عمررررررري واني عمري ما يضيعش هدر يا سااااااااااااامي

 

بقى كدة يامّااااا ! يعني ده اخر القول ! يعني مش هتساعديني يا امّااااااااا ؟؟؟؟؟؟؟

 

المساعد ربنا يا سامي , هو انت تبصبص للحريم واللي اللي ندفعوا التمن من شقا عمري !!!!!!! اتوكل على الله شوفلك حل بعيد عني , واني المساعدة اللي هنعملوها اني مش هنجيبوا لابوك سيرة لحد ما تتصرف

 

ماشي يا امّااااااا ماشي , ابقي افتكريها يامّاااااااا , سلاااااااااام

 

الله يسلمك يا سبع البرومبة , عجايب والله , يوم من اوله غريببببب , اتنكدنا في كتب كتاب ادهم بسبب العيلة المشنكلة اللي ناسبها واخر الليلة ختمت بخبر النصب على ساااااامي , البت عروسة ادهم دي باين عليها قدمها نحس ع العييييييييييييلة

شارك هذه المشاركه


رابط المشاركه
شارك

اذكرن الله يا حبيبات , جعلني الله وإياكن من الذاكرات

 

 

سبحان الله

 

 

الحمدلله

 

لا اله إلا الله

 

الله أكبر

 

لا حول ولا قوة إلا بالله

شارك هذه المشاركه


رابط المشاركه
شارك

ايّووووووووه هو سامي اتأخر كدة ليه يا بت يا بدور !

 

الغايب حجته معاه يا ست اوسا , ما كلمتهوش ع التليفون الصغير اللي بيشيله في جيبه ليه !

 

محموله مقفول يا بت , اووووووووووف

 

مممم باين عليكِ بتحبيه اوي يا ست اوسا

 

مش حكاية حب يا بت يا بدور , اني بنقولك اني مش مرتاحة للسفرية بتاعته دددددي , قلبي مش مطمن وحاسة انه بيعمل حاجة من ورايا

 

هاااا ! الشر برا وبعيد يا ست اوسا , ده شيطان وبيوسوس في دماغك عشان يوقع بينك وبين سي سامي الطيب الأميررررررر

 

 

استني اما نطلبوه تاني يا بت

 

 

ترررررررررررررررررررررررررررررررررررن تررررررررررررررررررررررررررررررررررن افتحوا يللي جوااااااااااااااااااا

 

لا تطلبيه ولا حاجة , اهو سي سامي جه وبيرن الجرس اهو , اما نروحوا نفتحوله

 

روحي يا بت , يا ترى كان في انهي داهية المخفي طول النهااااااااار

 

 

ساااااامي ههه حمدالله ع السلامة يا حبيبي , دي اوسا قالبة عليك الدنيا وعقلها عمال يودي ويجيب من الصبحححححح

 

سيبك منها دلوقتي , اني كنت عايزك في كلمتين مهمين يا بت

 

في ايه يا سامي

 

لما اوسا تنام عشان نعرفوا نتكلموا , اني هنتسحب من جنبها ونجولك , بس خليكِ صاحية وفايقة للكلام

 

باين عليها حاجة كبيرة اوي ! ماشي يا سامي , ربنا يستر , ادخل لأوسا طمنها عليكككككك

 

 

 

 

مساء الخير يا اوسا

 

مساء النور يا سامي , ما لسة بدرررررري , كل ده في السفرية بتاعتك ! دانت خارج وش الفجر والساعة دلوقتي داخلة على اتناشررررررر , كنت فين ده كله يا سااااااااامي

 

ايّوووووووووه في ايه يا اوساااااااااا ما تسبيني ناخدوا نفسي من الطريققققققققق , بلاش نرتاحوااااااااااا !!!!!!!

 

ارتاح يا خويا , نخلي بدور تحضرلك العشا ؟

 

مش عايز نطفحححححححح شبعااااااااااان , شبعان من الدنيا كلهاااااااااا

 

ايّوووووووووه في ايه يا راااااااجل

 

نقولولك ايه بس يا اوسااااااااا , ادي اخرة اللي يساعد الحريممممممممم , اني بعد كدة هنشوفوا أي واحدة عايزة مساعدة هنحشّوا رقبتهاااااااااااا

 

واحدة !!!!!!! اني كان قلبي حاسس ان غيابك طول النهار سببه واحدددددددة , مالها يا خويا الواحدة , عملت فيك ايه يا عنتر زماااااااااااانك

 

بنقولولك ايه يا اوساااااااااااا اني ما نعرفش حاجة عن عنتر غير السيف اللي كان بيطير بيه الرقاااااااب , ما تخلنيش نعملوها معااااااااااكِ

 

يامّا خوفتنييييييييي , انتي بنترعبوا من الصوت العالي يا ولاااااااا هيهي , ال على رأي المثل , خدوهم بالصوت قبل ما يغلبوكووووو , اني عايزة نفهم اصل الحكاية وكنت فين طول النهار ومع ميييييييين

 

يا اوسا الحكاية مش زي ما انتِ فاهمة , اني هنقولولك ع الحكاية يا ام اويئ أأأ قصدي يا ام نورهاااااااان

 

احكي ياخويا بس لخص وادخل في المفيييييد

 

بقى اني يا بت جاتلي من كام يوم ست غلبانة وكحيانة وبتجري على يتامى وقعدت تعيط وتترجاني عشان ندوها بضاعة تتاجر بيها وتأكل العياااااااال , بقت هي تعيط والعيال حواليها يعيطو ويشدوا في هدومها ويقولوا جعانين يا امّااااااااااااا , ما نطولش عليكِ في الكلام , اني شوفت المنظر الدمعة فرت من عيني و وانتِ عارفة ان قلبي رهيف , وقولتليها خدي البضاعة اللي انتِ عايزاها يا حاجة

 

حاجة ! هي ست كبيرة ولا ايه ؟

 

ايوة , ست كبيرة , كبيرة اوووووووي كركووووووبة , عندها يجي سبعين سنة

 

نعممممممم ! سبعين سنة ازاي وعندها عيال صغيرين يا سااااااامي !!!!!!!!

 

هاااااا أأأأ لالالالا قصدي يعني ان اللي يشوفها من كتر الهم والحزن اللي هي فيه يديها سبعين سنة , لكن هي بتاعة اربعين كدة ولا حاجة , يعني في سنك كدة ولا اصغر حاجة بسيطة

 

سن مين يا راااااااااجل اني يا دوب عندي واحد وعشرين سننننننننننننة

 

لا يا راجل ! أأأ قصدي لا يا شيخة !!!!! معلش , اصل انتِ من كتر العقل اللي عندك اللي يشوف شكلك يديكِ اكبر من سنككككك

 

كمل يا سامي , عملت معاك ايه الست ام العيال دي ؟

 

نصبت عليا , نصبت عليا يا اوساااااااااا , سامي ابن الحاج مرشدي اتنصب عليه يا رجاااااااااالة

 

طب ازاي يعني واحدة ست غلبانة ومعاها عيال يتامى هتنصب عليككككككك

 

اكيد العيال دول مش عيالها يا اوساااااا , اكيد خطفاهممممممم

 

مش بعيد يا سامي , اني سامعة ان خطف العيال كتر اليومين دوووووول

 

ايّووووووووووه اني مالي ومال العيال اللي بيتَخَطَفووووو , اني دلوقتي عايز نحط تمن البضاعة قبل ما ابويا ما يشم خبر ان فيه بضاعة ناقصة في المخزن ويقولي فلوسها راحت فييييييييين

 

هي الفلوس قد ايه ؟

 

خمسة وعشرين الف جنيي

 

ايّوووووووووووووووووووووه بقى تدي ست ماتعرفهاش بضاعة بخمسة وعشرين الف جنيي !!!!! ليها حق تاخدها وتهرررررررررب , طالما لقيته مال سايب ومالوش صااااااااحب

 

يعني ده جزائي عشان قلبي حنين يا اوساااااااااا

 

طب ابقى خلي قلبك الحنين ينفعك يا خوياااااااا

 

طب وانتِ يا اوسا

 

اني نعملولك ايه ان شاء الله !!!!!!!

 

هاتي خمسة وعشرين الف جنيي من الفلوس اللي محوشاها واني لما ربنا يكرمني هنردوهالك

 

فلوس محوشاها ! منين يا حسرررررررررة

 

من المصروف اللي ابوكِ بيدهولك

 

هو انت فاكر اني بنحوش من الفلوس اللي بابا بيدهالي !

 

اومال بتعملي بيها ايييييييه

 

دول يا دوب مكفييني صابون وشامبو وشاور جيل

 

يا سلام ع النضافة يختيييييييي , يا اوسا اطلعي من دول يا اوساااااااا جوزك واقع في ورطة ولازم تقفي جنبه , ان ما كانتش مراتي تقف جنبي نروحوا لميييييييين

 

روح لامككككككككككك اهي ما بتقدرش ترفع دراعاتها من الدهب اللي لابساااااااااه

 

روحتيلها قبل ما اجي

 

وقالتلك ايه ؟

 

ما رضيتش تديني الفلوس يا اوسااااااااااا

 

طيب يعني امك اللي هي امك ما رضيتش تديك الفلوس , عايزني اني ندهالك !!!!!!!

 

يا مساء الندالة يا اوسااااااااااااا

 

استندل احسن ما اخسر فلوووووووسي , تصبح على خير يا سمسمتي يا حلو يا مسمسم انت انجغا يختي انجغا يا كتكوتة يللي بيضحكوا عليكِ النسواااااان هههه

 

اوعي ايدككككككككك ال انجغا اااااال , اني على اخر الزمن يتقالي انجغااااااا !!!!!!! والله واتسخطت يا سامي على ايد الحريمممممممم

 

 

 

 

 

 

 

 

 

 

 

 

 

 

 

بدارة بت يا بداااارة

 

ايوة يا سامي اني صاحية ادخل

 

كويس انك ما نمتيش يا بت

 

نناموا ازاي وانت قايلي استنيني

 

طبعا عَرَفتي بللي حصل

 

ايوة , سَمَعتك انت واوسا بتتكلموا , بقى دي اصول يا ساااااامي , انت برضو يا تاجر يا ابن السوق تضحك عليك واحدة ست وتسحب منك بضاعة بالآلافات من غير ما تأمّن نفسكككككك

 

تووووء مش وقته يا بت الكلام ده , اني جاي قاصدك في خدمة

 

خدمة ! خدمة ايه ؟

 

............ فلوس الشقة اللي شيلاها عند اختك

 

يا مصيبتييييييي !!!! انت هتاخد الفلوس اللي بتدهالي ونحوشوها عشان نجيبوا شقة تلمنااااااااا !!!!!!

 

يا بت مصيبة ايه بسسسسسس , وطي صوتك واعقلي شووووووية , اني هناخدوا الفلوس عشان نحطوا تمن البضاعة اللي خدتها بنت ال .......... اااااااخ لو نشوفوها قداااااااااامي كنت نخنقوها ونطلعوا روحهااااااااا , اسمعيني بس يا بدارة , اني هناخدوا الفلوس ولما ربنا يفرجها هندوهالك تاااااااااااني

 

تدهالي تاني ايه بس يا ساااااااامي تووووء ياسامي دانت بتديني كل سنة عشر تلاف وساعات خمسسسسة , دانت كدة هتخلينا نستنوا سنين فوق السنيييييييين اهئ اهئئئئئئئئ وبعدين في البخت ده بقىىىىىى اهئ اهئئئئئئئئ

 

يا بت بطلي عياط بقى اني مش ناقص وربناااااااا , فكري كويس يا بداررررررة , ابويا لو عَرَف بالموضوع اقل ما فيها هيطردني من المحل ونتسوح انا وانتتتتتتتِ , ساعتها بقى لا هنعرفوا نجيبوا شقة ولا هنلاقي ناكلوا من اصله , لكن واني في المحل نقدروا نعوضوا الفلوس , يا بت افهمي وكبري دماغك بقىىىىىىى

 

هنقولوا ايه ! مالك وانت حر فيه يا سامي اهئ اهئئئئئ حاضر هنجيبوا الفلوس من اختي اهئ اهئئئئئ

 

ههه ربنا ما يحرمني منك يا حبيبتي , اني كنت عارف ان انتي اللي هتقفي جنبي , وكنت عارف ومتأكد ان اوسا هتستندل معايا وامي مش هتعبرنيييييييي

 

........... عايز الفلوس امتى يا سامي

 

بكرة الصبح يا بت تستأذني من اوسا وتروحي تجيبهم واني هنستنوكِ على الإمة عشان ناخدوهم منك

 

.......... ماشي يا سامي , ممكن تسيبني بقى عشان مش قادرة نتكلم

 

ههه ماشي , ربنا ما يحرمني منك يا بدارة , طول عمرك جدعة يا بت

 

 

 

 

 

 

 

 

 

 

 

 

 

 

 

بنقولولك ايه يا بدارة , اني هننزل دلوقتي ونسبقوكِ , وانتِ استأذني من اوسا وحصليني على طوووول , ما تتأخريش يا بدااااااارة

 

طيب يا سامي طييييييب اوووف

 

 

ايه ده ! اني سَمعت صوت الباب بيفَتَح ويتقَفَل , حد جه ولا ايه يا بت يا بدورررر

 

لا يا ست اوسا , ده سي سامي نَزَل

 

نَزَل ! نزل بدري كدة ! تلاقيه رايح يشوف صرفة للبلوى اللي عملها قبل ابوه ما يدرى , اني داخلة نكملوا نوم يا بت , صحيني ع الساعة عشرة , ممم ولا نقولك سيبيني نصحى لوحدي لما نشبعوا نوووووووم

 

طب استني بس يا ست اوسا

 

عايزة ايه يا بت ؟

 

معلش اني يعني بنستأذنك اني هنخطفوا رجلي ونروحوا نطلوا على امي , أأأ اصل امبارح واني بنكلموها على تليفون الجيران سَمَعت صوتها متغير كدة , باين عليها تعبانة حبتين

 

هتغيبي يعني يا بت

 

لالالالا مسافة السكة وهنيجي على طول

 

طب خدي معاكِ المفتاح , وتيجي على طول يا بت عشان نورهان لو صحيت ما لقتكيش هتقعد تزن وتعيط وتقلبلي دماغييييييييي

 

لالالالا ما تخافيش يا ست اوسا , قولتلك مسافة السكة ونكونوا هنا , نطمنوا بس على امي عشان مش هاينة عليا

 

ههه انتِ حنينة يا بت , ليها الحق البت نورهان تحبك , اصل العيل تبع الحنية

 

هههه نورهان دي بنحسوا انها بنتي وربنا , عن اذنك يا ست اوسا عشان نخلصوا مشواري ونلحقوا نيجي بدري

 

طيب يا بت , المفتاح عندك جنب التليفزيون , اني داخلة ننام

 

نوم العوافي يا ست اوسا , الله يسامحك يا ساااااااااااامي , شكلي هنندموا ندم عمري ع الجوازة دددددددي

 

 

 

 

 

 

 

 

 

 

 

 

 

 

 

 

ترررررررررررررررررررررررررررررررن ترررررررررررررررررررررررررررررن

 

جرس الباب بيرن يا سلااااااااامة يكون مين اللي جايلنا وش الصبح كدة !

 

يمكن تكون امك يا ابتسام

 

امي صحيح بتصحى بدري لكن عمرها ما تنزل عندي قبل عشرة الصبح على تكون انت نَزَلت ع الورشة

 

تررررررررررررررررررررررررررررررررررررررررررررررررررررررررررررن

 

طيب اني هنشوفوا مين وندخل نلبس عشان ننزل

 

 

مين ! بدارة !!!!!

 

صباح الخير يا سلامة

 

صباح النور يا بدارة , خير ! ايه اللي جايبك بدري كدة !

 

اصل عايزة ابتسام في حاجة ضروري , هي فين

 

اهي عندك جوا , يا ابتساااااااااام , بدارة اختك

 

بدااااااااارة !!!!!!! اهلا يختي , خير يا بدااااااارة ؟ انتِ كويسة ؟؟؟؟؟؟

 

اني بخير يا ابتسام ما تتخضيش ممممم اني بس كنت عايزاكِ في كلمتين

 

خدوا راحتكو , اني داخل نلبس عشان ننزلوا الورشة

 

طيب يا سلامة , تعالي يا بدارة , اقعدي يا حبيبتي

 

ازيك يا ابتسام وازي الولا وجدي ؟

 

وجدي بخير الحمدلله , بس نايم , نصحهولك ؟

 

لالا خليه نايم ومرتاح , نبقى نشوفوه مرة تانية على رواقة رغم انه واحشني وربنا , بس اني مستعجلة

 

قلقتيني يا بدارة , في ايه يختي

 

الأول اني مش عايزة امي تعرف اني جيت وما طَلَعتش عندها عشان ما تزعلش مني

 

لا متخافيش , مش هنجيبولها سيرة , اتكلمي يا بدارة عشان انتِ وغوشتيني

 

اني عايزة الفلوس اللي شايلاها عندك

 

اييييييييه ! الفلوس !!!!!!!!!!!!!!!

شارك هذه المشاركه


رابط المشاركه
شارك

السلام عليكم و رحمة الله و بركاته

هبة الحبيبة الحمد لله على سلامة زوجك و ربنا يحفظكم من كل سوء

فرحت جدا لسؤالك عني

الايام اللي فاتت ما نزلتش الشغل و قرات النهارده الحلقات

حزينة جدا عشان ضحى لكن أكيد حتفرحينا تاني لأأنها فعلت كل هذا خوفا على من تحب

ربنا يسعد قلبك و يرزقك بما تحبي

سلامي لكل الأخوات الحبيبات

شارك هذه المشاركه


رابط المشاركه
شارك

السلام عليكم و رحمة الله و بركاته

جميلة الحلقات يا هبة

سامي وقع في شر أعماله يستاهل

و أم ضحي عاجبني موقفها جداً

بس أدهم شرير و ها يخلصه من ضحي المسكينة

ربنا يخلصها منه

شارك هذه المشاركه


رابط المشاركه
شارك

دى سعاد ناويه لضحى هطلع كل غلها فى ضحى

بس إن شاء الله مش هتم الدخله

ادهم مش بيحترم حد لا كبير ولا صغير بيقول على اللى اد والدته هاربيها !!

 

سعاد بيزعق لاحمد هى طبعا مستقويه على الطيب لكن ادهم سايباه على راحته

 

بدارة هتبقى فى مشكله هى كمان مع اختها وسامى ممكن ميصدقهاش او يصدقها بس يفضح الدنيا

وساعتها ينكشف

 

حلقات جميله

 

 

 

الله يسلمك من كل سوء يارجائى فى الله كبير

  • معجبة 1

شارك هذه المشاركه


رابط المشاركه
شارك

 

هه تسلمي خالتو، صراحة من كلامك مفهمتش حاجة، بس لمن شوفت صورتها إللي نزلتها سارة عرفته..

ما شاء الله ده السفندي له تاريخ عريق معاكو ههه

عزومة مقبولة خالتو، قد ايه هو لذيذ تسلم ايدك هه^^

جزاك الله خيرا سارة تعبتكو معي يا عسولات، تعرفو انا عايزة أعرف إزاي بتسوو السحلب ده بالتفصيل، لأن واضح انه لذيذ ههه.

حمدا لله على سلامة زوجك خالتو هبة..

شارك هذه المشاركه


رابط المشاركه
شارك

 

هه تسلمي خالتو، صراحة من كلامك مفهمتش حاجة، بس لمن شوفت صورتها إللي نزلتها سارة عرفته..

ما شاء الله ده السفندي له تاريخ عريق معاكو ههه

عزومة مقبولة خالتو، قد ايه هو لذيذ تسلم ايدك هه^^

جزاك الله خيرا سارة تعبتكو معي يا عسولات، تعرفو انا عايزة أعرف إزاي بتسوو السحلب ده بالتفصيل، لأن واضح انه لذيذ ههه.

حمدا لله على سلامة زوجك خالتو هبة..

شارك هذه المشاركه


رابط المشاركه
شارك

حلقات جميلة .بارك الله فيك .ولكنها مختصرة .كمان كم يوم حنعمل حفلة بمناسبة ان المسلسل بقى عمره سنة .طبعا هادا اول مسلسل اتابعه معاك يا هبة حلقة حلقة .

 

واضح ان اكتشاف زواج سامي وبدارة قرب .الا ازا كانت هبة عايزة تنهي الزواج قبل ان يظهر للناس بعد حدوث مشكلة بين سامي وبدارة تنتهي بالطلاق .كل شيء عند هبة جائز .ههه.ما عدا ما يخطر على بالنا

بالنسبة لادهم الله اعلم نهايته يعني مسموح له ما يحضرش زواج احمد بينما احمد لا يجوز له الغياب .اوسا وسعاد وعادل وتوحا جميعا عايزين قرصة اذن جامدة

بانتظار ما ستسفر عنه الحلقات

شارك هذه المشاركه


رابط المشاركه
شارك

الله المستعان

 

حقيقي شخصية سعاد سيئة جداً

الحمد لله الذي عافانا

 

هي وأختها من البداية مستغلين شكلهم الجميل لإغواء رجلين غنيين

توحا بتقول لابنها امال اتجوزت ابوك ليه ، عشان سواد عيونه

يدل فعلا على وضاعة هذه الشخصية

 

وديننا الحنيف بين لنا ان في الجاهلية كانت تنكح المرأة بسبب قبيلتها

واليهود يزوجون للمال

والنصارى للجمال

اما الإسلام ، فاظفر بذات الدين تربت يداك

 

سعاد كل همها دنيا زائلة ، يدل على تفاهة التفكير

" ما أغنى عنّي ماليه هلك عنّي سلطانيه "

 

وعادل سليم وحش المنيا اللي بسببه اتكبرتي على خلق الله

ماذا سيفعل لك وأنت واقفة بين يدي الله

" فيومئذٍ لا يعذب عذابه أحد

ولا يوثق وثاقه أحد "

 

ناس منكبة على الدنيا انكباب رهيب

وعندها قصر نظر لدرجة تراها كأنها كل شيء

وهي في الحقيقة ليست بأي شيء سوى

" الذي خلق الموت والحياة ليبلوكم أيكم أحسن عملاً وهو العزيز الغفور "

 

لنحمد الله كثيراً يا حبيبات على ما هدانا له

وعلى نعمته علينا أن جعلنا نبصر هذه الحقائق بفضله

ولا ننس أبداً شكر نعمه

 

فقد يمكن أن نكون غافلين مثلهم وأشد

لكن من منّ علينا أن نذكر الله عزّ وجلّ !

اللهم لك الحمد

 

فإذا ما قابل المرء شخص في الحقيقة على ذنب ما

لا ينبغي ابدا ان يظل يحقره بينه وبين نفسه ويعدد مساوئه ويظل يكرر بداخله " أنا خيرٌ منه "

الكلمة التي اهلكت ابليس !

بل يقول كما قال الشيخ الشنقيطي حفظه الله

" من أنا حتى يقيمني الله

من أنا حتى يوفقني الله لعبادته

من أنا حتى ينيم غيري ويجعلني أصلي بين يديه والناس نيام

وكان يقول أن أحدهم يخرج لصلاة الفجر لا ينسى شكرها حتى يرجع إلى بيته

 

ويظل يعدد نعم الله حتى يدرك أنه لا شيء وهذه هي الحقيقة

 

اما الكبر وازدراء الناس والنظر بعين من أعلى فليست سوى من آفات القلوب ومهلكاته

كما أن العجب من محبطات الأعمال

لا يدخل الجنة من كان في قلبه مثقال ذرة من كبر " فيما معناه "

 

اللهم آت نفوسنا تقواها وزكها أنت خير من زكاها أنت وليها ومولاها

 

عذراً على الخروج عن الموضوع قليلاً لكن لا بد أن ندرك هذا حتى لا نقع في هذا الخطأ الرهيب حتى لو كان داخلياً فقط ولا يظهر سوى التواضع !

 

اللهم أصلح قلوبنا ووفقنا إلى ما تحب وترضى

 

جزاك الله خيراً هبة الحبيبة. : )

  • معجبة 2

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏من خاف زلة القدم بعد الثبات، فليجعل له حظا من عبادة السر والقُرُبات، وليحرِص عليها حتى الممات.

×