- جـــه ... ماجاش ... أديــنا قاعديــــــن !!

[دعاء الكروان3294 196]

 

 

- جـــه ... ماجاش ... أديــنا قاعديــــــن !!

 

 

= هو مين ده اللي ...

جـــه ... ماجاش ... أديــنا قاعديــــــن !!

؟؟؟

 

- وهل يخفى القمر ؟

 

أكيد العريـــــــس هو القمر

 

قمر الليالي اللي بيسهرني بالليل

أحلم به

وبشكله

وبكلامـــــــــه

و بـــ.......

 

= خلااااص استووووب

 

- قمر الليالي اللي يصلي معايا قيام الليل ويعينني على الطاعة

 

= ما قلنا ستوووووب

 

 

 

 

فطرة وطبيعي جدا البنت في سن الزواج تفكر في الزواج ..

و إلا ما تبقاش طبيعية !!

 

XX بس اللي مش طبيعي >> التفكير الزيادة XX

 

 

اللي بيخلي البنت ماتتصورش السعادة إلا في الزواج

ما تتخيلش طعم الحياة ولا لذة الطاعة إلا لو كانت مع زوجها "المستقبلي"

 

وده طبعا أكبر سكينة بتحز بها قلبها بالبطئ !

 

وماتقولش لنفسها الموضوع ده تسالي .. دي مجرد أحلام يقظة مسيري أصحى منها

 

لكن الفكرة أنك بتضعفي طاقة قلبك لأنك بتحمليه فوق طاقته

 

 

 

 

روشتة العلاج في كلمتين:

 

 

الانشغال + الالتزام

 

 

هم اللي بيضبطوا موضوع التفكير الزيادة

 

الانشغال >>> معلوم أن وقت الفراغ اللي هتفكري فيه في موضوع الزواج .

.هيتملي بالتفكير في الحاجات اللي مشغولة بها

 

 

الالتزام >>> هيخلي جواكي سكينة وطمأنينة أن الرزق هيجي في وقته بإذن الله ..

 

 

ولو ماجاش بقى ؟؟؟؟

 

 

افتكري الجملة اللي كنا واحنا صغيرين نقولها:

 

وعايزاكي تقوليها بأكبر ابتسامة

جـــه ... ماجاش ... أديــنا قاعديــــــن !!

 

 

بس قاعدين بنعبد ربنا .. مشغولين بطاعته

 

والله فعلا بعد الزواج الواحد بيتحسر على حاجات كتير كان نفسه يخلصها قبل الزواج

 

اشغلي نفسك بدراسة علم شرعي .. حفظ القرآن .. الاشتراك في جمعيات خيرية أو نشاطات تبع المسجد

 

بجد هتحسي أن حياتك لها معنى و هدف وهيقل التفكير كتير

 

 

وتيقني..

اللي بيشتغل لربنا .. ربنا بيفتح عليه أبواب فضله

واللي بيطمع في ربنا .. ربنا بيرزقه من غير حساب

 

بس طبعا تكون النية الشغل لربنا مش لحاجة تانية

 

 

حاجة كمان نسيت أقولها .. الواحد مش ضامن عمره

.. فلما يموت وهو في الطريق خير من أنه يموت وهو لسه واقف في مكانه

 

 

 

لأني بشوف ناس كتير بتعلق سبب فتورها عن الطاعة وكده

بأنها منتظرة الزوج اللي يعينها عالطاعة و و و و

 

 

فبجد اللي بتفكر كده فعلا بتضيع عمرها لأنها ما اتخلقتش للزواج فقط .. ده جزء من رسالتها

 

 

 

وربنا اللي بايده مقاليد السماوات والأرض واللي قال سبحانه عن نفسه:

"ألا يعلم من خلق وهو اللطيف الخبير"

 

يعلم أن فلانة حالها هينصلح لو تزوجت

 

ويعلم أن علانة حالها هينتكس لو تزوجت

 

فالواحد فعلا يتوكل على ربنا ويسيب الأمر له وحده

 

هل أنتي تعرفي أنتي هينصلح حالك ولا هينتكس بالزواج ؟

 

هل تضمني أن زواجك يستمر أو يحصل تفاهم و ود بينك وبين زوجك أو العكس يحصل نفور ؟

 

 

 

 

 

ونصيحة لما تقعدي مع صحباتك اللي لسه غير متزوجات ماتتكلموش كتير أو خالص في موضوع الزواج

 

عارفة أنها نصيحة غريبة بس فعلا هتريح كتير

 

لأن الكلام ده لما بترجعي البيت وبتبقى لوحدك بتقعدي تفكري فيه تاني و أكتر

 

لأني كتير بشوف بنات مشغولة بموضوع الزواج جدا وكلهم أحسبهم على خير ملتزمات

مش بتوع مصاحبة ولاد والكلام ده .. وعلى خلق وخير ربنا يبارك فيهم

 

 

لكن بلاقيها مثلا بتكتب رسايل لزوجها المستقبلي مع أنها لسه مش مخطوبة ولا متزوجة

 

بس شغل القلب والتفكير بالموضوع ده هيتعبها أوووي

 

لأنها على كل الأحوال هتبقى تعبانة

 

* لو لا قدر الله ما تزوجتش هتبقى حياتها كئيبة جدا

لأنها بانية سعادتها على شئ واحد >>> وهو الزواج

فلو الشئ ده ما اتحققش هتبقى حياتها ضلمة ومالهاش طعم

 

وده طبعا أكبر غلط

 

 

 

* ولو حتى اتخطبت .. معذرة في اللفظ "هتدلق زي الجردل"

 

لأن قلبها هيبقى متعطش أوي لأي مشاعر .. وهيأثر جدا على اختياراتها للعريس

 

 

.. هتتخيل كل كلمة كانت بتكتبهاله فيه حتى لو مش مقاسه ولا راكبة فيه

 

 

 

واللي بقوله من واقع تجارب شفتها ..

 

زي ما بيقولوا عندها فراغ عاطفي فهتشبعه في أي واحد يقع في وشها

 

حتى لو الظروف الظاهرة قدامها أنه مش مناسب لها هتوافق عليه

 

وهتفضل ولو حتى كان بيبص للأبجورة اللي جنبها هتقول ده عينه مازلتش من علي وهتبرر عيوبه و هتعيش نفسها في أوهام لحد ما تتقرص وتفوق

 

* ولو دخلت وخرجت في كذا تجربة خطوبة فاشلة .. قلبها مش هيتحمل الضغط وقلبها هيتهري بالتجارب دي

لأن استهلاك المشاعر بيستهلك قلبها معاه

 

وأنتي كده كده مش هتتزوجي إلا شخص واحد

 

 

ليه تقعد تهري وتهلك فيه بالشكل ده ؟

 

 

 

لكن لو الموضوع عندها من الاول في المستوى العادي المنضبط

zero state

أن كل شئ بقدر الله والمشاعر كلهاااااااااا كلهاااااااا وبأكد كلهااااا بتيجي بعد الزواج

والتفكير الكتير مش هيقدم ولا هيؤخر حاجة

 

 

مش هقول مش هتتأثر .. أكيد هتتأثر لكن هيبقى عندها صبر ويقين

 

 

 

اقفلي على قلبك لحد ما ربنا يأذن لك بصاحب النصيب

 

و صدقيني نصيبك و رزقك هو اللي بيجري وراكي.. مش أنتي اللي تجري وراه

 

اصبري واحتسبي صبرك ده عند ربنا

 

واستغلي فترة الصبر ده في اصلاح نفسك عشان تكوني زوجة صالحة بإذن الله

:)

 

 

 

 

منقول :)

 

[هاجر 19 46]

تسلمي حبيبتي على هذا النقل الرائع والله كلام يدخل القلب

ونصيحة لما تقعدي مع صحباتك اللي لسه غير متزوجات ماتتكلموش كتير أو خالص في موضوع الزواج

 

فعلا الشخص عندما يتكلم بموضوع محدد يفضل يفكر فيه طويلا

واسأل الله ان يرزق جميع المسلمين والمسلمات الازواج الصالحين والصالحات

[و ما توفيقي الا بالله 1]

السلام عليكم و رحمة الله و بركاته

موضوع جميل جدا و يتحدث عن واقع البنات اللي أنا كنت منهم

لكن لما تيقنت أنه لن يأتيني من رزقي الا ما قدر لي ارتحت

و نصيحة لكل بنت أن لا تبني سعادتها على الزواج فقط و حتى اذا جاءها خاطب

فلتفكر جيدا قبل ما تقدم على هذه الخطوة حتى لا تندم بعد ذلك

اسفة على الاطالة الموضوع أعجبني جدا

بارك الله فيك

[بنت الاسلام السلفيه 110]

جزاكِ الله خيرا كلام تمام

اللهم رزقك بنات المسلمين بازواج صالحين

واصلح ازواجنا واصلحنا لهم

[** الفقيرة الى الله ** 985]

وعليكم السلام ورحمة الله وبركاته

 

موضوع مميز وهام لكل فتاة تنتظر فارس الأحلام..

وتركن للتفكير وتضييع وقتها فيما لا ينفع

الأفضل هو عدم التفكير وشغل الوقت بطاعة الله والعمل لدين الله

وكل فتاة قد كتب الله أنها ستتزوج أم لا في اللوح المحفوظ قبل أن يخلق الله السماوات والأرض

فقدر الله نافذ وسيأتي لا محالة فلمَ نتعب أنفسنا بالتفكير..

نسأل الله أن يملأ قلوبنا رضا وإيمانا بالقضاء والقدر.. فالرضا هو حياة القلب ~

 

جزاكِ الله خيرا دعاء الحبيبة

لا حرمكِ الله الأجر،،

[راجية المنان 205]

وعليكم السلام ورحمة الله وبركاته

 

موضوع جميييل ونصائح طيبة

جزاكِ الله خير الجزاء ياحبيبة

 

و صدقيني نصيبك و رزقك هو اللي بيجري وراكي.. مش أنتي اللي تجري وراه

 

صدقتِ ..

 

على الفتاة ان تستغل وقتها بما يرضى الله وتسعى لتحقيق اهدافها قبل ارتباطها بمسؤوليات الزواج..

 

نسئل الله ان يقدر لنا مافيه خير لنا في ديننا ودنيانا ..

[دعاء الكروان3294 196]

تسعدني ردودكن أخواتي

[سُندس واستبرق 4685]

بارك الله فيك ِ

أسأل الله أن يرزق بنات المسلمين الأزواج الصالحين .

[سدرة المُنتهى 87 1317]

بارك الله فيك ِ

أسأل الله أن يرزق بنات المسلمين الأزواج الصالحين .

[اسماء عبدالمجيد 0]

جزاكم الله كل خير على هذا الطرح الاكثر من رائع

جعله الله في ميزان حسناتك يوم ان تلقاه

[مُقصرة دومًا 1261]

السلام عليكِ

 

موضوع جميل بارك الله فيكِ يا غالية

عن تجربة والله لم أكن أشغل نفسي بهذا الأمر كثيرًاحتى رزقني الله بزوج صالح أسأل الله أن يبارك فيه

سلمي الأمر لله وفوضي الأمر إليه واعلمي أن كل شيء بقدر وبميعاد ونصيبك لن يأخذه منكِ أحد

فقط توكلي على الله واحسني الظن به سُبحانه

قال صَلَّى اللَّهُ عَلَيْهِ وَسَلَّمَ يُحَدِّثُ عَنْ رَبِّهِ عَزَّ وَجَلَّ " أَنَا عِنْدَ ظَنِّ عَبْدِي بِي فَلْيَظُنَّ بِي مَا شَاءَ "

فلتظني خيرًا حتي يأتيكِ الخير

أسأل الله أن يرزق بنات المسلمين أزواج صالحين.