اذهبي الى المحتوى

المشاركات التي تم ترشيحها

اهلا اهلا .انا هنا .ههههه.اصل ساعات بأخر التعليق وبنسى

الحلقات اليوم حلوة .

شخصيات جديدة دخلت المسلسل .بحس اننا داخلين دوامة مالهاش نهاية .يلا معاك معاك يا ستي

اللهم اجعل هذا العمل في ميزان حسنات هبة نور .واجعل لنا منها نصيب .

شارك هذه المشاركه


رابط المشاركه
شارك

صح يا محبة زى ماقلت ممكن ضيا هو اللى يتجوز صابرين بالعند فى عادل ومراته :P

شارك هذه المشاركه


رابط المشاركه
شارك

حلقات رائعة

 

بس حتى لو جه عريس لصابرين عادل وسعاد مش هيسكتوا

وبعدين مش هيام مش عاجبة سعاد عشان مستواها المادى اومال فرحانه ليه بصابرين ما هو نفس المستوى تقريبا دماغ عجيبة فعلا

بس برضه اللى فى دماغهم مش هيحصل ان شاء الله

 

 

ادهم شخصية زبالة انا كنت متخيلة ان حبه لضحى هيهذب طباعه معاها على الاقل بس ده مش حب ده حب تملك

  • معجبة 1

شارك هذه المشاركه


رابط المشاركه
شارك

تسلم ايدك ع الحلقات يا هوبه

تدبير ام صابرين وعادل مش هيتم ان شاء الله

وضحي صعب حقيقي موقفها

وسفر خالد صعب جداً

فعلا حلقات مؤثره

وفصل موردي من الشغل

 

 

 

بانتظار الحلقات

 

اعذريني يا هوبه والله في عدم ردي غير نادر مشغوله جدااااااا

ودعواتك ليا يا قلبي

 

شارك هذه المشاركه


رابط المشاركه
شارك

كابتن هو كله نكد نكد كده مفيش شوية فرح الله يخليكِ

ضحى تستاهل اكتر من كده بصراحه

ام خالد ست طيبة جدا وفعلا ضحى خسرتها

هزعل جدا جدا جدا لو احمد اتجوز صابرين وخضع لضغوط اهله

اعتقد اللى هيشتغل جديد ده يتقدم لصابرين

شارك هذه المشاركه


رابط المشاركه
شارك

واعلم أن النصر مع الصبر ، والفرج مع الكرب ، وأن مع العسر يسرا

 

: )

شارك هذه المشاركه


رابط المشاركه
شارك

خلتيتي اعيط يا هوبة سفر خالد مؤثر جدااا

وكمان موردي زعلت علشانه

وضحي مش حاسة انهل ها تتدوح ادهم بس مش ها تخليه يقربلها خالص وبعدين ها تقطع العقد وتسيبة الصراحة حيره جامده جداااا

معلشي كنت مش عارفه اغلق علشان كان موبايلي عطلان...

شارك هذه المشاركه


رابط المشاركه
شارك

هههههه والله انتِ شرفتينا يا مدام زوزو

 

هههههه ده من ذوقك يا مدام ناهد , الله ! احنا ليه بنحط القاب كدة قبل اسامينا ! انا زوزو وانتِ ناهد

 

ههههههه خلاص يا زوزو , اهلا بيكِ يا حبيبتي منوراني , اشربي الشاي مع الكيك وقوليلي رأيك في عمايل ايديا ههههه

 

 

استني اما ادوق الكيك كدة ممممم الله ! تسلم ايدك يا ناهد يا حبيبتي هههه

 

هههه ميرسي يا زوزو يا روح قلبي , لكن صحيح ما جبتيش الولاد معاكِ ليه ؟

 

ما ينفعش يا حبيبتي , انا عندي ولدين , الكبير محمد تالتة طب والصغير يوسف اولى هندسة

 

ههههه ماشاء الله , ربنا يخليهوملك

 

ميرسي يا ناهد يا حبيبتي , عشان كدة بقى ما بيخرجوش معانا ههه شباب بقى وليهم العالم الخاص بتاعهم

 

انتِ هتقوليلي ! ههههه مجربة يا حبيبتي مجررررربة , معتز ومازن نفس الطريقة والله

 

ماشاء الله عليهم , هما بيدرسوا ايه ؟

 

معتز اولى هندسة اتصالات و مازن ثانوية عامة

 

ماشاء الله , ربنا معاهم يارب , لكن ما عندكيش بنات زي حالاتي ولا ايه ؟ انا متهيألي ان عندك على ما سمعت

 

ههههههه ايوة عندي بنوتة , اسمها هديل في شهادة الميلاد , بس ساعات نناديها هدير ههههه

 

هههه مافرقتش كتير , اومال هي فين ماجاتش سلمت عليا ؟

 

هناديها يا زوزو , اصلها بتتكسف مووووووووت , خجولة بشكل مش طبيعي لدرجة اني عايزها اعرضها على دكتوووووور

 

ههههههههه كل البنات بيتكسفوا , لكن هي في سنة كام ؟

 

 

اولى ثانوي

 

ماشاء الله ههههه شوقتيني اشوفها

 

لحظة واحدة , هديرررررررر يا هدددددددددديررررررر

 

 

 

ايوة يا ماما , السلام عليكم يا طنط

 

هههه اهلا اهلا حبيبتي , عليكم السلام يا روحي , ماشاء الله , ايه الجمال ده !!!!!! تعالي يا حبيبتي واقفة بعيد ليه !

 

ما تتكسفيش يا هدير , دي طنط زوزو يا روحي هههه مش بقولك بتتكسف يا زوزو !!!!!! قربي وسلمي على طنط يا حبيبتي

 

 

حاضر يا ماما , ازي حضرتك يا طنط

 

هههه يا روح طنط , ايه الجمال دددده , هاتي بوسة يا روحي امووووووه امووووووووه , قمر , حقيقي قمر يا هدير

 

هههههههه ميرسي خااااااالص يا طنط , ده من ذوق حضرتككككككك

 

بس معقول بنتك في اولى ثانوي !

 

ههههه ايه يا زوزو , شكلها اصغر من كدة ؟

 

لالالا بالعكس هههه فايرة ماشاء الله , اللي يشوفها يفتكرها في الجامعة

 

اعوذ بالله , دي جاية تنشنا عين دي ولا ايه !!!! ميرسي يا حبيبتي , روحي انتِ يا هدير على اووووووضتك

 

حاضر يا ماما

 

لالالالا ههههه تروح على اوضتها ايه ! انا نفسي اتكلم معاها , تعرفي يا هدير يا حبيبتي انا كان نفسي اوووووي يكون عندي بنوتة حلوة زيك , بس ربنا ما ارادش , وعندي ولدين

 

عندك ولدين يا طنطططططططططط هما في سنة كامممممممممم

 

هديررررررررر , انا كان قلبي حاسس انك مش هتستري وهتفضحينااااااا

 

اه يا ماما قرصتيني جاااامد , أأأأ اقصد يا طنط ما جبتهومش ليه عشان نجيبلهم شيكولاتة وبنبوني ونوديهم الملااااااااهي

 

ههههههه عسل يا هدير يا حبيبتي , لا يا روحي , دول كباااااااار , واحد في كلية الطب وواحد في كلية الهندسة

 

هههههههه يا حبيبتي يا طنط , انا حبيتك اوي اووووووي , اجيبلك تشربي ايه تاني غير الشااااااي

 

ههه لا يا روحي كفاية كدة

 

والله ابدااااااااا , هعمل لحضرتك سحلب عشان يدفييييييييكِ ولا اعملك هوت تشوكليت يا طنطططططط ؟

 

لا يا حبيبتي اعملي سحلب

 

 

حاضر يا طنط من عنياااااااا احلى كوباية سحلب هعملهالك بإيدياااااا , عن اذنك يا طنططططططططط

 

هههه اتفضلي يا روحي , لطيفة اوي بنتك , وحنينة اووووي , اهو عشان كدة كان نفسي يبقى عندي بنتتتتتتتتت

 

اعتبريها بنتك يا حبيبتي ههههه

 

طبعا يا ناهد يا روحي هههه

 

 

 

 

 

 

على فين يا هدييييييييييل

 

رايحة اعمل لطنط سحلب يا بابااااااا

 

طب مش تيجي تسلمي على عمك رؤوف

 

هههه السلام عليكم , ازيك يا عموووووووو

 

عليكم السلام , بسم الله ماشاء الله , ازيك انتِ يا هدير , عندك عروسة حلوة اهيه يا نبيل ههههه

 

ههههه العيال كبروا وكبرونا وفي احنا في عز شبابنا يا رؤوف , اعملي حسابي انا وعمك رؤوف في السحلب يا هديرررررررر

 

حاضر يا باباااااا , عن اذنكوووووووو ههههه

 

اتفضلي , منور يا رؤوف , بقى يبقى بينا معرفة السنين دي كلها وما تزورنيش إلا النهاردة في بيتي ! ههه داحنا معرفة من ايام الجامعة يا راجل

 

ههههه اه والله , الجامعة وايام الجامعة , كانت ايام حلوة يا نبيل , فاكر جمال فهمي زميلنا والمقالب اللي كان بيعملها فينا ؟ هههههه

 

اااه فاكر طبعا هههههه كان اظرف واحدة في الشلة بتاعتنا , انت ما تعرفش عنه حاجة ؟

 

اخر حاجة كنت اعرفها انه سافر الخليج , ما اعرفش بقى رجع مصر ولا لسة هناك

 

خسارة والله , اتقطعت اخبار ناس كتير قضينا معاهم ايام حلوة

 

 

 

 

 

 

اهو السحلب خلص وصبيته في الكوبيات , فاضل بقى اذوقه بجوز الهند والمكسرااااااااات , ادي كوباية طنط اهيه هههه هتوصى بيها في جوز الهند والمكسرات عشان تحبني ههههههههههههههههه

 

 

 

 

 

 

 

 

 

 

 

اتفضلي يا طنطططططط كوباية سحلب ما حصلتشششششش ههههه

 

ههه متشكرة يا هديل يا حبيبتي , تعبتك معايا يا روحي

 

تعبتيني معاكِ ! ارجوكِ يا طنط ما تقوليش كدة تاني عشان ما ازعلش , اصل حضرتك ما تعرفيش انا حبيتك قد ايه , هاتي بوسة يا طنط امووووووه

 

 

ههههه يا روحي , عسولة يا هديل , يا سلام ع البنات وحنيتهمممممم , يا سلام لو اروح البيت الاقي محمد ويوسف ولادي اتقلبوا بنتين ههههههه

 

يا طنط حرام عليكِ , يتقلبوا بنتين ايييييييه هو احنا ناقصيييين , اشربي السحلب يا طنطططط هههه

 

ههه ميرسي يا روح قلبي , هشرب اهو , ممممم ياسلاااااام كوباية سحلب حلوة بشككككككل

 

 

 

 

 

 

 

 

 

 

 

 

 

 

ها يا زوزو , ايه رأيك في مرات نبيل ؟

 

هههههه ست لطيفة اوووووووي وبنتها الطف منهاااااا , بنت لذيذة بشكل يا رؤووووف ! حبوبة وزي القمرررررر ههههه حبيتها خاااااالص , احنا لازم نعزمهم عندنا

 

اعزميهم يا ستي , انتِ مش خدتي رقم مرات نبيل ؟

 

ايوة طبعا اخدته هههههه دي بقت صاحبتي خااااااالص

 

هههههه يا خوفي لتتفقوا علينااااااااا

 

مممممم وهنتفق عليكو ليه ! طول ما انتو ماشيين جنب الحيط وما بتعملوش حاجة غلط يا حبيبي يبقى ما تخافوش مننااااااااااااااااااا

 

ربنا يستررررررررررر

 

 

 

 

 

 

 

 

 

 

 

 

الو ايوة يا طارق , انا واقفة مستنية مامتك في المطار اهوووو

 

امي مو وصلت للحين يا دعاء ؟

 

لا يا حبيبي , بس الطيارة وصلت , هي زمانها خارجة دلوقتي ما تقلقشششش , اهيه , اهيه خرجت يا طارق هههه سلام دلوقتي يا حبيبي واشوفك في البيت انا ومامتككككك , يا طنططططط انا اهو يا طنطططططط طنط عطيييييييية ههههه

 

دعااااااااااء , مرات ابني حبيبتي هناك اهييييه

 

 

اهلا يا طنط اهلاااااااا حمدالله ع السلاااااااااامة امووووه امووووووووه

 

 

ازيك يا دعااااااء امووووووووه اموووووووه

 

 

حبيبتي يا طنط وحشتييييني هههه

 

انتِ كمان يا حبيبتي , اومال فين طااااااارق

 

طارق مشغول والله يا طنط وبيعتذرلك جدااااااا , انا جيت اخدك بداله

 

ايوة يا بنتي بس كان جه خدنا بالعربية بدل الشحططة في المواصلاااااااااات

 

ههههه انا جيت بالعربية بتاعتي يا طنط ما تقلقيش

 

فين عربيتك دي ؟

 

العربية الفضي اللي هناك دي يا طنط , اتفضلي

 

بتعرفي تسوقي ولا هتجربي فيا يا دعاااااااء , انا بخاف من سواقة الستاااااات

 

هههه ما تخافيش يا طنط , العمر واحد والرب واحد , ومهما عشنا كلنا هنموووووووت

 

الله يبشرك بالخير يا بنتي , اتوكلنا على الله

 

 

 

 

 

 

 

 

افتحي الشباك اللي جنبك يا طنط واتفرجي ع البلد

 

الله ! حلوة اوي اوووووي , دي ابراج الكويت اهييييييه

 

ههههه انتِ عارفة ابراج الكويت يا طنط ؟؟؟؟

 

شوفتها كتير في الصور يا دعاء , اول مرة اشوفها ع الطبيعة ههههه وأول مرة في حياتي اركب طيارة يا دعااااااء

 

الله ! ازاي يا طنط ! مش طارق طلعك العمرة مرتين وحجيتي مرة كمان ؟

 

ايوة يا حبيبتي , بس كنت بسافر بالباخررررة

 

هههه اومال علا عاملة ايه , قربت تولد ولا لسسسسسسة ؟

 

وانتِ ما تعرفيش انها ولدت الشهر اللي فات ؟؟؟؟؟

 

ولدت ! طارق ماقليش يا طنط , حمدالله على سلامتها , الف مبروك

 

الله يبارك فيكِ يا حبيبتي

 

ربنا رزقها بإيه ؟

 

طارق هههههه

 

طارق تااااااااااني !!!!!!!!!!!! ههههه ربنا معاه بقى ويتولاه برحمتتتتتته

 

 

 

 

 

 

 

 

 

اتفضلي يا طنط وصلنااااااااا

 

بسم الله ماشاء الله , انتو ساكنين هنا ؟

 

ايوة يا طنط في الفيلا دي

 

وعايشين فيها لوحديكو ولا مسكنين حد معاكووووو ؟

 

هههه لا يا طنط ساكنين لوحدينا , انا وطارق وصلاح ورغد والشغالة

 

ماشاء الله ههههه حلوة اوي من برا

 

ومن جوا هتعجبك اوي يا طنططططط اتفضلي

 

متشكرة يا حبيبتي , بسم الله ماشاء الله , له حق الواد طارق يلبد هنا ويكره سيرة نزوله مصر

 

 

اتفضلي يا طنط , يا جيسيكااااااااااا جيسيكاااااااااااا

 

وي مدااااااااام

 

تعالي خدي شنطة طنط وطلعيها فوووووووق , اتفضلي يا طنط

 

الله !!!!!! دي الفيلا واسعة اوي يا دعاء , ماشاء الله , دي كام مطرح دي ؟

 

ههههه ما تعديش يا طنط , انا اخترتلك اوضة حلوة اوي هتعجبك , هتطلعي دلوقتي ؟

 

لالالا خليني قاعدة هنا ع الصالون الحلو ده

 

هههه ماشي يا طنط , عن اذنك هطلع اصحي الولاد و اخليهم يفوقوا وينزلوا يسلموا عليكِ

 

اتفضلي يا حبيبتي , مؤدبة وطيبة , سبحان الله , انا مش عارفة دي بنت احسان ازاااااي !!!!!

 

 

 

 

يلا يا صلاااااااح خد رغد وانزلوا سلموا على تيتة

 

نسلم على مينو ؟؟؟؟؟؟؟

 

على تيييييتة , انا مش قولتلك اني رايحة اجيبها من المطااااااار ؟

 

أي يومّا تذكرت الحين

شارك هذه المشاركه


رابط المشاركه
شارك

هيا يا رغد مشان نسلم على تيتة

 

وينها تيتة يا صلاح ؟؟؟؟؟؟

 

هذه الجاعدة في الصالون , تييييييييييتة

 

ايش لونج تيتة

 

ايه العيال الخليجين دول ! تلاقيهم قرايب دعاء اللي في الكويت

 

ليش ما تردين , انتِ تيتة ولا مو تيتة ؟؟؟؟؟؟؟؟؟؟

 

انت مين يا ابني ؟؟؟؟؟؟

 

انا صلاح

 

ابوك اسمه ايه ؟

 

ابوي اسمه طارجججججججج

 

يا حبيبي يا صلااااااااااااح , تعالى في حضن تيتة ههههههه

 

انتِ تيتة ؟؟؟؟؟

 

انا تيتة يا حبيبي امووووووه امووووووووه , مين الأمورة دي

 

هذي رغد إختي , سلمي على تيتة يا رغد , لا تخافين , تعالى هنيي , هذي تيتتتتتتتة

 

ايش لونج تيتتتتتتة انا رغد

 

حبيبتي يا رغددددد ههههه اموووووووه امووووووووه , بسم الله ماشاء الله , ايه الجمال والطعامة دي , لكن انت واختك بتتكلموا كدة ليه يا صلاح

 

كيف تبينا نتكلم تيتة ؟ هنيي الناس يتكلمون مثلناااااا

 

الناس بيتكلموا مثلكو ! قصدك انتو اللي بتتكلموا مثلهممممم

 

شيسمج تيتة ؟

 

ايييييييه ؟ مش فاهمة

 

اسمج اسمججججج , اني اسمي صلاح , انتِ شيسمج

 

ااه بتسألني عن اسمي ههههه مش عارف اسم جدتك ام ابوك يا ولد ! اسمي عطية

 

هههه عطية ! هذا اسم رجااااااال

 

لا يا حبيبي يمشي حريمي ورجالي , لو مش عاجبك اغيره يا صلاح هههه

 

ههه لالالا زين تيتة زين , مو تغيرينه , احبج وايد تيييييييتة

 

ربنا يخليك يا حبيبي , ايه العباية الحلوة دي يا رغد ؟ هههه

 

اُبوي جابها

 

ومين اللي عامللك التسريحة الحلوة دي

 

امي تسوينها , انا بروح لامي , تبي شي مني تيتة ؟

 

تبي شي مني يا تيتة جَبِل ما اطلع ؟

 

لا يا حبايبي , العيال ولا كأنهم مصريين , لا شكلهم ولا كلامهم في ريحة الأصل المصري , هي دعاء بتعمل ايه فوق !

ايه ده ! مين الراجل ابو جلابية بيضة وغطرة اللي زي العجل ده !!!!! وازاي يدخل في غياب طااااااارق , هي دعاء اتجننت ولا اييييييه , مدية مفتاح البيت لراجل غريب يدخل عليها في غياب جوزهاااااا !!!!!! يكونش خالها الكويتي ؟؟؟؟؟؟؟ لالالالالا ده شكله صغير , والسكسوكة اللي في دقنه سووووودة , يعني لسة شباب , يطلع مين دددده

 

يومّااااااااا ايش لونج يومّااااااااااااااا حمدالله على سلامتج يومّااااااااااااا هههههههههههه

 

.............................................

 

, ايش يومّاااااا ليش تطلعين في وجهي إكدي !!!!!! ليش مو تاخدني في حضنج ؟؟؟؟؟؟؟؟؟؟؟؟؟

 

اخرس يا قليل الأددددددددددب , حَضَنَك حنش واتلفّح بيككككككككك , ال حضن ال !!!!! عيب ده انا قد امك يا عديم التربييييييييية

 

ايش فيج يومّااااااا !!!!!! دعاااااااااااااااء

 

انت كمان بتقولّها يا دعاء من غير القااااااااب !!!!!! والله عاااااااااال , دلوقتي يجي طارق يعلقك من حواجبكككك

 

دعاااااااااااااااء وينجججججججججججج

 

 

انا نازلة اهو يا حبيبييييييييي هههههههههه

 

يا دي المصيبة ! دي بتقوله يا حبيبي !!!!!!! لالالالا البت دي شكلها مش هتعمّر مع طااااااارق , دي حالها مال واتقلب ووجب طلاقهااااااااا

 

 

هههههههه حمدالله ع السلامة يا طارق

 

الله يسلمج دعاء

 

طااااااااااااارق !!!!!! انت طارق ابني ؟

 

مينو كنتِ تظنين يومّااااااا !!!!!!!

 

والله يا ابني ما عرفتك هههههه ايه العز ده ! ده انت مسافر من عندنا جلد على عضم , ايه اللي نفخك النفخة ددددددددي ؟ ههههههههه

 

هههههههه المرجوجة يومّااااااا , حمدالله بسلامتج يومّااااااا اشتجتلج واااااااااايد واااااااااايد اموووووه اموووووه

 

هو ماله يا دعاء بيتكلم كدة ليه

 

بيكلمك خليجي يا طنططططططط حتى اللهجة المصري ما بقاش يتكلمهاااااااا

 

جولتلك جَبِل اكدي ما تجيبي سيرة مصر , انتِ تعرفين ويش تسوي فيني هذي السيرررررررة

 

سكت يا طارق سكت يا حبيبي

 

انا طالع اغير ملابسي , تبي شي يومّا ؟؟؟؟؟؟؟

 

هو بيقول ايه يا بنتي ؟

 

بيقولك طالع يغير هدومه , عايزة حاجة ؟

 

عايزاك بخير يا حبيبي , ايه يا دعاء , ايه اللي جرا لطارق ؟

 

بيعيش حالة انفصال عن الواقع يا طنط , مش عايز حتى يفتكر انه مصري

 

معقول الكلام ده ! طب وده ينفع !!!!! هو حد ينسى بلده مهما عملت فييييييييه , هي صحيح مصر عملت فيه اللي ما يتعملش , بس برضو المسامح كريمممممممم

 

قوليله يا طنطططططط , دانا هتجنن عشان انزل مصر اشوف اهلي مش رااااضي اهئ اهئئئئئئئ ولاد اختي اللي كبروا وما شوفتهومش اهئ اهئ ماما وبابا حبايبي اللي هتجنن عليهم اهئ اهئئئئئئئ ارجوكِ يا طنط كلمييييييه

 

يا حبيبتي يا بنتي ! معلش يا دعاء , انا هحاول معاه وربنا يسهل , اديكِ شايفة هو كمان ما بينزلش مصر يزورني , ولما وحشته اوي بعت جابني عشان ما ينزلش هو

 

طب وده ينفع برضو يا طنط , مصر وحشتني يا طنط اهئ اهئئئئئئئ وحشتني اوي اهئ اهئئئئئئ

 

ما يوحشكيش غالي يا حبيبتي , مسيرك تنزلي , اهي مصر قاعدة , هتروح فين يعني ! صحيح عمالين يبيعوا فيها بس اكيد هيخلولنا حتة , مش معقول يعني يبيعوها كلها ويشردوا الشعب , ولا مش معقول ليه !!!!! كل شيء ممكن

 

 

 

 

 

 

 

 

 

 

ويش رأيج في الغدا يومّاااااا

 

حلو يا طارق

 

كلي داياي يومّا

 

نعم يا حبيبي

 

كلي ديااااااااي , ما تتكسفين يومّاااااا

 

يا ابني انا مش مكسوفة , انا مش فاهمة

 

بيقولك كلي فراخ يا طنط , الفراخ اسمها دياي هنيي , قصدي هنا

 

الفراخ اسمها دياي! , عاشت الاسامي

 

كلي يا طنط , قطعتلك الفراخ ع الرز

 

تسلم ايدك يا دعاء

 

وانا يومّااااا ابي جطعة ديااااااااي

 

خد يا صلاح , كل يا حبيبي , كلي يا رغد وما تلعبيش بالمعلققققققة

 

اني ما ابي الدياااااااي , ابي جيسكا تسوي مجبوس باللحم

 

طيب طيب يا رغد , المجبوس بكرة , اكلي مشخوووووول

 

ايه يا بنتي اسامي الاكلات الغريبة دي ! ايه المجبوس والمشخول والشخلول , ايه الأكلات دي ؟

 

هههه اكلات كويتية يا طنط بس لذيذة اوي , دوقي المشخول كدة

 

ايه المشخول ده

 

رز يا طنط وله طريقة معينة بيعملوه بيها , كلي يا طنط بالهنا والشفا

 

الله يخليكِ يا بنتي

 

منورانا يومّااااااا , اليوم عيد بجدومج هههههه

 

عيد ! عساكم من عواده يا حبيبي

 

 

 

 

 

 

 

 

 

 

 

 

 

 

 

 

يا ماما انا عايز اعرف يعني العفش اللي عند النجار ده هيخلص امتى ؟ اهل رانيا قلقانييييييين

 

يا سلام ! ما يقلقواااااا ايه المشكلة يعني !

 

المشكلة يا ماما اننا مش عارفين نحدد معاد الفرررررح , دي تالت مرة نأجل ونقولهم الشهر الجاااااي , انا متفق معاهم على سنة خطوبة بسسسسسسس

 

ييييي يا باسمممممم , بتحصل كتير اوي يعني ان الناس يتفقوا على معاد للفرح ويأجلوا اكتر من مرة عشان لسة ما جهزوشششش , احنا مش اول ناس يعني نعمل كدة يا باسممممم

 

يا ماما بس بصراحة انا بقيت في موقف وحش اوي , باباها سألني المرة اللي فاتت العفش هيخلص امتى وقالي انت متفق معانا على سنة والمفروض تكون قد اتفاقك , وكمان اخوها اداني كلمتين عشان الخطوبة طولت

 

وانت بتخاف منهم بقى ولا ايه ! خلي عندك شخصيييييية , قولهم العفش لسة ما خلصش , اعملكو ايه يعنييييييي , مش يدوك الكلام في جنابك وانت تقعد قدامهم مبلول زي العيل الصغيررر !!!!!

 

ماما انا مش داخل حررررب انا عايز اتجوز رانيااااااااا

 

والله انا ما فاهمة مدلوق عليها اوي كدة ليه ! دي بخيلة بخل ما وصفش على حدددددددد

 

رانيا بخيلة !!!!!!

 

ايوة بخيلة , بخيلة وجلدة كماااااااااان , عدا علينا عيدين أم , كان هان على الهانم بتاعتك تجيبلي هدية وتقولي اتفضلي يا طنط الهدية دي بمناسبة عيد الأم ؟؟؟؟؟؟؟؟

 

يا ماما انت عارفة ان اهلها ملتزمين وما بيحتفلوش بعيد الأم

 

اوووووف عيلة خنققققققققة , لا عيد ام ولا عيد ميلاد ولا عيد راس السنة حتىىىىىىى , اومال بيحتفلوا بإيييييييييه !!!!!

 

عيد الأضحى وعيد الفطر يا ماما , هي دي اعياد المسلمين

 

يعني هي الأعياد التانية مش بتاعة مسلمين !!!!!

 

هههه بصراحة لا , بس ما تخافيش بكرة لما تعيش معانا هتتطبع بطبعنا وتحتفل بعيد الأم وتجيبلك هدية وفي عيد ميلادك هتجيبلك هدية وتقولك هابي بيرث داي تو يو , وفي عيد راس السنة هتقولك هابي نيو يير وتجيبلك شجرة الكريسماس كمااااااان

 

ايوة كدة يا باسم , دي عايزة تتمدن يا حبيبي بدل الأفكار المتخلفة اللي اتربت عليها ددددددي

 

طب انا دلوقتي ما ليش دعوها بتمدنها وتخلفها , انا عايز اتجوزهااااااااا

 

طيب يا سيدي هتتجوزهاااااااا , على العموم باباك النهاردة هيروح للنجار عشان يدفعله اخر دفعة في الفلوس ويسلمنا العفششششش

 

بجد يا ماماااااااا ههههه يعني هنحدد معاد الفرح مع اهل رانيااااااا ؟

 

ايوة يا سيدي , انا هروح معاك يوم الجمعة الجاية ولا شوف اخوها بيكون موجود انهي جمعة في الشهر عشان نقولهم كتب الكتاب والدخلة أول الشهر , خلينا نجوزك ونخلص من زنك يا سي باسممممممممم

 

ههههههه تعيش ماما تعيششششششششش اموووووووه

شارك هذه المشاركه


رابط المشاركه
شارك

ازيكو يا حلوين منوريييييييين

 

محبة صحبة الاخيار

 

الكلام مش ليكي لوحدك , الكلام ليكِ ولزمايلك بتوع المتابعة الصامتة هههههههههههههه الله يهديكو عليا

 

وبعدين انتي بتقولي هتخلي الحلقات صامتة ازاي , ماا هي صامتة اصلا ومش سامعين صوت ؟ اقولك لااااااااا حضرتك بخيال القارئ سامعة اصواتهم وراصدة حركاتهم وسكنتاتهم ومتخيلة اشكالهم وهيئاتهم , عايشة في عالمهم وبينهم ,

 

اكتر حاجة ضحكتني عن التخيل كلام هدوء الفجر , بتقولي بتخيل عادل بشكلين , لما بيبقى مع سعاد اتخيله بشعر ابيض ولما يكون مع اشجان بتخيله شاب صغير هههههههه

 

المهم ان كل واحد فيكو له خيال ومتخيل الشخصيات بعيون خياله يا عسل

 

وبالنسبة للزاي بقى اخلي الحلقة صامتة , فدي بسيطة جداااااااا , انتي ما بتاخديش بالك من ردود الابطال الصامتة .................................... ههههههههه

 

اقولك هعمل ايه , خدي الحوار التالي بين احمد وهيام

 

 

احمد ..........................................................................

 

 

هيام ...................................................................................... ؟؟؟؟؟؟؟؟؟؟؟؟؟؟؟؟؟؟؟؟

 

 

احمد هيرد عليها

 

............................................................................

 

 

وهكذا لحد ما تخلص الحلقة ههههههههههههههه شوفتي بقى يا محبة يا اختي ؟ ههههههههههه

 

ما اقدرش اعمل كدة طبعا يا عسل , بس كمان نحبوا نشوفوا ردودك وتفاعلاتك انتِ والاخوات , وزي ما قالت حبيبتي سارة محمد مش شرط تكتبوا توقعات , لكن ممكن تحليل للأحداث وانطباعكو عنها , وفعلا الردود بتفيد ناس كتير لانها بتكون خلاصة تجاربكو

 

اعان الله الجميع ان شاء الله

 

منورين كلكو يا بنات

 

 

ومطلوبين هنا كلكووووووووو

 

أمر ا لا فضلا توجهوا جميعا الى هذا الرابط ههههههههه

 

لالالالالا خليها فضلا لا أمرا عشان ما تضربونيش ههههههه

 

https://akhawat.islamway.net/forum/index.php?showtopic=334133

 

دعوة للجميع , وأريد ان تتحدثوا بكل صراحة , فأنا سأستفيد حتى من النقد

 

موعدي معكن في المساء , ليس هناااااااااا

 

في الرابط اعلاه ههههههههه

 

دمتن بود يا حبيباتي

  • معجبة 1

شارك هذه المشاركه


رابط المشاركه
شارك

السلام عليكم ورحمة الله وبركاته

وحشتينى خالص يا هوووبة معلش على التقصير غصب عنى ...

الأحداث كتيييرة وجميلة تسلم إيديكى

مش عارفة آخرت ضحى إيه حطت نفسها فى ورطة.

وعادل ده هو السبب فى دمار بيته وتربية أدهم وأوسا بالطريقة دى علشان مش عايز يشد وده خطأ كان يخليه وسط ...لأ وكمان ينكد على أحمد كل شوية بسبب الخلفة هو ده أب!!

عجبتنى زيارة زوزو وشكلها مش هتعدى وخلاص مش كده يا هبة هههه...

بس ما عجبنيش إن هدير تسلم على رؤوف لأنه ما ينفعش هى كبيرة وهو رجل غريب....

خالد برغم إللى حصل راح سلم على حامد وده يدل على أخلاقه وحبه ليه..

شارك هذه المشاركه


رابط المشاركه
شارك

الله المستعان

 

أكيد فيه فرج قريب بإذن الله : )

هدير تعاملها مع الضيفة مش حلو اوي.

فيه لهفة كده وممكن تترجم غلط مع حد بيسيئ الظن

البنت زينتها الحياء والكسوف خصوصا مع الغرباء لئلا يقال جريئة

 

وكمان كلمة" حرام عليك" اتقالت كتير المرادي وده مش صح !

لا يصح التهاون في هذه الكلمة يا حبيبات عمال على بطلل

حتى الشيوخ كثير منهم يقول. " لا يجوز. "

بدل من حرام لانها ليس بالهين أن تطلع من أفواههم

لئلا يكون كذب على الله والعياذ بالله

فمابالنا نحن ، تهاون كثيراً في هذه الكلمة حتى على امور عادية !

الله المستعان

 

.

حماة رانيا كلامها سيئ جداً

هي لو مش ملتزمة كيف مش هيلاحظوا هذا من قبل الزواج !

او هيلاحظوا ويطنشوا وبالأخص رانيا

الله المستعان

شارك هذه المشاركه


رابط المشاركه
شارك

السلام عليكم ورحمة الله وبركاته

ماشاءالله .حلقات جميلة .

سبحان الله الالتزام الديني تخلف واتباع الغرب اصبح تمدنا .

حتى السلام على الرجال .يعني الاب يطلب من ابنته السلام على صديقه .أين الغيرة.

اللهم ارحمنا برحمتك

شارك هذه المشاركه


رابط المشاركه
شارك

السلام عليكم ورحمة الله وبركاته

 

أضحك الله سنكِ ياهبة ،

أعجبنى الحوار الصامت : )

ياريت تعمليه لما تكون الحلقات حزينة حتى لا نفهم شيء ولا نحزن على أبطالنا : )

 

حلقات جميلة بارك الله فيكِ ،

 

طارق ... هل ممكن أن يكره إنسان وطنه بهذا الشكل؟

أعرف أناساً يعيشون بالخارج لسنين طويلة ولا يفكرون

بالعودة للعيش فى وطنهم ، ولكنهم يأتون كل فترة لزيارة أهليهم .

 

أكيد سيحدث مشاكل فى حفل زواج رانيا (هذا إن تم )

وذلك لاختلاف درجة الإلتزام بين أهلها وأهل خطيبها.

شارك هذه المشاركه


رابط المشاركه
شارك

هدير دى فظيعه مبحبش كده بصراحه

 

حلقة طارق مكنتش عجبانى ^^ هى دعاء وعطية بس اللى عجبونى

مش للدرجادى يعنى طارق يبقى مش طايق مصر ولا سيرتها ناس حصلها زيه ومش بيبقوا كده

 

باسم زى الطفل الصغير وامه هتفضل تتحكم فيه وفى مراته

البنت لازم تاخد برأي ابوها واخواتها اللى اكبر منها ويعرفوا عنها وفى نفس الوقت تبقى مواقفه على العريس

 

لالالا بلاش حلقات صامته يا هبه مجرد التمثيل تعبنى بصراحه طب على الصوت حتى عشان نسمع ههههه

شارك هذه المشاركه


رابط المشاركه
شارك

السلام عليكم هبه

تسلم ايدك علي حلقات النهارده رغم ان الحلقات النهارده عندها انيميا وحاده كمان

بس كنت عاوزه اطمن علي ضحي بقي لان موضوعها طول

مش عارفه حاسه انها اعجبت بشخصيه ادهم علشان جديده عليها

يلا بقي طمنينا و طولي الحلقات شويه صغيرين كمان

شارك هذه المشاركه


رابط المشاركه
شارك

انا تعبانة وبقرأ على مهلي بس اللي ضحى عملته عايزة تضرب عليه

وصعبانة عليا أوي

 

أما أوسا وأدهم عاوزين حد يدلق عليهم جركن بنزين :ph34r:

شارك هذه المشاركه


رابط المشاركه
شارك

إنشاء حساب جديد أو تسجيل دخول لتتمكني من إضافة تعليق جديد

يجب ان تكون عضوا لدينا لتتمكن من التعليق

إنشاء حساب جديد

سجلي حسابك الجديد لدينا في الموقع بمنتهي السهوله .

سجلي حساب جديد

تسجيل دخول

هل تمتلكين حسابًا بالفعل ؟ سجلي دخولك من هنا.

سجلي دخولك الان

  • من يتصفحن الموضوع الآن   0 عضوات متواجدات الآن

    لا توجد عضوات مسجلات يتصفحن هذه الصفحة

منتدى❤ أخوات طريق الإسلام❤

‏ أخبروهم بالسلاح الخفي القوي الذي لا يُهزم صاحبه ولا يضام خاطره، عدته ومكانه القلب، وجنوده اليقين وحسن الظن بالله، وشهوده وعده حق وقوله حق وهذا أكبر النصر، من صاحب الدعاء ولزم باب العظيم رب العالمين، جبر خاطره في الحين، وأراه الله التمكين، ربنا اغفر لنا وللمؤمنين والمؤمنات وارحم المستضعفات في فلسطين وفي كل مكان ..

×